੧੩. ਕੁਲਦੂਸਕਸਿਕ੍ਖਾਪਦਵਣ੍ਣਨਾ

੪੩੧. ਨ ਕੇਵਲਂ ਵਿਹਾਰੋ ਏਵ ਕੀਟਾਗਿਰਿ, ਸੋਪਿ ਗਾਮੋ ‘‘ਕੀਟਾਗਿਰਿ’’ਚ੍ਚੇਵ ਵੁਚ੍ਚਤਿ. ਗਾਮਞ੍ਹਿ ਸਨ੍ਧਾਯ ਪਰਤੋ ‘‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’’ਨ੍ਤਿ ਵੁਤ੍ਤਂ. ਏਕਸਂਵਚ੍ਛਰੇ ਦ੍ਵਿਕ੍ਖਤ੍ਤੁਂ ਵਸ੍ਸਤਿ ਕਿਰ, ਤਂ ਸਨ੍ਧਾਯ ‘‘ਦ੍ਵੀਹਿ ਮੇਘੇਹੀ’’ਤਿ ਵੁਤ੍ਤਂ. ਸਮਧਿਕਨ੍ਤਿ ਛ ਜਨੇ ਸਨ੍ਧਾਯ. ਅਕਤਵਤ੍ਥੁਨ੍ਤਿ ਨਵਂ ਅਟ੍ਠੁਪ੍ਪਤ੍ਤਿਂ. ‘‘ਜਾਭਿਸੁਮਨਾਦਿਗਚ੍ਛਂ ਅਲ੍ਲਾਨਂ ਹਰਿਤਾਨਂ ਏਵਾ’’ਤਿ ਲਿਖਿਤਂ. ਭੂਤਗਾਮਬੀਜਗਾਮਭੇਦਤੋ ਪਨੇਸ ਭੇਦੋ. ਵਤਤ੍ਥਾਯਾਤਿ ਵਤਿਅਤ੍ਥਾਯ. ਯਂਕਿਞ੍ਚੀਤਿ ਸੋਦਕਂ ਵਾ ਨਿਰੁਦਕਂ ਵਾ. ਆਰਾਮਾਦਿਅਤ੍ਥਾਯਾਤਿ ਵਨਰਾਜਿਕਾਦਿਅਤ੍ਥਾਯ. ਮਾਲਾਵਚ੍ਛਰੋਪਨਂ ਕੁਲਦੂਸਕਂਯੇਵ ਸਨ੍ਧਾਯ, ਗਨ੍ਥਨਾਦਿਸਬ੍ਬਂ ਨ ਸਨ੍ਧਾਯ ਵੁਤ੍ਤਨ੍ਤਿ. ਕਥਂ ਪਞ੍ਞਾਯਤੀਤਿ ਚੇ? ਤਂ ਦਸ੍ਸੇਤੁਂ ‘‘ਬੁਦ੍ਧੇਨ ਧਮ੍ਮੋ’’ਤਿਆਦਿ. ‘‘ਆਵੇਲ਼ਂ ਆਬਿਲ਼’’ਨ੍ਤਿਪਿ ਪਾਠੋ.

ਗੋਪ੍ਫਨਨ੍ਤਿ ਗਨ੍ਥਨਂ. ਵੇਠਿਮਨ੍ਤਿ ਤਗ੍ਗਤਿਕਮੇਵ. ਵੇਧਿਮਂ ਅਞ੍ਞੇਨ ਕੇਨਚਿ ਪੁਪ੍ਫਂ ਵੇਧੇਤ੍ਵਾ ਕਤਂ. ਕਣ੍ਟਕਮ੍ਪਿ ਬਨ੍ਧਿਤੁਨ੍ਤਿ ਏਤ੍ਥ ‘‘ਸਯਂ ਵਿਜ੍ਝਨਤ੍ਥਂ ਨ ਵਟ੍ਟਤਿ. ਅਞ੍ਞਸ੍ਸਤ੍ਥਾਯ ਵਟ੍ਟਤੀ’’ਤਿ ਵਦਨ੍ਤਿ. ਜਾਲਮਯਂ ਵਿਤਾਨਂ ਜਾਲਵਿਤਾਨਂ. ਪੁਪ੍ਫਪਟਿਚ੍ਛਕਂ ਗਵਕ੍ਖਂ ਵਿਯ ਸਛਿਦ੍ਦਂ ਕਰੋਨ੍ਤਿ. ਤਾਲਪਣ੍ਣਗੁਲ਼ਕਨ੍ਤਿ ਤਾਲਪਣ੍ਣਮਯਂ ਪੁਨ ਕਤਮ੍ਪਿ ਪਟਿਛਿਜ੍ਜਕਮੇਵ. ਧਮ੍ਮਰਜ੍ਜੁ ਚੇਤਿਯਂ ਵਾ ਬੋਧਿਂ ਵਾ ਪੁਪ੍ਫਪ੍ਪਵੇਸਨਤ੍ਥਂ ਆਵਿਜ੍ਝਿਤ੍ਵਾ ਬਦ੍ਧਰਜ੍ਜੁ. ‘‘ਕਾਸਾਵੇਨ ਬਦ੍ਧਮ੍ਪਿ ਸੁਤ੍ਤਵਾਕਾਦੀਹਿ ਬਦ੍ਧਂ ਭਣ੍ਡਿਤਸਦਿਸ’’ਨ੍ਤਿ ਲਿਖਿਤਂ. ਅਂਸਭਣ੍ਡਿਕਂ ਪਸਿਬ੍ਬਕੇ ਪਕ੍ਖਿਤ੍ਤਸਦਿਸਤ੍ਤਾ ਵੇਧਿਮਂ ਨ ਜਾਤਂ, ਤਸ੍ਮਾ ‘‘ਸਿਥਿਲਬਦ੍ਧਸ੍ਸ ਅਨ੍ਤਰਨ੍ਤਰਾ ਪਕ੍ਖਿਪਿਤੁਂ ਨ ਵਟ੍ਟਤੀ’’ਤਿ ਵਦਨ੍ਤਿ. ‘‘ਅਞ੍ਞਮਞ੍ਞਂ ਅਫੁਸਾਪੇਤ੍ਵਾ ਅਨੇਕਕ੍ਖਤ੍ਤੁਮ੍ਪਿ ਪਰਿਕ੍ਖਿਪਿਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਪੂਰਿਤਨ੍ਤਿ ਦੀਘਤੋ ਪਸਾਰੇਤ੍ਵਾ ਪੂਰਿਤਂ. ਘਟਿਕਦਾਮਓਲਮ੍ਬਕੋਤਿ ‘‘ਯਮਕਦਾਮਓਲਮ੍ਬਕੋ’’ਤਿ ਲਿਖਿਤਂ. ‘‘ਗੇਣ੍ਡੁਖਰਪਤ੍ਤਦਾਮਾਨਂ ਪਟਿਕ੍ਖਿਤ੍ਤਤ੍ਤਾ ਚੇਲਾਦੀਹਿ ਕਤਦਾਮਮ੍ਪਿ ਨ ਵਟ੍ਟਤਿ ਅਕਪ੍ਪਿਯਾਨੁਲੋਮਤ੍ਤਾ’’ਤਿ ਵਦਨ੍ਤਿ.

‘‘ਰੇਚਕਂ ਨਾਮ ਤਥਾਲਾਸਿਯਨਾਟਨਟਾਨਂ ਨਚ੍ਚ’’ਨ੍ਤਿ ਲਿਖਿਤਂ. ਤਂ ‘‘ਪਰਿਵਤ੍ਤਨ੍ਤੀ’’ਤਿ ਵੁਤ੍ਤਂ. ‘‘ਸਾਰਿਯੋ ਨਾਮ ਰੁਤਸੁਨਖਾ ਸਿਙ੍ਗਾਲਕਮ੍ਮਕੁਰੁਙ੍ਗਕੇਲ਼ਿਪਨੇ ਠਿਤਾ’’ਤਿ ਕਿਰ ਪਾਠੋ. ‘‘ਨਿਬੁਜ੍ਝਨ੍ਤੀ’’ਤਿ ਪਾਲ਼ਿ.

੪੩੨. ਅਬਲਬਲਾਦਿ-ਪਦਾਨਂ ਉਪ੍ਪਟਿਪਾਟਿਯਾ. ਯਥਾ ਪਾਮੋਕ੍ਖਾਨਂ ਵਸੇਨ ਸਬ੍ਬੇਪਿ ‘‘ਅਸ੍ਸਜਿਪੁਨਬ੍ਬਸੁਕਾ’’ਤਿ ਵੁਤ੍ਤਾ, ਤਥਾ ਪਾਮੋਕ੍ਖਪ੍ਪਤ੍ਤਸਾਵਕਸ੍ਸ ਵਸੇਨ ਤਦਾਯਤ੍ਤਵੁਤ੍ਤਿਨੇ ਸਬ੍ਬੇਪਿ ‘‘ਸਾਰਿਪੁਤ੍ਤਾ’’ਤਿ. ਤੇਨ ਵੁਤ੍ਤਂ ‘‘ਗਚ੍ਛਥ ਤੁਮ੍ਹੇ ਸਾਰਿਪੁਤ੍ਤਾ’’ਤਿ.

੪੩੩. ‘‘ਗਾਮੇ ਵਾ ਨ ਵਸਿਤਬ੍ਬ’’ਨ੍ਤਿ ਇਮਿਨਾਵ ਤਸ੍ਮਿਂ ਗਾਮੇ ਅਞ੍ਞਤ੍ਥ ਨ ਵਸਿਤਬ੍ਬਨ੍ਤਿ ਸਿਦ੍ਧਂ. ‘‘ਤਸ੍ਮਿਂ ਵਿਹਾਰੇ ਵਾ’’ਤਿ ਕਸ੍ਮਾ ਵੁਤ੍ਤਨ੍ਤਿ ਚੇ? ਅਤ੍ਥਸਬ੍ਭਾਵਤੋ. ਯਸ੍ਮਿਞ੍ਹਿ ਗਾਮੇ ਕੁਲਦੂਸਕਕਮ੍ਮਂ ਕਤਂ, ਤਸ੍ਮਿਂ ਗਾਮੇ, ਯਸ੍ਮਿਂ ਵਿਹਾਰੇ ਵਸਨ੍ਤੇਨ ਕੁਲਦੂਸਨਂ ਕਤਂ, ਤਂ ਵਿਹਾਰਂ ਠਪੇਤ੍ਵਾ ਅਞ੍ਞਸ੍ਮਿਂ ਵਸਿਤੁਂ ਨ ਵਟ੍ਟਤੀਤਿ ਦਸ੍ਸਨਤ੍ਥਂ. ਤਂ ਕਥਨ੍ਤਿ ਚੇ? ‘‘ਗਾਮੇ ਵਾ ਨ ਵਸਿਤਬ੍ਬ’’ਨ੍ਤਿ ਵਚਨੇਨ ਯਸ੍ਮਿਂ ਗਾਮੇ ਕੁਲਦੂਸਨਕਮ੍ਮਂ ਕਤਂ, ਤਸ੍ਮਿਂ ਵਿਹਾਰੇਪਿ ਵਸਿਤੁਂ ਨ ਲਬ੍ਭਤੀਤਿ ਆਪਨ੍ਨਂ, ਤਂ ਦਿਸ੍ਵਾ ‘‘ਤਸ੍ਮਿਂ ਵਿਹਾਰੇ’’ਤਿ ਵੁਤ੍ਤਂ, ਤੇਨ ਤਸ੍ਮਿਂ ਗਾਮੇ ਅਞ੍ਞਸ੍ਮਿਂ ਵਸਿਤੁਂ ਲਬ੍ਭਤੀਤਿ ਸਿਦ੍ਧਂ. ‘‘ਤਸ੍ਮਿਂ ਵਿਹਾਰੇ ਵਸਨ੍ਤੇਨਾ’’ਤਿ ਇਮਿਨਾ ਤਸ੍ਮਿਂ ਗਾਮੇ ਅਞ੍ਞਤ੍ਥ ਵਸਨ੍ਤੇਨ ਸਾਮਨ੍ਤਗਾਮੇ ਪਿਣ੍ਡਾਯ ਚਰਿਤੁਂ ਵਟ੍ਟਤੀਤਿ ਦੀਪਿਤਂ ਹੋਤਿ. ਸਾਮਨ੍ਤਵਿਹਾਰੇਪੀਤਿ ਸਾਮਨ੍ਤਵਿਹਾਰੋ ਨਾਮ ਤਸ੍ਮਿਂਯੇਵ ਗਾਮੇ ਤਸ੍ਸ ਵਿਹਾਰਸ੍ਸ ਸਾਮਨ੍ਤਵਿਹਾਰੋ ਚ ਤਸ੍ਸ ਗਾਮਸ੍ਸ ਸਾਮਨ੍ਤਵਿਹਾਰੋ ਚਾਤਿ ਉਭਯਂ ਵੁਚ੍ਚਤਿ, ਏਤੇਨ ਤਸ੍ਮਿਂ ਗਾਮੇ ਅਞ੍ਞਤ੍ਥ ਵਸਨ੍ਤੇਨ ਤਸ੍ਮਿਂ ਗਾਮੇ ਪਿਣ੍ਡਾਯ ਨ ਚਰਿਤਬ੍ਬਂ. ਸਾਮਨ੍ਤਗਾਮੇਪਿ ਪਿਣ੍ਡਾਯ ਚਰਿਤੁਂ ਵਟ੍ਟਤਿ, ਪੁਨ ਯਸ੍ਮਿਂ ਗਾਮੇ ਕੁਲਦੂਸਨਕਮ੍ਮਂ ਕਤਂ, ਤਸ੍ਸ ਸਾਮਨ੍ਤਗਾਮੇ ਕੁਲਦੂਸਕਵਿਹਾਰਸ੍ਸ ਸਾਮਨ੍ਤਵਤ੍ਥੁਵਿਹਾਰੇ ਵਸਨ੍ਤੇਨ ਤਸ੍ਮਿਂ ਗਾਮੇਪਿ ਚਰਿਤੁਂ ਵਟ੍ਟਤਿ. ਯਸ੍ਮਿਂ ਸਾਮਨ੍ਤਗਾਮੇ ਕੁਲਦੂਸਕਂ ਨ ਕਤਂ, ਤਸ੍ਮਿਮ੍ਪਿ ਚਰਿਤੁਂ ਵਟ੍ਟਤਿ, ਨੇਵ ਵਿਹਾਰੇਤਿ ਅਧਿਪ੍ਪਾਯੋ. ‘‘ਨ ਨਗਰੇ ਚਰਿਤੁ’’ਨ੍ਤਿ ਵੁਤ੍ਤਤ੍ਤਾ ਅਞ੍ਞਸ੍ਮਿਂ ਵਿਹਾਰੇ ਤਸ੍ਮਿਂ ਗਾਮੇ ਵਸਿਤੁਂ ਵਟ੍ਟਤੀਤਿ ਦੀਪਿਤਂ ਹੋਤੀਤਿ ਏਕੇ. ਗਣ੍ਠਿਪਦੇਸੁ ਪਨ ਵਿਚਾਰਣਾ ਏਵ ਨਤ੍ਥਿ, ਤਸ੍ਮਾ ਸੁਟ੍ਠੁ ਵਿਚਾਰੇਤ੍ਵਾ ਕਥੇਤਬ੍ਬਂ.

੪੩੬-੭. ਦਾਪੇਤੁਂ ਨ ਲਭਨ੍ਤਿ, ਪੁਪ੍ਫਦਾਨਞ੍ਹਿ ਸਿਯਾ. ਤਸ੍ਸੇਵ ਨ ਕਪ੍ਪਤੀਤਿ ਏਤ੍ਥ ਯਾਗੁਆਦੀਨਿ ਆਨੇਤ੍ਵਾ ‘‘ਦਦਨ੍ਤੂ’’ਤਿ ਇਚ੍ਛਾਵਸੇਨ ਵਦਤਿ ਚੇ, ਸਬ੍ਬੇਸਂ ਨ ਕਪ੍ਪਤਿ, ਕੇਵਲਂ ਪਨ ਸੁਦ੍ਧਚਿਤ੍ਤੇਨ ਅਤ੍ਤਾਨਂ ਵਾ ਪਰੇਸਂ ਵਾ ਅਨੁਦ੍ਦਿਸਿਤ੍ਵਾ ‘‘ਇਮੇ ਮਨੁਸ੍ਸਾ ਦਾਨਂ ਦਤ੍ਵਾ ਪੁਞ੍ਞਂ ਪਸਵਨ੍ਤੂ’’ਤਿ ਵਦਨ੍ਤਸ੍ਸ ਤਸ੍ਸੇਵ ਨ ਕਪ੍ਪਤਿ ਯਾਗੁਆਦੀਨਂ ਪਚ੍ਚਯਪਟਿਸਂਯੁਤ੍ਤਕਥਾਯ ਉਪ੍ਪਨ੍ਨਤ੍ਤਾ. ਮਹਾਅਟ੍ਠਕਥਾਯਮ੍ਪਿ ‘‘ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨ’’ਨ੍ਤਿ ਵਿਸੇਸੇਤ੍ਵਾ ਅਵੁਤ੍ਤਤ੍ਤਾ ਅਤ੍ਥਤੋ ਸਯਮੇਵਾਤਿ ਅਪਰੇ. ਆਚਰਿਯਾ ਪਨ ‘‘ਯਥਾ ਮਹਾਪਚ੍ਚਰਿਯਂ, ਕੁਰੁਨ੍ਦਿਯਞ੍ਚ ‘ਤਸ੍ਸੇਵਾ’ਤਿ ਵਿਸੇਸੇਤ੍ਵਾ ਵੁਤ੍ਤਂ, ਏਵਂ ਮਹਾਅਟ੍ਠਕਥਾਯਂ ਵਿਸੇਸੇਤ੍ਵਾ ਨ ਵੁਤ੍ਤਂ, ਤਸ੍ਮਾ ਸਬ੍ਬੇਸਂ ਨ ਕਪ੍ਪਤੀ’’ਤਿ ਵਦਨ੍ਤਿ.

ਕੁਲਦੂਸਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਤੇਰਸਕਕਣ੍ਡਵਣ੍ਣਨਾ ਨਿਟ੍ਠਿਤਾ.