੧੦. ਪਠਮਸਙ੍ਘਭੇਦਸਿਕ੍ਖਾਪਦਵਣ੍ਣਨਾ

੪੦੯. ‘‘ਵਜ੍ਜਂ ਨ ਫੁਸੇਯ੍ਯਾ’’ਤਿ ਚ ਪਾਠੋ.

੪੧੦. ਤੇਸਂ ਅਨੁਰੂਪਾਜਾਨਨਤੋ ਅਸਬ੍ਬਞ੍ਞੂ ਅਸ੍ਸ. ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ (ਮਹਾਵ. ੨੦੪) ਵੁਤ੍ਤਤ੍ਤਾ ਪਟਿਕ੍ਖਿਤ੍ਤਮੇਵ. ਤਿਕੋਟਿਪਰਿਸੁਦ੍ਧਨ੍ਤਿ ਪਰਸ੍ਸ ਪਾਪਪਸਙ੍ਗਨਿਵਾਰਣਤ੍ਥਂ ਵੁਤ੍ਤਂ, ਨ ਪਟਿਚ੍ਚਕਮ੍ਮਨਿਵਾਰਣਤ੍ਥਂ ਕੋਟੀਹੀਤਿ ਆਕਾਰੇਹਿ. ਪਰਿਸੁਦ੍ਧਨ੍ਤਿ ਵਿਮੁਤ੍ਤਂ. ਦਸਹਿ ਲੇਸੇਹਿ ਉਦ੍ਦਿਸ੍ਸ ਕਤਂ ਸਮਣਾ ਪਰਿਭੁਞ੍ਜਨ੍ਤਿ, ਅਸ੍ਸਮਣਾ ਇਮੇਤਿ ਸਾਸਨਸ੍ਸ ਗਰਹਭਾਵੋ ਆਗਚ੍ਛੇਯ੍ਯ, ਗਰਹਪਚ੍ਚਯਾ ਲੋਕੋ ਵਾ ਅਪੁਞ੍ਞਂ ਅਰਿਯੂਪਵਾਦਂ ਪਸਵੇਯ੍ਯ, ਤੇਹਿ ਵਿਮੁਤ੍ਤਨ੍ਤਿ ਅਤ੍ਥੋ. ਵਾਗੁਰਨ੍ਤਿ ਮਿਗਜਾਲਂ. ਅਤ੍ਤਨੋ ਅਤ੍ਥਾਯ ਵਾਤਿਆਦਿਨਾ ਪਰੇਸਂ ਅਤ੍ਥਾਯ ਕਤੇ ਕਪ੍ਪਿਯਭਾਵਂ ਦਸ੍ਸੇਤ੍ਵਾ ਭਿਕ੍ਖੂਨਞ੍ਚ ਅਞ੍ਞੇਸਞ੍ਚ ਅਤ੍ਥਾਯ ਕਤੇ ਤਂ ਦਸ੍ਸੇਤੁਂ ‘‘ਮਤਾਨਂ ਪੇਤਕਿਚ੍ਚਤ੍ਥਾਯਾ’’ਤਿਆਦਿਮਾਹ.

ਯਂ ਯਂ ਹੀਤਿਆਦਿ ਤਸ੍ਸ ਕਾਰਣਸ੍ਸ ਦਸ੍ਸਨਤ੍ਥਂ ਵੁਤ੍ਤਂ. ਪੁਨ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਤ੍ਥਾਯ ਕਤਂ ਨ ਕਪ੍ਪਤੀਤਿ ਵੁਤ੍ਤਨ੍ਤਿ ਕਿਰ ਧਮ੍ਮਸਿਰਿਤ੍ਥੇਰੋ. ਗਣ੍ਠਿਪਦੇ ‘‘ਭਿਕ੍ਖੂਨਮੇਵ ਸੁਦ੍ਧਾਨਂ ਅਤ੍ਥਾਯ ਕਤਂ ਨ ਵਟ੍ਟਤੀ’’ਤਿ ਲਿਖਿਤਂ. ਅਪਰੇਹਿ ਪਨ ‘‘ਮਤਾਨਂ ਪੇਤਕਿਚ੍ਚਤ੍ਥਾਯਾਤਿਆਦਿਨਾ ਵੁਤ੍ਤੇਪਿ ਕਪ੍ਪਤਿ, ਭਿਕ੍ਖੂਨਂਯੇਵ ਅਤ੍ਥਾਯਾਤਿ ਇਮਿਨਾ ‘ਭਿਕ੍ਖੂਨਮ੍ਪਿ ਦਤ੍ਵਾ ਮਯਂ ਭੁਞ੍ਜਿਸ੍ਸਾਮਾ’ਤਿ ਕਤਮ੍ਪਿ ਵੁਤ੍ਤਂ. ਪੁਨ ‘ਪਞ੍ਚਸੁ ਏਕਂ ਉਦ੍ਦਿਸ੍ਸਕਤਂ ਇਤਰੇਸਂ ਨ ਕਪ੍ਪਤੀ’ਤਿ ਦਸ੍ਸਨਤ੍ਥਂ ‘ਪਞ੍ਚਸੁ ਹਿ ਸਹਧਮ੍ਮਿਕੇਸੂਤਿਆਦਿ ਵੁਤ੍ਤ’ਨ੍ਤਿ ਵਦਨ੍ਤੀ’’ਤਿ ਵੁਤ੍ਤਂ. ਅਞ੍ਞਤਰਸ੍ਮਿਂ ਪਨ ਗਣ੍ਠਿਪਦੇ ‘‘ਅਮ੍ਹਾਕਨ੍ਤਿ ਚ ਰਾਜਯੁਤ੍ਤਾਦੀਨਨ੍ਤਿ ਚ ਵੁਤ੍ਤੇ ਵਟ੍ਟਤੀਤਿ ਵਤ੍ਵਾ ‘ਤੁਮ੍ਹਾਕ’ਨ੍ਤਿ ਅਵਤ੍ਵਾ ‘ਪੇਤਕਿਚ੍ਚਤ੍ਥਾਯਾਤਿ ਵੁਤ੍ਤੇਪਿ ਵਟ੍ਟਤੀ’ਤਿ ਚ ਦਸ੍ਸੇਤ੍ਵਾ ਸਬ੍ਬਤ੍ਥ ਵੁਤ੍ਤਾਨਂ, ਆਦਿਸਦ੍ਦੇਨ ਸਙ੍ਗਹਿਤਾਨਞ੍ਚ ਲਕ੍ਖਣਂ ਠਪੇਨ੍ਤੇਨ ‘ਭਿਕ੍ਖੂਨਂਯੇਵਾ’ਤਿਆਦਿ ਵੁਤ੍ਤਂ. ਤਤ੍ਥ ‘ਭਿਕ੍ਖੂਨਂ ਉਦ੍ਦਿਟ੍ਠੇ ਏਵਾਤਿ ਅਧਿਪ੍ਪਾਯੇਨਾ’ਤਿ ਵੁਤ੍ਤਂ. ਨ ‘ਤੁਮ੍ਹਾਕਂ, ਅਮ੍ਹਾਕਞ੍ਚਾਤਿ ਵੁਤ੍ਤੇ ਅਨਾਪਤ੍ਤੀ’ਤਿ ਦਸ੍ਸਨਤ੍ਥਂ. ਕਸ੍ਮਾ? ਮਿਸ੍ਸਕਵਾਰਸ੍ਸ ਅਭਾਵਾ. ਲਕ੍ਖਣਂ ਨਾਮ ਵੁਤ੍ਤਾਨਂ, ਵੁਤ੍ਤਸਦਿਸਾਨਞ੍ਚ ਹੋਤਿ. ‘ਸਚੇ ਪੇਤਕਿਚ੍ਚਤ੍ਥਾਯਾਤਿ ਵੁਤ੍ਤਟ੍ਠਾਨੇ ਭਿਕ੍ਖੂਨਂ ਭੋਜਨਂ ਸਨ੍ਧਾਯ ਕਰੋਨ੍ਤੀ’ਤਿ ਵਦਨ੍ਤਿ ਮਹਾਅਟ੍ਠਕਥਾਯਞ੍ਚ ‘ਤਸ੍ਮਿਂ ਵਾਰੇ ਚ ਨ ਤੁਮ੍ਹਾਕਨ੍ਤਿ ਵੁਤ੍ਤੇ ਵਟ੍ਟਤੀ’ਤਿ ਵੁਤ੍ਤਤ੍ਤਾ. ਤੇਨੇਵ ਇਧਾਪਿ ‘ਪੇਤਕਿਚ੍ਚਤ੍ਥਾਯ, ਮਙ੍ਗਲਾਦੀਨਂ ਵਾ ਅਤ੍ਥਾਯ ਕਤੇਪਿ ਏਸੇਵ ਨਯੋ’ਤਿ ਪੁਬ੍ਬੇ ਵੁਤ੍ਤਤ੍ਥਵਸੇਨ ਵੁਤ੍ਤਂ. ‘ਅਵਧਾਰਣਤ੍ਥੇਨ ਮਿਸ੍ਸਕੇ ਵਟ੍ਟਤੀ’ਤਿ ਚੇ? ‘ਕਪ੍ਪਿਯਮਂਸਸ੍ਸ ਹਿ ਪਟਿਗ੍ਗਹਣੇ ਆਪਤ੍ਤਿ ਨਤ੍ਥੀ’ਤਿ ਵਚਨੇਨ ਅਕਪ੍ਪਿਯਪਟਿਗ੍ਗਹਣੇ ਆਪਤ੍ਤੀਤਿ ਆਪਨ੍ਨਂ, ‘ਤਞ੍ਚ ਗਹੇਤਬ੍ਬਂ ਸਿਯਾ’ਤਿ ਪਟਿਕ੍ਖਿਪਿਤਬ੍ਬਾ’’ਤਿ ਵੁਤ੍ਤਂ, ਤਂ ਸੁਨ੍ਦਰਂ ਵਿਯ ਦਿਸ੍ਸਤਿ, ਵਿਚਾਰੇਤ੍ਵਾ ਗਹੇਤਬ੍ਬਂ. ਯਤ੍ਥ ਚਾਤਿ ਭਿਕ੍ਖੂਨਂ ਅਤ੍ਥਾਯ ਕਤੇਪਿ. ਤਮਤ੍ਥਂ ਆਵਿ ਕਾਤੁਂ ‘‘ਸਚੇ ਪਨਾ’’ਤਿਆਦਿ ਵੁਤ੍ਤਂ. ਏਤ੍ਥ ਪਨ ‘‘ਭਿਕ੍ਖੁਨੀਨਂ ਦੁਕ੍ਕਟਂ, ਇਤਰੇਸਂ ਦਣ੍ਡਕਮ੍ਮਵਤ੍ਥੂ’’ਤਿ ਵਦਨ੍ਤਿ. ਕਪ੍ਪਂ ਨਿਰਯਮ੍ਹੀਤਿ ਅਸਙ੍ਖ੍ਯੇਯ੍ਯਕਪ੍ਪਂ. ਵਿਵਟ੍ਟਟ੍ਠਾਯਿਕਾਲੇਯੇਵ ਸਙ੍ਘਭੇਦੋ ਹੋਤੀਤਿ. ਕਪ੍ਪਨ੍ਤਿ ਆਯੁਕਪ੍ਪਂ.

੪੧੧. ਕੁਸਲਨ੍ਤਿ ਖੇਮਂ. ਆਪਤ੍ਤਿਭਯਾ ਕਤਾ ਲਜ੍ਜੀਹੀਤਿ ਏਤ੍ਥ ਆਪਤ੍ਤਿਭਯੇਨ ਅਵਸ੍ਸਂ ਆਰੋਚੇਨ੍ਤੀਤਿ ਦਸ੍ਸਨਤ੍ਥਂ ‘‘ਲਜ੍ਜੀ ਰਕ੍ਖਿਸ੍ਸਤੀ’’ਤਿ (ਵਿਸੁਦ੍ਧਿ. ੧.੪੨; ਪਾਰਾ. ਅਟ੍ਠ. ੧.੪੫) ਪੋਰਾਣਵਚਨਸ੍ਸਾਨੁਰੂਪਤੋ ‘‘ਅਞ੍ਞੇਹਿ ਲਜ੍ਜੀਹੀ’’ਤਿ ਵੁਤ੍ਤਂ. ਅਲਜ੍ਜਿਸ੍ਸਪਿ ਅਨਾਰੋਚੇਨ੍ਤਸ੍ਸ ਆਪਤ੍ਤਿਯੇਵ ‘‘ਯੇ ਪਸ੍ਸਨ੍ਤਿ ਯੇ ਸੁਣਨ੍ਤੀ’’ਤਿ ਵਚਨਤੋ.

੪੧੬. ਅਸਮਨੁਭਾਸਨ੍ਤਸ੍ਸਾਤਿ ਕਮ੍ਮਕਾਰਕੇ ਕਤ੍ਤੁਨਿਦ੍ਦੇਸੋ, ਸਮਨੁਭਾਸਨਕਮ੍ਮਂ ਅਕਰਿਯਮਾਨਸ੍ਸਾਤਿ ਅਤ੍ਥੋ. ਓਦਿਸ੍ਸ ਅਨੁਞ੍ਞਾਤੋ ਨਾਮ ਉਮ੍ਮਤ੍ਤਕਖਿਤ੍ਤਚਿਤ੍ਤਵੇਦਨਟ੍ਟਾਦਿਕੋ ‘‘ਅਨਾਪਤ੍ਤਿ ਆਦਿਕਮ੍ਮਿਕਸ੍ਸਾ’’ਤਿ ਅਰਿਟ੍ਠਸਿਕ੍ਖਾਪਦੇ ਆਗਤਤ੍ਤਾ ਅਤ੍ਥੀਤਿ ਚੇ? ਯਮ੍ਪੀਤਿਆਦਿ. ਸਾ ਪਨੇਸਾ ਅਨਾਪਤ੍ਤਿ. ਸੋ ਵੁਚ੍ਚਤੀਤਿ ਤਤ੍ਥ ਆਗਤੋਪਿ ਸਕਮ੍ਮਬ੍ਯਾਵਟੋਪਿ ਏਵਂ ਵੁਚ੍ਚਤਿ. ਏਤੇਨੁਪਾਯੇਨਾਤਿ ਅਸਮਨੁਭਾਸਨ੍ਤਸ੍ਸ ਚ ਆਦਿਕਮ੍ਮਿਕਸ੍ਸ ਚ ਵੁਤ੍ਤਤ੍ਥਵਸੇਨ. ਠਪੇਤ੍ਵਾ ਅਰਿਟ੍ਠਸਿਕ੍ਖਾਪਦਨ੍ਤਿ ਤਤ੍ਥ ਆਦਿਕਮ੍ਮਿਕਪਦਾਭਾਵਾ.

ਤਿਵਙ੍ਗਿਕਨ੍ਤਿ ਏਤ੍ਥ ਵਾਚਾਯ ਏਵ ਪਟਿਨਿਸ੍ਸਜ੍ਜਨ੍ਤਸ੍ਸ ਓਟ੍ਠਚਲਨਾਦਿਕਾਯਵਿਞ੍ਞਤ੍ਤਿ ਹੋਤਿ, ਤਸ੍ਮਾ ਦੁਵਿਧਮ੍ਪਿ ਵਿਞ੍ਞਤ੍ਤਿਂ ਕਥੇਨ੍ਤਸ੍ਸ ਹੋਤਿ. ਵਚੀਭੇਦਂ ਕਾਤੁਂ ਅਸਕ੍ਕੋਨ੍ਤਸ੍ਸ ਕਾਯਵਿਕਾਰਂ ਕਰੋਨ੍ਤਸ੍ਸ ਅਨਾਪਤ੍ਤਿਯਾ ਭਵਿਤਬ੍ਬਂ. ਕਸ੍ਮਾ? ਤਿਵਙ੍ਗੇਸੁ ਏਕਸ੍ਸ ਪਰਿਹੀਨਤ੍ਤਾ, ਤਸ੍ਮਾ ਤਿਵਙ੍ਗਭਾਵੋ ਆਪਤ੍ਤਿਯਾ, ਅਙ੍ਗਹਾਨਿਭਾਵੋ ਅਨਾਪਤ੍ਤਿਯਾਤਿ ਗਹੇਤਬ੍ਬਂ. ਏਤ੍ਥ ਸਿਯਾ – ਯਦਿ ਅਙ੍ਗਹਾਨਿਭਾਵੇਨ ਅਨਾਪਤ੍ਤਿ, ਏਵਂ ਸਨ੍ਤੇਪਿ ਵਿਕਾਰਂ ਅਕਤ੍ਵਾ ਚਿਤ੍ਤੇਨੇਵ ਵਿਸ੍ਸਜ੍ਜੇਨ੍ਤਸ੍ਸ ਅਨਾਪਤ੍ਤਿਯਾ ਭਵਿਤਬ੍ਬਨ੍ਤਿ? ਤਂ ਨ, ਕਸ੍ਮਾ? ਅਟ੍ਠਕਥਾਯਂ ‘‘ਕਾਯਵਿਕਾਰਂ ਵਾ ਵਚੀਭੇਦਂ ਵਾ ਅਕਰੋਨ੍ਤਸ੍ਸੇਵ ਪਨ ਆਪਜ੍ਜਨਤੋ ਅਕਿਰਿਯ’’ਨ੍ਤਿ ਹਿ ਵੁਤ੍ਤਂ, ‘‘ਚਿਤ੍ਤਂ ਵਾ ਅਨੁਪ੍ਪਾਦੇਨ੍ਤਸ੍ਸ ਵਾ’’ਤਿ ਨ ਵੁਤ੍ਤਂ, ਤਸ੍ਮਾ ਚਿਤ੍ਤਞ੍ਚ ਨਾਮ ਵਿਞ੍ਞਤ੍ਤਿਪਟਿਬਦ੍ਧਂ ਏਵਾਤਿ ਵਿਸੁਂ ਅਙ੍ਗਭਾਵੇਨੇਵ ਵੁਤ੍ਤਤ੍ਤਾ ਜਾਨਿਤਬ੍ਬਨ੍ਤਿ ਚੇ? ਤਂ ਨ, ਦ੍ਵਿਨ੍ਨਂਯੇਵ ਅਕਿਰਿਯਾਤਿ, ਤਸ੍ਮਾ ਚਿਤ੍ਤੇਨ ਵਿਸ੍ਸਜ੍ਜੇਨ੍ਤਸ੍ਸਾਪਿ ਆਪਤ੍ਤਿ ਵਿਯ ਦਿਸ੍ਸਤਿ, ਉਪਪਰਿਕ੍ਖਿਤ੍ਵਾ ਗਹੇਤਬ੍ਬਂ. ਤਤ੍ਥ ‘‘ਅਕੁਸਲਚਿਤ੍ਤ’’ਨ੍ਤਿ ਵੁਤ੍ਤਨ੍ਤਿ ਚੇ? ‘‘ਚਿਤ੍ਤਬਾਹੁਲ੍ਲਤੋ ਵੁਤ੍ਤ’’ਨ੍ਤਿ ਵਦਨ੍ਤਿ. ਤੇਪਿ ਕਿਰ ਬਾਹੁਲ੍ਲਤੋ ਵਦਨ੍ਤਿ.

ਪਠਮਸਙ੍ਘਭੇਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.