੫. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ

੨੯੭. ਅਹਮ੍ਹਿ ਦੁਗ੍ਗਤਾਤਿ ਅਹਂ ਅਮ੍ਹਿ ਦੁਗ੍ਗਤਾ. ਅਹਂ ਖ੍ਵਯ੍ਯੋਤਿ ਏਤ੍ਥ ਅਯ੍ਯੋਤਿ ਬਹੁਵਚਨਂ ਹੋਤਿ.

੨੯੮. ਓਯਾਚਨ੍ਤੀਤਿ ਨੀਚਂ ਕਤ੍ਵਾ ਦੇਵੇ ਯਾਚਨ੍ਤਿ. ਆਯਾਚਨ੍ਤੀਤਿ ਉਚ੍ਚਂ ਕਤ੍ਵਾ ਆਦਰੇਨ ਯਾਚਨ੍ਤਿ. ਅਲਙ੍ਕਾਰਾਦੀਹਿ ਮਣ੍ਡਿਤੋ ਕੇਸਸਂਵਿਧਾਨਾਦੀਹਿ ਪਸਾਧਿਤੋ. ‘‘ਮਣ੍ਡਿਤਕਰਣੇ ਦੁਕ੍ਕਟ’’ਨ੍ਤਿ ਵਦਨ੍ਤਿ.

ਪਦਭਾਜਨੀਯਵਣ੍ਣਨਾ

੩੦੩. ਸਹ ਪਰਿਦਣ੍ਡੇਨ ਵਤ੍ਤਮਾਨਾਤਿ ਅਤ੍ਥੋ. ਛਨ੍ਦਵਾਸਿਨੀ ਨਾਮ ‘‘ਪਿਯਾ ਪਿਯਂ ਵਸੇਤੀ’’ਤਿ ਪਾਲ਼ਿ, ਪੁਰਿਸਂ ਵਾਸੇਤੀਤਿ ਅਧਿਪ੍ਪਾਯੋ. ‘‘ਪਿਯੋ ਪਿਯਂ ਵਾਸੇਤੀ’’ਤਿ ਅਟ੍ਠਕਥਾ.

ਤਂ ਕਿਰਿਯਂ ਸਮ੍ਪਾਦੇਸ੍ਸਤੀਤਿ ਅਵਸ੍ਸਂ ਆਰੋਚੇਨ੍ਤਿਯਾ ਚੇ ਆਰੋਚੇਤੀਤਿ ਅਤ੍ਥੋ. ਦ੍ਵਿਨ੍ਨਂ ਮਾਤਾਪਿਤੂਨਂ ਚੇ ਆਰੋਚੇਤਿ, ਸਙ੍ਘਾਦਿਸੇਸੋਤਿ ਵਿਨਯਵਿਨਿਚ੍ਛਯੇ ‘‘ਵਤ੍ਥੁ ਓਲੋਕੇਤਬ੍ਬ’’ਨ੍ਤਿ ਵੁਤ੍ਤਂ. ਵਤ੍ਥੁਮ੍ਹਿ ਚ ‘‘ਉਦਾਯਿਤ੍ਥੇਰੋ ਗਣਿਕਾਯ ਆਰੋਚੇਸੀ’’ਤਿ ਵੁਤ੍ਤਂ. ਤਂ ‘‘ਮਾਤਾਦੀਨਮ੍ਪਿ ਵਦਤੋ ਵਿਸਙ੍ਕੇਤੋ ਨਤ੍ਥੀ’’ਤਿ ਅਟ੍ਠਕਥਾਵਚਨਤੋ ਨਿਪ੍ਪਯੋਜਨਂ. ਤਂ ਪਨੇਤਨ੍ਤਿ ਆਚਰਿਯਸ੍ਸ ਵਚਨਂ. ਮਾਤੁਰਕ੍ਖਿਤਂ ਬ੍ਰੂਹੀਤਿ ਪੇਸਿਤਸ੍ਸ ਗਨ੍ਤ੍ਵਾ ਮਾਤਾਪਿਤੁਰਕ੍ਖਿਤਂ ਵਦਤੋ ਤਸ੍ਸ ਤਸ੍ਸਾ ਮਾਤੁਰਕ੍ਖਿਤਭਾਵੇਪਿ ਸਤਿ ਵਿਸਙ੍ਕੇਤਮੇਵ, ਕਸ੍ਮਾ? ‘‘ਪਿਤੁਰਕ੍ਖਿਤਾਦੀਸੁ ਅਞ੍ਞਤਰਂ ਵਦਨ੍ਤਸ੍ਸ ਵਿਸਙ੍ਕੇਤ’’ਨ੍ਤਿ ਵੁਤ੍ਤਤ੍ਤਾ ਇਤਰਥਾ ਆਦਿ-ਸਦ੍ਦੋ ਨਿਰਤ੍ਥਕੋ ਸਿਯਾ. ਏਕਂ ਦਸਕਂ ਇਤਰੇਨ ਦਸਕੇਨ ਯੋਜੇਤ੍ਵਾ ਪੁਬ੍ਬੇ ਸੁਕ੍ਕਵਿਸ੍ਸਟ੍ਠਿਯਂ ਵੁਤ੍ਤਨਯਤ੍ਤਾ ਮਾਤੁਰਕ੍ਖਿਤਾਯ ਮਾਤਾ ਅਤ੍ਤਨੋ ਧੀਤੁਸਨ੍ਤਿਕਂ ਪਹਿਣਤੀਤਿ ਗਹੇਤਬ੍ਬਂ.

੩੩੮. ਅਨਭਿਨਨ੍ਦਿਤ੍ਵਾਤਿ ਵਚਨਮਤ੍ਤਮੇਵ, ਯਦਿਪਿ ਅਭਿਨਨ੍ਦਤਿ, ਯਾਵ ਸਾਸਨਂ ਨਾਰੋਚੇਤਿ, ਤਾਵ ‘‘ਵੀਮਂਸਿਤੋ’’ਤਿ ਨ ਵੁਚ੍ਚਤਿ. ਸਾਸਨਾਰੋਚਨਕਾਲੇਤਿ ਆਣਾਪਕਸ੍ਸ ਸਾਸਨਵਚਨਕ੍ਖਣੇ. ਤਤਿਯਪਦੇ ਵੁਤ੍ਤਨਯੇਨਾਤਿ ਏਕਙ੍ਗਸਮ੍ਪਤ੍ਤਿਯਾ ਦੁਕ੍ਕਟਨ੍ਤਿ ਅਤ੍ਥੋ. ਵਤ੍ਥੁਗਣਨਾਯ ਸਙ੍ਘਾਦਿਸੇਸੋਤਿ ਉਭਯਵਤ੍ਥੁਗਣਨਾਯ ਕਿਰ.

੩੩੯. ਚਤੁਤ੍ਥੇ ਅਨਾਪਤ੍ਤੀਤਿ ਏਤ੍ਥ ਪਨ ‘‘ਪਟਿਗ੍ਗਣ੍ਹਾਤਿ ਨ ਵੀਮਂਸਤਿ ਨ ਪਚ੍ਚਾਹਰਤਿ, ਅਨਾਪਤ੍ਤੀਤਿ ਏਤ੍ਥ ਵਿਯ ‘ਗਚ੍ਛਨ੍ਤੋ ਨ ਸਮ੍ਪਾਦੇਤਿ, ਆਗਚ੍ਛਨ੍ਤੋ ਵਿਸਂਵਾਦੇਤੀ’ਤਿ ਅਨਾਪਤ੍ਤਿਪਾਲ਼ਿਯਾਪਿ ਭਵਿਤਬ੍ਬਨ੍ਤਿ ਦਸ੍ਸਨਤ੍ਥਂ ਵੁਤ੍ਤ’’ਨ੍ਤਿ ਵਦਨ੍ਤਿ, ਏਕਚ੍ਚੇਸੁ ਪੋਤ੍ਥਕੇਸੁ ‘‘ਅਤ੍ਥੀ’’ਤਿਪਿ.

ਵਿਨੀਤਵਤ੍ਥੁਵਣ੍ਣਨਾ

੩੪੧. ਅਲਂਵਚਨੀਯਾਤਿ ਨ ਵਚਨੀਯਾ, ਨਿਵਾਰਣੇ ਅਲਂ-ਸਦ੍ਦੋ. ਥੇਰਪਿਤਾ ਵਦਤੀਤਿ ਜਿਣ੍ਣਪਿਤਾ ਵਦਤੀਤਿ ਅਤ੍ਥੋ. ਕਿਞ੍ਚਾਪਿ ਏਤ੍ਥ ‘‘ਇਤ੍ਥੀ ਨਾਮ ਮਨੁਸ੍ਸਿਤ੍ਥੀ ਨ ਯਕ੍ਖੀ ਨ ਪੇਤੀ ਨ ਤਿਰਚ੍ਛਾਨਗਤਾ, ਪੁਰਿਸੋ ਨਾਮ ਮਨੁਸ੍ਸਪੁਰਿਸੋ ਨ ਯਕ੍ਖੋ’’ਤਿਆਦਿ ਨਤ੍ਥਿ, ਤਥਾਪਿ ਕਾਯਸਂਸਗ੍ਗਾਦੀਸੁ ‘‘ਮਨੁਸ੍ਸਿਤ੍ਥੀ’’ਤਿ ਇਤ੍ਥੀਵਵਤ੍ਥਾਨਸ੍ਸ ਕਤਤ੍ਤਾ ਇਧਾਪਿ ਮਨੁਸ੍ਸਿਤ੍ਥੀ ਏਵਾਤਿ ਪਞ੍ਞਾਯਤਿ. ਮੇਥੁਨਪੁਬ੍ਬਭਾਗਤ੍ਤਾ ਮਨੁਸ੍ਸਉਭਤੋਬ੍ਯਞ੍ਜਨਕੋ ਚ ਥੁਲ੍ਲਚ੍ਚਯਵਤ੍ਥੁਕੋਵ ਹੋਤਿ, ਸੇਸਾ ਮਨੁਸ੍ਸਪਣ੍ਡਕਉਭਤੋਬ੍ਯਞ੍ਜਨਕਤਿਰਚ੍ਛਾਨਗਤਪੁਰਿਸਾਦਯੋ ਦੁਕ੍ਕਟਵਤ੍ਥੁਕਾਵ ਮਿਚ੍ਛਾਚਾਰਸਾਸਨਙ੍ਗਸਮ੍ਭਵਤੋਤਿ ਵੇਦਿਤਬ੍ਬਂ. ਯਥਾਸਮ੍ਭਵਂ ਪਨ ਵਾਰਾ ਉਦ੍ਧਰਿਤਬ੍ਬਾ. ਪਞ੍ਞਤ੍ਤਿਅਜਾਨਨੇ ਵਿਯ ਅਲਂਵਚਨੀਯਭਾਵਾਜਾਨਨੇਪਿ ਅਚਿਤ੍ਤਕਤਾ ਵੇਦਿਤਬ੍ਬਾ. ਦੁਟ੍ਠੁਲ੍ਲਾਦੀਸੁਪੀਤਿ ‘‘ਇਮਸ੍ਮਿਮ੍ਪੀ’’ਤਿ ਵੁਤ੍ਤਮੇਵ ਹੋਤਿ. ‘‘ਲੇਖਂ ਨੇਤ੍ਵਾ ਪਟਿਲੇਖਂ ਆਰੋਚਿਤਸ੍ਸਾਪਿ ਸਞ੍ਚਰਿਤ੍ਤਂ ਨਤ੍ਥਿ ਸਞ੍ਚਰਿਤ੍ਤਭਾਵਮਜਾਨਨ੍ਤਸ੍ਸਾ’’ਤਿ ਵਦਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ.

ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.