੪. ਸੁਖਿਨ੍ਦ੍ਰਿਯਵਗ੍ਗੋ

੧-੫. ਸੁਦ੍ਧਿਕਸੁਤ੍ਤਾਦਿਵਣ੍ਣਨਾ

੫੦੧-੫੦੫. ਯਥਾ ਚਕ੍ਖੁ ਦਸ੍ਸਨੇ ਅਧਿਪਤੇਯ੍ਯਟ੍ਠੇਨ ਚਕ੍ਖੁਨ੍ਦ੍ਰਿਯਂ, ਏਵਂ ਸੁਖਵੇਦਨਾ ਸੁਖਨੇ ਅਧਿਪਤੇਯ੍ਯਟ੍ਠੇਨ ਸੁਖਿਨ੍ਦ੍ਰਿਯਂ. ਏਸ ਨਯੋ ਸੇਸੇਸੁਪਿ. ਸੇਸਂ ਤੇਭੂਮਕਨ੍ਤਿ ਸੇਸਂ ਭੂਮਿਤ੍ਤਯਵਸੇਨ ਤੇਭੂਮਕਂ.

੬. ਪਠਮਵਿਭਙ੍ਗਸੁਤ੍ਤਵਣ੍ਣਨਾ

੫੦੬. ਕਾਯਿਕਨ੍ਤਿ ਅਯਮਸ੍ਸ ਨਿਸ੍ਸਯਵਸੇਨ ਨਿਦ੍ਦੇਸੋਤਿ ਆਹ – ‘‘ਕਾਯਪਸਾਦਵਤ੍ਥੁਕ’’ਨ੍ਤਿ. ਸਰੂਪਨਿਦ੍ਦੇਸੋ ਸੁਖਂ ਸੁਖਿਨ੍ਦ੍ਰਿਯਸ੍ਸ ਸਰੂਪਨ੍ਤਿ. ਸਾਦਨੀਯਟ੍ਠੇਨ ਧਮ੍ਮਪਦਾਨਿ ਅਤ੍ਤਨਿ ਅਸ੍ਸਾਦਯਤੀਤਿ ਸਾਤਂ, ਮਧੁਰਂ. ਵੇਦਯਿਤਨ੍ਤਿ ਵੇਦਿਯਨਂ, ਅਨੁਭਵਨਨ੍ਤਿ ਅਤ੍ਥੋ. ਅਞ੍ਞਧਮ੍ਮਵਿਸਿਟ੍ਠੋਤਿ ਫਸ੍ਸਾਦੀਹਿ ਅਞ੍ਞੇਹਿ ਧਮ੍ਮੇਹਿ ਵਿਸਦਿਸੋ. ਕਾਯਿਕਨ੍ਤਿ ਪਸਾਦਕਾਯਸਨ੍ਨਿਸ੍ਸਿਤਂ. ਚੇਤਸਿਕਨ੍ਤਿ ਚੇਤੋਸਨ੍ਨਿਸ੍ਸਿਤਂ, ਤੇਨ ਵੁਤ੍ਤਂ ‘‘ਏਤ੍ਥ ਪਨਾ’’ਤਿਆਦਿ. ਕਾਯਪਸਾਦ…ਪੇ… ਨਤ੍ਥਿ, ਤਸ੍ਮਾ ‘‘ਚਤ੍ਤਾਰੋ ਪਸਾਦਕਾਯੇ ਵਤ੍ਥੁਂ ਕਤ੍ਵਾ’’ਤਿ ਵੁਤ੍ਤਂ.

੯. ਕਟ੍ਠੋਪਮਸੁਤ੍ਤਵਣ੍ਣਨਾ

੫੦੯. ਦ੍ਵਿਨ੍ਨਂ ਅਰਣੀਨਨ੍ਤਿ ਅਧਰੁਤ੍ਤਰਾਰਣੀਨਂ. ਕਿਞ੍ਚਿ ਦ੍ਵਯਂ ਸਙ੍ਘਟ੍ਟਿਤਮਤ੍ਤਂ ਹੁਤ੍ਵਾ ਨ ਸਮੋਧਾਨਗਤਂ ਹੋਤੀਤਿ ਤਂਨਿਵਤ੍ਤਨਤ੍ਥਂ ‘‘ਸਙ੍ਘਟ੍ਟਨਸਮੋਧਾਨਾ’’ਤਿ ਵੁਤ੍ਤਂ. ਪੁਨਪ੍ਪੁਨਂ ਸਙ੍ਘਟ੍ਟਨੇਨ ਹਿ ਤੇਜੋਪਾਤੁਭਾਵੋ. ਅਧਰਾਰਣੀ ਵਿਯ ਵਤ੍ਥਾਰਮ੍ਮਣਂ ਅਸਤਿਪਿ ਵਾਯਾਮੇ ਤਜ੍ਜਸਮ੍ਫਸ੍ਸਪਚ੍ਚਯਤੋ. ਉਤ੍ਤਰਾਰਣੀ ਵਿਯ ਫਸ੍ਸੋ ਵਤ੍ਥਾਰਮ੍ਮਣਾਦਿਫਸ੍ਸੇਨ ਪਵਤ੍ਤਨਤੋ. ਸਙ੍ਘਟ੍ਟੋ ਵਿਯ ਫਸ੍ਸਸਙ੍ਘਟ੍ਟਨਂ ਅਰਣਿਦ੍ਵਯਸਙ੍ਘਟ੍ਟਨਾ ਵਿਯ ਫਸ੍ਸਸ੍ਸੇਵ ਵਤ੍ਥਾਰਮ੍ਮਣੇਸੁ ਸਙ੍ਘਟ੍ਟਨਾਕਾਰੇਨ ਪਵਤ੍ਤਿਤੋ. ਅਗ੍ਗਿ ਵਿਯ ਵੇਦਨਾ ਅਨੁਦਹਨਟ੍ਠੇਨ ਖਣਿਕਾਵਾਯਞ੍ਚ. ਵਤ੍ਥਾਰਮ੍ਮਣਂ ਵਾ ਉਤ੍ਤਰਾਰਣੀ ਵਿਯ ਇਨ੍ਧਨਾਪਾਤਗਹਣਾਦੀਸੁ ਉਸ੍ਸਾਹਸ੍ਸ ਵਿਯ ਪਵਤ੍ਤਿਸਮ੍ਭਵਤੋ. ਫਸ੍ਸੋ ਅਧਰਾਰਣੀ ਵਿਯ ਨਿਰੁਸ੍ਸਾਹਨਿਰੀਹਤਾਵਸੇਨ ਅਤ੍ਤਸਾਧਨਤੋ.

੧੦. ਉਪ੍ਪਟਿਪਾਟਿਕਸੁਤ੍ਤਵਣ੍ਣਨਾ

੫੧੦. ਰਸਨਂ ਭਞ੍ਜਨਂ ਨਿਰੁਜ੍ਝਨਂ ਰਸੋ. ਯੋ ਯੋ ਧਮ੍ਮਾਨਂ ਰਸੋ ਯਥਾਧਮ੍ਮਰਸੋ, ਤੇਨ ਯਥਾਧਮ੍ਮਰਸੇਨ. ਪਟਿਪਾਟਿਯਾਤਿ ਕਮੇਨ, ਉਭਯੇਨਪਿ ਧਮ੍ਮਾਨਂ ਪਹਾਨਕ੍ਕਮੇਨਾਤਿ ਵੁਤ੍ਤਂ ਹੋਤਿ. ਇਮਸ੍ਮਿਂ ਇਨ੍ਦ੍ਰਿਯਵਿਭਙ੍ਗੇਤਿ ਇਮਸ੍ਮਿਂ ਇਨ੍ਦ੍ਰਿਯਸਂਯੁਤ੍ਤਸਞ੍ਞਿਤੇ ਇਨ੍ਦ੍ਰਿਯਵਿਭਙ੍ਗੇ. ਅਦੇਸਿਤਤ੍ਤਾਤਿ ਸੇਸਸੁਤ੍ਤਾਨਿ ਵਿਯ ‘‘ਸੁਖਿਨ੍ਦ੍ਰਿਯ’’ਨ੍ਤਿਆਦਿਨਾ ਅਦੇਸਿਤਤ੍ਤਾ ਇਦਂ ਉਪ੍ਪਟਿਪਾਟਿਕਸੁਤ੍ਤਂ ਨਾਮ. ਵਲਿਯਾ ਖਰਸਮ੍ਫਸ੍ਸਾਯ ਫੁਟ੍ਠਸ੍ਸ. ਤਨ੍ਤਿ ਕਣ੍ਟਕਵੇਦਨਾਦਿਂ. ਏਤਸ੍ਸ ਦੁਕ੍ਖਿਨ੍ਦ੍ਰਿਯਸ੍ਸ.

ਤੇਸਂ ਤੇਸਨ੍ਤਿ ਦੋਮਨਸ੍ਸਿਨ੍ਦ੍ਰਿਯਾਦੀਨਂ. ਕਾਰਣਵਸੇਨੇਵਾਤਿ ਤਂਤਂਅਸਾਧਾਰਣਕਾਰਣਵਸੇਨ. ਤੇਸਞ੍ਹਿ ਵਿਸੇਸਕਾਰਣਂ ਦਸ੍ਸੇਨ੍ਤੋ ‘‘ਪਤ੍ਤਚੀਵਰਾਦੀਨਂ ਵਾ’’ਤਿ ਆਹ.

ਏਕਤੋਵਾਤਿ ਪੁਨਪ੍ਪੁਨਂ ਪਦੁਦ੍ਧਾਰਣਂ ਅਕਤ੍ਵਾ ਏਕਜ੍ਝਮੇਵ. ਦੁਤਿਯਜ੍ਝਾਨਾਦੀਨਂ ਉਪਚਾਰਕ੍ਖਣੇ ਏਵ ਨਿਰੁਜ੍ਝਨ੍ਤੀਤਿ ਆਨੇਤ੍ਵਾ ਸਮ੍ਬਨ੍ਧੋ. ਤੇਸਂ ਦੁਕ੍ਖਿਨ੍ਦ੍ਰਿਯਦੋਮਨਸ੍ਸਾਦੀਨਂ. ਅਤਿਸਯਨਿਰੋਧੋਤਿ ਸੁਟ੍ਠੁ ਪਹਾਨਂ ਉਜੁਪ੍ਪਟਿਪਕ੍ਖੇਨ ਵੂਪਸਮੋ. ਨਿਰੋਧੋਯੇਵਾਤਿ ਨਿਰੋਧਮਤ੍ਤਮੇਵ. ਨਾਨਾਵਜ੍ਜਨੇਤਿ ਯੇਨ ਆਵਜ੍ਜਨੇਨ ਅਪ੍ਪਨਾਵੀਥਿ ਹੋਤਿ, ਤਤੋ ਭਿਜ੍ਜਾਵਜ੍ਜਨੇ, ਅਨੇਕਾਵਜ੍ਜਨੇ ਵਾ. ਅਪ੍ਪਨਾਵੀਥਿਯਞ੍ਹਿ ਉਪਚਾਰੋ ਏਕਾਵਜ੍ਜਨੋ, ਇਤਰੋ ਅਨੇਕਾਵਜ੍ਜਨੋ ਅਨੇਕਕ੍ਖਤ੍ਤੁਂ ਪਵਤ੍ਤਨਤੋ. ਵਿਸਮਨਿਸਜ੍ਜਾਯ ਉਪ੍ਪਨ੍ਨਕਿਲਮਥੋ ਵਿਸਮਾਸਨੁਪਤਾਪੋ. ਪੀਤਿਫਰਣੇਨਾਤਿ ਪੀਤਿਯਾ ਫਰਣਰਸਤ੍ਤਾ. ਪੀਤਿਸਮੁਟ੍ਠਾਨਾਨਂ ਵਾ ਪਣੀਤਰੂਪਾਨਂ ਕਾਯਸ੍ਸ ਬ੍ਯਾਪਨਤੋ ਵੁਤ੍ਤਂ. ਤੇਨਾਹ ‘‘ਸਬ੍ਬੋ ਕਾਯੋ ਸੁਖੋਕ੍ਕਨ੍ਤੋ ਹੋਤੀ’’ਤਿ. ਵਿਤਕ੍ਕਵਿਚਾਰਪਚ੍ਚਯੇਪੀਤਿ ਪਿ-ਸਦ੍ਦੋ ਅਟ੍ਠਾਨਪਯੁਤ੍ਤੋ, ਸੋ ‘‘ਪਹੀਨਸ੍ਸਾ’’ਤਿ ਏਤ੍ਥ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬੋ ‘‘ਪਹੀਨਸ੍ਸਪਿ ਦੋਮਨਸ੍ਸਿਨ੍ਦ੍ਰਿਯਸ੍ਸਾ’’ਤਿ. ਏਤਂ ਦੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ ਸਮ੍ਬਨ੍ਧੋ. ‘‘ਤਸ੍ਸ ਮਯ੍ਹਂ ਅਤਿਚਿਰਂ ਵਿਤਕ੍ਕਯਤੋ ਵਿਚਾਰਯਤੋ ਕਾਯੋਪਿ ਕਿਲਮਿ, ਚਿਤ੍ਤਮ੍ਪਿ ਵਿਹਞ੍ਞੀ’’ਤਿ ਚ ਵਚਨਤੋ ਕਾਯਚਿਤ੍ਤਖੇਦਾਨਂ ਵਿਤਕ੍ਕਵਿਚਾਰਪਚ੍ਚਯਤਾ ਵੇਦਿਤਬ੍ਬਾ. ਵਿਤਕ੍ਕਵਿਚਾਰਭਾਵੇ ਉਪ੍ਪਜ੍ਜਤਿ ਦੋਮਨਸ੍ਸਿਨ੍ਦ੍ਰਿਯਨ੍ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਤਤ੍ਥਸ੍ਸ ਸਿਯਾ ਉਪ੍ਪਤ੍ਤੀਤਿ ਤਤ੍ਥ ਦੁਤਿਯਜ੍ਝਾਨੁਪਚਾਰੇ ਅਸ੍ਸ ਦੋਮਨਸ੍ਸਸ੍ਸ ਉਪ੍ਪਤ੍ਤਿ ਭਵੇਯ੍ਯ. ‘‘ਤਤ੍ਥਸ੍ਸ ਸਿਯਾ ਉਪ੍ਪਤ੍ਤੀ’’ਤਿ ਇਦਂ ਪਰਿਕਪ੍ਪਵਚਨਂ ਉਪਚਾਰਕ੍ਖਣੇ ਦੋਮਨਸ੍ਸਸ੍ਸ ਸੁਪ੍ਪਹੀਨਭਾਵਦਸ੍ਸਨਤ੍ਥਂ. ਤਥਾ ਹਿ ਵੁਤ੍ਤਂ ‘‘ਨ ਤ੍ਵੇਵ ਦੁਤਿਯਜ੍ਝਾਨੇ ਪਹੀਨਪਚ੍ਚਯਤ੍ਤਾ’’ਤਿ. ਪਹੀਨਮ੍ਪਿ ਸੋਮਨਸ੍ਸਿਨ੍ਦ੍ਰਿਯਂ ਪੀਤਿ ਵਿਯ ਨ ਦੂਰੇਤਿ ਕਤ੍ਵਾ ‘‘ਆਸਨ੍ਨਤ੍ਤਾ’’ਤਿ ਵੁਤ੍ਤਂ. ਨਾਨਾਵਜ੍ਜਨੁਪਚਾਰੇ ਪਹੀਨਮ੍ਪਿ ਪਹਾਨਙ੍ਗਂ ਪਟਿਪਕ੍ਖੇਨ ਅਵਿਹਤਤ੍ਤਾ ਅਨ੍ਤਰਨ੍ਤਰਾ ਉਪ੍ਪਜ੍ਜੇਯ੍ਯਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਅਪ੍ਪਨਾਪ੍ਪਤ੍ਤਾਯਾ’’ਤਿਆਦਿਮਾਹ. ‘‘ਤਾਦਿਸਾਯ ਆਸੇਵਨਾਯ ਇਚ੍ਛਿਤਬ੍ਬਤ੍ਤਾ ਯਥਾ ਮਗ੍ਗਵੀਥਿਤੋ ਪੁਬ੍ਬੇ ਦ੍ਵੇ ਤਯੋ ਜਵਨਵਾਰਾ ਸਦਿਸਾਨੁਪਸ੍ਸਨਾਵ ਪਵਤ੍ਤਨ੍ਤਿ, ਏਵਮਿਧਾਪਿ ਅਪ੍ਪਨਾਵਾਰਤੋ ਪੁਬ੍ਬੇ ਦ੍ਵੇ ਤਯੋ ਜਵਨਵਾਰਾ ਉਪੇਕ੍ਖਾਸਹਗਤਾਵ ਪਵਤ੍ਤਨ੍ਤੀ’’ਤਿ ਵਦਨ੍ਤਿ. ਅਪਰਿਸੇਸਨ੍ਤਿ ਸੁਵਿਕ੍ਖਮ੍ਭਿਤਨ੍ਤਿ ਕਤ੍ਵਾ ਵਿਕ੍ਖਮ੍ਭਨੇਨ ਅਨਵਸੇਸਂ.

ਤਥਤ੍ਤਾਯਾਤਿ ਤਥਭਾਵਾਯ ਪਠਮਜ੍ਝਾਨਸਮਙ੍ਗਿਤਾਯ. ਸਾ ਪਨਸ੍ਸ ਉਪ੍ਪਾਦਨੇਨ ਵਾ ਉਪ੍ਪਨ੍ਨਸ੍ਸ ਸਮਾਪਜ੍ਜਨੇਨ ਵਾ ਹੋਤੀਤਿ ਵੁਤ੍ਤਂ ‘‘ਉਪ੍ਪਾਦਨਤ੍ਥਾਯ ਸਮਾਪਜ੍ਜਨਤ੍ਥਾਯਾ’’ਤਿ. ਦ੍ਵੀਸੂਤਿ ਨਵਮਦਸਮੇਸੁ ਸੁਤ੍ਤਨ੍ਤੇਸੁ.

ਸੁਖਿਨ੍ਦ੍ਰਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.