੨. ਮੁਦੁਤਰਵਗ੍ਗੋ

੧. ਪਟਿਲਾਭਸੁਤ੍ਤਵਣ੍ਣਨਾ

੪੮੧. ਸਮ੍ਮਪ੍ਪਧਾਨੇ ਆਰਬ੍ਭਾਤਿ ਸਮ੍ਮਪ੍ਪਧਾਨੇ ਭਾਵਨਾਵਸੇਨ ਆਰਬ੍ਭ. ਤੇਨਾਹ ‘‘ਭਾਵੇਨ੍ਤੋ’’ਤਿ. ਯਥਾ ਵੀਰਿਯਿਨ੍ਦ੍ਰਿਯਨਿਦ੍ਦੇਸੇ ‘‘ਚਤ੍ਤਾਰੋ ਸਮ੍ਮਪ੍ਪਧਾਨੇ ਆਰਬ੍ਭ ਵੀਰਿਯਂ ਪਟਿਲਭਤੀ’’ਤਿ ਦੇਸਨਾ ਆਗਤਾ, ਏਵਂ ਸਤਿਨ੍ਦ੍ਰਿਯਨਿਦ੍ਦੇਸੇ ‘‘ਚਤ੍ਤਾਰੋ ਸਤਿਪਟ੍ਠਾਨੇ ਆਰਬ੍ਭ ਸਤਿਂ ਪਟਿਲਭਤੀ’’ਤਿ, ਤਸ੍ਮਾ ‘‘ਸਤਿਨ੍ਦ੍ਰਿਯੇਪਿ ਏਸੇਵ ਨਯੋ’’ਤਿ ਵੁਤ੍ਤਂ. ਸਦ੍ਧਿਨ੍ਦ੍ਰਿਯਾਦਿਨਿਦ੍ਦੇਸੇਸੁ ਪਨ ਨ ਤਥਾ ਦੇਸੇਤਿ.

੨. ਪਠਮਸਂਖਿਤ੍ਤਸੁਤ੍ਤਵਣ੍ਣਨਾ

੪੮੨. ਇਨ੍ਦ੍ਰਿਯਾਨਂ ਤਿਕ੍ਖਾਦਿਭਾਵੋ ਵਿਪਸ੍ਸਨਾਵਸੇਨ ਵਾ ਮਗ੍ਗਵਸੇਨ ਵਾ ਫਲਵਸੇਨ ਵਾ ਗਹੇਤਬ੍ਬੋਤਿ ਵੁਤ੍ਤਂ ‘‘ਤਤੋਤਿ…ਪੇ… ਵੇਦਿਤਬ੍ਬ’’ਨ੍ਤਿ. ਨਨੁ ਚੇਤ੍ਥ ਮੁਦੁਭਾਵੋ ਏਵ ਪਾਲ਼ਿਯਂ ਗਹਿਤੋਤਿ? ਸਚ੍ਚਮੇਤਂ, ਤਂ ਪਨ ਤਿਕ੍ਖਭਾਵੇ ਅਸਤਿ ਨ ਹੋਤਿ ਤਿਕ੍ਖਾਦਿਭਾਵੋਤਿ ਵੁਤ੍ਤਂ. ਯਤੋ ਹਿ ਅਯਂ ਮੁਦੁ, ਇਤੋ ਤਂ ਤਿਕ੍ਖਨ੍ਤਿ ਵਤ੍ਤਬ੍ਬਤਂ ਲਭਤਿ ਅਪੇਕ੍ਖਾਸਿਦ੍ਧਤ੍ਤਾ ਤਿਕ੍ਖਮੁਦੁਭਾਵਾਨਂ ਪਾਰਾਪਾਰਂ ਵਿਯ. ਇਦਾਨਿ ‘‘ਤਤੋ’’ਤਿਆਦਿਨਾ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਸਮਤ੍ਤਾਨੀ’’ਤਿਆਦਿ ਵੁਤ੍ਤਂ. ਤਤ੍ਥ ਸਮਤ੍ਤਾਨੀਤਿ ਸਮ੍ਪਨ੍ਨਾਨਿ. ਇਤਰਂ ਤਸ੍ਸੇਵ ਵੇਵਚਨਂ. ਸਮਤ੍ਤਾਨੀਤਿ ਵਾ ਪਰਿਯਤ੍ਤਾਨਿ, ਸਮਤ੍ਤਾਨੀਤਿ ਅਤ੍ਥੋ. ‘‘ਤਤੋ ਮੁਦੁਤਰਾਨਿ ਧਮ੍ਮਾਨੁਸਾਰੀਮਗ੍ਗਸ੍ਸਾ’’ਤਿ ਕਸ੍ਮਾ ਵੁਤ੍ਤਂ? ਤਤੋਤਿ ਹਿ ਸੋਤਾਪਤ੍ਤਿਮਗ੍ਗਵਿਪਸ੍ਸਨਿਨ੍ਦ੍ਰਿਯਾਨਿ ਅਧਿਪ੍ਪੇਤਾਨਿਯੇਵ, ‘‘ਤਤੋ ਮੁਦੁਤਰਾਨੀ’’ਤਿ ਵੁਤ੍ਤਪਠਮਮਗ੍ਗੋ ਧਮ੍ਮਾਨੁਸਾਰੀ ਵਾ ਸਿਯਾ ਸਦ੍ਧਾਨੁਸਾਰੀ ਵਾਤਿ ਬ੍ਯਭਿਚਰਤਿ? ਨਾਯਂ ਦੋਸੋ, ਸੋਤਾਪਤ੍ਤਿਮਗ੍ਗੇਕਦੇਸਵਸੇਨੇਵ ਲਦ੍ਧਬ੍ਬਪਠਮਮਗ੍ਗਾਪੇਕ੍ਖਾਯ ਵਿਪਸ੍ਸਨਾਯ ਵਿਭਾਗਸ੍ਸ ਅਧਿਪ੍ਪੇਤਤ੍ਤਾ. ਯੋ ਹਿ ਸੋਤਾਪਨ੍ਨੋ ਹੁਤ੍ਵਾ ਇਰਿਯਾਪਥਂ ਅਕੋਪੇਤ੍ਵਾ ਯਥਾਨਿਸਿਨ੍ਨੋਵ ਸਕਦਾਗਾਮਿਮਗ੍ਗਂ ਪਾਪੁਣਾਤਿ, ਤਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਸਨ੍ਧਾਯ ਅਵਿਭਾਗੇਨ ਵੁਤ੍ਤਂ – ‘‘ਤਤੋ ਮੁਦੁਤਰਾਨਿ ਸੋਤਾਪਤ੍ਤਿਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮਾ’’ਤਿ. ਯੋ ਪਨ ਸੋਤਾਪਨ੍ਨੋ ਹੁਤ੍ਵਾ ਕਾਲਨ੍ਤਰੇਨ ਸਕਦਾਗਾਮੀ ਹੋਤਿ, ਤਸ੍ਸ ਸੋਤਾਪਤ੍ਤਿਮਗ੍ਗਤ੍ਥਾਯ ਪਵਤ੍ਤਾਨਿ ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮ ਹੋਨ੍ਤਿ. ਸੋ ਚੇ ਧਮ੍ਮਾਨੁਸਾਰੀਗੋਤ੍ਤੋ, ਤਸ੍ਸ ਯਥਾਵੁਤ੍ਤਵਿਪਸ੍ਸਨਿਨ੍ਦ੍ਰਿਯਤੋ ਮੁਦੁਤਰਾਨੀਤਿ ‘‘ਤਤੋ ਮੁਦੁਤਰਾਨਿ ਧਮ੍ਮਾਨੁਸਾਰੀਮਗ੍ਗਸ੍ਸਾ’’ਤਿ ਵੁਤ੍ਤਂ. ਵਿਪਸ੍ਸਨਿਨ੍ਦ੍ਰਿਯਾਨਿ ਨਾਮਾਤਿ ਆਨੇਤ੍ਵਾ ਸਮ੍ਬਨ੍ਧੋ. ਧਮ੍ਮਾਨੁਸਾਰੀਵਿਪਸ੍ਸਨਿਨ੍ਦ੍ਰਿਯਤੋ ਸਦ੍ਧਾਨੁਸਾਰੀਵਿਪਸ੍ਸਨਿਨ੍ਦ੍ਰਿਯਾਨਂ ਮੁਦੁਭਾਵਸ੍ਸ ਕਾਰਣਂ ਸਯਮੇਵ ਵਕ੍ਖਤਿ. ਧਮ੍ਮੇਨ ਪਞ੍ਞਾਯ ਮਗ੍ਗਸੋਤਂ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ, ਪਞ੍ਞੁਤ੍ਤਰੋ ਅਰਿਯੋ. ਸਦ੍ਧਾਯ ਮਗ੍ਗਸੋਤਂ ਅਨੁਸ੍ਸਰਤੀਤਿ ਸਦ੍ਧਾਨੁਸਾਰੀ, ਸਦ੍ਧੁਤ੍ਤਰੋ ਅਰਿਯੋ.

ਏਵਂ ਵਿਪਸ੍ਸਨਾਵਸੇਨ ਦਸ੍ਸੇਤ੍ਵਾ ਮਗ੍ਗਵਸੇਨ ਦਸ੍ਸੇਤੁਂ ‘‘ਤਥਾ’’ਤਿਆਦਿ ਆਰਦ੍ਧਂ. ਸਮ੍ਪਯੋਗਤੋ ਸਭਾਵਤੋ ਚ ਅਰਹਤ੍ਤਮਗ੍ਗਪਰਿਯਾਪਨ੍ਨਾਨਿ ਅਰਹਤ੍ਤਮਗ੍ਗਿਨ੍ਦ੍ਰਿਯਾਨਿ. ਅਰਹਤ੍ਤਫਲਿਨ੍ਦ੍ਰਿਯਾਨੀਤਿ ਏਤ੍ਥਾਪਿ ਏਸੇਵ ਨਯੋ.

ਇਦਾਨਿ ਫਲਵਸੇਨ ਦਸ੍ਸੇਤੁਂ ‘‘ਸਮਤ੍ਤਾਨਿ ਪਰਿਪੁਣ੍ਣਾਨੀ’’ਤਿਆਦਿ ਵੁਤ੍ਤਂ. ਸੋਤਾਪਤ੍ਤਿਮਗ੍ਗਟ੍ਠਪੁਗ੍ਗਲਵਸੇਨ ਨਾਨਤ੍ਤਂ ਜਾਤਂ, ਤਸ੍ਮਾ ਤੇ ਦ੍ਵੇਪਿ ਇਧ ਤਤਿਯਵਾਰੇ ਨ ਲਬ੍ਭਨ੍ਤੀਤਿ ਅਧਿਪ੍ਪਾਯੋ. ਧਮ੍ਮਾਨੁਸਾਰੀਸਦ੍ਧਾਨੁਸਾਰੀਨਂ ਨਾਨਤ੍ਤਂ ਕਥਂ ਜਾਤਨ੍ਤਿ ਆਹ ‘‘ਆਗਮਨੇਨਪਿ ਮਗ੍ਗੇਨਪੀ’’ਤਿ. ਤਦੁਭਯਂ ਦਸ੍ਸੇਨ੍ਤੋ ‘‘ਸਦ੍ਧਾਨੁਸਾਰੀਪੁਗ੍ਗਲੋ’’ਤਿਆਦਿਮਾਹ. ਉਦ੍ਦਿਸਾਪੇਨ੍ਤੋਤਿ ਉਦ੍ਦੇਸਂ ਗਣ੍ਹਨ੍ਤੋ.

ਮਗ੍ਗੋ ਤਿਕ੍ਖੋ ਹੋਤਿ ਉਪਨਿਸ੍ਸਯਿਨ੍ਦ੍ਰਿਯਾਨਂ ਤਿਕ੍ਖਵਿਸਦਭਾਵਤੋ. ਤੇਨਾਹ ‘‘ਸੂਰਂ ਞਾਣਂ ਵਹਤੀ’’ਤਿ. ਅਸਙ੍ਖਾਰੇਨਾਤਿ ਸਰਸੇਨੇਵ. ਅਪ੍ਪਯੋਗੇਨਾਤਿ ਤਸ੍ਸੇਵ ਵੇਵਚਨਂ. ਧਮ੍ਮਾਨੁਸਾਰੀਪੁਗ੍ਗਲੋ ਹਿ ਆਗਮਨਮ੍ਹਿ ਕਿਲੇਸੇ ਵਿਕ੍ਖਮ੍ਭੇਨ੍ਤੋ ਅਪ੍ਪਦੁਕ੍ਖੇਨ ਅਪ੍ਪਕਸਿਰੇਨ ਅਕਿਲਮਨ੍ਤੋਵ ਵਿਕ੍ਖਮ੍ਭੇਤੁਂ ਸਕ੍ਕੋਤਿ. ਸਦ੍ਧਾਨੁਸਾਰੀਪੁਗ੍ਗਲੋ ਪਨ ਦੁਕ੍ਖੇਨ ਕਸਿਰੇਨ ਕਿਲਮਨ੍ਤੋ ਹੁਤ੍ਵਾ ਵਿਕ੍ਖਮ੍ਭੇਤੁਂ ਸਕ੍ਕੋਤਿ, ਤਸ੍ਮਾ ਧਮ੍ਮਾਨੁਸਾਰਿਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਕਿਲੇਸਚ੍ਛੇਦਕਞਾਣਂ ਅਦਨ੍ਧਂ ਤਿਖਿਣਂ ਹੁਤ੍ਵਾ ਵਹਤਿ, ਯਥਾ ਨਾਮ ਤਿਖਿਣੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਮਟ੍ਠਂ ਹੋਤਿ, ਅਸਿ ਖਿਪ੍ਪਂ ਵਹਤਿ, ਸਦ੍ਦੋ ਨ ਸੁਯ੍ਯਤਿ, ਬਲਵਵਾਯਾਮਕਿਚ੍ਚਂ ਨ ਹੋਤਿ, ਏਵਰੂਪਾ ਧਮ੍ਮਾਨੁਸਾਰਿਨੋ ਪੁਬ੍ਬਭਾਗਭਾਵਨਾ ਹੋਤਿ, ਸਦ੍ਧਾਨੁਸਾਰਿਨੋ ਪਨ ਪੁਬ੍ਬਭਾਗਕ੍ਖਣੇ ਕਿਲੇਸਚ੍ਛੇਦਕਞਾਣਂ ਦਨ੍ਧਂ ਨ ਤਿਖਿਣਂ ਅਸੂਰਂ ਹੁਤ੍ਵਾ ਵਹਤਿ, ਯਥਾ ਨਾਮ ਨਾਤਿਤਿਖਿਣੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਨ ਮਟ੍ਠਂ ਹੋਤਿ, ਅਸਿ ਸੀਘਂ ਨ ਵਹਤਿ, ਸਦ੍ਦੋ ਸੁਯ੍ਯਤਿ, ਬਲਵਵਾਯਾਮਕਿਚ੍ਚਂ ਇਚ੍ਛਿਤਬ੍ਬਂ ਹੋਤਿ, ਏਵਰੂਪਾ ਸਦ੍ਧਾਨੁਸਾਰਿਨੋ ਪੁਬ੍ਬਭਾਗਭਾਵਨਾ ਹੋਤਿ. ਏਵਂ ਸਨ੍ਤੇਪਿ ਕਿਲੇਸਕ੍ਖਯੇ ਨਾਨਤ੍ਤਂ ਨਤ੍ਥਿ. ਤੇਨਾਹ ‘‘ਕਿਲੇਸਕ੍ਖਯੇ ਪਨਾ’’ਤਿਆਦਿ. ਅਵਸੇਸਾ ਚ ਕਿਲੇਸਾ ਖੀਯਨ੍ਤਿ ਸਂਯੋਜਨਕ੍ਖਯਾਯ ਯੋਗਤ੍ਤਾ.

੩. ਦੁਤਿਯਸਂਖਿਤ੍ਤਸੁਤ੍ਤਵਣ੍ਣਨਾ

੪੮੩. ਤਤੋਤਿ ਫਲਤੋ ਫਲਵੇਮਤ੍ਤਤਾਯ ਚਰਿਯਮਾਨਤ੍ਤਾ. ਇਨ੍ਦ੍ਰਿਯਵੇਮਤ੍ਤਤਾ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਨਾਨਤ੍ਤੇਨ. ਫਲਨਾਨਤ੍ਤਨ੍ਤਿ ਅਰਹਤ੍ਤਫਲਾਦਿਨਾਨਤ੍ਤਂ. ਪੁਗ੍ਗਲਨਾਨਤ੍ਤਨ੍ਤਿ ਅਨਾਗਾਮਿਆਦਿਪੁਗ੍ਗਲਨਾਨਤ੍ਤਂ.

੪. ਤਤਿਯਸਂਖਿਤ੍ਤਸੁਤ੍ਤਵਣ੍ਣਨਾ

੪੮੪. ਸੀਲਕ੍ਖਨ੍ਧਾਦੀਹਿ ਸਦ੍ਧਿਨ੍ਦ੍ਰਿਯਾਦੀਹਿ ਚ ਪਰਿਤੋ ਪੂਰਣੇਨ ਪਰਿਪੂਰਂ ਅਰਹਤ੍ਤਮਗ੍ਗਂ ਕਰੋਨ੍ਤੋ ਨਿਪ੍ਫਤ੍ਤਿਤੋ ਅਰਹਤ੍ਤਫਲਂ ਆਰਾਧੇਤਿ ਨਿਪ੍ਫਾਦੇਤਿ. ਤਯੋ ਪਦੇਸਮਗ੍ਗੇਤਿ ਸੀਲਕ੍ਖਨ੍ਧਾਦੀਨਂ ਅਪਾਰਿਪੂਰਿਯਾ ਏਕਦੇਸਭੂਤੇ ਤਯੋ ਹੇਟ੍ਠਿਮਮਗ੍ਗੇ. ਪਦੇਸਂ ਹੇਟ੍ਠਿਮਫਲਤ੍ਤਯਂ. ਚਤੂਸੂਤਿ ਇਮਸ੍ਮਿਂ ਵਗ੍ਗੇ ਪਠਮਾਦੀਸੁ ਚਤੂਸੁ ਸੁਤ੍ਤੇਸੁ. ਕਾਮਞ੍ਚੇਤ੍ਥ ਤਤਿਯੇ ‘‘ਤਤੋਤਿ ਫਲਵਸੇਨ ਨਿਸ੍ਸਕ੍ਕ’’ਨ੍ਤਿ ਵੁਤ੍ਤਂ, ਚਤੁਤ੍ਥੇ ‘‘ਪਰਿਪੂਰਂ ਪਰਿਪੂਰਕਾਰੀ ਆਰਾਧੇਤਿ, ਪਦੇਸਂ ਪਦੇਸਕਾਰੀ’’ਤਿ, ‘‘ਚਤੂਸੁਪਿ ਸੁਤ੍ਤੇਸੁ ਮਿਸ੍ਸਕਾਨੇਵ ਇਨ੍ਦ੍ਰਿਯਾਨਿ ਕਥਿਤਾਨੀ’’ਤਿ ਪਨ ਵਚਨਤੋ ਵਿਪਸ੍ਸਨਾਵਸੇਨਪਿ ਯੋਜਨਾ ਲਬ੍ਭਤੇਵਾਤਿ ਦਟ੍ਠਬ੍ਬਂ.

੫-੭. ਪਠਮਵਿਤ੍ਥਾਰਸੁਤ੍ਤਾਦਿਵਣ੍ਣਨਾ

੪੮੫-੪੮੭. ਵਿਪਸ੍ਸਨਾਵਸੇਨ ਨਿਸ੍ਸਕ੍ਕਂ ਵੇਦਿਤਬ੍ਬਂ, ਨ ਮਗ੍ਗਫਲਵਸੇਨ, ਇਮਸ੍ਮਿਂ ਸੁਤ੍ਤੇ ਸਬ੍ਬਸੋਵ ਵਿਪਸ੍ਸਨਿਨ੍ਦ੍ਰਿਯਾਨਂ ਏਵ ਅਧਿਪ੍ਪੇਤਤ੍ਤਾ. ਇਦਾਨਿ ਤਮਤ੍ਥਂ ਪਾਕਟਂ ਕਾਤੁਂ ‘‘ਪਰਿਪੁਣ੍ਣਾਨਿ ਹੀ’’ਤਿਆਦਿ ਵੁਤ੍ਤਂ. ਅਵਿਹਾਦੀਸੁ ਪਞ੍ਚਸੁ ਸੁਦ੍ਧਾਵਾਸੇਸੁ ਤਤ੍ਥ ਤਤ੍ਥ ਆਯੁਵੇਮਜ੍ਝਂ ਅਨਤਿਕ੍ਕਮਿਤ੍ਵਾ ਅਨ੍ਤਰਾ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨਤੋ ਅਨ੍ਤਰਾਪਰਿਨਿਬ੍ਬਾਯੀ, ਅਸਙ੍ਖਾਰੇਨ ਅਪ੍ਪਯੋਗੇਨ ਸਰਸਤੋਵ ਪਰਿਨਿਬ੍ਬਾਯਨਤੋ ਅਸਙ੍ਖਾਰਪਰਿਨਿਬ੍ਬਾਯੀ, ਤਬ੍ਬਿਪਰਿਯਾਯਤੋ ਸਸਙ੍ਖਾਰਪਰਿਨਿਬ੍ਬਾਯੀ, ਉਦ੍ਧਂ ਵਾਹਿਭਾਵੇਨ ਉਦ੍ਧਮਸ੍ਸ ਤਣ੍ਹਾਸੋਤਂ ਵਟ੍ਟਸੋਤਂ ਵਾਤਿ ਉਦ੍ਧਂਸੋਤੋ, ਉਦ੍ਧਂ ਵਾ ਗਨ੍ਤ੍ਵਾ ਪਟਿਲਭਿਤਬ੍ਬਤੋ ਉਦ੍ਧਮਸ੍ਸ ਮਗ੍ਗਸੋਤਨ੍ਤਿ ਉਦ੍ਧਂਸੋਤੋ, ਅਕਨਿਟ੍ਠਭਵਂ ਗਚ੍ਛਤੀਤਿ ਅਕਨਿਟ੍ਠਗਾਮੀਤਿ ਏਵਮੇਤ੍ਥ ਸਦ੍ਦਤ੍ਥੋ ਦਟ੍ਠਬ੍ਬੋ.

ਇਮਸ੍ਮਿਂ ਪਨ ਠਾਨੇਤਿ ‘‘ਵਿਪਸ੍ਸਨਾਵਸੇਨ ਨਿਸ੍ਸਕ੍ਕ’’ਨ੍ਤਿ ਵੁਤ੍ਤਟ੍ਠਾਨੇ. ਅਰਹਤ੍ਤਮਗ੍ਗੇਯੇਵ ਠਤ੍ਵਾਤਿ ਇਮਸ੍ਮਿਂਯੇਵ ਭਵੇ ਅਰਹਤ੍ਤਮਗ੍ਗੇਯੇਵ, ਨ ਵਿਪਸ੍ਸਨਾਯ ਚ ਠਤ੍ਵਾ. ਪਞ੍ਚ ਨਿਸ੍ਸਕ੍ਕਾਨਿ ਨੀਹਰਿਤਬ੍ਬਾਨੀਤਿ ‘‘ਤਤੋ ਮੁਦੁਤਰੇਹਿ ਅਨ੍ਤਰਾਪਰਿਨਿਬ੍ਬਾਯੀ ਹੋਤੀ’’ਤਿਆਦੀਨਿ ਪਞ੍ਚ ਨਿਸ੍ਸਕ੍ਕਾਨਿ ਨਿਦ੍ਧਾਰੇਤ੍ਵਾ ਕਥੇਤਬ੍ਬਾਨਿ. ਇਦਾਨਿ ਤਮਤ੍ਥਂ ਵਿਵਰਨ੍ਤੋ ‘‘ਅਰਹਤ੍ਤਮਗ੍ਗਸ੍ਸ ਹੀ’’ਤਿਆਦਿਮਾਹ. ਤਤ੍ਥ ਅਵਿਹਾਦੀਸੁ ਉਪ੍ਪਜ੍ਜਿਤ੍ਵਾ ਉਪ੍ਪਨ੍ਨਸਮਨਨ੍ਤਰਾਯ ਪਰਿਨਿਬ੍ਬਾਯਨਤੋ ਪਠਮਅਨ੍ਤਰਾਪਰਿਨਿਬ੍ਬਾਯੀ. ਤਤ੍ਥ ਆਯੁਪ੍ਪਮਾਣਵੇਮਜ੍ਝਂ ਅਪ੍ਪਤ੍ਵਾਵ ਪਰਿਨਿਬ੍ਬਾਯਨਤੋ ਦੁਤਿਯਅਨ੍ਤਰਾਪਰਿਨਿਬ੍ਬਾਯੀ, ਆਯੁਵੇਮਜ੍ਝਂ ਪਤ੍ਵਾ ਪਰਿਨਿਬ੍ਬਾਯਨਤੋ ਤਤੋ ਪਰਂ ਤਤਿਯਅਨ੍ਤਰਾਪਰਿਨਿਬ੍ਬਾਯੀ ਵੇਦਿਤਬ੍ਬੋ. ‘‘ਪਞ੍ਚ ਨਿਸ੍ਸਕ੍ਕਾਨੀ’’ਤਿ ਕਸ੍ਮਾ ਵੁਤ੍ਤਂ? ਨਨੁ ਅਸਙ੍ਖਾਰਸਸਙ੍ਖਾਰਪਰਿਨਿਬ੍ਬਾਯੀਤਿ ਵਤ੍ਤਬ੍ਬਨ੍ਤਿ? ਨ ਵਤ੍ਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਸਙ੍ਖਾਰਪਰਿਨਿਬ੍ਬਾਯਿਸ੍ਸ ਸਸਙ੍ਖਾਰਪਰਿਨਿਬ੍ਬਾਯਿਨੋਪਿ ਏਤੇਵ ਪਞ੍ਚ ਜਨਾ’’ਤਿ.

ਤੀਣਿ ਨਿਸ੍ਸਕ੍ਕਾਨੀਤਿ ‘‘ਤਤੋ ਮੁਦੁਤਰੇਹਿ ਸੋਤਾਪਨ੍ਨੋ ਹੋਤੀ’’ਤਿਆਦੀਨਿ ਤੀਣਿ ਨਿਸ੍ਸਕ੍ਕਪਦਾਨਿ. ਇਧ ਸਕਦਾਗਾਮੀ ਨ ਗਹਿਤੋ, ਸੋ ਅਨਾਗਾਮਿਮਗ੍ਗੇ ਠਤ੍ਵਾ ਨੀਹਰਿਤਬ੍ਬੋ, ਅਨਾਗਾਮਿਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯੇਹਿ ਮੁਦੁਤਰੇਹਿ ਸਕਦਾਗਾਮੀ ਹੋਤਿ. ਸਕਦਾ…ਪੇ… ਮੁਦੁਤਰਾਨੀਤਿ ਇਦਂ ਸਕਦਾਗਾਮਿਮਗ੍ਗਸ੍ਸ ਵਿਪਸ੍ਸਨਿਨ੍ਦ੍ਰਿਯੇਹਿ ਏਕਬੀਜਿਸਙ੍ਖਾਤਸੋਤਾਪਨ੍ਨਵਿਪਸ੍ਸਨਿਨ੍ਦ੍ਰਿਯਾਨਿ ਮੁਦੁਤਰਾਨਿ ਹੋਨ੍ਤੀਤਿ ਤੀਣਿ ਕਤ੍ਵਾ ਵੁਤ੍ਤਂ. ਧਮ੍ਮਾਨੁਸਾਰੀਤਿਆਦਿਦ੍ਵਯਂ ਕੋਲਂਕੋਲਾਦਿਦ੍ਵਯੇਨ ਗਹਿਤਂ ਹੋਤੀਤਿ. ਸਕਦਾਗਾਮਿਮਗ੍ਗਸ੍ਸ ਹੀਤਿਆਦਿ ਵੁਤ੍ਤਸ੍ਸੇਵ ਅਤ੍ਥਸ੍ਸ ਵਿਵਰਣਂ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ. ਛਟ੍ਠਸਤ੍ਤਮਾਨਿ ਵੁਤ੍ਤਨਯਾਨੇਵਾਤਿ ਛਟ੍ਠਸਤ੍ਤਮਾਨਿ ਸੁਤ੍ਤਾਨਿ ਦੁਤਿਯਤਤਿਯੇਸੁ ਵੁਤ੍ਤਨਯਾਨੇਵ. ਤਤ੍ਥ ਪਨ ਮਿਸ੍ਸਕਾਨਿ ਇਨ੍ਦ੍ਰਿਯਾਨਿ ਕਥਿਤਾਨਿ, ਇਧ ਪੁਬ੍ਬਭਾਗਵਿਪਸ੍ਸਨਿਨ੍ਦ੍ਰਿਯਾਨਿ ਕਥਿਤਾਨੀਤਿ ਅਯਮੇਵ ਵਿਸੇਸੋ.

੮. ਪਟਿਪਨ੍ਨਸੁਤ੍ਤਵਣ੍ਣਨਾ

੪੮੮. ਤਨ੍ਤਿ ਮਗ੍ਗਫਲਵਸੇਨ ਨਿਸ੍ਸਕ੍ਕਂ. ਪਾਲ਼ਿਯਂ ਵੁਤ੍ਤਮੇਵ ‘‘ਅਰਹਤ੍ਤਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਹੋਤੀ’’ਤਿਆਦਿਨਾ. ਅਟ੍ਠਹੀਤਿ ਚਤੂਹਿ ਫਲੇਹਿ ਚਤੂਹਿ ਚ ਮਗ੍ਗੇਹੀਤਿ ਅਟ੍ਠਹਿ. ਬਹਿਭੂਤੋ ਨ ਅਨ੍ਤੋਭਾਵੋ. ਲੋਕੁਤ੍ਤਰਾਨੇਵ ਇਨ੍ਦ੍ਰਿਯਾਨਿ ਕਥਿਤਾਨਿ ਮਗ੍ਗਫਲਚਿਤ੍ਤੁਪ੍ਪਾਦਪਰਿਯਾਪਨ੍ਨਤ੍ਤਾ.

੯-੧੦. ਸਮ੍ਪਨ੍ਨਸੁਤ੍ਤਾਦਿਵਣ੍ਣਨਾ

੪੮੯-੪੯੦. ਇਨ੍ਦ੍ਰਿਯਸਮ੍ਪਨ੍ਨੋਤਿ ਏਤ੍ਥ ਸਮ੍ਪਨ੍ਨਸਦ੍ਦੋ ਪਰਿਪੂਰਿਅਤ੍ਥੋਤਿ ਆਹ ‘‘ਪਰਿਪੁਣ੍ਣਿਨ੍ਦ੍ਰਿਯੋ’’ਤਿ. ਮਿਸ੍ਸਕਾਨਿ ਇਨ੍ਦ੍ਰਿਯਾਨਿ ਕਥਿਤਾਨਿ ਸਾਮਞ੍ਞਤੋਵ ਦੇਸਿਤਤ੍ਤਾ.

ਮੁਦੁਤਰਵਗ੍ਗਵਣ੍ਣਨਾ ਨਿਟ੍ਠਿਤਾ.