੬-੭. ਅਨ੍ਤੇਵਾਸਿਕਸੁਤ੍ਤਾਦਿਵਣ੍ਣਨਾ

੧੫੧-੧੫੨. ਅਨ੍ਤ-ਸਦ੍ਦੋ ਸਮੀਪਤ੍ਥੇ ਵਤ੍ਤਤਿ ‘‘ਉਦਕਨ੍ਤਂ ਵਨਨ੍ਤ’’ਨ੍ਤਿਆਦੀਸੁ, ਕਿਲੇਸੋ ਪਨ ਅਤਿਆਸਨ੍ਨੇ ਵਸਤਿ ਅਬ੍ਭਨ੍ਤਰਵੁਤ੍ਤਿਤਾਯਾਤਿ ‘‘ਅਨ੍ਤੇਵਾਸਿਕ’’ਨ੍ਤਿ ਵੁਤ੍ਤੋ ਵਿਭਤ੍ਤਿਅਲੋਪੇਨ ਯਥਾ ‘‘ਵਨੇਕੁਸਲੋ, ਕੂਲੇਰੁਕ੍ਖਾ’’ਤਿ. ਤੇਨਾਹ – ‘‘ਅਨਨ੍ਤੇਵਾਸਿਕਨ੍ਤਿ ਅਨ੍ਤੋਵਸਨਕਿਲੇਸਵਿਰਹਿਤ’’ਨ੍ਤਿ. ਆਚਰਣਕਕਿਲੇਸਵਿਰਹਿਤਨ੍ਤਿ ਸਮੁਦਾਚਰਣਕਿਲੇਸਰਹਿਤਂ. ਅਨ੍ਤੋ ਅਸ੍ਸ ਵਸਨ੍ਤੀਤਿ ਅਸ੍ਸ ਪੁਗ੍ਗਲਸ੍ਸ ਅਨ੍ਤੋ ਅਬ੍ਭਨ੍ਤਰੇ ਚਿਤ੍ਤੇ ਵਸਨ੍ਤਿ ਪਵਤ੍ਤਨ੍ਤਿ. ਤੇ ਏਤਂ ਅਧਿਭਵਨ੍ਤੀਤਿ ਤੇ ਕਿਲੇਸਾ ਏਤਂ ਪੁਗ੍ਗਲਂ ਅਭਿਭਵਿਤ੍ਵਾ ਅਤ੍ਤਨੋ ਵਸੇ ਵਤ੍ਤੇਨ੍ਤਿ. ਤੇਨਾਹ – ‘‘ਅਜ੍ਝੋਤ੍ਥਰਨ੍ਤਿ ਸਿਕ੍ਖਾਪੇਨ੍ਤਿ ਵਾ’’ਤਿ. ਤੇਹਿ ਆਚਰਿਯੇਹੀਤਿ ਤੇਹਿ ਕਿਲੇਸਸਙ੍ਖਾਤੇਹਿ ਸਤ੍ਤੇ ਅਤ੍ਤਨੋ ਗਤਿਯਂ ਠਪੇਨ੍ਤੇਹਿ ਆਚਰਿਯੇਹਿ. ਸਤ੍ਤਮਂ ਹੇਟ੍ਠਾ ਕਥਿਤਨਯਮੇਵਾਤਿ ਯਸ੍ਮਾ ਹੇਟ੍ਠਾ ਖਨ੍ਧਵਸੇਨ ਦੇਸਨਾ ਆਗਤਾ, ਇਧ ਆਯਤਨਵਸੇਨਾਤਿ ਅਯਮੇਵ ਵਿਸੇਸੋ.

ਅਨ੍ਤੇਵਾਸਿਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.