੮. ਅਤ੍ਥਿਨੁਖੋਪਰਿਯਾਯਸੁਤ੍ਤਵਣ੍ਣਨਾ

੧੫੩. ਪਰਿਯਾਯਤਿ ਪਰਿਗਚ੍ਛਤਿ ਫਲਂ ਏਤਸ੍ਸਾਤਿ ਪਰਿਯਾਯੋ ਹੇਤੂਤਿ ਆਹ – ‘‘ਯਂ ਪਰਿਯਾਯਨ੍ਤਿ ਯਂ ਕਾਰਣ’’ਨ੍ਤਿ. ਪਚ੍ਚਕ੍ਖਦਿਟ੍ਠੇ ਅਵਿਪਰੀਤੇ ਅਤ੍ਥੇ ਪਵਤ੍ਤਸਦ੍ਧਾ ਪਚ੍ਚਕ੍ਖਸਦ੍ਧਾ ਯਥਾ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਖਾਤੋ ਧਮ੍ਮੋ’’ਤਿ (ਮ. ਨਿ. ੧.੨੮੮) ਚ. ਏਵਂ ਕਿਰਾਤਿ ਇਤਿ ਕਿਰਾਯ ਉਪ੍ਪਨ੍ਨੋ ਸਦ੍ਦਹਨਾਕਾਰੋ ਸਦ੍ਧਾਪਤਿਰੂਪਕੋ. ਏਤਨ੍ਤਿ ‘‘ਅਞ੍ਞਤ੍ਰੇਵ ਸਦ੍ਧਾਯਾ’’ਤਿ ਏਤਂ ਵਚਨਂ. ਰੁਚਾਪੇਤ੍ਵਾਤਿ ਕਿਞ੍ਚਿ ਅਤ੍ਥਂ ਅਤ੍ਤਨੋ ਮਤਿਯਾ ਰੋਚੇਤ੍ਵਾ. ਖਮਾਪੇਤ੍ਵਾਤਿ ਤਸ੍ਸੇਵ ਵੇਵਚਨਂ, ਚਿਤ੍ਤਂ ਤਥਾ ਖਮਾਪੇਤ੍ਵਾ. ਤੇਨਾਹ – ‘‘ਅਤ੍ਥੇਤਨ੍ਤਿ ਗਹਣਾਕਾਰੋ’’ਤਿ. ਪਰਮ੍ਪਰਾਗਤਸ੍ਸ ਅਤ੍ਥਸ੍ਸ ਏਵਂ ਕਿਰਸ੍ਸਾਤਿ ਅਨੁਸ੍ਸਵਨਂ. ਕਾਰਣਂ ਚਿਨ੍ਤੇਨ੍ਤਸ੍ਸਾਤਿ ਯੁਤ੍ਤਿਂ ਚਿਨ੍ਤੇਨ੍ਤਸ੍ਸ. ਕਾਰਣਂ ਉਪਟ੍ਠਾਤੀਤਿ ‘‘ਸਾਧੂ’’ਤਿ ਅਤ੍ਤਨੋ ਚਿਤ੍ਤਸ੍ਸ ਉਪਤਿਟ੍ਠਤਿ. ਅਤ੍ਥੇਤਨ੍ਤਿ ‘‘ਏਤਂ ਕਾਰਣਂ ਏਵਮਯਮਤ੍ਥੋ ਯੁਜ੍ਜਤੀ’’ਤਿ ਚਿਤ੍ਤੇਨ ਗਹਣਂ. ਆਕਾਰਪਰਿਵਿਤਕ੍ਕੋਤਿ ਯੁਤ੍ਤਿਪਰਿਕਪ੍ਪਨਾ. ਲਦ੍ਧੀਤਿ ਨਿਚ੍ਛਯੇਨ ਗਹਣਂ, ਸਾ ਚ ਖੋ ਦਿਟ੍ਠਿ ਅਯਾਥਾਵਗ੍ਗਹਣੇਨ ਅਞ੍ਞਾਣਮੇਵਾਤਿ ਦਟ੍ਠਬ੍ਬਂ. ਤਨ੍ਤਿ ਲਦ੍ਧਿਂ. ਅਤ੍ਥੇਸਾਤਿ ਏਸਾ ਲਦ੍ਧਿ ਮਮ ਉਪ੍ਪਨ੍ਨਾ ਅਤ੍ਥਿ ਯੁਤ੍ਤਰੂਪਾ ਹੁਤ੍ਵਾ ਉਪਲਬ੍ਭਤਿ. ਏਵਂ ਗਹਣਾਕਾਰੋ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿ ਨਾਮ, ਪਠਮੁਪ੍ਪਨ੍ਨਲਦ੍ਧਿਸਙ੍ਖਾਤਾਯ ਦਿਟ੍ਠਿਯਾ ਨਿਜ੍ਝਾਨਂ ਖਮਨਾਕਾਰੋ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿ ਨਾਮ. ਪਞ੍ਚ ਠਾਨਾਨੀਤਿ ਯਥਾਵੁਤ੍ਤਾਨਿ ਸਦ੍ਧਾਦੀਨਿ ਪਞ੍ਚ ਕਾਰਣਾਨਿ. ਮੁਞ੍ਚਿਤ੍ਵਾ ਅਗ੍ਗਹੇਤ੍ਵਾ. ਹੇਟ੍ਠਿਮਮਗ੍ਗਵਜ੍ਝਾਨਂ ਰਾਗਾਦੀਨਂ ਅਭਾਵਂ ਸਨ੍ਧਾਯ ‘‘ਨਤ੍ਥਿ ਮੇ ਅਜ੍ਝਤ੍ਤਂ ਰਾਗਦੋਸਮੋਹੋ’’ਤਿ ਅਯਂ ਸੇਕ੍ਖਾਨਂ ਪਚ੍ਚਵੇਕ੍ਖਣਾ, ਸਬ੍ਬਸੋ ਅਭਾਵਂ ਸਨ੍ਧਾਯ ਅਸੇਕ੍ਖਾਨਨ੍ਤਿ ਆਹ – ‘‘ਸੇਕ੍ਖਾਸੇਕ੍ਖਾਨਂ ਪਚ੍ਚਵੇਕ੍ਖਣਾ ਕਥਿਤਾ’’ਤਿ. ‘‘ਸਨ੍ਤਂ ਵਾ ਅਜ੍ਝਤ੍ਤ’’ਨ੍ਤਿਆਦਿਨਾ ਸੇਕ੍ਖਾਨਂ, ‘‘ਅਸਨ੍ਤਂ ਵਾ ਅਜ੍ਝਤ੍ਤ’’ਨ੍ਤਿਆਦਿਨਾ ਅਸੇਕ੍ਖਾਨਂ ਪਚ੍ਚਵੇਕ੍ਖਣਾ ਕਥਿਤਾਤਿ ਦਟ੍ਠਬ੍ਬਂ.

ਅਤ੍ਥਿਨੁਖੋਪਰਿਯਾਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.