੬. ਘੋਸਿਤਸੁਤ੍ਤਵਣ੍ਣਨਾ

੧੨੯. ਰੂਪਾ ਚ ਮਨਾਪਾਤਿ ਨੀਲਾਦਿਭੇਦਾ ਰੂਪਧਮ੍ਮਾ ਚ ਮਨਸਾ ਮਨੁਞ੍ਞਾ ਪਿਯਰੂਪਾ ਸਂਵਿਜ੍ਜਨ੍ਤਿ, ਇਦਞ੍ਚ ਸੁਖਵੇਦਨੀਯਸ੍ਸ ਫਸ੍ਸਸ੍ਸ ਸਭਾਵਦਸ੍ਸਨਤ੍ਥਂ. ਏਵਂ ‘‘ਰੂਪਾ ਚ ਮਨਾਪਾ ਉਪੇਕ੍ਖਾਵੇਦਨਿਯਾ’’ਤਿ ਏਤ੍ਥਾਪਿ ਯਥਾਰਹਂ ਵਤ੍ਤਬ੍ਬਂ. ਚਕ੍ਖੁਵਿਞ੍ਞਾਣ…ਪੇ… ਫਸ੍ਸਨ੍ਤਿ ਵੁਤ੍ਤਂ. ਉਪਨਿਸ੍ਸਯਕੋਟਿਯਾ ਹਿ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਫਸ੍ਸੋ ਸੁਖਵੇਦਨੀਯੋ, ਨ ਸਹਜਾਤਕੋਟਿਯਾ. ਤੇਨਾਹ – ‘‘ਏਕਂ ਫਸ੍ਸਂ ਪਟਿਚ੍ਚ ਜਵਨਵਸੇਨ ਸੁਖਵੇਦਨਾ ਉਪ੍ਪਜ੍ਜਤੀ’’ਤਿ. ਸੇਸਪਦੇਸੂਤਿ ‘‘ਸਂਵਿਜ੍ਜਤਿ ਖੋ, ਗਹਪਤਿ, ਸੋਤਧਾਤੂ’’ਤਿ ਆਗਤੇਸੁ ਪਞ੍ਚਸੁ ਕੋਟ੍ਠਾਸੇਸੁ.

ਤੇਵੀਸਤਿ ਧਾਤੁਯੋ ਕਥਿਤਾ ਛਨ੍ਨਂ ਦ੍ਵਾਰਾਨਂ ਵਸੇਨ ਵਿਭਜ੍ਜਗਹਣੇਨ. ਵਤ੍ਥੁਨਿਸ੍ਸਿਤਨ੍ਤਿ ਹਦਯਵਤ੍ਥੁਨਿਸ੍ਸਿਤਂ. ਪਞ੍ਚਦ੍ਵਾਰੇ ਵੀਸਤਿ, ਮਨੋਦ੍ਵਾਰੇ ਤਿਸ੍ਸੋ ਏਵਂ ਤੇਵੀਸਤਿ.

ਘੋਸਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.