੧੩. ਗਹਪਤਿਵਗ੍ਗੋ

੧-੩. ਵੇਸਾਲੀਸੁਤ੍ਤਾਦਿਵਣ੍ਣਨਾ

੧੨੪-੧੨੬. ਦ੍ਵੀਸੂਤਿ ਇਮਸ੍ਮਿਂ ਗਹਪਤਿਵਗ੍ਗੇ ਪਠਮਦੁਤਿਯੇਸੁ ਤਤਿਯੇ ਚ ਵੁਤ੍ਤਤ੍ਥਮੇਵ ਪਾਠਜਾਤਂ ਅਪੁਬ੍ਬਂ ਨਤ੍ਥੀਤਿ ਅਤ੍ਥੋ.

੪-੫. ਭਾਰਦ੍ਵਾਜਸੁਤ੍ਤਾਦਿਵਣ੍ਣਨਾ

੧੨੭-੧੨੮. ਕਾਮਂ ਅਞ੍ਞੇਪਿ ਪਬ੍ਬਜਿਤਾ ਯੁਤ੍ਤਕਾਲੇ ਪਿਣ੍ਡਂ ਉਲਮਾਨਾ ਚਰਨ੍ਤਿਯੇਵ, ਅਯਂ ਪਨ ਓਦਰਿਤੋ, ਤੇਨੇਵ ਕਾਰਣੇਨ ਪਬ੍ਬਜਿਤੋਤਿ ਦਸ੍ਸੇਨ੍ਤੋ ‘‘ਪਿਣ੍ਡਂ ਉਲਮਾਨੋ’’ਤਿਆਦਿਮਾਹ. ਘਂਸਨ੍ਤੋਵਾਤਿ ਭੂਮਿਯਂ ਘਂਸਨ੍ਤੋ ਏਵ ਪਤ੍ਤਂ ਠਪੇਤਿ. ਪਰਿਕ੍ਖੀਣਨ੍ਤਿ ਸਮਨ੍ਤਤੋ ਪਰਿਕ੍ਖੀਣਂ. ਨਾਲ਼ਿਕੋ …ਪੇ… ਜਾਤਂ, ਅਤਿਰੇਕਪਤ੍ਤਟ੍ਠਪਨਸ੍ਸ ਪਟਿਕ੍ਖਿਤ੍ਤਤ੍ਤਾ ਅਞ੍ਞਂ ਨ ਗਣ੍ਹਾਤਿ. ‘‘ਇਨ੍ਦ੍ਰਿਯਭਾਵਨਨ੍ਤਿ ਚਕ੍ਖਾਦਿਪਞ੍ਚਿਨ੍ਦ੍ਰਿਯਭਾਵਨ’’ਨ੍ਤਿ ਕੇਚਿ ਵਦਨ੍ਤਿ, ਤਥਾ ਵਿਪਸ੍ਸਨਾਭਿਨਿਵੇਸਂ ਕਤ੍ਵਾ ਉਪਰਿਵਿਪਸ੍ਸਨਂ ਵਡ੍ਢਿਤ੍ਵਾਤਿ ਅਧਿਪ੍ਪਾਯੋ. ਅਪਰੇ ਪਨ ‘‘ਸਦ੍ਧਾਪਞ੍ਚਮਾਨਂ ਇਨ੍ਦ੍ਰਿਯਾਨਂ ਵਸੇਨ ਵਿਪਸ੍ਸਨਾਭਿਨਿਵੇਸਂ ਕਤ੍ਵਾ ਤੇਨ ਸੁਖੇਨ ਅਭਿਞ੍ਞਾਪਹਾਨਾਨਂ ਸਮ੍ਪਾਦਨਵਸੇਨ ਇਨ੍ਦ੍ਰਿਯਂ ਭਾਵੇਤ੍ਵਾ’’ਤਿ ਵਦਨ੍ਤਿ.

ਉਪਸਙ੍ਕਮਤੀਤਿ ਏਤ੍ਥ ਯਥਾ ਸੋ ਰਾਜਾ ਉਪਸਙ੍ਕਮਿ, ਤਂ ਆਗਮਨਤੋ ਪਟ੍ਠਾਯ ਦਸ੍ਸੇਤੁਂ ‘‘ਥੇਰੋ ਕਿਰਾ’’ਤਿਆਦਿ ਆਰਦ੍ਧਂ. ਮਹਾਪਾਨਂ ਨਾਮ ਅਞ੍ਞਂ ਕਮ੍ਮਂ ਅਕਤ੍ਵਾ ਪਾਨਪਸੁਤੋ ਹੁਤ੍ਵਾ ਸਤ੍ਤਾਹਂ ਤਦਨੁਰੂਪਪਰਿਜਨਸ੍ਸ ਸੁਰਾਪਿਵਨਂ. ਤੇਨਾਹ ‘‘ਮਹਾਪਾਨਂ ਨਾਮ ਪਿਵਿਤ੍ਵਾ’’ਤਿ. ਸਾਲਿਥੁਸੇਹੀਤਿ ਰਤ੍ਤਸਾਲਿਥੁਸੇਹਿ. ਡਯ੍ਹਮਾਨਂ ਵਿਯ ਕਿਪਿਲ੍ਲਿਕਦਂਸਨਜਾਤਾਹਿ ਦੁਕ੍ਖਵੇਦਨਾਹਿ. ਮੁਖਸਤ੍ਤੀਹਿ ਵਿਜ੍ਝਿਂਸੁ ਵਲ੍ਲਭਤਾਯ. ਇਤ੍ਥਿਲੋਲੋ ਹਿ ਸੋ ਰਾਜਾ.

ਪਵੇਣਿਨ੍ਤਿ ਤੇਸਂ ਸਮਾਦਾਨਪਵੇਣਿਂ ਬ੍ਰਹ੍ਮਚਰਿਯਪਬਨ੍ਧਂ. ਪਟਿਪਾਦੇਨ੍ਤੀਤਿ ਸਮ੍ਪਾਦੇਨ੍ਤਿ. ਗਰੁਕਾਰਮ੍ਮਣਨ੍ਤਿ ਗਰੁਕਾਤਬ੍ਬਆਰਮ੍ਮਣਂ, ਅਵੀਤਿਕ੍ਕਮਿਤਬ੍ਬਾਰਮ੍ਮਣਨ੍ਤਿ ਅਤ੍ਥੋ. ਅਸ੍ਸਾਤਿ ਰਞ੍ਞੋ. ਚਿਤ੍ਤਂ ਅਨੋਤਰਨ੍ਤਨ੍ਤਿ ਪਸਾਦਵੀਥਿਂ ਅਨੋਤਰਨ੍ਤਂ ਅਨੁਪਗਚ੍ਛਨ੍ਤਂ. ਵਿਹੇਠੇਤੁਨ੍ਤਿ ਵਿਬਾਧਿਤੁਂ.

ਲੋਭਸ੍ਸ ਅਪਰਾਪਰੁਪ੍ਪਤ੍ਤਿਯਾ ਬਹੁਵਚਨਵਸੇਨ ‘‘ਲੋਭਧਮ੍ਮਾ’’ਤਿ ਵੁਤ੍ਤਂ. ਉਪ੍ਪਜ੍ਜਨ੍ਤੀਤਿਪਿ ਅਤ੍ਥੋ ਯੇਵ, ਯਸ੍ਮਾ ਉਪ੍ਪਜ੍ਜਮਾਨੋ ਲੋਭਧਮ੍ਮੋ ਅਤ੍ਤਨੋ ਹੇਤੁਪਚ੍ਚਯੇ ਪਰਿਗ੍ਗਹਾਪੇਨ੍ਤੋ ਜਾਨਾਪੇਨ੍ਤੋ ਵਿਯ ਸਹਤਿ ਪਵਤ੍ਤਤੀਤਿ. ਇਮਮੇਵ ਕਾਯਨ੍ਤਿ ਏਤ੍ਥ ਸਮੂਹਤ੍ਥੇ ਏਵ ਕਾਯ-ਸਦ੍ਦੋ ਗਬ੍ਭਾਸਯਾਦਿਟ੍ਠਾਨੇਸੁ ਉਪ੍ਪਜ੍ਜਨਧਮ੍ਮਸਮੂਹਵਿਸਯਤ੍ਤਾ, ਇਤਰੇ ਪਨ ਕਾਯੂਪਲਕ੍ਖਿਤਤਾਯ ‘‘ਕਾਯੋ’’ਤਿ ਵੇਦਿਤਬ੍ਬਾ. ਉਤ੍ਤਾਨਮੇਵ ਹੇਟ੍ਠਾ ਵੁਤ੍ਤਨਯਤ੍ਤਾ.

ਭਾਰਦ੍ਵਾਜਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੬. ਘੋਸਿਤਸੁਤ੍ਤਵਣ੍ਣਨਾ

੧੨੯. ਰੂਪਾ ਚ ਮਨਾਪਾਤਿ ਨੀਲਾਦਿਭੇਦਾ ਰੂਪਧਮ੍ਮਾ ਚ ਮਨਸਾ ਮਨੁਞ੍ਞਾ ਪਿਯਰੂਪਾ ਸਂਵਿਜ੍ਜਨ੍ਤਿ, ਇਦਞ੍ਚ ਸੁਖਵੇਦਨੀਯਸ੍ਸ ਫਸ੍ਸਸ੍ਸ ਸਭਾਵਦਸ੍ਸਨਤ੍ਥਂ. ਏਵਂ ‘‘ਰੂਪਾ ਚ ਮਨਾਪਾ ਉਪੇਕ੍ਖਾਵੇਦਨਿਯਾ’’ਤਿ ਏਤ੍ਥਾਪਿ ਯਥਾਰਹਂ ਵਤ੍ਤਬ੍ਬਂ. ਚਕ੍ਖੁਵਿਞ੍ਞਾਣ…ਪੇ… ਫਸ੍ਸਨ੍ਤਿ ਵੁਤ੍ਤਂ. ਉਪਨਿਸ੍ਸਯਕੋਟਿਯਾ ਹਿ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਫਸ੍ਸੋ ਸੁਖਵੇਦਨੀਯੋ, ਨ ਸਹਜਾਤਕੋਟਿਯਾ. ਤੇਨਾਹ – ‘‘ਏਕਂ ਫਸ੍ਸਂ ਪਟਿਚ੍ਚ ਜਵਨਵਸੇਨ ਸੁਖਵੇਦਨਾ ਉਪ੍ਪਜ੍ਜਤੀ’’ਤਿ. ਸੇਸਪਦੇਸੂਤਿ ‘‘ਸਂਵਿਜ੍ਜਤਿ ਖੋ, ਗਹਪਤਿ, ਸੋਤਧਾਤੂ’’ਤਿ ਆਗਤੇਸੁ ਪਞ੍ਚਸੁ ਕੋਟ੍ਠਾਸੇਸੁ.

ਤੇਵੀਸਤਿ ਧਾਤੁਯੋ ਕਥਿਤਾ ਛਨ੍ਨਂ ਦ੍ਵਾਰਾਨਂ ਵਸੇਨ ਵਿਭਜ੍ਜਗਹਣੇਨ. ਵਤ੍ਥੁਨਿਸ੍ਸਿਤਨ੍ਤਿ ਹਦਯਵਤ੍ਥੁਨਿਸ੍ਸਿਤਂ. ਪਞ੍ਚਦ੍ਵਾਰੇ ਵੀਸਤਿ, ਮਨੋਦ੍ਵਾਰੇ ਤਿਸ੍ਸੋ ਏਵਂ ਤੇਵੀਸਤਿ.

ਘੋਸਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭-੮. ਹਾਲਿਦ੍ਦਿਕਾਨਿਸੁਤ੍ਤਾਦਿਵਣ੍ਣਨਾ

੧੩੦-੧੩੧. ਤਂ ਇਤ੍ਥੇਤਨ੍ਤਿ ਚਕ੍ਖੁਨਾ ਯਂ ਰੂਪਂ ਦਿਟ੍ਠਂ, ਤਂ ਇਤ੍ਥਨ੍ਤਿ ਅਤ੍ਥੋ. ਤਂ ਸੁਖਵੇਦਨਿਯਨ੍ਤਿ ਤਂ ਸੁਖਵੇਦਨਾਯ ਉਪਨਿਸ੍ਸਯਕੋਟਿਯਾ ਪਚ੍ਚਯਭੂਤਂ ਚਕ੍ਖੁਵਿਞ੍ਞਾਣਞ੍ਚੇਵ, ਯੋ ਚ ਯਥਾਰਹਂ ਉਪਨਿਸ੍ਸਯਕੋਟਿਯਾ ਵਾ, ਅਨਨ੍ਤਰੋ ਚੇ ਅਨਨ੍ਤਰਕੋਟਿਯਾ ਵਾ, ਸਹਜਾਤੋ ਚੇ ਸਮ੍ਪਯੁਤ੍ਤਕੋਟਿਯਾ ਵਾ, ਸੁਖਵੇਦਨਾਯ ਪਚ੍ਚਯੋ ਫਸ੍ਸੋ. ਤਂ ਸੁਖਵੇਦਨਿਯਞ੍ਚ ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਵੇਦਨਾਤਿ ਯੋਜਨਾ. ਏਸ ਨਯੋ ਸਬ੍ਬਤ੍ਥ ਸਬ੍ਬੇਸੁ ਸੇਸੇਸੁ ਸਤ੍ਤਸੁ ਵਾਰੇਸੁ. ਮਨੋਧਾਤੁਯੇਵ ਵਾ ਸਮਾਨਾਤਿ ਅਭਿਧਮ੍ਮਨਯੇਨ. ਸੁਤ੍ਤਨ੍ਤਨਯੇਨ ਪਨ ਸੁਞ੍ਞਤਟ੍ਠੇਨ ਨਿਸ੍ਸਤ੍ਤਨਿਜ੍ਜੀਵਟ੍ਠੇਨ ਚ ਮਨੋਧਾਤੁਸਮਞ੍ਞਂ ਲਭਤੇਵ. ਅਟ੍ਠਮਂ ਉਤ੍ਤਾਨਮੇਵ ਹੇਟ੍ਠਾ ਵੁਤ੍ਤਨਯਤ੍ਤਾ.

ਹਾਲਿਦ੍ਦਿਕਾਨਿਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯. ਲੋਹਿਚ੍ਚਸੁਤ੍ਤਵਣ੍ਣਨਾ

੧੩੨. ਤੇਪਿ ਮਾਣਵਕਾਤ੍ਵੇਵ ਵੁਤ੍ਤਾ, ਨ ਬ੍ਰਾਹ੍ਮਣਕੁਮਾਰਾ ਏਵ. ਸੇਲੇਯ੍ਯਕਾਨੀਤਿ ਅਞ੍ਞਮਞ੍ਞਂ ਸਿਲਿਸ੍ਸਨਲਙ੍ਘਨਕੀਲ਼ਨਾਨਿ.

ਉਪਟ੍ਠਾਨਵਸੇਨ ਇਭਂ ਹਰਨ੍ਤੀਤਿ ਇਬ੍ਭਾ, ਹਤ੍ਥਿਗੋਪਕਾ. ਤੇ ਪਨ ਨਿਹੀਨਕੁਟੁਮ੍ਬਸ੍ਸ ਭੋਗ੍ਗਂ ਉਪਾਦਾਯ ਗਹਪਤਿਭਾਵਂ ਉਪਾਦਾਯ ‘‘ਗਹਪਤਿਕਾ’’ਤਿਪਿ ਵੁਚ੍ਚਨ੍ਤੀਤਿ ਆਹ ‘‘ਗਹਪਤਿਕਾ’’ਤਿ. ਕਣ੍ਹਾਤਿ ਕਣ੍ਹਾਭਿਜਾਤਿਕਾ. ਰਟ੍ਠਂ ਭਰਨ੍ਤੀਤਿ ਯਸ੍ਮਿਂ ਰਟ੍ਠੇ ਵਸਨ੍ਤਿ, ਤਸ੍ਸ ਰਟ੍ਠਸ੍ਸ ਬਲਿਂ ਭਰਣੇਨ, ਅਤ੍ਤਨੋ ਵਾ ਕੁਟੁਮ੍ਬਸ੍ਸ ਭਰਣੇਨ ਭਰਤਾ. ਪਰਿਯਾਯਨ੍ਤਾਤਿ ਪਰਿਤੋ ਸਂਚਰਨ੍ਤਾ ਕੀਲ਼ਨ੍ਤਿ.

ਸੀਲਜੇਟ੍ਠਕਾਤਿ ਸੀਲਪ੍ਪਧਾਨਾ. ਯੇ ਪੁਰਾਣਂ ਸਰਨ੍ਤਿ, ਤੇ ਸੀਲੁਤ੍ਤਮਾ ਅਹੇਸੁਂ. ਦ੍ਵਾਰਾਨਿ ਚਕ੍ਖਾਦਿਦ੍ਵਾਰਾਨਿ.

ਅਪਕ੍ਕਮਿਤ੍ਵਾ ਅਪੇਤਾ ਵਿਰਹਿਤਾ ਹੁਤ੍ਵਾ. ਵਿਸਮਾਨੀਤਿ ਵਿਗਤਸਮਾਨਿ ਦੁਚ੍ਚਰਿਤਸਭਾਵਾਨਿ. ਨਾਨਾਵਿਧਦਣ੍ਡਾ ਨਾਨਾਵਿਧਦਣ੍ਡਨਿਪਾਤਾ.

ਅਨਾਹਾਰਕਾਤਿ ਕਿਞ੍ਚਿ ਅਭੁਞ੍ਜਨਕਾ. ਪਙ੍ਕੋ ਵਿਯ ਪਙ੍ਕੋ, ਮਲਂ. ਦਨ੍ਤਪਙ੍ਕੋ ਪੁਰਿਮਪਦਲੋਪੇਨ ਪਙ੍ਕੋਤਿ ਵੁਤ੍ਤੋਤਿ ‘‘ਪਙ੍ਕੋ ਨਾਮ ਦਨ੍ਤਮਲ’’ਨ੍ਤਿ ਵੁਤ੍ਤਂ. ਅਜੇਹਿ ਕਾਤਬ੍ਬਕਾਨਂ ਅਕੋਪੇਤ੍ਵਾ ਕਰਣਂ ਸਮਾਦਾਨਵਸੇਨ ਵਤਂ. ਏਸ ਨਯੋ ਸੇਸੇਸੁਪਿ. ਕੋਹਞ੍ਞਂ ਨਾਮ ਅਤ੍ਤਨਿ ਵਿਜ੍ਜਮਾਨਦੋਸਂ ਪਟਿਚ੍ਛਾਦੇਤ੍ਵਾ ਅਸਨ੍ਤਗੁਣਪਕਾਸਨਾਤਿ ਆਹ – ‘‘ਪਟਿਚ੍ਛਨ੍ਨ…ਪੇ… ਕੋਹਞ੍ਞਞ੍ਚੇਵਾ’’ਤਿ. ਪਰਿਕ੍ਖਾਰਭਣ੍ਡਕਵਣ੍ਣਾਤਿ ਪਰਿਕ੍ਖਾਰਭਣ੍ਡਾ ਕਪ੍ਪਕਾਤਿ. ਤੇ ਚ ਖੋ ਅਤ੍ਤਨੋ ਜੀਵਿਕਤ੍ਥਾਯ ਆਮਿਸਕਿਞ੍ਜਕ੍ਖਸ੍ਸ ਅਤ੍ਤਨਿਬਨ੍ਧਨਤ੍ਥਾਯ ਅਮੋਚਨਤ੍ਥਾਯ ਕਤਾ.

ਅਖਿਲਨ੍ਤਿ ਚੇਤੋਖਿਲਰਹਿਤਂ ਬ੍ਰਹ੍ਮਵਿਹਾਰਵਸੇਨ. ਤੇਨਾਹ ‘‘ਮੁਦੁ ਅਥਦ੍ਧ’’ਨ੍ਤਿ.

ਅਧਿਮੁਤ੍ਤੋਤਿ ਅਭਿਰਤਿਵਸੇਨ ਯੁਤ੍ਤਪਯੁਤ੍ਤੋ. ਪਰਿਤ੍ਤਚਿਤ੍ਤੋਤਿ ਪਰਿਤੋ ਖਣ੍ਡਿਤਚਿਤ੍ਤੋ. ਅਪ੍ਪਮਾਣਚਿਤ੍ਤੋਤਿ ਏਤ੍ਥ ‘‘ਕੋ ਅਯ’’ਨ੍ਤਿ ਪਟਿਕ੍ਖਿਤੁਂ ਸਕ੍ਕੁਣੇਯ੍ਯਚਿਤ੍ਤੋ.

ਲੋਹਿਚ੍ਚਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਵੇਰਹਚ੍ਚਾਨਿਸੁਤ੍ਤਵਣ੍ਣਨਾ

੧੩੩. ਬ੍ਰਾਹ੍ਮਣਿਂ ਧਮ੍ਮਸਵਨਾਯ ਚੋਦੇਨ੍ਤੋ ਮਾਣਵਕੋ ‘‘ਯਗ੍ਘੇ’’ਤਿ ਅਵੋਚ. ਤੇਨਾਹ ‘‘ਯਗ੍ਘੇਤਿ ਚੋਦਨਤ੍ਥੇ ਨਿਪਾਤੋ’’ਤਿ.

ਵੇਰਹਚ੍ਚਾਨਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਗਹਪਤਿਵਗ੍ਗਵਣ੍ਣਨਾ ਨਿਟ੍ਠਿਤਾ.