੩. ਪਰਿਹਾਨਸੁਤ੍ਤਵਣ੍ਣਨਾ

੯੬. ਪਰਿਹਾਨਸਭਾਵਨ੍ਤਿ ਅਨਵਜ੍ਜਧਮ੍ਮੇਹਿ ਪਰਿਹਾਯਨਸਭਾਵਂ. ਅਭਿਭਵਿਤਾਨੀਤਿ ਅਭਿਭੂਤਾਨਿ ਨਿਬ੍ਬਿਸੇਵਨਭਾਵਾਕਾਰੇਨ. ਸਰਸਙ੍ਕਪ੍ਪਾਤਿ ਤਸ੍ਮਿਂ ਤਸ੍ਮਿਂ ਵਿਸਯੇ ਅਨਵਟ੍ਠਿਤਭਾਵੇਨ ਸਙ੍ਕਪ੍ਪਾ. ਸਂਯੋਜਨਿਯਾਤਿ ਸਂਯੋਜੇਤਬ੍ਬਾ. ਸਂਯੋਜਨਾਨਞ੍ਹਿ ਪੁਨਪ੍ਪੁਨਂ ਉਪ੍ਪਤ੍ਤਿਯਾ ਓਕਾਸਂ ਦੇਨ੍ਤੋ ਕਿਲੇਸਜਾਤਂ ਅਧਿਵਾਸੇਤਿ ਨਾਮ. ਕਿਲੇਸੋ ਏਵ ਕਿਲੇਸਜਾਤਂ. ਆਰਮ੍ਮਣਂ ਪਨ ਚਿਤ੍ਤੇ ਕਰੋਨ੍ਤੋ ਅਧਿਵਾਸੇਤਿ ਨਾਮ. ਛਨ੍ਦਰਾਗਪ੍ਪਹਾਨੇਨ ਨ ਪਜਹਤਿ ਆਰਮ੍ਮਣਂ, ਕਿਲੇਸਂ ਪਨ ਅਨੁਪ੍ਪਤ੍ਤਿਧਮ੍ਮਤਾਪਾਦਨੇਨ ਏਵ. ਅਭਿਭਵਿਤਂ ਆਯਤਨਨ੍ਤਿ ਕਥਿਤਂ ਅਧਿਵਾਸਨਾਦਿਨਾ. ‘‘ਕਥਞ੍ਚ, ਭਿਕ੍ਖਵੇ, ਪਰਿਹਾਨਧਮ੍ਮੋ ਹੋਤੀ’’ਤਿ ਧਮ੍ਮਂ ਪੁਚ੍ਛਿਤ੍ਵਾ ਤਂ ਵਿਭਜਨ੍ਤੇਨ ਭਗਵਤਾ ‘‘ਤਞ੍ਚੇ ਭਿਕ੍ਖੁ ਅਧਿਵਾਸੇਤੀ’’ਤਿਆਦਿਨਾ ਪੁਗ੍ਗਲੇਨ ਪੁਗ੍ਗਲਾਧਿਟ੍ਠਾਨੇਨ ਧਮ੍ਮੋ ਦਸ੍ਸਿਤੋ.

ਪਰਿਹਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.