੧੦. ਸਲ਼ਵਗ੍ਗੋ

੧. ਅਦਨ੍ਤਅਗੁਤ੍ਤਸੁਤ੍ਤਵਣ੍ਣਨਾ

੯੪. ਅਦਮਿਤਾਤਿ ਦਮਂ ਨਿਬ੍ਬਿਸੇਵਨਭਾਵਂ ਅਨੀਤਾ. ਅਗੋਪਿਤਾਤਿ ਸਤਿਸਙ੍ਖਾਤਾਯ ਵਤਿਯਾ ਨ ਰਕ੍ਖਿਤਾ. ਅਪਿਹਿਤਾਤਿ ਸਤਿਕਵਾਟੇਨ ਨ ਪਿਹਿਤਾ. ਚਤੂਹਿਪਿ ਪਦੇਹਿ ਇਨ੍ਦ੍ਰਿਯਾਨਂ ਅਨਾਵਰਣਮੇਵਾਹ. ਅਧਿਕਂ ਵਹਨ੍ਤੀਤਿ ਅਧਿਵਾਹਾ, ਦੁਕ੍ਖਸ੍ਸ ਅਧਿਵਾਹਾ ਦੁਕ੍ਖਾਧਿਵਾਹਾ. ਨਿਰਯੇਸੁ ਉਪ੍ਪਜ੍ਜਨਕਂ ਨੇਰਯਿਕਂ. ਆਦਿ-ਸਦ੍ਦੇਨ ਸੇਸਪਾਲ਼ਿਂ ਸਙ੍ਗਣ੍ਹਾਤਿ.

ਸਲ਼ੇਵਾਤਿ ਛ-ਕਾਰਸ੍ਸ ਸ-ਕਾਰੋ, ਲ਼-ਕਾਰੋ ਪਦਸਨ੍ਧਿਕਰੋ. ਯਤ੍ਥਾਤਿ ਨਿਮਿਤ੍ਤਤ੍ਥੇ ਭੁਮ੍ਮਂ. ਅਨਵਸ੍ਸੁਤਾ ਅਤਿਨ੍ਤਾਤਿ ਰਾਗੇਨ ਅਤੇਮਿਤਾ.

ਅਸ੍ਸਾਦਿਤਨ੍ਤਿ ਅਸ੍ਸਾਦਂ ਇਤਂ ਉਪਗਤਂ. ਤੇਨਾਹ ‘‘ਅਸ੍ਸਾਦਵਨ੍ਤ’’ਨ੍ਤਿ. ਸੁਖਦੁਕ੍ਖਨ੍ਤਿ ਇਟ੍ਠਾਨਿਟ੍ਠਂ. ਅਨ੍ਵਯਤੀਤਿ ਅਨ੍ਵਯੋ, ਹੇਤੁ. ਫਸ੍ਸੋਤਿ ਅਨ੍ਵਯੋ ਏਤਸ੍ਸਾਤਿ ਫਸ੍ਸਨ੍ਵਯਨ੍ਤਿ ਆਹ – ‘‘ਫਸ੍ਸਹੇਤੁਕ’’ਨ੍ਤਿ. ‘‘ਅਵਿਰੁਦ੍ਧ’’ਇਤਿ ਵਿਭਤ੍ਤਿਲੋਪੇਨ ਨਿਦ੍ਦੇਸੋ.

ਪਪਞ੍ਚਸਞ੍ਞਾਤਿ ਤਣ੍ਹਾਦਿਸਮਧੂਪਸਂਹਤਸਞ੍ਞਾ. ਤੇਨਾਹ ‘‘ਕਿਲੇਸਸਞ੍ਞਾਯ ਪਪਞ੍ਚਸਞ੍ਞਾ ਨਾਮ ਹੁਤ੍ਵਾ’’ਤਿ. ਪਪਞ੍ਚਸਞ੍ਞਾ ਏਤੇਸਂ ਅਤ੍ਥੀਤਿ ਪਪਞ੍ਚਸਞ੍ਞਾ, ਇਤਰੀਤਰਾ ਨਰਾ. ਪਪਞ੍ਚਯਨ੍ਤਾਤਿ ਸਂਸਾਰੇ ਪਪਞ੍ਚਂ ਚਿਰਾਯਨਂ ਕਰੋਨ੍ਤਾ. ਸਞ੍ਞਿਨੋਤਿ ਗੇਹਸ੍ਸਿਤਸਞ੍ਞਾਯ ਸਞ੍ਞਾਵਨ੍ਤੋ. ਮਨੋਮਯਂ ਵਿਤਕ੍ਕਨ੍ਤਿ ਕੇਵਲਂ ਮਨਸਾ ਸਮ੍ਭਾਵਿਤਂ ਮਿਚ੍ਛਾਵਿਤਕ੍ਕਂ. ਇਰੀਯਤੀਤਿ ਇਰਿਯਂ ਪਟਿਪਤ੍ਤਿਂ ਇਰੀਯਤਿ ਪਟਿਪਜ੍ਜਤਿ.

ਸੁਟ੍ਠੁ ਭਾਵਿਤੋਤਿ ਸੁਟ੍ਠੁਭਾਵਂ ਸੁਭਾਵਨਂ ਇਤੋ ਭਾਵਿਤਭਾਵਿਤੋ. ਫੁਟ੍ਠਸ੍ਸ ਚਿਤ੍ਤਨ੍ਤਿ ਤੇਨ ਯਥਾਵੁਤ੍ਤਫਸ੍ਸੇਨ ਫੁਟ੍ਠਂ ਅਸ੍ਸ ਚਿਤ੍ਤਂ. ਨ ਵਿਕਮ੍ਪਤੇ ਕ੍ਵਚੀਤਿ ਕਿਸ੍ਮਿਞ੍ਚਿ ਇਟ੍ਠਾਨਿਟ੍ਠਾਰਮ੍ਮਣੇ ਨ ਕਮ੍ਪਤਿ. ਪਾਰਗਾਤਿ ਪਾਰਗਾਮਿਨੋ ਭਵਥ.

ਅਦਨ੍ਤਅਗੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਮਾਲੁਕ੍ਯਪੁਤ੍ਤਸੁਤ੍ਤਵਣ੍ਣਨਾ

੯੫. ਅਪਸਾਦੇਤੀਤਿ ਤਜ੍ਜੇਤਿ. ਉਸ੍ਸਾਦੇਤੀਤਿ ਉਕ੍ਕਂਸੇਤਿ. ਅਯਂ ਕਿਰ ਥੇਰੋ ਮਾਲੁਕ੍ਯਪੁਤ੍ਤੋ. ਪਮਜ੍ਜਿਤ੍ਵਾਤਿ ਯੋਨਿਸੋਮਨਸਿਕਾਰਸ੍ਸ ਅਨਨੁਯੁਜ੍ਜਨੇਨ ਪਮਜ੍ਜਿਤ੍ਵਾ.

ਯਤ੍ਰਾਤਿ ਪਚ੍ਚਤ੍ਤਂ ਵਚਨਾਲਙ੍ਕਾਰੇ. ਨਾਮਾਤਿ ਅਸਮ੍ਭਾਵਨੇ ਅਪਸਾਦਨਪਕ੍ਖੇ, ਉਸ੍ਸਾਦਨਪਕ੍ਖੇ ਪਨ ਸਮ੍ਭਾਵਨੇ. ਕਿਂ ਜਾਤਨ੍ਤਿ ਕਿਂ ਤੇਨ ਮਹਲ੍ਲਕਭਾਵੇਨ ਜਾਤਨ੍ਤਿ ਮਹਲ੍ਲਕਭਾਵਂ ਤਿਣਾਯਪਿ ਅਮਞ੍ਞਮਾਨੋ ਵਦਤਿ. ਤੇਨਾਹ ‘‘ਯਦਿ…ਪੇ… ਅਨੁਗ੍ਗਣ੍ਹਨ੍ਤੋ’’ਤਿ. ਅਨੁਗ੍ਗਣ੍ਹਨ੍ਤੋਤਿ ਅਚਿਨ੍ਤੇਨ੍ਤੋ. ਮਾਦਿਸਾਨਂ ਭਗਵਤੋ ਓਵਾਦੋ ਉਪਕਾਰਾਵਹੋਤਿ ਏਤਰਹਿ ਓਵਾਦਞ੍ਚ ਪਸਂਸਨ੍ਤੋ.

‘‘ਅਦਿਟ੍ਠਾ ਅਦਿਟ੍ਠਪੁਬ੍ਬਾ’’ਤਿਆਦਿਨਾ ਪਰਿਕਪ੍ਪਵਸੇਨ ਵੁਤ੍ਤਨਿਦਸ੍ਸਨਂ ‘‘ਯਥਾ ਏਤੇਸੁ ਛਨ੍ਦਾਦਯੋ ਨ ਹੋਨ੍ਤਿ, ਏਵਮਿਤਰੇਸੁਪਿ ਪਰਿਞ੍ਞਾਤੇਸੂ’’ਤਿ ਨਯਪਟਿਪਜ੍ਜਨਤ੍ਥਂ, ਤੇਸਮ੍ਪਿ ਇਮੇਹਿ ਸਮਾਨੇਤਬ੍ਬਤ੍ਤਾ. ਤੇਨ ਵੁਤ੍ਤਂ ‘‘ਸੁਪਿਨਕੂਪਮਾ ਕਾਮਾ’’ਤਿ (ਮ. ਨਿ. ੧.੨੩੪; ੨.੪੬; ਪਾਚਿ. ੪੧੭; ਚੂਲ਼ਵ. ੬੫).

ਚਕ੍ਖੁਵਿਞ੍ਞਾਣੇਨ ਦਿਟ੍ਠੇ ਦਿਟ੍ਠਮਤ੍ਤਨ੍ਤਿ ਚਕ੍ਖੁਵਿਞ੍ਞਾਣਸ੍ਸ ਰੂਪਾਯਤਨਂ ਯਤ੍ਤਕੋ ਗਹਣਾਕਾਰੋ, ਤਤ੍ਤਕਂ. ਕਿਤ੍ਤਕਂ ਪਮਾਣਨ੍ਤਿ ਅਤ੍ਤਸਂਵੇਦਿਯਂ ਪਰਸ੍ਸ ਨ ਦਿਸਿਤਬ੍ਬਂ, ਕਪ੍ਪਨਾਮਤ੍ਤਂ ਰੂਪਂ. ਤੇਨਾਹ ‘‘ਚਕ੍ਖੁਵਿਞ੍ਞਾਣਂ ਹੀ’’ਤਿਆਦਿ. ਰੂਪੇਤਿ ਰੂਪਾਯਤਨੇ. ਰੂਪਮਤ੍ਤਮੇਵਾਤਿ ਨੀਲਾਦਿਭੇਦਂ ਰੂਪਾਯਤਨਮਤ੍ਤਂ, ਨ ਨੀਲਾਦਿ. ਵਿਸੇਸਨਿਵਤ੍ਤਨਤ੍ਥੋ ਹਿ ਅਯਂ ਮਤ੍ਤ-ਸਦ੍ਦੋ. ਯਦਿ ਏਵਂ, ਏਵ-ਕਾਰੋ ਕਿਮਤ੍ਥਿਯੋ? ਚਕ੍ਖੁਵਿਞ੍ਞਾਣਞ੍ਹਿ ਰੂਪਾਯਤਨੇ ਲਬ੍ਭਮਾਨਮ੍ਪਿ ਨੀਲਾਦਿਵਿਸੇਸਂ ‘‘ਇਦਂ ਨੀਲਂ ਨਾਮ, ਇਦਂ ਪੀਤਂ ਨਾਮਾ’’ਤਿ ਨ ਗਣ੍ਹਾਤਿ. ਕੁਤੋ ਨਿਚ੍ਚਾਨਿਚ੍ਚਾਦਿਸਭਾਵਤ੍ਥਨ੍ਤਿ ਸਂਹਿਤਸ੍ਸਪਿ ਨਿਵਤ੍ਤਨਤ੍ਥਂ ਏਵਕਾਰਗ੍ਗਹਣਂ. ਤੇਨਾਹ ‘‘ਨ ਨਿਚ੍ਚਾਦਿਸਭਾਵ’’ਨ੍ਤਿ. ਸੇਸਵਿਞ੍ਞਾਣੇਹਿਪੀਤਿ ਜਵਨਵਿਞ੍ਞਾਣੇਹਿਪਿ.

ਦਿਟ੍ਠਂ ਨਾਮ ਚਕ੍ਖੁਵਿਞ੍ਞਾਣਂ ਰੂਪਾਯਤਨਸ੍ਸ ਦਸ੍ਸਨਨ੍ਤਿ ਕਤ੍ਵਾ. ਤੇਨਾਹ ‘‘ਰੂਪੇ ਰੂਪਵਿਜਾਨਨ’’ਨ੍ਤਿ. ਚਕ੍ਖੁਵਿਞ੍ਞਾਣਮਤ੍ਤਮੇਵਾਤਿ ਯਤ੍ਤਕਂ ਚਕ੍ਖੁਵਿਞ੍ਞਾਣਂ ਰੂਪਾਯਤਨੇ ਗਹਣਮਤ੍ਤਂ, ਤਂਮਤ੍ਤਮੇਵ ਮੇ ਸਬ੍ਬਂ ਚਿਤ੍ਤਂ ਭਵਿਸ੍ਸਤੀਤਿ ਅਤ੍ਥੋ. ‘‘ਰਾਗਾਦਿਰਹੇਨਾ’’ਤਿ ਵਾ ਪਾਠੋ. ਦਿਟ੍ਠਂ ਨਾਮ ਪਦਤ੍ਥਤੋ ਚਕ੍ਖੁਵਿਞ੍ਞਾਣੇਨ ਦਿਟ੍ਠਂ ਰੂਪਂ. ਤਤ੍ਥੇਵਾਤਿ ਚਕ੍ਖੁਵਿਞ੍ਞਾਣੇਨ ਦਿਟ੍ਠਮਤ੍ਤੇ ਰੂਪੇ. ਚਿਤ੍ਤਤ੍ਤਯਂ ਦਿਟ੍ਠਮਤ੍ਤਂ ਨਾਮ ਚਕ੍ਖੁਵਿਞ੍ਞਾਣਂ ਵਿਯ ਰਾਗਾਦਿਵਿਰਹੇਨ ਪਵਤ੍ਤਨਤੋ. ਤੇਨਾਹ ‘‘ਯਥਾ ਤ’’ਨ੍ਤਿ ਆਦਿ.

ਮਨੋਦ੍ਵਾਰਾਵਜ੍ਜਨੇਨ ਵਿਞ੍ਞਾਤਾਰਮ੍ਮਣਂ ਵਿਞ੍ਞਾਤਨ੍ਤਿ ਅਧਿਪ੍ਪੇਤਂ ਰਾਗਾਦਿਵਿਰਹੇਨ ਵਿਞ੍ਞੇਯ੍ਯਤੋ. ਤੇਨਾਹ ‘‘ਯਥਾ ਆਵਜ੍ਜਨੇਨਾ’’ਤਿਆਦਿ.

ਤਦਾਤਿ ਤਸ੍ਮਿਂ ਕਾਲੇ, ਨ ਤਤੋ ਪਟ੍ਠਾਯਾਤਿ ਅਯਮੇਤ੍ਥ ਅਤ੍ਥੋਤਿ ਦਸ੍ਸੇਤਿ. ‘‘ਦਿਟ੍ਠਮਤ੍ਤ’’ਨ੍ਤਿਆਦਿਨਾ ਯੇਸਂ ਰਾਗਾਦੀਨਂ ਨਿਵਤ੍ਤਨਂ ਅਧਿਪ੍ਪੇਤਂ, ਤੇ ‘‘ਤੇਨਾ’’ਤਿ ਏਤ੍ਥ ਤ-ਸਦ੍ਦੇਨ ਪਚ੍ਚਾਮਸੀਯਨ੍ਤੀਤਿ ‘‘ਤੇਨ ਰਾਗੇਨ ਵਾ ਰਤ੍ਤੋ’’ਤਿਆਦਿ ਵੁਤ੍ਤਂ. ਤਤ੍ਥਾਤਿ ਵਿਸਯੇ ਭੁਮ੍ਮਂ, ਵਿਸਯਭਾਵੋ ਚ ਵਿਸਯਿਨਾ ਸਮ੍ਬਨ੍ਧਵਸੇਨ ਇਚ੍ਛਿਤਬ੍ਬੋਤਿ ਵੁਤ੍ਤਂ ‘‘ਪਟਿਬਦ੍ਧੋ’’ਤਿਆਦਿ.

ਸਤੀਤਿ ਰੂਪਸ੍ਸ ਯਥਾਸਭਾਵਸਲ੍ਲਕ੍ਖਣਾ ਸਤਿ ਮੁਟ੍ਠਾ ਪਿਯਨਿਮਿਤ੍ਤਮਨਸਿਕਾਰੇਨ ਅਨੁਪ੍ਪਜ੍ਜਨਤੋ ਨ ਦਿਸ੍ਸਤਿ ਨਪ੍ਪਵਤ੍ਤਤਿ. ਅਜ੍ਝੋਸਾਤਿ ਅਜ੍ਝੋਸਾਯ. ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਅਤ੍ਤਨਿਯਕਰਣੇਨ.

ਅਭਿਜ੍ਝਾ ਚ ਵਿਹੇਸਾ ਚਾਤਿ ਕਰਣਤ੍ਥੇ ਪਚ੍ਚਤ੍ਤਵਚਨਨ੍ਤਿ ਆਹ – ‘‘ਅਭਿਜ੍ਝਾਯ ਚ ਵਿਹੇਸਾਯ ਚਾ’’ਤਿ. ਅਤ੍ਥਵਸੇਨ ਵਿਭਤ੍ਤਿਪਰਿਣਾਮੋਤਿ ਆਹ – ‘‘ਅਭਿਜ੍ਝਾਵਿਹੇਸਾਹੀ’’ਤਿ. ਆਚਿਨਨ੍ਤਸ੍ਸਾਤਿ ਵਡ੍ਢੇਨ੍ਤਸ੍ਸ. ਪਟਿਸ੍ਸਤੋਤਿ ਪਤਿਸ੍ਸਤੋ ਸਬ੍ਬਤ੍ਥ ਸਤਿਯਾ ਯੁਤ੍ਤੋ. ਸੇਵਤੋ ਚਾਪੀਤਿ ਏਤ੍ਥ ਚ-ਸਦ੍ਦੋ ਅਪਿ-ਸਦ੍ਦੋ ਚ ਨਿਪਾਤਮਤ੍ਤਨ੍ਤਿ ‘‘ਸੇਵਨ੍ਤਸ੍ਸ’’ਇਚ੍ਚੇਵ ਅਤ੍ਥੋ ਵੁਤ੍ਤੋ.

ਮਾਲੁਕ੍ਯਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਪਰਿਹਾਨਸੁਤ੍ਤਵਣ੍ਣਨਾ

੯੬. ਪਰਿਹਾਨਸਭਾਵਨ੍ਤਿ ਅਨਵਜ੍ਜਧਮ੍ਮੇਹਿ ਪਰਿਹਾਯਨਸਭਾਵਂ. ਅਭਿਭਵਿਤਾਨੀਤਿ ਅਭਿਭੂਤਾਨਿ ਨਿਬ੍ਬਿਸੇਵਨਭਾਵਾਕਾਰੇਨ. ਸਰਸਙ੍ਕਪ੍ਪਾਤਿ ਤਸ੍ਮਿਂ ਤਸ੍ਮਿਂ ਵਿਸਯੇ ਅਨਵਟ੍ਠਿਤਭਾਵੇਨ ਸਙ੍ਕਪ੍ਪਾ. ਸਂਯੋਜਨਿਯਾਤਿ ਸਂਯੋਜੇਤਬ੍ਬਾ. ਸਂਯੋਜਨਾਨਞ੍ਹਿ ਪੁਨਪ੍ਪੁਨਂ ਉਪ੍ਪਤ੍ਤਿਯਾ ਓਕਾਸਂ ਦੇਨ੍ਤੋ ਕਿਲੇਸਜਾਤਂ ਅਧਿਵਾਸੇਤਿ ਨਾਮ. ਕਿਲੇਸੋ ਏਵ ਕਿਲੇਸਜਾਤਂ. ਆਰਮ੍ਮਣਂ ਪਨ ਚਿਤ੍ਤੇ ਕਰੋਨ੍ਤੋ ਅਧਿਵਾਸੇਤਿ ਨਾਮ. ਛਨ੍ਦਰਾਗਪ੍ਪਹਾਨੇਨ ਨ ਪਜਹਤਿ ਆਰਮ੍ਮਣਂ, ਕਿਲੇਸਂ ਪਨ ਅਨੁਪ੍ਪਤ੍ਤਿਧਮ੍ਮਤਾਪਾਦਨੇਨ ਏਵ. ਅਭਿਭਵਿਤਂ ਆਯਤਨਨ੍ਤਿ ਕਥਿਤਂ ਅਧਿਵਾਸਨਾਦਿਨਾ. ‘‘ਕਥਞ੍ਚ, ਭਿਕ੍ਖਵੇ, ਪਰਿਹਾਨਧਮ੍ਮੋ ਹੋਤੀ’’ਤਿ ਧਮ੍ਮਂ ਪੁਚ੍ਛਿਤ੍ਵਾ ਤਂ ਵਿਭਜਨ੍ਤੇਨ ਭਗਵਤਾ ‘‘ਤਞ੍ਚੇ ਭਿਕ੍ਖੁ ਅਧਿਵਾਸੇਤੀ’’ਤਿਆਦਿਨਾ ਪੁਗ੍ਗਲੇਨ ਪੁਗ੍ਗਲਾਧਿਟ੍ਠਾਨੇਨ ਧਮ੍ਮੋ ਦਸ੍ਸਿਤੋ.

ਪਰਿਹਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਪਮਾਦਵਿਹਾਰੀਸੁਤ੍ਤਵਣ੍ਣਨਾ

੯੭. ਨ ਪਿਦਹਿਤ੍ਵਾ ਚਕ੍ਖੁਨ੍ਦ੍ਰਿਯਂ ਨ ਪਿਦਹਿਤ੍ਵਾ ਸਞ੍ਛਾਦਿਤ੍ਵਾ ਠਿਤਸ੍ਸ. ਬ੍ਯਾਸਿਞ੍ਚਤੀਤਿ ਕਿਲੇਸੇਹਿ ਵਿਸੇਸੇਨ ਆਸਿਞ੍ਚਤਿ. ਕਿਲੇਸਤਿਨ੍ਤਨ੍ਤਿ ਕਿਲੇਸੇਹਿ ਅਵਸ੍ਸੁਤਂ. ਦੁਬ੍ਬਲਪੀਤਿ ਤਰੁਣਾ ਨ ਬਲਪ੍ਪਤ੍ਤਾ. ਬਲਵਪੀਤਿ ਉਬ੍ਬੇਗਾ ਫਰਣਪ੍ਪਤ੍ਤਾ ਚ ਪੀਤਿ. ਦਰਥਪ੍ਪਸ੍ਸਦ੍ਧੀਤਿ ਕਾਯਚਿਤ੍ਤਦਰਥਵੂਪਸਮਲਕ੍ਖਣਾ ਪਸ੍ਸਦ੍ਧਿ. ਨ ਉਪ੍ਪਜ੍ਜਨ੍ਤਿ ਪਚ੍ਚਯਪਰਮ੍ਪਰਾਯ ਅਸਿਦ੍ਧਤ੍ਤਾ. ‘‘ਕਥਞ੍ਚ, ਭਿਕ੍ਖਵੇ, ਪਮਾਦਵਿਹਾਰੀ ਹੋਤੀ’’ਤਿਆਦਿਨਾ ਪੁਗ੍ਗਲਂ ਪੁਚ੍ਛਿਤ੍ਵਾ ‘‘ਪਾਮੋਜ੍ਜਂ ਨ ਹੋਤਿ, ਪਾਮੋਜ੍ਜਂ ਜਾਯਤੀ’’ਤਿਆਦਿਨਾ ਚ, ਧਮ੍ਮੇਨ ‘‘ਪਮਾਦਵਿਹਾਰੀ ਅਪ੍ਪਮਾਦਵਿਹਾਰੀ’’ਤਿ ਚ ਪੁਗ੍ਗਲੋ ਦਸ੍ਸਿਤੋ.

ਪਮਾਦਵਿਹਾਰੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਸਂਵਰਸੁਤ੍ਤਵਣ੍ਣਨਾ

੯੮. ਇਦਨ੍ਤਿ ‘‘ਕਥਞ੍ਚ, ਭਿਕ੍ਖਵੇ, ਅਸਂਵਰੋ’’ਤਿ? ਇਦਂ ਵਚਨਂ. ਪਹਾਤਬ੍ਬਧਮ੍ਮਕ੍ਖਾਨਵਸੇਨਾਤਿ ਪਹਾਤਬ੍ਬਧਮ੍ਮਸ੍ਸੇਵ ਕਥਨਂ ਵੁਤ੍ਤਂ. ‘‘ਕਥਞ੍ਚ, ਭਿਕ੍ਖਵੇ, ਅਸਂਵਰੋ ਹੋਤੀ’’ਤਿ ਧਮ੍ਮਂ ਪੁਚ੍ਛਿਤ੍ਵਾ ‘‘ਸਨ੍ਤਿ, ਭਿਕ੍ਖਵੇ, ਚਕ੍ਖੁਵਿਞ੍ਞੇਯ੍ਯਾ ਰੂਪਾ’’ਤਿਆਦਿਨਾ ਧਮ੍ਮੋਵ ਵਿਭਤ੍ਤੋ.

ਸਂਵਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਸਮਾਧਿਸੁਤ੍ਤਵਣ੍ਣਨਾ

੯੯. ਚਿਤ੍ਤੇਕਗ੍ਗਤਾਯਾਤਿ ਸਮਥਵਸੇਨ ਚਿਤ੍ਤੇਕਗ੍ਗਤਾਯ. ਪਰਿਹਾਯਮਾਨੇਤਿ ਤਸ੍ਸ ਅਲਾਭੇਨ ਪਰਿਹਾਯਮਾਨੇ. ਕਮ੍ਮਟ੍ਠਾਨਨ੍ਤਿ ਵਿਪਸ੍ਸਨਾਕਮ੍ਮਟ੍ਠਾਨਂ, ਸਮਥਮੇਵ ਵਾ.

੭. ਪਟਿਸਲ੍ਲਾਨਸੁਤ੍ਤਵਣ੍ਣਨਾ

੧੦੦. ਕਮ੍ਮਟ੍ਠਾਨਨ੍ਤਿ ਸਮਥਵਿਪਸ੍ਸਨਾਕਮ੍ਮਟ੍ਠਾਨਂ.

੮-੯. ਪਠਮਨਤੁਮ੍ਹਾਕਂਸੁਤ੍ਤਾਦਿਵਣ੍ਣਨਾ

੧੦੧-੧੦੨. ਉਪਮਂ ਪਰਿਵਾਰੇਤ੍ਵਾਤਿ ਉਪਮਂ ਪਰਿਹਰਿਤ੍ਵਾ. ਸੁਦ੍ਧਿਕਵਸੇਨਾਤਿ ਉਪਮਾਯ ਵਿਨਾ ਕੇਵਲਮੇਵ.

੧੦. ਉਦਕਸੁਤ੍ਤਵਣ੍ਣਨਾ

੧੦੩. ਉਦਕੋਤਿ ਤਸ੍ਸ ਨਾਮਂ. ਵੇਦਂ ਞਾਣਂ. ਸਬ੍ਬਂ ਜਿਤਵਾਤਿ ਸਬ੍ਬਜਿ. ਅਵਖਤਨ੍ਤਿ ਨਿਖਤਂ. ਉਚ੍ਛਾਦਨਧਮ੍ਮੋਤਿ ਉਚ੍ਛਾਦੇਤਬ੍ਬਸਭਾਵੋ. ਪਰਿਮਦ੍ਦਨਧਮ੍ਮੋਤਿ ਪਰਿਮਦ੍ਦਿਤਬ੍ਬਸਭਾਵੋ. ਪਰਿਹਤੋਤਿ ਪਰਿਹਰਿਤੋ. ਓਦਨਕੁਮ੍ਮਾਸੂਪਚਯੁਚ੍ਛਾਦਨਪਰਿਮਦ੍ਦਨਪਦੇਹੀਤਿ ਵਤ੍ਤਬ੍ਬਂ. ਉਚ੍ਛਾਦਨਂ ਵਾ ਪਰਿਮਦ੍ਦਨਮਤ੍ਤਮੇਵਾਤਿ ਕਤ੍ਵਾ ਨ ਗਹਿਤਂ.

ਉਦਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਲ਼ਵਗ੍ਗਵਣ੍ਣਨਾ ਨਿਟ੍ਠਿਤਾ.

ਦੁਤਿਯੋ ਪਣ੍ਣਾਸਕੋ.