੪. ਪਮਾਦਵਿਹਾਰੀਸੁਤ੍ਤਵਣ੍ਣਨਾ

੯੭. ਨ ਪਿਦਹਿਤ੍ਵਾ ਚਕ੍ਖੁਨ੍ਦ੍ਰਿਯਂ ਨ ਪਿਦਹਿਤ੍ਵਾ ਸਞ੍ਛਾਦਿਤ੍ਵਾ ਠਿਤਸ੍ਸ. ਬ੍ਯਾਸਿਞ੍ਚਤੀਤਿ ਕਿਲੇਸੇਹਿ ਵਿਸੇਸੇਨ ਆਸਿਞ੍ਚਤਿ. ਕਿਲੇਸਤਿਨ੍ਤਨ੍ਤਿ ਕਿਲੇਸੇਹਿ ਅਵਸ੍ਸੁਤਂ. ਦੁਬ੍ਬਲਪੀਤਿ ਤਰੁਣਾ ਨ ਬਲਪ੍ਪਤ੍ਤਾ. ਬਲਵਪੀਤਿ ਉਬ੍ਬੇਗਾ ਫਰਣਪ੍ਪਤ੍ਤਾ ਚ ਪੀਤਿ. ਦਰਥਪ੍ਪਸ੍ਸਦ੍ਧੀਤਿ ਕਾਯਚਿਤ੍ਤਦਰਥਵੂਪਸਮਲਕ੍ਖਣਾ ਪਸ੍ਸਦ੍ਧਿ. ਨ ਉਪ੍ਪਜ੍ਜਨ੍ਤਿ ਪਚ੍ਚਯਪਰਮ੍ਪਰਾਯ ਅਸਿਦ੍ਧਤ੍ਤਾ. ‘‘ਕਥਞ੍ਚ, ਭਿਕ੍ਖਵੇ, ਪਮਾਦਵਿਹਾਰੀ ਹੋਤੀ’’ਤਿਆਦਿਨਾ ਪੁਗ੍ਗਲਂ ਪੁਚ੍ਛਿਤ੍ਵਾ ‘‘ਪਾਮੋਜ੍ਜਂ ਨ ਹੋਤਿ, ਪਾਮੋਜ੍ਜਂ ਜਾਯਤੀ’’ਤਿਆਦਿਨਾ ਚ, ਧਮ੍ਮੇਨ ‘‘ਪਮਾਦਵਿਹਾਰੀ ਅਪ੍ਪਮਾਦਵਿਹਾਰੀ’’ਤਿ ਚ ਪੁਗ੍ਗਲੋ ਦਸ੍ਸਿਤੋ.

ਪਮਾਦਵਿਹਾਰੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.