੯. ਕਸ੍ਸਕਸੁਤ੍ਤਵਣ੍ਣਨਾ

੧੫੫. ਨਿਬ੍ਬਾਨਂ ਅਪਦਿਸਿਤ੍ਵਾਤਿ ਨਿਬ੍ਬਾਨਂ ਨਿਸ੍ਸਾਯ ਨਿਬ੍ਬਾਨਗੁਣੇ ਆਰਬ੍ਭਾਤਿ ਅਤ੍ਥੋ. ਹਟਹਟਕੇਸੋਤਿ ਇਤੋ ਚਿਤੋ ਚ ਵਿਕਿਣ੍ਣਤ੍ਤਾ ਆਕੁਲਾਕੁਲਕੇਸੋ. ਚਕ੍ਖੁਸਮ੍ਫਸ੍ਸਵਿਞ੍ਞਾਣਾਯਤਨਨ੍ਤਿ ਏਤ੍ਥ ਯਥਾ ਚਕ੍ਖੁਗ੍ਗਹਣੇਨ ਫਸ੍ਸੋ ਵਿਸੇਸਿਤੋ, ਤੇਨ ਏਵ ਵਿਞ੍ਞਾਣਾਯਤਨਂ. ਤਥਾ ਸਤਿ ਚਕ੍ਖੁਵਿਞ੍ਞਾਣਸ੍ਸ ਚ ਗਹਣਂ ਆਪਜ੍ਜੇਯ੍ਯਾਤਿ. ਨਨੁ ਚੇਤ੍ਥ ਚਕ੍ਖੁਗ੍ਗਹਣੇਨ ਵਿਸੇਸਿਤਤ੍ਤਾ ਚਕ੍ਖੁਦ੍ਵਾਰਿਕਾਨਂ ਸਬ੍ਬੇਸਂ ਵਿਞ੍ਞਾਣਾਨਂ ਗਹਣਨ੍ਤਿ? ਸਚ੍ਚਮੇਤਂ, ਤਞ੍ਚ ਖੋ ਪਠਮੇਨ ਚਕ੍ਖੁਗ੍ਗਹਣੇਨਾਤਿ ਨਾਯਂ ਦੋਸੋ. ਭਵਙ੍ਗਚਿਤ੍ਤਨ੍ਤਿ ਆਵਜ੍ਜਨਾਯ ਅਨਨ੍ਤਰਪਚ੍ਚਯਭੂਤਮੇਵ ਅਧਿਪ੍ਪੇਤਨ੍ਤਿ ਨਿਯਮੇਤ੍ਵਾ ਦਸ੍ਸੇਤੁਂ ‘‘ਸਾਵਜ੍ਜਨਕ’’ਨ੍ਤਿ ਵੁਤ੍ਤਂ, ਤਸ੍ਮਾ ਤਦਾਰਮ੍ਮਣਮ੍ਪੀਤਿ ਜਵਨਚਿਤ੍ਤੇਨ ਸਹ ਤਦਾਰਮ੍ਮਣਚਿਤ੍ਤਮ੍ਪਿ. ‘‘ਵਿਞ੍ਞਾਣਾਯਤਨ’’ਨ੍ਤਿ ਚ ਵੁਤ੍ਤੇ ਨਿਮ੍ਮਲਮੇਵ.

‘‘ਚਕ੍ਖੂ’’ਤਿ ਅਵਿਸੇਸਤੋ ਵੁਤ੍ਤਤ੍ਤਾ ਪਨ ਮਾਰਸ੍ਸ ਅਯਮ੍ਪਿ ਅਤ੍ਥੋ ਆਪਨ੍ਨੋਤਿ ਦਸ੍ਸੇਤੁਂ ‘‘ਯਂ ਲੋਕੇ’’ਤਿਆਦਿ ਵੁਤ੍ਤਂ. ਉਪਕ੍ਕਵਿਪਕ੍ਕਨ੍ਤਿ ਚਕ੍ਖੁਪਾਕਰੋਗੇਨ ਉਪਰਿ ਹੇਟ੍ਠਾ ਚ ਸਬ੍ਬਸੋ ਪਕ੍ਕਂ ਕੁਥਿਤਂ. ਏਸੇਵ ਨਯੋਤਿ ਇਮਿਨਾ ਯਂ ਲੋਕੇ ਕੁਟ੍ਠਕਿਲਾਸਗਣ੍ਡਕਚ੍ਛੁਆਦੀਹਿ ਉਪਦ੍ਦੁਤਂ ਵਣਪੀਲ਼ਕਾਦਿਵਸੇਨ ਪਗ੍ਘਰਨ੍ਤਂ ਅਸੁਚਿਂ ਅਨ੍ਤਮਸੋ ਪਰਮਜੇਗੁਚ੍ਛਰੂਪਮ੍ਪਿ, ਸਬ੍ਬਂ ਤਂ ਤਵੇਵ ਹੋਤੂਤਿ ਏਵਮਾਦਿਂ ਅਪਦਿਸਤਿ.

ਯਂ ਭਣ੍ਡਕਨ੍ਤਿ ਹਿਰਞ੍ਞਸੁਵਣ੍ਣਾਦਿਖੇਤ੍ਤਵਤ੍ਥਾਦਿਉਪਕਰਣਂ ਗਹਟ੍ਠਾ, ਪਬ੍ਬਜਿਤਾ ਚ ਯਂ ਪਤ੍ਤਚੀਵਰਾਦਿਂ ‘‘ਮਮ ਇਦ’’ਨ੍ਤਿ ਅਭਿਨਿਵਿਸਨ੍ਤਾਵ ਵਦਨ੍ਤਿ, ਏਤੇਸੁ ਪਰਿਗ੍ਗਹਤ੍ਥੇਸੁ ਚ ਤੇਸਂ ਪਰਿਗ੍ਗਾਹਕਪੁਗ੍ਗਲੇਸੁ ਚ ਤੇ ਚਿਤ੍ਤਂ ਯਦਿ ਅਤ੍ਥਿ, ਤਾਨਿ ਆਰਬ੍ਭ ਤਵ ਚਿਤ੍ਤਂ ਯਦਿ ਭਵਤਿ, ਏਵਂ ਤ੍ਵਂ ਤਤ੍ਥ ਬਦ੍ਧੋ ਏਵ ਹੋਸੀਤਿ ਅਤ੍ਥੋ. ਤੇਨਾਹ ‘‘ਨ ਮੇ ਸਮਣ ਮੋਕ੍ਖਸੀ’’ਤਿ.

ਯਂ ਭਣ੍ਡਕਂ ਵਦਨ੍ਤੀਤਿ ਯਥਾਵੁਤ੍ਤਂ ਉਪਕਰਣਂ ਲੋਕੇ ਬਹੁਜਨਾ ‘‘ਮਮ ਇਦ’’ਨ੍ਤਿ ਵਦਨ੍ਤਿ. ਨ ਤਂ ਮਯ੍ਹਨ੍ਤਿ ਤਂ ਮਯ੍ਹਂ ਨ ਹੋਤਿ, ਨ ਤਤ੍ਥ ਮਮ ਤਣ੍ਹਾਵਸੇਨ ਮਮਨ੍ਤਿ ਨਤ੍ਥਿ. ਨ ਤੇ ਅਹਨ੍ਤਿ ਯੇ ਪੁਗ੍ਗਲਾ ਏਤ੍ਥ ਬਦ੍ਧਾ, ਤੇਪਿ ਅਹਂ ਨ ਹੋਮਿ, ਤਤ੍ਥ ਮੇ ਦਿਟ੍ਠਿਬਦ੍ਧੋ ਨਤ੍ਥਿ. ਨ ਮੇ ਮਗ੍ਗਮ੍ਪਿ ਦਕ੍ਖਸੀਤਿ ਏਵਂ ਸਬ੍ਬਸੋ ਬਦ੍ਧਾਭਾਵੇਨ ਮੁਤ੍ਤਸ੍ਸ ਮੇ ਗਤਮਗ੍ਗਮ੍ਪਿ ਮਾਰ ਤ੍ਵਂ ਨ ਦਕ੍ਖਸਿ ਨ ਪਸ੍ਸਿਸ੍ਸਸਿ, ਯੇ ਭਵਾਦਯੋ ਤੁਯ੍ਹਂ ਵਿਸਯਾ, ਤੇਸੁ ਭਵਯੋਨਿਗਤਿਆਦੀਸੁ ਮਯ੍ਹਂ ਗਤਮਗ੍ਗਂ ਨ ਪਸ੍ਸਿਸ੍ਸਸਿ ਭਵਨਿਸ੍ਸਟ੍ਠਤ੍ਤਾਤਿ.

ਕਸ੍ਸਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.