੮. ਪਿਣ੍ਡਸੁਤ੍ਤਵਣ੍ਣਨਾ

੧੫੪. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਞਾਤਿਮਿਤ੍ਤਕੁਲੇ. ਪਾਹੁਨਕਾਨੀਤਿ ਪਹਿਤਬ੍ਬਪਣ੍ਣਾਕਾਰਾਨਿ. ਆਗਨ੍ਤੁਕਪਣ੍ਣਾਕਾਰਾਨੀਤਿ ਆਗਨ੍ਤੁਕਾਨਂ ਉਪਗਤਾਨਂ ਦਾਤਬ੍ਬਪਣ੍ਣਾਕਾਰਾਨਿ. ਸਯਂਚਰਦਿਵਸੇਤਿ ਕੁਮਾਰਕਾਨਞ੍ਚ ਕੁਮਾਰਿਕਾਨਞ੍ਚ ਸਯਂ ਅਤ੍ਤਨਾ ਚਰਿਤਬ੍ਬਛਣਦਿਵਸੇ. ਇਦਾਨਿ ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ‘‘ਸਮਵਯਜਾਤਿਗੋਤ੍ਤਾ’’ਤਿਆਦਿਮਾਹ. ਸਮਵਯਸਮਜਾਤਿਕਸਮਗੋਤ੍ਤਾਤਿ ਪਚ੍ਚੇਕਂ ਸਮ-ਸਦ੍ਦੋ ਯੋਜੇਤਬ੍ਬੋ. ਗੋਤ੍ਤਸਮਤਾ ਚ ਆਵਾਹਵਿਵਾਹਯੋਗ੍ਯਤਾਵਸੇਨ ਦਟ੍ਠਬ੍ਬਾ, ਨ ਏਕਗੋਤ੍ਤਤਾਵਸੇਨ. ਤਤੋ ਤਤੋ ਗਾਮਤੋ. ਅਞ੍ਞਸ੍ਮਿਂ ਦਾਤਬ੍ਬੇ ਅਸਤਿ. ਛਣਵਸੇਨ ਪਹਿਣਿਤੁਂ ਸਮ੍ਪਾਦਿਤਂ ਪੂਵਂ ਛਣਪੂਵਂ. ਤਾਸਂ ਸਮ੍ਪਤ੍ਤਿਯਾਤਿ ਤਾਸਂ ਦਾਨਂ ਧਮ੍ਮਸ੍ਸਵਨਞ੍ਚਾਤਿ ਤਸ੍ਸਾ ਦੁਵਿਧਾਯਪਿ ਸਮ੍ਪਤ੍ਤਿਯਾ.

ਞਾਣਂ ਨਾਮ ਆਵਜ੍ਜਨਪੁਬ੍ਬਕਂ, ਤਸ੍ਮਾ ਅਜਾਨਨਸ੍ਸ ‘‘ਅਨਾਵਜ੍ਜਨਤਾਯਾ’’ਤਿ ਕਾਰਣਂ ਵਤ੍ਵਾ ਸੇਸਕਾਰਣਂ ਵਦਨ੍ਤੋ ‘‘ਬੁਦ੍ਧਾਨ’’ਨ੍ਤਿਆਦਿਮਾਹ. ਉਪਚਾਰਭੇਦਨ੍ਤਿ ਬੁਦ੍ਧਂ ਦਿਸ੍ਵਾ ਮਨੁਸ੍ਸੇਹਿ ਕਾਤਬ੍ਬਉਪਚਾਰਸ੍ਸ ਭਿਨ੍ਦਨਂ. ਭਿਨ੍ਦਿਤੁਨ੍ਤਿ ਵਿਧਮਿਤੁਂ.

ਭਗਵਾ ਪਨਾਤਿ ਪਨਸਦ੍ਦੋ ਵਿਸੇਸਤ੍ਥਜੋਤਕੋ. ਤੇਨ ਨ ਕੇਵਲਂ ਭਗਵਾ ਉਪ੍ਪਣ੍ਡਨਂ ਪਰਿਹਰਨ੍ਤੋ ਤਂ ਗਾਮਂ ਨ ਪੁਨ ਪਾਵਿਸਿ, ਅਥ ਖੋ ਮਾਰਂ ਅਨੁਕਮ੍ਪਨ੍ਤੋਤਿ ਇਦਂ ਵਿਸੇਸਂ ਜੋਤੇਤਿ.

ਜਨੇਸੀਤਿ ਅਪੁਞ੍ਞਂ ਜਨੇਸਿ, ਜਨੇਨ੍ਤੋ ਚ ਯਥਾ ਤਤੋ ਆਯਤਿਂ ਥਿਰਤਰਂ ਮਹਨ੍ਤਂ ਦੁਕ੍ਖਂ ਨਿਪ੍ਫਜ੍ਜਿਸ੍ਸਤਿ, ਏਵਂ ਨਿਪ੍ਫਾਦੇਸਿ. ਆਸਜ੍ਜਨਨ੍ਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ. ਕਿਞ੍ਚਤਿ ਮਦ੍ਦਤਿ ਅਭਿਭਵਤੀਤਿ ਕਿਞ੍ਚਨਨ੍ਤਿ ਆਹ ‘‘ਮਦ੍ਦਿਤੁਂ ਸਮਤ੍ਥ’’ਨ੍ਤਿ.

ਪਿਣ੍ਡਸੁਤ੍ਤਵਣ੍ਣਨਾ ਨਿਟ੍ਠਿਤਾ.