੫. ਦਾਮਲਿਸੁਤ੍ਤਵਣ੍ਣਨਾ

੮੬. ਤੇਨ ਕਾਰਣੇਨਾਤਿ ਤੇਨ ਪਧਾਨੇਨ ਕਾਰਣਭੂਤੇਨ, ਪਧਾਨਕਰਣਨਿਮਿਤ੍ਤਨ੍ਤਿ ਅਤ੍ਥੋ. ਯਂ ਕਿਞ੍ਚਿ ਖੁਦ੍ਦਕਮ੍ਪਿ ਮਹਨ੍ਤਮ੍ਪਿ ਹੀਨਮ੍ਪਿ ਪਣੀਤਮ੍ਪਿ ਭਵਂ. ਆਯਤਪਗ੍ਗਹੋਤਿ ਦੀਘਰਤ੍ਤਸ੍ਸ ਵੀਰਿਯਾਰਮ੍ਭੋ. ਕਿਚ੍ਚਵੋਸਾਨਨ੍ਤਿ ਕਿਚ੍ਚਨਿਟ੍ਠਾਨਂ. ਤਥੇਵਾਤਿ ਯਥਾ ਅਰਹਤ੍ਤੁਪ੍ਪਤ੍ਤਿਤੋ ਪੁਬ੍ਬੇ, ਤਤੋ ਪਚ੍ਛਾਪਿ ਤਥੇਵ ‘‘ਬੁਦ੍ਧਿਪਗ੍ਗਹੋ’’ਤਿ ਵੀਰਿਯਂ ਦਲ਼੍ਹਂ ਕਰੋਤੂਤਿ ਕੁਪ੍ਪਧਮ੍ਮਂ ਵਿਯ ਮਞ੍ਞਮਾਨੋ ਵਦਤਿ. ਦਿਟ੍ਠਧਮ੍ਮਸੁਖਵਿਹਾਰਾਦਿਅਤ੍ਥਂ ਪਨ ਵੀਰਿਯਕਰਣਂ ਇਚ੍ਛਿਤਬ੍ਬਮੇਵ.

ਅਸਂਕਿਣ੍ਣਾਤਿ ਅਵੋਮਿਸ੍ਸਾ ਏਵਂ ਅਞ੍ਞਤ੍ਥ ਅਨਾਗਤਤ੍ਤਾ. ਤੇਨਾਹ ‘‘ਭਗਵਤਾ ਹੀ’’ਤਿਆਦਿ. ਯਦਿ ਏਵਂ ਇਧੇਵ ਕਸ੍ਮਾ ਏਤਂ ਵੁਤ੍ਤਨ੍ਤਿ ਆਹ ‘‘ਇਧ ਪਨਾ’’ਤਿਆਦਿ. ਪਤਿਟ੍ਠਨ੍ਤਿ ਨਦੀ ਨਾਮ ਅਨਵਟ੍ਠਿਤਤੀਰਾ, ਤਤ੍ਥ ਪਤਿਟ੍ਠਾਤਬ੍ਬਟ੍ਠਾਨਂ.

ਦਾਮਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.