੨. ਦੇਵਪੁਤ੍ਤਸਂਯੁਤ੍ਤਂ
੧. ਪਠਮਵਗ੍ਗੋ
੧. ਪਠਮਕਸ੍ਸਪਸੁਤ੍ਤਵਣ੍ਣਨਾ
੮੨. ਦੇਵਸ੍ਸ ਪੁਤ੍ਤੋ ਦੇਵਪੁਤ੍ਤੋ. ਦੇਵਾਨਂ ਜਨਕਜਨੇਤਬ੍ਬਸਮ੍ਬਨ੍ਧਾਭਾਵਤੋ ਕਥਮਯਂ ਦੇਵਪੁਤ੍ਤੋਤਿ ਵੁਚ੍ਚਤੀਤਿ ਆਹ ‘‘ਦੇਵਾਨਂ ਹੀ’’ਤਿਆਦਿ. ‘‘ਅਪਾਕਟੋ ਅਞ੍ਞਤਰੋਤਿ ਵੁਚ੍ਚਤੀ’’ਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤਂ. ਪਾਕਟੋਪਿ ਹਿ ਕਤ੍ਥਚਿ ‘‘ਅਞ੍ਞਤਰੋ’’ਤਿ ਵੁਚ੍ਚਤਿ. ਹੇਟ੍ਠਾ ਦੇਵਤਾਸਂਯੁਤ੍ਤੇ ‘‘ਅਪਾਕਟਾ ਅਞ੍ਞਤਰਾ ਦੇਵਤਾ’’ਤਿ ਵਤ੍ਵਾ ਇਧ ‘‘ਪਾਕਟੋ ਦੇਵਪੁਤ੍ਤੋ’’ਤਿ ਵੁਤ੍ਤਂ. ਤਥਾ ਹਿਸ੍ਸ ਕਸ੍ਸਪੋਤਿ ਗੋਤ੍ਤਨਾਮਂ ਗਹਿਤਂ, ਤਞ੍ਚ ਖੋ ਪੁਰਿਮਜਾਤਿਸਿਦ੍ਧਸਮਞ੍ਞਾਵਸੇਨ. ਅਨੁਸਾਸਨਂ ਅਨੁਸਾਸੋ, ਤਂ ਅਨੁਸਾਸਂ. ਭਿਕ੍ਖੁਨਿਦ੍ਦੇਸਨ੍ਤਿ ਭਿਕ੍ਖੁਸਦ੍ਦਸ੍ਸ ਨਿਦ੍ਦੇਸਂ. ਭਿਕ੍ਖੁਓਵਾਦਨ੍ਤਿ ਭਿਕ੍ਖੁਭਾਵਾਵਹਂ ਓਵਾਦਂ. ਯਦਿ ਪਨ ਨ ਅਸ੍ਸੋਸਿ, ਕਥਮਯਂ ਪਞ੍ਹਂ ਕਥੇਸੀਤਿ? ਅਞ੍ਞਤੋ ਸੁਤਂ ਨਿਸ੍ਸਾਯ ਪਞ੍ਹਂ ਕਥੇਸਿ, ਨ ਪਨ ਭਗਵਤੋ ਸਮ੍ਮੁਖਾ ਸੁਤਭਾਵੇਨ.
ਤੇਸਨ੍ਤਿ ਯਥਾਵੁਤ੍ਤਾਨਂ ਤਿਣ੍ਣਂ ਪੁਗ੍ਗਲਾਨਂ. ‘‘ਕਥੇਤੁਕਾਮੋ ਚੇਵਾ’’ਤਿਆਦਿਨਾ ਹਿ ਚਤੁਤ੍ਥਂ ਇਧ ਉਦ੍ਧਟਂ. ਤਤ੍ਥ ਆਦਿਤੋ ਤਿਣ੍ਣਂ ਭਗਵਾ ਪਞ੍ਹਂ ਭਾਰਂ ਨ ਕਰੋਤਿ ਏਕੇਕਙ੍ਗਵੇਕਲ੍ਲਤੋ ਚੇਵ ਅਙ੍ਗਦ੍ਵਯਵੇਕਲ੍ਲਤੋ ਚ, ਚਤੁਤ੍ਥਸ੍ਸ ਪਨ ਉਭਯਙ੍ਗਪਾਰਿਪੂਰਤ੍ਤਾ ਭਾਰਂ ਕਰੋਤੀਤਿ ਆਹ ‘‘ਅਯਂ ਪਨਾ’’ਤਿਆਦਿ.
ਗਾਥਾਯਂ ‘‘ਸੁਭਾਸਿਤਸ੍ਸਾ’’ਤਿ ਉਪਯੋਗਤ੍ਥੇ ਸਾਮਿਵਚਨਨ੍ਤਿ ਆਹ ‘‘ਸੁਭਾਸਿਤਂ ਸਿਕ੍ਖੇਯ੍ਯਾ’’ਤਿ. ਚਤੁਸਚ੍ਚਾਦਿਨਿਸ੍ਸਿਤਂ ਬੁਦ੍ਧਵਚਨਂ ਸਿਕ੍ਖਨ੍ਤੋ ਚਤੁਬ੍ਬਿਧਂ ਵਚੀਸੁਚਰਿਤਂ ਸਿਕ੍ਖਤਿ ਨਾਮਾਤਿ ਆਹ ‘‘ਚਤੁਸਚ੍ਚਨਿਸ੍ਸਿਤਂ…ਪੇ… ਸਿਕ੍ਖੇਯ੍ਯਾ’’ਤਿ. ਅਵਧਾਰਣੇਨ ਤਪ੍ਪਟਿਪਕ੍ਖਂ ਪਟਿਨਿਵਤ੍ਤੇਤਿ. ਉਪਾਸਿਤਬ੍ਬਨ੍ਤਿ ਆਸੇਵਿਤਬ੍ਬਂ ਭਾਵੇਤਬ੍ਬਂ ਬਹੁਲੀਕਾਤਬ੍ਬਂ. ਅਟ੍ਠਤਿਂਸਭੇਦਂ ਕਮ੍ਮਟ੍ਠਾਨਨ੍ਤਿ ਇਦਂ ਤਸ੍ਸ ਵਿਪਸ੍ਸਨਾਪਦਟ੍ਠਾਨਤਂ ਹਦਯੇ ਠਪੇਤ੍ਵਾ ਵੁਤ੍ਤਂ. ਤਥਾ ਹਿ ਵੁਤ੍ਤਂ ‘‘ਦੁਤਿਯਪਦੇਨ ਅਧਿਪਞ੍ਞਾਸਿਕ੍ਖਾ ਕਥਿਤਾ’’ਤਿ. ਯੇ ਪਨ ‘‘ਦੁਤਿਯਪਦੇਨ ਅਧਿਚਿਤ੍ਤਸਿਕ੍ਖਾ ਚਿਤ੍ਤਵੂਪਸਮੇਨ ਅਧਿਪਞ੍ਞਾਸਿਕ੍ਖਾ’’ਤਿ ਪਠਨ੍ਤਿ, ਤੇਸਂ ਪਦੇਨ ਅਟ੍ਠਤਿਂਸਪ੍ਪਭੇਦਕਮ੍ਮਟ੍ਠਾਨਂ ਸੁਦ੍ਧਸਮਥਕਮ੍ਮਟ੍ਠਾਨਸ੍ਸੇਵ ਗਹਣਂ ਦਟ੍ਠਬ੍ਬਂ. ਯਦਿ ਏਵਂ ‘‘ਅਟ੍ਠਸਮਾਪਤ੍ਤਿਵਸੇਨਾ’’ਤਿ ਇਦਂ ਕਥਨ੍ਤਿ? ‘‘ਤਂ ਵਿਪਸ੍ਸਨਾਧਿਟ੍ਠਾਨਾਨਂ ਸਮਾਪਤ੍ਤੀਨਂ ਵਸੇਨ ਕਥਿਤ’’ਨ੍ਤਿ ਵਦਨ੍ਤਿ. ਏਵਞ੍ਚ ਕਤ੍ਵਾ ‘‘ਦੁਤਿਯਪਦੇਨ ਅਧਿਪਞ੍ਞਾਸਿਕ੍ਖਾ’’ਤਿ ਇਦਂ ਵਚਨਂ ਸਮਤ੍ਥਿਤਂ ਹੋਤਿ. ਸਿਕ੍ਖਨਂ ਨਾਮ ਆਸੇਵਨਨ੍ਤਿ ਆਹ ‘‘ਭਾਵੇਯ੍ਯਾਤਿ ਅਤ੍ਥੋ’’ਤਿ. ਉਪਾਸਨਨ੍ਤਿ ਪਯਿਰੁਪਾਸਨਂ. ਤਞ੍ਚ ਖੋ ਅਸ੍ਸੁਤਪਰਿਯਾਪੁਣਨਕਮ੍ਮਟ੍ਠਾਨੁਗ੍ਗਹਾਦਿਵਸੇਨ ਦਸ੍ਸੇਨ੍ਤੋ ‘‘ਤਮ੍ਪੀ’’ਤਿਆਦਿਮਾਹ. ਅਧਿਸੀਲਸਿਕ੍ਖਾ ਕਥਿਤਾ ਲਕ੍ਖਣਹਾਰਨਯੇਨ. ਵਚੀਸੁਚਰਿਤਸ੍ਸ ਹਿ ਸੀਲਸਭਾਵਤ੍ਤਾ ਤਗ੍ਗਹਣੇਨੇਵ ਤਦੇਕਲਕ੍ਖਣਂ ਕਾਯਸੁਚਰਿਤਮ੍ਪਿ ਇਤਰਮ੍ਪਿ ਗਹਿਤਮੇਵਾਤਿ. ਏਤ੍ਥ ਚ ਅਧਿਸੀਲਸਿਕ੍ਖਾਯ ਚਿਤ੍ਤਵਿਵੇਕੋ, ਅਧਿਪਞ੍ਞਾਸਿਕ੍ਖਾਯ ਉਪਧਿਵਿਵੇਕੋ, ਅਧਿਚਿਤ੍ਤਸਿਕ੍ਖਾਯ ਕਾਯਵਿਵੇਕੋ ਕਥਿਤੋ, ਕਾਯਵਿਵੇਕੋ ਪਨ ਸਰੂਪੇਨੇਵ ਪਾਲ਼ਿਯਂ ਗਹਿਤੋਤਿ ਤਿਵਿਧਸ੍ਸਪਿ ਵਿਵੇਕਸ੍ਸ ਪਕਾਸਿਤਤ੍ਤਂ ਦਟ੍ਠਬ੍ਬਂ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਪਠਮਕਸ੍ਸਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਦੁਤਿਯਕਸ੍ਸਪਸੁਤ੍ਤਵਣ੍ਣਨਾ
੮੩. ਦ੍ਵੀਹਿ ਝਾਨੇਹੀਤਿ ਆਰਮ੍ਮਣਲਕ੍ਖਣੂਪਨਿਜ੍ਝਾਨਲਕ੍ਖਣੇਹਿ ਦ੍ਵੀਹਿ ਝਾਨੇਹਿ. ਕਮ੍ਮਟ੍ਠਾਨਵਿਮੁਤ੍ਤਿਯਾਤਿ ਕਮ੍ਮਟ੍ਠਾਨਾਨੁਯੋਗਲਦ੍ਧਾਯ ਵਿਮੁਤ੍ਤਿਯਾ. ਤੇਨ ਤਦਙ੍ਗਵਿਕ੍ਖਮ੍ਭਨਵਿਮੁਤ੍ਤਿਯੋ ਵਦਤਿ. ਸਤ੍ਥੁਸਾਸਨਸ੍ਸ ਹਦਯਤ੍ਤਾ ਅਬ੍ਭਨ੍ਤਰਤ੍ਤਾ ਹਦਯਸ੍ਸ ਮਾਨਸਸ੍ਸ, ਅਨੁਪਤ੍ਤਿਂ ਪਟਿਲਾਭਮਾਨਸਂ. ਤਂ ਪਨ ਅਤ੍ਥਤੋ ਅਞ੍ਞਾ ਏਵਾਤਿ ਆਹ ‘‘ਅਰਹਤ੍ਤ’’ਨ੍ਤਿ. ਤਂ ਪਤ੍ਤੁਕਾਮੇਨ ਏਕਨ੍ਤਤੋ ਵਜ੍ਜੇਤਬ੍ਬਤਣ੍ਹਾਦਿਟ੍ਠੀਨਂ ਭਾਵੇ ਤਸ੍ਸ ਅਨਿਜ੍ਝਨਤੋ, ਤਦਭਾਵੇ ਇਜ੍ਝਨਤੋ ਚ ਤੇ ਉਪ੍ਪਾਦਨਵਸੇਨ ਯਦਗ੍ਗੇਨ ਨਿਸ੍ਸਿਤੋ, ਤਦਗ੍ਗੇਨ ਪਨਾਯਮ੍ਪਿ ਤੇਹਿ ਨਿਸ੍ਸਿਤੋ ਨਾਮ ਹੋਤੀਤਿ ਆਹ ‘‘ਅਨਿਸ੍ਸਿਤੋ’’ਤਿਆਦਿ. ਅਰਹਤ੍ਤਂ ਆਨਿਸਂਸਿਤਬ੍ਬਟ੍ਠੇਨ ਆਨਿਸਂਸਂ ਏਤਸ੍ਸਾਤਿ ਅਰਹਤ੍ਤਾਨਿਸਂਸੋ. ਅਰਹਤ੍ਤਂ ਪਤ੍ਤੁਕਾਮਸ੍ਸ ਪੁਬ੍ਬਭਾਗਪਟਿਪਦਾ ਇਚ੍ਛਿਤਬ੍ਬਾ. ਤਤ੍ਥ ਚ ਸਬ੍ਬਪਠਮੋ ਕਮ੍ਮਟ੍ਠਾਨਅਤ੍ਤਾਨੁਯੋਗੋ, ਸੋ ਇਧ ਨ ਗਹਿਤੋਤਿ ਆਹ ‘‘ਤਨ੍ਤਿਧਮ੍ਮੋ ਪੁਬ੍ਬਭਾਗੋ’’ਤਿ. ਤਤ੍ਥ ਤਨ੍ਤਿਧਮ੍ਮੋਤਿ ਪਰਿਯਤ੍ਤਿਧਮ੍ਮੋ.
ਦੁਤਿਯਕਸ੍ਸਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਮਘਸੁਤ੍ਤਵਣ੍ਣਨਾ
੮੪. ਮਘੋਤਿ ਸਕ੍ਕਸ੍ਸੇਤਂ ਨਾਮਂ ਪੁਰਿਮਜਾਤਿਅਨੁਗਤਂ. ਸ੍ਵੇਵਾਤਿ ਸਕ੍ਕੋ ਏਵ. ਵਤੇਨਾਤਿ ਮਾਤਾਪਿਤੁਉਪਟ੍ਠਾਨਾਦਿਚਾਰਿਤ੍ਤਧਮ੍ਮੇਨ. ਅਞ੍ਞੇਤਿ ਉਪਧਿਵੇਪਕ੍ਕਪਾਪਧਮ੍ਮੇ ਅਭਿਭਵਿਤ੍ਵਾ. ਅਸੁਰਨ੍ਤਿ ਇਨ੍ਦਸਤ੍ਤੁਭੂਤਂ ਅਸੁਰਂ.
ਮਘਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਮਾਗਧਸੁਤ੍ਤਵਣ੍ਣਨਾ
੮੫. ਚਤੁਤ੍ਥਸੁਤ੍ਤਂ ਵੁਤ੍ਤਤ੍ਥਮੇਵਾਤਿ ਦੇਵਤਾਸਂਯੁਤ੍ਤੇ ਸਂਵਣ੍ਣਿਤਤ੍ਥਮੇਵ, ਤਸ੍ਮਾ ਇਧ ਨ ਵਤ੍ਤਬ੍ਬੋ ਅਤ੍ਥੋਤਿ ਅਧਿਪ੍ਪਾਯੋ.
ਮਾਗਧਸੁਤ੍ਤਵਣ੍ਣਨਾ ਨਿਟ੍ਠਿਤਾ
੫. ਦਾਮਲਿਸੁਤ੍ਤਵਣ੍ਣਨਾ
੮੬. ਤੇਨ ਕਾਰਣੇਨਾਤਿ ਤੇਨ ਪਧਾਨੇਨ ਕਾਰਣਭੂਤੇਨ, ਪਧਾਨਕਰਣਨਿਮਿਤ੍ਤਨ੍ਤਿ ਅਤ੍ਥੋ. ਯਂ ਕਿਞ੍ਚਿ ਖੁਦ੍ਦਕਮ੍ਪਿ ਮਹਨ੍ਤਮ੍ਪਿ ਹੀਨਮ੍ਪਿ ਪਣੀਤਮ੍ਪਿ ਭਵਂ. ਆਯਤਪਗ੍ਗਹੋਤਿ ਦੀਘਰਤ੍ਤਸ੍ਸ ਵੀਰਿਯਾਰਮ੍ਭੋ. ਕਿਚ੍ਚਵੋਸਾਨਨ੍ਤਿ ਕਿਚ੍ਚਨਿਟ੍ਠਾਨਂ. ਤਥੇਵਾਤਿ ਯਥਾ ਅਰਹਤ੍ਤੁਪ੍ਪਤ੍ਤਿਤੋ ਪੁਬ੍ਬੇ, ਤਤੋ ਪਚ੍ਛਾਪਿ ਤਥੇਵ ‘‘ਬੁਦ੍ਧਿਪਗ੍ਗਹੋ’’ਤਿ ਵੀਰਿਯਂ ਦਲ਼੍ਹਂ ਕਰੋਤੂਤਿ ਕੁਪ੍ਪਧਮ੍ਮਂ ਵਿਯ ਮਞ੍ਞਮਾਨੋ ਵਦਤਿ. ਦਿਟ੍ਠਧਮ੍ਮਸੁਖਵਿਹਾਰਾਦਿਅਤ੍ਥਂ ਪਨ ਵੀਰਿਯਕਰਣਂ ਇਚ੍ਛਿਤਬ੍ਬਮੇਵ.
ਅਸਂਕਿਣ੍ਣਾਤਿ ਅਵੋਮਿਸ੍ਸਾ ਏਵਂ ਅਞ੍ਞਤ੍ਥ ਅਨਾਗਤਤ੍ਤਾ. ਤੇਨਾਹ ‘‘ਭਗਵਤਾ ਹੀ’’ਤਿਆਦਿ. ਯਦਿ ਏਵਂ ਇਧੇਵ ਕਸ੍ਮਾ ਏਤਂ ਵੁਤ੍ਤਨ੍ਤਿ ਆਹ ‘‘ਇਧ ਪਨਾ’’ਤਿਆਦਿ. ਪਤਿਟ੍ਠਨ੍ਤਿ ਨਦੀ ਨਾਮ ਅਨਵਟ੍ਠਿਤਤੀਰਾ, ਤਤ੍ਥ ਪਤਿਟ੍ਠਾਤਬ੍ਬਟ੍ਠਾਨਂ.
ਦਾਮਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਕਾਮਦਸੁਤ੍ਤਵਣ੍ਣਨਾ
੮੭. ਪੁਬ੍ਬਯੋਗਾਵਚਰੋਤਿ ਪੁਬ੍ਬੇ ਯੋਗਾਵਚਰੋ ਪੁਰਿਮਤ੍ਤਭਾਵੇ ਭਾਵਨਮਨੁਯੁਤ੍ਤੋ. ਅਯਂ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾਵ ਬਹੂਨਿ ਵਸ੍ਸਸਹਸ੍ਸਾਨਿ ਸਮਣਧਮ੍ਮਂ ਅਕਾਸਿ, ਨ ਪਨ ਵਿਸੇਸਂ ਨਿਬ੍ਬਤ੍ਤੇਸਿ. ਤਮਤ੍ਥਂ ਕਾਰਣੇਨ ਸਦ੍ਧਿਂ ਦਸ੍ਸੇਤੁਂ ‘‘ਬਹਲਕਿਲੇਸਤਾਯਾ’’ਤਿਆਦਿ ਵੁਤ੍ਤਂ. ਏਕਨ੍ਤਪਰਿਸੁਦ੍ਧਸ੍ਸਾਤਿ ਯਥਾ ਵਿਸੇਸਾਵਹੋ ਹੋਤਿ, ਏਵਂ ਏਕਨ੍ਤੇਨ ਪਰਿਸੁਦ੍ਧਸ੍ਸ ਸਬ੍ਬਸੋ ਅਨੁਪਕ੍ਕਿਲਿਟ੍ਠਸ੍ਸ. ਸੀਲੇਨ ਸਮਾਹਿਤਾਤਿ ਯਥਾ ਸੀਲਂ ਉਪਰੂਪਰਿ ਵਿਸੇਸਾਵਹਂ ਨਿਬ੍ਬੇਧਭਾਗਿਯਞ੍ਚ ਹੋਤਿ, ਏਵਂ ਸਮ੍ਮਦੇਵ ਆਹਿਤਚਿਤ੍ਤਾ ਸੁਟ੍ਠੁ ਸਮ੍ਪਨ੍ਨਚਿਤ੍ਤਾ. ਤਥਾਭੂਤਾ ਤੇਨ ਸਮਨ੍ਨਾਗਤਾ ਹੋਨ੍ਤੀਤਿ ਆਹ ‘‘ਸਮੁਪੇਤਾ’’ਤਿ. ਪਤਿਟ੍ਠਿਤਸਭਾਵਾਤਿ ਸੇਕ੍ਖਤ੍ਤਾ ਏਵ ਯਥਾਧਿਗਤਧਮ੍ਮੇਨ ਨਿਚ੍ਚਲਭਾਵੇਨ ਅਧਿਟ੍ਠਿਤਸਭਾਵਾ. ਮਯਾ ਤੁਟ੍ਠਿਯਾ ਗਹਿਤਾਯ ਦੇਵਪੁਤ੍ਤੋ ‘‘ਦੁਲ੍ਲਭਾ ਤੁਟ੍ਠੀ’’ਤਿ ਵਕ੍ਖਤੀਤਿ ਭਗਵਾ ‘‘ਤੁਟ੍ਠਿ ਹੋਤਿ ਸੁਖਾਵਹਾ’’ਤਿ ਅਵੋਚਾਤਿ ਆਹ ‘‘ਉਪਰਿ ਪਞ੍ਹਸਮੁਟ੍ਠਾਪਨਤ੍ਥ’’ਨ੍ਤਿ. ਪਬ੍ਬਜਿਤੋ ਰੁਕ੍ਖਮੂਲਿਕੋ ਅਬ੍ਭੋਕਾਸਿਕੋ ਵਾ ਅਨਗਾਰਿਯੁਪੇਤੋ ਨਾਮ ਹੋਤਿ, ਸੇਨਾਸਨੇ ਪਨ ਵਸਨ੍ਤੋ ਕਥਨ੍ਤਿ ਆਹ ‘‘ਸਤ੍ਤਭੂਮਿਕੇ’’ਤਿਆਦਿ. ਚਤੁਪਚ੍ਚਯਸਨ੍ਤੋਸੋਤਿ ਭਾਵਨਾਭਿਯੋਗਸਿਦ੍ਧੋ ਚਤੂਸੁ ਪਚ੍ਚਯੇਸੁ ਸਨ੍ਤੋਸੋ. ਤੇਨ ਚਿਤ੍ਤਵੂਪਸਮੇਨ ਤੁਟ੍ਠਿ ਲਦ੍ਧਾਤਿ ਦਸ੍ਸੇਤਿ. ਚਿਤ੍ਤਵੂਪਸਮਭਾਵਨਾਯਾਤਿ ਚਿਤ੍ਤਕਿਲੇਸਾਨਂ ਵੂਪਸਮਕਰਭਾਵਨਾਯ, ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਨਿਬ੍ਬਿਸੇਵਨਭਾਵਕਰਣੇਨ ਸਵਿਸੇਸਂ ਚਿਤ੍ਤਸ੍ਸ ਵੂਪਸਮਕਰਭਾਵਨਾਯ ਰਤੋ ਮਨੋਤਿ ਯੋਜਨਾ.
ਏਤ੍ਥ ਚ ਇਨ੍ਦ੍ਰਿਯੂਪਸਮੇਨ ਚਿਤ੍ਤਸਮਾਧਾਨਂ ਪਰਿਪੁਣ੍ਣਂ ਹੋਤਿ ਇਨ੍ਦ੍ਰਿਯਭਾਵਨਾਯ ਚਿਤ੍ਤਸਮਾਧਾਨਸ੍ਸ ਅਕਾਰਕਾਨਂ ਦੂਰੀਕਰਣਤੋ. ਅਧਿਚਿਤ੍ਤਸਮਾਧਾਨੇਨ ਚਤੁਪਚ੍ਚਯਸਨ੍ਤੋਸੋ ਸਵਿਸੇਸਂ ਪਰਿਸੁਦ੍ਧੋ ਪਰਿਪੁਣ੍ਣੋ ਚ ਹੋਤਿ ਪਚ੍ਚਯਾਨਂ ਅਲਾਭਲਾਭੇਸੁ ਪਰਿਚ੍ਚਾਗਸਭਾਵਤੋ. ਵੁਤ੍ਤਨਯੇਨ ਪਨ ਸਨ੍ਤੁਟ੍ਠਸ੍ਸ ਯਥਾਸਮਾਦਿਨ੍ਨਂ ਸੀਲਂ ਵਿਸੁਜ੍ਝਤਿ ਪਾਰਿਪੂਰਿਞ੍ਚ ਉਪਗਚ੍ਛਤਿ, ਤਥਾਭੂਤੋ ਚਤੁਸਚ੍ਚਕਮ੍ਮਟ੍ਠਾਨੇ ਯੁਤ੍ਤੋ ਮਗ੍ਗਪਟਿਪਾਟਿਯਾ ਸਬ੍ਬਸੋ ਕਿਲੇਸੇ ਸਮੁਚ੍ਛਿਨ੍ਦਨ੍ਤੋ ਨਿਬ੍ਬਾਨਦਿਟ੍ਠੋ ਹੋਤੀਤਿ ਇਮਮਤ੍ਥਂ ਦਸ੍ਸੇਤਿ ‘‘ਯੇ ਰਤ੍ਤਿਨ੍ਦਿਵ’’ਨ੍ਤਿਆਦਿਨਾ. ਕਿਂ ਨ ਗਚ੍ਛਿਸ੍ਸਨ੍ਤਿ? ਗਮਿਸ੍ਸਨ੍ਤੇਵਾਤਿ ਅਰਿਯਮਗ੍ਗਭਾਵਨਂ ਪਹਾਯ ਸਮ੍ਮਾਪਟਿਪਤ੍ਤਿਯਾ ਦੁਕ੍ਕਰਭਾਵਂ ਸਨ੍ਧਾਯ ਸਾਸਙ੍ਕਂ ਵਦਤਿ. ਤੇਨਾਹ ‘‘ਅਯਂ ਪਨ ਦੁਗ੍ਗਮੋ ਭਗਵਾ ਵਿਸਮੋ ਮਗ੍ਗੋ’’ਤਿ.
ਤਤ੍ਥ ਕੇਚਿ ‘‘ਅਯਂ ਪਨਾਤਿ ਦੇਵਪੁਤ੍ਤੋ. ਸੋ ਹਿ ਭਗਵਤੋ ‘ਅਰਿਯਾ ਗਚ੍ਛਨ੍ਤੀ’ਤਿ ਵਚਨਂ ਸੁਤ੍ਵਾ ‘ਦੁਗ੍ਗਮੋ ਭਗਵਾ’ਤਿਆਦਿਮਾਹਾ’’ਤਿ ਵਦਨ੍ਤਿ, ਤਂ ਨ ਯੁਜ੍ਜਤਿ. ਯਸ੍ਮਾ ‘‘ਸਚ੍ਚਮੇਤ’’ਨ੍ਤਿ ਏਵਮਾਦਿਪਿ ਤਸ੍ਸੇਵ ਵੇਵਚਨਂ ਕਤ੍ਵਾ ਦਸ੍ਸਿਤਂ, ਤਸ੍ਮਾ ‘‘ਯੇਨ ਮਗ੍ਗੇਨ ਅਰਿਯਾ ਗਚ੍ਛਨ੍ਤੀ’’ਤਿ ਤੁਮ੍ਹੇਹਿ ਵੁਤ੍ਤਂ, ਅਯਂ ਪਨ ‘‘ਦੁਗ੍ਗਮੋ ਭਗਵਾ ਵਿਸਮੋ ਮਗ੍ਗੋ’’ਤਿ ਆਹ ਦੇਵਪੁਤ੍ਤੋ. ਅਰਿਯਮਗ੍ਗੋ ਕਾਮਂ ਕਦਾਚਿ ਅਤਿਦੁਕ੍ਖਾ ਪਟਿਪਦਾਤਿਪਿ ਵੁਚ੍ਚਤਿ, ਤਞ੍ਚ ਖੋ ਪੁਬ੍ਬਭਾਗਪਟਿਪਦਾਵਸੇਨ, ਅਯਂ ਪਨ ਅਤੀਵ ਸੁਗਮੋ ਸਬ੍ਬਕਿਲੇਸਦੁਗ੍ਗਵਿਵਜ੍ਜਨਤੋ ਕਾਯਦੁਚ੍ਚਰਿਤਾਦਿਵਿਸਮਸ੍ਸ ਰਾਗਾਦਿਵਿਸਮਸ੍ਸ ਚ ਦੂਰੀਕਰਣਤੋ ਨ ਵਿਸਮੋ. ਤੇਨਾਹ ‘‘ਪੁਬ੍ਬਭਾਗਪਟਿਪਦਾਯਾ’’ਤਿਆਦਿ. ਅਸ੍ਸਾਤਿ ਅਰਿਯਮਗ੍ਗਸ੍ਸ. ਅਰਿਯਮਗ੍ਗਸ੍ਸ ਹਿ ਅਧਿਸੀਲਸਿਕ੍ਖਾਦੀਨਂ ਪਰਿਬੁਨ੍ਧਿਤਬ੍ਬਭਾਗੇਨ ਬਹੂ ਪਰਿਸ੍ਸਯਾ ਹੋਨ੍ਤੀਤਿ. ਏਵਂ ਵੁਤ੍ਤੋਤਿ ‘‘ਦੁਗ੍ਗਮੋ ਵਿਸਮੋ’’ਤਿ ਚ ਏਵਂ ਵੁਤ੍ਤੋ.
ਅਵਂਸਿਰਾਤਿ ਅਨੁਟ੍ਠਹਨੇਨ ਅਧੋਭੂਤਉਤ੍ਤਮਙ੍ਗਾ. ਕੁਸਲਙ੍ਗੇਸੁ ਹਿ ਸਮ੍ਮਾਦਿਟ੍ਠਿ ਉਤ੍ਤਮਙ੍ਗਾ ਸਬ੍ਬਸੇਟ੍ਠਤ੍ਤਾ, ਤਞ੍ਚ ਅਨਰਿਯਾ ਪਤਨ੍ਤਿ ਨ ਉਟ੍ਠਹਨ੍ਤਿ ਮਿਚ੍ਛਾਪਟਿਪਜ੍ਜਨਤੋ. ਤੇਨਾਹ ‘‘ਞਾਣਸਿਰੇਨਾ’’ਤਿਆਦਿ. ਅਨਰਿਯਮਗ੍ਗੇਤਿ ਮਿਚ੍ਛਾਮਗ੍ਗੇ. ਤੇਨਾਹ ‘‘ਵਿਸਮੇ ਮਗ੍ਗੇ’’ਤਿ. ਤਂ ਮਗ੍ਗਨਤੋ ਅਨਰਿਯਾ ਅਰਿਯਾਨਂ ਮਗ੍ਗਤੋ ਅਪਾਪੁਣਨੇਨ ਪਰਿਚ੍ਚਤ੍ਤਾ ਹੁਤ੍ਵਾ ਅਪਾਯੇ ਸਕਲਵਟ੍ਟਦੁਕ੍ਖੇ ਚ ਪਤਨ੍ਤਿ. ਸ੍ਵੇਵਾਤਿ ਸ੍ਵਾਯਂ ਅਨਰਿਯੇਹਿ ਕਦਾਚਿਪਿ ਗਨ੍ਤੁਂ ਅਸਕ੍ਕੁਣੇਯ੍ਯੋ ਮਗ੍ਗੋ ਅਰਿਯਾਨਂ ਵਿਸੁਦ੍ਧਸਤ੍ਤਾਨਂ ਸਬ੍ਬਸੋ ਸਮਧਿਗਮੇਨ ਸਮੋ ਹੋਤਿ. ਕਾਯਵਿਸਮਾਦੀਹਿ ਸਮਨ੍ਨਾਗਤਤ੍ਤਾ ਵਿਸਮੇ ਸਤ੍ਤਕਾਯੇ ਤੇਸਂ ਸਬ੍ਬਸੋਵ ਪਹਾਨੇਨ ਸਬ੍ਬਤ੍ਥ ਸਮਾਯੇਵ.
ਕਾਮਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਪਞ੍ਚਾਲਚਣ੍ਡਸੁਤ੍ਤਵਣ੍ਣਨਾ
੮੮. ਸਮ੍ਬਾਧੇਤਿ ਸਮ੍ਪੀਲ਼ਿਤਤਣ੍ਹਾਕਿਲੇਸਾਦਿਨਾ ਸਉਪ੍ਪੀਲ਼ਤਾਯ ਪਰਮਸਮ੍ਬਾਧੇ. ਅਤਿਵਿਯ ਸਙ੍ਕਾਰਟ੍ਠਾਨਭੂਤੋ ਹਿ ਨੀਵਰਣਸਮ੍ਬਾਧੋ ਅਧਿਪ੍ਪੇਤੋ. ਸੋ ਹਿ ਦੁਗ੍ਗਹਨੋ ਤਸ੍ਮਿਂ ਅਸਤਿ ਕਾਮਗੁਣਸਮ੍ਬਾਧੋ ਅਨਵਸਰੋ ਏਵ ਸੇਯ੍ਯਥਾਪਿ ਮਹਾਕਸ੍ਸਪਾਦੀਨਂ. ਓਕਾਸਨ੍ਤਿ ਝਾਨਸ੍ਸੇਤਂ ਨਾਮਂ ਨੀਵਰਣਸਮ੍ਬਾਧਾਭਾਵਤੋ. ਅਸਮ੍ਬਾਧਭਾਵੇਨ ਹਿ ਝਾਨਂ ਇਧ ‘‘ਓਕਾਸੋ’’ਤਿ ਵੁਤ੍ਤਂ, ਤਞ੍ਚ ਖੋ ਅਚ੍ਚਨ੍ਤਾਸਮ੍ਬਾਧਟ੍ਠਾਨਤਾਯ ਵਿਪਸ੍ਸਨਾਪਾਦਕਤਾਯ. ਤਥਾ ਹਿ ਪਾਲ਼ਿਯਂ ‘‘ਅਵਿਨ੍ਦੀ’’ਤਿਆਦਿ ਵੁਤ੍ਤਂ. ਤਤ੍ਥ ਅਵਿਨ੍ਦੀਤਿ ਵਿਨ੍ਦਿ ਪਟਿਲਭਿ. ਭੂਰਿਮੇਧਸੋਤਿ ਮਹਾਪਞ੍ਞੋ, ਸਪਞ੍ਞੋਤਿ ਅਤ੍ਥੋ. ਅਬੁਜ੍ਝੀਤਿ ਬੁਜ੍ਝਿ ਪਟਿਵਿਜ੍ਝਿ. ਪਟਿਲੀਨੋ ਹੁਤ੍ਵਾ ਸੇਟ੍ਠੋ, ਪਟਿਲੀਨਾਨਂ ਵਾ ਸੇਟ੍ਠੋਤਿ ਪਟਿਲੀਨਸੇਟ੍ਠੋ. ਮਾਨੁਸ੍ਸਯਵਸੇਨ ਉਨ੍ਨਤਭਾਵਤੋ ਪਟਿਲੀਨੋ ਨਾਮ ਪਹੀਨਮਾਨੋ. ਪਟਿਲਭਿਂਸੂਤਿ ਕਾਮਗੁਣਸਮ੍ਬਾਧੇਪਿ ‘‘ਇਮੇ ਕਾਮਗੁਣਾ ਮਾਦਿਸਾਨਂ ਕਿਂ ਕਰਿਸ੍ਸਨ੍ਤੀ’’ਤਿ? ਤੇ ਅਭਿਭੁਯ੍ਯ ਨਿਬ੍ਬਾਨਪ੍ਪਤ੍ਤਿਯਾ ਸਮ੍ਮਾਸਤਿਂ ਪਟਿਲਭਿਂਸੁ. ਤੇਨ ਸਮ੍ਪਯੁਤ੍ਤੇਨ ਲੋਕੁਤ੍ਤਰਸਮਾਧਿਨਾਪਿ ਸੁਟ੍ਠੁ ਸਮਾਹਿਤਾ.
ਅਯਂ ਕਿਰ ਦੇਵਪੁਤ੍ਤੋ ਇਤੋ ਪੁਰਿਮਵਾਰੇ ਅਤ੍ਤਭਾਵੇ ਪਠਮਜ੍ਝਾਨਲਾਭੀ ਹੁਤ੍ਵਾ ਤਤੋ ਚਵਿਤ੍ਵਾ ਬ੍ਰਹ੍ਮਕਾਯਿਕਾਸੁ ਨਿਬ੍ਬਤ੍ਤਿਤ੍ਵਾ ਤਤ੍ਥ ਝਾਨਸੁਖਂ ਅਨੁਭਵਿਤ੍ਵਾ ਤਤੋ ਚੁਤੋ ਇਦਾਨਿ ਕਾਮਭਵੇ ਨਿਬ੍ਬਤ੍ਤੋ, ਤਸ੍ਮਾ ਤਂ ਝਾਨਂ ਸਮ੍ਭਾਵੇਨ੍ਤੋ ‘‘ਤਾਦਿਸਸ੍ਸ ਨਾਮ ਝਾਨਸੁਖਸ੍ਸ ਲਾਭੀ ਭਗਵਾ’’ਤਿ ਤੇਨ ਗੁਣੇਨ ਭਗਵਨ੍ਤਂ ਅਭਿਤ੍ਥਵਨ੍ਤੋ ‘‘ਸਮ੍ਬਾਧੇ ਵਤਾ’’ਤਿ ਗਾਥਂ ਅਭਾਸਿ. ਅਥਸ੍ਸ ਭਗਵਾ ਯਥਾ ਨਾਮ ਅਟ੍ਠਸਟ੍ਠਿਯੋਜਨਸਤਸਹਸ੍ਸੁਬ੍ਬੇਧਸਿਨੇਰੁਪਬ੍ਬਤਰਾਜਂ ਉਪਾਦਾਯ ਸਾਸਪੋ ਨ ਕਿਞ੍ਚਿ ਹੋਤਿ, ਏਵਂ ਅਨਨ੍ਤਾਪਰਿਮੇਯ੍ਯਬੁਦ੍ਧਗੁਣੇ ਉਪਾਦਾਯ ਰੂਪਾਵਚਰਪਠਮਜ੍ਝਾਨਂ ਨ ਕਿਞ੍ਚਿ ਹੋਤੀਤਿ ਦਸ੍ਸੇਨ੍ਤੋ ‘‘ਯੇ ਸਤਿ’’ਨ੍ਤਿਆਦਿਨਾ ਅਨੁਤ੍ਤਰਗੁਣਾਧਿਗਮਂ ਪਵੇਦੇਸਿ. ਤਤ੍ਥ ਸਤਿਨ੍ਤਿ ਵਿਪਸ੍ਸਨਾਸਤਿਯਾ ਸਦ੍ਧਿਂ ਅਰਿਯਮਗ੍ਗਸਤਿਂ. ਸੁਸਮਾਹਿਤਾਤਿ ਲੋਕਿਯਸਮਾਧਿਨਾ ਚੇਵ ਲੋਕੁਤ੍ਤਰਸਮਾਧਿਨਾ ਚ ਸੁਟ੍ਠੁ ਸਮਾਹਿਤਾ. ਤੇ ਹਿ ਅਚ੍ਚਨ੍ਤਂ ਸੁਸਮਾਹਿਤਾ, ਨ ਝਾਨਮਤ੍ਤਲਾਭਿਨੋ ਅਕੁਪ੍ਪਧਮ੍ਮਤ੍ਤਾ. ਕੇਚਿ ‘‘ਕਮ੍ਮਨ੍ਤੇ ਸੁਸਮਾਹਿਤਾ’’ਤਿ ਪਾਠਂ ਵਤ੍ਵਾ ‘‘ਮਗ੍ਗਸਮਾਹਿਤਾ’’ਤਿ ਅਤ੍ਥਂ ਵਦਨ੍ਤਿ.
ਪਞ੍ਚਾਲਚਣ੍ਡਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਤਾਯਨਸੁਤ੍ਤਵਣ੍ਣਨਾ
੮੯. ਅਤੀਤਜਾਤਿਯਂ ਸਯਂਕਾਰਵਸੇਨ ਤਾਯ ਦਿਟ੍ਠਿਯਾ ਉਪ੍ਪਾਦਿਤਤ੍ਤਾ ਪੁਬ੍ਬੇ ਤਿਤ੍ਥਕਰੋ. ਤੇਨਾਹ ‘‘ਦਿਟ੍ਠਿ ਉਪ੍ਪਾਦੇਤ੍ਵਾ’’ਤਿ. ਅਪਰੇ ਆਹੁ ‘‘ਅਯਂ ਮੇ ਸਤ੍ਥਾਤਿ ਗਹਣਵਸੇਨ ਤਿਤ੍ਥਕਰੋ ਅਸ੍ਸ ਅਤ੍ਥੀਤਿ ਪੁਬ੍ਬੇ ਤਿਤ੍ਥਕਰੋ, ਅਤੀਤਤ੍ਤਭਾਵੇ ਤਿਤ੍ਥਕਰਸਾਵਕੋ’’ਤਿ. ਤੇ ‘‘ਦਿਟ੍ਠਿਂ ਉਪ੍ਪਾਦੇਤ੍ਵਾਤਿ ਤਸ੍ਸ ਸਤ੍ਥੁਨੋ ਦਿਟ੍ਠਿਂ ਆਦਾਯ ਗਹੇਤ੍ਵਾਤਿ ਅਤ੍ਥੋ’’ਤਿ ਵਦਨ੍ਤਿ. ਤਿਤ੍ਥਂ ਨਾਮ ਦ੍ਵਾਸਟ੍ਠਿ ਦਿਟ੍ਠਿਯੋ ਤਬ੍ਬਿਨਿਮੁਤ੍ਤਸ੍ਸ ਮਿਚ੍ਛਾਵਾਦਸ੍ਸ ਅਭਾਵਤੋ. ਤਿਤ੍ਥੇ ਨਿਯੁਤ੍ਤਾਤਿ ਤਿਤ੍ਥਿਕਾ, ਤੇ ਏਵ ਤਿਤ੍ਥਿਯਾਤਿ ਵੁਤ੍ਤਾ ਕ-ਕਾਰਸ੍ਸ ਯ-ਕਾਰਂ ਕਤ੍ਵਾ. ਤਸ੍ਸਾਤਿ ਯਥਾਵੁਤ੍ਤਸ੍ਸ ਕਲ੍ਯਾਣਕਮ੍ਮਸ੍ਸ. ਨਿਸ੍ਸਨ੍ਦੇਨਾਤਿ ਫਲਭਾਵੇਨ. ਵੀਰਿਯਪ੍ਪਟਿਸਂਯੁਤ੍ਤਾਤਿ ਵੀਰਿਯਦੀਪਨਾਤਿ ਅਤ੍ਥੋ.
ਅਨਿਯਮਿਤਆਣਤ੍ਤੀਤਿ ਅਨਿਯਮਵਿਧਾਨਂ ਅਨਿਯਮਵਸੇਨ ਵਿਧਿਵਚਨਂ. ਤਣ੍ਹਾਸੋਤਨ੍ਤਿ ਤਣ੍ਹਾਪ੍ਪਬਨ੍ਧਨਂ. ਨੀਹਰਾਤਿ ਸਮੇਹਿ ਪਜਹ. ਏਕਤ੍ਤਨ੍ਤਿ ਏਕਗ੍ਗਂ. ਤੇਨਾਹ ‘‘ਝਾਨ’’ਨ੍ਤਿ. ਉਪਪਜ੍ਜਤੀਤਿ ਨ ਉਪ੍ਪਜ੍ਜਤਿ ਨ ਪਾਪੁਣਾਤੀਤਿ ਆਹ ‘‘ਨ ਪਟਿਲਭਤੀ’’ਤਿ. ਨ ਓਸਕ੍ਕੇਯ੍ਯਾਤਿ ਨ ਸਙ੍ਕੋਚਂ ਆਪਜ੍ਜੇਯ੍ਯ. ਘਰਾਵਾਸਤੋ ਪਰਿਬ੍ਬਜਨਂ ਪਰਿਤੋ ਅਪਗਮੋਤਿ ਪਰਿਬ੍ਬਜੋ. ਪਬ੍ਬਜਿਤਵਤਸਮਾਦਾਨਸ੍ਸ ਅਦਲ਼੍ਹਤਾਯ ਚ ਤਤ੍ਥ ਚ ਅਸਕ੍ਕਚ੍ਚਕਿਰਿਯਾਯ ਸਿਥਿਲਗਹਿਤਾ. ਅਤਿਰੇਕਨ੍ਤਿ ਪਬ੍ਬਜ੍ਜਾਯ ਪੁਰਿਮਕਾਲਤੋਪਿ ਅਧਿਕਂ. ਉਪਰੀਤਿ ਉਪਰੂਪਰਿ. ਦੁਕ੍ਕਟਂ ਅਕਤਮੇਵ ਸੇਯ੍ਯੋਤਿ ਦੁਚ੍ਚਰਿਤਂ ਨਾਮ ਸਬ੍ਬੇਨ ਸਬ੍ਬਂ ਅਕਤਮੇਵ ਹਿਤਾਵਹਂ.
ਯਂ ਕਿਞ੍ਚੀਤਿ ਯਂ ਕਿਞ੍ਚਿ ਕਮ੍ਮਂ. ਸਿਥਿਲਂ ਕਤਨ੍ਤਿ ਅਸਕ੍ਕਚ੍ਚਕਾਰਿਤਾਯ ਸਿਥਿਲਂ ਕਤ੍ਵਾ ਪਵਤ੍ਤਿਤਂ. ਏਵਰੂਪਮੇਵਾਤਿ ਏਵਰੂਪਂ ਪਰਾਮਟ੍ਠਸਾਮਞ੍ਞਸਦਿਸਮੇਵ ਪਚ੍ਛਾਨੁਤਾਪਚਰਿਯਾਦਿਪਟਿਭਾਗਤੋ. ਸਂਕਿਲਿਟ੍ਠਮੇਵ ਤਣ੍ਹਾਸਂਕਿਲੇਸਉਪਕ੍ਕਿਲਿਟ੍ਠਤ੍ਤਾ. ਆਸਙ੍ਕਿਤਪਰਿਸਙ੍ਕਿਤਨ੍ਤਿਆਦਿਤੋ ਸਮਨ੍ਤਤੋਪਿ ਪਰੇਹਿ ਸਙ੍ਕਿਤਂ. ਬ੍ਰਹ੍ਮਚਰਿਯਸ੍ਸ ਆਦਿ ਆਦਿਬ੍ਰਹ੍ਮਚਰਿਯਂ, ਤਤ੍ਥ ਨਿਯੁਤ੍ਤਾਤਿ ਆਦਿਬ੍ਰਹ੍ਮਚਰਿਯਿਕਾ, ਮਗ੍ਗਬ੍ਰਹ੍ਮਚਰਿਯਸ੍ਸ ਪੁਬ੍ਬਭਾਗਪਟਿਪਦਾਤਿ ਅਤ੍ਥੋ. ਤੇਨਾਹ ‘‘ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾ’’ਤਿ. ਪੁਬ੍ਬਪਧਾਨਭੂਤਾਤਿ ਪਠਮਾਰਮ੍ਭਭੂਤਾ.
ਤਾਯਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਚਨ੍ਦਿਮਸੁਤ੍ਤਵਣ੍ਣਨਾ
੯੦. ਵਿਮਾਨੇ ਗਹਿਤੇ ਤਂਨਿਵਾਸੀਪਿ ਗਹਿਤੋ ਹੋਤੀਤਿ ਵੁਤ੍ਤਂ ‘‘ਚਨ੍ਦਵਿਮਾਨਵਾਸੀ ਦੇਵਪੁਤ੍ਤੋ’’ਤਿ. ਸਬ੍ਬਧੀਤਿ ਸਬ੍ਬਸ੍ਮਾ ਦੁਗ੍ਗਟ੍ਠਾਨਾ ਵਿਪ੍ਪਮੁਤ੍ਤੋਸਿ ਭਗਵਾ ਤ੍ਵਂ, ਤਸ੍ਮਾ ਮਯ੍ਹਮ੍ਪਿ ਇਤੋ ਸਮ੍ਬਾਧਟ੍ਠਾਨਤੋ ਵਿਪ੍ਪਮੋਕ੍ਖਂ ਕਰੋਹੀਤਿ ਅਧਿਪ੍ਪਾਯੋ. ਤੇਨਾਹ ‘‘ਤਸ੍ਸ ਮੇ ਸਰਣਂ ਭਵਾ’’ਤਿ. ਲੋਕਾਨੁਕਮ੍ਪਕਾਤਿ ਸਬ੍ਬਸ੍ਸ ਲੋਕਸ੍ਸ ਅਨੁਗ੍ਗਹਾ, ਤਸ੍ਮਾ ਤੁਯ੍ਹਮ੍ਪਿ ਏਤਸ੍ਸਪਿ ਚਨ੍ਦਸ੍ਸ. ਤਾਦਿਸਾ ਏਵਾਤਿ ਸਮਾਨਾ ਏਵ. ਪਮੁਞ੍ਚਸੀਤਿ ਪਮੁਞ੍ਚਿਤ੍ਥ. ਤੇਨਾਹ ‘‘ਅਤੀਤਤ੍ਥੇ ਵਤ੍ਤਮਾਨਵਚਨ’’ਨ੍ਤਿ.
ਚਨ੍ਦਿਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਸੂਰਿਯਸੁਤ੍ਤਵਣ੍ਣਨਾ
੯੧. ਅਨ੍ਧਭਾਵਕਰਣੇਤਿ ਲੋਕਸ੍ਸ ਅਨ੍ਧਕਰਣੇਤਿਪਿ ਅਪਰੇ. ਤੇਨਾਹ ‘‘ਤਮਸੀ’’ਤਿ. ਵਿਰੋਚਤੀਤਿ ਵਿਜ੍ਜੋਤਤਿ. ਕਾਮਂ ਦੇਵਪੁਤ੍ਤਵਸੇਨ ਪਠਮਂ ਦੇਵਤਾ ਉਦ੍ਧਟਾ, ਰਾਹੁਨੋ ਪਨ ਪਯੋਗੋ ਤਸ੍ਸ ਵਿਮਾਨੇਤਿ ਆਹ ‘‘ਮਣ੍ਡਲੀਤਿ ਮਣ੍ਡਲਸਣ੍ਠਾਨੋ’’ਤਿ. ਵਦਤਿ ਤਦਾ ਮੁਖੇਨ ਗਹਿਤਤ੍ਤਾ. ਮੁਖੇਨ ਗਹਣਞ੍ਚੇਤ੍ਥ ‘‘ਗਿਲੀ’’ਤਿ ਅਧਿਪ੍ਪੇਤਂ, ਨ ਚ ਅਜ੍ਝੋਹਰਣਨ੍ਤਿ ਆਹ ‘‘ਗਿਲੀਤਿ ਵਦਤੀ’’ਤਿ. ਇਦਾਨਿ ਤਸ੍ਸ ਮੁਖੇਨ ਗਹਣਸਮਤ੍ਥਤਂ ਦਸ੍ਸੇਤੁਂ ‘‘ਰਾਹੁਸ੍ਸ ਹੀ’’ਤਿਆਦਿ ਵੁਤ੍ਤਂ. ਸੋਤਿਆਦਿ ਤਸ੍ਸ ਚਨ੍ਦਿਮਸੂਰਿਯਾਨਂ ਗਹਣਕਾਰਣਦਸ੍ਸਨਂ. ਅਧਿਵਤ੍ਥਾ ਦੇਵਤਾਤਿ ਚਨ੍ਦਿਮਸੂਰਿਯਾਨਂ ਪਰਿਚਾਰਕਦੇਵਤਾ. ਵੇਗਨ੍ਤਿ ਜਵਂ. ਸੋ ਹਿ ਕੇਨਚਿ ਅਭਿਮੁਖਂ ਅਤਿਦੁਨ੍ਨਿਵਾਰੋ ਕਮ੍ਮਨਿਯਾਮਸਿਦ੍ਧੋ. ਮਤ੍ਥਕਨ੍ਤਿ ਕਣ੍ਠਸ੍ਸ ਉਪਰਿਮਦੇਸਂ. ਕੇਚਿ ‘‘ਸੀਸਮਤ੍ਥਕਮੇਵਾ’’ਤਿ ਵਦਨ੍ਤਿ. ਨਿਕ੍ਖਮੇਯ੍ਯ ਵੇਗਸ੍ਸ ਤਿਕ੍ਖਸੀਘਥਾਮਭਾਵਤੋ. ਆਕਡ੍ਢਿਤ੍ਵਾਤਿ ਅਤ੍ਤਨੋ ਗਮਨਦਿਸਾਭਿਮੁਖਂ ਆਕਡ੍ਢਿਤ੍ਵਾ. ਨਨ੍ਤਿ ਰਾਹੁਂ. ਉਦ੍ਧਂ ਉਲ੍ਲਙ੍ਘੇਤੁਕਾਮਮ੍ਪਿ ਓਨਮੇਯ੍ਯ. ਪਦਦ੍ਵਯੇਨਪਿ ਸੋ ਮਹਾਸਰੀਰੋ ਮਹਾਬਲੋ, ਚਨ੍ਦਿਮਸੂਰਿਯਾਨਂ ਪਨ ਗਮਨਵੇਗੋ ਤੇਨ ਸਬ੍ਬਥਾਪਿ ਦੁਨ੍ਨਿਵਾਰਿਯੋਵਾਤਿ ਦਸ੍ਸੇਤਿ. ਵਿਮਾਨੇਨਾਤਿ ਚਨ੍ਦਗ੍ਗਹੇ ਚਨ੍ਦਵਿਮਾਨੇਨ, ਸੂਰਿਯਗ੍ਗਹੇ ਸੂਰਿਯਵਿਮਾਨੇਨ ਉਭਿਨ੍ਨਮ੍ਪਿ ਵਿਮਾਨੇਨ ਸਹੇਵ. ਅਮਾਵਾਸਿਯਞ੍ਹਿ ਦ੍ਵੇ ਵਿਮਾਨਾਨਿ ਯੋਜਨਮਤ੍ਤਨ੍ਤਰਿਤਾਨਿ ਹੁਤ੍ਵਾ ਸਹੇਵ ਪਵਤ੍ਤਨ੍ਤਿ. ਯਦਿ ਦ੍ਵੇਪਿ ਦੇਵਪੁਤ੍ਤਾ ਸੋਤਾਪਤ੍ਤਿਫਲਂ ਪਤ੍ਤਾ, ਅਥ ਕਸ੍ਮਾ ਸੂਰਿਯਸੁਤ੍ਤੇ ਏਵ ‘‘ਪਜਂ ਮਮ’’ਨ੍ਤਿ ਵੁਤ੍ਤਂ, ਨ ਚਨ੍ਦਸੁਤ੍ਤੇਤਿ? ‘‘ਸੋ ਚ ਕਿਰ ਨ ਚਿਰਸ੍ਸੇਵ ਤਤੋ ਚਵਿਤ੍ਵਾ ਅਞ੍ਞਤ੍ਥ ਨਿਬ੍ਬਤ੍ਤੋ, ਅਞ੍ਞਾ ਏਵ ਚ ਦੇਵਤਾ ਤਤ੍ਥ ਵਸਿ, ਯਸ੍ਮਿਂ ਚਨ੍ਦਗ੍ਗਹੇ ਭਗਵਾ ਤਂ ਗਾਥਂ ਅਭਾਸਿ, ਨ ਤਥਾ ਸੂਰਿਯੋ, ਅਪਰਭਾਗੇ ਪਨ ਤਤ੍ਥਪਿ ਕਾਲੇਨ ਕਾਲਂ ਰਾਹੁਗ੍ਗਹੋ ਹੋਤੀ’’ਤਿ ਵਦਨ੍ਤਿ.
ਸੂਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.
੨. ਅਨਾਥਪਿਣ੍ਡਿਕਵਗ੍ਗੋ
੧. ਚਨ੍ਦਿਮਸਸੁਤ੍ਤਵਣ੍ਣਨਾ
੯੨. ਪਬ੍ਬਤਤਟਾ ਸਨ੍ਦਮਾਨੋ ਤਥਾਰੂਪੋ ਨਦੀਨਿਵਤ੍ਤਨਪਦੇਸੋਪਿ ਸਮ੍ਬਾਧਟ੍ਠਾਨਤਾਯ ਕਚ੍ਛੋ ਵਿਯਾਤਿ ਆਹ ‘‘ਪਬ੍ਬਤਕਚ੍ਛੇਪੀ’’ਤਿ. ਪਟਿਪਕ੍ਖਦੂਰੀਭਾਵੇਨ ਸੇਟ੍ਠਟ੍ਠੇਨ ਚ ਏਕੋ ਉਦੇਤੀਤਿ ਏਕੋਦਿ, ਏਕਗ੍ਗਤਾ. ਤਸ੍ਮਿਂ ਯੋਗਤੋ ਏਕਗ੍ਗਚਿਤ੍ਤਾ ਇਧ ਏਕੋਦੀ. ਪਟਿਪਕ੍ਖਤੋ ਅਤ੍ਤਾਨਂ ਨਿਪਯਨ੍ਤਿ ਵਿਸੋਧੇਨ੍ਤੀਤਿ ਨਿਪਕਾ, ਪਞ੍ਞਵਨ੍ਤੋ. ਤੇਨਾਹ ‘‘ਏਕਗ੍ਗਚਿਤ੍ਤਾ ਚੇਵਾ’’ਤਿਆਦਿ. ਕਾਯਾਦਿਭੇਦਂ ਆਰਮ੍ਮਣਂ ਸਾਤਿਸਯਾਯ ਸਤਿਯਾ ਸਰਨ੍ਤੀਤਿ ਸਤਾ. ਤੇਨਾਹ ‘‘ਸਤਿਮਨ੍ਤੋ’’ਤਿ. ਸੋਤ੍ਥਿਂ ਗਮਿਸ੍ਸਨ੍ਤੀਤਿ ਯਥਾਵੁਤ੍ਤਪਦੇਸੇ ਮਗਾ ਸੋਤ੍ਥਿਮਨੁਪਦ੍ਦਵੇਨ ਵਤ੍ਤਿਸ੍ਸਨ੍ਤਿ, ਏਵਂ ਝਾਨਲਾਭਿਨੋ ਸੋਤ੍ਥਿਂ ਕਿਲੇਸੇਹਿ ਅਨੁਪਦ੍ਦੁਤਾ ਵਤ੍ਤਿਸ੍ਸਨ੍ਤਿ. ਅਯਂ ਕਿਰ ਦੇਵਪੁਤ੍ਤੋ ਬ੍ਰਹ੍ਮਲੋਕੇ ਨਿਬ੍ਬਾਨਸਞ੍ਞੀ, ਤਸ੍ਮਾ ਏਵਮਾਹ. ਭਗਵਾ ‘‘ਅਯਂ ਦੇਵਪੁਤ੍ਤੋ ਅਨਿਬ੍ਬਾਨਗਾਮੀ ਸਮਾਨੋ ਨਿਬ੍ਬਾਨਗਾਮਿਸਞ੍ਞੀ, ਹਨ੍ਦਸ੍ਸ ਨਿਬ੍ਬਾਨਗਾਮਿਨੋ ਦਸ੍ਸੇਮੀ’’ਤਿ ਦੁਤਿਯਂ ਗਾਥਮਾਹ. ਚਤੁਨ੍ਨਂ ਓਘਾਨਂ, ਸਂਸਾਰਮਹੋਘਸ੍ਸੇਵ ਵਾ ਪਰਤੀਰਭਾਵਤੋ ਪਰਤੀਰਨ੍ਤਿ ਨਿਬ੍ਬਾਨਂ. ਅਮ੍ਬੁਨਿ ਜਾਤੋ ਅਮ੍ਬੁਜੋ, ਮਚ੍ਛੋ. ਸੁਤ੍ਤਜਾਲਂ ਛਿਨ੍ਦਿਤ੍ਵਾ ਮਚ੍ਛਾ ਵਿਯ ਕਿਲੇਸਜਾਲਂ ਭਿਨ੍ਦਿਤ੍ਵਾ ਗਮਿਸ੍ਸਨ੍ਤੀਤਿ.
ਚਨ੍ਦਿਮਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਵੇਣ੍ਡੁਸੁਤ੍ਤਵਣ੍ਣਨਾ
੯੩. ਪਯਿਰੁਪਾਸਿਯਾਤਿ ਪਯਿਰੁਪਾਸਹੇਤੁ. ਸਿਕ੍ਖਨ੍ਤੀਤਿ ਤਿਸ੍ਸੋਪਿ ਸਿਕ੍ਖਾ ਸਿਕ੍ਖਨ੍ਤਿ. ਸਿਟ੍ਠਿਪਦੇਤਿ ਕਿਲੇਸਾਨਂ ਸਾਸਨਤੋ ਵਟ੍ਟਦੁਕ੍ਖਪਰਿਤ੍ਤਾਸਨਤੋ ਚ ਸਿਟ੍ਠਿਸਞ੍ਞਿਤੇ ਯਥਾਨੁਸਿਟ੍ਠਂ ਪਟਿਪਜ੍ਜਿਤਬ੍ਬਤੋ ਪਦੇ, ਸਦ੍ਧਮ੍ਮੇਤਿ ਅਤ੍ਥੋ. ਤੇਨਾਹ ‘‘ਅਨੁਸਿਟ੍ਠਿਪਦੇ’’ਤਿ. ਤਤ੍ਥ ਅਨੁਸਿਟ੍ਠੀਤਿ ਸਦ੍ਧਮ੍ਮੋ. ਕਾਲੇਤਿ ਯੁਤ੍ਤਪਤ੍ਤਕਾਲੇ. ਅਪ੍ਪਮਾਦੋਨਾਮ ਸਮਥਵਿਪਸ੍ਸਨਾਭਾਵਨਾ.
ਵੇਣ੍ਡੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਦੀਘਲਟ੍ਠਿਸੁਤ੍ਤਵਣ੍ਣਨਾ
੯੪. ਤਥੇਵ ਪਞ੍ਞਾਯੀਤਿ ਦੀਘਲਟ੍ਠਿਤ੍ਵੇਵ ਪਞ੍ਞਾਯਿ, ਤਥਾਸਮਞ੍ਞਾ ਏਵ ਅਹੋਸਿ.
ਦੀਘਲਟ੍ਠਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਨਨ੍ਦਨਸੁਤ੍ਤਵਣ੍ਣਨਾ
੯੫. ਨਤ੍ਥਿ ਏਤਸ੍ਸ ਆਵਟ੍ਟਂ ਆਵਰਣਨ੍ਤਿ ਅਨਾਵਟਂ. ਰੁਕ੍ਖੋ ਵਾ ਪਬ੍ਬਤੋ ਵਾਤਿ ਸਤ੍ਤਾਨਂ ਪਕਤਿਚਕ੍ਖੁਸ੍ਸ ਆਵਰਣਭੂਤੋ ਰੁਕ੍ਖੋ ਵਿਯ ਪਬ੍ਬਤੋ ਵਿਯ ਚ ਅਭਿਭਵਿਤੁਂ ਸਮਤ੍ਥੋ ਞੇਯ੍ਯਾਵਰਣੋ ਨਤ੍ਥਿ. ਕਥਂਵਿਧਨ੍ਤਿ ਕਥਂਸਣ੍ਠਿਤਂ, ਕਥਂਪਕਾਰਂ ਵਾ. ਦੁਕ੍ਖਨ੍ਤਿ ਵਟ੍ਟਦੁਕ੍ਖਂ.
ਨਨ੍ਦਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਚਨ੍ਦਨਸੁਤ੍ਤਵਣ੍ਣਨਾ
੯੬. ਹੇਟ੍ਠਾਤਿ ਕਾਮਭਵੇ. ਤਤ੍ਥ ਹਿ ਪਰਿਬ੍ਭਮਨ੍ਤਸ੍ਸ ਪਤਿਟ੍ਠਾ ਦੁਲ੍ਲਭਾ ਯੇਭੁਯ੍ਯੇਨ ਤਤ੍ਥ ਸਤ੍ਤਾ ਨਿਮੁਗ੍ਗਾ ਏਵ ਹੋਨ੍ਤਿ, ਤਸ੍ਮਾ ਹੇਟ੍ਠਾ ਅਪ੍ਪਤਿਟ੍ਠੋ ਸਂਸਾਰੋ. ਉਪਰੀਤਿ ਮਹਗ੍ਗਤਭਵੇ. ਤਤ੍ਥ ਹਿ ਨਿਬ੍ਬਤ੍ਤਸ੍ਸ ਨਿਬ੍ਬਾਨਂ ਆਰੁਹਿਤੁਂ ਆਲਮ੍ਬਨਾ ਦੁਲ੍ਲਭਾ, ਝਾਨਾਭਿਰਤਿਯਾ ਤਤ੍ਥੇਵ ਨਿਕਨ੍ਤਿ ਤੇਸਂ ਬਲਵਤੀ ਹੋਤਿ, ਤਸ੍ਮਾ ਉਪਰਿ ਅਨਾਲਮ੍ਬਨੋ ਸਂਸਾਰੋ. ਪੇਸਿਤਤ੍ਤੋਤਿ ਨਿਬ੍ਬਾਨਂ ਪਤਿ ਪੇਸਿਤਚਿਤ੍ਤੋ. ਤਯੋ ਕਮ੍ਮਾਭਿਸਙ੍ਖਾਰਾਤਿ ਪੁਞ੍ਞਾਭਿਸਙ੍ਖਾਰਾਦਯੋ ਤਯੋ ਅਭਿਸਙ੍ਖਾਰਾ. ਤੇਨ ‘‘ਨਨ੍ਦੀਪੁਬ੍ਬਕੋ ਕਮ੍ਮਭਵੋ’’ਤਿ ਵਤ੍ਵਾ ‘‘ਨਨ੍ਦਿਂ ਜਨੇਤ੍ਵਾ’’ਤਿ ਵੁਤ੍ਤੋ. ਕਾਮਸਞ੍ਞਾਸੀਸੇਨ ਕਾਮਚ੍ਛਨ੍ਦਸ੍ਸ ਗਹਣਂ, ਕਾਮਚ੍ਛਨ੍ਦਪਮੁਖਾਨਿ ਚ ਓਰਮ੍ਭਾਗਿਯਸਂਯੋਜਨਾਨਿ ਗਹਿਤਾਨੀਤਿ ਆਹ ‘‘ਕਾਮਸਞ੍ਞਾਗਹਣੇਨ ਪਞ੍ਚੋਰਮ੍ਭਾਗਿਯਸਂਯੋਜਨਾਨੀ’’ਤਿ. ਰੂਪਭਵੋ ਰੂਪਂ ਭਵਪਦਲੋਪੇਨ. ਰੂਪਭਵਗ੍ਗਹਣੇਨ ਚੇਤ੍ਥ ਸੇਸਭਵਸ੍ਸਪਿ ਗਹਣਂ. ਤਸ੍ਸ ਸਂਯੋਜਨਗ੍ਗਹਣੇਨ ਪਞ੍ਚ ਉਦ੍ਧਮ੍ਭਾਗਿਯਸਂਯੋਜਨਾਨਿ ਗਹਿਤਾਨਿ. ਮਹੋਘੇਤਿ ਸਂਸਾਰਮਹੋਘੇ. ਤੇਸਨ੍ਤਿ ਕਾਮਭਵਾਦੀਨਂ ਗਹਣੇਨ ਭਵਭਾਵੇਨ ਤਦੇਕਲਕ੍ਖਣਤਾਯ. ਅਰੂਪਭਵੋ ਗਹਿਤੋ ਲਕ੍ਖਣਹਾਰਨਯੇਨ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਚਨ੍ਦਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਵਾਸੁਦਤ੍ਤਸੁਤ੍ਤਵਣ੍ਣਨਾ
੯੭. ਛਟ੍ਠਂ ਹੇਟ੍ਠਾ ਦੇਵਤਾਸਂਯੁਤ੍ਤਵਣ੍ਣਨਾਯਂ ਵੁਤ੍ਤਤ੍ਥਮੇਵ.
ਵਾਸੁਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਸੁਬ੍ਰਹ੍ਮਸੁਤ੍ਤਵਣ੍ਣਨਾ
੯੮. ਸੁਬ੍ਰਹ੍ਮਾਤਿ ਤਸ੍ਸ ਦੇਵਪੁਤ੍ਤਸ੍ਸ ਨਾਮਂ. ਤਸ੍ਸ ਸਤ੍ਥੁ ਸਨ੍ਤਿਕੂਪਸਙ੍ਕਮਨਸ੍ਸ ਕਾਰਣਂ ਦਸ੍ਸੇਨ੍ਤੋ ‘‘ਸੋ ਕਿਰਾ’’ਤਿਆਦਿਮਾਹ. ਤਦੇਵ ਸੋਕਂ ਤਸ੍ਸ ਦੇਵਪੁਤ੍ਤਸ੍ਸ ਅਟ੍ਠੁਪ੍ਪਤ੍ਤਿ. ਅਚ੍ਛਰਾਸਙ੍ਘਪਰਿਵੁਤੋਤਿ ਸਹਸ੍ਸਮਤ੍ਤੇਨ ਅਚ੍ਛਰਾਸਙ੍ਘੇਨ ਪਰਿਵੁਤੋ. ਨਨ੍ਦਨਕੀਲ਼ਿਕਨ੍ਤਿ ਨਨ੍ਦਨਵਨਕੀਲ਼ਿਕਂ. ਹਤ੍ਥਂ ਆਗਚ੍ਛਤੀਤਿ ਹਤ੍ਥਗਯ੍ਹੁਪਗੋ ਹੋਤਿ. ਗਨ੍ਥੇਨ੍ਤੀਤਿ ਏਤ੍ਥ ਮਾਲਾਵੇਠਨਮ੍ਪਿ ਖਿਡ੍ਡਾਪਸੁਤਤਾਯਾਤਿ ਦਟ੍ਠਬ੍ਬਂ. ਅਞ੍ਞਥਾ ਪੁਪ੍ਫਾਨਿਯੇਵ ਤਾਯ ਤਾਯ ਚਿਤ੍ਤਸ੍ਸ ਵਸੇਨ ਮਾਲਾਭਾਵੇਨ ਹਤ੍ਥਂ ਉਪਗਚ੍ਛਨ੍ਤੀਤਿ. ਉਪਚ੍ਛੇਦਕਕਮ੍ਮਵਸੇਨਾਤਿ ਤਸ੍ਮਿਂ ਦੇਵਲੋਕੇ ਆਯੁਸੇਸੇ ਸਤਿ ਏਵ ਤਸ੍ਸ ਪਨ ਉਪਘਾਤਕਸ੍ਸ ਲਦ੍ਧੋਕਾਸਸ੍ਸ ਪਾਪਕਮ੍ਮਸ੍ਸ ਵਸੇਨ. ‘‘ਪਹਾਰੋ’’ਤਿ ਦਿਵਸਸ੍ਸ ਤਤਿਯੋ ਭਾਗੋ ਵੁਚ੍ਚਤਿ, ਤਸ੍ਮਾ ਏਕਪ੍ਪਹਾਰੇਨੇਵਾਤਿ ਏਕਵੇਲਾਯਮੇਵਾਤਿ ਅਤ੍ਥੋ.
ਪਿਯਵਤ੍ਥੁਕਸੋਕੇਨਾਤਿ ਪਿਯਵਤ੍ਥੁਨਿਮਿਤ੍ਤਕੇਨ ਸੋਕੇਨ. ਰੁਪ੍ਪਮਾਨੋਤਿ ਪੀਲ਼ਿਯਮਾਨੋ. ਸਤ੍ਤਮੇ ਦਿਵਸੇਤਿ ਮਨੁਸ੍ਸਗਣਨਾਯ ਸਤ੍ਤਮੇ ਦਿਵਸੇ. ਤਤ੍ਥੇਵਾਤਿ ਤਸ੍ਮਿਂਯੇਵ ਨਿਰਯੇ ਨਿਬ੍ਬਤ੍ਤਿਤਬ੍ਬਂ ਇਮਿਨਾ ਤਾਹਿ ਚ ਸਹੇਵ ਪੁਬ੍ਬੇ ਤਸ੍ਸ ਪਾਪਕਮ੍ਮਸ੍ਸ ਕਤਤ੍ਤਾ. ਰੁਪ੍ਪੀਤਿ ਚਿਤ੍ਤਸਨ੍ਤਾਸਂ ਆਪਜ੍ਜਿ. ਨਿਦ੍ਧਮਿਤੁਨ੍ਤਿ ਨੀਹਰਿਤੁਂ ਅਪਨੇਤੁਂ. ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾਤਿ ਤਾਹਿ ਪਞ੍ਚਸਤਾਹਿ ਅਚ੍ਛਰਾਹਿ ਸਦ੍ਧਿਂ ਭਗਵਤੋ ਸਨ੍ਤਿਕਂ ਗਨ੍ਤ੍ਵਾ.
ਇਦਨ੍ਤਿ ਅਤ੍ਤਨੋ ਚਿਤ੍ਤਂ ਦਸ੍ਸੇਤਿ ਆਸਨ੍ਨਪਚ੍ਚਕ੍ਖਭਾਵਤੋ. ਨਿਚ੍ਚਨ੍ਤਿ ਸਦਾ. ਸ੍ਵਾਯਂ ਨਿਚ੍ਚਤ੍ਥੋ ਅਧਿਪ੍ਪਾਯਵਸੇਨ ਗਹੇਤਬ੍ਬੋਤਿ ਤਤ੍ਥ ਪਹਾਤਬ੍ਬਂ ਗਹੇਤਬ੍ਬਞ੍ਚ ਦਸ੍ਸੇਨ੍ਤੋ ‘‘ਦੇਵਲੋਕੇ’’ਤਿਆਦਿਮਾਹ. ਨ ਗਹੇਤਬ੍ਬੋ ਹੇਤੁਪਵਤ੍ਤਿਤੋ ਪੁਬ੍ਬੇ ਤਸ੍ਸ ਉਤ੍ਰਾਸਸ੍ਸ ਅਭਾਵਤੋ. ਤੇਸੂਤਿ ਦੁਕ੍ਖੇਸੁ. ਤਾਨਿ ਹਿ ਹੇਤੁਪਚ੍ਚਯੇਹਿ ਕਤ੍ਤਬ੍ਬਤੋ ਗਾਥਾਯਂ ‘‘ਕਿਚ੍ਛੇਸੂ’’ਤਿ ਵੁਤ੍ਤਾਨਿ. ਕਿਚ੍ਛੇਸੂਤਿ ਵਾ ਕਿਚ੍ਛਨਿਮਿਤ੍ਤਂ. ਯਾਸਞ੍ਹਿ ਪਯੋਗਵਿਪਤ੍ਤੀਨਂ ਵਸੇਨਸ੍ਸ ਤਾਨਿ ਦੁਕ੍ਖਾਨਿ ਉਪ੍ਪਜ੍ਜੇਯ੍ਯੁਂ, ਤਂਨਿਮਿਤ੍ਤਨ੍ਤਿ ਅਤ੍ਥੋ. ਤਾ ਹਿ ਅਸ੍ਸ ਪਯੋਗਵਿਪਤ੍ਤਿਯੋ ਗਤਿਵਿਪਤ੍ਤਿਯੋ ਸਤ੍ਥੁ ਸਨ੍ਤਿਕਂ ਉਪਗਮਨੇਨ ਹਾਯੇਯ੍ਯੁਂ. ਨਿਬ੍ਬਤ੍ਤਾਨਂ ਦਿਟ੍ਠਾਨੀਤਿ ਨਿਬ੍ਬਤ੍ਤਾਨਂ ਵਸੇਨ ਦਿਟ੍ਠਾਨਿ ਦੁਕ੍ਖਾਨਿ. ਤੇਸੁ ਚ ਦੁਕ੍ਖੇਸੁ. ਸਬ੍ਬਤ੍ਥ ਨਿਮਿਤ੍ਤਤ੍ਥੇ ਭੁਮ੍ਮਂ. ਡਯ੍ਹਮਾਨੋ ਵਿਯ ਚਿਤ੍ਤਸਨ੍ਤਾਪੇਨ.
ਚਤ੍ਤਾਰਿਪਿ ਸਚ੍ਚਾਨਿ ਬੁਜ੍ਝਤਿ ਪਟਿਵਿਜ੍ਝਤੀਤਿ ਬੋਧਿ, ਸਤਿਆਦਿਧਮ੍ਮਸਾਮਗ੍ਗੀ, ਤਸ੍ਮਾ ਬੋਜ੍ਝਾ ਬੋਧਿਤੋ. ਸਾ ਪਨ ਬੋਧਿ ਭਾਵਨਾਕਾਰੇਨੇਵ ਪਵਤ੍ਤਤਿ, ਅਞ੍ਞਤ੍ਰਸਦ੍ਦਯੋਗੇਨ ਚ ‘‘ਬੋਜ੍ਝਾ’’ਤਿ ਨਿਸ੍ਸਕ੍ਕਵਚਨਨ੍ਤਿ ਤਦਤ੍ਥਂ ਦਸ੍ਸੇਨ੍ਤੋ ਮੁਞ੍ਚਿਤ੍ਵਾਪਦਂ ਅਪੇਕ੍ਖਿਤ੍ਵਾ ‘‘ਬੋਜ੍ਝਙ੍ਗਭਾਵਨ’’ਨ੍ਤਿ ਆਹ. ਤਪੋਗੁਣਨ੍ਤਿ ਧੁਤਧਮ੍ਮਮਾਹ. ਸੋ ਹਿ ਤਣ੍ਹਾਲੋਲੁਪ੍ਪਸ੍ਸ ਤਪਨਤੋ ਤਪੋ, ਸਯਂ ਗੁਣਸਭਾਵਤ੍ਤਾ ਗੁਣਸਨ੍ਨਿਸ੍ਸਯਤੋ ਚ ਗੁਣਨ੍ਤਿ. ਤੇਨਾਹ ‘‘ਧੁਤਙ੍ਗਸਙ੍ਖਾਤਂ ਤਪੋਗੁਣ’’ਨ੍ਤਿ. ਸਬ੍ਬੇ ਸਙ੍ਖਾਰਗਤਾ ਨਿਸ੍ਸਜ੍ਜੀਯਨ੍ਤਿ ਏਤ੍ਥਾਤਿ ਸਬ੍ਬਨਿਸ੍ਸਗ੍ਗੋ, ਅਸਙ੍ਖਤਧਾਤੂਤਿ ਆਹ ‘‘ਸਬ੍ਬਨਿਸ੍ਸਗ੍ਗਾਤਿ ਨਿਬ੍ਬਾਨਤੋ’’ਤਿ.
ਇਨ੍ਦ੍ਰਿਯਸਂਵਰੋਵ ਪਠਮਂ ਵੇਦਿਤਬ੍ਬੋ ਪਟਿਪਤ੍ਤਿਕ੍ਕਮਵਸੇਨ ਤਸ੍ਸੇਵ ਪਠਮਤ੍ਤਾ. ਤਂ ਪਨ ਪਟਿਪਤ੍ਤਿਕ੍ਕਮਂ ਦਸ੍ਸੇਤੁਂ ‘‘ਇਨ੍ਦ੍ਰਿਯਸਂਵਰੇ ਹੀ’’ਤਿਆਦਿਮਾਹ. ਨਿਪ੍ਪਰਿਯਾਯਤੋ ਮਗ੍ਗਪਰਿਯਾਪਨ੍ਨਾ ਏਵ ਬੋਜ੍ਝਙ੍ਗਾਤਿ ਆਹ ‘‘ਸਹਵਿਪਸ੍ਸਨਾਯ ਬੋਜ੍ਝਙ੍ਗੇ’’ਤਿ. ਤਸ੍ਸਾਤਿ ਤਥਾਭਾਵੇਨ ਤਸ੍ਸ ਯੋਗਿਨੋ. ਯਸ੍ਮਾ ਦੇਵਪੁਤ੍ਤਸ੍ਸ ਸਤ੍ਥਾ ਤਂ ਗਾਥਂ ਵਤ੍ਵਾ ਉਪਰਿ ਚ ਸਚ੍ਚਾਨਿ ਪਕਾਸੇਸਿ, ਤਸ੍ਮਾ ਵੁਤ੍ਤਂ ‘‘ਭਗਵਾ ਚਤੁਸਚ੍ਚਵਸੇਨ ਦੇਸਨਂ ਵਿਨਿਵਤ੍ਤੇਸੀ’’ਤਿ. ਦੇਵਪੁਤ੍ਤੋ ਸੋਤਾਪਤ੍ਤਿਫਲੇ ਪਤਿਟ੍ਠਹੀਤਿ ਕਾਮਂ ਤਸ੍ਸੇਵ ਵਿਸੇਸਾਧਿਗਮੋ ਇਧਾਗਤੋ, ਪਞ੍ਚਸਤਮਤ੍ਤਾਹਿ ਪਨ ਅਚ੍ਛਰਾਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਹੀਤਿ ਵੇਦਿਤਬ੍ਬਂ. ਤੇਨਾਹ ਮਹਾਸਤਿਪਟ੍ਠਾਨਸੁਤ੍ਤਵਣ੍ਣਨਾਯਂ (ਦੀ. ਨਿ. ਅਟ੍ਠ. ੨.੩੭੩; ਮ. ਨਿ. ਅਟ੍ਠ. ੧.੧੦੬) ‘‘ਸੋ ਦੇਸਨਾਪਰਿਯੋਸਾਨੇ ਪਞ੍ਚਹਿ ਅਚ੍ਛਰਾਸਤੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਤਂ ਸਮ੍ਪਤ੍ਤਿਂ ਥਾਵਰਂ ਕਤ੍ਵਾ ਦੇਵਲੋਕਮੇਵ ਅਗਮਾਸੀ’’ਤਿ.
ਸੁਬ੍ਰਹ੍ਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਕਕੁਧਸੁਤ੍ਤਵਣ੍ਣਨਾ
੯੯. ‘‘ਨਨ੍ਦਾਮੀ’’ਤਿ ਵੁਤ੍ਤੇ ਨਨ੍ਦੀ ਨਾਮ ਪਬ੍ਬਜਿਤਸ੍ਸ ਮਲਨ੍ਤਿ ਚੋਦੇਤੁਕਾਮੋ ਦੇਵਪੁਤ੍ਤੋ ‘‘ਨਨ੍ਦਸੀ’’ਤਿ ਪੁਚ੍ਛਿ. ਅਥਸ੍ਸ ਭਗਵਾ ਤਂ ਪਟਿਕ੍ਖਿਪਨ੍ਤੋ ‘‘ਕਿਂ ਲਦ੍ਧਾ’’ਤਿ? ਆਹ. ਤੇਨ ‘‘ਤਯਾ ਮਮ ਅਧਿਪ੍ਪੇਤਨਨ੍ਦਿਯਾ ਇਧ ਪਚ੍ਚਯੋ ਏਵ ਨਤ੍ਥਿ, ਕੁਤੋ ਸਾ ਨਨ੍ਦੀ’’ਤਿ ਦਸ੍ਸੇਤਿ. ਤੇਨਾਹ ‘‘ਤੁਟ੍ਠਿ ਨਾਮਾ’’ਤਿਆਦਿ. ਅਥ ਦੇਵਪੁਤ੍ਤੋ ਨਨ੍ਦਿਯਾ ਅਸਤਿ ਸੋਕੇਨ ਭਵਿਤਬ੍ਬਂ, ਸੋਕੋ ਚ ਪਬ੍ਬਜਿਤਸ੍ਸ ਮਲਨ੍ਤਿ ਚੋਦੇਨ੍ਤੋ ਆਹ ‘‘ਤੇਨ ਹਿ, ਸਮਣ, ਸੋਚਸੀ’’ਤਿ. ਭਗਵਾ ਤਮ੍ਪਿ ਪਟਿਕ੍ਖਿਪਨ੍ਤੋ ‘‘ਕਿਂ ਜੀਯਿਤ੍ਥਾ’’ਤਿਆਦਿਮਾਹ. ਕਿਂ ਮਂ ਜਿਨਾਤੀਤਿ ਅਤ੍ਥੋ?
ਯਦਿ ਤੇ ਨਨ੍ਦਿਸੋਕਾ ਨ ਸਨ੍ਤਿ ਹਾਸਵਤ੍ਥੁਨੋ ਲਾਭਸ੍ਸ ਜਾਨਿਯਾ ਚ ਅਭਾਵਤੋ, ਏਕਵਿਹਾਰਿਨੋ ਪਨ ਅਰਤਿਯਾ ਭਵਿਤਬ੍ਬਨ੍ਤਿ ਆਹ – ‘‘ਕਚ੍ਚਿ ਤਂ ਏਕਮਾਸੀਨਂ, ਅਰਤੀ ਨਾਭਿਕੀਰਤੀ’’ਤਿ. ਤਸ੍ਮਿਮ੍ਪਿ ਭਗਵਤਾ ਪਟਿਕ੍ਖਿਤ੍ਤੇ ਅਥ ਨੇਸਮ੍ਪਿ ਨਨ੍ਦਿਸੋਕਾਰਤੀਨਂ ਅਭਾਵੇ ਕਾਰਣਂ ਪੁਚ੍ਛਨ੍ਤੋ ‘‘ਕਥਂ ਤ੍ਵ’’ਨ੍ਤਿ ਗਾਥਮਾਹ? ਅਥਸ੍ਸ ਭਗਵਾ ਤਂ ਕਾਰਣਂ ਪਵੇਦੇਨ੍ਤੋ ‘‘ਅਘਜਾਤਸ੍ਸਾ’’ਤਿ ਗਾਥਮਾਹ. ਤਤ੍ਥ ਅਘਜਾਤਸ੍ਸਾਤਿ ਅਘੇ ਜਾਤਸ੍ਸ. ਤੇਨਾਹ ‘‘ਵਟ੍ਟਦੁਕ੍ਖੇ ਠਿਤਸ੍ਸਾ’’ਤਿ. ਜਾਤਤਣ੍ਹਸ੍ਸ ਅਪ੍ਪਹੀਨਤਣ੍ਹਸ੍ਸ ਵਟ੍ਟਦੁਕ੍ਖਂ ਆਗਤਮੇਵ ਕਾਰਣਸ੍ਸ ਅਪ੍ਪਹੀਨਤ੍ਤਾ. ਤਸ੍ਸੇਵ ਹਿ ਕਾਰਣਸ੍ਸ ਅਪ੍ਪਹੀਨਤਂ ਦਸ੍ਸੇਨ੍ਤੋ ‘‘ਦੁਕ੍ਖੀ ਸੁਖਂ ਪਤ੍ਥਯਤੀਤਿ ਹਿ ਵੁਤ੍ਤ’’ਨ੍ਤਿ ਆਹ. ਦੁਕ੍ਖਪ੍ਪਵਤ੍ਤਿਯਾ ਸਾਪਿ ਤਣ੍ਹਾਪ੍ਪਵਤ੍ਤਿ ਤੇਨ ਦਸ੍ਸਿਤਾ. ਇਤੀਤਿਆਦਿਨਾ ਵੁਤ੍ਤਮੇਵਤ੍ਥਂ ਨਿਗਮਨਵਸੇਨ ਦਸ੍ਸੇਤਿ.
ਕਕੁਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਉਤ੍ਤਰਸੁਤ੍ਤਵਣ੍ਣਨਾ
੧੦੦. ਨਵਮਨ੍ਤਿ ਉਤ੍ਤਰਸੁਤ੍ਤਂ ਹੇਟ੍ਠਾ ਦੇਵਤਾਸਂਯੁਤ੍ਤਵਣ੍ਣਨਾਯਂ ਵੁਤ੍ਤਤ੍ਥਮੇਵ.
ਉਤ੍ਤਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਅਨਾਥਪਿਣ੍ਡਿਕਸੁਤ੍ਤਵਣ੍ਣਨਾ
੧੦੧. ਦਸਮੇ ਕਾਮਂ ਦੇਵਤਾਸਂਯੁਤ੍ਤੇਪਿ ‘‘ਇਦਂ ਹਿ ਤਂ ਜੇਤਵਨ’’ਨ੍ਤਿਆਦਿਨਾ ਇਮਾ ਏਵ ਗਾਥਾ ਆਗਤਾ. ਤਤ੍ਥ ‘‘ਅਞ੍ਞਤਰਾ ਦੇਵਤਾ’’ਤਿ ਨਿਦਾਨਂ ਆਰੋਪਿਤਂ. ਹੇਟ੍ਠਾ ਆਗਤਨਯਤ੍ਤਾ ਏਵ ਹਿ ਪੋਤ੍ਥਕੇਸੁ ਨ ਲਿਖਿਤਂ, ਇਧ ਪਨ ਦੇਵਪੁਤ੍ਤਸਂਯੁਤ੍ਤੇ ‘‘ਅਨਾਥਪਿਣ੍ਡਿਕੋ ਦੇਵਪੁਤ੍ਤੋ’’ਤਿ ਨਿਦਾਨੇ ਨਿਗਮੇ ਚ ਆਗਤਂ, ਤਤ੍ਥ ਦੇਵਪੁਤ੍ਤੇਨ ਸਤ੍ਥੁ ਵੁਤ੍ਤਪ੍ਪਕਾਰਗੁਣਪਵੇਦਨਵਸੇਨ ਵੁਤ੍ਤਂ. ਸਤ੍ਥਾ ਪਨ ਭਿਕ੍ਖੂਨਂ ਤਮਤ੍ਥਂ ਪਵੇਦੇਨ੍ਤੋ ‘‘ਅਞ੍ਞਤਰੋ ਦੇਵਪੁਤ੍ਤੋ’’ਤਿ ਆਹ. ਤਥਾ ਪਵੇਦਨੇ ਪਨ ਕਾਰਣਂ ਦਸ੍ਸੇਨ੍ਤੋ ‘‘ਆਨਨ੍ਦਤ੍ਥੇਰਸ੍ਸਾ’’ਤਿਆਦਿਮਾਹ. ਅਨੁਮਾਨਬੁਦ੍ਧਿਯਾਤਿ ਅਨੁਮਾਨਞਾਣਸ੍ਸ. ਆਨੁਭਾਵਪ੍ਪਕਾਸਨਤ੍ਥਨ੍ਤਿ ਬਲਦੀਪਨਤ੍ਥਂ.
ਅਨਾਥਪਿਣ੍ਡਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.
੩. ਨਾਨਾਤਿਤ੍ਥਿਯਵਗ੍ਗੋ
੧. ਸਿਵਸੁਤ੍ਤਵਣ੍ਣਨਾ
੧੦੨. ਤਤਿਯਵਗ੍ਗਸ੍ਸ ਪਠਮਨ੍ਤਿ ਤਤਿਯਵਗ੍ਗੇ ਪਠਮਸੁਤ੍ਤਂ. ਵੁਤ੍ਤਤ੍ਥਮੇਵ ਹੇਟ੍ਠਾ ਸਤੁਲ੍ਲਪਕਾਯਿਕਵਗ੍ਗੇ ਪਠਮਸੁਤ੍ਤੇ.
ਸਿਵਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਖੇਮਸੁਤ੍ਤਵਣ੍ਣਨਾ
੧੦੩. ਪਠਮਂਯੇਵਾਤਿ ਜਰਾਮਰਣਾਦਿਭਾਵਤੋ ਪਗੇਵ. ਬਲਵਚਿਨ੍ਤਨਂ ਚਿਨ੍ਤੇਤੀਤਿ ਯਥਾ ਸਾਕਟਿਕੋ ਅਜਾਨਿਤ੍ਵਾ ਵਿਸਮੇ ਮਗ੍ਗੇ ਸਕਟਂ ਪਾਜੇਨ੍ਤੋ ਅਕ੍ਖੇ ਛਿਨ੍ਨੇ ਪਤਿਕਾਤੁਂ ਅਵਿਸਹਨ੍ਤੋ ਦੁਕ੍ਖੀ ਦੁਮ੍ਮਨੋ ਬਲਵਚਿਨ੍ਤਨਂ ਚਿਨ੍ਤੇਤਿ, ਮਹਨ੍ਤਂ ਚਿਤ੍ਤਸਨ੍ਤਾਪਂ ਪਾਪੁਣਾਤਿ, ਏਵਂ ਅਧਮ੍ਮਵਾਦੀ ਮਚ੍ਚੁਮੁਖਂ ਪਤ੍ਤੋ ਬਲਵਚਿਤ੍ਤਸਨ੍ਤਾਪਂ ਪਾਪੁਣਾਤਿ, ਤਸ੍ਮਾ ਧਮ੍ਮਚਰਿਯਾਯ ਨਪ੍ਪਮਜ੍ਜਿਤਬ੍ਬਨ੍ਤਿ.
ਖੇਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਸੇਰੀਸੁਤ੍ਤਵਣ੍ਣਨਾ
੧੦੪. ਯਂ ਦਾਨਂ ਦੇਮੀਤਿ ਯਂ ਦੇਯ੍ਯਧਮ੍ਮਂ ਪਰਸ੍ਸ ਦੇਮਿ. ਤਸ੍ਸ ਪਤਿ ਹੁਤ੍ਵਾਤਿ ਤਬ੍ਬਿਸਯਂ ਲੋਭਂ ਸੁਟ੍ਠੁ ਅਭਿਭਵਨ੍ਤੋ ਤਸ੍ਸ ਅਧਿਪਤਿ ਹੁਤ੍ਵਾ ਦੇਮਿ ਤੇਨ ਅਨਾਕਡ੍ਢਨੀਯਤ੍ਤਾ. ‘‘ਨ ਦਾਸੋ ਨ ਸਹਾਯੋ’’ਤਿ ਵਤ੍ਵਾ ਤਦੁਭਯਂ ਅਨ੍ਵਯਤੋ ਬ੍ਯਤਿਰੇਕਤੋ ਦਸ੍ਸੇਤੁਂ ‘‘ਯੋ ਹੀ’’ਤਿਆਦਿ ਵੁਤ੍ਤਂ. ਦਾਸੋ ਹੁਤ੍ਵਾ ਦੇਤਿ ਤਣ੍ਹਾਯ ਦਾਸਬ੍ਯਸ੍ਸ ਉਪਗਤਤ੍ਤਾ. ਸਹਾਯੋ ਹੁਤ੍ਵਾ ਦੇਤਿ ਤਸ੍ਸ ਪਿਯਭਾਵਾਵਿਸ੍ਸਜ੍ਜਨਤੋ. ਸਾਮੀ ਹੁਤ੍ਵਾ ਦੇਤਿ ਤਣ੍ਹਾਦਾਸਬ੍ਯਤੋ ਅਤ੍ਤਾਨਂ ਮੋਚੇਤ੍ਵਾ ਅਭਿਭੁਯ੍ਯ ਪਵਤ੍ਤਨਤੋ. ਸਾਮਿਪਰਿਭੋਗਸਦਿਸਾ ਹੇਤਸ੍ਸਾਯਂ ਪਵਤ੍ਤਤੀਤਿ.
ਅਥ ਵਾ ਯੋ ਦਾਨਸੀਲਤਾਯ ਦਾਯਕੋ ਪੁਗ੍ਗਲੋ, ਸੋ ਦਾਨੇ ਪਵਤ੍ਤਿਭੇਦੇਨ ਦਾਨਦਾਸੋ ਦਾਨਸਹਾਯੋ ਦਾਨਪਤੀਤਿ ਤਿਪ੍ਪਕਾਰੋ ਹੋਤੀਤਿ ਦਸ੍ਸੇਤਿ. ਤਦਸ੍ਸ ਤਿਪ੍ਪਕਾਰਤਂ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਯੋ ਹੀ’’ਤਿਆਦਿ ਵੁਤ੍ਤਂ. ਦਾਤਬ੍ਬਟ੍ਠੇਨ ਦਾਨਂ, ਅਨ੍ਨਪਾਨਾਦਿ. ਤਤ੍ਥ ਯਂ ਅਤ੍ਤਨਾ ਪਰਿਭੁਞ੍ਜਤਿ ਤਣ੍ਹਾਧਿਪਨ੍ਨਤਾਯ, ਤਸ੍ਸ ਵਸੇ ਵਤ੍ਤਨਤੋ ਦਾਸੋ ਵਿਯ ਹੋਤਿ. ਯਂ ਪਰੇਸਂ ਦੀਯਤਿ, ਤਤ੍ਥਪਿ ਅਨ੍ਨਪਾਨਸਾਮਞ੍ਞੇਨ ਇਦਂ ਵੁਤ੍ਤਂ ‘‘ਦਾਨਸਙ੍ਖਾਤਸ੍ਸ ਦੇਯ੍ਯਧਮ੍ਮਸ੍ਸ ਦਾਸੋ ਹੁਤ੍ਵਾ ਦੇਤੀ’’ਤਿ. ਸਹਾਯੋ ਹੁਤ੍ਵਾ ਦੇਤਿ ਅਤ੍ਤਨਾ ਪਰਿਭੁਞ੍ਜਿਤਬ੍ਬਸ੍ਸ ਪਰੇਸਂ ਦਾਤਬ੍ਬਸ੍ਸ ਚ ਸਮਸਮਟ੍ਠਪਨੇਨ. ਪਤਿ ਹੁਤ੍ਵਾ ਦੇਤਿ ਸਯਂ ਦੇਯ੍ਯਧਮ੍ਮਸ੍ਸ ਵਸੇ ਅਵਤ੍ਤਿਤ੍ਵਾ ਤਸ੍ਸ ਅਤ੍ਤਨੋ ਵਸੇ ਵਤ੍ਤਾਪਨਤੋ.
ਅਪਰੋ ਨਯੋ – ਯੋ ਅਤ੍ਤਨਾ ਪਣੀਤਂ ਪਰਿਭੁਞ੍ਜਿਤ੍ਵਾ ਪਰੇਸਂ ਨਿਹੀਨਂ ਦੇਤਿ, ਸੋ ਦਾਨਦਾਸੋ ਨਾਮ ਤਨ੍ਨਿਮਿਤ੍ਤਨਿਹੀਨਭਾਵਾਪਤ੍ਤਿਤੋ. ਯੋ ਯਾਦਿਸਂ ਅਤ੍ਤਨਾ ਪਰਿਭੁਞ੍ਜਤਿ, ਤਾਦਿਸਮੇਵ ਪਰੇਸਂ ਦੇਤਿ, ਸੋ ਦਾਨਸਹਾਯੋ ਨਾਮ ਤਨ੍ਨਿਮਿਤ੍ਤਨਿਹੀਨਾਧਿਕਭਾਵਵਿਸ੍ਸਜ੍ਜਨੇਨ ਸਦਿਸਭਾਵਾਪਤ੍ਤਿਤੋ. ਯੋ ਅਤ੍ਤਨਾ ਨਿਹੀਨਂ ਪਰਿਭੁਞ੍ਜਿਤ੍ਵਾ ਪਰੇਸਂ ਪਣੀਤਂ ਦੇਤਿ, ਸੋ ਦਾਨਪਤਿ ਨਾਮ ਤਨ੍ਨਿਮਿਤ੍ਤਸੇਟ੍ਠਭਾਵਪ੍ਪਤ੍ਤਿਤੋ. ਕਮ੍ਮਸਰਿਕ੍ਖਕੋ ਹਿ ਵਿਪਾਕੋ, ਤਸ੍ਮਾ ਦੇਵਪੁਤ੍ਤੋ ‘‘ਦਾਨਪਤੀ’’ਤਿ ਵਦਨ੍ਤੋ ‘‘ਅਹਂ ਤਾਦਿਸੋ ਅਹੋਸਿ’’ਨ੍ਤਿ ਦਸ੍ਸੇਤਿ.
‘‘ਚਤੂਸੁ ਦ੍ਵਾਰੇਸੁ ਦਾਨਂ ਦੀਯਿਤ੍ਥਾ’’ਤਿ ਪਾਲ਼ਿਯਂ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰੇਤ੍ਵਾ ਦਸ੍ਸੇਤੁਂ ‘‘ਤਸ੍ਸ ਕਿਰਾ’’ਤਿਆਦਿ ਵੁਤ੍ਤਂ. ਦਾਨਨ੍ਤਿ ਯਿਟ੍ਠਂ, ਤਞ੍ਚ ਖੋ ਸਬ੍ਬਸਾਧਾਰਣਵਸੇਨ ਕਤਨ੍ਤਿ ਆਹ ‘‘ਸਮਣ …ਪੇ… ਯਾਚਕਾਨ’’ਨ੍ਤਿ. ਪਬ੍ਬਜ੍ਜੂਪਗਤਾਤਿ ਯਂ ਕਿਞ੍ਚਿ ਪਬ੍ਬਜ੍ਜਂ ਉਪਗਤਾ. ਭੋਵਾਦਿਨੋਤਿ ਜਾਤਿਮਤ੍ਤਬ੍ਰਾਹ੍ਮਣੇ ਵਦਤਿ. ਨਾਲਤ੍ਥ ਬੁਦ੍ਧਸੁਞ੍ਞਤ੍ਤਾ ਤਦਾ ਲੋਕਸ੍ਸ. ਦੁਗ੍ਗਤਾਤਿ ਦੁਕ੍ਖਜੀਵਿਕਕਪ੍ਪਕਾ ਕਸਿਰਵੁਤ੍ਤਿਕਾ. ਤੇਨਾਹ ‘‘ਦਲਿਦ੍ਦਮਨੁਸ੍ਸਾ’’ਤਿ. ਕਸਿਵਾਣਿਜ੍ਜਾਦਿਜੀਵਿਕਂ ਅਨੁਟ੍ਠਾਤੁਂ ਅਸਮਤ੍ਥਾ ਇਧ ‘‘ਕਪਣਾ’’ਤਿ ਅਧਿਪ੍ਪੇਤਾਤਿ ਆਹ ‘‘ਕਾਣਕੁਣਿਆਦਯੋ’’ਤਿ. ਪਥਾਵਿਨੋਤਿ ਅਦ੍ਧਿਕਾ. ਵਨਿਬ੍ਬਕਾਤਿ ਦਾਯਕਾਨਂ ਗੁਣਕਿਤ੍ਤਨਕਮ੍ਮਫਲਕਿਤ੍ਤਨਵਸੇਨ ਯਾਚਕਾ ਸੇਯ੍ਯਥਾਪਿ ਨਗ੍ਗਾਦਯੋ. ਤੇਨਾਹ ‘‘ਇਟ੍ਠਂ ਦਿਨ੍ਨ’’ਨ੍ਤਿਆਦਿ. ਪਸਤਮਤ੍ਤਨ੍ਤਿ ਵੀਹਿਤਣ੍ਡੁਲਾਦਿਵਸੇਨ ਵੁਤ੍ਤਂ. ਸਰਾਵਮਤ੍ਤਨ੍ਤਿ ਯਾਗੁਭਤ੍ਤਾਦਿਵਸੇਨ. ਯਥਾ ਗਾਮਲਾਭੋ ਗਾਮੇ ਉਪ੍ਪਜ੍ਜਨਕੋ ਆਯਲਾਭੋ, ਏਵਂ ਤਤ੍ਥ ਦ੍ਵਾਰਲਾਭੋਤਿ ਆਹ ‘‘ਤਤ੍ਥ ਉਪ੍ਪਜ੍ਜਨਕਸਤਸਹਸ੍ਸੇ’’ਤਿ. ਮਹਨ੍ਤਤਰਂ ਦਾਨਂ ਅਦਂਸੁ ਅਞ੍ਞਸ੍ਸਪਿ ਧਨਸ੍ਸ ਵਿਨਿਯੋਗਂ ਗਤਤ੍ਤਾ. ਤਂ ਸਨ੍ਧਾਯਾਤਿ ਤਂ ਮਹਨ੍ਤਤਰਂ ਦਾਨਂ ਕਤਂ ਸਨ੍ਧਾਯ. ਰਞ੍ਞੋ ਹਿ ਤਤ੍ਥ ਦਾਨਂ ਇਤ੍ਥਾਗਾਰਸ੍ਸ ਦਾਨੇਨ ਮਹਤਾ ਅਭਿਭੂਤਂ ਵਿਯ ਪਟਿਨਿਵਤ੍ਤਂ ਹੋਤੀਤਿ ਆਹ ‘‘ਪਟਿਨਿਵਤ੍ਤੀ’’ਤਿ. ਕੋਚੀਤਿ ਭੁਮ੍ਮਤ੍ਥੇ ਪਚ੍ਚਤ੍ਤਵਚਨਂ. ਤੇਨਾਹ ‘‘ਕਤ੍ਥਚੀ’’ਤਿ. ਅਨੇਕਵਸ੍ਸਸਹਸ੍ਸਾਯੁਕਕਾਲੇ ਤਸ੍ਸ ਉਪ੍ਪਨ੍ਨਤ੍ਤਾ ਅਸੀਤਿਵਸ੍ਸਸਹਸ੍ਸਾਨਿ ਸੋ ਰਾਜਾ ਦਾਨਮਦਾਸੀਤਿ.
ਸੇਰੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਘਟੀਕਾਰਸੁਤ੍ਤਵਣ੍ਣਨਾ
੧੦੫. ਚਤੁਤ੍ਥਂ ਹੇਟ੍ਠਾ ਦੇਵਤਾਸਂਯੁਤ੍ਤਵਣ੍ਣਨਾਯਂ ਵੁਤ੍ਤਤ੍ਥਮੇਵ.
ਘਟੀਕਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਜਨ੍ਤੁਸੁਤ੍ਤਵਣ੍ਣਨਾ
੧੦੬. ਯੇ ਵਿਨਯੇ ਅਪਕਤਞ੍ਞੁਨੋ ਸਂਕਿਲੇਸਿਕੇਸੁ ਵੋਦਾਨਿਯੇਸੁ ਧਮ੍ਮੇਸੁ ਨ ਕੁਸਲਾ ਯਂ ਕਿਞ੍ਚਿ ਨ ਕਾਰਿਨੋ ਵਿਪ੍ਪਟਿਸਾਰਬਹੁਲਾ. ਤੇਸਂ ਅਨੁਪ੍ਪਨ੍ਨਞ੍ਚ ਉਦ੍ਧਚ੍ਚਂ ਉਪ੍ਪਜ੍ਜਤਿ, ਉਪ੍ਪਨ੍ਨਞ੍ਚ ਭਿਯ੍ਯੋਭਾਵਂ ਵੇਪੁਲ੍ਲਂ ਆਪਜ੍ਜਤੀਤਿ ਆਹ ‘‘ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਯ…ਪੇ… ਉਦ੍ਧਚ੍ਚਪਕਤਿਕਾ’’ਤਿ. ਸਾਰਾਭਾਵੇਨ ਤੁਚ੍ਛਤ੍ਤਾ ਚ ਨਲ਼ੋ ਵਿਯਾਤਿ ਨਲ਼ੋ, ਮਾਨੋਤਿ ਆਹ ‘‘ਉਨ੍ਨਲ਼ਾਤਿ ਉਗ੍ਗਤਨਲ਼ਾ’’ਤਿ. ਤੇਨਾਹ ‘‘ਉਟ੍ਠਿਤਤੁਚ੍ਛਮਾਨਾ’’ਤਿ. ਮਾਨੋ ਹਿ ਸੇਯ੍ਯਸ੍ਸ ਸੇਯ੍ਯੋਤਿ ਸਦਿਸੋਤਿ ਚ ਪਵਤ੍ਤਿਯਾ ਵਿਸੇਸਤੋ ਤੁਚ੍ਛੋ. ਚਾਪਲ੍ਲੇਨਾਤਿ ਚਪਲਭਾਵੇਨ, ਤਣ੍ਹਾਲੋਲੁਪ੍ਪੇਨਾਤਿ ਅਤ੍ਥੋ. ਮੁਖਖਰਾਤਿ ਮੁਖੇਨ ਫਰੁਸਾ, ਫਰੁਸਵਾਦਿਨੋਤਿ ਅਤ੍ਥੋ. ਵਿਕਿਣ੍ਣਵਾਚਾਤਿ ਵਿਸਟਵਚਨਾ, ਸਮ੍ਫਪ੍ਪਲਾਪਤਾਯ ਅਪਰਿਯਨ੍ਤਵਚਨਾ. ਤੇਨਾਹ ‘‘ਅਸਂਯਤਵਚਨਾ’’ਤਿਆਦਿ. ਚਣ੍ਡਸੋਤੇ ਬਦ੍ਧਨਾਵਾਸਦਿਸਾਤਿ ਏਤੇਨ ਅਨਵਟ੍ਠਿਤਕਿਰਿਯਤਂ ਦਸ੍ਸੇਤਿ. ਯੇਨ ਸਮਨ੍ਨਾਗਤਾ ਸਤ੍ਤਾ ਏਕਸ੍ਮਿਂ ਠਾਨੇ ਠਾਤੁਂ ਵਾ ਨਿਸੀਦਿਤੁਂ ਵਾ ਨ ਸਕ੍ਕੋਨ੍ਤਿ, ਇਤੋ ਚਿਤੋ ਚ ਵਿਚਰਨ੍ਤਿ. ਅਨਵਟ੍ਠਿਤਚਿਤ੍ਤਾਤਿ ਏਕਸ੍ਮਿਂ ਆਰਮ੍ਮਣੇ ਨ ਅਵਟ੍ਠਿਤਚਿਤ੍ਤਾ. ਵਿਵਟਇਨ੍ਦ੍ਰਿਯਾਤਿ ਅਸਂਵੁਤਚਕ੍ਖਾਦਿਇਨ੍ਦ੍ਰਿਯਾ.
ਗੁਣਕਥਾਯ ਸਦ੍ਧਿਂ ਕਥਿਯਮਾਨੋ ਨਿਗ੍ਗੁਣਸ੍ਸ ਅਗੁਣੋ ਪਾਕਟੋ ਹੋਤਿ ਜਾਤਿਮਣਿਸਮੀਪੇ ਠਿਤਸ੍ਸ ਵਿਯ ਕਾਚਮਣਿਨੋ ਦੋਸੋ. ਸੁਖਜੀਵਿਨੋਤਿ ਸੁਖੇ ਠਿਤਾ. ਯਥਾ ਦਾਯਕਾਨਂ ਸੁਭਰਂ ਹੋਤਿ, ਏਵਂ ਸੁਖੇਨ ਅਕਿਚ੍ਛੇਨ ਪਵਤ੍ਤਜੀਵਿਕਾ. ਤੇਨਾਹ ‘‘ਪੁਬ੍ਬੇ ਭਿਕ੍ਖੂ’’ਤਿਆਦਿ.
ਅਤ੍ਤਨੋ ਰੁਚਿਵਸੇਨ ਗਾਮਕਿਚ੍ਚਂ ਨੇਤੀਤਿ ਗਾਮਣਿ, ਤੇ ਪਨ ਹੀਲ਼ੇਨ੍ਤੋ ਵਦਤਿ ‘‘ਗਾਮਣਿਕਾ’’ਤਿ. ਵਿਸ੍ਸਜ੍ਜੇਤ੍ਵਾਤਿ ਸਤਿਵੋਸ੍ਸਗ੍ਗਵਸੇਨ ਵਿਸ੍ਸਜ੍ਜੇਤ੍ਵਾ ਕਿਲੇਸਮੁਚ੍ਛਾਯਾਤਿ ਮਹਿਚ੍ਛਾਸਙ੍ਖਾਤਾਯ ਤਣ੍ਹਾਮੁਚ੍ਛਾਯ. ਸੀਲਵਨ੍ਤਾਨਂਯੇਵ ਹਿ ਦੁਪ੍ਪਟਿਪਤ੍ਤਿਂ ਸਨ੍ਧਾਯ ਦੇਵਪੁਤ੍ਤੋ ਵਦਤਿ. ਵਤ੍ਤਬ੍ਬਯੁਤ੍ਤਕੇਯੇਵਾਤਿ ਓਵਾਦੇਨ ਮਯਾ ਅਨੁਗ੍ਗਹੇਤਬ੍ਬਮੇਵ. ਛਡ੍ਡਿਤਕਾਤਿ ਪਰਿਚ੍ਚਤ੍ਤਾ ਆਚਰਿਯੁਪਜ੍ਝਾਯਾਦੀਹਿ. ਤਤੋ ਏਵ ਅਨਾਥਾ ਅਪ੍ਪਤਿਟ੍ਠਾ. ਪੇਤਾਤਿ ਵਿਗਤਜੀਵਿਤਾ ਮਤਾ. ਯਥਾ ਪੇਤਾ, ਤਥੇਵ ਹੋਨ੍ਤਿ ਅਤ੍ਤਹਿਤਾਸਮਤ੍ਥਤਾਯ ਵਿਞ੍ਞੂਨਂ ਜਿਗੁਚ੍ਛਿਤਬ੍ਬਤਾਯ ਚ.
ਜਨ੍ਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਰੋਹਿਤਸ੍ਸਸੁਤ੍ਤਵਣ੍ਣਨਾ
੧੦੭. ਏਕੋਕਾਸੇਤਿ ਚਕ੍ਕਵਾਲ਼ਸ੍ਸ ਪਰਿਯਨ੍ਤਸਞ੍ਞਿਤੇ ਏਕਸ੍ਮਿਂ ਓਕਾਸੇ. ਭੁਮ੍ਮਨ੍ਤਿ ‘‘ਯਤ੍ਥਾ’’ਤਿ ਇਦਂ ਭੁਮ੍ਮਵਚਨਂ, ਸਾਮਞ੍ਞਤੋ ਵੁਤ੍ਤਮ੍ਪਿ ‘‘ਸੋ ਲੋਕਸ੍ਸ ਅਨ੍ਤੋ’’ਤਿ ਵਚਨਤੋ ਵਿਸਿਟ੍ਠਵਿਸਯਮੇਵ ਹੋਤਿ. ‘‘ਨ ਜਾਯਤਿ ਨ ਮੀਯਤੀ’’ਤਿ ਵਤ੍ਵਾ ਪੁਨ ‘‘ਨ ਚਵਤਿ ਨ ਉਪਪਜ੍ਜਤੀ’’ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਇਦਂ ਅਪਰਾਪਰਂ…ਪੇ… ਗਹਿਤ’’ਨ੍ਤਿ. ਪਦਗਮਨੇਨਾਤਿ ਪਦਸਾ ਗਮਨੇਨ. ਸਙ੍ਖਾਰਲੋਕਸ੍ਸ ਅਨ੍ਤਂ ਸਨ੍ਧਾਯ ਵਦਤਿ ਉਪਰਿ ਸਚ੍ਚਾਨਿ ਪਕਾਸੇਤੁਕਾਮੋ. ਸਙ੍ਖਾਰਲੋਕਸ੍ਸ ਹਿ ਅਨ੍ਤੋ ਨਿਬ੍ਬਾਨਂ.
ਦਲ਼੍ਹਂ ਥਿਰਂ ਧਨੁ ਏਤਸ੍ਸਾਤਿ ਦਲ਼੍ਹਧਨ੍ਵਾ. ਸੋ ਏਵ ਦਲ਼੍ਹਧਮ੍ਮੋਤਿ ਵੁਤ੍ਤੋ. ਤੇਨਾਹ ‘‘ਦਲ਼੍ਹਧਨੂ’’ਤਿ. ਉਤ੍ਤਮਪ੍ਪਮਾਣੇਨਾਤਿ ਸਹਸ੍ਸਥਾਮਪ੍ਪਮਾਣੇਨ. ਧਨੁਸਿਪ੍ਪਸਿਕ੍ਖਿਤਤਾਯ ਧਨੁਗ੍ਗਹੋ, ਨ ਧਨੁਗ੍ਗਹਮਤ੍ਤੇਨਾਤਿ ਆਹ ‘‘ਧਨੁਗ੍ਗਹੋਤਿ ਧਨੁਆਚਰਿਯੋ’’ਤਿ. ‘‘ਧਨੁਗ੍ਗਹੋ’’ਤਿ ਵਤ੍ਵਾ ‘‘ਸਿਕ੍ਖਿਤੋ’’ਤਿ ਵੁਤ੍ਤੇ ਧਨੁਸਿਕ੍ਖਾਯ ਸਿਕ੍ਖਿਤੋਤਿ ਵਿਞ੍ਞਾਯਤਿ, ਸਿਕ੍ਖਾ ਚ ਏਤ੍ਤਕੇ ਕਾਲੇ ਸਮਤ੍ਥਸ੍ਸ ਉਕ੍ਕਂਸਗਤੋ ਹੋਤੀਤਿ ਆਹ ‘‘ਦਸ ਦ੍ਵਾਦਸ ਵਸ੍ਸਾਨਿ ਧਨੁਸਿਪ੍ਪਂ ਸਿਕ੍ਖਿਤੋ’’ਤਿ. ਉਸਭਪ੍ਪਮਾਣੇਪੀਤਿ ਵੀਸਤਿਯਟ੍ਠਿਯੋ ਉਸਭਂ, ਤਸ੍ਮਿਂ ਉਸਭਪ੍ਪਮਾਣੇ ਪਦੇਸੇ. ਵਾਲਗ੍ਗਨ੍ਤਿ ਵਾਲ਼ਕੋਟਿਂ. ਕਤਹਤ੍ਥੋਤਿ ਪਰਿਚਿਤਹਤ੍ਥੋ. ਕਤਸਰਕ੍ਖੇਪੋਤਿ ਵਿਵਟਸਰਕ੍ਖੇਪਪਦੇਸਦਸ੍ਸਨਵਸੇਨ ਸਰਕ੍ਖੇਪਕਤਾਵੀ. ਤੇਨਾਹ ‘‘ਦਸ੍ਸਿਤਸਿਪ੍ਪੋ’’ਤਿ. ‘‘ਕਤਸਿਪ੍ਪੋ’’ਤਿ ਕੇਚਿ. ਅਸਨ੍ਤਿ ਏਤੇਨਾਤਿ ਅਸਨਂ, ਕਣ੍ਡੋ. ਤਾਲਚ੍ਛਾਯਨ੍ਤਿ ਤਾਲਚ੍ਛਾਦਿਂ, ਸਾ ਪਨ ਰਤਨਮਤ੍ਤਾ, ਵਿਦਤ੍ਥਿਚਤੁਰਙ੍ਗੁਲਾ ਵਾ.
ਪੁਰਤ੍ਥਿਮਸਮੁਦ੍ਦਾਤਿ ਏਕਸ੍ਮਿਂ ਚਕ੍ਕਵਾਲ਼ੇ ਪੁਰਤ੍ਥਿਮਸਮੁਦ੍ਦਾ. ਸਮੁਦ੍ਦਸੀਸੇਨ ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਂ ਵਦਤਿ. ਪਚ੍ਛਿਮਸਮੁਦ੍ਦੋਤਿ ਏਤ੍ਥਾਪਿ ਏਸੇਵ ਨਯੋ. ਨਿਪ੍ਪਪਞ੍ਚਤਨ੍ਤਿ ਅਦਨ੍ਧਕਾਰਿਤਂ. ਸਮ੍ਪਤ੍ਤੇਤਿ ਤਾਦਿਸੇਨ ਜਵੇਨ ਗਚ੍ਛਨ੍ਤੇਨ ਸਮ੍ਪਤ੍ਤੇ. ਅਨੋਤਤ੍ਤੇਤਿ ਏਤ੍ਥਾਪਿ ‘‘ਸਮ੍ਪਤ੍ਤੇ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧੋ, ਤਥਾ ‘‘ਨਾਗਲਤਾਦਨ੍ਤਕਟ੍ਠਂ ਖਾਦਿਤ੍ਵਾ’’ਤਿ ਏਤ੍ਥਾਪਿ. ਤਦਾਤਿ ਯਦਾ ਸੋ ਲੋਕਨ੍ਤਗਵੇਸਕੋ ਅਹੋਸਿ, ਤਦਾ. ਦੀਘਾਯੁਕਕਾਲੋਤਿ ਅਨੇਕਵਸ੍ਸਸਹਸ੍ਸਾਯੁਕਕਾਲੋ. ਚਕ੍ਕਵਾਲ਼ਲੋਕਸ੍ਸਾਤਿ ਸਾਮਞ੍ਞਵਸੇਨ ਏਕਵਚਨਂ, ਚਕ੍ਕਵਾਲ਼ਲੋਕਨ੍ਤਿ ਅਤ੍ਥੋ. ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਨਿਬ੍ਬਤ੍ਤਿ ਪੁਬ੍ਬਪਰਿਚਰਿਯਸਿਦ੍ਧਾਯ ਨਿਕਨ੍ਤਿਯਾ. ਸਸਞ੍ਞਿਮ੍ਹਿ ਸਮਨਕੇਤਿ ਨ ਰੂਪਧਮ੍ਮਮਤ੍ਤਕੇ, ਅਥ ਖੋ ਪਞ੍ਚਕ੍ਖਨ੍ਧਸਮੁਦਾਯੇਤਿ ਦਸ੍ਸੇਤਿ. ਸਮਿਤਪਾਪੋਤਿ ਸਮੁਚ੍ਛਿਨ੍ਨਸਂਕਿਲੇਸਧਮ੍ਮੋ.
ਰੋਹਿਤਸ੍ਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭-੮. ਨਨ੍ਦਸੁਤ੍ਤਨਨ੍ਦਿਵਿਸਾਲਸੁਤ੍ਤਵਣ੍ਣਨਾ
੧੦੮-੧੦੯. ਨਨ੍ਦਸੁਤ੍ਤਵਿਸਾਲਸੁਤ੍ਤਾਨਿ ਸਤ੍ਤਮਅਟ੍ਠਮਾਨਿ ਹੇਟ੍ਠਾ ਸਂਵਣ੍ਣਿਤਰੂਪਤ੍ਤਾ ਵੁਤ੍ਤਤ੍ਥਾਨੇਵ.
ਨਨ੍ਦਸੁਤ੍ਤਨਨ੍ਦਿਵਿਸਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਸੁਸਿਮਸੁਤ੍ਤਵਣ੍ਣਨਾ
੧੧੦. ਤੁਯ੍ਹਮ੍ਪਿ ਨੋਤਿ ਤੁਯ੍ਹਮ੍ਪਿ ਨੁ, ਨੁ-ਸਦ੍ਦੋ ਪੁਚ੍ਛਾਯਂ, ਤਸ੍ਮਾ ਵਣ੍ਣਂ ਕਥੇਤੁਕਾਮੋ ਪੁਚ੍ਛਤੀਤਿ ਅਧਿਪ੍ਪਾਯੋ. ਨ ਵਟ੍ਟਤੀਤਿ ਨ ਯੁਜ੍ਜਤਿ, ਕਥਿਤੋਤਿ ਕਥੇਤੁਂ ਆਰਦ੍ਧੋ, ਤੇਨਾਹ ‘‘ਮਤ੍ਥਕਂ ਨ ਪਾਪੁਣਾਤੀ’’ਤਿ. ਤਮੇਵ ਮਤ੍ਥਕਾਪਾਪੁਣਨਂ ਦਸ੍ਸੇਤੁਂ ‘‘ਸੋ ਹੀ’’ਤਿਆਦਿ ਵੁਤ੍ਤਂ. ਸਤਿਸਮ੍ਪਜਞ੍ਞਾਯੋਗਤੋ ਗੋਰੂਪਸੀਲੋ, ਮੂਲ਼੍ਹੋ ਖਲਿਤਪਞ੍ਞੋ, ਗੋਰੂਪਸ੍ਸ ਵਿਯ ਸੀਲਂ ਏਤਸ੍ਸਾਤਿ ਹਿ ਗੋਰੂਪਸੀਲੋ. ਸਭਾਗੋ ਏਕਰੂਪਚਿਤ੍ਤਤਾਯ. ਅਰਿਯਾਨਂ ਸਭਾਗਤਾ ਨਾਮ ਗੁਣਵਨ੍ਤਵਸੇਨਾਤਿ ਆਹ ‘‘ਅਞ੍ਞਮਞ੍ਞਸ੍ਸ ਗੁਣੇਸੁ ਪਸੀਦਿਤ੍ਵਾ’’ਤਿ. ਸੋਲ਼ਸਵਿਧਂ ਪਞ੍ਞਨ੍ਤਿ ਮਹਾਪਞ੍ਞਾਦਿਕਾ ਛ, ਨਵ ਅਨੁਪੁਬ੍ਬਵਿਹਾਰਸਮਾਪਤ੍ਤਿਪਞ੍ਞਾ, ਆਸਵਕ੍ਖਯਪਞ੍ਞਾਤਿ ਇਮਂ ਸੋਲ਼ਸਵਿਧਂ ਪਞ੍ਞਂ. ਤੇਸਟ੍ਠਿ ਸਾਵਕਸਾਧਾਰਣਞਾਣਾਨਿਪਿ ਏਤ੍ਥੇਵ ਸਙ੍ਗਹਂ ਸਮੋਸਰਣਂ ਗਚ੍ਛਨ੍ਤਿ.
ਆਨਨ੍ਦਾਤਿ ਥੇਰਂ ਆਹ. ਆਚਾਰੋਤਿ ਚਾਰਿਤ੍ਤਸੀਲਮਾਹ. ਗੋਚਰੋਤਿ ਗੋਚਰਸਮ੍ਪਤ੍ਤਿ. ਵਿਹਾਰੋਤਿ ਸਮਾਪਤ੍ਤਿਵਿਹਾਰੋ. ਅਭਿਕ੍ਕਮੋਤਿਆਦਿਨਾ ਇਰਿਯਾਪਥਵਿਹਾਰਂ. ਤੁਯ੍ਹਮ੍ਪੀਤਿ ਪਿ-ਸਦ੍ਦੇਨ ਭਗਵਤਾ ਅਤ੍ਤਾਨਂ ਆਦਿਂ ਕਤ੍ਵਾ ਤਦਞ੍ਞੇਸਂ ਵਿਞ੍ਞੂਨਂ ਸਬ੍ਬੇਸਂ ਥੇਰਸ੍ਸ ਰੁਚ੍ਚਨਸਭਾਵੋ ਦੀਪਿਤੋਤਿ ਦਸ੍ਸੇਨ੍ਤੋ ‘‘ਮਯ੍ਹਂ ਰੁਚ੍ਚਤੀ’’ਤਿਆਦਿਮਾਹ. ਤਤ੍ਥ ਸਤਿਪਿ ਆਨਨ੍ਦਤ੍ਥੇਰਸ੍ਸਪਿ ਅਸੀਤਿਯਾ ਮਹਾਥੇਰਾਨਂ ਅਨ੍ਤੋਗਧਭਾਵੇ ‘‘ਅਸੀਤਿਯਾ ਮਹਾਥੇਰਾਨਂ ਰੁਚ੍ਚਤੀ’’ਤਿ ਵਤ੍ਵਾ ‘‘ਤੁਯ੍ਹਮ੍ਪਿ ਰੁਚ੍ਚਤੀ’’ਤਿ ਵਚਨਂ ਤੇਨ ਧਮ੍ਮਸੇਨਾਪਤਿਨੋ ਵਣ੍ਣਂ ਕਥਾਪੇਤੁਕਾਮਤਾਯਾਤਿ ਦਟ੍ਠਬ੍ਬਂ.
ਸਾਟਕਨ੍ਤਰੇਤਿ ਨਿਵਤ੍ਥਵਤ੍ਥਨ੍ਤਰੇ. ਲਦ੍ਧੋਕਾਸੋਤਿ ਨਿਬ੍ਬੁਦ੍ਧਂ ਕਰੋਨ੍ਤੋ ਸਾਟਕਨ੍ਤਰੇ ਲਦ੍ਧਂ ਗਹੇਤੁਂ ਲਦ੍ਧਾਵਸਰੋ. ਲਭਿਸ੍ਸਾਮਿਨੋਤਿ ਲਭਿਸ੍ਸਾਮਿ ਵਤ. ਦੀਪਧਜਭੂਤਨ੍ਤਿ ਸਤਯੋਜਨਵਿਤ੍ਥਿਣ੍ਣਂ ਜਮ੍ਬੁਦੀਪਸ੍ਸ ਧਜਭੂਤਂ. ਪੁਗ੍ਗਲਪਲਾਪੇਤਿ ਅਨ੍ਤੋਸਾਰਾਭਾਵਤੋ ਪਲਾਪਭੂਤੇ ਪੁਗ੍ਗਲੇ ਹਰਨ੍ਤੋ. ਬਾਲਤਾਯਾਤਿ ਰੁਚਿਖਨ੍ਤਿਆਦਿਅਭਾਵਤਾਯ. ਦੋਸਤਾਯਾਤਿ ਦੁਸ੍ਸਕਭਾਵੇਨ. ਮੋਹੇਨਾਤਿ ਮਹਾਮੂਲ਼੍ਹਤਾਯ. ਕੇਚਿ ਪਨ ‘‘ਬਾਲੋ ਬਾਲਤਾਯਾਤਿ ਮੂਲ਼੍ਹਤਾਯ ਪਕਤਿਬਾਲਭਾਵੇਨ ਨ ਜਾਨਾਤਿ. ਮੂਲ਼੍ਹੋ ਮੋਹੇਨਾਤਿ ਸਯਂ ਅਬਾਲੋ ਸਮਾਨੋਪਿ ਯਦਾ ਮੋਹੇਨ ਪਰਿਯੁਟ੍ਠਿਤੋ ਹੋਤਿ, ਤਦਾ ਮੋਹੇਨ ਨ ਜਾਨਾਤਿ, ਅਯਂ ਪਦਦ੍ਵਯਸ੍ਸ ਵਿਸੇਸੋ’’ਤਿ ਵਦਨ੍ਤਿ. ਵਿਪਲ੍ਲਤ੍ਥਚਿਤ੍ਤੋਤਿ ਯਕ੍ਖੁਮ੍ਮਾਦੇਨ ਪਿਤ੍ਤੁਮ੍ਮਾਦੇਨ ਵਾ ਵਿਪਰੀਤਚਿਤ੍ਤੋ.
‘‘ਚਤੂਸੁ ਕੋਸਲ੍ਲੇਸੂ’’ਤਿ ਵੁਤ੍ਤਂ ਚਤੁਬ੍ਬਿਧਂ ਕੋਸਲ੍ਲਂ ਪਾਲ਼ਿਯਾ ਏਵ ਦਸ੍ਸੇਤੁਂ ‘‘ਵੁਤ੍ਤਂ ਹੇਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਯੋ ਅਟ੍ਠਾਰਸ ਧਾਤੁਯੋ ਸਮੁਦਯਤੋ ਅਤ੍ਥਙ੍ਗਮਤੋ ਅਸ੍ਸਾਦਤੋ ਆਦੀਨਵਤੋ ਨਿਸ੍ਸਰਣਤੋ ਚ ਯਥਾਭੂਤਂ ਪਜਾਨਾਤਿ, ਅਯਂ ਧਾਤੁਕੁਸਲੋ. ਵੁਤ੍ਤਨਯੇਨ ਆਯਤਨੇਸੁ ਕੁਸਲੋ ਆਯਤਨਕੁਸਲੋ. ਅਵਿਜ੍ਜਾਦੀਸੁ ਦ੍ਵਾਦਸਪਟਿਚ੍ਚਸਮੁਪ੍ਪਾਦਙ੍ਗੇਸੁ ਕੁਸਲੋ ਪਟਿਚ੍ਚਸਮੁਪ੍ਪਾਦਕੁਸਲੋ. ‘‘ਇਦਂ ਇਮਸ੍ਸ ਫਲਸ੍ਸ ਠਾਨਂ ਕਾਰਣਂ, ਇਦਂ ਅਟ੍ਠਾਨਂ ਅਕਾਰਣ’’ਨ੍ਤਿ ਏਵਂ ਠਾਨਞ੍ਚ ਠਾਨਤੋ, ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਪਜਾਨਤੋ ਠਾਨਾਟ੍ਠਾਨਕੁਸਲੋ. ਯੋ ਪਨ ਇਮੇਸੁ ਧਾਤੁਆਦੀਸੁ ਪਰਿਞ੍ਞਾਭਿਸਮਯਾਦਿਵਸੇਨ ਨਿਸ੍ਸਙ੍ਗਗਤਿਯਾ ਪਣ੍ਡਾਤਿ ਲਦ੍ਧਨਾਮੇਨ ਞਾਣੇਨ ਇਤੋ ਗਤੋ ਪਵਤ੍ਤੋ, ਅਯਂ ਪਣ੍ਡਿਤੋ ਨਾਮ.
ਮਹਨ੍ਤਾਨਂ ਅਤ੍ਥਾਨਂ ਪਰਿਗ੍ਗਣ੍ਹਨਤੋ ਮਹਤੀ ਪਞ੍ਞਾ ਏਤਸ੍ਸਾਤਿ ਮਹਾਪਞ੍ਞੋ. ਸੇਸਪਦੇਸੁਪਿ ਏਸੇਵ ਨਯੋਤਿ ਆਹ ‘‘ਮਹਾਪਞ੍ਞਾਦੀਹਿ ਸਮਨ੍ਨਾਗਤੋਤਿ ਅਤ੍ਥੋ’’ਤਿ. ਨਾਨਤ੍ਤਨ੍ਤਿ ਯਾਹਿ ਮਹਾਪਞ੍ਞਾਦੀਹਿ ਸਮਨ੍ਨਾਗਤਤ੍ਤਾ ਥੇਰੋ ‘‘ਮਹਾਪਞ੍ਞੋ’’ਤਿਆਦਿਨਾ ਕਿਤ੍ਤਿਤੋ, ਤਾਸਂ ਮਹਾਪਞ੍ਞਾਦੀਨਂ ਇਦਂ ਨਾਨਤ੍ਤਂ ਅਯਂ ਵੇਮਤ੍ਤਤਾ. ਯਸ੍ਸ ਕਸ੍ਸਚਿ ਵਿਸੇਸਤੋ ਅਰੂਪਧਮ੍ਮਸ੍ਸ ਮਹਤ੍ਤਂ ਨਾਮ ਕਿਚ੍ਚਸਿਦ੍ਧਿਯਾ ਵੇਦਿਤਬ੍ਬਨ੍ਤਿ ਤਦਸ੍ਸ ਕਿਚ੍ਚਸਿਦ੍ਧਿਯਾ ਦਸ੍ਸੇਨ੍ਤੋ ‘‘ਮਹਨ੍ਤੇ ਸੀਲਕ੍ਖਨ੍ਧੇ ਪਰਿਗ੍ਗਣ੍ਹਾਤੀ’’ਤਿਆਦਿਮਾਹ. ਤਤ੍ਥ ਹੇਤੁਮਹਨ੍ਤਤਾਯ ਪਚ੍ਚਯਮਹਨ੍ਤਤਾਯ ਨਿਸ੍ਸਯਮਹਨ੍ਤਤਾਯ ਪਭੇਦਮਹਨ੍ਤਤਾਯ ਕਿਚ੍ਚਮਹਨ੍ਤਤਾਯ ਫਲਮਹਨ੍ਤਤਾਯ ਆਨਿਸਂਸਮਹਨ੍ਤਤਾਯ ਚ ਸੀਲਕ੍ਖਨ੍ਧਸ੍ਸ ਮਹਨ੍ਤਭਾਵੋ ਵੇਦਿਤਬ੍ਬੋ. ਤਤ੍ਥ ਹੇਤੂ ਅਲੋਭਾਦਯੋ. ਪਚ੍ਚਯਾ ਹਿਰੋਤ੍ਤਪ੍ਪਸਦ੍ਧਾਸਤਿਵੀਰਿਯਾਦਯੋ. ਨਿਸ੍ਸਯਾ ਸਾਵਕਬੋਧਿਪਚ੍ਚੇਕਬੋਧਿਸਮ੍ਮਾਸਮ੍ਬੋਧਿਨਿਯਤਤਾ, ਤਂਸਮਙ੍ਗਿਨੋ ਚ ਪੁਰਿਸਵਿਸੇਸਾ. ਪਭੇਦੋ ਚਾਰਿਤ੍ਤਾਦਿਵਿਭਾਗੋ. ਕਿਚ੍ਚਂ ਤਦਙ੍ਗਾਦਿਵਸੇਨ ਪਟਿਪਕ੍ਖਸ੍ਸ ਵਿਧਮਨਂ. ਫਲਂ ਸਗ੍ਗਸਮ੍ਪਦਾ ਨਿਬ੍ਬਾਨਸਮ੍ਪਦਾ ਚ. ਆਨਿਸਂਸੋ ਪਿਯਮਨਾਪਤਾਦਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੮-੯) ਆਕਙ੍ਖੇਯ੍ਯਸੁਤ੍ਤਾਦੀਸੁ (ਮ. ਨਿ. ੧.੬੪ ਆਦਯੋ) ਚ ਆਗਤਨਯੇਨ ਵੇਦਿਤਬ੍ਬੋ. ਇਮਿਨਾ ਨਯੇਨ ਸਮਾਧਿਕ੍ਖਨ੍ਧਾਦੀਨਮ੍ਪਿ ਮਹਨ੍ਤਤਾ ਯਥਾਰਹਂ ਨਿਦ੍ਧਾਰੇਤ੍ਵਾ ਵੇਦਿਤਬ੍ਬਾ. ਠਾਨਾਟ੍ਠਾਨਾਦੀਨਂ ਪਨ ਮਹਨ੍ਤਭਾਵੋ ਮਹਾਵਿਸਯਤਾਯ ਵੇਦਿਤਬ੍ਬੋ. ਤਤ੍ਥ ਠਾਨਾਟ੍ਠਾਨਾਨਂ ਮਹਾਵਿਸਯਤਾ ਬਹੁਧਾਤੁਕਸੁਤ੍ਤਾਦੀਸੁ ਆਗਤਨਯੇਨ, ਵਿਹਾਰਸਮਾਪਤ੍ਤੀਨਂ ਸਮਾਧਿਕ੍ਖਨ੍ਧੇ ਨਿਦ੍ਧਾਰਿਤਨਯੇਨ ਵੇਦਿਤਬ੍ਬਾ. ਅਰਿਯਸਚ੍ਚਾਨਂ ਸਕਲਸਾਸਨਸਙ੍ਗਣ੍ਹਨਤੋ ਸਚ੍ਚਵਿਭਙ੍ਗੇ (ਵਿਭ. ੧੮੯ ਆਦਯੋ) ਤਂਸਂਵਣ੍ਣਨਾਸੁ (ਵਿਭ. ਅਟ੍ਠ. ੧੮੯ ਆਦਯੋ) ਆਗਤਨਯੇਨ; ਸਤਿਪਟ੍ਠਾਨਾਦੀਨਂ ਸਤਿਪਟ੍ਠਾਨਵਿਭਙ੍ਗਾਦੀਸੁ (ਵਿਭ. ੩੫੫ ਆਦਯੋ) ਤਂਸਂਵਣ੍ਣਨਾਦੀਸੁ (ਵਿਭ. ਅਟ੍ਠ. ੩੫੫ ਆਦਯੋ) ਚ ਆਗਤਨਯੇਨ; ਸਾਮਞ੍ਞਫਲਾਨਂ ਮਹਤੋ ਹਿਤਸ੍ਸ ਮਹਤੋ ਸੁਖਸ੍ਸ ਮਹਤੋ ਅਤ੍ਥਸ੍ਸ ਮਹਤੋ ਯੋਗਕ੍ਖੇਮਸ੍ਸ ਨਿਪ੍ਫਤ੍ਤਿਭਾਵਤੋ ਸਨ੍ਤਪਣੀਤਨਿਪੁਣਅਤਕ੍ਕਾਵਚਰਪਣ੍ਡਿਤਵੇਦਨੀਯਭਾਵਤੋ ਚ; ਅਭਿਞ੍ਞਾਨਂ ਮਹਾਸਮ੍ਭਾਰਤੋ ਮਹਾਵਿਸਯਤੋ ਮਹਾਕਿਚ੍ਚਤੋ ਮਹਾਨੁਭਾਵਤੋ ਮਹਾਨਿਪ੍ਫਤ੍ਤਿਤੋ ਚ; ਨਿਬ੍ਬਾਨਸ੍ਸ ਮਦਨਿਮ੍ਮਦਨਾਦਿਮਹਤ੍ਥਸਿਦ੍ਧਿਤੋ ਮਹਨ੍ਤਤਾ ਵੇਦਿਤਬ੍ਬਾ. ਪਰਿਗ੍ਗਣ੍ਹਾਤੀਤਿ ਸਭਾਵਾਦਿਤੋ ਪਰਿਚ੍ਛਿਜ੍ਜ ਗਣ੍ਹਾਤਿ ਜਾਨਾਤਿ ਪਟਿਵਿਜ੍ਝਤੀਤਿ ਅਤ੍ਥੋ. ਸਾ ਪਨਾਤਿ ਮਹਾਪਞ੍ਞਤਾ.
ਪੁਥੁਪਞ੍ਞਾਤਿ ਏਤ੍ਥ ਨਾਨਾਖਨ੍ਧੇਸੁ ਞਾਣਂ ਪਵਤ੍ਤਤੀਤਿ ਅਯਂ ਰੂਪਕ੍ਖਨ੍ਧੋ ਨਾਮ…ਪੇ… ਅਯਂ ਵਿਞ੍ਞਾਣਕ੍ਖਨ੍ਧੋ ਨਾਮਾਤਿ ਏਵਂ ਪਞ੍ਚਨ੍ਨਂ ਖਨ੍ਧਾਨਂ ਨਾਨਾਕਰਣਂ ਪਟਿਚ੍ਚ ਞਾਣਂ ਪਵਤ੍ਤਤਿ. ਤੇਸੁ ਏਕਵਿਧੇਨ ਰੂਪਕ੍ਖਨ੍ਧੋ, ਏਕਾਦਸਵਿਧੇਨ ਰੂਪਕ੍ਖਨ੍ਧੋ, ਏਕਵਿਧੇਨ ਵੇਦਨਾਕ੍ਖਨ੍ਧੋ, ਬਹੁਵਿਧੇਨ ਵੇਦਨਾਕ੍ਖਨ੍ਧੋ, ਏਕਵਿਧੇਨ ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਵਿਞ੍ਞਾਣਕ੍ਖਨ੍ਧੋਤਿ ਏਵਂ ਏਕੇਕਸ੍ਸ ਖਨ੍ਧਸ੍ਸ ਏਕਵਿਧਾਦਿਵਸੇਨ ਅਤੀਤਾਦਿਵਸੇਨਪਿ ਨਾਨਾਕਰਣਂ ਪਟਿਚ੍ਚ ਞਾਣਂ ਪਵਤ੍ਤਤਿ. ਤਥਾ ਇਦਂ ਚਕ੍ਖਾਯਤਨਂ ਨਾਮ…ਪੇ… ਇਦਂ ਧਮ੍ਮਾਯਤਨਂ ਨਾਮਂ. ਤਤ੍ਥ ਦਸਾਯਤਨਾ ਕਾਮਾਵਚਰਾ, ਦ੍ਵੇ ਚਤੁਭੂਮਕਾਤਿ ਏਵਂ ਆਯਤਨਾਨਂ ਨਾਨਾਕਰਣਂ ਪਟਿਚ੍ਚ ਞਾਣਂ ਪਵਤ੍ਤਤਿ. ਨਾਨਾਧਾਤੂਸੂਤਿ ਅਯਂ ਚਕ੍ਖੁਧਾਤੁ ਨਾਮ…ਪੇ… ਅਯਂ ਮਨੋਵਿਞ੍ਞਾਣਧਾਤੁ ਨਾਮ. ਤਤ੍ਥ ਸੋਲ਼ਸ ਧਾਤੁਯੋ ਕਾਮਾਵਚਰਾ, ਦ੍ਵੇ ਚਤੁਭੂਮਕਾਤਿ ਏਵਂ ਧਾਤੁਨਾਨਾਕਰਣਂ ਪਟਿਚ੍ਚ ਞਾਣਂ ਪਵਤ੍ਤਤਿ, ਤਂ ਉਪਾਦਿਣ੍ਣਧਾਤੁਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ ਪਚ੍ਚੇਕਬੁਦ੍ਧਾਨਞ੍ਹਿ ਦ੍ਵਿਨ੍ਨਂ ਅਗ੍ਗਸਾਵਕਾਨਞ੍ਚ ਉਪਾਦਿਣ੍ਣਧਾਤੂਸੁ ਏਵ ਨਾਨਾਕਰਣਂ ਪਟਿਚ੍ਚ ਞਾਣਂ ਪਵਤ੍ਤਤਿ. ਤਞ੍ਚ ਖੋ ਏਕਦੇਸਮਤ੍ਤਤੋ, ਨ ਨਿਪ੍ਪਦੇਸਤੋ, ਅਨੁਪਾਦਿਣ੍ਣਕਧਾਤੂਨਂ ਪਨ ਨਾਨਾਕਰਣਂ ਨ ਜਾਨਨ੍ਤਿ ਏਵ. ਇਤਰਸਾਵਕੇਸੁ ਵਤ੍ਤਬ੍ਬਮੇਵ ਨਤ੍ਥਿ, ਸਬ੍ਬਞ੍ਞੁਬੁਦ੍ਧਾਨਂਯੇਵ ਪਨ ਇਮਾਯ ਨਾਮ ਧਾਤੁਯਾ ਉਸ੍ਸਨ੍ਨਤ੍ਤਾਵ ਇਮਸ੍ਸ ਰੁਕ੍ਖਸ੍ਸ ਖਨ੍ਧੋ ਸੇਤੋ ਹੋਤਿ, ਇਮਸ੍ਸ ਕਾਲ਼ੋ, ਇਮਸ੍ਸ ਮਟ੍ਠੋ, ਇਮਸ੍ਸ ਬਹਲਤ੍ਤਚੋ, ਇਮਸ੍ਸ ਤਨੁਤ੍ਤਚੋ, ਇਮਸ੍ਸ ਪਤ੍ਤਂ ਵਣ੍ਣਸਣ੍ਠਾਨਾਦਿਵਸੇਨ ਏਵਰੂਪਂ; ਇਮਸ੍ਸ ਪੁਪ੍ਫਂ ਨੀਲਂ ਪੀਤਕਂ ਲੋਹਿਤਕਂ ਓਦਾਤਂ, ਸੁਗਨ੍ਧਂ ਦੁਗ੍ਗਨ੍ਧਂ; ਫਲਂ ਖੁਦ੍ਦਕਂ ਮਹਨ੍ਤਂ ਦੀਘਂ ਵਟ੍ਟਂ ਸੁਸਣ੍ਠਾਨਂ ਮਟ੍ਠਂ ਫਰੁਸਂ ਸੁਗਨ੍ਧਂ ਮਧੁਰਂ ਤਿਤ੍ਤਕਂ ਅਮ੍ਬਿਲਂ ਕਟੁਕਂ ਕਸਾਵਂ; ਕਣ੍ਟਕੋ ਤਿਖਿਣੋ ਅਤਿਖਿਣੋ ਉਜੁਕੋ ਕੁਟਿਲੋ ਤਮ੍ਬੋ ਲੋਹਿਤੋ ਓਦਾਤੋ ਹੋਤੀਤਿ ਧਾਤੁਨਾਨਤ੍ਤਂ ਪਟਿਚ੍ਚ ਞਾਣਂ ਪਵਤ੍ਤਤਿ.
ਅਤ੍ਥੇਸੂਤਿ ਰੂਪਾਦੀਸੁ ਆਰਮ੍ਮਣੇਸੁ. ਨਾਨਾਪਟਿਚ੍ਚਸਮੁਪ੍ਪਾਦੇਸੂਤਿ ਅਜ੍ਝਤ੍ਤਬਹਿਦ੍ਧਾਭੇਦਤੋ ਚ ਸਣ੍ਠਾਨਭੇਦਤੋ ਚ ਨਾਨਪ੍ਪਭੇਦੇਸੁ ਪਟਿਚ੍ਚਸਮੁਪ੍ਪਾਦਙ੍ਗੇਸੁ. ਅਵਿਜ੍ਜਾਦਿਅਙ੍ਗਾਨਞ੍ਹਿ ਪਚ੍ਚੇਕਂ ਪਟਿਚ੍ਚਸਮੁਪ੍ਪਾਦਸਞ੍ਞਿਤਾਤਿ. ਤੇਨਾਹ ਸਙ੍ਖਾਰਪਿਟਕੇ ‘‘ਦ੍ਵਾਦਸ ਪਚ੍ਚਯਾ ਦ੍ਵਾਦਸ ਪਟਿਚ੍ਚਸਮੁਪ੍ਪਾਦਾ’’ਤਿ. ਨਾਨਾਸੁਞ੍ਞਤਮਨੁਪਲਬ੍ਭੇਸੂਤਿ ਨਾਨਾਸਭਾਵੇਸੁ ਨਿਚ੍ਚਸਾਰਾਦਿਵਿਰਹਤੋ ਸੁਞ੍ਞਸਭਾਵੇਸੁ, ਤਤੋ ਏਵ ਇਤ੍ਥਿਪੁਰਿਸਅਤ੍ਤਅਤ੍ਤਨਿਯਾਦਿਵਸੇਨ ਅਨੁਪਲਬ੍ਭੇਸੁ ਸਭਾਵੇਸੁ. ਮ-ਕਾਰੋ ਹੇਤ੍ਥ ਪਦਸਨ੍ਧਿਕਰੋ. ਨਾਨਾਅਤ੍ਥੇਸੂਤਿ ਅਤ੍ਥਪਟਿਸਮ੍ਭਿਦਾਵਿਸਯੇਸੁ ਪਚ੍ਚਯੁਪ੍ਪਨ੍ਨਾਦਿਭੇਦੇਸੁ ਨਾਨਾਵਿਧੇਸੁ ਅਤ੍ਥੇਸੁ. ਧਮ੍ਮੇਸੂਤਿ ਧਮ੍ਮਪਟਿਸਮ੍ਭਿਦਾਵਿਸਯੇਸੁ ਪਚ੍ਚਯਾਦਿਨਾਨਾਧਮ੍ਮੇਸੁ. ਨਿਰੁਤ੍ਤੀਸੂਤਿ ਤੇਸਂਯੇਵ ਅਤ੍ਥਧਮ੍ਮਾਨਂ ਨਿਦ੍ਧਾਰਣਵਚਨਸਙ੍ਖਾਤਾਸੁ ਨਿਰੁਤ੍ਤੀਸੁ. ਪਟਿਭਾਨੇਸੂਤਿ ਅਤ੍ਥਪਟਿਸਮ੍ਭਿਦਾਦੀਸੁ ਵਿਸਯਭੂਤੇਸੁ ‘‘ਇਮਾਨਿ ਇਦਮਤ੍ਥਜੋਤਕਾਨੀ’’ਤਿ ਤਥਾ ਤਥਾ ਪਟਿਭਾਨਤੋ ਪਤਿਟ੍ਠਾਨਤੋ ਪਟਿਭਾਨਾਨੀਤਿ ਲਦ੍ਧਨਾਮੇਸੁ ਞਾਣੇਸੁ. ਪੁਥੁ ਨਾਨਾਸੀਲਕ੍ਖਨ੍ਧੇਸੂਤਿਆਦੀਸੁ ਸੀਲਸ੍ਸ ਪੁਥੁਤ੍ਤਂ ਨਾਨਤ੍ਤਞ੍ਚ ਵੁਤ੍ਤਮੇਵ. ਇਤਰੇਸਂ ਪਨ ਵੁਤ੍ਤਨਯਾਨੁਸਾਰੇਨ ਸੁਵਿਞ੍ਞੇਯ੍ਯਤ੍ਤਾ ਪਾਕਟਮੇਵ. ਯਂ ਪਨ ਅਭਿਨ੍ਨਂ ਏਕਮੇਵ ਨਿਬ੍ਬਾਨਂ, ਤਤ੍ਥ ਉਪਚਾਰਵਸੇਨ ਪੁਥੁਤ੍ਤਂ ਗਹੇਤਬ੍ਬਨ੍ਤਿ ਆਹ ‘‘ਪੁਥੁ ਜਨਸਾਧਾਰਣੇ ਧਮ੍ਮੇ ਸਮਤਿਕ੍ਕਮ੍ਮਾ’’ਤਿ. ਤੇਨਸ੍ਸ ਇਧ ਮਦਨਿਮ੍ਮਦਨਾਦਿਪਰਿਯਾਯੇਨ ਪੁਥੁਤ੍ਤਂ ਦੀਪਿਤਂ ਹੋਤਿ.
ਏਵਂ ਵਿਸਯਵਸੇਨ ਪਞ੍ਞਾਯ ਮਹਤ੍ਤਂ ਪੁਥੁਤ੍ਤਞ੍ਚ ਦਸ੍ਸੇਤ੍ਵਾ ਇਦਾਨਿ ਸਮ੍ਪਯੁਤ੍ਤਧਮ੍ਮਵਸੇਨ ਹਾਸਭਾਵਂ, ਪਵਤ੍ਤਿਆਕਾਰਵਸੇਨ ਜਵਨਭਾਵਂ, ਕਿਚ੍ਚਵਸੇਨ ਤਿਕ੍ਖਾਦਿਭਾਵਞ੍ਚ ਦਸ੍ਸੇਤੁਂ ‘‘ਕਤਮਾ ਹਾਸਪਞ੍ਞਾ’’ਤਿਆਦਿ ਵੁਤ੍ਤਂ. ਤਤ੍ਥ ਹਾਸਬਹੁਲੋਤਿ ਪੀਤਿਬਹੁਲੋ. ਸੇਸਪਦਾਨਿ ਤਸ੍ਸ ਵੇਵਚਨਾਨਿ. ਸੀਲਂ ਪਰਿਪੂਰੇਤੀਤਿ ਹਟ੍ਠਪਹਟ੍ਠੋ ਉਦਗ੍ਗੁਦਗ੍ਗੋ ਹੁਤ੍ਵਾ ਪੀਤਿਸਹਗਤਾਯ ਪਞ੍ਞਾਯ ਪਾਤਿਮੋਕ੍ਖਸੀਲਂ ਠਪੇਤ੍ਵਾ ਹਾਸਨੀਯਤਰਸ੍ਸੇਵ ਵਿਸੁਂ ਗਹਿਤਤ੍ਤਾ ਇਤਰਂ ਤਿਵਿਧਂ ਸੀਲਂ ਪਰਿਪੂਰੇਤਿ. ਪੀਤਿਸੋਮਨਸ੍ਸਸਹਗਤਾ ਹਿ ਪਞ੍ਞਾ ਅਭਿਰਤਿਵਸੇਨ ਤਦਾਰਮ੍ਮਣੇ ਫੁਲ੍ਲਿਤਾ ਵਿਕਸਿਤਾ ਵਿਯ ਵਤ੍ਤਤਿ, ਨ ਉਪੇਕ੍ਖਾਸਹਗਤਾ. ਸੀਲਕ੍ਖਨ੍ਧਂ ਸਮਾਧਿਕ੍ਖਨ੍ਧਨ੍ਤਿਆਦੀਸੁਪਿ ਏਸੇਵ ਨਯੋ. ਥੇਰੋਤਿਆਦਿਨਾ ਅਭਿਨੀਹਾਰਸਿਦ੍ਧਾ ਥੇਰਸ੍ਸ ਹਾਸਪਞ੍ਞਤਾਤਿ ਦਸ੍ਸੇਤਿ.
ਸਬ੍ਬਂ ਰੂਪਂ ਅਨਿਚ੍ਚਲਕ੍ਖਣਤੋ ਖਿਪ੍ਪਂ ਜਵਤੀਤਿ ਰੂਪਕ੍ਖਨ੍ਧਂ ਅਨਿਚ੍ਚਨ੍ਤਿ ਸੀਘਵੇਗੇਨ ਪਵਤ੍ਤਿਯਾ ਪਟਿਪਕ੍ਖਦੂਰੀਭਾਵੇਨ ਪੁਬ੍ਬਾਭਿਸਙ੍ਖਾਰਸ੍ਸ ਸਾਤਿਸਯਤ੍ਤਾ ਇਨ੍ਦੇਨ ਵਿਸਟ੍ਠਵਜਿਰਂ ਵਿਯ ਲਕ੍ਖਣਂ ਪਟਿਵਿਜ੍ਝਨ੍ਤੀ ਅਦਨ੍ਧਾਯਨ੍ਤੀ ਰੂਪਕ੍ਖਨ੍ਧੇ ਅਨਿਚ੍ਚਲਕ੍ਖਣਂ ਵੇਗੇਨ ਪਟਿਵਿਜ੍ਝਤਿ, ਤਸ੍ਮਾ ਸਾ ਜਵਨਪਞ੍ਞਾ ਨਾਮਾਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਏਵਂ ਲਕ੍ਖਣਾਰਮ੍ਮਣਿਕਵਿਪਸ੍ਸਨਾਵਸੇਨ ਜਵਨਪਞ੍ਞਂ ਦਸ੍ਸੇਤ੍ਵਾ ਬਲਵਵਿਪਸ੍ਸਨਾਵਸੇਨ ਦਸ੍ਸੇਤੁਂ ‘‘ਰੂਪ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਖਯਟ੍ਠੇਨਾਤਿ ਯਤ੍ਥ ਯਤ੍ਥ ਉਪ੍ਪਜ੍ਜਤਿ, ਤਤ੍ਥ ਤਤ੍ਥੇਵ ਖਣੇਨੇਵ ਭਿਜ੍ਜਨਤੋ ਖਯਸਭਾਵਤੋ. ਭਯਟ੍ਠੇਨਾਤਿ ਭਯਾਨਕਤੋ. ਅਸਾਰਕਟ੍ਠੇਨਾਤਿ ਅਤ੍ਤਸਾਰਵਿਰਹਤੋ ਨਿਚ੍ਚਸਾਰਾਦਿਵਿਰਹਤੋ ਚ. ਤੁਲਯਿਤ੍ਵਾਤਿ ਤੁਲਾਭੂਤਾਯ ਵਿਪਸ੍ਸਨਾਯ ਤੁਲਯਿਤ੍ਵਾ. ਤੀਰਯਿਤ੍ਵਾਤਿ ਤਾਯ ਏਵ ਤੀਰਣਭੂਤਾਯ ਤੀਰੇਤ੍ਵਾ. ਵਿਭਾਵਯਿਤ੍ਵਾਤਿ ਯਾਥਾਵਤੋ ਪਕਾਸੇਤ੍ਵਾ ਪਞ੍ਚਕ੍ਖਨ੍ਧਂ ਵਿਭੂਤਂ ਕਤ੍ਵਾ ਪਾਕਟਂ ਕਤ੍ਵਾ. ਰੂਪਨਿਰੋਧੇਤਿ ਰੂਪਕ੍ਖਨ੍ਧਸ੍ਸ ਨਿਰੋਧਭੂਤੇ ਨਿਬ੍ਬਾਨੇ ਨਿਨ੍ਨਪੋਣਪਬ੍ਭਾਰਭਾਵੇਨ. ਇਦਾਨਿ ਸਿਖਾਪ੍ਪਤ੍ਤਵਿਪਸ੍ਸਨਾਵਸੇਨ ਜਵਨਪਞ੍ਞਂ ਦਸ੍ਸੇਤੁਂ ਪੁਨ ‘‘ਰੂਪ’’ਨ੍ਤਿਆਦਿ ਵੁਤ੍ਤਂ. ‘‘ਵੁਟ੍ਠਾਨਗਾਮਿਨਿਵਿਪਸ੍ਸਨਾਵਸੇਨਾ’’ਤਿ ਕੇਚਿ.
ਞਾਣਤਿਕ੍ਖਭਾਵੋ ਨਾਮ ਸਵਿਸੇਸਂ ਪਟਿਪਕ੍ਖਸਮੁਚ੍ਛਿਨ੍ਦਨੇ ਵੇਦਿਤਬ੍ਬੋਤਿ ‘‘ਖਿਪ੍ਪਂ ਕਿਲੇਸੇ ਛਿਨ੍ਦਤੀਤਿ ਤਿਕ੍ਖਪਞ੍ਞੋ’’ਤਿ ਵਤ੍ਵਾ ਤੇ ਪਨ ਕਿਲੇਸੇ ਵਿਭਾਗੇਨ ਦਸ੍ਸੇਨ੍ਤੋ ‘‘ਉਪ੍ਪਨ੍ਨਂ ਕਾਮਵਿਤਕ੍ਕ’’ਨ੍ਤਿਆਦਿਮਾਹ. ਤਿਕ੍ਖਪਞ੍ਞੋ ਖਿਪ੍ਪਾਭਿਞ੍ਞੋ ਹੋਤਿ, ਪਟਿਪਦਾ ਚਸ੍ਸ ਨ ਚਲਤੀਤਿ ਆਹ ‘‘ਏਕਸ੍ਮਿਂ ਆਸਨੇ ਚਤ੍ਤਾਰੋ ਚ ਅਰਿਯਮਗ੍ਗਾ ਅਧਿਗਤਾ ਹੋਨ੍ਤੀ’’ਤਿਆਦਿ. ਥੇਰੋ ਚਾਤਿਆਦਿਨਾ ਧਮ੍ਮਸੇਨਾਪਤਿਨੋ ਤਿਕ੍ਖਪਞ੍ਞਤਾ ਸਿਖਾਪ੍ਪਤ੍ਤਾਤਿ ਦਸ੍ਸੇਤਿ.
‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾ ਸਙ੍ਖਤਾ ਪਟਿਚ੍ਚਸਮੁਪ੍ਪਨ੍ਨਾ ਖਯਧਮ੍ਮਾ ਵਯਧਮ੍ਮਾ ਵਿਰਾਗਧਮ੍ਮਾ ਨਿਰੋਧਧਮ੍ਮਾ’’ਤਿ ਯਾਥਾਵਤੋ ਦਸ੍ਸਨੇਨ ਸਚ੍ਚਸਮ੍ਪਟਿਵੇਧੋ ਇਜ੍ਝਤਿ, ਨ ਅਞ੍ਞਥਾਤਿ ਕਾਰਣਮੁਖੇਨ ਨਿਬ੍ਬੇਧਿਕਪਞ੍ਞਂ ਦਸ੍ਸੇਤੁਂ ‘‘ਸਬ੍ਬਸਙ੍ਖਾਰੇਸੁ ਉਬ੍ਬੇਗਬਹੁਲੋ ਹੋਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਉਬ੍ਬੇਗਬਹੁਲੋਤਿ ਵੁਤ੍ਤਨਯੇਨ ਸਬ੍ਬਸਙ੍ਖਾਰੇਸੁ ਅਭਿਣ੍ਹਪ੍ਪਵਤ੍ਤਸਂਵੇਗੋ. ਉਤ੍ਤਾਸਬਹੁਲੋਤਿ ਞਾਣੁਤ੍ਤਾਸਵਸੇਨ ਸਬ੍ਬਸਙ੍ਖਾਰੇਸੁ ਬਹੁਸੋ ਉਤ੍ਰਸ੍ਤਮਾਨਸੋ. ਤੇਨ ਆਦੀਨਵਾਨੁਪਸ੍ਸਨਮਾਹ. ਉਕ੍ਕਣ੍ਠਨਬਹੁਲੋਤਿ ਇਮਿਨਾ ਪਨ ਨਿਬ੍ਬਿਦਾਨੁਪਸ੍ਸਨਮਾਹ, ਅਰਤਿਬਹੁਲੋਤਿਆਦਿਨਾ ਤਸ੍ਸਾ ਏਵ ਅਪਰਾਪਰੁਪ੍ਪਤ੍ਤਿਂ. ਬਹਿਮੁਖੋ ਸਬ੍ਬਸਙ੍ਖਾਰਤੋ ਬਹਿਭੂਤਂ ਨਿਬ੍ਬਾਨਂ ਉਦ੍ਦਿਸ੍ਸ ਪਵਤ੍ਤਞਾਣਮੁਖੋ, ਤਥਾ ਵਾ ਪਵਤ੍ਤਿਤਵਿਮੋਕ੍ਖਮੁਖੋ. ਨਿਬ੍ਬਿਜ੍ਝਨਂ ਨਿਬ੍ਬੇਧੋ, ਸੋ ਏਤਿਸ੍ਸਾ ਅਤ੍ਥਿ, ਨਿਬ੍ਬਿਜ੍ਝਤੀਤਿ ਵਾ ਨਿਬ੍ਬੇਧਾ, ਸਾ ਏਵ ਪਞ੍ਞਾ ਨਿਬ੍ਬੇਧਿਕਾ. ਯਂ ਪਨੇਤ੍ਥ ਅਤ੍ਥਤੋ ਨ ਵਿਭਤ੍ਤਂ, ਤਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ.
ਅਪ੍ਪਿਚ੍ਛੋਤਿ ਸਨ੍ਤਗੁਣਨਿਗੁਹਨਤਾਤਿ ਅਤ੍ਤਨਿ ਵਿਜ੍ਜਮਾਨਾਨਂ ਬਾਹੁਸਚ੍ਚਧੁਤਧਮ੍ਮਸੀਲਾਦਿਗੁਣਾਨਞ੍ਚੇਵ ਪਟਿਵੇਧਗੁਣਸ੍ਸ ਚ ਨਿਗੁਹਨਂ, ਪਟਿਗ੍ਗਹਣੇ ਚ ਮਤ੍ਤਞ੍ਞੁਤਾਤਿ ਏਤੇਨੇਵ ਪਰਿਯੇਸਨਪਰਿਭੋਗਮਤ੍ਤਞ੍ਞੁਤਾਪਿ ਵੁਤ੍ਤਾ ਹੋਤਿ. ਤੀਹਿ ਸਨ੍ਤੋਸੇਹੀਤਿ ਚਤੂਸੁ ਪਚ੍ਚਯੇਸੁ ਪਚ੍ਚੇਕਂ ਤੀਹਿ ਸਨ੍ਤੋਸੇਹਿ, ਸਬ੍ਬੇ ਪਨ ਦ੍ਵਾਦਸ. ਪਟਿਸਲ੍ਲੀਨੇਨ ਵਿਵੇਕਟ੍ਠਕਾਯਾਨਂ ਨ ਸਙ੍ਗਣਿਕਾਰਾਮਾਨਂ. ਨੇਕ੍ਖਮ੍ਮਾਭਿਰਤਾਨਨ੍ਤਿ ਪਬ੍ਬਜ੍ਜਂ ਉਪਗਤਾਨਂ. ਪਰਿਸੁਦ੍ਧਚਿਤ੍ਤਾਨਂ ਵਿਗਤਚਿਤ੍ਤਸਂਕਿਲੇਸਾਨਂ. ਪਰਮਵੋਦਾਨਪ੍ਪਤ੍ਤਾਨਂ ਅਟ੍ਠਸਮਾਪਤ੍ਤਿਸਮਧਿਗਮੇਨ ਅਤਿਵਿਯ ਵੋਦਾਨਂ ਵਿਸੁਦ੍ਧਿਂ ਪਤ੍ਤਾਨਂ. ਕਿਲੇਸੁਪਧਿਆਦੀਨਂ ਅਭਾਵਤੋ ਨਿਰੁਪਧੀਨਂ. ਫਲਸਮਾਪਤ੍ਤਿਵਸੇਨ ਸਬ੍ਬਸਙ੍ਖਾਰਵਿਨਿਸ੍ਸਟਤ੍ਤਾ ਵਿਸਙ੍ਖਾਰਂ ਨਿਬ੍ਬਾਨਂ. ਉਪਗਤਾਨਂ, ਇਮੇਸਂ ਤਿਣ੍ਣਂ ਵਿਵੇਕਾਨਂ ਲਾਭੀ ਪਵਿਵਿਤ੍ਤੋ ‘‘ਪਕਾਰੇਹਿ ਵਿਵਿਤ੍ਤੋ’’ਤਿ ਕਤ੍ਵਾ. ਸਮਾਸਜ੍ਜਨਂ ਪਰਿਸਿਨੇਹੁਪ੍ਪਾਦੋ ਸਂਸਗ੍ਗੋ, ਸਵਨਵਸੇਨ ਉਪ੍ਪਜ੍ਜਨਕਸਂਸਗ੍ਗੋ ਸਵਨਸਂਸਗ੍ਗੋ. ਏਸ ਨਯੋ ਸੇਸੇਸੁਪਿ. ਸਮੁਲ੍ਲਪਨਂ ਆਲਾਪਸਲ੍ਲਪਨਂ. ਸਂਸਗ੍ਗਵਤ੍ਥੁਨਾ ਇਮਿਨਾ ਤਸ੍ਸ ਪਰਿਭੋਗੋ ਪਰਿਭੋਗਸਂਸਗ੍ਗੋ.
ਆਰਦ੍ਧਵੀਰਿਯੋਤਿ ਏਤ੍ਥ ਵੀਰਿਯਾਰਮ੍ਭੋ ਨਾਮ ਵੀਰਿਯਸ੍ਸ ਪਗ੍ਗਣ੍ਹਨਂ ਪਰਿਪੁਣ੍ਣਕਰਣਂ. ਤਂ ਪਨ ਸਬ੍ਬਸੋ ਕਿਲੇਸਾਨਂ ਨਿਗ੍ਗਣ੍ਹਨਨ੍ਤਿ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ. ਓਧੁਨਨਵਤ੍ਤਾਤਿ ਕਿਲੇਸਾਨਂ ਯਸ੍ਸ ਕਸ੍ਸਚਿ ਸਾਵਜ੍ਜਸ੍ਸ ਓਧੁਨਨਵਸੇਨ ਵਤ੍ਤਾ. ਤੇਨਾਹ ‘‘ਭਿਕ੍ਖੂਨ’’ਨ੍ਤਿਆਦਿ. ਓਤਿਣ੍ਣਂ ਨਾਮ ਵਜ੍ਜਂ ਅਜ੍ਝਾਚਰਿਤਨ੍ਤਿ ਆਰੋਚਿਤਂ. ਅਨੋਤਿਣ੍ਣਂ ਅਨਾਰੋਚਿਤਂ. ਤਨ੍ਤਿਵਸੇਨਾਤਿ ਪਾਲ਼ਿਧਮ੍ਮਵਸੇਨ, ਯੁਤ੍ਤਸਦ੍ਦਸ੍ਸ ਵਸੇਨਾਤਿ ਅਤ੍ਥੋ. ਪਾਪੇ ਲਾਮਕੇ ਪੁਗ੍ਗਲੇ ਧਮ੍ਮੇ ਚ ਗਰਹਤਿ ਜਿਗੁਚ੍ਛਤੀਤਿ ਪਾਪਗਰਹੀ. ਤੇਨਾਹ ‘‘ਪਾਪਪੁਗ੍ਗਲੇ’’ਤਿਆਦਿ. ਏਕਦਸ੍ਸੀਤਿ ਏਕਭਵਦਸ੍ਸੀ, ਇਧਲੋਕਮਤ੍ਤਦਸ੍ਸੀ ਦਿਟ੍ਠਧਮ੍ਮਿਕਸੁਖਮਤ੍ਤਾਪੇਕ੍ਖੀ. ਸਮਨ੍ਤਾਤਿ ਸਮਨ੍ਤਤੋ, ਪਰਿਤੋ ਮੇ ਕਤ੍ਥਚਿ ਮਾ ਅਹੂਤਿ ਯੋਜਨਾ.
ਸੋਲ਼ਸਹਿ ਪਦੇਹੀਤਿ ਸੋਲ਼ਸਹਿ ਕੋਟ੍ਠਾਸੇਹਿ. ਅਕੁਪ੍ਪਨ੍ਤਿ ਕੇਨਚਿ ਅਕੋਪਨੀਯਂ. ਅਯਂ ਧਮ੍ਮਸੇਨਾਪਤਿਨੋ ਗੁਣਕਥਾ ਸਤ੍ਥੁ ਵਚਨਾਨੁਸਾਰੇਨ ਦਸਸਹਸ੍ਸਚਕ੍ਕਵਾਲ਼ਬ੍ਯਾਪਿਨੀ ਅਹੋਸਿ, ਤਂ ਦਸ੍ਸੇਤੁਂ ‘‘ਏਵ’’ਨ੍ਤਿਆਦਿ ਵੁਤ੍ਤਂ. ਚਤੁਬ੍ਬਿਧਾ ਵਣ੍ਣਨਿਭਾ ਪਾਤੁਭਵਿ ਉਲ਼ਾਰਪੀਤਿਸੋਮਨਸ੍ਸਸਮੁਟ੍ਠਾਨਤ੍ਤਾ. ਸੁਟ੍ਠੁ ਓਭਾਸਤੀਤਿ ਸੁਭੋ. ਓਭਾਸਸਮ੍ਪਤ੍ਤਿਯਾ ਮਣਿਨੋ ਭਦ੍ਦਕਤਾਤਿ ਆਹ ‘‘ਸੁਭੋਤਿ ਸੁਨ੍ਦਰੋ’’ਤਿ. ਜਾਤਿਮਾ ਪਰਿਸੁਦ੍ਧਆਕਰਸਮੁਟ੍ਠਿਤਤ੍ਤਾ. ਕੁਰੁਵਿਨ੍ਦਜਾਤਿਆਦਿਜਾਤਿਵਿਸੇਸੋਪਿ ਮਣਿ ਆਕਰਪਰਿਸੁਦ੍ਧਮੂਲਕੋ ਏਵਾਤਿ ਆਹ ‘‘ਜਾਤਿਸਮ੍ਪਨ੍ਨੋ’’ਤਿ. ਧੋਵਨਾਦਿਪਰਿਕਮ੍ਮੇਨਾਤਿ ਚਤੂਸੁ ਪਾਸਾਣੇਸੁ ਧੋਵਨਦੋਸਨੀਹਰਣਤਾਪਨਸਣ੍ਹਕਰਣਾਦਿਪਰਿਕਮ੍ਮੇਨ. ਰਤ੍ਤਕਮ੍ਬਲਸ੍ਸ ਵਸੇਨ ਸਭਾਵਵਣ੍ਣਸਿਦ੍ਧਿਯਾ ਵੇਲ਼ੁਰਿਯਮਣਿ ਅਤਿਵਿਯ ਸੋਭਤੀਤਿ ਆਹ ‘‘ਪਣ੍ਡੁਕਮ੍ਬਲੇ ਨਿਕ੍ਖਿਤ੍ਤੋ’’ਤਿ. ਨਿਕ੍ਖਨ੍ਤਿ ਭਣ੍ਡਮਾਹ. ਤਞ੍ਚ ਅਪ੍ਪਕੇਨ ਸੁਵਣ੍ਣੇਨ ਕਤਂ ਭਣ੍ਡਂ ਨ ਸੋਭਤਿ ਸੋਭਾਵਿਪੁਲੇਨਾਤਿ ਆਹ ‘‘ਅਤਿਰੇਕਪਞ੍ਚਸੁਵਣ੍ਣੇਨ ਕਤਪਿਲ਼ਨ੍ਧਨ’’ਨ੍ਤਿ. ਸੁਵਣ੍ਣਨ੍ਤਿ ਪਞ੍ਚਧਰਣਸ੍ਸ ਸਮਞ੍ਞਾ, ਤਸ੍ਮਾ ਪਞ੍ਚਵੀਸਤਿਸੁਵਣ੍ਣਸਾਰਿਯਾ ਵਿਚਿਤ੍ਤਆਭਰਣਂ ਇਧ ‘‘ਨਿਕ੍ਖ’’ਨ੍ਤਿ ਅਧਿਪ੍ਪੇਤਂ. ਤਞ੍ਹਿ ਵਿਪੁਲਂ ਨ ਪਰਿਤ੍ਤਕਂ. ਮਹਾਜਮ੍ਬੁਸਾਖਾਯ ਪਵਤ੍ਤਨਦਿਯਨ੍ਤਿ ਮਹਾਜਮ੍ਬੁਸਾਖਾਯ ਹੇਟ੍ਠਾ ਸਞ੍ਜਾਤਨਦਿਯਂ. ਤਂ ਕਿਰ ਰਤਨਂ ਰਤ੍ਤਂ. ਸੁਕੁਸਲੇਨ…ਪੇ… ਸਮ੍ਪਹਟ੍ਠਨ੍ਤਿ ਸੁਟ੍ਠੁ ਕੁਸਲੇਨ ਸੁਵਣ੍ਣਕਾਰੇਨ ਉਕ੍ਕਾਯ ਤਾਪੇਤ੍ਵਾ ਸਮ੍ਮਾ ਪਹਟ੍ਠਂ ਮਜ੍ਜਨਾਦਿਵਸੇਨ ਸੁਕਤਪਰਿਕਮ੍ਮਂ. ਧਾਤੁਵਿਭਙ੍ਗੇਤਿ ਧਾਤੁਵਿਭਙ੍ਗਸੁਤ੍ਤੇ. ਕਤਭਣ੍ਡਨ੍ਤਿ ਆਭਰਣਭਾਵੇਨ ਕਤਂ ਭਣ੍ਡਂ.
ਨਾਤਿਉਚ੍ਚੋ ਨਾਤਿਨੀਚੋ ਤਰੁਣਸੂਰਿਯੋ ਨਾਮ. ਸਤ੍ਥਾਰਾ ਆਭਤਵਣ੍ਣੋ ਉਬ੍ਭਤਗੁਣੋਤਿ ਅਤ੍ਥੋ. ਨੇਵ ਮਰਣਂ ਅਭਿਨਨ੍ਦਤੀਤਿ ਅਤ੍ਤਨੋਪਿ ਮਰਣਂ ਨੇਵ ਅਭਿਨਨ੍ਦਤਿ ਅਤ੍ਤਵਿਨਿਪਾਤਸ੍ਸ ਸਾਵਜ੍ਜਭਾਵਤੋ. ਬੋਧਿਸਤ੍ਤੋ ਪਨ ਪਰੇਸਂ ਅਤ੍ਥਾਯ ਅਤ੍ਤਨੋ ਅਤ੍ਤਭਾਵਂ ਪਰਿਚ੍ਚਜਤਿ ਕਰੁਣਾਵਸੇਨ, ਏਵਂ ਵੋਸਜ੍ਜਨਂ ਪਰਮਤ੍ਥਪਾਰਮੀਪਾਰਿਪੂਰਿਂ ਗਚ੍ਛਤੀਤਿ ਸਾਵਕਾ ਨ ਤਥਾ ਕਾਤੁਂ ਸਕ੍ਕਾ ਸਿਕ੍ਖਾਪਦਤੋ. ਨ ਜੀਵਿਤਂ ਪਤ੍ਥੇਤਿ ਜੀਵਿਤਾਸਾਯ ਸਮੁਚ੍ਛਿਨ੍ਨਤ੍ਤਾ. ਦਿਵਸਸਙ੍ਖੇਪਨ੍ਤਿ ਅਜ੍ਜ ਤ੍ਵਂ ਇਦਂ ਨਾਮ ਕਮ੍ਮਂ ਕਰੋਹਿ, ਇਦਂ ਤੇ ਵੇਤਨਨ੍ਤਿ ਦਿਵਸਭਾਗੇਨ ਪਰਿਚ੍ਛਿਨ੍ਨਂ ਵੇਤਨਂ. ਤਾਦਿਸੋ ਹਿ ਭਤਕੋ ਦਿਵਸਕ੍ਖਯਮੇਵ ਉਦਿਕ੍ਖਤਿ, ਨ ਕਮ੍ਮਨਿਟ੍ਠਾਨਂ. ਨਿਬ੍ਬਿਸਂ ਭਤਕੋ ਯਥਾਤਿ ਵੇਤਨਂ ਭਤਿਂ ਇਚ੍ਛਨ੍ਤੋ ਕਾਲਕ੍ਖਯਂ ਉਦਿਕ੍ਖਨ੍ਤੋ ਭਤਕਪੁਰਿਸੋ ਵਿਯ.
ਸੁਸਿਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਨਾਨਾਤਿਤ੍ਥਿਯਸਾਵਕਸੁਤ੍ਤਵਣ੍ਣਨਾ
੧੧੧. ਨਾਨਾਤਿਤ੍ਥਿਯਸਾਵਕਾਤਿ ਪੁਥੁਤਿਤ੍ਥਿਯਾਨਂ ਸਾਵਕਾ. ਛਿਨ੍ਦਿਤੇਤਿ ਹਤ੍ਥਚ੍ਛੇਦਾਦਿਵਸੇਨ ਛੇਦੇ. ਮਾਰਿਤੇਤਿ ਮਾਰਣੇ. ਨ ਪਾਪਂ ਸਮਨੁਪਸ੍ਸਤੀਤਿ ਕਿਞ੍ਚਿ ਪਾਪਂ ਅਤ੍ਥੀਤਿ ਨ ਪਸ੍ਸਤਿ, ਪਰੇਸਞ੍ਚ ਤਥਾ ਪਵੇਦੇਤਿ. ਵਿਸ੍ਸਾਸਨ੍ਤਿ ਵਿਸ੍ਸਤ੍ਥਭਾਵਂ. ‘‘ਕਤਕਮ੍ਮਾਨਮ੍ਪਿ ਵਿਪਾਕੋ ਨਤ੍ਥੀ’’ਤਿ ਵਦਨ੍ਤੋ ਕਤਪਾਪਾਨਂ ਅਕਤਪੁਞ੍ਞਾਨਞ੍ਚ ਵਿਸ੍ਸਤ੍ਥਤਂ ਨਿਰਾਸਙ੍ਕਤਂ ਜਨੇਤਿ.
ਤਪੋਜਿਗੁਚ੍ਛਾਯਾਤਿ ਤਪਸਾ ਅਚੇਲਵਤਾਦਿਨਾ ਪਾਪਤੋ ਜਿਗੁਚ੍ਛਨੇਨ, ‘‘ਪਾਪਂ ਵਿਰਾਜਯਾਮਾ’’ਤਿ ਅਚੇਲਵਤਾਦਿਸਮਾਦਾਨੇਨਾਤਿ ਅਤ੍ਥੋ. ਤਸ੍ਮਿਞ੍ਹਿ ਸਮਾਦਾਨੇ ਠਿਤੇਨ ਸਂਵਰੇਨ ਸਂਵੁਤਚਿਤ੍ਤੋ ਸਮਨ੍ਨਾਗਤੋ ਪਿਹਿਤੋ ਚ ਨਾਮ ਹੋਤੀਤਿ ‘‘ਸੁਸਂਵੁਤਤ੍ਤੋ’’ਤਿਆਦਿ ਵੁਤ੍ਤਂ. ਚਤ੍ਤਾਰੋ ਯਾਮਾ ਭਾਗਾ ਚਤੁਯਾਮਾ, ਚਤੁਯਾਮਾ ਏਵ ਚਾਤੁਯਾਮਾ. ਭਾਗਤ੍ਥੋ ਹਿ ਇਧ ਯਾਮ-ਸਦ੍ਦੋ ਯਥਾ ‘‘ਰਤ੍ਤਿਯਂ ਪਠਮੋ ਯਾਮੋ’’ਤਿ. ਸੋ ਪਨੇਤ੍ਥ ਭਾਗੋ ਸਂਵਰਲਕ੍ਖਣੋਤਿ ਆਹ ‘‘ਚਾਤੁਯਾਮੇਨ ਸੁਸਂਵੁਤੋ’’ਤਿ, ਚਤੁਕੋਟ੍ਠਾਸੇਨ ਸਂਵਰੇਨ ਸੁਟ੍ਠੁ ਸਂਵੁਤੋਤਿ ਅਤ੍ਥੋ. ਪਟਿਕ੍ਖਿਤ੍ਤਸਬ੍ਬਸੀਤੋਦਕੋਤਿ ਪਟਿਕ੍ਖਿਤ੍ਤਸਬ੍ਬਸੀਤੁਦਕਪਰਿਭੋਗੋ. ਸਬ੍ਬੇਨ ਪਾਪਵਾਰਣੇਨ ਯੁਤ੍ਤੋਤਿ ਸਬ੍ਬਪ੍ਪਕਾਰੇਨ ਸਂਵਰਲਕ੍ਖਣੇਨ ਪਾਪਵਾਰਣੇਨ ਸਮਨ੍ਨਾਗਤੋ. ਧੁਤਪਾਪੋਤਿ ਸਬ੍ਬੇਨ ਨਿਜ੍ਜਰਲਕ੍ਖਣੇਨ ਪਾਪਵਾਰਣੇਨਪਿ ਧੁਤਪਾਪੋ. ਫੁਟ੍ਠੋਤਿ ਅਟ੍ਠਨ੍ਨਮ੍ਪਿ ਕਮ੍ਮਾਨਂ ਖੇਪਨੇਨ ਵਿਕ੍ਖੇਪਪ੍ਪਤ੍ਤਿਯਾ ਕਮ੍ਮਕ੍ਖਯਲਕ੍ਖਣੇਨ ਸਬ੍ਬੇਨ ਪਾਪਵਾਰਣੇਨ ਫੁਟ੍ਠੋ, ਤਂ ਫੁਸਿਤ੍ਵਾ ਠਿਤੋ. ਨ ਨਿਗੁਹਨ੍ਤੋਤਿ ਨ ਨਿਗੁਹਨਹੇਤੁ ਦਿਟ੍ਠਸੁਤੇ ਤਥੇਵ ਕਥੇਨ੍ਤੋ.
ਨਾਨਾਤਿਤ੍ਥਿਯਾਨਂਯੇਵ ਉਪਟ੍ਠਾਕੋਤਿ ਪਰਵਾਦੀਨਂ ਸਬ੍ਬੇਸਂਯੇਵ ਤਿਤ੍ਥਿਯਾਨਂ ਉਪਟ੍ਠਾਕੋ, ਤੇਸੁ ਸਾਧਾਰਣਵਸੇਨ ਅਭਿਪ੍ਪਸਨ੍ਨੋ. ਕੋਟਿਪ੍ਪਤ੍ਤਾਤਿ ਮੋਕ੍ਖਾਧਿਗਮੇਨ ਸਮਣਧਮ੍ਮੇ ਪਤ੍ਤਬ੍ਬਮਰਿਯਾਦਪ੍ਪਤ੍ਤਾ.
ਸਹਚਰਿਤਮਤ੍ਤੇਨਾਤਿ ਸੀਹਨਾਦੇਨ ਸਹ ਵਸ੍ਸਕਰਣਮਤ੍ਤੇਨ. ਸੀਹੇਨ ਸੀਹਨਾਦਂ ਨਦਨ੍ਤੇਨ ਸਹੇਵ ਸਿਙ੍ਗਾਲੇਨ ਅਤ੍ਤਨੋ ਸਿਙ੍ਗਾਲਰਵਕਰਣਮਤ੍ਤੇਨ. ਕੋਤ੍ਥੁਕੋਤਿ ਖੁਦ੍ਦਕਕੋਤ੍ਥੁ. ਆਸਙ੍ਕਿਤਸਮਾਚਾਰੋਤਿ ਅਤ੍ਤਨਾ ਚ ਪਰੇਹਿ ਚ ਆਸਙ੍ਕਿਤਬ੍ਬਸਮਾਚਾਰੋ. ਸਪ੍ਪੁਰਿਸਾਨਨ੍ਤਿ ਬੁਦ੍ਧਾਦੀਨਂ.
ਤਸ੍ਸਾਤਿ ਵੇਗਬ੍ਭਰਿਸ੍ਸ ਦੇਵਪੁਤ੍ਤਸ੍ਸ. ਸਰੀਰੇ ਅਨੁਆਵਿਸੀਤਿ ਸਰੀਰੇ ਅਨੁਪਵਿਸਿਤ੍ਵਾ ਵਿਯ ਆਵਿਸਿ. ਅਧਿਮੁਚ੍ਚੀਤਿ ਯਥਾ ਗਹਿਤਸ੍ਸ ਵਸੇਨ ਚਿਤ੍ਤਂ ਨ ਵਤ੍ਤਤਿ, ਅਤ੍ਤਨੋ ਏਵ ਵਸੇ ਵਤ੍ਤਤਿ, ਏਵਂ ਅਧਿਟ੍ਠਹਿ. ਆਯੁਤ੍ਤਾਤਿ ਦਸ੍ਸਨੇਨ ਸਂਯੁਤ੍ਤਾ. ਪਵਿਵੇਕਿਯਨ੍ਤਿ ਕਪ੍ਪਕਵਤ੍ਥਭੁਞ੍ਜਨਸੇਨਾਸਨੇਹਿ ਪਵਿਵਿਤ੍ਤਭਾਵਂ. ਤੇਨਾਹ ‘‘ਤੇ ਕਿਰਾ’’ਤਿਆਦਿ. ਰੂਪੇ ਨਿਵਿਟ੍ਠਾਤਿ ਚਕ੍ਖੁਰੂਪਧਮ੍ਮੇ ਅਭਿਨਿਵਿਟ੍ਠਾ. ਤੇਨਾਹ ‘‘ਤਣ੍ਹਾਦਿਟ੍ਠੀਹਿ ਪਤਿਟ੍ਠਿਤਾ’’ਤਿ. ਦੇਵਲੋਕਪਤ੍ਥਨਕਾਮਾਤਿ ਦੇਵਲੋਕਸ੍ਸੇਵ ਅਭਿਪਤ੍ਥਨਕਾਮਾ. ਮਰਣਧਮ੍ਮਤਾਯ ਮਾਤਿਯਾ. ਤੇਨਾਹ ‘‘ਮਾਤਿਯਾਤਿ ਮਚ੍ਚਾ’’ਤਿ. ਪਰਲੋਕਤ੍ਥਾਯਾਤਿ ਪਰਸਮ੍ਪਤ੍ਤਿਭਾਵਾਯ ਲੋਕਸ੍ਸ ਅਤ੍ਥਾਯ.
ਪਭਾਸਵਣ੍ਣਾਤਿ ਪਭਾਯ ਸਮਾਨਵਣ੍ਣਾ. ਕੇਸਂ ਪਭਾਯਾਤਿ ਆਹ ‘‘ਚਨ੍ਦੋਭਾਸਾ’’ਤਿਆਦਿ. ਸਜ੍ਝਾਰਾਗਪਭਾਸਵਣ੍ਣਾ ਇਨ੍ਦਧਨੁਪਭਾਸਵਣ੍ਣਾਤਿ ਪਚ੍ਚੇਕਂ ਯੋਜਨਾ. ਆਮੋ ਆਮਗਨ੍ਧੋ ਏਤਸ੍ਸ ਅਤ੍ਥੀਤਿ ਆਮਿਸਂ. ਵਧਾਯਾਤਿ ਵਿਦ੍ਧਂਸਿਤੁਂ. ਰੂਪਾਤਿ ਰੂਪਾਯਤਨਾਦਿਰੂਪਿਧਮ੍ਮਾ.
ਰਾਜਗਹਸਮੀਪਪ੍ਪਵਤ੍ਤੀਨਂ ਰਾਜਗਹਿਯਾਨਂ. ‘‘ਸੇਤੋ’’ਤਿ ਕੇਲਾਸਕੂਟੋ ਅਧਿਪ੍ਪੇਤੋਤਿ ਆਹ ‘‘ਸੇਤੋਤਿ ਕੇਲਾਸੋ’’ਤਿ. ਕੇਨਚਿ ਨ ਘਟ੍ਟੇਤੀਤਿ ਅਘਂ, ਅਨ੍ਤਲਿਕ੍ਖਨ੍ਤਿ ਆਹ ‘‘ਅਘਗਾਮੀਨਨ੍ਤਿ ਆਕਾਸਗਾਮੀਨ’’ਨ੍ਤਿ. ਉਦਕਂ ਧੀਯਤਿ ਏਤ੍ਥਾਤਿ ਉਦਧਿ, ਮਹੋਦਧਿ. ਵਿਪੁਲੋਤਿ ਵੇਪੁਲ੍ਲਪਬ੍ਬਤੋ. ਹਿਮਵਨ੍ਤਪਬ੍ਬਤਾਨਨ੍ਤਿ ਹਿਮਵਨ੍ਤਪਬ੍ਬਤਭਾਗਾਨਂ. ਬੁਦ੍ਧੋ ਸੇਟ੍ਠੋ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਾਦੀਹਿ ਸਬ੍ਬਗੁਣੇਹਿ.
ਨਾਨਾਤਿਤ੍ਥਿਯਸਾਵਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.
ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਦੇਵਪੁਤ੍ਤਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.