੩. ਕੋਸਲਸਂਯੁਤ੍ਤਂ

੧. ਪਠਮਵਗ੍ਗੋ

੧. ਦਹਰਸੁਤ੍ਤਵਣ੍ਣਨਾ

੧੧੨. ਭਗਵਤਾ ਸਦ੍ਧਿਂ ਸਮ੍ਮੋਦੀਤਿ ਭਗਵਤੋ ਗੁਣੇ ਅਜਾਨਨ੍ਤੋ ਕੋਸਲਰਾਜਾ ਅਤ੍ਤਨੋ ਖਤ੍ਤਿਯਮਾਨੇਨ ਕੇਵਲਂ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਪਠਮਾਗਤੇ ਹਿ ਸਤ੍ਥਰਿ ਤਸ੍ਸ ਸਮ੍ਮੋਦਿਤਾਕਾਰਂ ਦਸ੍ਸੇਤੁਂ ‘‘ਯਥਾ’’ਤਿਆਦਿ ਵੁਤ੍ਤਂ. ਯਥਾ ਖਮਨੀਯਾਦੀਨਿ ਪੁਚ੍ਛਨ੍ਤੋਤਿ ਯਥਾ ਭਗਵਾ ‘‘ਕਚ੍ਚਿ ਤੇ, ਮਹਾਰਾਜ, ਖਮਨੀਯਂ, ਕਚ੍ਚਿ ਯਾਪਨੀਯ’’ਨ੍ਤਿਆਦਿਨਾ ਤੇਨ ਰਞ੍ਞਾ ਸਦ੍ਧਿਂ ਪਠਮਂ ਪਵਤ੍ਤਮੋਦੋ ਅਹੋਸਿ ਪੁਬ੍ਬਭਾਸਿਤਾਯ, ਤਦਨੁਕਰਣੇਨ ਏਵਂ ਸੋਪਿ ਰਾਜਾ ਭਗਵਤਾ ਸਦ੍ਧਿਂ ਸਮਪ੍ਪਵਤ੍ਤਮੋਦੋ ਅਹੋਸੀਤਿ ਯੋਜਨਾ. ਤਂ ਪਨ ਸਮਪ੍ਪਵਤ੍ਤਮੋਦਨਂ ਉਪਮਾਯ ਦਸ੍ਸੇਤੁਂ ‘‘ਸੀਤੋਦਕਂ ਵਿਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਮ੍ਮੋਦਿਤਨ੍ਤਿ ਸਂਸਨ੍ਦਿਤਂ ਏਕੀਭਾਵਨ੍ਤਿ ਸਮ੍ਮੋਦਨਕਿਰਿਯਾਯ ਸਮਾਨਤਂ ਏਕਰੂਪਤਂ, ਖਮਨੀਯਨ੍ਤਿ ‘‘ਇਦਂ ਚਤੁਚਕ੍ਕਂ ਨਵਦ੍ਵਾਰਂ ਸਰੀਰਯਨ੍ਤਂ ਦੁਕ੍ਖਬਹੁਲਤਾਯ ਸਭਾਵਤੋ ਦੁਸ੍ਸਹਂ, ਕਚ੍ਚਿ ਖਮਿਤੁਂ ਸਕ੍ਕੁਣੇਯ੍ਯ’’ਨ੍ਤਿ ਪੁਚ੍ਛਤਿ. ਯਾਪਨੀਯਨ੍ਤਿ ਪਚ੍ਚਯਾਯਤ੍ਤਵੁਤ੍ਤਿਕਂ ਚਿਰਪਬਨ੍ਧਸਙ੍ਖਾਤਾਯ ਯਾਪਨਾਯ ਕਚ੍ਚਿ ਯਾਪੇਤੁਂ ਸਕ੍ਕੁਣੇਯ੍ਯਂ. ਸੀਸਰੋਗਾਦਿਆਬਾਧਾਭਾਵੇਨ ਕਚ੍ਚਿ ਅਪ੍ਪਾਬਾਧਂ. ਦੁਕ੍ਖਜੀਵਿਕਾਭਾਵੇਨ ਕਚ੍ਚਿ ਅਪ੍ਪਾਤਙ੍ਕਂ. ਤਂਤਂਕਿਚ੍ਚਕਰਣੇ ਉਟ੍ਠਾਨਸੁਖਤਾਯ ਕਚ੍ਚਿ ਲਹੁਟ੍ਠਾਨਂ. ਤਦਨੁਰੂਪਬਲਯੋਗਤੋ ਕਚ੍ਚਿ ਬਲਂ. ਸੁਖਵਿਹਾਰਸਮ੍ਭਵੇਨ ਕਚ੍ਚਿ ਫਾਸੁਵਿਹਾਰੋ ਅਤ੍ਥੀਤਿ ਤਤ੍ਥ ਤਤ੍ਥ ਕਚ੍ਚਿ-ਸਦ੍ਦਂ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਬਲਵਪ੍ਪਤ੍ਤਾ ਪੀਤਿ ਪੀਤਿਯੇਵ. ਤਰੁਣਪੀਤਿ ਪਾਮੋਜ੍ਜਂ. ਸਮ੍ਮੋਦਨਂ ਜਨੇਤਿ ਕਰੋਤੀਤਿ ਸਮ੍ਮੋਦਨੀਯਂ. ਸਮ੍ਮੋਦਿਤਬ੍ਬਤੋ ਸਮ੍ਮੋਦਨੀਯਨ੍ਤਿ ਇਮਂ ਪਨ ਅਤ੍ਥਂ ਦਸ੍ਸੇਨ੍ਤੋ ‘‘ਸਮ੍ਮੋਦਿਤੁਂ ਯੁਤ੍ਤਭਾਵਤੋ’’ਤਿ ਆਹ. ਸਰਿਤਬ੍ਬਭਾਵਤੋਤਿ ਅਨੁਸ੍ਸਰਿਤਬ੍ਬਭਾਵਤੋ. ‘‘ਸਰਣੀਯ’’ਨ੍ਤਿ ਵਤ੍ਤਬ੍ਬੇ ਦੀਘਂ ਕਤ੍ਵਾ ‘‘ਸਾਰਣੀਯ’’ਨ੍ਤਿ ਵੁਤ੍ਤਂ.

ਸੁਯ੍ਯਮਾਨਸੁਖਤੋਤਿ ਆਪਾਥਮਧੁਰਤਂ ਆਹ, ਅਨੁਸ੍ਸਰਿਯਮਾਨਸੁਖਤੋਤਿ ਵਿਮਦ੍ਦਰਮਣੀਯਤਂ. ਬ੍ਯਞ੍ਜਨਪਰਿਸੁਦ੍ਧਤਾਯਾਤਿ ਸਭਾਵਨਿਰੁਤ੍ਤਿਭਾਵੇਨ ਤਸ੍ਸਾ ਕਥਾਯ ਵਚਨਚਾਤੁਰਿਯਮਾਹ, ਅਤ੍ਥਪਰਿਸੁਦ੍ਧਤਾਯਾਤਿ ਅਤ੍ਥਸ੍ਸ ਨਿਰੁਪਕ੍ਕਿਲੇਸਤਂ. ਅਨੇਕੇਹਿ ਪਰਿਯਾਯੇਹੀਤਿ ਅਨੇਕੇਹਿ ਕਾਰਣੇਹਿ. ਅਦਿਟ੍ਠਤ੍ਤਾਤਿ ਉਪਸਙ੍ਕਮਨਵਸੇਨ ਅਦਿਟ੍ਠਤ੍ਤਾ. ਗੁਣਾਗੁਣਵਸੇਨਾਤਿ ਗੁਣਵਸੇਨ ਗਮ੍ਭੀਰਭਾਵਂ ਵਾ ਅਗੁਣਵਸੇਨ ਉਤ੍ਤਾਨਭਾਵਂ ਵਾ. ਓਵਟ੍ਟਿਕਸਾਰਂ ਕਤ੍ਵਾਤਿ ਓਵਟ੍ਟਿਕਾਯ ਗਹੇਤਬ੍ਬਸਾਰਵਤ੍ਥੁਂ ਕਤ੍ਵਾ. ਲੋਕਨਿਸ੍ਸਰਣਭਵੋਕ੍ਕਨ੍ਤਿਪਞ੍ਹਨ੍ਤਿ ਲੋਕਤੋ ਨਿਸ੍ਸਟਭਾਵਪਞ੍ਹਞ੍ਚੇਵ ਆਦਿਤੋ ਭਵੋਕ੍ਕਮਨਪਞ੍ਹਞ੍ਚ. ਸਤ੍ਥੁ ਸਮ੍ਮਾਸਮ੍ਬੁਦ੍ਧਤਂ ਪੁਚ੍ਛਨ੍ਤੋ ਹਿ ‘‘ਕਿਂ ਭਵਂ ਗੋਤਮੋ ਸਬ੍ਬਲੋਕਤੋ ਨਿਸ੍ਸਟੋ, ਸਬ੍ਬਸਤ੍ਤੇਹਿ ਚ ਜੇਟ੍ਠੋ’’ਤਿ? ਪੁਚ੍ਛਤਿ ਨਾਮ. ਯਥਾ ਹਿ ਸਤ੍ਥੁ ਸਮ੍ਮਾਸਮ੍ਬੁਦ੍ਧਤਾਯ ਲੋਕਤੋ ਨਿਸ੍ਸਟਤਾ ਵਿਞ੍ਞਾਯਤਿ, ਏਵਂ ਸਬ੍ਬਸਤ੍ਤੇਹਿ ਜੇਟ੍ਠਭਾਵਤੋ ਸੇਟ੍ਠਭਾਵਤੋ. ਸ੍ਵਾਯਮਤ੍ਥੋ ਅਗ੍ਗਪਸਾਦਸੁਤ੍ਤਾਦੀਹਿ (ਇਤਿਵੁ. ੯੦; ਅ. ਨਿ. ੪.੩੪) ਵਿਭਾਵੇਤਬ੍ਬੋ. ਕਥਂ ਪਨ ਸਮ੍ਬੁਦ੍ਧਤਾ ਵਿਞ੍ਞਾਯਤੀਤਿ? ਅਵਿਪਰੀਤਧਮ੍ਮਦੇਸਨਤੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗਸਂਵਣ੍ਣਨਾਦੀਸੁ (ਵਿਸੁਦ੍ਧਿ. ਮਹਾਟੀ. ੧.੧੨੪) ਵੁਤ੍ਤਨਯੇਨ ਵੇਦਿਤਬ੍ਬੋ.

ਰਾਜਾ ਸਤ੍ਥੁ ਅਵਿਪਰੀਤਧਮ੍ਮਦੇਸਨਂ ਅਜਾਨਨ੍ਤੋ ਤਤੋ ਏਵਸ੍ਸ ਸਮ੍ਮਾਸਮ੍ਬੋਧਿਂ ਅਸਦ੍ਦਹਨ੍ਤੋ ‘‘ਵੁਡ੍ਢਤਰੇਸੁਪਿ ਚਿਰਪਬ੍ਬਜਿਤੇਸੁ ਸਮ੍ਮਾਸਮ੍ਬੁਦ੍ਧਭਾਵੇ ਅਲਬ੍ਭਮਾਨੇ ਤਬ੍ਬਿਪਰੀਤੇ ਕਥਂ ਲਬ੍ਭੇਯ੍ਯਾ’’ਤਿ ਮਞ੍ਞਮਾਨੋ ‘‘ਕਿਂ ਪਨ ਭਵਂ ਗੋਤਮੋ’’ਤਿਆਦਿਂ ਵਕ੍ਖਤਿ. ਰਾਜਾ ਅਤ੍ਤਨੋ ਲਦ੍ਧਿਯਾ ਨ ਪੁਚ੍ਛਤਿ ਅਤ੍ਤਨੋ ਸਮ੍ਮੁਖਾ ਤੇਹਿ ਅਸਮ੍ਮਾਸਮ੍ਬੁਦ੍ਧਭਾਵਸ੍ਸੇਵ ਪਟਿਞ੍ਞਾਤਤ੍ਤਾ. ਯਸ੍ਮਾ ਤੇ ਮੁਸਾਵਾਦਿਤਾਯ ਅਤ੍ਤਨੋ ਉਪਟ੍ਠਾਕਾਦੀਨਂ ‘‘ਬੁਦ੍ਧਾ ਮਯ’’ਨ੍ਤਿ ਪਟਿਜਾਨਿਂਸੁ, ਤਸ੍ਮਾ ਵੁਤ੍ਤਂ ‘‘ਲੋਕੇ ਮਹਾਜਨੇਨ ਗਹਿਤਪਟਿਞ੍ਞਾਵਸੇਨ ਪੁਚ੍ਛਤੀ’’ਤਿ. ਸ੍ਵਾਯਮਤ੍ਥੋ ਆਗਮਿਸ੍ਸਤਿ. ਬੁਦ੍ਧਸੀਹਨਾਦਨ੍ਤਿ ਬੁਦ੍ਧਾਨਂ ਏਵ ਆਵੇਣਿਕਂ ਸੀਹਨਾਦਂ. ਕਾਮਂ ਮਗ੍ਗਞਾਣਪਦਟ੍ਠਾਨਂ ਸਬ੍ਬਞ੍ਞੁਤਞ੍ਞਾਣਂ, ਸਮ੍ਬੋਧਿਞਾਣੇ ਪਨ ਗਹਿਤੇ ਤਂ ਅਤ੍ਥਤੋ ਗਹਿਤਮੇਵ ਹੋਤੀਤਿ ਵੁਤ੍ਤਂ ‘‘ਸਬ੍ਬਞ੍ਞੁਤਞ੍ਞਾਣਸਙ੍ਖਾਤਂ ਸਮ੍ਮਾਸਮ੍ਬੋਧਿ’’ਨ੍ਤਿ.

ਪਬ੍ਬਜ੍ਜੂਪਗਮਨੇਨਾਤਿ ਯਾਯ ਕਾਯਚਿ ਪਬ੍ਬਜ੍ਜਾਯ ਉਪਗਮਨਮਤ੍ਤੇਨ ਸਮਣਾ, ਨ ਸਮਿਤਪਾਪਤਾਯ. ਜਾਤਿਵਸੇਨਾਤਿ ਜਾਤਿਮਤ੍ਤੇਨ ਬ੍ਰਾਹ੍ਮਣਾ, ਨ ਬਾਹਿਤਪਾਪਤਾਯ. ਪਬ੍ਬਜਿਤਸਮੂਹਸਙ੍ਖਾਤੋ ਸਙ੍ਘੋਤਿ ਪਬ੍ਬਜਿਤਸਮੂਹਤਾਮਤ੍ਤੇਨ ਸਙ੍ਘੋ, ਨ ਨਿਯ੍ਯਾਨਿਕਦਿਟ੍ਠਿਵਿਸੁਦ੍ਧਸੀਲਸਾਮਞ੍ਞਵਸੇਨ ਸਂਹਤਤ੍ਤਾਤਿ ਅਧਿਪ੍ਪਾਯੋ. ਏਤੇਸਂ ਅਤ੍ਥੀਤਿ ਏਤੇਸਂ ਸਬ੍ਬਞ੍ਞੁਪਟਿਞ੍ਞਾਤਾਨਂ ਪਰਿਵਾਰਭੂਤੋ ਅਤ੍ਥਿ. ਸ੍ਵੇਵਾਤਿ ਪਬ੍ਬਜਿਤਸਮੂਹਸਙ੍ਖਾਤੋ ਏਵ. ਕੇਚਿ ਪਨ ‘‘ਪਬ੍ਬਜਿਤਸਮੂਹਵਸੇਨ. ਸਙ੍ਘਿਨੋ, ਗਹਟ੍ਠਸਮੂਹਵਸੇਨ ਗਣਿਨੋ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ ਗਣੇ ਏਵ ਲੋਕੇ ਸਙ੍ਘਸਦ੍ਦਸ੍ਸ ਨਿਰੁਲ਼੍ਹਤ੍ਤਾ. ਆਚਾਰਸਿਕ੍ਖਾਪਨਵਸੇਨਾਤਿ ਅਚੇਲਕਵਤਚਰਿਯਾਦਿ-ਆਚਾਰਸਿਕ੍ਖਾਪਨਵਸੇਨ. ਪਾਕਟਾਤਿ ਸਙ੍ਘੀਆਦਿਭਾਵੇਨ ਪਕਾਸਿਤਾ. ‘‘ਅਪ੍ਪਿਚ੍ਛਾ’’ਤਿ ਵਤ੍ਵਾ ਤਤ੍ਥ ਲਬ੍ਭਮਾਨਂ ਅਪ੍ਪਿਚ੍ਛਤਂ ਦਸ੍ਸੇਤੁਂ ‘‘ਅਪਿਚ੍ਛਤਾਯ ਵਤ੍ਥਮ੍ਪਿ ਨ ਨਿਵਾਸੇਨ੍ਤੀ’’ਤਿ ਵੁਤ੍ਤਂ. ਨ ਹਿ ਤੇਸੁ ਸਾਸਨਿਕੇਸੁ ਵਿਯ ਸਨ੍ਤਗੁਣਨਿਗੁਹਨਾ ਅਪ੍ਪਿਚ੍ਛਾ ਲਬ੍ਭਤੀਤਿ. ਯਸੋਤਿ ਕਿਤ੍ਤਿਸਦ੍ਦੋ. ਤਰਨ੍ਤਿ ਏਤੇਨ ਸਂਸਾਰੋਘਨ੍ਤਿ ਏਵਂ ਸਮ੍ਮਤਤ੍ਤਾ ਤਿਤ੍ਥਂ ਵੁਚ੍ਚਤਿ ਲਦ੍ਧੀਤਿ ਆਹ ‘‘ਤਿਤ੍ਥਕਰਾਤਿ ਲਦ੍ਧਿਕਰਾ’’ਤਿ. ਸਾਧੁਸਮ੍ਮਤਾਤਿ ‘‘ਸਾਧੂ’’ਤਿ ਸਮ੍ਮਤਾ, ਨ ਸਾਧੂਹਿ ਸਮ੍ਮਤਾਤਿ ਆਹ ‘‘ਸਨ੍ਤੋ…ਪੇ… ਪੁਥੁਜ੍ਜਨਸ੍ਸਾ’’ਤਿ.

ਕਪ੍ਪਕੋਲਾਹਲਨ੍ਤਿ ਕਪ੍ਪਤੋ ਕੋਲਾਹਲਂ, ‘‘ਕਪ੍ਪੁਟ੍ਠਾਨਂ ਭਵਿਸ੍ਸਤੀ’’ਤਿ ਦੇਵਪੁਤ੍ਤੇਹਿ ਉਗ੍ਘੋਸਿਤਮਹਾਸਦ੍ਦੋ. ਇਮੇਤਿ ਪੂਰਣਾਦਯੋ. ਬੁਦ੍ਧਕੋਲਾਹਲਨ੍ਤਿ ਦੇਵਤਾਹਿ ਘੋਸਿਤਂ ਬੁਦ੍ਧਕੋਲਾਹਲਂ. ਪਯਿਰੁਪਾਸਿਤ੍ਵਾਤਿ ਪੁਰਿਸਸੁਤਿਪਰਮ੍ਪਰਾਯ ਸੁਤ੍ਵਾ. ਚਿਨ੍ਤਾਮਣਿਵਿਜ੍ਜਾ ਨਾਮ ਪਰਚਿਤ੍ਤਜਾਨਾਪਨਵਿਜ੍ਜਾ. ਸਾ ਕੇਵਟ੍ਟਸੁਤ੍ਤੇ ‘‘ਮਣਿਕਾ’’ਤਿ ਆਗਤਾ, ਆਦਿ-ਸਦ੍ਦੇਨ ਗਨ੍ਧਾਰਿਸਮ੍ਭਵਵਿਜ੍ਜਾਦਿਂ ਸਙ੍ਗਣ੍ਹਾਤਿ. ਤਤ੍ਥ ਗਨ੍ਧਾਰਿਯਾ ਵਿਕੁਬ੍ਬਨਂ ਦਸ੍ਸੇਤਿ. ਅਤ੍ਤਭਾਵੇਤਿ ਸਰੀਰੇ. ਰਾਜੁਸ੍ਮਾਤਿ ਰਾਜਤੇਜੋ.

ਸੁਕ੍ਕਧਮ੍ਮੋਤਿ ਅਨਵਜ੍ਜਧਮ੍ਮੋ ਨਿਕ੍ਕਿਲੇਸਤਾ. ਇਦਂ ਗਹੇਤ੍ਵਾਤਿ ਇਦਂ ਪਰਮ੍ਮੁਖਾ ‘‘ਮਯਂ ਬੁਦ੍ਧਾ’’ਤਿ ਵਤ੍ਵਾ ਅਤ੍ਤਨੋ ਸਮ੍ਮੁਖਾ ‘‘ਨ ਮਯਂ ਬੁਦ੍ਧਾ’’ਤਿ ਤੇਹਿ ਵੁਤ੍ਤਵਚਨਂ ਗਹੇਤ੍ਵਾ. ਏਵਮਾਹਾਤਿ ‘‘ਯੇਪਿ ਤੇ, ਭੋ ਗੋਤਮ…ਪੇ… ਨਵੋ ਚ ਪਬ੍ਬਜ੍ਜਾਯਾ’’ਤਿ ਏਵਂ ਅਵੋਚ. ਅਤ੍ਤਨੋ ਪਟਿਞ੍ਞਂ ਗਹੇਤ੍ਵਾਤਿ ‘‘ਨ ਮਯਂ ਬੁਦ੍ਧਾ’’ਤਿ ਤੇਸਂ ਅਤ੍ਤਨੋ ਪੁਰਤੋ ਪਵਤ੍ਤਿਤਂ ਪਟਿਞ੍ਞਂ ਗਹੇਤ੍ਵਾ. ਈਦਿਸੇ ਠਾਨੇ ਕਿਂ-ਸਦ੍ਦੋ ਪਟਿਸੇਧਵਾਚਕੋ ਹੋਤੀਤਿ ਵੁਤ੍ਤਂ ‘‘ਕਿਨ੍ਤਿ ਪਟਿਕ੍ਖੇਪਵਚਨ’’ਨ੍ਤਿ, ਕਸ੍ਮਾ ਪਟਿਜਾਨਾਤੀਤਿ ਅਤ੍ਥੋ?

ਨ ਉਞ੍ਞਾਤਬ੍ਬਾਤਿ ਨ ਗਰਹਿਤਬ੍ਬਾ. ਗਰਹਤ੍ਥੋ ਹਿ ਅਯਂ ਉ-ਸਦ੍ਦੋ. ‘‘ਦਹਰੋ’’ਤਿ ਅਧਿਕਤਤ੍ਤਾ ਵਕ੍ਖਮਾਨਤ੍ਤਾ ਚ ‘‘ਖਤ੍ਤਿਯੋਤਿ ਰਾਜਕੁਮਾਰੋ’’ਤਿ ਵੁਤ੍ਤਂ. ਉਰਸਾ ਗਚ੍ਛਤੀਤਿ ਉਰਗੋ, ਯੋ ਕੋਚਿ ਸਪ੍ਪੋ, ਇਧ ਪਨ ਅਧਿਪ੍ਪੇਤਂ ਦਸ੍ਸੇਤੁਂ ‘‘ਆਸੀਵਿਸੋ’’ਤਿ ਆਹ. ਸੀਲਵਨ੍ਤਂ ਪਬ੍ਬਜਿਤਂ ਦਸ੍ਸੇਤਿ ਸਾਮਞ੍ਞਤੋ ‘‘ਭਿਕ੍ਖੂ’’ਤਿ ਵਦਨ੍ਤੋ. ਇਧ ਪਨ ਯਸ੍ਮਾ ‘‘ਭਵਮ੍ਪਿ ਨੋ ਗੋਤਮੋ’’ਤਿਆਦਿਨਾ ਭਗਵਨ੍ਤਂ ਉਦ੍ਦਿਸ੍ਸ ਕਥਂ ਸਮੁਟ੍ਠਾਪੇਸਿ, ਤਸ੍ਮਾ ਭਗਵਾ ਅਤ੍ਤਾਨਂ ਅਬ੍ਭਨ੍ਤਰਂ ਅਕਾਸਿ. ਯਦਿਪਿ ਵਿਸੇਸੋ ਸਾਮਞ੍ਞਜੋਤਨਾਯ ਵਿਭਾਵਿਤੋ ਹੋਤਿ, ਸਂਸਯੁਪ੍ਪਤ੍ਤਿਦੀਪਕਂ ਨੋਤਿ ਵੁਤ੍ਤਗ੍ਗਹਣਂ ਪਨ ਤਂ ਪਰਿਚ੍ਛਿਜ੍ਜਤੀਤਿ. ਤੇਨਾਹ ‘‘ਦੇਸਨਾਕੁਸਲਤਾਯਾ’’ਤਿਆਦਿ. ਇਦਾਨਿ ਅਵਞ੍ਞਾਪਰਿਭਵੇ ਪਯੋਗਤੋ ਵਿਭਾਵੇਤੁਂ ‘‘ਏਤ੍ਥ ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਚਿਤ੍ਤੀਕਤਾਕਾਰਵਸੇਨ ਅਵਞ੍ਞਾਯ ਪਾਕਟਭਾਵੋ, ਵਮ੍ਭਨਵਸੇਨ ਪਰਿਭਵਸ੍ਸਾਤਿ ਅਧਿਪ੍ਪਾਯੇਨ ਕਾਯਪਯੋਗਵਸੇਨ ਅਵਞ੍ਞਾ ਦਸ੍ਸਿਤਾ, ਵਚੀਪਯੋਗਵਸੇਨ ਪਰਿਭਵੋ, ਉਭਯਂ ਪਨ ਉਭਯਤ੍ਥਾਪਿ ਪਭੇਦਤੋ ਗਹਿਤਂ, ਅਵਞ੍ਞਪਰਿਭਵਾਨਂ ਦ੍ਵਿਨ੍ਨਮ੍ਪਿ ਉਭਯਤ੍ਥ ਪਰਿਗ੍ਗਹੋ. ਤਂ ਸਬ੍ਬਮ੍ਪੀਤਿ ਤਂ ਅਵਞ੍ਞਾਦਿ ਸਬ੍ਬਮ੍ਪਿ. ਚਤੂਸੁਪਿ ਤਂ ਨ ਕਾਤਬ੍ਬਮੇਵ ਸਮ੍ਪਤਿ ਆਯਤਿਞ੍ਚ ਅਨਤ੍ਥਾਵਹਤ੍ਤਾ.

ਤਦਤ੍ਥਦੀਪਨਾਤਿ ਤਸ੍ਸ ਆਦਿਤੋ ਵੁਤ੍ਤਸ੍ਸ ਅਤ੍ਥਸ੍ਸ ਦੀਪਨਾ. ਵਿਸੇਸਤ੍ਥਦੀਪਨਾਤਿ ਤਤੋ ਵਿਸਿਟ੍ਠਤ੍ਥਦੀਪਨਾ. ਖੇਤ੍ਤਾਨਂ ਅਧਿਪਤੀਤਿ ਖਤ੍ਤਿਯੋਤਿ ਨਿਰੁਤ੍ਤਿਨਯੇਨ ਸਦ੍ਦਸਿਦ੍ਧਿ ਵੇਦਿਤਬ੍ਬਾ. ਖੇਤ੍ਤਤੋ ਵਿਵਾਦਾ ਸਤ੍ਤੇ ਤਾਯਤੀਤਿ ਖਤ੍ਤਿਯੋਤਿ ਲੋਕਿਯਾ ਕਥਯਨ੍ਤਿ. ‘‘ਮਹਾਸਮ੍ਮਤੋ, ਖਤ੍ਤਿਯੋ, ਰਾਜਾ’’ਤਿ ਏਵਮਾਗਤੇਸੁ ਇਮੇਸੁ ਦੁਤਿਯਂ. ਅਕ੍ਖਰਨ੍ਤਿ ਸਮਞ੍ਞਾ. ਸਾ ਹਿ ਉਦਯਬ੍ਬਯਾਭਾਵਤੋ ‘‘ਨ ਕਦਾਚਿ ਖਰਤੀਤਿ ਅਕ੍ਖਰ’’ਨ੍ਤਿ ਵੁਤ੍ਤਾ. ਤੇਨਾਹ ‘‘ਨਾਮਗੋਤ੍ਤਂ ਨ ਜੀਰਤੀ’’ਤਿ. ਜਾਤਿਸਮ੍ਪਨ੍ਨਨ੍ਤਿ ਸਮ੍ਪਨ੍ਨਜਾਤਿਂ ਅਤਿਵਿਸੁਦ੍ਧਜਾਤਿਂ. ਤੀਣਿ ਕੁਲਾਨੀਤਿ ਬ੍ਰਾਹ੍ਮਣਵੇਸ੍ਸਸੁਦ੍ਦਕੁਲਾਨਿ. ਅਤਿਕ੍ਕਮਿਤ੍ਵਾਤਿ ਅਤ੍ਤਨੋ ਜਾਤਿਸਮ੍ਪਤ੍ਤਿਯਾ ਅਭਿਭਵਿਤ੍ਵਾ.

ਕੇਵਲਂ ਨਾਮਪਦਂ ਵੁਤ੍ਤਂ ਆਖ੍ਯਾਤਪਦਂ ਅਪੇਕ੍ਖਤੇਵਾਤਿ ਆਹ ‘‘ਠਾਨਂ ਹੀਤਿ ਕਾਰਣਂ ਵਿਜ੍ਜਤੀ’’ਤਿ. ਉਦ੍ਧਟਦਣ੍ਡੇਨਾਤਿ ਸਮਨ੍ਤਤੋ ਉਬ੍ਭਤੇਨ ਦਣ੍ਡੇਨ ਸਾਸਨੇਨ, ਬਲਵਂ ਉਪਕ੍ਕਮਂ ਗਰੁਕਂ ਰਾਜਾਨਮ੍ਪਿ. ਤਂ ਖਤ੍ਤਿਯਂ ਪਰਿਵਜ੍ਜੇਯ੍ਯਾਤਿ ਖਤ੍ਤਿਯਂ ਅਵਞ੍ਞਾਪਰਿਭਵਕਰਣਤੋ ਵਜ੍ਜੇਯ੍ਯ. ਤੇਨਾਹ ‘‘ਨ ਘਟ੍ਟੇਯ੍ਯਾ’’ਤਿ.

ਉਰਗਸ੍ਸ ਚ ਨਾਨਾਵਿਧਵਣ੍ਣਗ੍ਗਹਣੇ ਕਾਰਣਂ ਵਦਤਿ ‘‘ਯੇਨ ਯੇਨ ਹੀ’’ਤਿਆਦਿਨਾ. ਬਹੁਭਕ੍ਖਨ੍ਤਿ ਮਹਾਭਕ੍ਖਂ ਸਬ੍ਬਭਕ੍ਖਖਾਦਕਂ. ਪਾਵਕਂ ਸੋਧਨਤ੍ਥੇਨ ਅਸੁਦ੍ਧਸ੍ਸਪਿ ਦਹਨੇਨ. ਸੋਤਿ ਮਗ੍ਗੋ. ਕਣ੍ਹੋ ਵਤ੍ਤਨੀ ਇਮਸ੍ਸਾਤਿ ਕਣ੍ਹਵਤ੍ਤਨੀ. ਮਹਨ੍ਤੋ ਅਗ੍ਗਿਕ੍ਖਨ੍ਧੋ ਹੁਤ੍ਵਾ. ਯਾਵਬ੍ਰਹ੍ਮਲੋਕਪ੍ਪਮਾਣੋਤਿ ਕਪ੍ਪਵੁਟ੍ਠਾਨਕਾਲੇ ਅਰਞ੍ਞੇ ਅਗ੍ਗਿਨਾ ਗਹਿਤੇ ਕਾਲਨ੍ਤਰੇ ਏਵ ਕਟ੍ਠਤਿਣਰੁਕ੍ਖਾਦਿਸਮ੍ਭਵੋਤਿ ਦਸ੍ਸੇਤੁਂ ‘‘ਜਾਯਨ੍ਤਿ ਤਤ੍ਥ ਪਾਰੋਹਾ’’ਤਿ ਪਾਲ਼ਿਯਂ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ.

ਡਹਿਤੁਂ ਨ ਸਕ੍ਕੋਤਿ ਪਚ੍ਚਕ੍ਕੋਸਨਾਦਿਨਾ. ਵਿਨਸ੍ਸਨ੍ਤਿ ਸਮਣਤੇਜਸਾ ਵਿਨਾਸਿਤਤ੍ਤਾ. ‘‘ਨ ਤਸ੍ਸਾ’’ਤਿ ਏਤ੍ਥ ਨ-ਕਾਰਂ ‘‘ਵਿਨ੍ਦਰੇ’’ਤਿ ਏਤ੍ਥ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਨ ਵਿਨ੍ਦਨ੍ਤੀ’’ਤਿ. ਵਤ੍ਥੁਮਤ੍ਤਾਵਸਿਟ੍ਠੋਤਿ ਠਾਨਮੇਵ ਨੇਸਂ ਅਵਸਿਸ੍ਸਤਿ, ਸਯਂ ਪਨ ਸਬ੍ਬਸੋ ਸਹ ਧਨੇਨ ਵਿਨਸ੍ਸਨ੍ਤੀਤਿ ਅਤ੍ਥੋ.

‘‘ਸਮ੍ਮਦੇਵ ਸਮਾਚਰੇ’’ਤਿ ਏਤ੍ਥ ਯਥਾ ਰਾਜਾਦੀਸੁ ਸਮ੍ਮਾ ਸਮਾਚਰੇਯ੍ਯ, ਤਂ ਵਿਭਾਗੇਨ ਦਸ੍ਸੇਨ੍ਤੋ ‘‘ਖਤ੍ਤਿਯਂ ਤਾਵਾ’’ਤਿਆਦਿਮਾਹ. ਤਂ ਸੁਵਿਞ੍ਞੇਯ੍ਯਮੇਵ. ਤਿਸ੍ਸੋ ਕੁਲਸਮ੍ਪਤ੍ਤਿਯੋਤਿ ਖਤ੍ਤਿਯ-ਬ੍ਰਾਹ੍ਮਣਗਹਪਤਿ-ਮਹਾਸਾਲਕੁਲਾਨਿ ਵਦਤਿ. ਪਞ੍ਚ ਰੂਪਿਬ੍ਰਹ੍ਮਲੋਕੇ, ਚਤ੍ਤਾਰੋ ਅਰੂਪੀਬ੍ਰਹ੍ਮਲੋਕੇਤਿ ਏਵਂ ਨਵ ਬ੍ਰਹ੍ਮਲੋਕੇ ਕਮ੍ਮਭਵਵਿਭਾਗੇਨ, ਸੇਸਾਨਂ ਗਣਨਾਨਂ ਉਪਪਤ੍ਤਿਭਵਵਿਭਾਗੇਨ.

ਅਭਿਕ੍ਕਨ੍ਤਨ੍ਤਿ ਅਤਿਵਿਯ ਕਮਨੀਯਂ. ਸਾ ਪਨਸ੍ਸਾ ਕਨ੍ਤਤਾ ਅਤਿਵਿਯ ਇਟ੍ਠਤਾਯ ਮਨਵਡ੍ਢਨਤਾਯ ਸੋਭਨਤਾਯਾਤਿ ਆਹ ‘‘ਅਤਿਇਟ੍ਠਂ ਅਤਿਮਨਾਪਂ ਅਤਿਸੁਨ੍ਦਰਨ੍ਤਿ ਅਤ੍ਥੋ’’ਤਿ. ‘‘ਅਭਿਕ੍ਕਨ੍ਤ’’ਨ੍ਤਿ ਵਚਨਂ ਅਪੇਕ੍ਖਿਤ੍ਵਾ ਨਪੁਂਸਕਨਿਦ੍ਦੇਸੋ, ਵਚਨਂ ਪਨ ਭਗਵਤੋ ਧਮ੍ਮਦੇਸਨਾਤਿ ਤਥਾ ਵੁਤ੍ਤਂ. ਅਤ੍ਥਮਤ੍ਤਦਸ੍ਸਨਂ ਵਾ ਏਤਂ, ਤਸ੍ਮਾ ਅਤ੍ਥਵਸੇਨ ਲਿਙ੍ਗਵਿਭਤ੍ਤਿਵਿਪਰਿਣਾਮੋ ਵੇਦਿਤਬ੍ਬੋ. ਦੁਤਿਯਪਦੇਪਿ ਏਸੇਵ ਨਯੋ.

ਅਧੋਮੁਖਠਪਿਤਨ੍ਤਿ ਕੇਨਚਿ ਅਧੋਮੁਖਂ ਠਪਿਤਂ. ਹੇਟ੍ਠਾਮੁਖਜਾਤਨ੍ਤਿ ਸਭਾਵੇਨੇਵ ਹੇਟ੍ਠਾਮੁਖਂ ਜਾਤਂ. ਉਗ੍ਘਾਟੇਯ੍ਯਾਤਿ ਵਿਵਟਂ ਕਰੇਯ੍ਯ. ਹਤ੍ਥੇ ਗਹੇਤ੍ਵਾਤਿ ‘‘ਪੁਰਤ੍ਥਾਭਿਮੁਖੋ ਉਤ੍ਤਰਾਭਿਮੁਖੋ ਵਾ ਗਚ੍ਛਾ’’ਤਿਆਦੀਨਿ ਅਵਤ੍ਵਾ ਹਤ੍ਥੇ ਗਹੇਤ੍ਵਾ ਨਿਸ੍ਸਨ੍ਦੇਹਂ ਕਤ੍ਵਾ ‘‘ਏਸ ਮਗ੍ਗੋ’’ਤਿ ਏਵਂ ਵਤ੍ਵਾ ‘‘ਗਚ੍ਛਾ’’ਤਿ ਵਦੇਯ੍ਯ. ਕਾਲ਼ਪਕ੍ਖਚਾਤੁਦ੍ਦਸੀਤਿ ਕਾਲ਼ਪਕ੍ਖੇ ਚਾਤੁਦ੍ਦਸੀ. ਨਿਕ੍ਕੁਜ੍ਜਿਤਂ ਉਕ੍ਕੁਜ੍ਜੇਯ੍ਯਾਤਿ ਆਧੇਯ੍ਯਸ੍ਸ ਅਨਾਧਾਰਭੂਤਂ ਭਾਜਨਂ ਤਸ੍ਸ ਆਧਾਰਭਾਵਾਪਾਦਨਵਸੇਨ ਉਕ੍ਕੁਜ੍ਜੇਯ੍ਯ. ਅਞ੍ਞਾਣਸ੍ਸ ਅਭਿਮੁਖਤ੍ਤਾ ਹੇਟ੍ਠਾਮੁਖਜਾਤਤਾਯ ਸਦ੍ਧਮ੍ਮਵਿਮੁਖਂ, ਤਤੋ ਏਵ ਅਧੋਮੁਖਭਾਵੇਨ ਅਸਦ੍ਧਮ੍ਮੇ ਪਤਿਤਨ੍ਤਿ ਏਵਂ ਪਦਦ੍ਵਯਂ ਯਥਾਰਹਂ ਯੋਜੇਤਬ੍ਬਂ, ਨ ਯਥਾਸਙ੍ਖਯਂ. ਕਾਮਂ ਕਾਮਚ੍ਛਨ੍ਦਾਦਯੋਪਿ ਪਟਿਚ੍ਛਾਦਕਾ, ਮਿਚ੍ਛਾਦਿਟ੍ਠਿ ਪਨ ਸਵਿਸੇਸਂ ਪਟਿਚ੍ਛਾਦਿਕਾਤਿ ਆਹ ‘‘ਮਿਚ੍ਛਾਦਿਟ੍ਠਿਗਹਨਪਟਿਚ੍ਛਨ੍ਨ’’ਨ੍ਤਿ. ਤੇਨਾਹ ਭਗਵਾ – ‘‘ਮਿਚ੍ਛਾਦਿਟ੍ਠਿਪਰਮਾਹਂ, ਭਿਕ੍ਖਵੇ, ਵਜ੍ਜਂ ਵਦਾਮੀ’’ਤਿ (ਅ. ਨਿ. ੧.੩੧੦). ਸਬ੍ਬਾਪਾਯਗਾਮਿਮਗ੍ਗੋ ਕੁਮ੍ਮਗ੍ਗੋ ‘‘ਕੁਚ੍ਛਿਤੋ ਮਗ੍ਗੋ’’ਤਿ ਕਤ੍ਵਾ. ਸਮ੍ਮਾਦਿਟ੍ਠਿਆਦੀਨਂ ਉਜੁਪਟਿਪਕ੍ਖਤਾਯ ਮਿਚ੍ਛਾਦਿਟ੍ਠਿਆਦਯੋ ਅਟ੍ਠ ਮਿਚ੍ਛਤ੍ਤਧਮ੍ਮਾ ਮਿਚ੍ਛਾਮਗ੍ਗੋ. ਤੇਨੇਵ ਹਿ ਤਦੁਭਯਪਟਿਪਕ੍ਖਤਂ ਸਨ੍ਧਾਯ ‘‘ਸਗ੍ਗਮੋਕ੍ਖਮਗ੍ਗਂ ਆਵਿਕਰੋਨ੍ਤੇਨਾ’’ਤਿ ਵੁਤ੍ਤਂ. ਸਪ੍ਪਿਆਦਿਸਨ੍ਨਿਸ੍ਸਯੋ ਪਦੀਪੋ ਨ ਤਥਾ ਉਜ੍ਜਲੋ, ਯਥਾ ਤੇਲਸਨ੍ਨਿਸ੍ਸਯੋਤਿ ਤੇਲਪਜ੍ਜੋਤਗ੍ਗਹਣਂ. ਏਤੇਹਿ ਪਰਿਯਾਯੇਹੀਤਿ ਏਤੇਹਿ ਨਿਕ੍ਕੁਜ੍ਜਿਤੁਕ੍ਕੁਜ੍ਜਨਪਟਿਚ੍ਛਨ੍ਨਵਿਵਰਣਾਦਿਉਪਮੋਪਮਿਤਬ੍ਬਪ੍ਪਕਾਰੇਹਿ.

ਪਸਨ੍ਨਾਕਾਰਨ੍ਤਿ ਪਸਨ੍ਨੇਹਿ ਕਾਤਬ੍ਬਂ ਸਕ੍ਕਾਰਂ. ਸਰਣਨ੍ਤਿ ਪਟਿਸਰਣਂ ਪਰਾਯਣਂ. ਅਜ੍ਜਤਾਤਿ ਅਜ੍ਜਾਤਿ ਪਦਸ੍ਸ ਵਡ੍ਢਨਮਤ੍ਤਂ ਹੇਤ੍ਥ ਤਾ-ਸਦ੍ਦੋ ਯਥਾ ‘‘ਦੇਵਤਾ’’ਤਿ. ਪਾਣੇਹਿ ਉਪੇਤਨ੍ਤਿ ਪਾਣੇਹਿ ਸਹ ਸਰਣਂ ਉਪੇਤਂ. ‘‘ਯਾਵ ਮੇ ਪਾਣਾ ਧਰਨ੍ਤਿ, ਤਾਵ ਸਰਣਂ ਗਤਮੇਵ ਮਂ ਧਾਰੇਤੂ’’ਤਿ ਆਪਾਣਕੋਟਿਕਂ ਅਤ੍ਤਨੋ ਸਰਣਗਮਨਂ ਪਵੇਦੇਤਿ. ਤੇਨਾਹ ‘‘ਯਾਵ ਮੇ’’ਤਿਆਦਿ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਦਹਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪੁਰਿਸਸੁਤ੍ਤਵਣ੍ਣਨਾ

੧੧੩. ਪੁਰਿਮਸੁਤ੍ਤੇਤਿ ਪੁਰਿਮਸੁਤ੍ਤਦੇਸਨਾਯਂ. ਤਤ੍ਥ ਹਿ ਉਪਸਙ੍ਕਮਨ੍ਤਵੇਲਾਯ ਸਤ੍ਥੁ ਗੁਣੇ ਅਜਾਨਨ੍ਤੋ ਕੇਵਲਂ ਸਮ੍ਮੋਦਨਂ ਕਰੋਤਿ. ਦੇਸਨਂ ਸੁਤ੍ਵਾ ਪਨ ਸਤ੍ਥੁ ਗੁਣੇ ਞਤ੍ਵਾ ਸਰਣਙ੍ਗਤਤ੍ਤਾ ਇਧ ਇਮਸ੍ਮਿਂ ਸਮਾਗਮੇ ਅਭਿਵਾਦੇਸਿ ਪਞ੍ਚਪਤਿਟ੍ਠਿਤੇਨ ਵਨ੍ਦਿ. ਅਤ੍ਤਾਨਂ ਅਧਿ ਅਜ੍ਝਤ੍ਤਂ, ਅਵਿਜਹੇਨ ਅਤ੍ਤਾਨਂ ਅਧਿਕਿਚ੍ਚ ਉਦ੍ਦਿਸ੍ਸ ਪਵਤ੍ਤਧਮ੍ਮਾ ਅਜ੍ਝਤ੍ਤਂ ਏਕਜ੍ਝਂ ਗਹਣਵਸੇਨ, ਭੁਮ੍ਮਤ੍ਥੇ ਚੇਤਂ ਪਚ੍ਚਤ੍ਤਵਚਨਂ. ਕਾਮਞ੍ਚਾਯਂ ਅਜ੍ਝਤ੍ਤਸਦ੍ਦੋ ਗੋਚਰਜ੍ਝਤ੍ਤਵਿਸਯਜ੍ਝਤ੍ਤਅਜ੍ਝਤ੍ਤਜ੍ਝਤ੍ਤੇਸੁ ਪਵਤ੍ਤਤਿ. ਤੇ ਪਨੇਤ੍ਥ ਨ ਯੁਜ੍ਜਨ੍ਤੀਤਿ ਵੁਤ੍ਤਂ ‘‘ਨਿਯਕਜ੍ਝਤ੍ਤ’’ਨ੍ਤਿ, ਨਿਯਕਸਙ੍ਖਾਤਅਜ੍ਝਤ੍ਤਧਮ੍ਮੇਸੂਤਿ ਅਤ੍ਥੋ. ਤੇਨਾਹ ‘‘ਅਤ੍ਤਨੋ ਸਨ੍ਤਾਨੇ’’ਤਿ. ਲੁਬ੍ਭਨਲਕ੍ਖਣੋਤਿ ਗਿਜ੍ਝਨਲਕ੍ਖਣੋ, ਆਰਮ੍ਮਣੇ ਦਲ਼੍ਹਗ੍ਗਹਣਸਭਾਵੋਤਿ ਅਤ੍ਥੋ. ਦੁਸ੍ਸਨਲਕ੍ਖਣੋਤਿ ਕੁਜ੍ਝਨਲਕ੍ਖਣੋ, ਬ੍ਯਾਪਜ੍ਜਨਸਭਾਵੋਤਿ ਅਤ੍ਥੋ. ਮੁਯ੍ਹਨਲਕ੍ਖਣੋਤਿ ਅਞ੍ਞਾਣਲਕ੍ਖਣੋ, ਆਰਮ੍ਮਣੇ ਸਭਾਵਸਮ੍ਮੋਹਭਾਵੋਤਿ ਅਤ੍ਥੋ. ਵਿਹੇਠੇਨ੍ਤੀਤਿ ਅਤ੍ਥਨਾਸਨਅਨਤ੍ਥੁਪ੍ਪਾਦਨੇਹਿ ਵਿਬਾਧੇਨ੍ਤਿ. ਤਤੋ ਏਵ ਯਥਾ ਸਗ੍ਗਮਗ੍ਗੇਸੁ ਨ ਦਿਸ੍ਸਤਿ, ਏਵਂ ਕਰੋਨ੍ਤੀਤਿ ਆਹ ‘‘ਨਾਸੇਨ੍ਤਿ ਵਿਨਾਸੇਨ੍ਤੀ’’ਤਿ. ਅਤ੍ਤਨਿ ਸਮ੍ਭੂਤਾਤਿ ਸਨ੍ਤਾਨੇ ਨਿਬ੍ਬਤ੍ਤਾ.

ਪੁਰਿਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਜਰਾਮਰਣਸੁਤ੍ਤਵਣ੍ਣਨਾ

੧੧੪. ਅਞ੍ਞਤ੍ਰ ਜਰਾਮਰਣਾਤਿ ਜਰਾਮਰਣੇਨ ਵਿਨਾ. ਜਰਾਮਰਣਵਿਰਹਿਤੋ ਜਾਤੋ ਨਾਮ ਅਤ੍ਥਿ ਨੁ ਖੋਤਿ ਪੁਚ੍ਛਤਿ. ਪਾਲ਼ਿਯਂ ਜਾਤਸ੍ਸਾਤਿ ਪਚ੍ਚਤ੍ਤੇ ਸਾਮਿਵਚਨਂ. ਮਹਾਸਾਲਾਤਿ ਇਮਿਨਾ ਰ-ਕਾਰਸ੍ਸ ਲ-ਕਾਰਂ ਕਤ੍ਵਾ ‘‘ਮਹਾਸਾਲਾ’’ਤਿ ਵੁਤ੍ਤਨ੍ਤਿ ਦਸ੍ਸੇਤਿ ਯਥਾ ‘‘ਪੁਰਤ੍ਥਿਯੋਤਿ ਪੁਲਤ੍ਥਿਯੋ’’ਤਿ. ਮਹਾਸਾਰਪ੍ਪਤ੍ਤਾਤਿ ਮਹਨ੍ਤਂ ਵਿਭਵਸਾਰਂ ਪਤ੍ਤਾ. ਕੋਟਿਸਤਂ ਧਨਂ, ਅਯਮੇਵ ਵਾ ਪਾਠੋ. ‘‘ਕੁਮ੍ਭਂ ਨਾਮ ਦਸ ਅਮ੍ਬਣਾਨੀ’’ਤਿ ਵਦਨ੍ਤਿ. ਇਸ੍ਸਰਾਤਿ ਵਿਭਵਿਸ੍ਸਰਿਯੇਨ ਇਸ੍ਸਰਾ. ਸੁਵਣ੍ਣਰਜਤਭਾਜਨਾਦੀਨਨ੍ਤਿ ਆਦਿ-ਸਦ੍ਦੇਨ ਵਤ੍ਥਸੇਯ੍ਯਾਵਸਥਾਦਿਂ ਸਙ੍ਗਣ੍ਹਾਤਿ. ਅਸਾਧਾਰਣਧਨਾਨਂ ਨਿਧਾਨਗਤਤ੍ਤਾ ‘‘ਅਨਿਧਾਨਗਤਸ੍ਸਾ’’ਤਿ ਵੁਤ੍ਤਂ. ਤੁਟ੍ਠਿਕਰਣਸ੍ਸਾਤਿ ਪਾਸਾਦਸਿਵਿਕਾਦਿਸੁਖਸਾਧਨਸ੍ਸ.

ਆਰਕਾ ਕਿਲੇਸੇਹੀਤਿ ਨਿਰੁਤ੍ਤਿਨਯੇਨ ਸਦ੍ਦਸਿਦ੍ਧਿਮਾਹ. ਆਰਕਾਤਿ ਚ ਸਬ੍ਬਸੋ ਸਮੁਚ੍ਛਿਨ੍ਨਤ੍ਤਾ ਤੇਹਿ ਦੂਰੇਤਿ ਅਤ੍ਥੋ. ਰਾਗਾਦੀਨਂ ਹਤਤ੍ਤਾ, ਪਾਪਕਰਣੇ ਰਹਾਭਾਵਤੋ, ਅਨੁਤ੍ਤਰਦਕ੍ਖਿਣੇਯ੍ਯਤਾਦਿਪਚ੍ਚਯਾ ਚ ਅਰਹਂ. ਕਾਮਞ੍ਚਾਯਂ ਸਂਯੁਤ੍ਤਵਣ੍ਣਨਾ, ਅਭਿਧਮ੍ਮਨਯੋ ਏਵ ਪਨ ਨਿਪ੍ਪਰਿਯਾਯੋਤਿ ਆਹ ‘‘ਚਤ੍ਤਾਰੋ ਆਸਵਾ’’ਤਿ ਬ੍ਰਹ੍ਮਚਰਿਯਵਾਸਨ੍ਤਿ ਮਗ੍ਗਬ੍ਰਹ੍ਮਚਰਿਯਵਾਸਂ. ਵੁਟ੍ਠਾਤਿ ਵੁਟ੍ਠਵਨ੍ਤੋ. ਚਤੂਹਿ ਮਗ੍ਗੇਹਿ ਕਰਣੀਯਨ੍ਤਿ ਪਚ੍ਚੇਕਂ ਚਤੂਹਿ ਮਗ੍ਗੇਹਿ ਕਤ੍ਤਬ੍ਬਂ ਪਰਿਞ੍ਞਾਪਹਾਨਸਚ੍ਛਿਕਿਰਿਯਭਾਵਨਾਭਿਸਮਯਂ. ਏਵਂ ਗਤਂ ਸੋਲ਼ਸਵਿਧਂ ਹੋਤਿ. ਓਸੀਦਾਪਨਟ੍ਠੇਨ ਭਾਰਾ ਵਿਯਾਤਿ ਭਾਰਾ. ਤੇਨਾਹ ‘‘ਭਾਰਾ ਹਵੇ ਪਞ੍ਚਕ੍ਖਨ੍ਧਾ’’ਤਿਆਦਿ (ਸਂ. ਨਿ. ੩.੨੨). ਅਤ੍ਤਪਟਿਬਦ੍ਧਤਾਯ ਅਤ੍ਤਨੋ ਅਵਿਜਹਨਤੋ ਪਰਮਤ੍ਥਦੇਸਨਾਯ ਚ ਪਰਮਤ੍ਥੋ ਅਰਹਤ੍ਤਂ. ਕਾਮਞ੍ਚਾਯਮਤ੍ਥੋ ਸਬ੍ਬਸਮਿਦ੍ਧਿਸਸਨ੍ਤਤਿਪਰਿਯਾਪਨ੍ਨੋ ਅਨਵਜ੍ਜਧਮ੍ਮੋ ਸਮ੍ਭਵਤਿ ਅਕੁਪ੍ਪਸਭਾਵਾ, ਅਪਰਿਹਾਨਧਮ੍ਮੇਸੁ ਪਨ ਅਗ੍ਗਭੂਤੇ ਅਰਹਤ੍ਤੇ ਸਾਤਿਸਯੋ, ਨ ਇਤਰੇਸੂਤਿ ‘‘ਅਰਹਤ੍ਤਸਙ੍ਖਾਤੋ’’ਤਿਆਦਿ ਵੁਤ੍ਤਂ. ਓਰਮ੍ਭਾਗਿਯੁਦ੍ਧਮ੍ਭਾਗਿਯਵਿਭਾਗਂ ਦਸਵਿਧਮ੍ਪਿ ਭਵੇਸੁ ਸਂਯੋਜਨਂ ਕਿਲੇਸਕਮ੍ਮਵਿਪਾਕਵਟ੍ਟਪਚ੍ਚਯੋ ਹੁਤ੍ਵਾ ਨਿਸ੍ਸਰਿਤੁਂ ਅਪ੍ਪਦਾਨਵਸੇਨ ਬਨ੍ਧਤੀਤਿ ਭਵਸਂਯੋਜਨਂ. ਸਤਿਪਿ ਹਿ ਅਞ੍ਞੇਸਂ ਤਪ੍ਪਕ੍ਖਿਯਭਾਵੇਨ ਵਿਨਾ ਸਂਯੋਜਨਾਨਿ ਤੇਸਂ ਤਪ੍ਪਚ੍ਚਯਭਾਵੋ ਅਤ੍ਥਿ, ਭਵਨਿਯਾਮੋ ਓਰਮ੍ਭਾਗਿਯੁਦ੍ਧਮ੍ਭਾਗਿਯਸਙ੍ਗਹਿਤੋਤਿ ਤਂਤਂਭਵਨਿਬ੍ਬਤ੍ਤਕਕਮ੍ਮਨਿਯਾਮੋ ਚ ਹੋਤਿ, ਨ ਚ ਉਪਚ੍ਛਿਨ੍ਨਸਂਯੋਜਨਸ੍ਸ ਕਤਾਨਿਪਿ ਕਮ੍ਮਾਨਿ ਭਵਂ ਨਿਬ੍ਬਤ੍ਤੇਨ੍ਤੀਤਿ ਤੇਸਂਯੇਵ ਸਂਯੋਜਨਟ੍ਠੋ ਦਟ੍ਠਬ੍ਬੋ. ਸਮ੍ਮਾ ਕਾਰਣੇਹਿ ਜਾਨਿਤ੍ਵਾਤਿ ਞਾਯੇਨ ਦੁਕ੍ਖਾਦੀਸੁ ਸੋ ਯਥਾ ਜਾਨਿਤਬ੍ਬੋ; ਤਥਾ ਜਾਨਿਤ੍ਵਾ, ਪੁਬ੍ਬਕਾਲਕਿਰਿਯਾਵਿਮੁਤ੍ਤਾ ਹਿ ਅਪਰਕਾਲਕਿਰਿਯਾ ਚ ਯਥਾ ਸਮ੍ਭਵਤਿ, ਤਂ ਦਸ੍ਸੇਤੁਂ ‘‘ਮਗ੍ਗਪਞ੍ਞਾਯਾ’’ਤਿਆਦਿ ਵੁਤ੍ਤਂ.

ਭਿਜ੍ਜਨਸਭਾਵੋ ਖਣਾਯਤ੍ਤਤ੍ਤਾ. ਨਿਕ੍ਖਿਪਿਤਬ੍ਬਸਭਾਵੋ ਮਰਣਧਮ੍ਮਤ੍ਤਾ. ਅਯਂ ਕਾਯੋ ਉਸ੍ਮਾਯੁਵਿਞ੍ਞਾਣਾਪਗਮੋ ਛਡ੍ਡਨੀਯਧਮ੍ਮੋ, ਯਸ੍ਮਿਂ ਯਂ ਪਤਿਟ੍ਠਿਤਂ, ਤਂ ਤਸ੍ਸ ਸਨ੍ਤਾਨਗਤਵਿਪ੍ਪਯੁਤ੍ਤਨ੍ਤਿ ਕਤ੍ਵਾ ਵਤ੍ਤਬ੍ਬਤਂ ਅਰਹਤੀਤਿ ਆਹ ‘‘ਖੀਣਾਸਵਸ੍ਸ ਹਿ ਅਜੀਰਣਧਮ੍ਮੋਪਿ ਅਤ੍ਥੀ’’ਤਿਆਦਿ. ਤੇਨਾਹ ਭਗਵਾ ‘‘ਇਮਸ੍ਮਿਂਯੇਵ ਬ੍ਯਾਮਮਤ੍ਤੇ ਕਲ਼ੇਵਰੇ ਸਸਞ੍ਞਿਮ੍ਹਿ ਸਮਨਕੇ ਲੋਕਞ੍ਚ ਪਞ੍ਞਪੇਮਿ ਲੋਕਸਮੁਦਯਞ੍ਚ ਲੋਕਨਿਰੋਧਞ੍ਚਾ’’ਤਿਆਦਿ (ਸਂ. ਨਿ. ੧.੧੦੭; ਅ. ਨਿ. ੪.੪੫). ਅਸ੍ਸ ਖੀਣਾਸਵਸ੍ਸ, ‘‘ਜੀਰਣਧਮ੍ਮ’’ਨ੍ਤਿ ਯਥਾਵੁਤ੍ਤਂ ਅਜੀਰਣਧਮ੍ਮਂ ਠਪੇਤ੍ਵਾ ਜੀਰਣਧਮ੍ਮਂ ਦਸ੍ਸੇਨ੍ਤੋ ‘‘ਤੇਸਂਪਾਯਂ ਕਾਯੋ ਭੇਦਨਧਮ੍ਮੋ’’ਤਿ ਏਵਮਾਹ. ਜਰਂ ਪਤ੍ਤਸ੍ਸੇਵ ਹਿਸ੍ਸ ਭੇਦਨਨਿਕ੍ਖਿਪਿਤਬ੍ਬਤਾਨਿਯਤੇ ਅਤ੍ਥੇ ਸੁਤ੍ਤਦੇਸਨਾ ਪਵਤ੍ਤਾ. ਅਤ੍ਥਸ੍ਸ ਉਪ੍ਪਤ੍ਤਿ ਅਟ੍ਠੁਪ੍ਪਤ੍ਤਿ, ਸਾ ਏਤਸ੍ਸ ਅਤ੍ਥੀਤਿ ਅਟ੍ਠੁਪ੍ਪਤ੍ਤਿਕੋ. ਕਿਰ-ਸਦ੍ਦੋ ਅਨੁਸ੍ਸਵਤ੍ਥੋ, ਤੇਨ ਅਨੁਸ੍ਸਵਾਗਤੋਯਮਤ੍ਥੋ, ਨ ਅਟ੍ਠਕਥਾਗਤੋਤਿ ਦੀਪੇਤਿ. ਤੇਨਾਹ ‘‘ਵਦਨ੍ਤੀ’’ਤਿ. ਯੇਨਾਯਂ ਅਤ੍ਥੋ ਹੇਤੁਨਾ ਅਟ੍ਠੁਪ੍ਪਤ੍ਤਿਕੋ, ਤਂ ਦਸ੍ਸੇਤੁਂ ‘‘ਸਿਵਿਕਸਾਲਾਯਂ ਨਿਸੀਦਿਤ੍ਵਾ ਕਥਿਤ’’ਨ੍ਤਿ ਵੁਤ੍ਤਂ. ‘‘ਵਿਹਰਤਿ ਜੇਤਵਨੇ’’ਤਿ ਨਿਦਾਨਵਚਨੇਨ ਯਥਾ ਨ ਵਿਰੁਜ੍ਝਤਿ, ਤਥਾ ਵੇਦਿਤਬ੍ਬਂ. ਨਨੁ ਇਮਸ੍ਸ ਸੁਤ੍ਤਸ੍ਸ ਪੁਚ੍ਛਾਵਸਿਕੋ ਨਿਕ੍ਖੇਪੋਤਿ? ਸਚ੍ਚਮੇਤਂ, ਸੁਤ੍ਤੇਕਦੇਸਂ ਪਨ ਸਨ੍ਧਾਯ ਅਟ੍ਠੁਪ੍ਪਤ੍ਤਿਕਤਾਵਚਨਂ. ਕੇਚਿ ਪਨ ‘‘ਯਾਨਂ ਆਰੁਹਿਤ੍ਵਾ ਰਾਜਾ ਆਗਤੋ, ਰਞ੍ਞੋ ਆਰੋਹਨੀਯਰਥਂ ਦਸ੍ਸੇਤ੍ਵਾ ਵੁਤ੍ਤ’’ਨ੍ਤਿਪਿ ਵਦਨ੍ਤਿ.

ਸਰੀਰੇ ਫੇਣਪਿਣ੍ਡਸਮੇ ਕਿਂ ਵਤ੍ਤਬ੍ਬਂ? ਸਬ੍ਭਿ ਸਦ੍ਧਿਨ੍ਤਿ ਸਾਧੂਹਿ ਸਹ ਪਵੇਦਯਨ੍ਤਿ. ਨ ਹਿ ਕਦਾਚਿ ਸਾਧੂਨਂ ਸਾਧੂਹਿ ਸਹ ਕਤ੍ਤਬ੍ਬਾ ਹੋਨ੍ਤਿ, ਤਸ੍ਮਾ ਸੀਦਨਸਭਾਵਾਨਂ ਕਿਲੇਸਾਨਂ ਭਿਜ੍ਜਨਪ੍ਪਤ੍ਤਤ੍ਤਾ ਨਿਬ੍ਬਾਨਂ ਸਬ੍ਭੀਤਿ ਵੁਚ੍ਚਤਿ. ਪੁਰਿਮਪਦਸ੍ਸਾਤਿ ‘‘ਸਤਞ੍ਚ ਧਮ੍ਮੋ ਨ ਜਰਂ ਉਪੇਤੀ’’ਤਿ ਪਦਸ੍ਸ. ਕਾਰਣਂ ਦਸ੍ਸੇਨ੍ਤੋ ਬ੍ਯਤਿਰੇਕਵਸੇਨ. ਸਤਂ ਧਮ੍ਮੋ ਨਿਬ੍ਬਾਨਂ ਕਿਲੇਸੇਹਿ ਸਂਸੀਦਨਭਿਜ੍ਜਨਸਭਾਵੋ ਨ ਹੋਤਿ, ਤਸ੍ਮਾ ਤਂ ਆਗਮ੍ਮ ਜਰਂ ਨ ਉਪੇਤਿ. ਕਿਲੇਸਾ ਪਨ ਤਨ੍ਨਿਮਿਤ੍ਤਕਾ, ਏਵਮਯਂ ਵੁਤ੍ਤਕਾਰਣਤੋ ਜਰਂ ਨ ਉਪੇਤੀਤਿ. ਤੇਨਾਹ ‘‘ਇਦ’’ਨ੍ਤਿਆਦਿ. ਸੁਨ੍ਦਰਾਧਿਵਚਨਂ ਵਾ ਏਤਂ ‘‘ਸਬ੍ਭੀ’’ਤਿ ਪਦਂ ਅਪਾਪਤਾਦੀਪਨਤੋ, ਸਬ੍ਭਿਧਮ੍ਮਭੂਤਨ੍ਤਿ ਅਤ੍ਥੋ. ਤੇਨਾਹ ‘‘ਵਿਰਾਗੋ ਤੇਸਂ ਅਗ੍ਗਮਕ੍ਖਾਯਤਿ (ਇਤਿਵੁ. ੯੦; ਅ. ਨਿ. ੪.੩੪), ਨ ਤੇਨ ਧਮ੍ਮੇਨ ਸਮਤ੍ਥਿ ਕਿਞ੍ਚੀ’’ਤਿ (ਖੁ. ਪਾ. ੬.੪; ਸੁ. ਨਿ. ੨੨੭) ਚ.

ਜਰਾਮਰਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਪਿਯਸੁਤ੍ਤਵਣ੍ਣਨਾ

੧੧੫. ਰਹਸਿ ਗਤਸ੍ਸਾਤਿ ਜਨਸਮ੍ਬਾਧਤੋ ਅਪਕ੍ਕਨ੍ਤਸ੍ਸ. ਨਿਲੀਨਸ੍ਸ ਤੇਨੇਵ ਜਨਵਿਵੇਕੇਨ ਏਕਮਨ੍ਤਂ ਨਿਸਜ੍ਜਾਯ ਏਕੀਭਾਵੇਨ ਪਟਿਸਲ੍ਲੀਨਸ੍ਸ ਵਿਯ. ਤੇਨਾਹ ‘‘ਏਕੀਭੂਤਸ੍ਸਾ’’ਤਿ. ਸਬ੍ਬਞ੍ਞੁਭਾਸਿਤਂ ਕਰੋਨ੍ਤੋ ਆਹ ਤਸ੍ਸ ਵਚਨਂ ‘‘ਏਵਮੇਤ’’ਨ੍ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਵਚਨਂ ਤਥਾਪਚ੍ਚਨੁਭਾਸਨ੍ਤੋ. ਅਨ੍ਤਕੇਨਾਧਿਪਨ੍ਨਤ੍ਤਾ ਏਵ ਖੇਤ੍ਤਵਤ੍ਥੁਹਿਰਞ੍ਞਸੁਵਣ੍ਣਾਦਿ ਮਾਨੁਸਂ ਭਵਂ ਜਹਤੋ. ਅਨੁਗਨ੍ਤਿ ਅਨੁਗਤਂ, ਤਮੇਵ ਅਨੁਗਾਮੀਤਿ ਅਤ੍ਥੋ. ਨਿਚਯਨ੍ਤਿ ਉਪਰੂਪਰਿ ਵਡ੍ਢਿਯਾ ਨਿਚਿਤਭੂਤਂ. ਸਮ੍ਪਰਾਯਿਕਨ੍ਤਿ ਸਮ੍ਪਰਾਯ ਹਿਤਂ.

ਪਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਅਤ੍ਤਰਕ੍ਖਿਤਸੁਤ੍ਤਵਣ੍ਣਨਾ

੧੧੬. ਪੀਦਹਨਨ੍ਤਿ ਸਂਯਮਨਂ. ਕਮ੍ਮਪਥਭੇਦਂ ਅਪ੍ਪਤ੍ਤਸ੍ਸਾਤਿ ਸੁਪਿਨਕਾਲੋ ਵਿਯ ਪਵਤ੍ਤਿਮਤ੍ਤਤਾਯ ਕਮ੍ਮਪਥਵਿਸੇਸਂ ਅਗਤਸ੍ਸ. ਕਮ੍ਮਸ੍ਸਾਤਿ ਅਕੁਸਲਕਮ੍ਮਸ੍ਸ. ਸਂਵਰਨ੍ਤਿ ਸਂਵਰਭਾਵਂ ਦਸ੍ਸੇਤਿ, ਇਤਰਸ੍ਸ ਪਨ ਸਂਵਰਭਾਵੋ ਪੁਰਿਮੇਹਿ ਤੀਹਿ ਪਦੇਹਿ ਦਸ੍ਸਿਤੋਵਾਤਿ. ਓਤ੍ਤਪ੍ਪਮ੍ਪਿ ਗਹਿਤਮੇਵ ਤਦਵਿਨਾਭਾਵਤੋ. ਨ ਹਿ ਪਾਪਜਿਗੁਚ੍ਛਨਂ ਪਾਪਉਤ੍ਰਾਸਰਹਿਤਂ, ਉਤ੍ਰਾਸੋ ਵਾ ਪਾਪਜਿਗੁਚ੍ਛਨਰਹਿਤੋ ਅਤ੍ਥੀਤਿ.

ਅਤ੍ਤਰਕ੍ਖਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਅਪ੍ਪਕਸੁਤ੍ਤਵਣ੍ਣਨਾ

੧੧੭. ਉਲ਼ਾਰਸਦ੍ਦੋ ਸੇਟ੍ਠੇ ਬਹੁਕੇ ਚ ਦਿਸ੍ਸਤੀਤਿ ਆਹ ‘‘ਪਣੀਤੇ ਚ ਬਹੁਕੇ ਚਾ’’ਤਿ. ਮਾਨਮਜ੍ਜਨੇਨਾਤਿ ਮਾਨਵਸੇਨ ਮਦਪ੍ਪਤ੍ਤਿਯਾ. ਅਤਿਕ੍ਕਮਨ੍ਤਿ ਸਾਧੁਮਰਿਯਾਦਵੀਤਿਕ੍ਕਮਲਕ੍ਖਣਂ ਦੋਸਂ. ਕੂਟੋ ਪਾਸੋ.

ਅਪ੍ਪਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਅਡ੍ਡਕਰਣਸੁਤ੍ਤਵਣ੍ਣਨਾ

੧੧੮. ਯਸ੍ਮਾ ਕਾਮਨਿਮਿਤ੍ਤਂ ਸਤ੍ਤੋ ਸਮ੍ਪਜਾਨਮੁਸਾ ਭਾਸਤਿ, ਤਸ੍ਮਾ ਕਾਮਾ ਤਸ੍ਸ ਪਤਿਟ੍ਠਾ ਪਚ੍ਚਯੋ ਕਾਰਣਨ੍ਤਿ ਆਹ ‘‘ਕਾਮਹੇਤੂ’’ਤਿਆਦਿ. ਭਦ੍ਰਮੁਖਸੀਸੇਨ ਵਿਟਟੁਭਂ ਭਦ੍ਰੋਪਚਾਰੇਨ ਉਪਚਰਤੀਤਿ ਅਤ੍ਥੋ, ਵਿਨਿਚ੍ਛਯੋ ਕਰੀਯਤਿ ਏਤ੍ਥਾਤਿ ਅਡ੍ਡਕਰਣਂ, ਵਿਨਿਚ੍ਛਯਟ੍ਠਾਨਂ. ਖਿਪ੍ਪਨ੍ਤਿ ਕੂਟਂ, ਮਚ੍ਛਖਿਪ੍ਪਨ੍ਤਿਪਿ ਵਟ੍ਟਤਿ. ਓਡ੍ਡਿਤਨ੍ਤਿ ਓਡ੍ਡਨਵਸੇਨ ਫਲਂ ਪਾਪਿਤਂ.

ਅਡ੍ਡਕਰਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਮਲ੍ਲਿਕਾਸੁਤ੍ਤਵਣ੍ਣਨਾ

੧੧੯. ‘‘ਕਸ੍ਮਾ ਪੁਚ੍ਛਤੀ’’ਤਿ? ਪੁਚ੍ਛਾਕਾਰਣਂ ਚੋਦੇਤ੍ਵਾ ਸਮੁਦਯਤੋ ਪਟ੍ਠਾਯ ਦਸ੍ਸੇਤੁਂ ‘‘ਅਯਂ ਕਿਰ ਮਲ੍ਲਿਕਾ’’ਤਿਆਦਿ ਵੁਤ੍ਤਂ. ਮਾਲਾਰਾਮਂ ਗਨ੍ਤ੍ਵਾਤਿ ਅਤ੍ਤਨੋ ਪਿਤੁ ਮਾਲਾਰਾਮਂ ਰਕ੍ਖਣਤ੍ਥਞ੍ਚੇਵ ਅਵਸੇਸਪੁਪ੍ਫਗ੍ਗਹਣਤ੍ਥਞ੍ਚ ਗਨ੍ਤ੍ਵਾ. ਕਾਸਿਗਾਮੇਤਿ ਕਾਸਿਰਟ੍ਠਸ੍ਸ ਗਾਮੇ. ਸੋ ਕਿਰ ਗਾਮੋ ਮਹਾਕੋਸਲਰਾਜੇਨ ਅਤ੍ਤਨੋ ਧੀਤੁਯਾ ਪਤਿਘਰਂ ਗਚ੍ਛਨ੍ਤਿਯਾ ਪੁਪ੍ਫਮੂਲਤ੍ਥਾਯ ਦਿਨ੍ਨੋ, ਤਂਨਿਮਿਤ੍ਤਂ. ਭਾਗਿਨੇਯ੍ਯੇਨ ਅਜਾਤਸਤ੍ਤੁਨਾ. ਤਸ੍ਸਾਤਿ ਰਞ੍ਞੋ ਪਸੇਨਦਿਸ੍ਸ. ਸਾਤਿ ਮਲ੍ਲਿਕਾ. ਨਿਵਤ੍ਤਿਤੁਨ੍ਤਿ ਤਸ੍ਸਾ ਧਮ੍ਮਤਾਯ ਨਿਵਤ੍ਤਿਤੁਂ ਤਸ੍ਸਾ ਵਚਨਂ ਪਟਿਕ੍ਖਿਪਿਤੁਂ. ਨੇਵਜ੍ਝਗਾਤਿ ਵਤ੍ਤਮਾਨਤ੍ਥੇ ਅਤੀਤਵਚਨਨ੍ਤਿ ਆਹ ‘‘ਨਾਧਿਗਚ੍ਛਤੀ’’ਤਿ. ਪੁਥੁ ਅਤ੍ਤਾਤਿ ਤੇਸਂ ਸਤ੍ਤਾਨਂ ਅਤ੍ਤਾ.

ਮਲ੍ਲਿਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਯਞ੍ਞਸੁਤ੍ਤਵਣ੍ਣਨਾ

੧੨੦. ਥੂਣਨ੍ਤਿ ਯਞ੍ਞੂਪਤ੍ਥਮ੍ਭਂ. ਉਪਨੀਤਾਨਿ ਯਞ੍ਞਂ ਯਜਿਤੁਂ ਆਰਮ੍ਭਾਯ. ਏਤ੍ਤਾਵਤਾਤਿ ‘‘ਇਧ, ਭਨ੍ਤੇ…ਪੇ… ਰੁਦਮਾਨਾ ਪਰਿਕਮ੍ਮਾਨਿ ਕਰੋਨ੍ਤੀ’’ਤਿ ਏਤ੍ਤਕੇਨ ਪਾਠੇਨ. ਸਨ੍ਨਿਟ੍ਠਾਨਨ੍ਤਿ ‘‘ਨਂ ਇਤ੍ਥਿਂ ਲਭਿਸ੍ਸਾਮਿ ਨੁ ਖੋ, ਨ ਨੁ ਖੋ ਲਭਿਸ੍ਸਾਮੀ’’ਤਿ ਨਿਚ੍ਛਯਂ ਅਵਿਨ੍ਦਨ੍ਤੋ ਨ ਞਾਯਨ੍ਤੋ. ਫੇਣੁਦ੍ਦੇਹਕਨ੍ਤਿ ਯਥਾ ਯਤ੍ਥ ਕੁਥਿਤੇ ਫੇਣਂ ਉਦ੍ਦੇਹਤਿ ਨ ਉਪਧੀਯਤਿ, ਏਵਂ ਅਨੇਕਵਾਰਂ ਫੇਣਂ ਉਟ੍ਠਾਪੇਤ੍ਵਾ. ਤਂ ਦਿਵਸਨ੍ਤਿ ਤਸ੍ਮਿਂ ਰਞ੍ਞਾ ਨਿਦ੍ਦਂ ਅਲਭਿਤ੍ਵਾ ਦੁਕ੍ਖਸੇਯ੍ਯਦਿਵਸੇ. ਆਲੋਕਂ ਓਲੋਕੇਤ੍ਵਾਤਿ ਲੋਹਕੁਮ੍ਭਿਮੁਖਵਟ੍ਟਿਸੀਸੇ ਪਤ੍ਤੇ ਤਤ੍ਥ ਮਹਨ੍ਤਂ ਆਲੋਕਂ ਓਲੋਕੇਤ੍ਵਾ. ਅਤ੍ਤਾਨੋ ਵਚਨਂ ਰਞ੍ਞੋ ਪਵਤ੍ਤਿਞਾਪਨਤ੍ਥਂ. ਮਹਾਸਦ੍ਦੋ ਉਦਪਾਦਿ ‘‘ਏਵਰੂਪਂ ਯਞ੍ਞਂ ਰਾਜਾ ਕਾਰਾਪੇਤੀ’’ਤਿ. ਵਤ੍ਤੁਕਾਮੋ ਅਹੋਸਿ, ਵਤ੍ਤੁਞ੍ਚ ਪਨ ਅਵਿਸਹਨ੍ਤੋ ‘‘ਸ’’ ਇਤਿ ਵਤ੍ਵਾ ਲੋਹਕੁਮ੍ਭਿਯਂ ਨਿਮੁਗ੍ਗੋ. ਇਮਂ ਗਾਥਂ ਵਤ੍ਤੁਕਾਮੋ ਅਹੋਸੀਤਿ ਅਯਂ ਪਨੇਤ੍ਥ ਸਮ੍ਬਨ੍ਧੋ. ਏਸ ਨਯੋ ਸੇਸਪਦਦ੍ਵਯੇਪਿ. ਧਮ੍ਮਭੇਰਿਂ ਚਰਾਪੇਸੁਂ ‘‘ਕੋਚਿ ਕਞ੍ਚਿ ਪਾਣਂ ਮਾ ਹਨਤੂ’’ਤਿ. ਸੋ ਇਤ੍ਥਿਸਾਮਿਕੋ ਪੁਰਿਸੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ ਅਤ੍ਤਨੋ ਉਪਨਿਸ੍ਸਯਸਮ੍ਪਤ੍ਤਿਯਾ ਸਤ੍ਤੁ ਚ ਦੇਸਨਾਵਿਲਾਸਸਮ੍ਪਤ੍ਤਿਯਾ, ਰਾਜਾ ਪਨ ਮਹਾਬੋਧਿਨਿਰੁਜ੍ਝਨਸਭਾਵਤ੍ਤਾ ਕਿਞ੍ਚਿ ਵਿਸੇਸਂ ਨਾਧਿਗਚ੍ਛਿ.

ਸਙ੍ਗਹਵਤ੍ਥੂਨੀਤਿ ਲੋਕਸ੍ਸ ਸਙ੍ਗਹਕਾਰਣਾਨਿ. ਨਿਪ੍ਫਨ੍ਨਸਸ੍ਸਤੋ ਨਵਭਾਗੇ ਕਸ੍ਸਕਸ੍ਸ ਦਤ੍ਵਾ ਰਞ੍ਞਂ ਏਕਭਾਗਗ੍ਗਹਣਂ ਦਸਮਭਾਗਗ੍ਗਹਣਂ. ਏਵਂ ਕਸ੍ਸਕਾ ਹਟ੍ਠਤੁਟ੍ਠਾ ਸਸ੍ਸਾਨਿ ਸਮ੍ਪਾਦੇਨ੍ਤੀਤਿ ਆਹ ‘‘ਸਸ੍ਸਸਮ੍ਪਾਦਨੇ ਮੇਧਾਵਿਤਾਤਿ ਅਤ੍ਥੋ’’ਤਿ. ਤਤੋ ਓਰਭਾਗੇ ਕਿਰ ਛਭਾਗਗ੍ਗਹਣਂ ਜਾਤਂ. ਛਮਾਸਿਕਨ੍ਤਿ ਛਨ੍ਨਂ ਛਨ੍ਨਂ ਮਾਸਾਨਂ ਪਹੋਨਕਂ. ਪਾਸੇਤੀਤਿ ਪਾਸਗਤੇ ਵਿਯ ਕਰੋਤਿ. ਵਾਚਾਯ ਪਿਯਸ੍ਸ ਪਿਯਕਰਸ੍ਸ ਕਮ੍ਮਂ ਵਾਚਾਪੇਯ੍ਯਂ. ਸਬ੍ਬਸੋ ਰਟ੍ਠਸ੍ਸ ਇਦ੍ਧਾਦਿਭਾਵਤੋ ਖੇਮਂ. ਨਿਰਬ੍ਬੁਦਂ ਚੋਰਿਯਾਭਾਵਤੋ. ਇਦਞ੍ਹਿ ਰਟ੍ਠਂ ਅਚੋਰਿਯਂ ਨਿਰਗ੍ਗਲ਼ਨ੍ਤਿ ਵੁਚ੍ਚਤਿ ਅਪਾਰੁਤਘਰਭਾਵਤੋ.

ਉਦ੍ਧਂਮੂਲਕਂ ਕਤ੍ਵਾਤਿ ਉਮ੍ਮੂਲਂ ਕਤ੍ਵਾ. ਦ੍ਵੀਹਿ ਪਰਿਯਞ੍ਞੇਹੀਤਿ ਮਹਾਯਞ੍ਞਸ੍ਸ ਪੁਬ੍ਬਭਾਗੇ ਪਚ੍ਛਾ ਚ ਪਵਤ੍ਤੇਤਬ੍ਬੇਹਿ ਦ੍ਵੀਹਿ ਪਰਿਵਾਰਯਞ੍ਞੇਹਿ. ਸਤ੍ਤਵੀਸਤਿ…ਪੇ… ਨਸ੍ਸਾਤਿ ਸਤ੍ਤਵੀਸਾਧਿਕਾਨਂ ਤਿਣ੍ਣਂ ਪਸੁਸਤਾਨਂ ਦ੍ਵਾਵੀਸਤਿਯਾ ਅਸ੍ਸਾਦੀਹਿ ਚ ਸਟ੍ਠਿਅਧਿਕਦ੍ਵਿਸਤਆਰਞ੍ਞਕਪਸੂਹਿ ਚ ਸਦ੍ਧਿਂ ਸਮ੍ਪਿਣ੍ਡਿਤਾਨਂ ਪਨ ਨਵਾਧਿਕਛਸਤਪਸੂਨਂ ਮਾਰਣੇਨ ਭੇਰਵਸ੍ਸ ਪਾਪਭੀਰੁਕਾਨਂ ਭਯਾਵਹਸ੍ਸ. ਤਥਾ ਹਿ ਵਦਨ੍ਤਿ –

‘‘ਛਸਤਾਨਿ ਨਿਯੁਜ੍ਜਨ੍ਤਿ, ਪਸੂਨਂ ਮਜ੍ਝਿਮੇ ਹਨਿ,

ਅਸ੍ਸਮੇਧਸ੍ਸ ਯਞ੍ਞਸ੍ਸ, ਅਧਿਕਾਨਿ ਨਵਾਪਿ ਚਾ’’ਤਿ.

ਸਮ੍ਮਨ੍ਤਿ ਯੁਗਚ੍ਛਿਦ੍ਦੇ ਪਕ੍ਖਿਪਿਤਬ੍ਬਦਣ੍ਡਕਂ. ਪਾਸੇਨ੍ਤੀਤਿ ਖਿਪਨ੍ਤਿ. ਸਂਹਾਰਿਮੇਹੀਤਿ ਸਕਟੇਹਿ ਵਹਿਤਬ੍ਬੇਹਿ ਯੂਪੇਹਿ. ਪੁਬ੍ਬੇ ਕਿਰ ਏਕੋ ਰਾਜਾ ਸਮ੍ਮਾਪਾਸਂ ਯਜਨ੍ਤੋ ਸਰਸ੍ਸਤਿਨਦੀਤੀਰੇ ਪਥਵਿਯਾ ਵਿਵਰੇ ਦਿਨ੍ਨੇ ਨਿਮੁਗ੍ਗੋਯੇਵ ਅਹੋਸਿ. ਅਨ੍ਧਬਾਲਬ੍ਰਾਹ੍ਮਣਾ ਗਤਾਨੁਗਤਿਗਤਾ ‘‘ਅਯਂ ਤਸ੍ਸ ਸਗ੍ਗਗਮਨਮਗ੍ਗੋ’’ਤਿ ਸਞ੍ਞਾਯ ਤਤ੍ਥ ਸਮ੍ਮਾਪਾਸਯਞ੍ਞਂ ਪਟ੍ਠਪੇਨ੍ਤਿ. ਤੇਨ ਵੁਤ੍ਤਂ ‘‘ਨਿਮੁਗ੍ਗੋਕਾਸਤੋ ਪਭੁਤੀ’’ਤਿ. ਅਯੂਪੋ ਅਪ੍ਪਕਦਿਵਸੋ ਯਾਗੋ, ਸਯੂਪੋ ਬਹੁਦਿਵਸਂ ਸਾਧੇਯ੍ਯੋ ਸਤ੍ਰਯਾਗੋ. ਮਨ੍ਤਪਦਾਭਿਸਙ੍ਖਤਾਨਂ ਸਪ੍ਪਿਮਧੂਨਂ ਵਾਜਮਿਤਿ ਸਮਞ੍ਞਾ, ਹਿਰਞ੍ਞਸੁਵਣ੍ਣਗੋਮਹਿਂ ਸਾਦਿਸਤ੍ਤਰਸਕਦਕ੍ਖਿਣਸ੍ਸ. ਸਾਰਗਬ੍ਭਕੋਟ੍ਠਾਗਾਰਾਦੀਸੁ ਨਤ੍ਥੇਤ੍ਥ ਅਗ੍ਗਲ਼ਨ੍ਤਿ ਨਿਰਗ੍ਗਲ਼ੋ. ਤਤ੍ਥ ਕਿਰ ਯਞ੍ਞੇ ਅਤ੍ਤਨੋ ਸਾਪਤੇਯ੍ਯਂ ਅਨਵਸੇਸਤੋ ਅਨਿਗੂਹਿਤ੍ਵਾ ਨਿਯ੍ਯਾਤੀਯਤਿ. ਮਹਾਰਮ੍ਭਾਤਿ ਬਹੁਪਸੁਘਾਤਕਮ੍ਮਾ. ਅਟ੍ਠਕਥਾਯਂ ਪਨ ‘‘ਵਿਵਿਧਾ ਯਤ੍ਥ ਹਞ੍ਞਰੇ’’ਤਿ ਵਕ੍ਖਮਾਨਤ੍ਤਾ ‘‘ਮਹਾਕਿਚ੍ਚਾ’’ਤਿ ਅਤ੍ਥੋ ਵੁਤ੍ਤੋ, ਇਧ ‘‘ਮਹਾਰਮ੍ਭਾਤਿ ਪਪਞ੍ਚਵਸੇਨ ਅਜੇਲ਼ਕਾ’’ਤਿਆਦਿ ਵੁਤ੍ਤਨ੍ਤਿ ‘‘ਬਹੁਪਸੁਘਾਤਕਮ੍ਮਾ’’ਤਿ ਅਤ੍ਥੋ ਵੁਤ੍ਤੋ. ਨਿਰਾਰਮ੍ਭਾਤਿ ਏਤ੍ਥਾਪਿ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋ. ਅਨੁਗਤਂ ਕੁਲਨ੍ਤਿ ਅਨੁਕੁਲਂ, ਕੁਲਾਨੁਗਤਨ੍ਤਿ ਅਤ੍ਥੋ ਵੇਦਿਤਬ੍ਬੋ. ਤੇਨਾਹ ‘‘ਯਂ ਨਿਚ੍ਚਭਤ੍ਤਾਦਿ…ਪੇ… ਅਤ੍ਥੋ’’ਤਿ.

ਯਞ੍ਞਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਬਨ੍ਧਨਸੁਤ੍ਤਵਣ੍ਣਨਾ

੧੨੧. ਇਦਨ੍ਤਿ ‘‘ਇਧ, ਭਨ੍ਤੇ’’ਤਿਆਦਿਕਂ ਵਚਨਂ. ਤੇ ਭਿਕ੍ਖੂ ਆਰੋਚੇਸੁਨ੍ਤਿ ਸਮ੍ਬਨ੍ਧੋ. ਤੇਸੂਤਿ ਤੇਸੁ ਰਞ੍ਞਾ ਬਨ੍ਧਾਪਿਤਮਨੁਸ੍ਸੇਸੁ. ਸੁਕਤਕਾਰਣਨ੍ਤਿ ਸੁਕਾਰਣਕਿਰਿਯਂ ਆਰੋਚੇਸੁਂ, ਨ ਕੇਵਲਂ ਤੇਸਂ ਮਨੁਸ੍ਸਾਨਂ ਬਨ੍ਧਾਪਿਤਭਾਵਂ. ਇਦਾਨਿ ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਰਞ੍ਞੋ ਕਿਰਾ’’ਤਿਆਦਿ ਵੁਤ੍ਤਂ. ਅਟ੍ਠਵਙ੍ਕੋਤਿ ਅਟ੍ਠਂਸੋ. ਅਨ੍ਤੋਘਰਚਾਰਿਨੋਤਿ ਅਨ੍ਤੇਪੁਰਵਾਸਿਨੋ.

ਉਕ੍ਕਟ੍ਠੇਤਿ ਯੁਦ੍ਧੇ. ਮਨ੍ਤੀਸੂਤਿ ਗੁਤ੍ਤਮਨ੍ਤੀਸੁ. ਅਕੁਤੂਹਲਨ੍ਤਿ ਸਞ੍ਞਤਂ. ਪਿਯਨ੍ਤਿ ਪਿਯਾਯਿਤਬ੍ਬਂ. ਅਨ੍ਨਪਾਨਮ੍ਹਿ ਮਧੁਰੇ ਅਭੁਤ੍ਤੇ ਉਪ੍ਪਨ੍ਨੇ. ਅਤ੍ਥੇਤਿ ਅਤ੍ਥੇ ਕਿਚ੍ਚੇ ਜਾਤੇ ਥਿਰਨ੍ਤਿ ਨ ਕਥੇਨ੍ਤਿ ਕਾਯਬਲਮਤ੍ਤੇਨ ਅਪਨੇਤੁਂ ਸਕ੍ਕੁਣੇਯ੍ਯਤ੍ਤਾ. ਸੁਟ੍ਠੁ ਰਤ੍ਤਰਤ੍ਤਾਤਿ ਅਤਿਵਿਯ ਰਤ੍ਤਾ ਏਵ ਹੁਤ੍ਵਾ ਰਤ੍ਤਾ. ਸਾਰਤ੍ਤੇਨਾਤਿ ਸਾਰਭਾਵੇਨ ਸਾਰਭਾਵਸਞ੍ਞਾਯ. ਓਹਾਰਿਨਨ੍ਤਿ ਹੇਟ੍ਠਾ ਹਰਣਸੀਲਨ੍ਤਿ ਆਹ ‘‘ਚਤੂਸੁ ਅਪਾਯੇਸੁ ਆਕਡ੍ਢਨਕ’’ਨ੍ਤਿ. ਸਿਥਿਲਨ੍ਤਿ ਸਿਥਿਲਾਕਾਰਂ, ਨ ਪਨ ਸਿਥਿਲਂ. ਤੇਨਾਹ ਭਗਵਾ ‘‘ਦੁਪ੍ਪਮੁਞ੍ਚ’’ਨ੍ਤਿ.

ਬਨ੍ਧਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਵਗ੍ਗੋ

੧. ਸਤ੍ਤਜਟਿਲਸੁਤ੍ਤਵਣ੍ਣਨਾ

੧੨੨. ਪੁਬ੍ਬਾਰਾਮਸਙ੍ਖਾਤੇਤਿ ਸਾਵਤ੍ਥਿਨਗਰਸ੍ਸ ਪੁਬ੍ਬਦਿਸਾਯ ਕਤਤ੍ਤਾ ਪੁਬ੍ਬਾਰਾਮੇਤਿ ਸਙ੍ਖਂ ਗਤੇ. ਤਤ੍ਰਾਤਿ ‘‘ਮਿਗਾਰਮਾਤੁਯਾ ਪਾਸਾਦੇ’’ਤਿ ਤਸ੍ਮਿਂ ਸਂਖਿਤ੍ਤਵਚਨੇ. ਅਯਂ ਇਦਾਨਿ ਵੁਚ੍ਚਮਾਨਾ ਅਨੁਪੁਬ੍ਬਿਕਥਾ ਆਦਿਤੋ ਪਟ੍ਠਾਯ ਅਨੁਕ੍ਕਮਕਥਾ. ਪਤ੍ਥਨਂ ਅਕਾਸਿ ਤਸ੍ਸ ਭਗਵਤੋ ਅਗ੍ਗੁਪਟ੍ਠਾਯਿਕਂ ਏਕਂ ਉਪਾਸਿਕਂ ਦਿਸ੍ਵਾ ਤਂ ਠਾਨਨ੍ਤਰਂ ਆਕਙ੍ਖਨ੍ਤੀ. ਮੇਣ੍ਡਕਪੁਤ੍ਤਸ੍ਸਾਤਿ ਮੇਣ੍ਡਕਸੇਟ੍ਠਿਪੁਤ੍ਤਸ੍ਸ. ਮਾਤਿਟ੍ਠਾਨੇ ਠਪੇਸਿ ਤਸ੍ਸਾ ਉਪਕਾਰਂ ਗਰੁਭਾਵਞ੍ਚ ਦਿਸ੍ਵਾ. ਤਾਯ ਕਾਰਿਤੇ ਪਾਸਾਦੇਤਿ ਤਾਯ ਮਹਾਉਪਾਸਿਕਾਯ ਮਹਾਲਤਾਪਸਾਧਨਂ ਵਿਸ੍ਸਜ੍ਜੇਤ੍ਵਾ ਨਵਹਿ ਕੋਟੀਹਿ ਕਰੀਸਮਤ੍ਤੇ ਭੂਮਿਭਾਗੇ ਕਾਰਿਤੇ ਸਹਸ੍ਸਗਬ੍ਭਪਟਿਮਣ੍ਡਿਤੇ ਪਾਸਾਦੇ.

ਪਰੂਲ਼੍ਹਕਚ੍ਛਾਤਿ ਪਰੂਲ਼੍ਹਕਚ੍ਛਲੋਮਾ. ਕਮਣ੍ਡਲੁਘਟਿਕਾਦਿਂ ਪਬ੍ਬਜਿਤਪਰਿਕ੍ਖਾਰਂ. ਨਗ੍ਗਭੋਗ੍ਗਨਿਸ੍ਸਿਰਿਕਾਨਨ੍ਤਿ ਨਗ੍ਗਾਨਞ੍ਚੇਵ ਭੋਗ੍ਗਾਨਞ੍ਚ ਨਿਸ੍ਸਿਰਿਕਾਨਞ੍ਚ. ਤੇ ਹਿ ਅਨਿਵਤ੍ਥਵਤ੍ਥਤਾਯ ਨਗ੍ਗਾ ਚੇਵ, ਅਚੇਲਕਵਤਾਦਿਨਾ ਭੋਗ੍ਗਸਰੀਰਤਾਯ ਭੋਗ੍ਗਾ, ਸੋਭਾਰਹਿਤਤਾਯ ਨਿਸ੍ਸਿਰਿਕਾ ਚ. ਅਤ੍ਤਨਾ ਦਿਟ੍ਠਸੁਤਂ ਪਟਿਚ੍ਛਾਦੇਤ੍ਵਾ ਨ ਕਥੇਯ੍ਯੁਨ੍ਤਿ ਅਕਾਰਣਮੇਤਂ ਤੇਸਂ ਰਞ੍ਞਾ ਪਯੁਤ੍ਤਚਰਪੁਰਿਸਭਾਵਤੋ. ਏਵਂ ਕਤੇ ਪਨ ਤੇ ‘‘ਅਞ੍ਞੇਪਿ ਪਬ੍ਬਜਿਤਾ ਅਤ੍ਥੀਤਿ ਅਯਂ ਜਾਨਾਤੀ’’ਤਿ ਮਞ੍ਞੇਯ੍ਯੁਨ੍ਤਿ ਕੋਹਞ੍ਞਚਿਤ੍ਤੋ ਏਵਂ ਅਕਾਸੀਤਿ ਸਕ੍ਕਾ ਵਿਞ੍ਞਾਤੁਂ. ਤਥਾ ਹਿ ਤੇਨਤ੍ਥੇਨ ਅਪਰਿਤੋਸਮਾਨੋ ‘‘ਅਪਿਚਾ’’ਤਿਆਦਿਮਾਹ.

ਕਾਸਿਕਚਨ੍ਦਨਨ੍ਤਿ ਉਜ੍ਜਲਚਨ੍ਦਨਂ. ਤਂ ਕਿਰ ਵਣ੍ਣਵਸੇਨ ਸਮੁਜ੍ਜਲਂ ਹੋਤਿ ਪਭਸ੍ਸਰਂ, ਤਦਤ੍ਥਮੇਵ ਨਂ ਸਣ੍ਹਤਰਂ ਕਰੋਨ੍ਤਿ. ਤੇਨਾਹ ‘‘ਕਾਸਿਕਚਨ੍ਦਨਨ੍ਤਿ ਸਣ੍ਹਚਨ੍ਦਨ’’ਨ੍ਤਿ. ਵਣ੍ਣਗਨ੍ਧਤ੍ਥਾਯਾਤਿ ਵਣ੍ਣਸੋਭਤ੍ਥਞ੍ਚੇਵ ਸੁਗਨ੍ਧਭਾਵਤ੍ਥਞ੍ਚ. ਵਣ੍ਣਗਨ੍ਧਤ੍ਥਾਯਾਤਿ ਛਵਿਰਾਗਕਰਣਤ੍ਥਞ੍ਚੇਵ ਸੁਗਨ੍ਧਤ੍ਥਾਯ ਚ. ‘‘ਗਿਹਿਨਾ’’ਤਿਆਦੀਹਿ ਪਦੇਹਿ ਏਵਂ ਪਮਾਦਵਿਹਾਰਿਨਾ ਤਯਾ ਅਰਹਨ੍ਤੋ ਦੁਵਿਞ੍ਞੇਯ੍ਯਾਤਿ ਦਸ੍ਸੇਤਿ.

ਸਂਵਾਸੋ ਨਾਮ ਇਧ ਕਾਲੇਨ ਉਪਸਙ੍ਕਮਨਨ੍ਤਿ ਦਸ੍ਸੇਨ੍ਤੋ ‘‘ਉਪਸਙ੍ਕਮਨ੍ਤੇਨਾ’’ਤਿ ਆਹ. ਕਾਯਵਾਚਾਹਿ ਅਸਂਯਤੇਨਪਿ ਸਂਯਤਾਕਾਰੋ, ਅਸਂਵੁਤਿਨ੍ਦ੍ਰਿਯੇਨਪਿ ਸਂਵੁਤਿਨ੍ਦ੍ਰਿਯਾਕਾਰੋ. ਪਰਿਗ੍ਗਹੇਸ੍ਸਾਮੀਤਿ ਵੀਮਂਸਿਸ੍ਸਾਮਿ ‘‘ਪਰਿਸੁਦ੍ਧਂ ਨੁ ਖੋ, ਨੋ’’ਤਿ. ਸਪ੍ਪਞ੍ਞੇਨਾਤਿ ਸੀਲਪਰਿਗ੍ਗਣ੍ਹਨਪਞ੍ਞਾਯ ਸਪ੍ਪਞ੍ਞੇਨ. ਜਾਨਿਤੁਂ ਨ ਸਕ੍ਕੋਤਿ ਸਭਾਵਸ੍ਸ ਸਤੋ ਸੀਲਸ੍ਸ ਅਨੁਪਧਾਰਣਤੋ.

ਕਥਨੇਨਾਤਿ ਅਪਰਾਪਰਂ ਕਥਨੇਨ. ਤਥਾ ਹਿ ਵਕ੍ਖਤਿ ‘‘ਏਕਚ੍ਚਸ੍ਸ ਹੀ’’ਤਿਆਦਿ. ਅਰਿਯਵੋਹਾਰੋਤਿ ਦਿਟ੍ਠਾਦਿਲਕ੍ਖਣੇਨ ਵੋਹਰਿਤੋ ‘‘ਦਿਟ੍ਠਂ ਅਦਿਟ੍ਠ’’ਨ੍ਤਿਆਦਿਨਾ ਪਵੁਤ੍ਤਸਦ੍ਦਵੋਹਾਰੋ. ਤਸ੍ਸ ਪਨ ਕਾਰਣਮੇਵ ਗਣ੍ਹਨ੍ਤੋ ‘‘ਏਤ੍ਥ ਚੇਤਨਾ’’ਤਿ ਆਹ. ਏਸ ਨਯੋ ਅਨਰਿਯਵੋਹਾਰੇਪਿ. ਪਰਮਤ੍ਥਤੋ ਹਿ ਸਚ੍ਚਵਾਚਾਦਯੋ ਮੁਸਾਵਾਦਾਦਯੋ ਚੇਤਨਾਲਕ੍ਖਣਾਤਿ. ਪਞ੍ਞਤ੍ਤਿਵੋਹਾਰੋ ਤਥਾ ਤਥਾ ਵੋਹਰਿਤਬ੍ਬਤੋ ਏਵਮਾਹ ‘‘ਸਂਵੋਹਾਰੇਨ ਖੋ, ਮਹਾਰਾਜ, ਸੋਚੇਯ੍ਯਂ ਵੇਦਿਤਬ੍ਬ’’ਨ੍ਤਿ.

ਞਾਣਥਾਮੋਤਿ ਞਾਣਗੁਣਬਲਂ, ਯੇਨ ਠਾਨੁਪ੍ਪਤ੍ਤਿਕਪਟਿਭਾਨਾਦਿਨਾ ਅਚ੍ਚਾਯਿਕਕਿਚ੍ਚਕਰਣੀਯਾਨਿ ਨਿਟ੍ਠਾਪੇਤਿ. ਸਂਕਥਾਯਾਤਿ ਅਤ੍ਥਵੀਮਂਸਨਵਸੇਨ ਪਵਤ੍ਤਾਯ ਸਮ੍ਮਾਕਥਾਯ. ਉਪ੍ਪਿਲਵਤਿ ਲਹੁਕਭਾਵਤੋ. ਹੇਟ੍ਠਾਚਰਕਾਤਿ ਅਵਚਰਕਾ. ਯੇ ਅਨੁਪਵਿਸਿਤ੍ਵਾ ਪਰੇਸਂ ਰਹਸ੍ਸਵੀਮਂਸਨਵਸੇਨ ਪਵਤ੍ਤਾ, ਤੇਸੁ ਓਚਰਕਵੋਹਾਰੋਤਿ ਵੁਤ੍ਤਂ ‘‘ਚਰਾ ਹੀ’’ਤਿਆਦਿ.

ਵਣ੍ਣਸਣ੍ਠਾਨੇਨਾਤਿ ਵਣ੍ਣੇਨ ਵਾ ਸਣ੍ਠਾਨੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਸਣ੍ਠਾਨਸਮ੍ਪਤ੍ਤਿਯਾ ਵਾ. ਸੁਜਾਨੋ ਪੇਸਲੋ ਵਿਸ੍ਸਸੇਤਿ ਯੋਜਨਾ. ਲਹੁਕਦਸ੍ਸਨੇਨਾਤਿ ਪਰਿਤ੍ਤਦਸ੍ਸਨੇਨ ਵਿਜ੍ਜੁਕੇਨ ਵਿਯ. ਪਰਿਕ੍ਖਾਰਭਣ੍ਡਕੇਨਾਤਿ ਪਬ੍ਬਜਿਤਪਰਿਕ੍ਖਾਰਭੂਤੇਨ ਭਣ੍ਡਕੇਨ. ਲੋਹਡ੍ਢਮਾਸੋਤਿ ਲੋਹਮਯੋ ਉਪਡ੍ਢਗ੍ਘਨਕਮਾਸੋ.

ਸਤ੍ਤਜਟਿਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਞ੍ਚਰਾਜਸੁਤ੍ਤਵਣ੍ਣਨਾ

੧੨੩. ਰੂਪਾਤਿ ਰੂਪਸਙ੍ਖਾਤਾ ਕਾਮਗੁਣਾ. ਤੇ ਪਨ ਨੀਲਾਦਿਵਸੇਨ ਅਨੇਕਭੇਦਭਿਨ੍ਨਾਪਿ ਰੂਪਾਯਤਨਤ੍ਤਾ ਚਕ੍ਖੁਵਿਞ੍ਞੇਯ੍ਯਤਂ ਨਾਤਿਵਤ੍ਤਨ੍ਤੀਤਿ ਆਹ ‘‘ਨੀਲਪੀਤਾਦਿਭੇਦਂ ਰੂਪਾਰਮ੍ਮਣ’’ਨ੍ਤਿ. ਤੋ-ਸਦ੍ਦੋਪਿ ਦਾ-ਸਦ੍ਦੋ ਵਿਯ ਕਾਲਤ੍ਥੋ ਹੋਤੀਤਿ ਆਹ ‘‘ਯਤੋਤਿ ਯਦਾ’’ਤਿ. ਮਨਂ ਆਪਯਤਿ ਵਡ੍ਢੇਤੀਤਿ ਮਨਾਪਂ, ਮਨੋਰਮਂ. ਮਨਾਪਨਿਪ੍ਫਤ੍ਤਿਤਨ੍ਤਿ ਤਸ੍ਸ ਪੁਗ੍ਗਲਸ੍ਸ ਮਨਸਾ ਪਿਯਾਯਿਤਂ, ਤਸ੍ਸ ਅਗ੍ਗਭਾਵੇਨ ਪਰਿਯਨ੍ਤਂ ਪਰਮਂ ਕੋਟਿਂ ਕਤ੍ਵਾ ਪਵਤ੍ਤਿਤਨ੍ਤਿ ਅਤ੍ਥੋ. ਪੁਗ੍ਗਲਮਨਾਪਨ੍ਤਿ ਆਰਮ੍ਮਣਸਭਾਵਂ ਅਚਿਨ੍ਤੇਤ੍ਵਾ ਪੁਗ੍ਗਲਸ੍ਸ ਵਸੇਨ ਮਨਾਪਭਾਵੇਨੇਵ ਇਟ੍ਠਤਾਯ ਇਟ੍ਠਨ੍ਤਿ. ਸਮ੍ਮੁਤੀਤਿ ਸਮਞ੍ਞਾ. ਪੁਗ੍ਗਲਮਨਾਪਂ ਨਾਮ ਸਞ੍ਞਾਵਿਪਲ੍ਲਾਸਵਸੇਨ ਵਿਪਰੀਤਮ੍ਪਿ ਗਣ੍ਹਾਤਿ ਇਤਰਸਭਾਵਤੋਤਿ ਆਹ ‘‘ਯਂ ਏਕਸ੍ਸ…ਪੇ… ਇਟ੍ਠਂ ਕਨ੍ਤ’’ਨ੍ਤਿ. ਇਦਾਨਿ ਤਂ ਜਿਵ੍ਹਾਵਿਞ੍ਞੇਯ੍ਯਵਸੇਨ ਯੋਜੇਤ੍ਵਾ ਦਸ੍ਸੇਨ੍ਤੋ ‘‘ਪਚ੍ਚਨ੍ਤਵਾਸੀਨ’’ਨ੍ਤਿਆਦਿਮਾਹ. ਇਦਂ ਪੁਗ੍ਗਲਮਨਾਪਨ੍ਤਿ ਇਦਂ ਯਥਾਵੁਤ੍ਤਂ ਜਿਵ੍ਹਾਵਿਞ੍ਞੇਯ੍ਯਂ ਵਿਯ ਅਞ੍ਞਮ੍ਪਿ ਏਵਂਜਾਤਿਕਂ ਤੇਨ ਤੇਨ ਪੁਗ੍ਗਲੇਨ ਮਨਾਪਨ੍ਤਿ ਗਹੇਤਬ੍ਬਾਰਮ੍ਮਣਂ ਪੁਗ੍ਗਲਮਨਾਪਂ ਨਾਮ.

ਲੋਕੇ ਪਟਿਵਿਭਤ੍ਤਂ ਨਤ੍ਥਿ, ਵਿਭਜਿਤ੍ਵਾ ਦਸ੍ਸਨੇਨ ਲੋਕੇਨ ਮਧੁਰਜਾਤੇਨਪਿ ਪਟਿਵਿਭਤ੍ਤਂ ਕਤ੍ਵਾ ਗਹੇਤੁਂ ਨ ਸਕ੍ਕੁਣੇਯ੍ਯਾਤਿ ਅਧਿਪ੍ਪਾਯੋ. ਤੇਨਾਹ ‘‘ਵਿਭਜਿਤ੍ਵਾ ਪਨ ਦਸ੍ਸੇਤਬ੍ਬ’’ਨ੍ਤਿ. ਦਿਬ੍ਬਕਪ੍ਪਮ੍ਪੀਤਿ ਦੇਵਲੋਕਪਰਿਯਾਪਨ੍ਨਸਦਿਸਮ੍ਪਿ ਅਮਨਾਪਂ ਉਪਟ੍ਠਾਤਿ ਉਲ਼ਾਰਪਣੀਤਾਰਮ੍ਮਣਪਰਿਚਯਤੋ. ਮਜ੍ਝਿਮਾਨਂ ਪਨ…ਪੇ… ਵਿਭਜਿਤਬ੍ਬਂ ਤੇਸਂ ਮਨਾਪਸ੍ਸ ਮਨਾਪਤੋ, ਅਮਨਾਪਸ੍ਸ ਅਮਨਾਪਤੋ ਉਪਟ੍ਠਾਨਤੋ. ਤਤ੍ਥਪਿ ਇਟ੍ਠਾਨਿਟ੍ਠਪਰਿਚ੍ਛੇਦੋ ਨਿਪ੍ਪਰਿਯਾਯਤੋ ਏਵਂ ਵੇਦਿਤਬ੍ਬੋਤਿ ਦਸ੍ਸੇਨ੍ਤੋ ਆਹ ‘‘ਤਞ੍ਚ ਪਨੇਤ’’ਨ੍ਤਿਆਦਿ. ਤਞ੍ਚ ਪਨੇਤਂ ਇਟ੍ਠਾਨਿਟ੍ਠਭੂਤਂ ਆਰਮ੍ਮਣਂ ਕਾਮਾਵਚਰਜਵਨੇਸੁ ਅਕੁਸਲਸ੍ਸ ਵਸੇਨ ਯੇਭੁਯ੍ਯੇਨ ਪਵਤ੍ਤਤੀਤਿ ਕਤ੍ਵਾ ਤਤ੍ਥ ‘‘ਰਜ੍ਜਤਿ ਦੁਸ੍ਸਤੀ’’ਤਿ ਅਕੁਸਲਸ੍ਸੇਵ ਪਵਤ੍ਤਿ ਦਸ੍ਸਿਤਾ. ਸੇਸਕਾਮਾਵਚਰਸ੍ਸਪਿ ਵਸੇਨ ਪਵਤ੍ਤਿ ਲਬ੍ਭਤੇਵ. ਤਥਾ ਹਿ ਤਂ ਅਪ੍ਪਟਿਕੂਲੇਪਿ ਪਟਿਕੂਲਾਕਾਰਤੋ, ਪਟਿਕੂਲੇਪਿ ਅਪ੍ਪਟਿਕੂਲਾਕਾਰਤੋ ਪਵਤ੍ਤਤੀਤਿ. ਵਿਪਾਕਚਿਤ੍ਤਂ ਇਟ੍ਠਾਨਿਟ੍ਠਂ ਪਰਿਚ੍ਛਿਨ੍ਦਤਿ, ਨ ਸਕ੍ਕਾ ਵਿਪਾਕਂ ਵਞ੍ਚੇਤੁਨ੍ਤਿ. ਕੁਸਲਕਮ੍ਮਂ ਹਿ ਏਕਨ੍ਤਤੋ ਇਟ੍ਠਮੇਵ, ਅਕੁਸਲਕਮ੍ਮਞ੍ਚ ਅਨਿਟ੍ਠਮੇਵ, ਤਸ੍ਮਾ ਤਤ੍ਥ ਉਪ੍ਪਜ੍ਜਮਾਨਂ ਵਿਪਾਕਚਿਤ੍ਤਂ ਯਥਾਸਭਾਵਤੋ ਪਵਤ੍ਤਤੀਤਿ.

ਯਂ ਪਨ ਸਮ੍ਮੋਹਵਿਨੋਦਨਿਯਂ ‘‘ਕੁਸਲਕਮ੍ਮਜਂ ਅਨਿਟ੍ਠਂ ਨਾਮ ਨਤ੍ਥੀ’’ਤਿ ਏਤ੍ਤਕਮੇਵ ਵੁਤ੍ਤਂ, ਤਂ ਪਨ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ. ਤੇਨ ਸੋਭਨਂ ਅਕੁਸਲਕਮ੍ਮਜਮ੍ਪਿ ਏਕਚ੍ਚਾਨਂ ਸਤ੍ਤਾਨਂ ਇਟ੍ਠਨ੍ਤਿ ਅਨੁਞ੍ਞਾਤਂ ਸਿਯਾ. ਕੁਸਲਕਮ੍ਮਜਂ ਪਨ ਸਬ੍ਬੇਸਂ ਇਟ੍ਠਮੇਵਾਤਿ ਵਦਨ੍ਤਿ. ਤਿਰਚ੍ਛਾਨਗਤਾਨਂ ਕੇਸਞ੍ਚਿ ਮਨੁਸ੍ਸਰੂਪਂ ਅਮਨਾਪਂ, ਯਤੋ ਤੇ ਦਿਸ੍ਵਾਵ ਪਲਾਯਨ੍ਤਿ. ਮਨੁਸ੍ਸਾ ਚ ਦੇਵਤਾਨਂ ਰੂਪਂ ਦਿਸ੍ਵਾ ਭਾਯਨ੍ਤਿ, ਤੇਸਮ੍ਪਿ ਵਿਪਾਕਵਿਞ੍ਞਾਣਂ ਤਂ ਰੂਪਂ ਆਰਬ੍ਭ ਕੁਸਲਵਿਪਾਕਮੇਵ ਉਪ੍ਪਜ੍ਜਤਿ, ਤਾਦਿਸਸ੍ਸ ਪਨ ਪੁਞ੍ਞਸ੍ਸ ਅਭਾਵਾ ਨ ਤੇਸਂ ਤਤ੍ਥ ਅਭਿਰਤਿ ਹੋਤੀਤਿ ਦਟ੍ਠਬ੍ਬਂ. ਕੁਸਲਕਮ੍ਮਜਸ੍ਸ ਪਨ ਅਨਿਟ੍ਠਸ੍ਸ ਅਭਾਵੋ ਵਿਯ ਅਕੁਸਲਕਮ੍ਮਜਸ੍ਸ ਸੋਭਨਸ੍ਸ ਇਟ੍ਠਸ੍ਸ ਅਭਾਵੋ ਵਤ੍ਤਬ੍ਬੋ. ਹਤ੍ਥਿਆਦੀਨਮ੍ਪਿ ਹਿ ਅਕੁਸਲਕਮ੍ਮਜਂ ਮਨੁਸ੍ਸਾਨਂ ਅਕੁਸਲਵਿਪਾਕਸ੍ਸੇਵ ਆਰਮ੍ਮਣਂ, ਕੁਸਲਕਮ੍ਮਜਂ ਪਨ ਪਵਤ੍ਤੇ ਸਮੁਟ੍ਠਿਤਂ ਕੁਸਲਵਿਪਾਕਸ੍ਸ, ਇਟ੍ਠਾਰਮ੍ਮਣੇਨ ਵੋਮਿਸ੍ਸਕਤ੍ਤਾ ਅਪ੍ਪਕਂ ਅਕੁਸਲਕਮ੍ਮਜਂ ਬਹੁਲਂ ਅਕੁਸਲਵਿਪਾਕੁਪ੍ਪਤ੍ਤਿਯਾ ਕਾਰਣਂ ਨ ਭਵਿਸ੍ਸਤੀਤਿ ਸਕ੍ਕਾ ਵਤ੍ਤੁਂ. ਇਦਾਨਿ ਤਮੇਵ ਵਿਪਾਕਵਸੇਨ ਇਟ੍ਠਾਨਿਟ੍ਠਾਰਮ੍ਮਣਵਵਤ੍ਥਾਨਂ ਵਿਭਾਵੇਤੁਂ ‘‘ਕਿਞ੍ਚਾਪਿ ਹੀ’’ਤਿਆਦਿ ਵੁਤ੍ਤਂ. ਤਯਿਦਂ ਸਮ੍ਮੁਤਿਮਨਾਪਸਂਵਿਭਾਗਤ੍ਥਂ ਵੁਤ੍ਤਂ, ਇਧ ਪਨ ਨ ਤਥਾ ਵਿਭਤ੍ਤਨ੍ਤਿ ਆਹ ‘‘ਭਗਵਾ ਪਨਾ’’ਤਿਆਦਿ.

ਸੋ ਉਪਾਸਕੋ ਚਨ੍ਦਨਙ੍ਗਲਗਾਮੇ ਜਾਤਤ੍ਤਾ ‘‘ਚਨ੍ਦਨਙ੍ਗਲਿਕੋ’’ਤਿ ਪਞ੍ਞਾਯਤਿ, ‘‘ਚਨ੍ਦਨਵਿਲਾਸੋ’’ਤਿ ਕੇਚਿ. ਤਸ੍ਸ ਉਪਾਸਕਸ੍ਸ ਪਟਿਭਾਨਂ ਉਦਪਾਦੀਤਿ ਯੋਜਨਾ. ਤੇ ਰਾਜਾਨੋ ਹਤਪ੍ਪਭੇ ਹਤਸੋਭੇ ਦਿਸ੍ਵਾਤਿ ਸਮ੍ਬਨ੍ਧੋ. ਉਦਕਾਭਿਸਿਤ੍ਤੇਤਿ ਉਦਕੇਨ ਅਭਿਸਿਞ੍ਚਿਤੇ. ਅਙ੍ਗਾਰੇ ਵਿਯਾਤਿ ਅਙ੍ਗਾਰਕ੍ਖਣੇ ਵਿਯ.

ਕਾਲਸ੍ਸੇਵਾਤਿ ਪਗੇਵ. ਅਵਿਗਤਗਨ੍ਧਂ ਤਙ੍ਖਣਵਿਕਸਿਤਤਾਯ. ਈਦਿਸਂ ਵਚਨਨ੍ਤਿ ‘‘ਅਚ੍ਛਾਦੇਸੀ’’ਤਿ ਏਵਰੂਪਂ ਵਚਨਨ੍ਤਿ.

ਪਞ੍ਚਰਾਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਦੋਣਪਾਕਸੁਤ੍ਤਵਣ੍ਣਨਾ

੧੨੪. ‘‘ਦੋਣਪਾਕਕੁਰ’’ਨ੍ਤਿ ਏਤ੍ਥ ਵਿਭਤ੍ਤਿਲੋਪਂ ਕਤ੍ਵਾ ਨਿਦ੍ਦੇਸੋਤਿ ਆਹ ‘‘ਦੋਣਪਾਕਂ ਕੁਰ’’ਨ੍ਤਿ. ਦੋਣਸ੍ਸਾਤਿ ਚਤੁਨ੍ਨਂ ਆਲ਼੍ਹਕਾਨਂ, ਸੋਲ਼ਸਨਾਲ਼ੀਨਨ੍ਤਿ ਅਤ੍ਥੋ. ਤਦੁਪਿਯਨ੍ਤਿ ਤਦਨੁਰੂਪਂ, ਤਸ੍ਸ ਵੁਤ੍ਤਪਰਿਮਾਣਸ੍ਸ ਅਨੁਚ੍ਛਵਿਕਨ੍ਤਿ ਅਤ੍ਥੋ. ਪੁਬ੍ਬੇਤਿ ਤਂਦਿਵਸਤੋ ਪੁਰਿਮਤਰਦਿਵਸੇਸੁ. ਬਲਵਾਤਿ ਮਹਾ. ਭਤ੍ਤਪਰਿਲ਼ਾਹੋਤਿ ਭਤ੍ਤਸਮ੍ਮਦਹੇਤੁਕੋ. ਅਸ੍ਸ ਰਞ੍ਞੋ ਉਭੋਸੁ ਪਸ੍ਸੇਸੁ ਗਹਿਤਤਾਲਵਣ੍ਟਾ ਬੀਜਨ੍ਤਿ ਯਮਕਤਾਲਵਣ੍ਟੇਹਿ. ਫਾਸੁਵਿਹਾਰਨ੍ਤਿ ਭੋਜਨੇ ਮਤ੍ਤਞ੍ਞੁਤਾਯ ਲਦ੍ਧਬ੍ਬਸੁਖਵਿਹਾਰਂ. ਭੋਜਨਮਤ੍ਤਞ੍ਞੂ ਹਿ ਸੁਖਵਿਹਾਰੋ ਹੋਤਿ. ਤੇਨਾਹ ‘‘ਤਨੁਕਸ੍ਸ ਭਵਨ੍ਤਿ ਵੇਦਨਾ, ਸਣਿਕਂ ਜੀਰਤਿ ਆਯੁ ਪਾਲਯ’’ਨ੍ਤਿ.

ਤਨੁਕਸ੍ਸਾਤਿ ਤਨੁਕਾ ਅਸ੍ਸ ਪੁਗ੍ਗਲਸ੍ਸ, ਭੁਤ੍ਤਪਚ੍ਚਯਾ ਵਿਸਭਾਗਵੇਦਨਾ ਨ ਹੋਨ੍ਤੀਤਿ ਅਤ੍ਥੋ. ਸਣਿਕਨ੍ਤਿ ਮਨ੍ਦਂ ਮੁਦੁਕਂ, ਅਪਰਿਸ੍ਸਯਮੇਵਾਤਿ ਅਤ੍ਥੋ. ਜੀਰਤੀਤਿ ਪਰਿਭੁਤ੍ਤਾਹਾਰੋ ਪਚ੍ਚਤਿ. ਆਯੁਪਾਲਯਨ੍ਤਿ ਨਿਰੋਧੋ ਅਵੇਦਨੋ ਜੀਵਿਤਂ ਰਕ੍ਖਨ੍ਤੋ. ਅਥ ਵਾ ਸਣਿਕਂ ਜੀਰਤੀਤਿ ਸੋ ਭੋਜਨੇ ਮਤ੍ਤਞ੍ਞੂ ਪੁਗ੍ਗਲੋ ਪਰਿਮਿਤਾਹਾਰਤਾਯ ਸਣਿਕਂ ਚਿਰੇਨ ਜੀਰਤਿ ਜਰਂ ਪਾਪੁਣਾਤਿ ਜੀਵਿਤਂ ਪਾਲੇਨ੍ਤੋ.

ਪਰਿਯਾਪੁਣਿਤ੍ਵਾਤਿ ਏਤ੍ਥ ਯਥਾ ਸਬ੍ਬਂ ਸੋ ਪਰਿਯਾਪੁਣਿ, ਤਤੋ ਪਰਞ੍ਚ ਯਥਾ ਪਟਿਪਜ੍ਜਿ, ਤਂ ਦਸ੍ਸੇਤੁਂ ‘‘ਰਞ੍ਞਾ ਸਦ੍ਧਿ’’ਨ੍ਤਿਆਦਿ ਵੁਤ੍ਤਂ. ਤਾਵਤਕੇ ਤਣ੍ਡੁਲੇ ਹਾਰੇਯ੍ਯਾਸਿ ਤਦੁਪਿਯਞ੍ਚ ਬ੍ਯਞ੍ਜਨਨ੍ਤਿ ਆਨੇਤ੍ਵਾ ਸਮ੍ਬਨ੍ਧੋ.

ਪੁਰਿਸਭਾਗੋ ਏਸਾਤਿ ਮਜ੍ਝਿਮੇਨ ਪੁਰਿਸੇਨ ਭੁਞ੍ਜਿਤਬ੍ਬਭਾਗੋ ਏਸੋ, ਯਦਿਦਂ ਨਾਲ਼ਿਕੋਦਨਮਤ੍ਤਂ. ਸਲ੍ਲਿਖਿਤਸਰੀਰਤਾਤਿ ਭਮਂ ਆਰੋਪੇਤ੍ਵਾ ਉਲ੍ਲਿਖਿਤਸ੍ਸ ਵਿਯ ਸਬ੍ਬਪਰਿਲ਼ਾਹਵੂਪਸਮਸ੍ਸ ਪੁਥੁਲਤਾਪਗਤਸਰੀਰਸ੍ਸ. ਸੀਲਂ ਸਮ੍ਪਰਾਯਿਕਤ੍ਥੋਤਿ ਵੁਤ੍ਤਂ, ਕੁਤੋ ਪਨੇਤ੍ਥ ਸੀਲਨ੍ਤਿ ਆਹ ‘‘ਭੋਜਨੇ’’ਤਿਆਦਿ. ਸੀਲਙ੍ਗਂ ਨਾਮ ਹੋਤੀਤਿ ਚਤੁਪਾਰਿਸੁਦ੍ਧਿਸੀਲਸ੍ਸ ਅਵਯਵੋ ਏਕੋ ਭਾਗੋ ਹੋਤਿ.

ਦੋਣਪਾਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਪਠਮਸਙ੍ਗਾਮਸੁਤ੍ਤਵਣ੍ਣਨਾ

੧੨੫. ਵੇਦੇਨ ਞਾਣੇਨ ਈਹਤਿ ਇਰਿਯਤੀਤਿ ਵੇਦੇਹੀ, ਕੋਸਲਰਾਜਭਗਿਨੀ ਅਜਾਤਸਤ੍ਤੁਨੋ ਮਾਤਾ, ਸਾ ਕਿਰ ਸਮ੍ਪਜਞ੍ਞਜਾਤਿਕਾ. ਤੇਨਾਹ ‘‘ਪਣ੍ਡਿਤਾਧਿਵਚਨ’’ਨ੍ਤਿ, ਚਤ੍ਤਾਰਿ ਅਙ੍ਗਾਨਿ ਏਤਿਸ੍ਸਨ੍ਤਿ ਚਤੁਰਙ੍ਗਿਨੀ. ਦ੍ਵਿਨ੍ਨਂ ਰਜ੍ਜਾਨਨ੍ਤਿ ਕਾਸਿਕਰਜ੍ਜਮਗਧਰਜ੍ਜਾਨਂ ਅਨ੍ਤਰੇ, ਸੋ ਪਨ ਗਾਮੋ ਕਾਸਿਕਰਜ੍ਜੋ.

ਪਾਪਾਤਿ ਲਾਮਕਾ ਨਿਹੀਨਾਚਾਰਾ. ਮੇਜ੍ਜਤਿ ਸਿਨਿਯ੍ਹਤੀਤਿ ਮੇਤ੍ਤਿ, ਸਾ ਏਤੇਸੁ ਅਤ੍ਥੀਤਿ ਮਿਤ੍ਤਾ. ਸਹ ਅਯਨ੍ਤਿ ਪਵਤ੍ਤਨ੍ਤੀਤਿ ਸਹਾਯਾ. ਸਮ੍ਪਵਙ੍ਕਨ੍ਤਿ ਸੁਟ੍ਠੁ ਓਨਤਂ. ਜਯਕਾਰਣਂ ਦਿਸ੍ਵਾ ਆਹ, ਤਥਾ ਹਿ ‘‘ਅਜ੍ਜ ਇਮਂ ਰਤ੍ਤਿਂ ਦੁਕ੍ਖਂ ਸੇਤੀ’’ਤਿ ਕਾਲਪਰਿਚ੍ਛੇਦਵਸੇਨ ਵੁਤ੍ਤਂ. ਵੇਰਿਘਾਤੋ ਨਾਮ ਵੇਰਿਪੁਗ੍ਗਲੇ ਸਤੀਤਿ ਆਹ ‘‘ਵੇਰਿਪੁਗ੍ਗਲਂ ਲਭਤੀ’’ਤਿ.

ਪਠਮਸਙ੍ਗਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਸਙ੍ਗਾਮਸੁਤ੍ਤਵਣ੍ਣਨਾ

੧੨੬. ਸੁਣਾਥਾਤਿ ‘‘ਵਤ੍ਵਾ’’ਤਿ ਵਚਨਸੇਸੋ. ਉਪਕਪ੍ਪਤੀਤਿ ਸਮ੍ਭਵਤਿ. ਸਯ੍ਹਂ ਹੋਤੀਤਿ ਕਾਤੁਂ ਸਕ੍ਕਾ ਹੋਤਿ. ‘‘ਯਦਾ ਚਞ੍ਞੇ’’ਤਿ ਚ-ਕਾਰੋ ਨਿਪਾਤਮਤ੍ਤਨ੍ਤਿ ਆਹ ‘‘ਯਦਾ ਅਞ੍ਞੇ’’ਤਿ. ਵਿਲੁਮ੍ਪਨ੍ਤੀਤਿ ਵਿਨਾਸਂ ਅਚ੍ਛਿਨ੍ਦਨਂ ਕਰੋਨ੍ਤਿ. ਵਿਲੁਮ੍ਪੀਯਤੀਤਿ ਵਿਲੁਤ੍ਤਪਰਸਨ੍ਤਕਸ੍ਸ ਅਸਕਤ੍ਤਾ ਪੁਗ੍ਗਲੋ ਦਿਟ੍ਠਧਮ੍ਮਿਕਂ ਕਮ੍ਮਫਲਂ ਪਟਿਸਂਵੇਦੇਨ੍ਤੋ ਵਿਯ ਸਯਮ੍ਪਿ ਪਰੇਨ ਵਿਲੁਮ੍ਪੀਯਤਿ, ਧਨਜਾਨਿਂ ਪਾਪੁਣਾਤਿ. ‘‘ਕਾਰਣ’’ਨ੍ਤਿ ਹਿ ਮਞ੍ਞਤੀਤਿ ਪਾਪਕਿਰਿਯਂ ਅਤ੍ਤਨੋ ਹਿਤਾਵਹਂ ਕਾਰਣਂ ਕਤ੍ਵਾ ਮਞ੍ਞਤਿ. ਜਯਨ੍ਤੋ ਪੁਗ੍ਗਲੋ ‘‘ਇਦਂ ਨਾਮ ਜਿਨਾਮੀ’’ਤਿ ਮਞ੍ਞਮਾਨੋ ਸਯਮ੍ਪਿ ਤਤੋ ਪਰਾਜਯਂ ਪਾਪੁਣਾਤਿ. ਘਟ੍ਟੇਤਾਰਨ੍ਤਿ ਪਾਪਕਮ੍ਮਵਿਪਾਕਂ. ਕਮ੍ਮਵਿਵਟ੍ਟੇਨਾਤਿ ਕਮ੍ਮਸ੍ਸ ਵਿਵਟ੍ਟਨੇਨ, ਪਚ੍ਚਯਲਾਭੇਨ ਲਦ੍ਧਾਵਸਰੇਨ ਵਿਵਟ੍ਟੇਤ੍ਵਾ ਵਿਗਮਿਤੇਨ ਕਮ੍ਮੇਨਾਤਿ ਅਤ੍ਥੋ.

ਦੁਤਿਯਸਙ੍ਗਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਮਲ੍ਲਿਕਾਸੁਤ੍ਤਵਣ੍ਣਨਾ

੧੨੭. ਏਕਚ੍ਚਾਤਿ ਪਣ੍ਡਿਤਾ ਸਪਞ੍ਞਾ. ਸੇਯ੍ਯਾਤਿ ਵਰਾ. ਗਾਥਾਸੁਖਤ੍ਥਂ ਸਸੁਰਸਦ੍ਦਲੋਪਂ ਕਤ੍ਵਾ ‘‘ਸਸ੍ਸੁਦੇਵਾ’’ਤਿ ਵੁਤ੍ਤਨ੍ਤਿ ਆਹ ‘‘ਸਸ੍ਸੁਸਸੁਰਦੇਵਤਾ’’ਤਿ. ਦਿਸਾਜੇਟ੍ਠਕਾਤਿ ਚਤੂਸੁਪਿ ਦਿਸਾਸੁ ਜੇਟ੍ਠਕਸੀਸੇਨ ਹਿ ਲੋਕਂ ਵਦਤਿ. ਤਾਦਿਸਾਯਾਤਿ ਤਥਾਰੂਪਾਯ ਮੇਧਾਵਿਤਾਦਿਗੁਣਵੁਤ੍ਤਿਯਾ. ਸੁਭਰਿਯਾਯਾਤਿ ਸੁਖੇਤ੍ਤਭੂਤਾਯ ਸੁਨ੍ਦਰਿਤ੍ਥਿਯਾਤਿ ਅਤ੍ਥੋ.

ਮਲ੍ਲਿਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਅਪ੍ਪਮਾਦਸੁਤ੍ਤਵਣ੍ਣਨਾ

੧੨੮. ਸਮਧਿਗ੍ਗਯ੍ਹਾਤਿ ਸਮ੍ਮਾ ਅਤਿਵਿਯ ਗਹੇਤ੍ਵਾ, ਞਾਯੇਨ ਵਿਸੇਸਤੋ ਗਣ੍ਹਿਤ੍ਵਾ. ਕਾਰਾਪਕਅਪ੍ਪਮਾਦੋਤਿ ਤਿਣ੍ਣਂ ਪੁਞ੍ਞਕਿਰਿਯਵਤ੍ਥੂਨਂ ਪਵਤ੍ਤਕਅਪ੍ਪਮਾਦੋ. ਸਮਵਧਾਨਨ੍ਤਿ ਸਮਵਰੋਧਂ ਅਨ੍ਤੋਗਧਂ. ਉਪਕ੍ਖੇਪਨ੍ਤਿ ਬਹਿ ਅਹੁਤ੍ਵਾ ਪਕ੍ਖਿਪਿਤਬ੍ਬਤਂ. ਸੇਸਪਦਜਾਤਾਨਿ ਵਿਯ ਅਵ…ਪੇ… ਧਮ੍ਮਾ ਸਪ੍ਪਦੇਸਤ੍ਤਾ. ਅਪ੍ਪਮਾਦੇ ਸਮੋਧਾਨਂ ਗਚ੍ਛਨ੍ਤਿ ਤਸ੍ਸ ਨਿਪ੍ਪਦੇਸਤ੍ਤਾ. ਅਗ੍ਗਂ ਸੇਟ੍ਠਂ ਮਹਨ੍ਤਂ ਸੇਸਧਮ੍ਮਾਨਂ ਅਪ੍ਪਮਾਦੋ. ਪਟਿਲਾਭਕਟ੍ਠੇਨਾਤਿ ਅਧਿਗਮਹੇਤੁਤਾਯ. ਲੋਕਿਯੋਪਿ ਸਮਾਨੋਤਿ ਕਾਮਾਵਚਰੋਪਿ ਸਮਾਨੋ. ਮਹਗ੍ਗਤਾਨੁਤ੍ਤਰਾਨਂ ਪੁਬ੍ਬਭਾਗੇ ਪਵਤ੍ਤਅਪ੍ਪਮਾਦੋ ਹਿ ਇਧਾਧਿਪ੍ਪੇਤੋ.

ਪਸਂਸਨ੍ਤਿ ਪਣ੍ਡਿਤਾਤਿ ਯੋਜਨਾ. ਅਪ੍ਪਮਾਦਸ੍ਸ ਪਾਸਂਸਭਾਵੇ ਏਕਨ੍ਤਤੋ ਕਤ੍ਤਬ੍ਬਤਾਯ ਪਨ ‘‘ਏਤਾਨੀ’’ਤਿਆਦਿਨਾ ਕਾਰਣਂ ਆਹ. ਇਮਿਸ੍ਸਾ ਯੋਜਨਾਯ ‘‘ਪੁਞ੍ਞਕਿਰਿਯਾਸੂ’’ਤਿ ਪਦਸ੍ਸ ‘‘ਅਪ੍ਪਮਤ੍ਤੋ’’ਤਿ ਇਮਿਨਾ ਸਮ੍ਬਨ੍ਧੋ. ਯਸ੍ਮਾ ਪਣ੍ਡਿਤਾ ਅਪ੍ਪਮਾਦਂ ਪਸਂਸਨ੍ਤਿ, ਯਸ੍ਮਾ ਚ ਪੁਞ੍ਞਕਿਰਿਯਾਸੁ ਅਪ੍ਪਮਤ੍ਤੋ ਉਭੋ ਅਤ੍ਥੇ ਅਧਿਗ੍ਗਣ੍ਹਾਤਿ, ਤਸ੍ਮਾ ਆਯੁਆਦੀਨਿ ਪਤ੍ਥਯਨ੍ਤੇਨ ਅਪ੍ਪਮਾਦੋਵ ਕਾਤਬ੍ਬੋਤਿ. ਦੁਤਿਯਯੋਜਨਾਯ ਪਨ ਪਣ੍ਡਿਤਾ ਅਪ੍ਪਮਾਦਂ ਪਸਂਸਨ੍ਤਿ. ਕਤ੍ਥ? ਪੁਞ੍ਞਕਿਰਿਯਾਸੁ. ਕਸ੍ਮਾਤਿ ਚੇ? ਅਪ੍ਪਮਤ੍ਤੋਤਿਆਦਿ. ਤੇਨਾਹ ‘‘ਯਸ੍ਮਾ…ਪੇ… ਅਤ੍ਥੋ’’ਤਿ. ਅਤ੍ਥਪਟਿਲਾਭਾਤਿ ਦਿਟ੍ਠਧਮ੍ਮਿਕਾਦਿਹਿਤਪਟਿਲਾਭਾ.

ਅਪ੍ਪਮਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਕਲ੍ਯਾਣਮਿਤ੍ਤਸੁਤ੍ਤਵਣ੍ਣਨਾ

੧੨੯. ਸੀਲਾਦਿਗੁਣਸਮਨ੍ਨਾਗਤੋ ਕਲ੍ਯਾਣੋ ਭਦ੍ਦਕੋ ਮਿਤ੍ਤੋ ਏਤਸ੍ਸਾਤਿ ਕਲ੍ਯਾਣਮਿਤ੍ਤੋ, ਤਸ੍ਸ ਧਮ੍ਮੋ ਕਲ੍ਯਾਣਮਿਤ੍ਤਸ੍ਸੇਵ ਸ੍ਵਾਖਾਤੋ ਨਾਮ ਹੋਤਿ ਸੁਤ੍ਵਾ ਕਤ੍ਤਬ੍ਬਕਿਚ੍ਚਸ੍ਸ ਸਾਧਨਤੋ. ਤੇਨਾਹ ‘‘ਅਤ੍ਥਂ ਪੂਰੇਤੀ’’ਤਿ. ਇਤਰਸ੍ਸਾਤਿ ਪਾਪਮਿਤ੍ਤਸ੍ਸ. ਤੇਨਾਤਿ ਅਤ੍ਥਪੂਰਣੇਨ. ਏਤਨ੍ਤਿ ‘‘ਸੋ ਚ ਖੋ ਕਲ੍ਯਾਣਮਿਤ੍ਤਸ੍ਸਾ’’ਤਿ ਏਤਂ ਵਚਨਂ. ਦੇਸਨਾਧਮ੍ਮੋਤਿ ਪਰਿਯਤ੍ਤਿਧਮ੍ਮੋ. ਸੋ ਹਿ ਕਲ੍ਯਾਣਮਿਤ੍ਤਤੋ ਪਚ੍ਚਕ੍ਖਤੋ ਲਦ੍ਧਬ੍ਬੋ, ਇਤਰੇ ਤਦੁਪਨਿਸ੍ਸਯਾ ਪਚ੍ਚਤ੍ਤਪੁਰਿਸਕਾਰੇਹਿ, ਤੇਨ ਲਦ੍ਧਬ੍ਬੋ ਕਲ੍ਯਾਣਮਿਤ੍ਤੋਤਿ ਏਵਮਤ੍ਥੋ ਗਹੇਤਬ੍ਬੋ. ਸਾਵਕਬੋਧਿਸਤ੍ਤਵਸੇਨ ਹੇਸਾ ਦੇਸਨਾ ਆਗਤਾ. ਨ ਹਿ ਸੇਸਬੋਧਿਸਤ੍ਤਾਨਂ ਪਰੋਪਦੇਸੇਨ ਪਯੋਜਨਂ ਅਤ੍ਥਿ.

ਉਪਡ੍ਢਂ ਕਲ੍ਯਾਣਮਿਤ੍ਤਤੋਤਿ ਬ੍ਰਹ੍ਮਚਰਿਯਂ ਚਰਨ੍ਤਸ੍ਸ ਉਪਡ੍ਢਗੁਣੋ ਕਲ੍ਯਾਣਮਿਤ੍ਤਤੋ ਲਦ੍ਧਬ੍ਬੋ. ਉਪਡ੍ਢਂ ਪਚ੍ਚਤ੍ਤਪੁਰਿਸਕਾਰਤੋਤਿ ਇਤਰਂ ਉਪਡ੍ਢਂ ਞਾਣਂ ਪਟਿਪਜ੍ਜਨ੍ਤਸ੍ਸ ਅਤ੍ਤਨੋ ਪੁਰਿਸਕਾਰਤੋ. ਲੋਕੇਪਿ ਪਾਕਟੋਯਮਤ੍ਥੋ ‘‘ਆਚਰਿਯਤੋ ਉਪਡ੍ਢਂ, ਪਚ੍ਚਤ੍ਤਪੁਰਿਸਕਾਰਤੋ ਉਪਡ੍ਢਂ ਲਦ੍ਧਬ੍ਬਾ ਤੇਵਿਜ੍ਜਤਾ’’ਤਿ, ਤਸ੍ਮਾ ਥੇਰੋ ਤਥਾ ਚਿਨ੍ਤੇਸਿ. ਨਿਪ੍ਪਦੇਸਨ੍ਤਿ ਅਨਵਸੇਸਤੋ. ਤਤੋਤਿ ਕਲ੍ਯਾਣਮਿਤ੍ਤਤੋ. ਉਪਡ੍ਢਂ ਆਗਚ੍ਛਤੀਤਿ ਉਪਡ੍ਢਗੁਣੋ ਪਟਿਪਜ੍ਜਨ੍ਤਂ ਉਪਗਚ੍ਛਤਿ. ਬਹੂਹਿ ਪੁਰਿਸੇਹਿ. ਵਿਨਿਬ੍ਭੋਗੋ ਵਿਵੇਚਨਂ ਨਤ੍ਥਿ ਏਕਜ੍ਝਂ ਅਤ੍ਥਸ੍ਸ ਵਿਵੇਚੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਏਸਾਤਿ ਪਰਤੋਘੋਸਪਚ੍ਚਤ੍ਤਪੁਰਿਸਕਾਰਤੋ ਚ ਸਿਜ੍ਝਮਾਨੋ ਅਤ੍ਥੋ. ਏਤ੍ਤਕਨ੍ਤਿ ਏਤ੍ਤਕੋ ਭਾਗੋ. ਯਦਿ ਨ ਸਕ੍ਕਾ ਲਦ੍ਧੁਂ, ਅਥ ਕਸ੍ਮਾ ਉਪਡ੍ਢਨ੍ਤਿ ਵੁਤ੍ਤਨ੍ਤਿ ਆਹ ‘‘ਕਲ੍ਯਾਣਮਿਤ੍ਤਤਾਯਾ’’ਤਿਆਦਿ. ਸਮ੍ਮਾਦਿਟ੍ਠਿਆਦੀਸੁ ਨ ਸਕ੍ਕਾ ਲਦ੍ਧੁਂ. ਅਸਕ੍ਕੁਣੇਯ੍ਯੇ ਸਕਲਮ੍ਪਿ ਨ ਸਮ੍ਭਵਤਿ ਪਰਤੋਘੋਸਮਤ੍ਤੇਨ ਤੇਸਂ ਅਸਿਜ੍ਝਨਤੋ, ਪਧਾਨਹੇਤੁਭਾਵਦੀਪਨਤ੍ਥਂ ਪਨ ‘‘ਸਕਲਮੇਵਾ’’ਤਿ ਵੁਤ੍ਤਂ. ਪੁਬ੍ਬਭਾਗਪਟਿਲਾਭਙ੍ਗਨ੍ਤਿ ਪੁਬ੍ਬਭਾਗੇ ਪਟਿਲਦ੍ਧਬ੍ਬਕਾਰਣਂ ਕਲ੍ਯਾਣਮਿਤ੍ਤਸ੍ਸ ਉਪਦੇਸੇਨ ਵਿਨਾ ਤੇਨ ਉਤ੍ਤਰਿ ਵਿਸੇਸਤੋ ਅਲਦ੍ਧਬ੍ਬਤੋ. ਅਤ੍ਥਤੋਤਿ ਪਰਮਤ੍ਥਤੋ. ‘‘ਕਲ੍ਯਾਣਮਿਤ੍ਤਂ…ਪੇ… ਚਤ੍ਤਾਰੋ ਖਨ੍ਧਾ’’ਤਿ ਵਤ੍ਵਾ ਸੁਤ੍ਵਾਤਿ ਅਤ੍ਥੋ. ਤੇ ਪਨ ਸੀਲਾਦਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿ ਆਹ ‘‘ਸਙ੍ਖਾਰਕ੍ਖਨ੍ਧੋਤਿਪਿ ਵਦਨ੍ਤਿਯੇਵਾ’’ਤਿ.

ਮਾਹੇਵਨ੍ਤਿ ਮਾ ਅਹ ਏਵਨ੍ਤਿ ਛੇਦੋ, ਅਹਾਤਿ ਨਿਪਾਤਮਤ੍ਤਂ, ਮਾਤਿ ਪਟਿਸੇਧੇ ਨਿਪਾਤੋ. ਤੇਨਾਹ ‘‘ਮਾ ਏਵਂ ਅਭਣੀ’’ਤਿ. ‘‘ਮਾਹੇਵਂ ਆਨਨ੍ਦਾ’’ਤਿ ਵਦਤੋ ਭਗਵਤੋ ਇਮਸ੍ਮਿਂ ਠਾਨੇ ਤਾਦਿਸਸ੍ਸ ਨਾਮ ਤੇ, ਆਨਨ੍ਦ, ਕਲ੍ਯਾਣਮਿਤ੍ਤਗੁਣੇ ਸੇਵਤੋ ਵਤ੍ਤੁਂ ਯੁਤ੍ਤਂ ਅਯਾਥਾਵਤੋਤਿ ਧਮ੍ਮਭਣ੍ਡਾਗਾਰਿਕਸ੍ਸ ਯਥਾਭੂਤਗੁਣਕਿਤ੍ਤਨਮੁਖੇਨ ਪਟਿਕ੍ਖੇਪੋ ਯੁਤ੍ਤੋਤਿ ਦਸ੍ਸੇਨ੍ਤੋ ‘‘ਬਹੁਸ੍ਸੁਤੋ’’ਤਿਆਦਿਮਾਹ. ਇਦਨ੍ਤਿ ਇਦਂ ਵਚਨਂ ਭਗਵਾ ਆਹਾਤਿ ਸਮ੍ਬਨ੍ਧੋ. ਸਕਲਮੇਵ ਹੀਤਿ ਏਤ੍ਥ ਹਿ-ਸਦ੍ਦੋ ਹੇਤੁਅਤ੍ਥੋ. ਤੇਨ ‘‘ਮਾਹੇਵ’’ਨ੍ਤਿ ਤਸ੍ਸ ਪਟਿਕ੍ਖੇਪਸ੍ਸ ਕਾਰਣਂ ਜੋਤਿਤਂ, ਨ ਸਰੂਪਤੋ ਵੁਤ੍ਤਂ. ‘‘ਕਲ੍ਯਾਣਮਿਤ੍ਤਸ੍ਸੇਤ’’ਨ੍ਤਿਆਦਿਨਾ ਪਨ ਤਂ ਸਰੂਪਤੋ ਦਸ੍ਸਿਤਨ੍ਤਿ ਆਹ ‘‘ਇਦਾਨਿ…ਪੇ… ਆਦਿਮਾਹਾ’’ਤਿ. ਪਾਟਿਕਙ੍ਖਿਤਬ੍ਬਨ੍ਤਿ ਇਚ੍ਛਨਟ੍ਠੇਨ ਪਾਟਿਕਙ੍ਖਿਤਬ੍ਬਂ, ਨ ਪਟਿਕਙ੍ਖਾਨਿਮਿਤ੍ਤੇਨਾਤਿ ਆਹ ‘‘ਅਵਸ੍ਸਂਭਾਵੀਤਿ ਅਤ੍ਥੋ’’ਤਿ.

ਇਧਾਤਿ ਅਨ੍ਤੋਗਧਾਵਧਾਰਣਪਦਂ, ਇਧੇਵਾਤਿ ਅਤ੍ਥੋ. ਇਮਸ੍ਮਿਂਯੇਵ ਹਿ ਸਾਸਨੇ ਅਰਿਯਮਗ੍ਗਭਾਵਨਾ, ਨ ਅਞ੍ਞਤ੍ਥ. ਆਦਿਪਦਾਨਂਯੇਵਾਤਿ ਤਸ੍ਮਿਂ ਤਸ੍ਮਿਂ ਵਾਕ੍ਯੇ ਆਦਿਤੋ ਏਵ ਵੁਤ੍ਤਸਮ੍ਮਾਦਿਟ੍ਠਿਆਦਿਪਦਾਨਂਯੇਵ. ਸਮ੍ਮਾਦਸ੍ਸਨਲਕ੍ਖਣਾਤਿ ਚਤੁਨ੍ਨਂ ਅਰਿਯਸਚ੍ਚਾਨਂ ਪਰਿਞ੍ਞਾਭਿਸਮਯਾਦਿਵਸੇਨ ਸਮ੍ਮਦੇਵ ਦਸ੍ਸਨਸਭਾਵਾ. ਸਮ੍ਮਾਅਭਿਰੋਪਨਲਕ੍ਖਣੋਤਿ ਨਿਬ੍ਬਾਨਸਙ੍ਖਾਤੇ ਆਰਮ੍ਮਣੇ ਸਮ੍ਪਯੁਤ੍ਤਧਮ੍ਮੇ ਸਮ੍ਮਦੇਵ ਆਰੋਪਨਸਭਾਵੋ. ਸਮ੍ਮਾਪਰਿਗ੍ਗਹਣਲਕ੍ਖਣਾਤਿ ਮੁਸਾਵਾਦਾਦੀਨਂ ਵਿਸਂਵਾਦਨਾਦਿਕਿਚ੍ਚਤਾਯ ਲੂਖਾਨਂ ਅਪਰਿਗ੍ਗਾਹਕਾਨਂ ਪਟਿਪਕ੍ਖਭਾਵਤੋ ਪਰਿਗ੍ਗਾਹਕਸਭਾਵਾ ਸਮ੍ਮਾਵਾਚਾ ਸਿਨਿਦ੍ਧਭਾਵੇਨ ਸਮ੍ਪਯੁਤ੍ਤਧਮ੍ਮੇ ਸਮ੍ਮਾਵਾਚਾਪਚ੍ਚਯਂ ਸੁਭਾਸਿਤਸੋਤਾਰਞ੍ਚ ਪੁਗ੍ਗਲਂ ਪਰਿਗ੍ਗਣ੍ਹਾਤੀਤਿ ਸਮ੍ਮਾਪਰਿਗ੍ਗਹਣਲਕ੍ਖਣਾ. ਯਥਾ ਕਾਯਿਕਕਿਰਿਯਾ ਕਿਞ੍ਚਿ ਕਤ੍ਤਬ੍ਬਂ ਸਮੁਟ੍ਠਾਪੇਤਿ, ਸਯਞ੍ਚ ਸਮੁਟ੍ਠਹਨਂ ਘਟਨਂ ਹੋਤਿ, ਤਥਾ ਸਮ੍ਮਾਕਮ੍ਮਨ੍ਤ ਸਙ੍ਖਾਤਾ ਵਿਰਤਿਪੀਤਿ ਸਮੁਟ੍ਠਾਪਨਲਕ੍ਖਣਾ ਦਟ੍ਠਬ੍ਬਾ, ਸਮ੍ਪਯੁਤ੍ਤਧਮ੍ਮਾਨਂ ਵਾ ਉਕ੍ਖਿਪਨਂ ਸਮੁਟ੍ਠਾਪਨਂ ਕਾਯਿਕਕਿਰਿਯਾਯ ਭਾਰੁਕ੍ਖਿਪਨਂ ਵਿਯ. ਜੀਵਮਾਨਸ੍ਸ ਸਤ੍ਤਸ੍ਸ, ਸਮ੍ਪਯੁਤ੍ਤਧਮ੍ਮਾਨਂ ਵਾ, ਜੀਵਿਤਪ੍ਪਵਤ੍ਤਿਯਾ ਆਜੀਵਸ੍ਸੇਵ ਵਾ ਸੁਦ੍ਧਿ ਵੋਦਾਨਂ. ਯਥਾ ਉਪ੍ਪਨ੍ਨੁਪ੍ਪਨ੍ਨਾਨਂ ਵਜ੍ਜਾਨਂ ਧਮ੍ਮੇਨ ਪਹਾਨਾਨੁਪ੍ਪਾਦਅਤ੍ਥਲਾਭਾਦਿਪਰਿਵੁਡ੍ਢਿ ਹੋਤਿ, ਏਵਂ ਸਮ੍ਪਯੁਤ੍ਤਾਨਂ ਪਗ੍ਗਹਣਸਭਾਵੋਤਿ ਸਮ੍ਮਾਪਗ੍ਗਹਲਕ੍ਖਣੋ ਸਮ੍ਮਾਵਾਯਾਮੋ. ਕਾਯਵੇਦਨਾਚਿਤ੍ਤਧਮ੍ਮੇਸੁ ਸੁਭਸੁਖਨਿਚ੍ਚਅਤ੍ਤਗਾਹਾਨਞ੍ਚ ਵਿਧਮਨਵਸੇਨ ਸਮ੍ਮਾਪਤਿਟ੍ਠਾਨਸਭਾਵਾਤਿ ਸਮ੍ਮਾਉਪਟ੍ਠਾਨਲਕ੍ਖਣਾ ਸਮ੍ਮਾਸਤਿ. ਸਮ੍ਪਯੁਤ੍ਤਧਮ੍ਮਾਨਂ ਸਮ੍ਮਾ ਸਮਾਦਹਨਂ ਏਕਗ੍ਗਤਾਕਰਣਂ ਸਭਾਵੋ ਏਤਸ੍ਸਾਤਿ ਸਮ੍ਮਾਸਮਾਧਾਨਲਕ੍ਖਣੋ ਸਮ੍ਮਾਸਮਾਧਿ. ਤੀਣਿ ਕਿਚ੍ਚਾਨਿ ਹੋਨ੍ਤਿ ਪਟਿਪਕ੍ਖਧਮ੍ਮੇਸੁ, ਆਰਮ੍ਮਣਧਮ੍ਮੇਸੁ, ਸਮ੍ਪਯੁਤ੍ਤਧਮ੍ਮੇਸੁ ਚ ਏਕਸ੍ਮਿਂਯੇਵ ਖਣੇ ਪਵਤ੍ਤਿਵਿਸੇਸਭੂਤਾਨਿ. ਇਦਾਨਿ ਤਾਨਿ ਸਰੂਪਤੋ ਦਸ੍ਸੇਤੁਂ ‘‘ਸੇਯ੍ਯਥਿਦ’’ਨ੍ਤਿਆਦਿ ਵੁਤ੍ਤਂ. ਸਦ੍ਧਿਨ੍ਤਿ ਇਮਿਨਾ ‘‘ਅਞ੍ਞੇਹੀ’’ਤਿ ਵੁਤ੍ਤਕਿਲੇਸਾ ਮਿਚ੍ਛਾਦਿਟ੍ਠਿਯਾ ਸਹ ਏਕਟ੍ਠਾ ਵਾ ਅਨੇਕਟ੍ਠਾ ਵਾਤਿ ਦਸ੍ਸੇਤਿ. ਪਜਹਤਿ ਪਹਾਯ ਨਂ ਪਟਿਵਿਜ੍ਝਤਿ. ਨਿਰੋਧਨ੍ਤਿ ਨਿਬ੍ਬਾਨਂ ਆਰਮ੍ਮਣਂ ਕਰੋਤਿ ਸਚ੍ਛਿਕਿਰਿਯਾਪਟਿਵੇਧੇਨ ਪਟਿਵਿਜ੍ਝਤਿ.

ਨ ਕੇਵਲਂ ਮਗ੍ਗਧਮ੍ਮਾ ਵੁਤ੍ਤਨਯੇਨੇਵ, ਅਥ ਖੋ ਅਪਰੇਨਪਿ ਨਯੇਨ ਵੇਦਿਤਬ੍ਬਾਤਿ ਦਸ੍ਸੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਨਾਨਾਖਣਾ ਪੁਨਪ੍ਪੁਨਂ ਉਪ੍ਪਜ੍ਜਨਤੋ. ਨਾਨਾਰਮ੍ਮਣਾ ਅਨਿਚ੍ਚਾਨੁਪਸ੍ਸਨਾਦਿਭਾਵਤੋ. ਏਕਕ੍ਖਣਾ ਸਕਿਦੇਵ ਉਪ੍ਪਜ੍ਜਨਤੋ. ਏਕਾਰਮ੍ਮਣਾ ਨਿਬ੍ਬਾਨਵਿਸਯਤ੍ਤਾ. ਚਤ੍ਤਾਰਿ ਨਾਮਾਨਿ ਲਭਤਿ ਪਰਿਞ੍ਞਾਭਿਸਮਯਾਦਿਵਸੇਨ ਪਵਤ੍ਤਿਯਾ. ਤੀਣਿ ਨਾਮਾਨਿ ਲਭਤਿ ਕਾਮਸਙ੍ਕਪ੍ਪਾਦੀਨਂ ਪਹਾਨਵਸੇਨ ਪਵਤ੍ਤਿਯਾ. ਪਟਿਪਕ੍ਖਪਹਾਨਵਸੇਨ ਹਿਸ੍ਸ ਨਾਮਤ੍ਤਯਲਾਭੋ. ਏਸ ਨਯੋ ਸੇਸੇਸੁਪਿ. ਵਿਰਤਿਯੋਪਿ ਹੋਨ੍ਤਿ ਚੇਤਨਾਯੋਪਿ ਪੁਬ੍ਬਭਾਗੇਪਿ ਵਿਕ੍ਖਮ੍ਭਨਵਸੇਨ ਪਵਤ੍ਤਨਤੋ. ਮਗ੍ਗਕ੍ਖਣੇ ਪਨ ਵਿਰਤਿਯੋਵ ਪਟਿਪਕ੍ਖਸਮੁਚ੍ਛਿਨ੍ਦਨਸ੍ਸ ਮਗ੍ਗਕਿਚ੍ਚਤ੍ਤਾ. ਨ ਹਿ ਚੇਤਨਾ ਮਗ੍ਗਸਭਾਵਾ. ਸਮ੍ਮਪ੍ਪਧਾਨਸਤਿਪਟ੍ਠਾਨਵਸੇਨਾਤਿ ਚਤੁਬ੍ਬਿਧਸਮ੍ਮਪ੍ਪਧਾਨਚਤੁਬ੍ਬਿਧਸਤਿਪਟ੍ਠਾਨਵਸੇਨ ਚਤ੍ਤਾਰਿ ਨਾਮਾਨਿ ਲਭਤਿ ਅਨੁਪ੍ਪਨ੍ਨਾਕੁਸਲਾਨੁਪ੍ਪਾਦਨਾਦੀਨਂ ਕੁਸਲਾਨਞ੍ਚ ਵਡ੍ਢਨਤੋ. ਪੁਬ੍ਬਭਾਗੇਪਿ ਮਗ੍ਗਕ੍ਖਣੇਪੀਤਿ ਯਥਾ ਪੁਬ੍ਬਭਾਗੇ ਪਠਮਜ੍ਝਾਨਾਦਿਵਸੇਨ ਨਾਨਾ. ਏਵਂ ਮਗ੍ਗਕ੍ਖਣੇਪਿ. ਨ ਹਿ ਏਕੋਪਿ ਚ ਮਗ੍ਗਸਮਾਧਿ ਪਠਮਜ੍ਝਾਨਸਮਾਧਿਆਦਿਨਾਮਾਨਿ ਲਭਤਿ ਸਮ੍ਮਾਦਿਟ੍ਠਿਆਦੀਨਂ ਵਿਯ ਕਿਚ੍ਚਵਸੇਨ ਭੇਦਾਭਾਵਤੋ. ਤੇਨਾਹ ‘‘ਮਗ੍ਗਕ੍ਖਣੇਪਿ ਸਮ੍ਮਾਸਮਾਧਿਯੇਵਾ’’ਤਿ.

ਞਤ੍ਵਾ ਞਾਤਬ੍ਬਾਤਿ ਸਮ੍ਬਨ੍ਧੋ. ਵੁਦ੍ਧਿ ਨਾਮ ਵੇਪੁਲ੍ਲਂ ਭਿਯ੍ਯੋਭਾਵੋ ਪੁਨਪ੍ਪੁਨਂ ਉਪ੍ਪਾਦੋ ਏਵਾਤਿ ਆਹ ‘‘ਪੁਨਪ੍ਪੁਨਂ ਜਨੇਤੀ’’ਤਿ. ਅਭਿਨਿਬ੍ਬਤ੍ਤੇਤੀਤਿ ਅਭਿਵਡ੍ਢਂ ਪਾਪੇਨ੍ਤੋ ਨਿਬ੍ਬਤ੍ਤੇਤਿ. ਵਿਵਿਤ੍ਤਤਾਤਿ ਵਿਵਿਤ੍ਤਭਾਵੋ. ਸੋ ਹਿ ਵਿਵੇਚਨੀਯਤੋ ਵਿਵਿਚ੍ਚਤਿ, ਯਂ ਵਿਵਿਚ੍ਚਿਤ੍ਵਾ ਠਿਤਂ, ਤਦੁਭਯਮ੍ਪਿ ਇਧ ਵਿਵਿਤ੍ਤਭਾਵਸਾਮਞ੍ਞੇਨ ‘‘ਵਿਵਿਤ੍ਤਤਾ’’ਤਿ ਵੁਤ੍ਤਂ. ਤੇਸੁ ਪੁਰਿਮੋ ਵਿਵੇਚਨੀਯਤੋ ਵਿਵਿਚ੍ਚਮਾਨਤਾਯ ਵਿਵਿਚ੍ਚਨਕਿਰਿਯਾਯ ਸਮਙ੍ਗੀ ਧਮ੍ਮਸਮੂਹੋ ਤਾਯ ਏਵ ਵਿਵਿਚ੍ਚਨਕਿਰਿਯਾਯ ਵਸੇਨ ਵਿਵੇਕੋਤਿ ਗਹਿਤੋ. ਇਤਰੋ ਸਬ੍ਬਸੋ ਤਤੋ ਵਿਵਿਤ੍ਤਸਭਾਵਤਾਯ. ਤਤ੍ਥ ਯਸ੍ਮਿਂ ਧਮ੍ਮਪੁਞ੍ਜੇ ਸਮ੍ਮਾਦਿਟ੍ਠਿ ਪਵਤ੍ਤਤਿ, ਤਂ ਯਥਾਵੁਤ੍ਤਾਯ ਵਿਵਿਚ੍ਚਮਾਨਤਾਯ ਵਿਵੇਕਸਙ੍ਖਾਤਂ ਨਿਸ੍ਸਾਯੇਵ ਪਵਤ੍ਤਤਿ, ਇਤਰਂ ਪਨ ਤਂਨਿਨ੍ਨਤਾਤਂਆਰਮ੍ਮਣਤਾਹੀਤਿ ਵੁਤ੍ਤਂ ‘‘ਵਿਵੇਕਂ ਨਿਸ੍ਸਿਤਂ, ਵਿਵੇਕੇ ਵਾ ਨਿਸ੍ਸਿਤ’’ਨ੍ਤਿ.

ਯਥਾ ਵਾ ਵਿਵੇਕਵਸੇਨ ਪਵਤ੍ਤਂ ਝਾਨਂ ‘‘ਵਿਵੇਕਜ’’ਨ੍ਤਿ ਵੁਤ੍ਤਂ, ਏਵਂ ਵਿਵੇਕਵਸੇਨ ਪਵਤ੍ਤਾ ਸਮ੍ਮਾਦਿਟ੍ਠਿ ‘‘ਵਿਵੇਕਨਿਸ੍ਸਿਤਾ’’ਤਿ ਦਟ੍ਠਬ੍ਬਾ. ਨਿਸ੍ਸਯੋ ਚ ਵਿਪਸ੍ਸਨਾਮਗ੍ਗਾਨਂ ਵਸੇਨ ਮਗ੍ਗਫਲਾਨਂ ਵੇਦਿਤਬ੍ਬੋ. ਅਸਤਿਪਿ ਤਾਸਂ ਪੁਬ੍ਬਾਪਰਭਾਵੇ ‘‘ਪਟਿਚ੍ਚਸਮੁਪ੍ਪਾਦੋ’’ਤਿ ਏਤ੍ਥ ਪਚ੍ਚਯਾਨਂ ਸਮੁਪ੍ਪਾਦਨਂ ਵਿਯ ਅਭਿਨ੍ਨਧਮ੍ਮਾਧਾਰਾ ਨਿਸ੍ਸਯਭਾਵਨਾ ਸਮ੍ਭਵਨ੍ਤਿ. ਤਸ੍ਸ ਤਦਙ੍ਗ-ਸਮੁਚ੍ਛੇਦਨਿਸ੍ਸਰਣਵਿਵੇਕਨਿਸ੍ਸਿਤਤਂ ਵਤ੍ਵਾ ਪਟਿਪ੍ਪਸ੍ਸਦ੍ਧਿਵਿਵੇਕਨਿਸ੍ਸਿਤਤਾਯ ਅਵਚਨਂ ਅਰਿਯਮਗ੍ਗਭਾਵਨਾਯ ਵੁਚ੍ਚਮਾਨਤ੍ਤਾ. ਭਾਵਿਤਮਗ੍ਗਸ੍ਸ ਹਿ ਯੇ ਸਚ੍ਛਿਕਾਤਬ੍ਬਾ ਧਮ੍ਮਾ. ਤੇਸਂ ਕਿਚ੍ਚਂ ਪਟਿਪ੍ਪਸ੍ਸਦ੍ਧਿਵਿਵੇਕੋ. ਅਜ੍ਝਾਸਯਤੋਤਿ ‘‘ਨਿਬ੍ਬਾਨਂ ਸਚ੍ਛਿਕਰਿਸ੍ਸਾਮੀ’’ਤਿ ਮਹਨ੍ਤਅਜ੍ਝਾਸਯਤੋ. ਯਦਿਪਿ ਹਿ ਵਿਪਸ੍ਸਨਾਕ੍ਖਣੇ ਸਙ੍ਖਾਰਾਰਮ੍ਮਣਂ ਚਿਤ੍ਤਂ, ਸਙ੍ਖਾਰੇਸੁ ਪਨ ਆਦੀਨਵਂ ਸੁਟ੍ਠੁ, ਦਿਸ੍ਵਾ ਤਪ੍ਪਟਿਪਕ੍ਖੇ ਨਿਬ੍ਬਾਨੇ ਨਿਨ੍ਨਤਾਯ ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤੋ ਹੋਤਿ, ਉਣ੍ਹਾਭਿਭੂਤਸ੍ਸ ਪੁਗ੍ਗਲਸ੍ਸ ਸੀਤਨਿਨ੍ਨਚਿਤ੍ਤਤਾ ਵਿਯ. ਕੇਚਿ ਪਨ ‘‘ਯਥਾ ਸਭਾਵਤੋ, ਯਥਾ ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤਤਾ, ਏਵਂ ਪਟਿਪ੍ਪਸ੍ਸਦ੍ਧਿਵਿਵੇਕਨਿਸ੍ਸਿਤਤਾਪਿ ਸਿਯਾ’’ਤਿ ਵਦਨ੍ਤਿ. ਯਦਗ੍ਗੇਨ ਹਿ ਨਿਬ੍ਬਾਨਨਿਨ੍ਨਤਾ ਸਿਯਾ, ਤਦਗ੍ਗੇਨ ਫਲਨਿਨ੍ਨਤਾਪਿ ਸਿਯਾ ‘‘ਕੁਦਾਸ੍ਸੁ ਨਾਮਾਹਂ ਤਦਾਯਤਨਂ ਉਪਸਮ੍ਪਜ੍ਜ ਵਿਹਰੇਯ੍ਯ’’ਨ੍ਤਿ ਅਜ੍ਝਾਸਯਸਮ੍ਪਤ੍ਤਿਯਾ ਭਾਵਤੋ. ਯਸ੍ਮਾ ਪਹਾਨਵਿਨਯੋ ਵਿਯ ਰਾਗਨਿਰੋਧੋਪਿ ਇਧਾਧਿਪ੍ਪੇਤਵਿਵੇਕੇਨ ਅਤ੍ਥਤੋ ਨਿਬ੍ਬਿਸਿਟ੍ਠੋ, ਤਸ੍ਮਾ ਵੁਤ੍ਤਂ ਏਸ ਨਯੋ ਵਿਰਾਗਨਿਸ੍ਸਿਤਾਦੀਸੂਤਿ. ਤੇਨਾਹ ‘‘ਵਿਵੇਕਤ੍ਥਾ ਏਵ ਹਿ ਵਿਰਾਗਾਦਯੋ’’ਤਿ.

ਵੋਸ੍ਸਗ੍ਗਸਦ੍ਦੋ ਪਰਿਚ੍ਚਾਗਤ੍ਥੋ ਪਕ੍ਖਨ੍ਦਨਤ੍ਥੋ ਚਾਤਿ ਵੋਸ੍ਸਗ੍ਗਸ੍ਸ ਦੁਵਿਧਤਾ ਵੁਤ੍ਤਾ. ਵੋਸ੍ਸਜ੍ਜਨਞ੍ਹਿ ਪਹਾਨਂ, ਵਿਸ੍ਸਟ੍ਠਭਾਵੇਨ ਨਿਰਾਸਙ੍ਕਪਵਤ੍ਤਿ ਚ, ਤਸ੍ਮਾ ਵਿਪਸ੍ਸਨਾਕ੍ਖਣੇ ਤਦਙ੍ਗਵਸੇਨ, ਮਗ੍ਗਕ੍ਖਣੇ ਸਮੁਚ੍ਛੇਦਵਸੇਨ ਪਟਿਪਕ੍ਖਸ੍ਸ ਪਹਾਨਂ ਵੋਸ੍ਸਗ੍ਗੋ, ਤਥਾ ਵਿਪਸ੍ਸਨਾਕ੍ਖਣੇ ਤਂਨਿਨ੍ਨਭਾਵੇਨ, ਮਗ੍ਗਕ੍ਖਣੇ ਆਰਮ੍ਮਣਕਰਣੇਨ ਵਿਸ੍ਸਟ੍ਠਸਭਾਵਤਾ ਵੋਸ੍ਸਗ੍ਗੋਤਿ ਵੇਦਿਤਬ੍ਬਂ. ਤੇਨੇਵਾਹ ‘‘ਤਤ੍ਥ ਪਰਿਚ੍ਚਾਗਵੋਸ੍ਸਗ੍ਗੋ’’ਤਿਆਦਿ. ਅਯਂ ਸਮ੍ਮਾਦਿਟ੍ਠੀਤਿ ਅਯਂ ਮਿਸ੍ਸਕਵਸੇਨ ਵੁਤ੍ਤਾ ਸਮ੍ਮਾਦਿਟ੍ਠਿ. ਯਥਾਵੁਤ੍ਤੇਨ ਪਕਾਰੇਨਾਤਿ ਤਦਙ੍ਗਪ੍ਪਹਾਨਸਮੁਚ੍ਛੇਦਪ੍ਪਹਾਨਪਕਾਰੇਨ ਤਂਨਿਨ੍ਨਤਦਾਰਮ੍ਮਣਕਰਣਪ੍ਪਕਾਰੇਨ ਚ.

ਪੁਬ੍ਬੇ ਵੋਸ੍ਸਗ੍ਗਵਚਨਸ੍ਸੇਵ ਅਤ੍ਥਸ੍ਸ ਵੁਤ੍ਤਤ੍ਤਾ ਆਹ ‘‘ਸਕਲੇਨ ਵਚਨੇਨਾ’’ਤਿ. ਪਰਿਣਮਨ੍ਤਂ ਵਿਪਸ੍ਸਨਾਕ੍ਖਣੇ, ਪਰਿਣਤਂ ਮਗ੍ਗਕ੍ਖਣੇ. ਪਰਿਣਾਮੋ ਨਾਮ ਇਧ ਪਰਿਪਾਕੋਤਿ ਆਹ ‘‘ਪਰਿਪਚ੍ਚਨ੍ਤਂ ਪਰਿਪਕ੍ਕਞ੍ਚਾ’’ਤਿ. ਪਰਿਪਾਕੋ ਚ ਆਸੇਵਨਲਾਭੇਨ ਲਦ੍ਧਸਾਮਤ੍ਥਿਯਸ੍ਸ ਕਿਲੇਸੇ ਪਰਿਚ੍ਚਜਿਤੁਂ ਨਿਬ੍ਬਾਨਂ ਪਕ੍ਖਨ੍ਦਿਤੁਂ ਤਿਕ੍ਖਵਿਸਦਭਾਵੋ. ਤੇਨਾਹ ‘‘ਅਯ’’ਨ੍ਤਿਆਦਿ. ਏਸ ਨਯੋਤਿ ਯ੍ਵਾਯਂ ਨਯੋ ‘‘ਵਿਵੇਕਨਿਸ੍ਸਿਤ’’ਨ੍ਤਿਆਦਿਨਾ ਸਮ੍ਮਾਦਿਟ੍ਠਿਯਂ ਵੁਤ੍ਤੋ, ਸੇਸੇਸੁ ਸਮ੍ਮਾਸਙ੍ਕਪ੍ਪਾਦੀਸੁਪਿ ਏਸੇਵ ਨਯੋ, ਏਵਂ ਤਤ੍ਥ ਨੇਤਬ੍ਬਨ੍ਤਿ ਅਤ੍ਥੋ. ਪਟਿਚ੍ਚਾਤਿ ਨਿਸ੍ਸਾਯ. ਜਾਤਿਸਭਾਵਾਤਿ ਜਾਯਨਸਭਾਵਾ. ਸਕਲੋਤਿ ਅਨਵਸੇਸੋ, ਸਬ੍ਬੋਤਿ ਅਤ੍ਥੋ. ਨ ਕੋਚਿ ਮਗ੍ਗੋ ਸਾਵਸੇਸੋ ਹੁਤ੍ਵਾ ਸਮ੍ਭਵਤਿ. ਹੇਟ੍ਠਿਮੇ ਮਗ੍ਗੇ ਉਪ੍ਪਨ੍ਨੇ ਉਪਰਿਮੋ ਉਪ੍ਪਨ੍ਨੋ ਏਵ ਨਾਮ ਅਨਨ੍ਤਰਾਯੇਨ ਉਪ੍ਪਜ੍ਜਨਤੋ. ਵਵਸ੍ਸਗ੍ਗਤ੍ਥੇਤਿ ਵਚਸਾਯਤ੍ਥੇ. ਵਣ੍ਣਯਨ੍ਤੀਤਿ ਗੁਣਵਣ੍ਣਨਵਸੇਨ ਵਿਤ੍ਥਾਰੇਨ੍ਤਿ.

ਕਲ੍ਯਾਣਮਿਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਪਠਮਅਪੁਤ੍ਤਕਸੁਤ੍ਤਵਣ੍ਣਨਾ

੧੩੦. ਦਿਵ-ਸਦ੍ਦੋ ਦਿਵਾ-ਸਦ੍ਦੋ ਵਿਯ ਦਿਵਸਪਰਿਯਾਯੋ, ਤਸ੍ਮਾ ਵਿਸੇਸਨਭਾਵੇਨ ਵੁਚ੍ਚਮਾਨੋ ਦਿਵਸਦ੍ਦੋ ਅਤ੍ਥਵਿਸੇਸਂ ਦੀਪੇਤੀਤਿ ਆਹ ‘‘ਦਿਵਸਸ੍ਸ ਦਿਵਾ’’ਤਿਆਦਿ. ਸਂ ਵੁਚ੍ਚਤਿ ਧਨਂ, ਤਸ੍ਸ ਪਤੀਤਿ ਸਮ੍ਪਤਿ, ਧਨਸਾਮਿਕੋ, ਤਸ੍ਸ ਹਿਤਾਵਹਤ੍ਤਾ ਸਾਪਤੇਯ੍ਯਨ੍ਤਿ ਆਹ ‘‘ਸਾਪਤੇਯ੍ਯਨ੍ਤਿ ਧਨ’’ਨ੍ਤਿ. ਤਸ੍ਸ ਗੇਹੇ ਕਤਾਕਤਭਣ੍ਡਸ੍ਸ ਅਤਿਬਹੁਭਾਵਤੋ ਵਿਮ੍ਹਯਪ੍ਪਤ੍ਤੋ ਰਾਜਾ ‘‘ਕੋ ਪਨ ਵਾਦੋ’’ਤਿ ਆਹ. ਕਾਲ਼ਲੋਹਂ ਨਾਮ ਅਯੋਫਲਂ. ਕਚ੍ਛਪਾਦਿਰੂਪੇਹਿਪਿ ਸੋਵਣ੍ਣਾਦੀਨਿ ਠਪੇਨ੍ਤਿ. ਸਕੁਣ੍ਡਕਭਤ੍ਤਨ੍ਤਿ ਸਕੁਣ੍ਡੇਹਿ ਵਾ ਸਥੁਸੇਹਿ ਵਾ ਪਕ੍ਕਭਤ੍ਤਂ. ਬਿਲਙ੍ਗਂ ਵੁਚ੍ਚਤਿ ਧਞ੍ਞਬਿਲਙ੍ਗਂ, ਆਰਨਾਲਨ੍ਤਿਪਿ ਵੁਚ੍ਚਤਿ, ਤਂ ਦੁਤਿਯਂ ਅਸ੍ਸਾਤਿ ਬਿਲਙ੍ਗਦੁਤਿਯਂ. ਤਞ੍ਹਿ ਕਞ੍ਜਿਤੋ ਨਿਬ੍ਬਤ੍ਤਤ੍ਤਾ ਕਞ੍ਜਿਕਂ ਨਾਮ. ਤੀਹਿ ਪਕ੍ਖੇਹਿ ਵਤ੍ਥਖਣ੍ਡੇਹਿ ਕਤਨਿਵਾਸਨਂ ਤਿਪਕ੍ਖਵਸਨਂ. ਤੇਨਾਹ ‘‘ਤੀਣਿ…ਪੇ… ਨਿਵਾਸਨ’’ਨ੍ਤਿ.

ਅਸਨ੍ਤੋ ਨੀਚੋ ਪੁਰਿਸੋਤਿ ਅਸਪ੍ਪੁਰਿਸੋਤਿ ਆਹ ‘‘ਲਾਮਕਪੁਰਿਸੋ’’ਤਿ. ਕਮ੍ਮਸ੍ਸ ਨਿਬ੍ਬਤ੍ਤਭਾਵੇਨ ਓਤਰਣਤਾਯ ਫਲਂ ਅਗ੍ਗਂ ਨਾਮ, ਉਪਰਿਭੂਮਿਗਤਤ੍ਤਾ ਉਦ੍ਧਂ ਅਗ੍ਗਂ ਅਸ੍ਸਾਤਿ ਉਦ੍ਧਗ੍ਗਿਕਂ. ਦਕ੍ਖਿਣਨ੍ਤਿ ਦਾਨਮਾਹ. ਸਗ੍ਗੋ ਨਾਮ ਕਾਮਭਵੂਪਪਤ੍ਤਿਭਵੋ, ਤਸ੍ਸ ਨਿਬ੍ਬਤ੍ਤਨਤੋ ‘‘ਸਗ੍ਗਸ੍ਸ ਹਿਤਾ’’ਤਿ ਵੁਤ੍ਤਂ. ਤਤ੍ਰੁਪਪਤ੍ਤਿਜਨਨਤੋਤਿ ਤਤ੍ਰ ਉਪਪਤ੍ਤਿਯਾ ਜਨਨਤੋ, ਉਪ੍ਪਾਦਨਤੋਤਿ ਅਤ੍ਥੋ.

ਸੇਤਂ ਉਦਕਂ ਏਤਿਸ੍ਸਾਤਿ ਸੇਤੋਦਕਾ. ਸੋ ਯੇਨ ਭਾਵੇਨ ਯਤ੍ਥ ਪਾਕਟਤਰੋ ਹੁਤ੍ਵਾ ਦਿਸ੍ਸਤਿ, ਤਂ ਦਸ੍ਸੇਤੁਂ ‘‘ਵੀਚੀਨਂ ਭਿਨ੍ਨਟ੍ਠਾਨੇ’’ਤਿ ਆਹ. ਸੁਖੋਤਰਣਟ੍ਠਾਨਤਾਯ ਕਦ੍ਦਮਾਦਿਦੋਸਵਿਰਹਤੋ ਚ ਸੁਨ੍ਦਰਤਿਤ੍ਥਾ. ਤਂ ਅਪੇਯ੍ਯਮਾਨਨ੍ਤਿ ਤਂ ਉਦਕਂ ਕੇਨਚਿ ਅਪਰਿਭੁਞ੍ਜਿਯਮਾਨਂ. ਅਤ੍ਤਨਾ ਕਤ੍ਤਬ੍ਬਕਿਚ੍ਚਕਰੋਤਿ ਅਤ੍ਤਨਾ ਕਾਤਬ੍ਬਕਮ੍ਮਸਙ੍ਖਾਤਕਿਚ੍ਚਕਰੋ, ਪਰਿਭੋਗਵਸੇਨ ਚੇਵ ਸਙ੍ਗਹੇਤਬ੍ਬਸਙ੍ਗਣ੍ਹਨਵਸੇਨ ਚ ਨਿਯੋਜਕੋਤਿ ਅਤ੍ਥੋ. ਕੁਸਲਕਿਚ੍ਚਕਰੋਤਿ ਅਤ੍ਤਨਾ ਕਾਤਬ੍ਬਪੁਞ੍ਞਕਰੋ.

ਪਠਮਅਪੁਤ੍ਤਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਦੁਤਿਯਅਪੁਤ੍ਤਕਸੁਤ੍ਤਵਣ੍ਣਨਾ

੧੩੧. ਪਿਣ੍ਡਪਾਤੇਨਾਤਿ ਸਹਯੋਗੇ ਕਰਣਵਚਨਂ. ਪਟਿਪਾਦਨਂ ਤੇਨ ਸਹ ਯੋਜਨਨ੍ਤਿ ਆਹ ‘‘ਪਿਣ੍ਡਪਾਤੇਨ ਸਦ੍ਧਿਂ ਸਂਯੋਜੇਸਿ, ਪਿਣ੍ਡਪਾਤਂ ਅਦਾਸੀਤਿ ਅਤ੍ਥੋ’’ਤਿ. ‘‘ਪਣੀਤਭੋਜਨਂ ਭੁਞ੍ਜਿਤ੍ਵਾ’’ਤਿ ਵੁਤ੍ਤਂ, ਪਾਲ਼ਿਯਂ ਪਨ ‘‘ਕਣਾਜਕਂ ਭੁਞ੍ਜਤਿ ਬਿਲਙ੍ਗਦੁਤਿਯ’’ਨ੍ਤਿ. ਤਂ ਤਂ ਪਵਤ੍ਤਿਤਂ ਯੇਭੁਯ੍ਯਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਇਦਾਨਿ ‘‘ਇਮਸ੍ਸ ਸੇਟ੍ਠਿਸ੍ਸ ਕਸ੍ਸਚਿ ਸਮਣਸ੍ਸ ਵਾ ਬ੍ਰਾਹ੍ਮਣਸ੍ਸ ਵਾ ਦੇਥਾ’’ਤਿ ਵਚਨਂ ਨ ਸੁਤਪੁਬ੍ਬਂ, ਯਸ੍ਮਾ ਪਚ੍ਚੇਕਬੁਦ੍ਧਾ ਨਾਮ ਅਤ੍ਤਨੋ ਗੁਣਾਨੁਭਾਵੇਹਿ ਲੋਕੇ ਪਾਕਟਾ ਸਞ੍ਜਾਤਾ ਏਵ ਹੋਨ੍ਤਿ, ਤਸ੍ਮਾ ਸੇਟ੍ਠਿਭਰਿਯਾਯ ‘‘ਨ ਯਸ੍ਸ ਵਾ ਤਸ੍ਸ ਵਾ’’ਤਿਆਦਿ ਚਿਨ੍ਤਿਤਂ. ਤਥਾ ਹਿ ਤੇਸਂ ਦੇਨ੍ਤਾਪਿ ਸਕ੍ਕਚ੍ਚਂ ਯੇਭੁਯ੍ਯੇਨ ਪਣੀਤਮੇਵ ਦੇਨ੍ਤਿ. ਨਾਸਾਪੁਟਂ ਪਹਰਿ ਅਤ੍ਤਨੋ ਆਨੁਭਾਵੇਨ. ਸੋ ਲੁਦ੍ਧਤਾਯ ‘‘ਬਹੁ ਵਤ ਧਞ੍ਞਂ ਮਮਸ੍ਸਾ’’ਤਿ ਚਿਤ੍ਤਂ ਸਂਯਮੇਤੁਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ.

ਵਿਪ੍ਪਟਿਸਾਰੁਪ੍ਪਨ੍ਨਾਕਾਰਂ ਦਸ੍ਸੇਤੁਂ ‘‘ਵਰਮੇਤ’’ਨ੍ਤਿਆਦਿ ਵੁਤ੍ਤਂ. ‘‘ਇਮਸ੍ਸ ਸਮਣਸ੍ਸ ਪਿਣ੍ਡਪਾਤਂ ਦੇਹੀ’’ਤਿ ਵਦਤੋ ਨ ਏਕਾਯ ਏਵ ਜਵਨਵੀਥਿਯਾ ਵਸੇਨ ਅਤ੍ਥਸਿਦ੍ਧਿ. ਅਥ ਖੋ ਤਤ੍ਥ ਆਦਿਤੋ ਪਵਤ੍ਤਜਵਨਵਾਰੋਪਿ ਅਤ੍ਥਿ ਮਜ੍ਝੇ ਪਵਤ੍ਤਜਵਨਵਾਰੋਪਿ, ਤਂ ਸਨ੍ਧਾਯਾਹ ‘‘ਪੁਬ੍ਬਪਚ੍ਛਿਮਚੇਤਨਾਵਸੇਨਾ’’ਤਿ. ਏਕਾ ਚੇਤਨਾ ਦ੍ਵੇ ਪਟਿਸਨ੍ਧਿਯੋ ਨ ਦੇਤੀਤਿ ਏਤ੍ਥ ਸਾਕੇਤਪਞ੍ਹਵਸੇਨ ਨਿਚ੍ਛਯੋ ਵੇਦਿਤਬ੍ਬੋ. ਚੁਦ੍ਦਸਨ੍ਨਂ ਚੇਤਨਾਨਂ ਪੁਬ੍ਬੇ ਪੁਰੇਤਰਂ ਕਤਤ੍ਤਾ ਪੁਰਾਣਂ.

ਪਰਿਗਯ੍ਹਤੀਤਿ ਪਰਿਗ੍ਗਹੋਤਿ ਆਹ ‘‘ਪਰਿਗ੍ਗਹਿਤਂ ਵਤ੍ਥੁ’’ਨ੍ਤਿ. ਅਨ੍ਵਾਯ ਉਪਨਿਸ੍ਸਾਯ ਜੀਵਨ੍ਤੀਤਿ ਅਨੁਜੀਵਿਨੋ. ਸਬ੍ਬਮੇਤਨ੍ਤਿ ਧਨਧਞ੍ਞਾਦਿਸਬ੍ਬਂ ਏਤਂ ਯਥਾਵੁਤ੍ਤਪਰਿਗ੍ਗਹਵਤ੍ਥੁਂ. ਨਿਕ੍ਖਿਪ੍ਪਗਾਮਿਨਨ੍ਤਿ ਨਿਕ੍ਖਿਪਿਤਬ੍ਬਤਾਗਾਮਿਨਂ. ਨਿਕ੍ਖਿਪਿਤਬ੍ਬਸਭਾਵਂ ਹੋਤੀਤਿ ਆਹ ‘‘ਨਿਕ੍ਖਿਪ੍ਪਸਭਾਵ’’ਨ੍ਤਿ. ਪਹਾਯ ਗਮਨੀਯਨ੍ਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਪਰਿਚ੍ਚਜਿਤਬ੍ਬਸਭਾਵਮੇਵਾ’’ਤਿ.

ਦੁਤਿਯਅਪੁਤ੍ਤਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਵਗ੍ਗੋ

੧. ਪੁਗ੍ਗਲਸੁਤ੍ਤਵਣ੍ਣਨਾ

੧੩੨. ‘‘ਨੀਚੇ ਕੁਲੇ ਪਚ੍ਚਾਜਾਤੋ’’ਤਿਆਦਿ ਅਪ੍ਪਕਾਸਨਭਾਵੇਨ ਤਮਤੀਤਿ ਤਮੋ, ਤੇਨ ਤਮੇਨ ਯੁਤ੍ਤੋਤਿ ਤਮੋ ਪੁਗ੍ਗਲੋ ਵੁਚ੍ਚਤਿ, ਤਂਯੋਗਤੋ ਪੁਗ੍ਗਲਸ੍ਸ ਤਬ੍ਬੋਹਾਰੋ ਯਥਾ ‘‘ਮਚ੍ਛੇਰਯੋਗਤੋ ਮਚ੍ਛੇਰੋ’’ਤਿ. ਤਸ੍ਮਾ ਤਮੋਤਿ ਅਪ੍ਪਕਾਸਨਭਾਵੇਨ ਤਮੋ ਤਮਭੂਤੋ ਅਨ੍ਧਕਾਰੋ ਵਿਯ ਜਾਤੋ, ਅਨ੍ਧਕਾਰਤ੍ਤਂ ਵਾ ਪਤ੍ਤੋਤਿ ਅਤ੍ਥੋ. ਵੁਤ੍ਤਲਕ੍ਖਣਂ ਤਮਮੇਵ ਪਰਮ੍ਪਰਤੋ ਅਯਨਂ ਗਤਿ ਨਿਟ੍ਠਾ ਏਤਸ੍ਸਾਤਿ ਤਮਪਰਾਯਣੋ, ਤਮਪਰਾਯਣਤਂ ਵਾ ਪਤ੍ਤੋਤਿ ਅਤ੍ਥੋ. ਞਾਯੇਨਪਿ ਤਮਗ੍ਗਹਣੇਨ ਖਨ੍ਧਤਮੋਵ ਕਥਿਤੋ, ਨ ਅਨ੍ਧਕਾਰਤਮੋ. ਖਨ੍ਧਤਮੋਤਿ ਚ ਸਮ੍ਪਤ੍ਤਿਰਹਿਤਾ ਖਨ੍ਧਪਵਤ੍ਤਿਯੇਵ ਦਟ੍ਠਬ੍ਬਾ. ‘‘ਉਚ੍ਚੇ ਕੁਲੇ ਪਚ੍ਚਾਜਾਤੋ’’ਤਿਆਦਿ ਪਕਾਸਨਭਾਵੇਨ ਜੋਤੇਤੀਤਿ ਜੋਤਿ, ਤੇਨ ਜੋਤਿਨਾ ਯੁਤ੍ਤੋਤਿਆਦਿ ਸਬ੍ਬਂ ਤਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਤਰੇ ਦ੍ਵੇਤਿ ਜੋਤਿਤਮਪਰਾਯਣੋ ਜੋਤਿਜੋਤਿਪਰਾਯਣੋਤਿ ਇਤਰੇ ਦ੍ਵੇ ਪੁਗ੍ਗਲੇ.

ਵੇਣੁਵੇਤ੍ਤਾਦਿਕੇਹਿ ਪੇਲ਼ਾਦਿਕਾਰਕਾ ਵਿਲੀਵਕਾਰਕਾ. ਮਿਗਮਚ੍ਛਾਦੀਨਂ ਨਿਸਾਦਨਤੋ ਨੇਸਾਦਾ, ਮਾਗਵਿਕਮਚ੍ਛਬਨ੍ਧਾਦਯੋ. ਰਥੇਸੁ ਚਮ੍ਮੇਨ ਹਨਨਕਰਣਤੋ ਰਥਕਾਰਾ ਚਮ੍ਮਕਾਰਾ ਵੁਤ੍ਤਾ. ‘‘ਪੁ’’ ਇਤਿ ਕਰੀਸਸ੍ਸ ਨਾਮਂ, ਤਂ ਕੁਸੇਨ੍ਤਿ ਅਪਨੇਨ੍ਤੀਤਿ ਪੁਕ੍ਕੁਸਾ, ਪੁਪ੍ਫਛਡ੍ਡਕਾ. ਦੁਬ੍ਬਣ੍ਣੋਤਿ ਵਿਰੂਪੋ. ਓਕੋਟਿਮਕੋਤਿ ਆਰੋਹਾਭਾਵੇਨ ਹੇਟ੍ਠਿਮਕੋਟਿਕੋ, ਰਸ੍ਸਕਾਯੋਤਿ ਅਤ੍ਥੋ. ਤੇਨਾਹ ‘‘ਲਕੁਣ੍ਡਕੋ’’ਤਿ. ਲਕੁ ਵਿਯ ਘਟਿਕਾ ਵਿਯ ਡੇਤਿ ਪਵਤ੍ਤਤੀਤਿ ਹਿ ਲਕੁਣ੍ਡਕੋ, ਰਸ੍ਸੋ. ਕਣਤਿ ਨਿਮੀਲਤੀਤਿ ਕਾਣੋ. ਤਂ ਪਨਸ੍ਸ ਨਿਮੀਲਨਂ ਏਕੇਨ ਅਕ੍ਖਿਨਾ ਦ੍ਵੀਹਿਪਿ ਵਾਤਿ ਆਹ ‘‘ਏਕਕ੍ਖਿਕਾਣੋ ਵਾ ਉਭਯਕ੍ਖਿਕਾਣੋ ਵਾ’’ਤਿ. ਕੁਣਨਂ ਕੁਣੋ, ਹਤ੍ਥਵੇਕਲ੍ਲਂ, ਸੋ ਏਤਸ੍ਸ ਅਤ੍ਥੀਤਿ ਕੁਣੀ. ਖਞ੍ਜੋ ਵੁਚ੍ਚਤਿ ਪਾਦਵਿਕਲੋ. ਹੇਟ੍ਠਿਮਕਾਯਸਙ੍ਖਾਤੋ ਸਰੀਰਸ੍ਸ ਪਕ੍ਖੋ ਪਦੇਸੋ ਹਤੋ ਅਸ੍ਸਾਤਿ ਪਕ੍ਖਹਤੋ. ਤੇਨਾਹ ‘‘ਪੀਠਸਮ੍ਪੀ’’ਤਿ. ਪਦੀਪੇ ਪਦੀਪਨੇ ਏਤਬ੍ਬਂ ਨੇਤਬ੍ਬਨ੍ਤਿ ਪਦੀਪੇਯ੍ਯਂ, ਤੇਲਕਪਲ੍ਲਾਦਿਉਪਕਰਣਂ. ਵੁਤ੍ਤਨ੍ਤਿ ਅਟ੍ਠਕਥਾਯਂ ਵੁਤ੍ਤਂ.

ਆਗਮਨਵਿਪਤ੍ਤੀਤਿ ਆਗਮਨਟ੍ਠਾਨਵਸੇਨ ਵਿਪਤ੍ਤਿ ਆਗਮੋ ਏਤ੍ਥਾਤਿ ਕਤ੍ਵਾ. ਪੁਬ੍ਬੁਪ੍ਪਨ੍ਨਪਚ੍ਚਯਵਿਪਤ੍ਤੀਤਿ ਪਠਮੁਪ੍ਪਨ੍ਨਪਚ੍ਚਯਵਸੇਨ ਵਿਪਤ੍ਤਿ. ਚਣ੍ਡਾਲਾਦਿਸਭਾਵਾ ਹਿਸ੍ਸ ਮਾਤਾਪਿਤਰੋ ਪਠਮੁਪ੍ਪਨ੍ਨਪਚ੍ਚਯਾ, ਪਠਮੁਪ੍ਪਤ੍ਤਿਯਾ ਵਾ ਪਚ੍ਚਯਾ, ਤੇਹੇਵਸ੍ਸ ਵਿਪਤ੍ਤਿ ਏਵ, ਨ ਸਮ੍ਪਤ੍ਤਿ. ਪਵਤ੍ਤਪਚ੍ਚਯਵਿਪਤ੍ਤੀਤਿ ਪਵਤ੍ਤੇ ਸੁਖਪਚ੍ਚਯਵਿਪਤ੍ਤਿ. ਤਾਦਿਸੇ ਨਿਹੀਨਕੁਲੇ ਉਪ੍ਪਨ੍ਨੋਪਿ ਕੋਚਿ ਵਿਭਵਸਮ੍ਪਨ੍ਨੋ ਸਿਯਾ, ਅਯਂ ਪਨ ਦੁਗ੍ਗਤੋ ਦੁਰੂਪੋ ਹੋਤਿ. ਆਜੀਵੁਪਾਯਵਿਪਤ੍ਤੀਤਿ ਆਜੀਵਨੁਪਾਯਵਸੇਨ ਵਿਪਤ੍ਤਿ. ਸੁਖੇਨ ਹਿ ਜੀਵਿਕਂ ਪਵਤ੍ਤੇਤੁਂ ਉਪਾਯਭੂਤਾ ਹਤ੍ਥਿਸਿਪ੍ਪਾਦਯੋ ਇਮਸ੍ਸ ਨਤ੍ਥਿ, ਪੁਪ੍ਫਛਡ੍ਡਕਸਿਲਾਕੋਟ੍ਟਨਾਦਿਕਮ੍ਮਂ ਪਨ ਕਤ੍ਵਾ ਜੀਵਿਕਂ ਪਵਤ੍ਤੇਤਿ. ਤੇਨਾਹ ‘‘ਕਸਿਰਵੁਤ੍ਤਿਕੇ’’ਤਿ. ਅਤ੍ਤਭਾਵਵਿਪਤ੍ਤੀਤਿ ਉਪਧਿਵਿਪਤ੍ਤਿ. ਦੁਕ੍ਖਕਾਰਣਸਮਾਯੋਗੋਤਿ ਕਾਯਿਕਚੇਤਸਿਕਦੁਕ੍ਖੁਪ੍ਪਤ੍ਤਿਯਾ ਪਚ੍ਚਯਸਮੋਧਾਨਂ. ਸੁਖਕਾਰਣਵਿਪਤ੍ਤੀਤਿ ਸੁਖਪਚ੍ਚਯਪਰਿਹਾਨਿ. ਉਪਭੋਗਵਿਪਤ੍ਤੀਤਿ ਉਪਭੋਗਸੁਖਸ੍ਸ ਵਿਨਾਸੋ ਅਨੁਪਲਦ੍ਧਿ. ਜੋਤਿ ਚੇਵ ਜੋਤਿਪਰਾਯਣਭਾਵੋ ਚ ਸੁਕ੍ਕਪਕ੍ਖੋ.

ਦਸਹਿ ਅਕ੍ਕੋਸਵਤ੍ਥੂਹੀਤਿ ਲਕ੍ਖਣਵਚਨਂ ਏਤਂ ਯਥਾ ‘‘ਯਦਿ ਮੇ ਬ੍ਯਾਧਿਤਾ ਹੋਨ੍ਤਿ, ਦਾਤਬ੍ਬਮਿਦਮੋਸਧ’’ਨ੍ਤਿ, ਤਸ੍ਮਾ ਦਸਹਿ ਅਕ੍ਕੋਸਵਤ੍ਥੂਹਿ, ਤਤ੍ਥ ਵਾ ਯੇਨ ਕੇਨਚਿ ਪਰਿਭਾਸਤੀਤਿ ਅਤ੍ਥੋ. ਏਕਗ੍ਗਚਿਤ੍ਤੋਤਿ ਦਾਨਂ ਦਾਤੁਂ ਅਪੇਕ੍ਖਿਤਤਾਯ ਸਮਾਹਿਤਚਿਤ੍ਤੋ.

ਪੁਗ੍ਗਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਅਯ੍ਯਿਕਾਸੁਤ੍ਤਵਣ੍ਣਨਾ

੧੩੩. ਜਰਾਜਿਣ੍ਣਾਤਿ ਜਰਾਯ ਜਿਣ੍ਣਾ. ਤੇਨ ਪਾਕਟਜਰਾਯ ਮਤ੍ਥਕਪ੍ਪਤ੍ਤਿਮਾਹ. ਵਯੋਵੁਡ੍ਢਾਤਿ ਵਯਸਾ ਵੁਡ੍ਢਾ. ਤੇਨ ਪਚ੍ਛਿਮਵਯਸ੍ਸ ਓਸਕ੍ਕਸਮ੍ਪਵਤ੍ਤਿਂ ਵਦਤਿ. ਜਾਤਿਮਹਲ੍ਲਿਕਾਤਿ ਜਾਤਿਮਹਤ੍ਤਗਤਾ. ਚਿਰਕਾਲਂ ਅਤਿਕ੍ਕਨ੍ਤਾਤਿ ਦ੍ਵੇ ਤਯੋ ਰਾਜਪਰਿਵਟ੍ਟੇ ਵੀਤਿਵਤ੍ਤਾ. ਵਯੋ-ਸਦ੍ਦੋ ਸਾਧਾਰਣਵਚਨੋਪਿ ਜਿਣ੍ਣਸਦ੍ਦਸਨ੍ਨਿਧਾਨਤੋ ਓਸਾਨਵਯਂ ਏਵ ਵਦਤੀਤਿ ਆਹ ‘‘ਪਚ੍ਛਿਮਵਯਂ ਸਮ੍ਪਤ੍ਤਾ’’ਤਿ. ਅਯ੍ਯਿਕਾਤਿ ਮਾਤਾਮਹਿਂ ਸਨ੍ਧਾਯ ਵਦਤਿ. ਹਤ੍ਥੀ ਏਵ ਰਤਨਭੂਤੋ ਹਤ੍ਥਿਰਤਨਨ੍ਤਿ ਆਹ ‘‘ਸਤਸਹਸ੍ਸਗ੍ਘਨਕੇਨਾ’’ਤਿਆਦਿ. ਸਬ੍ਬਾਨਿ ਤਾਨੀਤਿ ਕੁਮ੍ਭਕਾਰਭਾਜਨਾਨਿ, ਤੇਹਿ ਸਦ੍ਧਿਂ ਸਤ੍ਤਸਨ੍ਤਾਨਸ੍ਸ ਪਮਾਣਂ ਦਸ੍ਸੇਨ੍ਤੋ ‘‘ਤੇਸੁ ਹੀ’’ਤਿਆਦਿਮਾਹ, ਤਂ ਸੁਵਿਞ੍ਞੇਯ੍ਯਮੇਵ.

ਅਯ੍ਯਿਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਇਸ੍ਸਤ੍ਤਸੁਤ੍ਤਵਣ੍ਣਨਾ

੧੩੫. ਅਟ੍ਠੁਪ੍ਪਤ੍ਤਿਕੋਤਿ ਏਤ੍ਥ ਕਾ ਅਸ੍ਸ ਅਟ੍ਠੁਪ੍ਪਤ੍ਤਿ? ਤਿਤ੍ਥਿਯਾਨਂ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਅਲਾਭਾਯ ਅਯਸਾਯ ਪਰਿਸਕ੍ਕਨਂ. ਤਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਭਗਵਤੋ ਕਿਰਾ’’ਤਿਆਦਿ ਵੁਤ੍ਤਂ. ਯਥਾ ਤਂ ਸਬ੍ਬਦਿਸਾਸੁ ਯਮਕਮਹਾਮੇਘੋ ਉਟ੍ਠਹਿਤ੍ਵਾ ਮਹਾਓਘਂ ਵਿਯ ਸਬ੍ਬਾ ਪਾਰਮਿਯੋ ‘‘ਇਮਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦਸ੍ਸਾਮਾ’’ਤਿ ਸਮ੍ਪਿਣ੍ਡਿਤਾ ਵਿਯ ਲਾਭਸਕ੍ਕਾਰਮਹੋਘਂ ਨਿਬ੍ਬਤ੍ਤਯਿਂਸੁ. ਤਤੋ ਤਤੋ ਅਨ੍ਨਪਾਨਯਾਨਵਤ੍ਥਮਾਲਾਗਨ੍ਧਵਿਲੇਪਨਾਦਿਹਤ੍ਥਾ ਖਤ੍ਤਿਯਬ੍ਰਾਹ੍ਮਣਾਦਯੋ ਆਗਨ੍ਤ੍ਵਾ – ‘‘ਕਹਂ ਭਗਵਾ, ਕਹਂ ਦੇਵਦੇਵੋ ਨਰਾਸਭੋ ਲੋਕਨਾਥੋ’’ਤਿ ਭਗਵਨ੍ਤਂ ਪਰਿਯੇਸਨ੍ਤਿ, ਸਕਟਸਤੇਹਿਪਿ ਪਚ੍ਚਯੇ ਆਹਰਿਤ੍ਵਾ ਓਕਾਸਂ ਅਲਭਮਾਨਾ ਸਮਨ੍ਤਾ ਗਾਵੁਤਪ੍ਪਮਾਣਮ੍ਪਿ ਸਕਟਧੁਰੇਨ ਸਕਟਧੁਰਂ ਆਹਚ੍ਚ ਤਿਟ੍ਠਨ੍ਤਿ ਚੇਵ ਅਨੁਵਤ੍ਤਨ੍ਤਿ ਚ ਅਨ੍ਧਕਵਿਨ੍ਦਬ੍ਰਾਹ੍ਮਣਾਦਯੋ ਵਿਯ. ਸਬ੍ਬਂ ਖਨ੍ਧਕੇ (ਮਹਾਵ. ੨੮੨) ਤੇਸੁ ਤੇਸੁ ਸੁਤ੍ਤੇਸੁ ਚ ਆਗਤਨਯੇਨ ਵੇਦਿਤਬ੍ਬਂ. ਯਥਾ ਚ ਭਗਵਤੋ, ਏਵਂ ਭਿਕ੍ਖੁਸਙ੍ਘਸ੍ਸਪਿ. ਵੁਤ੍ਤਮ੍ਪਿ – ‘‘ਤੇਨ ਖੋ ਪਨ ਸਮਯੇਨ ਭਗਵਾ ਸਕ੍ਕਤੋ ਹੋਤਿ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਲਾਭੀ ਚੀਵਰ…ਪੇ… ਪਰਿਕ੍ਖਾਰਾਨਂ, ਭਿਕ੍ਖੁਸਙ੍ਘੋਪਿ ਖੋ’’ਤਿਆਦਿ (ਉਦਾ. ੩੮), ਤਥਾ ‘‘ਯਾਵਤਾ ਖੋ, ਚੁਨ੍ਦ, ਏਤਰਹਿ ਸਙ੍ਘੋ ਵਾ ਗਣੋ ਵਾ ਲੋਕੇ ਉਪ੍ਪਨ੍ਨੋ, ਨਾਹਂ, ਚੁਨ੍ਦ, ਅਞ੍ਞਂ ਏਕਂ ਸਙ੍ਘਮ੍ਪਿ ਏਕਂ ਗਣਮ੍ਪਿ ਸਮਨੁਪਸ੍ਸਾਮਿ ਏਵਂ ਲਾਭਗ੍ਗਯਸਗ੍ਗਪ੍ਪਤ੍ਤਂ, ਯਥਰਿਵਾਯਂ, ਚੁਨ੍ਦ, ਭਿਕ੍ਖੁਸਙ੍ਘੋ’’ਤਿ (ਦੀ. ਨਿ. ੩.੧੭੬). ਏਵਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰੇਨ. ਨਿਜ੍ਝਤ੍ਤਿਨ੍ਤਿ ਸਞ੍ਞਤ੍ਤਿਂ. ਨਨ੍ਤਿ ਕਥਂ.

ਏਵਂ ਪੁਚ੍ਛਿਤੁਂ ਅਯੁਤ੍ਤਂ ਤਿਤ੍ਥਿਯਾਨਂ ਕਥਾ ਮਹਾਜਨਸਨ੍ਨਿਪਾਤੇ ਨਿਯ੍ਯਾਤਿਤਾ ਹੋਤੀਤਿ. ਤਸ੍ਮਿਂ ਦਾਤਬ੍ਬਂ, ਚਿਤ੍ਤਪ੍ਪਸਾਦਮਤ੍ਤੇਨ ਦੇਨ੍ਤੇਪਿ ਹਿ ਪੁਞ੍ਞਂ ਪਵਡ੍ਢਤਿ. ਆਰੋਚਿਤਂ ਅਤ੍ਤਨੋਤਿ ਅਧਿਪ੍ਪਾਯੋ. ਭਗਵਾਤਿ ਸਤ੍ਥੁ ਆਮਨ੍ਤਨਂ. ਚਿਤ੍ਤਂ ਨਾਮ ਯਥਾਪਚ੍ਚਯਂ ਪਵਤ੍ਤਮਾਨਂ ਨਿਗਣ੍ਠਾ…ਪੇ… ਪਸੀਦਤਿ ਪਸਨ੍ਨਸ੍ਸਾਤਿ ਅਧਿਪ੍ਪਾਯੋ. ਪੁਬ੍ਬੇ ਅਵਿਸੇਸਤੋ ਦੇਯ੍ਯਧਮ੍ਮਸ੍ਸ ਦਾਤਬ੍ਬਟ੍ਠਾਨਂ ਨਾਮ ਪੁਚ੍ਛਿਤਂ, ਇਦਾਨਿ ਤਸ੍ਸ ਮਹਪ੍ਫਲਭਾਵਕਰੋ ਦਕ੍ਖਿਣੇਯ੍ਯਵਿਸੇਸੋਤਿ ਆਹ ‘‘ਅਞ੍ਞਂ ਤਯਾ ਪਠਮਂ ਪੁਚ੍ਛਿਤਂ, ਅਞ੍ਞਂ ਪਚ੍ਛਾ’’ਤਿ. ਸਲ੍ਲਕ੍ਖੇਹਿ ਏਤਂ. ਪਚ੍ਛਿਮਂ ਪੁਰਿਮੇਨ ਸਦ੍ਧਿਂ ਆਨੇਹੀਤਿ ਅਧਿਪ੍ਪਾਯੋ. ਪੁਚ੍ਛਿਤਸ੍ਸ ਨਾਮ ਪਞ੍ਹਸ੍ਸ ਕਥਨਂ ਮਯ੍ਹਮੇਵ ਭਾਰੋ. ਸਮੁਪਬ੍ਯੂਲ਼੍ਹੋਤਿ ਏਕਤੋ ਸੇਨਾਯ ਰਾਸਿਵਸੇਨ ਸਮ੍ਪਿਣ੍ਡਿਤੋਤਿ ਅਤ੍ਥੋ. ਤੇਨਾਹ ‘‘ਰਾਸਿਭੂਤੋ’’ਤਿ. ਅਸਿਕ੍ਖਿਤੋਤਿ ਸਤ੍ਤਟ੍ਠਸਂਵਚ੍ਛਰਾਨਿ ਧਨੁਸਿਪ੍ਪੇਨ ਸਿਕ੍ਖਿਤੋ. ਧਨੁਸਿਪ੍ਪਂ ਸਿਕ੍ਖਿਤ੍ਵਾਪਿ ਕੋਚਿ ਕਤਹਤ੍ਥੋ ਨ ਹੋਤਿ, ਅਯਂ ਪਨ ਅਸਿਕ੍ਖਿਤੋ ਨ ਕਤਹਤ੍ਥੋ, ਪੋਙ੍ਖਾਨੁਪੋਙ੍ਖਭਾਵੋਯੇਵ ਬ੍ਯਾਮਮੁਟ੍ਠਿਬਨ੍ਧੋ. ਤਿਣਪੁਞ੍ਜਮਤ੍ਤਿਕਾਪੁਞ੍ਜਾਦੀਸੂਤਿ ਆਦਿ-ਸਦ੍ਦੇਨ ਪਂਸੁਪੁਞ੍ਜਵਾਲੁਕਪੁਞ੍ਜਸਾਰਫਲਕਅਯੋਘਨਾਦਿਕੇ ਸਙ੍ਗਣ੍ਹਾਤਿ. ਅਕਤਪਰਿਚਯੋਤਿ ਤੇਸਂ ਸਨ੍ਤਿਕਾ ਵਿਜ੍ਝਨਟ੍ਠੇਨ ਅਕਤਪਰਿਚਯੋ. ਰਾਜਰਾਜਮਹਾਮਤ੍ਤਾਦਿਕੇ ਉਪੇਚ੍ਚ ਅਸਨਂ ਉਪਾਸਨਂ, ਨ ਕਤਂ ਉਪਾਸਨਂ ਏਤੇਨਾਤਿ ਅਕਤੂਪਾਸਨੋ. ਅਸਿਕ੍ਖਿਤਤਾਦਿਨਾ ਭੀਰੁਭਾਵੇਨ ਵਾ ਕਾਯਸ੍ਸ ਛਮ੍ਭਨਂ ਸਙ੍ਕਮ੍ਪਨਂ ਉਤ੍ਤਾਸੋ ਏਤਸ੍ਸ ਅਤ੍ਥੀਤਿ ਛਮ੍ਭੀਤਿ ਆਹ ‘‘ਪਵੇਧਿਤਕਾਯੋ’’ਤਿ.

ਦਕ੍ਖਿਣੇਯ੍ਯਤਾਯ ਅਧਿਪ੍ਪੇਤਤ੍ਤਾ ‘‘ਅਰਹਤ੍ਤਮਗ੍ਗੇਨ ਕਾਮਚ੍ਛਨ੍ਦੋ ਪਹੀਨੋ ਹੋਤੀ’’ਤਿ ਆਹ. ਅਚ੍ਚਨ੍ਤਪ੍ਪਹਾਨਸ੍ਸ ਇਚ੍ਛਿਤਤ੍ਤਾ ਤਤਿਯੇਨੇਵ ਕੁਕ੍ਕੁਚ੍ਚਂ ਪਹੀਨਂ ਹੋਤਿ ਪਟਿਘਸਮ੍ਪਯੋਗਂ. ਅਸੇਕ੍ਖਸ੍ਸ ਅਯਨ੍ਤਿ ਅਸੇਕ੍ਖਂ, ਸੀਲਕ੍ਖਨ੍ਧੋ. ਤਯਿਦਂ ਨ ਅਗ੍ਗਫਲਂ ਸੀਲਮੇਵ ਅਧਿਪ੍ਪੇਤਂ, ਅਥ ਖੋ ਯਂ ਕਿਞ੍ਚਿ ਅਸੇਕ੍ਖਸਨ੍ਤਾਨੇ ਪਵਤ੍ਤਂ ਸੀਲਂ, ਲੋਕੁਤ੍ਤਰੋ ਏਵ ਨ ਅਧਿਪ੍ਪੇਤੋ ਸਿਕ੍ਖਾਯ ਜਾਤਤ੍ਤਾ, ਏਵਂ ਵਿਮੁਤ੍ਤਿਕ੍ਖਨ੍ਧੋਪੀਤਿ. ਸੇਕ੍ਖਸ੍ਸ ਏਸੋਤਿ ਵਾ, ਅਪਰਿਯੋਸਿਤਸਿਕ੍ਖਤ੍ਤਾ ਸਯਮੇਵ ਸਿਕ੍ਖਤੀਤਿ ਵਾ ਸੇਕ੍ਖੋ, ਚਤੂਸੁ ਮਗ੍ਗੇਸੁ ਹੇਟ੍ਠਿਮੇਸੁ ਚ ਤੀਸੁ ਫਲੇਸੁ ਸੀਲਕ੍ਖਨ੍ਧੋ. ਉਪਰਿ ਸਿਕ੍ਖਿਤਬ੍ਬਾਭਾਵਤੋ ਅਸੇਕ੍ਖੋ. ਵੁਡ੍ਢਿਪ੍ਪਤ੍ਤੋ ਸੇਕ੍ਖੋਤਿ ਅਸੇਕ੍ਖੋ. ਅਗ੍ਗਫਲਭੂਤੋ ਸੀਲਕ੍ਖਨ੍ਧੋ ਵੁਚ੍ਚੇਯ੍ਯ, ਅਟ੍ਠਕਥਾਯਂ ਪਨ ਵਿਪਸ੍ਸਕਸ੍ਸ ਸੀਲਸ੍ਸ ਅਧਿਪ੍ਪੇਤਤ੍ਤਾ ਤਥਾ ਅਤ੍ਥੋ ਵੁਤ੍ਤੋ. ਸਬ੍ਬਤ੍ਥਾਤਿ ‘‘ਅਸੇਕ੍ਖੇਨਾ’’ਤਿਆਦੀਸੁ. ਏਤ੍ਥ ਚ ਯਥਾ ਸੀਲਸਮਾਧਿਪਞ੍ਞਾਕ੍ਖਨ੍ਧਾ ਮਿਸ੍ਸਕਾ ਅਧਿਪ੍ਪੇਤਾ, ਏਵਂ ਵਿਮੁਤ੍ਤਿਕ੍ਖਨ੍ਧਾਪੀਤਿ ਤਦਙ੍ਗਵਿਮੁਤ੍ਤਿਆਦਯੋਪਿ ਵੇਦਿਤਬ੍ਬਾ, ਨ ਪਟਿਪ੍ਪਸ੍ਸਦ੍ਧਿਵਿਮੁਤ੍ਤਿ ਏਵ.

ਯੇਨ ਸਿਪ੍ਪੇਨ ਇਸ੍ਸਾਸੋ ਹੋਤਿ, ਤਂ ਇਸ੍ਸਤ੍ਤਨ੍ਤਿ ਆਹ ‘‘ਉਸੁਸਿਪ੍ਪ’’ਨ੍ਤਿ. ਯਸ੍ਸਾ ਵਾਯੋਧਾਤੁਯਾ ਵਸੇਨ ਸਰੀਰਂ ਸਞ੍ਜਾਤਥਾਮਂ ਹੋਤਿ, ਤਂ ਬਲਪਚ੍ਚਯਂ ਸਨ੍ਧਾਯਾਹ ‘‘ਬਲਂ ਨਾਮ ਵਾਯੋਧਾਤੂ’’ਤਿ. ਸਮਪ੍ਪਵਤ੍ਤਿਤੋ ਹਿ ਵਿਸਮਪ੍ਪਵਤ੍ਤਿਨਿਵਾਰਕਧਾਤੁ ਬਲਂ ਨਾਮ, ਤੇਨ ਤਤੋ ਅਞ੍ਞਂ ਬਲਰੂਪਂ ਨਾਮ ਨਤ੍ਥਿ.

ਯਸ੍ਮਾ ਅਰਹਾ ਏਵ ਏਕਨ੍ਤਤੋ ਸੋਰਤੋ, ਤਸ੍ਸ ਭਾਵੋ ਸੋਰਚ੍ਚਨ੍ਤਿ ਆਹ ‘‘ਸੋਰਚ੍ਚਨ੍ਤਿ ਅਰਹਤ੍ਤ’’ਨ੍ਤਿ. ਏਤੇ ਦ੍ਵੇਤਿ ਖਨ੍ਤਿ ਸੋਰਚ੍ਚਨ੍ਤਿ ਏਤੇ ਦ੍ਵੇ ਧਮ੍ਮਾ. ਪਾਨੀਯਂ ਪਿਵਨ੍ਤਿ ਏਤ੍ਥਾਤਿ ਪਪਾ, ਯੋ ਕੋਚਿ ਜਲਾਸਯੋ ਯਂ ਕਿਞ੍ਚਿ ਪਾਨੀਯਟ੍ਠਾਨਨ੍ਤਿ ਆਹ ‘‘ਚਤੁਰਸ੍ਸਪੋਕ੍ਖਰਣੀਆਦੀਨੀ’’ਤਿ. ਉਦਕਵਿਕੂਲਾਦੀਸੁ ਕਮਨ੍ਤਿ ਅਤਿਕ੍ਕਮਨ੍ਤਿ ਏਤੇਹੀਤਿ ਸਙ੍ਕਮਨਾਨਿ, ਸੇਤੁਆਦੀਨਿ. ਸੇਤੁਕਰਣਯੁਤ੍ਤਟ੍ਠਾਨੇ ਸੇਤੁਂ, ਚਙ੍ਕਮਨਕਰਣਯੁਤ੍ਤਟ੍ਠਾਨੇ ਚਙ੍ਕਮਨਂ, ਮਗ੍ਗਕਰਣਯੁਤ੍ਤਟ੍ਠਾਨੇ ਮਗ੍ਗਂ ਕਰੇਯ੍ਯਾਤਿ ਅਯਮੇਤ੍ਥ ਅਧਿਪ੍ਪਾਯੋ. ਤੇਨਾਹ ‘‘ਪਣ੍ਣਾਸਾ’’ਤਿਆਦਿ.

ਭਿਕ੍ਖਾਚਾਰਵਤ੍ਤਨ੍ਤਿ ਅਰਿਯਾਨਂ ਹਿਤਂ ਵਤ੍ਤਪਟਿਪਤ੍ਤਿਂ. ਦੇਨ੍ਤੋਪੀਤਿ ਪਿ-ਸਦ੍ਦੇਨ ਅਖੀਣਾਸਵਸ੍ਸ ਦੇਨ੍ਤੋਪੀਤਿ ਇਮਮਤ੍ਥਂ ਦਸ੍ਸੇਤਿ ਯਸ੍ਸ ਕਸ੍ਸਚਿਪਿ ਦੇਨ੍ਤੇਨਪਿ ਕਮ੍ਮਫਲਂ ਸਦ੍ਦਹਿਤ੍ਵਾ ਵਿਪ੍ਪਸਨ੍ਨਚਿਤ੍ਤੇਨੇਵ ਦਾਤਬ੍ਬਤ੍ਤਾ. ਥਨਯਨ੍ਤਿ ਇਦਂ ਤਸ੍ਸ ਮਹਾਮੇਘਭਾਵਦਸ੍ਸਨਂ, ਯੋ ਹਿ ਮਹਾਵਸ੍ਸਂ ਵਸ੍ਸਤਿ, ਸੋ ਗਜ੍ਜਨ੍ਤੋ ਵਿਜ੍ਜੁਮ੍ਮਾਲਂ ਵਿਸ੍ਸਜ੍ਜੇਨ੍ਤੋ ਪਵਸ੍ਸਤਿ. ਅਭਿਸਙ੍ਖਰਿਤ੍ਵਾ ਸਮੋਧਾਨੇਤ੍ਵਾਤਿ ਖਾਦਨੀਯਸ੍ਸ ਵਿਵਿਧਜਾਤਿਯਾਨਿ ਸਮ੍ਪਿਣ੍ਡੇਤ੍ਵਾ. ਤੇਨਾਹ ‘‘ਰਾਸਿਂ ਕਤ੍ਵਾ’’ਤਿ.

ਪਕਿਰਣਂ ਨਾਮ ਵਿਕਿਰਣਮ੍ਪਿ ਹੋਤਿ ਅਨੇਕਤ੍ਥਤ੍ਤਾ ਧਾਤੂਨਨ੍ਤਿ ਆਹ ‘‘ਵਿਕਿਰਤੀ’’ਤਿ. ਪਕਿਰਨ੍ਤੋ ਵਿਯ ਵਾ ਦਾਨਂ ਦੇਤੀਤਿ ਇਮਿਨਾ ਗੁਣਖੇਤ੍ਤਮੇਵ ਅਪਰਿਯੇਸਿਤ੍ਵਾ ਕਰੁਣਾਖੇਤ੍ਤੇਪਿ ਮਹਾਦਾਨਂ ਪਵਤ੍ਤੇਤੀਤਿ ਦਸ੍ਸੇਤਿ. ਤੇਨ ‘‘ਪਕਿਰੇਤੀ’’ਤਿ ਵਦਨ੍ਤੇਨ ਭਗਵਤਾ ਅਟ੍ਠੁਪ੍ਪਤ੍ਤਿਯਂ ਆਗਤਤਿਤ੍ਥਿਯਵਾਦੇਨ ਅਪ੍ਪਟਿਸੇਧਿਤਤਾਪਿ ਦੀਪਿਤਾ ਹੋਤਿ. ਪੁਞ੍ਞਧਾਰਾਤਿ ਪੁਞ੍ਞਮਯਧਾਰਾ ਪੁਞ੍ਞਾਭਿਸਨ੍ਦਾ. ਸਿਨੇਹਯਨ੍ਤੀਤਿ ਥੂਲਧਾਰੇਨਪਿ ਸਿਨੇਹੇਨ ਸਿਨਿਦ੍ਧਂ ਕਰੋਨ੍ਤੀ. ਕਿਲੇਦਯਨ੍ਤੀਤਿ ਅਲ੍ਲਭਾਵਂ ਪਾਪਯਨ੍ਤੀ. ਯਥਾਯਂ ਪੁਞ੍ਞਧਾਰਾ ਦਾਤਾਰਂ ਅਨ੍ਤੋ ਸਿਨੇਹੇਤਿ ਪੂਰੇਤਿ ਅਭਿਸਨ੍ਦੇਤਿ, ਏਵਂ ਪਟਿਗ੍ਗਾਹਕਾਨਮ੍ਪਿ ਅਨ੍ਤੋ ਸਿਨੇਹੇਤਿ ਪੂਰੇਤਿ ਅਭਿਸਨ੍ਦੇਤਿ. ਤੇਨੇਵਾਹ ‘‘ਦਦਂ ਪਿਯੋ ਹੋਤਿ ਭਜਨ੍ਤਿ ਨਂ ਬਹੂ’’ਤਿਆਦਿ (ਅ. ਨਿ. ੫.੩੪) ਏਵਂ ਸਨ੍ਤੇਪਿ ‘‘ਦਾਤਾਰਂ ਅਭਿਵਸ੍ਸਤੀ’’ਤਿ ਵੁਤ੍ਤਤ੍ਤਾ ਅਟ੍ਠਕਥਾਯਂ ਦਾਯਕਵਸੇਨੇਵ ‘‘ਸਿਨੇਹੇਤੀ’’ਤਿ ਵੁਤ੍ਤਂ, ਯਸ੍ਮਾ ਵਾ ਪਟਿਗ੍ਗਾਹਕਸ੍ਸ ਸਿਨੇਹੁਪ੍ਪਤ੍ਤਿ ਆਮਿਸਨਿਸ੍ਸਿਤਾਤਿ ਦਾਯਕਵਸੇਨੇਵ ਵੁਤ੍ਤਂ.

ਇਸ੍ਸਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਪਬ੍ਬਤੂਪਮਸੁਤ੍ਤਵਣ੍ਣਨਾ

੧੩੬. ਖਤ੍ਤਿਯਾਤਿ ਅਭਿਸੇਕਪ੍ਪਤ੍ਤਾ. ਇਸ੍ਸਰਿਯਮਦੋ ਕਾਮਗੇਧੋ. ਪਥਵਿਮਣ੍ਡਲਸ੍ਸ ਮਹਨ੍ਤਤਾ ਤਂਨਿਵਾਸਿਨਂ ਅਨੁਯਨ੍ਤਤਾਤਿ ਸਬ੍ਬਮਿਦਂ ਯਥਿਚ੍ਛਿਤਸ੍ਸ ਰਾਜਕਿਚ੍ਚਸ੍ਸ ਸੁਖੇਨ ਸਮਿਜ੍ਝਨਸ੍ਸ ਕਾਰਣਕਿਤ੍ਤਨਂ. ਯਾਦਿਸੇ ਰਾਜਕਿਚ੍ਚੇ ਉਸ੍ਸੁਕ੍ਕਂ ਆਪਨ੍ਨੋ, ਤਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਏਸ ਕਿਰਾ’’ਤਿਆਦਿ ਵੁਤ੍ਤਂ. ਅਨ੍ਤਰਗਮਨਾਨੀਤਿ ਤਿਣ੍ਣਂ ਨਿਰਨ੍ਤਰਗਮਨਾਨਂ ਅਨ੍ਤਰਨ੍ਤਰਾ ਗਮਨਾਨਿ. ਚੋਰਾ ਚਿਨ੍ਤਯਿਂਸੂਤਿ ਏਕੋ ਅਨ੍ਤਰਭੋਗਿਕੋ ਰਾਜਾਪਰਾਧਿਕੋ ਪਞ੍ਚਸਤਮਨੁਸ੍ਸਪਰਿਵਾਰੋ ਚੋਰਿਯਂ ਕਰੋਨ੍ਤੋ ਵਿਚਰਤਿ, ਤੇ ਸਨ੍ਧਾਯ ਵੁਤ੍ਤਂ.

‘‘ਅਯੁਤ੍ਤਂ ਤੇ ਕਤ’’ਨ੍ਤਿ ਸਚਾਹਂ ਵਕ੍ਖਾਮੀਤਿ ਯੋਜਨਾ. ਧੁਰਵਿਹਾਰੇਤਿ ਰਥਸ੍ਸ ਧੁਰਂ ਵਿਯ ਨਗਰਸ੍ਸ ਧੁਰਭੂਤੇ ਵਿਹਾਰੇ. ਸਨ੍ਥਮ੍ਭਿਤੁਨ੍ਤਿ ਵਿਸ੍ਸਾਸਭਾਵੇਨ ਉਪਟ੍ਠਾਤੁਂ. ਸਦ੍ਧਾਯਿਕੋਤਿ ਸਦ੍ਧਾਯ ਅਯਿਤਬ੍ਬੋ, ਸਦ੍ਧੇਯ੍ਯੋਤਿ ਅਤ੍ਥੋ. ਤੇਨਾਹ ‘‘ਸਦ੍ਧਾਤਬ੍ਬੋ’’ਤਿ. ਪਚ੍ਚਯਿਕੋਤਿ ਪਤ੍ਤਿਯਾਯਿਤਬ੍ਬੋ. ਅਬ੍ਭਸਮਂ ਪੁਥੁਲਭਾਵੇਨ. ਨਿਪ੍ਪੋਥੇਨ੍ਤੋਤਿ ਨਿਮ੍ਮਦ੍ਦੇਨ੍ਤੋ. ਸਣ੍ਹਕਰਣੀਯਂ ਅਤਿਸਣ੍ਹਂ ਪਿਸਨ੍ਤੋ ਨਿਸਦਪੋਤੋ ਵਿਯ ਪਿਸਨ੍ਤੋ.

ਧਮ੍ਮਚਰਿਯਾਤਿਆਦਿਤ੍ਤਮ੍ਪਿ ਸੀਸਂ ਚੇਲਞ੍ਚ ਅਜ੍ਝੁਪੇਕ੍ਖਿਤ੍ਵਾ ਸਮ੍ਮਾਪਟਿਪਤ੍ਤਿ ਏਵ ਕਾਤਬ੍ਬਾ ਤਸ੍ਸਾ ਏਵ ਪਰਲੋਕੇ ਪਤਿਟ੍ਠਾਭਾਵਤੋ. ਆਚਿਕ੍ਖਾਮੀਤਿ ਕਥੇਮਿ, ਕਥੇਨ੍ਤੋ ਚ ਯਥਾ ਤਮਤ੍ਥਂ ਸਮ੍ਮਦੇਵ ਰਾਜਾ ਜਾਨਾਤਿ, ਏਵਂ ਜਾਨਾਪੇਮੀਤਿ. ਨਿਪ੍ਫਤ੍ਤਿ ਯੁਦ੍ਧੇਨ ਕਾਤਬ੍ਬਅਤ੍ਥਸਿਦ੍ਧਿ. ਵਿਸਿਨੋਤਿ ਬਨ੍ਧਤਿ ਯਥਾਧਿਪ੍ਪੇਤਂ ਚਿਤ੍ਤਂ ਏਤੇਨਾਤਿ ਵਿਸਯੋ, ਸਮਤ੍ਥਭਾਵੋ. ਮਨ੍ਤਸਮ੍ਪਨ੍ਨਾਤਿ ਸਮ੍ਪਨ੍ਨਰਾਜਮਨ੍ਤਾ. ਮਹਾਅਮਚ੍ਚਾਤਿ ਮਹੋਸਧਾਦਿਸਦਿਸਾ ਨੀਤਿਸਤ੍ਥਛੇਕਾ ਅਮਚ੍ਚਪੁਰਿਸਾ. ਉਪਲਾਪੇਤੁਨ੍ਤਿ ਪਰੇਸਂ ਅਨ੍ਤਰੇ ਵਿਰੋਧਤ੍ਥਂ ਸਙ੍ਗਣ੍ਹਿਤੁਂ.

ਦ੍ਵੇਯੇਵ ਪਬ੍ਬਤਾਤਿ ਪਬ੍ਬਤਸਦਿਸਾ ਦ੍ਵੇਯੇਵ ਗਹਿਤਾ. ਰਾਜੋਵਾਦੇਤਿ ਰਾਜੋਵਾਦਸੁਤ੍ਤੇ. ਆਗਤਾਵ ਤਤ੍ਤਨ੍ਤਿਯਾ ਅਨੁਰੂਪਤ੍ਥਂ. ਵਿਲੁਮ੍ਪਮਾਨਾਤਿ ਇਤਿ-ਸਦ੍ਦੋ ਆਦਿਅਤ੍ਥੋ. ਵਿਪਤ੍ਤੀਤਿ ਭੋਗਪਰਿਹਾਨਾਦਿਵਿਨਾਸੋ. ਹਤ੍ਥਿਯੁਦ੍ਧਾਦੀਹਿ ਜਰਾਮਰਣਂ ਜਿਨਿਤੁਂ ਨ ਸਕ੍ਕਾ ਸਤ੍ਤਸ੍ਸ ਅਵਿਸਯਭਾਵਤੋ. ਯੇਨ ਪਨ ਜਿਨਿਤੁਂ ਸਕ੍ਕਾ, ਤਂ ਦਸ੍ਸੇਨ੍ਤੋ ਭਗਵਾ ‘‘ਬੁਦ੍ਧੇ…ਪੇ… ਨਿਵੇਸਯੇ’’ਤਿ ਆਹ. ਰਤਨਤ੍ਤਯੇ ਹਿ ਸਦ੍ਧਾ ਨਿਵਿਟ੍ਠਾ ਮੂਲਜਾਤਾ ਪਤਿਟ੍ਠਿਤਾ ਏਕਨ੍ਤਤੋ ਜਰਾਮਰਣਵਿਜਯਾਯ ਹੋਤਿ. ਤੇਨਾਹ ‘‘ਤਸ੍ਮਾ ਸਦ੍ਧ’’ਨ੍ਤਿ.

ਪਬ੍ਬਤੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਕੋਸਲਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.