੧੦. ਚੋਦਕਚੁਦਿਤਕਪਟਿਸਂਯੁਤ੍ਤਕਥਾ

੪੦੧. ਅਜ੍ਝਤ੍ਤਨ੍ਤਿ ਏਤ੍ਥ ਅਤ੍ਤਸਦ੍ਦਸ੍ਸ ਚਿਤ੍ਤਵਾਚਕਭਾਵਞ੍ਚ ਸਤ੍ਤਮੀਵਿਭਤ੍ਤਿਯਾਪਿ ਅਮਾਦੇਸਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਚਿਤ੍ਤੇ’’ਤਿ. ਉਪ੍ਪਾਦੇਤ੍ਵਾਤਿ ਇਮਿਨਾ ‘‘ਮਨਸਿਕਰਿਤ੍ਵਾ’’ਤਿ ਪਦਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਕਾਰੁਞ੍ਞਤਾਤਿ ਏਤ੍ਥ ਦ੍ਵੀਸੁ ਣ੍ਯਪਚ੍ਚਯਤਾਪਚ੍ਚਯੇਸੁ ਏਕਸ੍ਸੇਵ ਭਾਵਵਾਚਕਤ੍ਤਾ ਏਕੋ ਸ੍ਵਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਕਰੁਣਭਾਵੋ’’ਤਿ. ਤਤ੍ਥ ਕਰੁਣਸ੍ਸ ਪੁਗ੍ਗਲਸ੍ਸ ਭਾਵੋ ਕਾਰੁਞ੍ਞਂ, ਤਦੇਵ ਕਾਰੁਞ੍ਞਤਾ. ਅਥ ਵਾ ਕਰੁਣੋ ਏਵ ਪੁਗ੍ਗਲੋ ਕਾਰੁਞ੍ਞਂ, ਤਸ੍ਸ ਭਾਵੋ ਕਾਰੁਞ੍ਞਤਾਤਿ ਵਚਨਤ੍ਥੋ ਕਾਤਬ੍ਬੋ. ਇਮਿਨਾਤਿ ‘‘ਕਾਰੁਞ੍ਞਤਾ’’ਤਿ ਪਦੇਨ. ਕਰੁਣਞ੍ਚਾਤਿ ਅਪ੍ਪਨਾਪਤ੍ਤਂ ਕਰੁਣਞ੍ਚ. ਕਰੁਣਾਪੁਬ੍ਬਭਾਗਞ੍ਚਾਤਿ ਅਪ੍ਪਨਾਪਤ੍ਤਾਯ ਕਰੁਣਾਯ ਪੁਬ੍ਬਭਾਗੇ ਪਰਿਕਮ੍ਮੂਪਚਾਰਵਸੇਨ ਪਵਤ੍ਤਂ ਕਾਮਾਵਚਰਕਰੁਣਞ੍ਚ. ਦ੍ਵੀਹਿਪੀਤਿ ‘‘ਹਿਤੇਸਿਤਾ, ਅਨੁਕਮ੍ਪਿਤਾ’’ਤਿ ਦ੍ਵੀਹਿਪਿ ਪਦੇਹਿ. ਮੇਤ੍ਤਞ੍ਚਾਤਿ ਅਪ੍ਪਨਾਪਤ੍ਤਮੇਤ੍ਤਞ੍ਚ. ਮੇਤ੍ਤਾਪੁਬ੍ਬਭਾਗਞ੍ਚਾਤਿ ਅਪ੍ਪਨਾਪਤ੍ਤਾਯ ਮੇਤ੍ਤਾਯ ਪੁਬ੍ਬਭਾਗੇ ਪਰਿਕਮ੍ਮੂਪਚਾਰਵਸੇਨ ਪਵਤ੍ਤਂ ਕਾਮਾਵਚਰਮੇਤ੍ਤਞ੍ਚ. ਸੁਦ੍ਧਨ੍ਤੇਤਿ ਸੁਦ੍ਧੇ ਕੋਟ੍ਠਾਸੇ. ਪਟਿਞ੍ਞਂ ਆਰੋਪੇਤ੍ਵਾਤਿ ਚੁਦਿਤਕਂ ਪਟਿਞ੍ਞਂ ਆਰੋਪੇਤ੍ਵਾ. ਯੇ ਏਤੇਤਿ ‘‘ਕਾਰੁਞ੍ਞਤਾ’’ਤਿਆਦਿਨਾ ਨਯੇਨ ਯੇ ਏਤੇ ਪਞ੍ਚ ਧਮ੍ਮਾ ਵੁਤ੍ਤਾਤਿ ਯੋਜਨਾ. ਇਮਿਨਾ ਇਮੇ ਪਞ੍ਚ ਧਮ੍ਮੇਤਿ ਏਤ੍ਥ ਇਮਸਦ੍ਦਸ੍ਸ ਅਨਿਯਮਨਿਦ੍ਦੇਸਭਾਵਂ ਦਸ੍ਸੇਤਿ.

ਸਚ੍ਚੇ ਚ ਅਕੁਪ੍ਪੇ ਚਾਤਿ ਏਤ੍ਥ ਸਚ੍ਚਸਦ੍ਦਸ੍ਸ ਵਿਰਤਿਸਚ੍ਚਪਰਮਤ੍ਥਸਚ੍ਚਾਨਿ ਪਟਿਕ੍ਖਿਪਨ੍ਤੋ ਆਹ ‘‘ਵਚੀਸਚ੍ਚੇ ਚਾ’’ਤਿ. ‘‘ਅਕੁਪ੍ਪਨਤਾਯਾ’’ਤਿ ਇਮਿਨਾ ਨਕੁਪਸ੍ਸ ਭਾਵੋ ਅਕੁਪ੍ਪਨ੍ਤਿ ਕਤ੍ਵਾ ਣ੍ਯਪਚ੍ਚਯਸ੍ਸ ਭਾਵਤ੍ਥਂ ਦਸ੍ਸੇਤਿ. ਹੀਤਿ ਸਚ੍ਚਂ, ਵਿਤ੍ਥਾਰੋ ਵਾ. ਨ ਪਰੋ ਘਟ੍ਟੇਤਬ੍ਬੋਤਿ ਨ ਪਰੋ ਕੁਜ੍ਝਾਪੇਤਬ੍ਬੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ.

ਇਤਿ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.