੧੦. ਭਿਕ੍ਖੁਨਿਕ੍ਖਨ੍ਧਕਂ

ਮਹਾਪਜਾਪਤਿਗੋਤਮੀਵਤ੍ਥੁਕਥਾ

੪੦੨. ਭਿਕ੍ਖੁਨਿਕ੍ਖਨ੍ਧਕੇ ਕਸ੍ਮਾ ਪਟਿਕ੍ਖਿਪਤੀਤਿ ਚੋਦਨਂ ਦਸ੍ਸੇਤ੍ਵਾ ਤਸ੍ਸਾ ਆਭੋਗਂ ਦਸ੍ਸੇਨ੍ਤੋ ਆਹ ‘‘ਨਨੂ’’ਤਿਆਦਿ. ‘‘ਕਾਮ’’ਨ੍ਤਿਆਦਿਨਾ ਅਭ੍ਯੂਪਗਮਪਰਿਹਾਰਵਸੇਨ ਵਿਸ੍ਸਜ੍ਜੇਤਿ. ਤਤ੍ਥ ਕਾਮਂਸਦ੍ਦੋ ਅਨੁਗ੍ਗਹਤ੍ਥੋ, ਪਨ ਸਦ੍ਦੋ ਗਰਹਤ੍ਥੋ, ਪਨ ਤਥਾਪਿ ਪਟਿਕ੍ਖਿਪਤੀਤਿ ਸਮ੍ਬਨ੍ਧੋ. ਤਨ੍ਤਿ ਮਹਾਪਜਾਪਤਿਂ ਗੋਤਮਿਂ. ਯਾਚਿਤੇਨ ਹੁਤ੍ਵਾ ਅਨੁਞ੍ਞਾਤਨ੍ਤਿ ਯੋਜਨਾ. ਅਯਨ੍ਤਿ ਪਬ੍ਬਜ੍ਜਾ. ਭਦ੍ਦਕਂ ਕਤ੍ਵਾਤਿ ਲਦ੍ਧਕਂ ਕਤ੍ਵਾ, ਮਨਾਪਂ ਕਤ੍ਵਾਤਿ ਅਤ੍ਥੋ.

੪੦੩. ਕੁਮ੍ਭਥੇਨਕੇਹੀਤਿ ਏਤ੍ਥ ਕੁਮ੍ਭੇ ਦੀਪਂ ਜਾਲੇਤ੍ਵਾ ਤੇਨਾਲੋਕੇਨ ਥੇਨੇਨ੍ਤੀਤਿ ਕੁਮ੍ਭਥੇਨਕਾਤਿ ਦਸ੍ਸੇਨ੍ਤੋ ਆਹ ‘‘ਕੁਮ੍ਭੇ ਦੀਪਂ ਜਾਲੇਤ੍ਵਾ’’ਤਿਆਦਿ.

ਨਾਲ਼ਿਮਜ੍ਝਗਤਨ੍ਤਿ ਸਸ੍ਸਨਾਲ਼ਸ੍ਸ ਮਜ੍ਝੇ ਗਤਂ. ਗਣ੍ਠਿਨ੍ਤਿ ਫਲ਼ੁਂ. ‘‘ਕਣ੍ਡ’’ਨ੍ਤਿਪਿ ਪਾਠੋ, ਦਣ੍ਡਨ੍ਤਿ ਅਤ੍ਥੋ. ਯੇਨਾਤਿ ਪਾਣਕੇਨ. ਅਯਞ੍ਹਿ ਯਂਸਦ੍ਦੋ ਤਂਸਦ੍ਦਾਨਪੇਕ੍ਖੋਤਿ ਦਟ੍ਠਬ੍ਬੋ.

ਅਨ੍ਤੋਰਤ੍ਤਭਾਵੋਤਿ ਅਨ੍ਤੋਲੋਹਿਤਭਾਵੋ. ਏਤਮਤ੍ਥਨ੍ਤਿ ਏਤਂ ਵਕ੍ਖਮਾਨਂ ਅਤ੍ਥਂ. ਆਲ਼ਿਯਾਤਿ ਆਵਰਣਾਯ. ਅਬਦ੍ਧਾਯਪੀਤਿ ਪਿਸਦ੍ਦੋ ਅਨੁਗ੍ਗਹਤ੍ਥੋ, ਬਦ੍ਧਾਯ ਪਨ ਪਗੇਵਾਤਿ ਅਤ੍ਥੋ. ਕਿਞ੍ਚੀਤਿ ਅਪ੍ਪਮਤ੍ਤਕਂ. ਯਨ੍ਤਿ ਉਦਕਂ. ਤਮ੍ਪੀਤਿ ਉਦਕਮ੍ਪਿ. ਪਿਸਦ੍ਦੋ ਅਬਦ੍ਧਾਯ ਠਿਤਂ ਕਿਞ੍ਚਿ ਉਦਕਂ ਅਪੇਕ੍ਖਤਿ. ਯੇ ਇਮੇ ਗਰੁਧਮ੍ਮਾ ਪਞ੍ਞਤ੍ਤਾਤਿ ਯੋਜਨਾ. ਪਟਿਕਚ੍ਚੇਵਾਤਿ ਪਗੇਵ, ਪਠਮਮੇਵਾਤਿ ਅਤ੍ਥੋ. ਤੇਸੂਤਿ ਗਰੁਧਮ੍ਮੇਸੁ. ਅਪਞ੍ਞਤ੍ਤੇਸੁ ਸਨ੍ਤੇਸੁਪੀਤਿ ਯੋਜਨਾ. ਪਠਮਂ ਵੁਤ੍ਤਨ੍ਤਿਆਦਿ ਵੁਤ੍ਤਂ, ਵਸ੍ਸਸਹਸ੍ਸਮੇਵ ਠਸ੍ਸਤਿ ਇਤਿ ਇਮਮਤ੍ਥਂ ਦਸ੍ਸੇਤੀਤਿ ਯੋਜਨਾ. ‘‘ਵਸ੍ਸਸਹਸ੍ਸ’’ਨ੍ਤਿ ਚ ਏਤਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤੋਤਿ ਵਸ੍ਸਸਹਸ੍ਸਤੋ. ਪਰਿਯਤ੍ਤਿਧਮ੍ਮੋਪੀਤਿ ਪਿਸਦ੍ਦੋ ਪਟਿਵੇਧਸਦ੍ਧਮ੍ਮਂ ਅਪੇਕ੍ਖਤਿ. ਦ੍ਵੀਸੁ ਸਦ੍ਧਮ੍ਮੇਸੁ ਠਿਤੇਸੁ ਪਟਿਪਤ੍ਤਿਸਦ੍ਧਮ੍ਮੋ ਠਿਤੋਯੇਵਾਤਿ ਕਤ੍ਵਾ ਨ ਵੁਤ੍ਤਂ. ਤਾਨਿਯੇਵਾਤਿ ਪਞ੍ਚਵਸ੍ਸਸਹਸ੍ਸਾਨਿਯੇਵ. ਪਰਿਯਤ੍ਤਿਯਾ ਸਤਿ ਪਟਿਵੇਧੋ ਨ ਹੋਤੀਤਿ ਨਾਪਿ ਵਤ੍ਤਬ੍ਬੋਤਿ ਯੋਜਨਾ. ਲਿਙ੍ਗਨ੍ਤਿ ਸਮਣਵੇਸਂ, ਸਮਣਾਕਾਰਨ੍ਤਿ ਅਤ੍ਥੋ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾ

੪੦੪. ਇਮਾਯ ਅਨੁਪਞ੍ਞਤ੍ਤਿਯਾਤਿ ਮਹਾਪਜਾਪਤਿਯਾ ਅਟ੍ਠਗਰੁਧਮ੍ਮਪਟਿਗ੍ਗਹਣੂਪਸਮ੍ਪਦਂ ਉਪਨਿਧਾਯ ਅਯਂ ਪਞ੍ਞਤ੍ਤਿ ਅਨੁਪਞ੍ਞਤ੍ਤਿ ਨਾਮ, ਤਾਯ ਅਨੁਪਞ੍ਞਤ੍ਤਿਯਾ ਉਪਸਮ੍ਪਾਦੇਤੁਨ੍ਤਿ ਅਤ੍ਥੋ. ਮਹਾਪਜਾਪਤਿਯਾ ਸਦ੍ਧਿਵਿਹਾਰਿਨਿਯੋ ਕਤ੍ਵਾਤਿ ਮਹਾਪਜਾਪਤਿਂ ਉਪਜ੍ਝਂ ਕਤ੍ਵਾ ਪਞ੍ਚਸਤਾ ਸਾਕਿਯਾਨਿਯੋ ਤਸ੍ਸਾ ਸਦ੍ਧਿਵਿਹਾਰਿਨਿਯੋ ਕਤ੍ਵਾਤਿ ਅਤ੍ਥੋ. ਇਤੀਤਿ ਤਸ੍ਮਾ ਅਹੇਸੁਨ੍ਤਿ ਸਮ੍ਬਨ੍ਧੋ. ਇਮਿਨਾ ਓਵਾਦੇਨਾਤਿ ਭਗਵਤੋ ਇਮਿਨਾ ਓਵਾਦੇਨ.

੪੧੦. ਏਤਿਸ੍ਸਾਤਿ ਏਤਿਸ੍ਸਾ ਭਿਕ੍ਖੁਨਿਯਾ. ਤਨ੍ਤਿ ਕਮ੍ਮਂ. ਅਞ੍ਞਸ੍ਮਿਨ੍ਤਿ ਅਞ੍ਞਸ੍ਮਿਂ ਕਮ੍ਮੇ. ਅਞ੍ਞਨ੍ਤਿ ਰੋਪਿਤਬ੍ਬਕਮ੍ਮਤੋ ਅਞ੍ਞਂ ਕਮ੍ਮਂ.

੪੧੧. ਕਦ੍ਦਮੋਦਕੇਨਾਤਿ ਕਦ੍ਦਮੇਨ ਆਲੁਲ਼ਿਤੇਨ ਉਦਕੇਨੇਵ. ਕਦ੍ਦਮਾਦੀਸੁਪੀਤਿ ਪੀਸਦ੍ਦੋ ‘‘ਯੇਨ ਕੇਨਚੀ’’ਤਿ ਏਤ੍ਥ ਯੋਜੇਤਬ੍ਬੋ. ਯੇਨ ਕੇਨਚਿਪੀਤਿ ਹਿ ਅਤ੍ਥੋ. ਸਨ੍ਨਿਪਤਿਤ੍ਵਾਤਿ ਭਿਕ੍ਖੁਨਿਸਙ੍ਘੇਨ ਸਨ੍ਨਿਪਤਿਤ੍ਵਾ. ਅਪਸਾਦਨੀਯਨ੍ਤਿ ਅਪਸਾਦੇਤਬ੍ਬਂ ਕਮ੍ਮਂ. ਏਤ੍ਤਾਵਤਾਤਿ ਏਤ੍ਤਕੇਨ ਸਾਵਨਮਤ੍ਤੇਨ. ਅਵਨ੍ਦਿਯੋਤਿ ਨ ਵਨ੍ਦੇਤਬ੍ਬੋ, ਵਨ੍ਦਿਤੁਂ ਨ ਅਰਹੋਤਿ ਅਤ੍ਥੋ. ਤਤੋਤਿ ਤਿਕ੍ਖਤ੍ਤੁਂ ਸਾਵੇਤਬ੍ਬਤੋ. ਨ ਵਨ੍ਦਨ੍ਤੀਤਿ ਭਿਕ੍ਖੁਨਿਯੋ ਨ ਵਨ੍ਦਨ੍ਤਿ. ਦਿਸ੍ਵਾਪੀਤਿ ਤਂ ਭਿਕ੍ਖੁਂ ਦਿਸ੍ਵਾਪਿ. ਤੇਨ ਭਿਕ੍ਖੁਨਾਤਿ ਅਪਸਾਦਨੀਯਂ ਦਸ੍ਸੇਨ੍ਤੇਨ ਭਿਕ੍ਖੁਨਾ, ਖਮਾਪੇਤਬ੍ਬਨ੍ਤਿ ਸਮ੍ਬਨ੍ਧੋ. ਵਿਹਾਰੇਯੇਵਾਤਿ ਭਿਕ੍ਖੂਨਂ ਵਿਹਾਰੇਯੇਵ. ਤੇਨ ਭਿਕ੍ਖੁਨਾਤਿ ਉਪਸਙ੍ਕਮਿਤਬ੍ਬੇਨ ਭਿਕ੍ਖੁਨਾ, ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ. ਤਤੋਤਿ ਵਤ੍ਤਬ੍ਬਕਾਲਤੋ. ਸੋਤਿ ਅਪਸਾਦਨੀਯਂ ਦਸ੍ਸੇਨ੍ਤੋ ਭਿਕ੍ਖੁ. ਏਤ੍ਥਾਤਿ ਭਿਕ੍ਖੁਨਿਕ੍ਖਨ੍ਧਕੇ. ਕਮ੍ਮਵਿਭਙ੍ਗੇਤਿ ਪਰਿਵਾਰਾਵਸਾਨੇ ਕਮ੍ਮਾਨਂ ਵਿਭਙ੍ਗਟ੍ਠਾਨੇ (ਪਰਿ. ਅਟ੍ਠ. ੪੯੫-੪੯੬).

ਓਭਾਸਨ੍ਤੀਤਿ ਅਵ ਹੀਨੇਨ ਭਾਸਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਅਸਦ੍ਧਮ੍ਮੇਨ ਓਭਾਸਨ੍ਤੀ’’ਤਿ. ‘‘ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਨ੍ਤੀ’’ਤਿ ਏਤ੍ਥ ਕਮ੍ਮਕਰਣੇ ਦਸ੍ਸੇਨ੍ਤੋ ਆਹ ‘‘ਪੁਰਿਸੇ ਅਸਦ੍ਧਮ੍ਮੇਨਾ’’ਤਿ. ਏਤ੍ਥ ‘‘ਪੁਰਿਸੇ’’ਤਿ ਇਮਿਨਾ ਕਮ੍ਮਂ ਦਸ੍ਸੇਤਿ, ‘‘ਅਸਦ੍ਧਮ੍ਮੇਨਾ’’ਤਿ ਇਮਿਨਾ ਕਰਣਂ. ਵਿਹਾਰਪ੍ਪਵੇਸਨੇਤਿ ਭਿਕ੍ਖੂਨਂ ਵਿਹਾਰਪ੍ਪਵੇਸਨੇ. ਓਵਾਦਂ ਠਪੇਤੁਨ੍ਤਿ ਏਤ੍ਥ ਓਵਾਦਟ੍ਠਪਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਨ ਭਿਕ੍ਖੁਨੁਪਸ੍ਸਯ’’ਨ੍ਤਿਆਦਿ. ਓਵਾਦਤ੍ਥਾਯਾਤਿ ਓਵਾਦਪਟਿਗ੍ਗਹਣਤ੍ਥਾਯ. ਮਾ ਕਰਿਤ੍ਥਾਤਿ ਮਾ ਕਰੇਯ੍ਯਾਥ.

੪੧੬. ਗਿਹਿਦਾਰਿਕਾਯੋਤਿ ਗਿਹਿਭੂਤਾ ਦਾਰਿਕਾਯੋ ਬਨ੍ਧਨ੍ਤਿ ਵਿਯਾਤਿ ਯੋਜਨਾ. ਘਨਪਟ੍ਟਕੇਨਾਤਿ ਘਨਭੂਤੇਨ ਪਟ੍ਟੇਨ ਨਿਯੁਤ੍ਤੇਨ. ਏਕਪਰਿਯਕਨ੍ਤਿ ਏਤ੍ਥ ਏਕਵਾਰਂ ਕਟਿਯਂ ਪਰਿਕ੍ਖਿਪਿਤ੍ਵਾ ਕਤਂ ਕਾਯਬਨ੍ਧਨਂ ਏਕਪਰਿਯਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਏਕਵਾਰਂ ਪਰਿਕ੍ਖਿਪਨਕ’’ਨ੍ਤਿ. ਤਤ੍ਥ ਪਰਿਕ੍ਖਿਪਨਕਨ੍ਤਿ ਕਟਿਯਂ ਪਰਿਕ੍ਖਿਪਨਾਰਹਂ.

ਵਿਲੀਵੇਨਾਤਿ ਏਤ੍ਥ ਬਹੁਤ੍ਥੇ ਏਕਵਚਨਨ੍ਤਿ ਆਹ ‘‘ਸਣ੍ਹੇਹਿ ਵਿਲੀਵੇਹੀ’’ਤਿ. ‘‘ਕਤਪਟ੍ਟੇਨਾ’’ਤਿ ਇਮਿਨਾ ਪਾਲ਼ਿਯਂ ‘‘ਕਤੇਨਾ’’ਤਿ ਪਾਠਸੇਸਂ ਦਸ੍ਸੇਤਿ. ਸੇਤਵਤ੍ਥਪਟ੍ਟੇਨਾਤਿ ਸੇਤਵਤ੍ਥੇਨ ਕਤੇਨ ਪਟ੍ਟੇਨ. ਕਤਵੇਣਿਯਾਤਿ ਕਤਾਯ ਵੇਣਿਯਾ. ਇਮਿਨਾ ਦੁਸ੍ਸੇਨ ਕਤਾ ਵੇਣਿ ਦੁਸ੍ਸਵੇਣੀਤਿ ਵਚਨਤ੍ਥਂ ਦਸ੍ਸੇਤਿ. ਏਸੇਵ ਨਯੋ ਪੁਰਿਮਪਚ੍ਛਿਮਪਦੇਸੁਪਿ. ਚੋਲ਼ਕਾਸਾਵਨ੍ਤਿ ਚੋਲ਼ਮੇਵ ਕਸਾਵੇਨ ਰਤ੍ਤਤ੍ਤਾ ਚੋਲ਼ਕਾਸਾਵਂ.

ਅਟ੍ਠਿਲ੍ਲੇਨਾਤਿ ਅਦ੍ਦੇਨ ਅਟ੍ਠਿਨਾ. ‘‘ਗੋਜਙ੍ਘਟ੍ਠਿਕੇ’’ਤਿ ਇਮਿਨਾ ਅਟ੍ਠਿਨੋ ਸਮ੍ਬਨ੍ਧਂ ਦਸ੍ਸੇਤਿ. ਹਤ੍ਥਂ ਕੋਟ੍ਟਾਪੇਨ੍ਤੀਤਿ ਏਤ੍ਥ ਹਤ੍ਥਂ ਨਾਮ ਅਗ੍ਗਬਾਹਮੇਵਾਧਿਪ੍ਪੇਤਂ, ਨ ਕਪ੍ਪਰਤੋ ਪਟ੍ਠਾਯਾਤਿ ਦਸ੍ਸੇਨ੍ਤੋ ਆਹ ‘‘ਅਗ੍ਗਬਾਹ’’ਨ੍ਤਿ. ਪਿਟ੍ਠਿਹਤ੍ਥਨ੍ਤਿ ਹਤ੍ਥਪਿਟ੍ਠਿਂ. ਪਿਟ੍ਠਿਪਾਦਨ੍ਤਿ ਪਾਦਪਿਟ੍ਠਿਂ.

੪੧੭. ਵੁਤ੍ਤਨਯਾਨੇਵਾਤਿ ਛਬ੍ਬਗ੍ਗਿਯਾਨਂ ਮੁਖਲਿਮ੍ਪਨਾਦੀਸੁ (ਚੂਲ਼ਵ. ਅਟ੍ਠ. ੨੪੭) ਵੁਤ੍ਤਨਯਾਨੇਵ. ਅਙ੍ਗਦੇਸੇਤਿ ਸਰੀਰਪ੍ਪਦੇਸੇ. ਗਣ੍ਡਪ੍ਪਦੇਸੇਤਿ ਕਪੋਲਪ੍ਪਦੇਸੇ. ਸਾਲੋਕੇ ਤਿਟ੍ਠਨ੍ਤੀਤਿ ਏਤ੍ਥ ਸਂਵਿਜ੍ਜਤਿ ਆਲੋਕੋ ਏਤ੍ਥਾਤਿ ਸਾਲੋਕਨ੍ਤਿ ਕਤ੍ਵਾ ਦ੍ਵਾਰਂ ਗਹੇਤਬ੍ਬਂ. ਤੇਨ ਵੁਤ੍ਤਂ ‘‘ਦ੍ਵਾਰਂ ਵਿਵਰਿਤ੍ਵਾ’’ਤਿ. ਵੁਟ੍ਠਾਪੇਨ੍ਤੀਤਿ ਉਪਸਮ੍ਪਾਦੇਨ੍ਤਿ. ਸੂਨਂ ਠਪੇਨ੍ਤੀਤਿ ਏਤ੍ਥ ਸੂਨਾਸਦ੍ਦੋ ਮਂਸਪਰਿਯਾਯੋਤਿ ਆਹ ‘‘ਮਂਸਂ ਵਿਕ੍ਕਿਣਨ੍ਤੀ’’ਤਿ. ਤੇਨਾਤਿ ਦਾਸੇਨ. ਇਦਂ ਪਦਂ ‘‘ਕਾਰੇਨ੍ਤੀ’’ਤਿ ਪਦੇ ਕਾਰਿਤਕਮ੍ਮਂ. ‘‘ਹਰਿਤਕਞ੍ਚੇਵ ਪਕ੍ਕਞ੍ਚਾ’’ਤਿ ਇਮਿਨਾ ਹਰਿਤਕਪਕ੍ਕਿਕਨ੍ਤਿ ਪਦਸ੍ਸ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ. ਤਤ੍ਥ ਹਰਿਤਕਨ੍ਤਿ ਹਰਿਤਮੇਵ ਪਣ੍ਣਂ. ਪਕ੍ਕਨ੍ਤਿ ਸੇਦਿਤਂ ਪਣ੍ਣਂ.

੪੧੮. ਕਥਿਤਾਯੇਵਾਤਿ ਚੀਵਰਕ੍ਖਨ੍ਧਕੇ ਕਥਿਤਾਯੇਵ.

੪੧੯. ਪਾਲ਼ਿਮੁਤ੍ਤਕਵਿਨਿਚ੍ਛਯੋਤਿ ਪਾਲ਼ਿਯਂ ਵੁਤ੍ਤਵਿਨਿਚ੍ਛਯਤੋ ਮੁਤ੍ਤੋ ਵਿਨਿਚ੍ਛਯੋ. ਪਾਲ਼ਿਮੁਤ੍ਤਕਵਿਨਿਚ੍ਛਯਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਯੋ ਕੋਚਿ ਕਾਲਂ ਕਰੋਨ੍ਤੋ ਵਦਤੀਤਿ ਸਮ੍ਬਨ੍ਧੋ. ਮਮਚ੍ਚਯੇਨਾਤਿ ਮਮ ਅਤਿਕ੍ਕਮੇਨ. ਅਞ੍ਞਸ੍ਸਾਤਿ ਵੁਤ੍ਤੇਹਿ ਉਪਜ੍ਝਾਯਾਦੀਹਿ ਅਞ੍ਞਸ੍ਸ. ਤੇਸਨ੍ਤਿ ਉਪਜ੍ਝਾਯਾਦੀਨਂ. ਨ ਹੋਤੀਤਿ ਪਰਿਕ੍ਖਾਰੋ ਨ ਹੋਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਚ੍ਚਯਦਾਨਨ੍ਤਿ ਅਚ੍ਚਯੇਨ ਹੋਤੂਤਿ ਦਾਨਂ. ਨ ਰੁਹਤੀਤਿ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਪਬ੍ਬਜਿਤਸ੍ਸ ਵਾ ਗਹਟ੍ਠਸ੍ਸ ਵਾ ਯਸ੍ਸ ਕਸ੍ਸਚਿ ਅਚ੍ਚਯਦਾਨਂ ਤੇਸਂ ਨ ਰੁਹਤਿ, ਸਙ੍ਘਸ੍ਸੇਵ ਰੁਹਤੀਤਿ ਅਧਿਪ੍ਪਾਯੋ. ਗਿਹੀਨਂ ਪਨ ਅਚ੍ਚਯਦਾਨਨ੍ਤਿ ਸਮ੍ਬਨ੍ਧੋ. ਰੁਹਤੀਤਿ ਗਿਹੀਨਂ ਪਬ੍ਬਜਿਤਸ੍ਸ ਵਾ ਗਹਟ੍ਠਸ੍ਸ ਵਾ ਯਸ੍ਸ ਕਸ੍ਸਚਿ ਅਚ੍ਚਯਦਾਨਂ ਤੇਸਂ ਰੁਹਤਿ, ਤੇਸਂਯੇਵ ਸਨ੍ਤਕੋ ਹੋਤੀਤਿ ਅਧਿਪ੍ਪਾਯੋ.

੪੨੦. ਪੁਰਾਣਮਲ੍ਲੀਤਿ ਏਤ੍ਥ ਮਲ੍ਲਸ੍ਸ ਭਰਿਯਾ ਮਲ੍ਲੀ, ਪੁਰਾਣੇ ਮਲ੍ਲੀ ਪੁਰਾਣਮਲ੍ਲੀਤਿ ਦਸ੍ਸੇਨ੍ਤੋ ਆਹ ‘‘ਪੁਰਾਣੇ’’ਤਿਆਦਿ. ‘‘ਗਿਹਿਕਾਲੇ’’ਤਿ ਇਮਿਨਾ ‘‘ਪੁਰਾਣੇ’’ਤਿ ਏਤ੍ਥ ਣਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਮਲ੍ਲਸ੍ਸਾਤਿ ਮੁਟ੍ਠਿਮਲ੍ਲਸ੍ਸ. ਪੁਰਿਸਬ੍ਯਞ੍ਜਨਨ੍ਤਿ ਏਤ੍ਥ ਬ੍ਯਞ੍ਜਨਸਦ੍ਦੋ ਨਿਮਿਤ੍ਤਪਰਿਯਾਯੋਤਿ ਆਹ ‘‘ਪੁਰਿਸਨਿਮਿਤ੍ਤ’’ਨ੍ਤਿ. ਚਿਤ੍ਤਨ੍ਤਿ ਰਾਗਚਿਤ੍ਤਂ.

੪੨੧. ਯਨ੍ਤਿ ਯਂ ਵਤ੍ਥੁ, ਅਗ੍ਗਨ੍ਤਿ ਪਠਮਭਾਗਂ. ਅਸਪ੍ਪਾਯਨ੍ਤਿ ਅਤ੍ਤਨੋ ਅਸਪ੍ਪਾਯਂ.

ਹਿਯ੍ਯੋਤਿ ਅਤੀਤਾਨਨ੍ਤਰਾਹਨਿ. ਅਞ੍ਞਸ੍ਮਿਨ੍ਤਿ ਭਿਕ੍ਖੁਨੀਹਿ ਅਞ੍ਞਸ੍ਮਿਂ. ‘‘ਭਿਕ੍ਖੁਨੀਹੀ’’ਤਿ ਪਦਂ ‘‘ਪਟਿਗ੍ਗਾਹਾਪੇਤ੍ਵਾ’’ਤਿ ਪਦੇ ਕਾਰਿਤਕਮ੍ਮਂ. ਹੀਤਿ ਸਚ੍ਚਂ, ਯਸ੍ਮਾ ਵਾ.

੪੨੬. ‘‘ਭੋਜਨਕਾਲ’’ਨ੍ਤਿ ਇਮਿਨਾ ‘‘ਕਾਲਂ ਵੀਤਿਨਾਮੇਸੁ’’ਨ੍ਤਿ ਏਤ੍ਥ ਕਾਲਵਿਸੇਸਂ ਦਸ੍ਸੇਤਿ.

ਪੁਰੇਤਿ ਆਦਿਮ੍ਹਿ. ਤਾਸਨ੍ਤਿ ਅਟ੍ਠਨ੍ਨਂ ਭਿਕ੍ਖੁਨੀਨਂ. ਅਬ੍ਭਨ੍ਤਰਿਮਾਤਿ ਅਬ੍ਭਨ੍ਤਰੇ ਪਰਿਯਾਪਨ੍ਨਾ. ਅਞ੍ਞਾਤਿ ਅਟ੍ਠਹਿ ਭਿਕ੍ਖੁਨੀਹਿ ਅਞ੍ਞਾ. ਨਵਕਤਰਾ ਹੋਤੀਤਿ ਸਮ੍ਬਨ੍ਧੋ. ‘‘ਠਪੇਤ੍ਵਾ ਭਤ੍ਤਗ੍ਗ’’ਨ੍ਤਿ ਇਮਿਨਾ ਅਞ੍ਞਤ੍ਥ ਸਬ੍ਬਤ੍ਥ ਯਥਾਵੁਡ੍ਢਂ ਨ ਪਟਿਬਾਹਿਤਬ੍ਬਨ੍ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਪਾਦਾਨਂ ਦਸ੍ਸੇਤਿ. ਅਞ੍ਞਸ੍ਮਿਨ੍ਤਿ ਏਤ੍ਥ ਸ੍ਮਿਂਵਚਨੇਨ ਤ੍ਥਪਚ੍ਚਯਸ੍ਸ ਅਤ੍ਥਂ ਦਸ੍ਸੇਤਿ. ‘‘ਚਤੁਪਚ੍ਚਯਭਾਜਨੀਯਟ੍ਠਾਨੇ’’ਤਿ ਇਮਿਨਾ ਸਰੂਪਂ ਦਸ੍ਸੇਤਿ.

੪੩੦. ਦੂਤੇਨਪਿ ਉਪਸਮ੍ਪਾਦੇਤੁਨ੍ਤਿ ਏਤ੍ਥ ਕਿਂ ਸਬ੍ਬਥਾ ਦੂਤੇਨ ਉਪਸਮ੍ਪਦਾ ਵਟ੍ਟਤੀਤਿ ਆਹ ‘‘ਦੂਤੇਨ…ਪੇ… ਵਟ੍ਟਤੀ’’ਤਿ. ਯੇਨ ਕੇਨਚਿ ਅਨ੍ਤਰਾਯੇਨਾਤਿ ਸਮ੍ਬਨ੍ਧੋ, ਅਸਤਿ ਅਨ੍ਤਰਾਯੇ ਨ ਵਟ੍ਟਤੀਤਿ ਅਧਿਪ੍ਪਾਯੋ. ਕਮ੍ਮਵਾਚਾਪਰਿਯੋਸਾਨੇ ਉਪਸਮ੍ਪਨ੍ਨਾਵ ਹੋਤੀਤਿ ਸਮ੍ਬਨ੍ਧੋ. ਤਾਵਦੇਵਾਤਿ ਉਪਸਮ੍ਪਨ੍ਨਕ੍ਖਣੇਯੇਵ.

੪੩੧. ਨਵਕਮ੍ਮਮ੍ਪੀਤਿ ਪਿਸਦ੍ਦੋ ਉਦੋਸਿਤਉਪਸ੍ਸਯੇ ਅਪੇਕ੍ਖਤਿ.

੪੩੨. ਤਸ੍ਸਾਤਿ ਤਸ੍ਸਾ ਇਤ੍ਥਿਯਾ. ਯਾਵ ਸੋ ਦਾਰਕੋ ਵਿਞ੍ਞੁਤਂ ਪਾਪੁਣਾਤੀਤਿ ਏਤ੍ਥ ਕਥਂ ਵਿਞ੍ਞੁਭਾਵੋ ਗਹੇਤਬ੍ਬੋਤਿ ਆਹ ‘‘ਯਾਵ ਖਾਦਿਤੁ’’ਨ੍ਤਿਆਦਿ.

ਠਪੇਤ੍ਵਾ ਸਾਗਾਰਨ੍ਤਿ ਏਤ੍ਥ ਸਕਾਰੋ ਸਹਸਦ੍ਦਕਾਰਿਯੋ, ਅਗਾਰਨ੍ਤਿ ਚ ਸੇਯ੍ਯਾਗਾਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਸਹਾਗਾਰਸੇਯ੍ਯਮਤ੍ਤਂ ਠਪੇਤ੍ਵਾ’’ਤਿ. ਯਥਾ ਅਞ੍ਞਸ੍ਮਿਂ ਪੁਰਿਸੇ ਪਟਿਪਜ੍ਜਿਤਬ੍ਬਂ, ਏਵਂ ਤਥਾਤਿ ਯੋਜਨਾ. ‘‘ਅਞ੍ਞਸ੍ਮਿ’’ਨ੍ਤਿ ਇਮਿਨਾ ਪਾਲ਼ਿਯਂ ਅਞ੍ਞੇ ਪੁਰਿਸੇਤਿ ਏਤ੍ਥ ਸ੍ਮਿਂਵਚਨਸ੍ਸ ਸਬ੍ਬਨਾਮਤੋ ਏਕਾਰਾਦੇਸੋ ਦਸ੍ਸਿਤੋ, ਤਂਦਸ੍ਸਨੇਨ ਚ ਕਚ੍ਚਾਯਨੇ (ਕਚ੍ਚਾਯਨੇ ੧੧੦ ਸੁਤ੍ਤੇ) ਸਬ੍ਬਨਾਮਤੋ ਸ੍ਮਿਂਵਚਨਸ੍ਸ ਏਕਾਰਾਦੇਸਨਿਸੇਧਨਂ ਅਨਿਚ੍ਚਨ੍ਤਿ ਦਸ੍ਸੇਤਿ.

੪੩੪. ‘‘ਯਦੇਵ ਸਾ ਵਿਬ੍ਭਨ੍ਤਾ’’ਤਿ ਇਮਿਨਾ ਦਸ੍ਸੇਤੀਤਿ ਸਮ੍ਬਨ੍ਧੋ. ‘‘ਯਸ੍ਮਾ’’ਤਿ ਇਮਿਨਾ ਯਦੇਵਾਤਿ ਏਤ੍ਥ ਯਂਸਦ੍ਦਸ੍ਸ ਕਾਰਣਤ੍ਥਂ ਦਸ੍ਸੇਤਿ. ਓਦਾਤਾਨਿ ਵਤ੍ਥਾਨਿ ਨਿਵਤ੍ਥਾਤਿ ਸਮ੍ਬਨ੍ਧੋ. ‘‘ਤਸ੍ਮਾਯੇਵਾ’’ਤਿ ਇਮਿਨਾ ਤਦੇਵਾਤਿ ਪਦਸ੍ਸ ਕਾਰਣਤ੍ਥਮੇਵ ਦਸ੍ਸੇਤਿ. ‘‘ਨ ਸਿਕ੍ਖਾਪਚ੍ਚਕ੍ਖਾਨੇਨਾ’’ਤਿ ਇਮਿਨਾ ਏਵਤ੍ਥਫਲਂ ਦਸ੍ਸੇਤਿ. ਸਾ ਪੁਨ ਉਪਸਮ੍ਪਦਂ ਨ ਲਭਤੀਤਿ ਸਾ ਵਿਬ੍ਭਨ੍ਤਾ ਭਿਕ੍ਖੁਨੀ ਪੁਨ ਉਪਸਮ੍ਪਦਂ ਨ ਲਭਤਿ.

ਪਬ੍ਬਜ੍ਜਮ੍ਪਿ ਨ ਲਭਤੀਤਿ ਤਿਤ੍ਥਾਯਤਨਸਙ੍ਕਨ੍ਤਾ ਭਿਕ੍ਖੁਨੀ ਪਬ੍ਬਜ੍ਜਮ੍ਪਿ ਨ ਲਭਤਿ, ਪਗੇਵ ਉਪਸਮ੍ਪਦਂ.

ਪਾਦੇ ਸਮ੍ਬਾਹਨ੍ਤਾਤਿ ਭਿਕ੍ਖੁਨੀਨਂ ਪਾਦੇ ਸਮ੍ਬਾਹਨ੍ਤਾ. ਕੇਸੇਤਿ ਭਿਕ੍ਖੁਨੀਨਂ ਕੇਸੇ. ਤਤ੍ਰਾਤਿ ‘‘ਕੁਕ੍ਕੁਚ੍ਚਯਨ੍ਤਾ ਨ ਸਾਦਿਯਨ੍ਤੀ’’ਤਿ ਵਚਨੇ. ਏਕੇ ਆਚਰਿਯਾ ਵਦਨ੍ਤੀਤਿ ਸਮ੍ਬਨ੍ਧੋ. ਸਾਰਤ੍ਤਾ ਹੋਨ੍ਤੀਤਿ ਯੋਜਨਾ. ਏਤ੍ਥਾਤਿ ਪੁਰਿਸਾਨਂ ਅਭਿਵਾਦਨਾਦੀਸੁ. ਇਦਨ੍ਤਿ ਪੁਰਿਸਾਨਂ ਅਭਿਵਾਦਨਾਦਿ, ‘‘ਅਨੁਞ੍ਞਾਤ’’ਨ੍ਤਿ ਪਦੇ ਵੁਤ੍ਤਕਮ੍ਮਂ ‘‘ਵਟ੍ਟਤੀ’’ਤਿ ਪਦੇ ਵੁਤ੍ਤਕਤ੍ਤਾ. ਅਥ ਵਾ ਓਦਿਸ੍ਸ ਅਨੁਞ੍ਞਾਤਂ ਇਦਂ ਪੁਰਿਸਾਨਂ ਅਭਿਵਾਦਨਾਦਿ ਵਟ੍ਟਤੀਤਿ ਯੋਜਨਾ. ਏਵਞ੍ਹਿ ਸਤਿ ‘‘ਓਦਿਸ੍ਸ ਅਨੁਞ੍ਞਾਤ’’ਨ੍ਤਿ ਪਦਂ ਹੇਤੁਅਨ੍ਤੋਗਧਵਿਸੇਸਨਂ, ਓਦਿਸ੍ਸ ਅਨੁਞ੍ਞਾਤਤ੍ਤਾ ਵਟ੍ਟਤੀਤਿ ਅਧਿਪ੍ਪਾਯੋ. ਤਨ੍ਤਿ ਅਟ੍ਠਕਥਾਸੁ ਵੁਤ੍ਤਵਚਨਂ. ਹੀਤਿ ਸਚ੍ਚਂ, ਯਸ੍ਮਾ ਵਾ.

੪੩੫. ਪਲ੍ਲਙ੍ਕੇਨ ਨਿਸੀਦਨ੍ਤੀਤਿ ਏਤ੍ਥ ਆਸਨਪਲ੍ਲਙ੍ਕਂ ਪਟਿਕ੍ਖਿਪਨ੍ਤੋ ਆਹ ‘‘ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਨ੍ਤੀ’’ਤਿ. ਤਤ੍ਥ ਆਭੁਜਿਤ੍ਵਾਤਿ ਆਬਨ੍ਧਿਤ੍ਵਾ. ਕੂਪੋਤਿ ਵਚ੍ਚਕੂਪੋ. ਉਪਰੀਤਿ ਕੂਪਤੋ ਉਪਰਿ. ‘‘ਸਬ੍ਬਦਿਸਾਸੁ ਪਞ੍ਞਾਯਤੀ’’ਤਿ ਇਮਿਨਾ ਪਟਿਚ੍ਛਨ੍ਨਮੇਵ ਅਤ੍ਥਿ, ਨ ਉਪਰਿ ਛਨ੍ਨਨ੍ਤਿ ਦਸ੍ਸੇਤਿ.

੪੩੬. ਕੁਣ੍ਡਕਨ੍ਤਿ ਕਣਂ. ਏਤ੍ਥਾਤਿ ਭਿਕ੍ਖੁਨਿਕ੍ਖਨ੍ਧਕੇ.

ਇਤਿ ਭਿਕ੍ਖੁਨਿਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.