ਚੂਲ਼ਵਗ੍ਗਯੋਜਨਾ
ਮਹਾਵਗ੍ਗਖਨ੍ਧਕਸ੍ਸੇਵਂ, ਕਤ੍ਵਾਨ ਯੋਜਨਾਨਯਂ;
ਅਧੁਨਾ ਚੂਲ਼ਵਗ੍ਗਸ੍ਸ, ਕਰਿਸ੍ਸਂ ਯੋਜਨਾਨਯਂ.
੧. ਕਮ੍ਮਕ੍ਖਨ੍ਧਕਂ
੧. ਤਜ੍ਜਨੀਯਕਮ੍ਮਕਥਾ
੧. ਚੂਲ਼ਵਗ੍ਗਸ੍ਸ ਪਠਮੇ ਕਮ੍ਮਕ੍ਖਨ੍ਧਕੇ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ‘‘ਚੂਲ਼ਵਗ੍ਗਸ੍ਸਾ’’ਤਿ ਪਦਂ ‘‘ਕਮ੍ਮਕ੍ਖਨ੍ਧਕੇ’’ਤਿ ਪਦੇ ਅਵਯਵਿਸਮ੍ਬਨ੍ਧੋ. ਤਾਵਾਤਿ ਪਾਰਿਵਾਸਿਕਕ੍ਖਨ੍ਧਕਾਦਿਤੋ, ਪਾਰਿਵਾਸਿਕ੍ਖਨ੍ਧਕਾਦੀਨਂ ਵਾ ਪਠਮਂ. ਚੇਵਸਦ੍ਦੋ ਚ ਚਸਦ੍ਦੋ ਚ ‘‘ਪਣ੍ਡੁਕਲੋਹਿਤਕਾ’’ਤਿ ਪਦਸ੍ਸ ਅਸਮਾਹਾਰਦ੍ਵਨ੍ਦਵਾਕ੍ਯਂ ਦੀਪੇਨ੍ਤਿ. ਨਿਸ੍ਸਯਾਨਂ ਨਾਮਂ ਨਿਸ੍ਸਿਤੇਸੁ ਉਪਚਾਰਵਸੇਨ ਤੇਸਂ ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਾਪਿ ਪਣ੍ਡੁਕਲੋਹਿਤਕਨਾਮਾਯੇਵ ਹੋਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਤੇਸਂ ਨਿਸ੍ਸਿਤਕਾਪੀ’’ਤਿਆਦਿ. ਪਿਸਦ੍ਦੇਨ ਉਪਚਾਰਤ੍ਥਂ ਸਮ੍ਪਿਣ੍ਡੇਤਿ. ‘‘ਸੁਟ੍ਠੁ ਬਲਵ’’ਨ੍ਤਿ ਇਮਿਨਾ ਬਲਵਾਬਲਵਨ੍ਤਿ ਦ੍ਵਿਨ੍ਨਂ ਸਦ੍ਦਾਨਂ ਪਰਿਯਾਯਭਾਵੇਨ ਵੁਤ੍ਤਤ੍ਤਾ ਅਤਿਸਯਤ੍ਥੋਤਿ ਦਸ੍ਸੇਤਿ. ‘‘ਬਲਵਬਲਵ’’ਨ੍ਤਿ ਵਤ੍ਤਬ੍ਬੇ ਵਾਚਾਸਿਲਿਟ੍ਠਵਸੇਨ ਦੀਘਂ ਕਤ੍ਵਾ ਏਵਂ ਵੁਤ੍ਤਂ. ਪਟਿਵਦਥਾਤਿ ਪਟਿਚ੍ਛਨ੍ਨਟ੍ਠਾਨੇ ਕਥੇਥ. ਇਮਿਨਾ ਪਟਿਮਨ੍ਤੇਥਾਤਿ ਏਤ੍ਥ ਮਨ੍ਤਧਾਤੁਯਾ ਗੁਤ੍ਤਭਾਸਨਤ੍ਥਂ ਦਸ੍ਸੇਤਿ. ਅਤ੍ਥੇਸੁ ਕਰਣਭਾਸਨਕਿਚ੍ਚੇਸੁ ਅਲਂ ਸਮਤ੍ਥਾਤਿ ਅਲਮਤ੍ਥਾ, ਤੇਸਂ ਵਿਸੇਸੇਨਾਤਿ ਅਲਮਤ੍ਥਤਰਾਤਿ ਦਸ੍ਸੇਨ੍ਤੋ ਆਹ ‘‘ਸਮਤ੍ਥਤਰਾ’’ਤਿ.
ਅਧਮ੍ਮਕਮ੍ਮਦ੍ਵਾਦਸਕਕਥਾ
੪. ਅਸਮ੍ਮੁਖਾ ਕਤਨ੍ਤਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਸਮ੍ਮੁਖੇਹਿ ਵਿਰਹਿਤਾ ਅਸਮ੍ਮੁਖਾਤਿ ਦਸ੍ਸੇਨ੍ਤੋ ਆਹ ‘‘ਸਙ੍ਘਧਮ੍ਮਵਿਨਯਪੁਗ੍ਗਲਸਮ੍ਮੁਖਾਨਂ ਵਿਨਾ ਕਤ’’ਨ੍ਤਿ. ‘‘ਅਪ੍ਪਟਿਪੁਚ੍ਛਿਤ੍ਵਾ’’ਤਿ ਇਮਿਨਾ ਅਪ੍ਪਟਿਪੁਚ੍ਛਾਤਿ ਏਤ੍ਥ ਤ੍ਵਾਪਚ੍ਚਯਸ੍ਸਾਕਾਰਭਾਵਂ ਦਸ੍ਸੇਤਿ. ਤਸ੍ਸੇਵਾਤਿ ਚੁਦਿਤਕਸ੍ਸੇਵ. ਅਦੇਸਨਾਗਾਮਿਨਿਯਾਤਿ ਏਤ੍ਥ ਅਕਾਰਸ੍ਸ ਅਞ੍ਞਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਾਰਾਜਿਕਾ…ਪੇ… ਵਾ’’ਤਿ. ਏਤ੍ਥਾਤਿ ਤਜ੍ਜਨੀਯਕਮ੍ਮੇ. ਨਵ ਪਦਾਤਿ ਨਵਸੁ ਪਦੇਸੁ, ਨਿਦ੍ਧਾਰਣੇ ਚੇਤਂ ਪਚ੍ਚਤ੍ਤਵਚਨਂ. ਪੁਰਿਮਕੇਸੁ ਤੀਸੁ ਤਿਕੇਸੁ ਵੁਤ੍ਤੇਸੁ ਨਵਸੁ ਪਦੇਸੂਤਿ ਯੋਜਨਾ. ‘‘ਏਕੇਕ’’ਨ੍ਤਿ ਪਦੇਨ ਸਮ੍ਬਨ੍ਧਿਤਬ੍ਬਂ. ਇਮੇਹੀਤਿ ਇਮੇਹਿ ਦ੍ਵੀਹਿ ਪਦੇਹਿ. ਦ੍ਵਾਦਸ ਤਿਕਾਤਿ ਪੁਰਿਮੇਹਿ ਤੀਹਿ ਤਿਕੇਹਿ ਨਵ ਤਿਕੇ ਮਿਸ੍ਸੇਤ੍ਵਾ ਦ੍ਵਾਦਸ. ਸੁਕ੍ਕਪਕ੍ਖੇਸੁਪੀਤਿ ਪਟਿਸੇਧਵਿਰਹਵਸੇਨ ਸੁਕ੍ਕੇਸੁ ਪਕ੍ਖੇਸੁਪਿ.
੬. ‘‘ਪਬ੍ਬਜਿਤਾਨ’’ਨ੍ਤਿ ਇਮਿਨਾ ਗਿਹੀਨਂ ਅਨਨੁਲੋਮਿਕਤਂ ਨਿਵਤ੍ਤੇਤਿ. ਸਹਸੋਕਿਤਾਦੀਹੀਤਿ ਆਦਿਸਦ੍ਦੇਨ ਸਹਨਨ੍ਦਿਂ ਸਙ੍ਗਣ੍ਹਾਤਿ. ਇਮਸ੍ਮਿਂ ਠਾਨੇ ਸਬ੍ਬਅਟ੍ਠਕਥਾਪੋਤ੍ਥਕੇਸੁ ‘‘ਨ ਉਪਸਮ੍ਪਾਦੇਤਬ੍ਬਨ੍ਤਿ ਉਪਜ੍ਝਾਯੇਨ ਹੁਤ੍ਵਾ ਨ ਉਪਸਮ੍ਪਾਦੇਤਬ੍ਬ’’ਨ੍ਤਿ ਪਾਠਤੋ ਪਟ੍ਠਾਯ ਯਾਵ ‘‘ਨ ਸਮ੍ਪਯੋਜੇਤਬ੍ਬਨ੍ਤਿ ਅਞ੍ਞਮਞ੍ਞਂ ਯੋਜੇਤ੍ਵਾ ਕਲਹੋ ਨ ਕਾਰੇਤਬ੍ਬੋ’’ਤਿ ਪਾਠੋ ਅਤ੍ਥਿ, ਤਾਵ ਅਟ੍ਠਾਰਸਸਮ੍ਮਾਵਤ੍ਤਨਵਤ੍ਤਾਨਂ ਸਂਵਣ੍ਣਨਾਪਾਠੋ ਲਿਖਿਤੋ, ਸੋ ਪਾਠੋ ਇਮਸ੍ਮਿਂ ਠਾਨੇ ਨ ਲਿਖਿਤਬ੍ਬੋ. ਕਸ੍ਮਾ? ਪਾਲ਼ਿਕ੍ਕਮਾਨੁਪ੍ਪਤ੍ਤਾਭਾਵਤੋ, ਅਟ੍ਠਕਥਾਯਮੇਵ ‘‘ਅਟ੍ਠਾਰਸ ਸਮ੍ਮਾਵਤ੍ਤਨਵਤ੍ਤਾਨਿ ਪਾਰਿਵਾਸਿਕਕ੍ਖਨ੍ਧਕੇ ਵਣ੍ਣਯਿਸ੍ਸਾਮਾ’’ਤਿ ਵਕ੍ਖਮਾਨਤ੍ਤਾ, ਯਥਾਵਚਨਞ੍ਚ ਪਾਰਿਵਾਸਿਕਕ੍ਖਨ੍ਧਕੇ (ਚੂਲ਼ਵ. ਅਟ੍ਠ. ੭੬) ਸਂਵਣ੍ਣਿਤਤ੍ਥਾ ਚ. ਤਸ੍ਮਾ ਸੋ ਪਾਠੋ ਨ ਪੋਰਾਣਪਾਠੋ ਹੋਤਿ, ਪਚ੍ਛਾ ਪਕ੍ਖਿਤ੍ਤਪਾਠੋਤਿ ਦਟ੍ਠਬ੍ਬੋ.
ਤਿਣ੍ਣਂ ਭਿਕ੍ਖਵੇ ਭਿਕ੍ਖੂਨਨ੍ਤਿਆਦਿ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਏਕੇਕੇਨਾਪੀਤਿ ਤੀਸੁ ਅਙ੍ਗੇਸੁ ਏਕੇਕੇਨਾਪਿ. ਇਮਿਨਾ ਅਵਯਵਵਾਕ੍ਯਨਿਬ੍ਬਤ੍ਤਿਵਸੇਨ ਕਮ੍ਮਾਰਹਭਾਵਂ ਦਸ੍ਸੇਤਿ. ਹੀਤਿ ਸਚ੍ਚਂ. ਨਿਯਸ੍ਸਸ੍ਸ ਵਿਸੇਸੇਨ ਅਭਿਣ੍ਹਾਪਤ੍ਤਿਕਤ੍ਤਂ ਅਙ੍ਗਂ ਇਤਿ ਵੁਤ੍ਤਨ੍ਤਿ ਯੋਜਨਾ. ਏਤ੍ਥ ਆਕਾਰਵਾਚਕੋ ਇਤਿਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਦਟ੍ਠਬ੍ਬਂ. ਏਸੇਵ ਨਯੋ ਅਨਨ੍ਤਰੇਪਿ. ਤਜ੍ਜੀਯਤਿ ਅਨੇਨ ਵਿਨਯਕਮ੍ਮੇਨਾਤਿ ਤਜ੍ਜਨੀਯਂ, ਤਮੇਵ ਕਮ੍ਮਂ ਤਜ੍ਜਨੀਯਕਮ੍ਮਂ. ‘‘ਨਿਸ੍ਸਾਯ ਤੇ ਵਤ੍ਥਬ੍ਬ’’ਨ੍ਤਿ ਨਿਯਸ੍ਸੀਯਤਿ ਬਾਲੋ ਭਜਾਪੀਯਤਿ ਅਨੇਨ ਵਿਨਯਕਮ੍ਮੇਨਾਤਿ ਨਿਯਸ੍ਸਂ, ਦਿਵਾਦਿਗਣਿਕਤ੍ਤਾ ਸਕਾਰਸ੍ਸ ਦ੍ਵੇਭਾਵੋ ਹੋਤਿ ‘‘ਨਸ੍ਸਂ ਵਸ੍ਸ’’ਨ੍ਤਿਆਦੀਸੁ ਵਿਯ, ਨਿਯਸ੍ਸਮੇਵ ਕਮ੍ਮਂ ਨਿਯਸ੍ਸਕਮ੍ਮਂ. ਗਾਮਾਦਿਤੋ ਪਬ੍ਬਾਜਿਯਤਿ ਅਨੇਨ ਵਿਨਯਕਮ੍ਮੇਨਾਤਿ ਪਬ੍ਬਾਜਨੀਯਂ, ਤਮੇਵ ਕਮ੍ਮਂ ਪਬ੍ਬਾਜਨੀਯਕਮ੍ਮਂ. ਤੀਸੂਤਿ ਭਣ੍ਡਨਕਾਰਕਅਭਿਣ੍ਹਾਪਤ੍ਤਿਕਕੁਲਦੂਸਕਵਸੇਨ ਤਿਵਿਧੇਸੁ ਅਙ੍ਗੇਸੁ. ਯੇਨ ਕੇਨਚਿ ਅਙ੍ਗੇਨਾਤਿ ਸਮ੍ਬਨ੍ਧੋ. ਯਦਿ ਸਬ੍ਬਾਨਿ ਕਮ੍ਮਾਨਿ ਕਾਤੁਂ ਵਟ੍ਟਤੀਤਿ ਯੋਜਨਾ. ਏਵਂ ਸਤਿ ਚਮ੍ਪੇਯ੍ਯਕ੍ਖਨ੍ਧਕੇ (ਮਹਾਵ. ੪੦੦ ਆਦਯੋ) ਵੁਤ੍ਤਂ ਇਦਂ ਵਚਨਂ ਵਿਰੁਜ੍ਝਤੀਤਿ ਸਮ੍ਬਨ੍ਧੋ. ਵਚਨਤ੍ਥਨਾਨਤ੍ਤਤੋਤਿ ਵਚਨਸ੍ਸ ਚ ਅਤ੍ਥਸ੍ਸ ਚ ਨਾਨਾਭਾਵਤੋ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਤਜ੍ਜਨੀਯਕਮ੍ਮਾਰਹਸ੍ਸਾਤਿ ਇਮਸ੍ਸ ਹੀ’’ਤਿਆਦਿ. ਤਤ੍ਥ ‘‘ਤਿਣ੍ਣਂ ਭਿਕ੍ਖਵੇ’’ਤਿਆਦਿਵਚਨਸ੍ਸ ਅਙ੍ਗਸਮ੍ਭਵੋ ਅਤ੍ਥੋਤਿ ਯੋਜਨਾ. ਤਸ੍ਮਾਤਿ ਯਸ੍ਮਾ ਨ ਵਿਰੁਜ੍ਝਤਿ, ਤਸ੍ਮਾ. ਸਙ੍ਘੇਨ ਕਤਂ ਹੋਤੀਤਿ ਸਮ੍ਬਨ੍ਧੋ. ਇਮਿਨਾ ਲਕ੍ਖਣੇਨ ਤਜ੍ਜਨੀਯਾਦਿਕਮ੍ਮਾਰਹਸ੍ਸ ਤਸ੍ਸ ਭਿਕ੍ਖੁਸ੍ਸਾਤਿ ਯੋਜਨਾ. ਏਵਂ ਕਮ੍ਮਸਨ੍ਨਿਟ੍ਠਾਨਤ੍ਥਂ ਦਸ੍ਸੇਤ੍ਵਾ ਅਙ੍ਗਸਮ੍ਭਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਸ ਪਨਾ’’ਤਿਆਦਿ. ਤਤ੍ਥ ਯਸ੍ਸਾਤਿ ਭਿਕ੍ਖੁਸ੍ਸ, ਅਤ੍ਥੀਤਿ ਸਮ੍ਬਨ੍ਧੋ. ਭਣ੍ਡਨਕਾਰਕਾਦੀਸੂਤਿਆਦਿਸਦ੍ਦੇਨ ਅਭਿਣ੍ਹਾਪਤ੍ਤਿਕਕੁਲਦੂਸਕਾਨਿ ਸਙ੍ਗਣ੍ਹਾਤਿ. ਆਕਙ੍ਖਮਾਨੋ ਸਙ੍ਘੋ ਕਰੇਯ੍ਯਾਤਿ ਸਮ੍ਬਨ੍ਧੋ. ਕਮ੍ਮਾਰਹਨ੍ਤਿ ਕਮ੍ਮਸ੍ਸ, ਕਮ੍ਮੇ ਵਾ ਅਰਹਂ. ਏਤ੍ਥਾਤਿ ਕਮ੍ਮਕ੍ਖਨ੍ਧਕੇ. ਪੁਬ੍ਬੇਨਾਤਿ ਪੁਬ੍ਬੇ ਵੁਤ੍ਤੇਨ ਚਮ੍ਪੇਯ੍ਯਕ੍ਖਨ੍ਧਕੇਨ. ਅਪਰਨ੍ਤਿ ਅਪਰੇ ਵੁਤ੍ਤਂ ਕਮ੍ਮਕ੍ਖਨ੍ਧਕਂ. ਸਮੇਤੀਤਿ ਸਮਂ ਗਚ੍ਛਤਿ.
ਤਤ੍ਥਾਤਿ ਕਮ੍ਮੇਸੁ, ਤਜ੍ਜਨੀਯਕਮ੍ਮੇਤਿ ਸਮ੍ਬਨ੍ਧੋ, ਅਙ੍ਗੇਸੁ ਵਾ, ਭਣ੍ਡਨਕਾਰਕਵਸੇਨਾਤਿ ਸਮ੍ਬਨ੍ਧੋ. ਅਥ ਖੋਤਿ ਤਥਾ ਵੁਤ੍ਤਾਪੀਤਿ ਅਤ੍ਥੋ. ਕਰੋਨ੍ਤੇਨ ਕਮ੍ਮਵਾਚਾਵਾਚਕੇਨਾਤਿ ਸਮ੍ਬਨ੍ਧੋ. ਹੀਤਿ ਫਲਜੋਤਕੋ. ਭੂਤੇਨ ਵਤ੍ਥੁਨਾਤਿ ਤਚ੍ਛੇਨ ਵਤ੍ਥੁਨਾ. ਅਞ੍ਞਸ੍ਸ ਕਮ੍ਮਸ੍ਸਾਤਿ ਤਜ੍ਜਨੀਯਕਮ੍ਮਤੋ ਅਞ੍ਞਸ੍ਸ ਕਮ੍ਮਸ੍ਸ. ਕਸ੍ਮਾ ਬਾਲਸ੍ਸ ਅਬ੍ਯਤ੍ਤਸ੍ਸ ਆਪਤ੍ਤਿਬਹੁਲਸ੍ਸ ਤਜ੍ਜਨੀਯਕਮ੍ਮਂ ਕਾਤਬ੍ਬਨ੍ਤਿ ਯੋਜਨਾ. ਇਦਮ੍ਪੀਤਿ ਤਜ੍ਜਨੀਯਕਮ੍ਮਮ੍ਪਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਕਮ੍ਮੇਸੁ.
ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਾਦਿਕਥਾ
੮. ਪਨ੍ਨਲੋਮਾਤਿ ਪਤਿਤਮਾਨਲੋਮਾ. ਏਤਨ੍ਤਿ ਵਤ੍ਤਂ. ਨੇਤ੍ਥਾਰਨ੍ਤਿ ਏਤ੍ਥ ਅਫੁਟ੍ਠਕ੍ਖਰਸਂਯੋਗੇ ਪਰਸ੍ਸ ਤਕਾਰਸ੍ਸ ਥਕਾਰੋ ਹੋਤਿ, ਤਸ੍ਮਾ ਦੁਤਿਯਕ੍ਖਰੇਨ ਪਾਠੋ ਯੁਤ੍ਤੋ. ਯੇਨਾਤਿ ਵਤ੍ਤੇਨ. ਨਿਸ੍ਸਾਰਣਾਤਿ ਨਿਸ੍ਸਾਰਣਤੋ. ਦਸ ਵਾ ਦਿਵਸਾਨਿ, ਪਞ੍ਚ ਵਾ ਦਿਵਸਾਨਿ ਪੂਰੇਤਬ੍ਬਨ੍ਤਿ ਯੋਜਨਾ. ਹੀਤਿ ਸਚ੍ਚਂ. ਏਤ੍ਤਕੇਨਾਤਿ ਏਤਪ੍ਪਮਾਣੇਨ ਦਸਪਞ੍ਚਦਿਵਸੇਨ.
੨. ਨਿਯਸ੍ਸਕਮ੍ਮਕਥਾ
੧੧. ਅਪਿਸ੍ਸੁ ਭਿਕ੍ਖੂ ਪਕਤਾਤਿ ਏਤ੍ਥ ਨਿਪਾਤਾਨਮਨੇਕਤ੍ਥਤ੍ਤਾ ਇਧ ਅਪਿਸ੍ਸੁਸਦ੍ਦੋ ਨਿਚ੍ਚਤ੍ਥੋ ਹੋਤਿ. ਪਕਤਸਦ੍ਦੋ ‘‘ਕੁਕ੍ਕੁਚ੍ਚਪਕਤਾ’’ਤਿਆਦੀਸੁ (ਪਾਰਾ. ਅਟ੍ਠ. ੧.ਤਤਿਯਸਙ੍ਗੀਤਿਕਥਾ; ਪਾਚਿ. ਅਟ੍ਠ. ੪੩੮) ਅਭਿਭਵਨਤ੍ਥੋ, ਇਧ ਪਨ ਬ੍ਯਾਵਟਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਨਿਚ੍ਚਂ ਬ੍ਯਾਵਟਾ ਹੋਨ੍ਤੀ’’ਤਿ.
੩. ਪਬ੍ਬਾਜਨੀਯਕਮ੍ਮਕਥਾ
੨੭. ਏਤ੍ਥਾਤਿ ਅਸ੍ਸਜਿਪੁਨਬ੍ਬਸੁਕਵਤ੍ਥੁਮ੍ਹਿ. ਕਾਯਿਕੋਤਿ ਏਤ੍ਥ ਕਾਯੇਨ ਕੀਲ਼ਤੀਤਿ ਕਾਯਿਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਕਾਯਕੀਲ਼ਾ ਵੁਚ੍ਚਤੀ’’ਤਿ. ‘‘ਏਸੇਵ ਨਯੋ’’ਤਿ ਇਮਿਨਾ ਵਾਚਾਯ ਕੀਲ਼ਤੀਤਿ ਵਾਚਸਿਕੋ, ਕਾਯਿਕੋ ਚ ਵਾਚਸਿਕੋ ਚ ਕਾਯਿਕਵਾਚਸਿਕੋਤਿ ਵਚਨਤ੍ਥਂ ਅਤਿਦਿਸਤਿ. ਏਤ੍ਥ ਚ ਪਚ੍ਛਿਮਵਚਨਤ੍ਥੋ ਸਮਾਹਾਰਦ੍ਵਨ੍ਦੋ, ਸਮਾਹਾਰਦ੍ਵਨ੍ਦੇਪਿ ਕਤ੍ਥਚਿ ਪੁਲ੍ਲਿਙ੍ਗਮਿਚ੍ਛਨ੍ਤਿ ਸਦ੍ਦਵਿਦੂ ‘‘ਧਮ੍ਮਵਿਨਯੋ’’ਤਿਆਦੀਸੁ (ਵਿਭ. ਅਟ੍ਠ. ੫੦੯) ਵਿਯ. ਕਾਯਦ੍ਵਾਰਪਞ੍ਞਤ੍ਤਸਿਕ੍ਖਾਪਦਂ ਵੀਤਿਕ੍ਕਮਤੀਤਿ ਕਾਯਿਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋ ਵੁਚ੍ਚਤੀ’’ਤਿ. ਕਾਯੇਨ ਪਞ੍ਞਤ੍ਤਸਿਕ੍ਖਾਪਦਂ ਵੀਤਿਕ੍ਕਮੇਤੀਤਿ ਕਾਯਿਕੋਤਿ ਵਚਨਤ੍ਥੋਪਿ ਯੁਜ੍ਜਤੇਵ. ‘‘ਉਪਹਨਨਂ ਵੁਚ੍ਚਤੀ’’ਤਿ ਇਮਿਨਾ ਉਪਹਨਨਂ ਉਪਘਾਤਂ, ਤਮੇਵ ਉਪਘਾਤਿਕਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਨਾਸਨ’’ਨ੍ਤਿ ਇਮਿਨਾ ਹਨਧਾਤੁਯਾ ਹਿਂਸਨਤ੍ਥਂ ਦਸ੍ਸੇਤਿ. ਪਟਿਕ੍ਖਿਤ੍ਤਵੇਜ੍ਜਕਮ੍ਮਾਦਿਵਸੇਨ ਤੇਲਪਚਨਅਰਿਟ੍ਠਪਚਨਾਦੀਨਿ ਕਾਯਿਕੋ ਮਿਚ੍ਛਾਜੀਵੋ ਨਾਮਾਤਿ ਯੋਜਨਾ. ਇਮਿਨਾ ਮਿਚ੍ਛਾਜੀਵਸ੍ਸ ਸਰੂਪਂ ਦਸ੍ਸੇਤਿ.
੪. ਪਟਿਸਾਰਣੀਯਕਮ੍ਮਕਥਾ
੩੩. ਸੁਧਮ੍ਮਵਤ੍ਥੁਸ੍ਮਿਂ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਅਨਪਲੋਕੇਤ੍ਵਾਤਿ ਏਤ੍ਥ ਅਪਪੁਬ੍ਬੋ ਲੋਕਸਦ੍ਦੋ ਆਪੁਚ੍ਛਨਤ੍ਥੋਤਿ ਆਹ ‘‘ਨ ਆਪੁਚ੍ਛਿਤ੍ਵਾ’’ਤਿ.
੩੪. ਕਿਨ੍ਤਿ ਕਿਂ ਨਾਮ ਖਾਦਨੀਯਭੋਜਨੀਯਂ. ਵੋਤਿ ਤੁਮ੍ਹੇਹਿ. ਗਹਪਤੀਤਿ ਆਲਪਨਪਦਂ. ਥੇਰਾਨਂ ਅਤ੍ਥਾਯਾਤਿ ਸਮ੍ਬਨ੍ਧੋ. ਪਟਿਯਤ੍ਤਨ੍ਤਿ ਪਟਿਯਾਦਿਤਂ. ‘‘ਏਤਂ ਅਵੋਚਾ’’ਤਿ ਇਮਿਨਾ ਏਤਦਵੋਚਾਤਿ ਏਤ੍ਥ ਨਿਗ੍ਗਹਿਤਾਦੇਸਸਨ੍ਧਿਂ ਦਸ੍ਸੇਤਿ. ਯਦਿਦਨ੍ਤਿ ਸਦ੍ਦੋ ‘‘ਤਿਲਸਂਗੁਲ਼ਿਕਾ’’ਤਿ ਪਦੇਨ ਯੋਜਿਤਤ੍ਤਾ ਇਤ੍ਥਿਲਿਙ੍ਗੋਤਿ ਆਹ ‘‘ਯਾ ਅਯ’’ਨ੍ਤਿ. ਤਿਲਸਕ੍ਖਲਿਕਾਤਿ ਤਿਲੇਨ ਸਂਸਟ੍ਠਾ ਸਕ੍ਖਲਿਕਾ. ‘‘ਸਾ ਨਤ੍ਥੀ’’ਤਿ ਇਮਿਨਾ ਉਤ੍ਤਰਵਾਕ੍ਯੇ ਯਂਸਦ੍ਦਸ੍ਸ ਪੁਬ੍ਬਵਾਕ੍ਯੇ ਤਂਸਦ੍ਦਾਪੇਕ੍ਖਤਂ ਦਸ੍ਸੇਤਿ. ਏਕੋ ਪੁਰਿਸੋਤਿ ਸਮ੍ਬਨ੍ਧੋ. ਪੂਵਿਯੋਤਿ ਪੂਵਂ, ਪੂਵੇਨ ਵਾ ਕਯਵਿਕ੍ਕਯੋ. ਤੇਨਾਤਿ ਕਾਰਣੇਨ. ਨਨ੍ਤਿ ਗਹਪਤਿਂ. ਥੇਰੋਤਿ ਸੁਧਮ੍ਮਤ੍ਥੇਰੋ. ਯਦੇਵ ਕਿਞ੍ਚੀਤਿ ਏਤ੍ਥ ਕਿਞ੍ਚਿ ਏਵ ਯਂ ਵਚਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਿਞ੍ਚਿਦੇਵ ਤਿਲਸਂਗੁਲ਼ਿਕਾਵਚਨ’’ਨ੍ਤਿ. ਇਦਨ੍ਤਿ ਇਮਂ ਅਤ੍ਥਂ. ਸੋਤਿ ਕੁਕ੍ਕੁਟਪੋਤਕੋ. ਕਾਕਵਸ੍ਸਿਤਨ੍ਤਿ ਕਾਕਸ੍ਸ ਵਸ੍ਸਿਤਂ, ਨੇਵ ਅਕਾਸੀਤਿ ਸਮ੍ਬਨ੍ਧੋ. ਤਯਾਪੀਤਿ ਪਿਸਦ੍ਦੋ ਕੁਕ੍ਕੁਟਪੋਤਕਂ ਅਪੇਕ੍ਖਤਿ. ਨੇਵ ਭਿਕ੍ਖੁਵਚਨਂ ਵੁਤ੍ਤਂ, ਨ ਗਿਹਿਵਚਨਂ ਵੁਤ੍ਤਂ, ਇਤਿ ਇਮਮਤ੍ਥਂ ਦਸ੍ਸੇਤੀਤਿ ਯੋਜਨਾ.
ਅਧਮ੍ਮਕਮ੍ਮਾਦਿਦ੍ਵਾਦਸਕਕਥਾ
੩੯. ਪੁਰਿਮੇਹਿ ਕਮ੍ਮੇਹੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਅਙ੍ਗੇਸੁ. ਯਥਾ ਪਰਿਸਕ੍ਕਿਯਮਾਨੇ ਗਿਹਿਨੋ ਲਾਭਂ ਨ ਲਭਨ੍ਤੀਤਿ ਯੋਜਨਾ. ਪਰਿਪੁਬ੍ਬੋ ਸਕ੍ਕਧਾਤੁ ਪਰਕ੍ਕਮਤ੍ਥੋਤਿ ਆਹ ‘‘ਪਰਕ੍ਕਮਨ੍ਤੋ’’ਤਿ. ਤਤ੍ਥਾਤਿ ਅਨਤ੍ਥਾਦੀਸੁ. ਅਤ੍ਥਭਙ੍ਗੋਤਿ ਗਿਹੀਨਂ ਅਤ੍ਥਸ੍ਸ ਭਙ੍ਗੋ. ਅਵਸਨਨ੍ਤਿ ਗਿਹੀਨਂ ਅਵਸਨਂ. ਗਿਹੀਨਨ੍ਤਿ ਏਤ੍ਥ ਸਾਮ੍ਯਤ੍ਥੇ ਸਾਮਿਵਚਨਨ੍ਤਿ ਆਹ ‘‘ਗਿਹੀਨਂ ਸਨ੍ਤਿਕੇ’’ਤਿ. ਯਥਾ ਕਰਿਯਮਾਨੇ ਸਚ੍ਚੋ ਹੋਤਿ, ਏਵਂ ਨ ਕਰੋਤੀਤਿ ਯੋਜਨਾ. ਏਕਙ੍ਗੇਨਾਪੀਤਿ ਪਿਸਦ੍ਦੋ ਸਮ੍ਭਾਵਨਤ੍ਥੋ, ਤਤੋ ਅਧਿਕੇਹਿ ਅਙ੍ਗੇਹਿ ਕਾ ਨਾਮ ਕਥਾਤਿ ਦਸ੍ਸੇਤਿ. ਏਤ੍ਥਾਤਿ ਪਟਿਸਾਰਣੀਯਕਮ੍ਮੇ. ਪਟਿਮੁਖਂ ਅਤ੍ਤਨੋ ਦੋਸਂ ਸਰਾਪੇਤਬ੍ਬਂ ਅਨੇਨ ਵਿਨਯਕਮ੍ਮੇਨਾਤਿ ਪਟਿਸਾਰਣੀਯਂ, ਤਮੇਵ ਕਮ੍ਮਂ ਪਟਿਸਾਰਣੀਯਕਮ੍ਮਂ.
੫. ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਥਾ
੪੬. ਸਂਸਥਾਤਿ ਏਤ੍ਥ ਸਂਸਧਾਤੁਯਾ ਕਥਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਆਰੋਚੇਥਾ’’ਤਿ. ਤੁਮ੍ਹੇ ਸਂਸਥ, ਕਥੇਥਾਤਿ ਅਤ੍ਥੋ.
੫੦. ਭਣ੍ਡਨਕਾਰਕੋ ਹੋਤੀਤਿਆਦਿ ਕਾਰਣੂਪਚਾਰਵਸੇਨ ਵੁਤ੍ਤੋਤਿ ਆਹ ‘‘ਭਣ੍ਡਨਾਦਿਪਚ੍ਚਯਾ’’ਤਿਆਦਿ. ਭਣ੍ਡਨਕਾਰਕਾਦਿ ਕਾਰਣਂ, ਤੇਨ ਆਪਨ੍ਨਾ ਆਪਤ੍ਤਿ ਫਲਂ, ਤਸ੍ਸਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਾਤਬ੍ਬਨ੍ਤਿ ਅਧਿਪ੍ਪਾਯੋ. ਤਸ੍ਸਾਤਿ ਆਪਤ੍ਤਿਯਾ.
੫੧. ਏਤ੍ਥਾਤਿ ਉਕ੍ਖੇਪਨੀਯਕਮ੍ਮੇ. ਤਤ੍ਥਾਤਿ ਤੇਚਤ੍ਤਾਲੀਸਵਤ੍ਤੇਸੁ. ਅਨੁਦ੍ਧਂਸੇਤਬ੍ਬੋਤਿ ਏਤ੍ਥ ਧਂਸਧਾਤੁਯਾ ਗਤ੍ਯਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਨ ਚੋਦੇਤਬ੍ਬੋ’’ਤਿ. ‘‘ਰਜੋਨੁਦ੍ਧਂਸਤੀ’’ਤਿਆਦੀਸੁ (ਬੁ. ਵਂ. ੨.੧੦੧) ਹਿ ਧਂਸਧਾਤੁ ਗਤ੍ਯਤ੍ਥੇ ਵਤ੍ਤਤਿ. ‘‘ਨ ਭਿਕ੍ਖੁ ਭਿਕ੍ਖੂਹੀ’’ਤਿ ਏਤ੍ਥ ਸੋਯੇਵ ਭਿਕ੍ਖੁ ਤੇਹੇਵ ਭਿਕ੍ਖੂਹੀਤਿ ਅਤ੍ਥਂ ਨਿਵਾਰੇਨ੍ਤੋ ਆਹ ‘‘ਅਞ੍ਞੋ ਭਿਕ੍ਖੁ ਅਞ੍ਞੇਹਿ ਭਿਕ੍ਖੂਹੀ’’ਤਿ. ਨ ਗਿਹਿਦ੍ਧਜੋਤਿ ਏਤ੍ਥ ਗਿਹੀਨਂ ਧਜੋ ਗਿਹਿਦ੍ਧਜੋਤਿ ਵੁਤ੍ਤੇ ਓਦਾਤਵਤ੍ਥਾਦੀਨੀਤਿ ਆਹ ‘‘ਓਦਾਤਵਤ੍ਥਾਨੀ’’ਤਿਆਦਿ. ਨ ਤਿਤ੍ਥਿਯਾਦਿਪਦਤ੍ਤਯਨ੍ਤਿ ‘‘ਨ ਤਿਤ੍ਥਿਯਾ ਸੇਵਿਤਬ੍ਬਾ, ਭਿਕ੍ਖੂ ਸੇਵਿਤਬ੍ਬਾ, ਭਿਕ੍ਖੁਸਿਕ੍ਖਾਯ ਸਿਕ੍ਖਿਤਬ੍ਬ’’ਨ੍ਤਿ ਪਦਾਨਂ ਤਯਂ. ‘‘ਨ ਅਪਸਾਦੇਤਬ੍ਬੋ’’ਤਿ ਇਮਿਨਾ ਨ ਆਸਾਦੇਤਬ੍ਬੋਤਿ ਏਤ੍ਥ ਆਪੁਬ੍ਬਸਦਧਾਤੁਯਾ ਅਪਪੁਬ੍ਬਸਦਧਾਤੁਯਾ ਸਮਾਨਭਾਵਂ ਦਸ੍ਸੇਤਿ. ‘‘ਅਨ੍ਤੋ ਵਾ ਬਹਿ ਵਾਤਿ’’ ਏਤ੍ਥ ਕਸ੍ਸ ਅਨ੍ਤੋ ਵਾ ਬਹਿ ਵਾਤਿ ਆਹ ‘‘ਵਿਹਾਰਸ੍ਸਾ’’ਤਿ. ਸੇਸਂ ਸਬ੍ਬਂਵਤ੍ਤਨ੍ਤਿ ਯੋਜਨਾ. ਇਮਿਨਾਤਿ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇਨ.
੬੫. ਤਸ੍ਸਾਤਿ ਆਪਤ੍ਤਿਯਾ. ਇਧਾਤਿ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਕਤੇ ਉਕ੍ਖੇਪਨੀਯਕਮ੍ਮੇ. ਆਪਤ੍ਤਿਅਦਸ੍ਸਨਾਦੀਸੁ ਉਦ੍ਧਰਿਤ੍ਵਾ ਖਿਪੀਯਤਿ ਅਪਨੀਯਤਿ ਅਨੇਨ ਵਿਨਯਕਮ੍ਮੇਨਾਤਿ ਉਕ੍ਖੇਪਨੀਯਂ, ਤਮੇਵ ਕਮ੍ਮਂ ਉਕ੍ਖੇਪਨੀਯਕਮ੍ਮਂ.
ਇਤਿ ਕਮ੍ਮਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.
੨. ਪਾਰਿਵਾਸਿਕਕ੍ਖਨ੍ਧਕਂ
੧. ਪਾਰਿਵਾਸਿਕਵਤ੍ਤਕਥਾ
੭੫. ਪਾਰਿਵਾਸਿਕਕ੍ਖਨ੍ਧਕੇ ਪਾਰਿਵਾਸਿਕਾਤਿ ਪਦਸ੍ਸ ਪਰਿਵਾਸਂ ਪਰਿਵਸਨ੍ਤੀਤਿ ਪਾਰਿਵਾਸਿਕਾਤਿ ਦਸ੍ਸੇਨ੍ਤੋ ਆਹ ‘‘ਪਰਿਵਾਸਂ ਪਰਿਵਸਨ੍ਤਾ’’ਤਿ. ਤਤ੍ਥਾਤਿ ‘‘ਪਰਿਵਾਸਂ ਪਰਿਵਸਨ੍ਤਾ’’ਤਿ ਤਦ੍ਧਿਤਵਾਕ੍ਯੇ. ਤੇਸੂਤਿ ਚਤੁਬ੍ਬਿਧੇਸੁ ਪਰਿਵਾਸੇਸੁ. ਤਿਤ੍ਥਿਯਪਰਿਵਾਸੋਤਿ ਤਿਤ੍ਥਿਯਾਨਂ ਪਰਿਵਾਸੋ, ਤਿਤ੍ਥਿਯਾਨਂ ਵਾ ਦਾਤਬ੍ਬੋ ਪਰਿਵਾਸੋ, ਤਿਤ੍ਥਿਯੇਹਿ ਵਾ ਪਰਿਵਸਿਤਬ੍ਬੋ ਪਰਿਵਾਸੋ ਤਿਤ੍ਥਿਯਪਰਿਵਾਸੋ. ਅਪ੍ਪਟਿਚ੍ਛਨ੍ਨਪਰਿਵਾਸੋਤਿ ਅਪ੍ਪਟਿਚ੍ਛਨ੍ਨੋ ਪਰਿਵਾਸੋ ਅਪ੍ਪਟਿਚ੍ਛਨ੍ਨਪਰਿਵਾਸੋ. ਤਤ੍ਥਾਤਿ ਅਪ੍ਪਟਿਚ੍ਛਨ੍ਨਪਰਿਵਾਸੇ. ਯਨ੍ਤਿ ਵਚਨਂ. ਅਯਂ ਪਨਾਤਿ ਅਯਂ ਪਟਿਚ੍ਛਨ੍ਨਪਰਿਵਾਸੋ ਪਨ. ਇਧਾਤਿ ਪਾਰਿਵਾਸਿਕਕ੍ਖਨ੍ਧਕੇ. ਸੇਸਾਤਿ ਅਪ੍ਪਟਿਚ੍ਛਨ੍ਨਪਰਿਵਾਸਤੋ ਸੇਸਾ. ਤਯੋਤਿ ਅਪ੍ਪਟਿਚ੍ਛਨ੍ਨਪਰਿਵਾਸਾਦਯੋ ਤਯੋ, ਦਾਤਬ੍ਬਾਤਿ ਸਮ੍ਬਨ੍ਧੋ. ਕਸ੍ਸ ਦਾਤਬ੍ਬਾਤਿ ਆਹ ‘‘ਯੇਨਾ’’ਤਿਆਦਿ. ਆਪਨ੍ਨਾ ਚੇਵਾਤਿ ਆਪਜ੍ਜਿਤਬ੍ਬਾ ਚੇਵ. ਤੇਸੂਤਿ ਤਿਵਿਧੇਸੁ ਪਰਿਵਾਸੇਸੁ. ਏਤੇ ਪਨਾਤਿ ਤਯੋ ਪਨ. ਇਧਾਤਿ ਪਾਰਿਵਾਸਿਕਕ੍ਖਨ੍ਧਕੇ. ਤਸ੍ਮਾਤਿ ਯਸ੍ਮਾ ਇਧ ਅਧਿਪ੍ਪੇਤਾ, ਤਸ੍ਮਾ. ਏਤੇਸੂਤਿ ਤਿਵਿਧੇਸੁ ਪਰਿਵਾਸੇਸੁ.
ਪਕਤਤ੍ਤਾਨਂ ਭਿਕ੍ਖੂਨਨ੍ਤਿ ਏਤ੍ਥ ਅਧਿਪ੍ਪੇਤਪਕਤਤ੍ਤੇ ਦਸ੍ਸੇਨ੍ਤੋ ਆਹ ‘‘ਠਪੇਤ੍ਵਾ’’ਤਿਆਦਿ. ਮੂਲਾਯਪਟਿਕਸ੍ਸਨਾਰਹਾਦੀਨਮ੍ਪੀਤਿ ਏਤ੍ਥ ਆਦਿਸਦ੍ਦੇਨ ਮਾਨਤ੍ਤਾਰਹਮਾਨਤ੍ਤਚਾਰਿਕਅਬ੍ਭਾਨਾਰਹਾਦਯੋ ਸਙ੍ਗਣ੍ਹਾਤਿ. ਪਿਸਦ੍ਦੇਨ ਪਕਤਿਪਕਤਤ੍ਤਂ ਅਪੇਕ੍ਖਤਿ. ਤੇਤਿ ਪਕਤਤ੍ਤਾ. ਯਂ ਅਭਿਵਾਦਨਾਦਿਂ ਕਰੋਨ੍ਤੀਤਿ ਯੋਜਨਾ. ਸਾਦਿਯਨ੍ਤੀਤਿ ਏਤ੍ਥ ਸਾਦਿਯਨਂ ਨਾਮ ਸਮ੍ਪਟਿਚ੍ਛਨਨ੍ਤਿ ਆਹ ‘‘ਸਮ੍ਪਟਿਚ੍ਛਨ੍ਤੀ’’ਤਿ. ਤਤ੍ਥਾਤਿ ਅਭਿਵਾਦਨਾਦੀਸੁ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਸਾਮੀਚਿਕਮ੍ਮਨ੍ਤਿ ਏਤਂ ਆਭਿਸਮਾਚਾਰਿਕਸ੍ਸ ਅਧਿਵਚਨਨ੍ਤਿ ਯੋਜਨਾ. ਅਭਿਵਾਦਨਾਦੀਨੀਤਿ ਅਭਿਵਾਦਨਪਚ੍ਚੁਟ੍ਠਾਨਅਞ੍ਜਲਿਕਮ੍ਮਾਨਿ. ਬੀਜਨਵਾਤਦਾਨਾਦਿਨੋਤਿ ਬੀਜਨਿਯਾ ਪਹਰਿਤੇਨ ਪਵਤ੍ਤਸ੍ਸ ਵਾਤਸ੍ਸ ਦਾਨਾਦਿਨੋ. ਆਸਨਾਭਿਹਾਰਨ੍ਤਿ ਏਤ੍ਥ ਅਭਿਹਰਣਂ ਅਭਿਹਾਰੋ, ਆਸਨਸ੍ਸ ਅਭਿਹਾਰੋ ਆਸਨਾਭਿਹਾਰੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਆਸਨਸ੍ਸ ਅਭਿਹਰਣ’’ਨ੍ਤਿ. ਪਞ੍ਞਾਪਨਮ੍ਪਿ ਅਭਿਹਰਿਤ੍ਵਾ ਪਞ੍ਞਾਪਿਤਤ੍ਤਾ ਅਭਿਹਾਰੋਯੇਵ ਨਾਮਾਤਿ ਆਹ ‘‘ਪਞ੍ਞਾਪਨਮੇਵ ਵਾ’’ਤਿ. ‘‘ਪਾਦਧੋਵਨਉਦਕ’’ਨ੍ਤਿ ਇਮਿਨਾ ਪਾਦਸ੍ਸ ਧੋਵਨਂ ਉਦਕਂ ਪਾਦੋਦਕਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਪਾਦਟ੍ਠਪਨਕ’’ਨ੍ਤਿ ਇਮਿਨਾ ਪਾਦਸ੍ਸ ਠਪਨਕਂ ਪੀਠਂ ਪਾਦਪੀਠਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਪਾਦਘਂਸਨਂ ਵਾ’’ਤਿ ਇਮਿਨਾ ਪਾਦਸ੍ਸ ਘਂਸਨਂ ਕਥਲਿਕਂ ਪਾਦਕਥਲਿਕਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਸਦ੍ਧਿਵਿਹਾਰਿਕਾਨਮ੍ਪਿ ਅਭਿਵਾਦਨਾਦਿਨ੍ਤਿ ਸਮ੍ਬਨ੍ਧੋ. ਪਿਸਦ੍ਦੇਨ ਅਞ੍ਞੇਸਂ ਸਾਦਿਯਨ੍ਤਸ੍ਸ ਕਾ ਨਾਮ ਕਥਾਤਿ ਦਸ੍ਸੇਤਿ. ਤੇਤਿ ਸਦ੍ਧਿਵਿਹਾਰਿਕਾ. ਸਦ੍ਧਾਪਬ੍ਬਜਿਤਾਤਿ ਸਦ੍ਧਾਯ ਪਬ੍ਬਜਿਤਾ. ਕੁਲਪੁਤ੍ਤਾਤਿ ਜਾਤਿਕੁਲਪੁਤ੍ਤਾ, ਆਚਾਰਕੁਲਪੁਤ੍ਤਾ ਚ. ਕਰੋਨ੍ਤਿ, ਆਪੁਚ੍ਛਨ੍ਤਿਯੇਵਾਤਿ ਸਮ੍ਬਨ੍ਧੋ. ਵਾਰਿਤਮ੍ਪਿ ਅਸਾਦਿਯਨਂ ਨਾਮਾਤਿ ਆਹ ‘‘ਵਾਰਿਤਕਾਲਤੋ ਪਟ੍ਠਾਯ ਅਨਾਪਤ੍ਤੀ’’ਤਿ. ਮਿਥੁ ਯਥਾਵੁਡ੍ਢਨ੍ਤਿ ਏਤ੍ਥ ਮਿਥੁਸਦ੍ਦੋ ਅਞ੍ਞਮਞ੍ਞਪਰਿਯਾਯੋ, ਯਥਾਸਦ੍ਦੋ ਯਂਸਦ੍ਦਪਰਿਯਾਯੋ, ਵਿਚ੍ਛਤ੍ਥੋ ਚਾਤਿ ਆਹ ‘‘ਅਞ੍ਞਮਞ੍ਞਂ ਯੋ ਯੋ ਵੁਡ੍ਢੋ’’ਤਿ. ਅਞ੍ਞਮਞ੍ਞਞ੍ਹਿ ਮਿਥਤਿ ਸਙ੍ਗਮਂ ਕਰੋਤੀਤਿ ਮਿਥੂਤਿ ਵੁਚ੍ਚਤਿ. ਤੇਨ ਤੇਨਾਤਿ ਭਿਕ੍ਖੁਨਾ, ‘‘ਸਾਦਿਤੁ’’ਨ੍ਤਿ ਪਦੇ ਭਾਵਕਤ੍ਤਾ. ਸਾਦਿਤੁਂ ਅਨੁਜਾਨਾਮੀਤਿ ਸਮ੍ਬਨ੍ਧੋ.
‘‘ਵੁਡ੍ਢਪਟਿਪਾਟਿਯਾ’’ਤਿ ਇਮਿਨਾ ਵੁਡ੍ਢਾਨਂ ਪਟਿਪਾਟਿ ਯਥਾਵੁਡ੍ਢਨ੍ਤਿ ਚਤੁਤ੍ਥੀਅਬ੍ਯਯੀਭਾਵਂ ਦਸ੍ਸੇਤਿ. ਪੁਰਿਮਪਦੇ ਪਨ ਪਠਮਾਅਬ੍ਯਯੀਭਾਵੋ. ਪਾਲ਼ਿਯਾਤਿ ਪਨ੍ਤਿਯਾ. ਤਤ੍ਥੇਵਾਤਿ ਸਙ੍ਘਨਵਕਟ੍ਠਾਨੇ ਏਵ. ਪਵਾਰਣਾਯਪੀਤਿ ਪਿਸਦ੍ਦੇਨ ਨ ਕੇਵਲਂ ਉਪੋਸਥੇਯੇਵ, ਅਥ ਖੋ ਪਵਾਰਣਾਯਪੀਤਿ ਦਸ੍ਸੇਤਿ. ਸਙ੍ਘੇਨ ਭਾਜਿਯਮਾਨਨ੍ਤਿ ਸਮ੍ਬਨ੍ਧੋ.
ਓਣੋਜਨਨ੍ਤਿ ਅਵਨੁਦਤੇ ਓਣੋਜਨਂ. ਅਵਪੁਬ੍ਬੋ ਨੁਦਧਾਤੁ ਨਕਾਰਸ੍ਸ ਣਕਾਰਂ, ਦਕਾਰਸ੍ਸ ਚ ਜਕਾਰਂ ਕਤ੍ਵਾ ਓਣੋਜਨਨ੍ਤਿ ਵੁਚ੍ਚਤਿ. ਨੁਦਧਾਤੁ ਅਪਨਯਨਤ੍ਥੋ, ਤੇਨ ਵੁਤ੍ਤਂ ‘‘ਵਿਸ੍ਸਜ੍ਜਨਂ ਵੁਚ੍ਚਤੀ’’ਤਿ. ਉਦ੍ਦੇਸਭਤ੍ਤਾਦੀਨੀਤਿਆਦਿਸਦ੍ਦੇਨ ਸਲਾਕਭਤ੍ਤਾਦੀਨਿ ਸਙ੍ਗਣ੍ਹਾਤਿ. ਅਸ੍ਸਾਤਿ ਪਾਰਿਵਾਸਿਕਸ੍ਸ. ਤਾਨੀਤਿ ਦ੍ਵੇ ਤੀਣਿ ਉਦ੍ਦੇਸਭਤ੍ਤਾਦੀਨਿ. ਹੇਟ੍ਠਾਤਿ ਅਤ੍ਤਨੋ ਹੇਟ੍ਠਾ. ਗਾਹੇਥਾਤਿ ਨਵਕਤਰੇ ਭਿਕ੍ਖੂ ਗਾਹਾਪੇਥ. ਭਤ੍ਤਪਚ੍ਚਾਸਾਤਿ ਭਤ੍ਤਮੇਵ ਪਚ੍ਚਾਸਾ ਭਤ੍ਤਪਚ੍ਚਾਸਾ, ਪਚ੍ਚਾਸਾਭਤ੍ਤਨ੍ਤਿ ਅਤ੍ਥੋ. ‘‘ਵਿਸ੍ਸਜ੍ਜੇਤਬ੍ਬਾਨੀ’’ਤਿ ਇਮਿਨਾ ਅਵਨੁਦਿਤਬ੍ਬਨ੍ਤਿ ਓਣੋਜਨਨ੍ਤਿ ਅਤ੍ਥਂ ਦਸ੍ਸੇਤਿ. ਏਵਨ੍ਤਿ ਗਹੇਤ੍ਵਾ ਵਿਸ੍ਸਜ੍ਜਮਾਨੇਤਿ ਯੋਜਨਾ. ਤਾਨੀਤਿ ਉਦ੍ਦੇਸਭਤ੍ਤਾਦੀਨਿ. ਯਦਿ ਪਨ ਨ ਗਣ੍ਹਾਤੀਤਿ ਸਚੇ ਸਙ੍ਘਤੋ ਵਸ੍ਸਗ੍ਗੇਨ ਨ ਗਣ੍ਹਾਤਿ. ਨ ਵਿਸ੍ਸਜ੍ਜੇਤੀਤਿ ਸਚੇ ਅਞ੍ਞਸ੍ਸ ਨ ਵਿਸ੍ਸਜ੍ਜੇਤਿ. ਓਦਿਸ੍ਸਾਤਿ ਉਦ੍ਦਿਸਿਤ੍ਵਾ. ਤਸ੍ਸਾਤਿ ਪਾਰਿਵਾਸਿਕਸ੍ਸ. ਹੀਤਿ ਯਸ੍ਮਾ. ਸਙ੍ਘਨਵਕਟ੍ਠਾਨੇ ਨਿਸਿਨ੍ਨਸ੍ਸ ਤਸ੍ਸਾਤਿ ਯੋਜਨਾ. ਭਤ੍ਤਗ੍ਗੇਤਿ ਭਤ੍ਤਸ੍ਸ ਗਹਣਟ੍ਠਾਨੇ. ਸੋਤਿ ਪਾਰਿਵਾਸਿਕੋ, ਮਾ ਕਿਲਮਿਤ੍ਥਾਤਿ ਸਮ੍ਬਨ੍ਧੋ. ਇਦਨ੍ਤਿ ਓਣੋਜਨਂ. ਅਸ੍ਸਾਤਿ ਪਾਰਿਵਾਸਿਕਸ੍ਸ, ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ.
ਆਗਤਾਗਤੇਹਿ ਭਿਕ੍ਖੂਹੀਤਿ ਸਮ੍ਬਨ੍ਧੋ. ਚਤੁਸ੍ਸਾਲਭਤ੍ਤਨ੍ਤਿ ਚਤੁਮੁਖਾ ਸਾਲਾ ਚਤੁਸ੍ਸਾਲਾ ਭੋਜਨਸਾਲਾ, ਤਤ੍ਥ ਪਟਿਪਾਟਿਯਾ ਦਿਨ੍ਨਂ ਭਤ੍ਤਂ ਚਤੁਸ੍ਸਾਲਭਤ੍ਤਂ. ਏਤਨ੍ਤਿ ਚਤੁਸ੍ਸਾਲਭਤ੍ਤਂ. ਪਾਲ਼ਿਯਾਤਿ ਭਿਕ੍ਖੂਨਂ ਪਾਲ਼ਿਯਾ. ਓਸਕ੍ਕਿਤ੍ਵਾਤਿ ਹੇਟ੍ਠਾ ਸਕ੍ਕਿਤ੍ਵਾ. ਹਤ੍ਥਪਾਸੇਤਿ ਭਤ੍ਤਦਾਯਕਸ੍ਸ ਹਤ੍ਥਪਾਸੇ. ਸੇਨੋਤਿ ਕੁਲਲੋ. ‘‘ਆਰਾਮਿਕਸਮਣੁਦ੍ਦੇਸੇਹੀ’’ਤਿ ਪਦਂ ‘‘ਆਹਰਾਪੇਤੁ’’ਨ੍ਤਿ ਪਦੇ ਕਾਰਿਤਕਮ੍ਮਂ. ਸਯਮੇਵਾਤਿ ਪਾਰਿਵਾਸਿਕੇਨ ਅਨਾਣਤ੍ਤੋ ਹੁਤ੍ਵਾ ਸਯਮੇਵ. ਮਹਾਪੇਲ਼ਭਤ੍ਤੇਪੀਤਿ ਮਹਤਿਯਂ ਪੇਲ਼ਾਯਂ ਪਕ੍ਖਿਪਿਤ੍ਵਾ ਦਿਨ੍ਨੇ ਭਤ੍ਤੇਪਿ. ਯਤ੍ਥ ਪਨਾਤਿ ਪਰਿਵਿਸਟ੍ਠਾਨੇ ਪਨ.
੭੬. ਤਤ੍ਰਾਯਂ ਸਮ੍ਮਾਵਤ੍ਤਨਾਤਿ ਏਤ੍ਥ ਤਸਦ੍ਦਸ੍ਸ ਅਨਿਯਮਨਿਦ੍ਦੇਸਭਾਵਂ ਦਸ੍ਸੇਨ੍ਤੋ ਆਹ ‘‘ਇਦਾਨਿ ਯਾ ਅਯਂ ਸਮ੍ਮਾਵਤ੍ਤਨਾ ਵੁਤ੍ਤਾ’’ਤਿ. ਸਮ੍ਮਾ ਵਤ੍ਤਿਤਬ੍ਬਂ ਏਤਾਯਾਤਿ ਸਮ੍ਮਾਵਤ੍ਤਨਾ. ਤਤ੍ਥਾਤਿ ਸਮ੍ਮਾਵਤ੍ਤਨਾਯਂ. ਨ ਉਪਸਮ੍ਪਾਦੇਤਬ੍ਬਨ੍ਤਿ ਏਤ੍ਥ ਆਚਰਿਯੇਨ ਹੁਤ੍ਵਾ ਕਮ੍ਮਵਾਚਾਸਾਵਨਮ੍ਪਿ ਉਪਸਮ੍ਪਾਦਨਮੇਵਾਤਿ ਆਹ ‘‘ਆਚਰਿਯੇਨ ਹੁਤ੍ਵਾਪਿ ਕਮ੍ਮਵਾਚਾ ਨ ਸਾਵੇਤਬ੍ਬਾ’’ਤਿ. ਅਞ੍ਞਸ੍ਮਿਂ ਅਸਤੀਤਿ ਅਤ੍ਤਨਾ ਅਞ੍ਞਸ੍ਮਿਂ ਕਮ੍ਮਵਾਚਾਵਾਚਕੇ ਅਸਤਿ. ਨ ਨਿਸ੍ਸਯੋ ਦਾਤਬ੍ਬੋਤਿ ਏਤ੍ਥ ਆਗਨ੍ਤੁਕਾਨਮੇਵ ਨਿਸ੍ਸਯੋ ਨ ਦਾਤਬ੍ਬੋ, ਨ ਦਿਨ੍ਨਨਿਸ੍ਸਯਾਨਮ੍ਪੀਤਿ ਦਸ੍ਸੇਨ੍ਤੋ ਆਹ ‘‘ਆਗਨ੍ਤੁਕਾਨਂ ਨਿਸ੍ਸਯੋ ਨ ਦਾਤਬ੍ਬੋ’’ਤਿਆਦਿ, ਯੇਹਿਪਿ ਭਿਕ੍ਖੂਹਿ ਗਹਿਤੋਤਿ ਸਮ੍ਬਨ੍ਧੋ.
ਅਞ੍ਞੋ ਸਾਮਣੇਰੋਤਿ ਪਕਤਤ੍ਤਕਾਲੇ ਉਪਜ੍ਝਂ ਦਤ੍ਵਾ ਗਹਿਤਸਾਮਣੇਰੇਹਿ ਅਞ੍ਞੋ ਸਾਮਣੇਰੋ. ਆਧਿਪਚ੍ਚਟ੍ਠਾਨਭੂਤਾਤਿ ਸਬ੍ਬਸਮ੍ਮੁਤੀਨਂ ਅਧਿਪਤਿਭਾਵਸ੍ਸ ਠਾਨਭੂਤਾ. ਪਟਿਬਲਸ੍ਸਾਤਿ ਭਿਕ੍ਖੁਨਿਯੋ ਓਵਦਿਤੁਂ ਪਟਿਬਲਸ੍ਸ. ਇਮਿਨਾ ਲਦ੍ਧਸਮ੍ਮੁਤਿਕੇਨ ਆਣਤ੍ਤੋ ਅਲਦ੍ਧਸਮ੍ਮੁਤਿਕੋਪਿ ਗਰੁਧਮ੍ਮੇਹਿ ਵਾ ਅਞ੍ਞੇਹਿ ਵਾ ਭਿਕ੍ਖੁਨਿਯੋ ਓਵਦਿਤੁਂ ਲਭਤੀਤਿ ਦਸ੍ਸੇਤਿ. ਆਗਤਾ ਭਿਕ੍ਖੁਨਿਯੋ ਵਤ੍ਤਬ੍ਬਾਤਿ ਸਮ੍ਬਨ੍ਧੋ. ਵੋਤਿ ਤੁਮ੍ਹਾਕਂ. ਸੋਤਿ ਭਿਕ੍ਖੁ. ਵੋਤਿ ਤੁਮ੍ਹਾਕਂ, ਦਸ੍ਸਤੀਤਿ ਸਮ੍ਬਨ੍ਧੋ.
ਸੁਕ੍ਕਵਿਸ੍ਸਟ੍ਠਿਯਾਤਿ ਸੁਕ੍ਕਵਿਸ੍ਸਟ੍ਠਿਆਪਤ੍ਤਿਕਾਰਣਾ. ਕਾਯਸਂਸਗ੍ਗਾਦਿਗਰੁਕਾਪਤ੍ਤਿ ਨਾਪਜ੍ਜਿਤਬ੍ਬਾਤਿ ਯੋਜਨਾ. ਆਪਤ੍ਤਿਕ੍ਖਨ੍ਧਵਸੇਨ ਆਪਤ੍ਤਿਵਤ੍ਥੂਨਂ ਪਾਪਿਟ੍ਠਭਾਵਞ੍ਚ ਪਾਪਿਟ੍ਠਤਰਭਾਵਞ੍ਚ ਵਿਤ੍ਥਾਰੇਨ੍ਤੋ ਆਹ ‘‘ਸਤ੍ਤਸੁ ਹੀ’’ਤਿਆਦਿ. ਪਾਪਿਟ੍ਠਤਰਾਤਿ ਦੁਬ੍ਭਾਸਿਤਾਪਤ੍ਤਿਤੋ ਦੁਕ੍ਕਟਾਪਤ੍ਤਿ ਪਾਪਿਟ੍ਠਤਰਾ. ਤਾਸਨ੍ਤਿ ਸਤ੍ਤਨ੍ਨਂ ਆਪਤ੍ਤੀਨਂ. ਪੁਰਿਮਨਯੇਨੇਵਾਤਿ ਪੁਰਿਮਾਨਂ ਆਪਤ੍ਤੀਨਂ ਨਯੇਨੇਵ. ਭੇਦੋਤਿ ਵਤ੍ਥੂਨਂ ਵਿਸੇਸੋ. ਏਵਂ ਆਪਤ੍ਤਿਕ੍ਖਨ੍ਧਵਸੇਨ ਆਪਤ੍ਤਿਵਤ੍ਥੂਨਂ ਪਾਪਿਟ੍ਠਪਾਪਿਟ੍ਠਤਰਭਾਵਂ ਦਸ੍ਸੇਤ੍ਵਾ ਇਦਾਨਿ ਸਿਕ੍ਖਾਪਦਵਸੇਨ ਤੇਸਂ ਤਂ ਦਸ੍ਸੇਨ੍ਤੋ ਆਹ ‘‘ਪਣ੍ਣਤ੍ਤਿਵਜ੍ਜਸਿਕ੍ਖਾਪਦੇ ਪਨਾ’’ਤਿਆਦਿ. ਉਭਯਮ੍ਪੀਤਿ ਵਤ੍ਥੁਆਪਤ੍ਤਿਸਙ੍ਖਾਤਂ ਉਭਯਮ੍ਪਿ.
ਕਮ੍ਮਨ੍ਤਿ ਏਤ੍ਥ ਕਾਰਣਭੂਤਸ੍ਸ ਕਮ੍ਮਸ੍ਸ ਨਾਮਂ ਕਾਰਿਯਭੂਤਾਯਂ ਕਮ੍ਮਵਾਚਾਯਂ ਉਪਚਾਰਵਸੇਨ ਕਾਰਿਯਭੂਤਾ ਕਮ੍ਮਵਾਚਾ ਕਮ੍ਮਨ੍ਤਿ ਵੁਚ੍ਚਤੀਤਿ ਆਹ ‘‘ਪਰਿਵਾਸਕਮ੍ਮਵਾਚਾ ਵੁਚ੍ਚਤੀ’’ਤਿ. ਕਮ੍ਮਸ੍ਮਿਂ ਸਤਿ, ਕਮ੍ਮੇਨ ਵਾ ਵਚਿਤਬ੍ਬਾਤਿ ਕਮ੍ਮਵਾਚਾਤਿ ਵਚਨਤ੍ਥੋ ਕਾਤਬ੍ਬੋ. ਕਸਿਕਮ੍ਮਨ੍ਤਿ ਕਸਿਸਙ੍ਖਾਤਂ ਕਮ੍ਮਂ. ਗੋਰਕ੍ਖਕਮ੍ਮਨ੍ਤਿ ਗੋਰਕ੍ਖਸਙ੍ਖਾਤਂ ਕਮ੍ਮਂ. ‘‘ਕਮ੍ਮਂ ਕਤ’’ਨ੍ਤਿ ਇਮਿਨਾ ਕਮ੍ਮਂ ਕਰੋਨ੍ਤੀਤਿ ਕਮ੍ਮਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਤੇਤਿ ਕਮ੍ਮਿਕਾ ਭਿਕ੍ਖੂ, ਨ ਗਰਹਿਤਬ੍ਬਾਤਿ ਸਮ੍ਬਨ੍ਧੋ.
ਵਚਿਤਬ੍ਬਂ ਅਨੇਨ ਦੋਸੇਨਾਤਿ ਵਚਨੀਯਂ, ਸਂਵਿਜ੍ਜਤਿ ਵਚਨੀਯਂ ਅਸ੍ਸਾਤਿ ਸਵਚਨੀਯਂ, ਤਂ ਨ ਕਾਤਬ੍ਬਨ੍ਤਿ ਅਤ੍ਥੋ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਪਲਿਬੋਧਤ੍ਥਾਯ ਹੀ’’ਤਿਆਦਿ. ਯਾਵ ਨ ਤਂ ਅਧਿਕਰਣਂ ਵੂਪਸਨ੍ਤਂ ਹੋਤਿ, ਤਾਵ ਇਮਮ੍ਹਾ ਆਵਾਸਾ ਏਕਪਦਮ੍ਪਿ ਮਾ ਪਕ੍ਕਾਮੀਤਿ ਯੋਜਨਾ. ਤੇਤਿ ਤੁਯ੍ਹਂ.
ਅਨੁਵਾਦੋਤਿ ਏਤ੍ਥ ਅਨੁਸਾਸਨਵਸੇਨ ਅਞ੍ਞੇ ਵਦਤੀਤਿ ਅਨੁਵਾਦੋਤਿ ਵੁਤ੍ਤੇ ਜੇਟ੍ਠਕਟ੍ਠਾਨਨ੍ਤਿ ਆਹ ‘‘ਵਿਹਾਰੇ ਜੇਟ੍ਠਕਟ੍ਠਾਨਂ ਨ ਕਾਤਬ੍ਬ’’ਨ੍ਤਿ. ਜੇਟ੍ਠਕਟ੍ਠਾਨਂ ਸਰੂਪੇਨ ਦਸ੍ਸੇਨ੍ਤੋ ਆਹ ‘‘ਪਾਤਿਮੋਕ੍ਖੁਦ੍ਦੇਸਕੇਨ ਵਾ’’ਤਿਆਦਿ. ਮੇਤਿ ਮਯ੍ਹਂ. ਤਨ੍ਤਿ ਤਵਂ. ਨ ਚੋਦੇਤਬ੍ਬੋਤਿ ਏਤ੍ਥ ਕੇਨ ਨ ਚੋਦੇਤਬ੍ਬੋਤਿ ਆਹ ‘‘ਵਤ੍ਥੁਨਾ ਵਾ ਆਪਤ੍ਤਿਯਾ ਵਾ’’ਤਿ. ਨ ਸਾਰੇਤਬ੍ਬੋਤਿ ਨ ਸਰਾਪੇਤਬ੍ਬੋ. ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬਨ੍ਤਿ ਏਤ੍ਥ ਭਿਕ੍ਖੂਹਿ ਅਤ੍ਤਨਾ ਕਲਹਵਸੇਨ ਨ ਸਮ੍ਪਯੋਜੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਞ੍ਞਮਞ੍ਞਂ ਯੋਜੇਤ੍ਵਾ ਕਲਹੋ ਨ ਕਾਰੇਤਬ੍ਬੋ’’ਤਿ.
ਸਙ੍ਘਤ੍ਥੇਰੇਨ ਹੁਤ੍ਵਾਤਿ ਸਙ੍ਘਤ੍ਥੇਰੇਨ ਹੋਨ੍ਤੇਨਪੀਤਿ ਅਤ੍ਥੋ. ਪੁਰਤੋ ਅਗਨ੍ਤਬ੍ਬੇ ਸਮਾਨੇ ਕਿਂ ਪਚ੍ਛਤੋ ਗਨ੍ਤਬ੍ਬਨ੍ਤਿ ਆਹ ‘‘ਦ੍ਵਾਦਸਹਤ੍ਥ’’ਨ੍ਤਿਆਦਿ. ਆਸਨਪਰਿਯਨ੍ਤੋਤਿ ਆਸਨਮੇਵ ਪਰਿਯਨ੍ਤੋ ਲਾਮਕੋਤਿ ਆਸਨਪਰਿਯਨ੍ਤੋ, ਤਦਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਙ੍ਘਨਵਕਾਸਨਂ ਵੁਚ੍ਚਤੀ’’ਤਿ. ਸ੍ਵਾਸ੍ਸਾਤਿ ਸੋ ਅਸ੍ਸ. ਸੋਤਿ ਆਸਨਪਰਿਯਨ੍ਤੋ. ਅਸ੍ਸਾਤਿ ਪਾਰਿਵਾਸਿਕਸ੍ਸ. ਤਤ੍ਥਾਤਿ ਆਸਨਪਰਿਯਨ੍ਤੇ. ਅਯਨ੍ਤਿ ਪਾਰਿਵਾਸਿਕੋ, ਨ ਲਭਤੀਤਿ ਸਮ੍ਬਨ੍ਧੋ. ਗਹਿਤਾਵਸੇਸਾਤਿ ਗਹਿਤਾਹਿ ਸੇਯ੍ਯਾਹਿ ਅਵਸੇਸਾ. ਮਙ੍ਗੁਲਗੂਥਭਰਿਤਾਤਿ ਮਙ੍ਗੁਲਾਨਂ ਗੂਥੇਹਿ ਪੂਰਿਤਾ. ਅਸ੍ਸਾਤਿ ਪਾਰਿਵਾਸਿਕਸ੍ਸ. ਰਜੇਹਿ ਹਤਾ ਨਾਸਿਤਾ ਭੂਮਿ ਏਤ੍ਥਾਤਿ ਰਜੋਹਤਭੂਮਿ. ਜਤੁਕਮੂਸਿਕਭਰਿਤਾਤਿ ਜਤੂਹਿ ਚ ਮੂਸਿਕਾਹਿ ਚ ਪੂਰਿਤਾ. ਪਣ੍ਣਸਾਲਾਤਿ ਪਣ੍ਣੇਹਿ ਛਾਦਿਤਾ ਸਾਲਾ. ਅਸ੍ਸਾਤਿ ਪਾਰਿਵਾਸਿਕਸ੍ਸ. ਸਬ੍ਬੇਪਿ ਆਵਾਸਾਤਿ ਯੋਜਨਾ. ਏਤੇਹੀਤਿ ਪਕਤਤ੍ਤੇਹਿ. ਤੇਸੂਤਿ ਆਵਾਸੇਸੁ. ਯਨ੍ਤਿ ਆਵਾਸਂ. ਪਚ੍ਚਯਨ੍ਤਿ ਵਸ੍ਸਾਵਾਸਿਕਲਾਭਂ. ਏਕਪਸ੍ਸੇਤਿ ਭਿਕ੍ਖੂਨਂ ਪਾਲ਼ਿਯਂ ਅਟ੍ਠਤ੍ਵਾ ਏਕਸ੍ਮਿਂ ਪਸ੍ਸੇ.
ਅਸ੍ਸਾਤਿ ਪਾਰਿਵਾਸਿਕਸ੍ਸ, ਦੇਨ੍ਤੀਤਿ ਸਮ੍ਬਨ੍ਧੋ. ਸੋ ਏਵਾਤਿ ਆਸਨਾਦਿਪਰਿਯਨ੍ਤੋ ਏਵ. ਞਾਤਿਪਵਾਰਿਤਟ੍ਠਾਨੇ ਨਿਮਨ੍ਤਿਤੇਨਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਤਂ ਕੁਲਂ. ਸਂਵਿਧਾਯਾਤਿ ਸਂਵਿਦਹਿਤ੍ਵਾ. ਅਸ੍ਸਾਤਿ ਕੁਲਸ੍ਸ, ਭਵੇਯ੍ਯ ਵਾ.
ਹਰਾਯਮਾਨੇਨਾਤਿ ਲਜ੍ਜਮਾਨੇਨ. ਯੇਨਾਪੀਤਿ ਪਾਰਿਵਾਸਿਕੇਨਪਿ. ਸਮਾਦਿਨ੍ਨਨ੍ਤਿ ਆਰਞ੍ਞਿਕਧੁਤਙ੍ਗਸਮਾਦਿਨ੍ਨਂ. ਤਥਾਤਿ ਯਥਾ ਆਰਞ੍ਞਿਕਙ੍ਗਂ ਨ ਸਮਾਦਾਤਬ੍ਬਂ, ਤਥਾ. ਪਿਣ੍ਡਪਾਤਿਕਧੁਤਙ੍ਗਮ੍ਪੀਤਿ ਪਿਸਦ੍ਦੋ ਆਰਞ੍ਞਿਕਙ੍ਗਂ ਅਪੇਕ੍ਖਤਿ. ਯੋ ਪਨਾਤਿ ਪਾਰਿਵਾਸਿਕੋ ਪਨ.
ਅਨਾਰੋਚੇਨ੍ਤਸ੍ਸ ਮੇਤਿ ਯੋਜਨਾ. ਅਨਾਰੋਚੇਨ੍ਤੇ ਸਤੀਤਿ ਵਾ ਯੋਜਨਾ. ‘‘ਇਮਿਨਾ ਕਾਰਣੇਨਾ’’ਤਿ ਇਮਿਨਾ ਤਪ੍ਪਚ੍ਚਯਾਤਿ ਏਤ੍ਥ ਪਚ੍ਚਯਸਦ੍ਦੋ ਕਾਰਣਤ੍ਥੋ, ਨਿਸ੍ਸਕ੍ਕਵਚਨਞ੍ਚ ਕਾਰਣਤ੍ਥੇ ਹੋਤੀਤਿ ਦਸ੍ਸੇਤਿ. ਸੋ ਰਤ੍ਤਿਚ੍ਛੇਦੋ ਏਵ ਪਚ੍ਚਯੋ ਤਪ੍ਪਚ੍ਚਯੋਤਿ ਵਚਨਤ੍ਥੋ ਕਾਤਬ੍ਬੋ. ‘‘ਸਾਮਣੇਰੇਹੀ’’ਤਿ ਪਦਂ ‘‘ਪਚਾਪੇਤ੍ਵਾ’’ਤਿ ਪਦੇ ਕਾਰਿਤਕਮ੍ਮਂ. ਏਤ੍ਥਾਪਿ ਪਕਤਿਯਾ ਨੀਹਰਾਪੇਤ੍ਵਾਪਿ ਵਿਹਾਰੇ ਪਚਾਪੇਤ੍ਵਾਪਿ ਭੁਞ੍ਜਨ੍ਤਸ੍ਸ ਪਟਿਸੇਧੋ ਨਤ੍ਥਿ. ਕਸ੍ਮਾ? ‘‘ਤਪ੍ਪਚ੍ਚਯਾ’’ਤਿ ਵੁਤ੍ਤਤ੍ਤਾ. ਗਾਮੇਤਿ ਮਹਾਗਾਮੇ, ਸਬ੍ਬਕਾਲਂ ਅਨੇਕਸਤੇਹਿ ਭਿਕ੍ਖੂਹਿ ਅਵਿਵਿਤ੍ਤੇ ਗਾਮੇਤਿ ਅਤ੍ਥੋ. ਗਾਮਕਾਵਾਸਨ੍ਤਿ ਗਾਮੋਯੇਵ ਖੁਦ੍ਦਕਟ੍ਠੇਨ ਗਾਮਕੋ, ਤਸ੍ਮਿਂ ਕਾਰਿਤੋ ਆਵਾਸੋ ਗਾਮਕਾਵਾਸੋ, ਤਂ.
ਗਤੇਨ ਆਗਨ੍ਤੁਕਪਾਰਿਵਾਸਿਕੇਨਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਕਿਸ੍ਮਿਞ੍ਚਿ ਵਿਹਾਰੇ, ਸਬ੍ਬੇ ਭਿਕ੍ਖੂਤਿ ਸਮ੍ਬਨ੍ਧੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਿਤਟ੍ਠਾਨੇ. ਨ ਏਕਚ੍ਚੇ ਪਸ੍ਸਤਿ, ਅਪਸ੍ਸਿਤਤ੍ਤਾ ਨਾਰੋਚੇਤਿ, ਰਤ੍ਤਿਚ੍ਛੇਦੋਵ ਹੋਤੀਤਿ ਅਧਿਪ੍ਪਾਯੋ.
ਏਕਸ੍ਸ ਵਾ ਬਹੂਨਂ ਵਾ ਆਗਨ੍ਤੁਕਾਨਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ‘‘ਆਗਨ੍ਤੁਕਸ੍ਸ ਆਰੋਚੇਤਬ੍ਬ’’ਨ੍ਤਿ ਪਦੇ. ਵੁਤ੍ਤਨਯੇਨੇਵਾਤਿ ‘‘ਆਗਨ੍ਤੁਕੇਨ ਆਰੋਚੇਤਬ੍ਬ’’ਨ੍ਤਿ ਪਦੇ ਵੁਤ੍ਤਨਯੇਨੇਵ. ਤਂ ਵੁਤ੍ਤਨਯਮਾਵਿਕਰੋਨ੍ਤੋ ਆਹ ‘‘ਸਚੇ’’ਤਿਆਦਿ. ਤੇਸਮ੍ਪੀਤਿ ਆਗਨ੍ਤੁਕਾਨਮ੍ਪਿ. ਤਸ੍ਸਾਤਿ ਪਾਰਿਵਾਸਿਕਸ੍ਸ. ਅਜਾਨਨ੍ਤਸ੍ਸੇਵਾਤਿ ਅਨਾਦਰੇ ਚੇਤਂ ਸਾਮਿਵਚਨਂ. ਅਯਞ੍ਚ ਪਨਾਤਿ ਪਾਰਿਵਾਸਿਕੋ ਚ. ਗਤਕਾਲੇਤਿ ਆਗਨ੍ਤੁਕਾਨਂ ਗਤਕਾਲੇ. ਯੇਪੀਤਿ ਆਗਨ੍ਤੁਕਾਪਿ. ਓਕ੍ਕਮਿਤ੍ਵਾਤਿ ਓਸਰਿਤ੍ਵਾ, ਪਵਿਸਿਤ੍ਵਾਤਿ ਅਤ੍ਥੋ. ਅਯਞ੍ਚਾਤਿ ਪਾਰਿਵਾਸਿਕੋ ਚ, ਜਾਨਾਤੀਤਿ ਸਮ੍ਬਨ੍ਧੋ. ਨੇਸਨ੍ਤਿ ਆਗਨ੍ਤੁਕਾਨਂ. ਯੋਪੀਤਿ ਆਗਨ੍ਤੁਕੋਪਿ. ਅਸ੍ਸਾਤਿ ਪਾਰਿਵਾਸਿਕਸ੍ਸ. ਅਞ੍ਞਾਤਤ੍ਤਾਤਿ ਆਗਤਭਾਵਸ੍ਸ ਅਜਾਨਿਤਤ੍ਤਾ. ‘‘ਅਬ੍ਭਾਨ’’ਨ੍ਤਿ ਪਦਂ ‘‘ਕਰੋਤੀ’’ਤਿ ਪਦੇ ਕਮ੍ਮਂ, ‘‘ਹੋਤੀ’’ਤਿ ਪਦੇ ਕਤ੍ਤਾ. ਅਧਿਕਾ ਰਤ੍ਤਿਯੋਤਿ ਆਪਤ੍ਤਿਪਟਿਚ੍ਛਨ੍ਨਰਤ੍ਤਿਤੋ ਅਧਿਕਾ ਰਤ੍ਤਿਯੋ. ਅਯਨ੍ਤਿ ਪਾਰਿਵਾਸਿਕਵਤ੍ਤਪਟਿਪਦਾ. ਅਪਣ੍ਣਕਪਟਿਪਦਾਤਿ ਅਵਿਰਦ੍ਧਪਟਿਪਦਾ, ਏਕਂਸਪਟਿਪਦਾਤਿ ਅਤ੍ਥੋ.
ਗਚ੍ਛਨ੍ਤਮ੍ਪਿ ਭਿਕ੍ਖੁਨ੍ਤਿ ਸਮ੍ਬਨ੍ਧੋ. ਸਾਵੇਤੁਨ੍ਤਿ ਸੁਣਾਪੇਤੁਂ. ਵਿਸਯਾਵਿਸਯੇਨਾਤਿ ਆਰੋਚੇਤੁਂ ਦੇਸਾਦੇਸੇਨ. ਕਰਵੀਕਤਿਸ੍ਸਤ੍ਥੇਰੋ ਆਹਾਤਿ ਸਮ੍ਬਨ੍ਧੋ.
‘‘ਉਪੋਸਥਦਿਵਸੇ’’ਤਿ ਇਮਿਨਾ ਉਪੋਸਥੇਤਿ ਏਤ੍ਥ ਉਪੋਸਥਸਦ੍ਦਸ੍ਸ ਪਾਤਿਮੋਕ੍ਖੁਦ੍ਦੇਸਾਦਯੋ ਅਤ੍ਥੇ ਨਿਵਤ੍ਤੇਤਿ. ਪਵਾਰਣਾਯਪੀਤਿ ਪਵਾਰਣਦਿਵਸੇਪਿ. ਗਨ੍ਤੁਨ੍ਤਿ ਭਿਕ੍ਖੁਸ੍ਸ ਠਿਤਟ੍ਠਾਨਂ ਗਨ੍ਤੁਂ. ਦੂਤੇਨਾਪੀਤਿ ਏਤ੍ਥ ਅਨਧਿਪ੍ਪੇਤਦੂਤਂ ਪਟਿਕ੍ਖਿਪਿਤ੍ਵਾ ਅਧਿਪ੍ਪੇਤਦੂਤਂ ਦਸ੍ਸੇਤੁਂ ਵੁਤ੍ਤਂ ‘‘ਅਨੁਪਸਮ੍ਪਨ੍ਨਂ…ਪੇ… ਆਰੋਚਾਪੇਤਬ੍ਬ’’ਨ੍ਤਿ.
ਸੁਞ੍ਞਵਿਹਾਰੋਤਿ ਭਿਕ੍ਖੂਹਿ ਵਿਵਿਤ੍ਤਵਿਹਾਰੋ. ਯਤ੍ਥਾਤਿ ਯਸ੍ਮਿਂ ਆਵਾਸੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤ੍ਥਾਤਿ ਸੁਞ੍ਞਵਿਹਾਰੇ. ਦਸਵਿਧਨ੍ਤਰਾਯੇ ਸਤਿ ਪਨ ਗਨ੍ਤਬ੍ਬਮੇਵਾਤਿ ਯੋਜਨਾ. ਨਾਨਾਸਂਵਾਸਕੇਹੀਤਿ ਕਮ੍ਮਨਾਨਾਸਂਵਾਸਕਲਦ੍ਧਿਨਾਨਾਸਂਵਾਸਕੇਹਿ.
੮੧. ਆਵਾਸਾਦੀਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਆਵਾਸੋ ਨਾਮਾ’’ਤਿਆਦਿ. ਤਤਿਯਪਦੇਨਾਤਿ ‘‘ਆਵਾਸੇ ਵਾ ਅਨਾਵਾਸੇ ਵਾ’’ਤਿ ਤਤਿਯਪਦੇਨ. ਏਤੇਸੂਤਿ ਆਵਾਸਾਦੀਸੁ. ਛਦਨਤੋਤਿ ਛਦਨਕੋਟਿਤੋ. ਅਨ੍ਤੋਆਵਾਸੇਤਿ ਭਿਤ੍ਤਿਪਰਿਚ੍ਛਿਨ੍ਨੇ ਅਨ੍ਤੋਆਵਾਸੇ. ਅਵਿਸੇਸੇਨਾਤਿ ‘‘ਉਕ੍ਖਿਤ੍ਤਕੋ’’ਤਿ ਵਾ ‘‘ਪਾਰਿਵਾਸਿਕੋ’’ਤਿ ਵਾ ਵਿਸੇਸਂ ਅਕਤ੍ਵਾ ਸਾਮਞ੍ਞੇਨ. ਉਦਕਪਾਤੇਨਾਤਿ ਛਦਨਤੋ ਉਦਕਂ ਪਤਤਿ ਏਤ੍ਥਾਤਿ ਉਦਕਪਾਤੋ, ਤੇਨ. ਪਞ੍ਚਵਣ੍ਣਚ੍ਛਦਨਬਦ੍ਧਟ੍ਠਾਨੇਸੂਤਿ ਪਞ੍ਚਪਮਾਣੇਨ ਛਦਨੇਨ ਬਦ੍ਧਟ੍ਠਾਨੇਸੁ ਏਤੇਸੁ ਆਵਾਸੇਸੂਤਿ ਸਮ੍ਬਨ੍ਧੋ. ਪਾਰਿਵਾਸਿਕਸ੍ਸ ਚ ਉਕ੍ਖਿਤ੍ਤਕਸ੍ਸ ਚ ਪਕਤਤ੍ਤੇਨ ਸਦ੍ਧਿਂ ਵਾਰਿਤਨ੍ਤਿ ਯੋਜਨਾ. ਨਾਨੂਪਚਾਰੇਪੀਤਿ ਪਿਸਦ੍ਦੇਨ ਏਕੂਪਚਾਰੇ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਏਤ੍ਥਾਤਿ ਏਕਚ੍ਛਨ੍ਨੇ ਆਵਾਸਾਦਿਕੇ, ਸਚੇ ਨਿਪਜ੍ਜਤੀਤਿ ਸਮ੍ਬਨ੍ਧੋ. ਤਸ੍ਮਿਨ੍ਤਿ ਸਟ੍ਠਿਵਸ੍ਸੇਪਿ ਪਾਰਿਵਾਸਿਕੇ.
ਵੁਟ੍ਠਾਤਬ੍ਬਂ, ਨਿਮਨ੍ਤੇਤਬ੍ਬੋਤਿ ਏਤ੍ਥ ਕਿਂ ਅਤ੍ਤਨੋ ਵੁਡ੍ਢਤਰਂ ਪਕਤਤ੍ਤਂ ਦਿਸ੍ਵਾ ਵੁਟ੍ਠਾਤਬ੍ਬਂ, ਨਿਮਨ੍ਤੇਤਬ੍ਬੋਤਿ ਆਹ ‘‘ਤਦਹੁਪਸਮ੍ਪਨ੍ਨਮ੍ਪੀ’’ਤਿਆਦਿ. ਓਬੁਦ੍ਧਨ੍ਤਿ ਪਲਿਬੁਦ੍ਧਂ. ਏਕਾਸਨੇਤਿ ਏਤ੍ਥ ਏਕਸਦ੍ਦੋ ਸਮਾਨਪਰਿਯਾਯੋਤਿ ਆਹ ‘‘ਸਮਾਨਵਸ੍ਸਿਕਾਸਨੇ’’ਤਿ, ਸਮਾਨਵਸ੍ਸਿਕਾਨਂ ਆਸਨੇਤਿ ਅਤ੍ਥੋ. ਛਮਾਯਂ ਨਿਸਿਨ੍ਨੇਤਿ ਏਤ੍ਥ ਛਮਾਸਦ੍ਦੋ ਭੂਮਿਪਰਿਯਾਯੋਤਿ ਆਹ ‘‘ਭੂਮਿਯਂ ਨਿਸਿਨ੍ਨੇ’’ਤਿ. ਇਤਰੇਨਾਤਿ ਪਾਰਿਵਾਸਿਕੇਨ. ਸਹਾਯੇਨ ਸਦ੍ਧਿਂ ਚਙ੍ਕਮਤਿ ਵਿਯਾਤਿ ਯੋਜਨਾ. ‘‘ਏਕਸ੍ਮਿਂ ਚਙ੍ਕਮੇ’’ਤਿ ਇਮਿਨਾ ਏਕਚਙ੍ਕਮਸਦ੍ਦਸ੍ਸ ਤੁਲ੍ਯਾਧਿਕਰਣਸਮਾਸਵਾਕ੍ਯਂ ਦਸ੍ਸੇਤਿ.
ਛਮਾਯਂ ਚਙ੍ਕਮਨ੍ਤਨ੍ਤਿ ਏਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਛਮਾਯਂ ਚਙ੍ਕਮਨ੍ਤੇ’’ਤਿ. ਅਯਂ ਪਨਾਤਿ ਵਕ੍ਖਮਾਨੋ ਪਨ. ਏਤ੍ਥਾਤਿ ‘‘ਛਮਾਯਂ ਚਙ੍ਕਮਨ੍ਤੇ’’ਤਿ ਪਾਠੇ. ਚਙ੍ਕਮਨ੍ਤੇਤਿ ਪਕਤਤ੍ਤੇ ਚਙ੍ਕਮਨ੍ਤੇ. ਨ ਚਙ੍ਕਮਿਤਬ੍ਬਨ੍ਤਿ ਪਾਰਿਵਾਸਿਕੇਨ ਨ ਚਙ੍ਕਮਿਤਬ੍ਬਂ. ਕੋ ਪਨ ਵਾਦੋ ਇਟ੍ਠਕਾਚਯਸਮ੍ਪਨ੍ਨੇ ਵੇਦਿਕਾਪਰਿਕ੍ਖਿਤ੍ਤੇ ਇਤਿ ਅਤ੍ਥੋਤਿ ਯੋਜਨਾ. ਪਬ੍ਬਤਨ੍ਤਰਵਨਨ੍ਤਰਗੁਮ੍ਬਨ੍ਤਰੇਸੂਤਿ ਪਬ੍ਬਤਮਜ੍ਝਵਨਮਜ੍ਝਗੁਮ੍ਬਮਜ੍ਝੇਸੁ, ਪਬ੍ਬਤਵਿਵਰਵਨਵਿਵਰਗੁਮ੍ਬਵਿਵਰੇਸੁ ਵਾ. ਉਪਚਾਰਨ੍ਤਿ ਦ੍ਵਾਦਸਹਤ੍ਥਂ ਉਪਚਾਰਂ.
੮੨. ਇਤਰੋਤਿ ਨਵਕੋ. ਅਸ੍ਸਾਤਿ ਨਵਕਸ੍ਸ. ਨ ਵਤ੍ਤਭੇਦੇ ਦੁਕ੍ਕਟਨ੍ਤਿ ਅਞ੍ਞਾਤਤ੍ਤਾ ਨ ਵਤ੍ਤਭੇਦੇ ਦੁਕ੍ਕਟਂ. ਏਸੇਵ ਨਯੋ ਸਬ੍ਬਤ੍ਥ. ਅਪਚ੍ਛਾਪੁਰਿਮਨ੍ਤਿ ਅਪਚ੍ਛਾ ਅਪੁਰਿਮਂ, ਏਕਪਹਾਰੇਨਾਤਿ ਅਤ੍ਥੋ. ਸਮਵਸ੍ਸਾ ਦ੍ਵੇ ਪਾਰਿਵਾਸਿਕਾਤਿ ਯੋਜਨਾ. ਦ੍ਵਿਨ੍ਨਂ ਪਾਰਿਵਾਸਿਕਾਨਂ ਏਕਤੋ ਵਸਨਦੋਸਂ ਦਸ੍ਸੇਨ੍ਤੋ ਆਹ ‘‘ਸਚੇ ਹਿ ਦ੍ਵੇ’’ਤਿਆਦਿ. ਨੇਸਨ੍ਤਿ ਦ੍ਵਿਨ੍ਨਂ ਪਾਰਿਵਾਸਿਕਾਨਂ. ਏਤ੍ਥਾਤਿ ਪਾਰਿਵਾਸਿਕਾਦੀਸੁ ਪਞ੍ਚਸੁ ਭਿਕ੍ਖੂਸੁ. ਮੂਲਾਯਪਟਿਕਸ੍ਸਨਾਰਹਾਦਯੋ ਚਤ੍ਤਾਰੋਤਿ ਯੋਜਨਾ.
ਪਰਿਵਾਸਦਾਨਾਦੀਨੀਤਿ ਆਦਿਸਦ੍ਦੇਨ ਮੂਲਾਯਪਟਿਕਸ੍ਸਨਮਾਨਤ੍ਤਦਾਨਅਬ੍ਭਾਨਾਨਿ ਸਙ੍ਗਣ੍ਹਾਤਿ. ਏਤੇਸ੍ਵੇਵਾਤਿ ਪਰਿਵਾਸਦਾਨਾਦੀਸੁ ਏਵ. ਅਯਨ੍ਤਿ ਪਾਰਿਵਾਸਿਕੋ.
੮੩. ‘‘ਅਥ ਖੋ ਆਯਸ੍ਮਾ ਉਪਾਲੀ’’ਤਿਆਦਿਵਚਨਸ੍ਸ ਅਨੁਸਨ੍ਧਿਂ ਦਸ੍ਸੇਨ੍ਤੋ ਆਹ ‘‘ਇਮਂ ਪਨਾ’’ਤਿਆਦਿ. ਰਹੋਗਤਸ੍ਸ ਉਪਾਲਿਤ੍ਥੇਰਸ੍ਸਾਤਿ ਯੋਜਨਾ. ਅਥ ਵਾ ਅਨਾਦਰੇ ਸਾਮਿਵਚਨਂ ਕਤ੍ਵਾ ਉਪਾਲਿਤ੍ਥੇਰਸ੍ਸ ਰਹੋਗਤਸ੍ਸਾਤਿ ਯੋਜਨਾ ਕਾਤਬ੍ਬਾ. ਏਤ੍ਥਾਤਿ ਪਾਰਿਵਾਸਿਕਵਤ੍ਤੇ. ਸੋਤਿ ਉਪਾਲਿਤ੍ਥੇਰੋ. ਅਸ੍ਸਾਤਿ ਉਪਾਲਿਤ੍ਥੇਰਸ੍ਸ. ਤਤ੍ਥਾਤਿ ਤੀਸੁ ਰਤ੍ਤਿਚ੍ਛੇਦੇਸੁ. ਯ੍ਵਾਯਨ੍ਤਿ ਯੋ ਅਯਂ, ਏਕਤੋ ਵਾਸੋਤਿ ਸਮ੍ਬਨ੍ਧੋ. ਸੋ ਵਾਸੋ ਸਹਵਾਸੋ ਨਾਮਾਤਿ ਯੋਜਨਾ. ਵਿਪ੍ਪਵਾਸੋਤਿ ਏਤ੍ਥ ਪਕਤਤ੍ਤੇਨ ਵਿਪ੍ਪਯੁਤ੍ਤੋ ਹੁਤ੍ਵਾ ਵਾਸੋਤਿ ਦਸ੍ਸੇਨ੍ਤੋ ਆਹ ‘‘ਏਕਕਸ੍ਸੇਵ ਵਾਸੋ’’ਤਿ. ਆਗਨ੍ਤੁਕਾਦੀਨਨ੍ਤਿ ਆਦਿਸਦ੍ਦੇਨ ਆਵਾਸਿਕਾ ਗਹੇਤਬ੍ਬਾ.
੮੪. ਤਤ੍ਥ ਤਤ੍ਥਾਤਿ ਤਂ ਤਂ ਠਾਨਂ. ਦ੍ਵੀਸੁ ਪਦੇਸੂਤਿ ਦ੍ਵੀਸੁ ਵਾਕ੍ਯਸਙ੍ਖਾਤੇਸੁ ਪਦੇਸੁ. ਏਕੇਨੇਕੇਨਪੀਤਿ ਏਕੇਨ ਏਕੇਨ ਵਾਕ੍ਯਪਦੇਨਪਿ. ਪਰਿਵਸਿਯਿਤ੍ਥਾਤਿ ਪਰਿਵੁਤ੍ਥੋ, ਪਰਿਵੁਤ੍ਥੋ ਪਰਿਵਾਸੋ ਏਤਸ੍ਸਾਤਿ ਪਰਿਵੁਤ੍ਥਪਰਿਵਾਸੋ, ਤਸ੍ਸ. ਹੀਤਿ ਸਚ੍ਚਂ. ਏਸਾਤਿ ਏਸੋ ਭਿਕ੍ਖੂਤਿ ਸਮ੍ਬਨ੍ਧੋ. ਸੁਦ੍ਧਨ੍ਤੇਤਿ ਸੁਦ੍ਧਕੋਟ੍ਠਾਸੇ. ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਸ੍ਸ. ਅਨ੍ਤਨ੍ਤਿ ਅਵਸਾਨਂ, ਵਿਨਾਸਂ ਵਾ.
੨. ਮੂਲਾਯਪਟਿਕਸ੍ਸਨਾਰਹਵਤ੍ਤਕਥਾ
੮੬. ਨਵਕਤਰਂ ਮੂਲਾਯਪਟਿਕਸ੍ਸਨਾਰਹਂ ਠਪੇਤ੍ਵਾਤਿ ਯੋਜਨਾ. ਇਮੇਸਂ ਪਞ੍ਚਨ੍ਨਂ ਪਕਤਤ੍ਤਾ ਏਵਾਤਿ ਸਮ੍ਬਨ੍ਧੋ. ਨੇਸਨ੍ਤਿ ਮੂਲਾਯਪਟਿਕਸ੍ਸਨਾਰਹਮਾਨਤ੍ਤਾਰਹਮਾਨਤ੍ਤਚਾਰਿਕਅਬ੍ਭਾਨਾਰਹਾਨਂ ਚਤੁਨ੍ਨਂ, ਮੂਲਾਯਪਟਿਕਸ੍ਸਨਾਰਹਾਦਿਲਕ੍ਖਣਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਮੂਲਾਯਪਟਿਕਸ੍ਸਨਾਰਹਸ੍ਸ ਵਤ੍ਤੇ. ਇਤੋਤਿ ਮੂਲਾਯਪਟਿਕਸ੍ਸਨਾਰਹਸ੍ਸ ਵਤ੍ਤਤੋ.
੮੭. ਯਥੇਵ ਪਾਰਿਵਾਸਿਕੋ ਗਣਪੂਰਕੋ ਨ ਹੋਤਿ, ਏਵਂ ਏਤੇਪਿ ਨ ਹੋਨ੍ਤੀਤਿ ਯੋਜਨਾ.
੪. ਮਾਨਤ੍ਤਾਚਾਰਿਕਵਤ੍ਤਕਥਾ
੯੨. ਊਨੇ ਗਣੇਤਿ ਏਤ੍ਥ ਗਣੋ ਨਾਮ ਗਣਭੋਜਨਸਿਕ੍ਖਾਪਦੇ (ਪਾਚਿ. ੨੧੭ ਆਦਯੋ) ਵਿਯ ਹੋਤੀਤਿ ਆਹ ‘‘ਚਤ੍ਤਾਰੋ ਵਾ ਅਤਿਰੇਕਾ ਵਾ’’ਤਿ. ਸਬ੍ਬਤ੍ਥਾਤਿ ਪਾਰਿਵਾਸਿਕਕ੍ਖਨ੍ਧਕੇ.
ਇਤਿ ਪਾਰਿਵਾਸਿਕਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.
੩. ਸਮੁਚ੍ਚਯਕ੍ਖਨ੍ਧਕਂ
੧. ਸੁਕ੍ਕਵਿਸ੍ਸਟ੍ਠਿਕਥਾ
ਸਮੁਚ੍ਚਯਕ੍ਖਨ੍ਧਕੇ ਤਤ੍ਥਾਤਿ ਚਤੁਬ੍ਬਿਧੇਸੁ ਮਾਨਤ੍ਤੇਸੁ. ਯਂ ਮਾਨਤ੍ਤਂ ਦਿਯ੍ਯਤਿ, ਇਦਂ ਅਪ੍ਪਟਿਚ੍ਛਨ੍ਨਮਾਨਤ੍ਤਂ ਨਾਮਾਤਿ ਯੋਜਨਾ. ਏਸੇਵ ਨਯੋ ਅਨਨ੍ਤਰਵਾਕ੍ਯੇਸੁਪਿ. ਪਟਿਚ੍ਛਨ੍ਨਾਯ ਆਪਤ੍ਤਿਯਾਤਿ ਹੇਤ੍ਵਤ੍ਥੇ ਕਰਣਵਚਨਂ, ਕਾਰਣਤ੍ਥੇ ਨਿਸ੍ਸਕ੍ਕਵਚਨਂ ਵਾ. ਅਦ੍ਧਮਾਸਨ੍ਤਿ ਪਨ੍ਨਰਸਦਿਵਸਕਾਲਂ. ਓਧਾਯਾਤਿ ਸਮੂਹਂ ਕਤ੍ਵਾ. ‘‘ਏਕਤੋ ਕਤ੍ਵਾ’’ਤਿ ਇਮਿਨਾ ‘‘ਓਧਾਯਾ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਤੇਸੂਤਿ ਚਤੁਬ੍ਬਿਧੇਸੁ ਮਾਨਤ੍ਤੇਸੁ. ਇਦਨ੍ਤਿ ਮਾਨਤ੍ਤਂ. ਅਪ੍ਪਟਿਚ੍ਛਨ੍ਨਾਯ…ਪੇ… ਵਚਨਤੋਤਿ ਞਾਪਕਹੇਤੁ. ਏਤੇਨ ਅਪ੍ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਦਾਤਬ੍ਬਂ ਮਾਨਤ੍ਤਂ ਅਪ੍ਪਟਿਚ੍ਛਨ੍ਨਮਾਨਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਤਨ੍ਤਿ ਅਪ੍ਪਟਿਚ੍ਛਨ੍ਨਮਾਨਤ੍ਤਂ. ਇਧਾਤਿ ਇਮਿਸ੍ਸਂ ਪਾਲ਼ਿਯਂ. ਤਤੁਤ੍ਤਰੀਤਿ ਤਤੋ ਤੀਹਿਪਿ ਉਤ੍ਤਰਿ. ਨਾਨਾਵਤ੍ਥੂਨਿ ਏਤਾਸਨ੍ਤਿ ਨਾਨਾਵਤ੍ਥੁਕਾਯੋ. ਤਾਸਨ੍ਤਿ ਨਾਨਾਵਤ੍ਥੁਕਾਨਂ.
ਮਾਲ਼ਕਸੀਮਾਯਮੇਵਾਤਿ ਸੀਮਮਾਲ਼ਕੇ ਏਵ, ਸੀਮਙ੍ਗਣੇ ਏਵਾਤਿ ਅਤ੍ਥੋ. ਤਤ੍ਥੇਵਾਤਿ ਮਾਲ਼ਕਸੀਮਾਯਮੇਵ.
ਵੇਦਯਾਮਹਨ੍ਤਿ ਵੇਦਯਾਮਿ ਅਹਂ. ਮਮ ਮਾਨਤ੍ਤਚਰਭਾਵਂ ਸਙ੍ਘਂ ਜਾਨਾਪੇਮੀਤਿ ਅਤ੍ਥੋ. ਵੇਦਯਤੀਤਿ ਮਨ੍ਤਿ ਜਾਨਾਪੇਤਿ, ਇਤਿ ਮਂ ਸਙ੍ਘੋ ਧਾਰੇਤੂਤਿ ਅਧਿਪ੍ਪਾਯੋ. ਵੁਤ੍ਤਨਯੇਨੇਵਾਤਿ ਪਾਰਿਵਾਸਿਕਕ੍ਖਨ੍ਧਕੇ ਵੁਤ੍ਤਨਯੇਨੇਵ. ਨਿਕ੍ਖਿਪਿਤਬ੍ਬਨ੍ਤਿ ‘‘ਮਾਨਤ੍ਤਂ ਨਿਕ੍ਖਿਪਾਮਿ, ਵਤ੍ਤਂ ਨਿਕ੍ਖਿਪਾਮੀ’’ਤਿ ਨਿਕ੍ਖਿਪਿਤਬ੍ਬਂ. ਮਾਲ਼ਕਤੋਤਿ ਸੀਮਙ੍ਗਣਤੋ. ਸੋਪੀਤਿ ਸਹ ਗਚ੍ਛਨ੍ਤੋਪਿ. ‘‘ਮਾਲ਼ਕੇ ਨਾਰੋਚਿਤ’’ਨ੍ਤਿ ਇਮਿਨਾ ਯਸ੍ਸ ਮਾਲ਼ਕੇ ਆਰੋਚਿਤਂ, ਤਸ੍ਸ ਅਨਾਰੋਚੇਤ੍ਵਾਪਿ ਨਿਕ੍ਖਿਪਿਤਬ੍ਬਨ੍ਤਿ ਦਸ੍ਸੇਤਿ. ਆਰੋਚੇਨ੍ਤੇਨ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ.
ਵਿਸਭਾਗੇਹਿ ਸਹ ਵਸਨ੍ਤਸ੍ਸ ਵਤ੍ਤਸ੍ਸ ਦੁਪ੍ਪੂਰਿਤਤ੍ਤਾ ਵੁਤ੍ਤਂ’’ਸਭਾਗਾ ਭਿਕ੍ਖੂ ਵਸਨ੍ਤੀ’’ਤਿ. ਚਤੂਹਿ, ਪਞ੍ਚਹਿ ਵਾਤਿ ਵਾਸਦ੍ਦੇਨ ਤਤੋ ਅਤਿਰੇਕਮ੍ਪਿ ਸਙ੍ਗਣ੍ਹਾਤਿ. ਪਰਿਕ੍ਖੇਪਾਰਹਟ੍ਠਾਨਤੋਤਿ ਚੀਵਰਕ੍ਖਨ੍ਧਕੇ (ਮਹਾਵ. ਅਟ੍ਠ. ੩੭੯) ਵੁਤ੍ਤਪਰਿਕ੍ਖੇਪਾਰਹਟ੍ਠਾਨਤੋ. ‘‘ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ’’ਤਿ ਇਦਂ ਵਿਹਾਰੇ ਭਿਕ੍ਖੂਨਂ ਸਜ੍ਝਾਯਾਦਿਸਦ੍ਦਸਵਨੂਪਚਾਰਪਹਾਨਤ੍ਥਂ ਵੁਤ੍ਤਂ. ਸਚੇ ਸਵਨੂਪਚਾਰਤੋ ਨ ਮੁਚ੍ਚਤਿ, ਤਤੋ ਅਤਿਰੇਕਮ੍ਪਿ ਅਤਿਕ੍ਕਮਿਤਬ੍ਬਂ. ਓਕ੍ਕਮ੍ਮਾਤਿ ਮਗ੍ਗਪਟਿਪਨ੍ਨਾਨਂ ਭਿਕ੍ਖੂਨਂ ਵਚਨਸਦ੍ਦਸਵਨੂਪਚਾਰਪਹਾਨਤ੍ਥਂ ਓਕ੍ਕਮਿਤ੍ਵਾ. ‘‘ਗੁਮ੍ਬੇਨ ਵਾ ਵਤਿਯਾ ਵਾ’’ਤਿ ਦਸ੍ਸਨੂਪਚਾਰਪਹਾਨਤ੍ਥਂ ਵੁਤ੍ਤਂ. ਇਧ ਉਪਚਾਰੋ ਨਾਮ ਯਤ੍ਥ ਠਤ੍ਵਾ ਪਸ੍ਸਤਿ ਸੁਣਾਤਿ, ਸੋਯੇਵ ਦੇਸੋ. ਅਞ੍ਞੋਤਿ ਚਤੂਹਿ ਪਞ੍ਚਹਿ ਵਾ ਭਿਕ੍ਖੂਹਿ ਅਞ੍ਞੋ. ਏਸਾਤਿ ਏਸੋ ਮਾਨਤ੍ਤਚਾਰਿਕੋ.
‘‘ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ’’ਤਿ ਇਮਿਨਾ ਅਨੋਕ੍ਕਮਿਤ੍ਵਾ ਅਜਾਨਨ੍ਤਸ੍ਸੇਵ ਗਚ੍ਛਤਿ, ਨਤ੍ਥਿ ਰਤ੍ਤਿਚ੍ਛੇਦੋਪੀਤਿ ਦਸ੍ਸੇਤਿ. ਏਤ੍ਥ ਦਿਟ੍ਠਰੂਪਾਨਂ ਸੁਤਸਦ੍ਦਾਨਂ ਦ੍ਵਾਦਸਹਤ੍ਥੂਪਚਾਰਤੋ ਬਹਿ ਠਿਤਾਨਮ੍ਪਿ ਆਰੋਚੇਤਬ੍ਬਂ. ਅਦਿਟ੍ਠਾਸੁਤਾਨਮ੍ਪਿ ਅਨ੍ਤੋ ਦ੍ਵਾਦਸਹਤ੍ਥੂਪਚਾਰਗਤਾਨਂ ਆਰੋਚੇਤਬ੍ਬਨ੍ਤਿ ਦਟ੍ਠਬ੍ਬਂ. ਸਤਿ ਕਰਣੀਯੇਤਿ ਇਦਂ ਗਨ੍ਤੁਸ੍ਸ ਕਾਰਣਦਸ੍ਸਨਤ੍ਥਂ ਵੁਤ੍ਤਂ. ਅਸਤਿ ਕਰਣੀਯੇਪਿ ਗਨ੍ਤੁਂ ਵਟ੍ਟਤਿ. ਸੋਪੀਤਿ ਏਕੋ ਭਿਕ੍ਖੁਪਿ. ‘‘ਤਸ੍ਸ ਸਨ੍ਤਿਕੇ ਆਰੋਚੇਤ੍ਵਾ’’ਤਿ ਇਮਿਨਾ ਅਨਾਰੋਚਨੇ ਵਤ੍ਤਭੇਦਦੁਕ੍ਕਟਂ ਹੋਤੀਤਿ ਦਸ੍ਸੇਤਿ. ਏਕਸ੍ਸ ਸਨ੍ਤਿਕੇ ਆਰੋਚੇਤ੍ਵਾ ਨਿਕ੍ਖਿਪਿਯਮਾਨੇ ਕਿਂ ਊਨੇ ਗਣੇ ਚਰਣਦੋਸੋ ਵਾ ਵਿਪ੍ਪਵਾਸੋ ਵਾ ਨ ਹੋਤੀਤਿ ਆਹ ‘‘ਅਯਞ੍ਚਾ’’ਤਿਆਦਿ. ਤਤ੍ਥ ਅਯਞ੍ਚਾਤਿ ਮਾਨਤ੍ਤਚਾਰਿਕੋ ਪਨ. ਯਸ੍ਮਾ ਕਾਰਣਾ ਵਸਿ, ਤੇਨ ਕਾਰਣੇਨਾਤਿ ਯੋਜਨਾ. ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਪਕਤਤ੍ਤਾਗਤਕਾਲੇ ਤਸ੍ਸ ਅਨਾਰੋਚੇਤ੍ਵਾਵ ਗਚ੍ਛਨ੍ਤਿ, ਤਸ੍ਮਾ ਭਿਕ੍ਖੂਨਞ੍ਚ ਦ੍ਵਾਦਸਹਤ੍ਥੂਪਚਾਰੇ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਅਤ੍ਥੋ. ਏਤ੍ਥ ਚ ‘‘ਗਣਸ੍ਸ ਆਰੋਚੇਤ੍ਵਾ’’ਤਿ ਇਮਿਨਾ ਊਨੇ ਗਣੇ ਚਰਣਦੋਸਾਭਾਵਂ ਦਸ੍ਸੇਤਿ. ‘‘ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾ’’ਤਿ ਇਮਿਨਾ ਵਿਪ੍ਪਵਾਸਦੋਸਾਭਾਵਂ ਦਸ੍ਸੇਤਿ. ਯਨ੍ਤਿ ਪੁਬ੍ਬੇ ਅਨਾਰੋਚਿਤਂ ਯਂ ਭਿਕ੍ਖੁਂ. ਅਯਨ੍ਤਿ ਪਠਮਂ ਪਸ੍ਸਿਤਬ੍ਬਸ੍ਸ ਆਰੋਚੇਤ੍ਵਾ ਨਿਕ੍ਖਿਪਨਂ. ‘‘ਨਿਕ੍ਖਿਤ੍ਤਵਤ੍ਤਸ੍ਸ ਪਰਿਹਾਰੋ’’ਤਿ ਇਮਿਨਾ ਅਨਿਕ੍ਖਿਤ੍ਤਵਤ੍ਤੇ ਅਨ੍ਤੋਉਪਚਾਰਗਤਾਨਂ ਸਬ੍ਬੇਸਂ ਆਰੋਚੇਤਬ੍ਬਨ੍ਤਿ ਦਸ੍ਸੇਤਿ.
ਅਯਨ੍ਤਿ ਮਾਨਤ੍ਤਚਾਰਿਕੋ, ਠਿਤੋਤਿ ਸਮ੍ਬਨ੍ਧੋ. ਤੇਨਾਪੀਤਿ ਮਾਨਤ੍ਤਚਾਰਿਕੇਨਪਿ, ਯਾਚਿਤਬ੍ਬਨ੍ਤਿ ਯੋਜਨਾ. ਸੋਤਿ ਅਨਿਕ੍ਖਿਤ੍ਤਵਤ੍ਤੋ ਭਿਕ੍ਖੁ. ਤਤ੍ਰਾਤਿ ‘‘ਸੋ ਅਬ੍ਭੇਤਬ੍ਬੋ’’ਤਿ ਵਚਨੇ. ਅਯਂ ਅਬ੍ਭਾਨਵਿਧਿ ਵੁਤ੍ਤੋਤਿ ਯੋਜਨਾ. ਅਯਞ੍ਚਾਤਿ ਅਬ੍ਭਾਨਵਿਧਿ ਚ. ਤਾਸਨ੍ਤਿ ਆਪਤ੍ਤੀਨਂ. ਏਵਨ੍ਤਿਆਦਿ ਨਿਗਮਨਂ. ਪਟਿਚ੍ਛਨ੍ਨਮਾਨਤ੍ਤਂ ਪਨ ਦਾਤਬ੍ਬਂ ਹੋਤੀਤਿ ਸਮ੍ਬਨ੍ਧੋ. ‘‘ਪਟਿਚ੍ਛਨ੍ਨਾਯਾ’’ਤਿਆਦਿਨਾ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਦਾਤਬ੍ਬਂ ਮਾਨਤ੍ਤਂ ਪਟਿਚ੍ਛਨ੍ਨਮਾਨਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਨਨ੍ਤਿ ਪਟਿਚ੍ਛਨ੍ਨਮਾਨਤ੍ਤਂ.
੨. ਪਰਿਵਾਸਕਥਾ
੧੦੨. ਤਸ੍ਸਾਤਿ ਪਟਿਚ੍ਛਨ੍ਨਮਾਨਤ੍ਤਸ੍ਸ. ਸਮੋਧਾਨੇਤ੍ਵਾਤਿ ਇਧੇਵ ਪਰਿਵਾਸਕਥਾਯਂ ਸਮੋਧਾਨੇਤ੍ਵਾ. ਇਧੇਵ ਪਰਿਵਾਸਕਥਾਯਂ ਦਸ੍ਸਯਿਸ੍ਸਾਮਾਤਿ ਯੋਜਨਾ. ਇਧੇਵਸਦ੍ਦੋ ਹਿ ਪੁਬ੍ਬਾਪਰਾਪੇਕ੍ਖੋ.
ਇਧ ਅਧਿਪ੍ਪੇਤਂ ਪਰਿਵਾਸਂ ਵਿਤ੍ਥਾਰੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਅਯਂ ਹੀ’’ਤਿਆਦਿ. ਇਧ ਅਧਿਪ੍ਪੇਤੋ ਪਰਿਵਾਸੋ ਨਾਮ ਤਿਵਿਧੋ ਹੋਤੀਤਿ ਯੋਜਨਾ. ਤਤ੍ਥਾਤਿ ਤਿਵਿਧੇਸੁ ਪਰਿਵਾਸੇਸੁ. ‘‘ਯਥਾਪਟਿਚ੍ਛਨ੍ਨਾਯ ਆਪਤ੍ਤਿਯਾ’’ਤਿ ਵਚਨਂ ਵਿਤ੍ਥਾਰੇਨ੍ਤੋ ਆਹ ‘‘ਕਸ੍ਸਚਿ ਹੀ’’ਤਿਆਦਿ. ਯਥਾ ਉਦਾਯਿਤ੍ਥੇਰਸ੍ਸ ਏਕਾਹਪਟਿਚ੍ਛਨ੍ਨਾ ਅਯਂ ਆਪਤ੍ਤਿ ਹੋਤਿ, ਤਥਾ ਕਸ੍ਸਚਿ ਏਕਾਹਪਟਿਚ੍ਛਨ੍ਨਾ ਆਪਤ੍ਤਿ ਹੋਤੀਤਿ ਯੋਜਨਾ. ਯਥਾ ਚ ਪਰਤੋ ਆਗਤਾ ਉਦਾਯਿਤ੍ਥੇਰਸ੍ਸੇਵ ਆਪਤ੍ਤਿ ਹੋਤਿ, ਤਥਾ ਕਸ੍ਸਚਿ ਦ੍ਵਿਹਾਦਿਪਟਿਚ੍ਛਨ੍ਨਾ ਆਪਤ੍ਤਿ ਹੋਤੀਤਿ ਯੋਜਨਾ. ਇਮਿਨਾ ਵੁਤ੍ਤਨਯਾਨੁਸਾਰੇਨ ਪਰਤੋਪਿ ਨਯੋ ਨੇਤਬ੍ਬੋ. ਤਸ੍ਮਾਤਿ ਯਸ੍ਮਾ ਏਕਾਹਾਦਿਪਟਿਚ੍ਛਨ੍ਨਾ ਏਕਾਦਿਆਪਤ੍ਤਿ ਹੋਤਿ, ਤਸ੍ਮਾ ਜਾਨਿਤਬ੍ਬੋਤਿ ਯੋਜਨਾ.
ਪਟਿਚ੍ਛਨ੍ਨਭਾਵਂ ਵਿਤ੍ਥਾਰੇਨ੍ਤੋ ਆਹ ‘‘ਅਯਂ ਹੀ’’ਤਿਆਦਿ. ਤਤ੍ਥਾਤਿ ‘‘ਦਸਹਾਕਾਰੇਹੀ’’ਤਿ ਪਾਠੇ. ਆਪਤ੍ਤਿਇਤਿ ਸਞ੍ਞਾ ਏਤਸ੍ਸਾਤਿ ਆਪਤ੍ਤਿਸਞ੍ਞੀ . ਪਹੁ ਚਾਤਿ ਸਮਤ੍ਥੋ ਚ. ਪਪੁਬ੍ਬੋ ਹੂਧਾਤੁ ਸਮਤ੍ਥਤ੍ਥੇ ਹੋਤਿ.
ਤਤ੍ਥਾਤਿ ਤਸ੍ਸਂ ਮਾਤਿਕਾਯਂ. ਯਨ੍ਤਿ ਆਪਤ੍ਤਿਂ. ਸੋਪਿ ਚਾਤਿ ਭਿਕ੍ਖੁਪਿ ਚ. ਤਤ੍ਥਾਤਿ ਤਸ੍ਸਂ ਆਪਤ੍ਤਿਯਂ. ਅਯਨ੍ਤਿ ਭਿਕ੍ਖੁ. ਤਤ੍ਥਾਤਿ ਆਪਤ੍ਤਿਯਂ. ਅਲਜ੍ਜਿਪਕ੍ਖੇ ਤਿਟ੍ਠਤੀਤਿ ‘‘ਸਞ੍ਚਿਚ੍ਚ ਆਪਤ੍ਤਿਂ ਪਰਿਗੂਹਤੀ’’ਤਿ (ਪਰਿ. ੩੫੯) ਵੁਤ੍ਤਪਕ੍ਖੇ ਠਿਤਤ੍ਤਾ ਅਲਜ੍ਜਿਪਕ੍ਖੇ ਤਿਟ੍ਠਤਿ.
ਪਕਤਤ੍ਤੋਤਿ ਏਤ੍ਥ ‘‘ਪਾਰਾਜਿਕਂ ਅਨਜ੍ਝਾਪਨ੍ਨੋ’’ਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਤਿਵਿਧਂ ਉਕ੍ਖੇਪਨੀਯਕਮ੍ਮਂ ਅਕਤੋ’’ਤਿ. ਏਤਨ੍ਤਿ ਅਪ੍ਪਟਿਚ੍ਛਨ੍ਨਭਾਵਂ, ‘‘ਆਪਜ੍ਜਤਿ…ਪੇ… ਕੁਸਲੇਹਿ ਚਿਨ੍ਤਿਤਾ’’ਤਿ ਵਚਨਂ ਵਾ.
ਗਾਥਾਯ ‘‘ਸਾਵਸੇਸ’’ਨ੍ਤਿ ਇਮਿਨਾ ਪਾਰਾਜਿਕਂ ਨਿਵਤ੍ਤੇਤਿ. ਗਰੁਕਨ੍ਤਿ ਏਤ੍ਥ ਸਙ੍ਘਾਦਿਸੇਸਮੇਵ ਅਧਿਪ੍ਪੇਤਨ੍ਤਿ ਦਸ੍ਸੇਤਿ. ਅਨਾਦਰਿਯਨ੍ਤਿ ਸਿਕ੍ਖਾਪਦੇ ਅਨਾਦਰਿਯਂ. ਵਜ੍ਜਨ੍ਤਿ ਦੁਕ੍ਕਟਂ. ਉਕ੍ਖਿਤ੍ਤਕੇਨ ਕਰਣਭੂਤੇਨ.
ਯਸ੍ਸਾਤਿ ਭਿਕ੍ਖੁਸ੍ਸ, ਨਤ੍ਥੀਤਿ ਸਮ੍ਬਨ੍ਧੋ. ਭੀਰੁਕਜਾਤਿਕਤਾਯਾਤਿ ਭੀਰੁਕਸਭਾਵਤਾਯ. ਪਬ੍ਬਤਵਿਹਾਰੇ ਵਸਨ੍ਤਸ੍ਸ ਯਸ੍ਸ ਭਿਕ੍ਖੁਨੋਤਿ ਯੋਜਨਾ. ਪਬ੍ਬਤਵਿਹਾਰੇਤਿ ਪਬ੍ਬਤਸ੍ਸ ਤਲੇ, ਅਨ੍ਤਰੇ ਵਾ ਕਾਰਿਤੇ ਵਿਹਾਰੇ. ਏਤਸ੍ਮਿਨ੍ਤਿ ਏਤਾਦਿਸੇ. ਅਨ੍ਤਰਾਯੇ ਸਤਿਯੇਵਾਤਿ ਯੋਜਨਾ. ਤਸ੍ਸ ਅਚ੍ਛਨ੍ਨਾਵ ਹੋਤੀਤਿ ਯੋਜਨਾ. ਅਨਨ੍ਤਰਾਯਿਕਸਞ੍ਞਾਯ ਛਾਦਯਤੋ ਅਚ੍ਛਨ੍ਨਾਵਾਤਿ ਅਨਨ੍ਤਰਾਯਿਕਸਞ੍ਞਾਯ ਛਾਦੇਨ੍ਤਸ੍ਸਾਪਿ ਏਕਨ੍ਤੇਨ ਅਨ੍ਤਰਾਯਿਕਤ੍ਤਾ ਅਚ੍ਛਨ੍ਨਾਵਾਤਿ ਅਧਿਪ੍ਪਾਯੋ.
ਅਸ੍ਸਾਤਿ ਭਿਕ੍ਖੁਸ੍ਸ. ਹਨੁਕਵਾਤੋਤਿ ਹਨੁਕਸ੍ਸ ਗੇਲਞ੍ਞਕਰੋ ਵਾਤੋ. ਵਿਜ੍ਝਤੀਤਿ ਹਨੁਕਂ ਵਿਜ੍ਝਤਿ. ਇਮਿਨਾਤਿ ਭਿਕ੍ਖੁਨਾ. ਪਹੁਸਞ੍ਞਿਨੋ ਛਾਦਿਤਾਪਿ ਏਕਨ੍ਤੇਨ ਅਪਹੁਤ੍ਤਾ ਅਚ੍ਛਾਦਿਤਾਵ ਹੋਤਿ.
ਛਾਦੇਤੁਕਾਮੋ ਚਾਤਿ ਏਤ੍ਥ ਇਦਂ ਚਤੁਕ੍ਕਂ ਵੇਦਿਤਬ੍ਬਂ ਛਾਦੇਤੁਕਾਮੋ ਛਾਦੇਤਿ, ਛਾਦੇਤੁਕਾਮੋ ਨਚ੍ਛਾਦੇਤਿ, ਅਚ੍ਛਾਦੇਤੁਕਾਮੋ ਛਾਦੇਤਿ, ਨਚ੍ਛਾਦੇਤੁਕਾਮੋ ਨਚ੍ਛਾਦੇਤੀਤਿ. ਤਤ੍ਥ ਪਠਮਪਦਂ ਸਨ੍ਧਾਯ ਵੁਤ੍ਤਂ ‘‘ਇਦਂ ਉਤ੍ਤਾਨਤ੍ਥਮੇਵਾ’’ਤਿ. ਏਵਂ ਸੇਸਾਸੁਪਿ ਮਾਤਿਕਾਸੁ ਚਤੁਕ੍ਕਂ ਵੇਦਿਤਬ੍ਬਂ. ਚਤੂਸੁ ਚਤੁਕ੍ਕੇਸੁ ਪਠਮਪਦੇ ਏਵ ਛਨ੍ਨਾ ਹੋਤਿ, ਨ ਸੇਸਪਦੇਸੁ. ਅਨੁਤ੍ਤਾਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਪੁਰੇਭਤ੍ਤੇ ਵਾਤਿ ਪੁਰੇਭਤ੍ਤਂ ਵਾ, ਭਤ੍ਤਤੋ, ਭਤ੍ਤਸ੍ਸ ਵਾ ਪੁਰੇਤਿ ਪੁਰੇਭਤ੍ਤਂ. ਅਬ੍ਯਯੀਭਾਵਸਮਾਸੇ ਸਤ੍ਤਮੀਵਿਭਤ੍ਤਿਯਾ ਅਮਿਤਿਕਾਰਿਯਸ੍ਸ ਅਨਿਚ੍ਚਭਾਵਤੋ ਵੁਤ੍ਤਂ ‘‘ਪੁਰੇਭਤ੍ਤੇ’’ਤਿ. ਏਸੇਵ ਨਯੋ ‘‘ਪਚ੍ਛਾਭਤ੍ਤੇ’’ਤਿ ਏਤ੍ਥਾਪਿ. ਦੁਤਿਯਪਦਸ੍ਸ ਅਤ੍ਥਂ ਦਸ੍ਸੇਤ੍ਵਾ ਤਤਿਯਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਸ ਪਨਾ’’ਤਿਆਦਿ. ਅਭਿਕ੍ਖੁਕੇ ਠਾਨੇ ਵਸਨ੍ਤਸ੍ਸ ਯਸ੍ਸ ਭਿਕ੍ਖੁਸ੍ਸਾਤਿ ਯੋਜਨਾ. ਆਗਮੇਨ੍ਤਸ੍ਸ ਗਚ੍ਛਨ੍ਤਸ੍ਸਾਤਿ ਅਨਾਦਰੇ ਚੇਤਾਨਿ ਸਾਮਿਵਚਨਾਨਿ.
ਚਤੁਤ੍ਥਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੋ ਪਨਾ’’ਤਿਆਦਿ. ਤਤ੍ਥ ਯੋ ਪਨਾਤਿ ਭਿਕ੍ਖੁ ਪਨ, ਆਵਿ ਕਰੋਤੀਤਿ ਸਮ੍ਬਨ੍ਧੋ. ਸਭਾਗਨ੍ਤਿ ਅਵੇਰਿਂ. ਅਯਨ੍ਤਿ ਭਿਕ੍ਖੁ. ਉਪਜ੍ਝਾਯੋ ਇਤਿ ਵਾ ਆਚਰਿਯੋ ਇਤਿ ਵਾਤਿ ਯੋਜਨਾ. ਲਜ੍ਜਾਯਾਤਿ ਲਜ੍ਜਨਿਮਿਤ੍ਤਂ, ਲਜ੍ਜਕਾਰਣਾ, ਲਜ੍ਜਹੇਤੁ ਵਾ. ਹੀਤਿ ਸਚ੍ਚਂ, ਯਸ੍ਮਾ ਵਾ, ਇਧਾਤਿ ਆਪਤ੍ਤਿਆਰੋਚਨਟ੍ਠਾਨੇ. ਅਵੇਰਿਸਭਾਗਸ੍ਸਾਤਿ ਅਵੇਰੀ ਹੁਤ੍ਵਾ ਸਭਾਗਸ੍ਸ.
ਪਕਾਸੇਤੁਕਾਮੋਤਿ ਅਞ੍ਞੇਸਂ ਪਕਾਸੇਤੁਕਾਮੋ. ਉਪਜ੍ਝਾਯਸ੍ਸਾਪੀਤਿ ਪਿਸਦ੍ਦੇਨ ਅਞ੍ਞਸ੍ਸ ਸਨ੍ਤਿਕੇ ਕਾ ਨਾਮ ਕਥਾਤਿ ਦਸ੍ਸੇਤਿ. ਤਤ੍ਥਾਤਿ ਆਪਤ੍ਤਿਆਰੋਚਨਟ੍ਠਾਨੇ. ਸਭਾਗਸਙ੍ਘਾਦਿਸੇਸਨ੍ਤਿ ਵਤ੍ਥੁਸਭਾਗਸਙ੍ਘਾਦਿਸੇਸਂ. ਸੁਦ੍ਧਸ੍ਸਾਤਿ ਵਤ੍ਥੁਸਭਾਗਸਙ੍ਘਾਦਿਸੇਸਤੋ ਸੁਦ੍ਧਸ੍ਸ. ਆਵਿਕਰਣਾਕਾਰਂ ਦਸ੍ਸੇਨ੍ਤੋ ਆਹ ‘‘ਆਵਿਕਰੋਨ੍ਤੋ ਚਾ’’ਤਿਆਦਿ. ਇਤਿ ਇਮਾਨੀਤਿਆਦਿ ਨਿਗਮਨਂ.
ਤਤੋਤਿ ਜਾਨਿਤਬ੍ਬਤੋ, ਪਰਨ੍ਤਿ ਸਮ੍ਬਨ੍ਧੋ. ਏਕਾਹਪਟਿਚ੍ਛਨ੍ਨਾਤਿ ਏਕਾਹੇਨ ਪਟਿਚ੍ਛਨ੍ਨਾ. ਯਾਵ ਚੁਦ੍ਦਸ ਦਿਵਸਾਨਿ, ਤਾਵ ਦਿਵਸਵਸੇਨ ਯੋਜਨਾ ਕਾਤਬ੍ਬਾਤਿ ਯੋਜਨਾ. ਪਕ੍ਖਪਟਿਚ੍ਛਨ੍ਨਨ੍ਤਿ ਪਕ੍ਖੇਨ ਪਟਿਚ੍ਛਨ੍ਨਂ. ਅਤਿਰੇਕਪਕ੍ਖਪਟਿਚ੍ਛਨ੍ਨਨ੍ਤਿ ਪਕ੍ਖਤੋ ਅਤਿਰੇਕੇਨ ਪਟਿਚ੍ਛਨ੍ਨਂ.
ਸਂਵਚ੍ਛਰਪਟਿਚ੍ਛਨ੍ਨਨ੍ਤਿ ਸਂਵਚ੍ਛਰੇਨ ਪਟਿਚ੍ਛਨ੍ਨਂ. ਤਤੋ ਵਾਤਿ ਅਤਿਰੇਕਸਟ੍ਠਿਸਂਵਚ੍ਛ ਰਤੋ ਵਾ. ਭਿਯ੍ਯੋਪੀਤਿ ਅਤਿਰੇਕਮ੍ਪਿ.
ਤਤੋਤਿ ਤੀਹਿ ਆਪਤ੍ਤੀਹਿ. ਪਰਨ੍ਤਿ ਅਤਿਰੇਕਂ. ਗਣਨਵਸੇਨਾਤਿ ਆਪਤ੍ਤਿਗਣਨਵਸੇਨ. ਵਤ੍ਥੁਕਿਤ੍ਤਨਵਸੇਨ ਵਾਤਿ ਆਪਤ੍ਤੀਨਂ ਵਤ੍ਥੁਕਿਤ੍ਤਨਵਸੇਨ ਵਾ. ਨਾਮਮਤ੍ਤਵਸੇਨ ਵਾਤਿ ‘‘ਸਙ੍ਘਾਦਿਸੇਸਾਪਤ੍ਤਿਯੋ’’ਤਿ ਏਵਂ ਨਾਮਸ੍ਸੇਵ ਵਸੇਨ ਵਾ. ਏਤ੍ਥ ਹਿ ਮਤ੍ਤਸਦ੍ਦੋ ਅਵਧਾਰਣਤ੍ਥੋ, ਤੇਨ ਵਤ੍ਥੁਂ ਨਿਵਤ੍ਤੇਤਿ.
ਤਤ੍ਥਾਤਿ ‘‘ਨਾਮਮਤ੍ਤਵਸੇਨਾ’’ਤਿ ਪਦੇ. ਸਜਾਤਿਸਾਧਾਰਣਨ੍ਤਿ ਸਸ੍ਸ ਅਤ੍ਤਨੋ ਜਾਤਿ ਸਜਾਤਿ, ਤਾਯ ਸਾਧਾਰਣਂ ਸਜਾਤਿਸਾਧਾਰਣਂ. ਸਬ੍ਬੇਸਂ, ਸਬ੍ਬੇਹਿ ਵਾ ਆਪਤ੍ਤੀਹਿ ਸਾਧਾਰਣਂ ਸਬ੍ਬਸਾਧਾਰਣਂ. ਤਤ੍ਥਾਤਿ ਦੁਵਿਧੇਸੁ ਨਾਮੇਸੁ. ਸਬ੍ਬਸਾਧਾਰਣਨਾਮਵਸੇਨਾਪੀਤਿ ਏਤ੍ਥ ਪਿਸਦ੍ਦੋ ‘‘ਅਹਂ ਭਨ੍ਤੇ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਜ੍ਜਿਂ ਏਕਾਹਪਟਿਚ੍ਛਨ੍ਨਾਯੋ’’ਤਿ ਏਵਂ ਸਜਾਤਿਸਾਧਾਰਣਨਾਮਵਸੇਨਪਿ ‘‘ਅਹਂ ਭਨ੍ਤੇ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਾਹਪਟਿਚ੍ਛਨ੍ਨਾਯੋ’’ਤਿ ਏਵਂ ਉਭਯਸਾਧਾਰਣਵਸੇਨਪਿ ਵਤ੍ਤੁਂ ਵਟ੍ਟਤੀਤਿ ਦਸ੍ਸੇਤਿ. ਹੀਤਿ ਸਚ੍ਚਂ. ਸਬ੍ਬਮ੍ਪਿ ਪਰਿਵਾਸਾਦਿਕਂ ਇਦਂ ਵਿਨਯਕਮ੍ਮਨ੍ਤਿ ਯੋਜਨਾ. ਵਸਤਿ ਆਪਤ੍ਤਿ ਏਤ੍ਥ ਤਦਾਯਤ੍ਤਵੁਤ੍ਤਿਤਾਯਾਤਿ ਵਤ੍ਥੁ. ਗੋ ਵੁਚ੍ਚਤਿ ਵਚਨਂ ਵਾ ਞਾਣਂ ਵਾ, ਤਂ ਤਾਯਤੀਤਿ ਗੋਤ੍ਤਂ.
ਤਤ੍ਥਾਤਿ ਵਤ੍ਥਾਦੀਸੁ ਚਤੁਬ੍ਬਿਧੇਸੁ. ਤਤ੍ਥਾਤਿ ਤੇਸੁ ਵਚਨੇਸੁ. ਸੁਕ੍ਕਵਿਸ੍ਸਟ੍ਠਿਂ ਕਾਯਸਂਸਗ੍ਗਨ੍ਤਿਆਦਿਨਾ ਵਚਨੇਨਾਪੀਤਿ ਏਤ੍ਥ ਆਦਿਸਦ੍ਦੇਨ ਦੁਟ੍ਠੁਲ੍ਲਾਦਿਵਚਨਾਨਿ ਸਙ੍ਗਣ੍ਹਾਤਿ. ਇਧ ਪਨਾਤਿ ਇਮਸ੍ਮਿਂ ਪਨ ਠਾਨੇ. ਯੋ ਯੋਤਿ ਤਿਸ੍ਸੋ ਵਾ ਫੁਸ੍ਸੋ ਵਾ ਆਪਨ੍ਨੋ ਹੋਤਿ.
ਏਵਂ ਆਰੋਚੇਤਬ੍ਬਨ੍ਤਿ ਏਵਂ ਵਕ੍ਖਮਾਨਨਯੇਨ ਆਰੋਚੇਤਬ੍ਬਨ੍ਤਿ ਯੋਜਨਾ. ਕਿਂ ਆਰੋਚੇਤਬ੍ਬਂ? ‘‘ਅਹਂ ਭਨ੍ਤੇ…ਪੇ… ਸਙ੍ਘੋ ਧਾਰੇਤੁ’’ ਇਤਿ ਆਰੋਚੇਤਬ੍ਬਨ੍ਤਿ ਯੋਜਨਾ.
ਵੇਦਯਾਮਹਨ੍ਤਿ ਵੇਦਯਾਮਿ ਅਹਂ. ਮਮ ਪਾਰਿਵਾਸਿਕਭਾਵਂ ਸਙ੍ਘਂ, ਸਙ੍ਘਸ੍ਸ ਵਾ ਜਾਨਾਪੇਮੀਤਿ ਅਤ੍ਥੋ. ਵੇਦਯਤੀਤਿ ਮਨ੍ਤਿ ਵੇਦਯਤਿ ਇਤਿ ਮਂ. ਪਾਰਿਵਾਸਿਕਭਾਵਂ ਸਙ੍ਘਂ, ਸਙ੍ਘਸ੍ਸ ਵਾ ਜਾਨਾਪੇਤੀਤਿ ਮਂ ਸਙ੍ਘੋ ਧਾਰੇਤੂਤਿ ਅਤ੍ਥੋ. ਏਤ੍ਥ ਬਹੂਸੁ ਅਟ੍ਠਕਥਾਪੋਤ੍ਥਕੇਸੁ ‘‘ਤਿਣ੍ਣਂ ਵਾ ਅਤਿਰੇਕਾਨਂ ਵਾ ਆਰੋਚੇਨ੍ਤੇਨ ਆਯਸ੍ਮਨ੍ਤੋ ਧਾਰੇਨ੍ਤੂ’’ਤਿ ਪਾਠੋ ਅਤ੍ਥਿ. ਕੇਸੁਚਿ ਅਟ੍ਠਕਥਾਪੋਤ੍ਥਕੇਸੁ ‘‘ਤਿਣ੍ਣਂ ਆਰੋਚੇਨ੍ਤੇਨ ਆਯਸ੍ਮਨ੍ਤੋ ਧਾਰੇਨ੍ਤੂ’’ਤਿ ਏਤ੍ਤਕੋਯੇਵ ਪਾਠੋ ਅਤ੍ਥਿ. ਹੇਟ੍ਠਾ ਮਾਨਤ੍ਤਕਥਾਯਮ੍ਪਿ ਏਵਮੇਵ ਅਤ੍ਥਿ. ਤਤ੍ਥ ‘‘ਅਤਿਰੇਕਾਨ’’ਨ੍ਤਿ ਇਮਿਨਾ ਤੀਹਿ ਅਤਿਰੇਕਾਨਂ ਆਰੋਚੇਨ੍ਤੇਨ ਸਙ੍ਘਂ ਅਪੇਕ੍ਖਿਤ੍ਵਾ ਸਚੇ ਏਕਵਚਨਵਸੇਨ ਵਤ੍ਤੁਕਾਮੋ ਹੋਤਿ, ‘‘ਮਂ ਸਙ੍ਘੋ ਧਾਰੇਤੂ’’ਤਿ ਵਤ੍ਤਬ੍ਬਂ. ਅਥ ਸਮ੍ਬਹੁਲੇ ਭਿਕ੍ਖੂ ਅਪੇਕ੍ਖਿਤ੍ਵਾ ਸਚੇ ਬਹੁਵਚਨਵਸੇਨ ਵਤ੍ਤੁਕਾਮੋ ਹੋਤਿ, ਯਥਾ ਤਿਣ੍ਣਂ, ਏਵਂ ‘‘ਮਂ ਆਯਸ੍ਮਨ੍ਤੋ ਧਾਰੇਨ੍ਤੂ’’ਤਿ ਵਤ੍ਤਬ੍ਬਨ੍ਤਿ ਦਸ੍ਸੇਤਿ. ਇਦਞ੍ਚ ਸਦ੍ਦਸਤ੍ਥਵਸੇਨੇਵ ਵੁਤ੍ਤਂ, ਨ ਵਿਨਯਕਮ੍ਮਵਿਪਤ੍ਤਿਵਸੇਨਾਤਿ ਦਟ੍ਠਬ੍ਬਂ.
‘‘ਵਿਹਾਰੇਯੇਵ ਰਤ੍ਤਿਪਰਿਗ੍ਗਹੋ’’ਤਿ ਇਮਿਨਾ ਅਨ੍ਤੋਉਪਚਾਰਸੀਮਾਯਮ੍ਪਿ ਪਰਿਵਸਿਤਬ੍ਬਭਾਵਂ ਦਸ੍ਸੇਤਿ. ਉਪਚਾਰਸੀਮਨ੍ਤਿ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਂ. ਏਸਾਤਿ ਪਾਰਿਵਾਸਿਕੋ ਭਿਕ੍ਖੁ. ਅਸ੍ਸਾਤਿ ਆਗਤਸ੍ਸ ਭਿਕ੍ਖੁਨੋ.
ਤਤੋਤਿ ਆਪਤ੍ਤਿਪਟਿਚ੍ਛਨ੍ਨਦਿਵਸਤੋ. ਕੁਕ੍ਕੁਚ੍ਚਵਿਨੋਦਨਤ੍ਥਾਯਾਤਿ ਆਪਤ੍ਤਿਪਟਿਚ੍ਛਨ੍ਨਦਿਵਸੇਨ ਸਮਂ ਪਰਿਵਸਿਤਬ੍ਬਂ ਨੁਖੋ, ਨ ਨੁਖੋਤਿ ਕੁਕ੍ਕੁਚ੍ਚਸ੍ਸ ਵਿਨੋਦਨਤ੍ਥਾਯ. ਪਰਿਵੁਤ੍ਥਤ੍ਤਾਤਿ ਪਰਿਵਸਿਤਤ੍ਤਾ. ਸੋਤਿ ਪਰਿਵੁਤ੍ਥੋ ਭਿਕ੍ਖੁ. ਇਦਨ੍ਤਿ ਦਾਤਬ੍ਬਮਾਨਤ੍ਤਂ. ਤਨ੍ਤਿ ਪਟਿਚ੍ਛਨ੍ਨਮਾਨਤ੍ਤਂ. ਛਾਰਤ੍ਤਨ੍ਤਿ ਛਰਤ੍ਤਿਯੋ ਸਮਾਹਟਾਤਿ ਛਾਰਤ੍ਤਂ, ਸਮਾਹਾਰੇ ਦਿਗੁ. ‘‘ਛਰਤ੍ਤ’’ਨ੍ਤਿ ਵਤ੍ਤਬ੍ਬੇ ਸੁਖੁਚ੍ਚਾਰਣਤ੍ਥਂ ਛਕਾਰਸ੍ਸ ਦੀਘਂ ਕਤ੍ਵਾ ਏਵਂ ਵੁਤ੍ਤਂ, ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ.
ਅਪ੍ਪਟਿਚ੍ਛਨ੍ਨਾਪਤ੍ਤਿਂ ਦਾਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਇਮਿਨਾ ਹੇਟ੍ਠਾ ਵੁਤ੍ਤਂ ਪਟਿਚ੍ਛਨ੍ਨਮਾਨਤ੍ਤਂ ਇਮਸ੍ਮਿਂ ਪਟਿਚ੍ਛਨ੍ਨਮਾਨਤ੍ਤੇ ਸਮੋਧਾਨੇਤ੍ਵਾਪਿ ਦਾਤੁਂ ਵਟ੍ਟਤੀਤਿ ਦਸ੍ਸੇਤਿ. ਏਵਂ ਸਨ੍ਤੇਪਿ ਮੂਲਮਾਨਤ੍ਤਂ ਪਟਿਚ੍ਚ ਪਟਿਚ੍ਛਨ੍ਨਮਾਨਤ੍ਤਨ੍ਤਿ ਵੁਚ੍ਚਤਿ. ਕਥਂ ਦਾਤੁਂ ਵਟ੍ਟਤੀਤਿ ਯੋਜਨਾ.
ਅਸ੍ਸਾਤਿ ਮਾਨਤ੍ਤਂ ਯਾਚਨ੍ਤਸ੍ਸ. ਤਦਨੁਰੂਪਨ੍ਤਿ ਤਸ੍ਸ ਯਾਚਨਸ੍ਸ ਅਨੁਰੂਪਂ. ਸਚੇ ਪਟਿਚ੍ਛਨ੍ਨਾ ਦ੍ਵੇਤਿ ਏਤ੍ਥ ਦ੍ਵੇਤਿ ਨਿਦਸ੍ਸਨਮਤ੍ਤਂ ਤਤੋ ਅਤਿਰੇਕਮ੍ਪਿ ਗਹੇਤਬ੍ਬਤ੍ਤਾ. ਸਬ੍ਬਤ੍ਥਾਤਿ ਸਬ੍ਬੇਸੁ ਏਕਬਹੂਸੁ. ਤਦਨੁਰੂਪਮੇ ਵਾਤਿ ਤਸ੍ਸ ਮਾਨਤ੍ਤਦਾਨਸ੍ਸ ਅਨੁਰੂਪਮੇਵ. ਇਧ ਪਨਾਤਿ ਪਟਿਚ੍ਛਨ੍ਨਮਾਨਤ੍ਤੇ ਪਨ. ਇਤੀਤਿਆਦਿ ਨਿਗਮਨਂ. ਯਂ ਮਾਨਤ੍ਤਂ ਦਿਯ੍ਯਤੀਤਿ ਯੋਜਨਾ. ਏਤ੍ਥਾਤਿ ਪਟਿਚ੍ਛਨ੍ਨਮਾਨਤ੍ਤੇ.
ਅਵਸੇਸਾਤਿ ਅਪ੍ਪਟਿਚ੍ਛਨ੍ਨਪਰਿਵਾਸਪਟਿਚ੍ਛਨ੍ਨਪਰਿਵਾਸੇਹਿ ਅਵਸੇਸਾ. ਤਤ੍ਥਾਤਿ ਅਵਸੇਸੇਸੁ ਦ੍ਵੀਸੁ ਪਰਿਵਾਸੇਸੁ. ਅਧਮ੍ਮਿਕਮਾਨਤ੍ਤਚਾਰਾਵਸਾਨੇ ਅਨੁਞ੍ਞਾਤਪਰਿਵਾਸੋਤਿ ਸਮ੍ਬਨ੍ਧੋ. ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤੋਤਿ ਆਹ ‘‘ਇਮਸ੍ਮਿਂ ਵਤ੍ਥੁਸ੍ਮਿ’’ਨ੍ਤਿ. ਏਸਾਤਿ ਸੁਦ੍ਧਨ੍ਤੋ, ਦਾਤਬ੍ਬੋਤਿ ਸਮ੍ਬਨ੍ਧੋ. ਏਤਨ੍ਤਿ ਜਾਨਨਾਜਾਨਨਂ.
ਤਤ੍ਥਾਤਿ ਦ੍ਵੀਸੁ ਸੁਦ੍ਧਨ੍ਤੇਸੁ, ਚੂਲ਼ਸੁਦ੍ਧਨ੍ਤੋਤਿ ਵੁਚ੍ਚਤੀਤਿ ਸਮ੍ਬਨ੍ਧੋ. ਯੋਤਿ ਭਿਕ੍ਖੁ, ਵਦਤੀਤਿ ਸਮ੍ਬਨ੍ਧੋ. ਆਰੋਚਿਤਦਿਵਸਤੋਤਿ ਆਪਤ੍ਤਿਆਰੋਚਿਤਦਿਵਸਤੋ.
ਤਨ੍ਤਿ ਚੂਲ਼ਸੁਦ੍ਧਨ੍ਤਂ, ਪਰਿਵਸਨ੍ਤੇਨ ਪਰਿਵਸਿਤਬ੍ਬਨ੍ਤਿ ਸਮ੍ਬਨ੍ਧੋ. ਅਗ੍ਗਹੇਸੀਤਿ ਪਰਿਵਾਸਂ ਅਗ੍ਗਹੇਸਿ. ਅਞ੍ਞਨ੍ਤਿ ਗਹਿਤਮਾਸਤੋ ਅਞ੍ਞਂ. ‘‘ਪਰਿਵਾਸਦਾਨਕਿਚ੍ਚਂ ਨਤ੍ਥੀ’’ਤਿ ਇਮਿਨਾ ਪਰਿਵਾਸਗਹਣਕਿਚ੍ਚਮ੍ਪਿ ਨਤ੍ਥੀਤਿ ਦਸ੍ਸੇਤਿ ਗਣ੍ਹਨ੍ਤਸ੍ਸੇਵ ਦਾਤਬ੍ਬਤ੍ਤਾ, ਦੇਨ੍ਤਸ੍ਸੇਵ ਗਹੇਤਬ੍ਬਤ੍ਤਾ ਵਾ. ਉਦ੍ਧਮ੍ਪਿ ਆਰੋਹਤੀਤਿ ਪਰਿਵਾਸਗਹਣਕਾਲਤੋ ਅਞ੍ਞਮ੍ਪਿ ਕਾਲਂ ਪਰਿਵਸਿਤਬ੍ਬਤ੍ਤਾ ਉਦ੍ਧਮ੍ਪਿ ਆਰੋਹਤਿ. ਹੇਟ੍ਠਾਪਿ ਓਰੋਹਤੀਤਿ ਪਰਿਵਾਸਗਹਣਕਾਲਤੋ ਊਨਮ੍ਪਿ ਕਾਲਂ ਪਰਿਵਸਿਤਬ੍ਬਤ੍ਤਾ ਹੇਟ੍ਠਾਪਿ ਓਰੋਹਤਿ. ਇਦਨ੍ਤਿ ਆਰੋਹਨੋਰੋਹਨਂ. ਤਸ੍ਸਾਤਿ ਸੁਦ੍ਧਨ੍ਤਪਰਿਵਾਸਸ੍ਸ. ਏਕਮੇਵ ਪਟਿਚ੍ਚ ਦ੍ਵੇ, ਤਿਸ੍ਸੋ, ਸਮ੍ਬਹੁਲਾ ਵਾ ਭਵਨ੍ਤੀਤਿ ਆਹ ‘‘ਏਕਂ ਵਿਨਾ ਸਮ੍ਬਹੁਲਾਨਂ ਅਭਾਵਤੋ’’ਤਿ.
ਏਵਂ ਚੂਲ਼ਸੁਦ੍ਧਨ੍ਤਂ ਦਸ੍ਸੇਤ੍ਵਾ ਮਹਾਸੁਦ੍ਧਨ੍ਤਂ ਦਸ੍ਸੇਨ੍ਤੋ ਆਹ ‘‘ਯੋ ਪਨਾ’’ਤਿਆਦਿ. ਤਨ੍ਤਿ ਮਹਾਸੁਦ੍ਧਨ੍ਤਂ. ਯਾਵ ਯਤ੍ਤਕੋ ਉਪਸਮ੍ਪਦਦਿਵਸੋ ਹੋਤਿ, ਤਾਵ ਤਤ੍ਤਕਂ ਕਾਲਨ੍ਤਿ ਯੋਜਨਾ. ਉਦ੍ਧਂ ਨਾਰੋਹਤੀਤਿ ਉਦ੍ਧਂ ਆਰੋਹਨਕਾਲਸ੍ਸ ਅਭਾਵਤੋ ਉਦ੍ਧਂ ਨ ਆਰੋਹਤਿ. ਏਤ੍ਥਾਤਿ ਸੁਦ੍ਧਨ੍ਤਪਰਿਵਾਸੇ. ਅਯਂ ਸੁਦ੍ਧਨ੍ਤਪਰਿਵਾਸੋ ਨਾਮਾਤਿ ਨਿਗਮਨਂ.
ਤਤ੍ਥਾਤਿ ਤਿਵਿਧੇਸੁ ਸਮੋਧਾਨਪਰਿਵਾਸੇਸੁ. ‘‘ਓਧੁਨਿਤ੍ਵਾ ਸਮੋਦਹਿਤ੍ਵਾ ਦਾਤਬ੍ਬਪਰਿਵਾਸੋ’’ਤਿ ਇਮਿਨਾ ਓਧੁਨਿਤ੍ਵਾ ਸਮੋਧਾਨੇਤ੍ਵਾ ਦਾਤਬ੍ਬੋ ਪਰਿਵਾਸੋ ਓਧਾਨਸਮੋਧਾਨੋਤਿ ਵਚਨਤ੍ਥਂ ਦਸ੍ਸੇਤਿ, ‘‘ਪਰਿਵਾਸੋ’’ਤਿ ਇਮਿਨਾ ਤਦ੍ਧਿਤਣਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਏਤ੍ਥ ਚ ਅਵਧੁਨਿਯਤੇ, ਅਵਧੁਨਿਤਬ੍ਬਨ੍ਤਿ ਵਾ ਓਧਾਨਂ, ਸਂ ਏਕਤੋ ਓਦਹੀਯਤੇ ਸਮ੍ਪਿਣ੍ਡੀਯਤੇ, ਉਦਹਿਯਤਿ ਸਮ੍ਪਿਣ੍ਡਿਯਤੀਤਿ ਵਾ ਸਮੋਧਾਨਨ੍ਤਿ ਅਵਯਵਵਚਨਤ੍ਥੋ ਕਾਤਬ੍ਬੋ. ‘‘ਮਕ੍ਖੇਤ੍ਵਾ’’ਤਿ ਇਮਿਨਾ ਧੁਧਾਤੁਯਾ ਪਪ੍ਪੋਟਨਧਂਸਨਧੋਵਨਾਨਿ ਦਸ੍ਸੇਤਿ. ਸੋਤਿ ਓਧਾਨਸਮੋਧਾਨੋ, ਆਗਤੋਤਿ ਸਮ੍ਬਨ੍ਧੋ.
ਏਤ੍ਥਾਤਿ ਓਧਾਨਸਮੋਧਾਨੇ. ਯੋਤਿ ਭਿਕ੍ਖੁ, ਪਟਿਚ੍ਛਾਦੇਤੀਤਿ ਸਮ੍ਬਨ੍ਧੋ. ਪਰਿਵਸਨ੍ਤੋ ਵਾ ਮਾਨਤ੍ਤਾਰਹੋ ਵਾ ਮਾਨਤ੍ਤਂ ਚਰਨ੍ਤੋ ਵਾ ਅਬ੍ਭਾਨਾਰਹੋ ਵਾ ਯੋ ਭਿਕ੍ਖੂਤਿ ਯੋਜਨਾ. ‘‘ਪੁਰਿਮਾਯ ਆਪਤ੍ਤਿਯਾ’’ਤਿ ਪਦਂ ‘‘ਸਮਾ ਵਾ’’ਤਿ ਪਦੇ ਸਹਾਦਿਯੋਗੋ. ‘‘ਊਨਤਰਾ’’ਤਿਪਦੇ ਵਿਭਤ੍ਤਿਅਪਾਦਾਨਂ, ਅਨੁਮੇਯ੍ਯਵਿਸਯਅਪਾਦਾਨਂ ਵਾ. ‘‘ਅਦਿਵਸੇ ਕਤ੍ਵਾ’’ਤਿ ਇਮਿਨਾ ਓਧੁਨਿਤ੍ਵਾਤਿ ਏਤ੍ਥ ਧੁਧਾਤੁਯਾ ਯਥਾਵੁਤ੍ਤਤ੍ਥੇਯੇਵ ਦਸ੍ਸੇਤਿ. ਊਨਕਪਕ੍ਖਪਟਿਚ੍ਛਨ੍ਨਾਤਿ ਪਕ੍ਖਤੋ ਊਨਕੇਨ ਪਟਿਚ੍ਛਨ੍ਨਾ. ਏਤੇਨੁਪਾਯੇਨਾਤਿ ਪਕ੍ਖੇ ਵੁਤ੍ਤੇਨ ਏਤੇਨ ਉਪਾਯੇਨ.
ਤਤ੍ਥਾਤਿ ਮੂਲਾਪਤ੍ਤਿਤੋ ਅਤਿਰੇਕਪਟਿਚ੍ਛਨ੍ਨੇ. ਆਵਿ ਕਾਰਾਪੇਤ੍ਵਾਤਿ ਮੂਲਾਪਤ੍ਤਿਤੋ ਅਨ੍ਤਰਾਪਤ੍ਤਿਯਾ ਪਟਿਚ੍ਛਨ੍ਨਭਾਵਂ ਆਵਿ ਕਾਰਾਪੇਤ੍ਵਾ. ਏਤ੍ਥਾਤਿ ਆਪਤ੍ਤਿਪਟਿਚ੍ਛਨ੍ਨੇ. ਪਮਾਣਨ੍ਤਿ ਕਾਰਣਂ. ਯਾਤਿ ਆਪਤ੍ਤਿ. ਤਤ੍ਥਾਤਿ ਮੂਲਭਾਵੇਨ ਕਤ੍ਤਬ੍ਬਾਯਂ ਮੂਲਿਆਪਤ੍ਤਿਯਂ. ਇਤਰਨ੍ਤਿ ਮੂਲਿਭਾਵੇਨ ਕਤ੍ਤਬ੍ਬਂ ਮੂਲਾਪਤ੍ਤਿਂ. ਸਮੋਧਾਯਾਤਿ ਸਮੋਦਹਿਤ੍ਵਾ. ਪਕ੍ਖਿਪਿਤ੍ਵਾਤਿ ਅਤ੍ਥੋ.
ਏਕਾ ਵਾ ਯਾ ਆਪਤ੍ਤਿ ਸਬ੍ਬਚਿਰਪਟਿਚ੍ਛਨ੍ਨਾ ਹੋਤੀਤਿ ਯੋਜਨਾ. ਸਬ੍ਬਚਿਰਪਟਿਚ੍ਛਨ੍ਨਾਯੋਤਿ ਸਬ੍ਬਾਸਂ ਆਪਤ੍ਤੀਨਂ ਚਿਰੇਨ ਪਟਿਚ੍ਛਨ੍ਨਾਯੋ. ਤਾਸਨ੍ਤਿ ਆਪਤ੍ਤੀਨਂ. ਅਗ੍ਘੇਨਾਤਿ ਪਰਿਚ੍ਛੇਦੇਨ. ਅਗ੍ਘਸਦ੍ਦੋ ਹੇਤ੍ਥ ਪਰਿਚ੍ਛੇਦਤ੍ਥਵਾਚਕੋ. ਅਭਿਧਾਨੇ (ਅਭਿਧਾਨਪ੍ਪਦੀਪਿਕਾਯਂ ੧੦੪੮ ਗਾਥਾਯਂ) ਵੁਤ੍ਤਂ ‘‘ਅਗ੍ਘੋ ਮੁਲ੍ਯੇ ਚ ਪੂਜਨੇ’’ਤਿ. ਏਤ੍ਥ ‘‘ਮੁਲ੍ਯੇ ਚਾ’’ਤਿ ਪਦਸ੍ਸ ਮੂਲਪਰਿਚ੍ਛੇਦੇਤਿ ਅਤ੍ਥੋ ਦਟ੍ਠਬ੍ਬੋ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਤਾਸਂ ਰਤ੍ਤਿਪਰਿਚ੍ਛੇਦਵਸੇਨਾ’’ਤਿ. ਇਮੇਹਿ ਪਦੇਹਿ ਅਗ੍ਘੇਨ ਰਤ੍ਤਿਪਰਿਚ੍ਛੇਦੇਨ ਸਮੋਧਾਨੇਤ੍ਵਾ ਦਾਤਬ੍ਬੋ ਪਰਿਵਾਸੋ ਅਗ੍ਘਸਮੋਧਾਨੋਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਚ ‘‘ਸਬ੍ਬਚਿਰਪਟਿਚ੍ਛਨ੍ਨਾਯੋ’’ਤਿ ਵੁਤ੍ਤਤ੍ਤਾ ਕਿਞ੍ਚਾਪਿ ਕੋਟਿਅਤ੍ਥਵਾਚਕੋ ਤਤਿਯਕ੍ਖਰੇਨ ਪਾਠੋ ਯੁਤ੍ਤੋ ਵਿਯ ਦਿਸ੍ਸਤਿ. ਤਥਾਪਿ ਸੋ ਪਾਠੋ ਨ ਗਹੇਤਬ੍ਬੋ. ਕਸ੍ਮਾ? ਬਹੂਸੁ ਪਾਲ਼ਿਪੋਤ੍ਥਕੇਸੁ, ਅਟ੍ਠਕਥਾਪੋਤ੍ਥਕੇਸੁ ਚ ਅਲਿਖਿਤਤ੍ਤਾ. ਬਹੂਸੁ ਹਿ ਪੋਰਾਣਪੋਤ੍ਥਕੇਸੁ ਚਤੁਤ੍ਥਕ੍ਖਰੇਨ ਪਾਠੋਯੇਵ ਲਿਖਿਤੋ, ਤਸ੍ਮਾ ਸੋ ਪਾਠੋਯੇਵ ਗਹੇਤਬ੍ਬੋ, ਨ ਅਞ੍ਞੋਤਿ ਦਟ੍ਠਬ੍ਬਂ. ਸੋਤਿ ਅਗ੍ਘਸਮੋਧਾਨੋ. ਆਗਤੋਯੇਵਾਤਿ ਸਮ੍ਬਨ੍ਧੋ.
ਯਸ੍ਸ ਪਨਾਤਿ ਭਿਕ੍ਖੁਸ੍ਸ, ਪਟਿਚ੍ਛਨ੍ਨਾਤਿ ਸਮ੍ਬਨ੍ਧੋ. ਸਬ੍ਬਨ੍ਤਿ ਸਕਲਂ. ਆਪਤ੍ਤਿਸਹਸ੍ਸਗਾਥਾਯ –
ਦਸਸਤਂ ਆਪਤ੍ਤਿਯੋ ਰਤ੍ਤਿਸਤਂ ਛਾਦਯਿਤ੍ਵਾਨਾਤਿ ਯੋਜਨਾ. ਇਮਿਨਾ ਨਯੇਨਪਿ ਅਗ੍ਘਸਮੋਧਾਨੋਤਿ ਏਤ੍ਥ ਅਗ੍ਘਸਦ੍ਦਸ੍ਸ ਚਤੁਤ੍ਥਕ੍ਖਰੇਨ ਪਾਠਸ੍ਸ ਯੁਤ੍ਤਭਾਵੋ ਵੇਦਿਤਬ੍ਬੋ. ਅਗ੍ਘੇਨ ਦਸਰਤ੍ਤਿਪਰਿਚ੍ਛੇਦੇਨ ਸਮੋਧਾਯ ਦਾਤਬ੍ਬੋ ਅਗ੍ਘਸਮੋਧਾਨੋ.
ਯੋ ਪਰਿਵਾਸੋ ਨਾਨਾਵਤ੍ਥੁਕਾਯੋ ਆਪਤ੍ਤਿਯੋ ਏਕਤੋ ਕਤ੍ਵਾ ਦਿਯ੍ਯਤਿ, ਅਯਂ ਪਰਿਵਾਸੋ ਮਿਸ੍ਸਕਸਮੋਧਾਨੋ ਨਾਮਾਤਿ ਯੋਜਨਾ. ਏਤ੍ਥ ਵਤ੍ਥੁਵਸੇਨ ਮਿਸ੍ਸਕਾ ਆਪਤ੍ਤਿਯੋ ਸਮੋਧਾਨੇਤ੍ਵਾ ਦਾਤਬ੍ਬੋ ਪਰਿਵਾਸੋ ਮਿਸ੍ਸਕਸਮੋਧਾਨੋਤਿ ਵਚਨਤ੍ਥੋ ਕਾਤਬ੍ਬੋ. ਤਤ੍ਰਾਤਿ ਮਿਸ੍ਸਕਸਮੋਧਾਨੇ. ਤਦਨੁਰੂਪਾਯਾਤਿ ਤਸ੍ਸ ਯਾਚਨਸ੍ਸ ਅਨੁਰੂਪਾਯ.
ਏਤ੍ਥ ਚਾਤਿ ਮਿਸ੍ਸਕਸਮੋਧਾਨੇ ਚ, ਕਾਤੁਂ ਵਟ੍ਟਤੀਤਿ ਸਮ੍ਬਨ੍ਧੋ.
‘‘ਪਕ੍ਖਮਾਨਤ੍ਤਞ੍ਚ …ਪੇ… ਕਥਯਿਸ੍ਸਾਮਾ’’ਤਿ ਯਂ ਵਚਨਂ ਵੁਤ੍ਤਂ, ਤਸ੍ਸ ਵਚਨਸ੍ਸ ਓਕਾਸੋਤਿ ਯੋਜਨਾ. ਤਂ ਪਨਾਤਿ ਪਕ੍ਖਮਾਨਤ੍ਤਂ ਪਨ. ‘‘ਅਡ੍ਢਮਾਸਮੇਵ ਦਾਤਬ੍ਬ’’ਨ੍ਤਿ ਇਮਿਨਾ ਪਕ੍ਖਮੇਵ ਦਾਤਬ੍ਬਂ ਮਾਨਤ੍ਤਂ ਪਕ੍ਖਮਾਨਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਹੀਤਿ ਸਚ੍ਚਂ. ਤਂ ਪਨਾਤਿ ਪਕ੍ਖਮਾਨਤ੍ਤਂ ਪਨ, ਦਾਤਬ੍ਬਨ੍ਤਿ ਸਮ੍ਬਨ੍ਧੋ. ਅਤ੍ਤਨੋ ਸੀਮਨ੍ਤਿ ਅਤ੍ਤਨੋ ਵਿਹਾਰਸੀਮਂ, ਮਹਾਸੀਮਨ੍ਤਿ ਅਤ੍ਥੋ. ਸੋਧੇਤ੍ਵਾਤਿ ਸਬ੍ਬਾਸਂ ਹਤ੍ਥਪਾਸਨਯਨਵਸੇਨ, ਛਨ੍ਦਾਰਹਾਨਂ ਛਨ੍ਦਨਯਨਵਸੇਨ, ਸੀਮਤੋ ਬਹਿਕਰਣਵਸੇਨ ਚ ਸੋਧੇਤ੍ਵਾ. ਚਤੁਵਗ੍ਗਗਣਨ੍ਤਿ ਚਤੁਵਗ੍ਗਸਙ੍ਘਂ. ਗਣੋਤਿ ਚੇਤ੍ਥ ਸਙ੍ਘੋਯੇਵਾਧਿਪ੍ਪੇਤੋ.
ਤਤ੍ਰਾਤਿ ‘‘ਯੋਜਨਾ ਕਾਤਬ੍ਬਾ’’ਤਿ ਵਚਨੇ. ਮੁਖਮਤ੍ਤਦਸ੍ਸਨਨ੍ਤਿ ਉਪਾਯਮਤ੍ਤਦਸ੍ਸਨਂ, ਆਦਿਮਤ੍ਤਦਸ੍ਸਨਂ ਵਾ. ‘‘ਆਪਨ੍ਨਾਯ ਭਿਕ੍ਖੁਨਿਯਾ’’ਤਿ ਪਦਂ ‘‘ਏਵਮਸ੍ਸ ਵਚਨੀਯੋ’’ਤਿ ਪਦੇ ਕਤ੍ਤਾ, ‘‘ਯਾਚਾਪੇਤ੍ਵਾ’’ਤਿ ਪਦੇ ਕਾਰਿਤਕਮ੍ਮਂ. ‘‘ਬ੍ਯਤ੍ਤਾਯ ਭਿਕ੍ਖੁਨਿਯਾ’’ਤਿ ਪਦਂ ‘‘ਞਾਪੇਤਬ੍ਬੋ’’ਤਿ ਪਦੇ ਕਾਰਿਤਕਤ੍ਤਾ, ‘‘ਸਙ੍ਘੋ’’ਤਿ ਪਦਂ ਤਤ੍ਥੇਵ ਕਾਰਿਤਕਮ੍ਮਂ. ‘‘ਏਤਂ ਕਾਰਣ’’ਨ੍ਤਿ ਧਾਤੁਕਮ੍ਮਂ ਅਜ੍ਝਾਹਰਿਤਬ੍ਬਂ. ਤਬ੍ਬਪਚ੍ਚਯੇਨ ਕਾਰਿਤਕਮ੍ਮਮੇਵ ਵੁਤ੍ਤਂ. ਞਾਪੇਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਸੁਣਾਤੁ ਮੇ’’ਤਿਆਦਿ.
ਨਿਕ੍ਖਿਤ੍ਤਵਤ੍ਤਨ੍ਤਿ ਕਰਣਤ੍ਥੇ ਚੇਤਂ ਉਪਯੋਗਵਚਨਂ. ਨਿਕ੍ਖਿਤ੍ਤਵਤ੍ਤੇਨਾਤਿ ਹਿ ਅਤ੍ਥੋ. ਤਤ੍ਥੇਵਾਤਿ ਮਾਲ਼ਕਸੀਮਾਯਮੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਸ੍ਸਾਤਿ ਮਾਨਤ੍ਤਚਾਰਿਕਾਯ ਭਿਕ੍ਖੁਨਿਯਾ. ਤਤ੍ਰਾਤਿ ਤਸ੍ਮਾ ਕਤ੍ਤਬ੍ਬਵਿਨਯਕਮ੍ਮਭਾਵਤੋਤਿ ਅਤ੍ਥੋ. ਨੋਤਿ ਅਮ੍ਹਾਕਂ, ਸਨ੍ਤਿਕਨ੍ਤਿ ਸਮ੍ਬਨ੍ਧੋ. ਚਤੂਹਿ ਪਕਤਤ੍ਤਭਿਕ੍ਖੁਨੀਹਿ ਨਿਸੀਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਗਾਮੂਪਚਾਰਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾਤਿ ਇਦਂ ਭਿਕ੍ਖੁਨੀਵਿਹਾਰੂਪਚਾਰਾਤਿਕ੍ਕਮਂ ਸਨ੍ਧਾਯ ਵੁਤ੍ਤਂ. ਵਿਹਾਰੂਪਚਾਰਤੋਪੀਤਿ ਭਿਕ੍ਖੁਵਿਹਾਰੂਪਚਾਰਤੋਪਿ. ਤਤ੍ਥਾਤਿ ਭਿਕ੍ਖੁਨੀਨਂ ਨਿਸਿਨ੍ਨਟ੍ਠਾਨਂ. ਕੁਰੁਨ੍ਦਿਮਹਾਪਚ੍ਚਰੀਸੁ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਵਿਹਾਰਸ੍ਸ ਚਾਤਿ ਭਿਕ੍ਖੁਵਿਹਾਰਸ੍ਸ ਚ. ਗਾਮਸ੍ਸ ਉਪਚਾਰਂ ਮੁਞ੍ਚਿਤੁਂ ਵਟ੍ਟਤੀਤਿ ਨ ਵੁਤ੍ਤਨ੍ਤਿ ਯੋਜਨਾ. ਤਸ੍ਮਾ ਗਾਮੂਪਚਾਰੇਪਿ ਨਿਸੀਦਿਤੁਂ ਵਟ੍ਟਤੀਤਿ ਅਧਿਪ੍ਪਾਯੋ.
ਤਾਯ ਭਿਕ੍ਖੁਨਿਯਾ ਆਰੋਚੇਤਬ੍ਬਨ੍ਤਿ ਸਮ੍ਬਨ੍ਧੋ.
ਤਤ੍ਥੇਵਾਤਿ ਭਿਕ੍ਖੁਨੀਨਂ ਨਿਸੀਦਨਟ੍ਠਾਨੇਯੇਵ. ਠਾਨਨ੍ਤਿ ਭਿਕ੍ਖੂਨਂ ਠਾਨਂ. ਏਤੀਤਿ ਆਗਚ੍ਛਤਿ. ਪਗੇਵਾਤਿ ਪਾਤੋਯੇਵ. ਤਾਯਾਤਿ ਮਾਨਤ੍ਤਚਾਰਿਨਿਯਾ.
ਅਨਿਕ੍ਖਿਤ੍ਤਵਤ੍ਤਾਯ ਪਨ ਭਿਕ੍ਖੁਨਿਯਾਤਿ ਸਮ੍ਬਨ੍ਧੋ. ਅਜਾਨਨਪਚ੍ਚਯਾਤਿ ਅਜਾਨਨਕਾਰਣਾ. ਤਨ੍ਤਿ ਵਚਨਂ. ਪਾਰਿਵਾਸਿਕਵਤ੍ਤਾਦੀਨਨ੍ਤਿ ਆਦਿਸਦ੍ਦੇਨ ਆਗਨ੍ਤੁਕਵਤ੍ਤਪੂਰਣਨਿਸ੍ਸਯਪਟਿਪ੍ਪਸ੍ਸਦ੍ਧਾਦਯੋ ਸਙ੍ਗਣ੍ਹਾਤਿ. ਯੁਤ੍ਤਤਰਂ ਦਿਸ੍ਸਤੀਤਿ ਯੁਤ੍ਤਤਰਂ ਹੁਤ੍ਵਾ ਦਿਸ੍ਸਤਿ. ਇਮਿਨਾ ਅਨਿਕ੍ਖਿਤ੍ਤਵਤ੍ਤਭਿਕ੍ਖੁਨਾ ਵਿਯ ਭਿਕ੍ਖੁਨਿਯਾਪਿ ਅਨ੍ਤੋਉਪਚਾਰਸੀਮਗਤਾਨਂਯੇਵ ਆਰੋਚੇਤਬ੍ਬਂ, ਨ ਗਾਮੇ ਠਿਤਾਨਮ੍ਪਿ ਗਨ੍ਤ੍ਵਾ ਆਰੋਚੇਤਬ੍ਬਨ੍ਤਿ ਦੀਪੇਤਿ. ਉਪੋਸਥੇਤਿ ਉਪੋਸਥਦਿਵਸੇ. ਏਸੇਵ ਨਯੋ ਪਵਾਰਣਾਯਪਿ. ਦੇਵਸਿਕਨ੍ਤਿ ਦਿਵਸੇ ਦਿਵਸੇ. ਤਸ੍ਮਿਂ ਗਾਮੇਤਿ ਭਿਕ੍ਖੁਨੀਨਂ ਵਸਨਗਾਮੇ. ਅਞ੍ਞਤ੍ਰਾਤਿ ਭਿਕ੍ਖੁਨੀਨਂ ਵਸਨਗਾਮਤੋ ਅਞ੍ਞਸ੍ਮਿਂ ਗਾਮੇ. ਤਤ੍ਰਾਤਿ ਭਿਕ੍ਖੁਨੀਨਂ ਵਸਨਗਾਮਂ. ਦਸ੍ਸੇਤ੍ਵਾਤਿ ਭਿਕ੍ਖੁਨੀਨਂ ਦਸ੍ਸੇਤ੍ਵਾ. ਤਾਯਾਤਿ ਮਾਨਤ੍ਤਚਾਰਿਨਿਯਾ. ਵਿਹਾਰਨ੍ਤਿ ਭਿਕ੍ਖੂਨਂ ਵਿਹਾਰਂ. ਉਪਚਾਰਸੀਮਾਯਾਤਿ ਉਪਚਾਰਸੀਮਤੋ ਬਹੀਤਿ ਸਮ੍ਬਨ੍ਧੋ. ਅਯਨ੍ਤਿ ਮਾਨਤ੍ਤਚਾਰਿਨੀ.
ਵੀਸਤਿ ਗਣੋ ਇਮਸ੍ਸਾਤਿ ਵੀਸਤਿਗਣੋ, ਸਙ੍ਘੋ, ਤਸ੍ਮਿਂ. ਮਾਨਤ੍ਤਂ ਚਰਮਾਨਾ ਭਿਕ੍ਖੁਨੀਤਿ ਯੋਜਨਾ. ਇਦਂ ਪਕ੍ਖਮਾਨਤ੍ਤਂ ਨਾਮਾਤਿ ਇਦਂ ਪੁਬ੍ਬਵਚਨਸ੍ਸ ਨਿਗਮਵਸੇਨ ਪਰਵਚਨਸ੍ਸ ਕਥਨਤ੍ਥਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ.
ਤਤ੍ਥਾਤਿ ਤਿਵਿਧੇਸੁ ਮਾਨਤ੍ਤੇਸੁ. ਯਦੇਤਂ ਮਾਨਤ੍ਤਂ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ਪਰਤੋਤਿ ਪਰਸ੍ਮਿਂ. ਪਰਿਵਾਸਂ ਪਰਿਵਸਨ੍ਤਸ੍ਸ ਮੂਲਾਯਪਟਿਕਸ੍ਸਿਤਸ੍ਸ ਉਦਾਯਿਤ੍ਥੇਰਸ੍ਸ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ਆਪਜ੍ਜਿਤ੍ਵਾਤਿ ਆਪਜ੍ਜਨਤੋ. ਇਦਨ੍ਤਿ ਮਾਨਤ੍ਤਂ ਵੁਚ੍ਚਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਓਧਾਨਸਮੋਧਾਨਨ੍ਤਿ ਏਤ੍ਥ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਤਮ੍ਪੀਤਿ ਕੁਰੁਨ੍ਦਿਯਂ ਵੁਤ੍ਤਵਚਨਮ੍ਪਿ.
ਤਨ੍ਤਿ ਅਗ੍ਘਸਮੋਧਾਨਮਿਸ੍ਸਕਸਮੋਧਾਨਂ, ਦਾਤਬ੍ਬਨ੍ਤਿ ਸਮ੍ਬਨ੍ਧੋ. ਏਤ੍ਤਾਵਤਾਤਿ ਏਤਪਰਿਮਾਣੇਨ ਵਚਨਕ੍ਕਮੇਨ, ‘‘ਅਯਞ੍ਹਿ ਇਧ ਅਧਿਪ੍ਪੇਤੋ ਪਰਿਵਾਸੋ ਨਾਮਾ’’ਤਿ (ਚੂਲ਼ਵ. ਅਟ੍ਠ. ੧੦੨) ਵਚਨਤੋ ਪਟ੍ਠਾਯ ਯਾਵ ‘‘ਯੋਜੇਤ੍ਵਾ ਦਾਤਬ੍ਬ’’ਨ੍ਤਿ ਵਚਨਂ, ਤਾਵ ਵਚਨਕ੍ਕਮੇਨਾਤਿ ਅਤ੍ਥੋ. ‘‘ਤੇਨ ਹਿ ਭਿਕ੍ਖਵੇ…ਪੇ… ਦਸ੍ਸੇਸ੍ਸਾਮਾ’’ਤਿ ਯਂ ਵਚਨਂ ਵੁਤ੍ਤਨ੍ਤਿ ਯੋਜਨਾ. ‘‘ਅਤ੍ਥਤੋ’’ਤਿ ਇਮਿਨਾ ਸਦ੍ਦੋਪਿ ਗਹੇਤਬ੍ਬੋ ਅਵਿਨਾਭਾਵਤੋ.
ਪਟਿਚ੍ਛਨ੍ਨਪਰਿਵਾਸਕਥਾ
੧੦੨. ਯਾ ਪਾਲ਼ਿ ਵੁਤ੍ਤਾਤਿ ਸਮ੍ਬਨ੍ਧੋ.
੧੦੮. ਤਤੋਤਿ ਪਾਲ਼ਿਤੋ. ਤਂ ਆਪਤ੍ਤਿਨ੍ਤਿ ਤਂ ਅਨ੍ਤਰਾਪਤ੍ਤਿਂ. ਅਸ੍ਸਾਤਿ ਭਿਕ੍ਖੁਸ੍ਸ. ਨਿਕ੍ਖਿਤ੍ਤਵਤ੍ਤੋ ਭਿਕ੍ਖੂਤਿ ਸਮ੍ਬਨ੍ਧੋ, ਹੁਤ੍ਵਾਤਿ ਵਾ. ਸੋਤਿ ਭਿਕ੍ਖੁ, ਠਿਤੋ ਹੁਤ੍ਵਾਤਿ ਸਮ੍ਬਨ੍ਧੋ. ਤਸ੍ਸਾ ਆਪਤ੍ਤਿਯਾਤਿ ਤਸ੍ਸਾ ਅਨ੍ਤਰਾਪਤ੍ਤਿਯਾ. ਪਟਿਚ੍ਛਨ੍ਨਾ ਹੋਤੀਤਿ ਅਨ੍ਤਰਾਪਤ੍ਤਿਪਿ ਪਟਿਚ੍ਛਨ੍ਨਾ ਹੋਤਿ. ਤਸ੍ਮਿਮ੍ਪੀਤਿ ਮੂਲਾਯ ਪਟਿਕਸ੍ਸਨੇਪਿ. ਮਕ੍ਖਿਤਾਤਿ ਪਿਸਿਤਾ, ਧਂਸਿਤਾ ਵਾ. ਮਕ੍ਖਿਯਨ੍ਤਿ ਪਿਸਿਯਨ੍ਤਿ, ਧਂਸਿਯਨ੍ਤੀਤਿ ਵਾ ਮਕ੍ਖਿਤਾ, ਪਰਿਵੁਤ੍ਥਦਿਵਸਾ. ਤਤੋਤਿ ਪਾਲ਼ਿਤੋ ਪਰਨ੍ਤਿ ਸਮ੍ਬਨ੍ਧੋ. ਪਰਤੋਪਿ ਏਸੇਵ ਨਯੋ. ਏਵਨ੍ਤਿਆਦਿ ਨਿਗਮਨਂ. ਪਟਿਚ੍ਛਨ੍ਨਵਾਰੇ ਦਸ੍ਸਿਤਾ ਹੋਨ੍ਤੀਤਿ ਸਮ੍ਬਨ੍ਧੋ.
ਸਮੋਧਾਨਪਰਿਵਾਸਕਥਾ
੧੨੫. ਤਤੋਤਿ ਪਟਿਚ੍ਛਨ੍ਨਵਾਰਤੋ, ਪਰਂ ਦਸ੍ਸਿਤਨ੍ਤਿ ਸਮ੍ਬਨ੍ਧੋ. ਏਤ੍ਥ ਚਾਤਿ ਏਤਸ੍ਮਿਂ ਵਾਰੇ ਚ. ਯਸ੍ਮਾਤਿ ਯਸ੍ਮਾ ਕਾਰਣਾ, ਯੇਨ ਕਾਰਣੇਨ ਵਾ. ਤੇਨੇਵਾਤਿ ਤੇਨੇਵ ਕਾਰਣੇਨ, ਤਸ੍ਮਾ ਕਾਰਣਾ ਵਾ, ‘‘ਮੂਲਾਯ…ਪੇ… ਦੇਤੂ’’ਤਿ ਵੁਤ੍ਤਨ੍ਤਿ ਯੋਜਨਾ. ਤਸ੍ਮਾ ਸਬ੍ਬੇ ਮਕ੍ਖਿਤਾਵ ਹੋਨ੍ਤੀਤਿ ਯੋਜਨਾ. ਤਤੋਤਿ ਵਾਰਤੋ ਪਰਂ ਨਿਟ੍ਠਾਪਿਤਨ੍ਤਿ ਸਮ੍ਬਨ੍ਧੋ.
ਅਗ੍ਘਸਮੋਧਾਨਪਰਿਵਾਸਕਥਾ
੧੩੪. ਤਤੋਤਿ ਵਾਰਤੋ ਪਰਂ ਦਸ੍ਸਿਤੋਤਿ ਸਮ੍ਬਨ੍ਧੋ. ਤਤੋਤਿ ਵਾਰਤੋ ਪਰਂ ਪਾਲ਼ਿ ਠਪਿਤਾਤਿ ਸਮ੍ਬਨ੍ਧੋ. ਲਜ੍ਜਿਧਮ੍ਮੇ ਵਾ ਉਪ੍ਪਨ੍ਨੇਤਿ ਸਮ੍ਬਨ੍ਧੋ. ਯਨ੍ਤਿ ਕਮ੍ਮਂ. ਤਤੋਤਿ ਵਾਰਤੋ ਪਰਂ ਤਥੇਵ ਪਾਲ਼ਿ ਠਪਿਤਾਤਿ ਸਮ੍ਬਨ੍ਧੋ.
੧੩੮. ਤਤੋਤਿ ਵਾਰਤੋ ਪਰਂ ਪੁਰਿਮਨਯੇਨੇਵ ਪਾਲ਼ਿ ਠਪਿਤਾਤਿ ਸਮ੍ਬਨ੍ਧੋ.
ਸੁਦ੍ਧਨ੍ਤਪਰਿਵਾਸਾਦਿਕਥਾ
੧੫੬. ਤਤੋਤਿ ਵਾਰਤੋ ਪਰਂ ਸੁਦ੍ਧਨ੍ਤਪਰਿਵਾਸੋ ਦਸ੍ਸਿਤੋਤਿ ਸਮ੍ਬਨ੍ਧੋ.
੧੬੦. ਤਤੋਤਿ ਪਾਲ਼ਿਤੋ ਪਰਂ ਪਾਲ਼ਿ ਠਪਿਤਾਤਿ ਸਮ੍ਬਨ੍ਧੋ.
੧੬੫. ਤਤ੍ਥਾਤਿ ਪਾਲ਼ਿਯਂ. ਅਨ੍ਤਰਾ…ਪੇ… ਅਪ੍ਪਟਿਚ੍ਛਨ੍ਨਾਯੋਤਿਆਦੀਸੁ ਅਤ੍ਥੋ ਦਟ੍ਠਬ੍ਬੋਤਿ ਸਮ੍ਬਨ੍ਧੋ.
੧੬੬. ਪਚ੍ਛਿਮਸ੍ਮਿਂ ਆਪਤ੍ਤਿਕ੍ਖਨ੍ਧੇਤਿ ਏਤ੍ਥ ਆਪਤ੍ਤਿਕ੍ਖਨ੍ਧਸ੍ਸ ਭੇਦਭਾਵਤੋ ਕਿਂ ‘‘ਪਚ੍ਛਿਮਸ੍ਮਿਂ ਆਪਤ੍ਤਿਕ੍ਖਨ੍ਧੇ’’ਤਿ ਵੁਤ੍ਤਨ੍ਤਿ ਆਹ ‘‘ਏਕੋਵ ਸੋ ਆਪਤ੍ਤਿਕ੍ਖਨ੍ਧੋ’’ਤਿ. ਅਥ ਕਸ੍ਮਾ ‘‘ਪਚ੍ਛਿਮਸ੍ਮਿਂ ਆਪਤ੍ਤਿਕ੍ਖਨ੍ਧੇ’’ਤਿ ਵੁਤ੍ਤਨ੍ਤਿ ਆਹ ‘‘ਪਚ੍ਛਾ ਛਾਦਿਤਤ੍ਤਾ ਪਨਾ’’ਤਿਆਦਿ. ਏਤ੍ਥ ਪਨਸਦ੍ਦੋ ਗਰਹਤ੍ਥਵਾਚਕੋ, ਤਥਾਪੀਤਿ ਹਿ ਅਤ੍ਥੋ. ਏਕੋਪਿ ਆਪਤ੍ਤਿਕ੍ਖਨ੍ਧੋ ਪਚ੍ਛਾ ਛਾਦਿਤਤ੍ਤਾ ਪਚ੍ਛਿਮਸ੍ਮਿਂ ਆਪਤ੍ਤਿਕ੍ਖਨ੍ਧੇਤਿ ਵੁਤ੍ਤਨ੍ਤਿ ਅਧਿਪ੍ਪਾਯੋ.
੧੮੦. ‘‘ਵਵਤ੍ਥਿਤਾ ਸਮ੍ਭਿਨ੍ਨਾ’’ਤਿ ਏਤਂ ਵਚਨਨ੍ਤਿ ਯੋਜਨਾ.
੮. ਦ੍ਵੇਭਿਕ੍ਖੁਵਾਰਏਕਾਦਸਕਾਦਿਕਥਾ
੧੮੧. ਤਤੋਤਿ ਪਾਲ਼ਿਤੋ ਪਰਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਪਾਲ਼ਿਯਂ. ਮਿਸ੍ਸਕਨ੍ਤਿ ਏਤ੍ਥ ਕੇਹਿ ਮਿਸ੍ਸਕਨ੍ਤਿ ਆਹ ‘‘ਥੁਲ੍ਲਚ੍ਚਯਾਦੀਹਿ ਮਿਸ੍ਸਕ’’ਨ੍ਤਿ.
੧੮੪. ਤਤੋਤਿ ਪਾਲ਼ਿਤੋ ਪਰਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਇਧ ਪਨ ਭਿਕ੍ਖਵੇ’’ਤਿਆਦਿਪਾਠੇ. ਤਞ੍ਚਾਤਿ ‘‘ਇਧ ਪਨ ਭਿਕ੍ਖਵੇ’’ਤਿਆਦਿਵਚਨਞ੍ਚ ਇਤੋ ਪੁਬ੍ਬੇ ਅਵੁਤ੍ਤਂ ਸਬ੍ਬਂ ਵਚਨਞ੍ਚਾਤਿ ਯੋਜਨਾ.
ਇਤਿ ਸਮੁਚ੍ਚਯਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.
੪. ਸਮਥਕ੍ਖਨ੍ਧਕਂ
੧. ਸਮ੍ਮੁਖਾਵਿਨਯਕਥਾ
੧੮੬-੭. ਸਮਥਕ੍ਖਨ੍ਧਕੇ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਛ ਮਾਤਿਕਾਪਦਾਨੀਤਿ ਵਾਕ੍ਯਮ੍ਪਿ ਸਮਾਸੋਪਿ ਯੁਤ੍ਤੋਯੇਵ. ਤਤ੍ਥ ਸਮਾਸੋ ਪਨ ਅਸਮਾਹਾਰਦਿਗੁਯੇਵ. ‘‘ਨਿਕ੍ਖਿਪਿਤ੍ਵਾ’’ਤਿ ਪਦਂ ‘‘ਵੁਤ੍ਤੋ’’ਤਿ ਪਦੇ ਪੁਬ੍ਬਕਾਲਕਿਰਿਯਾਵਿਸੇਸਨਂ, ਤੁਲ੍ਯਤ੍ਥੋ ਵਾ. ਵਿਤ੍ਥਾਰੋਤਿ ਵਿਭਙ੍ਗੋ. ਤਤ੍ਥਾਤਿ ਵਿਭਙ੍ਗੇ. ਸਞ੍ਞਾਪੇਤੀਤਿ ਏਤ੍ਥ ਸਞ੍ਞਂ ਕਤ੍ਵਾ ਜਾਨਾਪੇਤੀਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਪਰਿਤੋਸੇਤ੍ਵਾ ਜਾਨਾਪੇਤੀ’’ਤਿ. ਇਮਿਨਾ ਸਂਪੁਬ੍ਬੋ ਞਾਧਾਤੁ ਪਰਿਤੋਸਨਤ੍ਥਂ ਅਨ੍ਤੋਕਤ੍ਵਾ ਅਵਬੋਧਨਤ੍ਥੋ ਹੋਤੀਤਿ ਦਸ੍ਸੇਤਿ. ਕਾਰਣਪਤਿਰੂਪਕਾਨੀਤਿ ਕਾਰਣਸ੍ਸ ਪਟਿਭਾਗਾਨਿ. ਨਿਜ੍ਝਾਪੇਤੀਤਿ ਏਤ੍ਥ ਝੇਧਾਤੁ ਓਲੋਕਨਤ੍ਥੋਤਿ ਆਹ ‘‘ਓਲੋਕੇਤੀ’’ਤਿ. ਯਥਾਤਿ ਯੇਨਾਕਾਰੇਨ, ਕਰਿਯਮਾਨੇਤਿ ਸਮ੍ਬਨ੍ਧੋ. ਸੋਤਿ ਧਮ੍ਮਵਾਦੀ. ਪਰਤੋਪਿ ਏਸੇਵ ਨਯੋ. ‘‘ਪੁਨਪ੍ਪੁਨ’’ਨ੍ਤਿ ਇਮਿਨਾ ਅਨੁਪੇਕ੍ਖਤੀਤਿ ਏਤ੍ਥ ਅਨੁਸਦ੍ਦੋ ਨ ਉਪਚ੍ਛਿਨ੍ਨਤ੍ਥੋਤਿ ਦਸ੍ਸੇਤਿ. ਪੇਕ੍ਖਤਿ ਅਨੁਪੇਕ੍ਖਤੀਤਿ ਏਤ੍ਥ ਇਕ੍ਖਧਾਤੁ ‘‘ਦਸ੍ਸੇਤਿ ਅਨੁਦਸ੍ਸੇਤੀ’’ਤਿ ਏਤ੍ਥ ਦਿਸਧਾਤੁਯਾ ਸਦਿਸਤ੍ਥੋਤਿ ਆਹ ‘‘ਦਸ੍ਸੇਤਿ…ਪੇ… ਪਰਿਯਾਯਵਚਨਾਨੀ’’ਤਿ. ਤੇਸਞ੍ਞੇਵਾਤਿ ‘‘ਪੇਕ੍ਖਤਿ ਅਨੁਪੇਕ੍ਖਤੀ’’ਤਿ ਪਦਾਨਞ੍ਞੇਵ. ਪਰਿਯਾਯਵਚਨਾਨੀਤਿ ਵੇਵਚਨਸਦ੍ਦਾ ਅਤ੍ਥੇ ਪਰਿਬ੍ਯਤ੍ਤਿਂ ਅਯਨ੍ਤਿ ਗਚ੍ਛਨ੍ਤਿ ਇਮੇਹੀਤਿ ਪਰਿਯਾਯਾਨਿ, ਤਾਨਿਯੇਵ ਵਚਨਾਨਿ ਪਰਿਯਾਯਵਚਨਾਨਿ. ਸੋਤਿ ਅਧਮ੍ਮਵਾਦੀ. ਮੋਹੇਤ੍ਵਾਤਿ ਧਮ੍ਮਵਾਦੀਪੁਗ੍ਗਲਾਦਿਂ ਮੋਹਾਪੇਤ੍ਵਾ.
੧੮੮. ਧਮ੍ਮਵਾਦੀ ਪੁਗ੍ਗਲੋ ਦਸ੍ਸੇਤੀਤਿ ਸਮ੍ਬਨ੍ਧੋ. ਅਮੋਹੇਤ੍ਵਾਤਿ ਅਧਮ੍ਮਵਾਦੀਪੁਗ੍ਗਲਾਦਿਂ ਅਮੋਹਾਪੇਤ੍ਵਾ, ਅਵਿਪਰੀਤਂ ਜਾਨਾਪੇਤ੍ਵਾਤਿ ਅਤ੍ਥੋ.
੨. ਸਤਿਵਿਨਯਕਥਾ
੧੯੫. ਪਰਮ੍ਮੁਖਂ ਵਿਨੇਤਿ ਵਿਨਾਸੇਤੀਤਿ ਵਿਨਯੋ, ਪਰਮ੍ਮੁਖਂ ਵਿਨੇਤਿ ਵਿਨਾਸੇਤਿ ਅਨੇਨਾਤਿ ਵਾ ਵਿਨਯੋ, ਵਿਨਯਕਮ੍ਮਂ. ਸਙ੍ਘਧਮ੍ਮਵਿਨਯਪੁਗ੍ਗਲਸਮ੍ਮੁਖਾਨਂ ਦਾਤਬ੍ਬੋ ਵਿਨਯੋ ਸਮ੍ਮੁਖਾਵਿਨਯੋ. ਪਞ੍ਚਿਮਾਨੀਤਿ ਏਤ੍ਥ ਪਞ੍ਚਨ੍ਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਸੁਦ੍ਧਸ੍ਸਾ’’ਤਿਆਦਿ. ਅਨੁਵਦਿਤਸ੍ਸ ਦਾਨਨ੍ਤਿ ਸਮ੍ਬਨ੍ਧੋ. ਏਤਾਨੀਤਿ ਪਞ੍ਚ ਅਙ੍ਗਾਨਿ. ‘‘ਏਕੇਕਅਙ੍ਗਵਸੇਨ ਨ ਲਬ੍ਭਨ੍ਤੀ’’ਤਿ ਇਮਿਨਾ ਸਮੁਦਾਯਵਾਕ੍ਯਨਿਬ੍ਬਤ੍ਤਿਭਾਵਤੋ ਪਞ੍ਚਙ੍ਗਵਸੇਨੇਵ ਲਬ੍ਭਨ੍ਤੀਤਿ ਦਸ੍ਸੇਤਿ. ਦੇਸਨਾਮਤ੍ਤਮੇਵੇਤਨ੍ਤਿ ‘‘ਪਞ੍ਚਿਮਾਨੀ’’ਤਿ ਏਤਂ ਵਚਨਂ ਦੇਸਨਾਮਤ੍ਤਮੇਵ, ਨ ਅਵਯਵਵਾਕ੍ਯਨਿਬ੍ਬਤ੍ਤਿਵਚਨਨ੍ਤਿ ਅਧਿਪ੍ਪਾਯੋ. ਧਮ੍ਮਨ੍ਤਿ ਭੂਤਂ. ਏਤ੍ਥਾਤਿ ‘‘ਪਞ੍ਚਿਮਾਨਿ ਭਿਕ੍ਖਵੇ’’ਤਿਆਦਿਵਚਨੇ. ਤਤ੍ਥ ਚਾਤਿ ‘‘ਪਞ੍ਚਿਮਾਨਿ ਭਿਕ੍ਖਵੇ’’ਤਿਆਦਿਵਚਨੇ ਚ. ਅਨੁਵਦਨ੍ਤੀਤਿ ਏਤ੍ਥ ਅਨੁਦ੍ਧਂਸਨੇਨ ਵਦਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਚੋਦੇਨ੍ਤੀ’’ਤਿ. ਅਯਂ ਪਨ ਸਤਿਵਿਨਯੋ ਦਾਤਬ੍ਬੋਤਿ ਸਮ੍ਬਨ੍ਧੋ. ਅਨਾਗਾਮਿਨੋਪੀਤਿ ਪਿਸਦ੍ਦੋ ਸਮ੍ਭਾਵਨੇ, ਸਕਦਾਗਾਮਿਆਦਿਕੇ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਸੋ ਚ ਖੋਤਿ ਸਤਿਵਿਨਯੋ ਚ. ਚੋਦਿਯਮਾਨੇਯੇਵਾਤਿ ਚੋਦਿਯਮਾਨਸ੍ਸੇਵ, ਅਯਮੇਵ ਵਾ ਪਾਠੋ. ਤਸ੍ਮਿਨ੍ਤਿ ਸਤਿਵਿਨਯਸ੍ਮਿਂ ਦਿਨ੍ਨੇਤਿ ਸਮ੍ਬਨ੍ਧੋ. ਅਚੋਦਿਤਤ੍ਤਾ ਕਥਾ ਨ ਰੂਹਤੀਤਿ ਆਹ ‘‘ਚੋਦੇਨ੍ਤੋਪੀ’’ਤਿਆਦਿ. ਆਪਜ੍ਜਤੀਤਿ ਚੋਦਕੋ ਆਪਜ੍ਜਤਿ. ਚੋਦਨਾਦਿਅਸਾਰੁਪ੍ਪੇ ਵਿਨੇਤਿ ਵਿਨਾਸੇਤੀਤਿ ਵਿਨਯੋ, ਵਿਨੇਤਿ ਵਿਨਾਸੇਤਿ ਅਨੇਨਾਤਿ ਵਾ ਵਿਨਯੋ, ਵਿਨਯਕਮ੍ਮਂ. ਸਤਿਵੇਪੁਲ੍ਲਪਤ੍ਤਸ੍ਸ ਦਾਤਬ੍ਬੋ ਵਿਨਯੋ ਸਤਿਵਿਨਯੋ.
੩. ਅਮੂਲ਼੍ਹਵਿਨਯਕਥਾ
੧੯੬. ਭਾਸਿਤਪਰਿਕਨ੍ਤਨ੍ਤਿ ਏਤ੍ਥ ਭਾਸਿਤਪਰਿਕਨ੍ਤਸਦ੍ਦਾਨਂ ਕਰਣਾਪੇਕ੍ਖਤ੍ਤਾ ਵਿਸੁਂ ਕਰਣਂ ਦਸ੍ਸੇਨ੍ਤੋ ਆਹ ‘‘ਵਾਚਾਯ ਭਾਸਿਤਂ, ਕਾਯੇਨ ਪਰਿਕਨ੍ਤ’’ਨ੍ਤਿ. ‘‘ਪਰਿਕ੍ਕਮੇਤ੍ਵਾ ਕਤ’’ਨ੍ਤਿ ਇਮਿਨਾ ਪਰਿਕਮਤੀਤਿ ਪਰਿਕਨ੍ਤਂ, ਪਰਿਕਨ੍ਤਂ ਹੁਤ੍ਵਾ ਕਤਂ ਪਰਿਕਨ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਪਰਿਕ੍ਕਮੇਤ੍ਵਾਤਿ ਅਤਿਕ੍ਕਮਿਤ੍ਵਾ. ਸਰਤਾਯਸ੍ਮਾਤਿ ਏਤ੍ਥ ਉਕਾਰਲੋਪਸਨ੍ਧਿਂ ਦਸ੍ਸੇਨ੍ਤੋ ਆਹ ‘‘ਸਰਤੁ ਆਯਸ੍ਮਾ’’ਤਿ. ‘‘ਏਵਰੂਪਿਯਾ ਆਪਤ੍ਤਿਯਾ’’ਤਿ ਇਮਿਨਾ ਆਪਜ੍ਜਿਤਾਤਿ ਏਤ੍ਥ ਤੁਪਚ੍ਚਯਯੋਗਭਾਵਤੋ ਕਮ੍ਮਤ੍ਥਛਟ੍ਠਿਯਾਪਿ ਸਮ੍ਭਵਭਾਵਂ ਦਸ੍ਸੇਤਿ. ਤੁਪਚ੍ਚਯਯੋਗੇ ਕਮ੍ਮਤ੍ਥਛਟ੍ਠੀ ਅਨਿਚ੍ਚਂ ਹੋਤਿ, ਤਸ੍ਮਾ ਪਾਲ਼ਿਯਂ ‘‘ਏਵਰੂਪਿਯਾ ਆਪਤ੍ਤਿਯਾ’’ਤਿ ਕਮ੍ਮਤ੍ਥਛਟ੍ਠੀਭਾਵੇਨ ਅਵਤ੍ਵਾ ‘‘ਏਵਰੂਪਿਂ ਆਪਤ੍ਤਿ’’ਨ੍ਤਿ ਕਮ੍ਮਤ੍ਥਦੁਤਿਯਾਭਾਵੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਸ੍ਸਾਤਿ ‘‘ਆਪਜ੍ਜਿਤ੍ਵਾ’’ਤਿ ਪਾਠਸ੍ਸ. ‘‘ਪਠਮਂ ਪਚ੍ਛਾ’’ਤਿ ਪਦੇਹਿ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਚੋਦਕਸ੍ਸ ਕਥਂ ਵਿਨੇਤਿ ਵਿਨਾਸੇਤੀਤਿ ਵਿਨਯੋ, ਚੋਦਕਸ੍ਸ ਕਥਂ ਵਿਨੇਤਿ ਵਿਨਾਸੇਤਿ ਅਨੇਨਾਤਿ ਵਾ ਵਿਨਯੋ. ਪਠਮਂ ਮੂਲ਼੍ਹਭਾਵਂ ਉਪਗਨ੍ਤ੍ਵਾ ਪਚ੍ਛਾ ਅਮੂਲ਼੍ਹਸ੍ਸ ਦਾਤਬ੍ਬੋ ਵਿਨਯੋ ਅਮੂਲ਼੍ਹਵਿਨਯੋ.
੪. ਪਟਿਞ੍ਞਾਤਕਰਣਕਥਾ
੨੦੦. ਪਟਿਜਾਨਿਯਤੇ, ਪਟਿਜਾਨਨਂ ਵਾ ਪਟਿਞ੍ਞਾ, ਤਾਯ ਕਾਰੇਤਬ੍ਬਂ.
੫. ਯੇਭੁਯ੍ਯਸਿਕਾਕਥਾ
੨੦੨. ਯੇਭੁਯ੍ਯਸਿਕਾਤਿ ਏਤ੍ਥ ਯੇਭੁਯ੍ਯੇਨ ਪਵਤ੍ਤਾ ਯੇਭੁਯ੍ਯਸਿਕਾ, ਧਮ੍ਮਵਾਦੀਨਂ ਯੇਭੁਯ੍ਯਤਾਸਮ੍ਪਾਦਿਕਾ ਕਿਰਿਯਾਤਿ ਦਸ੍ਸੇਨ੍ਤੋ ਆਹ ‘‘ਯਸ੍ਸਾ ਕਿਰਿਯਾਯਾ’’ਤਿਆਦਿ. ਤਤ੍ਥ ਯਸ੍ਸਾ ਕਿਰਿਯਾਯਾਤਿ ਯਸ੍ਸਾ ਯੇਭੁਯ੍ਯਤਾਸਮ੍ਪਾਦਿਕਾਯ ਕਿਰਿਯਾਯ. ਏਸਾਤਿ ਯੇਭੁਯ੍ਯਤਾਸਮ੍ਪਾਦਿਕਾ ਕਿਰਿਯਾ.
੨੦੪. ਓਰਮਤ੍ਤਕਨ੍ਤਿ ਏਤ੍ਥ ਓਰਸਦ੍ਦੋ ਚ ਮਤ੍ਤਸਦ੍ਦੋ ਚ ਸਮੂਹਂ ਕਤ੍ਵਾ ਪਰਿਤ੍ਤਵਾਚਕੋ ਅਪ੍ਪਮਤ੍ਤਵਾਚਕੋਤਿ ਆਹ ‘‘ਪਰਿਤ੍ਤਂ ਅਪ੍ਪਮਤ੍ਤਕ’’ਨ੍ਤਿ. ‘‘ਭਣ੍ਡਨਮਤ੍ਤਮੇਵਾ’’ਤਿ ਇਮਿਨਾ ਨ ਮਹਨ੍ਤਂ ਵਿਵਾਦਾਧਿਕਰਣਂ ਹੋਤੀਤਿ ਦਸ੍ਸੇਤਿ. ਨ ਚ ਗਤਿਗਤਨ੍ਤਿ ਏਤ੍ਥ ਚਿਰਕਾਲਭਾਵਂ ਨ ਚ ਗਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਦ੍ਵੇ ਤਯੋ…ਪੇ… ਅਵਿਨਿਚ੍ਛਿਤ’’ਨ੍ਤਿ. ਤਤ੍ਥ ਤਤ੍ਥੇਵਾਤਿ ਤਸ੍ਮਿਂ ਤਸ੍ਮਿਂ ਵਿਵਾਦਾਧਿਕਰਣਜਾਤਆਵਾਸੇ ਏਵ, ਨ ਚ ਸਰਿਤਸਾਰਿਤਪਦਾਨਂ ਸੁਦ੍ਧਕਾਰਿਤਕਿਰਿਯਭਾਵਂ ਦਸ੍ਸੇਨ੍ਤੋ ਆਹ ‘‘ਸਯਂ ਸਰਿਤਂ ਵਾ ਅਞ੍ਞੇਹਿ ਸਾਰਿਤਂ ਵਾ ਨ ਹੋਤੀ’’ਤਿ. ਤੇਹਿ ਭਿਕ੍ਖੂਹੀਤਿ ਵਿਵਾਦਕਾਰਕੇਹਿ ਭਿਕ੍ਖੂਹਿ. ‘‘ਸਲਾਕਂ ਗਾਹੇਨ੍ਤੋ’’ਤਿ ਇਮਿਨਾ ‘‘ਜਾਨਾਤੀ’’ਤਿ ਪਦਸ੍ਸ ਕਤ੍ਤਾਰਂ ਦਸ੍ਸੇਤਿ. ਇਮਿਨਾ ਨੀਹਾਰੇਨਾਤਿ ਇਮਿਨਾ ਕਾਰਣੇਨ. ਅਪਿ ਨਾਮਾਤਿ ਇਮਿਨਾ ਅਪ੍ਪੇਵਨਾਮਸਦ੍ਦੋ ਅਪਿਨਾਮਪਰਿਯਾਯੋਤਿ ਦਸ੍ਸੇਤਿ. ਅਸ੍ਸੂਤਿ ਭਵੇਯ੍ਯੁਂ. ਇਮਿਨਾ ‘‘ਪਾਲ਼ਿਯਂ ਅਧਮ੍ਮਵਾਦੀ ਬਹੁਤਰਾ ਭਵੇਯ੍ਯੁਂ, ਅਪ੍ਪੇਵ ਨਾਮ ਸਾਧੂ’’ਤਿ ਯੋਜਨਾਨਯਂ ਦਸ੍ਸੇਤਿ. ‘‘ਅਯਮਸ੍ਸ ਅਜ੍ਝਾਸਯੋ ਹੋਤੀ’’ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਅਸ੍ਸਾਤਿ ਸਲਾਕਗਾਹਸ੍ਸ. ਦ੍ਵੀਸੁਪੀਤਿ ‘‘ਜਾਨਾਤਿ ਸਙ੍ਘੋ ਭਿਜ੍ਜਿਸ੍ਸਤੀ’’ਤਿ ਚ ‘‘ਅਪ੍ਪੇਵ ਨਾਮ ਸਙ੍ਘੋ ਭਿਜ੍ਜੇਯ੍ਯਾ’’ਤਿ ਚ ਦ੍ਵੀਸੁਪਿ ਪਦੇਸੁ.
‘‘ਅਧਮ੍ਮੇਨ ਗਣ੍ਹਨ੍ਤੀ’’ਤਿ ਏਤ੍ਥ ‘‘ਗਣ੍ਹਨ੍ਤੀ’’ਤਿ ਕਿਰਿਯਾਪਦਸ੍ਸ ਅਧਮ੍ਮਵਾਦਿਨੋ ਏਵ ਕਤ੍ਤਾ ਨਾਮਾਤਿ ਆਹ ‘‘ਅਧਮ੍ਮਵਾਦਿਨੋ’’ਤਿ. ‘‘ਦ੍ਵੇ ਧਮ੍ਮਵਾਦਿਨੋ’’ਤਿ ਇਮਿਨਾ ‘‘ਵਗ੍ਗਾ ਗਣ੍ਹਨ੍ਤੀ’’ਤਿ ਏਤ੍ਥ ‘‘ਗਣ੍ਹਨ੍ਤੀ’’ਤਿ ਕਿਰਿਯਾਪਦਸ੍ਸ ਧਮ੍ਮਵਾਦਿਨੋ ਏਵ ਕਤ੍ਤਾ ਨਾਮਾਤਿ ਦਸ੍ਸੇਤਿ. ਨ ਚ ਯਥਾਦਿਟ੍ਠਿਯਾ ਗਣ੍ਹਨ੍ਤੀਤਿ ਏਤ੍ਥ ਧਮ੍ਮਵਾਦਿਨੋ ਹੁਤ੍ਵਾ ਧਮ੍ਮਵਾਦਿਸਲਾਕਂ ਅਗ੍ਗਹੇਤ੍ਵਾ ਅਧਮ੍ਮਵਾਦਿਸਲਾਕਸ੍ਸ ਗਹਣਂ ਨ ਚ ਯਥਾਦਿਟ੍ਠਿਯਾ ਗਣ੍ਹਨ੍ਤਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਧਮ੍ਮਵਾਦਿਨੋ ਹੁਤ੍ਵਾ’’ਤਿਆਦਿ. ਪਟਿਵਤ੍ਤੇਤ੍ਵਾਤਿ ਇਮਮੇਵਤ੍ਥਂ ਪਟਿਸੇਧੇਤ੍ਵਾ. ‘‘ਪਰਿਵਤ੍ਤੇਤ੍ਵਾ’’ਤਿਪਿ ਪਾਠੋ, ਹੇਟ੍ਠੁਪਰਿਯਾਯਂ ਕਤ੍ਵਾਤਿ ਅਤ੍ਥੋ. ਤੇਤਿ ਧਮ੍ਮਵਾਦਿਨੋ. ਏਤ੍ਥਾਤਿ ਸਮਥਕ੍ਖਨ੍ਧਕੇ.
੬. ਤਸ੍ਸਪਾਪਿਯਸਿਕਾਕਥਾ
੨੦੭. ਅਸੁਚੀਤਿ ਏਤ੍ਥ ਨਤ੍ਥਿ ਸੁਚੀਨਿ ਕਾਯਵਚੀਕਮ੍ਮਾਨਿ ਏਤਸ੍ਸਾਤਿ ਅਸੁਚੀਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਸੁਚੀਹਿ ਕਾਯਵਚੀਕਮ੍ਮੇਹਿ ਸਮਨ੍ਨਾਗਤੋ’’ਤਿ. ਏਸੇਵ ਨਯੋ ਅਲਜ੍ਜੀਤਿ ਏਤ੍ਥਾਪਿ. ਸਾਨੁਵਾਦੋਤਿ ਏਤ੍ਥ ਅਨੁਵਾਦਉਪਵਾਦਸਦ੍ਦਾਨਂ ਪਰਿਯਾਯਤ੍ਤਾ ਵੁਤ੍ਤਂ ‘‘ਸਉਪਵਾਦੋ’’ਤਿ. ਇਤਿ ਪਞ੍ਚਾਤਿ ਇਮਾਨਿ ਪਞ੍ਚ ਅਙ੍ਗਾਨਿ. ਏਤ੍ਥਾਤਿ ਤਸ੍ਸਪਾਪਿਯਸਿਕਕਮ੍ਮੇ. ਇਦਨ੍ਤਿ ਕਮ੍ਮਂ ਵੁਚ੍ਚਤੀਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਯੋ ਪੁਗ੍ਗਲੋ ਪਾਪਿਯੋਤਿ ਯੋਜਨਾ. ਪਾਪੁਸ੍ਸਨ੍ਨਤਾਯਾਤਿ ਲਾਮਕੁਸ੍ਸਨ੍ਨਤਾਯ. ਇਮਿਨਾ ਅਯਞ੍ਚ ਪਾਪੋ ਅਯਞ੍ਚ ਪਾਪੋ, ਅਯਮਿਮੇਸਂ ਵਿਸੇਸੇਨ ਪਾਪੋਤਿ ਪਾਪਿਯੋਤਿ ਚ ਪਾਪਾਨਂ ਅਤਿਸਯੇਨ ਪਾਪੋਤਿ ਪਾਪਿਯੋਤਿ ਚ ਵਚਨਤ੍ਥੋ ਦਸ੍ਸਿਤੋ. ਤਸ੍ਸਾਤਿ ਪੁਗ੍ਗਲਸ੍ਸ. ਇਮਿਨਾ ਤਸ੍ਸ ਪਾਪਿਯਸ੍ਸ ਕਤ੍ਤਬ੍ਬਂ ਤਸ੍ਸਪਾਪਿਯਸਿਕਂ, ਤਮੇਵ ਕਮ੍ਮਂ ਤਸ੍ਸਪਾਪਿਯਸਿਕਕਮ੍ਮਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਕੇਸੁਚਿ ਪੋਤ੍ਥਕੇਸੁ ਯਕਾਰੇ ਦ੍ਵੇਭਾਵੋ ਅਤ੍ਥਿ, ਸੋ ਅਯੁਤ੍ਤੋਯੇਵ. ‘‘ਯੇਭੁਯ੍ਯਸਿਕਾ’’ਤਿ ਏਤ੍ਥ ਯਕਾਰੇ ਦ੍ਵੇਭਾਵਸ੍ਸ ਦਸ੍ਸਨਤੋ ਏਤ੍ਥਾਪਿ ਦ੍ਵੇਭਾਵੋ ਯੁਤ੍ਤੋ ਭਵੇਯ੍ਯਾਤਿ ਲਿਖਨ੍ਤੀਤਿ ਦਟ੍ਠਬ੍ਬਂ.