ਪਰਿਵਾਰਵਗ੍ਗਯੋਜਨਾ
ਚੂਲ਼ਵਗ੍ਗਖਨ੍ਧਕਸ੍ਸੇਵਂ, ਕਤ੍ਵਾਨ ਯੋਜਨਾਨਯਂ;
ਅਧੁਨਾ ਪਰਿਵਾਰਸ੍ਸ, ਕਰਿਸ੍ਸਂ ਯੋਜਨਾਨਯਂ.
ਸੋਲ਼ਸਮਹਾਵਾਰੋ
ਪਞ੍ਞਤ੍ਤਿਵਾਰਯੋਜਨਾ
ਏਵਂ ਦ੍ਵਾਵੀਸਤਿਖਨ੍ਧਕਾਨਂ ਸਂਵਣ੍ਣਨਂ ਕਤ੍ਵਾ ਇਦਾਨਿ ‘‘ਪਰਿਵਾਰੋ’’ਤਿ ਸਙ੍ਗਹਮਾਰੂਲ਼੍ਹਸ੍ਸ ਵਿਨਯਸ੍ਸ ਸਂਵਣ੍ਣਨਂ ਕਰੋਨ੍ਤੋ ਅਯਮਾਚਰਿਯੋ ਪਠਮਂ ਤਾਵ ਅਨੁਸਨ੍ਧਿਦਸ੍ਸਨਮੁਖੇਨ ਪਟਿਞ੍ਞਂ ਕਾਤੁਕਾਮੋ ਆਹ ‘‘ਵਿਸੁਦ੍ਧਪਰਿਵਾਰਸ੍ਸਾ’’ਤਿਆਦਿ. ਤਤ੍ਥ ਵਿਸੁਦ੍ਧਪਰਿਵਾਰਸ੍ਸਾਤਿ ਵਿਸੁਦ੍ਧਾਯ ਚਤੁਪਰਿਸਾਯ ਪਰਿਵਾਰਿਤਸ੍ਸ, ਅਥਵਾ ਵਿਸੁਦ੍ਧੇਨ ਚਤੁਪਰਿਸਸਙ੍ਖਾਤੇਨ ਪਰਿਵਾਰੇਨ ਸਮਨ੍ਨਾਗਤਸ੍ਸ ਭਗਵਤੋਤਿ ਸਮ੍ਬਨ੍ਧੋ. ਪਰਿਵਾਰੇ ਹਿ ਵਿਸੁਦ੍ਧੇ ਤੇਨ ਪਰਿਵਾਰਿਤੋ, ਤਂਪਰਿਵਾਰਿਤੋ ਵਾ ਭਗਵਾਪਿ ਵਿਸੁਦ੍ਧੋਯੇਵ ਨਾਮ ਹੋਤਿ. ਇਮਿਨਾ ਸਂਵਣ੍ਣਿਯਮਾਨਸ੍ਸ ‘‘ਪਰਿਵਾਰੋ’’ਤਿ ਸਙ੍ਗਹਮਾਰੂਲ਼੍ਹਸ੍ਸ ਦੇਸੇਤਬ੍ਬਧਮ੍ਮਸ੍ਸ ਅਨੁਰੂਪੇਨ ਦੇਸਕਭੂਤਸ੍ਸ ਭਗਵਤੋ ਥੋਮਨਂ ਕਤਂ ਹੋਤਿ. ਧਮ੍ਮਕ੍ਖਨ੍ਧਸਰੀਰਸ੍ਸਾਤਿ ਸੀਲਾਦਿਧਮ੍ਮਕ੍ਖਨ੍ਧਸਙ੍ਖਾਤੇਨ ਸਰੀਰੇਨ ਸਮਨ੍ਨਾਗਤਸ੍ਸ, ਇਮਿਨਾ ਸਂਵਣ੍ਣਿਤਾਨਂ ਖਨ੍ਧਕਾਨਮਨੁਰੂਪੇਨ ਭਗਵਤੋ ਥੋਮਨਂ ਕਤਂ ਹੋਤਿ. ਪਕਤਿ ਹੇਸਾਚਰਿਯਾਨਂ ਯਦਿਦਂ ਦੇਸੇਤਬ੍ਬਧਮ੍ਮਾਨੁਰੂਪੇਨ ਦੇਸਕਸ੍ਸ ਥੋਮਨਾ (ਸਾਰਤ੍ਥ. ਟੀ. ੧.ਗਨ੍ਥਾਰਮ੍ਭਕਥਾ; ਵਿਸੁਦ੍ਧਿ. ਮਹਾਟੀ. ੧.੧). ਅਨਨ੍ਤਰਾਤਿ ਅਨਨ੍ਤਰੇ ਕਾਲੇ.
ਯੋਤਿ ਵਿਨਯੋ. ਪੁਬ੍ਬਾਗਤਨ੍ਤਿ ਪੁਬ੍ਬੇ ਵੁਤ੍ਤੇਸੁ ਵਿਭਙ੍ਗਖਨ੍ਧਕੇਸੁ ਆਗਤਂ. ਨਯਨ੍ਤਿ ਸਦ੍ਦਅਤ੍ਥਵਿਨਿਚ੍ਛਯਨਯਸਙ੍ਖਾਤਂ ਸਬ੍ਬਂ ਨਯਂ. ਹਿਤ੍ਵਾਤਿ ਚਜਿਤ੍ਵਾ. ਅਨੁਤ੍ਤਾਨਤ੍ਥਵਣ੍ਣਨਨ੍ਤਿ ਅਨੁਤ੍ਤਾਨਾਨਂ ਪਦਾਨਮਤ੍ਥਵਣ੍ਣਨਂ. ਅਯਂ ਪਨੇਤ੍ਥ ਯੋਜਨਾ – ਵਿਸੁਦ੍ਧਪਰਿਵਾਰਸ੍ਸ ਧਮ੍ਮਕ੍ਖਨ੍ਧਸਰੀਰਸ੍ਸ ਭਗਵਤੋ ਸਾਸਨੇ ਖਨ੍ਧਕਾਨਮਨਨ੍ਤਰਾ ‘‘ਪਰਿਵਾਰੋ’’ਤਿ ਯੋ ਵਿਨਯੋ ਸਙ੍ਗਹਂ ਸਮਾਰੂਲ਼੍ਹੋ, ਤਸ੍ਸ ਵਿਨਯਸ੍ਸ ਪੁਬ੍ਬਾਗਤਂ ਨਯਂ ਹਿਤ੍ਵਾ ਇਦਾਨਿ ਅਨੁਤ੍ਤਾਨਤ੍ਥਵਣ੍ਣਨਂ ਕਰਿਸ੍ਸਾਮੀਤਿ.
੧. ਤਤ੍ਥ ਤਤ੍ਥਾਤਿ ‘‘ਤਸ੍ਸ ਅਨੁਤ੍ਤਾਨਤ੍ਥਵਣ੍ਣਨਂ ਕਰਿਸ੍ਸਾਮੀ’’ਤਿ ਯੋ ਪਰਿਵਾਰਸਙ੍ਖਾਤੋ ਵਿਨਯੋ ਸਂਵਣ੍ਣੇਤਬ੍ਬਭਾਵੇਨ ਵੁਤ੍ਤੋ, ਤਤ੍ਥ. ਸਙ੍ਖੇਪਤ੍ਥੋਤਿ ਸਮਾਸਤ੍ਥੋ. ਯਂ ਤੇਨਾਤਿ ਏਤ੍ਥ ਤਸਦ੍ਦਸ੍ਸ ਅਨਿਯਮਨਿਦ੍ਦੇਸਭਾਵਂ ਦਸ੍ਸੇਨ੍ਤੋ ਆਹ ‘‘ਯੋ ਸੋ’’ਤਿ. ਤਤ੍ਥ ਯੋਤਿ ਅਨਿਯਮ ਨਿਦ੍ਦੇਸੋ, ਤਸ੍ਸ ‘‘ਤੇਨਾ’’ਤਿ ਨਿਯਮਨਂ ਦਟ੍ਠਬ੍ਬਂ. ਸੋਤਿ ਪਦਾਲਙ੍ਕਾਰੋ. ਦ੍ਵੀਸੁ ਹਿ ਸਬ੍ਬਨਾਮੇਸੁ ਯੇਭੁਯ੍ਯੇਨ ਪੁਬ੍ਬਮੇਵ ਪਧਾਨਂ, ਪਚ੍ਛਿਮਂ ਪਨ ਵਚਨਾਲਙ੍ਕਾਰਂ. ਯੋ ਸੋ ਭਗਵਾ ਪਞ੍ਞਪੇਸੀਤਿ ਸਮ੍ਬਨ੍ਧੋ. ਚਿਰਟ੍ਠਿਤਿਕਤ੍ਥਨ੍ਤਿ ਚਿਰਂ ਪਞ੍ਚਵਸ੍ਸਸਹਸ੍ਸਕਾਲਂ ਠਿਤਿਕਤ੍ਥਾਯ, ‘‘ਯਾਚਿਤੋ’’ਤਿ ਚ ‘‘ਪਞ੍ਞਪੇਸੀ’’ਤਿ ਚ ਸਮ੍ਬਨ੍ਧੋ. ਧਮ੍ਮਸੇਨਾਪਤਿਨਾ ਯਾਚਿਤੋਤਿ ਸਮ੍ਬਨ੍ਧੋ. ਯਾਚਿਤੋ ਹੁਤ੍ਵਾ ਪਞ੍ਞਪੇਸੀਤਿ ਯੋਜਨਾ. ਤੇਨ ਭਗਵਤਾ ਪਞ੍ਞਤ੍ਤਨ੍ਤਿ ਸਮ੍ਬਨ੍ਧੋ. ‘‘ਜਾਨਤਾ ਪਸ੍ਸਤਾ’’ਤਿ ਦ੍ਵਿਨ੍ਨਂ ਪਦਾਨਂ ਕਮ੍ਮਮੇਵ ਦਸ੍ਸੇਨ੍ਤੋ ਆਹ ‘‘ਤਸ੍ਸ ਤਸ੍ਸਾ’’ਤਿਆਦਿ. ਤਤ੍ਥ ‘‘ਪਞ੍ਞਤ੍ਤਿਕਾਲ’’ਨ੍ਤਿ ਇਮਿਨਾ ‘‘ਜਾਨਤਾ’’ਤਿ ਪਦਸ੍ਸ ਕਮ੍ਮਂ ਦਸ੍ਸੇਤਿ, ‘‘ਦਸ ਅਤ੍ਥਵਸੇ’’ਤਿ ਇਮਿਨਾ ‘‘ਪਸ੍ਸਤਾ’’ਤਿ ਪਦਸ੍ਸ ਕਮ੍ਮਂ.
ਏਵਂ ਕਮ੍ਮਦਸ੍ਸਨੇਨ ਯੋਜਨਾਨਯਂ ਦਸ੍ਸੇਤ੍ਵਾ ਇਦਾਨਿ ਕਰਣਦਸ੍ਸਨੇਨ ਅਪਰਮ੍ਪਿ ਯੋਜਨਾਨਯਂ ਦਸ੍ਸੇਨ੍ਤੋ ਆਹ ‘‘ਅਪਿਚਾ’’ਤਿਆਦਿ. ‘‘ਪੁਬ੍ਬੇਨਿਵਾਸਾਦੀਹੀ’’ਤਿਆਦਿਸਦ੍ਦੇਨ ਦਿਬ੍ਬਚਕ੍ਖੁਸ੍ਸ ਵਿਸੁਂ ਗਹੇਤਬ੍ਬਤ੍ਤਾ ਇਦ੍ਧਿਵਿਧਦਿਬ੍ਬਸੋਤਪਰਚਿਤ੍ਤਵਿਜਾਨਨਾਨਿ ਗਹੇਤਬ੍ਬਾਨਿ. ਇਮੇਹਿ ਪਦੇਹਿ ‘‘ਜਾਨਤਾ, ਪਸ੍ਸਤਾ’’ਤਿ ਦ੍ਵਿਨ੍ਨਂ ਪਦਾਨਂ ਪਞ੍ਚਨ੍ਨਂ ਲੋਕਿਯਅਭਿਞ੍ਞਾਨਮੇਵ ਕਰਣਭਾਵਂ ਦਸ੍ਸੇਤਿ. ਤੀਹਿ ਵਿਜ੍ਜਾਹੀਤਿ ਪੁਬ੍ਬੇਨਿਵਾਸਦਿਬ੍ਬਚਕ੍ਖੁਆਸਵਕ੍ਖਯਞਾਣਸਙ੍ਖਾਤਾਹਿ ਤੀਹਿ ਵਿਜ੍ਜਾਹਿ. ਛਹਿ ਵਾ ਪਨ ਅਭਿਞ੍ਞਾਹੀਤਿ ਸਹ ਆਸਵਕ੍ਖਯਞਾਣੇਨ ਪਞ੍ਚਲੋਕਿਯਾਭਿਞ੍ਞਾਸਙ੍ਖਾਤਾਹਿ ਛਹਿ ਅਭਿਞ੍ਞਾਹਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਤੀਸੁ ਕਾਲੇਸੁ, ਪਞ੍ਚਸੁਪਿ ਞੇਯ੍ਯਧਮ੍ਮੇਸੁ. ਸਮਨ੍ਤਚਕ੍ਖੁਨਾਤਿ ਅਨਾਵਰਣਸਬ੍ਬਞ੍ਞੁਤਞ੍ਞਾਣਸਙ੍ਖਾਤੇਨ ਸਮਨ੍ਤਚਕ੍ਖੁਨਾ. ਪਞ੍ਞਾਯਾਤਿ ਸਬ੍ਬਞ੍ਞੁਤਪਞ੍ਞਾਯ. ਤਿਰੋਕੁਟ੍ਟਾਦੀਤਿ ਆਦਿਸਦ੍ਦੇਨ ਤਿਰੋਪਬ੍ਬਤਾਦਯੋ ਸਙ੍ਗਣ੍ਹਾਤਿ. ਮਂਸਚਕ੍ਖੁਨਾਤਿ ਪਸਾਦਚਕ੍ਖੁਨਾ. ਪਟਿਵੇਧਪਞ੍ਞਾਯਾਤਿ ਮਗ੍ਗਪਞ੍ਞਾਯ. ਦੇਸਨਾਪਞ੍ਞਾਯਾਤਿ ਸਬ੍ਬਞ੍ਞੁਤਪਞ੍ਞਾਯ. ਸਬ੍ਬਞ੍ਞੁਤਪਞ੍ਞਾਯੇਵ ਹਿ ਅਤ੍ਥਤੋ ਦੇਸਨਾਪਞ੍ਞਾ ਨਾਮ. ਤੇਨ ਵੁਤ੍ਤਂ ‘‘ਤਸ੍ਸਾ ਪਞ੍ਞਾਯ ਤੇਜਸਾ. ਅਭਿਧਮ੍ਮਕਥਾਮਗ੍ਗਂ, ਦੇਵਾਨਂ ਸਮ੍ਪਵਤ੍ਤਯੀਤਿ (ਧ. ਸ. ਅਟ੍ਠ. ਗਨ੍ਥਾਰਮ੍ਭਕਥਾ ੫). ਇਮੇਹਿ ਪਦੇਹਿ ਅਵਤ੍ਥਾਵਸੇਨ ਵਿਸੁਂ ਵਿਸੁਂ ਦ੍ਵਿਨ੍ਨਂ ਪਦਾਨਂ ਕਰਣਸਮ੍ਭਵਂ ਦਸ੍ਸੇਤਿ. ਅਰਹਤਾਤਿ ਅਰੀਨਂ ਅਰਾਨਞ੍ਚ ਹਤਤ੍ਤਾ, ਪਚ੍ਚਯਾਦੀਨਞ੍ਚ ਅਰਹਤ੍ਤਾ ਅਰਹਤਾ. ਸਮ੍ਮਾਸਮ੍ਬੁਦ੍ਧੇਨਾਤਿ ਸਮ੍ਮਾ ਸਾਮਞ੍ਚ ਸਬ੍ਬਧਮ੍ਮਾਨਂ ਬੁਦ੍ਧਤ੍ਤਾ ਸਮ੍ਮਾਸਮ੍ਬੁਦ੍ਧੇਨ, ਤੇਨ ਭਗਵਤਾਤਿ ਸਮ੍ਬਨ੍ਧੋ. ਕੇਨਾਭਤਨ੍ਤਿ ਤਂ ਪਠਮਂ ਪਾਰਾਜਿਕਂ ਕੇਨ ਆਭਤਂ, ਇਤਿ ਸਙ੍ਖੇਪਤ੍ਥੋਤਿ ਯੋਜਨਾ.
੨. ਪੁਚ੍ਛਾਵਿਸਜ੍ਜਨੇ ਪਨ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਯਂ ਤੇਨ…ਪੇ… ਪਾਰਾਜਿਕਨ੍ਤਿ ਇਦਂ ਪਦਂ ਪਚ੍ਚੁਦ੍ਧਰਣਮਤ੍ਤਮੇਵਾਤਿ ਸਮ੍ਬਨ੍ਧੋ. ਪਤਿਉਦ੍ਧਰਣਮਤ੍ਤਮੇਵ, ਨ ਅਤ੍ਥਦਸ੍ਸਨਨ੍ਤਿ ਅਤ੍ਥੋ. ਏਤ੍ਥਾਤਿ ਏਤੇਸੁ ਪਦੇਸੁ. ਏਕਾ ਪਞ੍ਞਤ੍ਤੀਤਿ ਏਕਾ ਪਠਮਪਞ੍ਞਤ੍ਤਿ. ਅਨੁਪਞ੍ਞਤ੍ਤਿਯੋਤਿ ਪਚ੍ਛਾ ਠਪਿਤਾ ਪਞ੍ਞਤ੍ਤਿਯੋ.
ਏਤ੍ਤਾਵਤਾਤਿ ਏਤ੍ਤਕੇਨ ‘‘ਏਕਾ ਪਞ੍ਞਤ੍ਤਿ, ਦ੍ਵੇ ਅਨੁਪਞ੍ਞਤ੍ਤਿਯੋ’’ਤਿ ਵਚਨਮਤ੍ਤੇਨ ਵਿਸ੍ਸਜ੍ਜਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਤਤਿਯਂ ਪੁਚ੍ਛਨ੍ਤਿ ਸਮ੍ਬਨ੍ਧੋ. ਕਸ੍ਮਾ ਅਨੁਪ੍ਪਨ੍ਨਪਞ੍ਞਤ੍ਤਿ ਤਸ੍ਮਿਂ ਨਤ੍ਥੀਤਿ ਆਹ ‘‘ਅਯਂ ਹੀ’’ਤਿਆਦਿ. ਤਤ੍ਥ ਹਿ ਯਸ੍ਮਾ ਅਞ੍ਞਤ੍ਰ ਨਤ੍ਥਿ, ਤਸ੍ਮਾ ਨਤ੍ਥੀਤਿ ਯੋਜਨਾ. ‘‘ਅਨੁਪ੍ਪਨ੍ਨੇ ਦੋਸੇ ਪਞ੍ਞਤ੍ਤਾ’’ਤਿ ਇਮਿਨਾ ਅਨੁਪ੍ਪਨ੍ਨੇ ਦੋਸੇ ਪਞ੍ਞਪੇਤਬ੍ਬਾਤਿ ਅਨੁਪ੍ਪਨ੍ਨਪਞ੍ਞਤ੍ਤੀਤਿ ਵਚਨਤ੍ਥਂ ਦਸ੍ਸੇਤਿ. ਸਾਤਿ ਅਨੁਪ੍ਪਨ੍ਨਪਞ੍ਞਤ੍ਤਿ. ਤਸ੍ਮਾਤਿ ਯਸ੍ਮਾ ਅਞ੍ਞਤ੍ਰ ਨਤ੍ਥਿ, ਤਸ੍ਮਾ. ਸਬ੍ਬਤ੍ਥਪਞ੍ਞਤ੍ਤੀਤਿ ਏਤ੍ਥ ਸਬ੍ਬਸ੍ਮਿਂ ਪਦੇਸੇ ਪਞ੍ਞਤ੍ਤਿ ਸਬ੍ਬਤ੍ਥਪਞ੍ਞਤ੍ਤੀਤਿ ਅਲੁਤ੍ਤਸਮਾਸਂ ਦਸ੍ਸੇਨ੍ਤੋ ਆਹ ‘‘ਮਜ੍ਝਿਮਦੇਸੇ ਚੇਵਾ’’ਤਿਆਦਿ. ‘‘ਮਜ੍ਝਿਮਦੇਸੇ ਚੇਵ ਪਚ੍ਚਨ੍ਤਿਮਜਨਪਦੇਸੁ ਚਾ’’ਤਿ ਇਮਿਨਾ ‘‘ਸਬ੍ਬਤ੍ਥਾ’’ਤਿ ਪਦਸ੍ਸ ਸਰੂਪਂ ਦਸ੍ਸੇਤਿ. ਪਦੇਸਪਞ੍ਞਤ੍ਤਿਂ ਅਪਨੇਤ੍ਵਾ ਸਬ੍ਬਤ੍ਥਪਞ੍ਞਤ੍ਤਿਂ ਪਾਰਿਸੇਸਨਯੇਨ ਦਸ੍ਸੇਨ੍ਤੋ ਆਹ ‘‘ਵਿਨਯਧਰਪਞ੍ਚਮੇਨਾ’’ਤਿਆਦਿ. ਤਤ੍ਥ ਵਿਨਯਧਰਪਞ੍ਚਮੇਨਾਤਿ ਅਨੁਸ੍ਸਾਵਨਾਚਰਿਯਪਞ੍ਚਮੇਨ. ਏਤ੍ਥੇਵਾਤਿ ਮਜ੍ਝਿਮਦੇਸੇਯੇਵ. ਏਤੇਹੀਤਿ ਚਤੂਹਿ ਸਿਕ੍ਖਾਪਦੇਹਿ. ਸੇਸਾਨੀਤਿ ਚਤੂਹਿ ਸਿਕ੍ਖਾਪਦੇਹਿ ਸੇਸਾਨਿ.
ਸਾਧਾਰਣਪਞ੍ਞਤ੍ਤੀਤਿ ਏਤ੍ਥ ਸਾਧਾਰਣਾ ਨਾਮ ਭਿਕ੍ਖੁਭਿਕ੍ਖੁਨੀਨਮੇਵਾਤਿ ਆਹ ‘‘ਭਿਕ੍ਖੂਨਞ੍ਚੇਵ ਭਿਕ੍ਖੁਨੀਨਞ੍ਚਾ’’ਤਿ. ਇਦਂ ਪਨਾਤਿ ਪਠਮਪਾਰਾਜਿਕਂ ਪਨ, ਪਞ੍ਞਤ੍ਤਨ੍ਤਿ ਸਮ੍ਬਨ੍ਧੋ. ਵਿਨੀਤਕਥਾਮਤ੍ਤਮੇਵਾਤਿ ਵਿਨੀਤਵਤ੍ਥੁਪਕਾਸਕਂ ਕਥਾਮਤ੍ਤਮੇਵ. ਤਾਸਨ੍ਤਿ ਭਿਕ੍ਖੁਨੀਨਂ. ਬ੍ਯਞ੍ਜਨਮਤ੍ਤਮੇਵਾਤਿ ‘‘ਸਾਧਾਰਣਾ’’ਤਿ ਚ ‘‘ਉਭਤੋ’’ਤਿ ਚ ਬ੍ਯਞ੍ਜਨਮਤ੍ਤਮੇਵ. ਏਤ੍ਥਾਤਿ ਸਾਧਾਰਣਪਞ੍ਞਤ੍ਤਿਉਭਤੋਪਞ੍ਞਤ੍ਤਿਪਦੇ.
‘‘ਨਿਦਾਨੇ ਅਨੁਪਵਿਟ੍ਠ’’ਨ੍ਤਿ ਇਮਿਨਾ ‘‘ਨਿਦਾਨੋਗਧ’’ਨ੍ਤਿ ਪਦਸ੍ਸ ਸਤ੍ਤਮੀਸਮਾਸਞ੍ਚ ਓਗਧਸਦ੍ਦਸ੍ਸ ਅਨੁਪਵਿਟ੍ਠਤ੍ਥਞ੍ਚ ਦਸ੍ਸੇਤਿ. ਓਗਾਲ਼੍ਹੋ ਹੁਤ੍ਵਾ ਧਰਤਿ ਤਿਟ੍ਠਤੀਤਿ ਓਗਧਂ. ਨਨੁ ਨਿਦਾਨੋਗਧੇ ਸਤਿ ‘‘ਪਠਮੇਨ ਉਦ੍ਦੇਸੇਨਾ’’ਤਿ ਵਤ੍ਤਬ੍ਬਂ, ਕਸ੍ਮਾ ‘‘ਦੁਤਿਯੇਨ ਉਦ੍ਦੇਸੇਨਾ’’ਤਿ ਵੁਤ੍ਤਨ੍ਤਿ ਆਹ ‘‘ਨਿਦਾਨੋਗਧ’’ਨ੍ਤਿ. ਨਿਦਾਨਪਰਿਯਾਪਨ੍ਨਮ੍ਪਿ ਸਮਾਨਨ੍ਤਿ ਨਿਦਾਨਪਰਿਯਾਪਨ੍ਨਂ ਸਮਾਨਮ੍ਪੀਤਿ ਯੋਜਨਾ. ਪਿਸਦ੍ਦੋ ਗਰਹਤ੍ਥੋ, ਪਗੇਵ ਦੁਤਿਯੇ ਉਦ੍ਦੇਸੇ ਪਰਿਯਾਪਨ੍ਨੇਤਿ ਦਸ੍ਸੇਤਿ. ‘‘ਸੀਲਵਿਪਤ੍ਤਿਆਦੀਨ’’ਨ੍ਤਿ ਵਚਨਂ ਵਿਤ੍ਥਾਰੇਨ੍ਤੋ ਆਹ ‘‘ਪਠਮਾ ਹੀ’’ਤਿਆਦਿ.
ਦ੍ਵਙ੍ਗਿਕੇਨਾਤਿ ਕਾਯਚਿਤ੍ਤਸਙ੍ਖਾਤੇਨ ਦ੍ਵਙ੍ਗਿਕੇਨ. ਨਨੁ ‘‘ਏਕੇਨ ਸਮੁਟ੍ਠਾਨੇਨਾ’’ਤਿ ਵੁਤ੍ਤਤ੍ਤਾ ‘‘ਕਾਯਤੋਯੇਵਾ’’ਤਿ ਵਤ੍ਤਬ੍ਬਂ, ਅਥ ਕਸ੍ਮਾ ‘‘ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤੀ’’ਤਿ ਵੁਤ੍ਤਨ੍ਤਿ ਆਹ ‘‘ਏਤ੍ਥ ਹੀ’’ਤਿਆਦਿ. ਏਤ੍ਥਾਤਿ ‘‘ਏਕੇਨ ਸਮੁਟ੍ਠਾਨੇਨਾ’’ਤਿ ਵਚਨੇ. ਚਿਤ੍ਤਨ੍ਤਿ ਸੇਵਨਚਿਤ੍ਤਂ. ਆਪਨ੍ਨੋਸੀਤਿ ਤ੍ਵਂ ਆਪਨ੍ਨੋ ਅਸੀਤਿ ਯੋਜਨਾ. ਆਮ ਆਪਨ੍ਨੋਮ੍ਹੀਤਿ ਆਮ ਅਹਂ ਆਪਨ੍ਨੋ ਅਮ੍ਹੀਤਿ ਯੋਜਨਾ. ਤਾਵਦੇਵਾਤਿ ਤਸ੍ਮਿਂ ਪਟਿਜਾਨਕ੍ਖਣੇਯੇਵ. ਤਂ ਪੁਗ੍ਗਲਨ੍ਤਿ ਪਾਰਾਜਿਕਮਾਪਨ੍ਨਂ ਤਂ ਪੁਗ੍ਗਲਂ. ਤਪ੍ਪਚ੍ਚਯਾਤਿ ਤਸ੍ਸ ਪਾਰਾਜਿਕਮਾਪਨ੍ਨਸ੍ਸ ਕਾਰਣਾ. ‘‘ਨ ਕਤਮੇਨ ਸਮਥੇਨ ਸਮ੍ਮਤੀ’’ਤਿ ਯਂ ਪਨ ਵਚਨਂ ਵੁਤ੍ਤਨ੍ਤਿ ਯੋਜਨਾ. ਤਨ੍ਤਿ ਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ.
ਵੁਤ੍ਤਮਾਤਿਕਾ ਪਞ੍ਞਤ੍ਤੀਤਿ ਵੁਤ੍ਤਮਾਤਿਕਾਸਙ੍ਖਾਤਾ ਪਞ੍ਞਤ੍ਤਿ ਵਿਨਯੋ ਨਾਮਾਤਿ ਯੋਜਨਾ. ਮਾਤਿਕਾ ਹਿ ਯਸ੍ਮਾ ਪਞ੍ਞਪੀਯਤਿ ਸਙ੍ਖੇਪੇਨ ਠਪੀਯਤਿ, ਪਕਾਰਂ ਜਾਨਾਪੇਤਿ ਵਾ, ਤਸ੍ਮਾ ਪਞ੍ਞਤ੍ਤੀਤਿ ਵੁਚ੍ਚਤਿ. ‘‘ਪਦਭਾਜਨਂ ਵੁਚ੍ਚਤੀ’’ਤਿ ਇਮਿਨਾ ਵਿਤ੍ਥਾਰੇਨ ਭਾਜਿਯਤਿ ਏਤਾਯਾਤਿ ਵਿਭਤ੍ਤੀਤਿ ਦਸ੍ਸੇਤਿ. ਵੀਤਿਕ੍ਕਮੋਤਿ ਕਾਯਵਾਚਾਵੀਤਿਕ੍ਕਮੋ. ਸੋ ਹਿ ਨ ਸਂਵਰਤਿ ਕਾਯਵਾਚਂ ਨ ਪਿਦਹਤੀਤਿ ਅਸਂਵਰੋਤਿ ਵੁਚ੍ਚਤਿ. ਯੇਸਂ ਵਤ੍ਤਤੀਤਿ ਏਤ੍ਥ ਵਤ੍ਤਤਿਕਿਰਿਯਾਯ ਕਤ੍ਤਾਰਂ ਦਸ੍ਸੇਨ੍ਤੋ ਆਹ ‘‘ਵਿਨਯਪਿਟਕਞ੍ਚ ਅਟ੍ਠਕਥਾ ਚਾ’’ਤਿ. ਪਗੁਣਾਤਿ ਵਾਚੁਗ੍ਗਤਾ. ਤੇਤਿ ਤੇ ਪੁਗ੍ਗਲਾ, ਧਾਰੇਨ੍ਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤਸ੍ਸਾਤਿ ਪਠਮਪਾਰਾਜਿਕਸ੍ਸ. ਕੇਨਾਭਤਨ੍ਤਿ ਏਤ੍ਥ ਭਰਧਾਤੁਯਾ ਧਾਰਣਪੋਸਨਤ੍ਥੇਸੁ (ਪਾਣਿਨੀ ੧੦੮ ਧਾਤੁਪਾਠੇ) ਧਾਰਣਤ੍ਥਂ ਦਸ੍ਸੇਨ੍ਤੋ ਆਹ ‘‘ਕੇਨ ਆਨੀਤ’’ਨ੍ਤਿ. ‘‘ਪਰਮ੍ਪਰਾਯ ਆਨੀਤ’’ਨ੍ਤਿ ਇਮਿਨਾ ਪਰਮ੍ਪਰਾਭਤਨ੍ਤਿ ਪਦਸ੍ਸ ਤਤਿਯਾਸਮਾਸਂ ਦਸ੍ਸੇਤਿ. ਅਥਵਾ ‘‘ਕੇਨਾਭਤ’’ਨ੍ਤਿ ਪੁਚ੍ਛਾਯ ਅਨੁਰੂਪਂ ਯਕਾਰਲੋਪਵਸੇਨ ਵਾਕ੍ਯਨ੍ਤਿ ਦਸ੍ਸੇਤਿ.
੩. ਉਪਾਲਿ ਦਾਸਕੋ ਚੇਵਾਤਿਆਦਿਕਾ ਗਾਥਾਯੋ ਕਿਮਤ੍ਥਂ ਕੇਹਿ ਠਪਿਤਾਤਿ ਆਹ ‘‘ਇਦਾਨੀ’’ਤਿਆਦਿ. ਤਨ੍ਤਿ ਪਰਂ ਪਰਂ. ਤਤ੍ਥਾਤਿ ਤਾਸੁ ਗਾਥਾਸੁ. ਯਨ੍ਤਿ ਵਚਨਂ. ਇਮਿਨਾ ਨਯੇਨਾਤਿ ਪਠਮਪਾਰਾਜਿਕਸ੍ਸ ਪੁਚ੍ਛਾਵਿਸਜ੍ਜਨੇ ਵੁਤ੍ਤੇਨ ਇਮਿਨਾ ਨਯੇਨ.
ਇਤਿ ਮਹਾਵਿਭਙ੍ਗੇ ਪਞ੍ਞਤ੍ਤਿਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਕਤਾਪਤ੍ਤਿਵਾਰਾਦਿਵਣ੍ਣਨਾ
੧੫੭. ਇਤੋਤਿ ਪਞ੍ਞਤ੍ਤਿਵਾਰਤੋ, ਪਰਂ ਵੁਤ੍ਤਾ ਸਤ੍ਤ ਵਾਰਾ ਉਤ੍ਤਾਨਤ੍ਥਾ ਏਵਾਤਿ ਯੋਜਨਾ. ਕਤਾਪਤ੍ਤਿਵਾਰੋਤਿ ‘‘ਕਤਾਪਤ੍ਤੀ’’ਤਿ ਪਦੇਨ ਲਕ੍ਖਿਤੋ ਵਾਰੋ. ਏਸੇਵ ਨਯੋ ਸੇਸੇਸੁਪਿ. ਤਦਨਨ੍ਤਰੋਤਿ ਤੇਸਂ ਸਤ੍ਤਨ੍ਨਂ ਵਾਰਾਨਂ ਅਨਨ੍ਤਰੇ ਵੁਤ੍ਤੋ. ਸਮੁਚ੍ਚਯਵਾਰੋਤਿ ਸਂ ਏਕਤੋ ਆਪਤ੍ਤਿਵਿਪਤ੍ਤਿਆਦਯੋ ਉਚਿਯਨ੍ਤਿ ਸਮ੍ਪਿਣ੍ਡਿਯਨ੍ਤਿ ਏਤ੍ਥਾਤਿ ਸਮੁਚ੍ਚਯੋ, ਸੋਯੇਵ ਵਾਰੋ ਸਮੁਚ੍ਚਯਵਾਰੋ.
੧੮੮. ਤਤੋਤਿ ਤੇਹਿ ਅਟ੍ਠਹਿ ਵਾਰੇਹਿ, ਪਰਂ ਵੁਤ੍ਤਾਤਿ ਸਮ੍ਬਨ੍ਧੋ. ਪਚ੍ਚਯਵਸੇਨ ਵੁਤ੍ਤੋ ਏਕੋ ਪਞ੍ਞਤ੍ਤਿਵਾਰੋਤਿ ਯੋਜਨਾ. ਪਚ੍ਚਯਵਸੇਨਾਤਿ ਪਚ੍ਚਯਸਦ੍ਦਸ੍ਸ ਵਸੇਨ. ਤਸ੍ਸਾਤਿ ਪਚ੍ਚਯਸ੍ਸ. ਤੇਪੀਤਿ ਅਟ੍ਠ ਵਾਰਾਪਿ. ਇਤੀਤਿਆਦਿ ਨਿਗਮਨਂ. ਤਤੋਤਿ ਮਹਾਵਿਭਙ੍ਗਤੋ, ਪਰਂ ਆਗਤਾਤਿ ਸਮ੍ਬਨ੍ਧੋ. ਏਵਂ ਇਮੇ ਦ੍ਵਤ੍ਤਿਂਸ ਵਾਰਾਤਿ ਯੋਜਨਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤ੍ਥਾਤਿ ਦ੍ਵਤ੍ਤਿਂਸਵਾਰੇਸੁ.
ਸਮੁਟ੍ਠਾਨਸੀਸਵਣ੍ਣਨਾ
੨੫੭. ਤਦਨਨ੍ਤਰਾਯਾਤਿ ਤੇਸਂ ਦ੍ਵਤ੍ਤਿਂਸਵਾਰਾਨਂ ਅਨਨ੍ਤਰਂ ਵੁਤ੍ਤਾਯ ਸਮੁਟ੍ਠਾਨਕਥਾਯ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਅਨਤ੍ਤਾ ਇਤਿ ਨਿਚ੍ਛਿਤਾਤਿ ਅਨਤ੍ਤਾਤ੍ਵੇਵ ਵਿਨਿਚ੍ਛਿਤਾ. ਇਮਿਨਾ ਅਨਤ੍ਤਾ ਇਤਿ ਨਿਚ੍ਛਯਾਤਿ ਏਤ੍ਥ ਚਿਧਾਤੁਯਾ ਵਿਨਿਚ੍ਛਯਤ੍ਥਂ ਦਸ੍ਸੇਤਿ. ‘‘ਅਨਿਚ੍ਚਾਕਾਰਾਦੀਹੀ’’ਤਿ ਇਮਿਨਾ ਸਭਾਗਧਮ੍ਮਾਨਨ੍ਤਿ ਏਤ੍ਥ ਅਨਿਚ੍ਚਾਕਾਰਾਦੀਹਿ ਸਮਾਨੋ ਭਾਗੋ ਏਤੇਸਨ੍ਤਿ ਸਭਾਗਾ, ਤੇਯੇਵ ਧਮ੍ਮਾ ਸਭਾਗਧਮ੍ਮਾਤਿ ਵਚਨਤ੍ਥਂ ਦਸ੍ਸੇਤਿ. ਨਾਮਮਤ੍ਤਮ੍ਪੀਤਿ ਅਨਿਚ੍ਚਾਦਿਨਾਮਮਤ੍ਤਮ੍ਪਿ. ਪਿਸਦ੍ਦੇਨ ਪਗੇਵ ਨਾਮਿਕੋ ਅਨਿਚ੍ਚਾਦਿਸਭਾਵੋਤਿ ਦਸ੍ਸੇਤਿ. ਨ ਪਞ੍ਞਾਯਤੀਤਿ ਨ ਖਾਯਤਿ. ਇਮਿਨਾ ਨ ਨਾਯਤੀਤਿ ਏਤ੍ਥ ਞਾਧਾਤੁਯਾ ਖਾਯਨਤ੍ਥਂ ਦਸ੍ਸੇਤਿ. ਦੁਕ੍ਖਹਾਨਿਨ੍ਤਿ ਏਤ੍ਥ ਦੁਕ੍ਖਂ ਜਹਾਤੀਤਿ ਦੁਕ੍ਖਹਾਨੀਤਿ ਦਸ੍ਸੇਨ੍ਤੋ ਆਹ ‘‘ਦੁਕ੍ਖਘਾਤਨ’’ਨ੍ਤਿ. ਦੁਕ੍ਖਂ ਹਨਤੀਤਿ ਦੁਕ੍ਖਘਾਤਨੋ, ਸਦ੍ਧਮ੍ਮੋ, ਤਂ. ‘‘ਖਨ੍ਧਕਾ ਯਾ ਚ ਮਾਤਿਕਾ’’ਤਿ ਵਤ੍ਤਬ੍ਬੇ ਸੁਖੁਚ੍ਚਾਰਣਤ੍ਥਾਯ ਰਸ੍ਸਵਸੇਨ ਪਾਠੋ ਅਤ੍ਥੀਤਿ ਆਹ ‘‘ਖਨ੍ਧਕਾ ਯ ਚ ਮਾਤਿਕਾ’’ਤਿ. ਸਮੁਟ੍ਠਾਨਂ ਨਿਯਤੋਕਤਨ੍ਤਿ (ਸਂ. ਨਿ. ੧.੨੧੬) ਏਤ੍ਥ ‘‘ਸਮੁਟ੍ਠਾਨਂ ਨਿਯਤਕਤ’’ਨ੍ਤਿ ਵਤ੍ਤਬ੍ਬੇ ‘‘ਪਰੋਸਹਸ੍ਸ’’ਨ੍ਤਿਆਦੀਸੁ ਵਿਯ ਓਕਾਰਾਗਮਵਸੇਨ ‘‘ਸਮੁਟ੍ਠਾਨਨਿਯਤੋਕਤ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਸਮੁਟ੍ਠਾਨਂ ਨਿਯਤਕਤ’’ਨ੍ਤਿ. ਏਤੇਨਾਤਿ ‘‘ਸਮੁਟ੍ਠਾਨਂ ਨਿਯਤੋਕਤ’’ਨ੍ਤਿ ਪਾਠੇਨ. ਪਚ੍ਚੇਤਬ੍ਬੋਤਿ ਪਤਿ ਏਤਬ੍ਬੋ, ਪਟਿਮੁਖਂ ਞਾਤਬ੍ਬੋਤਿ ਅਤ੍ਥੋ. ਅਞ੍ਞੇਹੀਤਿ ਤੀਹਿ ਸਿਕ੍ਖਾਪਦੇਹਿ ਅਞ੍ਞੇਹਿ ਸਿਕ੍ਖਾਪਦੇਹਿ.
ਤਤ੍ਥਾਤਿ ਸਮ੍ਭੇਦਨਿਦਾਨਵਚਨੇਸੁ. ਸਮ੍ਭੇਦਵਚਨੇਨ ਪਚ੍ਚੇਤਬ੍ਬਨ੍ਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਤਾਨਿ ਤੀਣਿ ਸਿਕ੍ਖਾਪਦਾਨਿ ਠਪੇਤ੍ਵਾਤਿ ਸਮ੍ਬਨ੍ਧੋ. ਪਞ੍ਞਤ੍ਤਿਦੇਸਸਙ੍ਖਾਤਨ੍ਤਿ ਪਞ੍ਞਤ੍ਤਿਟ੍ਠਾਨਭੂਤਦੇਸਸਙ੍ਖਾਤਂ. ‘‘ਇਮਾਨਿ ਤੀਣੀ’’ਤਿ ਇਮਿਨਾ ‘‘ਦਿਸ੍ਸਨ੍ਤੀ’’ਤਿ ਕਿਰਿਯਾਯ ਕਤ੍ਤਾਰਂ ਦਸ੍ਸੇਤਿ. ‘‘ਪਞ੍ਞਾਯਨ੍ਤੀ’’ਤਿ ਇਮਿਨਾ ਦਿਸਧਾਤੁਯਾ ਖਾਯਨਤ੍ਥਂ ਦਸ੍ਸੇਤਿ. ਤਤ੍ਥਾਤਿ ਸਮੁਟ੍ਠਾਨਨਿਯਮਸਮ੍ਭੇਦਨਿਦਾਨਸਙ੍ਖਾਤੇਸੁ ਤੀਸੁ, ਨਿਦ੍ਧਾਰਣੇ ਭੁਮ੍ਮਂ. ਇਤਰਂ ਪਨਾਤਿ ਸਮੁਟ੍ਠਾਨਨਿਯਮਸਮ੍ਭੇਦੇਹਿ ਅਞ੍ਞਂ ਪਨ.
ਆਲ਼ਵੀਤਿ ਆਲ਼ਵਿਯਂ. ਸਕ੍ਕੇਸੁ ਭਗ੍ਗੇਸੁ ਚਾਤਿ ਏਤ੍ਥ ਜਨਪਦਨਾਮਤ੍ਤਾ ਬਹੁਵਚਨਵਸੇਨ ਵੁਤ੍ਤਂ.
ਦ੍ਵੀਸੁ ਵਿਭਙ੍ਗੇਸੁ ਪਞ੍ਞਤ੍ਤਂ ਯਂ ਸਿਕ੍ਖਾਪਦਂ ਉਦ੍ਦਿਸਨ੍ਤੀਤਿ ਯੋਜਨਾ. ‘‘ਵਿਭਙ੍ਗੇਸੂ’’ਤਿ ਇਮਿਨਾ ਵਿਭਙ੍ਗੇਤਿ ਏਤ੍ਥ ਸੁਕਾਰਲੋਪੋਤਿ ਦਸ੍ਸੇਤਿ. ਤਸ੍ਸਾਤਿ ਸਿਕ੍ਖਾਪਦਸ੍ਸ. ਯਥਾਞਾਯਨ੍ਤਿ ਯੁਤ੍ਤਿਯਾ ਅਨੁਰੂਪਂ. ਤਨ੍ਤਿ ਸਮੁਟ੍ਠਾਨਂ. ਮੇ ਸੁਣਾਥਾਤਿ ਮਮ ਸਨ੍ਤਿਕਾ ਸੁਣਾਥ. ਇਤੀਤਿ ਅਯਮਤ੍ਥੋ.
ਕਥਿਨਨ੍ਤਿ ਪਠਮਕਥਿਨਸਮੁਟ੍ਠਾਨਂ. ਅਨਨੁਞ੍ਞਾਤਾਯ ਸਦ੍ਧਿਨ੍ਤਿ ਅਨਨੁਞ੍ਞਾਤਸਮੁਟ੍ਠਾਨੇਨ ਸਦ੍ਧਿਂ. ਸਦਿਸਾ ਇਧ ਦਿਸ੍ਸਰੇਤਿ ਏਤ੍ਥ ਇਧਸਦ੍ਦੋ ਅਤ੍ਥਪਕਰਣਵਸੇਨ ਉਭਤੋਵਿਭਙ੍ਗਵਿਸਯੋਤਿ ਆਹ ‘‘ਇਧ ਉਭਤੋਵਿਭਙ੍ਗੇ’’ਤਿ. ‘‘ਸਦਿਸਾਨੀ’’ਤਿ ਇਮਿਨਾ ਸਦਿਸਾਤਿ ਏਤ੍ਥ ਨਿਕਾਰਸ੍ਸਾਕਾਰਾਦੇਸੋ ਦਸ੍ਸਿਤੋ. ‘‘ਦਿਸ੍ਸਨ੍ਤੀ’’ਤਿ ਇਮਿਨਾ ਦਿਸ੍ਸਰੇਤਿ ਏਤ੍ਥ ਅਨ੍ਤਿਸਦ੍ਦਸ੍ਸ ਰੇਕਾਰੋ (ਨਿਰੁਤ੍ਤਿਦੀਪਨਿਯਂ ੫੭੦ ਸੁਤੇ) ਦਸ੍ਸਿਤੋ.
ਸਮੁਟ੍ਠਾਨਸੀਸੋ
ਪਠਮਪਾਰਾਜਿਕਸਮੁਟ੍ਠਾਨਵਣ੍ਣਨਾ
੨੫੮. ਕਿਮਤ੍ਥਂ ‘‘ਮੇਥੁਨਂ ਸੁਕ੍ਕਸਂਸਗ੍ਗੋ’’ਤਿਆਦਿਵਚਨਂ ਵੁਤ੍ਤਨ੍ਤਿ ਆਹ ‘‘ਇਦਾਨੀ’’ਤਿਆਦਿ. ਤਤ੍ਥ ਤਤ੍ਥਾਤਿ ‘‘ਮੇਥੁਨਂ ਸੁਕ੍ਕਸਂਸਗ੍ਗੋ’’ਤਿਆਦਿਵਚਨੇ. ਸਮੁਟ੍ਠਾਨਸੀਸਨ੍ਤਿ ਸਮੁਟ੍ਠਾਨਾਨਂ, ਸਮੁਟ੍ਠਾਨੇਸੁ ਵਾ ਸੀਸਂ. ਸੇਸਾਨੀਤਿ ਪਠਮਪਾਰਾਜਿਕਤੋ ਸੇਸਾਨਿ ਪਞ੍ਚਸਤ੍ਤਤਿ ਸਿਕ੍ਖਾਪਦਾਨਿ. ਤੇਨਾਤਿ ਪਠਮਪਾਰਾਜਿਕੇਨ. ‘‘ਸੁਕ੍ਕਸਂਸਗ੍ਗੋ’’ਤਿਆਦਿਵਚਨਂ ਸਂਵਣ੍ਣੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ‘‘ਸੁਕ੍ਕਸਂਸਗ੍ਗੋ’’ਤਿਆਦਿਵਚਨੇ.
ਖੁਦ੍ਦਕਵਣ੍ਣਨਾਵਸਾਨੇਤਿ ਖੁਦ੍ਦਕਟ੍ਠਕਥਾਯ ਅਵਸਾਨੇ.
ਲਿਙ੍ਗਵਿਪਰਿਯਾਯੋਤਿ ਲਿਙ੍ਗਵਿਪਲ੍ਲਾਸੋ. ਕਾਯਮਾਨਸਿਕਾ ਕਤਾਤਿ ਏਤ੍ਥ ਕਾਯਮਾਨਸੇਸੁ ਪਵਤ੍ਤਾ ਕਾਯਮਾਨਸਿਕਾਤਿ ਵੁਤ੍ਤੇ ਸਮੁਟ੍ਠਾਨਾਤਿ ਆਹ ‘‘ਕਾਯਚਿਤ੍ਤਸਮੁਟ੍ਠਾਨਾ ਕਤਾ’’ਤਿ.
ਦੁਤਿਯਪਾਰਾਜਿਕਸਮੁਟ੍ਠਾਨਵਣ੍ਣਨਾ
੨੫੯. ਇਦਂ ਸਮੁਟ੍ਠਾਨਂ ਏਕਂ ਸਮੁਟ੍ਠਾਨਸੀਸਨ੍ਤਿ ਸਮ੍ਬਨ੍ਧੋ. ‘‘ਅਦਿਨ੍ਨਾਦਾਨ’’ਨ੍ਤਿ ਇਮਿਨਾ ਅਦਿਨ੍ਨਨ੍ਤਿ ਏਤ੍ਥ ਸਮੁਦਾਯਨਾਮੇ ਏਕਦੇਸਵੋਹਾਰੋਤਿ ਦਸ੍ਸੇਤਿ. ਸੇਸਾਨੀਤਿ ਦੁਤਿਯਪਾਰਾਜਿਕਤੋ ਸੇਸਾਨਿ ਏਕੂਨਸਤ੍ਤਤਿ ਸਿਕ੍ਖਾਪਦਾਨਿ. ਤੇਨਾਤਿ ਦੁਤਿਯਪਾਰਾਜਿਕੇਨ. ਤਤ੍ਥਾਤਿ ‘‘ਵਿਗ੍ਗਹੁਤ੍ਤਰੀ’’ਤਿਆਦਿਵਚਨੇ. ਵਿਗ੍ਗਹੁਤ੍ਤਰੀਤਿਆਦਿਪਦਾਨਂ ਬ੍ਯਞ੍ਜਨੇ ਆਦਰਮਕਤ੍ਵਾ ਅਤ੍ਥਮੇਵ ਦਸ੍ਸੇਤੁਂ ਵੁਤ੍ਤਂ ‘‘ਮਨੁਸ੍ਸਵਿਗ੍ਗਹਉਤ੍ਤਰਿਮਨੁਸ੍ਸਧਮ੍ਮਸਿਕ੍ਖਾਪਦਾਨੀ’’ਤਿ. ਅਨਿਯਤਾ ਦੁਤਿਯਿਕਾਤਿ ਆਪਤ੍ਤਿਂ ਅਪੇਕ੍ਖਿਤ੍ਵਾ ਪਾਲ਼ਿਯਂ ਇਤ੍ਥਿਲਿਙ੍ਗਵਸੇਨ ਵੁਤ੍ਤਂ, ਅਟ੍ਠਕਥਾਯਂ ਪਨ ਸਿਕ੍ਖਾਪਦਂ ਅਪੇਕ੍ਖਿਤ੍ਵਾ ਨਪੁਂਸਕਲਿਙ੍ਗਵਸੇਨ ਦੁਤਿਯਨ੍ਤਿ ਵੁਤ੍ਤਂ.
ਸਮੁਟ੍ਠਾਨਾ ਤਿਕਾ ਕਤਾਤਿ ਏਤ੍ਥ ‘‘ਤਿਕਸਮੁਟ੍ਠਾਨਾ’’ਤਿ ਵਤ੍ਤਬ੍ਬੇ ਪਦਵਿਪਰਿਯਾਯਵਸੇਨ ਕਕਾਰਸ੍ਸ ਦੀਘਵਸੇਨ ਸਮੁਟ੍ਠਾਨਾ ਤਿਕਾਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਤਿਕਸਮੁਟ੍ਠਾਨਾ ਕਤਾ’’ਤਿ.
ਸਞ੍ਚਰਿਤ੍ਤਸਮੁਟ੍ਠਾਨਵਣ੍ਣਨਾ
੨੬੦. ‘‘ਸਞ੍ਚਰੀ’’ਤਿ ਇਦਂ ਤਾਵ ਸਞ੍ਚਰਿਤ੍ਤਂ ਨਾਮ ਏਕਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ.
ਵਿਭਙ੍ਗੇ ਆਗਤੇਨ ‘‘ਰਿਞ੍ਚਨ੍ਤੀ’’ਤਿ (ਪਾਰਾ. ੫੭੬) ਪਦੇਨ ਏਲ਼ਕਲੋਮਧੋਵਾਪਨਸਿਕ੍ਖਾਪਦਂ ਉਪਲਕ੍ਖਿਤ੍ਵਾ ਵੁਤ੍ਤਨ੍ਤਿ ਆਹ ‘‘ਵਿਭਙ੍ਗੇ ਰਿਞ੍ਚਨ੍ਤਿ ਉਦ੍ਦੇਸਨ੍ਤਿ ਆਗਤ’’ਨ੍ਤਿ.
‘‘ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਾਯ’’ ਇਤਿ (ਪਾਚਿ. ੧੩੫-੧੩੬) ਚ ‘‘ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਦਦੇਯ੍ਯ’’ਇਤਿ (ਪਾਚਿ. ੧੬੯) ਚ ‘‘ਚੀਵਰਂ ਸਿਬ੍ਬੇਯ੍ਯ’’ਇਤਿ (ਪਾਚਿ. ੧੭੬-੧੭੭) ਚ ਵੁਤ੍ਤਸਿਕ੍ਖਾਪਦਤ੍ਤਯਨ੍ਤਿ ਯੋਜਨਾ.
‘‘ਸਮਣਚੀਵਰੇਨ ਚਾ’’ਤਿ ਏਵਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਸਮਣਚੀਵਰਂ ਦਦੇਯ੍ਯਾ’’ਤਿ ਇਦਂ (ਪਾਚਿ. ੯੧੭) ਵਚਨਂ ਸਨ੍ਧਾਯਾਤਿ ਸਮ੍ਬਨ੍ਧੋ.
ਸਮਨੁਭਾਸਨਾਸਮੁਟ੍ਠਾਨਵਣ੍ਣਨਾ
੨੬੧. ਭੇਦਨ੍ਤਿ ਇਦਂ ਸਮਨੁਭਾਸਨਂ ਨਾਮ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ.
ਕਥਿਨਸਮੁਟ੍ਠਾਨਵਣ੍ਣਨਾ
੨੬੨. ਉਬ੍ਭਤਨ੍ਤਿ ਇਦਂ ਕਥਿਨਸਮੁਟ੍ਠਾਨਂ ਨਾਮ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ.
ਆਵਸਥੇਨ ਸਦ੍ਧਿਨ੍ਤਿ ਆਵਸਥਸਦ੍ਦੇਨ ਸਦ੍ਧਿਂ.
ਏਲ਼ਕਲੋਮਸਮੁਟ੍ਠਾਨਵਣ੍ਣਨਾ
੨੬੩. ‘‘ਏਲ਼ਕਲੋਮਾ’’ਤਿ ਇਦਂ ਏਲ਼ਕਲੋਮਸਮੁਟ੍ਠਾਨਂ ਨਾਮ ਏਕਂ ਸਮੁਟ੍ਠਾਨਸੀਸਂ. ਇਤੋਤਿ ਯਥਾਵੁਤ੍ਤਤੋ. ਪਾਲ਼ਿਨ੍ਤਿ ਮਾਤਿਕਾਪਾਲ਼ਿਂ. ਵਿਰਜ੍ਝਿਤ੍ਵਾਤਿ ਪੁਬ੍ਬਾਪਰਤੋ ਵਿਰਾਧੇਤ੍ਵਾ. ਯਥਾਤਿ ਯੇਨਾਕਾਰੇਨ. ਪਨਸਦ੍ਦੋ ਅਨੁਗ੍ਗਹਤ੍ਥੋ. ਕਿਞ੍ਚਾਪਿ ਲਿਖਨ੍ਤਿ, ਪਨ ਤਥਾਪੀਤਿ ਯੋਜਨਾ. ਏਵਨ੍ਤਿ ਤਥਾਕਾਰੇਨ. ਅਤ੍ਥਾਨੁਕ੍ਕਮੋਤਿ ਅਤ੍ਥਸ੍ਸ ਅਨੁਕ੍ਕਮੋ.
‘‘ਅਭਿਕ੍ਖੁਕਾਵਾ ਸੇਨ ਚਾ’’ਤਿ ਏਤਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਅਭਿਕ੍ਖੁਕੇ ਆਵਾਸੇ ਵਸ੍ਸਂ ਵਸੇਯ੍ਯਾ’’ਤਿ (ਪਾਚਿ. ੧੦੪੭) ਇਦਂ ਵਚਨਂ ਸਨ੍ਧਾਯਾਤਿ ਸਮ੍ਬਨ੍ਧੋ. ‘‘ਭਿਕ੍ਖੁਨੀ’’ਤਿਆਦਿਨਾ ਵੁਤ੍ਤਾਨੀਤਿ ਸਮ੍ਬਨ੍ਧੋ. ਆਦਿਸਦ੍ਦੇਨ ‘‘ਸਿਕ੍ਖਮਾਨਾ ਚ ਸਾਮਣੇਰੀ ਗਿਹਿਨਿਯਾ’’ਤਿ ਪਾਠਂ ਸਙ੍ਗਣ੍ਹਾਤਿ.
ਪਦਸੋਧਮ੍ਮਸਮੁਟ੍ਠਾਨਵਣ੍ਣਨਾ
੨੬੪. ਪਦਨ੍ਤਿ ਇਦਂ ਪਦਸੋਧਮ੍ਮਸਮੁਟ੍ਠਾਨਂ ਨਾਮ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ. ‘‘ਤਥਾ ਅਤ੍ਥਙ੍ਗਤੇਨ ਚਾ’’ਤਿ ਏਤਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਅਤ੍ਥਙ੍ਗਤੇ ਸੂਰਿਯੇ ਓਵਦੇਯ੍ਯਾ’’ਤਿ (ਪਾਚਿ. ੧੫੪-੧੫੫) ਇਦਂ ਵਚਨਂ ਸਨ੍ਧਾਯਾਤਿ ਸਮ੍ਬਨ੍ਧੋ. ਅਨੋਕਾਸੋ ਚ…ਪੇ… ਸਨ੍ਧਾਯ ਵੁਤ੍ਤਨ੍ਤਿ (ਪਾਚਿ. ੧੨੧੯-੧੨੨੧) ਏਤ੍ਥਾਪਿ ਏਸੇਵ ਨਯੋ.
ਅਦ੍ਧਾਨਸਮੁਟ੍ਠਾਨਵਣ੍ਣਨਾ
੨੬੫. ਅਦ੍ਧਾਨਨ੍ਤਿ ਇਦਂ ਅਦ੍ਧਾਨਸਮੁਟ੍ਠਾਨਂ ਨਾਮ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ.
ਥੇਯ੍ਯਸਤ੍ਥਸਮੁਟ੍ਠਾਨਵਣ੍ਣਨਾ
੨੬੬. ਥੇਯ੍ਯਸਤ੍ਥਨ੍ਤਿ ਇਦਂ ਥੇਯ੍ਯਸਤ੍ਥਸਮੁਟ੍ਠਾਨਂ ਨਾਮ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨਿ. ‘‘ਬ੍ਯੂਹੇਨ ਸਤ੍ਤਮਾ’’ਤਿ ਇਦਂ ਵਚਨਂ ਵੁਤ੍ਤਨ੍ਤਿ ਯੋਜਨਾ. ਤਦਨਨ੍ਤਰਮੇਵਾਤਿ ਤਸ੍ਸ ਸਿਕ੍ਖਾਪਦਸ੍ਸ ਅਨਨ੍ਤਰਮੇਵ, ‘‘ਆਗਤ’’ਇਤਿ ਸਮ੍ਬਨ੍ਧੋ.
ਧਮ੍ਮਦੇਸਨਾਸਮੁਟ੍ਠਾਨਵਣ੍ਣਨਾ
੨੬੭. ਧਮ੍ਮਦੇਸਨਾਸਮੁਟ੍ਠਾਨੇ ਸਮੁਟ੍ਠਾਨਸੀਸਂ ਨਤ੍ਥਿ, ਸਬ੍ਬਾਨਿ ਏਕਦਸ ਸਿਕ੍ਖਾਪਦਾਨਿ ਸਮ੍ਪਿਣ੍ਡੇਤ੍ਵਾ ਧਮ੍ਮਦੇਸਨਾਸਮੁਟ੍ਠਾਨਾਨੀਤਿ ਵੁਤ੍ਤਾਨਿ. ਏਵਨ੍ਤਿਆਦਿ ਨਿਗਮਨਂ. ਤੇਸਨ੍ਤਿ ਤੇਸਂ ਸਿਕ੍ਖਾਪਦਾਨਂ. ਸਮ੍ਭਿਨ੍ਨਸਮੁਟ੍ਠਾਨਨ੍ਤਿ ਸਂਸਗ੍ਗਸਮੁਟ੍ਠਾਨਂ. ਤਿਵਿਧਨ੍ਤਿ ਭੂਤਾਰੋਚਨਚੋਰਿਵੁਟ੍ਠਾਪਨਅਨਨੁਞ੍ਞਾਤਸਮੁਟ੍ਠਾਨਵਸੇਨ ਤਿਪ੍ਪਕਾਰਂ. ਤਨ੍ਤਿ ਨਿਯਤਸਮੁਟ੍ਠਾਨਂ, ਹੋਤੀਤਿ ਸਮ੍ਬਨ੍ਧੋ. ਪੁਨ ਤਨ੍ਤਿ ਨਿਯਤਸਮੁਟ੍ਠਾਨਂ, ਦਸ੍ਸੇਤੁਨ੍ਤਿ ਸਮ੍ਬਨ੍ਧੋ. ਪੁਨ ਤਨ੍ਤਿ ਵਚਨਂ. ਨੇਤ੍ਤਿਧਮ੍ਮਾਨੁਲੋਮਿਕਨ੍ਤਿ ਏਤ੍ਥ ਕਾਯਵਾਚਂ ਨੇਤਿ ਵਿਨੇਤੀਤਿ ਨੇਤ੍ਤਿ, ਕਾਯਵਾਚਂ ਨੇਤਿ ਵਿਨੇਤਿ ਏਤ੍ਥ, ਏਤਾਯਾਤਿ ਵਾ ਨੇਤ੍ਤਿ. ਧਮ੍ਮੋਤਿ ਪਾਲ਼ਿ. ਸਾ ਹਿ ਯਸ੍ਮਾ ਅਤ੍ਥਂ ਧਾਰੇਤਿ, ਤਸ੍ਮਾ ਧਮ੍ਮੋਤਿ ਵੁਚ੍ਚਤਿ. ਨੇਤ੍ਤਿਯੇਵ ਧਮ੍ਮੋ ਨੇਤ੍ਤਿਧਮ੍ਮੋ, ਤਸ੍ਸ ਅਨੁਲੋਮਿਕਂ ਨੇਤ੍ਤਿਧਮ੍ਮਾਨੁਲੋਮਿਕਂ. ਤੇਨ ਵੁਤ੍ਤਂ ‘‘ਵਿਨਯਪਾਲ਼ਿਧਮ੍ਮਸ੍ਸ ਅਨੁਲੋਮ’’ਨ੍ਤਿ.
ਇਤਿ ਸਮੁਟ੍ਠਾਨਸੀਸਵਣ੍ਣਨਾਯ ਯੋਜਨਾ ਸਮਤ੍ਤਾ.
ਅਨ੍ਤਰਪੇਯ੍ਯਾਲ ਕਤਿਪੁਚ੍ਛਾਵਾਰਵਣ੍ਣਨਾ
੨੭੧. ਇਦਾਨਿ ਵੁਤ੍ਤੋਤਿ ਸਮ੍ਬਨ੍ਧੋ. ‘‘ਇਦਾਨੀ’’ਤਿ ਪਦੇਨ ਸਮ੍ਬਨ੍ਧਤ੍ਤਾ ਵੁਤ੍ਤੋਤਿ ਏਤ੍ਥ ਤਪਚ੍ਚਯੋ ਪਚ੍ਚੁਪ੍ਪਨ੍ਨਕਾਲਿਕੋਤਿ ਦਟ੍ਠਬ੍ਬੋ.
ਤਤ੍ਥਾਤਿ ਮਾਤਿਕਾਯਂ, ਪੁਚ੍ਛਾਸੁ ਵਾ. ਆਗਤਾਪਤ੍ਤਿਪੁਚ੍ਛਾਤਿ ਆਗਤਾਪਤ੍ਤਿਯਾ ਪੁਚ੍ਛਾ. ਹੀਤਿ ਵਿਸੇਸਜੋਤਕੋ, ਹਿ ਵਿਸੇਸਂ ਵਕ੍ਖਾਮੀਤਿ ਅਤ੍ਥੋ. ਏਤ੍ਥਾਤਿ ‘‘ਕਤਿ ਆਪਤ੍ਤਿਕ੍ਖਨ੍ਧਾ’’ਤਿ ਦੁਤਿਯਪਦੇ. ‘‘ਰਾਸਿਵਸੇਨਾ’’ਤਿ ਇਮਿਨਾ ਖਨ੍ਧਸਦ੍ਦਸ੍ਸ ਰਾਸਤ੍ਥਂ ਦਸ੍ਸੇਤਿ. ਵਿਨੀਤਵਤ੍ਥੂਨੀਤਿ ਏਤ੍ਥ ਵਿਨੀਤਸਦ੍ਦੋ ਵਿਨਯਪਰਿਯਾਯੋਤਿ ਆਹ ‘‘ਵਿਨਯਪੁਚ੍ਛਾ’’ਤਿ. ਨਨੁ ਵਿਨੀਤਵਿਨਯਸਦ੍ਦਾਨਂ ਸਦ੍ਦਤੋ ਨਾਨਤ੍ਤਾ ਅਤ੍ਥਤੋਪਿ ਨਾਨਂ, ਕਸ੍ਮਾ ਪਨ ‘‘ਵਿਨਯਪੁਚ੍ਛਾ’’ਤਿ ਵੁਤ੍ਤਨ੍ਤਿ ਆਹ ‘‘ਵਿਨੀਤਂ…ਪੇ… ਏਕ’’ਨ੍ਤਿ. ਇਦਨ੍ਤਿ ਪਦਤ੍ਤਯਂ. ਅਤ੍ਥਤੋ ਏਕਨ੍ਤਿ ਅਤ੍ਥਤੋਯੇਵ ਏਕਂ, ਨ ਸਦ੍ਦਤੋ. ਵਿਨੀਤਵਤ੍ਥੂਨੀਤਿ ਆਪਤ੍ਤਿਵਿਨਯਕਾਰਣਤ੍ਤਾ ਵਿਨੀਤਵਤ੍ਥੂਨਿ. ਯੇਸੂਤਿ ਅਗਾਰਵੇਸੁ. ਸਤੀਤਿ ਸਨ੍ਤੇਸੁ. ਏਤ੍ਥ ਚ ਯੇਸੁ ਸਤਿ ਆਪਤ੍ਤਿਯੋ ਨ ਹੋਨ੍ਤਿ, ਅਸਤਿ ਹੋਨ੍ਤੀਤਿ ਵਾਕ੍ਯਮ੍ਪਿ ਅਵੁਤ੍ਤਸਿਦ੍ਧਿਨਯੇਨ ਗਹੇਤਬ੍ਬਂ. ਯੇਸੂਤਿ ਗਾਰਵੇਸੁ. ਤੇਤਿ ਅਗਾਰਵਗਾਰਵੇ. ਯਸ੍ਮਾ ਪਨ ਨਤ੍ਥੀਤਿ ਸਮ੍ਬਨ੍ਧੋ. ਵਿਪਤ੍ਤਿਭਾਵਪੁਚ੍ਛਾਤਿ ਵਿਪਤ੍ਤਿਭਾਵਸ੍ਸ ਪੁਚ੍ਛਾ. ਪੁਚ੍ਛਿਯਤਿ ਇਮਾਯਾਤਿ ਪੁਚ੍ਛਾ. ਵਿਵਾਦਮੂਲਾਨਿ ਅਨੁਵਾਦਮੂਲਾਨੀਤਿ ਇਮਾ ਪੁਚ੍ਛਾਯੋ ਮੂਲਪੁਚ੍ਛਾਤਿ ਸਮ੍ਬਨ੍ਧੋ. ਪੋਤ੍ਥਕੇਸੁ ‘‘ਇਮਾਨੀ’’ਤਿ ਨਿਕਾਰੇਨ ਸਹ ਪਾਠੋ ਅਤ੍ਥਿ, ਸੋ ਅਪਾਠੋਯੇਵ. ਮੂਲਪੁਚ੍ਛਾਤਿ ਪੁਚ੍ਛਿਯਨ੍ਤਿ ਇਮਾਹੀਤਿ ਪੁਚ੍ਛਾ, ਮੂਲਾਨਂ ਪੁਚ੍ਛਾ ਮੂਲਪੁਚ੍ਛਾ. ‘‘ਅਧਿਕਰਣ’’ਨ੍ਤਿਆਦੀਸੁ ‘‘ਵੁਤ੍ਤਂ’’ ਇਤਿ ਸਮ੍ਬਨ੍ਧੋ. ਤੇਸਂਯੇਵਾਤਿ ਅਧਿਕਰਣਾਨਂਯੇਵ. ਅਯਮੇਤ੍ਥ ਮਾਤਿਕਾ.
ਨਿਦ੍ਦੇਸੇ ਮਾਤਿਕਾਯਾਤਿ ਪਾਤਿਮੋਕ੍ਖੇ. ਵਿਭਙ੍ਗੇਤਿ ਪਦਭਾਜਨਿਯਂ, ਆਗਤਵਸੇਨ ਵੁਤ੍ਤਾਤਿ ਯੋਜਨਾ. ਅਯਮੇਤ੍ਥ ਨਿਦ੍ਦੇਸੋ.
ਪਟਿਨਿਦ੍ਦੇਸੇ ਆਰਤੀਤਿਆਦਿਪਦਾਨਂ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਆਰਕਾ’’ਤਿਆਦਿ. ਤਤ੍ਥ ‘‘ਆਰਕਾ’’ਤਿ ਇਮਿਨਾ ਆਰਤੀਤਿ ਏਤ੍ਥ ਆਉਪਸਗ੍ਗਸ੍ਸ ਅਤ੍ਥਂ ਦਸ੍ਸੇਤਿ. ਏਤੇਹੀਤਿ ਆਪਤ੍ਤਿਕ੍ਖਨ੍ਧੇਹਿ, ਆਰਕਾਤਿ ਸਮ੍ਬਨ੍ਧੋ. ‘‘ਰਮਤੀ’’ਤਿ ਇਮਿਨਾ ਤਿਪਚ੍ਚਯੋ ਕਤ੍ਵਤ੍ਥੇ ਹੋਤੀਤਿ ਦਸ੍ਸੇਤਿ. ਰਤੀਤਿ ਰਮਨਂ. ਇਮਿਨਾ ਤਿਪਚ੍ਚਯੋ ਭਾਵਤ੍ਥੇਪਿ ਹੋਤੀਤਿ ਦਸ੍ਸੇਤਿ. ਵਿਨਾਤਿ ਏਤੇਹਿ ਆਪਤ੍ਤਿਕ੍ਖਨ੍ਧੇਹਿ ਵਿਨਾ. ਇਮਿਨਾ ਵਿਰਤੀਤਿ ਏਤ੍ਥ ਵਿਤ੍ਯੂਪਸਗ੍ਗਸ੍ਸ ਅਤ੍ਥਂ ਦਸ੍ਸੇਤਿ. ਪਚ੍ਚੇਕਨ੍ਤਿ ਪਤਿ ਏਕਂ, ਪਟਿਸਦ੍ਦੋ ਵਿਚ੍ਛਤ੍ਥਜੋਤਕੋ, ਵਿਸੁਂ ਵਿਸੁਨ੍ਤਿ ਅਤ੍ਥੋ. ਇਮਿਨਾ ਪਟਿਵਿਰਤੀਤਿ ਏਤ੍ਥ ਪਟਿਤ੍ਯੂਪਸਗ੍ਗਸ੍ਸ ਅਤ੍ਥਂ ਦਸ੍ਸੇਤਿ. ਵਿਰਤਿ ਪਟਿਵਿਰਤੀਤਿ ਏਤ੍ਥਾਪਿ ਤਿਪਚ੍ਚਯੋ ਭਾਵਤ੍ਥੇਪਿ ਵੇਦਿਤਬ੍ਬੋ. ਵੇਰਨ੍ਤਿ ਅਨਤ੍ਥਕਰਤ੍ਤਾ ਵਿਰਮਿਤਬ੍ਬਨ੍ਤਿ ਵਿਰਂ, ਤਦੇਵ ਵੇਰਂ, ਰਾਗਾਦਿਅਕੁਸਲਧਮ੍ਮਾ. ਤੇ ਹਿ ਵੇਰਹੇਤੁਤ੍ਤਾ ਵੇਰਨ੍ਤਿ ਵੁਚ੍ਚਨ੍ਤਿ. ਏਤਾਯਾਤਿ ਵਿਰਤਿਯਾ. ਇਮਿਨਾ ਅਕਿਰਿਯਾਤਿ ਏਤ੍ਥ ਰਿਰਿਯਪਚ੍ਚਯੋ ਕਰਣਤ੍ਥੇ ਹੋਤੀਤਿ ਦਸ੍ਸੇਤਿ. ਯਂ ਆਪਤ੍ਤਿਕ੍ਖਨ੍ਧਕਰਣਨ੍ਤਿ ਯੋਜਨਾ. ਤਸ੍ਸਾਤਿ ਆਪਤ੍ਤਿਕ੍ਖਨ੍ਧਕਰਣਸ੍ਸ. ਪਟਿਪਕ੍ਖਤੋਤਿ ਵਿਰੁਦ੍ਧਭਾਵਤੋ. ਇਮਿਨਾ ਅਕਰਣਨ੍ਤਿ ਏਤ੍ਥ ਅਕਾਰੋ ਵਿਰੁਦ੍ਧਤ੍ਥੋਤਿ ਦਸ੍ਸੇਤਿ. ਆਪਤ੍ਤਿਕ੍ਖਨ੍ਧਅਜ੍ਝਾਪਤ੍ਤਿਯਾਤਿ ਆਪਤ੍ਤਿਕ੍ਖਨ੍ਧਾਨਂ ਅਤਿਕ੍ਕਮਿਤ੍ਵਾ ਆਪਜ੍ਜਨਸ੍ਸ. ‘‘ਵੇਲਨਤੋ’’ਤਿ ਇਮਿਨਾ ਵੇਲਤੀਤਿ ਵੇਲਾ, ਵੇਲਨਂ ਵਾ ਵੇਲਾਤਿ ਵਚਨਤ੍ਥੇ ਦਸ੍ਸੇਤਿ. ਨਿਯ੍ਯਾਨਨ੍ਤਿ ਮਗ੍ਗਂ. ਮਗ੍ਗੋ ਹਿ ਨਿਬ੍ਬਾਨਂ ਆਰਮ੍ਮਣਕਰਣਵਸੇਨ ਯਾਤਿ ਗਚ੍ਛਤੀਤਿ ਨਿਯ੍ਯਾਨਨ੍ਤਿ ਵੁਚ੍ਚਤਿ. ‘‘ਬਨ੍ਧਤੀ’’ਤਿ ਇਮਿਨਾ ਸਿਧਾਤੁਯਾ ਬਨ੍ਧਨਤ੍ਥਂ ਦਸ੍ਸੇਤਿ. ‘‘ਨਿਵਾਰੇਤੀ’’ਤਿ ਇਮਿਨਾ ਬਨ੍ਧਧਾਤੁਯਾ ਅਧਿਪ੍ਪਾਯਤ੍ਥਂ. ਏਤਨ੍ਤਿ ‘‘ਸੇਤੂ’’ਤਿ ਨਾਮਂ. ਤਂ ਸੇਤੁਨ੍ਤਿ ਆਪਤ੍ਤਿਕ੍ਖਨ੍ਧਸਙ੍ਖਾਤਂ ਤਂ ਸੇਤੁਂ. ਏਤ੍ਥ ਕੇਸੁਚਿ ਪੋਤ੍ਥਕੇਸੁ ‘‘ਸੋ ਸੇਤੂ’’ਤਿ ਚ ‘‘ਏਤਾਯ ਪਞ੍ਞਤ੍ਤਿਯਾ’’ਤਿ ਚ ਪਾਠੋ ਅਤ੍ਥਿ, ਸੋ ਅਪਾਠੋਯੇਵ.
ਬੁਦ੍ਧੇ ਅਗਾਰਵਾਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਯੋਤਿ ਯੋ ਕੋਚਿ, ਨ ਗਚ੍ਛਤੀਤਿਆਦੀਸੁ ਸਮ੍ਬਨ੍ਧੋ. ਧਰਮਾਨੇਤਿ ਤਿਟ੍ਠਮਾਨੇ, ਸਂਵਿਜ੍ਜਮਾਨੇਤਿ ਅਤ੍ਥੋ. ਉਪਟ੍ਠਾਨਨ੍ਤਿ ਉਪਟ੍ਠਾਨਟ੍ਠਾਨਂ, ਉਪਟ੍ਠਾਨਤ੍ਥਂ ਵਾ. ਏਤਸ੍ਸਾਤਿ ਯਸ੍ਸ ਕਸ੍ਸਚਿ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ. ਧਮ੍ਮਸ੍ਸਵਨਨ੍ਤਿ ਧਮ੍ਮਸ੍ਸਵਨਟ੍ਠਾਨਂ, ਧਮ੍ਮਸ੍ਸਵਨਤ੍ਥਂ ਵਾ. ਧਮ੍ਮਸ੍ਸਵਨਗ੍ਗਨ੍ਤਿ ਧਮ੍ਮਸ੍ਸਵਨਂ ਗਣ੍ਹਨ੍ਤਿ ਏਤ੍ਥਾਤਿ ਧਮ੍ਮਸ੍ਸਵਨਗ੍ਗੋ, ਧਮ੍ਮਸਵਨਮਣ੍ਡਪੋ. ਅਥ ਵਾ ਧਮ੍ਮਸ੍ਸਵਨਂ ਗਣ੍ਹਾਤੀਤਿ ਧਮ੍ਮਸ੍ਸਵਨਗ੍ਗੋ, ਧਮ੍ਮਸ੍ਸਵਨਟ੍ਠਾਨੇ ਸਮਾਗਮਜਨੋ, ਤਂ ਧਮ੍ਮਸ੍ਸਵਨਗ੍ਗਂ. ਚਿਤ੍ਤੀਕਾਰਨ੍ਤਿ ਅਪਚਾਯਨਾਕਾਰਂ. ਵਿਕ੍ਖਿਤ੍ਤੋ ਵਾ ਅਨਾਦਰੋ ਵਾ ਹੁਤ੍ਵਾ ਨਿਸੀਦਤੀਤਿ ਯੋਜਨਾ. ਕਾਯਪਾਗਬ੍ਬਿਯਨ੍ਤਿ ਭੁਸਂ ਗਰਤਿ ਅਞ੍ਞੇ ਪੀਲ਼ੇਤਿ ਅਨੇਨਾਤਿ ਪਗਬ੍ਬੋ, ਅਤਿਮਾਨੋ, ਓਟ੍ਠਜੋ ਤਤਿਯਕ੍ਖਰੋ. ਪਗਬ੍ਬਸ੍ਸ ਭਾਵੋ ਪਾਗਬ੍ਬਿਯਂ, ਕਾਯੇਨ ਪਾਗਬ੍ਬਿਯਂ ਕਾਯਪਾਗਬ੍ਬਿਯਂ (ਵਜਿਰ. ਟੀ. ਪਰਿਵਾਰ ੨੭੧; ਸਾਰਤ੍ਥ. ਟੀ. ਪਰਿਵਾਰ ੩.੨੭੧; ਵਿ. ਵਿ. ਟੀ. ਪਰਿਵਾਰ ੨.੨੭੧ ਸਂ. ਨਿ. ਅਟ੍ਠ. ੨.੨.੧੪੬; ਅ. ਨਿ. ਅਟ੍ਠ. ੩.੬.੮੨-੮੪; ਸੁ. ਨਿ. ਅਟ੍ਠ. ੧.੧੪੪), ਕਾਯਾਨਾਚਾਰਂ. ਤਿਸ੍ਸੋ ਸਿਕ੍ਖਾਤਿ ਅਧਿਸੀਲਸਿਕ੍ਖਾਦਿਕਾ ਤਿਸ੍ਸੋ ਸਿਕ੍ਖਾ. ਪਮਜ੍ਜਨਂ ਪਮਾਦੋ, ਸਤਿਵਿਪ੍ਪਵਾਸੋਤਿ ਆਹ ‘‘ਪਮਾਦੇ ਚ ਸਤਿਵਿਪ੍ਪਵਾਸੇ’’ਤਿ. ਆਮਿਸਪਟਿਸਨ੍ਧਾਰਨ੍ਤਿ ਆਮਿਸੇਨ ਅਤ੍ਤਨੋ, ਪਰੇਸਞ੍ਚ ਅਨ੍ਤਰਸ੍ਸ ਪਟਿਸਨ੍ਦਹਨਂ ਆਮਿਸਪਟਿਸਨ੍ਧਾਰੋ, ਤਥਾ ਧਮ੍ਮਪਟਿਸਨ੍ਧਾਰੋ.
੨੭੨. ਸਤ੍ਥਰਿਪਿ ਅਗਾਰਵੋਤਿਆਦੀਨਂ ਅਤ੍ਥੋਤਿ ਸਮ੍ਬਨ੍ਧੋ. ‘‘ਅਨੀਚਵੁਤ੍ਤੀ’’ਤਿਆਦਿਨਾ ਅਪ੍ਪਤਿਸ੍ਸੋਤਿ ਪਦਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ, ਸਦ੍ਦਤ੍ਥੋ ਪਨੇਵਂ ਵੇਦਿਤਬ੍ਬੋ, ਪਟਿਮੁਖਂ ਆਦਰੇਨ ਸਤ੍ਥੁਵਚਨਂ ਅਸੁਣਨ੍ਤੋ ਅਪ੍ਪਤਿਸ੍ਸੋ ਨਾਮਾਤਿ. ਅਜ੍ਝਤ੍ਤਂ ਵਾਤਿ ਏਤ੍ਥ ਨਿਯਕਜ੍ਝਤ੍ਤਾਦੀਸੁ ਚਤੂਸੁ ਨਿਯਕਜ੍ਝਤ੍ਤਭਾਵਞ੍ਚ ਸਤ੍ਤਮੀਵਿਭਤ੍ਤਿਯਾ ਅਮਾਦੇਸਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਸਨ੍ਤਾਨੇ ਵਾ’’ਤਿ. ‘‘ਅਤ੍ਤਨੋ ਪਕ੍ਖੇ ਵਾ’’ਤਿ ਇਮਿਨਾ ਅਤ੍ਤਨੋ ਚਿਤ੍ਤਸਨ੍ਤਾਨੇਤਿ ਅਤ੍ਥਂ ਪਟਿਕ੍ਖਿਪਤਿ. ਤਤ੍ਰ ਤੁਮ੍ਹੇਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਤਸ੍ਮਿਂ ਅਜ੍ਝਤ੍ਤਬਹਿਦ੍ਧਾਭੇਦੇ’’ਤਿ. ਸਪਰਸਨ੍ਤਾਨੇਤਿ ਅਤ੍ਤਪਰਸਨ੍ਤਾਨੇ. ਪਹਾਨਾਯਾਤਿ ਏਤ੍ਥ ਹਾਧਾਤੁਯਾ ਕਰਣਞ੍ਚ ਆਯਸਦ੍ਦਸ੍ਸ ਤਦਤ੍ਥਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਮੇਤ੍ਤਾਭਾਵਨਾਦੀਹਿ ਨਯੇਹਿ ਪਹਾਨਤ੍ਥ’’ਨ੍ਤਿ. ਮੇਤ੍ਤਾਭਾਵਨਾਦੀਹੀਤਿਆਦਿਸਦ੍ਦੇਨ ਕਰੁਣਾਭਾਵਨਾਦਿਂ ਸਙ੍ਗਣ੍ਹਾਤਿ. ਤਨ੍ਤਿ ਵਿਵਾਦਮੂਲਂ. ‘‘ਅਪ੍ਪਵਤ੍ਤਿਭਾਵਾਯਾ’’ਤਿ ਇਮਿਨਾ ਅਨਵਸ੍ਸਵਾਯਾਤਿ ਏਤ੍ਥ ਅਵਪੁਬ੍ਬ ਸੁਧਾਤੁਯਾ ਪਵਤ੍ਤਨਤ੍ਥਂ ਦਸ੍ਸੇਤਿ.
ਸਨ੍ਦਿਟ੍ਠਿਪਰਾਮਾਸੀਤਿ ਏਤ੍ਥ ਸਸ੍ਸ ਅਤ੍ਤਨੋ ਇਦਂ ਸਂ, ਸਂ ਦਿਟ੍ਠਿਂ ਪਰਤੋ ਆਮਸਤੀਤਿ ਸਨ੍ਦਿਟ੍ਠਿਪਰਾਮਾਸੀਤਿ ਦਸ੍ਸੇਨ੍ਤੋ ਆਹ ‘‘ਸਕਮੇਵ ਦਿਟ੍ਠਿਂ ਪਰਾਮਸਤੀ’’ਤਿ. ‘‘ਯ’’ਨ੍ਤਿਆਦਿਨਾ ਪਰਾਮਸਨਾਕਾਰਂ ਦਸ੍ਸੇਤਿ. ਆਧਾਨਗ੍ਗਾਹੀਤਿ ਏਤ੍ਥ ਆਭੁਸੋ ਠਿਯਤੇ ਆਧਾਨਨ੍ਤਿ ਵਚਨਤ੍ਥੇਨ ਆਧਾਨਸਦ੍ਦੋ ਦਲ਼੍ਹਪਰਿਯਾਯੋਤਿ ਆਹ ‘‘ਦਲ਼੍ਹਗ੍ਗਾਹੀ’’ਤਿ. ਦਲ਼੍ਹਂ ਗਣ੍ਹਾਤੀਤਿ ਦਲ਼੍ਹਗ੍ਗਾਹੀ.
੨੭੩. ਅਨੁਵਾਦਮੂਲਨਿਦ੍ਦੇਸੋ ਕਿਞ੍ਚਾਪਿ ਸਮਾਨੋਤਿ ਯੋਜਨਾ. ਅਥ ਖੋਤਿ ਤਥਾ ਸਮਾਨੋਪਿ, ਅਯਮੇਤ੍ਥ ਵਿਸੇਸੋਤਿ ਸਮ੍ਬਨ੍ਧੋ. ਵਿਵਦਨ੍ਤਾਨਂ ਪੁਗ੍ਗਲਾਨਨ੍ਤਿ ਯੋਜਨਾ. ਤਥਾ ਵਿਵਦਨ੍ਤਾਤਿ ਤੇਨਾਕਾਰੇਨ ਵਿਵਦਨ੍ਤਾ, ਅਨੁਵਦਨ੍ਤੀਤਿ ਸਮ੍ਬਨ੍ਧੋ. ‘‘ਅਸੁਕਂ ਨਾਮ ਵਿਪਤ੍ਤਿਂ ਆਪਨ੍ਨੋ’’ਤਿ ਵੁਤ੍ਤਮੇਵਤ੍ਥਂ ਆਪਤ੍ਤਿਯਾ ਸਲ੍ਲਕ੍ਖੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਪਾਰਾਜਿਕਂ ਆਪਨ੍ਨੋਸੀ’’ਤਿਆਦਿ. ਏਤ੍ਥਾਤਿ ਅਨੁਵਾਦਮੂਲੇ. ਵਿਸੇਸੋਤਿ ਵਿਵਾਦਮੂਲਤੋ ਵਿਸੇਸੋ. ਵਿਵਦਨ੍ਤਾਨਂ ਕੋਧੂਪਨਾਹਾਦੀਨਿ ਵਿਵਾਦਮੂਲਾਨਿ, ਅਨੁਵਦਨ੍ਤਾਨਂ ਅਨੁਵਾਦਮੂਲਾਨੀਤਿ ਵੁਤ੍ਤਂ ਹੋਤਿ.
੨੭੪. ਮੇਤ੍ਤਂ ਕਾਯਕਮ੍ਮਂ ਨਾਮਾਤਿ ਏਤ੍ਥ ਮੇਤ੍ਤਾ ਏਤਸ੍ਸਤ੍ਥੀਤਿ ਮੇਤ੍ਤਂ, ਕਾਯਕਮ੍ਮਂ, ਮੇਤ੍ਤਚਿਤ੍ਤਸਹਗਤਂ ਕਾਯਕਮ੍ਮਨ੍ਤਿ ਵੁਤ੍ਤਂ ਹੋਤਿ. ਤੇਨ ਵੁਤ੍ਤਂ ‘‘ਮੇਤ੍ਤਚਿਤ੍ਤੇਨ ਕਤਂ ਕਾਯਕਮ੍ਮ’’ਨ੍ਤਿ. ਸਮ੍ਮੁਖਪਰਮ੍ਮੁਖਾਨਂ ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਤੇਸੁ ਸਮ੍ਮੁਖਪਰਮ੍ਮੁਖੇਸੁ. ਕਾਯਕਮ੍ਮਂ ਨਾਮਾਤਿ ਮੇਤ੍ਤਂ ਕਾਯਕਮ੍ਮਂ ਨਾਮ. ਥੇਰਾਨਂ ਦਾਨਇਤਿ ਸਮ੍ਬਨ੍ਧੋ. ਉਭਯੇਹਿਪੀਤਿ ਨਵਕਤ੍ਥੇਰੇਹਿਪਿ. ਤੇਸੂਤਿ ਨਵਕਤ੍ਥੇਰੇਸੁ. ਅਵਮਞ੍ਞਨ੍ਤਿ ਅਵਮਾਨਂ. ਅਤ੍ਤਨੋ ਦੁਨ੍ਨਿਕ੍ਖਿਤ੍ਤਾਨਂ ਪਟਿਸਾਮਨਂ ਵਿਯ ਪਟਿਸਾਮਨਨ੍ਤਿ ਯੋਜਨਾ. ‘‘ਮੇਤ੍ਤਾਕਾਯਕਮ੍ਮਸਙ੍ਖਾਤੋ’’ਤਿ ਇਮਿਨਾ ਅਯਮ੍ਪਿ ਧਮ੍ਮੋਤਿ ਏਤ੍ਥ ਧਮ੍ਮਸਰੂਪਂ ਦਸ੍ਸੇਤਿ. ਪਿਸਦ੍ਦੋ ਉਪਰਿ ਵਕ੍ਖਮਾਨੇ ਧਮ੍ਮੇ ਅਪੇਕ੍ਖਤਿ. ‘‘ਸਰਿਤਬ੍ਬੋ’’ਤਿ ਇਮਿਨਾ ਅਨੀਯਸਦ੍ਦੋ ਕਮ੍ਮਵਾਚਕੋਤਿ ਦਸ੍ਸੇਤਿ. ਸਤਿਜਨਕੋਤਿ ਸਬ੍ਰਹ੍ਮਚਾਰੀਨਂ ਸਤਿਜਨਕੋ. ਤਸ੍ਸ ਪਦਸ੍ਸ ਅਧਿਪ੍ਪਾਯਂ ਦਸ੍ਸੇਨ੍ਤੋ ਆਹ ‘‘ਯੋ ਨ’’ਨ੍ਤਿਆਦਿ. ਤਤ੍ਥ ਯੋਤਿ ਪੁਗ੍ਗਲੋ. ਨਨ੍ਤਿ ਮੇਤ੍ਤਂ ਕਾਯਕਮ੍ਮਂ. ਤਂ ਪੁਗ੍ਗਲਂ ਅਨੁਸ੍ਸਰਨ੍ਤੀਤਿ ਸਮ੍ਬਨ੍ਧੋ. ਯੇਸਨ੍ਤਿ ਸਬ੍ਰਹ੍ਮਚਾਰੀਨਂ. ਤੇਤਿ ਸਬ੍ਰਹ੍ਮਚਾਰਿਨੋ. ਪਸਨ੍ਨਚਿਤ੍ਤਾ ਹੁਤ੍ਵਾਤਿ ਸਮ੍ਬਨ੍ਧੋ. ‘‘ਪਿਯਂ ਕਰੋਤੀ’’ਤਿ ਇਮਿਨਾ ਪਿਯਕਰਣੋਤਿ ਪਦਸ੍ਸ ਪਿਯਂ ਕਰੋਤੀਤਿ ਪਿਯਕਰਣੋਤਿ ਵਚਨਤ੍ਥਂ ਦਸ੍ਸੇਤਿ. ਏਸੇਵ ਨਯੋ ਗਰੁਕਰਣੋਤਿ ਏਤ੍ਥਾਪਿ. ‘‘ਸਙ੍ਗਹੇਤਬ੍ਬਭਾਵਾਯਾ’’ਤਿ ਇਮਿਨਾ ਸਙ੍ਗਹਾਯਾਤਿ ਪਦਸ੍ਸ ਭਾਵਪ੍ਪਧਾਨਕਮ੍ਮਨਿਦ੍ਦੇਸਭਾਵਂ ਦਸ੍ਸੇਤਿ. ਸਙ੍ਗਹੇਤਬ੍ਬੋਤਿ ਸਙ੍ਗਹੋ, ਤਦਤ੍ਥਾਯ. ਤੇਹੀਤਿ ਸਬ੍ਰਹ੍ਮਚਾਰੀਹਿ. ‘‘ਸਮਗ੍ਗਭਾਵਾਯਾ’’ਤਿ ਇਮਿਨਾ ਸਮਗ੍ਗਸ੍ਸ ਭਾਵੋ ਸਾਮਗ੍ਗੀਤਿ ਵਚਨਤ੍ਥਂ ਦਸ੍ਸੇਤਿ.
ਪਗ੍ਗਯ੍ਹ ਵਚਨਨ੍ਤਿ ਪਗ੍ਗਹੇਤ੍ਵਾ ਵਚਨਂ. ਵਿਹਾਰੇਤਿ ਆਧਾਰੇ ਭੁਮ੍ਮਂ, ਥੇਰੇ ਅਸਨ੍ਤੇਤਿ ਯੋਜਨਾ. ਤਨ੍ਤਿ ਥੇਰਂ ਕਦਾ ਆਗਮਿਸ੍ਸਤਿ ਨੁਖੋਤਿ ਯੋਜਨਾ. ਮਮਾਯਨਵਚਨਨ੍ਤਿ ਮਮਾਯਨਾਕਾਰੇਨ ਪਵਤ੍ਤਂ ਵਚਨਂ. ਮੇਤ੍ਤਾਸਿਨੇਹਸਿਨਿਦ੍ਧਾਨੀਤਿ ਮੇਤ੍ਤਾਸਙ੍ਖਾਤੇਨ ਸਿਨੇਹੇਨ ਸਿਨੇਹਿਤਾਨਿ. ਨਯਨਾਨੀਤਿ ਚਕ੍ਖੂਨਿ. ‘‘ਅਪ੍ਪਾਬਾਧੋ’’ਤਿ ਇਮਿਨਾ ਅਰੋਗੋਤਿ ਪਦਸ੍ਸੇਵ ਅਤ੍ਥਂ ਦਸ੍ਸੇਤਿ. ਨਿਚ੍ਚਾਬਾਧੇਨ ਵਾ ਅਰੋਗੋ, ਆਗਨ੍ਤੁਕਾਬਾਧੇਨ ਅਪ੍ਪਾਬਾਧੋ, ਅਜ੍ਝਤ੍ਤਾਬਾਧੇਨ ਵਾ ਅਰੋਗੋ, ਬਹਿਦ੍ਧਾਬਾਧੇਨ ਅਪ੍ਪਾਬਾਧੋ, ਕਾਯਾਬਾਧੇਨ ਵਾ ਅਰੋਗੋ, ਚਿਤ੍ਤਾਬਾਧੇਨ ਅਪ੍ਪਾਬਾਧੋ. ਸਮਨ੍ਨਾਹਰਣਨ੍ਤਿ ਪੁਨਪ੍ਪੁਨਂ ਮਨਸਿਕਰਣਂ.
ਨ ਪੁਗ੍ਗਲਂ ਪਟਿਵਿਭਜਿਤ੍ਵਾ ਭੁਞ੍ਜਤੀਤਿ ਯੋਜਨਾ. ਤਦਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਯੋ ਹੀ’’ਤਿਆਦਿ. ਤਤ੍ਥ ਯੋਤਿ ਪੁਗ੍ਗਲੋ, ਭੁਞ੍ਜਤੀਤਿ ਸਮ੍ਬਨ੍ਧੋ. ‘‘ਏਤ੍ਤਕਂ…ਪੇ… ਭੁਞ੍ਜਿਸ੍ਸਾਮੀ’’ਤਿ ਇਮਿਨਾ ਆਮਿਸਪਟਿਵਿਭਤ੍ਤਭੋਗਿਭਾਵਂ ਦਸ੍ਸੇਤਿ. ‘‘ਏਤ੍ਤਕਂ ਵਾ ਅਸੁਕਸ੍ਸ ਚ…ਪੇ… ਭੁਞ੍ਜਿਸ੍ਸਾਮੀ’’ਤਿ ਇਮਿਨਾ ਪੁਗ੍ਗਲਪਟਿਵਿਭਤ੍ਤਭੋਗਿਭਾਵਂ ਦਸ੍ਸੇਤਿ. ਅਯਨ੍ਤਿ ਪੁਗ੍ਗਲੋ. ਆਭਤਨ੍ਤਿ ਗਾਮਾਦਿਤੋ ਆਨੀਤਂ. ਅਦਾਤੁਮ੍ਪੀਤਿ ਪਿਸਦ੍ਦੇਨ ਦਾਤੁਮ੍ਪਿ ਵਟ੍ਟਤੀਤਿ ਦਸ੍ਸੇਤਿ. ਦਾਨਞ੍ਹਿ ਨਾਮ ਨ ਕਸ੍ਸਚਿ ਵਾਰਿਤਂ. ਸਬ੍ਬੇਸਨ੍ਤਿ ਦੁਸ੍ਸੀਲਸੀਲਵਨ੍ਤਾਨਂ. ਵੁਤ੍ਤਨ੍ਤਿ ਅਟ੍ਠਕਥਾਯਂ (ਦੀ. ਨਿ. ਅਟ੍ਠ. ੨.੧੪੧; ਮ. ਨਿ. ਅਟ੍ਠ. ੨.੪੯੨; ਅ. ਨਿ. ਅਟ੍ਠ. ੩.੬.੧੧) ਵੁਤ੍ਤਂ. ਵਿਚੇਯ੍ਯਾਤਿ ਵਿਚਿਨਿਤ੍ਵਾ. ਦਾਤੁਮ੍ਪੀਤਿ ਪਿਸਦ੍ਦੇਨ ਅਵਿਚਿਨਿਤ੍ਵਾ ਸਾਮਞ੍ਞਤੋ ਦਾਤੁਮ੍ਪਿ ਵਟ੍ਟਤੀਤਿ ਸਮ੍ਪਿਣ੍ਡੇਤਿ. ਨਨੁ ਏਵਂ ਸਤਿ ਪੁਗ੍ਗਲਵਿਭਾਗੋ ਕਤੋ ਨਾਮ ਹੋਤਿ, ਕਸ੍ਮਾ ਵਿਚੇਯ੍ਯ ਦਾਤੁਂ ਵਟ੍ਟਤੀਤਿ ਆਹ ‘‘ਨ ਹੀ’’ਤਿਆਦਿ. ਹੀਤਿ ਯਸ੍ਮਾ. ਏਤੇਤਿ ਗਿਲਾਨਾਦਯੋ. ਇਦਂ ਪਦਂ ਵਿਚਿਨਿਤ੍ਵਾਤਿ ਪਦੇ ਕਮ੍ਮਂ, ‘‘ਦੇਨ੍ਤੇਨਾ’’ਤਿ ਪਦੇ ਸਮ੍ਪਦਾਨਂ. ਹੀਤਿ ਸਚ੍ਚਂ. ਇਤਿ ਅਯਨ੍ਤਿ ਇਤਿ ਮਨਸਿਕਤ੍ਵਾ ਅਯਂ ਸਾਰਣੀਯਧਮ੍ਮਪੂਰਕੋ.
ਅਖਣ੍ਡਾਨੀਤਿਆਦੀਸੁ ਪਠਮਂ ਤਾਵ ਖਣ੍ਡਛਿਦ੍ਦਸਬਲਕਮ੍ਮਾਸਾਨਿ ਦਸ੍ਸੇਤ੍ਵਾ ਤੇਸਂ ਪਟਿਪਕ੍ਖਵਸੇਨ ਅਖਣ੍ਡਾਦੀਨਿ ਦਸ੍ਸੇਨ੍ਤੋ ਆਹ ‘‘ਯਸ੍ਸਾ’’ਤਿਆਦਿ. ਤਤ੍ਥ ਯਸ੍ਸਾਤਿ ਭਿਕ੍ਖੁਸ੍ਸ, ਸਿਕ੍ਖਾਪਦਂ ਭਿਨ੍ਨਨ੍ਤਿ ਸਮ੍ਬਨ੍ਧੋ. ਸਤ੍ਤਸੁ ਆਪਤ੍ਤਿਕ੍ਖਨ੍ਧੇਸੂਤਿ ਆਧਾਰੇ ਭੁਮ੍ਮਂ, ਸਿਕ੍ਖਾਪਦਨ੍ਤਿ ਸਮ੍ਬਨ੍ਧੋ. ਆਪਤ੍ਤਿਞ੍ਹਿ ਪਟਿਚ੍ਚ ਸਿਕ੍ਖਾਪਦਸ੍ਸ ਪਞ੍ਞਤ੍ਤਤ੍ਤਾ ਆਪਤ੍ਤਿ ਤਸ੍ਸ ਵਿਸਯੋ ਹੋਤਿ. ਆਦਿਮ੍ਹਿ ਵਾ ਅਨ੍ਤੇ ਵਾਤਿ ਸਿਕ੍ਖਾਪਦਾਨਂ ਆਦਿਮ੍ਹਿ ਵਾ ਅਨ੍ਤੇ ਵਾ. ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਸਿਕ੍ਖਾਪਦੇ ਭਿਨ੍ਨੇ ਆਪਤ੍ਤਿਸਮ੍ਭਵਤੋ ਵੁਤ੍ਤਂ ‘‘ਸਿਕ੍ਖਾਪਦਂ ਭਿਨ੍ਨ’’ਨ੍ਤਿ. ਖਣ੍ਡਂ ਨਾਮਾਤਿ ਛਿਨ੍ਨਂ ਨਾਮ. ਵੇਮਜ੍ਝੇਤਿ ਸਿਕ੍ਖਾਪਦਾਨਂ ਵੇਮਜ੍ਝੇ. ਭਿਨ੍ਨਨ੍ਤਿ ਸਿਕ੍ਖਾਪਦਂ ਭਿਨ੍ਨਂ. ਛਿਦ੍ਦਂ ਨਾਮਾਤਿ ਵਿਵਰਂ ਨਾਮ. ਦ੍ਵੇ ਤੀਣਿ ਸਿਕ੍ਖਾਪਦਾਨੀਤਿ ਸਮ੍ਬਨ੍ਧੋ. ਸਬਲਂ ਨਾਮਾਤਿ ਚਿਤ੍ਰਂ ਨਾਮ. ਭਿਨ੍ਨਾਨੀਤਿ ਸਿਕ੍ਖਾਪਦਾਨਿ ਭਿਨ੍ਨਾਨਿ. ਕਮ੍ਮਾਸਂ ਨਾਮਾਤਿ ਵਿਚਿਤ੍ਰਂ ਨਾਮ. ਏਤ੍ਥ ਚ ਏਕਸ੍ਮਿਂ ਠਾਨੇ ਏਕੇਨ ਵਿਸਭਾਗਵਣ੍ਣੇਨ ਚਿਤ੍ਰਂ ਸਬਲਂ ਨਾਮ, ਨਾਨਾਠਾਨੇ ਨਾਨਾਵਣ੍ਣੇਨ ਵਿਚਿਤ੍ਰਂ ਕਮ੍ਮਾਸਂ ਨਾਮਾਤਿ ਅਯਮੇਤੇਸਂ ਵਿਸੇਸੋ. ਖਣ੍ਡਾਦੀਨਂ ਵਿਪਰਿਵਤ੍ਤਨਵਸੇਨ ਅਖਣ੍ਡਾਦੀਨਿ ਦਸ੍ਸੇਨ੍ਤੋ ਆਹ ‘‘ਯਸ੍ਸ ਪਨਾ’’ਤਿਆਦਿ. ਅਭਿਨ੍ਨਾਨਿਸੀਲਾਨੀਤਿ ਅਭਿਨ੍ਨਾਨਿ ਸਿਕ੍ਖਾਪਦਸੀਲਾਨਿ. ਤਾਨਿ ਪਨਾਤਿ ਸੀਲਾਨਿ ਪਨ. ‘‘ਏਤਾਨੀ’’ਤਿ ਪਦਂ ਪਦਾਲਙ੍ਕਾਰਮਤ੍ਤਂ. ਭੁਜਿਸ੍ਸਭਾਵਕਰਣਤੋਤਿ ਤਣ੍ਹਾਦਾਸਬ੍ਯਤੋ ਮੋਚੇਤ੍ਵਾ ਭੁਜਿਸ੍ਸਕਰਣਭਾਵਤੋ. ਇਮਿਨਾ ‘‘ਭੁਜਿਸ੍ਸਭਾਵਕਰਣਾਨੀ’’ਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪਵਸੇਨ ਏਵਂ ਵੁਤ੍ਤਨ੍ਤਿ ਦਸ੍ਸੇਤਿ. ਭੁਜਿਸ੍ਸਾਨੀਤਿ ਵੁਚ੍ਚਨ੍ਤੀਤਿ ਸਮ੍ਬਨ੍ਧੋ. ਵਿਞ੍ਞੂਹੀਤਿ ਬੁਦ੍ਧਾਦੀਹਿ ਸਪ੍ਪੁਰਿਸੇਹਿ. ਉਪਚਾਰਸਮਾਧਿਂ ਅਪ੍ਪਨਾਸਮਾਧਿਂ ਵਾਤਿ ਏਤ੍ਥ ਵਾਸਦ੍ਦੋ ਸਮੁਚ੍ਚਯਤ੍ਥੋ. ਉਪਚਾਰਸਮਾਧਿਞ੍ਚ ਅਪ੍ਪਨਾਸਮਾਧਿਂ ਚਾਤਿ ਹਿ ਅਤ੍ਥੋ. ‘‘ਸਂਵਤ੍ਤਯਨ੍ਤੀ’’ਤਿ ਇਮਿਨਾ ਸਮਾਧਿਸਂਵਤ੍ਤਨਿਕਾਨੀਤਿ ਏਤ੍ਥ ਅਨੀਯਸਦ੍ਦੋ ਬਹੁਲਂ ਕਤ੍ਤੁਵਾਚਕੋਤਿ ਦਸ੍ਸੇਤਿ. ਸੀਲਸਾਮਞ੍ਞਗਤੋਤਿ ਏਤ੍ਥ ਸਮਾਨਸ੍ਸ ਭਾਵੋ ਸਾਮਞ੍ਞਂ, ਤਂ ਗਤੋਤਿ ਸਾਮਞ੍ਞਗਤੋ, ਸੀਲੇਨ ਸਾਮਞ੍ਞਗਤੋ ਸੀਲਸਾਮਞ੍ਞਗਤੋ, ਹੁਤ੍ਵਾ ਵਿਹਰਤੀਤਿ ਯੋਜਨਾ. ਤੇਨ ਵੁਤ੍ਤਂ ‘‘ਸਮਾਨਭਾਵੂਪਗਤਸੀਲੋ ਵਿਹਰਤੀ’’ਤਿ.
ਯਾਯਂ ਦਿਟ੍ਠੀਤਿ ਏਤ੍ਥ ‘‘ਦਿਟ੍ਠੀ’’ਤਿ ਸਾਮਞ੍ਞਗਤਸ੍ਸਾਪਿ ਸਦ੍ਦਸ੍ਸ ‘‘ਅਰਿਯਾ’’ਤਿ ਸਦ੍ਦਨ੍ਤਰਸਨ੍ਨਿਧਾਨੇਨ ਵਿਸੇਸਵਿਸਯਤ੍ਤਾ ਸਮ੍ਮਾਦਿਟ੍ਠੀਤਿ ਆਹ ‘‘ਮਗ੍ਗਸਮ੍ਪਯੁਤ੍ਤਾ ਸਮ੍ਮਾਦਿਟ੍ਠੀ’’ਤਿ. ‘‘ਮਗ੍ਗਸਮ੍ਪਯੁਤ੍ਤਾ’’ਤਿ ਇਮਿਨਾ ਲੋਕਿਯਸਮ੍ਮਾਦਿਟ੍ਠਿਂ ਪਟਿਕ੍ਖਿਪਤਿ. ਨਿਦ੍ਦੋਸਾਤਿ ਵਿਸੁਦ੍ਧਤ੍ਤਾ, ਉਤ੍ਤਮਤ੍ਤਾ ਵਾ ਨਿਦ੍ਦੋਸਾ. ਇਮਿਨਾ ਅਰਿਯਸਦ੍ਦੋ ਨਿਦ੍ਦੋਸਤ੍ਥਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋਤਿ ਦਸ੍ਸੇਤਿ. ਨਿਯ੍ਯਾਤੀਤਿ ਨਿਬ੍ਬਾਨਂ ਯਾਤਿ. ਇਮਿਨਾ ਅਨੀਯਸਦ੍ਦੋ ਬਹੁਲਂ ਕਤ੍ਤੁਵਾਚਕੋਤਿ ਦਸ੍ਸੇਤਿ. ਯੋ ਤਥਾਕਾਰੀ ਹੋਤਿ, ਤਕ੍ਕਰਸ੍ਸਾਤਿ ਯੋਜਨਾ. ਤਥਾਕਾਰੀਤਿ ਤਾਯ ਮਗ੍ਗਸਮ੍ਪਯੁਤ੍ਤਾਯ ਸਮ੍ਮਾਦਿਟ੍ਠਿਯਾ ਕਾਰੀ ਹੋਤਿ. ਇਮਿਨਾ ਤਾਯ ਸਮ੍ਮਾਦਿਟ੍ਠਿਯਾ ਕਰੋਤੀਤਿ ਤਕ੍ਕਰੋਤਿ ਵਚਨਤ੍ਥਂ ਦਸ੍ਸੇਤਿ. ਦੁਕ੍ਖਕ੍ਖਯਾਯਾਤਿ ਏਤ੍ਥ ਖੀਯਨਂ ਖਯੋ, ਦੁਕ੍ਖਸ੍ਸ ਖਯੋ ਦੁਕ੍ਖਕ੍ਖਯੋ, ਤਦਤ੍ਥਾਯਾਤਿ ਦਸ੍ਸੇਨ੍ਤੋ ਆਹ ‘‘ਸਬ੍ਬਦੁਕ੍ਖਸ੍ਸ ਖਯਤ੍ਥ’’ਨ੍ਤਿ. ਸੇਸਨ੍ਤਿ ਵੁਤ੍ਤਵਚਨਤੋ ਸੇਸਂ ਵਚਨਂ.
ਇਤਿ ਕਤਿਪੁਚ੍ਛਾਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਖਨ੍ਧਕਪੁਚ੍ਛਾਵਾਰੋ
ਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ
੩੨੦. ਉਪਸਮ੍ਪਦਕ੍ਖਨ੍ਧਕਨ੍ਤਿ ਮਹਾਖਨ੍ਧਕਂ. ‘‘ਨਿਦਾਨੇਨ ਚ ਨਿਦ੍ਦੇਸੇਨ ਚ ਸਦ੍ਧਿ’’ਨ੍ਤਿ ਇਮਿਨਾ ਸਹ ਨਿਦਾਨੇਨਾਤਿ ਸਨਿਦਾਨਂ, ਸਹ ਨਿਦ੍ਦੇਸੇਨਾਤਿ ਸਨਿਦ੍ਦੇਸਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਨਿਦਾਨੇਨਾਤਿ ਸਿਕ੍ਖਾਪਦਪਞ੍ਞਤ੍ਤਿਦੇਸਸਙ੍ਖਾਤੇਨ ਨਿਦਾਨੇਨ. ਨਿਦ੍ਦੇਸੇਨਾਤਿ ਪੁਗ੍ਗਲਾਦਿਨਿਦ੍ਦੇਸੇਨ. ਤਤ੍ਥਾਤਿ ਉਪਸਮ੍ਪਦਕ੍ਖਨ੍ਧਕੇ. ਸਮੁਕ੍ਕਟ੍ਠਪਦਾਨਨ੍ਤਿ ਏਤ੍ਥ ਸਮੁਕ੍ਕਟ੍ਠਸਦ੍ਦੋ ਉਤ੍ਤਮਪਰਿਯਾਯੋਤਿ ਆਹ ‘‘ਉਤ੍ਤਮਾਨੀ’’ਤਿ. ਪਦਾਨੀਤਿ ‘‘ਨ ਭਿਕ੍ਖਵੇ ਊਨਵੀਸਤਿਵਸ੍ਸੋ ਪੁਗ੍ਗਲੋ ਉਪਸਮ੍ਪਾਦੇਤਬ੍ਬੋ’’ਤਿ (ਪਾਚਿ. ੪੦੨-੪੦੩; ਮਹਾਵ. ੧੨੪) ਆਦਿਨਾ ਨਯੇਨ ਵੁਤ੍ਤਾਨਿ ਪਦਾਨਿ. ਇਮੇਹਿ ਪਦੇਹਿ ‘‘ਸਮੁਕ੍ਕਟ੍ਠਾਨਿ ਪਦਾਨਿ ਸਮੁਕ੍ਕਟ੍ਠਪਦਾਨੀ’’ਤਿ ਵਚਨਤ੍ਥਂ ਦਸ੍ਸੇਤਿ. ਇਤੀਤਿ ਅਯਮਤ੍ਥੋ. ਕਸ੍ਮਾ ਪਨੇਤ੍ਥ ‘‘ਸਮੁਕ੍ਕਟ੍ਠਪਦਾਨਂ ਕਤਿ ਆਪਤ੍ਤਿਯੋ’’ਤਿ ਪਦਾਨਮੇਵ ਸਾਮਿਵਸੇਨ ਨਿਦ੍ਦੇਸੋ ਕਤੋ, ਨਨੁ ਆਪਤ੍ਤਿਯੋ ਨਾਮ ਪੁਗ੍ਗਲਾਨਞ੍ਞੇਵ ਹੋਨ੍ਤੀਤਿ ਆਹ ‘‘ਯੇਨ ਯੇਨ ਹੀ’’ਤਿਆਦਿ. ਹੀਤਿ ਯਸ੍ਮਾ. ਯੇਨ ਯੇਨ ਪਦੇਨ ਪਞ੍ਞਤ੍ਤਾਤਿ ਸਮ੍ਬਨ੍ਧੋ. ਸਾ ਸਾਤਿ ਆਪਤ੍ਤਿ. ਦ੍ਵੇ ਆਪਤ੍ਤਿਯੋਤਿ ਏਤ੍ਥ ਦ੍ਵਿਨ੍ਨਂ ਆਪਤ੍ਤੀਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਪਾਚਿਤ੍ਤਿਯਂ, ਦੁਕ੍ਕਟ’’ਨ੍ਤਿ.
ਨਸ੍ਸਨ੍ਤੇਤੇਤਿ ਨਸ੍ਸਨ੍ਤੁ ਏਤੇ. ਵਿਨਸ੍ਸਨ੍ਤੇਤੇਤਿ ਵਿਨਸ੍ਸਨ੍ਤੁ ਏਤੇ ਭਿਕ੍ਖੂਤਿ ਅਤ੍ਥੋ. ਤੇਹੀਤਿ ਭਿਕ੍ਖੂਹਿ. ਵਦਤੋਤਿ ਵਦਨ੍ਤਾਨਂ. ਸੇਸੇਸੁ ਉਪੋਸਥਕਰਣੇਸੂਤਿ ਸਮ੍ਬਨ੍ਧੋ. ‘‘ਦੁਕ੍ਕਟਾਪਤ੍ਤਿਯੇਵਾ’’ਤਿ ਇਮਿਨਾ ਏਕਾ ਆਪਤ੍ਤੀਤਿ ਏਤ੍ਥ ਅਤ੍ਥਪਕਰਣਾਦਿਵਸੇਨ ਦੁਕ੍ਕਟਾਪਤ੍ਤਿਯੇਵਾਤਿ ਦਸ੍ਸੇਤਿ.
ਪਵਾਰਣਕ੍ਖਨ੍ਧਕੇਪੀਤਿ ਪਿਸਦ੍ਦੋ ਉਪੋਸਥਕ੍ਖਨ੍ਧਕਂ ਅਪੇਕ੍ਖਤਿ.
ਚਮ੍ਮਸਂਯੁਤ੍ਤੇਪੀਤਿ ਚਮ੍ਮੇਨ ਸਂਯੁਤ੍ਤਂ ਕਤ੍ਵਾ ਦੇਸਿਤੇ ਖਨ੍ਧਕੇਪਿ, ਚਮ੍ਮਕ੍ਖਨ੍ਧਕੇਪੀਤਿ ਅਤ੍ਥੋ. ਪਿਸਦ੍ਦੋ ਪਵਾਰਣਕ੍ਖਨ੍ਧਕਂ ਅਪੇਕ੍ਖਤਿ. ਭੇਸਜ੍ਜਕ੍ਖਨ੍ਧਕੇਪੀਤਿ ਪਿਸਦ੍ਦੋ ਚਮ੍ਮਕ੍ਖਨ੍ਧਕਂ ਅਪੇਕ੍ਖਤਿ. ਸਮਨ੍ਤਾਤਿ ਅਙ੍ਗਜਾਤਸ੍ਸ ਸਮਨ੍ਤਤੋ.
ਤਤ੍ਥਾਤਿ ਕਥਿਨਕ੍ਖਨ੍ਧਕੇ. ਚੀਵਰਸਂਯੁਤ੍ਤੇਤਿ ਚੀਵਰਕ੍ਖਨ੍ਧਕੇ.
ਚਮ੍ਪੇਯ੍ਯਕੇਤਿ ਚਮ੍ਪੇਯ੍ਯਕ੍ਖਨ੍ਧਕੇ. ਸਮੁਚ੍ਚਯਕ੍ਖਨ੍ਧਕੇਸੁਪੀਤਿ ਪਿਸਦ੍ਦੋ ਚਮ੍ਪੇਯ੍ਯਕ੍ਖਨ੍ਧਕਂ ਅਪੇਕ੍ਖਤਿ.
ਸਮਥਕ੍ਖਨ੍ਧਕੇ ਇਮਾ ਦ੍ਵੇ ਆਪਤ੍ਤਿਯੋ ਹੋਨ੍ਤੀਤਿ ਯੋਜਨਾ. ਏਸੇਵ ਨਯੋ ਸੇਸੇਸੁਪਿ. ਖੁਦ੍ਦਕਵਤ੍ਥੁਕੇਤਿ ਖੁਦ੍ਦਕਵਤ੍ਥੁਕ੍ਖਨ੍ਧਕੇ. ਗਰੁਭਣ੍ਡਵਿਸ੍ਸਜ੍ਜਨੇਤਿ ਗਰੁਭਣ੍ਡਸ੍ਸ ਵਿਸ੍ਸਜ੍ਜਨੇ.
ਸਙ੍ਘਭੇਦੇਤਿ ਸਙ੍ਘਭੇਦਕ੍ਖਨ੍ਧਕੇ. ‘‘ਸਮਾਚਾਰਂ ਪੁਚ੍ਛਿਸ੍ਸਨ੍ਤਿ ਵੁਤ੍ਤੇ ਵਤ੍ਤਕ੍ਖਨ੍ਧਕੇ’’ਤਿ ਇਮਿਨਾ ਸਮਾਚਾਰਸਦ੍ਦੇਨ ਵਤ੍ਤਕ੍ਖਨ੍ਧਕਂ ਗਹੇਤਬ੍ਬਨ੍ਤਿ ਦਸ੍ਸੇਤਿ. ਸਾਤਿ ਦੁਕ੍ਕਟਾਪਤ੍ਤਿ. ‘‘ਤਥਾ’’ਤਿ ਪਦੇਨ ‘‘ਏਕਾ ਦੁਕ੍ਕਟਾਪਤ੍ਤਿਯੇਵਾ’’ਤਿ ਪਦਂ ਅਤਿਦਿਸਤਿ. ‘‘ਪਾਤਿਮੋਕ੍ਖਟ੍ਠਪਨੇ’’ਤਿ ਇਮਿਨਾ ਪਾਲ਼ਿਯਂ ਠਪਨਂ ਪੁਚ੍ਛਿਸ੍ਸਨ੍ਤਿ ਏਤ੍ਥ ‘‘ਪਾਤਿਮੋਕ੍ਖ’’ਨ੍ਤਿਆਦਿਪਦਸ੍ਸ ਲੋਪਂ ਦਸ੍ਸੇਤਿ. ਪਞ੍ਚਸਤਿਕਸਤ੍ਤਸਤਿਕੇਸੂਤਿ ਪਞ੍ਚਸਤਿਕਕ੍ਖਨ੍ਧਕਸਤ੍ਤਸਤਿਕਕ੍ਖਨ੍ਧਕੇਸੁ. ਆਰੋਪਿਤੋਤਿ ਏਤ੍ਥ ਰੁਪਧਾਤੁਯਾ ਦ੍ਵਿਕਮ੍ਮਿਕਤ੍ਤਾ, ਨ੍ਯਾਦਿਗਣਤ੍ਤਾ ਚ ‘‘ਧਮ੍ਮੋ’’ਤਿ ਪਧਾਨਕਮ੍ਮਮੇਵ ਵੁਤ੍ਤਂ, ਨ ‘‘ਸਙ੍ਗਹ’’ਨ੍ਤਿ ਅਪਧਾਨਕਮ੍ਮਂ. ਤੇਨ ਵੁਤ੍ਤਂ ‘‘ਧਮ੍ਮੋ ਸਙ੍ਗਹ’’ਨ੍ਤਿ. ਤਤ੍ਥਾਤਿ ਪਞ੍ਚਸਤਿਕਸਤ੍ਤਸਤਿਕੇਸੁ.
ਇਤਿ ਖਨ੍ਧਕਪੁਚ੍ਛਾਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ
ਏਕੁਤ੍ਤਰਿਕਨਯੋ ਏਕਕਵਾਰਵਣ੍ਣਨਾ
੩੨੧. ਏਵਂ ਖਨ੍ਧਕਪੁਚ੍ਛਾਯ ਵਣ੍ਣਨਂ ਕਤ੍ਵਾ ਇਦਾਨਿ ਏਕੁਤ੍ਤਰਿਕਨਯਸ੍ਸ ਤਂ ਕਰੋਨ੍ਤੋ ਆਹ ‘‘ਆਪਤ੍ਤਿ…ਪੇ… ਨਯੇ’’ਤਿ. ਤਤ੍ਥ ਏਕੁਤ੍ਤਰਿਕਨਯੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ‘‘ਛ ਆਪਤ੍ਤਿਸਮੁਟ੍ਠਾਨਾਨੀ’’ਤਿ ਇਮਿਨਾ ਸਮੁਟ੍ਠਾਨਾਨਿ ਆਪਤ੍ਤਿਂ ਕਰੋਨ੍ਤੀਤਿ ਅਤ੍ਥੇਨ ਆਪਤ੍ਤਿਕਰਾ ਨਾਮਾਤਿ ਦਸ੍ਸੇਤਿ. ਏਤੇਸਨ੍ਤਿ ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ. ਹੀਤਿ ਯਸ੍ਮਾ, ਆਪਜ੍ਜਤੀਤਿ ਸਮ੍ਬਨ੍ਧੋ. ਸਿਕ੍ਖਾਪਦੇ ਚਾਤਿ ਮਾਤਿਕਾਸਿਕ੍ਖਾਪਦੇ ਚ. ਲਹੁਕਾ ਆਪਤ੍ਤੀਤਿ ਏਤ੍ਥ ਅਪ੍ਪਸਾਵਜ੍ਜਤ੍ਤਾ ਨ ਲਹੁਕਾ ਨਾਮ ਹੋਤਿ, ਲਹੁਕੇਨ ਪਨ ਵਿਨਯਕਮ੍ਮੇਨਾਤਿ ਆਹ ‘‘ਲਹੁਕੇਨ ਵਿਨਯਕਮ੍ਮੇਨ ਵਿਸੁਜ੍ਝਨਤੋ’’ਤਿ. ਪਞ੍ਚਵਿਧਾਤਿ ਥੁਲ੍ਲਚ੍ਚਯਾਦਿਵਸੇਨ ਪਞ੍ਚਪਕਾਰਾ. ਕੇਨਚੀਤਿ ਲਹੁਕੇਨ ਵਾ ਗਰੁਕੇਨ ਵਾ ਕੇਨਚਿ ਆਕਾਰੇਨ. ਸਂਵਿਜ੍ਜਤਿ ਗਿਹਿਭਾਵਤੋ ਅਵਸੇਸੋ ਸਮਣਭਾਵੋ ਏਤਿਸ੍ਸਾਤਿ ਸਾਵਸੇਸਾ, ਪਟਿਪਕ੍ਖਵਸੇਨ ਅਨਵਸੇਸਾ. ਦ੍ਵੇ ਆਪਤ੍ਤਿਕ੍ਖਨ੍ਧਾਤਿ ਪਾਰਾਜਿਕਸਙ੍ਘਾਦਿਸੇਸਵਸੇਨ ਦ੍ਵੇ ਆਪਤ੍ਤਿਕ੍ਖਨ੍ਧਾ.
‘‘ਕਰੋਨ੍ਤੀ’’ਤਿ ਇਮਿਨਾ ਅਨ੍ਤਰਾਯਿਕਾਤਿ ਏਤ੍ਥ ਣਿਕਪਚ੍ਚਯਸ੍ਸ ਅਤ੍ਥਂ ਦਸ੍ਸੇਤਿ. ਅਨ੍ਤਰਾਯਿਕਾ ਆਪਤ੍ਤਿਯੋ ਸਬ੍ਬਥਾ ਅਨ੍ਤਰਾਯਿਕਾ ਹੋਨ੍ਤੀਤਿ ਆਹ ‘‘ਅਨ੍ਤਰਾਯਿਕਂ ਆਪਨ੍ਨਸ੍ਸਾਪੀ’’ਤਿਆਦਿ. ਦੇਸੇਤ੍ਵਾ ਸੁਦ੍ਧਿਪਤ੍ਤਸ੍ਸਾਤਿ ਸਮ੍ਬਨ੍ਧੋ. ਲੋਕਵਜ੍ਜਾਤਿ ਲੋਕੇਹਿ ਵਜ੍ਜੇਤਬ੍ਬਾ. ਪਣ੍ਣਤ੍ਤਿਵਜ੍ਜਾਤਿ ਭਗਵਤੋ ਪਣ੍ਣਤ੍ਤਿਯਾ ਵਜ੍ਜੇਤਬ੍ਬਾ. ਯਨ੍ਤਿ ਯਂ ਆਪਤ੍ਤਿਂ ਆਪਜ੍ਜਤੀਤਿ ਸਮ੍ਬਨ੍ਧੋ. ਕਰੋਨ੍ਤੋਤਿ ਕਿਰਿਯਮਾਨਤੋ. ਏਤ੍ਥ ਹਿ ਮਾਨਸਦ੍ਦਸ੍ਸ ਅਨ੍ਤਾਦੇਸੋ. ਇਮਿਨਾ ਕਰਣਂ ਕਿਰਿਯਨ੍ਤਿ ਭਾਵਤ੍ਥਂ ਦਸ੍ਸੇਤਿ. ਆਪਜ੍ਜਤੀਤਿ ਪੁਗ੍ਗਲੋ ਆਪਜ੍ਜਤਿ. ਸਾ ਆਪਤ੍ਤਿ ਕਿਰਿਯਤੋ ਸਮੁਟ੍ਠਿਤਾ ਨਾਮਾਤਿ ਯੋਜਨਾ. ਕਾ ਆਪਤ੍ਤਿ ਵਿਯਾਤਿ ਆਹ ‘‘ਪਾਰਾਜਿਕਾਪਤ੍ਤਿ ਵਿਯਾ’’ਤਿ. ਏਸੇਵ ਨਯੋ ਅਨਨ੍ਤਰਵਾਕ੍ਯੇਸੁਪਿ.
ਪੁਬ੍ਬਾਪਤ੍ਤੀਤਿ ਏਤ੍ਥ ਪੁਬ੍ਬਸਦ੍ਦੋ ਪਠਮਤ੍ਥੋਤਿ ਆਹ ‘‘ਪਠਮਂ ਆਪਨ੍ਨਾਪਤ੍ਤੀ’’ਤਿ. ‘‘ਆਪਨ੍ਨਾ’’ਤਿ ਪਦੇਨ ਮਜ੍ਝੇਲੋਪਂ ਦਸ੍ਸੇਤਿ. ਪਚ੍ਛਾ ਆਪਨ੍ਨਾਪਤ੍ਤੀਤਿ ਵਤ੍ਤਭੇਦਦੁਕ੍ਕਟਾਪਤ੍ਤਿ. ਮੂਲਵਿਸੁਦ੍ਧਿਯਾਤਿ ਮੂਲੇ ਕਾਯਚਿ ਆਪਤ੍ਤਿਯਾ ਅਮਿਸ੍ਸਤ੍ਤਾ ਵਿਸੁਦ੍ਧਿਯਾ ਆਪਤ੍ਤਿਯਾ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਇਦਮ੍ਪੀਤਿ ਕੁਰੁਨ੍ਦਿਯਂ ਵੁਤ੍ਤਵਚਨਮ੍ਪਿ. ਪਿਸਦ੍ਦੇਨ ਪੁਰਿਮਂ ਮਹਾਅਟ੍ਠਕਥਾਵਚਨਂ ਅਪੇਕ੍ਖਤਿ. ਏਕੇਨ ਪਰਿਯਾਯੇਨਾਤਿ ਏਕੇਨ ਕਾਰਣੇਨ.
ਯਾਤਿ ਆਪਤ੍ਤਿ, ਦੇਸਿਤਾ ਹੋਤੀਤਿ ਸਮ੍ਬਨ੍ਧੋ. ਅਯਂ ਦੇਸਿਤਾ ਗਣਨੂਪਿਕਾ ਨਾਮਾਤਿ ਯੋਜਨਾ. ਯਾ ਦੇਸਿਤਾ ਹੋਤਿ, ਅਯਂ ਅਗਣਨੂਪਿਕਾ ਨਾਮਾਤਿ ਯੋਜਨਾ. ਸਉਸ੍ਸਾਹੇਨੇਵਾਤਿ ਪੁਨਪਿ ਆਪਜ੍ਜਿਸ੍ਸਾਮੀਤਿ ਸਹ ਉਸ੍ਸਾਹੇਨੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ‘‘ਗਣਨਂ ਨ ਉਪੇਤੀ’’ਤਿ ਇਮਿਨਾ ਗਣਨਂ ਨ ਉਪਗਚ੍ਛਤੀਤਿ ਅਗਣਨੂਪਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਅਟ੍ਠਮੇ ਵਤ੍ਥੁਸ੍ਮਿਂ ਪੂਰਣੇਤਿ ਸਮ੍ਬਨ੍ਧੋ. ਇਦਂ ਪਾਲ਼ਿਯਂ ਅਟ੍ਠਵਤ੍ਥੁਕਪੂਰਣਵਸੇਨ ਭਿਕ੍ਖੁਨੀਨਂ ਆਗਤਤ੍ਤਾ ਭਿਕ੍ਖੁਨਿਯੋ ਸਨ੍ਧਾਯ ਵੁਤ੍ਤਂ. ਭਿਕ੍ਖੂਨਮ੍ਪਿ ਦੁਤਿਯਪਾਰਾਜਿਕਟ੍ਠਾਨੇ ਲਬ੍ਭਤਿਯੇਵ.
ਥੁਲ੍ਲਵਜ੍ਜਾਤਿ ਏਤ੍ਥ ਥੁਲ੍ਲਂ ਵਜ੍ਜਂ ਏਤਿਸ੍ਸਾਤਿ ਥੁਲ੍ਲਵਜ੍ਜਾਤਿ ਦਸ੍ਸੇਨ੍ਤੋ ਆਹ ‘‘ਥੁਲ੍ਲਦੋਸੇ ਪਞ੍ਞਤ੍ਤਾ’’ਤਿ. ਯਾ ਚ ਧਮ੍ਮਿਕਸ੍ਸ ਪਟਿਸ੍ਸਵਸ੍ਸ ਅਸਚ੍ਚਾਪਨੇ ਆਪਤ੍ਤਿ ਅਤ੍ਥਿ, ਸਾ ਚ ਗਿਹਿਪਟਿਸਂਯੁਤ੍ਤਾਤਿ ਯੋਜਨਾ. ਪਞ੍ਚਾਨਨ੍ਤਰਿਯਕਮ੍ਮਾਪਤ੍ਤੀਤਿ ਪਞ੍ਚਹਿ ਆਨਨ੍ਤਰਿਯਕਮ੍ਮੇਹਿ ਆਪਨ੍ਨਾ ਪਾਰਾਜਿਕਾਪਤ੍ਤਿ. ਸੁਦਿਨ੍ਨਤ੍ਥੇਰਾਦੀਤਿ ਆਦਿਸਦ੍ਦੇਨ ਧਨਿਯਤ੍ਥੇਰਾਦਯੋ ਸਙ੍ਗਣ੍ਹਾਤਿ. ਆਦਿਕਮ੍ਮਿਕੋਤਿ ਆਦਿਕਮ੍ਮਂ ਕਰੋਨ੍ਤੋ, ਤਸ੍ਮਿਂ ਨਿਯੁਤ੍ਤੋ ਵਾ. ਮਕ੍ਕਟਿਸਮਣਾਦੀਤਿ ਆਦਿਸਦ੍ਦੇਨ ਵਜ੍ਜਿਪੁਤ੍ਤਕਾਦਯੋ ਸਙ੍ਗਣ੍ਹਾਤਿ. ਯੋ ਕਦਾਚਿ ਕਰਹਚਿ ਆਪਤ੍ਤਿਂ ਆਪਜ੍ਜਤਿ, ਸੋ ਅਧਿਚ੍ਚਾਪਤ੍ਤਿਕੋ ਨਾਮਾਤਿ ਯੋਜਨਾ. ਪਰਤੋਪਿ ਏਸੇਵ ਨਯੋ.
‘‘ਚੋਦੇਤੀ’’ਤਿ ਇਮਿਨਾ ਚੋਦੇਤੀਤਿ ਚੋਦਕੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਚੋਦਿਤੋ’’ਤਿ ਇਮਿਨਾ ਚੋਦਿਤਬ੍ਬੋਤਿ ਚੁਦਿਤੋ, ਸੋਯੇਵ ਚੁਦਿਤਕੋਤਿ ਵਚਨਤ੍ਥਂ ਦਸ੍ਸੇਤਿ. ਪਞ੍ਚਦਸਸੂਤਿ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ ਵੁਤ੍ਤੇਸੁ ਪਞ੍ਚਦਸਧਮ੍ਮੇਸੁ. ਤੇਨਾਤਿ ਅਧਮ੍ਮਚੋਦਕੇਨ, ਚੋਦਿਤੋਤਿ ਸਮ੍ਬਨ੍ਧੋ. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ (ਚੂਲ਼ਵ. ੪੦੧) ਵੁਤ੍ਤੇ ਸਚ੍ਚੇ ਚ ਅਕੁਪ੍ਪੇ ਚ ਅਤਿਟ੍ਠਨ੍ਤੋਪਿ ਅਧਮ੍ਮਚੁਦਿਤਕੋਯੇਵ ਨਾਮ, ਸੋ ਪਨ ਧਮ੍ਮਚੋਦਕੇਨ ਚੋਦਿਤੇਯੇਵ ਕੁਪ੍ਪਨ੍ਤੋ ਅਧਮ੍ਮਚੁਦਿਤਕੋ ਨਾਮ, ਅਧਮ੍ਮਚੋਦਕੇਨ ਚੋਦਿਤੇ ਪਨ ਕੁਪ੍ਪਨ੍ਤੋਪਿ ਅਧਮ੍ਮਚੁਦਿਤਕੋ ਨਾਮ ਨ ਹੋਤਿ, ਤਸ੍ਮਾ ਇਧ ਨ ਵੁਤ੍ਤੋ. ‘‘ਸਮਨ੍ਨਾਗਤੋ’’ਤਿ ਇਮਿਨਾ ਨਿਯਤਾ ਏਤਸ੍ਸ ਸਨ੍ਤੀਤਿ ਨਿਯਤੋਤਿ ਵਚਨਤ੍ਥਂ ਦਸ੍ਸੇਤਿ.
ਆਪਜ੍ਜਿਤੁਂ ਭਬ੍ਬਾਤਿ ਭਬ੍ਬਾਪਤ੍ਤਿਕਾ. ਕੇਨਚਿ ਕਮ੍ਮੇਨ ਅਕਤੋਪਿ ਅਨੁਕ੍ਖਿਤ੍ਤਕੋਯੇਵ ਨਾਮ, ਸੋ ਪਨ ਉਕ੍ਖਿਤ੍ਤਕੋਤਿ ਸਙ੍ਕਾਭਾਵਤੋ ਇਧ ਨ ਵੁਤ੍ਤੋ. ਅਯਨ੍ਤਿ ਤਜ੍ਜਨੀਯਾਦਿਕਮ੍ਮਕਤੋ ਭਿਕ੍ਖੁ. ਹੀਤਿ ਯਸ੍ਮਾ, ਨ ਕੋਪੇਤੀਤਿ ਸਮ੍ਬਨ੍ਧੋ. ਲਿਙ੍ਗਦਣ੍ਡਕਮ੍ਮਸਂਵਾਸਨਾਸਨਾਹੀਤਿ ਲਿਙ੍ਗਨਾਸਨੇਨ ਚ ਦਣ੍ਡਕਮ੍ਮਨਾਸਨੇਨ ਚ ਸਂਵਾਸਨਾਸਨੇਨ ਚ. ਯੇਨਾਤਿ ਭਿਕ੍ਖੁਨਾ. ਸੋਤਿ ਨਾਨਾਸਂਵਾਸਕੋ. ਦ੍ਵਿਨ੍ਨਂ ਨਾਨਾਸਂਵਾਸਕਾਨਂ ਵਿਸੇਸੋ ਹੇਟ੍ਠਾ (ਪਾਚਿ. ਅਟ੍ਠ. ੪੨੮) ਵੁਤ੍ਤੋਯੇਵ. ਠਪਨਂ ਜਾਨਿਤਬ੍ਬਨ੍ਤਿ ਏਤ੍ਥ ਕਿਂ ਠਪਨਂ ਨਾਮਾਤਿ ਆਹ ‘‘ਪਾਤਿਮੋਕ੍ਖਟ੍ਠਪਨ’’ਨ੍ਤਿ.
ਇਤਿ ਏਕਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਦੁਕਵਾਰਵਣ੍ਣਨਾ
੩੨੨. ਦੁਕੇਸੁ ਅਚਿਤ੍ਤਕਾ ਆਪਤ੍ਤੀਤਿ ਸਮ੍ਬਨ੍ਧੋ. ਭੂਤਾਰੋਚਨਾਪਤ੍ਤੀਤਿ ਪਾਚਿਤ੍ਤਿਯਾਪਤ੍ਤਿ. ਅਭੂਤਾਰੋਚਨਾਪਤ੍ਤੀਤਿ ਪਾਰਾਜਿਕਥੁਲ੍ਲਚ੍ਚਯਾਪਤ੍ਤਿ. ਪਦਸੋਧਮ੍ਮਾਦਿਕਾਤਿਆਦਿਸਦ੍ਦੇਨ ਉਤ੍ਤਰਿਛਪਞ੍ਚਵਾਚਾ ਸਙ੍ਗਹਿਤਾ. ਮਞ੍ਚਪੀਠਾਦੀਨਨ੍ਤਿਆਦਿਸਦ੍ਦੇਨ ਭਿਸਿਆਦਯੋ ਸਙ੍ਗਣ੍ਹਾਤਿ. ਅਨਾਪੁਚ੍ਛਾਗਮਨਾਦੀਸੂਤਿ ਆਦਿਸਦ੍ਦੇਨ ਅਨੁਦ੍ਧਰਿਤ੍ਵਾ ਗਮਨਂ ਸਙ੍ਗਣ੍ਹਾਤਿ. ਸਪੁਗ੍ਗਲੋਤਿ ਸੋ ਅਤ੍ਤਸਙ੍ਖਾਤੋ ਪੁਗ੍ਗਲੋ ਸਪੁਗ੍ਗਲੋ. ਪਰਪੁਗ੍ਗਲੋਤਿ ਪਰੋ ਪੁਗ੍ਗਲੋ ਪਰਪੁਗ੍ਗਲੋ. ਗਰੁਕਨ੍ਤਿ ਸਙ੍ਘਾਦਿਸੇਸਂ. ਲਹੁਕਨ੍ਤਿ ਪਾਚਿਤ੍ਤਿਯਂ. ਪੁਨ ਗਰੁਕਨ੍ਤਿ ਪਾਰਾਜਿਕਂ. ਪੁਨ ਲਹੁਕਨ੍ਤਿ ਪਾਚਿਤ੍ਤਿਯਮੇਵ.
ਅਙ੍ਗੁਲਿਮਤ੍ਤਮ੍ਪੀਤਿ ਪਿਸਦ੍ਦੇਨ ਕੇਸਗ੍ਗਮਤ੍ਤਮ੍ਪੀਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਤਨ੍ਤਿ ਮਞ੍ਚਪੀਠਂ. ਗਮਿਯੋ ਆਪਜ੍ਜਤਿ ਨਾਮਾਤਿ ਸਮ੍ਬਨ੍ਧੋ.
‘‘ਆਦਿਯਨ੍ਤੋ ਆਪਜ੍ਜਤਿ ਨਾਮਾ’’ਤਿਆਦਿਨਾ ਅਤ੍ਥਾਪਤ੍ਤਿ ਆਦਿਯਨ੍ਤੋ ਆਪਜ੍ਜਤੀਤਿ ਪਾਲ਼ਿਯਂ ਆਦਿਯਨ੍ਤੋ ਹੁਤ੍ਵਾ ਆਪਜ੍ਜਤਿ ਆਪਤ੍ਤਿ ਅਤ੍ਥੀਤਿ ਯੋਜਨਾਨਯਂ ਦਸ੍ਸੇਤਿ. ਏਵਞ੍ਹਿ ਸਤਿ ‘‘ਆਪਜ੍ਜਤੀ’’ਤਿ ਆਖ੍ਯਾਤਪਦਂ ‘‘ਅਤ੍ਥੀ’’ਤਿ ਕਿਰਿਯਨ੍ਤਰਂ ਅਪੇਕ੍ਖਿਤ੍ਵਾ ਕਤ੍ਤਾ ਹੋਤੀਤਿ ਦਟ੍ਠਬ੍ਬਂ. ਅਥ ਵਾ ਆਦਿਯਨ੍ਤੋ ਪੁਗ੍ਗਲੋ ਯਂ ਆਪਤ੍ਤਿਂ ਆਪਜ੍ਜਤਿ, ਸਾ ਆਪਤ੍ਤਿ ਅਤ੍ਥੀਤਿ ਯੋਜਨਾ. ਏਸੇਵ ਨਯੋ ਅਞ੍ਞੇਸੁਪਿ. ਮੂਗਬ੍ਬਤਾਦੀਨੀਤਿ ਆਦਿਸਦ੍ਦੇਨ ਗੋਵਤਕੁਕ੍ਕੁਰਵਤਾਦੀਨਿ ਸਙ੍ਗਣ੍ਹਾਤਿ. ਪਾਰਿਵਾਸਿਕਾਦਯੋ ਆਪਜ੍ਜਨ੍ਤੀਤਿ ਸਮ੍ਬਨ੍ਧੋ. ਤਜ੍ਜਨੀਯਾਦਿਕਮ੍ਮਕਤਾ ਵਾ ਪੁਗ੍ਗਲਾਤਿ ਯੋਜਨਾ. ਅਸਮਾਦਿਯਨ੍ਤਾ ਆਪਜ੍ਜਨ੍ਤੀਤਿ ਅਸਮਾਦਿਯਨ੍ਤਾ ਹੁਤ੍ਵਾ ਆਪਜ੍ਜਨ੍ਤਿ. ਤੇਤਿ ਪੁਗ੍ਗਲੇ. ਕਰੋਨ੍ਤੋ ਆਪਜ੍ਜਤਿ ਨਾਮਾਤਿ ਕਰੋਨ੍ਤੋ ਹੁਤ੍ਵਾ ਆਪਜ੍ਜਤਿ ਨਾਮਾਤਿ ਯੋਜਨਾ. ਏਵਂ ਦੇਨ੍ਤੋ ਆਪਜ੍ਜਤਿ ਨਾਮਾਤਿਆਦੀਸੁਪਿ.
ਏਕਰਤ੍ਤਛਾਰਤ੍ਤਸਤ੍ਤਾਹਦਸਾਹਮਾਸਾਤਿਕ੍ਕਮੇਸੂਤਿ ‘‘ਏਕਰਤ੍ਤਮ੍ਪਿ ਤਿਚੀਵਰੇਨ ਵਿਪ੍ਪਵਸੇਯ੍ਯਾ’’ਤਿ (ਪਾਰਾ. ੪੭੫-੪੭੬) ਚ ‘‘ਛਾਰਤ੍ਤਪਰਮਂ ਤੇਨ ਭਿਕ੍ਖੁਨਾ ਤੇਨ ਚੀਵਰੇਨ ਵਿਪ੍ਪਵਸਿਤਬ੍ਬ’’ਨ੍ਤਿ (ਪਾਰਾ. ੬੫੩) ਚ ‘‘ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬ’’ਨ੍ਤਿ (ਪਾਰਾ. ੬੨੨-੬੨੩) ਚ ‘‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’’ਨ੍ਤਿ (ਪਾਰਾ. ੪੬੨-੪੬੩) ਚ ‘‘ਮਾਸਪਰਮਂ ਨਿਕ੍ਖਿਪਿਤਬ੍ਬ’’ਨ੍ਤਿ (ਪਾਰਾ. ੪੯੯-੫੦੦) ਚ ਵੁਤ੍ਤਕਾਲਾਤਿਕ੍ਕਮੇਸੁ.
ਇਮਂ ਪਨ ਆਪਤ੍ਤਿਂ ਆਪਜ੍ਜਤਿ ਨਾਮਾਤਿ ਸਮ੍ਬਨ੍ਧੋ.
ਯਸ੍ਮਿਂ ਪਕ੍ਖੇ ਨਿਸਿਨ੍ਨੋਤਿ ਯਸ੍ਮਿਂ ਪਕ੍ਖੇ ਸਯਂ ਨਿਸਿਨ੍ਨੋ. ਤੇਸਨ੍ਤਿ ਅਤ੍ਤਨੋ ਪਕ੍ਖੇ ਨਿਸਿਨ੍ਨਾਨਂ, ਨਾਨਾਸਂਵਾਸਕਨ੍ਤਿ ਸਮ੍ਬਨ੍ਧੋ. ਯੇਸਨ੍ਤਿ ਸਕਪਕ੍ਖੇ ਨਿਸਿਨ੍ਨਾਨਂ. ਕਮ੍ਮਂ ਕੋਪੇਤੀਤਿ ਨਾਨਾਸਂਵਾਸਕਤ੍ਤਾ ਕਮ੍ਮਂ ਕੋਪੇਤਿ. ਇਤਰੇਸਨ੍ਤਿ ਪਰਪਕ੍ਖੇ ਨਿਸਿਨ੍ਨਾਨਂ. ਹਤ੍ਥਪਾਸਂ ਅਨਾਗਤਤ੍ਤਾ ਕਮ੍ਮਂ ਕੋਪੇਤੀਤਿ ਯੋਜਨਾ. ‘‘ਏਸੇਵ ਨਯੋ’’ਤਿ ਵੁਤ੍ਤਵਚਨਂ ਵਿਤ੍ਥਾਰੇਨ੍ਤੋ ਆਹ ‘‘ਯੇਸਂ ਹੀ’’ਤਿਆਦਿ. ਯੇਸਨ੍ਤਿ ਸਕਪਕ੍ਖੇ ਵਾ ਪਰਪਕ੍ਖੇ ਵਾ ਨਿਸਿਨ੍ਨਾਨਂ ਯੇਸਂ ਭਿਕ੍ਖੂਨਂ. ਸੋਤਿ ਭਿਕ੍ਖੁ. ਆਪਜ੍ਜਿਤਬ੍ਬਤੋਤਿ ਆਪਜ੍ਜਿਤਬ੍ਬਭਾਵਤੋ. ਇਮਿਨਾ ਪੁਗ੍ਗਲੇਨ ਛਹਿ ਸਮੁਟ੍ਠਾਨੇਹਿ ਆਪਜ੍ਜਿਤਬ੍ਬਾਤਿ ਆਪਤ੍ਤਿਯੋਤਿ ਵਚਨਤ੍ਥਂ ਦਸ੍ਸੇਤਿ. ਕਮ੍ਮੇਨ ਵਾ ਸਲਾਕਗ੍ਗਾਹੇਨ ਵਾਤਿ ਏਤ੍ਥ ਉਦ੍ਦੇਸੋ ਕਮ੍ਮੇ ਲਕ੍ਖਣਹਾਰਨਯੇਨ ਸਙ੍ਗਹਂ ਗਚ੍ਛਤਿ, ਵੋਹਾਰਾਨੁਸ੍ਸਾਵਨਾ ਸਲਾਕਗ੍ਗਾਹੇਤਿ ਦਸ੍ਸੇਨ੍ਤੋ ਆਹ ‘‘ਉਦ੍ਦੇਸੋ ਚੇਵ…ਪੇ… ਏਕ’’ਨ੍ਤਿ. ਪੁਬ੍ਬਭਾਗਾਤਿ ਸਙ੍ਘਭੇਦਸ੍ਸ ਪੁਬ੍ਬਭਾਗੇ ਪਵਤ੍ਤਾ. ਪਮਾਣਨ੍ਤਿ ਸਙ੍ਘਭੇਦਸ੍ਸ ਕਾਰਣਂ.
ਅਦ੍ਧਾਨਹੀਨੋ ਨਾਮਾਤਿ ਏਤ੍ਥ ਅਦ੍ਧਾਨਸਦ੍ਦੋ ਕਾਲਪਰਿਯਾਯੋਤਿ ਆਹ ‘‘ਊਨਵੀਸਤਿਵਸ੍ਸੋ’’ਤਿ. ਥੇਯ੍ਯਸਂਵਾਸਕਾਦਯੋਤਿਆਦਿਸਦ੍ਦੇਨ ਤਿਤ੍ਥਿਯਪਕ੍ਕਨ੍ਤਕਭਿਕ੍ਖੁਨੀਦੂਸਕਪਞ੍ਚਾਨਨ੍ਤਰਿਯਾ ਸਙ੍ਗਹੇਤਬ੍ਬਾ. ਅਟ੍ਠ ਅਭਬ੍ਬਪੁਗ੍ਗਲਾ ਕਰਣਦੁਕ੍ਕਟਕਾ ਨਾਮ ਹੋਨ੍ਤੀਤਿ ਯੋਜਨਾ. ਏਤ੍ਥ ਕਤ੍ਤਬ੍ਬਨ੍ਤਿ ਕਰਣਂ, ਕਮ੍ਮਂ, ਦੁਟ੍ਠੁ ਕਤ੍ਤਬ੍ਬਨ੍ਤਿ ਦੁਕ੍ਕਟਂ, ਕਮ੍ਮਮੇਵ. ਕਰਣਂ ਦੁਕ੍ਕਟਮੇਤਸ੍ਸਾਤਿ ਕਰਣਦੁਕ੍ਕਟਕੋ. ਵਿਸੇਸਨਪਰਨਿਪਾਤੋ ‘‘ਅਗ੍ਯਾਹਿਤੋ’’ਤਿਆਦੀਸੁ ਵਿਯ. ਤਦੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਦੁਕ੍ਕਟਕਿਰਿਯਾ’’ਤਿਆਦਿ. ਨੋ ਚ ਯਾਚਤੀਤਿ ਏਤ੍ਥ ਯਾਚਧਾਤੁਯਾ ਪਧਾਨਕਮ੍ਮਂ ਦਸ੍ਸੇਨ੍ਤੋ ਆਹ ‘‘ਉਪਸਮ੍ਪਦ’’ਨ੍ਤਿ, ‘‘ਸਙ੍ਘ’’ਨ੍ਤਿ ਅਪਧਾਨਕਮ੍ਮਮਾਨੇਤਬ੍ਬਂ. ਤੇਪਿਟਕੋਤਿ ਤਿਪਿਟਕਂ ਵਾਚੁਗ੍ਗਤਵਸੇਨ ਧਾਰਕੋ. ਆਣਾਯਪੀਤਿ ਪਿਸਦ੍ਦੋ ‘‘ਮਤੇਨਪੀ’’ਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਯਾਚਨ੍ਤਸ੍ਸੇਵਾਤਿ ਨਿਸ੍ਸਯਂ ਆਚਰਿਯਂ ਯਾਚਨ੍ਤਸ੍ਸੇਵ. ਯਂ ਵਤ੍ਥੁਂ ਅਜ੍ਝਾਚਰਨ੍ਤੋ ਆਪਤ੍ਤਿਂ ਆਪਜ੍ਜਤਿ, ਤਂ ਵਤ੍ਥੁ ਸਾਤਿਸਾਰਂ ਨਾਮਾਤਿ ਯੋਜਨਾ.
ਉਪਘਾਤਿਕਾਤਿ ਏਤ੍ਥ ਉਪਹਨਨ੍ਤੀਤਿ ਉਪਘਾਤਾ, ਤੇਯੇਵ ਉਪਘਾਤਿਕਾਤਿ ਦਸ੍ਸੇਨ੍ਤੋ ਆਹ ‘‘ਉਪਘਾਤਾ’’ਤਿ. ਤਤ੍ਥਾਤਿ ਦ੍ਵੀਸੁ ਉਪਘਾਤਿਕੇਸੁ. ਦ੍ਵੇ ਵੇਨਯਿਕਾਤਿ ਏਤ੍ਥ ਵਿਨਯੇਨ ਸਿਦ੍ਧਾ ਵੇਨਯਿਕਾਤਿ ਦਸ੍ਸੇਨ੍ਤੋ ਆਹ ‘‘ਵਿਨਯਸਿਦ੍ਧਾ’’ਤਿ. ‘‘ਦ੍ਵੇ ਅਤ੍ਥਾ’’ਤਿ ਇਮਿਨਾ ਣਿਕਸਦ੍ਦਸ੍ਸ ਸਰੂਪਂ ਦਸ੍ਸੇਤਿ. ਪਞ੍ਞਤ੍ਤਾਨੁਲੋਮਂ ਨਾਮ ਦਟ੍ਠਬ੍ਬਨ੍ਤਿ ਸਮ੍ਬਨ੍ਧੋ. ਪਚ੍ਚਯਘਾਤੋਤਿ ਪਚ੍ਚਯਸ੍ਸ ਘਾਤੋ. ਇਮਿਨਾ ਸੇਤੁਘਾਤੋਤਿ ਏਤ੍ਥ ਸੇਤੁਸਦ੍ਦੋ ਪਚ੍ਚਯਵਾਚਕੋਤਿ ਦਸ੍ਸੇਤਿ. ਚਿਤ੍ਤਸ੍ਸਾਪੀਤਿ ਪਿਸਦ੍ਦੋ ਪਗੇਵ ਕਾਯਵਾਚਾਨਨ੍ਤਿ ਦਸ੍ਸੇਤਿ. ਇਤਿਪੀਤਿ ਪਿਸਦ੍ਦੋ ਦੁਤਿਯਤ੍ਥਸਮ੍ਪਿਣ੍ਡਨੋ. ‘‘ਪਮਾਣੇਨਾ’’ਤਿ ਇਮਿਨਾ ਮਤ੍ਤਕਾਰਿਤਾਤਿ ਏਤ੍ਥ ਮਤ੍ਤਸਦ੍ਦੋ ਪਮਾਣਤ੍ਥੋਤਿ ਦਸ੍ਸੇਤਿ. ‘‘ਕਰਣ’’ਨ੍ਤਿ ਇਮਿਨਾ ਕਾਰਿਤਾਤਿ ਤਦ੍ਧਿਤਭਾਵਂ ਕਿਤਭਾਵੇਨ ਦਸ੍ਸੇਤਿ ਸਭਾਗਤ੍ਤਾ. ਕਾਯਦ੍ਵਾਰਿਕਨ੍ਤਿ ਕਾਯਦ੍ਵਾਰੇ ਪਵਤ੍ਤਂ ਆਪਤ੍ਤਿਂ. ਇਮਿਨਾ ਆਪਜ੍ਜਤੀਤਿ ਪਦਸ੍ਸ ਕਮ੍ਮਂ ਦਸ੍ਸੇਤਿ. ਕਾਯੇਨੇਵ ਵੁਟ੍ਠਾਤੀਤਿ ਕਾਯਸਾਮਗ੍ਗਿਯਾ ਦਾਨਤ੍ਤਾ ਕਾਯੇਨੇਵ ਵੁਟ੍ਠਾਤਿ. ਸੀਸਮਕ੍ਖਨਾਦੀਤਿ ਆਦਿਸਦ੍ਦੇਨ ਪਾਦਮਕ੍ਖਨਾਦਿਂ ਸਙ੍ਗਣ੍ਹਾਤਿ.
ਤਨ੍ਤਿ ਭਾਰਂ. ‘‘ਨਿਤ੍ਥਰਿਤੁਂ ਵੀਰਿਯਂ ਆਰਭਤੀ’’ਤਿ ਇਮਿਨਾ ਵਹਨਾਕਾਰਂ ਦਸ੍ਸੇਤਿ. ਥੇਰੋ ਸਮਾਨੋਤਿ ਯੋਜਨਾ. ਨਵਹਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਅਨੁਜਾਨਾਮੀ’’ਤਿਆਦਿ. ‘‘ਕੁਕ੍ਕੁਚ੍ਚਾਯਿਤ੍ਵਾ ਕਰੋਤੀ’’ਤਿ ਇਮਿਨਾ ਕੁਕ੍ਕੁਚ੍ਚਸਦ੍ਦਸ੍ਸ ਨਾਮਧਾਤੁਂ ਦਸ੍ਸੇਤਿ. ‘‘ਦਿਵਾ ਚ ਰਤ੍ਤੋ ਚਾ’’ਤਿ ਇਮਿਨਾ ਅਭਿਣ੍ਹਂ ਆਸਵਵਡ੍ਢਨਂ ਦਸ੍ਸੇਤਿ. ਤਤ੍ਥ ਤਤ੍ਥਾਤਿ ਤੇਸੁ ਤੇਸੁ ਵਿਭਙ੍ਗਕ੍ਖਨ੍ਧਕੇਸੁ.
ਇਤਿ ਦੁਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਤਿਕਵਾਰਵਣ੍ਣਨਾ
੩੨੩. ਤਿਕੇਸੁ ਭਗਵਤਿ ਤਿਟ੍ਠਨ੍ਤੇ ਯਂ ਆਪਤ੍ਤਿਂ ਆਪਜ੍ਜਤਿ, ਸਾ ਆਪਤ੍ਤਿ ਅਤ੍ਥੀਤਿ ਯੋਜਨਾ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਦੇਸੁ. ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਤਿਕੇਸੁ, ਵਿਤ੍ਥਾਰੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਲੋਹਿਤੁਪ੍ਪਾਦਾਪਤ੍ਤੀਤਿ ਅਨੁਲੋਮਪਾਰਾਜਿਕਾਪਤ੍ਤਿ. ‘‘ਆਵੁਸੋਵਾਦੇਨਾ’’ਤਿ ‘‘ਆਵੁਸੋ’’ਤਿ ਵੋਹਾਰੇਨ. ਵੋਤਿ ਤੁਮ੍ਹੇਹਿ.
ਕਾਲੇਤਿ ਪੁਰੇਭਤ੍ਤਕਾਲੇ. ਵਿਕਾਲੇਤਿ ਪਚ੍ਛਾਭਤ੍ਤਕਾਲੇ. ਅਵਸੇਸਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ. ਦਸਵਸ੍ਸੋਮ੍ਹੀਤਿ ਅਹਂ ਦਸਵਸ੍ਸੋ ਅਮ੍ਹਿ. ਨਵੋਤਿ ਪਞ੍ਚਵਸ੍ਸਅਪਰਿਪੁਣ੍ਣੋ. ਮਜ੍ਝਿਮੋਤਿ ਪਞ੍ਚਵਸ੍ਸਤੋ ਪਟ੍ਠਾਯ ਯਾਵ ਦਸਵਸ੍ਸਅਪਰਿਪੁਣ੍ਣੋ. ਕੁਸਲਚਿਤ੍ਤੋ ਆਪਜ੍ਜਤੀਤਿ ਕੁਸਲਚਿਤ੍ਤੋ ਹੁਤ੍ਵਾ ਆਪਜ੍ਜਤਿ. ਅਬ੍ਯਾਕਤਚਿਤ੍ਤੋਤਿ ਸੁਪਨ੍ਤਸ੍ਸ ਭਵਙ੍ਗਚਿਤ੍ਤਂ ਸਨ੍ਧਾਯ ਵੁਤ੍ਤਂ. ਯਨ੍ਤਿ ਆਪਤ੍ਤਿਂ. ਸਬ੍ਬਨ੍ਤਿ ਆਪਤ੍ਤਿਂ, ਆਪਜ੍ਜਤੀਤਿ ਸਮ੍ਬਨ੍ਧੋ. ਦੁਕ੍ਖਵੇਦਨਾਸਮਙ੍ਗੀ ਹੁਤ੍ਵਾ ਆਪਜ੍ਜਤੀਤਿ ਯੋਜਨਾ. ਯਨ੍ਤਿ ਆਪਤ੍ਤਿਂ.
ਤਯੋ ਪਟਿਕ੍ਖੇਪਾਤਿ ਏਤ੍ਥ ਪਟਿਕ੍ਖੇਪਸ੍ਸ ਸਾਮਿਕਂ ਦਸ੍ਸੇਨ੍ਤੋ ਆਹ ‘‘ਬੁਦ੍ਧਸ੍ਸ ਭਗਵਤੋ’’ਤਿ. ਕਿਲੇਸਸਲ੍ਲੇਖਨਕਪਟਿਪਤ੍ਤਿਯਾਤਿ ਕਿਲੇਸਂ ਸਲ੍ਲਿਖਤਿ ਤਨੁਂ ਕਰੋਤੀਤਿ ਕਿਲੇਸਸਲ੍ਲੇਖਨਕਾ, ਸਾਯੇਵ ਪਟਿਪਤ੍ਤਿ ਕਿਲੇਸਸਲ੍ਲੇਖਨਕਪਟਿਪਤ੍ਤਿ, ਤਾਯ.
ਪਰਿਸਂ ਉਪਟ੍ਠਾਪੇਨ੍ਤੋ ਬਾਲੋਤਿ ਸਮ੍ਬਨ੍ਧੋ. ਪਰਿਸਂ ਉਪਟ੍ਠਾਪੇਨ੍ਤੋ ਪਣ੍ਡਿਤੋ ਚਾਤਿ ਸਮ੍ਬਨ੍ਧੋ. ਅਵਸੇਸਂ ਆਪਤ੍ਤਿਨ੍ਤਿ ਯੋਜਨਾ. ਕਾਲ਼ੇਤਿ ਕਾਲ਼ਪਕ੍ਖੇ. ਜੁਣ੍ਹੇਤਿ ਜੁਣ੍ਹਪਕ੍ਖੇ.
ਕਤ੍ਤਿਕਪੁਣ੍ਣਮਾਸਿਯਾਤਿ ਪਚ੍ਛਿਮਕਤ੍ਤਿਕਪੁਣ੍ਣਮਾਸਿਯਾ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸੁਵੁਤ੍ਤਕਾਰਣਂ ਦਸ੍ਸੇਨ੍ਤੋ ਆਹ ‘‘ਚਾਤੁਮਾਸ’’ਨ੍ਤਿਆਦਿ. ਹੀਤਿ ਯਸ੍ਮਾ, ਪਰਿਯੇਸਨ੍ਤੋ ਚ ਨਿਵਾਸੇਨ੍ਤੋ ਚ ਭਿਕ੍ਖੂਤਿ ਯੋਜਨਾ.
ਵਤ੍ਥੁਨ੍ਤਿ ਮੇਥੁਨਧਮ੍ਮਾਦਿਵਤ੍ਥੁਂ.
ਪਟਿਚ੍ਛਾਦੇਤਿ ਏਤਾਯਾਤਿ ਪਟਿਚ੍ਛਾਦੀਤਿ ਕਰਣਤ੍ਥੋਪਿ ਯੁਜ੍ਜਤਿ. ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਦ੍ਵਾਰਂ ਪਿਦਹਿਤ੍ਵਾ’’ਤਿਆਦਿ. ਏਤਦੇਵਾਤਿ ਪਰਿਕਮ੍ਮਮੇਵ. ਉਭਯਤ੍ਥਾਤਿ ਉਭਯੇਸੁ ਜਨ੍ਤਾਘਰਪਟਿਚ੍ਛਾਦਿਉਦਕਪਟਿਚ੍ਛਾਦੀਸੁ. ਸਬ੍ਬਨ੍ਤਿ ਅਖਿਲਂ ਪਰਿਕਮ੍ਮਾਦਿਂ. ਨਿਯ੍ਯਨ੍ਤੀਤਿ ਨਿਲੀਯਿਤ੍ਵਾ ਯਨ੍ਤਿ. ਇਮਿਨਾ ਵਹਨ੍ਤੀਤਿ ਏਤ੍ਥ ਵਹਧਾਤੁ ਗਤ੍ਯਤ੍ਥੋਤਿ ਦਸ੍ਸੇਤਿ. ਅਬ੍ਭਮਹਿਕਾਧੂਮਰਜਰਾਹੁਵਿਮੁਤ੍ਤਨ੍ਤਿ ਅਬ੍ਭੇਨ ਚ ਮਹਿਕਾਯ ਚ ਧੂਮੇਨ ਚ ਰਜੇਨ ਚ ਰਾਹੁਨਾ ਚ ਵਿਮੁਤ੍ਤਂ. ਤੇਸੂਤਿ ਅਬ੍ਭਾਦੀਸੁ. ਤਥਾਤਿ ਯਥਾ ਚਨ੍ਦਮਣ੍ਡਲਂ ਵਿਰੋਚਤਿ, ਤਥਾ ਸੂਰਿਯਮਣ੍ਡਲਂ.
ਕਰਣੀਯੇਨ ਹੁਤ੍ਵਾਤਿ ਸਮ੍ਬਨ੍ਧੋ.
ਕਪ੍ਪੇਨ੍ਤੋਤਿ ਕਰੋਨ੍ਤੋ. ਆਗਨ੍ਤੁਕੋ ਆਪਜ੍ਜਤੀਤਿ ਸਮ੍ਬਨ੍ਧੋ. ਅਨਜ੍ਝਿਟ੍ਠੋਤਿ ਅਨਜ੍ਝੇਸਿਤੋ ਹੁਤ੍ਵਾਤਿ ਸਮ੍ਬਨ੍ਧੋ. ਤਿਣਵਤ੍ਥਾਰਕਸਮਥੇ ਕਾਯੇਨ ਵੁਟ੍ਠਾਤਿ ਕਾਯਸਾਮਗ੍ਗਿਯਾ ਦਾਨਤ੍ਤਾ.
ਆਗਾਲ਼੍ਹਾਯ ਚੇਤੇਯ੍ਯਾਤਿ ਆਗਾਲ਼੍ਹਸਦ੍ਦੋ ਦਲ਼੍ਹਪਰਿਯਾਯੋਤਿ ਆਹ ‘‘ਦਲ਼੍ਹਭਾਵਾਯਾ’’ਤਿ. ਆ ਭੁਸੋ ਗਾਹਿਯਤੇ ਆਗਾਲ਼੍ਹੋ, ਗਾਲ਼੍ਹੋ ਬਾਲ਼੍ਹੋ ਦਲ਼੍ਹੋਤਿ ਅਤ੍ਥਤੋ ਏਕਂ. ਚੇਤੇਯ੍ਯਾਤਿ ਪਕਪ੍ਪੇਯ੍ਯ. ਨ ਪੂਰਯਤੋਤਿ ਨ ਪੂਰਯਨ੍ਤਸ੍ਸ. ਅਲਜ੍ਜੀ ਚ ਹੋਤਿ ਬਾਲੋ ਚ ਅਪਕਤਤ੍ਤੋ ਚਾਤਿ ਏਤ੍ਥ ਬਾਲਮਤ੍ਤਅਪਕਤਤ੍ਤਮਤ੍ਤੇਨ ਕਮ੍ਮਂ ਨ ਕਾਤਬ੍ਬਂ, ਆਪਤ੍ਤਿਵਸੇਨੇਵ ਪਨ ਕਾਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਬਾਲੋ’’ਤਿਆਦਿ. ਤਤ੍ਥ ਬਾਲੋ ਨ ਜਾਨਾਤੀਤਿ ਸਮ੍ਬਨ੍ਧੋ. ਅਯਨ੍ਤਿ ਬਾਲੋ. ਏਤ੍ਤਾਵਤਾਤਿ ਏਤ੍ਤਕੇਨ ਅਜਾਨਨਮਤ੍ਤੇਨ. ਬਾਲਭਾਵਮੂਲਕਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ. ਦ੍ਵੇ ਆਪਤ੍ਤਿਕ੍ਖਨ੍ਧੇਤਿ ਪਾਰਾਜਿਕਸਙ੍ਘਾਦਿਸੇਸਵਸੇਨ ਦ੍ਵੇ ਆਪਤ੍ਤਿਰਾਸਯੋ. ਤੇਸਨ੍ਤਿ ਤਿਣ੍ਣਂ ਪੁਗ੍ਗਲਾਨਂ, ਕਾਤਬ੍ਬਨ੍ਤਿ ਸਮ੍ਬਨ੍ਧੋ.
ਕਾਯਿਕੋ ਦਵੋ ਨਾਮਾਤਿ ਕਾਯਿਕੋ ਪਰਿਹਾਸੋ ਨਾਮ. ਮੁਖਾਲਮ੍ਬਰਕਰਣਾਦਿਭੇਦੋਤਿ ਮੁਖੇਨ ਆਲਮ੍ਬਰਨਾਮਕਤੂਰਿਯਕਿਚ੍ਚਸ੍ਸ ਕਰਣਾਦਿਭੇਦੋ. ਦ੍ਵੀਹਿਪਿ ਦ੍ਵਾਰੇਹੀਤਿ ਕਾਯਵਚੀਵਸੇਨ ਦ੍ਵੀਹਿਪਿ ਦ੍ਵਾਰੇਹਿ. ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋਤਿ ਕਾਯਦ੍ਵਾਰੇ ਪਞ੍ਞਤ੍ਤਸ੍ਸ ਕਾਯਸਂਸਗ੍ਗਾਦਿਸਿਕ੍ਖਾਪਦਸ੍ਸ ਵੀਤਿਕ੍ਕਮੋ. ਵਚੀਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋਤਿ ਵਚੀਦ੍ਵਾਰੇ ਪਞ੍ਞਤ੍ਤਸ੍ਸ ਦੁਟ੍ਠੁਲ੍ਲਵਾਚਾਦਿਸਿਕ੍ਖਾਪਦਸ੍ਸ ਵੀਤਿਕ੍ਕਮੋ. ਕਾਯਿਕੇਨ ਉਪਘਾਤਿਕੇਨਾਤਿ ਏਤ੍ਥ ਉਪਘਾਤਿਕਂ ਨਾਮ ਅਸਿਕ੍ਖਨਨ੍ਤਿ ਆਹ ‘‘ਅਸਿਕ੍ਖਨੇਨਾ’’ਤਿ. ਕਸ੍ਮਾ ਅਸਿਕ੍ਖਨਂ ਉਪਘਾਤਂ ਨਾਮਾਤਿ ਆਹ ‘‘ਯੋ ਹੀ’’ਤਿਆਦਿ. ਤਤ੍ਥ ਯੋਤਿ ਪੁਗ੍ਗਲੋ. ਤਨ੍ਤਿ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਂ. ਨਨ੍ਤਿ ਏਵਮੇਵ. ਹਿ ਯਸ੍ਮਾ ਉਪਘਾਤੇਤੀਤਿ ਸਮ੍ਬਨ੍ਧੋ. ਵੇਜ੍ਜਕਮ੍ਮੇਨ ਸਮਨ੍ਨਾਗਤੋਤਿ ਸਮ੍ਬਨ੍ਧੋ. ਸਾਸਨਉਗ੍ਗਹਣਆਰੋਚਨਾਦਿਨਾ ਵਾਚਸਿਕੇਨ ਮਿਚ੍ਛਾਜੀਵੇਨਾਤਿ ਯੋਜਨਾ.
‘‘ਮਾ ਭਣ੍ਡਨਂ ਕਰੀ’’ਤਿ ਇਮਿਨਾ ‘‘ਮਾ’’ਤਿ ਪਟਿਸੇਧਸ੍ਸ ‘‘ਕਰੀ’’ਤਿ ਪਾਠਸੇਸੇਨ ਸਮ੍ਬਨ੍ਧਿਤਬ੍ਬਭਾਵਂ ਦਸ੍ਸੇਤਿ. ਨ ਵੋਹਰਿਤਬ੍ਬਨ੍ਤਿ ਏਤ੍ਥ ਵਿਪੁਬ੍ਬਅਵਪੁਬ੍ਬ-ਹਰਧਾਤੁ ਕਥਨਤ੍ਥੋਤਿ ਆਹ ‘‘ਨ ਕਿਞ੍ਚਿ ਵਤ੍ਤਬ੍ਬ’’ਨ੍ਤਿ. ਹੀਤਿ ਸਚ੍ਚਂ. ਬੀਜਨਗ੍ਗਾਹਾਦਿਕੇਤਿ ਆਦਿਸਦ੍ਦੇਨ ਧਮ੍ਮਜ੍ਝੇਸਨਾਦਿਂ ਸਙ੍ਗਣ੍ਹਾਤਿ. ਓਕਾਸਕਮ੍ਮਂ ਕਾਰੇਨ੍ਤਸ੍ਸਾਤਿ ਏਤ੍ਥ ‘‘ਓਕਾਸ’’ਨ੍ਤਿ ਚ ‘‘ਓਕਾਸਕਮ੍ਮ’’ਨ੍ਤਿ ਚ ਸਦਿਸਨ੍ਤਿ ਆਹ ‘‘ਓਕਾਸਂ ਕਾਰੇਨ੍ਤਸ੍ਸਾ’’ਤਿ. ਨ ਆਦਾਤਬ੍ਬਨ੍ਤਿ ਨ ਗਣ੍ਹਿਤਬ੍ਬਂ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਤ੍ਥ ਗਹੇਤ੍ਵਾ’’ਤਿਆਦਿ.
ਯਨ੍ਤਿ ਵਿਨਯਂ. ਸੋਤਿ ਭਿਕ੍ਖੁ. ਸੋਤਿ ਵਿਨਯੋ. ਤਸ੍ਸਾਤਿ ਭਿਕ੍ਖੁਸ੍ਸ. ਇਦਨ੍ਤਿ ਕਮ੍ਮਂ. ਅਞ੍ਞਂ ਪੁਚ੍ਛਾਤਿ ਮਯਾ ਅਞ੍ਞਂ ਭਿਕ੍ਖੁਂ ਪੁਚ੍ਛਾਹੀਤਿ ਯੋਜਨਾ. ਇਤੀਤਿ ਏਵਂ. ਸੋਤਿ ਤੀਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ. ਅਸ੍ਸਾਤਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ. ਨ ਸਾਕਚ੍ਛਿਤਬ੍ਬੋਤਿ ਨ ਸਹ ਕਥੇਤਬ੍ਬੋ.
‘‘ਲਦ੍ਧਿ’’ਨ੍ਤਿ ਇਮਿਨਾ ਇਦਮਪ੍ਪਹਾਯਾਤਿ ਏਤ੍ਥ ਇਦਂਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ‘‘ਅਵਿਜਹਿਤ੍ਵਾ’’ਤਿ ਇਮਿਨਾ ਹਾਧਾਤੁ ਤ੍ਵਾਪਚ੍ਚਯੋਤਿ ਦਸ੍ਸੇਤਿ. ਸੁਦ੍ਧਂ ਬ੍ਰਹ੍ਮਚਾਰਿਨ੍ਤਿ ਏਤ੍ਥ ਸਬ੍ਬਥਾ ਕਿਲੇਸਸੁਦ੍ਧੋ ਖੀਣਾਸਵੋਵ ਗਹੇਤਬ੍ਬੋਤਿ ਆਹ ‘‘ਖੀਣਾਸਵਂ ਭਿਕ੍ਖੁ’’ਨ੍ਤਿ. ‘‘ਪਾਤਬ੍ਯਭਾਵ’’ਨ੍ਤਿ ਇਮਿਨਾ ਪਾਤਬ੍ਯਤਨ੍ਤਿ ਏਤ੍ਥ ਤਾਪਚ੍ਚਯੋ ਭਾਵਤ੍ਥੇ ਹੋਤੀਤਿ ਦਸ੍ਸੇਤਿ. ‘‘ਪਟਿਸੇਵਨ’’ਨ੍ਤਿ ਇਮਿਨਾ ਪਾਤਬ੍ਯਸਦ੍ਦੋ ਯਥਾਕਾਮਪਰਿਭੁਞ੍ਜਨਤ੍ਥੋਤਿ ਦਸ੍ਸੇਤਿ. ਗਤਿਵਿਸੋਧਨਨ੍ਤਿ ਦੁਗ੍ਗਤਿਤੋ ਸੁਗਤਿਯਾ ਵਿਸੁਜ੍ਝਨਂ. ‘‘ਅਕੁਸਲਾਨਿ ਚੇਵ ਮੂਲਾਨਿ ਚਾ’’ਤਿ ਇਮਿਨਾ ਅਕੁਸਲਸਦ੍ਦਸ੍ਸ ਚ ਮੂਲਸਦ੍ਦਸ੍ਸ ਚ ਤੁਲ੍ਯਾਧਿਕਰਣਭਾਵਂ ਦਸ੍ਸੇਤਿ. ਤਸ੍ਮਾ ਅਕੁਸਲਸਙ੍ਖਾਤਾਨਿ ਮੂਲਾਨਿ ਅਕੁਸਲਮੂਲਾਨੀਤਿ ਤੁਲ੍ਯਾਧਿਕਰਣਸਮਾਸੋ ਕਾਤਬ੍ਬੋ. ਦੁਚ੍ਚਰਿਤਾਨੀਤਿ ਏਤ੍ਥ ਦੁਸਦ੍ਦਸ੍ਸ ਦੁਟ੍ਠੁਵਿਰੂਪਤ੍ਥਭਾਵਂ ਦਸ੍ਸੇਨ੍ਤੋ ਆਹ ‘‘ਦੁਟ੍ਠੁ ਚਰਿਤਾਨਿ, ਵਿਰੂਪਾਨਿ ਵਾ ਚਰਿਤਾਨੀ’’ਤਿ. ਵਿਰੂਪਾਨੀਤਿ ਵਿਕਾਰਸਭਾਵਾਨਿ. ‘‘ਕਰਣਭੂਤੇਨਾ’’ਤਿ ਇਮਿਨਾ ‘‘ਕਤ੍ਤੁਭੂਤੇਨਾ’’ਤਿ ਅਤ੍ਥਂ ਪਟਿਕ੍ਖਿਪਤਿ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਖਨ੍ਧਕੇ.
ਇਤਿ ਤਿਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਚਤੁਕ੍ਕਵਾਰਵਣ੍ਣਨਾ
੩੨੪. ਚਤੁਕ੍ਕੇਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਤਿਣਵਤ੍ਥਾਰਕਸਮਥਟ੍ਠਾਨਨ੍ਤਿ ਤਿਣਵਤ੍ਥਾਰਕਸਮਥੇਨ ਅਧਿਕਰਣਵੂਪਸਮਿਤਟ੍ਠਾਨਂ. ਪਰਸ੍ਸ ਕਮ੍ਮਵਾਚਾਯਾਤਿ ਪਰਸ੍ਸ ਕਰਣਭੂਤਾਯ ਕਮ੍ਮਵਾਚਾਯ. ਤਤੋਤਿ ਚਤੁਕ੍ਕਤੋ. ਪਰੇਸੂਤਿ ਅਞ੍ਞੇਸੁ ਚਤੁਕ੍ਕੇਸੁ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਤਮੇਵਾਤਿ ਕਾਯਦ੍ਵਾਰਿਕਮੇਵ. ਪੁਨ ਤਮੇਵਾਤਿ ਵਚੀਦ੍ਵਾਰਿਕਮੇਵ. ਆਪਜ੍ਜਿਤਬ੍ਬਾਪਤ੍ਤਿਞ੍ਚ ਸਹਾਗਾਰਸੇਯ੍ਯਾਪਤ੍ਤਿਞ੍ਚਾਤਿ ਯੋਜਨਾ. ਜਗ੍ਗਨ੍ਤੋਤਿ ਜਾਗਰਨ੍ਤੋ.
ਅਚਿਤ੍ਤਕੋ ਆਪਜ੍ਜਤਿ ਨਾਮਾਤਿ ‘‘ਅਚਿਤ੍ਤਕੋ ਭਿਕ੍ਖੁ ਆਪਜ੍ਜਤਿ ਨਾਮਾ’’ਤਿ ਵਾ ‘‘ਅਚਿਤ੍ਤਕੋ ਹੁਤ੍ਵਾ ਆਪਜ੍ਜਤਿ ਨਾਮਾ’’ਤਿ ਵਾ ਯੋਜਨਾ ਕਾਤਬ੍ਬਾ. ਸਭਾਗਨ੍ਤਿ ਵਤ੍ਥੁਸਭਾਗਂ. ਤਞ੍ਚਾਤਿ ਅਞ੍ਞਤਰਂ ਤਞ੍ਚ ਆਪਤ੍ਤਿਂ. ਇਤੀਤਿ ਏਵਂ.
ਕਮ੍ਮੇਨਾਤਿ ਸਮਨੁਭਾਸਨਕਮ੍ਮੇਨ. ਕਮ੍ਮੇਨ ਵੁਟ੍ਠਾਤੀਤਿ ਕਮ੍ਮੇਨ ਏਵ ਵੁਟ੍ਠਾਤਿ.
ਸੋਤਿ ਗਿਹਿਪਰਿਕ੍ਖਾਰੋ, ਆਹਟੋ ਹੋਤੀਤਿ ਸਮ੍ਬਨ੍ਧੋ. ਅਵਾਪੁਰਣਨ੍ਤਿ ਕੁਞ੍ਚਿਕਂ. ਅਨ੍ਤੋਤਿ ਭਣ੍ਡਾਗਾਰਸ੍ਸ ਅਨ੍ਤੋ.
ਸਮ੍ਮੁਖਾ ਵੁਟ੍ਠਾਤੀਤਿ ਸਮ੍ਮੁਖਾ ਏਵ ਵੁਟ੍ਠਾਤਿ.
ਸਯਿਤਾਯ ਏਵ ਭਿਕ੍ਖੁਨਿਯਾਤਿ ਯੋਜਨਾ. ਇਦਨ੍ਤਿ ਸਹਾਗਾਰਸੇਯ੍ਯਾਪਤ੍ਤਿਂ, ਪਟਿਚ੍ਚਾਤਿ ਸਮ੍ਬਨ੍ਧੋ. ਏਤਨ੍ਤਿ ‘‘ਲਿਙ੍ਗਪਾਤੁਭਾਵੇਨਾ’’ਤਿ ਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਉਭਿਨ੍ਨਮ੍ਪੀਤਿ ਭਿਕ੍ਖੁਭਿਕ੍ਖੁਨੀਨਮ੍ਪਿ. ਲਿਙ੍ਗਪਟਿਲਾਭੇਨਾਤਿ ਇਤ੍ਥਿਲਿਙ੍ਗਪਟਿਲਾਭੇਨ. ਪਠਮਨ੍ਤਿ ਆਦਿਕਪ੍ਪਕਾਲੇ. ‘‘ਪਠਮਂ ਉਪ੍ਪਨ੍ਨਵਸੇਨਾ’’ਤਿ ਇਮਿਨਾ ਪੁਰੇ ਉਪ੍ਪਨ੍ਨਂ ਪੁਰਿਮਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਸੇਟ੍ਠਭਾਵੇਨਾ’’ਤਿ ਇਮਿਨਾ ਪੁਰਭਾਵੇਨ ਸੇਟ੍ਠਭਾਵੇਨ ਉਪ੍ਪਨ੍ਨਂ ਪੁਰਿਮਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਪੁਰਿਸਲਿਙ੍ਗ’’ਨ੍ਤਿ ਇਮਿਨਾ ਇਮਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਪੁਰਿਸਕੁਤ੍ਤਪੁਰਿਸਾਕਾਰਾਦੀਤਿ ਆਦਿਸਦ੍ਦੇਨ ਪੁਰਿਸਨਿਮਿਤ੍ਤਾਦਯੋ ਸਙ੍ਗਣ੍ਹਾਤਿ. ਯਾਨਿ ਛਚਤ੍ਤਾਲੀਸ ਸਿਕ੍ਖਾਪਦਾਨੀਤਿ ਯੋਜਨਾ. ਇਮਿਨਾ ਵੁਤ੍ਤਨਯਾਨੁਸਾਰੇਨ ਦੁਤਿਯਚਤੁਕ੍ਕੇਪਿ ਅਤ੍ਥੋ ਵੇਦਿਤਬ੍ਬੋ. ਤੇਹੀਤਿ ਤਿਂਸਾਧਿਕੇਹਿ ਸਤਸਿਕ੍ਖਾਪਦੇਹਿ.
ਮਹਾਪਦੇਸਾਤਿ ਵਿਨਯੇ (ਮਹਾਵ. ੩੦੫) ਆਗਤਾ ਮਹਾਪਦੇਸਾ. ਕਸ੍ਮਾ ਮਹਾਪਦੇਸਾ ‘‘ਸਾਮੁਕ੍ਕਂਸਾ’’ਤਿ ਵੁਚ੍ਚਨ੍ਤੀਤਿ ਆਹ ‘‘ਤੇ ਹੀ’’ਤਿਆਦਿ. ਤਤ੍ਥ ਤੇਤਿ ਚਤ੍ਤਾਰੋ ਮਹਾਪਦੇਸਾ, ਵੁਚ੍ਚਨ੍ਤੀਤਿ ਸਮ੍ਬਨ੍ਧੋ. ‘‘ਸਯ’’ਨ੍ਤਿ ਇਮਿਨਾ ਸਾਮੁਕ੍ਕਂਸਾਤਿ ਏਤ੍ਥ ਸਂਸਦ੍ਦਸ੍ਸ ਸਯਮਤ੍ਥਂ ਦਸ੍ਸੇਤਿ. ‘‘ਉਕ੍ਖਿਪਿਤ੍ਵਾ’’ਤਿ ਇਮਿਨਾ ਉਕ੍ਕਂਸਸਦ੍ਦੋ ਉਕ੍ਖਿਪਨਤ੍ਥੋਤਿ ਦਸ੍ਸੇਤਿ. ‘‘ਠਪਿਤਤ੍ਤਾ’’ਤਿ ਇਮਿਨਾ ਸਯਂ ਉਕ੍ਕਂਸਿਤ੍ਵਾ ਠਪਿਤਾ ਸਾਮੁਕ੍ਕਂਸਾਤਿ ਵਚਨਤ੍ਥਂ ਦਸ੍ਸੇਤਿ. ‘‘ਅਜ੍ਝੋਹਰਣੀਯਪਰਿਭੋਗਾ’’ਤਿ ਇਮਿਨਾ ਬਾਹਿਰਪਰਿਭੋਗਂ ਨਿਵਤ੍ਤੇਤਿ. ਉਦਕਂ ਪਨਾਤਿ ਕੇਨਚਿ ਅਸਂਸਗ੍ਗਂ ਪਸਨ੍ਨੋਦਕਂ ਪਨ. ਕਾਲੇਤਿ ਸਪ੍ਪਦਟ੍ਠਕਾਲੇ. ‘‘ਪਞ੍ਚ ਵਾ ਦਸ ਵਾ ਸੀਲਾਨੀ’’ਤਿ ਇਮਿਨਾ ਪਞ੍ਚ ਵਾ ਦਸ ਵਾ ਸੀਲਾਨਿ ਉਪਾਸਕਸੀਲਨ੍ਤਿ ਦਸ੍ਸੇਤਿ.
ਤਤ੍ਥ ਚਾਤਿ ਵਿਹਾਰੇ ਚ. ਉਭੋਪੀਤਿ ਆਗਨ੍ਤੁਕਾਵਾਸਿਕਵਸੇਨ ਉਭੋਪਿ. ਅਸਾਧਾਰਣਨ੍ਤਿ ਦ੍ਵੀਹਿ ਅਸਾਧਾਰਣਂ. ਆਪਤ੍ਤਿਨ੍ਤਿ ਭਿਕ੍ਖੁਨੀਹਿਯੇਵ ਸਾਧਾਰਣਂ ਆਪਤ੍ਤਿਂ. ਗਮਿਯਚਤੁਕ੍ਕੇਪੀਤਿ ਪਿਸਦ੍ਦੋ ਆਗਨ੍ਤੁਕਚਤੁਕ੍ਕਂ ਅਪੇਕ੍ਖਤਿ. ਵਤ੍ਥੁਨਾਨਤ੍ਤਤਾਵਾਤਿ ਮੇਥੁਨਾਦਿਵਤ੍ਥੁਨਾਨਤ੍ਤਤਾ ਏਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸਾਤਿ ਆਪਤ੍ਤਿ. ਤਥਾਤਿ ਯਥਾ ਕਾਯਸਂਸਗ੍ਗੇ, ਤਥਾ ਲਸੁਣਖਾਦਨੇਤਿ ਯੋਜਨਾ. ਏਤ੍ਥਾਤਿ ਵਤ੍ਥੁਨਾਨਤ੍ਤਤਾਦਿਚਤੁਕ੍ਕੇ. ਚਤ੍ਤਾਰਿ ਪਾਰਾਜਿਕਾਨੀਤਿ ਭਿਕ੍ਖੁਪਾਤਿਮੋਕ੍ਖੇ ਆਗਤਾਨਿ. ਵਿਸੁਂ ਆਪਜ੍ਜਨ੍ਤੇਸੁਪਿ ਏਸੇਵ ਨਯੋਤਿ ਸਮ੍ਬਨ੍ਧੋ.
ਪੁਰਿਮਚਤੁਕ੍ਕੇਤਿ ਵਤ੍ਥੁਨਾਨਤ੍ਤਤਾਦਿਚਤੁਕ੍ਕੇ. ਯੋ ਪਠਮੋ ਪਞ੍ਹੋਤਿ ਯੋਜਨਾ. ਇਧਾਤਿ ਵਤ੍ਥੁਸਭਾਗਤਾਦਿਚਤੁਕ੍ਕੇ. ਯੋ ਚਾਤਿ ਯੋ ਚ ਪਞ੍ਹੋ. ਤਤ੍ਥਾਤਿ ਵਤ੍ਥੁਨਾਨਤ੍ਤਤਾਦਿਚਤੁਕ੍ਕੇ. ਤਤਿਯਚਤੁਤ੍ਥੇਸੁ ਪਞ੍ਹੇਸੂਤਿ ਸਮ੍ਬਨ੍ਧੋ.
‘‘ਸਦ੍ਧਿਵਿਹਾਰਿਕਸ੍ਸਾ’’ਤਿ ਪਦਂ ‘‘ਕਤ੍ਤਬ੍ਬ’’ਇਤਿ ਪਦੇ ਸਮ੍ਪਦਾਨਂ.
ਗਰੁਕਨ੍ਤਿ ਪਾਰਾਜਿਕਂ. ਲਹੁਕਨ੍ਤਿ ਥੁਲ੍ਲਚ੍ਚਯਂ ਵਾ ਦੁਕ੍ਕਟਂ ਵਾ.
ਅਟ੍ਠਨ੍ਨਂ ਭਿਕ੍ਖੁਨੀਨਂ ਪਟਿਪਾਟਿਯਾ ਨਿਸੀਦਿਤਬ੍ਬਤੋ ਵੁਤ੍ਤਂ ‘‘ਨਵਮਭਿਕ੍ਖੁਨਿਤੋ’’ਤਿ. ਪਚ੍ਚੁਟ੍ਠਾਨਾਰਹਾਤਿ ਪਟਿਮੁਖਂ ਉਪਟ੍ਠਾਤੁਂ ਅਰਹਾ. ਅਵਿਸੇਸੇਨ ਚਾਤਿ ‘‘ਭਿਕ੍ਖੂ’’ਤਿ ਵਾ ‘‘ਭਿਕ੍ਖੁਨੀ’’ਤਿ ਵਾ ਵਿਸੇਸ, ਮਕਤ੍ਵਾ ਸਾਮਞ੍ਞੇਨ ਚ. ‘‘ਆਸਨਾਰਹਚਤੁਕ੍ਕਸ੍ਸਾ’’ਤਿ ਪਦਂ ‘‘ਪਠਮਪਦ’’ਨ੍ਤਿ ਪਦੇ ਅਵਯਵਿਸਮ੍ਬਨ੍ਧੋ.
ਅਸਾਧਾਰਣਨ੍ਤਿ ਭਿਕ੍ਖੂਹਿ ਅਸਾਧਾਰਣਂ. ਵਿਕਾਲੇ ਕਪ੍ਪਤੀਤਿ ਤਦਹੁਵਿਕਾਲੇ ਕਪ੍ਪਤਿ. ਕਾਲਾਤੀਤਨ੍ਤਿ ਕਾਲਯਾਮਸਤ੍ਤਹਾਤੀਤਂ. ਯਾਵਕਾਲਿਕਾਦਿਤ੍ਤਯਞ੍ਚ ਅਕਪ੍ਪਿਯਮਂਸਞ੍ਚ ਉਗ੍ਗਹਿਤਕਞ੍ਚ ਅਪਟਿਗ੍ਗਹਿਤਕਞ੍ਚਾਤਿ ਯੋਜਨਾ.
ਗੁਣਙ੍ਗੁਣੂਪਾਹਨਞ੍ਚ ਧੁਵਨ੍ਹਾਨਞ੍ਚ ਚਮ੍ਮਤ੍ਥਰਣਞ੍ਚ ਗੁਣਙ੍ਗੁਣੂਪਾਹਨਧੁਵਨ੍ਹਾਨਚਮ੍ਮਤ੍ਥਰਣਾਨਿ. ਇਮਾਨਿ ਚਤ੍ਤਾਰੀਤਿ ਪਞ੍ਚਵਗ੍ਗੇਨ ਗਣੇਨ ਉਪਸਮ੍ਪਦਦਾਨਾਦੀਨਿ. ਇਧਾਤਿ ਪਚ੍ਚਨ੍ਤਿਮੇਸੁ ਜਨਪਦੇਸੁ. ਇਧਾਤਿ ਮਜ੍ਝਿਮੇਸੁ. ਇਦਨ੍ਤਿ ਚਤੁਬ੍ਬਿਧਂ ਵਤ੍ਥੁ. ਦੀਪੇਤੁਮ੍ਪੀਤਿ ਦੀਪਨਮ੍ਪਿ. ਤੁਂਪਚ੍ਚਯੋ ਹਿ ਕਤ੍ਵਤ੍ਥਜੋਤਕੋ. ਏਸੇਵ ਨਯੋ ਦੀਪੇਤੁਂ ਪਨਾਤਿ ਏਤ੍ਥਾਪਿ. ਸੇਸਂ ਅਨੁਞ੍ਞਾਤਕਨ੍ਤਿ ਸਮ੍ਬਨ੍ਧੋ. ਉਭਯਤ੍ਥਪੀਤਿ ਪਚ੍ਚਨ੍ਤਿਮਮਜ੍ਝਿਮਵਸੇਨ ਉਭਯਤ੍ਥਾਪਿ.
ਛਨ੍ਦਪਾਰਿਸੁਦ੍ਧਿਅਕ੍ਖਾਨਂ ਏਕਂ ਕਤ੍ਵਾ ‘‘ਚਤ੍ਤਾਰੋ’’ਤਿ ਵੁਤ੍ਤਂ. ਚਤ੍ਤਾਰੋ ਪੁਬ੍ਬਕਿਚ੍ਚਾਤਿ ਲਿਙ੍ਗਵਿਪਲ੍ਲਾਸੋ, ‘‘ਚਤ੍ਤਾਰਿ ਪੁਬ੍ਬਕਿਚ੍ਚਾਨੀ’’ਤਿ ਹਿ ਅਤ੍ਥੋ. ਏਵਂ ਵੁਤ੍ਤਾਨਿ ਇਮਾਨਿ ਚਤ੍ਤਾਰੀਤਿ ਸਮ੍ਬਨ੍ਧੋ. ਏਵਂ ਆਗਤਾ ਸਮ੍ਮੁਤਿਯੋਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਚਤੁਕ੍ਕੇਸੁ.
ਇਤਿ ਚਤੁਕ੍ਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਪਞ੍ਚਕਵਾਰਵਣ੍ਣਨਾ
੩੨੫. ਪਞ੍ਚਕੇਸੁ ‘‘ਪਞ੍ਚ ਪੁਗ੍ਗਲਾ ਨਿਯਤਾ’’ਤਿ ਏਤਂ ਆਨਨ੍ਤਰਿਯਾਨਮੇਵ ਗਹਣਨ੍ਤਿ ਯੋਜਨਾ. ਪਞ੍ਚ ਛੇਦਨ ਕਾ ਆਪਤ੍ਤਿਯੋ ਨਾਮ ਵੇਦਿਤਬ੍ਬਾਤਿ ਸਮ੍ਬਨ੍ਧੋ. ਯਾ ਵਿਕਪ੍ਪਨਾ ਵੁਤ੍ਤਾਤਿ ਯੋਜਨਾ. ਉਸ੍ਸਙ੍ਕਿਤੋਤਿ ਉਟ੍ਠਹਿਤ੍ਵਾ ਸਙ੍ਕਿਤੋ. ਪਰਿਸਙ੍ਕਿਤੋਤਿ ਪੁਨਪ੍ਪੁਨਂ ਸਙ੍ਕਿਤੋ. ਅਕੁਪ੍ਪੋ ਅਰਹਤ੍ਤਫਲਸਙ੍ਖਾਤੋ ਧਮ੍ਮੋ ਇਮਸ੍ਸਾਤਿ ਅਕੁਪ੍ਪਧਮ੍ਮੋ, ਖੀਣਾਸਵੋ. ਖੀਣਾਸਵੋ ਸਮਾਨੋਪਿ ਉਸ੍ਸਙ੍ਕਿਤੋ ਚੇਵ ਪਰਿਸਙ੍ਕਿਤੋ ਚਾਤਿ ਯੋਜਨਾ. ਪਰਿਹਰਿਤਬ੍ਬਾਤਿ ਅਪਨੇਤਬ੍ਬਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤੇਸੂਤਿ ਅਗੋਚਰੇਸੁ. ਥੂਪਚੀਵਰਨ੍ਤਿ ਏਤ੍ਥ ਥੂਪਂ ਪਰਿਕ੍ਖਿਪਿਤ੍ਵਾ ਕਤਂ ਚੀਵਰਂ ਥੂਪਚੀਵਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਵਮ੍ਮਿਕ’’ਨ੍ਤਿਆਦਿ. ਵਮ੍ਮਿਕੋ ਹਿ ਥੂਪਯਤਿ ਉਦ੍ਧਂ ਆਰੋਹਤੀਤਿ ਥੂਪੋਤਿ ਵੁਚ੍ਚਤਿ. ਨ੍ਹਾਨਟ੍ਠਾਨੇਤਿ ਸਬ੍ਬੇਸਂ ਨ੍ਹਾਨਟ੍ਠਾਨੇ. ਤਞ੍ਹਿ ਉਦਕੇਨ ਕਾਯਂ ਅਭਿਸਿਞ੍ਚਤਿ ਏਤ੍ਥਾਤਿ ਅਭਿਸੇਕਨ੍ਤਿ ਵੁਚ੍ਚਤਿ. ਅਭਿਸੇਕੇ ਛਡ੍ਡਿਤਂ ਆਭਿਸੇਕਿਕਂ, ਚੀਵਰਂ. ਤੇਨ ਵੁਤ੍ਤਂ ‘‘ਛਡ੍ਡਿਤਚੀਵਰ’’ਨ੍ਤਿ. ਭਤਪਟਿਯਾਭਤਨ੍ਤਿ ਏਤ੍ਥ ਭਰਧਾਤੁਯਾ ਪੋਸਨਤ੍ਥਂ ਪਟਿਕ੍ਖਿਪਿਤ੍ਵਾ ਧਾਰਣਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੁਸਾਨਂ ਨੇਤ੍ਵਾ ਪੁਨ ਆਨੀਤਕ’’ਨ੍ਤਿ. ਤਤ੍ਥ ‘‘ਸੁਸਾਨ’’ਨ੍ਤਿ ਇਮਿਨਾ ਕਮ੍ਮਂ ਦਸ੍ਸੇਤਿ, ‘‘ਪੁਨਾ’’ਤਿ ਇਮਿਨਾ ਪਟਿਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ਇਮੇਹਿ ਪਦੇਹਿ ਸੁਸਾਨਂ ਭਤਂ ਹੁਤ੍ਵਾ ਗੇਹਂ ਪਟਿਆਭਰਿਤਬ੍ਬਨ੍ਤਿ ਭਤਪਟਿਯਾਭਤਨ੍ਤਿ ਵਚਨਤ੍ਥਂ ਦਸ੍ਸੇਤਿ, ਯਕਾਰੋ ਪਦਸਨ੍ਧਿਕਰੋ. ਪਾਲ਼ਿਯਂ, ਅਟ੍ਠਕਥਾਯਞ੍ਚ ਪੋਤ੍ਥਕੇਸੁ ‘‘ਗਤਪਟਿਯਾਗਤ’’ਨ੍ਤਿ ਕਣ੍ਠਜਤਤਿਯਕ੍ਖਰੇਨ ਪਾਠੋ ਅਤ੍ਥਿ, ਸੋ ਅਸੁਨ੍ਦਰੋ.
ਕਾਯੋ ਪਠਮਂ, ਵਾਚਾ ਦੁਤਿਯਂ, ਕਾਯਵਾਚਾ ਤਤਿਯਂ, ਇਦਂ ਸਨ੍ਧਾਯ ‘‘ਤਤਿਯੇਨਾ’’ਤਿ ਵੁਤ੍ਤਂ. ਤਤ੍ਥੇਵਾਤਿ ਅਨ੍ਤਰਪੇਯ੍ਯਾਲੇ ਏਵ.
ਅਦਿਨ੍ਨਨ੍ਤਿ ਏਤ੍ਥ ਅਕਾਰਸ੍ਸ ਨਕਾਰਿਯਭਾਵਞ੍ਚ ਤਪਚ੍ਚਯਸ੍ਸ ਕਮ੍ਮਵਾਚਕਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਅਞ੍ਞੇਨ ਨ ਦਿਨ੍ਨ’’ਨ੍ਤਿ. ਤਤ੍ਥ ‘‘ਅਞ੍ਞੇਨਾ’’ਤਿ ਇਮਿਨਾ ਤਪਚ੍ਚਯਸ੍ਸ ਕਮ੍ਮਵਾਚਕਭਾਵਂ ਦਸ੍ਸੇਤਿ, ਨਕਾਰੇਨ ਅਕਾਰਸ੍ਸ ਕਾਰਿਯਂ ਦਸ੍ਸੇਤਿ. ਕੇਨ ਕਾਰਣੇਨ ਅਵਿਦਿਤਨ੍ਤਿ ਆਹ ‘‘ਪਟਿਗ੍ਗਣ੍ਹਾਮੀਤਿ ਚੇਤਨਾਯ ਅਭਾਵੇਨਾ’’ਤਿ. ਅਵਿਦਿਤਨ੍ਤਿ ਅਪਾਕਟਂ. ਨਟਸਮਜ੍ਜਾਦਿਦਾਨਨ੍ਤਿ ਨਟਸਮਜ੍ਜਾਦੀਨਂ ਸਬ੍ਬੇਸਂ ਦਾਨਂ. ਉਸਭਵਿਸ੍ਸਜ੍ਜਨਨ੍ਤਿ ਉਸਭਸ੍ਸ ਵਿਸ੍ਸਜ੍ਜਨਂ. ਇਦਂ ਉਪਲਕ੍ਖਣਵਸੇਨ ਵੁਤ੍ਤਂ. ਸਬ੍ਬਾਸਮ੍ਪਿ ਪਨ ਮਨੁਸ੍ਸਾਮਨੁਸ੍ਸਾਨਂ ਇਤ੍ਥੀਨਂ ਮੇਥੁਨਰਤਿਵਸੇਨ ਪੁਰਿਸਾਨਂ ਦਾਨਮ੍ਪਿ ਗਹੇਤਬ੍ਬਂ. ਇਤ੍ਥਿਦਾਨਨ੍ਤਿ ਏਤ੍ਥਾਪਿ ਯਾਸਂ ਕਾਸਞ੍ਚਿ ਇਤ੍ਥੀਨਂ ਯੇਸਂ ਕੇਸਞ੍ਚਿ ਪੁਰਿਸਾਨਂ ਦਾਨਂ ਗਹੇਤਬ੍ਬਂ. ਪਟਿਭਾਨਚਿਤ੍ਤਕਮ੍ਮਦਾਨਨ੍ਤਿ ਮੇਥੁਨਸੇਵਨਪਟਿਭਾਨਚਿਤ੍ਤਕਮ੍ਮਦਾਨਂ. ਲੋਕਸ੍ਸਾਤਿ ਲੋਕੇਨ. ਕਥੇਤੁਕਮ੍ਯਤਾਤਿ ਕਥੇਤੁਕਾਮਤਾ. ‘‘ਨ ਸੁਪ੍ਪਟਿਵਿਨੋਦਯਾ’’ਤਿ ਇਮਿਨਾ ਦੁਕ੍ਖੇਨ ਪਟਿਵਿਨੋਦੇਤਬ੍ਬਾਤਿ ਦੁਪ੍ਪਟਿਵਿਨੋਦਯਾ, ਪਟਿਵਿਨੋਦੇਤੁਂ ਨ ਸੁਕਰਾਤਿ ਦਸ੍ਸੇਤਿ. ਉਪਾਯੇਨਾਤਿ ਯੁਤ੍ਤਿਯਾ.
ਫੁਸ੍ਸਦੇਵਤ੍ਥੇਰੋ ਅਟ੍ਠਾਸਿ ਕਿਰਾਤਿ ਸਮ੍ਬਨ੍ਧੋ. ਏਕਂਸਨ੍ਤਿ ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਏਕਸ੍ਮਿਂ ਅਂਸੇਤਿ ਹਿ ਅਤ੍ਥੋ. ਬੁਦ੍ਧਾਰਮ੍ਮਣਨ੍ਤਿ ਬੁਦ੍ਧਗੁਣਾਰਮ੍ਮਣਂ. ਮਾਰੋਤਿ ਦੇਵਪੁਤ੍ਤਮਾਰੋ, ਗਤੋਤਿ ਸਮ੍ਬਨ੍ਧੋ. ਗੋਮਯਨ੍ਤਿ ਗੋਮੀਲ਼੍ਹਂ. ਜਰਗ੍ਗਵੋਤਿ ਜਰਗੋਣੋ. ਤਾਦਿਸਮੇਵਾਤਿ ਗੋਮਯਵਿਪ੍ਪਕਿਰਣਸਭਾਵਮੇਵ. ਵਿਪ੍ਪਕਾਰਨ੍ਤਿ ਵਿਸੇਸਪਕਾਰੇਨ ਕਰਣਂ. ਵਙ੍ਕਪਾਦਨ੍ਤਿ ਕੁਟਿਲਪਾਦਂ. ਪਰਿਕਸਨ੍ਤੋਤਿ ਪਰਿਚ੍ਛੇਦਂ ਕਤ੍ਵਾ ਵਿਲੇਖਨ੍ਤੋ. ਵਿਗਚ੍ਛਪੁਰਿਸੋਤਿ ਵਿਕਾਰਂ, ਵਿਰੂਪਂ ਵਾ ਗਤਪੁਰਿਸੋ. ‘‘ਵਿਭਚ੍ਛਪੁਰਿਸੋ’’ਤਿਪਿ ਪਾਠੋ, ਵਿਸੇਸੇਨ ਸੋਭਣਂ ਭਕ੍ਖਪੁਰਿਸੋਤਿ ਅਤ੍ਥੋ. ਅਯਮੇਵ ਪਾਠੋ ਅਭਿਧਾਨਾਦੀਸੁ (ਅਭਿਧਾਨਪ੍ਪਦੀਪਿਕਾਯਂ ੧੦੨ ਗਾਥਾਯਂ) ਦਿਸ੍ਸਤਿ. ਸਮਨ੍ਤਾਤਿ ਕਟਅਨ੍ਧਕਾਰਵਿਹਾਰਸ੍ਸ ਸਮਨ੍ਤਤੋ. ਮਾਰੋ ਸਿਯਾ ਨੁ ਖੋਤਿ ਯੋਜਨਾ. ਨ ਅਸਕ੍ਖਿਂ ਇਤਿ ਆਹਾਤਿ ਯੋਜਨਾ. ਦਿਟ੍ਠਪੁਬ੍ਬੋਤਿ ਪੁਬ੍ਬੇ ਦਿਟ੍ਠੋ. ਮਹਾਨੁਭਾਵੋਤਿ ਦੇਵਿਦ੍ਧਿਯਾ ਮਹਾਨੁਭਾਵੋ. ਇਙ੍ਘਾਤਿ ਉਯ੍ਯੋਜਨਤ੍ਥੇ ਨਿਪਾਤੋ, ਉਯ੍ਯੋਜੇਮੀਤਿ ਅਤ੍ਥੋ. ਅਤ੍ਤਭਾਵਨ੍ਤਿ ਤਵ ਅਤ੍ਤਭਾਵਂ. ਤਾਦਿਸਂ ਰੂਪਨ੍ਤਿ ਬੁਦ੍ਧਸ੍ਸ ਭਗਵਤੋ ਅਤ੍ਤਭਾਵਸਦਿਸਂ ਰੂਪਂ. ਤਂਸਰਿਕ੍ਖਕਨ੍ਤਿ ਤੇਨ ਰੂਪੇਨ ਸਦਿਸਂ. ਪਤਿਰੂਪਮੇਵ ਸਦਿਸਟ੍ਠੇਨ ਪਤਿਰੂਪਕਂ, ਨ ਏਕਂਸਸਦਿਸਂ ਰੂਪਂ ਕਿਞ੍ਚਿ ਸਦਿਸਰੂਪਨ੍ਤਿ ਅਤ੍ਥੋ. ਸਕਤ੍ਤਭਾਵਨ੍ਤਿ ਸਸ੍ਸ ਏਸੋ ਸਕੋ, ਸੋਯੇਵ ਅਤ੍ਤਭਾਵੋ ਸਕਤ੍ਤਭਾਵੋ, ਤਂ. ਅਯਨ੍ਤਿ ਮਾਰੋ. ਕਥਨ੍ਤਿ ਕੇਨ ਕਾਰਣੇਨ ਭਗਵਾ ਨ ਸੋਭਤਿ ਨੁ ਖੋ, ਸੋਭਤਿਯੇਵਾਤਿ ਅਤ੍ਥੋ. ਤਦੇਵ ਸਮਤ੍ਥੇਤੁਂ ਵੁਤ੍ਤਂ ‘‘ਸਬ੍ਬਸੋ ਵੀਤਰਾਗਦੋਸਮੋਹੋ’’ਤਿ. ਵਞ੍ਚਿਤੋਮ੍ਹੀਤਿ ਅਹਂ ਵਞ੍ਚਿਤੋ ਅਮ੍ਹਿ. ਕਿਂ ਅਤ੍ਥੀਤਿ ਕਿਂ ਨਾਮ ਅਤ੍ਥਿ, ਮਮ ਵਞ੍ਚਨਚਿਤ੍ਤਂ ਨਤ੍ਥੀਤਿ ਅਧਿਪ੍ਪਾਯੋ. ਦਹਰਭਿਕ੍ਖੁ ਪਟਿਲਭਤੀਤਿਆਦਿਨਾ ਸਮ੍ਬਨ੍ਧਿਤਬ੍ਬਂ.
ਦਹਰਭਿਕ੍ਖੁ ਅਟ੍ਠਾਸੀਤਿ ਸਮ੍ਬਨ੍ਧੋ. ਸਙ੍ਕਾਰਛਡ੍ਡਨਿਂ ਪਚ੍ਛਿਨ੍ਤਿ ਸਮ੍ਬਨ੍ਧੋ. ਸਙ੍ਕਾਰਂ ਛਡ੍ਡੇਤਿ ਇਮਾਯਾਤਿ ਸਙ੍ਕਾਰਛਡ੍ਡਨੀ. ਤਿਸ੍ਸਦਤ੍ਤਤ੍ਥੇਰੋ ਨਾਮ ਪੁਚ੍ਛੀਤਿ ਸਮ੍ਬਨ੍ਧੋ. ਨਾਵਾਤੋਤਿ ਪੋਤਤੋ. ਪਞ੍ਹਾਸਹਸ੍ਸਨ੍ਤਿ ਸਮਥਵਿਪਸ੍ਸਨਾਕਮ੍ਮਟ੍ਠਾਨੇਸੁ ਪੁਚ੍ਛਾਸਹਸ੍ਸਂ. ਪੁਚ੍ਛੀਤਿ ਦਹਰਂ ਪੁਚ੍ਛਿ. ਪਰਿਚ੍ਛਿਨ੍ਦੀਤਿ ਤਸ੍ਮਿਂ ਦਿਵਸੇ ਕਾਤਬ੍ਬਵਤ੍ਤਂ ਨਿਟ੍ਠਪੇਸੀਤਿ ਅਤ੍ਥੋ. ਯੋਨਕਵਿਸਯਤੋਤਿ ਯੋਨਕਲੋਕਤੋ. ਅਟ੍ਠ ਕਪ੍ਪੇ ਅਨੁਸ੍ਸਰੀਤਿ ਚੇਤਿਯਙ੍ਗਣਂ ਦਿਸ੍ਵਾ ਚਿਤ੍ਤਸ੍ਸ ਪਸੀਦਨਤੋ ਪੁਬ੍ਬੇਨਿਵਾਸਞਾਣੇਨ ਅਟ੍ਠ ਕਪ੍ਪੇ ਅਨੁਸ੍ਸਰਿ.
ਏਕੋ ਭਿਕ੍ਖੁ ਗਤੋਤਿ ਸਮ੍ਬਨ੍ਧੋ. ਦੇਵਤਾ ਪੁਪ੍ਫਹਤ੍ਥਾ ਅਟ੍ਠਂਸੂਤਿ ਮਨੁਸ੍ਸਵੇਸਂ ਗਹੇਤ੍ਵਾ ਅਟ੍ਠਂਸੁ. ਤੇਨ ਵੁਤ੍ਤਂ ‘‘ਕਤਰਗਾਮਵਾਸਿਕਾਤ੍ਥਾ’’ਤਿ. ਤੁਮ੍ਹੇ ਕਤਰਸ੍ਮਿਂ ਗਾਮੇ ਵਸਨਸੀਲਾ ਅਤ੍ਥ ਭਵਥਾਤਿ ਯੋਜਨਾ. ਇਧੇਵਾਤਿ ਇਮਸ੍ਮਿਂਯੇਵ ਠਾਨੇ. ਠਿਤਾਮ੍ਹਾਤਿ ਮਯਂ ਠਿਤਾ ਅਮ੍ਹਾਤਿ ਯੋਜਨਾ.
ਅਯਂ ਕਥਾਤਿ ਅਯਂ ਵਕ੍ਖਮਾਨਕਥਾ. ਕਿਂ ਅਮਚ੍ਚਪੁਤ੍ਤੋ ਪਾਸਾਦਿਕੋ ਨੁ ਖੋਤਿ ਯੋਜਨਾ. ਨੇਤਿ ਅਮਚ੍ਚਪੁਤ੍ਤਅਭਯਤ੍ਥੇਰੇ. ਞਾਤਕਾ ਅਗਮਂਸੂਤਿ ਸਮ੍ਬਨ੍ਧੋ. ਥੇਰਮਾਤਾਪਿ ਪਹਿਣੀਤਿ ਸਮ੍ਬਨ੍ਧੋ. ਪਿਸਦ੍ਦੇਨ ਞਾਤਕੇ ਅਪੇਕ੍ਖਤਿ. ਪਹਿਣਾਕਾਰਂ ਦਸ੍ਸੇਨ੍ਤੋ ਆਹ ‘‘ਪੁਤ੍ਤੋ ਮੇ’’ਤਿਆਦਿ. ਅਮਚ੍ਚਪੁਤ੍ਤੋ ਆਰੂਲ਼੍ਹੋਤਿ ਸਮ੍ਬਨ੍ਧੋ. ਅਭਯਤ੍ਥੇਰੋ ਆਹਾਤਿ ਸਮ੍ਬਨ੍ਧੋ. ਤੇਨਾਤਿ ਅਮਚ੍ਚਪੁਤ੍ਤੇਨ. ਯੁਗਗ੍ਗਾਹਨ੍ਤਿ ਯੁਗਸ੍ਸ ਗਾਹਂ. ‘‘ਮਹਲ੍ਲਕਤ੍ਥੇਰਸ੍ਸ ਸਮ੍ਮਟ੍ਠਟ੍ਠਾਨੇ ਕਚਵਰਂ ਛਡ੍ਡੇਤ੍ਵਾ’’ਤਿ ਵਚਨਂ ਆਵਿ ਕਰੋਨ੍ਤੋ ਆਹ ‘‘ਅਤੀਤਤ੍ਤਭਾਵੇ ਕਿਰਾ’’ਤਿਆਦਿ. ਅਮਚ੍ਚਪੁਤ੍ਤੋ ਛਡ੍ਡੇਸੀਤਿ ਸਮ੍ਬਨ੍ਧੋ.
ਤਨ੍ਤਿ ਸਮ੍ਮਜ੍ਜਨਵਤ੍ਤਂ. ਤਤ੍ਰਾਤਿ ‘‘ਸਤ੍ਥੁਸਾਸਨਂ ਕਤਂ ਹੋਤੀ’’ਤਿਵਚਨੇ. ਆਯਸ੍ਮਾ ਸਾਰਿਪੁਤ੍ਤੋ ਨਿਸੀਦਿ ਕਿਰਾਤਿ ਸਮ੍ਬਨ੍ਧੋ. ਭਗਵਾ ਪਚ੍ਚਾਗਞ੍ਛੀਤਿ ਸਮ੍ਬਨ੍ਧੋ. ਪਾਦਾਨੀਤਿ ਪਾਦਸ੍ਸ ਅਕ੍ਕਮਨਟ੍ਠਾਨਾਨਿ, ਪਾਦਚੇਤਿਯਾਨੀਤਿ ਅਤ੍ਥੋ. ਥੇਰੋ ਨਿਸੀਦੀਤਿ ਸਮ੍ਬਨ੍ਧੋ. ਜਣ੍ਣੁਕੇਹਿ ਪਤਿਟ੍ਠਾਯ ‘‘ਪਾਦਚੇਤਿਯਂ ਵਨ੍ਦਿਤ੍ਵਾ’’ਤਿ ਪਾਠਸੇਸੋ ਅਜ੍ਝਾਹਰਿਤਬ੍ਬੋ. ਮੇ ਨਿਸਿਨ੍ਨਭਾਵਂ ਮੇ ਸਤ੍ਥਾ ਅਞ੍ਞਾਸਿ ਵਤਾਤਿ ਯੋਜਨਾ. ਮੇਸਦ੍ਦੋ ਹਿ ਪੁਬ੍ਬਪਰਾਪੇਕ੍ਖੋ. ਚੋਦਨਨ੍ਤਿ ਦੋਸਾਰੋਪਨਂ. ਕਾਰੇਸ੍ਸਾਮੀਤਿ ਦਸਬਲਂ ਕਾਰੇਸ੍ਸਾਮਿ. ਭਗਵਾ ਆਹਾਤਿ ਸਮ੍ਬਨ੍ਧੋ. ਗਤੋਸੀਤਿ ਤ੍ਵਂ ਗਤੋ ਅਸਿ, ਵਿਚਰਨ੍ਤਸ੍ਸ ਤੁਯ੍ਹਂ ਨ ਪਤਿਰੂਪਨ੍ਤਿ ਯੋਜਨਾ. ਤਤੋਤਿ ਚੋਦਨਕਾਲਤੋ.
ਏਤ੍ਤਕੋ ਵਿਨਿਚ੍ਛਯੋ ਉਪਲਬ੍ਭਤੀਤਿ ਸਮ੍ਬਨ੍ਧੋ. ਭਾਸਪਰਿਯਨ੍ਤਨ੍ਤਿ ਵਚਨਪਰਿਚ੍ਛੇਦਂ. ਅਯਨ੍ਤਿ ਕਥਾ. ਏਤ੍ਤਕਂ ਵਚਨਨ੍ਤਿ ਸਮ੍ਬਨ੍ਧੋ. ਗਯ੍ਹੂਪਗਨ੍ਤਿ ਗਹੇਤਬ੍ਬਭਾਵਂ ਉਪਗਮਨਂ, ਗਣ੍ਹਿਤੁਂ ਖਮਨੀਯਨ੍ਤਿ ਅਤ੍ਥੋ. ਤਾਨੀਤਿ ਦ੍ਵੇ ਮੂਲਾਨਿ. ਪੁਨ ਤਾਨੀਤਿ ਸਮੁਦਯਭੂਤਾਨਿ ਛ ਆਪਤ੍ਤਿਸਮੁਟ੍ਠਾਨਾਨਿ. ਵਤ੍ਥੁਨ੍ਤਿ ਮੇਥੁਨਾਦਿਵਤ੍ਥੁਂ. ਇਤਿਪੀਤਿ ਪਿਸਦ੍ਦੋ ਪਠਮਨਯਂ ਅਪੇਕ੍ਖਤਿ. ਏਤ੍ਥ ਪਠਮਨਯੇ ਮੂਲੇਨ ਸਮੁਦਯਸ੍ਸ ਪਾਯਤੋ ਅਭੇਦੋ ਹੋਤਿ, ਪਚ੍ਛਿਮਨਯੇ ਪਨ ਸਬ੍ਬਥਾ ਭੇਦੋ ਹੋਤਿ. ਤਸ੍ਮਾ ਪਚ੍ਛਿਮਨਯੋਯੇਵ ਯੁਤ੍ਤਤਰੋਤਿ ਦਟ੍ਠਬ੍ਬੋ. ‘‘ਵੂਪਸਮ੍ਮਤੀ’’ਤਿ ਇਮਿਨਾ ‘‘ਨਿਰੁਜ੍ਝਤੀ’’ਤਿ ਪਦਸ੍ਸ ਸਮੁਚ੍ਛੇਦਨਿਰੋਧਂ ਦਸ੍ਸੇਤਿ. ਵੁਟ੍ਠਾਨੇਨਾਤਿ ਪਰਿਵਾਸਾਦਿਵਿਨਯਕਮ੍ਮੇਨ.
ਤੇਤ੍ਤਿਂਸਮੂਲਾਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਵਿਵਾਦਾਧਿਕਰਣਸ੍ਸ ਦ੍ਵਾਦਸ ਮੂਲਾਨੀ’’ਤਿਆਦਿ. ਏਕਂ ਮੂਲਨ੍ਤਿ ਸਮ੍ਬਨ੍ਧੋ. ਤਾਨੀਤਿ ਤੇਤ੍ਤਿਂਸ ਮੂਲਾਨਿ. ਪਰਤੋਤਿ ਪਰਸ੍ਮਿਂ. ‘‘ਅਟ੍ਠਾਰਸ ਭੇਦਕਰਵਤ੍ਥੂਨੀ’’ਤਿਆਦਿਨਾ ਅਧਿਕਰਣਾਨਂ ਸਮੁਟ੍ਠਾਨਂ ਦਸ੍ਸੇਤਿ. ਚਤ੍ਤਾਰਿ ਸਙ੍ਘਕਿਚ੍ਚਾਨਿ ਨਿਸ੍ਸਾਯ ਉਪ੍ਪਜ੍ਜਤੀਤਿ ਯੋਜਨਾ. ਇਦਨ੍ਤਿ ਵਤ੍ਥੁ. ਸਤ੍ਤਨ੍ਨਂ ਨਿਦਾਨਨ੍ਤਿ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਪਞ੍ਞਤ੍ਤਿਟ੍ਠਾਨਸਙ੍ਖਾਤਂ ਨਿਦਾਨਂ. ਏਤ੍ਥਾਤਿ ਠਾਨੇ. ਪਞ੍ਞਤ੍ਤਿਂ ਨ ਜਾਨਾਤੀਤਿ ਏਤ੍ਥ ‘‘ਅਨੁਪਞ੍ਞਤ੍ਤਿਂ ਨ ਜਾਨਾਤੀ’’ਤਿ ਵਕ੍ਖਮਾਨਤ੍ਤਾ ਪਠਮਪਞ੍ਞਤ੍ਤਿ ਗਹੇਤਬ੍ਬਾਤਿ ਆਹ ‘‘ਪਠਮਪਞ੍ਞਤ੍ਤਿਂ ਨ ਜਾਨਾਤੀ’’ਤਿ. ਅਨੁਪਞ੍ਞਤ੍ਤੀਤਿ ਏਤ੍ਥ ਅਨੁਸਦ੍ਦੋ ਨਉਪਚ੍ਛਿਨ੍ਨਤ੍ਥੋਤਿ ਆਹ ‘‘ਪੁਨਪ੍ਪੁਨਂ ਪਞ੍ਞਤ੍ਤਿਂ ਨ ਜਾਨਾਤੀ’’ਤਿ. ਪਚ੍ਛਾਤ੍ਥੋਪਿ ਯੁਜ੍ਜਤੇਵ ਪਠਮਪਞ੍ਞਤ੍ਤਿਤੋ ਪਚ੍ਛਾ ਪਞ੍ਞਤ੍ਤਤ੍ਤਾ. ਅਨੁਸਨ੍ਧਿਵਚਨਪਥਨ੍ਤਿ ਏਤ੍ਥ ਅਨੁਸਨ੍ਧੀਨਂ ਵਸੇਨ ਵਚਨਪਥਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਥਾਨੁਸਨ੍ਧਿਵਿਨਿਚ੍ਛਯਾਨੁਸਨ੍ਧਿਵਸੇਨ ਵਤ੍ਥੁ’’ਨ੍ਤਿ. ਞਤ੍ਤਿਕਿਚ੍ਚਨ੍ਤਿ ਞਤ੍ਤਿਯਾ ਕਿਚ੍ਚਂ. ਇਮਿਨਾ ਞਤ੍ਤਿਯਾਤਿ ਏਤ੍ਥ ਸਾਮ੍ਯਤ੍ਥੇ ਸਾਮਿਵਚਨਂ. ਕਰਧਾਤੁਸਮ੍ਬਨ੍ਧੇ ਕਰਣਵਚਨਮ੍ਪਿ ਯੁਜ੍ਜਤੇਵ. ਕਰਣਨ੍ਤਿ ਏਤ੍ਥ ਚ ਯੁਪਚ੍ਚਯਸ੍ਸ ਕਮ੍ਮਤ੍ਥਭਾਵਞ੍ਚ ਦਸ੍ਸੇਤਿ. ਨ ਕੇਵਲਂ ਞਤ੍ਤਿਕਮ੍ਮੇ ਏਵ ਞਤ੍ਤਿਕਿਚ੍ਚਂ ਨ ਜਾਨਾਤਿ, ਅਥ ਖੋ ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮੇਸੁਪਿ ਨ ਜਾਨਾਤੀਤਿ ਦਸ੍ਸੇਨ੍ਤੋ ਆਹ ‘‘ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮੇਸੂ’’ਤਿਆਦਿ. ਪੁਬ੍ਬੇ ਠਪੇਤਬ੍ਬਾਤਿ ਞਤ੍ਤਿ ਨਾਮ ਕਮ੍ਮਵਾਚਾਯ ਪੁਬ੍ਬੇ ਠਪੇਤਬ੍ਬਾਤਿ ਨ ਜਾਨਾਤਿ. ਇਮਿਨਾ ਨਪੁਬ੍ਬਕੁਸਲਭਾਵਂ ਦਸ੍ਸੇਤਿ. ‘‘ਪਚ੍ਛਾ’’ਤਿ ਇਮਿਨਾ ਨਅਪਰਕੁਸਲਭਾਵਂ ਦਸ੍ਸੇਤਿ. ਪਿਸਦ੍ਦੇਨ ਪਠਮਨਯਂ ਅਪੇਕ੍ਖਤਿ. ‘‘ਕਾਲਂ ਨ ਜਾਨਾਤੀ’’ਤਿ ਇਮਿਨਾ ਅਕਾਲਞ੍ਞੂਤਿ ਪਦਸ੍ਸ ਵਿਗ੍ਗਹਵਾਕ੍ਯਂ ਦਸ੍ਸੇਤਿ. ਕਾਲਂ ਦਸ੍ਸੇਨ੍ਤੋ ਆਹ ‘‘ਅਨਜ੍ਝਿਟ੍ਠੋ’’ਤਿਆਦਿ.
‘‘ਧੁਤਙ੍ਗੇ ਆਨਿਸਂਸਂ ਅਜਾਨਿਤ੍ਵਾ’’ਤਿ ਇਮਿਨਾ ਮਨ੍ਦਮੋਮੂਹਾਨਂ ਫਲਂ ਦਸ੍ਸੇਤਿ. ਪਾਪਿਚ੍ਛੋਤਿ ਏਤ੍ਥ ਪਾਪਿਚ੍ਛੋ ਨਾਮ ਪਚ੍ਚਯਲਾਭਸ੍ਸ ਪਤ੍ਥਨਾਤਿ ਆਹ ‘‘ਪਚ੍ਚਯਲਾਭਂ ਪਤ੍ਥਯਮਾਨੋ’’ਤਿ. ਕਾਯਵਿਵੇਕੋ ਚ ਚਿਤ੍ਤਵਿਵੇਕੋ ਚ ਉਪਧਿਵਿਵੇਕੋ ਚ ਕਾਯਚਿਤ੍ਤਉਪਧਿਵਿਵੇਕਂ, ਸਮਾਹਾਰਦ੍ਵਨ੍ਦੋ, ਪੁਬ੍ਬਪਦੇਸੁ ਉਤ੍ਤਰਪਦਲੋਪੋ. ਏਤਸ੍ਸਾਤਿ ਆਰਞ੍ਞਿਕਸ੍ਸ. ਇਮਿਨਾ ਇਮਾਯ ਅਤ੍ਥੋ ਇਦਮਤ੍ਥੋ, ਸੋ ਏਤਸ੍ਸਤ੍ਥੀਤਿ ਇਦਮਤ੍ਥੀਤਿ ਵਚਨਤ੍ਥਂ ਦਸ੍ਸੇਤਿ. ਅਪ੍ਪਿਚ੍ਛਞ੍ਞੇਵਾਤਿਆਦੀਸੁ ਏਵਸਦ੍ਦਾਨਂ ਛਡ੍ਡੇਤਬ੍ਬਤ੍ਥਂ ਦਸ੍ਸੇਨ੍ਤੋ ਆਹ ‘‘ਨ ਅਞ੍ਞਂ ਕਿਞ੍ਚਿ ਲੋਕਾਮਿਸ’’ਨ੍ਤਿ.
ਨਵਵਿਧਨ੍ਤਿ ਦਿਵਸਵਸੇਨ ਤਿਵਿਧਂ, ਤਥਾ ਕਤ੍ਤਬ੍ਬਾਕਾਰਵਸੇਨ, ਤਥਾ ਕਾਰਕਵਸੇਨਾਤਿ ਨਵਵਿਧਂ ਉਪੋਸਥਂ.
ਕਾਯਦੁਚ੍ਚਰਿਤਾਦਿ ਯਸ੍ਮਾ ਨ ਪਸਾਦਂ ਸਂਵਤ੍ਤੇਤਿ, ਨ ਪਸਾਦਾਯ ਵਾ ਸਂਵਤ੍ਤਤਿ, ਤਸ੍ਮਾ ਅਪਾਸਾਦਿਕਨ੍ਤਿ ਵੁਚ੍ਚਤਿ. ਤੇਨ ਵੁਤ੍ਤਂ ‘‘ਅਪਾਸਾਦਿਕਨ੍ਤਿ ਕਾਯਦੁਚ੍ਚਰਿਤਾਦਿ ਅਕੁਸਲ’’ਨ੍ਤਿ. ਵੇਲਂ ਅਤਿਕ੍ਕਮ੍ਮਾਤਿ ਭੋਜਨਾਦਿਕਾਲਂ ਅਤਿਕ੍ਕਮਿਤ੍ਵਾ. ਇਮਿਨਾ ਅਤਿਵੇਲਨ੍ਤਿ ਏਤ੍ਥ ਅਤਿਸਦ੍ਦਸ੍ਸ ਅਤਿਕ੍ਕਮਨਤ੍ਥਞ੍ਚ ‘‘ਅਤਿਵੇਲ’’ਨ੍ਤਿ ਪਦਸ੍ਸ ‘‘ਵਿਹਰਤੋ’’ਤਿ ਪਦੇ ਕਿਰਿਯਵਿਸੇਸਨਭਾਵਞ੍ਚ ਦਸ੍ਸੇਤਿ. ਅਪ੍ਪਂ ਕਾਲਨ੍ਤਿ ਯੋਜਨਾ. ਅਵਤਰਣਂ ਓਤਾਰੋਤਿ ਦਸ੍ਸੇਨ੍ਤੋ ਆਹ ‘‘ਓਤਰਣ’’ਨ੍ਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਞ੍ਚਕੇਸੁ.