ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ

ਖੁਦ੍ਦਸਿਕ੍ਖਾ

ਗਨ੍ਥਾਰਮ੍ਭਕਥਾ

(ਕ)

ਆਦਿਤੋ ਉਪਸਮ੍ਪਨ੍ਨ-ਸਿਕ੍ਖਿਤਬ੍ਬਂ ਸਮਾਤਿਕਂ;

ਖੁਦ੍ਦਸਿਕ੍ਖਂ ਪਵਕ੍ਖਾਮਿ, ਵਨ੍ਦਿਤ੍ਵਾ ਰਤਨਤ੍ਤਯਂ.

ਤਤ੍ਰਾਯਂ ਮਾਤਿਕਾ –

(ਖ)

ਪਾਰਾਜਿਕਾ ਚ ਚਤ੍ਤਾਰੋ, ਗਰੁਕਾ ਨਵ ਚੀਵਰਂ;

ਰਜਨਾਨਿ ਚ ਪਤ੍ਤੋ ਚ, ਥਾਲਕਾ ਚ ਪਵਾਰਣਾ.

(ਗ)

ਕਾਲਿਕਾ ਚ ਪਟਿਗ੍ਗਾਹੋ, ਮਂਸੇਸੁ ਚ ਅਕਪ੍ਪਿਯਂ;

ਨਿਸ੍ਸਗ੍ਗਿਯਾਨਿ ਪਾਚਿਤ੍ਤਿ, ਸਮਣਕਪ੍ਪ ਭੂਮਿਯੋ.

(ਘ)

ਉਪਜ੍ਝਾਚਰਿਯਵਤ੍ਤਾਨਿ, ਵਚ੍ਚਪ੍ਪਸ੍ਸਾਵਠਾਨਿਕਂ;

ਆਪੁਚ੍ਛਕਰਣਂ ਨਗ੍ਗੋ, ਨ੍ਹਾਨਕਪ੍ਪੋ ਅਵਨ੍ਦਿਯੋ.

(ਙ)

ਚਮ੍ਮਂ ਉਪਾਹਨਾ ਚੇਵ, ਅਨੋਲੋਕਿਯਮਞ੍ਜਨੀ;

ਅਕਪ੍ਪਿਯਸਯਨਾਨਿ, ਸਮਾਨਾਸਨਿਕੋਪਿ ਚ.

(ਚ)

ਅਸਂਵਾਸਿਕੋ ਚ ਕਮ੍ਮਂ, ਮਿਚ੍ਛਾਜੀਵਵਿਵਜ੍ਜਨਾ;

ਵਤ੍ਤਂ ਵਿਕਪ੍ਪਨਾ ਚੇਵ, ਨਿਸ੍ਸਯੋ ਕਾਯਬਨ੍ਧਨਂ.

(ਛ)

ਪਥਵੀ ਚ ਪਰਿਕ੍ਖਾਰੋ, ਭੇਸਜ੍ਜੁਗ੍ਗਹਦੂਸਨਂ;

ਵਸ੍ਸੂਪਨਾਯਿਕਾ ਚੇਵਾਵੇਭਙ੍ਗਿਯਂ ਪਕਿਣ੍ਣਕਂ.

(ਜ)

ਦੇਸਨਾ ਛਨ੍ਦਦਾਨਾਦਿ, ਉਪੋਸਥਪ੍ਪਵਾਰਣਾ;

ਸਂਵਰੋ ਸੁਦ੍ਧਿ ਸਨ੍ਤੋਸੋ, ਚਤੁਰਕ੍ਖਾ ਵਿਪਸ੍ਸਨਾਤਿ.

੧. ਪਾਰਾਜਿਕਨਿਦ੍ਦੇਸੋ

ਪਾਰਾਜਿਕਾ ਚ ਚਤ੍ਤਾਰੋਤਿ –

੧. ਮਗ੍ਗਤ੍ਤਯੇ ਅਨਿਕ੍ਖਿਤ੍ਤਸਿਕ੍ਖੋ ਸਨ੍ਥਤਸਨ੍ਥਤੇ;

ਅਲ੍ਲੋਕਾਸੇ ਨਿਮਿਤ੍ਤਂ ਸਂ, ਤਿਲਮਤ੍ਤਮ੍ਪਿ ਸਨ੍ਥਤਂ.

੨. ਅਸਨ੍ਥਤਮੁਪਾਦਿਣ੍ਣਂ, ਪਵੇਸਨ੍ਤੋ ਚੁਤੋਥ ਵਾ;

ਪਵੇਸਨਟ੍ਠਿਤੁਦ੍ਧਾਰਪਵਿਟ੍ਠਕ੍ਖਣਸਾਦਕੋ.

੩. ਆਦਿਯੇਯ੍ਯ ਹਰੇਯ੍ਯਾਵਹਰੇਯ੍ਯ ਇਰਿਯਾਪਥਂ;

ਕੋਪੇਯ੍ਯ ਠਾਨਾ ਚਾਵੇਯ੍ਯ, ਸਙ੍ਕੇਤਂ ਵੀਤਿਨਾਮਯੇ.

੪. ਅਦਿਨ੍ਨਂ ਥੇਯ੍ਯਚਿਤ੍ਤੇਨ, ਭਵੇ ਪਾਰਾਜਿਕੋਥ ਵਾ;

ਥੇਯ੍ਯਾਬਲਕੁਸਚ੍ਛਨ੍ਨਪਰਿਕਪ੍ਪਾਵਹਾਰਕੋ;

ਭਣ੍ਡਕਾਲਗ੍ਘਦੇਸੇਹਿ, ਪਰਿਭੋਗੇਤ੍ਥ ਨਿਚ੍ਛਯੋ.

੫. ਮਨੁਸ੍ਸਵਿਗ੍ਗਹਂ ਚਿਚ੍ਚ, ਜੀਵਿਤਾ ਵਾ ਵਿਯੋਜਯੇ;

ਸਤ੍ਥਹਾਰਕਂ ਵਾਸ੍ਸ ਮਰਣਚੇਤਨੋ ਉਪਨਿਕ੍ਖਿਪੇ.

੬. ਗਾਹੇਯ੍ਯ ਮਰਣੂਪਾਯਂ, ਵਦੇਯ੍ਯ ਮਰਣੇ ਗੁਣਂ;

ਚੁਤੋ ਪਯੋਗਾ ਸਾਹਤ੍ਥਿਨਿਸ੍ਸਗ੍ਗਾਣਤ੍ਤਿਥਾਵਰਾ.

੭. ਇਦ੍ਧਿਵਿਜ੍ਜਾਮਯਾ ਕਾਲਵਤ੍ਥਾਵੁਧਿਰਿਯਾਪਥਾ;

ਕ੍ਰਿਯਾਵਿਸੇਸੋ ਓਕਾਸੋ, ਛ ਆਣਤ੍ਤਿਨਿਯਾਮਕਾ.

੮. ਝਾਨਾਦਿਭੇਦ ਨੋਸਨ੍ਤਮਤ੍ਤਨਤ੍ਤੁਪਨਾਯਿਕਂ;

ਕਤ੍ਵਾ ਕੋਟ੍ਠਾਸਮੇਕੇਕਂ, ਪਚ੍ਚੁਪ੍ਪਨ੍ਨਭਵਸ੍ਸਿਤਂ.

੯. ਅਞ੍ਞਾਪਦੇਸਰਹਿਤਂ, ਦੀਪੇਨ੍ਤੋਨਧਿਮਾਨਿਕੋ;

ਕਾਯੇਨ ਵਾਚਾ ਵਿਞ੍ਞਤ੍ਤਿ-ਪਥੇ ਞਾਤੇ ਚੁਤੋ ਭਵੇ.

੧੦. ਪਾਰਾਜਿਕੇਤੇ ਚਤ੍ਤਾਰੋ, ਅਸਂਵਾਸਾ ਯਥਾ ਪੁਰੇ;

ਅਭਬ੍ਬਾ ਭਿਕ੍ਖੁਭਾਵਾਯ, ਸੀਸਚ੍ਛਿਨ੍ਨੋਵ ਜੀਵਿਤੁਂ.

੧੧. ਪਰਿਯਾਯੋ ਚ ਆਣਤ੍ਤਿ, ਤਤਿਯੇ ਦੁਤਿਯੇ ਪਨ;

ਆਣਤ੍ਤਿਯੇਵ ਸੇਸੇਸੁ, ਦ੍ਵਯਮੇਤਂ ਨ ਲਬ੍ਭਤਿ.

੧੨. ਸੇਵੇਤੁਕਾਮਤਾਚਿਤ੍ਤਂ, ਮਗ੍ਗੇ ਮਗ੍ਗਪ੍ਪਵੇਸਨਂ;

ਇਮਂ ਮੇਥੁਨਧਮ੍ਮਸ੍ਸ, ਆਹੁ ਅਙ੍ਗਦ੍ਵਯਂ ਬੁਧਾ.

੧੩. ਮਨੁਸ੍ਸਸਂ ਤਥਾਸਞ੍ਞੀ, ਥੇਯ੍ਯਚਿਤ੍ਤਞ੍ਚ ਵਤ੍ਥੁਨੋ;

ਗਰੁਤਾ ਅਵਹਾਰੋ ਚ, ਅਦਿਨ੍ਨਾਦਾਨਹੇਤੁਯੋ.

੧੪. ਪਾਣੋ ਮਾਨੁਸ੍ਸਕੋ ਪਾਣ-ਸਞ੍ਞਿਤਾ ਘਾਤਚੇਤਨਾ;

ਪਯੋਗੋ ਤੇਨ ਮਰਣਂ, ਪਞ੍ਚੇਤੇ ਵਧਹੇਤੁਯੋ.

੧੫. ਅਸਨ੍ਤਤਾ ਅਤ੍ਤਨਿ ਪਾਪਮਿਚ੍ਛਤਾ-

ਯਾਰੋਚਨਾ ਤਸ੍ਸ ਮਨੁਸ੍ਸਜਾਤਿਤਾ;

ਨਾਞ੍ਞਾਪਦੇਸੋ ਚ ਤਦੇਵ ਜਾਨਨਂ,

ਪਞ੍ਚੇਤ੍ਥ ਅਙ੍ਗਾਨਿ ਅਸਨ੍ਤਦੀਪਨੇ.

੧੬. ਅਸਾਧਾਰਣਾ ਚਤ੍ਤਾਰੋ, ਭਿਕ੍ਖੁਨੀਨਮਭਬ੍ਬਕਾ;

ਏਕਾਦਸ ਚ ਵਿਬ੍ਭਨ੍ਤਾ, ਭਿਕ੍ਖੁਨੀ ਮੁਦੁਪਿਟ੍ਠਿਕੋ.

੧੭. ਲਮ੍ਬੀ ਮੁਖੇਨ ਗਣ੍ਹਨ੍ਤੋ, ਅਙ੍ਗਜਾਤਂ ਪਰਸ੍ਸ ਚ;

ਤਤ੍ਥੇਵਾਭਿਨਿਸੀਦਨ੍ਤੋ, ਚਤ੍ਤਾਰੋ ਅਨੁਲੋਮਿਕਾ.

੧੮. ਮਗ੍ਗੇ ਮਗ੍ਗਪ੍ਪਵੇਸਨਾ, ਮੇਥੁਨਸ੍ਸ ਇਧਾਗਤਾ;

ਚਤ੍ਤਾਰੋਤਿ ਚਤੁਬ੍ਬੀਸ, ਸਮੋਧਾਨਾ ਪਰਾਜਿਕਾਤਿ.

੨. ਸਙ੍ਘਾਦਿਸੇਸਨਿਦ੍ਦੇਸੋ

ਗਰੁਕਾ ਨਵਾਤਿ –

੧੯. ਮੋਚੇਤੁਕਾਮਤਾ ਸੁਕ੍ਕ-ਸ੍ਸੁਪਕ੍ਕਮ੍ਮ ਵਿਮੋਚਯਂ;

ਅਞ੍ਞਤ੍ਰ ਸੁਪਿਨਨ੍ਤੇਨ, ਸਮਣੋ ਗਰੁਕਂ ਫੁਸੇ.

੨੦. ਇਤ੍ਥਿਸਞ੍ਞੀ ਮਨੁਸ੍ਸਿਤ੍ਥਿਂ, ਕਾਯਸਂਸਗ੍ਗਰਾਗਵਾ;

ਸਮ੍ਫੁਸਨ੍ਤੋ ਉਪਕ੍ਕਮ੍ਮ, ਸਮਣੋ ਗਰੁਕਂ ਫੁਸੇ.

੨੧. ਤਥਾ ਸੁਣਨ੍ਤਿਂ ਵਿਞ੍ਞੁਞ੍ਚ, ਮਗ੍ਗਂ ਵਾਰਬ੍ਭ ਮੇਥੁਨਂ;

ਦੁਟ੍ਠੁਲ੍ਲਵਾਚਾਰਾਗੇਨ, ਓਭਾਸੇਤ੍ਵਾ ਗਰੁਂ ਫੁਸੇ.

੨੨. ਵਤ੍ਵਾਤ੍ਤਕਾਮੁਪਟ੍ਠਾਨ-ਵਣ੍ਣਂ ਮੇਥੁਨਰਾਗਿਨੋ;

ਵਾਚਾ ਮੇਥੁਨਯੁਤ੍ਤੇਨ, ਗਰੁਂ ਮੇਥੁਨਯਾਚਨੇ.

੨੩. ਪਟਿਗ੍ਗਹੇਤ੍ਵਾ ਸਨ੍ਦੇਸਂ, ਇਤ੍ਥਿਯਾ ਪੁਰਿਸਸ੍ਸ ਵਾ;

ਵੀਮਂਸਿਤ੍ਵਾ ਹਰਂ ਪਚ੍ਚਾ, ਸਮਣੋ ਗਰੁਕਂ ਫੁਸੇ.

੨੪. ਸਂਯਾਚਿਤਪਰਿਕ੍ਖਾਰਂ, ਕਤ੍ਵਾਦੇਸਿਤਵਤ੍ਥੁਕਂ;

ਕੁਟਿਂ ਪਮਾਣਾਤਿਕ੍ਕਨ੍ਤਂ, ਅਤ੍ਤੁਦ੍ਦੇਸਂ ਗਰੁਂ ਫੁਸੇ.

੨੫. ਮਹਲ੍ਲਕਂ ਵਿਹਾਰਂ ਵਾ, ਕਤ੍ਵਾਦੇਸਿਤਵਤ੍ਥੁਕਂ;

ਅਤ੍ਤਨੋ ਵਸਨਤ੍ਥਾਯ, ਸਮਣੋ ਗਰੁਕਂ ਫੁਸੇ.

੨੬. ਅਮੂਲਕੇਨ ਚੋਦੇਨ੍ਤੋ, ਚੋਦਾਪੇਨ੍ਤੋਵ ਵਤ੍ਥੁਨਾ;

ਅਨ੍ਤਿਮੇਨ ਚ ਚਾਵੇਤੁਂ, ਸੁਣਮਾਨਂ ਗਰੁਂ ਫੁਸੇ.

੨੭. ਅਞ੍ਞਸ੍ਸ ਕਿਰਿਯਂ ਦਿਸ੍ਵਾ, ਤੇਨ ਲੇਸੇਨ ਚੋਦਯਂ;

ਵਤ੍ਥੁਨਾ ਅਨ੍ਤਿਮੇਨਾਞ੍ਞਂ, ਚਾਵੇਤੁਂ ਗਰੁਕਂ ਫੁਸੇ.

੨੮. ਛਾਦੇਤਿ ਜਾਨਮਾਪਨ੍ਨਂ, ਪਰਿਵਸੇਯ੍ਯ ਤਾਵਤਾ;

ਚਰੇਯ੍ਯ ਸਙ੍ਘੇ ਮਾਨਤ੍ਤਂ, ਪਰਿਵੁਤ੍ਥੋ ਛ ਰਤ੍ਤਿਯੋ.

ਚਿਣ੍ਣਮਾਨਤ੍ਤਮਬ੍ਭੇਯ੍ਯ, ਤਂ ਸਙ੍ਘੋ ਵੀਸਤੀਗਣੋ.

੨੯. ਆਪਤ੍ਤਿਨੁਕ੍ਖਿਤ੍ਤਮਨਨ੍ਤਰਾਯ

ਪਹੁਤ੍ਤਤਾਯੋ ਤਥਸਞ੍ਞਿਤਾ ਚ;

ਛਾਦੇਤੁਕਾਮੋ ਅਥ ਛਾਦਨਾਤਿ,

ਛਨ੍ਨਾ ਦਸਙ੍ਗੇਹ੍ਯਰੁਣੁਗ੍ਗਮਮ੍ਹੀਤਿ.

੩. ਚੀਵਰਨਿਦ੍ਦੇਸੋ

ਚੀਵਰਨ੍ਤਿ –

੩੦. ਖੋਮਕੋਸੇਯ੍ਯਕਪ੍ਪਾਸ-ਸਾਣਭਙ੍ਗਾਨਿ ਕਮ੍ਬਲਂ;

ਕਪ੍ਪਿਯਾਨਿ ਛਲ਼ੇਤਾਨਿ, ਸਾਨੁਲੋਮਾਨਿ ਜਾਤਿਤੋ.

੩੧. ਦੁਕੂਲਞ੍ਚੇਵ ਪਟ੍ਟੁਣ੍ਣ-ਪਟਂ ਸੋਮਾਰਚੀਨਜਂ;

ਇਦ੍ਧਿਜਂ ਦੇਵਦਿਨ੍ਨਞ੍ਚ, ਤਸ੍ਸ ਤਸ੍ਸਾਨੁਲੋਮਿਕਂ.

੩੨. ਤਿਚੀਵਰਂ ਪਰਿਕ੍ਖਾਰ-ਚੋਲ਼ਂ ਵਸ੍ਸਿਕਸਾਟਿਕਂ;

ਅਧਿਟ੍ਠੇ ਨ ਵਿਕਪ੍ਪੇਯ੍ਯ, ਮੁਖਪੁਞ੍ਛਨਨਿਸੀਦਨਂ.

੩੩. ਪਚ੍ਚਤ੍ਥਰਣਕਂ ਕਣ੍ਡੁ-ਚ੍ਛਾਦਿਮੇਤ੍ਥ ਤਿਚੀਵਰਂ;

ਨ ਵਸੇਯ੍ਯ ਵਿਨੇਕਾਹਂ, ਚਾਤੁਮਾਸਂ ਨਿਸੀਦਨਂ.

੩੪. ‘‘ਇਮਂ ਸਙ੍ਘਾਟਿਂਧਿਟ੍ਠਾਮਿ’’, ਸਙ੍ਘਾਟਿਮਿਚ੍ਚਧਿਟ੍ਠਯੇ;

ਅਹਤ੍ਥਪਾਸਮੇਤਨ੍ਤਿ, ਸੇਸੇਸੁਪਿ ਅਯਂ ਨਯੋ.

੩੫. ਅਧਿਟ੍ਠਹਨ੍ਤੋ ਸਙ੍ਘਾਟਿ-ਪ੍ਪਭੁਤਿਂ ਪੁਬ੍ਬਚੀਵਰਂ;

ਪਚ੍ਚੁਦ੍ਧਰਿਤ੍ਵਾਧਿਟ੍ਠੇਯ੍ਯ, ਪਤ੍ਤਾਧਿਟ੍ਠਹਨੇ ਤਥਾ.

੩੬. ਏਤਂ ਇਮਂ ਵ ਸਙ੍ਘਾਟਿਂ, ਸਂਸੇ ਪਚ੍ਚੁਦ੍ਧਰਾਮਿਤਿ;

ਏਵਂ ਸਬ੍ਬਾਨਿ ਨਾਮੇਨ, ਵਤ੍ਵਾ ਪਚ੍ਚੁਦ੍ਧਰੇ ਵਿਦੂ.

੩੭. ਸਙ੍ਘਾਟਿ ਪਚ੍ਛਿਮਨ੍ਤੇਨ, ਦੀਘਸੋ ਮੁਟ੍ਠਿਪਞ੍ਚਕੋ;

ਉਤ੍ਤਮਨ੍ਤੇਨ ਸੁਗਤ-ਚੀਵਰੂਨਾਪਿ ਵਟ੍ਟਤਿ.

੩੮. ਮੁਟ੍ਠਿਤ੍ਤਿਕਞ੍ਚ ਤਿਰਿਯਂ, ਤਥਾ ਏਕਂਸਿਕਸ੍ਸਪਿ;

ਅਨ੍ਤਰਵਾਸਕੋ ਚਾਪਿ, ਦੀਘਸੋ ਮੁਟ੍ਠਿਪਞ੍ਚਕੋ;

ਅਡ੍ਢਤੇਯ੍ਯੋ ਦ੍ਵਿਹਤ੍ਥੋ ਵਾ, ਤਿਰਿਯਨ੍ਤੇਨ ਵਟ੍ਟਤਿ.

੩੯. ਨਿਸੀਦਨਸ੍ਸ ਦੀਘੇਨ, ਵਿਦਤ੍ਥਿ ਦ੍ਵੇ ਵਿਸਾਲਤੋ;

ਦਿਯਡ੍ਢਂ ਦਸਾ ਵਿਦਤ੍ਥਿ, ਸੁਗਤਸ੍ਸ ਵਿਦਤ੍ਥਿਯਾ.

੪੦. ਕਣ੍ਡੁਪ੍ਪਟਿਚ੍ਛਾਦਿਕਸ੍ਸ, ਤਿਰਿਯਂ ਦ੍ਵੇ ਵਿਦਤ੍ਥਿਯੋ;

ਦੀਘਨ੍ਤਤੋ ਚਤਸ੍ਸੋਵ, ਸੁਗਤਸ੍ਸ ਵਿਦਤ੍ਥਿਯਾ.

੪੧. ਵਸ੍ਸਿਕਸਾਟਿਕਾਯਾਪਿ, ਦੀਘਸੋ ਛ ਵਿਦਤ੍ਥਿਯੋ;

ਤਿਰਿਯਂ ਅਡ੍ਢਤੇਯ੍ਯਾਵ, ਸੁਗਤਸ੍ਸ ਵਿਦਤ੍ਥਿਯਾ.

੪੨. ਏਤ੍ਥ ਛੇਦਨਪਾਚਿਤ੍ਤਿ, ਕਰੋਨ੍ਤਸ੍ਸ ਤਦੁਤ੍ਤਰਿ;

ਪਚ੍ਚਤ੍ਥਰਣ ਮੁਖਚੋਲ਼ਾ, ਆਕਙ੍ਖਿਤਪ੍ਪਮਾਣਿਕਾ.

੪੩. ਪਰਿਕ੍ਖਾਰਚੋਲ਼ੇ ਗਣਨਾ, ਪਮਾਣਂ ਵਾ ਨ ਦੀਪਿਤਂ;

ਤਥਾ ਵਤ੍ਵਾ ਅਧਿਟ੍ਠੇਯ੍ਯ, ਥਵਿਕਾਦਿਂ ਵਿਕਪ੍ਪਿਯਂ.

੪੪. ਅਹਤਾਹਤਕਪ੍ਪਾਨਂ, ਸਙ੍ਘਾਟਿ ਦਿਗੁਣਾ ਸਿਯਾ;

ਏਕਚ੍ਚਿਯੋਤ੍ਤਰਾਸਙ੍ਗੋ, ਤਥਾ ਅਨ੍ਤਰਵਾਸਕੋ.

੪੫. ਉਤੁਦ੍ਧਟਾਨ ਦੁਸ੍ਸਾਨਂ, ਸਙ੍ਘਾਟਿ ਚ ਚਤੁਗ੍ਗੁਣਾ;

ਭਵੇਯ੍ਯੁਂ ਦਿਗੁਣਾ ਸੇਸਾ, ਪਂਸੁਕੂਲੇ ਯਥਾਰੁਚਿ.

੪੬. ਤੀਸੁ ਦ੍ਵੇ ਵਾਪਿ ਏਕਂ ਵਾ, ਛਿਨ੍ਦਿਤਬ੍ਬਂ ਪਹੋਤਿ ਯਂ;

ਸਬ੍ਬੇਸੁ ਅਪ੍ਪਹੋਨ੍ਤੇਸੁ, ਅਨ੍ਵਾਧਿਮਾਦਿਯੇਯ੍ਯ ਵਾ;

ਅਚ੍ਛਿਨ੍ਨਞ੍ਚ ਅਨਾਦਿਣ੍ਣਂ, ਨ ਧਾਰੇਯ੍ਯ ਤਿਚੀਵਰਂ.

੪੭. ਗਾਮੇ ਨਿਵੇਸਨੇ ਉਦ੍ਦੋ-ਸਿਤਪਾਸਾਦਹਮ੍ਮਿਯੇ;

ਨਾਵਾਟ੍ਟਮਾਲ਼ਆਰਾਮੇ, ਸਤ੍ਥਖੇਤ੍ਤਖਲੇ ਦੁਮੇ.

੪੮. ਅਜ੍ਝੋਕਾਸੇ ਵਿਹਾਰੇ ਵਾ, ਨਿਕ੍ਖਿਪਿਤ੍ਵਾ ਤਿਚੀਵਰਂ;

ਭਿਕ੍ਖੁਸਮ੍ਮੁਤਿਯਾਞ੍ਞਤ੍ਰ, ਵਿਪ੍ਪਵਤ੍ਥੁਂ ਨ ਵਟ੍ਟਤਿ.

੪੯. ਰੋਗਵਸ੍ਸਾਨਪਰਿਯਨ੍ਤਾ, ਕਣ੍ਡੁਚ੍ਛਾਦਿਕਸਾਟਿਕਾ;

ਤਤੋ ਪਰਂ ਵਿਕਪ੍ਪੇਯ੍ਯ, ਸੇਸਾ ਅਪਰਿਯਨ੍ਤਿਕਾ.

੫੦. ਪਚ੍ਚਤ੍ਥਰਣ ਪਰਿਕ੍ਖਾਰ-ਮੁਖਪੁਞ੍ਛਨਚੋਲ਼ਕਂ;

ਦਸਂ ਪ੍ਯਰਤ੍ਤਨਾਦਿਣ੍ਣਕਪ੍ਪਂ ਲਬ੍ਭਂ ਨਿਸੀਦਨਂ.

੫੧. ਅਦਸਂ ਰਜਿਤਂਯੇਵ, ਸੇਸਚੀਵਰਪਞ੍ਚਕਂ;

ਕਪ੍ਪਤਾਦਿਣ੍ਣਕਪ੍ਪਂਵ, ਸਦਸਂਵ ਨਿਸੀਦਨਂ.

੫੨. ਅਨਧਿਟ੍ਠਿਤਨਿਸ੍ਸਟ੍ਠਂ, ਕਪ੍ਪੇਤ੍ਵਾ ਪਰਿਭੁਞ੍ਜਯੇ;

ਹਤ੍ਥਦੀਘਂ ਤਤੋਪਡ੍ਢ-ਵਿਤ੍ਥਾਰਞ੍ਚ ਵਿਕਪ੍ਪਿਯਂ.

੫੩. ਤਿਚੀਵਰਸ੍ਸ ਭਿਕ੍ਖੁਸ੍ਸ, ਸਬ੍ਬਮੇਤਂ ਪਕਾਸਿਤਂ;

ਪਰਿਕ੍ਖਾਰਚੋਲ਼ਿਯੋ ਸਬ੍ਬਂ, ਤਥਾ ਵਤ੍ਵਾ ਅਧਿਟ੍ਠਤਿ.

੫੪. ਅਚ੍ਛੇਦਵਿਸ੍ਸਜ੍ਜਨਗਾਹਵਿਬ੍ਭਮਾ,