੯. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਂ

੧. ਪਾਤਿਮੋਕ੍ਖੁਦ੍ਦੇਸਯਾਚਨਕਥਾ

੩੮੩. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ ਨਨ੍ਦਿਮੁਖਿਯਾ ਰਤ੍ਤਿਯਾਤਿ ਏਤ੍ਥ ਨਨ੍ਦਿਯਤਿ ਤੁਸਿਯਤੀਤਿ ਨਨ੍ਦਿ, ਇਕਾਰਨ੍ਤੋਯਂ ਨਪੁਂਸਕਲਿਙ੍ਗੋ. ‘‘ਨਨ੍ਦਿਸੇਨੋ (ਜਾ. ਅਟ੍ਠ. ੩.੪.੧) ਨਨ੍ਦਿਵਿਸਾਲੋ’’ਤਿਆਦੀਸੁ ਇਕਾਰਨ੍ਤੋਯਂ ਪੁਲ੍ਲਿਙ੍ਗੋ ਹੋਤਿ, ਇਧ ਪਨ ਮੁਖਂ ਅਪੇਕ੍ਖਿਤ੍ਵਾ ਇਕਾਰਨ੍ਤੋ ਨਪੁਂਸਕਲਿਙ੍ਗੋ ਹੋਤਿ. ਅਰੁਣੁਟ੍ਠਿਤਕਾਲੇ ਓਦਾਤਦਿਸਾਮੁਖਤਾਯ ਨਨ੍ਦਿ ਮੁਖਂ ਏਤਿਸ੍ਸਂ ਰਤ੍ਤਿਯਨ੍ਤਿ ਨਨ੍ਦਿਮੁਖੀ, ਰਤ੍ਤਿ, ਤਾਯ ਨਨ੍ਦਿਮੁਖਿਯਾ ਰਤ੍ਤਿਯਾ, ਤੇਨ ਵੁਤ੍ਤਂ ‘‘ਅਰੁਣੁਟ੍ਠਿਤਕਾਲੇਪਿ ਹਿ ਨਨ੍ਦੀਮੁਖਾ ਵਿਯ ਰਤ੍ਤਿ ਖਾਯਤੀ’’ਤਿ. ਅਨ੍ਤੋਪੂਤਿਨ੍ਤਿ ਏਤ੍ਥ ਕਾਯਸ੍ਸ ਅਨ੍ਤੋ ਕੁਣਪਪੂਤਿਨ੍ਤਿ ਅਤ੍ਥਂ ਪਟਿਪਕ੍ਖਿਪਨ੍ਤੋ ਆਹ ‘‘ਅਤ੍ਤਚਿਤ੍ਤਸਨ੍ਤਾਨੇ’’ਤਿਆਦਿ. ‘‘ਕਿਲੇਸਵਸ੍ਸਨਵਸੇਨਾ’’ਤਿ ਇਮਿਨਾ ਉਦਕਵਸ੍ਸਨਵਸੇਨਾਤਿ ਅਤ੍ਥਂ ਪਟਿਕ੍ਖਿਪਤਿ. ਅਵਸ੍ਸੁਤਨ੍ਤਿ ਤਿਨ੍ਤਂ, ਕਿਲਿਨ੍ਨਨ੍ਤਿ ਅਤ੍ਥੋ. ਕਸਮ੍ਬੁਜਾਤਨ੍ਤਿ ਏਤ੍ਥ ਕਸਮ੍ਬੂਤਿ ਸਙ੍ਕਾਰੋ. ਸੋ ਹਿ ਸਮ੍ਮੁਞ੍ਚਨਿਯਾ ਕਸਿਯਮਾਨੇ ਵਿਲੇਖਿਯਮਾਨੇ ਸਮ੍ਬਤਿ ਸਦ੍ਦਂ ਕਰੋਤੀਤਿ ਕਸਮ੍ਬੁ, ਤਂ ਵਿਯ ਜਾਤਨ੍ਤਿ ਕਸਮ੍ਬੁਜਾਤਨ੍ਤਿ ਅਤ੍ਥੋ ਦਟ੍ਠਬ੍ਬੋ. ਅਟ੍ਠਕਥਾਯਂ ਪਨ ਅਧਿਪ੍ਪਾਯਵਸੇਨ ‘‘ਆਕਿਲਿਟ੍ਠਜਾਤ’’ਨ੍ਤਿ ਵੁਤ੍ਤਂ, ਅਤਿਵਿਯ ਕਿਲਿਟ੍ਠਜਾਤਨ੍ਤਿ ਅਤ੍ਥੋ. ‘‘ਆਕਿਣ੍ਣਦੋਸਤਾਯ ਕਿਲਿਟ੍ਠਜਾਤ’’ਨ੍ਤਿਪਿ ਪਾਠੋ. ‘‘ਯਾਵ ਬਾਹਾਗਹਣਾਪਿ ਨਾਮਾ’’ਤਿ ਇਮਿਨਾ ਪਾਠੇਨ ਦਸ੍ਸੇਤੀਤਿ ਸਮ੍ਬਨ੍ਧੋ. ਹੀਤਿ ਪਦਪੂਰਣਮਤ੍ਤਂ. ਤੇਨਾਤਿ ਮੋਘਪੁਰਿਸੇਨ. ‘‘ਯਾਵਾ’’ਤਿ ਨਿਪਾਤਪਯੋਗਤ੍ਤਾ ‘‘ਬਾਹਾਗਹਣਾਪੀ’’ਤਿ ਏਤ੍ਥ ਪਞ੍ਚਮੀਵਿਭਤ੍ਤਿ ਅਵਧਿਅਤ੍ਥੇ ਹੋਤਿ. ਨਾਮ-ਸਦ੍ਦੋ ਗਰਹਤ੍ਥਜੋਤਕੋ, ਤਸ੍ਸ ਪਯੋਗਤ੍ਤਾ ‘‘ਆਗਮੇਸ੍ਸਤੀ’’ਤਿ ਏਤ੍ਥ ਅਤੀਤਤ੍ਥੇ ਅਨਾਗਤਵਚਨਂ (ਸਦ੍ਦਨੀਤਿਸੁਤ੍ਤਮਾਲਾਯ ੮੯੩ ਸੁਤ੍ਤੇ). ਆਗਮੇਸ੍ਸਤਿ ਨਾਮਾਤਿ ਯੋਜਨਾ. ਆਗਮੇਸ੍ਸਤੀਤਿ ਈਸਂ ਅਧਿਵਾਸੇਸ੍ਸਤਿ. ‘‘ਆਤੋ ਗਮੁਈਸਮਧਿਵਾਸਨੇ’’ਤਿ ਹਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੮ ਮਕਾਰਨ੍ਤਧਾਤੁ) ਵੁਤ੍ਤਂ.

੩੮੪. ਨ ਆਯਤਕੇਨੇਵ ਪਪਾਤੋਤਿ ਏਤ੍ਥ ਦੀਘੇਨੇਵ ਪਪਾਤੋਤਿ ਦਸ੍ਸੇਨ੍ਤੋ ਆਹ ‘‘ਨ ਪਠਮਮੇਵ ਗਮ੍ਭੀਰੋ’’ਤਿ. ਆਯਤਸਦ੍ਦੋ ਹਿ ਦੀਘਪਰਿਯਾਯੋ. ‘‘ਨ ਆਯਤਕੇਨ ਗੀਤਸ੍ਸਰੇਨ ਧਮ੍ਮੋ ਗਾਯਿਤਬ੍ਬੋ’’ਤਿਆਦੀਸੁ (ਚੂਲ਼ਵ. ੨੪੯) ਵਿਯ ਪਪਾਤੋ ਦੀਘੇਨ ਤੀਰਸ੍ਸ ਆਦਿਮ੍ਹਿ ਨ ਹੋਤੀਤਿ ਵੁਤ੍ਤਂ ਹੋਤਿ. ਪਠਮਮੇਵਾਤਿ ਤੀਰਸ੍ਸ ਆਦਿਮ੍ਹਿਯੇਵ. ‘‘ਅਨੁਪੁਬ੍ਬੇਨ ਗਮ੍ਭੀਰੋ’’ਤਿ ਇਮਿਨਾ ‘‘ਨ ਪਠਮਮੇਵ ਗਮ੍ਭੀਰੋ’’ਤਿ ਵਚਨਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਠਿਤਧਮ੍ਮੋਤਿ ਤੀਰਸ੍ਸ ਅਨ੍ਤੋਯੇਵ ਠਿਤਸਭਾਵੋ. ਵੇਲਂ ਨਾਤਿਵਤ੍ਤਤੀਤਿ ਏਤ੍ਥ ਵੇਲਾਸਦ੍ਦਸ੍ਸ ਤੀਰਮਰਿਯਾਦਤ੍ਥੇਸੁ ਪਵਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਓਸਕ੍ਕਨਕਨ੍ਦਰਂ ਮਰਿਯਾਦਵੇਲ’’ਨ੍ਤਿ. ਤਤ੍ਥ ‘‘ਓਸਕ੍ਕਨਕਨ੍ਦਰ’’ਇਤਿ ਪਦੇਨ ਤੀਰਤ੍ਥਂ ਦਸ੍ਸੇਤਿ, ‘‘ਮਰਿਯਾਦ’’ ਇਤਿ ਪਦੇਨ ਮਰਿਯਾਦਤ੍ਥਂ. ਕੇਨ ਉਦਕੇਨ ਦਰਿਤਬ੍ਬੋਤਿ ਕਨ੍ਦਰੋ, ਉਦਕੇਨ ਓਸਕ੍ਕਨੋ ਕਨ੍ਦਰੋ ਏਤ੍ਥਾਤਿ ਓਸਕ੍ਕਨਕਨ੍ਦਰਂ, ਤੀਰਂ. ਓਸਕ੍ਕਨਕਨ੍ਦਰਭੂਤਞ੍ਚ ਮਰਿਯਾਦਭੂਤਞ੍ਚ ਵੇਲਂ ਤੀਰਂ ਨਾਤਿਕ੍ਕਮਤੀਤਿ ਅਤ੍ਥੋ. ਤੀਰਂ ਵਾਹੇਤੀਤਿ ਏਤ੍ਥ ਵਹਧਾਤੁਯਾ ਪਾਪੁਣਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਤੀਰਂ ਅਪ੍ਪੇਤੀ’’ਤਿ. ਤਤ੍ਥ ਅਪ੍ਪੇਤੀਤਿ ਪਾਪੁਣਾਪੇਤਿ. ‘‘ਉਸ੍ਸਾਰੇਤੀ’’ਤਿ ਇਮਿਨਾ ਪਾਲ਼ਿਯਂ ‘‘ਥਲਂ ਉਸ੍ਸਾਰੇਤੀ’’ਤਿ ਪਦੇਨ ‘‘ਤੀਰਂ ਵਾਹੇਤੀ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤੀਤਿ ਅਤ੍ਥੋ ਦਸ੍ਸਿਤੋ. ਉਸ੍ਸਾਰੇਤੀਤਿ ਉਦ੍ਧਰਿਤ੍ਵਾ ਗਮਾਪੇਤਿ. ਅਞ੍ਞਾਪਟਿਵੇਧੋਤਿ ਏਤ੍ਥ ਆਜਾਨਾਤਿ, ਆਜਾਨਿਤ੍ਥਾਤਿ ਵਾ ਅਞ੍ਞਂ ਅਰਹਤ੍ਤਮਗ੍ਗੋ ਵਾ ਅਰਹਤ੍ਤਫਲਂ ਵਾ, ਤਸ੍ਸ ਪਟਿਵਿਜ੍ਝਨਂ ਅਞ੍ਞਾਪਟਿਵੇਧੋ, ਸੁਖੁਚ੍ਚਾਰਣਤ੍ਥਂ ਮਜ੍ਝੇ ਦੀਘੋ, ਅਞ੍ਞਾਪਟਿਵੇਧੋ ਨਾਮ ਅਰਹਤ੍ਤੁਪ੍ਪਤ੍ਤਿਯੇਵ ਹੋਤਿ. ਤੇਨ ਵੁਤ੍ਤਂ ‘‘ਅਰਹਤ੍ਤੁਪ੍ਪਤ੍ਤੀ’’ਤਿ.

੩੮੫. ਛਨ੍ਨਮਤਿਵਸ੍ਸਤੀਤਿ ਉਦਾਨਪਾਲ਼ਿਯਾ ਸਨ੍ਧਾਯਭਾਸਿਤਪਾਲ਼ਿਭਾਵਂ ਦਸ੍ਸੇਨ੍ਤੋ ਆਹ ‘‘ਆਪਤ੍ਤਿ’’ਨ੍ਤਿਆਦਿ. ਤਤ੍ਥ ਇਦਨ੍ਤਿ ‘‘ਛਨ੍ਨਮਤਿਵਸ੍ਸਤੀ’’ਤਿ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਏਤਨ੍ਤਿ ਨਵਾਪਤ੍ਤਿਆਪਜ੍ਜਨਂ ਸਨ੍ਧਾਯਾਤਿ ਸਮ੍ਬਨ੍ਧੋ.

੪. ਪਾਤਿਮੋਕ੍ਖਸਵਨਾਰਹਕਥਾ

੩੮੬. ਪੁਰੇ ਵਾ ਪਚ੍ਛਾ ਵਾਤਿ ਞਤ੍ਤਿਤੋ ਪੁਰੇ ਵਾ ਪਚ੍ਛਾ ਵਾ. ਖੇਤ੍ਤੇਤਿ ਪਾਤਿਮੋਕ੍ਖਟ੍ਠਪਨਸ੍ਸ ਖੇਤ੍ਤੇ. ਖੇਤ੍ਤਂ ਦਸ੍ਸੇਨ੍ਤੋ ਆਹ ‘‘ਤਸ੍ਮਾ’’ਤਿਆਦਿ. ਰੇਕਾਰਂ ਭਣਤੀਤਿ ਛਤ੍ਤਿਂਸਤ੍ਯਕ੍ਖਰੇਸੁ ਰੇ-ਕਾਰਂ ਞਤ੍ਤਿਟ੍ਠਪਨਕੋ ਭਣਤਿ. ਇਦਨ੍ਤਿ ਪਞ੍ਚਤਿਂਸਤ੍ਯਕ੍ਖਰਾਨਂ ਉਚ੍ਚਾਰਣਟ੍ਠਾਨਂ. ਵੁਤ੍ਤੇਤਿ ਞਤ੍ਤਿਟ੍ਠਪਨਕੇਨ ਵੁਤ੍ਤੇ. ‘‘ਸੁਣਾਤੁ ਮੇ’’ਤਿ ਵਚਨੇ ਅਨਾਰਦ੍ਧੇਯੇਵਾਤਿ ਯੋਜਨਾ.

੫. ਧਮ੍ਮਿਕਾਧਮ੍ਮਿਕਪਾਤਿਮੋਕ੍ਖਟ੍ਠਪਨਕਥਾ

੩੮੭. ਤੇਨ ਪੁਗ੍ਗਲੇਨਾਤਿ ਤੇਨ ਚੁਦਿਤਕੇਨ ਪੁਗ੍ਗਲੇਨ. ਸਾ ਵਿਪਤ੍ਤੀਤਿ ਸੀਲਵਿਪਤ੍ਤਿਆਦਿਸਙ੍ਖਾਤਾ ਸਾ ਵਿਪਤ੍ਤਿ. ਸਞ੍ਞਾਅਮੂਲਿਕਵਸੇਨਾਤਿ ‘‘ਕਤਾ’’ ਇਤਿ ਸਞ੍ਞਾਯ ਅਮੂਲਿਕਵਸੇਨ. ਕਤਞ੍ਚਾਤਿ ਏਕਨ੍ਤੇਨ ਕਤਞ੍ਚ. ਅਕਤਞ੍ਚਾਤਿ ਏਕਨ੍ਤੇਨ ਅਕਤਞ੍ਚ.

ਕੋਪੇਤੁਕਾਮਤਾਯ ਨੇਵ ਆਗਚ੍ਛਤੀਤਿ ਸਮ੍ਬਨ੍ਧੋ. ਤੇਨਾਤਿ ਅਨਾਗਮਨਾਦਿਕਾਰਣੇਨ. ਆਪਜ੍ਜਤੀਤਿ ਪਾਤਿਮੋਕ੍ਖਟ੍ਠਪਨਕੋ ਆਪਜ੍ਜਤਿ. ਇਚ੍ਚਸ੍ਸਾਪੀਤਿ ਇਤਿ ਏਵਂ ਅਸ੍ਸ ਪਾਤਿਮੋਕ੍ਖਟ੍ਠਪਨਕਸ੍ਸਾਪਿ. ਪਚ੍ਚਾਦਿਯਤੀਤਿ ਪਤਿ ਆਦਿਯਤਿ, ‘‘ਅਕਤਂ ਕਮ੍ਮਂ, ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿਆਦਿਨਾ ਪੁਨ ਆਦੀਯਤਿ, ਪੁਨ ਆਰਭਤੀਤਿ ਅਤ੍ਥੋ.

੬. ਧਮ੍ਮਿਕਪਾਤਿਮੋਕ੍ਖਟ੍ਠਪਨਕਥਾ

੩੮੮. ਮਗ੍ਗਪਟਿਪਾਦਨਾਦੀਸੂਤਿ ਮਗ੍ਗਸ੍ਮਿਂ ਪਟਿਪਾਦਨਾਦੀਸੁ. ਆਦਿਸਦ੍ਦੇਨ ਥੇਯ੍ਯਚਿਤ੍ਤੇਨ ਅਵਹਾਰਾਦਯੋ ਸਙ੍ਗਣ੍ਹਾਤਿ. ਆਕਾਰਾਦਿਸਞ੍ਞਾਤਿ ਆਕਾਰਸਞ੍ਞਾ ਲਿਙ੍ਗਸਞ੍ਞਾ ਨਿਮਿਤ੍ਤਸਞ੍ਞਾ. ਤਨ੍ਤਿ ਪਰਿਸਙ੍ਕਂ ਸਨ੍ਧਾਯਾਤਿ ਸਮ੍ਬਨ੍ਧੋ.

੭. ਅਤ੍ਤਾਦਾਨਅਙ੍ਗਕਥਾ

੩੯੮. ਅਤ੍ਤਾਦਾਨਂ ਆਦਾਤੁਕਾਮੇਨਾਤਿ ਏਤ੍ਥ ਕਿਂ ਅਤ੍ਤਾਦਾਨਨ੍ਤਿ ਆਹ ‘‘ਸਾਸਨਂ ਸੋਧੇਤੁਕਾਮੋ’’ਤਿਆਦਿ. ਇਮਿਨਾ ਪਰਂ ਚੋਦੇਤੁਂ ਅਤ੍ਤਨਾ ਆਦਾਤਬ੍ਬਂ ਅਧਿਕਰਣਂ ਅਤ੍ਤਾਦਾਨਨ੍ਤਿ ਵੁਚ੍ਚਤੀਤਿ ਦਸ੍ਸੇਤਿ. ਅਕਾਲੋ ਇਮਂ ਅਤ੍ਤਾਦਾਨਂ ਆਦਾਤੁਨ੍ਤਿ ਏਤ੍ਥ ਅਕਾਲਂ ਦਸ੍ਸੇਨ੍ਤੋ ਆਹ ‘‘ਰਾਜਭਯ’’ਨ੍ਤਿਆਦਿ. ਤਤ੍ਥ ਵਸ੍ਸਾਰਤ੍ਤੋਤਿ ਵਸ੍ਸਕਾਲੋ. ਸੋ ਹਿ ਵਸ੍ਸੋ ਅਤਿਵਿਯ ਰਞ੍ਜਤਿ ਏਤ੍ਥ ਕਾਲੇਤਿ ਵਸ੍ਸਾਰਤ੍ਤੋਤਿ ਵੁਚ੍ਚਤਿ. ਵਸ੍ਸਾਰਤ੍ਤੋਪਿ ਅਧਿਕਰਣਵੂਪਸਮਤ੍ਥਂ ਲਜ੍ਜਿਪਰਿਸਾਯ ਦੂਰਤੋ ਆਨਯਨਸ੍ਸ ਦੁਕ੍ਕਰਤ੍ਤਾ ਅਕਾਲੋ ਨਾਮ. ਇਤੀਤਿ ਅਯਂ ਰਾਜਭਯਾਦਿਕਾਲੋਤਿ ਅਤ੍ਥੋ. ਵਿਪਰੀਤੋਤਿ ਰਾਜਭਯਾਦੀਨਂ ਅਭਾਵਕਾਲੋ.

ਅਭੂਤਂ ਇਦਂ ਅਤ੍ਤਾਦਾਨਨ੍ਤਿ ਏਤ੍ਥ ਅਭੂਤਸਦ੍ਦੋ ਅਵਿਜ੍ਜਮਾਨਪਰਿਯਾਯੋਤਿ ਆਹ ‘‘ਅਸਨ੍ਤਮਿਦ’’ਨ੍ਤਿ, ਇਦਂ ਅਤ੍ਤਾਦਾਨਂ ਅਵਿਜ੍ਜਮਾਨਨ੍ਤਿ ਅਤ੍ਥੋ. ਮਯਾ ਗਹਿਤੋਤਿ ਸਮ੍ਬਨ੍ਧੋ. ਸੀਲਵਾ ਪੁਗ੍ਗਲੋਤਿ ਯੋਜਨਾ. ਯਨ੍ਤਿ ਅਤ੍ਤਾਦਾਨਂ ਸਂਵਤ੍ਤਤੀਤਿ ਸਮ੍ਬਨ੍ਧੋ. ਇਦਨ੍ਤਿ ਅਤ੍ਤਾਦਾਨਂ.

ਨ ਲਭਿਸ੍ਸਾਮਿ ਸਨ੍ਦਿਟ੍ਠੇ, ਲਭਿਸ੍ਸਾਮਿ ਸਨ੍ਦਿਟ੍ਠੇਤਿ ਏਤ੍ਥ ‘‘ਨ ਲਭਿਸ੍ਸਾਮਿ, ਲਭਿਸ੍ਸਾਮੀ’’ਤਿ ਇਦਂ ਕਿਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਅਪ੍ਪੇਕਦਾ ਹੀ’’ਤਿਆਦਿ. ਤਤ੍ਥ ਅਪ੍ਪੇਕਦਾਤਿ ਅਪਿ ਏਕਦਾ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਏਵਰੂਪਾਤਿ ਸਨ੍ਦਿਟ੍ਠਸਮ੍ਭਤ੍ਤਸਭਾਵਾ. ਤਨ੍ਤਿ ਉਪਤ੍ਥਮ੍ਭਕਭਿਕ੍ਖੁਲਭਨਂ ਸਨ੍ਧਾਯਾਤਿ ਸਮ੍ਬਨ੍ਧੋ. ‘‘ਨ ਲਭਿਸ੍ਸਾਮੀ’’ਤਿ ਇਦਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ.

ਕੋਸਮ੍ਬਕਾਨਂ ਭਣ੍ਡਨਾਦਿ ਭਵਤਿ ਵਿਯ ਭਣ੍ਡਨਾਦਿ ਭਵਿਸ੍ਸਤੀਤਿ ਯੋਜਨਾ. ਪਚ੍ਛਾਪਿ ਅਵਿਪ੍ਪਟਿਸਾਰਕਰਂ ਭਵਿਸ੍ਸਤੀਤਿ ਏਤ੍ਥ ਕੇਸਂ ਅਵਿਪ੍ਪਟਿਸਾਰਕਰਂ ਭਵਤਿ ਵਿਯ ਪਞ੍ਚਙ੍ਗਸਮ੍ਪਨ੍ਨਾਗਤਂ ਅਤ੍ਤਾਦਾਨਂ ਆਦਿਯਤੋ ਪਚ੍ਛਾਪਿ ਅਵਿਪ੍ਪਟਿਸਾਰਕਰਂ ਭਵਤੀਤਿ ਆਹ ‘‘ਸੁਭਦ੍ਦਂ ਵੁਡ੍ਢਪਬ੍ਬਜਿਤ’’ਨ੍ਤਿਆਦਿ. ਤਤ੍ਥ ਪਞ੍ਚਸਤਿਕਸਙ੍ਗੀਤਿਨ੍ਤਿ ਪਞ੍ਚਸਤੇਹਿ ਮਹਾਕਸ੍ਸਪਾਦੀਹਿ ਕਤ੍ਤਬ੍ਬਂ ਸਙ੍ਗੀਤਿਂ. ਮਹਾਕਸ੍ਸਪਤ੍ਥੇਰਸ੍ਸ ਪਚ੍ਛਾ ਸਮਨੁਸ੍ਸਰਣਕਰਂ ਹੋਤਿ ਇਵ ਹੋਤੀਤਿ ਯੋਜਨਾ. ਏਸੇਵ ਨਯੋ ਸੇਸੇਸੁਪਿ. ਸਮਨੁਸ੍ਸਰਣਕਰਨ੍ਤਿ ਸਮ੍ਮੋਦਵਸੇਨ ਪੁਨਪ੍ਪੁਨਂ ਅਨੁਸ੍ਸਰਣਸ੍ਸ ਕਰਂ. ਇਮਿਨਾ ‘‘ਅਵਿਪ੍ਪਟਿਸਾਰਕਰ’’ਨ੍ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਪਚ੍ਛਾਪੀਤਿ ਏਤ੍ਥ ਪਿਸਦ੍ਦਸ੍ਸ ਅਵੁਤ੍ਤਸਮ੍ਪਿਣ੍ਡਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਾਸਨਸ੍ਸ ਚਾ’’ਤਿਆਦਿ. ਤਤ੍ਥ ਸਾਸਨਸ੍ਸ ਚ ਸਸ੍ਸਿਰਿਕਤਾਯਾਤਿ ਸਮ੍ਬਨ੍ਧੋ. ਵਿਗਤਉਪਕ੍ਕਿਲੇਸਚਨ੍ਦਿਮਸੂਰਿਯਾਨਂ ਵਿਯ ਸਾਸਨਸ੍ਸ ਚ ਸਸ੍ਸਿਰਿਕਤਾਯ ਸਂਵਤ੍ਤਤੀਤਿ ਅਧਿਪ੍ਪਾਯੋ.

੮. ਚੋਦਕੇਨ ਪਚ੍ਚਵੇਕ੍ਖਿਤਬ੍ਬਧਮ੍ਮਕਥਾ

੩੯੯. ‘‘ਅਚ੍ਛਿਦ੍ਦੇਨ ਅਪ੍ਪਟਿਮਂਸੇਨਾ’’ਤਿਆਦੀਸੁ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਛਿਦ੍ਦਸਪ੍ਪਟਿਮਂਸਂ ਪਠਮਂ ਦਸ੍ਸੇਤ੍ਵਾ ਵਿਪਰੀਤਵਸੇਨ ਅਚ੍ਛਿਦ੍ਦਅਪ੍ਪਟਿਮਂਸਂ ਦਸ੍ਸੇਨ੍ਤੋ ਆਹ ‘‘ਯੇਨਾ’’ਤਿਆਦਿ. ਤਤ੍ਥ ਯੇਨ ਕਤਾਨੀਤਿ ਸਮ੍ਬਨ੍ਧੋ. ਛਿਜ੍ਜਤੀਤਿ ਛਿਦ੍ਦੋ, ਪਟਿ ਪੁਨਪ੍ਪੁਨਂ ਮਸਿਯਤਿ ਆਮਸਿਯਤੀਤਿ ਪਟਿਮਂਸੋ, ਨਿਗ੍ਗਹਿਤਾਗਮੋ, ਭਾਵਪ੍ਪਧਾਨੋਯਂ ਕਮ੍ਮਨਿਦ੍ਦੇਸੋ. ਸਹ ਪਟਿਮਂਸੇਨਾਤਿ ਸਪ੍ਪਟਿਮਂਸੋ, ਕਾਯਸਮਾਚਾਰੋ. ਵਿਪਰੀਤੋਤਿ ਵਿਪਰਿਵਤ੍ਤਵਸੇਨ ਇਤੋ ਪਵਤ੍ਤੋ, ਕਾਯਸਮਾਚਾਰੋਤਿ ਅਤ੍ਥੋ. ਅਮੂਲਕਾਨੁਦ੍ਧਂਸਨਾਦੀਹੀਤਿ ਆਦਿਸਦ੍ਦੇਨ ਦੁਟ੍ਠੁਲ੍ਲਵਾਚਾਦਯੋ ਸਙ੍ਗਣ੍ਹਾਤਿ.

ਮੇਤ੍ਤਂ ਨੁ ਖੋ ਮੇ ਚਿਤ੍ਤਨ੍ਤਿ ਏਤ੍ਥ ਅਪ੍ਪਨਾਭਾਵਪ੍ਪਤ੍ਤਂ ਮੇਤ੍ਤਚਿਤ੍ਤਮੇਵਾਧਿਪ੍ਪੇਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਪਲਿਬੋਧੇ ਛਿਨ੍ਦਿਤ੍ਵਾ’’ਤਿਆਦਿ. ਤਤ੍ਥ ਪਲਿਬੋਧੇਤਿ ਆਵਾਸਪਲਿਬੋਧਾਦਿਕੇ ਪਲਿਬੋਧੇ. ‘‘ਵਿਕ੍ਖਮ੍ਭਨਵਸੇਨ ਵਿਹਤਾਘਾਤ’’ਨ੍ਤਿ ਇਮਿਨਾ ਅਪ੍ਪਨਾਭਾਵਪ੍ਪਤ੍ਤਂ ਮੇਤ੍ਤਚਿਤ੍ਤਮੇਵ ਦਸ੍ਸੇਤਿ. ਇਦਂ ਪਨਾਵੁਸੋ ਕਤ੍ਥ ਵੁਤ੍ਤਂ ਭਗਵਤਾਤਿ ਏਤ੍ਥ ਇਦਂਸਦ੍ਦਕਿਂਸਦ੍ਦਾਨਂ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਇਦਂ ਸਿਕ੍ਖਾਪਦਂ ਕਤਰਸ੍ਮਿਂ ਨਗਰੇ’’ਤਿ.

੯. ਚੋਦਕੇਨ ਉਪਟ੍ਠਾਪੇਤਬ੍ਬਕਥਾ

੪੦੦. ‘‘ਕਾਲੇਨ ਵਕ੍ਖਾਮੀ’’ਤਿਆਦੀਸੁ ਚੋਦਨਾਯ ਕਾਲਅਕਾਲਾਦਿਂ ਦਸ੍ਸੇਨ੍ਤੋ ਆਹ ‘‘ਏਕੋ ਏਕ’’ਨ੍ਤਿਆਦਿ. ਤਤ੍ਥ ਏਕੋਤਿ ਏਕਕੋ ਚੋਦਕੋ. ਏਕਨ੍ਤਿ ਏਕਕਂ ਚੁਦਿਤਕਂ. ਸਙ੍ਘਮਜ੍ਝ…ਪੇ… ਅਸਨਸਾਲਾਦੀਸੁ ਵਾ ਪਰਿਵਾਰਿਤਕ੍ਖਣੇ ਵਾਤਿ ਯੋਜਨਾ. ਤਤ੍ਥ ‘‘ਸਙ੍ਘਮਜ੍ਝ…ਪੇ… ਅਸਨਸਾਲਾਦੀਸੂ’’ਤਿ ਇਮਿਨਾ ਠਾਨਾਭਾਵਂ ਦਸ੍ਸੇਤਿ, ‘‘ਉਪਟ੍ਠਾਕੇਹਿ ਪਰਿਵਾਰਿਤਕ੍ਖਣੇ’’ਤਿ ਇਮਿਨਾ ਕਾਲਾਭਾਵਂ ਦਸ੍ਸੇਤਿ. ਇਮੇਹਿ ਪਦੇਹਿ ਠਾਨਮ੍ਪਿ ਕਾਲੇਨ ਸਙ੍ਗਹੇਤ੍ਵਾ ‘‘ਕਾਲੇਨ ਵਕ੍ਖਾਮੀ’’ਤਿ ਵੁਤ੍ਤਨ੍ਤਿ ਦਸ੍ਸੇਤਿ. ਤਚ੍ਛੇਨਾਤਿ ਸਚ੍ਚੇਨ. ਹਮ੍ਭੋਤਿ ਨਿਪਾਤੋ ਪਚ੍ਛਿਮਪਦੇਸੁ ਪਚ੍ਚੇਕਂ ਯੋਜੇਤਬ੍ਬੋ. ਹਮ੍ਭੋ ਮਹਲ੍ਲਕ, ਹਮ੍ਭੋ ਪਰਿਸਾਵਚਰ, ਹਮ੍ਭੋ ਪਂਸੁਕੂਲਿਕ, ਹਮ੍ਭੋ ਧਮ੍ਮਕਥਿਕਾਤਿ ਹਿ ਅਤ੍ਥੋ. ਇਦਨ੍ਤਿ ਕਮ੍ਮਂ. ਕਾਰਣਨਿਸ੍ਸਿਤਨ੍ਤਿ ਮਹਲ੍ਲਕਭਾਵਕਾਰਣਾਦੀਸੁ ਨਿਸ੍ਸਿਤਂ. ‘‘ਭਨ੍ਤੇ’’ਤਿ ਨਿਪਾਤੋਪਿ ਪਚ੍ਚੇਕਂ ਯੋਜੇਤਬ੍ਬੋ. ਏਤ੍ਥ ਚ ‘‘ਹਮ੍ਭੋ’’ਤਿ ਨਿਪਾਤੇਨ ਲੋਕਵੋਹਾਰਵਸੇਨ ਅਨਾਦਰਸ੍ਸ ਪਕਾਸਕਤ੍ਤਾ ਫਰੁਸੇਨ ਵਦਤਿ ਨਾਮ, ‘‘ਭਨ੍ਤੇ’’ਤਿ ਨਿਪਾਤੇਨ ਸਾਦਰਸ੍ਸ ਪਕਾਸਕਤ੍ਤਾ ਸਣ੍ਹੇਨ ਵਦਤਿ ਨਾਮ. ਕਾਰਣਨਿਸ੍ਸਿਤਂ ਕਤ੍ਵਾਤਿ ਇਮਸ੍ਮਿਂ ਵੀਤਿਕ੍ਕਮੇ ਅਯਂ ਨਾਮ ਦੋਸੋਤਿ ਕਾਰਣਨਿਸ੍ਸਿਤਂ ਕਤ੍ਵਾ. ‘‘ਮੇਤ੍ਤਚਿਤ੍ਤਂ ਉਪਟ੍ਠਪੇਤ੍ਵਾ’’ਤਿ ਇਮਿਨਾ ਮੇਤ੍ਤਚਿਤ੍ਤੋਤਿ ਪਦਸ੍ਸ ‘‘ਵਕ੍ਖਾਮੀ’’ਤਿ ਪਦੇ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ. ਨੋ ਦੋਸਨ੍ਤਰੋਤਿ ਏਤ੍ਥ ਅਨ੍ਤਰਸਦ੍ਦਸ੍ਸ ਚਿਤ੍ਤਵਾਚਕਭਾਵਂ ਦਸ੍ਸੇਨ੍ਤੋ ਆਹ ‘‘ਨ ਦੁਟ੍ਠਚਿਤ੍ਤੋ’’ਤਿ. ‘‘ਹੁਤ੍ਵਾ’’ਤਿ ਇਮਿਨਾ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ.

੧੦. ਚੋਦਕਚੁਦਿਤਕਪਟਿਸਂਯੁਤ੍ਤਕਥਾ

੪੦੧. ਅਜ੍ਝਤ੍ਤਨ੍ਤਿ ਏਤ੍ਥ ਅਤ੍ਤਸਦ੍ਦਸ੍ਸ ਚਿਤ੍ਤਵਾਚਕਭਾਵਞ੍ਚ ਸਤ੍ਤਮੀਵਿਭਤ੍ਤਿਯਾਪਿ ਅਮਾਦੇਸਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਚਿਤ੍ਤੇ’’ਤਿ. ਉਪ੍ਪਾਦੇਤ੍ਵਾਤਿ ਇਮਿਨਾ ‘‘ਮਨਸਿਕਰਿਤ੍ਵਾ’’ਤਿ ਪਦਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਕਾਰੁਞ੍ਞਤਾਤਿ ਏਤ੍ਥ ਦ੍ਵੀਸੁ ਣ੍ਯਪਚ੍ਚਯਤਾਪਚ੍ਚਯੇਸੁ ਏਕਸ੍ਸੇਵ ਭਾਵਵਾਚਕਤ੍ਤਾ ਏਕੋ ਸ੍ਵਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਕਰੁਣਭਾਵੋ’’ਤਿ. ਤਤ੍ਥ ਕਰੁਣਸ੍ਸ ਪੁਗ੍ਗਲਸ੍ਸ ਭਾਵੋ ਕਾਰੁਞ੍ਞਂ, ਤਦੇਵ ਕਾਰੁਞ੍ਞਤਾ. ਅਥ ਵਾ ਕਰੁਣੋ ਏਵ ਪੁਗ੍ਗਲੋ ਕਾਰੁਞ੍ਞਂ, ਤਸ੍ਸ ਭਾਵੋ ਕਾਰੁਞ੍ਞਤਾਤਿ ਵਚਨਤ੍ਥੋ ਕਾਤਬ੍ਬੋ. ਇਮਿਨਾਤਿ ‘‘ਕਾਰੁਞ੍ਞਤਾ’’ਤਿ ਪਦੇਨ. ਕਰੁਣਞ੍ਚਾਤਿ ਅਪ੍ਪਨਾਪਤ੍ਤਂ ਕਰੁਣਞ੍ਚ. ਕਰੁਣਾਪੁਬ੍ਬਭਾਗਞ੍ਚਾਤਿ ਅਪ੍ਪਨਾਪਤ੍ਤਾਯ ਕਰੁਣਾਯ ਪੁਬ੍ਬਭਾਗੇ ਪਰਿਕਮ੍ਮੂਪਚਾਰਵਸੇਨ ਪਵਤ੍ਤਂ ਕਾਮਾਵਚਰਕਰੁਣਞ੍ਚ. ਦ੍ਵੀਹਿਪੀਤਿ ‘‘ਹਿਤੇਸਿਤਾ, ਅਨੁਕਮ੍ਪਿਤਾ’’ਤਿ ਦ੍ਵੀਹਿਪਿ ਪਦੇਹਿ. ਮੇਤ੍ਤਞ੍ਚਾਤਿ ਅਪ੍ਪਨਾਪਤ੍ਤਮੇਤ੍ਤਞ੍ਚ. ਮੇਤ੍ਤਾਪੁਬ੍ਬਭਾਗਞ੍ਚਾਤਿ ਅਪ੍ਪਨਾਪਤ੍ਤਾਯ ਮੇਤ੍ਤਾਯ ਪੁਬ੍ਬਭਾਗੇ ਪਰਿਕਮ੍ਮੂਪਚਾਰਵਸੇਨ ਪਵਤ੍ਤਂ ਕਾਮਾਵਚਰਮੇਤ੍ਤਞ੍ਚ. ਸੁਦ੍ਧਨ੍ਤੇਤਿ ਸੁਦ੍ਧੇ ਕੋਟ੍ਠਾਸੇ. ਪਟਿਞ੍ਞਂ ਆਰੋਪੇਤ੍ਵਾਤਿ ਚੁਦਿਤਕਂ ਪਟਿਞ੍ਞਂ ਆਰੋਪੇਤ੍ਵਾ. ਯੇ ਏਤੇਤਿ ‘‘ਕਾਰੁਞ੍ਞਤਾ’’ਤਿਆਦਿਨਾ ਨਯੇਨ ਯੇ ਏਤੇ ਪਞ੍ਚ ਧਮ੍ਮਾ ਵੁਤ੍ਤਾਤਿ ਯੋਜਨਾ. ਇਮਿਨਾ ਇਮੇ ਪਞ੍ਚ ਧਮ੍ਮੇਤਿ ਏਤ੍ਥ ਇਮਸਦ੍ਦਸ੍ਸ ਅਨਿਯਮਨਿਦ੍ਦੇਸਭਾਵਂ ਦਸ੍ਸੇਤਿ.

ਸਚ੍ਚੇ ਚ ਅਕੁਪ੍ਪੇ ਚਾਤਿ ਏਤ੍ਥ ਸਚ੍ਚਸਦ੍ਦਸ੍ਸ ਵਿਰਤਿਸਚ੍ਚਪਰਮਤ੍ਥਸਚ੍ਚਾਨਿ ਪਟਿਕ੍ਖਿਪਨ੍ਤੋ ਆਹ ‘‘ਵਚੀਸਚ੍ਚੇ ਚਾ’’ਤਿ. ‘‘ਅਕੁਪ੍ਪਨਤਾਯਾ’’ਤਿ ਇਮਿਨਾ ਨਕੁਪਸ੍ਸ ਭਾਵੋ ਅਕੁਪ੍ਪਨ੍ਤਿ ਕਤ੍ਵਾ ਣ੍ਯਪਚ੍ਚਯਸ੍ਸ ਭਾਵਤ੍ਥਂ ਦਸ੍ਸੇਤਿ. ਹੀਤਿ ਸਚ੍ਚਂ, ਵਿਤ੍ਥਾਰੋ ਵਾ. ਨ ਪਰੋ ਘਟ੍ਟੇਤਬ੍ਬੋਤਿ ਨ ਪਰੋ ਕੁਜ੍ਝਾਪੇਤਬ੍ਬੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ.

ਇਤਿ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.