੨੧੭. ਤਿਚੀਵਰਾਨੁਜਾਨਨਕਥਾ

੩੪੬. ‘‘ਉਕ੍ਖਿਤ੍ਤਭਣ੍ਡਿਕਭਾਵਂ ਆਪਾਦਿਤੇ’’ਤਿ ਇਮਿਨਾ ਉਬ੍ਭਣ੍ਡਿਤੇਤਿ ਏਤ੍ਥ ਉਕ੍ਖਿਤ੍ਤਂ ਭਣ੍ਡਂ ਉਬ੍ਭਣ੍ਡਂ, ਉਬ੍ਭਣ੍ਡਭਾਵਂ ਇਤਾ ਆਪਾਦਿਤਾਤਿ ਉਬ੍ਭਣ੍ਡਿਤਾਤਿ ਵਚਨਤ੍ਥਂ ਦਸ੍ਸੇਤਿ. ਤੇ ਉਬ੍ਭਣ੍ਡਿਤੇ ਭਿਕ੍ਖੂ ਅਦ੍ਦਸਾਤਿ ਯੋਜਨਾ. ਭਿਸਿਸਙ੍ਖੇਪੇਨਾਤਿ ਭਿਸਿਯਂ ਪਕ੍ਖੇਪੇਨ, ਪਵੇਸੇਨਾਤਿ ਅਤ੍ਥੋ, ਭਿਸਿਆਕਾਰੇਨਾਤਿ ਵੁਤ੍ਤਂ ਹੋਤਿ. ਤਤ੍ਥਾਤਿ ਦਕ੍ਖਿਣਾਗਿਰਿਂ. ਗਚ੍ਛਨ੍ਤਾ ਤੇ ਭਿਕ੍ਖੂਤਿ ਯੋਜਨਾ. ‘‘ਅਟ੍ਠਪਮਾਣਾਸੂ’’ਤਿ ਇਮਿਨਾ ਅਨ੍ਤਰਟ੍ਠਕਾਸੂਤਿ ਏਤ੍ਥ ਕਪਚ੍ਚਯੋ ਪਮਾਣਤ੍ਥੇ ਹੋਤੀਤਿ ਦਸ੍ਸੇਤਿ, ਕੇਸੁਚਿ ਪੋਤ੍ਥਕੇਸੁ ਪਮਾਣਸਦ੍ਦੋ ਨ ਦਿਸ੍ਸਤਿ, ਗਲ਼ਿਤੋਤਿ ਦਟ੍ਠਬ੍ਬੋ. ਰਤ੍ਤੀਸੂਤਿ ਸਮ੍ਬਨ੍ਧੋ. ਭਗਵਨ੍ਤਨ੍ਤਿ ਏਤ੍ਥ ਸਮ੍ਪਦਾਨਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਭਗਵਤੋ’’ਤਿ. ਸੀਤਾਲੁਕਾਤਿ ਏਤ੍ਥ ਸੀਤਂ ਪਕਤਿ ਏਤੇਸਨ੍ਤਿ ਸੀਤਾਲੁਨੋ, ਤੇਯੇਵ ਸੀਤਾਲੁਕਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੀਤਪਕਤਿਕਾ’’ਤਿ. ਯੇ ਕੁਲਪੁਤ੍ਤਾ ਪਕਤਿਯਾਵ ਸੀਤੇਨ ਕਿਲਮਨ੍ਤਿ, ਤੇ ਸੀਤਾਲੁਕਾ ਨਾਮਾਤਿ ਯੋਜਨਾ. ਏਕਚ੍ਚਿਯਨ੍ਤਿ ਏਤ੍ਥ ਏਕਚ੍ਚਸਦ੍ਦੋ ਏਕਪਰਿਯਾਯੋਤਿ ਆਹ ‘‘ਏਕਂ ਪਟ੍ਟ’’ਨ੍ਤਿ. ਇਮਿਨਾ ਏਕੋਯੇਵ ਏਕਚ੍ਚੋਤਿ ਕਤ੍ਵਾ ਸਕਤ੍ਥੇ ਅਚ੍ਚਪਚ੍ਚਯੋਤਿ ਦਸ੍ਸੇਤਿ. ‘‘ਪਟ੍ਟ’’ਨ੍ਤਿ ਇਮਿਨਾ ਏਕਚ੍ਚੇਨ ਨਿਯੁਤ੍ਤਂ ਏਕਚ੍ਚਿਯਨ੍ਤਿ ਵਚਨਤ੍ਥਂ ਕਤ੍ਵਾ ਨਿਯੁਤ੍ਤਤ੍ਥੇ ਪਵਤ੍ਤਸ੍ਸ ਇਯਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਇਤੀਤਿ ਏਵਂ. ਭਗਵਾ ਅਨੁਜਾਨਾਤੀਤਿ ਸਮ੍ਬਨ੍ਧੋ. ਇਤਰੇਤਿ ਸਙ੍ਘਾਟਿਤੋ ਇਤਰੇ ਉਤ੍ਤਰਾਸਙ੍ਗਅਨ੍ਤਰਵਾਸਕੇ.