ਮਹਾਵਗ੍ਗਯੋਜਨਾ

੧. ਮਹਾਖਨ੍ਧਕਂ

੧. ਬੋਧਿਕਥਾ

ਏਵੂਭਤੋਵਿਭਙ੍ਗਸ੍ਸ, ਕਤ੍ਵਾਨ ਯੋਜਨਾਨਯਂ;

ਮਹਾਵਗ੍ਗਖਨ੍ਧਕਸ੍ਸ, ਕਰਿਸ੍ਸਂ ਯੋਜਨਾਨਯਂ.

ਉਭਿਨ੍ਨਨ੍ਤਿ ਉਭਯੇਸਂ. ਪਾਤਿਮੋਕ੍ਖਾਨਨ੍ਤਿ ਪਾਤਿਮੋਕ੍ਖਵਿਭਙ੍ਗਾਨਂ. ਪਾਤਿਮੋਕ੍ਖਗਹਣੇਨ ਹੇਤ੍ਥ ਤੇਸਂ ਵਿਭਙ੍ਗੋਪਿ ਗਹਿਤੋ ਅਭੇਦੇਨ ਵਾ ਉਤ੍ਤਰਪਦਲੋਪਵਸੇਨ ਵਾ. ਖਨ੍ਧਕਨ੍ਤਿ ਪਞ੍ਞਤ੍ਤਿਸਮੂਹਂ. ਖਨ੍ਧਸਦ੍ਦੋ ਹੇਤ੍ਥ ਪਞ੍ਞਤ੍ਤਿਵਾਚਕੋ. ਵਿਨਯਪਞ੍ਞਤ੍ਤਿਯੋ ਵੁਚ੍ਚਨ੍ਤਿ ‘‘ਖਨ੍ਧੋ’’ਤਿ. ਤੇਸਂ ਸਮੂਹੋ ਖਨ੍ਧਕੋ. ਅਥਵਾ ਖਨ੍ਧੋਤਿ ਰਾਸਿ. ਖਨ੍ਧਸਦ੍ਦੋ ਹਿ ਰਾਸਤ੍ਥਵਾਚਕੋ. ਵਿਨਯਪਞ੍ਞਤ੍ਤਿਰਾਸਿ ਵੁਚ੍ਚਤਿ ‘‘ਖਨ੍ਧੋ’’ਤਿ. ਕਕਾਰੋ ਪਕਾਸਕਵਾਚਕੋ. ਖਨ੍ਧਾਨਂ ਵਿਨਯਪਞ੍ਞਤ੍ਤਿਰਾਸੀਨਂ ਕੋ ਪਕਾਸਕੋਤਿ ਖਨ੍ਧਕੋ, ਤਂ ਖਨ੍ਧਕਂ. ਅਯਂ ਪਨੇਤ੍ਥ ਯੋਜਨਾ – ਉਭਿਨ੍ਨਂ ਪਾਤਿਮੋਕ੍ਖਾਨਂ ਸਙ੍ਗੀਤਿਸਮਨਨ੍ਤਰਂ ਖਨ੍ਧਕੋਵਿਦਾ ਖਨ੍ਧਕੇਸੁ ਕੁਸਲਾ ਮਹਾਥੇਰਾ ਯਂ ਖਨ੍ਧਕਂ ਸਙ੍ਗਾਯਿਂਸੁ, ਤਸ੍ਸ ਖਨ੍ਧਕਸ੍ਸ ਦਾਨਿ ਸਂਵਣ੍ਣਨਾਕ੍ਕਮੋ ਯਸ੍ਮਾ ਸਮ੍ਪਤ੍ਤੋ, ਤਸ੍ਮਾ ਤਸ੍ਸ ਖਨ੍ਧਕਸ੍ਸ ਅਯਂ ਅਨੁਤ੍ਤਾਨਤ੍ਥਵਣ੍ਣਨਾ ਹੋਤੀਤਿ.

ਯੇ ਅਤ੍ਥਾਤਿ ਸਮ੍ਬਨ੍ਧੋ. ਹਿਸਦ੍ਦੋ ਪਦਾਲਙ੍ਕਾਰੋ. ਯੇਸਨ੍ਤਿ ਪਦਾਨਂ. ਤੇਤਿ ਤੇ ਅਤ੍ਥੇ. ਭਵੇਤਿ ਭਵੇਯ੍ਯ, ਭਵਿਤੁਂ ਸਕ੍ਕੁਣੇਯ੍ਯਾਤਿ ਅਤ੍ਥੋ. ਤੇਸਨ੍ਤਿ ਅਤ੍ਥਾਨਂ. ਕਿਨ੍ਤਿ ਕਿਂ ਪਯੋਜਨਂ. ਤੇਤਿ ਅਤ੍ਥੇ, ਞਾਤੁਨ੍ਤਿ ਸਮ੍ਬਨ੍ਧੋ. ਅਥਵਾ ਤੇਤਿ ਅਤ੍ਥਾ, ਅਵਣ੍ਣਿਤਾਤਿ ਸਮ੍ਬਨ੍ਧੋ. ਤੇਸਂਯੇਵਾਤਿ ਅਤ੍ਥਾਨਮੇਵ. ਅਯਂ ਪਨੇਤ੍ਥ ਯੋਜਨਾ – ਪਦਭਾਜਨੀਯੇ ਯੇਸਂ ਪਦਾਨਂ ਯੇ ਅਤ੍ਥਾ ਭਗਵਤਾ ਪਕਾਸਿਤਾ, ਤੇਸਂ ਪਦਾਨਨ੍ਤਿ ਪਾਠਸੇਸੋ, ਤੇ ਅਤ੍ਥੇ ਪੁਨ ਵਦੇਯ੍ਯਾਮ ਚੇ, ਕਦਾ ਪਰਿਯੋਸਾਨਂ ਸਂਵਣ੍ਣਨਾਯ ਪਰਿਨਿਟ੍ਠਾਨਂ ਭਵੇ, ਨ ਭਵੇਯ੍ਯਾਤਿ ਅਧਿਪ੍ਪਾਯੋ. ਯੇ ਚੇਵ ਅਤ੍ਥਾ ਉਤ੍ਤਾਨਾ, ਤੇਸਂ ਸਂਵਣ੍ਣਨਾਯ ਕਿਂ ਪਯੋਜਨਂ, ਨ ਪਯੋਜਨਨ੍ਤਿ ਅਧਿਪ੍ਪਾਯੋ. ਅਧਿਪ੍ਪਾਯਾਨੁਸਨ੍ਧੀਹਿ ਚ ਅਧਿਪ੍ਪਾਯੇਨ ਚ ਅਨੁਸਨ੍ਧਿਨਾ ਚ ਬ੍ਯਞ੍ਜਨੇਨ ਚ ਯੇ ਪਨ ਅਤ੍ਥਾ ਅਨੁਤ੍ਤਾਨਾ, ਤੇ ਅਤ੍ਥੇ, ਅਤ੍ਥਾ ਵਾ ਅਵਣ੍ਣਿਤਾ ਯਸ੍ਮਾ ਞਾਤੁਂ ਨ ਸਕ੍ਕਾ, ਤਸ੍ਮਾ ਤੇਸਂਯੇਵ ਅਤ੍ਥਾਨਂ ਅਯਂ ਸਂਵਣ੍ਣਨਾਨਯੋ ਹੋਤੀਤਿ. ਇਤਿਸਦ੍ਦੋ ਪਰਿਸਮਾਪਨਤ੍ਥੋ.

੧. ‘‘ਤੇਨ…ਪੇ… ਵੇਰਞ੍ਜਾਯ’’ਨ੍ਤਿਆਦੀਸੁ (ਪਾਰਾ. ੧) ਕਰਣਵਚਨੇ ਵਿਸੇਸਕਾਰਣਮਤ੍ਥਿ ਵਿਯ, ‘‘ਤੇਨ…ਪੇ… ਪਠਮਾਭਿਸਮ੍ਬੁਦ੍ਧੋ’’ਤਿ ਏਤ੍ਥ ਕਿਞ੍ਚਾਪਿ ਨਤ੍ਥੀਤਿ ਯੋਜਨਾ. ਅਸਦਿਸੋਪਮਾਯਂ. ਕਿਞ੍ਚਾਪਿਸਦ੍ਦੋ ਗਰਹਤ੍ਥਜੋਤਕੋ, ਪਨ-ਸਦ੍ਦੋ ਸਮ੍ਭਾਵਨਤ੍ਥਜੋਤਕੋ. ‘‘ਕਰਣਵਚਨੇਨੇਵਾ’’ਤਿ ਏਤ੍ਥ ਏਵਕਾਰੇਨ ਉਪਯੋਗਵਚਨਂ ਵਾ ਭੁਮ੍ਮਵਚਨਂ ਵਾ ਨਿਵਾਰੇਤਿ. ਅਭਿਲਾਪੋਤਿ ਅਭਿਮੁਖਂ ਅਤ੍ਥਂ ਲਪਤੀਤਿ ਅਭਿਲਾਪੋ, ਸਦ੍ਦੋ. ਆਦਿਤੋਤਿ ਵੇਰਞ੍ਜਕਣ੍ਡਤੋ. ਏਤਨ੍ਤਿ ‘‘ਤੇਨ ਸਮਯੇਨ ਬੁਦ੍ਧੋ ਭਗਵਾ ਉਰੁਵੇਲਾਯ’’ਨ੍ਤਿਆਦਿਵਚਨਂ. ‘‘ਅਞ੍ਞੇਸੁਪੀ’’ਤਿ ਵਤ੍ਵਾ ਤਮੇਵਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਇਤੋ ਪਰੇਸੂ’’ਤਿ.

ਯਦਿ ਵਿਸੇਸਕਾਰਣਂ ਨਤ੍ਥਿ, ਕਿਂ ਪਨੇਤਸ੍ਸ ਵਚਨੇ ਪਯੋਜਨਨ੍ਤਿ ਚੋਦੇਨ੍ਤੋ ਆਹ ‘‘ਕਿਂ ਪਨੇਤਸ੍ਸਾ’’ਤਿਆਦਿ. ਏਤਸ੍ਸਾਤਿ ‘‘ਤੇਨ ਸਮਯੇਨ ਬੁਦ੍ਧੋ ਭਗਵਾ ਉਰੁਵੇਲਾਯ’’ਨ੍ਤਿਆਦਿਵਚਨਸ੍ਸ. ਨਿਦਾਨਦਸ੍ਸਨਂ ਪਯੋਜਨਂ ਨਾਮਾਤਿ ਯੋਜਨਾ. ਤਮੇਵਤ੍ਥਂ ਵਿਭਾਵੇਤੁਮਾਹ ‘‘ਯਾ ਹੀ’’ਤਿਆਦਿ. ਯਾ ਪਬ੍ਬਜ੍ਜਾ ਚੇਵ ਯਾ ਉਪਸਮ੍ਪਦਾ ਚ ਭਗਵਤੋ ਅਨੁਞ੍ਞਾਤਾਤਿ ਯੋਜਨਾ. ਯਾਨਿ ਚ ਅਨੁਞ੍ਞਾਤਾਨੀਤਿ ਸਮ੍ਬਨ੍ਧੋ. ਤਾਨੀਤਿ ਪਬ੍ਬਜ੍ਜਾਦੀਨਿ. ਅਭਿਸਮ੍ਬੋਧਿਨ੍ਤਿ ਅਰਹਤ੍ਤਮਗ੍ਗਞਾਣਪਦਟ੍ਠਾਨਂ ਸਬ੍ਬਞ੍ਞੁਤਞ੍ਞਾਣਞ੍ਚ ਸਬ੍ਬਞ੍ਞੁਤਞ੍ਞਾਣਪਦਟ੍ਠਾਨਂ ਅਰਹਤ੍ਤਮਗ੍ਗਞਾਣਞ੍ਚ. ਬੋਧਿਮਹਾਮਣ੍ਡੇਤਿ ਮਹਨ੍ਤਾਨਂ ਮਗ੍ਗਞਾਣਸਬ੍ਬਞ੍ਞੁਤਞ੍ਞਾਣਾਨਂ ਪਸਨ੍ਨਟ੍ਠਾਨੇ ਬੋਧਿਰੁਕ੍ਖਮੂਲੇਤਿ ਅਤ੍ਥੋ. ਏਵਨ੍ਤਿਆਦਿ ਨਿਗਮਨਂ.

ਤਤ੍ਥਾਤਿ ਯਂ ‘‘ਤੇਨ ਸਮਯੇਨ ਉਰੁਵੇਲਾਯ’’ਨ੍ਤਿਆਦਿਵਚਨਂ ਵੁਤ੍ਤਂ, ਤਤ੍ਥ. ਉਰੁਵੇਲਾਯਨ੍ਤਿ ਏਤ੍ਥ ਉਰੁਸਦ੍ਦੋ ਮਹਨ੍ਤਪਰਿਯਾਯੋਤਿ ਆਹ ‘‘ਮਹਾਵੇਲਾਯ’’ਨ੍ਤਿ. ‘‘ਵਾਲਿਕਰਾਸਿਮ੍ਹੀ’’ਤਿ ਇਮਿਨਾ ਵੇਲਾਸਦ੍ਦਸ੍ਸ ਰਾਸਤ੍ਥਂ ਦਸ੍ਸੇਤਿ, ਕਾਲਸੀਮਾਦਯੋ ਨਿਵਤ੍ਤੇਤਿ. ਯਦਿ ਪਨ ‘‘ਉਰੂ’’ਤਿ ਵਾਲਿਕਾਯ ਨਾਮਂ, ‘‘ਵੇਲਾ’’ਤਿ ਮਰਿਯਾਦਾਯ, ਏਵਞ੍ਹਿ ਸਤਿ ਨਨੁ ਉਰੁਯਾ ਵੇਲਾਤਿ ਅਤ੍ਥੋ ਦਟ੍ਠਬ੍ਬੋਤਿ ਆਹ ‘‘ਵੇਲਾਤਿਕ੍ਕਮਨਹੇਤੁ ਆਹਟਾ ਉਰੁ ਉਰੁਵੇਲਾ’’ਤਿ. ਇਮਿਨਾ ਵੇਲਾਯ ਅਤਿਕ੍ਕਮੋ ਵੇਲਾ ਉਤ੍ਤਰਪਦਲੋਪਵਸੇਨ, ਵੇਲਾਯ ਆਹਟਾ ਉਰੁ ਉਰੁਵੇਲਾ ਪਦਵਿਪਰਿਯਾਯਵਸੇਨਾਤਿ ਦਸ੍ਸੇਤਿ. ਏਤ੍ਥਾਤਿ ‘‘ਉਰੁਵੇਲਾਯ’’ਨ੍ਤਿਪਦੇ. ਤਮੇਵਤ੍ਥਂ ਵਿਭਾਵੇਨ੍ਤੋ ਆਹ ‘‘ਅਤੀਤੇ ਕਿਰਾ’’ਤਿਆਦਿ. ਅਨੁਪ੍ਪਨ੍ਨੇ ਬੁਦ੍ਧੇ ਪਬ੍ਬਜਿਤ੍ਵਾਤਿ ਸਮ੍ਬਨ੍ਧੋ. ਤਾਪਸਪਬ੍ਬਜ੍ਜਨ੍ਤਿ ਇਸਿਪਬ੍ਬਜ੍ਜਂ, ਨ ਸਮਣਪਬ੍ਬਜ੍ਜਂ. ਕਤਿਕਵਤ੍ਤਨ੍ਤਿ ਕਰਣਂ ਕਤਂ, ਕਤੇਨ ਪਵਤ੍ਤਂ ਕਤਿਕਂ, ਤਮੇਵ ਵਤ੍ਤਂ ਕਤਿਕਵਤ੍ਤਂ. ਅਕਂਸੁ ਕਿਰਾਤਿ ਸਮ੍ਬਨ੍ਧੋ. ਯੋਤਿ ਯੋ ਕੋਚਿ. ਅਞ੍ਞੋਤਿ ਅਤ੍ਤਨਾ ਅਪਰੋ. ਸੋ ਆਕਿਰਤੂਤਿ ਸਮ੍ਬਨ੍ਧੋ. ਪਤ੍ਤਪੁਟੇਨਾਤਿ ਪਣ੍ਣੇਨ ਕਤੇਨ ਪੁਟੇਨ. ਤਤੋਤਿ ਕਤਿਕਵਤ੍ਤਕਰਣਤੋ. ਤਤ੍ਥਾਤਿ ਤਸ੍ਮਿਂ ਪਦੇਸੇ. ਤਤੋਤਿ ਮਹਾਵਾਲਿਕਰਾਸਿਜਨਨਤੋ, ਪਰਨ੍ਤਿ ਸਮ੍ਬਨ੍ਧੋ. ਨਨ੍ਤਿ ਤਂ ਪਦੇਸਂ. ਤਨ੍ਤਿ ਮਹਾਵਾਲਿਕਰਾਸਿਂ.

‘‘ਬੋਧਿਰੁਕ੍ਖਮੂਲੇ’’ਤਿ ਏਤ੍ਥ ਅਸ੍ਸਤ੍ਥਰੁਕ੍ਖਸ੍ਸ ਉਪਚਾਰਵਸੇਨ ਬੋਧੀਤਿ ਨਾਮਲਭਨਂ ਦਸ੍ਸੇਨ੍ਤੋ ਆਹ ‘‘ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣ’’ਨ੍ਤਿਆਦਿ. ਇਮਿਨਾ ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਤੀਤਿ ਬੋਧੀਤਿ ਵਚਨਤ੍ਥੇਨ ਚਤੂਸੁ ਮਗ੍ਗੇਸੁ ਞਾਣਂ ਬੋਧਿ ਨਾਮਾਤਿ ਦਸ੍ਸੇਤਿ. ਏਤ੍ਥਾਤਿ ਬੋਧਿਮ੍ਹਿ, ਬੋਧਿਯਂ ਵਾ. ਸਮੀਪਤ੍ਥੇ ਚੇਤਂ ਭੁਮ੍ਮਵਚਨਂ. ਰੁਕ੍ਖੋਪੀਤਿ ਪਿਸਦ੍ਦੇਨ ਨ ਮਗ੍ਗਞਾਣਮੇਵਾਤਿ ਦਸ੍ਸੇਤਿ. ਮੂਲੇਤਿ ਆਸਨ੍ਨੇ. ਪਠਮਾਭਿਸਮ੍ਬੁਦ੍ਧੋਤਿ ਅਨੁਨਾਸਿਕਲੋਪਵਸੇਨ ਸਨ੍ਧੀਤਿ ਆਹ ‘‘ਪਠਮਂ ਅਭਿਸਮ੍ਬੁਦ੍ਧੋ’’ਤਿ. ‘‘ਹੁਤ੍ਵਾ’’ਤਿ ਇਮਿਨਾ ‘‘ਪਠਮ’’ਨ੍ਤਿਪਦਸ੍ਸ ਭਾਵਨਪੁਂਸਕਂ ਦਸ੍ਸੇਤਿ. ਸਬ੍ਬਪਠਮਂਯੇਵਾਤਿ ਸਬ੍ਬੇਸਂ ਜਨਾਨਂ ਪਠਮਮੇਵ ਅਭਿਸਮ੍ਬੁਦ੍ਧੋ ਹੁਤ੍ਵਾਤਿ ਸਮ੍ਬਨ੍ਧੋ. ਏਕੋ ਏਵ ਪਲ੍ਲਙ੍ਕੋ ਏਕਪਲ੍ਲਙ੍ਕੋਤਿ ਅਵਧਾਰਣਸਮਾਸਂ ਦਸ੍ਸੇਨ੍ਤੋ ਆਹ ‘‘ਏਕੇਨੇਵ ਪਲ੍ਲਙ੍ਕੇਨਾ’’ਤਿ. ‘‘ਸਕਿਂ…ਪੇ… ਆਭੁਜਿਤੇਨਾ’’ਤਿ ਇਮਿਨਾ ਅਵਧਾਰਣਫਲਂ ਦਸ੍ਸੇਤਿ. ਪਲ੍ਲਙ੍ਕੋਤਿ ਚ ਊਰੁਬਦ੍ਧਾਸਨਂ. ਵਿਮੁਤ੍ਤਿਸੁਖਂ ਪਟਿਸਂਵੇਦੀਤਿ ਏਤ੍ਥ ਤਦਙ੍ਗਾਦੀਸੁ (ਪਟਿ. ਮ. ਅਟ੍ਠ. ੧.੧.੧੦੪) ਪਞ੍ਚਸੁ ਵਿਮੁਤ੍ਤੀਸੁ ਪਟਿਪ੍ਪਸ੍ਸਦ੍ਧਿਸਙ੍ਖਾਤਾ ਫਲਸਮਾਪਤ੍ਤਿ ਏਵਾਧਿਪ੍ਪੇਤਾਤਿ ਆਹ ‘‘ਫਲਸਮਾਪਤ੍ਤਿਸੁਖ’’ਨ੍ਤਿ. ਫਲਸਮਾਪਤ੍ਤੀਤਿ ਅਰਹਤ੍ਤਫਲਸਮਾਪਤ੍ਤਿ. ਸਾ ਹਿ ਵਿਰੁਦ੍ਧੇਹਿ ਉਪਕ੍ਕਿਲੇਸੇਹਿ ਮੁਚ੍ਚਿਤਟ੍ਠੇਨ ਵਿਮੁਤ੍ਤੀਤਿ ਵੁਚ੍ਚਤਿ, ਤਾਯ ਸਮ੍ਪਯੁਤ੍ਤਂ ਸੁਖਂ ਵਿਮੁਤ੍ਤਿਸੁਖਂ, ਚਤੁਤ੍ਥਜ੍ਝਾਨਿਕਂ ਅਰਹਤ੍ਤਫਲਸਮਾਪਤ੍ਤਿਸੁਖਂ. ਅਥਵਾ ਤਾਯ ਜਾਤਂ ਸੁਖਂ ਵਿਮੁਤ੍ਤਿਸੁਖਂ, ਸਕਲਕਿਲੇਸਦੁਕ੍ਖੂਪਸਮਸੁਖਂ. ‘‘ਪਟਿਸਂਵੇਦਯਮਾਨੋ’’ਤਿਇਮਿਨਾ ‘‘ਪਟਿਸਂਵੇਦੀ’’ਤਿ ਏਤ੍ਥ ਣੀਪਚ੍ਚਯਸ੍ਸ ਕਤ੍ਤੁਤ੍ਥਂ ਦਸ੍ਸੇਤਿ. ਪੁਨਪ੍ਪੁਨਂ ਸੁਟ੍ਠੁ ਵਦਤਿ ਅਨੁਭਵਤੀਤਿ ਪਟਿਸਂਵੇਦੀ. ਪਟਿਸਂਵੇਦੀ ਹੁਤ੍ਵਾ ਨਿਸੀਦੀਤਿ ਸਮ੍ਬਨ੍ਧੋ.

ਪਚ੍ਚਯਾਕਾਰਨ੍ਤਿ ਅਵਿਜ੍ਜਾਦਿਪਚ੍ਚਯਾਨਂ ਉਪ੍ਪਾਦਾਕਾਰਂ. ਕਸ੍ਮਾ ਪਚ੍ਚਯਾਕਾਰੋ ਪਟਿਚ੍ਚਸਮੁਪ੍ਪਾਦੋ ਨਾਮਾਤਿ ਆਹ ‘‘ਪਚ੍ਚਯਾਕਾਰੋ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ‘‘ਅਞ੍ਞਮਞ੍ਞ’’ਨ੍ਤਿਇਮਿਨਾ ‘‘ਪਟਿਚ੍ਚਾ’’ਤਿਪਦਸ੍ਸ ਕਮ੍ਮਂ ਦਸ੍ਸੇਤਿ, ‘‘ਸਹਿਤੇ’’ਤਿਇਮਿਨਾ ਸਂਸਦ੍ਦਸ੍ਸਤ੍ਥਂ. ‘‘ਧਮ੍ਮੇ’’ਤਿਇਮਿਨਾ ਤਸ੍ਸ ਸਰੂਪਂ. ਏਤ੍ਥਾਤਿ ਇਮਿਸ੍ਸਂ ਵਿਨਯਟ੍ਠਕਥਾਯਂ. ਤਤ੍ਥਾਤਿ ‘‘ਅਨੁਲੋਮਪਟਿਲੋਮ’’ਨ੍ਤਿਪਦੇ, ਅਨੁਲੋਮਪਟਿਲੋਮੇਸੁ ਵਾ. ਸ੍ਵੇਵ ਪਚ੍ਚਯਾਕਾਰੋ ਵੁਚ੍ਚਤੀਤਿ ਯੋਜਨਾ. ‘‘ਅਤ੍ਤਨਾ ਕਤ੍ਤਬ੍ਬਕਿਚ੍ਚਕਰਣਤੋ’’ਤਿਇਮਿਨਾ ਅਨੁਲੋਮਸਦ੍ਦਸ੍ਸ ਸਭਾਵਤ੍ਥਂ ਦਸ੍ਸੇਤਿ. ਸ੍ਵੇਵਾਤਿ ਪਚ੍ਚਯਾਕਾਰੋ ਏਵ. ਤਂ ਕਿਚ੍ਚਨ੍ਤਿ ਅਤ੍ਤਨਾ ਕਤ੍ਤਬ੍ਬਂ ਤਂ ਕਿਚ੍ਚਂ. ਤਸ੍ਸ ਅਕਰਣਤੋਤਿ ਅਤ੍ਤਨਾ ਕਤ੍ਤਬ੍ਬਕਿਚ੍ਚਸ੍ਸ ਅਕਰਣਤੋ. ਇਮਿਨਾ ਪਟਿਲੋਮਸਦ੍ਦਸ੍ਸ ਸਭਾਵਤ੍ਥਂ ਦਸ੍ਸੇਤਿ. ਪੁਰਿਮਨਯੇਨੇਵਾਤਿ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਨਾ ਪੁਰਿਮਨਯੇਨੇਵ. ਵਾਤਿ ਅਥਵਾ. ਪਵਤ੍ਤਿਯਾਤਿ ਸਂਸਾਰਪਵਤ੍ਤਿਯਾ. ਅਨੁਲੋਮੋਤਿ ਅਨੁਕੂਲੋ, ਅਨੁਰੂਪੋ ਵਾ. ਇਤਰੋਤਿ ‘‘ਅਵਿਜ੍ਜਾਯਤ੍ਵੇਵਾ’’ਤਿਆਦਿਨਾ ਵੁਤ੍ਤੋ ਪਚ੍ਚਯਾਕਾਰੋ. ਤਸ੍ਸਾਤਿ ਪਵਤ੍ਤਿਯਾ. ਪਟਿਲੋਮੋਤਿ ਪਟਿਵਿਰੁਦ੍ਧੋ, ਏਤ੍ਥਾਤਿ ‘‘ਅਨੁਲੋਮਪਟਿਲੋਮ’’ਨ੍ਤਿਪਦੇ. ਅਤ੍ਥੋ ਦਟ੍ਠਬ੍ਬੋਤਿ ਏਤ੍ਥ ਅਤ੍ਥੋ ਏਵਾਤਿ ਸਮ੍ਭਵਤੋ ਤਸ੍ਸ ਫਲਂ ਵਾ ‘‘ਸਦ੍ਦਨ੍ਤਰਤ੍ਥਾਪੋਹਨੇਨ ਸਦ੍ਦੋ ਅਤ੍ਥਂ ਵਦਤੀ’’ਤਿ ਵਚਨਤੋ (ਉਦਾ. ਅਟ੍ਠ. ੧; ਦੀ. ਨਿ. ਟੀ. ੧.੧; ਮ. ਨਿ. ਟੀ. ੧.ਮੁਲਪਰਿਯਾਯਸੁਤ੍ਤਵਣ੍ਣਨਾ; ਸਂ. ਨਿ. ਟੀ. ੧.੧.ਓਘਤਰਯਸੁਤ੍ਤਵਣ੍ਣਨਾ; ਅ. ਨਿ. ਟੀ. ੧.੧.ਰੁਪਾਦਿਵਗ੍ਗਵਣ੍ਣਨਾ) ਸਦ੍ਦਨ੍ਤਰਤ੍ਥਾਪੋਹਨਂ ਵਾ ਦਸ੍ਸੇਨ੍ਤੋ ਆਹ ‘‘ਆਦਿਤੋ ਪਨਾ’’ਤਿਆਦਿ. ਯਾਵਸਦ੍ਦੋ ਅਵਧਿਵਚਨੋ. ਯਾਵ ਅਨ੍ਤਂ ਪਾਪੇਤ੍ਵਾਤਿ ਸਮ੍ਬਨ੍ਧੋ. ਇਤੋਤਿ ਇਮੇਹਿ ਵੁਤ੍ਤੇਹਿ ਦ੍ਵੀਹਿ ਅਤ੍ਥੇਹਿ. ‘‘ਮਨਸਾਕਾਸੀ’’ਤਿ ਏਤ੍ਥ ਇਕਾਰਲੋਪਵਸੇਨ ਸਨ੍ਧੀਤਿ ਆਹ ‘‘ਮਨਸਿ ਅਕਾਸੀ’’ਤਿ. ਤਤ੍ਥਾਤਿ ‘‘ਮਨਸਾਕਾਸੀ’’ਤਿਪਦੇ. ਯਥਾਤਿ ਯੇਨਾਕਾਰੇਨ. ਇਦਨ੍ਤਿ ਇਮਂ ਆਕਾਰਂ. ਤਤ੍ਥਾਤਿ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਪਾਠੇ ਅਵਯਵਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਸਮਾਸਮਜ੍ਝੇ ਤਸਦ੍ਦੇਨ ਪੁਬ੍ਬਪਦਸ੍ਸੇਵ ਲਿਙ੍ਗਵਚਨਾਨਿ ਗਹੇਤਬ੍ਬਾਨੀਤਿ ਆਹ ‘‘ਅਵਿਜ੍ਜਾ ਚ ਸਾ ਪਚ੍ਚਯੋ ਚਾ’’ਤਿ. ਵਾਕ੍ਯੇ ਪਨ ਤਸਦ੍ਦੇਨ ਪਰਪਦਸ੍ਸੇਵ ਲਿਙ੍ਗਵਚਨਾਨਿ ਗਹੇਤਬ੍ਬਾਨਿ. ‘‘ਅਵਿਜ੍ਜਾਪਚ੍ਚਯਾ’’ਤਿਪਦਂ ‘‘ਸਮ੍ਭਵਨ੍ਤੀ’’ਤਿਪਦੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਤਸ੍ਮਾ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ ਸਮ੍ਭਵਨ੍ਤੀ’’ਤਿ. ਸਬ੍ਬਪਦੇਸੂਤਿ ‘‘ਸਙ੍ਖਾਰਪਚ੍ਚਯਾ ਵਿਞ੍ਞਾਣ’’ਨ੍ਤਿਆਦੀਸੁ ਸਬ੍ਬੇਸੁ ਪਦੇਸੁ.

ਯਥਾ ਪਨਾਤਿ ਯੇਨਾਕਾਰੇਨ ਪਨ. ਇਦਨ੍ਤਿ ਇਮਂ ਆਕਾਰਂ. ਤਤ੍ਥਾਤਿ ‘‘ਅਵਿਜ੍ਜਾਯ…ਪੇ… ਨਿਰੋਧੋ’’ਤਿਆਦਿਵਾਕ੍ਯੇ. ਅਵਿਜ੍ਜਾਯਤ੍ਵੇਵਾਤਿ ਏਤ੍ਥ ‘‘ਭਦ੍ਦਿਯੋਤ੍ਵੇਵਾ’’ਤਿਆਦੀਸੁ ਵਿਯ ‘‘ਭਦ੍ਦਿਯੋ ਇਤਿ ਏਵਾ’’ਤਿ ਪਦਚ੍ਛੇਦੋ ਕਤ੍ਤਬ੍ਬੋ, ਨ ਏਵਂ ‘‘ਅਵਿਜ੍ਜਾਯ ਇਤਿ ਏਵਾ’’ਤਿ, ਅਥ ਖੋ ‘‘ਅਵਿਜ੍ਜਾਯ ਤੁ ਏਵਾ’’ਤਿ ਕਾਤਬ੍ਬੋਤਿ ਆਹ ‘‘ਅਵਿਜ੍ਜਾਯ ਤੁ ਏਵਾ’’ਤਿ. ‘‘ਪ ਅਤਿਮੋਕ੍ਖਂ ਅਤਿਪਮੋਕ੍ਖ’’ਨ੍ਤਿਆਦੀਸੁ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਵਿਯ ਉਪਸਗ੍ਗਬ੍ਯਤ੍ਤਯੇਨ ਵੁਤ੍ਤਂ, ਏਵਮਿਧ ਨਿਪਾਤਬ੍ਯਤ੍ਤਯੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਤ੍ਥ ਏਵਸਦ੍ਦੇਨ ਸਤ੍ਤਜੀਵਾਦਯੋ ਨਿਵਤ੍ਤੇਤਿ. ਤੁਸਦ੍ਦੋ ਪਕ੍ਖਨ੍ਤਰਤ੍ਥਜੋਤਕੋ. ਅਨੁਲੋਮਪਕ੍ਖਤੋ ਪਟਿਲੋਮਸਙ੍ਖਾਤਂ ਪਕ੍ਖਨ੍ਤਰਂ ਮਨਸਾਕਾਸੀਤਿ ਅਤ੍ਥੋ. ਅਸੇਸਵਿਰਾਗਨਿਰੋਧਸਦ੍ਦੋ ਅਯੁਤ੍ਤਸਮਾਸੋ, ਉਤ੍ਤਰਪਦੇਨ ਚ ਤਤਿਯਾਸਮਾਸੋਤਿ ਆਹ ‘‘ਵਿਰਾਗਸਙ੍ਖਾਤੇਨ ਮਗ੍ਗੇਨ ਅਸੇਸਨਿਰੋਧਾ’’ਤਿ. ਤਤ੍ਥ ਅਸੇਸਸਦ੍ਦਂ ਵਿਰਾਗਸਦ੍ਦੇਨ ਸਮ੍ਬਨ੍ਧਮਕਤ੍ਵਾ ਨਿਰੋਧਸਦ੍ਦੇਨ ਸਮ੍ਬਨ੍ਧਂ ਕਤ੍ਵਾ ਅਤ੍ਥਸ੍ਸ ਗਹਣਂ ਅਯੁਤ੍ਤਸਮਾਸੋ ਨਾਮ. ‘‘ਮਗ੍ਗੇਨਾ’’ਤਿਇਮਿਨਾ ਵਿਰਾਗਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਮਗ੍ਗੋ ਹਿ ਵਿਰਜ੍ਜਨਟ੍ਠੇਨ ਵਿਰਾਗੋਤਿ ਵੁਚ੍ਚਤਿ. ਸਙ੍ਖਾਰਨਿਰੋਧੋਤਿ ਏਤ੍ਥ ਮਗ੍ਗੇਨ ਨਿਰੋਧਤ੍ਤਾ ਅਨੁਪ੍ਪਾਦਨਿਰੋਧੋ ਹੋਤੀਤਿ ਆਹ ‘‘ਸਙ੍ਖਾਰਾਨਂ ਅਨੁਪ੍ਪਾਦਨਿਰੋਧੋ ਹੋਤੀ’’ਤਿ. ਅਨੁਪ੍ਪਾਦਨਿਰੋਧੋਤਿ ਚ ਅਨੁਪ੍ਪਾਦੇਨ ਨਿਰੋਧੋ ਸਮੁਚ੍ਛੇਦਵਸੇਨ ਨਿਰੁਦ੍ਧਤ੍ਤਾ. ਏਵਨ੍ਤਿ ਯਥਾ ਅਵਿਜ੍ਜਾਯਤ੍ਵੇਵ ਅਸੇਸਵਿਰਾਗਨਿਰੋਧਾ ਸਙ੍ਖਾਰਨਿਰੋਧੋ, ਏਵਂ ਤਥਾਤਿ ਅਤ੍ਥੋ. ਤਤ੍ਥਾਤਿ ‘‘ਏਵਮੇਤਸ੍ਸਾ’’ਤਿਆਦਿਵਚਨੇ. ਕੇਵਲਸਦ੍ਦੋ ਸਕਲਪਰਿਯਾਯੋਤਿ ਆਹ ‘‘ਸਕਲਸ੍ਸਾ’’ਤਿ, ਅਨਵਸੇਸਸ੍ਸਾਤਿ ਅਤ੍ਥੋ. ਅਥਵਾ ਸਤ੍ਤਜੀਵਾਦੀਹਿ ਅਮਿਸ੍ਸਿਤਤ੍ਤਾ ਅਮਿਸ੍ਸਤ੍ਥੋਤਿ ਆਹ ‘‘ਸੁਦ੍ਧਸ੍ਸ ਵਾ’’ਤਿ. ‘‘ਸਤ੍ਤਵਿਰਹਿਤਸ੍ਸਾ’’ਤਿ ਇਮਿਨਾ ਸੁਦ੍ਧਭਾਵਂ ਦਸ੍ਸੇਤਿ. ਦੁਕ੍ਖਕ੍ਖਨ੍ਧਸ੍ਸਾਤਿ ਏਤ੍ਥ ਖਨ੍ਧਸਦ੍ਦੋ ਰਾਸਤ੍ਥਵਾਚਕੋਤਿ ਆਹ ‘‘ਦੁਕ੍ਖਰਾਸਿਸ੍ਸਾ’’ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤ੍ਥ ਏਤਸਦ੍ਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਯ੍ਵਾਯ’’ਨ੍ਤਿਆਦਿ. ਤਤ੍ਥ ‘‘ਅਵਿਜ੍ਜਾਦਿਵਸੇਨ…ਪੇ… ਨਿਰੋਧੋ ਹੋਤੀ’’ਤਿ ਯ੍ਵਾਯਂ ਅਤ੍ਥੋ ਵੁਤ੍ਤੋਤਿ ਯੋਜਨਾ. ਸਮੁਦਯੋ ਚ ਹੋਤੀਤਿ ਸਮ੍ਬਨ੍ਧੋ. ਵਿਦਿਤਵੇਲਾਯਨ੍ਤਿ ਪਾਕਟਵੇਲਾਯਂ ਪਸਿਦ੍ਧਕਾਲੇਤਿ ਅਤ੍ਥੋ. ਇਮਂ ਉਦਾਨਨ੍ਤਿ ਏਤ੍ਥ ਇਮਸਦ੍ਦੋ ਵੁਚ੍ਚਮਾਨਾਪੇਕ੍ਖੋ. ਤਸ੍ਮਿਂ ਅਤ੍ਥੇ ਵਿਦਿਤੇ ਸਤੀਤਿ ਯੋਜਨਾ. ਪਜਾਨਨਤਾਯਾਤਿ ਪਕਾਰੇਨ ਜਾਨਨਭਾਵਸ੍ਸ. ਸੋਮਨਸ੍ਸਯੁਤ੍ਤਞਾਣਸਮੁਟ੍ਠਾਨਨ੍ਤਿ ਸੋਮਨਸ੍ਸੇਨ ਏਕੁਪ੍ਪਾਦਾਦਿਵਸੇਨ ਯੁਤ੍ਤੇਨ ਞਾਣੇਨ ਸਮੁਟ੍ਠਾਨਂ, ਯੁਤ੍ਤਂ ਵਾ ਞਾਣਸਙ੍ਖਾਤਂ ਸਮੁਟ੍ਠਾਨਂ ਉਦਾਨਨ੍ਤਿ ਸਮ੍ਬਨ੍ਧੋ. ਤਤ੍ਥ ਉਦਾਨਨ੍ਤਿ ਕੇਨਟ੍ਠੇਨ ਉਦਾਨਂ? ਉਦਾਨਟ੍ਠੇਨ, ਮੋਦਨਟ੍ਠੇਨ, ਕੀਲ਼ਨਟ੍ਠੇਨ ਚਾਤਿ ਅਤ੍ਥੋ. ਕਿਮਿਦਂ ਉਦਾਨਂ ਨਾਮ? ਪੀਤਿਵੇਗਸਮੁਟ੍ਠਾਪਿਤੋ ਉਦਾਹਾਰੋ. ਯਥਾ (ਉਦਾ. ਅਟ੍ਠ. ਗਨ੍ਥਾਰਮ੍ਭਕਥਾ) ਹਿ ਯਂ ਤੇਲਾਦਿਮਿਨਿਤਬ੍ਬਵਤ੍ਥੁ ਮਾਨਂ ਗਹੇਤੁਂ ਨ ਸਕ੍ਕੋਤਿ ਵਿਸਨ੍ਦਿਤ੍ਵਾ ਗਚ੍ਛਤਿ, ਤਂ ‘‘ਅਵਸੇਕੋ’’ਤਿ ਵੁਚ੍ਚਤਿ. ਯਞ੍ਚ ਜਲਂ ਤਲ਼ਾਕਂ ਗਹੇਤੁਂ ਨ ਸਕ੍ਕੋਤਿ, ਅਜ੍ਝੋਤ੍ਥਰਿਤ੍ਵਾ ਗਚ੍ਛਤਿ, ਤਂ ‘‘ਓਘੋ’’ਤਿ ਵੁਚ੍ਚਤਿ. ਏਵਮੇਵਂ ਯਂ ਪੀਤਿਵੇਗਸਮੁਟ੍ਠਾਪਿਤਂ ਵਿਤਕ੍ਕਵਿਪ੍ਫਾਰਂ ਹਦਯਂ ਸਨ੍ਧਾਰੇਤੁਂ ਨ ਸਕ੍ਕੋਤਿ, ਸੋ ਅਧਿਕੋ ਹੁਤ੍ਵਾ ਅਨ੍ਤੋ ਅਸਣ੍ਠਹਿਤ੍ਵਾ ਵਚੀਦ੍ਵਾਰੇਨ ਨਿਕ੍ਖਮਨ੍ਤੋ ਪਟਿਗ੍ਗਾਹਕਨਿਰਪੇਕ੍ਖੋ ਉਦਾਹਾਰਵਿਸੇਸੋ ‘‘ਉਦਾਨ’’ਨ੍ਤਿ ਵੁਚ੍ਚਤਿ. ‘‘ਅਤ੍ਤਮਨਵਾਚਂ ਨਿਚ੍ਛਾਰੇਸੀ’’ਤਿ ਇਮਿਨਾ ਉਦਧਾਤੁਸ੍ਸ ਉਦਾਹਾਰਤ੍ਥਂ ਦਸ੍ਸੇਤਿ.

ਤਸ੍ਸਾਤਿ ਉਦਾਨਸ੍ਸ ਅਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਯਦਾਤਿ ਏਤ੍ਥ ਦਾਪਚ੍ਚਯਸ੍ਸ ਅਤ੍ਥਵਾਕ੍ਯਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਿਂ ਕਾਲੇ’’ਤਿ. ਹਵੇਤਿ ‘‘ਬ੍ਯਤ੍ਤ’’ਨ੍ਤਿ ਇਮਸ੍ਮਿਂ ਅਤ੍ਥੇ ਨਿਪਾਤੋ. ਬ੍ਯਤ੍ਤਂ ਪਾਕਟਨ੍ਤਿ ਹਿ ਅਤ੍ਥੋ. ਪਾਤੁਭਵਨ੍ਤੀਤਿ ਏਤ੍ਥ ਪਾਤੁਨਿਪਾਤਸ੍ਸ ਅਤ੍ਥਸ੍ਸ ‘‘ਹਵੇ’’ਤਿ ਨਿਪਾਤੇਨ ਵੁਤ੍ਤਤ੍ਤਾ ਭੂਧਾਤੁਸ੍ਸੇਵ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਉਪ੍ਪਜ੍ਜਨ੍ਤੀ’’ਤਿ. ਅਨੁਲੋਮ ਪਟਿਲੋਮ ਪਚ੍ਚਯਾਕਾਰ ਪਟਿਵੇਧਸਾਧਕਾਤਿ ਅਨੁਲੋਮਤੋ ਚ ਪਟਿਲੋਮਤੋ ਚ ਪਚ੍ਚਯਾਕਾਰਸ੍ਸ ਪਟਿਵਿਜ੍ਝਨਸ੍ਸ ਸਾਧਕਾ. ਬੋਧਿਪਕ੍ਖਿਯਧਮ੍ਮਾਤਿ ਬੋਧਿਯਾ ਮਗ੍ਗਞਾਣਸ੍ਸ ਪਕ੍ਖੇ ਭਵਾ ਸਤ੍ਤਤਿਂਸ ਧਮ੍ਮਾ. ਅਥਵਾ ਪਾਤੁਨਿਪਾਤੇਨ ਸਹ ‘‘ਭਵਨ੍ਤੀ’’ਤਿਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਕਾਸਨ੍ਤੀ’’ਤਿ. ਇਮਸ੍ਮਿਂ ਨਯੇ ਹਵੇਸਦ੍ਦੋ ਏਕਂਸਤ੍ਥਵਾਚਕੋ. ਹਵੇ ਏਕਂਸੇਨਾਤਿ ਹਿ ਅਤ੍ਥੋ. ਅਭਿਸਮਯਵਸੇਨਾਤਿ ਮਗ੍ਗਞਾਣਵਸੇਨ. ਮਗ੍ਗਞਾਣਞ੍ਹਿ ਯਸ੍ਮਾ ਅਭਿਮੁਖਂ ਚਤ੍ਤਾਰਿ ਸਚ੍ਚਾਨਿ ਸਮੇਚ੍ਚ ਅਯਤਿ ਜਾਨਾਤਿ, ਤਸ੍ਮਾ ਅਭਿਸਮਯੋਤਿ ਵੁਚ੍ਚਤਿ.

‘‘ਕਿਲੇਸਸਨ੍ਤਾਪਨਟ੍ਠੇਨਾ’’ਤਿ ਇਮਿਨਾ ਆਭੁਸੋ ਕਿਲੇਸੇ ਤਾਪੇਤੀਤਿ ਆਤਾਪੋਤਿ ਵਚਨਤ੍ਥਂ ਦਸ੍ਸੇਤਿ. ਨ ਵੀਰਿਯਸਾਮਞ੍ਞਂ ਹੋਤਿ, ਅਥ ਖੋ ਸਮ੍ਮਪ੍ਪਧਾਨਵੀਰਿਯਮੇਵਾਤਿ ਆਹ ‘‘ਸਮ੍ਮਪ੍ਪਧਾਨਵੀਰਿਯਵਤੋ’’ਤਿ. ਇਮਿਨਾ ਆਤਾਪੀਤਿ ਏਤ੍ਥ ਈਪਚ੍ਚਯਸ੍ਸ ਵਨ੍ਤੁਅਤ੍ਥਂ ਦਸ੍ਸੇਤਿ. ਆਰਮ੍ਮਣੂਪਨਿਜ੍ਝਾਨਲਕ੍ਖਣੇਨ ਚਾਤਿ ਕਸਿਣਾਦਿਆਰਮ੍ਮਣਂ ਉਪਗਨ੍ਤ੍ਵਾ ਨਿਜ੍ਝਾਨਸਭਾਵੇਨ ਅਟ੍ਠਸਮਾਪਤ੍ਤਿਸਙ੍ਖਾਤੇਨ ਝਾਨੇਨ ਚ. ਲਕ੍ਖਣੂਪਨਿਜ੍ਝਾਨਲਕ੍ਖਣੇਨ ਚਾਤਿ ਅਨਿਚ੍ਚਾਦਿਲਕ੍ਖਣਂ ਉਪਗਨ੍ਤ੍ਵਾ ਨਿਜ੍ਝਾਨਸਭਾਵੇਨ ਵਿਪਸ੍ਸਨਾਮਗ੍ਗਫਲਸਙ੍ਖਾਤੇਨ ਝਾਨੇਨ ਚ. ‘‘ਬਾਹਿਤਪਾਪਸ੍ਸਾ’’ਤਿ ਇਮਿਨਾ ਬਾਹਿਤੋ ਅਣੋ ਪਾਪੋ ਅਨੇਨਾਤਿ ਬ੍ਰਾਹ੍ਮਣੋਤਿ ਵਚਨਤ੍ਥਂ ਦਸ੍ਸੇਤਿ. ਅਣਸਦ੍ਦੋ ਹਿ ਪਾਪਪਰਿਯਾਯੋ. ‘‘ਖੀਣਾਸਵਸ੍ਸਾ’’ਤਿ ਇਮਿਨਾ ਤਸ੍ਸ ਸਰੂਪਂ ਦਸ੍ਸੇਤਿ. ਅਥਸ੍ਸਾਤਿ ਅਥ ਅਸ੍ਸ, ਤਸ੍ਮਿਂ ਕਾਲੇ ਬ੍ਰਾਹ੍ਮਣਸ੍ਸਾਤਿ ਅਤ੍ਥੋ. ਯਾ ਏਤਾ ਕਙ੍ਖਾ ਵੁਤ੍ਤਾਤਿ ਸਮ੍ਬਨ੍ਧੋ. ‘‘ਕੋ ਨੁ ਖੋ…ਪੇ… ਅਵੋਚਾ’’ਤਿਆਦਿਨਾ (ਸਂ. ਨਿ. ੨.੧੨) ਨਯੇਨ ਚ ਤਥਾ ‘‘ਕਤਮਂ ਨੁ ਖੋ…ਪੇ… ਅਵੋਚਾ’’ਤਿਆਦਿਨਾ (ਸਂ. ਨਿ. ੨.੩੫) ਨਯੇਨ ਚ ਪਚ੍ਚਯਾਕਾਰੇ ਵੁਤ੍ਤਾਤਿ ਯੋਜਨਾ. ਨੋ ਕਲ੍ਲੋ ਪਞ੍ਹੋਤਿ ਅਯੁਤ੍ਤੋ ਪਞ੍ਹੋ, ਦੁਪ੍ਪਞ੍ਹੋ ਏਸੋਤਿ ਅਤ੍ਥੋ. ਤਥਾਤਿ ਏਵਂ, ਤਤੋ ਅਞ੍ਞਥਾ ਵਾ. ਯਾ ਚ ਸੋਲ਼ਸ ਕਙ੍ਖਾ (ਮ. ਨਿ. ੧.੧੮; ਸਂ. ਨਿ. ੨.੨੦) ਆਗਤਾਤਿ ਸਮ੍ਬਨ੍ਧੋ. ਅਪਟਿਵਿਦ੍ਧਤ੍ਤਾ ਕਙ੍ਖਾਤਿ ਯੋਜਨਾ. ਸੋਲ਼ਸ ਕਙ੍ਖਾਤਿ ਅਤੀਤਵਿਸਯਾ ਪਞ੍ਚ, ਅਨਾਗਤਵਿਸਯਾ ਪਞ੍ਚ, ਪਚ੍ਚੁਪ੍ਪਨ੍ਨਵਿਸਯਾ ਛਾਤਿ ਸੋਲ਼ਸਵਿਧਾ ਕਙ੍ਖਾ. ਵਪਯਨ੍ਤੀਤਿ ਵਿ ਅਪਯਨ੍ਤਿ, ਇਕਾਰਲੋਪੇਨਾਯਂ ਸਨ੍ਧਿ. ਵਿਤ੍ਯੂਪਸਗ੍ਗੋ ਧਾਤ੍ਵਤ੍ਥਾਨੁਵਤ੍ਤਕੋ, ਅਪਯਨ੍ਤਿ – ਸਦ੍ਦੋ ਅਪਗਮਨਤ੍ਥੋਤਿ ਆਹ ‘‘ਅਪਗਚ੍ਛਨ੍ਤੀ’’ਤਿ. ‘‘ਨਿਰੁਜ੍ਝਨ੍ਤੀ’’ਤਿਇਮਿਨਾ ਅਪਗਮਨਤ੍ਥਮੇਵ ਪਰਿਯਾਯਨ੍ਤਰੇਨ ਦੀਪੇਤਿ. ‘‘ਕਸ੍ਮਾ’’ਤਿ ਇਮਿਨਾ ‘‘ਯਤੋ ਪਜਾਨਾਤਿ ਸਹੇਤੁਧਮ੍ਮ’’ਨ੍ਤਿ ਵਾਕ੍ਯਸ੍ਸ ਪੁਬ੍ਬਵਾਕ੍ਯਕਾਰਣਭਾਵਂ ਦਸ੍ਸੇਤਿ. ਸਹੇਤੁਧਮ੍ਮਨ੍ਤਿ ਏਤ੍ਥ ਸਹ ਅਵਿਜ੍ਜਾਦਿਹੇਤੁਨਾਤਿ ਸਹੇਤੁ, ਸਙ੍ਖਾਰਾਦਿਕੋ ਪਚ੍ਚਯੁਪ੍ਪਨ੍ਨਧਮ੍ਮੋ. ਸਹੇਤੁ ਚ ਸੋ ਧਮ੍ਮੋ ਚਾਤਿ ਸਹੇਤੁਧਮ੍ਮੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਵਿਜ੍ਜਾਦਿਕੇਨਾ’’ਤਿਆਦਿ. ‘‘ਪਟਿਵਿਜ੍ਝਤੀ’’ਤਿ ਇਮਿਨਾ ਪਜਾਨਾ ਤੀਤਿ ਏਤ੍ਥ ਞਾਧਾਤੁਯਾ ਅਵਬੋਧਨਤ੍ਥਂ ਦਸ੍ਸੇਤਿ, ਮਾਰਣਤੋਸਨਾਦਿਕੇ ਅਤ੍ਥੇ ਨਿਵਤ੍ਤੇਤਿ. ਇਤੀਤਿ ਤਸ੍ਮਾ, ਵਪਯਨ੍ਤੀਤਿ ਯੋਜਨਾ.

੨. ਪਚ੍ਚਯਕ੍ਖਯਸ੍ਸਾਤਿ ਪਚ੍ਚਯਾਨਂ ਖਯਟ੍ਠਾਨਸ੍ਸ ਅਸਙ੍ਖਤਸ੍ਸਾਤਿ ਯੋਜਨਾ. ਤਤ੍ਰਾਤਿ ਦੁਤਿਯਉਦਾਨੇ. ਖੀਯਨ੍ਤਿ ਪਚ੍ਚਯਾ ਏਤ੍ਥਾਤਿ ਖਯਂ, ਨਿਬ੍ਬਾਨਨ੍ਤਿ ਆਹ ‘‘ਪਚ੍ਚਯਾਨਂ ਖਯਸਙ੍ਖਾਤਂ ਨਿਬ੍ਬਾਨ’’ਨ੍ਤਿ. ‘‘ਅਞ੍ਞਾਸੀ’’ਤਿ ਇਮਿਨਾ ਅਵੇਦੀਤਿ ਏਤ੍ਥ ਵਿਦਧਾਤੁਯਾ ਞਾਣਤ੍ਥਂ ਦਸ੍ਸੇਤਿ, ਅਨੁਭਵਨਲਾਭਾਦਿਕੇ ਨਿਵਤ੍ਤੇਤਿ. ਤਸ੍ਮਾ ਵਪਯਨ੍ਤੀਤਿ ਸਮ੍ਬਨ੍ਧੋ. ਵੁਤ੍ਤਪ੍ਪਕਾਰਾਤਿ ਪਠਮਉਦਾਨੇ ਵੁਤ੍ਤਸਦਿਸਾ. ਧਮ੍ਮਾਤਿ ਬੋਧਿਪਕ੍ਖਿਯਧਮ੍ਮਾ, ਚਤੁਅਰਿਯਸਚ੍ਚਧਮ੍ਮਾ ਵਾ.

੩. ਇਮਂ ਉਦਾਨਂ ਉਦਾਨੇਸੀਤਿ ਸਮ੍ਬਨ੍ਧੋ. ਯੇਨ ਮਗ੍ਗੇਨ ਵਿਦਿਤੋਤਿ ਯੋਜਨਾ. ਤਤ੍ਰਾਤਿ ਤਤਿਯਉਦਾਨੇ. ਸੋ ਬ੍ਰਾਹ੍ਮਣੋ ਤਿਟ੍ਠਤੀਤਿ ਸਮ੍ਬਨ੍ਧੋ. ਤੇਹਿ ਉਪ੍ਪਨ੍ਨੇਹਿ ਬੋਧਿਪਕ੍ਖਿਯਧਮ੍ਮੇਹਿ ਵਾ ਯਸ੍ਸ ਅਰਿਯਮਗ੍ਗਸ੍ਸ ਚਤੁਸਚ੍ਚਧਮ੍ਮਾ ਪਾਤੁਭੂਤਾ, ਤੇਨ ਅਰਿਯਮਗ੍ਗੇਨ ਵਾ ਵਿਧੂਪਯਨ੍ਤਿ ਯੋਜਨਾ. ਵੁਤ੍ਤਪ੍ਪਕਾਰਨ੍ਤਿ ਸੁਤ੍ਤਨਿਪਾਤੇ ਵੁਤ੍ਤਪ੍ਪਕਾਰਂ. ਮਾਰਸੇਨਨ੍ਤਿ ਕਾਮਾਦਿਕਂ ਦਸਵਿਧਂ ਮਾਰਸੇਨਂ. ‘‘ਵਿਧਮੇਨ੍ਤੋ’’ਤਿਇਮਿਨਾ ਵਿਧੂਪਯਨ੍ਤਿ ਏਤ੍ਥ ਧੂਪਧਾਤੁਯਾ ਵਿਧਮਨਤ੍ਥਂ ਦਸ੍ਸੇਤਿ, ਲਿਮ੍ਪਨਤ੍ਥਾਦਯੋ ਨਿਵਤ੍ਤੇਤਿ. ‘‘ਵਿਦ੍ਧਂ ਸੇਨ੍ਤੋ’’ਤਿਇਮਿਨਾ ਵਿਧਮੇਨ੍ਤੋਤਿ ਏਤ੍ਥ ਧਮੁਧਾਤੁਯਾ ਧਂਸਨਤ੍ਥਂ ਦਸ੍ਸੇਤਿ, ਸਦ੍ਦਤ੍ਥਾਦਯੋ ਨਿਵਤ੍ਤੇਤਿ. ‘‘ਸੂਰਿਯੋਵ ਓਭਾਸਯ’’ਨ੍ਤਿਪਦਸ੍ਸ ‘‘ਸੂਰਿਯੋ ਇਵਾ’’ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਥਾ’’ਤਿਆਦਿ. ਸੂਰਿਯੋਤਿ ਆਦਿਚ੍ਚੋ. ਸੋ ਹਿ ਯਸ੍ਮਾ ਪਠਮਕਪ੍ਪਿਕਾਨਂ ਸੂਰਂ ਜਨੇਤਿ, ਤਸ੍ਮਾ ਸੂਰਿਯੋਤਿ ਵੁਚ੍ਚਤਿ. ਅਬ੍ਭੁਗ੍ਗਤੋਤਿ ਅਭਿਮੁਖਂ ਉਦ੍ਧਂ ਆਕਾਸਂ ਗਤੋ, ਅਬ੍ਭਂ ਵਾ ਆਕਾਸਂ ਉਗ੍ਗਤੋ. ਅਬ੍ਭਸਦ੍ਦੋ ਹਿ ਆਕਾਸਪਰਿਯਾਯੋ. ਆਕਾਸੋ ਹਿ ਯਸ੍ਮਾ ਆਭੁਸੋ ਭਾਤਿ ਦਿਪ੍ਪਤਿ, ਤਸ੍ਮਾ ‘‘ਅਬ੍ਭ’’ਨ੍ਤਿ ਵੁਚ੍ਚਤਿ. ਅਯਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਯਥਾ ਸੂਰਿਯੋ ਓਭਾਸਯਨ੍ਤੋ ਤਿਟ੍ਠਤਿ, ਏਵਂ ਬ੍ਰਾਹ੍ਮਣੋ ਸਚ੍ਚਾਨਿ ਪਟਿਵਿਜ੍ਝਨ੍ਤੋ. ਯਥਾ ਸੂਰਿਯੋ ਅਨ੍ਧਕਾਰਂ ਵਿਧਮੇਨ੍ਤੋ ਤਿਟ੍ਠਤਿ, ਏਵਂ ਬ੍ਰਾਹ੍ਮਣੋ ਮਾਰਸੇਨਮ੍ਪਿ ਵਿਧੂਪਯਨ੍ਤੋਤਿ.

ਏਤ੍ਥਾਤਿ ਏਤੇਸੁ ਤੀਸੁ ਉਦਾਨੇਸੁ. ਪਠਮਂ ਉਦਾਨਂ ਉਪ੍ਪਨ੍ਨਨ੍ਤਿ ਸਮ੍ਬਨ੍ਧੋ. ਇਮਿਸ੍ਸਾ ਖਨ੍ਧਕਪਾਲ਼ਿਯਾ ਉਦਾਨਪਾਲ਼ਿਂ ਸਂਸਨ੍ਦਨ੍ਤੋ ਆਹ ‘‘ਉਦਾਨੇ ਪਨਾ’’ਤਿਆਦਿ. ਉਦਾਨੇ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਨ੍ਤਿ ਉਦਾਨੇ ਵੁਤ੍ਤਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਚ੍ਚਯੇਨਾਤਿ ਅਤਿਕ੍ਕਮੇਨ, ਤਮੇਵਤ੍ਥਂ ਵਿਭਾਵੇਨ੍ਤੋ ਆਹ ‘‘ਤਦਾ ਹੀ’’ਤਿਆਦਿ. ਤਦਾਤਿ ‘‘ਸ੍ਵੇ ਆਸਨਾ ਵੁਟ੍ਠਹਿਸ੍ਸਾਮੀ’’ਤਿ ਰਤ੍ਤਿਂ ਉਪ੍ਪਾਦਿਤਮਨਸਿਕਾਰਕਾਲੇ. ਭਗਵਾ ਮਨਸਾਕਾਸੀਤਿ ਸਮ੍ਬਨ੍ਧੋ. ਪੁਰਿਮਾ ਦ੍ਵੇ ਉਦਾਨਗਾਥਾ ਆਨੁਭਾਵਦੀਪਿਕਾ ਹੋਨ੍ਤੀਤਿ ਯੋਜਨਾ. ਤਸ੍ਸਾਤਿ ਪਚ੍ਚਯਾਕਾਰਪਜਾਨਨਪਚ੍ਚਯਕ੍ਖਯਾਧਿਗਮਸ੍ਸ. ਏਕੇਕਮੇਵਾਤਿ ਅਨੁਲੋਮਪਟਿਲੋਮੇਸੁ ਏਕੇਕਮੇਵ. ਪਠਮਯਾਮਞ੍ਚਾਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਨਿਰਨ੍ਤਰਂ ਪਠਮਯਾਮਕਾਲਨ੍ਤਿ ਅਤ੍ਥੋ. ਇਧ ਪਨਾਤਿ ਇਮਸ੍ਮਿਂ ਖਨ੍ਧਕੇ ਪਨ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਭਗਵਾ ਹੀ’’ਤਿਆਦਿ. ਤਤ੍ਥ ਭਗਵਾ ਉਦਾਨੇਸੀਤਿ ਸਮ੍ਬਨ੍ਧੋ. ਵਿਸਾਖਪੁਣ੍ਣਮਾਯਾਤਿ ਵਿਸਾਖਾਯ ਯੁਤ੍ਤਾਯ ਪੁਣ੍ਣਮਾਯ. ‘‘ਅਰੁਣੋ ਉਗ੍ਗਮਿਸ੍ਸਤੀ’’ਤਿ ਵਤ੍ਤਬ੍ਬਸਮਯੇਤਿ ਸਮ੍ਬਨ੍ਧੋ. ਸਬ੍ਬਞ੍ਞੁਤਨ੍ਤਿ ਸਬ੍ਬਞ੍ਞੁਭਾਵਂ, ਅਨਾਵਰਣਞਾਣਨ੍ਤਿ ਅਤ੍ਥੋ. ਤਤੋਤਿ ਅਰੁਣੁਗ੍ਗਮਨਤੋ. ਤਂ ਦਿਵਸਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਂ, ਤਸ੍ਮਿਂ ਦਿਵਸੇਤਿ ਹਿ ਅਤ੍ਥੋ. ਅਚ੍ਚਨ੍ਤਸਂਯੋਗੇ ਵਾ, ਤਂ ਦਿਵਸਂ ਕਾਲਨ੍ਤਿ ਹਿ ਅਤ੍ਥੋ. ਏਵਂ ਮਨਸਿ ਕਤ੍ਵਾਤਿ ਯਥਾ ਤਂ ਦਿਵਸਂ ਅਨੁਲੋਮਪਟਿਲੋਮਂ ਮਨਸਾਕਾਸਿ, ਏਵਂ ਮਨਸਿ ਕਤ੍ਵਾਤਿ ਅਤ੍ਥੋ. ਇਤੀਤਿ ਏਵਂ. ‘‘ਬੋਧਿਰੁਕ੍ਖਮੂਲੇ…ਪੇ… ਨਿਸੀਦੀ’’ਤਿ ਏਵਂ ਵੁਤ੍ਤਂ ਤਂ ਸਤ੍ਤਾਹਨ੍ਤਿ ਯੋਜਨਾ. ਤਤ੍ਥੇਵਾਤਿ ਬੋਧਿਰੁਕ੍ਖਮੂਲੇਯੇਵ.

੨. ਅਜਪਾਲਕਥਾ

੪. ਨ ਭਗਵਾਤਿ ਏਤ੍ਥ ਨਕਾਰੋ ‘‘ਉਪਸਙ੍ਕਮੀ’’ਤਿ ਪਦੇਨ ਯੋਜੇਤਬ੍ਬੋ, ਨ ਉਪਸਙ੍ਖਮੀਤਿ ਹਿ ਅਤ੍ਥੋ. ਤਮ੍ਹਾ ਸਮਾਧਿਮ੍ਹਾਤਿ ਤਤੋ ਅਰਹਤ੍ਤਫਲਸਮਾਪਤ੍ਤਿਸਮਾਧਿਤੋ. ਅਨਨ੍ਤਰਮੇਵ ਅਨੁਪਸਙ੍ਕਮਨਂ ਉਪਮਾਯ ਆਵਿਕਰੋਨ੍ਤੋ ਆਹ ‘‘ਯਥਾ ਪਨਾ’’ਤਿਆਦਿ. ਇਚ੍ਚੇਵਂ ਵੁਤ੍ਤਂ ਨ ਹੋਤੀਤਿ ਯੋਜਨਾ. ਇਦਨ੍ਤਿ ਇਦਂ ਅਤ੍ਥਜਾਤਂ. ਏਤ੍ਥਾਤਿ ‘‘ਭੁਤ੍ਵਾ ਸਯਤੀ’’ਤਿ ਵਾਕ੍ਯੇ. ਏਵਨ੍ਤਿ ਉਪਮੇਯ੍ਯਜੋਤਕੋ. ਇਧਾਪੀਤਿ ਇਮਿਸ੍ਸਂ ‘‘ਅਥ ਖੋ ਭਗਵਾ’’ਤਿਆਦਿਪਾਲ਼ਿਯਮ੍ਪਿ. ਇਦਨ੍ਤਿ ਅਯਮਤ੍ਥੋ ਦੀਪਿਤੋ ਹੋਤੀਤਿ ਯੋਜਨਾ. ਏਤ੍ਥਾਤਿ ‘‘ਅਥ ਖੋ ਭਗਵਾ’’ਤਿਆਦਿਪਾਠੇ.

ਅਪਰਾਨਿਪੀਤਿ ਪਲ੍ਲਙ੍ਕਸਤ੍ਤਾਹਤੋ ਅਞ੍ਞਾਨਿਪਿ. ਤਤ੍ਰਾਤਿ ‘‘ਅਪਰਾਨਿਪੀ’’ਤਿਆਦਿਵਚਨੇ. ਭਗਵਤਿ ਨਿਸਿਨ੍ਨੇ ਸਤੀਤਿ ਯੋਜਨਾ. ਕਿਰਸਦ੍ਦੋ ਵਿਤ੍ਥਾਰਜੋਤਕੋ. ਕਿਂ ਨੁ ਖੋਤਿ ਪਰਿਵਿਤਕ੍ਕਨਤ੍ਥੇ ਨਿਪਾਤੋ. ਏਕਚ੍ਚਾਨਨ੍ਤਿ ਅਪ੍ਪੇਸਕ੍ਖਾਨਂ ਏਕਚ੍ਚਾਨਂ. ਤਾਸਨ੍ਤਿ ਦੇਵਤਾਨਂ. ਬਲਾਧਿਗਮਟ੍ਠਾਨਨ੍ਤਿ ਬਲੇਨ ਤੇਜਸਾ ਅਧਿਗਮਟ੍ਠਾਨਂ. ਅਨਿਮਿਸੇਹੀਤਿ ਉਮ੍ਮਿਸੇਹਿ. ਸਤ੍ਤਾਹਨ੍ਤਿ ਕਮ੍ਮਤ੍ਥੇ ਚੇਤਂ ਉਪਯੋਗਵਚਨਂ, ਅਚ੍ਚਨ੍ਤਸਂਯੋਗੇ ਵਾ. ਏਵਞ੍ਹਿ ਸਤਿ ‘‘ਕਾਲ’’ਨ੍ਤਿ ਕਮ੍ਮਂ ਵੇਦਿਤਬ੍ਬਂ. ਤਂ ਠਾਨਨ੍ਤਿ ਅਨਿਮਿਸੇਹਿ ਅਕ੍ਖੀਹਿ ਓਲੋਕਿਯਮਾਨਟ੍ਠਾਨਂ. ਅਥਾਤਿ ਅਨਿਮਿਸਸਤ੍ਤਾਹਸ੍ਸ ਅਨਨ੍ਤਰੇ. ਰਤਨਚਙ੍ਕਮੇਤਿ ਰਤਨਮਯੇ ਚਙ੍ਕਮੇ. ਤਂ ਠਾਨਨ੍ਤਿ ਚਙ੍ਕਮਟ੍ਠਾਨਂ. ਤਤੋਤਿ ਚਙ੍ਕਮਸਤ੍ਤਾਹਤੋ. ਰਤਨਘਰਨ੍ਤਿ ਰਤਨਮਯਂ ਗੇਹਂ. ਤਤ੍ਥਾਤਿ ਰਤਨਘਰੇ ਅਭਿਧਮ੍ਮਪਿਟਕਂ ਵਿਚਿਨਨ੍ਤੋਤਿ ਸਮ੍ਬਨ੍ਧੋ. ਏਤ੍ਥਾਤਿ ਰਤਨਘਰੇ, ਅਭਿਧਮ੍ਮਪਿਟਕੇ ਵਾ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਤਂ ਠਾਨਨ੍ਤਿ ਅਭਿਧਮ੍ਮਪਿਟਕਵਿਚਿਨਨਟ੍ਠਾਨਂ.

ਏਵਨ੍ਤਿਆਦਿ ਪੁਬ੍ਬਵਚਨਸ੍ਸ ਨਿਗਮਵਸੇਨ ਪਚ੍ਛਿਮਵਚਨਸ੍ਸ ਅਨੁਸਨ੍ਧਿਨਿਦਸ੍ਸਨਂ. ਤੇਨਾਤਿ ਅਜਪਾਲਾਨਂ ਨਿਸੀਦਨਕਾਰਣੇਨ. ਅਸ੍ਸਾਤਿ ਨਿਗ੍ਰੋਧਸ੍ਸ. ‘‘ਅਜਪਾਲਨਿਗ੍ਰੋਧੋਤ੍ਵੇਵ ਨਾਮ’’ਨ੍ਤਿ ਇਮਿਨਾ ਉਪਚਾਰਵਸੇਨ ਨਾਮਲਭਨਂ ਦਸ੍ਸੇਤਿ. ਅਜਪਾ ਬ੍ਰਾਹ੍ਮਣਾ ਲਨ੍ਤਿ ਨਿਵਾਸਂ ਗਣ੍ਹਨ੍ਤਿ ਏਤ੍ਥਾਤਿ ਅਜਪਾਲੋ, ਉਣ੍ਹਕਾਲੇ ਵਾ ਅਨ੍ਤੋਪਵਿਟ੍ਠੇ ਅਜੇ ਅਤ੍ਤਨੋ ਛਾਯਾਯ ਪਾਲੇਤੀਤਿ ਅਜਪਾਲੋ, ਅਜਪਾਲੋ ਚ ਸੋ ਨਿਗ੍ਰੋਧੋ ਚੇਤਿ ਅਜਪਾਲਨਿਗ੍ਰੋਧੋਤਿ ਵਚਨਤ੍ਥਾਨਿਪਿ ਪਕਰਣਨ੍ਤਰੇਸੁ (ਉਦਾ. ਅਟ੍ਠ. ੪) ਦਸ੍ਸਿਤਾਨਿ. ਤਤ੍ਰਾਪੀਤਿ ਅਜਪਾਲਨਿਗ੍ਰੋਧੇਪਿ. ਬੋਧਿਤੋਤਿ ਬੋਧਿਰੁਕ੍ਖਤੋ. ਏਤ੍ਥਾਤਿ ਅਜਪਾਲਨਿਗ੍ਰੋਧੇ. ਭਗਵਤਿ ਨਿਸਿਨ੍ਨੇਤਿ ਯੋਜਨਾ. ਤਤ੍ਥਾਤਿ ‘‘ਅਥ ਖੋ ਅਞ੍ਞਤਰੋ’’ਤਿਆਦਿਵਚਨੇ. ਸੋਤਿ ਬ੍ਰਾਹ੍ਮਣੋ. ਦਿਟ੍ਠਮਙ੍ਗਲਿਕੋ ਨਾਮਾਤਿ ਦਿਟ੍ਠਸੁਤਮੁਤਸਙ੍ਖਾਤੇਸੁ ਤੀਸੁ ਮਙ੍ਗਲਿਕੇਸੁ ਦਿਟ੍ਠਮਙ੍ਗਲਿਕੋ ਨਾਮ ਕਿਰਾਤਿ ਅਤ੍ਥੋ. ‘‘ਮਾਨਵਸੇਨ…ਪੇ… ਵੁਚ੍ਚਤੀ’’ਤਿ ਇਮਿਨਾ ‘‘ਹੁਂਹੁ’’ਨ੍ਤਿ ਕਰੋਤੀਤਿ ਹੁਂਹੁਙ੍ਕੋ, ਹੁਂਹੁਙ੍ਕੋ ਜਾਤਿ ਸਭਾਵੋ ਇਮਸ੍ਸਾਤਿ ਹੁਂਹੁਙ੍ਕਜਾਤਿਕੋਤਿ ਵਚਨਤ੍ਥਂ ਦਸ੍ਸੇਤਿ.

ਤੇਨਾਤਿ ਬ੍ਰਾਹ੍ਮਣੇਨ. ਸਿਖਾਪ੍ਪਤ੍ਤਨ੍ਤਿ ਅਗ੍ਗਪ੍ਪਤ੍ਤਂ. ਤਸ੍ਸਾਤਿ ਉਦਾਨਸ੍ਸ. ਯੋਤਿ ਪੁਗ੍ਗਲੋ, ਪਟਿਜਾਨਾਤੀਤਿ ਸਮ੍ਬਨ੍ਧੋ. ‘‘ਨ ਦਿਟ੍ਠਮਙ੍ਗਲਿਕਤਾਯਾ’’ਤਿ ਇਮਿਨਾ ਅਵਧਾਰਣਫਲਂ ਦਸ੍ਸੇਤਿ. ‘‘ਬਾਹਿਤਪਾਪਧਮ੍ਮਤ੍ਤਾ’’ਤਿ ਇਮਿਨਾ ਬਾਹਿਤੋ ਪਾਪੋ ਧਮ੍ਮੋ ਅਨੇਨਾਤਿ ਬਾਹਿਤਪਾਪਧਮ੍ਮੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਹੁਂਹੁਙ੍ਕਾਰਪਹਾਨੇਨਾ’’ਤਿ ਇਮਿਨਾ ਨਤ੍ਥਿ ਹੁਂਹੁਙ੍ਕਾਰੋ ਇਮਸ੍ਸਾਤਿ ਨਿਹੁਂਹੁਙ੍ਕੋਤਿ ਵਚਨਤ੍ਥਂ ਦਸ੍ਸੇਤਿ. ਰਾਗਾਦਿਕਸਾਵਾਭਾਵੇਨਾਤਿ ਇਮਿਨਾ ਨਤ੍ਥਿ ਰਾਗਾਦਿਕਸਾਵੋ ਇਮਸ੍ਸਾਤਿ ਨਿਕ੍ਕਸਾਵੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਭਾਵਨਾਨੁਯੋਗਯੁਤ੍ਤਚਿਤ੍ਤਤਾਯਾ’’ਤਿ ਇਮਿਨਾ ਯਤਂ ਅਨੁਯੁਤ੍ਤਂ ਅਤ੍ਤਂ ਚਿਤ੍ਤਂ ਇਮਸ੍ਸਾਤਿ ਯਤਤ੍ਤੋਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਹਿ ਯਤਸਦ੍ਦੋ ਵੀਰਿਯਵਾਚਕੋ, ਯਤਧਾਤੁਯਾ ਨਿਪ੍ਫਨ੍ਨੋ, ਅਤ੍ਤਸਦ੍ਦੋ ਚਿਤ੍ਤਪਰਿਯਾਯੋ. ਯਤਸਦ੍ਦਸ੍ਸ ਯਮੁਧਾਤੁਯਾ ਚ ਨਿਪ੍ਫਨ੍ਨਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਸੀਲਸਂਵਰੇਨ ਵਾ’’ਤਿਆਦਿ. ‘‘ਸਞ੍ਞਤਚਿਤ੍ਤਤਾਯਾ’’ਤਿ ਇਮਿਨਾ ਯਮਤਿ ਸਂਯਮਤੀਤਿ ਯਤਂ, ਯਤਂ ਅਤ੍ਤਂ ਚਿਤ੍ਤਂ ਇਮਸ੍ਸਾਤਿ ਯਤਤ੍ਤੋਤਿ ਵਚਨਤ੍ਥਂ ਦਸ੍ਸੇਤਿ. ਸਚ੍ਚਾਨਿ ਵਿਦਨ੍ਤਿ ਜਾਨਨ੍ਤੀਤਿ ਵੇਦਾਨੀਤਿ ਵਚਨਤ੍ਥੇਨ ਮਗ੍ਗਞਾਣਾਨਿ ਵੇਦਾਨਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਚਤੁਮਗ੍ਗਞਾਣਸਙ੍ਖਾਤੇਹਿ ਵੇਦੇਹੀ’’ਤਿ. ‘‘ਚਤੁਮਗ੍ਗਞਾਣਸਙ੍ਖਾਤਾਨ’’ਨ੍ਤਿ ਵਿਭਤ੍ਤਿਪਰਿਣਾਮਂ ਕਤ੍ਵਾ ‘‘ਵੇਦਾਨ’’ਨ੍ਤਿਪਦੇਨ ਯੋਜੇਤਬ੍ਬੋ. ਅਨ੍ਤਨ੍ਤਿ ਨਿਬ੍ਬਾਨਂ. ਤਞ੍ਹਿ ਯਸ੍ਮਾ ਸਙ੍ਖਾਰਾਨਂ ਅਵਸਾਨੇ ਜਾਤਂ, ਤਸ੍ਮਾ ਅਨ੍ਤਨ੍ਤਿ ਵੁਚ੍ਚਤਿ. ਪੁਨ ਅਨ੍ਤਨ੍ਤਿ ਅਰਹਤ੍ਤਫਲਂ. ਤਞ੍ਹਿ ਯਸ੍ਮਾ ਮਗ੍ਗਸ੍ਸ ਪਰਿਯੋਸਾਨੇ ਪਵਤ੍ਤਂ, ਤਸ੍ਮਾ ਅਨ੍ਤਨ੍ਤਿ ਵੁਚ੍ਚਤਿ. ‘‘ਮਗ੍ਗਬ੍ਰਹ੍ਮਚਰਿਯਸ੍ਸ ਵੁਸਿਤਤ੍ਤਾ’’ਤਿ ਇਮਿਨਾ ਵੁਸਿਤਂ ਮਗ੍ਗਸਙ੍ਖਾਤਂ ਬ੍ਰਹ੍ਮਚਰਿਯਂ ਅਨੇਨਾਤਿ ਵੁਸਿਤਬ੍ਰਹ੍ਮਚਰਿਯੋਤਿ ਵਚਨਤ੍ਥਂ ਦਸ੍ਸੇਤਿ. ਧਮ੍ਮੇਨ ਬ੍ਰਹ੍ਮਵਾਦਂ ਵਦੇਯ੍ਯਾਤਿ ਵੁਤ੍ਤਵਚਨਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਬ੍ਰਾਹ੍ਮਣੋ ਅਹਨ੍ਤਿ ਏਤਂ ਵਾਦਂ ਧਮ੍ਮੇਨ ਵਦੇਯ੍ਯਾ’’ਤਿ. ਧਮ੍ਮੇਨਾਤਿ ਭੂਤੇਨ ਸਭਾਵੇਨ. ਲੋਕੇਤਿ ਏਤ੍ਥ ਸਤ੍ਤਲੋਕੋਵਾਧਿਪ੍ਪੇਤੋਤਿ ਆਹ ‘‘ਸਕਲੇ ਲੋਕਸਨ੍ਨਿਵਾਸੇ’’ਤਿ.

੩. ਮੁਚਲਿਨ੍ਦਕਥਾ

੫. ਅਕਾਲਮੇਘੋਤਿ ਏਤ੍ਥ ਵਪ੍ਪਾਦਿਕਾਲਸ੍ਸ ਅਭਾਵਾ ਨ ਅਕਾਲੋ ਹੋਤਿ, ਅਥ ਖੋ ਵਸ੍ਸਕਾਲੇ ਅਸਮ੍ਪਤ੍ਤਤ੍ਤਾ ਅਕਾਲੋਤਿ ਆਹ ‘‘ਅਸਮ੍ਪਤ੍ਤੇ ਵਸ੍ਸਕਾਲੇ’’ਤਿ. ‘‘ਉਪ੍ਪਨ੍ਨਮੇਘੋ’’ਤਿ ਇਮਿਨਾ ਅਕਾਲੇ ਉਪ੍ਪਨ੍ਨੋ ਮੇਘੋ ਅਕਾਲਮੇਘੋਤਿ ਵਚਨਤ੍ਥਂ ਦਸ੍ਸੇਤਿ. ਗਿਮ੍ਹਾਨਂ ਪਚ੍ਛਿਮੇ ਮਾਸੇਤਿ ਜੇਟ੍ਠਮੂਲਮਾਸੇ. ਤਸ੍ਮਿਨ੍ਤਿ ਮੇਘੇ. ਸੀਤਵਾਤਦੁਦ੍ਦਿਨੀਤਿ ਏਤ੍ਥ ਸੀਤੇਨ ਵਾਤੇਨ ਦੂਸਿਤਂ ਦਿਨਂ ਇਮਿਸ੍ਸਾ ਵਟ੍ਟਲਿਕਾਯਾਤਿ ਸੀਤਵਾਤਦੁਦ੍ਦਿਨੀਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਾ ਚ ਪਨਾ’’ਤਿਆਦਿ. ਸਾ ਚ ਪਨ ਸਤ੍ਤਾਹਵਟ੍ਟਲਿਕਾ ਸੀਤਵਾਤਦੁਦ੍ਦਿਨੀ ਨਾਮ ਅਹੋਸੀਤਿ ਸਮ੍ਬਨ੍ਧੋ. ‘‘ਸਮੀਪੇ ਪੋਕ੍ਖਰਣਿਯਾ ਨਿਬ੍ਬਤ੍ਤੋ’’ਤਿ ਇਮਿਨਾ ਮੁਚਲਿਨ੍ਦਸ੍ਸ ਸਮੀਪੇ ਨਿਬ੍ਬਤ੍ਤੋ ਮੁਚਲਿਨ੍ਦੋਤਿ ਵਚਨਤ੍ਥਂ ਦਸ੍ਸੇਤਿ. ਮੁਚਲਿਨ੍ਦੋਤਿ ਚ ਨਿਚੁਲੋ. ਸੋ ਨੀਪੋਤਿ ਚ ਪਿਯਕੋਤਿ ਚ ਵੁਚ੍ਚਤਿ. ਨਾਗਸ੍ਸ ਭੋਗੋ ਏਕੋਪਿ ਸਤ੍ਤਾਭੁਜਤ੍ਤਾ ‘‘ਭੋਗੇਹੀ’’ਤਿ ਬਹੁਵਚਨਵਸੇਨ ਵੁਤ੍ਤਂ. ਤਸ੍ਮਿਨ੍ਤਿ ਨਾਗਰਾਜੇ ਠਿਤੇ ਸਤੀਤਿ ਯੋਜਨਾ. ਤਸ੍ਸਾਤਿ ਨਾਗਰਾਜਸ੍ਸ. ਤਸ੍ਮਾਤਿ ਯਸ੍ਮਾ ਭਣ੍ਡਾਗਾਰਗਬ੍ਭਪਮਾਣਂ ਅਹੋਸਿ, ਤਸ੍ਮਾ. ਠਾਨਸ੍ਸ ਕਾਰਣਂ ਪਰਿਦੀਪੇਤਿ ਅਨੇਨਾਤਿ ਠਾਨਕਾਰਣਪਰਿਦੀਪਨਂ ‘‘ਮਾ ਭਗਵਨ੍ਤਂ ਸੀਤ’’ਨ੍ਤਿਆਦਿਵਚਨਂ. ਸੋਤਿ ਨਾਗਰਾਜਾ. ਹੀਤਿ ਸਚ੍ਚਂ. ਪਾਲ਼ਿਯਂ ‘‘ਬਾਧਯਿਤ੍ਥਾ’’ਤਿ ਕਿਰਿਯਾਪਦਂ ਅਜ੍ਝਾਹਰਿਤਬ੍ਬਨ੍ਤਿ ਆਹ ‘‘ਮਾ ਸੀਤਂ ਭਗਵਨ੍ਤਂ ਬਾਧਯਿਤ੍ਥਾ’’ਤਿ. ਤਤ੍ਥਾਤਿ ‘‘ਮਾ ਭਗਵਨ੍ਤਂ ਸੀਤ’’ਨ੍ਤਿਆਦਿਵਚਨੇ. ਸਤ੍ਤਾਹਵਟ੍ਟਲਿਕਾਯ ਸਤੀਤਿ ਸਮ੍ਬਨ੍ਧੋ. ਤਮ੍ਪੀਤਿ ਉਣ੍ਹਮ੍ਪਿ. ਨਨ੍ਤਿ ਭਗਵਨ੍ਤਂ. ਤਸ੍ਸਾਤਿ ਨਾਗਰਾਜਸ੍ਸ. ਉਬ੍ਬਿਦ੍ਧਨ੍ਤਿ ਉਦ੍ਧਂ ਛਿਦ੍ਦਂ. ਵਿਦ੍ਧਛਿਦ੍ਦਸਦ੍ਦਾ ਹਿ ਪਰਿਯਾਯਾ. ਆਕਾਸਂ ਮੇਘਪਟਲਪਟਿਚ੍ਛਨ੍ਨਂ ਆਸਨ੍ਨਂ ਵਿਯ ਹੋਤਿ, ਮੇਘਪਟਲਵਿਗਮੇ ਦੂਰਂ ਵਿਯ ਉਪਟ੍ਠਾਤਿ, ਤਸ੍ਮਾ ਵੁਤ੍ਤਂ ‘‘ਮੇਘਵਿਗਮੇਨ ਦੂਰੀਭੂਤ’’ਨ੍ਤਿ. ਵਿਗਤਵਲਾਹਕਨ੍ਤਿ ਏਤ੍ਥ ਵਿਗਤਸਦ੍ਦੋ ਅਪਗਤਤ੍ਥਵਾਚਕੋ, ਵਲਾਹਕਸਦ੍ਦੋ ਮੇਘਪਰਿਯਾਯੋਤਿ ਆਹ ‘‘ਅਪਗਤਮੇਘ’’ਨ੍ਤਿ. ਇਨ੍ਦਨੀਲਮਣਿ ਵਿਯ ਦਿਬ੍ਬਤੀਤਿ ਦੇਵੋਤਿ ਵਚਨਤ੍ਥੇਨ ਆਕਾਸੋ ਦੇਵੋ ਨਾਮਾਤਿ ਆਹ ‘‘ਦੇਵਨ੍ਤਿ ਆਕਾਸ’’ਨ੍ਤਿ. ਅਤ੍ਤਨੋ ਰੂਪਨ੍ਤਿ ਅਤ੍ਤਨੋ ਨਾਗਸਣ੍ਠਾਨਂ. ਇਮਿਨਾ ਸਕਵਣ੍ਣਨ੍ਤਿ ਏਤ੍ਥ ਸਕਸਦ੍ਦੋ ਅਤ੍ਤਵਾਚਕੋ, ਵਣ੍ਣਸਦ੍ਦੋ ਸਣ੍ਠਾਨਵੇਵਚਨੋਤਿ ਦਸ੍ਸੇਤਿ.

ਸੁਖੋ ਵਿਵੇਕੋਤਿ ਏਤ੍ਥ ਤਦਙ੍ਗ ਵਿਕ੍ਖਮ੍ਭਨ ਸਮੁਚ੍ਛੇਦ ਪਟਿਪ੍ਪਸ੍ਸਦ੍ਧਿਨਿਸ੍ਸਰਣਵਿਵੇਕਸਙ੍ਖਾਤੇਸੁ ਪਞ੍ਚਸੁ ਵਿਵੇਕੇਸੁ ਨਿਬ੍ਬਾਨਸਙ੍ਖਾਤੋ ਨਿਸ੍ਸਰਣਵਿਵੇਕੋ ਚ ਕਾਯਚਿਤ੍ਤਉਪਧਿਵਿਵੇਕਸਙ੍ਖਾਤੇਸੁ ਤੀਸੁ ਵਿਵੇਕੇਸੁ ਨਿਬ੍ਬਾਨਸਙ੍ਖਾਤੋ ਉਪਧਿਵਿਵੇਕੋ ਚ ਗਹੇਤਬ੍ਬੋਤਿ ਆਹ ‘‘ਨਿਬ੍ਬਾਨਸਙ੍ਖਾਤੋ ਉਪਧਿਵਿਵੇਕੋ’’ਤਿ. ‘‘ਚਤੁਮਗ੍ਗਞਾਣਸਨ੍ਤੋਸੇਨਾ’’ਤਿ ਇਮਿਨਾ ਤੁਟ੍ਠਸ੍ਸਾਤਿ ਏਤ੍ਥ ਪਿਣ੍ਡਪਾਤਸਨ੍ਤੋਸਾਦਿਕੇ ਨਿਵਤ੍ਤੇਤਿ. ਸੁਤਧਮ੍ਮਸ੍ਸਾਤਿ ਏਤ੍ਥ ਸੁਤਸਦ੍ਦੋ ਵਿਸ੍ਸੁਤਪਰਿਯਾਯੋਤਿ ਆਹ ‘‘ਪਕਾਸਿਤਧਮ੍ਮਸ੍ਸਾ’’ਤਿ, ਪਾਕਟਸਚ੍ਚਧਮ੍ਮਸ੍ਸਾਤਿ ਅਤ੍ਥੋ. ਪਸ੍ਸਤੋਤਿ ਏਤ੍ਥ ਮਂਸਚਕ੍ਖੁਸ੍ਸ ਕਰਣਭਾਵੇਨ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਞਾਣਚਕ੍ਖੁਨਾ’’ਤਿ. ‘‘ਅਕੁਪ੍ਪਨਭਾਵੋ’’ਤਿ ਇਮਿਨਾ ਅਬ੍ਯਾਪਜ੍ਜਨ੍ਤਿ ਏਤ੍ਥ ਬ੍ਯਾਪਾਦਸਦ੍ਦਸ੍ਸ ਦੋਸਵਾਚਕਭਾਵੋ ਚ ਣ੍ਯਪਚ੍ਚਯਸ੍ਸ ਭਾਵਤ੍ਥੋ ਚ ਦਸ੍ਸਿਤੋ. ਏਤੇਨਾਤਿ ‘‘ਅਬ੍ਯਾਪਜ੍ਜ’’ਨ੍ਤਿਪਦੇਨ. ਮੇਤ੍ਤਾਪੁਬ੍ਬਭਾਗੋਤਿ ਅਬ੍ਯਾਪਜ੍ਜਸ੍ਸ ਪੁਬ੍ਬਭਾਗੇ ਮੇਤ੍ਤਾਯ ਉਪ੍ਪਨ੍ਨਭਾਵੋ. ਪਾਣਭੂਤੇਸੁ ਸਂਯਮੋਤਿ ਏਤ੍ਥ ਪਾਣਭੂਤਸਦ੍ਦਾ ਵੇਵਚਨਭਾਵੇਨ ਸਤ੍ਤੇਸੁ ਏਵ ਵਤ੍ਤਨ੍ਤੀਤਿ ਆਹ ‘‘ਸਤ੍ਤੇਸੁ ਚਾ’’ਤਿ. ਕਰੁਣਾਪੁਬ੍ਬਭਾਗੋਤਿ ਸਂਯਮਸ੍ਸ ਪੁਬ੍ਬਭਾਗੇ ਕਰੁਣਾਯ ਉਪ੍ਪਨ੍ਨਭਾਵੋ. ਯਾਤਿ ਯਾ ਵਿਰਾਗਤਾ. ਅਨਾਗਾਮਿਮਗ੍ਗਸ੍ਸ ਕਾਮਰਾਗਸ੍ਸ ਅਨਵਸੇਸਪਹਾਨਤ੍ਤਾ ਵੁਤ੍ਤਂ ‘‘ਏਤੇਨ ਅਨਾਗਾਮਿਮਗ੍ਗੋ ਕਥਿਤੋ’’ਤਿ. ਯਾਥਾਵਮਾਨਸ੍ਸ ਅਰਹਤ੍ਤਮਗ੍ਗੇਨ ਨਿਰੁਦ੍ਧਤ੍ਤਾ ਵੁਤ੍ਤਂ ‘‘ਅਸ੍ਮਿ…ਪੇ… ਕਥਿਤ’’ਨ੍ਤਿ. ਇਤੋਤਿ ਅਰਹਤ੍ਤਤੋ.

੪. ਰਾਜਾਯਤਨਕਥਾ

੬. ਪਾਚੀਨਕੋਣੇਤਿ ਪੁਰਤ੍ਥਿਮਅਸ੍ਸੇ, ਪੁਬ੍ਬਦਕ੍ਖਿਣਦਿਸਾਭਾਗੇਤਿ ਅਤ੍ਥੋ. ਰਾਜਾਯਤਨਰੁਕ੍ਖਨ੍ਤਿ ਖੀਰਿਕਾਰੁਕ੍ਖਂ. ਤੇਨ ਖੋ ਪਨ ਸਮਯੇਨਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਪੁਚ੍ਛਿਤ੍ਵਾ ਦਸ੍ਸੇਨ੍ਤੋ ਆਹ ‘‘ਕਤਰੇਨ ਸਮਯੇਨਾ’’ਤਿ. ਨਿਸਿਨ੍ਨਸ੍ਸ ਭਗਵਤੋਤਿ ਯੋਜਨਾ. ਦੇਵਰਾਜਸਦ੍ਦਸ੍ਸ ਅਞ੍ਞੇ ਪਜਾਪਤਿਆਦਯੋ ਦੇਵਰਾਜਾਨੋ ਨਿਵਤ੍ਤੇਤੁਂ ‘‘ਸਕ੍ਕੋ’’ਤਿ ਵੁਤ੍ਤਂ. ਤਨ੍ਤਿ ਹਰੀਤਕਂ. ਪਰਿਭੁਤ੍ਤਮਤ੍ਤਸ੍ਸੇਵ ਭਗਵਤੋਤਿ ਸਮ੍ਬਨ੍ਧੋ. ਨਿਸਿਨ੍ਨੇ ਭਗਵਤਿ.

‘‘ਤੇਨ ਖੋ ਪਨ ਸਮਯੇਨਾ’’ਤਿ ਇਮਿਨਾ ਯੇਨ ਸਮਯੇਨ ਭਗਵਾ ਰਾਜਾਯਤਨਮੂਲੇ ਨਿਸੀਦਿ, ਤੇਨ ਖੋ ਪਨ ਸਮਯੇਨਾਤਿ ਅਤ੍ਥਂ ਦਸ੍ਸੇਤਿ. ਉਕ੍ਕਲਜਨਪਦਤੋਤਿ ਉਕ੍ਕਲਨਾਮਕਾ ਜਨਪਦਮ੍ਹਾ. ਯਸ੍ਮਿਂ ਦੇਸੇ ਭਗਵਾ ਵਿਹਰਤਿ, ਤਂ ਦੇਸਨ੍ਤਿ ਯੋਜਨਾ. ਏਤ੍ਥਾਤਿ ‘‘ਤਂ ਦੇਸਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ’’ਤਿਪਦੇ. ਤੇਸਨ੍ਤਿ ਵਾਣਿਜਾਨਂ. ਞਾਤਿਸਾਲੋਹਿਤਸਦ੍ਦਾਨਂ ਅਞ੍ਞਮਞ੍ਞਵੇਵਚਨਤ੍ਤਾ ‘‘ਞਾਤੀ’’ਤਿ ਵੁਤ੍ਤੇ ਸਾਲੋਹਿਤਸਦ੍ਦਸ੍ਸ ਅਤ੍ਥੋ ਸਿਦ੍ਧੋਤਿ ਦਸ੍ਸੇਤੁਂ ਵੁਤ੍ਤਂ ‘‘ਞਾਤਿਭੂਤਪੁਬ੍ਬਾ ਦੇਵਤਾ’’ਤਿ. ਸਾਤਿ ਦੇਵਤਾ. ਨੇਸਨ੍ਤਿ ਵਾਣਿਜਾਨਂ. ਤਤੋਤਿ ਅਪਵਤ੍ਤਨਕਾਰਣਾ. ਤੇਤਿ ਵਾਣਿਜਾ. ਇਦਨ੍ਤਿ ਅਪਵਤ੍ਤਨਂ. ਬਲਿਨ੍ਤਿ ਉਪਹਾਰਂ. ਤੇਸਨ੍ਤਿ ਵਾਣਿਜਾਨਂ. ‘‘ਸਬ੍ਬਿਮਧੁਫਾਣਿਤਾਦੀਹਿ ਯੋਜੇਤ੍ਵਾ’’ਤਿ ਪਦਂ ਪੁਬ੍ਬਾਪਰਾਪੇਕ੍ਖਂ, ਤਸ੍ਮਾ ਮਜ੍ਝੇ ਵੁਤ੍ਤਂ. ਪਤਿਮਾਨੇਥਾਤਿ ਏਤ੍ਥ ਮਾਨ ਪੂਜਾਯਂ ਪੇਮਨੇਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੮ ਨਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਪੂਜਨਪੇਮਨਂ ਨਾਮ ਅਤ੍ਥਤੋ ਉਪਟ੍ਠਹਨਨ੍ਤਿ ਆਹ ‘‘ਉਪਟ੍ਠਹਥਾ’’ਤਿ. ਤਂ ਵੋਤਿ ਏਤ੍ਥ ਤਂਸਦ੍ਦੋ ਪਤਿਮਾਨਨਵਿਸਯੋ, ਵੋਸਦ੍ਦੋ ਤੀਸੁ ਵੋਸਦ੍ਦੇਸੁ ਤੁਮ੍ਹਸਦ੍ਦਸ੍ਸ ਕਾਰਿਯੋ ਵੋਸਦ੍ਦੋ, ਸੋ ਚ ਚਤੁਤ੍ਥ੍ਯਤ੍ਥੋਤਿ ਆਹ ‘‘ਤਂ ਪਤਿਮਾਨਂ ਤੁਮ੍ਹਾਕ’’ਨ੍ਤਿ. ਵੋਕਾਰੋ ਹਿ ਤਿਵਿਧੋ ਤੁਮ੍ਹਸਦ੍ਦਸ੍ਸ ਕਾਰਿਯੋ, ਯੋਵਚਨਸ੍ਸ ਕਾਰਿਯੋ, ਪਦਪੂਰਣੋਤਿ. ਤਤ੍ਥ ਤੁਮ੍ਹਸਦ੍ਦਸ੍ਸ ਕਾਰਿਯੋ ਪਞ੍ਚਵਿਧੋ ਪਚ੍ਚਤ੍ਤਉਪਯੋਗਕਰਣਸਮ੍ਪਦਾਨਸਾਮਿਵਚਨਵਸੇਨਾਤਿ. ਤਤ੍ਥ ਤੁਮ੍ਹਸਦ੍ਦਕਾਰਿਯੋ ਸਮ੍ਪਦਾਨਵਚਨੋ ਇਧਾਧਿਪ੍ਪੇਤੋ. ਤੇਨਾਹ ‘‘ਤੁਮ੍ਹਾਕ’’ਨ੍ਤਿ. ‘‘ਯ’’ਨ੍ਤਿਸਦ੍ਦਸ੍ਸ ਵਿਸਯੋ ਪਟਿਗ੍ਗਹਣਤ੍ਥੋਤਿ ਆਹ ‘‘ਯਂ ਪਟਿਗ੍ਗਹਣ’’ਨ੍ਤਿ. ਅਸ੍ਸਾਤਿ ਭਵੇਯ੍ਯ. ਯੋ ਪਤ੍ਤੋ ਅਹੋਸੀਤਿ ਯੋਜਨਾ. ਅਸ੍ਸਾਤਿ ਭਗਵਤੋ. ਸੋਤਿ ਪਤ੍ਤੋ. ਸੁਜਾਤਾਯ ਆਗਚ੍ਛਨ੍ਤਿਯਾ ਏਵਾਤਿ ਸਮ੍ਬਨ੍ਧੋ. ਅਨਾਦਰੇ ਚੇਤਂ ਸਾਮਿਵਚਨਂ. ਤੇਨਾਤਿ ਅਨ੍ਤਰਧਾਯਹੇਤੁਨਾ. ਅਸ੍ਸਾਤਿ ਭਗਵਤੋ. ਹਤ੍ਥੇਸੂਤਿ ਕਰਣਤ੍ਥੇ ਚੇਤਂ ਭੁਮ੍ਮਵਚਨਂ. ਹਤ੍ਥੇਹੀਤਿ ਹਿ ਅਤ੍ਥੋ. ਕਿਮ੍ਹੀਤਿ ਕੇਨ.

ਇਤੋਤਿ ਆਸਲ਼੍ਹੀਮਾਸਜੁਣ੍ਹਪਕ੍ਖਪਞ੍ਚਮਿਤੋ. ਏਤ੍ਤਕਂ ਕਾਲਨ੍ਤਿ ਏਤਂ ਪਮਾਣਂ ਏਕੂਨਪਞ੍ਞਾਸਦਿਵਸਕਾਲਂ. ਜਿਘਚ੍ਛਾਤਿ ਘਸਿਤੁਮਿਚ੍ਛਾ. ਪਿਪਾਸਾਤਿ ਪਾਤੁਮਿਚ੍ਛਾ. ਅਸ੍ਸਾਤਿ ਭਗਵਤੋ. ਚੇਤਸਾ-ਚੇਤੋਸਦ੍ਦਾਨਂ ਸਮ੍ਬਨ੍ਧਾਪੇਕ੍ਖਤ੍ਤਾ ਤੇਸਂ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਅਤ੍ਤਨੋ’’ਤਿ ਚ ‘‘ਭਗਵਤੋ’’ਤਿ ਚ. ਇਮੇਹਿ ਸਮ੍ਬਨ੍ਧਿਸਦ੍ਦਾਨਮਸਦਿਸਤ੍ਤਾ ਸਮ੍ਬਨ੍ਧੋਪਿ ਅਸਦਿਸੋਤਿ ਦਸ੍ਸੇਤਿ. ਅਤ੍ਤਨੋਤਿ ਚਤੁਨ੍ਨਂ ਮਹਾਰਾਜਾਨਂ. ਸਮਾਸੋਯੇਵ ਅਵਯਵੀਪਧਾਨੋ ਹੋਤਿ, ਵਾਕ੍ਯਂ ਪਨ ਅਵਯਵਪਧਾਨੋਯੇਵਾਤਿ ਦਸ੍ਸੇਨ੍ਤੋ ਆਹ ‘‘ਚਤੂਹਿ ਦਿਸਾਹੀ’’ਤਿ. ਪਾਲ਼ਿਯਂ ‘‘ਆਗਨ੍ਤ੍ਵਾ’’ਤਿ ਪਾਠਸੇਸੋ ਯੋਜੇਤਬ੍ਬੋ. ‘‘ਸਿਲਾਮਯੇ’’ਤਿ ਇਮਿਨਾ ਸਿਲਾਮਯਮੇਵ ਸੇਲਾਮਯਨ੍ਤਿ ਅਤ੍ਥਂ ਦਸ੍ਸੇਤਿ. ਇਦਨ੍ਤਿ ‘‘ਸੇਲਾਮਯੇ ਪਤ੍ਤੇ’’ਤਿ ਵਚਨਂ. ਯੇਤਿ ਮੁਗ੍ਗਵਣ੍ਣਸਿਲਾਮਯੇ ਪਤ੍ਤੇ. ਤਤੋਤਿ ਇਨ੍ਦਨੀਲਮਣਿਮਯਪਤ੍ਤਉਪਨਾਮਨਤੋ, ਪਰਨ੍ਤਿ ਸਮ੍ਬਨ੍ਧੋ. ਤੇਸਨ੍ਤਿ ਚਤੁਨ੍ਨਂ ਮਹਾਰਾਜਾਨਂ. ਚਤ੍ਤਾਰੋਪਿ ਅਧਿਟ੍ਠਹੀਤਿ ਸਮ੍ਬਨ੍ਧੋ. ਯਥਾਤਿ ਯੇਨਾਕਾਰੇਨ, ਅਧਿਟ੍ਠਿਯਮਾਨੇਤਿ ਯੋਜਨਾ. ਏਕਸਦਿਸੋਤਿ ਏਕਂਸੇਨ ਸਦਿਸੋ. ਅਧਿਟ੍ਠਿਤੇ ਪਤ੍ਤੇਤਿ ਸਮ੍ਬਨ੍ਧੋ. ਪਤ੍ਤੇਤਿ ਚ ਕਰਣਤ੍ਥੇ ਭੁਮ੍ਮਵਚਨਂ. ਪਤ੍ਤੇਨ ਪਟਿਗ੍ਗਹੇਸੀਤਿ ਹਿ ਅਤ੍ਥੋ. ਪਚ੍ਚਗ੍ਘੇਤਿ ਏਤ੍ਥ ਏਕਾਰੋ ਸ੍ਮਿਂਵਚਨਸ੍ਸ ਕਾਰਿਯੋਤਿ ਆਹ ‘‘ਪਚ੍ਚਗ੍ਘਸ੍ਮਿ’’ਨ੍ਤਿ. ਪਟਿ ਅਗ੍ਘਨ੍ਤਿ ਪਦਵਿਭਾਗਂ ਕਤ੍ਵਾ ਪਟਿਸਦ੍ਦੋ ਪਾਟੇਕ੍ਕਤ੍ਥੋ, ‘‘ਅਗ੍ਘ’’ਨ੍ਤਿ ਸਾਮਞ੍ਞਤੋ ਵੁਤ੍ਤੇਪਿ ਮਹਗ੍ਘਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਪਾਟੇਕ੍ਕਂ ਮਹਗ੍ਘਸ੍ਮਿ’’ਨ੍ਤਿ. ਇਮਿਨਾ ਚਤ੍ਤਾਰੋ ਏਕਤੋ ਹੁਤ੍ਵਾ ਨ ਮਹਗ੍ਘਾ ਹੋਨ੍ਤਿ, ਪਾਟੇਕ੍ਕਂ ਪਨ ਮਹਗ੍ਘਾ ਹੋਨ੍ਤੀਤਿ ਦਸ੍ਸੇਤਿ. ਅਥ ਵਾ ਸਉਪਸਗ੍ਗੋ ਪਚ੍ਚਗ੍ਘਸਦ੍ਦੋ ਅਭਿਨਵਪਰਿਯਾਯੋਤਿ ਆਹ ‘‘ਅਭਿਨਵੇ’’ਤਿ. ਅਭਿਨਵੋਤਿ ਚ ਅਚਿਰਤਨਵਤ੍ਥੁਸ੍ਸ ਨਾਮਂ. ਅਚਿਰਤਨਵਤ੍ਥੁ ਅਚਿਰਤਨਤ੍ਤਾ ਅਬ੍ਭੁਣ੍ਹਂ ਵਿਯ ਹੋਤਿ, ਤਸ੍ਮਾ ਵੁਤ੍ਤਂ ‘‘ਅਬ੍ਭੁਣ੍ਹੇ’’ਤਿ. ‘‘ਤਙ੍ਖਣੇ ਨਿਬ੍ਬਤ੍ਤਸ੍ਮਿ’’ਨ੍ਤਿ ਇਮਿਨਾ ਤਮੇਵਤ੍ਥਂ ਵਿਭਾਵੇਤਿ. ਦ੍ਵੇਵਾਚਿਕਾਤਿਪਦਸ੍ਸ ਸਮਾਸਵਸੇਨ ਚ ਤਦ੍ਧਿਤਵਸੇਨ ਚ ਨਿਪ੍ਫਨ੍ਨਭਾਵਂ ਦਸ੍ਸੇਨ੍ਤੋ ਆਹ ‘‘ਦ੍ਵੇ ਵਾਚਾ’’ਤਿਆਦਿ. ਪਤ੍ਤਾਤਿ ਏਤ੍ਥ ਏਕੋ ਇਤਿਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਇਤਿ ਤਸ੍ਮਾ ਦ੍ਵੇਵਾਚਿਕਾਇਤਿ ਅਤ੍ਥੋਤਿ ਯੋਜਨਾ. ਤੇਤਿ ਵਾਣਿਜਾ. ਅਥਾਤਿ ਤਸ੍ਮਿਂ ਕਾਲੇ. ਤੇਤਿ ਕੇਸੇ. ਤੇਸਨ੍ਤਿ ਵਾਣਿਜਾਨਂ. ਪਰਿਹਰਥਾਤਿ ਅਤ੍ਤਨੋ ਅਭਿਵਾਦਨਪਚ੍ਚੁਟ੍ਠਾਨਟ੍ਠਾਨਨ੍ਤਿ ਪਟਿਗ੍ਗਹੇਤ੍ਵਾ, ਪਰਿਚ੍ਛਿਨ੍ਦਿਤ੍ਵਾ ਵਾ ਹਰਥਾਤਿ ਅਤ੍ਥੋ. ਤੇਤਿ ਵਾਣਿਜਾ. ਅਮਤੇਨੇਵਾਤਿ ਅਮਤੇਨ ਇਵ, ਅਭਿਸਿਤ੍ਤਾ ਇਵਾਤਿ ਯੋਜਨਾ.

੫. ਬ੍ਰਹ੍ਮਯਾਚਨਕਥਾ

੭. ਭਗਵਾ ਉਪਸਙ੍ਕਮੀਤਿ ਸਮ੍ਬਨ੍ਧੋ. ਤਸ੍ਮਿਨ੍ਤਿ ਅਜਪਾਲਨਿਗ੍ਰੋਧੇ. ਆਚਿਣ੍ਣਸਮਾਚਿਣ੍ਣੋਤਿ ਆਚਰਿਤੋ ਸਮ੍ਮਾਚਰਿਤੋ, ਨ ਏਕਸ੍ਸ ਬੁਦ੍ਧਸ੍ਸ ਆਚਿਣ੍ਣੋ, ਅਥ ਖੋ ਸਬ੍ਬਬੁਦ੍ਧਾਨਂ ਆਚਿਣ੍ਣਸਮਾਚਿਣ੍ਣੋ, ਅਤਿਆਚਿਣ੍ਣੋ ਨਿਚ੍ਚਾਚਿਣ੍ਣੋਤਿ ਅਤ੍ਥੋ. ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਜਾਨਨ੍ਤਿ ਹੀ’’ਤਿਆਦਿ. ਧਮ੍ਮਦੇਸਨਨ੍ਤਿ ਭਗਵਤੋ ਧਮ੍ਮਦੇਸਨਂ, ਧਮ੍ਮਦੇਸਨਤ੍ਥਾਯ ਵਾ ਭਗਵਨ੍ਤਂ, ਭਗਵਨ੍ਤਂ ਵਾ ਧਮ੍ਮਦੇਸਨਂ. ਤਤੋਤਿ ਯਾਚਨਕਾਰਣਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਲੋਕਸਨ੍ਨਿਵਾਸੋ ਬ੍ਰਹ੍ਮਗਰੁਕੋ ਯਸ੍ਮਾ, ਇਤਿ ਤਸ੍ਮਾ ਉਪ੍ਪਾਦੇਸ੍ਸਨ੍ਤੀਤਿ ਯੋਜਨਾ. ਇਤੀਤਿਆਦਿ ਨਿਗਮਨਂ.

ਤਤ੍ਥਾਤਿ ਪਰਿਵਿਤਕ੍ਕਨਾਕਾਰਪਾਠੇ. ‘‘ਪਞ੍ਚਕਾਮਗੁਣੇਸੁ ਅਲ੍ਲੀਯ’’ਨ੍ਤੀਤਿ ਇਮਿਨਾ ਅਲ੍ਲੀਯਨ੍ਤਿ ਅਭਿਰਮਿਤਬ੍ਬਟ੍ਠੇਨ ਲਗ੍ਗਨ੍ਤਿ ਏਤ੍ਥਾਤਿ ਆਲਯਾ ਪਞ੍ਚ ਕਾਮਗੁਣਾਤਿ ਵਚਨਤ੍ਥਂ ਦਸ੍ਸੇਤਿ. ਅਲ੍ਲੀਯਨ੍ਤੀਤਿ ਲਗ੍ਗਨ੍ਤਿ. ‘‘ਪਞ੍ਚ ਕਾਮਗੁਣੇ ਅਲ੍ਲੀਯਨ੍ਤੀ’’ਤਿਪਿ ਪਾਠੋ, ਏਵਂ ਸਤਿ ਅਲ੍ਲੀਯਨ੍ਤਿ ਅਭਿਰਮਿਤਬ੍ਬਟ੍ਠੇਨ ਸੇਵਿਯਨ੍ਤੀਤਿ ਆਲਯਾ ਪਞ੍ਚ ਕਾਮਗੁਣਾਤਿ ਵਚਨਤ੍ਥੋ ਕਾਤਬ੍ਬੋ. ਅਲ੍ਲੀਯਨ੍ਤੀਤਿ ਸੇਵਨ੍ਤਿ. ਤੇਤਿ ਪਞ੍ਚ ਕਾਮਗੁਣਾ. ‘‘ਯਦਿਦ’’ਨ੍ਤਿਪਦਸ੍ਸ ਯਂ ਇਦਨ੍ਤਿ ਪਦਵਿਭਾਗਂ ਕਤ੍ਵਾ ‘‘ਯ’’ਨ੍ਤਿ ਚ ‘‘ਇਦ’’ਨ੍ਤਿ ਚ ਸਬ੍ਬਨਾਮਪਦਨ੍ਤਿ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਯਦਿਦਨ੍ਤਿ ਨਿਪਾਤੋ’’ਤਿ. ਇਮਿਨਾ ਤੀਸੁ ਲਿਙ੍ਗੇਸੁ ਦ੍ਵੀਸੁ ਚ ਵਚਨੇਸੁ ਵਿਨਾਸਂ, ਵਿਕਾਰਂ ਵਾ ਵਿਸਦਿਸਂ ਵਾ ਨਅਯਨਤ੍ਤਾ ਨਗਮਨਤ੍ਤਾ ਅਬ੍ਯਯਂ ਨਾਮਾਤਿ ਦਸ੍ਸੇਤਿ, ਅਤ੍ਥੋ ਪਨ ਸਬ੍ਬਨਾਮਤ੍ਥੋਯੇਵਾਤਿ ਦਟ੍ਠਬ੍ਬਂ. ਤਸ੍ਸਾਤਿ ‘‘ਯਦਿਦ’’ਨ੍ਤਿਨਿਪਾਤਸ੍ਸ, ਅਤ੍ਥੋਤਿ ਸਮ੍ਬਨ੍ਧੋ. ਠਾਨਨ੍ਤਿ ‘‘ਠਾਨਂ’’ਇਤਿਪਦਂ. ਪਟਿਚ੍ਚਸਮੁਪ੍ਪਾਦਨ੍ਤਿ ‘‘ਪਟਿਚ੍ਚਸਮੁਪ੍ਪਾਦੋ’’ਇਤਿਪਦਂ. ਅਤ੍ਥੋਪਿ ਯੁਤ੍ਤੋਯੇਵਾਤਿ ਦਟ੍ਠਬ੍ਬਂ. ਇਮੇਸਨ੍ਤਿ ਸਙ੍ਖਾਰਾਦੀਨਂ ਪਚ੍ਚਯੁਪ੍ਪਨ੍ਨਾਨਂ. ਪਚ੍ਚਯਾਤਿ ਅਵਿਜ੍ਜਾਦਿਕਾਰਣਾ. ‘‘ਇਦਪ੍ਪਚ੍ਚਯਾ ਏਵਾ’’ਤਿ ਇਮਿਨਾ ਇਦਪ੍ਪਚ੍ਚਯਤਾਤਿ ਏਤ੍ਥ ਤਾਪਚ੍ਚਯਸ੍ਸ ਸ੍ਵਤ੍ਥਂ ਦੀਪੇਤਿ ‘‘ਦੇਵਤਾ’’ਤਿਆਦੀਸੁ (ਖੁ. ਪਾ. ਅਟ੍ਠ. ਏਵਮਿਚ੍ਚਾਦਿਪਾਠਵਣ੍ਣਨਾ) ਵਿਯ.

ਸੋ ਮਮਸ੍ਸ ਕਿਲਮਥੋਤਿ ਏਤ੍ਥ ਤਂਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਯਾ ਅਜਾਨਨ੍ਤਾਨਂ ਦੇਸਨਾ ਨਾਮਾ’’ਤਿ, ਇਮਿਨਾ ‘‘ਦੇਸੇਯ੍ਯਂ, ਨ ਆਜਾਨੇਯ੍ਯੁ’’ਨ੍ਤਿ ਦ੍ਵਿਨ੍ਨਮੇਵ ਕਿਰਿਯਾਪਦਾਨਂ ਤਸਦ੍ਦਸ੍ਸ ਵਿਸਯਭਾਵਂ ਦਸ੍ਸੇਤਿ, ਨ ਏਕਸ੍ਸ ਕਿਰਿਯਾਪਦਸ੍ਸ. ਸੋਤਿ ਦੇਸਨਾਸਙ੍ਖਾਤੋ ਕਾਯਵਚੀਪਯੋਗੋ, ਇਮਿਨਾ ਵਾਕ੍ਯਵਿਸਯੇ ਤਸਦ੍ਦੋ ਉਤ੍ਤਰਪਦਸ੍ਸੇਵ ਲਿਙ੍ਗਵਚਨਾਨਿ ਗਣ੍ਹਾਤੀਤਿ ਦਸ੍ਸੇਤਿ, ਸਮਾਸਮਜ੍ਝੇ ਪਨ ਤਸਦ੍ਦੋ ਪੁਬ੍ਬਪਦਸ੍ਸੇਵ ਲਿਙ੍ਗਵਚਨਾਨਿ ਗਣ੍ਹਾਤਿ. ਤੇਨ ਵੁਤ੍ਤਂ ‘‘ਅਵਿਜ੍ਜਾ ਚ ਸਾ ਪਚ੍ਚਯੋ ਚਾ’’ਤਿ (ਉਦਾ. ਅਟ੍ਠ. ਪਠਮਬੋਧਿਸੁਤ੍ਤਵਣ੍ਣਨਾ) ਚ ‘‘ਅਭਿਧਮ੍ਮੋ ਚ ਸੋ ਪਿਟਕਞ੍ਚਾ’’ਤਿ ਚ (ਪਾਰਾ. ਅਟ੍ਠ. ੧.ਪਠਮਮਹਾਸਙ੍ਗੀਤਿਕਥਾ; ਧ. ਸ. ਅਟ੍ਠ. ਨਿਦਾਨਕਥਾ) ਆਦਿ. ਕਿਲਮਥੋਤਿ ਕਾਯਕਿਲਮਨਹੇਤੁ. ਕਿਲਮਤਿ ਅਨੇਨਾਤਿ ਕਿਲਮਥੋ. ਅਸ੍ਸਾਤਿ ਭਵੇਯ੍ਯ. ਸਾਤਿ ਕਾਯਵਚੀਪਯੋਗਸਙ੍ਖਾਤਾ ਦੇਸਨਾ. ਵਿਹੇਸਾਤਿ ਕਾਯਵਿਹਿਂਸਾਹੇਤੁ. ਵਿਹਿਂਸਤਿ ਇਮਾਯਾਤਿ ਵਿਹੇਸਾ. ਚਿਤ੍ਤੇਨ ਪਨ ਬੁਦ੍ਧਾਨਂ ਕਿਲਮਥੋ ਵਾ ਵਿਹੇਸਾ ਵਾ ਨਤ੍ਥਿ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਨਤ੍ਤਾ. ‘‘ਪਟਿਭਂਸੂ’’ਤਿ ਏਤ੍ਥ ਪਟੀਤਿ ਕਮ੍ਮਪ੍ਪਵਚਨੀਯਯੋਗਤ੍ਤਾ ‘‘ਭਗਵਨ੍ਤ’’ਨ੍ਤਿ ਏਤ੍ਥ ਸਾਮ੍ਯਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਭਗਵਤੋ’’ਤਿ. ‘‘ਅਨੁ ਅਚ੍ਛਰਿਯਾ’’ਤਿ ਇਮਿਨਾ ‘‘ਨ ਅਚ੍ਛਰਿਯਾ’’ਤਿ ਪਦਵਿਭਾਗਂ ਨਿਵਤ੍ਤੇਤਿ, ਪੁਨਪ੍ਪੁਨਂ ਅਚ੍ਛਰਿਯਾਤਿ ਅਤ੍ਥੋ. ਪਟਿਭਂਸੂਤਿ ਏਤ੍ਥ ਪਟਿਸਦ੍ਦੋ ਪਟਿਭਾਨਤ੍ਥੋ, ਭਾਧਾਤੁ ਖਾਯਨਤ੍ਥੋਤਿ ਆਹ ‘‘ਪਟਿਭਾਨਸਙ੍ਖਾਤਸ੍ਸ ਞਾਣਸ੍ਸ ਗੋਚਰਾ ਅਹੇਸੁ’’ਨ੍ਤਿ. ‘‘ਗੋਚਰਾ ਅਹੇਸੁ’’ਨ੍ਤਿ ਇਮਿਨਾ ਖਾਯਨਂ ਨਾਮ ਅਤ੍ਥਤੋ ਗੋਚਰਭਾਵੇਨ ਭਵਨਨ੍ਤਿ ਦਸ੍ਸੇਤਿ.

ਮੇਤਿ ਮਮ, ਮਯਾ ਵਾ, ਅਧਿਗਤਂ ਧਮ੍ਮਂ ਪਕਾਸਿਤੁਨ੍ਤਿ ਸਮ੍ਬਨ੍ਧੋ. ਅਰਿਯਮਗ੍ਗਸੋਤਸ੍ਸ ਪਟਿ ਪਟਿਸੋਤਨ੍ਤਿ ਵੁਤ੍ਤੇ ਨਿਬ੍ਬਾਨਮੇਵਾਤਿ ਆਹ ‘‘ਪਟਿਸੋਤਂ ਵੁਚ੍ਚਤਿ ਨਿਬ੍ਬਾਨ’’ਨ੍ਤਿ. ਨਿਬ੍ਬਾਨਗਾਮਿਨ੍ਤਿ ਅਰਿਯਮਗ੍ਗਂ. ਅਰਿਯਮਗ੍ਗੋ ਹਿ ਯਸ੍ਮਾ ਨਿਬ੍ਬਾਨਂ ਗਮਯਤਿ, ਤਸ੍ਮਾ ਨਿਬ੍ਬਾਨਗਾਮੀਤਿ ਵੁਚ੍ਚਤਿ. ਤਮੋਖਨ੍ਧੇਨਾਤਿ ਏਤ੍ਥ ਤਮਸਦ੍ਦੋ ਅਵਿਜ੍ਜਾਪਰਿਯਾਯੋ, ਖਨ੍ਧਸਦ੍ਦੋ ਰਾਸਤ੍ਥੋਤਿ ਆਹ ‘‘ਅਵਿਜ੍ਜਾਰਾਸਿਨਾ’’ਤਿ. ‘‘ਅਜ੍ਝੋਤ੍ਥਟਾ’’ਤਿ ਇਮਿਨਾ ਆਵੁਟਾਤਿ ਏਤ੍ਥ ਵੁਧਾਤੁ ਆਵਰਣਤ੍ਥੋਤਿ ਦਸ੍ਸੇਤਿ. ਅਪ੍ਪੋਸ੍ਸੁਕ੍ਕਤਾਯਾਤਿ ਏਤ੍ਥ ਅਪਤ੍ਯੂਪਸਗ੍ਗੋ ਅਭਾਵਤ੍ਥੋ, ਤਾਪਚ੍ਚਯੋ ਭਾਵਤ੍ਥੋਤਿ ਆਹ ‘‘ਨਿਰੁਸ੍ਸੁਕ੍ਕਭਾਵੇਨਾ’’ਤਿ.

੮. ਲੋਕੇਤਿ ਸਤ੍ਤਲੋਕੇ. ਮਹਾਬ੍ਰਹ੍ਮੇਤਿ ਮਹਾਬ੍ਰਹ੍ਮਾਨੋ. ਅਪ੍ਪਰਜਕ੍ਖਜਾਤਿਕਾਤਿ ਏਤ੍ਥ ਅਪ੍ਪਂ ਰਜਂ ਅਕ੍ਖਿਮ੍ਹਿ ਏਤੇਸਨ੍ਤਿ ਅਪ੍ਪਰਜਕ੍ਖਾ, ਅਪ੍ਪਰਜਕ੍ਖਾ ਜਾਤਿ ਸਭਾਵੋ ਏਤੇਸਨ੍ਤਿ ਅਪ੍ਪਰਜਕ੍ਖਜਾਤਿਕਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਞ੍ਞਾਮਯੇ’’ਤਿਆਦਿ. ‘‘ਪਞ੍ਞਾਮਯੇ’’ਤਿ ਇਮਿਨਾ ਮਂਸਮਯੇਤਿ ਅਤ੍ਥਂ ਨਿਵਤ੍ਤੇਤਿ. ਏਤੇਸਨ੍ਤਿ ਸਤ੍ਤਾਨਂ. ਧਮ੍ਮਸ੍ਸਾਤਿ ਤੁਪਚ੍ਚਯਯੋਗੇ ਛਟ੍ਠੀਕਮ੍ਮਂ. ਆਪੁਬ੍ਬੋ ਞਾਧਾਤੁ ਪਟਿਵਿਜ੍ਝਨਤ੍ਥੋਤਿ ਆਹ ‘‘ਪਟਿਵਿਜ੍ਝਿਤਾਰੋ’’ਤਿ.

ਸਂਵਿਜ੍ਜਤਿ ਮਲਂ ਏਤੇਸਨ੍ਤਿ ਸਮਲਾ, ਪੂਰਣਕਸ੍ਸਪਾਦਿਕਾ ਛ ਸਤ੍ਥਾਰੋ, ਤੇਹਿ. ‘‘ਰਾਗਾਦੀਹੀ’’ਤਿ ਇਮਿਨਾ ਮਲਸਰੂਪਂ ਦਸ੍ਸੇਤਿ. ਅਵਾਪੁਰੇਤਨ੍ਤਿ ਏਤ੍ਥ ਅਵਪੁਬ੍ਬੋ ਚ ਆਪੁਬ੍ਬੋ ਚ ਪੁਰਧਾਤੁ ਵਿਵਰਣਤ੍ਥੋਤਿ ਆਹ ‘‘ਵਿਵਰ ਏਤ’’ਨ੍ਤਿ. ਵਕਾਰਸ੍ਸ ਪਕਾਰਂ ਕਤ੍ਵਾ ‘‘ਅਪਾਪੁਰੇਤ’’ਨ੍ਤਿਪਿ ਪਾਠੋ. ਅਮਤਸਦ੍ਦਸ੍ਸ ਸਲਿਲਾਦਯੋ ਨਿਵਤ੍ਤੇਤੁਂ ਵੁਤ੍ਤਂ ‘‘ਨਿਬ੍ਬਾਨਸ੍ਸਾ’’ਤਿ. ਇਮੇ ਸਤ੍ਤਾ ਸੁਣਨ੍ਤੂਤਿ ਸਮ੍ਬਨ੍ਧੋ. ਵਿਮਲੇਨਾਤਿ ਏਤ੍ਥ ਵਿਸਦ੍ਦੋ ਅਭਾਵਤ੍ਥੋਤਿ ਆਹ ‘‘ਅਭਾਵਤੋ’’ਤਿ. ਇਮਿਨਾ ਨਤ੍ਥਿ ਮਲਂ ਏਤਸ੍ਸਾਤਿ ਵਿਮਲੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਸਮ੍ਮਾਸਮ੍ਬੁਦ੍ਧੇਨਾ’’ਤਿ ਇਮਿਨਾ ਅਞ੍ਞਪਦਤ੍ਥਸਰੂਪਂ ਦਸ੍ਸੇਤਿ. ਅਨੁਕ੍ਕਮੇਨ ਮਗ੍ਗੇਨ ਬੁਜ੍ਝਿਤਬ੍ਬਨ੍ਤਿ ਅਨੁਬੁਦ੍ਧਨ੍ਤਿ ਵੁਤ੍ਤੇ ਚਤੁਸਚ੍ਚਧਮ੍ਮੋ ਗਹੇਤਬ੍ਬੋਤਿ ਆਹ ‘‘ਚਤੁਸਚ੍ਚਧਮ੍ਮ’’ਨ੍ਤਿ.

‘‘ਸੇਲਮਯੇ’’ਤਿ ਇਮਿਨਾ ਸਿਲਾਯ ਨਿਬ੍ਬਤ੍ਤੋ ਸੇਲੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਸਬ੍ਬਞ੍ਞੁਤਞ੍ਞਾਣੇਨਾ’’ਤਿ ਇਮਿਨਾ ਸਮਨ੍ਤਚਕ੍ਖੁਸਰੂਪਂ ਦਸ੍ਸੇਤਿ. ਭਗਵਾ ਤ੍ਵਮ੍ਪੀਤਿ ਯੋਜਨਾ. ਧਮ੍ਮਸਦ੍ਦੋ ਪਞ੍ਞਾਪਰਿਯਾਯੋਤਿ ਆਹ ‘‘ਧਮ੍ਮਮਯਂ ਪਞ੍ਞਾਮਯ’’ਨ੍ਤਿ. ਅਪੇਤੋ ਸੋਕੋ ਇਮਸ੍ਸਾਤਿ ਅਪੇਤਸੋਕੋ, ਭਗਵਾ. ਸੋਕਂ ਅਵਤਰਤੀਤਿ ਸੋਕਾਵਤਿਣ੍ਣਾ, ਜਨਤਾ. ਸੋਕਾਵਤਿਣ੍ਣਞ੍ਚ ਜਾਤਿਜਰਾਭਿਭੂਤਞ੍ਚਾਤਿ ਚਸਦ੍ਦੋ ਯੋਜੇਤਬ੍ਬੋ. ਇਮਿਨਾ ਚਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਦਸ੍ਸੇਤਿ.

‘‘ਭਗਵਾ’’ਤਿਪਦਂ ‘‘ਵੀਰੋ’’ਤਿਆਦੀਸੁ ਯੋਜੇਤਬ੍ਬਂ. ‘‘ਵੀਰਿਯਵਨ੍ਤਤਾਯਾ’’ਤਿ ਇਮਿਨਾ ਵੀਰਂ ਯਸ੍ਸਤ੍ਥੀਤਿ ਵੀਰੋਤਿ ਵਚਨਤ੍ਥਂ ਦਸ੍ਸੇਤਿ. ਸਦ੍ਦਸਤ੍ਥੇਸੁ ਆਲਪਨਪਦੇਸੁ ਵਿਗ੍ਗਹੋ ਨ ਕਾਤਬ੍ਬੋਤਿ ਇਦਂ ਆਲਪਨਾਵਤ੍ਥਂ ਸਨ੍ਧਾਯ ਵੁਤ੍ਤਂ, ਇਧ ਪਨ ਤੇਸਮਤ੍ਥਦਸ੍ਸਨਤ੍ਥਾਯ ਵਿਗ੍ਗਹੋ ਵੁਤ੍ਤੋਤਿ ਦਟ੍ਠਬ੍ਬਂ. ‘‘ਦੇਵਪੁਤ੍ਤ…ਪੇ… ਵਿਜਿਤਤ੍ਤਾ’’ਤਿ ਇਮਿਨਾ ਵਿਜਿਤੋ ਮਾਰੇਹਿ ਸਂਗਾਮੋ ਅਨੇਨਾਤਿ ਵਿਜਿਤਸਙ੍ਗਾਮੋਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਚ ਖਨ੍ਧਮਾਰੋ ਮਚ੍ਚੁਮਾਰੇਨ ਸਙ੍ਗਹਿਤੋ ਦ੍ਵਿਨ੍ਨਂ ਮਾਰਾਨਂ ਏਕਤੋ ਵਿਜਿਤਤ੍ਤਾ. ‘‘ਸਤ੍ਤਵਾਹੋ’’ਤਿ ਪਠਮਕ੍ਖਰੇਨ ਚ ‘‘ਸਤ੍ਥਵਾਹੋ’’ਤਿ ਦੁਤਿਯਕ੍ਖਰੇਨ ਚ ਯੁਤ੍ਤੋ. ਤਤ੍ਥ ਸਤ੍ਥਵਾਹੋ ਵਿਯਾਤਿ ‘‘ਸਤ੍ਥਵਾਹੋ’’ਤਿ ਉਪਚਾਰੇਨ ਵੁਤ੍ਤੇ ਦੁਤਿਯਕ੍ਖਰੇਨ ਯੁਤ੍ਤੋ, ਸਤ੍ਤੇ ਵਹਹੀਤਿ ਸਤ੍ਤਵਾਹੋਤਿ ਮੁਖ੍ਯਤੋ ਵੁਤ੍ਤੇ ਪਠਮਕ੍ਖਰੇਨ ਯੁਤ੍ਤੋ. ਇਧ ਪਨ ਪਠਮਕ੍ਖਰੇਨ ਯੁਤ੍ਤੋਤਿ ਆਹ ‘‘ਸਤ੍ਤੇ ਵਹਤੀਤਿ ਸਤ੍ਤਵਾਹੋ’’ਤਿ. ਨਤ੍ਥਿ ਇਣਂ ਇਮਸ੍ਸਾਤਿ ਅਣਣੋ ਭਗਵਾ.

੯. ਬੁਦ੍ਧਚਕ੍ਖੁਨਾਤਿ ਏਤ੍ਥ ਚਕ੍ਖੁ ਦੁਵਿਧਂ ਮਂਸਚਕ੍ਖੁਞਾਣਚਕ੍ਖੁਵਸੇਨ. ਤਤ੍ਥਾਪਿ ਮਂਸਚਕ੍ਖੁ ਦੁਵਿਧਂ ਪਸਾਦਚਕ੍ਖੁਸਸਮ੍ਭਾਰਚਕ੍ਖੁਵਸੇਨ. ਤਤ੍ਥ ਪਸਾਦਰੂਪਂ ਪਸਾਦਚਕ੍ਖੁ ਨਾਮ, ਭਮੁਕਟ੍ਠਿਪਰਿਚ੍ਛਿਨ੍ਨੋ ਮਂਸਪਿਣ੍ਡੋ ਸਸਮ੍ਭਾਰਚਕ੍ਖੁ ਨਾਮ. ਞਾਣਚਕ੍ਖੁ ਪਨ ਪਞ੍ਚਵਿਧਂ (ਪਟਿ. ਮ. ਅਟ੍ਠ. ੧.੧.੩) ਦਿਬ੍ਬਧਮ੍ਮਪਞ੍ਞਾਬੁਦ੍ਧਸਮਨ੍ਤਚਕ੍ਖੁਵਸੇਨ. ਤਤ੍ਥ ਦਿਬ੍ਬਚਕ੍ਖੁਅਭਿਞ੍ਞਾਞਾਣਂ ਦਿਬ੍ਬਚਕ੍ਖੁ ਨਾਮ, ਹੇਟ੍ਠਿਮਮਗ੍ਗਤ੍ਤਯਂ ਧਮ੍ਮਚਕ੍ਖੁ ਨਾਮ, ਅਰਹਤ੍ਤਮਗ੍ਗਞਾਣਂ ਪਞ੍ਞਾਚਕ੍ਖੁ ਨਾਮ, ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਞ੍ਚ ਆਸਯਾਨੁਸਯਞਾਣਞ੍ਚ ਬੁਦ੍ਧਚਕ੍ਖੁ ਨਾਮ, ਸਬ੍ਬਞ੍ਞੁਤਞ੍ਞਾਣਂ ਸਮਨ੍ਤਚਕ੍ਖੁ ਨਾਮ. ਇਧ ਪਨ ‘‘ਬੁਦ੍ਧਚਕ੍ਖੁਨਾ’’ਤਿ ਵੁਤ੍ਤਤ੍ਤਾ ਯਥਾਵੁਤ੍ਤਦ੍ਵੇਞਾਣਾਨਿਯੇਵਾਤਿ ਆਹ ‘‘ਇਨ੍ਦ੍ਰਿਯ…ਪੇ… ਞਾਣੇਨ ਚਾ’’ਤਿ. ਹੀਤਿ ਸਚ੍ਚਂ. ਯੇਸਨ੍ਤਿ ਸਤ੍ਤਾਨਂ. ਸਦ੍ਧਾਦੀਨੀਤਿ ਆਦਿਸਦ੍ਦੇਨ ਵੀਰਿਯਸਤਿਸਮਾਧਿਪਞ੍ਞਿਨ੍ਦ੍ਰਿਯਾਨਿ ਸਙ੍ਗਣ੍ਹਾਤਿ. ਤਿਕ੍ਖਾਨੀਤਿ ਤਿਖਿਣਾਨਿ. ਮੁਦੂਨੀਤਿ ਸੁਖੁਮਤਰਾਨਿ. ਆਕਾਰਾਤਿ ਕਾਰਣਾ. ਇਮਾਨਿ ਤੀਣਿ ਦੁਕਾਨਿ ਬਾਹਿਰਤ੍ਥਸਮਾਸਵਸੇਨ ਵੁਤ੍ਤਾਨਿ. ਸੁਖੇਨ ਵਿਞ੍ਞਾਪੇਤਬ੍ਬਾਤਿ ਸੁਵਿਞ੍ਞਾਪਯਾ, ਤਥਾ ਦੁਵਿਞ੍ਞਾਪਯਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੇ ਕਥਿਤਕਾਰਣ’’ਨ੍ਤਿਆਦਿ. ਪਰਲੋਕੋ ਚ ਵਜ੍ਜਞ੍ਚ ਪਰਲੋਕਵਜ੍ਜਾਨਿ, ਤਾਨਿ ਭਯਤੋ ਪਸ੍ਸਨ੍ਤੀਤਿ ਪਰਲੋਕਵਜ੍ਜਭਯਦਸ੍ਸਾਵਿਨੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੇ’’ਤਿਆਦਿ. ਇਮਾਨਿ ਦ੍ਵੇ ਦੁਕਾਨਿ ਕਿਤਵਸੇਨ ਵੁਤ੍ਤਾਨਿ, ਇਧ ਪਚ੍ਛਿਮਦੁਕੇ ‘‘ਨ ਅਪ੍ਪੇਕਚ੍ਚੇ ਪਰਲੋਕਵਜ੍ਜਭਯਦਸ੍ਸਾਵਿਨੋ’’ਤਿ ਦੁਤਿਯਪਦਂ ਨ ਵੁਤ੍ਤਂ, ਪਟਿਸਮ੍ਭਿਦਾਮਗ੍ਗਪਾਲ਼ਿਯਂ (ਪਟਿ. ਮ. ੧.੧੧੧) ਪਨ ਯੁਗਲ਼ਵਸੇਨ ਵੁਤ੍ਤਂ. ਉਪ੍ਪਲਾਨਿ ਏਤ੍ਥ ਸਨ੍ਤੀਤਿ ਉਪ੍ਪਲਿਨੀਤਿ ਵਚਨਤ੍ਥੇਨ ਗਚ੍ਛੋ ਵਾ ਲਤਾ ਵਾ ਪੋਕ੍ਖਰਣੀ ਵਾ ਵਨਂ ਵਾ ‘‘ਉਪ੍ਪਲਿਨੀ’’ਤਿ ਵੁਚ੍ਚਤਿ, ਇਧ ਪਨ ‘‘ਵਨ’’ਨ੍ਤਿ ਆਹ ‘‘ਉਪ੍ਪਲਵਨੇ’’ਤਿ. ਨਿਮੁਗ੍ਗਾਨੇਵ ਹੁਤ੍ਵਾਤਿ ਸਮ੍ਬਨ੍ਧੋ. ਪੋਸਯਨ੍ਤੀਤਿ ਵਡ੍ਢਨ੍ਤਿ, ਇਮਿਨਾ ਅਨ੍ਤੋਨਿਮੁਗ੍ਗਾਨੇਵ ਹੁਤ੍ਵਾ ਪੋਸਯਨ੍ਤੀਤਿ ਅਨ੍ਤੋਨਿਮੁਗ੍ਗਪੋਸੀਨੀਤਿ ਵਚਨਤ੍ਥਂ ਦਸ੍ਸੇਤਿ. ‘‘ਉਦਕੇਨ ਸਮ’’ਨ੍ਤਿ ਇਮਿਨਾ ਉਦਕੇਨ ਸਮਂ ਸਮੋਦਕਂ, ਸਮੋਦਕਂ ਹੁਤ੍ਵਾ ਠਿਤਾਨੀਤਿ ਅਤ੍ਥਂ ਦਸ੍ਸੇਤਿ. ‘‘ਅਤਿਕ੍ਕਮਿਤ੍ਵਾ’’ਤਿ ਇਮਿਨਾ ਅਚ੍ਚੁਗ੍ਗਮ੍ਮਾਤਿਪਦਸ੍ਸ ਅਤਿਉਗ੍ਗਨ੍ਤ੍ਵਾਤਿ ਅਤ੍ਥਂ ਦਸ੍ਸੇਤਿ.

ਪਟਿਚ੍ਛਨ੍ਨੇਨ ਆਰੋਪਿਤਾਤਿ ਪਾਰੁਤਾ, ਨ ਪਾਰੁਤਾ ਅਪਾਰੁਤਾ. ਅਪਾਰੁਤਾ ਨਾਮ ਅਤ੍ਥਤੋ ਵਿਵਰਣਾਤਿ ਆਹ ‘‘ਵਿਵਟਾ’’ਤਿ ਸੋਤਿ ਅਰਿਯਮਗ੍ਗੋ. ਹੀਤਿ ਸਚ੍ਚਂ. ਪਚ੍ਛਿਮਪਦਦ੍ਵਯੇਤਿ ਗਾਥਾਯ ਉਤ੍ਤਮਪਦਦ੍ਵਯੇ. ਅਯਮੇਵਤ੍ਥੋਤਿ ਅਯਂ ਵਕ੍ਖਮਾਨੋ ਏਵਂ ਅਤ੍ਥੋ ਦਟ੍ਠਬ੍ਬੋਤਿ ਯੋਜਨਾ. ਹੀਤਿ ਵਿਤ੍ਥਾਰੋ. ਨ ਭਾਸਿਨ੍ਤਿ ਏਤ੍ਥ ਉਤ੍ਤਮਪੁਰਿਸਤ੍ਤਾ ‘‘ਅਹ’’ਨ੍ਤਿ ਵੁਤ੍ਤਂ. ‘‘ਦੇਵਮਨੁਜੇਸੁ’’ਤਿ ਵਤ੍ਤਬ੍ਬੇ ਏਕਸੇਸਵਸੇਨ ‘‘ਮਨੁਜੇਸੂ’’ਤਿ ਵੁਤ੍ਤਨ੍ਤਿ ਆਹ ‘‘ਦੇਵਮਨੁਸ੍ਸੇਸੂ’’ਤਿ.

੬. ਪਞ੍ਚਵਗ੍ਗਿਯਕਥਾ

੧੦. ਠਾਨੁਪ੍ਪਤ੍ਤਿਯਾਤਿ ਕਾਰਣੇਨ ਉਪ੍ਪਤ੍ਤਿਯਾ. ਨਿਕ੍ਕਿਲੇਸੋ ਜਾਤਿ ਸਭਾਵੋ ਇਮਸ੍ਸਾਤਿ ਨਿਕ੍ਕਿਲੇਸਜਾਤਿਕੋ. ‘‘ਞਾਣ’’ਨ੍ਤਿ ਅਵਿਸੇਸੇਨ ਵੁਤ੍ਤੇਪਿ ਅਤ੍ਥਤੋ ਅਨਾਵਰਣਞਾਣਮੇਵਾਤਿ ਆਹ ‘‘ਸਬ੍ਬਞ੍ਞੁਤਞ੍ਞਾਣ’’ਨ੍ਤਿ. ਇਤੋਤਿ ‘‘ਧਮ੍ਮਂ ਦੇਸੇਸ੍ਸਾਮੀ’’ਤਿ ਪਰਿਵਿਤਕ੍ਕਦਿਵਸਤੋ, ਹੇਟ੍ਠਾਤਿ ਸਮ੍ਬਨ੍ਧੋ. ਦੇਵਤਾ ਪਨ ਆਲ਼ਾਰਸ੍ਸ ਕਾਲਙ੍ਕਰਣਮੇਵ ਜਾਨਾਤਿ, ਨ ਆਕਿਞ੍ਚਞ੍ਞਾਯਤਨੇ ਨਿਬ੍ਬਤ੍ਤਭਾਵਂ. ਭਗਵਾ ਪਨ ਸਬ੍ਬਂ ਜਾਨਾਤਿ, ਤੇਨ ਵੁਤ੍ਤਂ ‘‘ਆਕਿਞ੍ਚਞ੍ਞਾਯਤਨੇ ਨਿਬ੍ਬਤ੍ਤੋ’’ਤਿ. ‘‘ਪਰਿਹੀਨਤ੍ਤਾ’’ਤਿ ਇਮਿਨਾ ਮਹਾਜਾਨਿਯੋਤਿ ਏਤ੍ਥ ਹਾਧਾਤੁਯਾ ਅਤ੍ਥਂ ਦਸ੍ਸੇਤਿ. ਅਸ੍ਸਾਤਿ ਆਲ਼ਾਰਸ੍ਸ. ਮਹਤੀ ਜਾਨਿਅਸ੍ਸਾਤਿ ‘‘ਮਹਾਜਾਨਿਕੋ’’ਤਿ ਵਤ੍ਤਬ੍ਬੇ ਕਕਾਰਸ੍ਸ ਯਕਾਰਂ ਕਤ੍ਵਾ ‘‘ਮਹਾਜਾਨਿਯੋ’’ਤਿ ਵੁਤ੍ਤਂ. ਅਕ੍ਖਣੇਤਿ ਬ੍ਰਹ੍ਮਚਰਿਯਵਾਸਾਯ ਅਨੋਕਾਸੇ, ਆਕਿਞ੍ਚਞ੍ਞਾਯਤਨੇਤਿ ਅਤ੍ਥੋ. ਹਿਯ੍ਯੋਤਿ ਅਨਨ੍ਤਰਾਤੀਤਾਹੇ. ਸੋਪੀਤਿ ਉਦਕੋ ਰਾਮਪੁਤ੍ਤੋਪਿ. ਪਿਸਦ੍ਦੋ ਆਲ਼ਾਰਾਪੇਕ੍ਖੋ. ਤਤ੍ਥ ਆਲ਼ਾਰੋ ਕਾਲਾਮੋ ਯਾਵਆਕਿਞ੍ਚਞ੍ਞਾਯਤਨਝਾਨਲਾਭੀ ਹੋਤਿ, ਤਸ੍ਮਾ ਆਕਿਞ੍ਚਞ੍ਞਾਯਤਨੇ ਨਿਬ੍ਬਤ੍ਤੋ. ਉਦਕੋ ਰਾਮਪੁਤ੍ਤੋ ਯਾਵਨੇਵਸਞ੍ਞਾਨਾਸਞ੍ਞਾਯਤਨਝਾਨਲਾਭੀ ਹੋਤਿ, ਤਸ੍ਮਾ ਨੇਵਸਞ੍ਞਾਨਾਸਞ੍ਞਾਯਤਨੇ ਨਿਬ੍ਬਤ੍ਤੋਤਿ ਦਟ੍ਠਬ੍ਬਂ. ‘‘ਬਹੁਕਾਰਾ’’ਤਿ ਚ ‘‘ਬਹੂਪਕਾਰਾ’’ਤਿ ਚ ਪਾਠਸ੍ਸ ਦ੍ਵਿਧਾ ਯੁਤ੍ਤਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਬਹੁਕਾਰਾਤਿ ਬਹੂਪਕਾਰਾ’’ਤਿ. ਪੇਸਿਤਤ੍ਤਭਾਵਂ ਮਨ੍ਤਿ ਯੋਜਨਾ. ਇਮਿਨਾ ਪਹਿਤਤ੍ਤਨ੍ਤਿ ਏਤ੍ਥ ਅਤ੍ਤਸਦ੍ਦੋ ਕਾਯਵਾਚਕੋਤਿ ਦਸ੍ਸੇਤਿ.

੧੧. ਅਨ੍ਤਰਾਸਦ੍ਦੇਨ ਯੁਤ੍ਤਤ੍ਤਾ ‘‘ਗਯਂ, ਬੋਧਿ’’ਨ੍ਤਿ ਏਤ੍ਥ ਸਾਮ੍ਯਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਗਯਾਯ ਚ ਬੋਧਿਮਣ੍ਡਸ੍ਸ ਚਾ’’ਤਿ.

ਗਾਥਾਯ ਚਤੂਸੁ ਸਬ੍ਬਸਦ੍ਦੇਸੁ ਦੁਤਿਯੋ ਸਬ੍ਬਸਦ੍ਦੋ ਅਨਵਸੇਸਤ੍ਥੋ, ਸੇਸਾ ਸਾਵਸੇਸਤ੍ਥਾਤਿ ਦਸ੍ਸੇਨ੍ਤੋ ਆਹ ‘‘ਸਬ੍ਬਂ ਤੇਭੂਮਕਧਮ੍ਮ’’ਨ੍ਤਿਆਦਿ. ਵਚਨਤ੍ਥੋ ਸੁਵਿਞ੍ਞੇਯ੍ਯੋਵ. ਅਰਹਤ੍ਤਫਲਸ੍ਸਾਪਿ ਤਣ੍ਹਾਕ੍ਖਯਤ੍ਤਾ ਵੁਤ੍ਤਂ ‘‘ਤਣ੍ਹਾਕ੍ਖਯੇ ਨਿਬ੍ਬਾਨੇ’’ਤਿ. ਸਯਂਸਦ੍ਦੋ ਅਤ੍ਤਪਰਿਯਾਯੋ, ਅਭਿਞ੍ਞਾਯਸਦ੍ਦੋ ਤੁ ਤ੍ਵਾਪਚ੍ਚਯਨ੍ਤੋਤਿ ਆਹ ‘‘ਅਤ੍ਤਨਾਵ ਜਾਨਿਤ੍ਵਾ’’ਤਿ. ‘‘ਸਬ੍ਬਂ ਚਤੁਭੂਮਕਧਮ੍ਮ’’ਨ੍ਤਿ ਇਮਿਨਾ ਞਾਧਾਤੁਯਾ ਕਮ੍ਮਂ ਦਸ੍ਸੇਤਿ. ‘‘ਅਯਂ ਮੇ ਆਚਰਿਯੋ’’ਤਿ ਉਦ੍ਦਿਸਨਾਕਾਰਦਸ੍ਸਨਂ.

‘‘ਲੋਕੁਤ੍ਤਰਧਮ੍ਮੇ’’ਤਿ ਇਮਿਨਾ ਲੋਕਿਯਧਮ੍ਮੇ ਪਨ ਆਚਰਿਯੋ (ਮਿ. ਪ. ੪.੫.੧੧) ਅਤ੍ਥੀਤਿ ਦਸ੍ਸੇਤਿ. ਪਟਿਪੁਗ੍ਗਲੋਤਿ ਏਤ੍ਥ ਪਟਿਸਦ੍ਦੋ ਪਟਿਭਾਗਤ੍ਥੋਤਿ ਆਹ ‘‘ਪਟਿਭਾਗਪੁਗ੍ਗਲੋ’’ਤਿ. ਸਦਿਸਪੁਗ੍ਗਲੋ ਨਾਮ ਨਤ੍ਥੀਤਿ ਅਤ੍ਥੋ. ਸੀਤਿਭੂਤੋਤਿ ਸੀਤਿ ਹੁਤ੍ਵਾ ਭੂਤੋ, ਸੀਤਿਭਾਵਂ ਵਾ ਪਤ੍ਤੋ.

ਕਾਸੀਨਨ੍ਤਿ ਬਹੁਵਚਨਵਸੇਨ ਵੁਤ੍ਤਤ੍ਤਾ ਜਨਪਦਾਨਂ ਨਾਮਂ. ਜਨਪਦਸਮੂਹਸ੍ਸ ਰਟ੍ਠਨਾਮਤ੍ਤਾ ਵੁਤ੍ਤਂ ‘‘ਕਾਸਿਰਟ੍ਠੇ’’ਤਿ. ‘‘ਨਗਰ’’ਨ੍ਤਿ ਇਮਿਨਾ ਪੁਰਸਦ੍ਦੋ ਨਗਰਪਰਿਯਾਯੋਤਿ ਦਸ੍ਸੇਤਿ. ਪਟਿਲਾਭਾਯਾਤਿ ਪਟਿਲਾਭਾਪਨਤ੍ਥਾਯ. ‘‘ਭੇਰਿ’’ਨ੍ਤਿ ਇਮਿਨਾ ਦੁਨ੍ਦੁਭਿਸਦ੍ਦੋ ਭੇਰਿਵਾਚਕੋਤਿ ਦਸ੍ਸੇਤਿ. ਭੇਰਿ ਹਿ ‘‘ਦੁਂਦੁ’’ਨ੍ਤਿਸਦ੍ਦੇਨ ਉਭਿ ਪੂਰਣਮੇਤ੍ਥਾਤਿ ਦੁਨ੍ਦੁਭੀਤਿ ਵੁਚ੍ਚਤਿ. ਦਕਾਰਰਕਾਰਾਨਂ ਸਂਯੋਗਂ ਕਤ੍ਵਾ ਦੁਨ੍ਦ੍ਰੁਭੀਤਿਪਿ ਪਾਠੋ ਅਤ੍ਥਿ, ਸੋ ਅਪਾਠੋਯੇਵ. ‘‘ਪਹਰਿਸ੍ਸਾਮੀ’’ਤਿ ਏਤ੍ਥ ਪਹਾਰਸਦ੍ਦੇਨ ਆਹਞ੍ਞਿਨ੍ਤਿ ਏਤ੍ਥ ਆਪੁਬ੍ਬਹਨਧਾਤੁਯਾ ਅਤ੍ਥਂ ਦਸ੍ਸੇਤਿ, ਸ੍ਸਾਮਿਸਦ੍ਦੇਨ ਅਜ੍ਜਤਨਿਇਂਵਿਭਤ੍ਤਿਯਾ ਅਨਾਗਤਕਾਲੇ ਪਵਤ੍ਤਭਾਵਂ, ਇਤਿਸਦ੍ਦੇਨ ਗਮਨਾਕਾਰਵਾਚਕਸ੍ਸ ਇਤਿਸਦ੍ਦਸ੍ਸ ਲੋਪਭਾਵਂ ਦਸ੍ਸੇਤਿ.

ਅਨਨ੍ਤਜਿਨੋਤਿ ਅਨਨ੍ਤਸਙ੍ਖਾਤਸ੍ਸ ਸਬ੍ਬਞ੍ਞੁਤਞ੍ਞਾਣਸ੍ਸ ਪਦਟ੍ਠਾਨਭੂਤੇਨ ਅਰਹਤ੍ਤਮਗ੍ਗਞਾਣੇਨ ਸਬ੍ਬਕਿਲੇਸਾਰੀਨਂ ਜਿਤਵਾ, ਏਤੇਨ ਫਲੂਪਚਾਰੇਨ ਅਨਨ੍ਤਜਿਨਭਾਵਂ ਦਸ੍ਸੇਤਿ. ਹੁਵੇਯ੍ਯ ਪਾਵੁਸੋਤਿ ਏਤ੍ਥ ‘‘ਹੁਵੇਯ੍ਯ ਅਪਿ ਆਵੁਸੋ’’ਤਿ ਪਦਵਿਭਾਗਂ ਕਤ੍ਵਾ ਹੁਧਾਤੁ ਸਤ੍ਤਤ੍ਥਵਾਚਕੋ, ਅਪਿਸਦ੍ਦੋ ਏਵਂਨਾਮਵਾਚਕੋਤਿ ਦਸ੍ਸੇਨ੍ਤੋ ਆਹ ਆਵੁਸੋ ‘‘ਏਵਂ ਨਾਮ ਭਵੇਯ੍ਯਾ’’ਤਿ. ਵਕਾਰਸ੍ਸ ਪਕਾਰਂ ਕਤ੍ਵਾ ‘‘ਹੁਪੇਯ੍ਯਾ’’ਤਿ ਪਾਠੋਪਿ ਯੁਜ੍ਜਤਿਯੇਵ.

੧੨. ‘‘ਅਤ੍ਥਾਯ ਪਟਿਪਨ੍ਨੋ’’ਤਿ ਇਮਿਨਾ ਬਾਹੁਲ੍ਲਸ੍ਸ ਅਤ੍ਥਾਯ ਪਟਿਪਨ੍ਨੋ ਬਾਹੁਲ੍ਲਿਕੋਤਿ ਵਚਨਤ੍ਥਂ ਦਸ੍ਸੇਤਿ. ਪਧਾਨਤੋਤਿ ਦੁਕ੍ਕਰਚਰਿਯਾਯ ਪਦਹਨਤੋ. ‘‘ਭਟ੍ਠੋ’’ਤਿ ਇਮਿਨਾ ਵਿਬ੍ਭਨ੍ਤੋਤਿ ਏਤ੍ਥ ਵਿਪੁਬ੍ਬਭਮੁਧਾਤੁਯਾ ਅਨਵਟ੍ਠਾਨਤ੍ਥੋ ਨਾਮ ਅਤ੍ਥਤੋ ਭਟ੍ਠੋਤਿ ਦਸ੍ਸੇਤਿ. ਸੋਤਨ੍ਤਿ ਏਤ੍ਥ ਸੋਤਸਦ੍ਦਸ੍ਸ ਸੋਤਵਿਞ੍ਞਾਣਾਦਿਵਾਚਕਤ੍ਤਾ ‘‘ਸੋਤਿਨ੍ਦ੍ਰਿਯ’’ਨ੍ਤਿ ਵੁਤ੍ਤਂ. ਇਰਿਯਾਯਾਤਿ ਏਤ੍ਥ ਇਰਿਯਨਂ ਚਰਣਂ ਇਰਿਯਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਦੁਕ੍ਕਰਚਰਿਯਾਯਾ’’ਤਿ. ਅਭਿਜਾਨਾਥ ਨੋਤਿ ਏਤ੍ਥ ਨੋਸਦ੍ਦੋ ਨੁਸਦ੍ਦਤ੍ਥੋਤਿ ਆਹ ‘‘ਅਭਿਜਾਨਾਥ ਨੂ’’ਤਿ. ਵਾਕ੍ਯਨ੍ਤਿ ਵਾਚਕਂ. ਸਞ੍ਞਾਪੇਤੁਨ੍ਤਿਪਦਸ੍ਸ ਸਞ੍ਞਾਪਨਾਕਾਰਂ ਦਸ੍ਸੇਤੁਂ ਵੁਤ੍ਤਂ ‘‘ਅਹਂ ਬੁਦ੍ਧੋ’’ਤਿ.

੧੩. ਇਤੋਤਿ ‘‘ਚਕ੍ਖੁਕਰਣੀ’’ਤਿਆਦਿਤੋ. ਪਦਤ੍ਥਤੋਤਿ ਪਦਤੋ ਚ ਅਤ੍ਥਤੋ ਚ, ਪਦਾਨਂ ਅਤ੍ਥਤੋ ਵਾ. ਇਤੋਤਿ ਯਥਾਵੁਤ੍ਤਤੋ. ਹੀਤਿ ਸਚ੍ਚਂ. ਸੁਤ੍ਤਨ੍ਤਕਥਨ੍ਤਿ ਸੁਤ੍ਤਨ੍ਤਵਸੇਨ ਵੁਤ੍ਤਵਚਨਂ.

੧੮. ਦੇਵਤਾਕੋਟੀਹੀਤਿ ਬ੍ਰਹ੍ਮਸਙ੍ਖਾਤਾਹਿ ਦੇਵਤਾਕੋਟੀਹਿ. ਪਤਿਟ੍ਠਿਤਸ੍ਸ ਤਸ੍ਸ ਆਯਸ੍ਮਤੋਤਿ ਸਮ੍ਬਨ੍ਧੋ. ਸਾਵ ਏਹਿਭਿਕ੍ਖੁਉਪਸਮ੍ਪਦਾਤਿ ਯੋਜਨਾ.

੧੯. ਦੁਤਿਯਦਿਵਸੇ ਧਮ੍ਮਚਕ੍ਖੁਂ ਉਦਪਾਦੀਤਿ ਸਮ੍ਬਨ੍ਧੋ. ‘‘ਦੁਤਿਯਦਿਵਸੇ’’ਤਿਆਦਿ ਪਾਟਿਪਦਦਿਵਸਂ ਉਪਨਿਧਾਯ ਵੁਤ੍ਤਂ. ਪਕ੍ਖਸ੍ਸਾਤਿ ਆਸਲ਼੍ਹੀਮਾਸਕਾਲ਼ਪਕ੍ਖਸ੍ਸ. ਸਬ੍ਬੇਵ ਤੇ ਭਿਕ੍ਖੂਤਿ ਯੋਜਨਾ. ਅਨਤ੍ਤਸੁਤ੍ਤੇਨਾਤਿ ਅਨਤ੍ਤਲਕ੍ਖਣਸੁਤ੍ਤਨ੍ਤੇਨ (ਮਹਾਵ. ੨੦; ਸਂ. ਨਿ. ੩.੫੯).

ਪਞ੍ਚਮਿਯਾ ਪਕ੍ਖਸ੍ਸਾਤਿ ਪਕ੍ਖਸ੍ਸ ਪਞ੍ਚਮਿਯਾ. ਲੋਕਸ੍ਮਿਨ੍ਤਿ ਸਤ੍ਤਲੋਕੇ. ‘‘ਮਨੁਸ੍ਸਅਰਹਨ੍ਤੋਤਿ ਇਮਿਨਾ ਦੇਵਅਰਹਨ੍ਤੋ ਬਹੂਤਿ ਦਸ੍ਸੇਤਿ.

੭. ਪਬ੍ਬਜ੍ਜਾਕਥਾ

੩੧. ਪੋਰਾਣਾਨੁਪੋਰਾਣਾਨਨ੍ਤਿ ਪੁਰਾਣੇ ਚ ਅਨੁਪੁਰਾਣੇ ਚ ਭਵਾਨਂ. ਏਕਸਟ੍ਠੀਤਿ ਏਕੋ ਚ ਸਟ੍ਠਿ ਚ, ਏਕੇਨ ਵਾ ਅਧਿਕਾ ਸਟ੍ਠਿ ਏਕਸਟ੍ਠਿ.

ਤਤ੍ਰਾਤਿ ਤੇਸੁ ਏਕਸਟ੍ਠਿਮਨੁਸ੍ਸਅਰਹਨ੍ਤੇਸੁ. ਪੁਬ੍ਬਯੋਗੋਤਿ ਪੁਬ੍ਬੇ ਕਤੋ ਉਪਾਯੋ, ਪੁਬ੍ਬੂਪਨਿਸ੍ਸਯੋਤਿ ਅਤ੍ਥੋ. ਵਗ੍ਗਬਨ੍ਧੇਨਾਤਿ ਸਮੂਹਂ ਕਤ੍ਵਾ ਬਨ੍ਧੇਨ. ਤੇਤਿ ਪਞ੍ਚਪਞ੍ਞਾਸ ਜਨਾ. ਝਾਪੇਸ੍ਸਾਮਾਤਿ ਡਯ੍ਹਿਸ੍ਸਾਮ. ਨੀਹਰਿਂਸੂਤਿ ਗਾਮਤੋ ਨੀਹਰਿਂਸੁ. ਤੇਸੂਤਿ ਪਞ੍ਚਪਞ੍ਞਾਸਜਨੇਸੁ. ਪਞ੍ਚ ਜਨੇ ਠਪੇਤ੍ਵਾਤਿ ਸਮ੍ਬਨ੍ਧੋ. ਸੇਸਾਤਿ ਪਞ੍ਚਹਿ ਜਨੇਹਿ ਅਵਸੇਸਾ. ਸੋਤਿ ਯਸੋ ਦਾਰਕੋ. ਤੇਪੀਤਿ ਚਤ੍ਤਾਰੋਪਿ ਜਨਾ. ਤਤ੍ਥਾਤਿ ਸਰੀਰੇ. ਤੇ ਸਬ੍ਬੇਪੀਤਿ ਯਸਸ੍ਸ ਮਾਤਾਪਿਤੁਭਰਿਯਾਹਿ ਸਦ੍ਧਿਂ ਸਬ੍ਬੇਪਿ ਤੇ ਸਹਾਯਕਾ. ਤੇਨਾਤਿ ਪੁਬ੍ਬਯੋਗੇਨ.

ਆਮਨ੍ਤੇਸੀਤਿ ਕਥੇਸਿ.

੩੨. ਦਿਬ੍ਬੇਸੁ ਵਿਸਯੇਸੁ ਭਵਾ ਦਿਬ੍ਬਾ ਲੋਭਪਾਸਾਤਿ ਦਸ੍ਸੇਨ੍ਤੋ ਆਹ ‘‘ਦਿਬ੍ਬਾ ਨਾਮਾ’’ਤਿਆਦਿ. ਲੋਭਪਾਸਾਤਿ ਲੋਭਸਙ੍ਖਾਤਾ ਬਨ੍ਧਨਾ. ਅਸਵਨਤਾਤਿ ਏਤ੍ਥ ਕਰਣਤ੍ਥੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਅਸਵਨਤਾਯਾ’’ਤਿ. ਪਰਿਹਾਯਨ੍ਤੀਤਿ ਏਤ੍ਥ ਕੇਨ ਪਰਿਹਾਯਨ੍ਤੀਤਿ ਆਹ ‘‘ਵਿਸੇਸਾਧਿਗਮਤੋ’’ਤਿ. ਵਿਸੇਸਾਧਿਗਮਤੋਤਿ ਮਗ੍ਗਫਲਸਙ੍ਖਾਤਸ੍ਸ ਵਿਸੇਸਸ੍ਸ ਅਧਿਗਮਤੋ.

੩੩. ਅਨ੍ਤਂ ਲਾਮਕਂ ਕਰੋਤੀਤਿ ਅਨ੍ਤਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਲਾਮਕਾ’’ਤਿ. ‘‘ਹੀਨਸਤ੍ਤਾ’’ਤਿ ਇਮਿਨਾ ਅਨ੍ਤਕਸ੍ਸ ਸਰੂਪਂ ਦਸ੍ਸੇਤਿ. ਆਮਨ੍ਤਨਪਦਮੇਤਂ. ਤਨ੍ਤਿ ਰਾਗਪਾਸਂ. ਹੀਤਿ ਸਚ੍ਚਂ. ਸੋਤਿ ਮਾਰੋ ਪਾਪਿਮਾ. ਅਨ੍ਤਲਿਕ੍ਖੇ ਚਰਨ੍ਤਾਨਂ ਪਞ੍ਚਾਭਿਞ੍ਞਾਨਮ੍ਪਿ ਬਨ੍ਧਨਤ੍ਤਾ ਅਨ੍ਤਲਿਕ੍ਖੇ ਚਰਤਿ ਪਵਤ੍ਤਤੀਤਿ ਅਨ੍ਤਲਿਕ੍ਖਚਰੋਤਿ ਵਚਨਤ੍ਥੇਨ ਰਾਗਪਾਸੋ ‘‘ਅਨ੍ਤਲਿਕ੍ਖਚਰੋ’’ਤਿ ਮਾਰੇਨ ਪਾਪਿਮਤਾ ਵੁਤ੍ਤੋ.

੩੪. ਨਾਨਾਜਨਪਦਤੋਤਿ ਏਕਿਸ੍ਸਾਪਿ ਦਿਸਾਯ ਨਾਨਾਜਨਪਦਤੋ. ‘‘ਅਨੁਜਾਨਾਮਿ…ਪੇ… ਪਬ੍ਬਾਜੇਥਾ’’ਤਿਆਦਿਮ੍ਹਿ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਪਬ੍ਬਾਜੇਨ੍ਤੇਨ ਭਿਕ੍ਖੁਨਾ ਪਬ੍ਬਾਜੇਤਬ੍ਬੋਤਿ ਸਮ੍ਬਨ੍ਧੋ. ਯੇ ਪਟਿਕ੍ਖਿਤ੍ਤਾ ਪੁਗ੍ਗਲਾਤਿ ਯੋਜਨਾ. ਪਰਤੋਤਿ ਪਰਸ੍ਮਿਂ. ‘‘ਨ ਭਿਕ੍ਖਵੇ…ਪੇ… ਪਬ੍ਬਾਜੇਤਬ੍ਬੋ’’ਤਿ ਪਾਲ਼ਿਂ (ਮਹਾਵ. ੮੯) ਆਦਿਂ ਕਤ੍ਵਾਤਿ ਯੋਜਨਾ. ਤੇਤਿ ਪਟਿਕ੍ਖਿਤ੍ਤਪੁਗ੍ਗਲੇ. ਸੋਪਿ ਚਾਤਿ ਸੋਪਿ ਚ ਪੁਗ੍ਗਲੋ. ਅਨੁਞ੍ਞਾਤੋਯੇਵ ਪਬ੍ਬਾਜੇਤਬ੍ਬੋਤਿ ਸਮ੍ਬਨ੍ਧੋ. ਤਸ੍ਸ ਚਾਤਿ ਪੁਗ੍ਗਲਸ੍ਸ ਚ, ਅਥ ਵਾ ਤੇਸਞ੍ਚ ਮਾਤਾਪਿਤੂਨਂ. ਵਚਨਵਿਪਲ੍ਲਾਸੋ ਹੇਸ. ਅਨੁਜਾਨਨਲਕ੍ਖਣਂ ਵਣ੍ਣਯਿਸ੍ਸਾਮਾਤਿ ਸਮ੍ਬਨ੍ਧੋ.

ਏਵਨ੍ਤਿ ਇਮਿਨਾ ਵੁਤ੍ਤਨਯੇਨ. ਚਸਦ੍ਦੋ ਵਾਕ੍ਯਸਮ੍ਪਿਣ੍ਡਨਤ੍ਥੋ. ਸਚੇ ਅਚ੍ਛਿਨ੍ਨਕੇਸੋ ਹੋਤਿ ਚ, ਸਚੇ ਏਕਸੀਮਾਯ ਅਞ੍ਞੇਪਿ ਭਿਕ੍ਖੂ ਅਤ੍ਥਿ ਚਾਤਿ ਅਤ੍ਥੋ. ਅਞ੍ਞੇਪੀਤਿ ਅਤ੍ਤਨਾ ਅਪਰੇਪਿ. ਭਣ੍ਡੂਤਿ ਮੁਣ੍ਡੋ, ਸੋਯੇਵ ਕਮ੍ਮਂ ਭਣ੍ਡੁਕਮ੍ਮਂ. ਤਸ੍ਸਾਤਿ ਭਣ੍ਡੁਕਮ੍ਮਸ੍ਸ. ਓਕਾਸੋਤਿ ਪਬ੍ਬਜ੍ਜਾਯ ਖਣੋ. ‘‘ਓਕਾਸਂ ਨ ਲਭਤੀ’’ਤਿ ਵਤ੍ਵਾ ਤਸ੍ਸ ਕਾਰਣਂ ਦਸ੍ਸੇਤੁਂ ਵੁਤ੍ਤਂ ‘‘ਸਚੇ’’ਤਿਆਦਿ.

ਅਵੁਤ੍ਤੋਪੀਤਿ ਏਤ੍ਥ ਪਿਸਦ੍ਦੋ ਵੁਤ੍ਤੋ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਉਪਜ੍ਝਾਯਂ ਉਦ੍ਦਿਸ੍ਸ ਪਬ੍ਬਾਜੇਤੀਤਿ ਏਤ੍ਥ ਪਬ੍ਬਜ੍ਜਾ ਚਤੁਬ੍ਬਿਧਾ ਤਾਪਸਪਬ੍ਬਜ੍ਜਾ ਪਰਿਬ੍ਬਾਜਕਪਬ੍ਬਜ੍ਜਾ ਸਾਮਣੇਰਪਬ੍ਬਜ੍ਜਾ ਉਪਸਮ੍ਪਦਪਬ੍ਬਜ੍ਜਾਤਿ. ਤਤ੍ਥ ਕੇਸਮਸ੍ਸੁਹਰਣਂ ਤਾਪਸਪਬ੍ਬਜ੍ਜਾ ਨਾਮ ਵਕ੍ਕਲਾਦਿਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਇਸਿਪਬ੍ਬਜ੍ਜਾਤਿਪਿ ਤਸ੍ਸਾਯੇਵ ਨਾਮਂ. ਕੇਸਮਸ੍ਸੁਹਰਣਮੇਵ ਪਰਿਬ੍ਬਾਜਕਪਬ੍ਬਜ੍ਜਾ ਨਾਮ ਕਾਸਾਯਾਦਿਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਕੇਸਮਸ੍ਸੁਹਰਣਞ੍ਚ ਕਾਸਾਯਚ੍ਛਾਦਨਞ੍ਚ ਸਾਮਣੇਰਪਬ੍ਬਜ੍ਜਾ ਨਾਮ ਸਰਣਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਉਪਸਮ੍ਪਦਪਬ੍ਬਜ੍ਜਾ ਤਿਵਿਧਾ ਏਹਿਭਿਕ੍ਖੁਉਪਸਮ੍ਪਦਪਬ੍ਬਜ੍ਜਾ ਸਰਣਗਹਣੂਪਸਮ੍ਪਦਪਬ੍ਬਜ੍ਜਾ ਞਤ੍ਤਿਚਤੁਤ੍ਥਵਾਚਿਕੂਪਸਮ੍ਪਦਪਬ੍ਬਜ੍ਜਾਤਿ. ਤਤ੍ਥ ਏਹਿਭਿਕ੍ਖੂਪਸਮ੍ਪਦਪਬ੍ਬਜ੍ਜਾਯਂ ਕੇਸਮਸ੍ਸੁਹਰਣਾਦਿ ਸਬ੍ਬਂ ਏਕਤੋਵ ਸਮ੍ਪਜ੍ਜਤਿ ‘‘ਏਹਿ ਭਿਕ੍ਖੂ’’ਤਿ ਭਗਵਤੋ ਵਚਨੇਨ ਅਭਿਨਿਪ੍ਫਨ੍ਨਤ੍ਤਾ. ਸਰਣਗਹਣੂਪਸਮ੍ਪਦਪਬ੍ਬਜ੍ਜਾ ਸਾਮਣੇਰਪਬ੍ਬਜ੍ਜਸਦਿਸਾਯੇਵ. ਕੇਸਮਸ੍ਸੁਹਰਣਞ੍ਚ ਕਾਸਾਯਚ੍ਛਾਦਨਞ੍ਚ ਸਰਣਗਹਣਞ੍ਚ ਞਤ੍ਤਿਚਤੁਤ੍ਥਵਾਚਿਕੂਪਸਮ੍ਪਦਪਬ੍ਬਜ੍ਜਾ ਨਾਮ ਕਮ੍ਮਵਾਚਾਗਹਣਤੋ ਪਠਮਮੇਵ ਵਜਿਤਬ੍ਬਤ੍ਤਾ. ਤਤ੍ਥ ਸਾਮਣੇਰਪਬ੍ਬਜ੍ਜਂ ਸਨ੍ਧਾਯ ਵੁਤ੍ਤਂ ‘‘ਉਪਜ੍ਝਾਯਂ ਉਦ੍ਦਿਸ੍ਸ ਪਬ੍ਬਾਜੇਤੀ’’ਤਿ. ਉਪਜ੍ਝਾਯਂ ਉਦ੍ਦਿਸ੍ਸਾਤਿ ਉਪਜ੍ਝਾਯਸ੍ਸ ਵੇਯ੍ਯਾਵਚ੍ਚਕਰਟ੍ਠਾਨਨਿਯਮਂ ਕਤ੍ਵਾ. ਪਬ੍ਬਜ੍ਜਾਕਮ੍ਮੇ ਅਤ੍ਤਨੋ ਇਸ੍ਸਰਿਯਮਕਤ੍ਵਾਤਿ ਅਤ੍ਥੋ. ਦਹਰੇਨ ਭਿਕ੍ਖੁਨਾ ਕੇਸਚ੍ਛੇਦਨਂ ਕਾਸਾਯਚ੍ਛਾਦਨਂ ਸਰਣਦਾਨਨ੍ਤਿ ਤੀਣਿ ਕਿਚ੍ਚਾਨਿ ਕਾਤਬ੍ਬਾਨਿਯੇਵ. ਕੇਚਿ ‘‘ਸਰਣਾਨਿ ਪਨ ਸਯਂ ਦਾਤਬ੍ਬਾਨੀ’’ਤਿ ਪਾਠਂ ਇਧਾਨੇਤ੍ਵਾ ਦਹਰੇਨ ਭਿਕ੍ਖੁਨਾ ਸਰਣਾਨਿ ਨ ਦਾਤਬ੍ਬਾਨੀਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ਦਹਰਸ੍ਸ ਭਿਕ੍ਖੁਤ੍ਤਾ, ਭਿਕ੍ਖੂਨਂ ਪਬ੍ਬਾਜੇਤੁਂ ਲਭਨਤ੍ਤਾ ਚ. ਉਪਜ੍ਝਾਯੋ ਚੇ ਕੇਸਚ੍ਛੇਦਨਞ੍ਚ ਕਾਸਾਯਚ੍ਛਾਦਨਞ੍ਚ ਅਕਤ੍ਵਾ ਪਬ੍ਬਜ੍ਜਤ੍ਥਂ ਸਰਣਾਨਿਯੇਵ ਦੇਤਿ, ਨ ਰੁਹਤਿ ਪਬ੍ਬਜ੍ਜਾ ਪਬ੍ਬਜ੍ਜਾਯ ਅਕਤ੍ਤਬ੍ਬਤ੍ਤਾ. ਕਮ੍ਮਵਾਚਂ ਸਾਵੇਤ੍ਵਾ ਉਪਸਮ੍ਪਾਦੇਤਿ, ਰੁਹਤਿ ਉਪਸਮ੍ਪਦਾ ਅਪਤ੍ਤਚੀਵਰਾਨਂ ਉਪਸਮ੍ਪਦਸਿਦ੍ਧਿਤੋ, ਕਮ੍ਮਵਿਪਤ੍ਤਿਯਾ ਅਭਾਵਤੋ ਚ. ਖਣ੍ਡਸੀਮਨ੍ਤਿ ਉਪਚਾਰਸੀਮਟ੍ਠਂ ਬਦ੍ਧਸੀਮਂ. ਪਬ੍ਬਾਜੇਤ੍ਵਾਤਿ ਕੇਸਚ੍ਛੇਦਨਂ ਸਨ੍ਧਾਯ ਵੁਤ੍ਤਂ ‘‘ਕਾਸਾਯਾਨਿ ਅਚ੍ਛਾਦੇਤ੍ਵਾ’’ਤਿ ਕਾਸਾਯਚ੍ਛਾਦਨਸ੍ਸ ਵਿਸੁਂ ਵੁਤ੍ਤਤ੍ਤਾ. ਸਾਮਣੇਰਸ੍ਸ ਸਰਣਦਾਨਸ੍ਸ ਅਰੁਹਤ੍ਤਾ ‘‘ਸਰਣਾਨਿ ਪਨ ਸਯਂ ਦਾਤਬ੍ਬਾਨੀ’’ਤਿ ਵੁਤ੍ਤਂ. ਪੁਰਿਸਂ ਪਬ੍ਬਾਜੇਤੁਨ੍ਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਆਣਤ੍ਤਿਯਾਤਿ ਭਿਕ੍ਖੂਨਂ ਆਣਤ੍ਤਿਯਾ. ਯੇਨ ਕੇਨਚੀਤਿ ਗਹਟ੍ਠਪਬ੍ਬਜਿਤੇਸੁ ਯੇਨ ਕੇਨਚਿ.

‘‘ਭਬ੍ਬਰੂਪੋ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸਹੇਤੁਕੋ’’ਤਿ. ਸਹੇਤੁਕੋਤਿ ਮਗ੍ਗਫਲਾਨਂ ਉਪਨਿਸ੍ਸਯੇਹਿ ਸਹ ਪਵਤ੍ਤੋ. ਯਸਸ੍ਸੀਤਿ ਪਰਿਵਾਰਯਸੇਨ ਚ ਕਿਤ੍ਤਿਯਸੇਨ ਚ ਸਮਨ੍ਨਾਗਤੋ. ਓਕਾਸਂ ਕਤ੍ਵਾਪੀਤਿ ਓਕਾਸਂ ਕਤ੍ਵਾ ਏਵ. ਸਯਮੇਵਾਤਿ ਨ ਅਞ੍ਞੋ ਆਣਾਪੇਤਬ੍ਬੋ. ਏਤ੍ਤੋਯੇਵਾਤਿ ਦਸ੍ਸਨਟ੍ਠਾਨਤੋਯੇਵ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਖਜ੍ਜੁ ਵਾਤਿ ਕਣ੍ਡੁਵਨਂ ਵਾ. ‘‘ਕਚ੍ਛੁ ਵਾ’’ਤਿਪਿ ਪਾਠੋ, ਪਾਮਂ ਵਾਤਿ ਅਤ੍ਥੋ. ਪਿਲ਼ਕਾ ਵਾਤਿ ਫੋਟਾ ਵਾ. ਏਤ੍ਤਕੇਨਾਤਿ ਏਤਪਮਾਣੇਨ ਘਂਸਿਤ੍ਵਾ ਨ੍ਹਾਪਨਮਤ੍ਤੇਨ. ਅਨਿਵਤ੍ਤਿਧਮ੍ਮਾਤਿ ਗਿਹਿਭਾਵਂ ਅਨਿਵਤ੍ਤਨਸਭਾਵਾ. ਕਤਞ੍ਞੂਤਿ ਕਤਸ੍ਸੂਪਕਾਰਸ੍ਸ ਜਾਨਨਸੀਲਾ. ਕਤਵੇਦਿਨੋਤਿ ਕਤਞ੍ਞੂਪਕਾਰਸ੍ਸ ਵੇਦਂ ਪਾਕਟਂ ਕਰੋਨ੍ਤੋ.

ਅਨਿਯ੍ਯਾਨਿਕਕਥਾਤਿ ਯਾਵਦਤ੍ਥਂ ਸੁਪਿਤ੍ਵਾ ਯਾਵਦਤ੍ਥਂ ਭੁਞ੍ਜੀਤ੍ਵਾ ਚਿਤ੍ਤਕੇਲ਼ਿਂ ਕਰੋਨ੍ਤੋ ਅਨੁਕ੍ਕਣ੍ਠਿਤੋ ਵਿਹਰਾਹੀਤਿਆਦਿਕਾ ਕਥਾ. ਨਕਥੇਤਬ੍ਬਂ ਦਸ੍ਸੇਤ੍ਵਾ ਕਥੇਤਬ੍ਬਂ ਦਸ੍ਸੇਨ੍ਤੋ ਆਹ ‘‘ਅਥਖ੍ਵਸ੍ਸਾ’’ਤਿ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਆਚਿਕ੍ਖਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਆਚਿਕ੍ਖਨ੍ਤੇਨ ਚਾ’’ਤਿਆਦਿ. ਵਣ੍ਣ…ਪੇ… ਵਸੇਨਾਤਿ ਵਣ੍ਣੋ ਚ ਸਣ੍ਠਾਨਞ੍ਚ ਗਨ੍ਧੋ ਚ ਆਸਯੋ ਚ ਓਕਾਸੋ ਚ, ਤੇਸਂ ਵਸੇਨ, ਆਚਿਕ੍ਖਿਤਬ੍ਬਨ੍ਤਿ ਸਮ੍ਬਨ੍ਧੋ. ਹੀਤਿ ਫਲਜੋਤਕੋ, ਆਚਿਕ੍ਖਨਸ੍ਸ ਫਲਂ ਵਕ੍ਖਾਮੀਤਿ ਅਤ੍ਥੋ. ਸੋਤਿ ਪਬ੍ਬਜ੍ਜਾਪੇਕ੍ਖੋ. ਪੁਬ੍ਬੇਤਿ ਪੁਬ੍ਬਭਵੇ, ਪਬ੍ਬਜਨਤੋ ਪੁਬ੍ਬੇ ਵਾ. ਕਣ੍ਟਕਵੇਧਾਪੇਕ੍ਖੋ ਪਰਿਪਕ੍ਕਗਣ੍ਡੋ ਵਿਯ ਞਾਣਂ ਪਵਤ੍ਤਤੀਤਿ ਯੋਜਨਾ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਇਨ੍ਦਾਸਨੀਤਿ ਸਕ੍ਕਸ੍ਸ ਵਜਿਰਾਵੁਧੋ. ਸੋ ਹਿ ਇਨ੍ਦੇਨ ਅਸੀਯਤਿ ਖਿਪੀਯਤੀਤਿ ਇਨ੍ਦਾਸਨੀਤਿ ਵੁਚ੍ਚਤਿ. ਇਨ੍ਦਾਸਨਿ ਪਬ੍ਬਤੇ ਚੁਣ੍ਣਯਮਾਨਾ ਵਿਯ ਸਬ੍ਬੇ ਕਿਲੇਸੇ ਚੁਣ੍ਣਯਮਾਨਂਯੇਵਾਤਿ ਯੋਜਨਾ. ਖੁਰਗ੍ਗੇਯੇਵਾਤਿ ਖੁਰਸ੍ਸ ਕੋਟਿਯਮੇਵ. ਖੁਰਕਮ੍ਮਪਰਿਯੋਸਾਨੇਯੇਵਾਤਿ ਅਤ੍ਥੋ. ਹੀਤਿ ਸਚ੍ਚਂ. ਤਸ੍ਮਾਤਿ ਯਸ੍ਮਾ ਪਤ੍ਤਾ, ਤਸ੍ਮਾ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ.

ਗਿਹਿਗਨ੍ਧਨ੍ਤਿ ਗੇਹੇ ਠਿਤਸ੍ਸ ਜਨਸ੍ਸ ਗਨ੍ਧਂ. ਅਥਾਪੀਤਿ ਯਦਿਪਿ ਅਚ੍ਛਾਦੇਤੀਤਿ ਸਮ੍ਬਨ੍ਧੋ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ. ਆਚਰਿਯੋ ਵਾਤਿ ਸਰਣਦਾਨਾਚਰਿਯੋ ਵਾ ਕਮ੍ਮਵਾਚਾਚਰਿਯੋ ਵਾ ਓਵਾਦਾਚਰਿਯੋ ਵਾ. ਤਂਯੇਵ ਵਾਤਿ ਪਬ੍ਬਜ੍ਜਾਪੇਕ੍ਖਮੇਵ ਵਾ. ਤੇਨ ਭਿਕ੍ਖੁਨਾਵਾਤਿ ਆਚਰਿਯੁਪਜ੍ਝਾਯਭਿਕ੍ਖੁਨਾ ਏਵ.

ਅਨਾਣਤ੍ਤਿਯਾਤਿ ਆਚਰਿਯੁਪਜ੍ਝਾਯੇਹਿ ਅਨਾਣਤ੍ਤਿਯਾ. ਇਮਿਨਾ ਆਚਰਿਯੁਪਜ੍ਝਾਯੇਹਿ ਅਨਾਣਤ੍ਤੇਨ ਯੇਨ ਕੇਨਚਿ ਨਿਵਾਸਨਾਦੀਨਿ ਨ ਕਾਤਬ੍ਬਾਨੀਤਿ ਦਸ੍ਸੇਤਿ. ਭਿਕ੍ਖੁਨਾਤਿ ਆਚਰਿਯੁਪਜ੍ਝਾਯਭਿਕ੍ਖੁਨਾ. ਤਸ੍ਸੇਵਾਤਿ ਪਬ੍ਬਜ੍ਜਾਪੇਕ੍ਖਸ੍ਸੇਵ. ਉਪਜ੍ਝਾਯਮੂਲਕੇਤਿ ਉਪਜ੍ਝਾਯਮੂਲਕੇ ਨਿਵਾਸਨਪਾਰੁਪਨੇ. ਅਯਨ੍ਤਿ ਵਿਨਿਚ੍ਛਯੋ.

ਤਤ੍ਥਾਤਿ ਪਬ੍ਬਜ੍ਜੂਪਸਮ੍ਪਦਟ੍ਠਾਨੇ. ਤੇਸਨ੍ਤਿ ਭਿਕ੍ਖੂਨਂ. ਅਥਾਤਿ ਵਨ੍ਦਾਪਨਤੋ ਪਚ੍ਛਾ, ਵਨ੍ਦਾਪਨਸ੍ਸ ਅਨਨ੍ਤਰਾ ਵਾ. ‘‘ਏਵਂ ਵਦੇਹੀ’’ਤਿ ਪਾਲ਼ਿਨਯਨਿਦਸ੍ਸਨਮੁਖੇਨ ‘‘ਯਮਹਂ ਵਦਾਮਿ, ਤਂ ਵਦੇਹੀ’’ਤਿ ਅਟ੍ਠਕਥਾਨਯਂ ਨਿਦਸ੍ਸੇਤਿ. ਅਥਾਤਿ ਤਦਨਨ੍ਤਰਂ. ਅਸ੍ਸਾਤਿ ਪਬ੍ਬਜ੍ਜਾਪੇਕ੍ਖਸ੍ਸ, ਦਾਤਬ੍ਬਾਨੀਤਿ ਸਮ੍ਬਨ੍ਧੋ. ਏਕਪਦਮ੍ਪੀਤਿ ਤੀਸੁ ਵਾਕ੍ਯਪਦੇਸੁ ਏਕਂ ਵਾਕ੍ਯਪਦਮ੍ਪਿ, ਨਵਸੁ ਵਾ ਵਿਭਤ੍ਯਨ੍ਤਪਦੇਸੁ ਏਕਪਦਮ੍ਪਿ. ਏਕਕ੍ਖਰਮ੍ਪੀਤਿ ਚਤੁਵੀਸਤਕ੍ਖਰੇਸੁ ਏਕਕ੍ਖਰਮ੍ਪਿ.

ਏਕਤੋ ਸੁਦ੍ਧਿਯਾਤਿ ਏਕਸ੍ਸੇਵ ਕਮ੍ਮਵਾਚਾਚਰਿਯਸ੍ਸ ਠਾਨਕਰਣਸਮ੍ਪਤ੍ਤਿਯਾ ਸੁਜ੍ਝਨੇਨ. ਉਭਤੋ ਸੁਦ੍ਧਿਯਾਵਾਤਿ ਉਭਯੇਸਂ ਸਰਣਦਾਨਾਚਰਿਯਸਾਮਣੇਰਾਨਂ ਸੁਜ੍ਝਨੇਨ ਏਵ. ਠਾਨਕਰਣਸਮ੍ਪਦਨ੍ਤਿ ਉਰਆਦਿਟ੍ਠਾਨਾਨਞ੍ਚ ਸਂਵੁਤਾਦਿਕਰਣਾਨਞ੍ਚ ਸਮ੍ਪਦਂ. ਵਤ੍ਤੁਨ੍ਤਿ ਠਾਨਕਰਣਸਮ੍ਪਦਂ ਵਤ੍ਤੁਂ. ਨ ਸਕ੍ਕੋਤੀਤਿ ਵਤ੍ਤੁਂ ਨ ਸਕ੍ਕੋਤੀਤਿ ਯੋਜਨਾ.

ਇਮਾਨੀਤਿ ਸਰਣਾਨਿ. ਚਸਦ੍ਦੋ ਉਪਨ੍ਯਾਸੋ, ਪਨਸਦ੍ਦੋ ਪਦਾਲਙ੍ਕਾਰੋ. ਏਕਸਮ੍ਬਨ੍ਧਾਨੀਤਿ ਏਕਤੋ ਸਮ੍ਬਨ੍ਧਾਨਿ. ਅਨੁਨਾਸਿਕਨ੍ਤਂ ਕਤ੍ਵਾ ਦਾਨਕਾਲੇ ‘‘ਬੁਦ੍ਧਂ’’ਇਤਿ ‘‘ਸਰਣਂ’’ਇਤਿ ਪਦਾਨਞ੍ਚ ‘‘ਸਰਣਂ’’ਇਤਿ ‘‘ਗਚ੍ਛਾਮਿ’’ਇਤਿ ਪਦਾਨਞ੍ਚ ਅਨ੍ਤਰਾ ਵਿਚ੍ਛੇਦਮਕਤ੍ਵਾ ਏਕਸਮ੍ਬਨ੍ਧਮੇਵ ਕਤ੍ਵਾ ਦਾਤਬ੍ਬਾਨੀਤਿ ਵੁਤ੍ਤਂ ਹੋਤਿ. ਕਸ੍ਮਾ ਤਿਣ੍ਣਂ ਪਦਾਨਮਨ੍ਤਰਾ ਬ੍ਯਵਧਾਨਸ੍ਸ ਕਸ੍ਸਚਿ ਅਕ੍ਖਰਸ੍ਸ ਅਭਾਵਤੋ. ਵਿਚ੍ਛਿਨ੍ਦਿਤ੍ਵਾਤਿ ਵਿਚ੍ਛੇਦਂ ਕਤ੍ਵਾ. ਮਕਾਰਨ੍ਤਂ ਕਤ੍ਵਾ ਦਾਨਕਾਲੇ ਤਿਣ੍ਣਂ ਪਦਾਨਮਨ੍ਤਰਾ ਏਕਸਮ੍ਬਨ੍ਧਮਕਤ੍ਵਾ ਵਿਚ੍ਛਿਨ੍ਦਿਤ੍ਵਾ ਏਵ ਕਤ੍ਵਾ ਦਾਤਬ੍ਬਾਨੀਤਿ ਵੁਤ੍ਤਂ ਹੋਤਿ. ਕਸ੍ਮਾ? ਤਿਣ੍ਣਂ ਪਦਾਨਮਨ੍ਤਰਾ ਬ੍ਯਵਧਾਨਸ੍ਸ ਨਿਸ੍ਸਰਸ੍ਸ ਮਕਾਰਸ੍ਸ ਅਤ੍ਥਿਭਾਵਤੋ. ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਨ੍ਤਿ ਵਚਨਂ, ‘‘ਨਤ੍ਥੀ’’ਤਿਪਦੇ ਕਤ੍ਤਾ, ‘‘ਨ ਵੁਤ੍ਤ’’ਨ੍ਤਿਪਦੇ ਕਮ੍ਮਂ. ਤਥਾਤਿ ‘‘ਅਹਂ ਭਨ੍ਤੇ ਬੁਦ੍ਧਰਕ੍ਖਿਤੋ’’ਤਿਆਦਿਨਾ ਆਕਾਰੇਨ, ਅਵਦਨ੍ਤਸ੍ਸ ਸਰਣਂ ਨ ਕੁਪ੍ਪਤਿ, ਬੁਕਾਰਦਕਾਰਾਦੀਨਂ ਬ੍ਯਞ੍ਜਨਾਨਂ ਠਾਨਕਰਣਸਮ੍ਪਦਂ ਹਾਪੇਨ੍ਤਸ੍ਸੇਵ ਸਰਣਂ ਕੁਪ੍ਪਤੀਤਿ ਅਧਿਪ੍ਪਾਯੋ.

‘‘ਤਿਕ੍ਖਤ੍ਤੁ’’ਨ੍ਤਿ ਇਮਿਨਾ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਨ ਵਟ੍ਟਤੀਤਿ ਦੀਪੇਤਿ. ਤਿਕ੍ਖਤ੍ਤੁਤੋ ਅਧਿਕਂ ਪਨ ਸਹਸ੍ਸਕ੍ਖਤ੍ਤੁਮ੍ਪਿ ਵਟ੍ਟਤਿਯੇਵ. ਤਤ੍ਥਾਤਿ ਤਾਸੁ ਪਬ੍ਬਜ੍ਜਾਉਪਸਮ੍ਪਦਾਸੁ. ਪਰਤੋਤਿ ਪਰਸ੍ਮਿਂ. ਸਾਤਿ ਉਪਸਮ੍ਪਦਾ. ਪਬ੍ਬਜ੍ਜਾ ਪਨ ਅਨੁਞ੍ਞਾਤਾ ਏਵਾਤਿ ਸਮ੍ਬਨ੍ਧੋ. ਪਰਤੋਪੀਤਿ ਪਿਸਦ੍ਦੋ ਪੁਬ੍ਬਾਪੇਕ੍ਖੋ. ਸਾਤਿ ਪਬ੍ਬਜ੍ਜਾ. ਏਤ੍ਤਾਵਤਾਤਿ ਏਤ੍ਤਕੇਨ ਕੇਸਚ੍ਛੇਦਨਕਾਸਾਯਚ੍ਛਾਦਨਸਰਣਦਾਨੇਨ. ਹੀਤਿ ਫਲਜੋਤਕੋ.

ਏਸਾਤਿ ਏਸੋ ਸਾਮਣੇਰੋਤਿ ਅਤ੍ਥੋ. ‘‘ਗਤਿਮਾ’’ਤਿ ਵਤ੍ਵਾ ਤਸ੍ਸਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਣ੍ਡਿਤਜਾਤਿਕੋ’’ਤਿ. ਅਥਾਤਿ ਏਵਂ ਸਤਿ. ਅਸ੍ਸਾਤਿ ਸਾਮਣੇਰਸ੍ਸ. ਤਸ੍ਮਿਂਯੇਵ ਠਾਨੇਤਿ ਸਾਮਣੇਰਭੂਮਿਯਂ ਠਿਤਟ੍ਠਾਨੇਯੇਵ. ਯਥਾ ਭਗਵਤਾ ਉਦ੍ਦਿਟ੍ਠਾਨਿ, ਤਥਾ ਉਦ੍ਦਿਸਿਤਬ੍ਬਾਨੀਤਿ ਯੋਜਨਾ. ਏਤਨ੍ਤਿ ‘‘ਅਨੁਜਾਨਾਮਿ…ਪੇ… ਜਾਤਰੂਪ ਰਜਤਪਟਿਗ੍ਗਹਣਾ ਵੇਰਮਣੀ’’ਤਿ ਵਚਨਂ.

ਤਨ੍ਤਿ ਅਨ੍ਧਕਟ੍ਠਕਥਾਯਂ ਵੁਤ੍ਤਵਚਨਂ. ਯਥਾਪਾਲ਼ਿਯਾਵਾਤਿ ਏਵਸਦ੍ਦੋ ਸਨ੍ਨਿਟ੍ਠਾਨਤ੍ਥੋ, ਤੇਨ ਯਥਾਪਾਲ਼ਿਯਾਵ ਉਦ੍ਦਿਸਿਤਬ੍ਬਾਨਿ. ਯਥਾਪਾਲ਼ਿਂ ਵਿਸਜ੍ਜੇਤ੍ਵਾ ਅਞ੍ਞਥਾ ਏਵ ਉਦ੍ਦਿਸਿਤਬ੍ਬਾਨੀਤਿ ਵਾਦਂ ਨਿਵਾਰੇਤਿ. ਯਥਾਪਾਲ਼ਿਂ ਵਿਸਜ੍ਜੇਤ੍ਵਾ ਅਞ੍ਞਥਾ ‘‘ਪਾਣਾਤਿਪਾਤਾ ਵੇਰਮਣਿਂ ਸਿਕ੍ਖਾਪਦਂ ਸਮਾਦਿਯਾਮੀ’’ਤਿ ਉਦ੍ਦਿਸਨ੍ਤੋਪਿ ਨਿਦ੍ਦੋਸੋਯੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਾਨੀਤਿ ਸਿਕ੍ਖਾਪਦਾਨਿ. ਯਾਵਾਤਿ ਯਤ੍ਤਕਂ ਕਾਲਂ ਨ ਜਾਨਾਤਿ, ਨ ਕੁਸਲੋ ਹੋਤੀਤਿ ਸਮ੍ਬਨ੍ਧੋ. ਸਨ੍ਤਿਕਾਵਚਰੋਯੇਵਾਤਿ ਆਚਰਿਯੁਪਜ੍ਝਾਯਾਨਂ ਸਮੀਪੇ ਅਵਚਾਰੋਵ. ਅਸ੍ਸਾਤਿ ਸਾਮਣੇਰਸ੍ਸ. ਕਪ੍ਪਿਯਾਕਪ੍ਪਿਯਨ੍ਤਿ ਦਸਸਿਕ੍ਖਾਪਦਵਿਨਿਮੁਤ੍ਤਂ ਕਪ੍ਪਿਯਂ ਪਰਾਮਾਸਾਦਿਞ੍ਚ ਅਕਪ੍ਪਿਯਂ ਅਪਰਾਮਾਸਾਦਿਞ੍ਚ. ਤੇਨਾਪੀਤਿ ਸਾਮਣੇਰੇਨਾਪਿ. ਨਾਸਨਙ੍ਗਾਨੀਤਿ ਲਿਙ੍ਗਨਾਸਨਅਙ੍ਗਾਨਿ. ਸਾਧੁਕਂ ਸਿਕ੍ਖਿਤਬ੍ਬਨ੍ਤਿ ਸਾਧੁਕਂ ਅਸਿਕ੍ਖਨ੍ਤਸ੍ਸ ਲਿਙ੍ਗਨਾਸਨਞ੍ਚ ਦਣ੍ਡਕਮ੍ਮਨਾਸਨਞ੍ਚ ਹੋਤੀਤਿ ਅਧਿਪ੍ਪਾਯੋ.

੧੦. ਦੁਤਿਯਮਾਰਕਥਾ

੩੫. ਮਯ੍ਹਨ੍ਤਿਪਦਸ੍ਸ ‘‘ਅਨੁਪ੍ਪਤ੍ਤਾ ਸਚ੍ਛਿਕਤਾ’’ਤਿਪਦੇਸੁ ਛਟ੍ਠੀਕਤ੍ਤੁਭਾਵਂ ਦਸ੍ਸੇਨ੍ਤੋ ਆਹ ‘‘ਮਯਾ ਖੋਤਿ ਅਤ੍ਥੋ’’ਤਿ. ‘‘ਅਥ ਵਾ’’ਤਿਆਦਿਨਾ ‘‘ਮਯ੍ਹ’’ਨ੍ਤਿਪਦਸ੍ਸ ‘‘ਯੋਨਿਸੋ ਮਨਸਿਕਾਰਾ, ਯੋਨਿਸੋ ਸਮ੍ਮਪ੍ਪਧਾਨਾ’’ਤਿਪਦੇਸੁ ਸਮ੍ਬਨ੍ਧਭਾਵਂ ਦਸ੍ਸੇਤਿ. ‘‘ਯੋਨਿਸੋ ਮਨਸਿਕਾਰਾ, ਯੋਨਿਸੋ ਸਮ੍ਮਪ੍ਪਧਾਨਾ’’ਤਿ ਏਤ੍ਥ ਕਾਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਤੇਨ ਹੇਤੁਨਾ’’ਤਿ. ‘‘ਪੁਨਾ’’ਤਿਆਦਿਨਾ ‘‘ਮਯ੍ਹ’’ਨ੍ਤਿਪਦਂ ‘‘ਯੋਨਿਸੋ ਮਨਸਿਕਾਰਾ, ਯੋਨਿਸੋ ਸਮ੍ਮਪ੍ਪਧਾਨਾ’’ਤਿਪਦੇਸੁ ਸਾਮ੍ਯਤ੍ਥੇ ਸਾਮਿਭਾਵੇਨ ਯੋਜੇਤ੍ਵਾ ਪੁਨ ‘‘ਅਨੁਪ੍ਪਤ੍ਤਾ, ਸਚ੍ਛਿਕਤਾ’’ਤਿ ਪਦੇਸੁ ਕਤ੍ਤੁਤ੍ਥੇ ਸਾਮਿਭਾਵੇਨ ਵਿਭਤ੍ਤਿਵਿਪਲ੍ਲਾਸੋ ਕਾਤਬ੍ਬੋਤਿ ਦਸ੍ਸੇਤਿ.

੧੧. ਭਦ੍ਦਵਗ੍ਗਿਯਕਥਾ

੩੬. ਭਦ੍ਦਂ ਰੂਪਞ੍ਚ ਚਿਤ੍ਤਞ੍ਚ ਏਤੇਸਮਤ੍ਥੀਤਿ ਭਦ੍ਦਕਾ. ਵਗ੍ਗਬਨ੍ਧਨਂ ਵਗ੍ਗੋ ਉਤ੍ਤਰਪਦਲੋਪੇਨ, ਵਗ੍ਗੇਨ ਚਰਨ੍ਤੀਤਿ ਵਗ੍ਗਿਯਾ. ਭਦ੍ਦਕਾ ਚ ਤੇ ਵਗ੍ਗਿਯਾ ਚਾਤਿ ਭਦ੍ਦਵਗ੍ਗਿਯਾ ਕਕਾਰਲੋਪੇਨਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਭਦ੍ਦਵਗ੍ਗਿਯਾ’’ਤਿਆਦਿ. ‘‘ਵੋਕਾਰੋ ਨਿਪਾਤਮਤ੍ਤੋ’’ਤਿ ਇਮਿਨਾ ਤੁਮ੍ਹਸਦ੍ਦਸ੍ਸ ਚ ਯੋਵਚਨਸ੍ਸ ਚ ਕਾਰਿਯਭਾਵਂ ਨਿਵਤ੍ਤੇਤਿ. ਹੀਤਿ ਸਚ੍ਚਂ. ਤੇਤਿ ਭਦ੍ਦਵਗ੍ਗਿਯਾ. ਇਦਨ੍ਤਿ ਪਞ੍ਚਸੀਲਰਕ੍ਖਨਂ. ਪੁਬ੍ਬਕਮ੍ਮਨ੍ਤਿ ਪੁਬ੍ਬੇ ਉਪਚਿਤਂ ਕੁਸਲਕਮ੍ਮਂ.

੧੨. ਉਰੁਵੇਲਪਾਟਿਹਾਰਿਯਕਥਾ

੩੮. ਪਰਿਯਾਦਿਯੇਯ੍ਯਨ੍ਤਿ ਏਤ੍ਥ ਦਾਧਾਤੁਸ੍ਸ ਪਰੀਤਿ ਚ ਆਤਿ ਚ ਉਪਸਗ੍ਗਵਸੇਨ ਅਭਿਭਵਨਤ੍ਥੋਤਿ ਆਹ ‘‘ਅਭਿਭਵੇਯ੍ਯ’’ਨ੍ਤਿ.

੩੯. ਪਚ੍ਛਾ ਪਕ੍ਖਿਤ੍ਤਾਤਿ ਸਙ੍ਗੀਤਿਤੋ ਪਰਂ ਪੋਤ੍ਥਕਾਰੂਲ਼੍ਹੇਹਿ ਠਪਿਤਾਤਿ ਅਤ੍ਥੋ.

੪੪. ‘‘ਏਵਂ ਵਦਨ੍ਤੋ ਵਿਯ ਓਣਤੋ’’ਤਿ ਇਮਿਨਾ ‘‘ਆਹਰਹਤ੍ਥੋ’’ਤਿਪਦਸ੍ਸ ਤਦ੍ਧਿਤਭਾਵਂ ਦਸ੍ਸੇਤਿ. ਵਿਤ੍ਥਿਣ੍ਣਮੁਖਤ੍ਤਾ ਮਨ੍ਦਂ ਹੀਨਂ ਅਤਿਮੁਖਮੇਤਾਸਨ੍ਤਿ ਵਚਨਤ੍ਥੇਨ ਅਗ੍ਗਿਕਪਾਲਾ ਮਨ੍ਦਾਮੁਖਿਯੋਤਿ ਵੁਚ੍ਚਨ੍ਤੀਤਿ ਆਹ ‘‘ਅਗ੍ਗਿਭਾਜਨਾਨਿ ਵੁਚ੍ਚਨ੍ਤੀ’’ਤਿ.

੫੧. ਯਸ੍ਮਾ ਯੋ ਨਾਗਦਮਨਕਾਲੋ ਚਿਰਂ ਪਤਤਿ ਪਵਤ੍ਤਤਿ, ਤਸ੍ਮਾ ਸੋ ਚਿਰਪਤਿਕੋਤਿ ਵੁਚ੍ਚਤਿ, ਤਸ੍ਮਾ ਚਿਰਪਤਿਕਾ ਪਟ੍ਠਾਯ ਅਭਿਪ੍ਪਸਨ੍ਨਾਤਿ ਯੋਜਨਾ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਚਿਰਕਾਲਤੋ ਪਟ੍ਠਾਯਾ’’ਤਿ.

੫੨. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਜਟਾਮਿਸ੍ਸ’’ਨ੍ਤਿਆਦਿਪਦੇਸੁ. ਖਾਰਿਕਾਜਨ੍ਤਿ ਏਤ੍ਥ ਕਮਣ੍ਡਲੁਆਦਿਕਾ ਤਾਪਸਪਰਿਕ੍ਖਾਰਾ ਖਾਰੀਤਿ ਵੁਚ੍ਚਨ੍ਤਿ, ਖਾਰਿਸਙ੍ਖਾਤੇਨ ਭਾਰੇਨ ਪੂਰਿਤੋ ਕਾਜੋ ਖਾਰਿਕਾਜੋਤਿ ਅਤ੍ਥਂ ਏਕਦੇਸੇਨ ਦਸ੍ਸੇਨ੍ਤੋ ਆਹ ‘‘ਖਾਰਿਭਾਰੋ’’ਤਿ.

੧੩. ਬਿਮ੍ਬਿਸਾਰਸਮਾਗਮਕਥਾ

੫੫. ਲਟ੍ਠਿਸਦ੍ਦੋ ਤਰੁਣਰੁਕ੍ਖਵਾਚਕੋ ‘‘ਅਮ੍ਬਲਟ੍ਠਿਕਾਯ’’ਨ੍ਤਿਆਦੀਸੁ (ਦੀ. ਨਿ. ੧.੨), ਇਧਾਪਿ ਤਰੁਣਤਾਲਰੁਕ੍ਖੋ ਲਟ੍ਠਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਤਾਲੁਯ੍ਯਾਨੇ’’ਤਿ. ਵਟਰੁਕ੍ਖੇਤਿ ਨਿਗ੍ਰੋਧਰੁਕ੍ਖੇ. ਏਤ੍ਥ ‘‘ਵਟ’’ਇਤਿ ਇਮਿਨਾ ਵਟਰੁਕ੍ਖੋ ਬਹੁਮੂਲਤ੍ਤਾ ਸੁਟ੍ਠੁਂ ਪਤਿਟ੍ਠਾਤੀਤਿ ਅਤ੍ਥੇਨ ਸੁਪ੍ਪਤਿਟ੍ਠੋ ਨਾਮਾਤਿ ਦਸ੍ਸੇਤਿ. ‘‘ਰੁਕ੍ਖੇ’’ਇਤਿ ਇਮਿਨਾ ਚੇਤਿਯਸਦ੍ਦੋ ਚੇਤਿਯਰੁਕ੍ਖੇ ਵਤ੍ਤਤੀਤਿ ਦਸ੍ਸੇਤਿ, ਦੇਵਾਲਯਞ੍ਚ ਥੂਪਞ੍ਚ ਨਿਵਤ੍ਤੇਤਿ. ਤਸ੍ਸਾਤਿ ਵਟਰੁਕ੍ਖਸ੍ਸ. ਏਤਨ੍ਤਿ ‘‘ਸੁਪ੍ਪਤਿਟ੍ਠੇ ਚੇਤਿਯੇ’’ਤਿ ਏਤਂ ਨਾਮਂ. ਲੋਕਵੋਹਾਰਵਸੇਨ ਦਸਸਹਸ੍ਸਸਙ੍ਖਾਤੇ ਸਙ੍ਖ੍ਯਾਵਿਸੇਸੇ ਨੀਹਰਿਤ੍ਵਾ ਯੁਜ੍ਜਿਤਬ੍ਬਨ੍ਤਿ ਨਿਯੁਤਨ੍ਤਿ ਵਚਨਤ੍ਥੇਨ ਦਸਸਹਸ੍ਸਂ ਨਿਯੁਤਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਏਕਨਿਯੁਤਂ ਦਸਸਹਸ੍ਸਾਨੀ’’ਤਿ. ‘‘ਨਹੁਤ’’ਨ੍ਤਿਪਿ ਪਾਠੋ, ਸੋ ਅਯੁਤ੍ਤੋ ਨਹੁਤਸਙ੍ਖਾਤੇਨ ਸਙ੍ਖ੍ਯਾਵਿਸੇਸੇਨ ਮਿਸ੍ਸੀਭਾਵੇਨ ਪਸਙ੍ਗਤ੍ਤਾ. ਤੇਸਨ੍ਤਿ ਦ੍ਵਾਦਸਨਿਯੁਤਾਨਂ ਬ੍ਰਾਹ੍ਮਣਗਹਪਤਿਕਾਨਂ.

‘‘ਕਿਸਸਰੀਰਤ੍ਤਾ’’ਤਿ ਇਮਿਨਾ ਕਿਸੋ ਕੋ ਅਤ੍ਤਾ ਏਤੇਸਨ੍ਤਿ ਕਿਸਕਾਤਿ ਵਚਨਤ੍ਥਂ ਦਸ੍ਸੇਤਿ. ਕਕਾਰੋ ਹੇਤ੍ਥ ਅਤ੍ਤਵਾਚਕੋ. ‘‘ਓਵਾਦਕੋ’’ਤਿ ਇਮਿਨਾ ਓਵਦਾਨੋਤਿ ਏਤ੍ਥ ਯੁਪਚ੍ਚਯੋ ਕਤ੍ਤੁਤ੍ਥੋਤਿ ਦਸ੍ਸੇਤਿ. ਗਾਥਾਬਨ੍ਧਤ੍ਤਾ ਅਕਾਰਸ੍ਸ ਦੀਘੋ. ‘‘ਅਥ ਵਾ’’ਤਿਆਦਿਨਾ ਕਿਸਕੋ ਹੁਤ੍ਵਾ ਅਞ੍ਞੇ ਓਵਦਾਨੋ ਕਿਸਕੋਵਦਾਨੋਤਿ ਵਚਨਤ੍ਥਂ ਦਸ੍ਸੇਤਿ. ਇਦਨ੍ਤਿ ਇਦਂ ਅਤ੍ਥਜਾਤਂ, ਅਯਮਤ੍ਥੋ ਵਾ. ਤ੍ਵਂ ਪਹਾਸੀਤਿ ਸਮ੍ਬਨ੍ਧੋ. ਤਨ੍ਤਿ ਤੁਵਂ. ਇਤਿ ਵੁਤ੍ਤਂ ਹੋਤੀਤਿ ਯੋਜਨਾ.

ਕਾਮਿਤ੍ਥਿਯੋਤਿ ਏਕਾਰਲੋਪਵਸੇਨ ਸਨ੍ਧੀਤਿ ਆਹ ‘‘ਕਾਮੇ ਇਤ੍ਥਿਯੋ ਚਾ’’ਤਿ. ਉਪਚੀਸੂਤਿ ਏਤ੍ਥ ਕਾਮਖਨ੍ਧਕਿਲੇਸਅਭਿਸਙ੍ਖਾਰਸਙ੍ਖਾਤੇਸੁ ਚਤੂਸੁ ਉਪਧੀਸੁ ਖਨ੍ਧੁਪਧਿ ਅਧਿਪ੍ਪੇਤੋਤਿ ਆਹ ‘‘ਖਨ੍ਧੁਪਧੀਸੂ’’ਤਿ.

ਕੋਚਰਹੀਤਿ ਏਤ੍ਥ ਕੋਸਦ੍ਦੋ ‘‘ਕੋ ਤੇ ਬਲਂ ਮਹਾਰਾਜਾ’’ਤਿਆਦੀਸੁ (ਜਾ. ੨.੨੨.੧੮੮੦) ਵਿਯ ਕ੍ਵਸਦ੍ਦਤ੍ਥੋਤਿ ਆਹ ‘‘ਕ੍ਵਚਰਹੀ’’ਤਿ. ਨਿਪਾਤੋਯੇਵੇਸ.

ਪਦਸਦ੍ਦਸ੍ਸ ਚਰਣਪਦਾਦਯੋ ਨਿਵਤ੍ਤੇਤੁਂ ਵੁਤ੍ਤਂ ‘‘ਨਿਬ੍ਬਾਨਪਦ’’ਨ੍ਤਿ. ‘‘ਸਨ੍ਤਸਭਾਵਤਾਯਾ’’ਤਿਆਦਿਨਾ ਸਨ੍ਤੋ ਸਭਾਵੋ ਇਮਸ੍ਸ ਪਦਸ੍ਸਾਤਿ ਸਨ੍ਤਂ. ਨਤ੍ਥਿ ਉਪਧਯੋ ਏਤ੍ਥਾਤਿ ਅਨੁਪਧਿਕਂ. ਨਤ੍ਥਿ ਕਿਞ੍ਚਨਮੇਤ੍ਥਾਤਿ ਅਕਿਞ੍ਚਨਂ. ਤੀਸੁ ਭਵੇਸੁ ਨ ਸਞ੍ਜਤੀਤਿ ਅਸਤ੍ਤਂ. ਅਞ੍ਞਥਾ ਨ ਭਵਤੀਤਿ ਅਨਞ੍ਞਥਾਭਾਵਿ. ਅਞ੍ਞੇਨ ਕੇਨਚਿ ਨ ਨੇਤਬ੍ਬਨ੍ਤਿ ਅਨਞ੍ਞਨੇਯ੍ਯਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਤੇਨਾਤਿ ‘‘ਸਨ੍ਤ’’ਨ੍ਤਿਆਦਿਪਦੇਨ. ਮੇਤਿ ਮਮ, ਮਨੋਤਿ ਸਮ੍ਬਨ੍ਧੋ. ਏਤ੍ਥ ਦੇਵਮਨੁਸ੍ਸਲੋਕੇ ਮੇ ਮਨੋ ਰਤੋ ਨਾਮਾਤਿ ਕਿਂ ਵਕ੍ਖਾਮਿ. ਇਤਿ ਇਮਮਤ੍ਥਂ ਦਸ੍ਸੇਤੀਤਿ ਯੋਜਨਾ.

੫੬. ਤਞ੍ਚਾਤਿ ਸਾਵਕਭਾਵਞ੍ਚ.

੫੭. ਅਸ੍ਸਾਸਕਾਤਿ ਏਤ੍ਥ ਆਪੁਬ੍ਬੋ ਸਾਸਧਾਤੁ ਆਪੁਬ੍ਬ ਸਿਸਧਾਤੁਨਾ ਸਦਿਸੋ, ‘‘ਮੇ’’ਤਿ ਛਟ੍ਠੀਯੋਗਤ੍ਤਾ ਣ੍ਵੁਪਚ੍ਚਯੋ ਚ ਭਾਵਤ੍ਥੋਤਿ ਆਹ ‘‘ਆਸਿਸਨਾ’’ਤਿ. ‘‘ਪਤ੍ਥਨਾ’’ਤਿ ਇਮਿਨਾ ਆਪੁਬ੍ਬਸਿਸਧਾਤੁਯਾ ਅਤ੍ਥਂ ਦਸ੍ਸੇਤਿ. ਅਸ੍ਸਾਤਿ ਬਿਮ੍ਬਿਸਾਰਰਞ੍ਞੋ. ਤਤ੍ਥਾਤਿ ਰਤਨਤ੍ਤਯੇ. ਨਿਚ੍ਛਯਗਮਨਮੇਵਾਤਿ ‘‘ਸਰਣ’’ਇਤਿਨਿਚ੍ਛਯੇਨ ਜਾਨਨਮੇਵ ਗਤੋ. ਅਤ੍ਤਸਨ੍ਨਿਯ੍ਯਾਤਨਨ੍ਤਿ ਅਤ੍ਤਨੋ ਅਤ੍ਤਾਨਂ ਰਤਨਤ੍ਤਯੇ ਸਨ੍ਨਿਯ੍ਯਾਤਨਂ. ਇਮਿਨਾ ਅਤ੍ਤਸਨ੍ਨਿਯ੍ਯਾਤਨ, ਪਣਿਪਾਤ, ਤਪ੍ਪਰਾਯਨ, ਸਿਸ੍ਸਭਾਵੂਪਗਮਨਸਙ੍ਖਾਤੇਸੁ ਚਤੂਸੁ ਸਰਣਗਮਨੇਸੁ (ਦੀ. ਨਿ. ਅਟ੍ਠ. ੧.੨੫੦; ਮ. ਨਿ. ਅਟ੍ਠ. ੧.੫੬; ਖੁ. ਪਾ. ਅਟ੍ਠ. ੧.ਸਰਣਗਮਨਗਮਕਵਿਭਾਵਨਾ) ਅਤ੍ਤਸਨ੍ਨਿਯ੍ਯਾਤਨਸਰਣਗਮਨਂ ਦੀਪੇਤਿ. ਅਯਨ੍ਤਿ ਬਿਮ੍ਬਿਸਾਰੋ ਰਾਜਾ. ਤਨ੍ਤਿ ਨਿਯਤਸਰਣਤਂ. ਪਣਿਪਾਤਗਮਨਞ੍ਚਾਤਿ ਏਤ੍ਥ ਪਣੀਤਿ ਕਰੋ. ਯਥਾ ਹਿ ਪਾਦਪਦਸਦ੍ਦਾ ਦੀਘਰਸ੍ਸਵਸੇਨ ਹੁਤ੍ਵਾ ਚਰਣਂ ਵਦਨ੍ਤਿ, ਏਵਂ ਪਾਣਿਪਣਿਸਦ੍ਦਾ ਕਰਂ ਵਦਨ੍ਤਿ. ਤਸ੍ਮਾ ਵੁਤ੍ਤਂ ‘‘ਪਣੀਤਿ ਕਰੋ’’ਤਿ. ਪਤਨਂ ਪਾਤੋ, ਪਣਿਨੋ ਪਾਤੋ ਪਣਿਪਾਤੋ. ਅਤ੍ਥਤੋ ਅਞ੍ਜਲਿਪਣਮਨਨ੍ਤਿ ਵੁਤ੍ਤਂ ਹੋਤਿ. ਤਸ੍ਸ ਗਮਨਞ੍ਚ ਗਚ੍ਛਨ੍ਤੋਤਿ ਅਤ੍ਥੋ. ਇਮਿਨਾ ਪਣਿਪਾਤਸਰਣਗਮਨਂ ਦੀਪੇਤਿ. ਚਸਦ੍ਦੋ ‘‘ਪਾਕਟ’’ਨ੍ਤਿ ਏਤ੍ਥਾਪਿ ਯੋਜੇਤਬ੍ਬੋ. ਪਾਕਟਞ੍ਚ ਕਰੋਨ੍ਤੋਤਿ ਹਿ ਅਤ੍ਥੋ.

੫੮. ਸਿਙ੍ਗੀਨਿਕ੍ਖਸਵਣ੍ਣੋਤਿ ਏਤ੍ਥ ਸਿਙ੍ਗੀਸਙ੍ਖਾਤੋ ਨਿਕ੍ਖੋ ਸਿਙ੍ਗੀਨਿਕ੍ਖੋ, ਤੇਨ ਸਮਾਨੋ ਵਣ੍ਣੋ ਏਤਸ੍ਸਾਤਿ ਸਿਙ੍ਗੀਨਿਕ੍ਖਸਵਣ੍ਣੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਿਙ੍ਗੀਸੁਵਣ੍ਣਨਿਕ੍ਖੇਨ ਸਮਾਨਵਣ੍ਣੋ’’ਤਿ. ਤਤ੍ਥ ‘‘ਸੁਵਣ੍ਣ’’ਇਤਿਪਦੇਨ ਨਿਕ੍ਖਸਦ੍ਦਸ੍ਸ ਸੁਵਣ੍ਣਤ੍ਥਂ ਦਸ੍ਸੇਤਿ, ਪਞ੍ਚਸੁਵਣ੍ਣਾਦਯੋ ਅਤ੍ਥੇ ਨਿਵਤ੍ਤੇਤਿ. ‘‘ਸਮਾਨ’’ਇਤਿਪਦੇਨ ਸਵਣ੍ਣੋਤਿ ਏਤ੍ਥ ਸਕਾਰੋ ਸਮਾਨਸਦ੍ਦਸ੍ਸੇਵ ਕਾਰਿਯੋਤਿ ਦਸ੍ਸੇਤਿ. ਸਬ੍ਬੇਸੂਤਿ ਅਖਿਲੇਸੁ ਚਕ੍ਖਾਦਿਇਨ੍ਦ੍ਰਿਯੇਸੁ. ਦਨ੍ਤੋਤਿ ਦਮਿਤੋ. ਇਨ੍ਦ੍ਰਿਯਸਂਵਰੋਤਿ ਵੁਤ੍ਤਂ ਹੋਤਿ. ਤਮੇਵਤ੍ਥਂ ਪਾਕਟਂ ਕਰੋਨ੍ਤੋ ਆਹ ‘‘ਭਗਵਤੋ ਹੀ’’ਤਿਆਦਿ.

੫੯. ਓਣੀਤੋ ਪਤ੍ਤਤੋ ਪਾਣਿ ਯੇਨਾਤਿ ਓਣੀਤਪਤ੍ਤਪਾਣੀਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਤ੍ਤਤੋ ਚਾ’’ਤਿਆਦਿ. ‘‘ਅਪਨੀਤਪਾਣਿ’’ਨ੍ਤਿ ਇਮਿਨਾ ਓਣੀਤਸਦ੍ਦੋ ਅਪਨੀਤਤ੍ਥੋ, ਪਾਣਿਸਦ੍ਦੇਨ ਚ ਸਮ੍ਬਨ੍ਧਿਤਬ੍ਬੋਤਿ ਦਸ੍ਸੇਤਿ. ‘‘ਸਲ੍ਲਕ੍ਖੇਤ੍ਵਾ’’ਤਿ ਇਮਿਨਾ ‘‘ਭਗਵਨ੍ਤ’’ਨ੍ਤਿ ਇਮਂ ਕਮ੍ਮਂ ‘‘ਸਲ੍ਲਕ੍ਖੇਤ੍ਵਾ’’ਤਿ ਪਾਠਸੇਸੇਨ ਯੋਜੇਤਬ੍ਬਨ੍ਤਿ ਦਸ੍ਸੇਤਿ. ਏਕਮਨ੍ਤਨ੍ਤਿ ਏਤ੍ਥ ਅਨ੍ਤਸਦ੍ਦੋ ਸਮੀਪਦੇਸਤ੍ਥੋ, ਕੋਟਿਦੇਸਤ੍ਥੋ ਵਾ ਹੋਤਿ, ਉਪਯੋਗਵਚਨਞ੍ਚ ਭੁਮ੍ਮਤ੍ਥੇ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਏਕਸ੍ਮਿਂ ਪਦੇਸੇ’’ਤਿ. ਅਤ੍ਥਿਕਪਯੋਗੇ ਕਰਣਸ੍ਸ ਸਮ੍ਭਵਤੋ ਆਹ ‘‘ਬੁਦ੍ਧਾਭਿਵਾਦਨਗਮਨੇਨ ਵਾ ਧਮ੍ਮਸ੍ਸਵਨਗਮਨੇਨ ਵਾ’’ਤਿ. ਅਪ੍ਪਾਕਿਣ੍ਣਨ੍ਤਿ ਏਤ੍ਥ ਅਪ੍ਪਸਦ੍ਦੋ ਪਟਿਸੇਧਤ੍ਥੋਤਿ ਆਹ ‘‘ਅਨਾਕਿਣ੍ਣ’’ਨ੍ਤਿ. ‘‘ਅਬ੍ਬੋਕਿਣ੍ਣ’’ਨ੍ਤਿਪਿ ਪਾਠੋ. ਅਪ੍ਪਨਿਗ੍ਘੋਸਨ੍ਤਿ ਏਤ੍ਥ ‘‘ਅਪ੍ਪਸਦ੍ਦ’’ਨ੍ਤਿਪਦੇਨ ਵਚਨਸਦ੍ਦਸ੍ਸ ਗਹਿਤਤ੍ਤਾ ਇਮਿਨਾ ਪਾਰਿਸੇਸਨਯੇਨ ਨਗਰਨਿਗ੍ਘੋਸਸਦ੍ਦੋਯੇਵ ਗਹੇਤਬ੍ਬੋਤਿ ਆਹ ‘‘ਨਗਰਨਿਗ੍ਘੋਸਸਦ੍ਦੇਨ ਅਪ੍ਪਨਿਗ੍ਘੋਸ’’ਨ੍ਤਿ. ਤੀਸੁ ਪਾਠੇਸੁ ਪਠਮੇਨ ਪਾਠੇਨ ਜਨਸ੍ਸ ਵਾਤੋ ਜਨਵਾਤੋ, ਤੇਨ ਵਿਰਹਿਤਂ ਵਿਜਨਵਾਤਨ੍ਤਿ ਵਿਕਪ੍ਪਂ ਦਸ੍ਸੇਤਿ. ਦੁਤਿਯੇਨ ਜਨਸ੍ਸ ਵਾਦੋ ਜਨਵਾਦੋ, ਤੇਨ ਵਿਰਹਿਤਂ ਵਿਜਨਵਾਦਨ੍ਤਿ ਵਿਕਪ੍ਪਂ ਦਸ੍ਸੇਤਿ. ਤਤਿਯੇਨ ਜਨਸ੍ਸ ਪਾਤੋ ਸਞ੍ਚਰਣਂ ਜਨਪਾਤੋ, ਤੇਨ ਵਿਰਹਿਤਂ ਵਿਜਨਪਾਤਨ੍ਤਿ ਵਿਕਪ੍ਪਂ ਦਸ੍ਸੇਤਿ. ਰਹਸ੍ਸਂ ਕਰੀਯਤਿ ਏਤ੍ਥਾਤਿ ਰਾਹਸ੍ਸੇਯ੍ਯਕਂ. ਮਨੁਸ੍ਸਾਨਂ ਰਾਹਸ੍ਸੇਯ੍ਯਕਂ ਮਨੁਸ੍ਸਰਾਹਸ੍ਸੇਯ੍ਯਕਨ੍ਤਿ ਵਚਨਤ੍ਥਂ ਦਸ੍ਸੇਤਿ ‘‘ਮਨੁਸ੍ਸਾਨ’’ਨ੍ਤਿਆਦਿਨਾ.

੧੪. ਸਾਰਿਪੁਤ੍ਤਮੋਗ੍ਗਲ੍ਲਾਨ ਪਬ੍ਬਜ੍ਜਾਕਥਾ

੬੦. ‘‘ਤੇਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨਾ. ਅਗਮਂਸੁ ਕਿਰਾਤਿ ਯੋਜਨਾ. ਤਤ੍ਰਾਤਿ ਗਿਰਗ੍ਗਸਮਜ੍ਜੇ. ਅਥਾਤਿ ਪਰਿਵਿਤਕ੍ਕਨਾਨਨ੍ਤਰਂ. ਤਸ੍ਸਾਤਿ ਸਞ੍ਚਯਸ੍ਸ. ਪਾਰਨ੍ਤਿ ਪਰਤੀਰਂ. ਏਤ੍ਥਾਤਿ ਤੁਮ੍ਹਾਕਂ ਵਾਦੇ. ਇਦਨ੍ਤਿ ਅਯਂ ਵਾਦੋ ਏਤ੍ਤਕੋਯੇਵਾਤਿ ਅਤ੍ਥੋ. ਯੋਤਿ ਯੋ ਕੋਚਿ. ਤ੍ਵਞ੍ਚ ਅਹਞ੍ਚ ਅਮ੍ਹੇ, ਤੇਸੁ. ਨਾਮਤੁਮ੍ਹਸਙ੍ਖਾਤੇਸੁ ਹਿ ਤੀਸੁ ਸਦ੍ਦੇਸੁ ਏਕਸੇਸੇਨ ਕਤ੍ਤਬ੍ਬੇਸੁ ਪਚ੍ਛਿਮਸ੍ਸੇਵ ਏਕਸੇਸੋ ਕਾਤਬ੍ਬੋ. ਤੇਨਾਤਿ ਕਤਿਕਕਰਣਹੇਤੁਨਾ.

ਸਂਖੇਪੇਨ ਵੁਤ੍ਤਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਇਦਂ ਹੀ’’ਤਿਆਦਿ. ਅਤ੍ਥੀਕੇਹੀਤਿ ਅਮਤੇਨ ਅਤ੍ਥਿਕੇਹਿ. ਉਪਞ੍ਞਾਤਂ ਮਗ੍ਗਨ੍ਤਿ ਅਮਤਸ੍ਸ ਮਗ੍ਗੋ ਉਪਗਨ੍ਤ੍ਵਾ ਞਾਤੋ. ਞਾਤੋ ਚੇਵ ਉਪਗਤੋ ਚਾਤਿ ਸਹ ਉਪਸਗ੍ਗੇਨ ਪਦਂ ਪਰਿਵਤ੍ਤਿਤ੍ਵਾ ਅਤ੍ਥਂ ਕਥੇਨ੍ਤੋ ਉਪਸਗ੍ਗਤ੍ਥੋ ਚ ਧਾਤੁਤ੍ਥੋ ਚ ਵਿਸੁਂਯੇਵ ਹੋਤੀਤਿ ਞਾਪੇਤਿ. ਅਤ੍ਥਿਕੇਹਿ ਅਮ੍ਹੇਹਿ ਉਪਞ੍ਞਾਤਂ ਨਿਬ੍ਬਾਨਂ ਮਗ੍ਗਂ ਮਗ੍ਗਨ੍ਤੋ ਅਨੁਬਨ੍ਧੇਯ੍ਯਨ੍ਤਿ ਵਾ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਮਗ੍ਗਫਲਪਚ੍ਚਵੇਕ੍ਖਣਞਾਣੇਹਿ ਉਪਗਨ੍ਤ੍ਵਾ ਞਾਤਬ੍ਬਨ੍ਤਿ ਉਪਞ੍ਞਾਤਂ ਨਿਬ੍ਬਾਨਂ. ਮਗ੍ਗਧਾਥੁਯਾ ਅਨ੍ਵੇਸਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਰਿਯੇਸਨ੍ਤੋ’’ਤਿ.

ਸਾਰਿਪੁਤ੍ਤੋਪਿ ਪਞ੍ਹਂ ਪੁਚ੍ਛੀਤਿ ਸਮ੍ਬਨ੍ਧੋ. ਕਮਣ੍ਡਲੁਤੋਤਿ ਕੁਣ੍ਡਿਕਤੋ. ਅਤ੍ਤਨੋ ਚ ਪਰੇਸਞ੍ਚ ਅਕਥਨੇਨ ਅਨ੍ਤਰੇ ਵਿਵਰਂ ਪਟਿਸਨ੍ਦਹਤੀਤਿ ਪਟਿਸਨ੍ਧਾਰੋ, ਤਂ. ਏਤ੍ਥਾਤਿ ‘‘ਨ ਤ੍ਯਾਹਂ ਸਕ੍ਕੋਮੀ’’ਤਿਪਦੇ. ਅਧਿਪ੍ਪਾਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਏਤ੍ਤਕਨ੍ਤਿ ਏਤ੍ਤਕਂ ਪਞ੍ਹਂ. ਇਮਸ੍ਸਾਤਿ ਪਰਿਬ੍ਬਾਜਕਸ੍ਸ. ਅਵਿਸਯਭਾਵਨ੍ਤਿ ਅਤ੍ਤਨੋ ਅਵਿਸਯਭਾਵਂ.

ਹੇਤੁਂ ਪਟਿਚ੍ਚ ਭਵਨ੍ਤੀਤਿ ਹੇਤੁਪ੍ਪਭਵਾਤਿ ਵਚਨਤ੍ਥੇਨ ਪਞ੍ਚਕ੍ਖਨ੍ਧਾ ਹੇਤੁਪ੍ਪਭਵਾ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਹੇਤੁਪ੍ਪਭਵਾ ਨਾਮ ਪਞ੍ਚਕ੍ਖਨ੍ਧਾ’’ਤਿ. ਤੇਨਾਤਿ ‘‘ਯੇ ਧਮ੍ਮਾ ਹੇਤੁਪ੍ਪਭਵਾ’’ਤਿ ਪਦੇਨ. ਅਸ੍ਸਾਤਿ ਸਾਰਿਪੁਤ੍ਤਪਰਿਬ੍ਬਾਜਕਸ੍ਸ. ‘‘ਤੇਸਂ ਹੇਤੁ ਨਾਮ ਸਮੁਦਯਸਚ੍ਚ’’ਨ੍ਤਿ ਇਮਿਨਾ ਹਿਨੋਤਿ ਏਤਸ੍ਮਾ ਫਲਨ੍ਤਿ ਹੇਤੂਤਿ ਵਚਨਤ੍ਥੇਨ ਸਮੁਦਯਸਚ੍ਚਂ ਹੇਤੁ ਨਾਮਾਤਿ ਦਸ੍ਸੇਤਿ. ਤਞ੍ਚਾਤਿ ਸਮੁਦਯਸਚ੍ਚਞ੍ਚ. ਤੇਸਨ੍ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਉਭਿਨ੍ਨਮ੍ਪਿ ਸਚ੍ਚਾਨ’’ਨ੍ਤਿ. ਅਪਵਤ੍ਤਿਵਸੇਨ ਨਿਰੁਜ੍ਝਤਿ ਏਤ੍ਥਾਤਿ ਨਿਰੋਧੋ. ਤਞ੍ਚਾਤਿ ਨਿਰੋਧਞ੍ਚ. ਤੇਨਾਤਿ ‘‘ਤੇਸਞ੍ਚ ਯੋ ਨਿਰੋਧੋ’’ਤਿਪਦੇਨ. ਅਸ੍ਸਾਤਿ ਸਾਰਿਪੁਤ੍ਤਪਰਿਬ੍ਬਾਜਕਸ੍ਸ. ਏਤ੍ਥਾਤਿ ਇਮਿਸ੍ਸਂ ਗਾਥਾਯਂ, ਚਤੂਸੁ ਸਚ੍ਚੇਸੁ ਵਾ. ਨਯਤੋਤਿ ਨਾਨਨ੍ਤਰਿਕਨਯਤੋ, ਅਵਿਨਾਭਾਵਨਯਤੋ ਵਾ, ਨੇਤ੍ਤਿਦੇਸਨਾਹਾਰਨਯਤੋ ਵਾ. ਤਮੇਵਤ੍ਥਂ ਪਾਕਟਂ ਕਰੋਨ੍ਤੋ ਆਹ ‘‘ਨਿਰੋਧੇ ਹੀ’’ਤਿਆਦਿ. ਏਕਦੇਸਸਰੂਪੇਕਸੇਸਨਯੇਨ ਵਾ ਮਗ੍ਗਸਚ੍ਚਂ ਗਹੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਨਿਰੋਧੋ ਚ ਨਿਰੋਧੂਪਾਯੋ ਚ ਨਿਰੋਧੋਤਿ ਏਕਦੇਸਸਰੂਪੇਕਸੇਸੋ ਕਾਤਬ੍ਬੋ. ਤੇਸਞ੍ਚਾਤਿ ਏਤ੍ਥ ਅਵੁਤ੍ਤਸਮ੍ਪਿਣ੍ਡਨਤ੍ਥੇਨ ਚਸਦ੍ਦੇਨ ਮਗ੍ਗਸਚ੍ਚਂ ਗਹੇਤਬ੍ਬਨ੍ਤਿਪਿ ਵਦਨ੍ਤਿ. ਅਯਂ ਨਯੋ ਅਟ੍ਠਕਥਾਯਂ ਨ ਵੁਤ੍ਤੋ. ਤਮੇਵਤ੍ਥਨ੍ਤਿ ਚਤੁਸਚ੍ਚਸਙ੍ਖਾਤਂ ਤਮੇਵਤ੍ਥਂ. ਪਟਿਪਾਦੇਨ੍ਤੋਤਿ ਨਿਗਮੇਨ੍ਤੋ.

‘‘ਸਚੇਪੀ’’ਤਿ ਇਮਿਨਾ ਯਦੀਤਿ ਪਦਸ੍ਸਤ੍ਥਂ ਵਣ੍ਣੇਤਿ. ‘‘ਏਤ੍ਤਕਮੇਵਾ’’ਤਿ ਇਮਿਨਾ ਤਾਵਦੇਵਾਤਿ ਪਦਸ੍ਸਤ੍ਥਂ ਵਣ੍ਣੇਤਿ. ‘‘ਇਤੋ ਉਤ੍ਤਰਿ ਨਤ੍ਥੀ’’ਤਿ ਇਮਿਨਾ ਏਵਕਾਰਸ੍ਸ ਫਲਂ ਦਸ੍ਸੇਤਿ. ਇਤੋਤਿ ਸੋਤਾਪਤ੍ਤਿਫਲਤੋ. ‘‘ਇਦਂ…ਪੇ… ਪਤ੍ਤਬ੍ਬ’’ਨ੍ਤਿ ਇਮਿਨਾ ‘‘ਏਤ੍ਤਕਮੇਵਾ’’ਤਿ ਪਦਸ੍ਸ ਅਤ੍ਥਸਰੂਪਂ ਦਸ੍ਸੇਤਿ. ‘‘ਏਸੋ ਏਵ ਧਮ੍ਮੋ’’ਤਿ ਇਮਿਨਾ ‘‘ਏਸੇਵ ਧਮ੍ਮੋ’’ਤਿਪਦਸ੍ਸ ਅਤ੍ਥਂ ਵਣ੍ਣੇਤਿ. ਪਚ੍ਚਬ੍ਯਤ੍ਥਾਤਿ ਪਤਿਅਵਪੁਬ੍ਬੋ ਇਧਾਤੁ ਪਟਿਵਿਦ੍ਧਤ੍ਥੋਤਿ ਆਹ ‘‘ਪਟਿਵਿਦ੍ਧਤ੍ਥਾ’’ਤਿ. ਤੁਮ੍ਹੇਹੀਤਿ ਅਸ੍ਸਜਿਤ੍ਥੇਰਂ ਸਨ੍ਧਾਯਾਹ. ਇਮਿਨਾ ‘‘ਪਚ੍ਚਬ੍ਯਤ੍ਥਾ’’ਤਿ ਏਤ੍ਥ ਹਿਯ੍ਯਤ੍ਤਨੀਪਰਸ੍ਸਪਦਮਜ੍ਝਿਮਪੁਰਿਸਬਹੁਵਚਨਤ੍ਥਵਿਭਤ੍ਤਿਂ ਦੀਪੇਤਿ. ਕਪ੍ਪਨਹੁਤੇਹੀਤਿ ਕਪ੍ਪਾਨਂ ਨਹੁਤੇਹਿ, ਕੋਟਿਪਕੋਟਿਸਤਸਹਸ੍ਸਾਨਂ ਸਤੇਹਿ ਨਹੁਤੇਹੀਤਿ ਅਤ੍ਥੋ. ਅਬ੍ਭਤੀਤਨ੍ਤਿ ਅਭਿਅਤੀਤਂ. ਅਮ੍ਹੇਹਿ ਅਦਿਟ੍ਠਮੇਵ ਹੁਤ੍ਵਾ ਅਤਿਕ੍ਕਮਾਪਿਤਨ੍ਤਿ ਅਤ੍ਥੋ.

੬੨. ਆਰਮ੍ਮਣਭੂਤਸ੍ਸ ਨਿਬ੍ਬਾਨਸ੍ਸ ਗਮ੍ਭੀਰਤ੍ਤਾ ਆਰਮ੍ਮਣਿਕਭੂਤਂ ਞਾਣਮ੍ਪਿ ਗਮ੍ਭੀਰਮੇਵਾਧਿਪ੍ਪੇਤਨ੍ਤਿ ਆਹ ‘‘ਗਮ੍ਭੀਰਸ੍ਸ ਚ ਞਾਣਸ੍ਸਾ’’ਤਿ. ਯਥਾ ਹਿ ਸਣ੍ਹਵਤ੍ਥਸ੍ਸ ਸਿਬ੍ਬਨਤ੍ਥਾਯ ਸਣ੍ਹਸੂਚਿ ਅਧਿਪ੍ਪੇਤਾਤਿ. ਉਪਧੀਨਂ ਸਮ੍ਮਾ ਖਯਟ੍ਠੇਨ ਨਿਬ੍ਬਾਨਂ ਉਪਧਿਸਙ੍ਖਯਂ ਨਾਮਾਤਿ ਆਹ ‘‘ਉਪਧਿਸਙ੍ਖਯੇਤਿ ਨਿਬ੍ਬਾਨੇ’’ਤਿ. ਤਦਾਰਮ੍ਮਣਾਯਾਤਿ ਤਂਨਿਬ੍ਬਾਨਾਰਮ੍ਮਣਾਯ. ਵਿਮੁਤ੍ਤਿਯਾਤਿ ਫਲਵਿਮੁਤ੍ਤਿਯਾ. ਸਾਵਕਪਾਰਮੀਞਾਣੇਤਿ ਅਗ੍ਗਸਾਵਕਪਾਰਮੀਞਾਣੇ. ਤੇਸੂਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨੇਸੁ. ਅਡ੍ਢਮਾਸੇਨ ਅਰਹਤ੍ਤੇ ਪਤਿਟ੍ਠਿਤੋਤਿ ਸਮ੍ਬਨ੍ਧੋ.

ਅਤੀਤੇਤਿ ਕਪ੍ਪਸਤਸਹਸ੍ਸਾਧਿਕੇ ਅਸਙ੍ਖ੍ਯੇਯ੍ਯਮਤ੍ਥਕੇ. ਤਸ੍ਸਾਤਿ ਬੁਦ੍ਧਸ੍ਸ ਸਨ੍ਤਿਕੇ ਅਗ੍ਗਸਾਵਕਭਾਵਂ ਪਤ੍ਥੇਸੀਤਿ ਯੋਜਨਾ. ਅਸ੍ਸਮੇਤਿ ਮੁਨੀਨਂ ਠਾਨੇ. ਤਞ੍ਹਿ ਆ ਕੋਧਂ, ਆ ਭੁਸੋ ਵਾ ਰਾਗਾਦਯੋ ਸਮੇਨ੍ਤਿ ਏਤ੍ਥਾਤਿ ਅਸ੍ਸਮੋਤਿ ਵੁਚ੍ਚਤਿ, ਤਸ੍ਮਿਂ. ਪਤ੍ਥਯਿਤ੍ਵਾ ਚ ਪੇਸੇਸੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਨੀਲੁਪ੍ਪਲਮਣ੍ਡਪੇ. ਤੇਸੂਤਿ ਤਾਪਸਸੇਟ੍ਠੀਸੁ.

੬੩. ਯੇਸਨ੍ਤਿ ਕੁਲਾਨਂ. ‘‘ਵਿਧਵਭਾਵਾਯਾ’’ਤਿ ਇਮਿਨਾ ਵਿਧਵਾਯ ਭਾਵੋ ਵੇਧਬ੍ਯਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਵਿਧਵਾਤਿ ਚ ਪਤਿਸੁਞ੍ਞਾ. ਸਾ ਹਿ ਧਵੇਨ ਵਿਗਤਾਤਿ ‘‘ਵਿਧਵਾ’’ਤਿ ਚ, ਵਿਗਤੋ ਧਵੋ ਇਮਿਸ੍ਸਾਤਿ ‘‘ਵਿਧਵਾ’’ਤਿ ਚ ਵੁਚ੍ਚਤਿ. ਉਭਯੇਨਾਪੀਤਿ ਪੁਤ੍ਤਪਬ੍ਬਜ੍ਜਪਤਿਪਬ੍ਬਜ੍ਜਸਙ੍ਖਾਤੇਨ ਦੁਵਿਧੇਨਪਿ.

ਸਞ੍ਚਯਾਨੀਤਿ ਏਤ੍ਥ ਨਿਸ੍ਸਯੂਪਚਾਰੇਨ ਨਿਸ੍ਸਯੇ ਨਿਸ੍ਸਿਤੂਪਚਾਰੋ ਹੋਤੀਤਿ ਆਹ ‘‘ਸਞ੍ਚਯਸ੍ਸ ਅਨ੍ਤੇਵਾਸਿਕਾਨੀ’’ਤਿ. ਅਥ ਵਾ ਣਪਚ੍ਚਯੋ ਤਸ੍ਸੇਦਮਤ੍ਥੇ ਹੋਤੀਤਿ ਆਹ ‘‘ਸਞ੍ਚਯਸ੍ਸ ਅਨ੍ਤੇਵਾਸਿਕਾਨੀ’’ਤਿ. ‘‘ਮਗਧਾਨ’’ਨ੍ਤਿ ਬਹੁਵਚਨਵਸੇਨ ਵੁਤ੍ਤਤ੍ਤਾ ਜਨਪਦਸ੍ਸ ਨਾਮਨ੍ਤਿ ਆਹ ‘‘ਮਗਧਾਨਂ ਜਨਪਦਸ੍ਸਾ’’ਤਿ. ਗਿਰਿਬ੍ਬਜਨ੍ਤਿ ਏਤ੍ਥ ਵਜੋ ਵਿਯਾਤਿ ਵਜੋ, ਗਿਰਿ. ਵਜਸਦਿਸੋ ਗਿਰਿ ਏਤ੍ਥਾਤਿ ਗਿਰਿਬ੍ਬਜਂ ਪਦਹੇਟ੍ਠੁਪਰਿਯਵਸੇਨ, ਨਗਰਂ. ‘‘ਮਹਾਵੀਰਿਯਵਨ੍ਤੋ’’ਤਿ ਇਮਿਨਾ ਮਹਨ੍ਤੋ ਵੀਰੋ ਏਤੇਸਂ ਤਥਾਗਤਾਨਨ੍ਤਿ ਮਹਾਵੀਰਾਤਿ ਵਚਨਤ੍ਥਂ ਦਸ੍ਸੇਤਿ. ਧਮ੍ਮੇਨ ਨਯਮਾਨਾਨਂ ਕਾ ਉਸੂਯਾ ਵਿਜਾਨਤਨ੍ਤਿ ਏਤ੍ਥ ਕਚ੍ਚਾਯਨਨਯੇਨ (ਕਚ੍ਚਾਯਨੇ ੨੭੭ ਸੁਤ੍ਤੇ) ਉਸੂਯਪਯੋਗੇ ਸਮ੍ਪਦਾਨਂ ਹੋਤੀਤਿ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਭੁਮ੍ਮਤ੍ਥੇ ਸਾਮਿਵਚਨਂ, ਉਪਯੋਗਤ੍ਥੇ ਵਾ’’ਤਿ. ਵਿਜਾਨਨ੍ਤਾਨਨ੍ਤਿ ਵਿਜਾਨਨ੍ਤੇਸੁ ਤਥਾਗਤੇਸੁ, ਵਿਜਾਨਨ੍ਤੇ ਵਾ.

੧੫. ਉਪਜ੍ਝਾਯਵਤ੍ਤਕਥਾ

੬੪. ਅਨੁਪਜ੍ਝਾਯਕਾਤਿ ਏਤ੍ਥ ਵਜ੍ਜਾਵਜ੍ਜਂ ਉਪਗਨ੍ਤ੍ਵਾ ਝਾਯਤੀਤਿ ਉਪਜ੍ਝਾਯੋ, ਸੋ ਨਤ੍ਥਿ ਏਤੇਸਨ੍ਤਿ ਅਨੁਪਜ੍ਝਾਯਕਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਵਜ੍ਜਾਵਜ੍ਜ’’ਨ੍ਤਿਆਦਿ. ‘‘ਪਿਣ੍ਡਾਯ ਚਰਣਕਪਤ੍ਤ’’ਨ੍ਤਿ ਇਮਿਨਾ ਪਿਣ੍ਡਾਯ ਉਦ੍ਦਿਸ੍ਸ, ਉਟ੍ਠਹਿਤ੍ਵਾ ਵਾ ਤਿਟ੍ਠਤਿ ਅਨੇਨਾਤਿ ਉਤ੍ਤਿਟ੍ਠੋ, ਸੋਯੇਵ ਪਤ੍ਤੋ ਉਤ੍ਤਿਟ੍ਠਪਤ੍ਤੋਤਿ ਅਤ੍ਥਂ ਦਸ੍ਸੇਤਿ. ‘‘ਉਤ੍ਤਿਟ੍ਠੇ ਨ ਪਮਜ੍ਜੇਯ੍ਯਾ’’ਤਿਆਦੀਸੁ (ਧ. ਪ. ੧੬੮) ਪਨ ਪਿਣ੍ਡਾਯ ਚਰਣਂ ‘‘ਉਤ੍ਤਿਟ੍ਠ’’ਨ੍ਤਿ ਵੁਚ੍ਚਤਿ. ਤਸ੍ਮਾ ਤਤ੍ਥ ਪਿਣ੍ਡਾਯ ਉਦ੍ਦਿਸ੍ਸ, ਉਟ੍ਠਹਿਤ੍ਵਾ ਵਾ ਤਿਟ੍ਠਨਂ ਉਤ੍ਤਿਟ੍ਠਨ੍ਤਿ ਵਚਨਤ੍ਥੋ ਕਾਤਬ੍ਬੋ. ‘‘ਪਿਣ੍ਡਾਯ ਚਰਣਪਤ੍ਤ’’ਨ੍ਤਿ ਇਦਂ ਵਚਨਂ ‘‘ਤਸ੍ਮਿਞ੍ਹਿ ਮਨੁਸ੍ਸਾ ਉਚ੍ਛਿਟ੍ਠਸਞ੍ਞਿਨੋ’’ਤਿਪਦਂ ਲਙ੍ਘਿਤ੍ਵਾ ‘‘ਤਸ੍ਮਾ ਉਤ੍ਤਿਟ੍ਠਪਤ੍ਤਨ੍ਤਿ ਵੁਤ੍ਤ’’ਨ੍ਤਿਪਦੇਨ ਯੋਜੇਤਬ੍ਬਂ, ਤਸ੍ਮਾ ਪਿਣ੍ਡਾਯ ਚਰਣਕਪਤ੍ਤਤ੍ਤਾ ਉਤ੍ਤਿਟ੍ਠਪਤ੍ਤਨ੍ਤਿ ਵੁਤ੍ਤਨ੍ਤਿ ਵੁਤ੍ਤਂ ਹੋਤਿ. ਤਸ੍ਮਿਂ ਮਨੁਸ੍ਸਾ ਕਿਂਸਞ੍ਞਿਨੋਤਿ ਆਹ ‘‘ਤਸ੍ਮਿਞ੍ਹਿ ਮਨੁਸ੍ਸਾ ਉਚ੍ਛਿਟ੍ਠਸਞ੍ਞਿਨੋ’’ਤਿ. ਤਸ੍ਮਿਞ੍ਹਿ ਤਸ੍ਮਿਂ ਏਵ ਉਤ੍ਤਿਟ੍ਠਪਤ੍ਤੇ ਪਬ੍ਬਜਿਤਾਨਂ ਪਰਿਭੋਗਭਾਵੇਨ ਮਨੁਸ੍ਸੇਹਿ ਅਵਸਜ੍ਜਿਤਬ੍ਬਤ੍ਤਾ, ਅਵਛਡ੍ਡੇਤਬ੍ਬਤ੍ਤਾ ਵਾ ਮਨੁਸ੍ਸਾ ਉਚ੍ਛਿਟ੍ਠਸਞ੍ਞਿਨੋ ਹੋਨ੍ਤੀਤਿ ਯੋਜਨਾ. ਪਬ੍ਬਜਿਤਾਨਂ ਪਿਣ੍ਡਾਯ ਚਰਣਕਪਤ੍ਤਤ੍ਤਾ ਉਤ੍ਤਿਟ੍ਠਪਤ੍ਤਨ੍ਤਿ ਵੁਤ੍ਤਂ, ਮਨੁਸ੍ਸਾਨਂ ਪਨ ਅਵਸਜ੍ਜਿਤਪਤ੍ਤਤ੍ਤਾ ਉਚ੍ਛਿਟ੍ਠਪਤ੍ਤਨ੍ਤਿ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਉਤ੍ਤਿਟ੍ਠ ਪਤ੍ਤਨ੍ਤਿਪਦਂ ਵਾਕ੍ਯਮੇਵ, ਨ ਸਮਾਸੋਤਿਪਿ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ‘‘ਉਟ੍ਠਹਿਤ੍ਵਾ’’ਤਿ ਇਮਿਨਾ ਉਤ੍ਤਿਟ੍ਠਾਤਿ ਏਤ੍ਥ ਤ੍ਵਾਲੋਪੋਤਿ ਦਸ੍ਸੇਤਿ. ‘‘ਗਹੇਤੁ’’ਨ੍ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਗੇਹਸਿਤਪੇਮਵਸੇਨਾਤਿ ਗੇਹੇ ਨਿਸ੍ਸਿਤਪੇਮਵਸੇਨ, ਮੇਤ੍ਤਾਪੁਬ੍ਬਙ੍ਗਮਪੇਮਵਸੇਨਾਤਿ ਅਤ੍ਥੋ. ਸਗਾਰਵਾ ਹੁਤ੍ਵਾ ਸਪ੍ਪਤਿਸ੍ਸਾ ਹੁਤ੍ਵਾ ਵਿਹਰਨ੍ਤਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਉਪਟ੍ਠਪੇਤ੍ਵਾ’’ਤਿ. ‘‘ਸਭਾਗਜੀਵਿਕਾ’’ਤਿ ਇਮਿਨਾ ਸਭਾਗਵੁਤ੍ਤਿਕਾਤਿ ਏਤ੍ਥ ਵੁਤ੍ਤਿਸਦ੍ਦੋ ਜੀਵਿਕਤ੍ਥੋਯੇਵ, ਨ ਵਿਵਰਣਾਦ੍ਯਤ੍ਥੋਤਿ ਦਸ੍ਸੇਤਿ. ਉਪਜ੍ਝਾਯਭਾਵਂ ਸਮ੍ਪਟਿਚ੍ਛਤਿ ਏਤੇਹੀਤਿ ਉਪਜ੍ਝਾਯਭਾਵਸਮ੍ਪਟਿਚ੍ਛਨਾਨਿ, ਤਾਨਿਯੇਵ ਵੇਵਚਨਾਨਿ ਉਪਜ੍ਝਾਯਭਾਵਸਮ੍ਪਟਿਚ੍ਛਨਵੇਵਚਨਾਨਿ. ਤਿਕ੍ਖਤ੍ਤੁਨ੍ਤਿ ਉਕ੍ਕਟ੍ਠਵਸੇਨ ਵੁਤ੍ਤਂ, ਸਕਿਮ੍ਪਿ ਵਟ੍ਟਤਿਯੇਵ. ਪਦਸ੍ਸ ਵਸੇਨ ਵਿਞ੍ਞਾਪੇਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਏਤ੍ਥਾਤਿ ਉਪਜ੍ਝਾਯਗਹਣਟ੍ਠਾਨੇ. ਯਦਿਦਂ ਵਾਚਾਯ ਵਾ ਸਾਵਨਂ, ਯਦਿਦਂ ਕਾਯੇਨ ਵਾ ਅਤ੍ਥਵਿਞ੍ਞਾਪਨਂ ਅਤ੍ਥਿ, ਇਦਮੇਵ ਸਾਵਨਅਤ੍ਥਵਿਞ੍ਞਾਪਨਮੇਵ ਉਪਜ੍ਝਾਯਗਹਣਨ੍ਤਿ ਯੋਜਨਾ. ਸਾਧੂਤਿ ਸਮ੍ਪਟਿਚ੍ਛਨਨ੍ਤਿ ਉਪਜ੍ਝਾਯੇਨ ਪਞ੍ਚਸੁ ਪਦੇਸੁ ਯਸ੍ਮਿਂ ਕਿਸ੍ਮਿਂਚਿ ਵੁਤ੍ਤੇ ਸਦ੍ਧਿਵਿਹਾਰਿਕਸ੍ਸ ‘‘ਸਾਧੂ’’ਤਿ ਸਮ੍ਪਟਿਚ੍ਛਨਂ. ਤਨ੍ਤਿ ਕੇਸਞ੍ਚਿ ਵਚਨਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤ੍ਥਾਤਿ ਉਪਜ੍ਝਾਯਗਹਣੇ. ‘‘ਨ ਸਮ੍ਪਟਿਚ੍ਛਨਂ ਅਙ੍ਗ’’ਨ੍ਤਿ ਇਮਿਨਾ ਆਯਾਚਨਦਾਨਾਨਿਯੇਵ ਅਙ੍ਗਾਨਿ ਨਾਮਾਤਿ ਦਸ੍ਸੇਤਿ. ਸਦ੍ਧਿਵਿਹਾਰਿਕੇਨਾਪਿ ਞਾਤੁਨ੍ਤਿ ਸਮ੍ਬਨ੍ਧੋ. ਇਮਿਨਾ ਪਦੇਨਾਤਿ ‘‘ਸਾਧੂ’’ਤਿ ਇਮਿਨਾ ਪਦੇਨ.

ਤਤ੍ਰਾਯਂ ਸਮ੍ਮਾਵਤ੍ਤਨਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਯਂ ਵੁਤ੍ਤਂ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ. ਇਮਿਨਾ ਕਿਰਿਯਾਵਿਸਯਭਾਵਮੇਵ ਦੀਪੇਤਿ, ਨ ਦਬ੍ਬਵਿਸਯਭਾਵਂ. ਅਯਨ੍ਤਿ ਵੁਚ੍ਚਮਾਨਾ. ਅਸ੍ਸਾਤਿ ਸਦ੍ਧਿਵਿਹਾਰਿਕਸ੍ਸ. ਧੋਤਪਾਦਪਰਿਹਰਣਤ੍ਥਾਯਾਤਿ ਧੋਤਸ੍ਸ ਪਾਦਸ੍ਸ ਪਂਸੁਮਕ੍ਖਨਾਦੀਨਂ ਪਰਿਹਰਣਤ੍ਥਾਯ. ਤਾਤਿ ਉਪਾਹਨਾਯੋ. ਕਾਲਸ੍ਸੇਵਾਤਿ ਪਚ੍ਚੂਸਕਾਲਤੋਯੇਵ, ਨਿਸ੍ਸਕ੍ਕਤ੍ਥੇ ਚੇਤਂ ਸਾਮਿਵਚਨਂ. ਤਤੋਤਿ ਤੇਹਿ ਤੀਹਿ ਦਨ੍ਤਕਟ੍ਠੇਹਿ, ਵਿਭਤ੍ਤਅਪਾਦਾਨਮੇਤਂ. ਤੇਸੁ ਵਾ ਤੀਸੁ ਦਨ੍ਤਕਟ੍ਠੇਸੁ. ਯਨ੍ਤਿ ਯਂ ਦਨ੍ਤਕਟ੍ਠਂ. ਅਥਾਤਿ ਤਸ੍ਮਿਂ ਗਹਣੇ.

ਤਤੋਤਿ ਸੀਤੁਣ੍ਹੋਦਕੇਹਿ, ਸੀਤੁਣ੍ਹੋਦਕੇਸੁ ਵਾ. ਵਲ਼ਞ੍ਜੇਤੀਤਿ ਪਰਿਭੁਞ੍ਜਤਿ. ਉਦਕਨ੍ਤਿ ਮੁਖਧੋਵਨੋਦਕਂ. ‘‘ਵਚ੍ਚਕੁਟਿਤੋ’’ਤਿ ਇਮਿਨਾ ਪਸ੍ਸਾਵਕੁਟੀਪਿ ਗਹੇਤਬ੍ਬਾ. ਏਵਨ੍ਤਿ ਸਮ੍ਮਜ੍ਜਿਯਮਾਨੇ. ਅਸੁਞ੍ਞਨ੍ਤਿ ਜਨਸਦ੍ਦਤੋ ਅਤੁਚ੍ਛਂ. ਆਸਨਨ੍ਤਿ ਥੇਰਸ੍ਸ ਆਸਨਂ. ਤਸ੍ਮਿਨ੍ਤਿ ਆਸਨੇ. ਨਿਸਿਨ੍ਨਸ੍ਸ ਥੇਰਸ੍ਸ ਵਤ੍ਤਂ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਉਕ੍ਲਾਪੋ ਅਸ੍ਮਿਂ ਦੇਸੇ ਅਤ੍ਥੀਤਿ ਉਕ੍ਲਾਪੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਕੇਨਚਿ ਕਚਵਰੇਨ ਸਂਕਿਣ੍ਣੋ’’ਤਿ. ਏਤ੍ਥ ਚ ਸਙ੍ਕਾਰੋ ਉਚ੍ਛਿਟ੍ਠੋ ਕਲਾਪੋ ਸਮੂਹੋ ਉਕ੍ਲਾਪੋਤਿ ਵਚਨਤ੍ਥੇਨ ਉਕ੍ਲਾਪੋਤਿ ਵੁਚ੍ਚਤਿ. ਕਚੀਯਤਿ ਬਨ੍ਧੀਯਤਿ ਅਸ੍ਮਿਂ ਦੇਸੇਤਿ ਕਚੋ, ਸੋ ਵਰੀਯਤਿ ਇਚ੍ਛੀਯਤਿ ਅਨੇਨਾਤਿ ਕਚਵਰੋਤਿ ਵਚਨਤ੍ਥੇਨ ਕਚਵਰੋਤਿ ਵੁਚ੍ਚਤਿ. ਹਤ੍ਥੇਨਪੀਤਿ ਏਤ੍ਥ ਪਿਸਦ੍ਦੋ ਪਿਲੋਤਿਕੇਨਪੀਤਿਆਦਿਂ ਸਙ੍ਗਣ੍ਹਾਤਿ.

ਏਕਤੋ ਕਤ੍ਵਾਤਿ ਏਕਤੋ ਸਮਾਨਪਟਲਂ ਕਤ੍ਵਾ. ਕਸ੍ਮਾ ਸਙ੍ਘਾਟੀਤਿ ਆਹ ‘‘ਸਬ੍ਬਂ ਹੀ’’ਤਿਆਦਿ. ‘‘ਸਙ੍ਘਟਿਤਤ੍ਤਾ’’ਤਿ ਇਮਿਨਾ ਸਂਹਰਿਤਬ੍ਬਾਤਿ ਸਙ੍ਘਾਟੀਤਿ ਵਚਨਤ੍ਥਂ ਦਸ੍ਸੇਤਿ. ਨਿਵਤ੍ਤਿਤ੍ਵਾ ਓਲੋਕੇਨ੍ਤਂ ਉਪਜ੍ਝਾਯਂ ਸਂਪਾਪੁਣਾਤੀਤਿ ਯੋਜਨਾ. ਏਕੇਨ ਵਾ ਪਦਵੀਤਿਹਾਰੇਨਾਤਿ ਸਮ੍ਬਨ੍ਧੋ. ਪਤ੍ਤੋਯੇਵ ਉਣ੍ਹਭਾਰਿਕੇਸੁ ਪਰਿਯਾਪਨ੍ਨੋਤਿ ਪਤ੍ਤਪਰਿਯਾਪਨ੍ਨੋ, ਪਤ੍ਤੇ ਪਰਿਯਾਪਨ੍ਨੋ ਯਾਗੁਆਦਿਕੋ ਪਤ੍ਤਪਰਿਯਾਪਨ੍ਨੋਤਿਪਿ ਯੁਜ੍ਜਤਿਯੇਵ. ਭਿਕ੍ਖਾਚਾਰੇਤਿ ਭਿਕ੍ਖਾਚਾਰਟ੍ਠਾਨੇ. ਯਾਗੁਯਾ ਵਾ ਲਦ੍ਧਾਯਾਤਿ ਸਮ੍ਬਨ੍ਧੋ. ਤਸ੍ਸਾਤਿ ਉਪਜ੍ਝਾਯਸ੍ਸ. ਸੋ ਪਤ੍ਤੋਤਿ ਉਣ੍ਹਾਦੀਸੁ ਪਰਿਯਾਪਨ੍ਨੋ ਸੋ ਪਤ੍ਤੋ. ਅਞ੍ਞਤ੍ਰ ਵਾਤਿ ਆਰਾਮਾਦੀਸੁ ਵਾ. ਤਸ੍ਸਾਤਿ ਉਪਜ੍ਝਾਯਸ੍ਸ. ਵਚਨੇ ਅਨਿਟ੍ਠਿਤੇਤਿ ਸਮ੍ਬਨ੍ਧੋ. ਇਤੋ ਪਟ੍ਠਾਯਾਤਿ ‘‘ਨ ਉਪਜ੍ਝਾਯਸ੍ਸ ਭਣਮਾਨਸ੍ਸਾ’’ਤਿ ਏਤ੍ਥ ਵੁਤ੍ਤਨਕਾਰਤੋ ਪਟ੍ਠਾਯ. ਇਮਿਨਾ ਹੇਟ੍ਠਾ ਵੁਤ੍ਤੇਸੁ ‘‘ਨਾਤਿਦੂਰੇ ਗਨ੍ਤਬ੍ਬ’’ਨ੍ਤਿਆਦੀਸੁ ਨਕਾਰਪਟਿਸਿਦ੍ਧੇਸੁ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ. ਯਤ੍ਥ ਕਤ੍ਥਚੀਤਿ ‘‘ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬ’’ਨ੍ਤਿਆਦੀਸੁ ਯੇਸੁ ਕੇਸੁਚਿ. ਅਯਨ੍ਤਿ ਦੁਕ੍ਕਟਾਪਤ੍ਤਿ. ਹੀਤਿ ਸਚ੍ਚਂ. ਆਪਤ੍ਤਿਸਾਮਨ੍ਤਾਤਿ ਏਤ੍ਥ ਆਪਤ੍ਤਿਯਾ ਸਾਮਨ੍ਤਾ ਆਪਤ੍ਤਿਸਾਮਨ੍ਤਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਆਪਤ੍ਤਿਯਾ ਆਸਨ੍ਨ’’ਨ੍ਤਿ. ‘‘ਆਸਨ੍ਨ’’ਨ੍ਤਿ ਇਮਿਨਾ ਸਾਮਨ੍ਤਾਸਦ੍ਦਸ੍ਸ ਆਸਨ੍ਨਵੇਵਚਨਤਞ੍ਚ ਉਪਯੋਗਤ੍ਥੇ ਨਿਸ੍ਸਕ੍ਕਵਚਨਤਞ੍ਚ ਦਸ੍ਸੇਤਿ. ਈਦਿਸਂ ਵਚਨਂ ਭਨ੍ਤੇ ਵਤ੍ਤੁਂ ਵਟ੍ਟਤਿ ਨਾਮਾਤਿ ਯੋਜਨਾ.

ਗਾਮਤੋ ਪਠਮਤਰਨ੍ਤਿ ਗਾਮਤੋ ਉਪਜ੍ਝਾਯਸ੍ਸ ਪਠਮਤਰਂ. ਤੇਨੇਵਾਤਿ ਉਪਜ੍ਝਾਯੇਨੇਵ. ਨਿਵਤ੍ਤਨ੍ਤੇਨ ਸਦ੍ਧਿਵਿਹਾਰਿਕੇਨਾਤਿ ਸਮ੍ਬਨ੍ਧੋ. ‘‘ਤਿਨ੍ਤ’’ਨ੍ਤਿ ਵਤ੍ਵਾ ਤਮੇਵਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸੇਦਗ੍ਗਹਿਤ’’ਨ੍ਤਿ. ਇਮਿਨਾ ਸੇਦੇਨ ਸੀਦਤੀਤਿ ਸਿਨ੍ਨਨ੍ਤਿ ਅਤ੍ਥਂ ਦਸ੍ਸੇਤਿ. ‘‘ਅਤਿਰੇਕਂ ਕਤ੍ਵਾ’’ਤਿ ਇਮਿਨਾ ਉਸ੍ਸਾਰੇਤ੍ਵਾਤਿਪਦਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ, ਉਦ੍ਧਂ ਉਦ੍ਧਂ ਸਾਰੇਤ੍ਵਾਤਿ ਵੁਤ੍ਤਂ ਹੋਤਿ. ਪਚ੍ਛਿਮਵਾਕ੍ਯਸ੍ਸ ਪੁਬ੍ਬਵਾਕ੍ਯਕਾਰਣਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਕਿਂ ਕਾਰਣਾ’’ਤਿ. ਮਜ੍ਝੇ ਭਙ੍ਗਸ੍ਸ ਦੋਸਂ ਆਵਿਕਰੋਨ੍ਤੋ ਆਹ ‘‘ਸਮਂ ਕਤ੍ਵਾ’’ਤਿਆਦਿ. ਤਤੋਤਿ ਸਮਂ ਕਤ੍ਵਾ ਸਂਹਰਣਤੋ, ਨਿਚ੍ਚਂ ਭਿਜ੍ਜਮਾਨਨ੍ਤਿ ਸਮ੍ਬਨ੍ਧੋ. ਮਜ੍ਝੇ ਭਙ੍ਗਤੋ ਵਾ, ਦੁਬ੍ਬਲਨ੍ਤਿ ਸਮ੍ਬਨ੍ਧੋ. ਏਤਨ੍ਤਿ ‘‘ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ’’ਤਿ ਏਤਂ ਵਚਨਂ. ਯਥਾਤਿ ਯੇਨਾਕਾਰੇਨ ਸਂਹਰਿਯਮਾਨੇਤਿ ਸਮ੍ਬਨ੍ਧੋ. ਚੀਵਰਭੋਗਸ੍ਸ ਓਰੋ ਅਨ੍ਤੋ ਓਭੋਗੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਕਾਯਬਨ੍ਧਨ’’ਨ੍ਤਿਆਦਿ.

ਯੋਤਿ ਉਪਜ੍ਝਾਯੋ. ‘‘ਗਾਮੇਯੇਵਾ’’ਤਿ ਵਤ੍ਵਾ ਤਮੇਵਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਅਨ੍ਤਰਘਰੇ ਵਾ ਪਟਿਕ੍ਕਮਨੇ ਵਾ’’ਤਿ. ਪਟਿਕ੍ਕਮਨੇ ਵਾਤਿ ਭੋਜਨਸਾਲਾਯਂ ਵਾ. ਤਸ੍ਸਾਤਿ ਉਪਜ੍ਝਾਯਸ੍ਸ. ਲਦ੍ਧਾ ਭਿਕ੍ਖਾ ਯੇਨਾਤਿ ਲਦ੍ਧਭਿਕ੍ਖੋ, ਤਸ੍ਸ ਵਾ. ਪਿਣ੍ਡਪਾਤੋ ਹੋਤੀਤਿ ਯੋਜਨਾ. ਤਸ੍ਸਾਤਿ ਉਪਜ੍ਝਾਯਸ੍ਸ. ਪਿਣ੍ਡਪਾਤੋ ਨ ਹੋਤੀਤਿ ਸਮ੍ਬਨ੍ਧੋ. ਅਤ੍ਤਨਾ ਲਦ੍ਧੋਪੀਤਿ ਪਿਸਦ੍ਦੋ ਉਪਜ੍ਝਾਯੇਨ ਲਦ੍ਧੋਪੀਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਆਹਰਿਯਤੂਤਿ ਏਤ੍ਥ ਤੁਵਿਭਤ੍ਤਿ ਪੁਚ੍ਛਾਯਂ ਹੋਤਿ, ਆਹਰਿਯਤੁ ਕਿਨ੍ਤਿ ਅਤ੍ਥੋ. ਕਾਲੋਤਿ ਭੋਜਨਕਾਲੋ. ਭੁਞ੍ਜਿਤ੍ਥਾਤਿ ਭੁਤ੍ਤੋ, ਤਸ੍ਮਿਂ ਸਤੀਤਿ ਸਮ੍ਬਨ੍ਧੋ. ਉਪਕਟ੍ਠੋਤਿ ਮਜ੍ਝਨ੍ਹਿਕਸ੍ਸ ਆਸਨ੍ਨੋ.

ਅਨਨ੍ਤਰਹਿਤਾਯਾਤਿ ਏਤ੍ਥ ਅਨ੍ਤਰਧਾਯਤੀਤਿ ਅਨ੍ਤਰਹਿਤੋ, ਤਟ੍ਟਿਕਚਮ੍ਮਖਣ੍ਡਾਦਿ, ਨਤ੍ਥਿ ਅਨ੍ਤਰਹਿਤੋ ਏਤਸ੍ਮਿਂ ਪਤ੍ਤਭੂਮੀਨਮਨ੍ਤਰੇਤਿ ਅਨਨ੍ਤਰਹਿਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨਤ੍ਥਤਾਯਾ’’ਤਿ. ਕਾਲ਼ਵਣ੍ਣਕਤਾ ਵਾ ਸੁਧਾਬਦ੍ਧਾ ਵਾ ਨਿਰਜਮਤ੍ਤਿਕਾ ਹੋਤੀਤਿ ਯੋਜਨਾ. ਤਨ੍ਤਿ ਪਤ੍ਤਂ. ਧੋਤਵਾਲਿਕਾਯਪੀਤਿ ਸੁਦ੍ਧਵਾਲਿਕਾਯਪਿ. ਤਤ੍ਥਾਤਿ ਪਂਸੁਰਜਸਕ੍ਖਰਾਦੀਸੁ. ਪੁਨ ਤਤ੍ਥਾਤਿ ਪਣ੍ਣਾਧਾਰਕੇਸੁ. ਇਦਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਭਿਮੁਖੇਨਾਤਿ ਅਤ੍ਤਨੋ ਅਭਿਮੁਖੇਨ. ਸਣਿਕਨ੍ਤਿ ਸਿਨ੍ਨਂ. ਅਨ੍ਤੇ ਪਨਾਤਿ ਚੀਵਰਸ੍ਸ ਕੋਟਿਯਂ ਪਨ. ਨਿਕ੍ਖਿਪਨ੍ਤਸ੍ਸ ਸਦ੍ਧਿਵਿਹਾਰਿਕਸ੍ਸ ਚੀਵਰਸ੍ਸ ਭੋਗੋਤਿ ਯੋਜਨਾ.

ਚੁਣ੍ਣਂ ਸਨ੍ਨੇਤਬ੍ਬਨ੍ਤਿ ਏਤ੍ਥ ਚੁਣ੍ਣਸਮੋਧਾਨੇਨ ਨੇਤਬ੍ਬਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਿਣ੍ਡਿ ਕਾਤਬ੍ਬਾ’’ਤਿ. ‘‘ਏਕਸ੍ਮਿਂ ਨਿਦ੍ਧੂਮੇ ਠਾਨੇ’’ਤਿ ਇਮਿਨਾ ਏਕਮਨ੍ਤਨ੍ਤਿ ਏਤ੍ਥ ਏਕਸ੍ਮਿਂ ਅਨ੍ਤੇ ਠਾਨੇਤਿ ਅਤ੍ਥਂ ਦਸ੍ਸੇਤਿ. ਜਨ੍ਤਾਘਰੇਤਿ ਅਗ੍ਗਿਸਾਲਾਯਂ. ਸਾ ਹਿ ਜਲਤਿ ਦਿਬ੍ਬਤਿ ਅਗ੍ਗਿ ਏਤ੍ਥਾਤਿ ਜਨ੍ਤਾ, ਜਨੇਤਿ ਸਰੀਰਸੇਦਮੇਤ੍ਥਾਤਿ ਵਾ ਜਨ੍ਤਾ, ਸਾ ਏਵ ਘਰਂ ਜਨ੍ਤਾਘਰਨ੍ਤਿ ਵੁਚ੍ਚਤਿ, ਤਸ੍ਮਿਂ. ਪਰਿਪੂਜਾਵਸੇਨ ਕਰੀਯਤੀਤਿ ਪਰਿਕਮ੍ਮਨ੍ਤਿ ਅਤ੍ਥੇਨ ਅਙ੍ਗਾਰਦਾਨਾਦਿਕਂ ਪਰਿਕਮ੍ਮਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਪਰਿਕਮ੍ਮਂ ਨਾਮਾ’’ਤਿਆਦਿ.

‘‘ਨ ਕੇਨਚਿ ਗੇਲਞ੍ਞੇਨਾ’’ਤਿਆਦਿਨਾ ਉਸ੍ਸਹਨਸ੍ਸ ਕਾਰਣਂ ਦਸ੍ਸੇਤਿ. ਹੀਤਿ ਸਚ੍ਚਂ. ਅਗਿਲਾਨੇਨ ਸਟ੍ਠਿਵਸ੍ਸੇਨ ਸਦ੍ਧਿਵਿਹਾਰਿਕੇਨਾਪਿ ਕਾਤਬ੍ਬਨ੍ਤਿ ਯੋਜਨਾ. ਅਨਾਦਰੇਨਾਤਿ ਵਤ੍ਤਕਰਣਸ੍ਸ ਅਨਾਦਰੇਨ. ਨਕਾਰਪਟਿਸਂਯੁਤ੍ਤੇਸੂਤਿ ਪਟਿਸੇਧਵਾਚਕੇਨ ਨਕਾਰੇਨ ਪਟਿਸਂਯੁਤ੍ਤੇਸੁ. ਪਦੇਸੂਤਿ ‘‘ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾ’’ਤਿਆਦੀਸੁ ਵਾਕ੍ਯੇਸੁ. ਭੂਮਿਯਨ੍ਤਿ ਉਪਲਕ੍ਖਣਵਸੇਨ ਵੁਤ੍ਤਂ ਭਿਤ੍ਤਿਯਮ੍ਪਿ ਅਪਟਿਘਂਸਿਤਬ੍ਬਤ੍ਤਾ. ‘‘ਪਿਠਸਙ੍ਘਾਟਞ੍ਚਾ’’ਤਿ ਇਮਿਨਾ ਕਵਾਟਪੀਲ਼ਨ੍ਤਿ ਏਤ੍ਥ ਪੀਠਸਦ੍ਦੇਨ ਪਿਠਸਙ੍ਘਾਟਂ ਵੁਚ੍ਚਤਿ ਉਤ੍ਤਰਪਦਲੋਪਵਸੇਨ ਵਾ ਏਕਦੇਸਵੋਹਾਰਵਸੇਨ ਵਾਤਿ ਦਸ੍ਸੇਤਿ. ‘‘ਅਚ੍ਛੁਪਨ੍ਤੇਨਾ’’ਤਿ ਇਮਿਨਾ ਅਪ੍ਪਟਿਘਂਸਨ੍ਤੇਨਾਤਿ ਏਤ੍ਥ ਘਂਸਧਾਤੁਯਾ ਅਤ੍ਥਂ ਦਸ੍ਸੇਤਿ. ਸਮ੍ਮਾ ਤਾਯਤਿ ਅਤ੍ਤਾਨਞ੍ਚ ਪਰਞ੍ਚ ਅਨੇਨਾਤਿ ਸਨ੍ਤਾਨਂ, ਤਮੇਵ ਸਨ੍ਤਾਨਕਨ੍ਤਿ ਅਤ੍ਥੇਨ ਕੀਟਕੁਲਾਵਕਮਕ੍ਕਟਕਸੁਤ੍ਤਾਦਿ ਸਨ੍ਤਾਨਕਂ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਸਨ੍ਤਾਨਕ’’ਨ੍ਤਿਆਦਿ. ਉਲ੍ਲੋਕਤੋਤਿ ਵਿਤਾਨਤੋ. ਤਞ੍ਹਿ ਉਦ੍ਧਂ ਲੁਚੀਯਤੇ ਬਨ੍ਧੀਯਤੇਤਿ ਉਲ੍ਲੋਕਨ੍ਤਿ ਵੁਚ੍ਚਤਿ, ਚਕਾਰਸ੍ਸ ਕਕਾਰਮਕਤ੍ਵਾ ‘‘ਉਲ੍ਲੋਚ’’ਨ੍ਤਿਪਿ ਵੁਚ੍ਚਤਿ. ਤੋਸਦ੍ਦੇਨ ਆਕਾਰਸ੍ਸ ਸ੍ਮਾਵਚਨਸ੍ਸ ਕਾਰਿਯਭਾਵਂ ਦਸ੍ਸੇਤਿ. ਅਪਹਰਿਤਬ੍ਬਨ੍ਤਿ ਅਪਨੇਤਬ੍ਬਂ. ‘‘ਅਵਹਰਿਤਬ੍ਬ’’ਨ੍ਤਿਪਿ ਪਾਠੋ, ਹੇਟ੍ਠਾ ਹਰਿਤਬ੍ਬਂ ਪਾਤੇਤਬ੍ਬਨ੍ਤਿ ਅਤ੍ਥੋ.

ਆਲੋਕਸਨ੍ਧਿਭਾਗਾਤਿ ਏਤ੍ਥ ਭਾਗਸਦ੍ਦਸ੍ਸ ਦ੍ਵਨ੍ਦਤੋ ਪਰਤ੍ਤਾ ਪੁਬ੍ਬਪਦੇਸੁਪਿ ਪਚ੍ਚੇਕਂ ਯੋਜੇਤਬ੍ਬੋਤਿ ਆਹ ‘‘ਆਲੋਕਸਨ੍ਧਿਭਾਗਾ ਚ ਕਣ੍ਣਭਾਗਾ ਚਾ’’ਤਿ. ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨ੍ਤਰਬਾਹਿਰਾ’’ਤਿਆਦਿ. ‘‘ਵਾਤਪਾਨਕਵਾਟਕਾਨੀ’’ਤਿ ਇਮਿਨਾ ਆਲੋਕਸਨ੍ਧਿਸਦ੍ਦਸ੍ਸ ਵਾਤਪਾਨਕਵਾਟਕਪਰਿਯਾਯਭਾਵਂ ਦਸ੍ਸੇਤਿ. ‘‘ਕੋਣਾ’’ਤਿ ਇਮਿਨਾ ਕਣ੍ਣਸਦ੍ਦਸ੍ਸ ਕੋਣਵੇਵਚਨਭਾਵਂ ਦਸ੍ਸੇਤਿ.

‘‘ਯਥਾ ਪਠਮ’’ਨ੍ਤਿਆਦਿਨਾ ਪਠਮਪਞ੍ਞਤ੍ਤਮੇਵ ਪਞ੍ਞਪੇਤਬ੍ਬਂ, ਨ ਅਞ੍ਞਥਾਤਿ ਦਸ੍ਸੇਤਿ. ਇਦਂ ਪਤਿਰੂਪਂ ਪਠਮਪਞ੍ਞਤ੍ਤਂ ਸਨ੍ਧਾਯ ਵੁਤ੍ਤਂ. ਪਠਮਪਞ੍ਞਤ੍ਤੇ ਅਪਤਿਰੂਪੇ ਅਞ੍ਞਥਾਪਿ ਪਞ੍ਞਪੇਤਬ੍ਬਂ. ਏਤਦਤ੍ਥਮੇਵਾਤਿ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਸ੍ਸ ਅਤ੍ਥਾਯ ਏਵ. ਸਚੇ ਪਞ੍ਞਤ੍ਤਂ ਅਹੋਸਿ, ਏਵਂ ਸਤੀਤਿ ਯੋਜਨਾ. ਇਦਨ੍ਤਿ ਭਿਤ੍ਤਿਂ ਮੋਚੇਤ੍ਵਾ ਪਞ੍ਞਾਪਨਂ. ਕਟੇਸੁ ਕਿਲ਼ਞ੍ਜੇਸੁ ਸਾਰਤ੍ਤਾ ਉਤ੍ਤਮਤ੍ਤਾ ਕਟਸਾਰਕੋਤਿ ਵੁਚ੍ਚਤਿ. ਨਿਵਤ੍ਤੇਤ੍ਵਾਤਿ ਸਂਹਰਿਤ੍ਵਾ. ਪੁਰਤ੍ਥਿਮਾਤਿ ਏਤ੍ਥ ਯਕਾਰਲੋਪੇਨ ਨਿਦ੍ਦੇਸੋਤਿ ਆਹ ‘‘ਪੁਰਤ੍ਥਿਮਾਯਾ’’ਤਿ.

ਵੂਪਕਾਸੇਤਬ੍ਬੋਤਿ ਏਤ੍ਥ ਕਸਧਾਤੁ ਗਤ੍ਯਤ੍ਥੋਤਿ ਆਹ ‘‘ਅਞ੍ਞਤ੍ਥ ਨੇਤਬ੍ਬੋ’’ਤਿ. ਉਪਜ੍ਝਾਯਂ ਗਹੇਤ੍ਵਾ ਅਞ੍ਞਤ੍ਥ ਗਨ੍ਤਬ੍ਬੋਤਿ ਅਤ੍ਥੋ. ਅਞ੍ਞਤ੍ਥਾਤਿ ਅਞ੍ਞਂ ਠਾਨਂ. ਵਿਵੇਚੇਤਬ੍ਬਨ੍ਤਿ ਏਤ੍ਥ ਦਿਟ੍ਠਿਗਤਤੋ ਉਪਜ੍ਝਾਯਂ ਵਿਵੇਚੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਵਿਸ੍ਸਜ੍ਜਾਪੇਤਬ੍ਬ’’ਨ੍ਤਿ. ‘‘ਅਞ੍ਞੋ ਵਤ੍ਤਬ੍ਬੋ’’ਤਿ ਵਤ੍ਵਾ ਤਸ੍ਸ ਆਕਾਰਂ ਦਸ੍ਸੇਤਿ ‘‘ਥੇਰ’’ਨ੍ਤਿਆਦਿਨਾ. ਸੋ ਸੋ ਭਿਕ੍ਖੁ ਯਾਚਿਤਬ੍ਬੋਤਿ ਸਮ੍ਬਨ੍ਧੋ. ਅਞ੍ਞੇਨ ਦਾਪੇਤਬ੍ਬੋਤਿ ਅਤ੍ਤਨਾ ਅਞ੍ਞੇਨ ਭਿਕ੍ਖੁਨਾ ਉਪਜ੍ਝਾਯਸ੍ਸ ਪਰਿਵਾਸੋ ਦਾਪੇਤਬ੍ਬੋਤਿ ਅਤ੍ਥੋ. ਕਿਨ੍ਤਿ ਨੁ ਖੋਤਿ ਕੇਨ ਏਵ ਉਪਾਯੇਨ ਦਦੇਯ੍ਯ ਨੁਖੋਤਿ ਅਤ੍ਥੋ. ਇਤਿਸਦ੍ਦੋ ਹਿ ਅਵਧਾਰਣਤ੍ਥੋ. ਅਟ੍ਠਕਥਾਯਪਿ ਇਮਮੇਵ ਨਯਂ ਦਸ੍ਸੇਤਿ ‘‘ਕੇਨ ਨੁ ਖੋ ਉਪਾਯੇਨਾ’’ਤਿ ਇਮਿਨਾ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਕਿਨ੍ਤਿ ਨੁ ਖੋ ਪਟਿਕਸ੍ਸੇਯ੍ਯਾ’’ਤਿਆਦਿਵਾਕ੍ਯੇਸੁ. ਸਤ੍ਤਸੁ ਕਮ੍ਮੇਸੁ ਤਿਵਿਧਸ੍ਸ ਉਕ੍ਖੇਪਨੀਯਕਮ੍ਮਸ੍ਸ ਗਰੁਕਤ੍ਤਾ ਵੁਤ੍ਤਂ ‘‘ਉਕ੍ਖੇਪਨੀਯਂ ਅਕਤ੍ਵਾ’’ਤਿ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਤੇਨ ਹੀ’’ਤਿਆਦਿ.

ਤੇਨ ਸਦ੍ਧਿਵਿਹਾਰਿਕੇਨ ਯਾਚਿਤਬ੍ਬਾਤਿ ਸਮ੍ਬਨ੍ਧੋ. ਸਚੇ ਕਰੋਨ੍ਤਿਯੇਵਾਤਿ ਭਿਕ੍ਖੂ ਸਚੇ ਕਮ੍ਮਂ ਕਰੋਨ੍ਤਿਯੇਵ. ਪੁਨ ਸਚੇ ਕਰੋਨ੍ਤਿਯੇਵਾਤਿ ਭਿਕ੍ਖੂ ਸਚੇ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿਯੇਵ. ਅਥਾਤਿ ਤਸ੍ਮਿਂ ਕਮ੍ਮੇ ਕਤੇ. ਇਤੀਤਿ ਏਵਂ ਯਾਚਨੇਨ. ਨਨ੍ਤਿ ਤਂ ਉਪਜ੍ਝਾਯਂ.

ਸਮ੍ਪਰਿਵਤ੍ਤਕਨ੍ਤਿ ਏਤ੍ਥ ‘‘ਪਿਣ੍ਡੁਕ੍ਖੇਪਕ’’ਨ੍ਤਿਆਦੀਸੁ (ਪਾਚਿ. ੬੨੦) ਵਿਯ ਸਮ੍ਪਰਿਵਤ੍ਤਕਨ੍ਤਿਪਦਂ ਕਿਰਿਯਾਵਿਸੇਸਨਂ, ਕਪਚ੍ਚਯੋ ਚ ਵਿਚ੍ਛਤ੍ਥੋਤਿ ਆਹ ‘‘ਸਮ੍ਪਰਿਵਤ੍ਤੇਤ੍ਵਾ ਸਮ੍ਪਰਿਵਤ੍ਤੇਤ੍ਵਾ’’ਤਿ. ਯਦੀਤਿ ਯਾਵ. ਯਦਿਸਦ੍ਦੋ ਹਿ ਯਾਵਪਰਿਯਾਯੋ, ਤੇਨ ਵੁਤ੍ਤਂ ‘‘ਨ ਤਾਵ ਪਕ੍ਕਮਿਤਬ੍ਬ’’ਨ੍ਤਿ. ਯਾਵ ਅਪ੍ਪਮਤ੍ਤਕਮ੍ਪਿ ਰਜਨਂ ਗਲਤਿ, ਨ ਤਾਵ ਪਕ੍ਕਮਿਤਬ੍ਬਨ੍ਤਿ ਯੋਜਨਾ. ਵਿਸਭਾਗਪੁਗ੍ਗਲੇਨਾਤਿ ਵਿਸਭਾਗੇਨ ਪੁਗ੍ਗਲੇਨ ਕਰਣਭੂਤੇਨ. ਨ ਉਪਜ੍ਝਾਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋਤਿ ਏਤ੍ਥ ਨ ਅਞ੍ਞੇਨੇਵ ਕਰਣੀਯੇਨ ਪਵਿਸਿਤਬ੍ਬੋ. ਪਿਣ੍ਡਾਯ ਪਨ ਪਵਿਸਿਤਬ੍ਬੋਤਿ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਪਿਣ੍ਡਾਯ ਵਾ’’ਤਿਆਦਿ. ‘‘ਅਨਾਪੁਚ੍ਛਿਤ੍ਵਾ’’ਤਿ ਇਮਿਨਾ ਅਨਾਪੁਚ੍ਛਾਤਿ ਏਤ੍ਥ ਆਕਾਰੋ ਤ੍ਵਾਪਚ੍ਚਯਸ੍ਸ ਕਾਰਿਯੋਤਿ ਦਸ੍ਸੇਤਿ. ਭਿਕ੍ਖਾਚਾਰਨ੍ਤਿ ਭਿਕ੍ਖਾਯ ਚਰਣਟ੍ਠਾਨਂ, ਉਪਜ੍ਝਾਯੇਨ ਗਨ੍ਤਬ੍ਬਨ੍ਤਿ ਯੋਜਨਾ. ਪਰਿਵੇਣਨ੍ਤਿ ਉਪਜ੍ਝਾਯਸ੍ਸ ਪਰਿਵੇਣਂ. ਪਸ੍ਸਤੀਤਿ ਉਪਜ੍ਝਾਯਂ ਪਸ੍ਸਤਿ.

ਦਸ੍ਸਨਤ੍ਥਾਯ ਵਾਤਿ ਅਸੁਭਦਸ੍ਸਨਤ੍ਥਾਯ ਵਾ. ਇਮਿਨਾਪਿ ਵਾਸਤ੍ਥਾਯ ਏਵ ਨ ਗਨ੍ਤਬ੍ਬਨ੍ਤਿ ਆਸਙ੍ਕਂ ਨਿਵਤ੍ਤੇਤਿ. ਕਮ੍ਮਨ੍ਤਿ ਪਕ੍ਕਮਨਸ੍ਸ ਕਾਰਣਂ ਕਮ੍ਮਂ. ਅਨਨੁਜਾਨਨਂ ਸਨ੍ਧਾਯ ਵੁਤ੍ਤਂ ‘‘ਯਾਵਤਤਿਯ’’ਨ੍ਤਿ. ਤਨ੍ਤਿ ਉਪਜ੍ਝਾਯਂ. ਅਸ੍ਸਾਤਿ ਸਦ੍ਧਿਵਿਹਾਰਿਕਸ੍ਸ. ‘‘ਨ ਸਮ੍ਪਜ੍ਜਤੀ’’ਤਿ ਇਮਿਨਾ ਸਚੇ ਸਮ੍ਪਜ੍ਜਤਿ, ਨ ਪਕ੍ਕਮਿਤਬ੍ਬਾਤਿ ਦਸ੍ਸੇਤਿ. ਕੇਵਲਨ੍ਤਿ ਵਿਨਾ ਉਦ੍ਦੇਸਾਦਿਸਮ੍ਪਜ੍ਜਨੇਹਿ. ਏਵਰੂਪੇ ਉਪਜ੍ਝਾਯੇ ਨਿਵਾਰੇਨ੍ਤੇਪੀਤਿ ਯੋਜਨਾ. ‘‘ਗੇਲਞ੍ਞਤੋ’’ਤਿ ਇਮਿਨਾ ਵੁਟ੍ਠਾਨਸਦ੍ਦਸ੍ਸ ਅਵਧਿਅਪੇਕ੍ਖਤਂ ਦਸ੍ਸੇਤਿ. ਅਸ੍ਸਾਤਿ ਉਪਜ੍ਝਾਯਸ੍ਸ. ਅਞ੍ਞੋਤਿ ਅਤ੍ਤਨਾ ਅਞ੍ਞੋ. ਤਸ੍ਸਾਤਿ ਅਞ੍ਞਸ੍ਸ ਭਿਕ੍ਖੁਸ੍ਸ.

੧੬. ਸਦ੍ਧਿਵਿਹਾਰਿਕਵਤ੍ਤਕਥਾ

੬੭. ਸਮ੍ਮਾਵਤ੍ਤਨਾਯਂ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਉਦ੍ਦੇਸਾਦੀਹੀਤਿ ਆਦਿਸਦ੍ਦੇਨ ਪਰਿਪੁਚ੍ਛਾਦਯੋ ਸਙ੍ਗਣ੍ਹਾਤਿ. ਸਙ੍ਗਹਸਦ੍ਦਸ੍ਸ ਸਙ੍ਖੇਪਗਹਣੇਸੁਪਿ ਵੁਤ੍ਤਿਤੋ ‘‘ਅਨੁਗ੍ਗਹੋ’’ਤਿ ਵੁਤ੍ਤਂ. ਅਥ ਵਾ ਸਮ੍ਮੁਖਾ ਸਙ੍ਗਹੋ ਚ ਪਰਮ੍ਮੁਖਾ ਅਨੁਗ੍ਗਹੋ ਚ ਕਾਤਬ੍ਬੋ. ਆਮਿਸੇਨ ਵਾ ਸਙ੍ਗਹੋ, ਧਮ੍ਮੇਨ ਵਾ ਅਨੁਗ੍ਗਹੋ. ਦਿਟ੍ਠਧਮ੍ਮਿਕਤ੍ਥਾਯ ਵਾ ਸਙ੍ਗਹੋ, ਸਮ੍ਪਰਾਯਿਕਤ੍ਥਾਯ ਵਾ ਅਨੁਗ੍ਗਹੋ. ਲੋਕਿਯਤ੍ਥਾਯ ਵਾ ਸਙ੍ਗਹੋ, ਲੋਕੁਤ੍ਤਰਤ੍ਥਾਯ ਵਾ ਅਨੁਗ੍ਗਹੋ ਕਾਤਬ੍ਬੋ. ਤਤ੍ਥਾਤਿ ਯਂ ਵੁਤ੍ਤਂ ‘‘ਉਦ੍ਦੇਸੇਨ ਪਰਿਪੁਚ੍ਛਾਯ ਓਵਾਦੇਨ ਅਨੁਸਾਸਨੀਯਾ’’ਤਿ. ਤਤ੍ਥ ਉਦ੍ਦਿਸਨਂ ਉਦ੍ਦੇਸੋਤਿ ਵਚਨਤ੍ਥੇਨ ਪਾਲ਼ਿਵਾਚਨਾ ਉਦ੍ਦੇਸੋ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਉਦ੍ਦੇਸੋਤਿ ਪਾਲ਼ਿਵਾਚਨਾ’’ਤਿ. ‘‘ਪਾਲ਼ਿਯਾ ਅਤ੍ਥਵਣ੍ਣਨਾ’’ਤਿ ਇਮਿਨਾ ਪੁਨਪ੍ਪੁਨਂ, ਸਮਨ੍ਤਤੋ ਵਾ ਪਾਲ਼ਿਯਾ ਅਤ੍ਥਸ੍ਸ ਪੁਚ੍ਛਨਂ ਪਰਿਪੁਚ੍ਛਾਤਿ ਅਤ੍ਥਂ ਦਸ੍ਸੇਤਿ. ਵਤ੍ਥੁਸ੍ਮਿਨ੍ਤਿ ਚਾਰਿਤ੍ਤਵਾਰਿਤ੍ਤਵਤ੍ਥੁਸ੍ਮਿਂ. ਇਦਨ੍ਤਿ ਚਾਰਿਤ੍ਤਂ. ਪੁਨ ਇਦਨ੍ਤਿ ਵਾਰਿਤ੍ਤਂ. ‘‘ਵਚਨ’’ਨ੍ਤਿ ਇਮਿਨਾ ਓਵਦਨਂ ਓਵਾਦੋਤਿ ਵਚਨਤ੍ਥਂ ਦਸ੍ਸੇਤਿ. ਓਤਿਣ੍ਣੇ ਵਤ੍ਥੁਸ੍ਮਿਂ ‘‘ਇਦਂ ਕਰੋਹਿ, ਇਦਂ ਮਾ ਕਰਿਤ੍ਥਾ’’ਤਿ ਵਚਨਂ ਅਨੁਸਾਸਨੀ ਨਾਮਾਤਿ ਯੋਜਨਾ. ‘‘ਪੁਨਪ੍ਪੁਨਂ ਵਚਨ’’ਨ੍ਤਿ ਇਮਿਨਾ ਅਨੁਸਾਸਨੀਤਿ ਏਤ੍ਥ ਅਨੁਸਦ੍ਦਸ੍ਸ ਨਉਪਚ੍ਛਿਨ੍ਨਤ੍ਥਂ ਦਸ੍ਸੇਤਿ. ‘‘ਸਚੇ ਉਪਜ੍ਝਾਯਸ੍ਸ ਪਤ੍ਤੋ ਹੋਤੀ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਨ ਪਕਤਿਪਤ੍ਤੋ ਹੋਤਿ, ਅਥ ਖੋ ਅਤਿਰਿਤ੍ਤਪਤ੍ਤੋ ਹੋਤੀਤਿ ਆਹ ‘‘ਅਤਿਰੇਕਪਤ੍ਤੋ’’ਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਸਚੇ ਉਪਜ੍ਝਾਯਸ੍ਸ ਚੀਵਰਂ ਹੋਤੀ’’ਤਿਆਦੀਸੁ ਪਦੇਸੁ. ਅਞ੍ਞੋਪੀਤਿ ਪਤ੍ਤਚੀਵਰੇਹਿ ਅਞ੍ਞੋਪਿ. ਸਮਣਪਰਿਕ੍ਖਾਰੋਤਿ ਛਤ੍ਤੁਪਾਹਨਾਦਿ ਸਮਣਪਰਿਕ੍ਖਾਰੋ. ਇਧਾਤਿ ਸਦ੍ਧਿਵਿਹਾਰਿਕਵਤ੍ਤੇ. ਨਯੇਨਾਤਿ ਞਾਯੇਨ. ਉਪ੍ਪਜ੍ਜਮਾਨਉਪਾਯਪਰਿਯੇਸਨਨ੍ਤਿ ਉਪ੍ਪਜ੍ਜਮਾਨਸ੍ਸ, ਉਪ੍ਪਜ੍ਜਮਾਨਤ੍ਥਾਯ ਵਾ ਉਪਾਯਸ੍ਸ ਪਰਿਯੇਸਨਂ. ਇਤੋਤਿ ‘‘ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਪਰਿਕ੍ਖਾਰੋ ਉਪ੍ਪਜ੍ਜਿਯੇਥਾ’’ਤਿ ਪਾਲ਼ਿਤੋ. ਚੀਵਰਂ ਰਜਨ੍ਤੇਨਾਤਿ ਏਤ੍ਥ ਰਜਨ੍ਤੇਨ ਉਪਜ੍ਝਾਯੇਨਾਤਿ ਅਤ੍ਥੋ ਨ ਦਟ੍ਠਬ੍ਬੋ, ਸਦ੍ਧਿਵਿਹਾਰਿਕੇਨਾਤਿ ਅਤ੍ਥੋ ਏਵਾਤਿ ਦਸ੍ਸੇਨ੍ਤੋ ਆਹ ‘‘ਉਪਜ੍ਝਾਯਤੋ ਉਪਾਯਂ ਸੁਤ੍ਵਾ ਰਜਨ੍ਤੇਨਾ’’ਤਿ. ਉਪਜ੍ਝਾਯਤੋ ਉਪਾਯਨ੍ਤਿ ਉਪਜ੍ਝਾਯਤੋ ਲਦ੍ਧਂ ਉਪਾਯਂ.

ਨਸਮ੍ਮਾਵਤ੍ਤਨਾਦਿਕਥਾ

੬੮. ਉਪਜ੍ਝਾਯਵਤ੍ਤਨ੍ਤਿ ਉਪਜ੍ਝਾਯਮ੍ਹਿ ਵਤ੍ਤਿਤਬ੍ਬਂ ਵਤ੍ਤਂ. ਸੋਤਿ ਸਦ੍ਧਿਵਿਹਾਰਿਕੋ. ਦੁਕ੍ਕਟਂ ਆਪਜ੍ਜਤੀਤਿ ਅਸ੍ਸ, ਸੋ ਵਾ ਦੁਕ੍ਕਟਂ ਆਪਜ੍ਜਤੀਤਿ ਯੋਜਨਾ. ਪਣਾਮੇਤਬ੍ਬੋਤਿ ਏਤ੍ਥ ਪਪੁਬ੍ਬ ਨਮੁਧਾਤੁ ਅਤ੍ਥਪਕਰਣਾਦਿਵਸੇਨ ਇਧ ਅਪਸਾਦਨਤ੍ਥੋਤਿ ਆਹ ‘‘ਅਪਸਾਦੇਤਬ੍ਬੋ’’ਤਿ. ਅਧਿਮਤ੍ਤਨ੍ਤਿ ਅਧਿਕਪ੍ਪਮਾਣਂ. ਗੇਹਸਿਤਪੇਮਨ੍ਤਿ ਮੇਤ੍ਤਾਸਿਨੇਹਂ. ਵੁਤ੍ਤਪਟਿਪਕ੍ਖਨਯੇਨਾਤਿ ਕਣ੍ਹਪਕ੍ਖੇ ਵੁਤ੍ਤੇਨ ਪਟਿਪਕ੍ਖੇਨ ਨਯੇਨ. ਅਲਂ ਪਣਾਮੇਤੁਨ੍ਤਿ ਏਤ੍ਥ ਅਲਂਸਦ੍ਦਸ੍ਸ ਅਰਹਤ੍ਥਪਟਿਕ੍ਖਿਤ੍ਤੇਸੁ ਦ੍ਵੀਸੁ ਅਤ੍ਥੇਸੁ ਅਰਹਤ੍ਥੋਤਿ ਆਹ ‘‘ਯੁਤ੍ਤੋ ਪਣਾਮੇਤੁ’’ਨ੍ਤਿ.

ਸਾਤਿਸਾਰੋ ਹੋਤੀਤਿ ਏਤ੍ਥ ਪਕਤਿਭਾਵਂ ਅਤਿਕ੍ਕਮਿਤ੍ਵਾ ਸਰਣਂ ਪਵਤ੍ਤਨਂ ਅਤਿਸਾਰੋ, ਦੋਸੋ. ਸਂਵਿਜ੍ਜਤਿ ਸੋ ਏਤਸ੍ਸਾਤਿ ਸਾਤਿਸਾਰੋਤਿ ਦਸ੍ਸੇਨ੍ਤੋ ਆਹ ‘‘ਸਦੋਸੋ ਹੋਤੀ’’ਤਿ. ਤਸ੍ਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਆਪਤ੍ਤਿਂ ਆਪਜ੍ਜਤੀ’’ਤਿ. ਆਪਤ੍ਤਿਨ੍ਤਿ ਦੁਕ੍ਕਟਾਪਤ੍ਤਿਂ. ਤਨ੍ਤਿ ਵਤ੍ਤਂ.

ਤੇਸਨ੍ਤਿ ਸਦ੍ਧਿਵਿਹਾਰਿਕਾਨਂ. ਵਤ੍ਤਨ੍ਤਿ ਬਹੁਕਾਨਂ ਸਦ੍ਧਿਵਿਹਾਰਿਕਾਨਂ ਵਤ੍ਤਂ. ਸਾਦਿਯਨਂ ਵਾ…ਪੇ… ਬਾਲੋ ਹੋਤੀਤਿ ਏਤ੍ਥ ਬਾਲਸ੍ਸ ਕਾਰਣਂ ਦਸ੍ਸੇਤੁਂ ਵੁਤ੍ਤਂ ‘‘ਸਾਦਿਯਨਂ ਵਾ ਅਸਾਦਿਯਨਂ ਵਾ ਨ ਜਾਨਾਤੀ’’ਤਿ. ਸਾਦਿਯਨਸ੍ਸ ਵਾ ਅਸਾਦਿਯਨਸ੍ਸ ਵਾ ਅਜਾਨਨਤ੍ਤਾ ਬਾਲੋ ਹੋਤੀਤਿ ਵੁਤ੍ਤਂ ਹੋਤਿ. ਅਜਾਨਨਸ੍ਸ ਕਾਰਣਂ ਦਸ੍ਸੇਤੁਂ ਵੁਤ੍ਤਂ ‘‘ਬਾਲੋ ਹੋਤੀ’’ਤਿ. ਬਾਲਤ੍ਤਾ ਸਾਦਿਯਨਂ ਵਾ ਅਸਾਦਿਯਨਂ ਵਾ ਨ ਜਾਨਾਤੀਤਿ ਵੁਤ੍ਤਂ ਹੋਤਿ. ਤੇਸੂਤਿ ਬਹੁਕੇਸੁ ਸਦ੍ਧਿਵਿਹਾਰਿਕੇਸੁ. ਤਸ੍ਸਾਤਿ ਵਤ੍ਤਸਮ੍ਪਨ੍ਨਭਿਕ੍ਖੁਸ੍ਸ. ਤੇਸਨ੍ਤਿ ਇਤਰੇਸਂ ਸਦ੍ਧਿਵਿਹਾਰਿਕਾਨਂ.

ਰਾਧਬ੍ਰਾਹ੍ਮਣਵਤ੍ਥੁਕਥਾ

੬੯. ਕਿਞ੍ਚਾਪਿ ਆਯਸ੍ਮਾ ਸਾਰਿਪੁਤ੍ਤੋ ਜਾਨਾਤੀਤਿ ਯੋਜਨਾ. ਇਮਿਨਾ ‘‘ਕਿਂ ਨੁ ਖੋ ਅਜਾਨਨ੍ਤੋ ਪੁਚ੍ਛੀ’’ਤਿ ਆਸਙ੍ਕਂ ਨਿਵਾਰੇਤਿ. ਭਗਵਾ ਅਨੁਞ੍ਞਾਤੁਕਾਮੋ ਹੋਤੀਤਿ ਸਮ੍ਬਨ੍ਧੋ. ਪਨਸਦ੍ਦੋ ਗਰਹਤ੍ਥੋ, ਤਥਾ ਜਾਨਨ੍ਤੋਪੀਤਿ ਅਤ੍ਥੋ. ਲਹੁਕਨ੍ਤਿ ਹੇਤੁਅਨ੍ਤੋਗਧਵਿਸੇਸਨਂ. ਲਹੁਕਤ੍ਤਾ ਪਟਿਕ੍ਖਿਪਿਤ੍ਵਾਤਿ ਵੁਤ੍ਤਂ ਹੋਤਿ. ਅਸ੍ਸਾਤਿ ਭਗਵਤੋ, ਅਜ੍ਝਾਸਯਨ੍ਤਿ ਸਮ੍ਬਨ੍ਧੋ. ‘‘ਅਜ੍ਝਾਸਯਂ ਵਿਦਿਤ੍ਵਾ’’ਤਿਵਚਨਸ੍ਸ ਯੁਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਬੁਦ੍ਧਾਨਂ ਹੀ’’ਤਿਆਦਿ. ਹੀਤਿ ਸਚ੍ਚਂ. ਅਯਞ੍ਚਾਤਿ ਸਾਰਿਪੁਤ੍ਤਤ੍ਥੇਰੋ ਚ. ਅਗ੍ਗੋਤਿ ਕੋਟਿਉਕ੍ਕਂਸੋ. ਸੇਟ੍ਠੋਤਿ ਪਵਰੋ ਉਤ੍ਤਮੋ.

‘‘ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨਾ’’ਤਿ ਏਤ੍ਥ ਬ੍ਯਤ੍ਤਪਟਿਬਲਾਨਂ ਵਿਸੇਸਂ ਦਸ੍ਸੇਤੁਂ ਵੁਤ੍ਤਂ ‘‘ਬ੍ਯਤ੍ਤੋ ਨਾਮਾ’’ਤਿਆਦਿ. ਤਤ੍ਥ ਯਸ੍ਸ ਸਾਟ੍ਠਕਥਂ ਵਿਨਯਪਿਟਕਵਾਚੁਗ੍ਗਤਂ ਪਵਤ੍ਤਤਿ, ਅਯਂ ਬ੍ਯਤ੍ਤੋ ਨਾਮਾਤਿ ਯੋਜਨਾ. ਤਸ੍ਮਿਨ੍ਤਿ ਵਿਨਯਪਿਟਕਂ ਵਾਚੁਗ੍ਗਤਭਿਕ੍ਖੁਮ੍ਹਿ. ਯਸ੍ਸਾਤਿ ਭਿਕ੍ਖੁਨੋ. ਸੁਗ੍ਗਹਿਤਨ੍ਤਿ ਸਾਟ੍ਠਕਥਾਯ ਸੁਟ੍ਠੁ ਗਹਿਤਂ. ਅਯਮ੍ਪੀਤਿ ਪਿਸਦ੍ਦੋ ਪੁਰਿਮਭਿਕ੍ਖੁਂ ਅਪੇਕ੍ਖਤਿ. ਇਮਸ੍ਮਿਂ ਅਤ੍ਥੇਤਿ ਇਮਸ੍ਮਿਂ ਵਤ੍ਥੁਮ੍ਹਿ, ਇਮਸ੍ਮਿਂ ਵਿਸਯੇਤਿ ਅਤ੍ਥੋ. ਬ੍ਯਤਿਰੇਕਾਨ੍ਵਯਵਸੇਨ ਪਟਿਬਲਂ ਦਸ੍ਸੇਨ੍ਤੋ ਆਹ ‘‘ਯੋ ਪਨਾ’’ਤਿਆਦਿ. ਯੋ ਪਨ ਨ ਸਕ੍ਕੋਤੀਤਿ ਸਮ੍ਬਨ੍ਧੋ. ਕਸ੍ਮਾਤਿ ਆਹ ‘‘ਕਾਸਸੋਸਸੇਮ੍ਹਾਦਿਨਾ ਵਾ’’ਤਿਆਦਿ. ਤਤ੍ਥ ਕਾਸੋ ਚ ਸੋਸੋ ਚ ਸੇਮ੍ਹੋ ਚ, ਤੇ ਆਦਯੋ ਯਸ੍ਸ ਗੇਲਞ੍ਞਸ੍ਸਾਤਿ ਕਾਸਸੋਸਸੇਮ੍ਹਾਦਿ, ਆਦਿਸਦ੍ਦੇਨ ਏਲ਼ਮੂਗਾਦਯੋ ਸਙ੍ਗਣ੍ਹਾਤਿ. ਓਟ੍ਠੋ ਚ ਦਨ੍ਤੋ ਚ ਜਿਵ੍ਹਾ ਚ, ਤਾ ਆਦਯੋ ਯੇਸਂ ਤਾਲੁਆਦੀਨਨ੍ਤਿ ਓਟ੍ਠਦਨ੍ਤਜਿਵ੍ਹਾਦਯੋ, ਤੇਸਂ. ਪਦਬ੍ਯਞ੍ਜਨੇਹੀਤਿ ਪਦਅਕ੍ਖਰੇਹਿ. ਬ੍ਯਞ੍ਜਨਸਦ੍ਦੋ ਹੇਤ੍ਥ ਅਕ੍ਖਰਵਾਚਕੋ. ਹਾਪੇਤੀਤਿ ਗਲਤ੍ਤਾ ਹਾਪੇਤਿ. ਅਞ੍ਞਥਾ ਵਾ ਵਤ੍ਤਬ੍ਬਨ੍ਤਿ ਅਞ੍ਞੇਨ ਸਿਥਿਲਾਦਿਨਾ ਆਕਾਰੇਨ ਵਾ ਵਤ੍ਤਬ੍ਬਂ. ਅਞ੍ਞਥਾ ਵਦਤੀਤਿ ਅਞ੍ਞੇਨ ਧਨਿਤਾਦਿਆਕਾਰੇਨ ਵਦਤਿ. ਤਬ੍ਬਿਪਰੀਤੋਤਿ ਤਸ੍ਸ ਅਪਟਿਬਲਸ੍ਸ ਵਿਪਰੀਤੋ ਭਿਕ੍ਖੂਤਿ ਸਮ੍ਬਨ੍ਧੋ. ਤਤੋਤਿ ਜਾਨਾਪੇਤਬ੍ਬਤੋ. ਯਨ੍ਤਿ ਯਂ ਆਕਾਰਂ ਧਾਤੁਕਮ੍ਮਮੇਤਂ, ਸਙ੍ਘੋਤਿ ਕਾਰਿਤਕਮ੍ਮਮੇਤਂ. ਇਧ ਕਾਰਿਤਕਮ੍ਮਂ ਕਿਤੋ ਵਦਤਿ.

੭੧. ਉਪਸਮ੍ਪਨ੍ਨਸਮਨਨ੍ਤਰਾਤਿ ਏਤ੍ਥ ਉਪਸਮ੍ਪਨ੍ਨਸ੍ਸ ਸਮਨਨ੍ਤਰਾਤਿ ਅਤ੍ਥਂ ਨਿਵਾਰੇਨ੍ਤੋ ਆਹ ‘‘ਉਪਸਮ੍ਪਨ੍ਨੋ ਹੁਤ੍ਵਾਵ ਸਮਨਨ੍ਤਰਾ’’ਤਿ. ਏਵਸਦ੍ਦੇਨ ਚਿਰਕਾਲਂ ਨਿਵਤ੍ਤੇਤਿ. ਉਲ੍ਲੁਮ੍ਪਤੂਤਿ ਏਤ੍ਥ ਉਪੁਬ੍ਬਲੁਪਧਾਤੁਯਾ ਉਪਸਗ੍ਗਵਸੇਨ ਵਾ ਅਤ੍ਥਾਤਿਸਯਵਸੇਨ ਵਾ ਧਾਤੂਨਮਨੇਕਤ੍ਥਤ੍ਤਾ ਇਧ ਉਪੁਬ੍ਬਧਰਧਾਤੁਯਾ ਅਤ੍ਥੇ ਵਤ੍ਤਤੀਤਿ ਦਸ੍ਸੇਨ੍ਤੋ ਆਹ ‘‘ਉਦ੍ਧਰਤੂ’’ਤਿ. ਉਟ੍ਠਾਪੇਤ੍ਵਾ, ਉਕ੍ਖਿਪਿਤ੍ਵਾ ਵਾ ਧਰਤੂਤਿ ਅਤ੍ਥੋ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਕੁਸਲਾ’’ਤਿਆਦਿ. ਤਤ੍ਥ ‘‘ਅਕੁਸਲਾ ਵੁਟ੍ਠਾਪੇਤ੍ਵਾ’’ਤਿ ਇਮਿਨਾ ਸਹਾਵਧਿਨਾ ਉਤ੍ਯੂਪਸਗ੍ਗਸ੍ਸ ਅਤ੍ਥਂ ਦਸ੍ਸੇਤਿ. ‘‘ਕੁਸਲੇ ਪਤਿਟ੍ਠਾਪੇਤੂ’’ਤਿ ਇਮਿਨਾ ਸਹਾਧਾਰੇਨ ਧਰਧਾਤੁਸ੍ਸ ਅਤ੍ਥਂ ਦਸ੍ਸੇਤਿ. ਉਤ੍ਯੂਪਸਗ੍ਗਸ੍ਸ ਉਕ੍ਖਿਪਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਾਮਣੇਰਭਾਵਾ ਵਾ ਉਦ੍ਧਰਿਤ੍ਵਾ’’ਤਿ. ‘‘ਪਟਿਚ੍ਚਾ’’ਤਿ ਇਮਿਨਾ ਉਪਾਦਾਯਾਤਿ ਏਤ੍ਥ ਸਮੀਪੇ ਆਦਿਯਿਤ੍ਵਾਤਿ ਸਦ੍ਦਤ੍ਥਮਗਹੇਤ੍ਵਾ ਸਙ੍ਕੇਤਤ੍ਥਵਸੇਨ ਪਾਕਟਤ੍ਤਾ ਤਸ੍ਸ ਸਙ੍ਕੇਤਤ੍ਥਂ ਦਸ੍ਸੇਤਿ, ਅਧਿਪ੍ਪਾਯਤ੍ਥਂ ਦਸ੍ਸੇਤੀਤਿ ਅਤ੍ਥੋ.

੭੩. ਅਧਿਟ੍ਠਿਤਾਤਿ ਏਤ੍ਥ ਅਧਿ ਨਿਚ੍ਚਵਸੇਨ ਠਾਤਿ ਪਵਤ੍ਤਤੀਤਿ ਅਧਿਟ੍ਠਿਤਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਨਿਚ੍ਚਪ੍ਪਵਤ੍ਤਿਨੀ’’ਤਿ. ਕਸ੍ਮਾ ਚਤ੍ਤਾਰੋ ਪਚ੍ਚਯਾ ਨਿਸ੍ਸਯਾਤਿ ਵੁਤ੍ਤਾਤਿ ਆਹ ‘‘ਯਸ੍ਮਾ’’ਤਿਆਦਿ. ‘‘ਚਤ੍ਤਾਰੋ’’ਤਿਆਦਿਨਾ ਚਤ੍ਤਾਰੋ ਪਚ੍ਚਯੇ ਨਿਸ੍ਸਾਯ ਅਤ੍ਤਭਾਵੋ ਸੇਤਿ ਪਵਤ੍ਤਤੀਤਿ ਨਿਸ੍ਸਾਯਾਤਿ ਅਵੁਤ੍ਤਕਮ੍ਮਤ੍ਥਂ ਦਸ੍ਸੇਤਿ.

੧੮. ਆਚਰਿਯਵਤ੍ਤਕਥਾ

੭੫. ਕਿਨ੍ਤਾਯਨ੍ਤਿ ਏਤ੍ਥ ਏਕਾਰਲੋਪਵਸੇਨ ਸਨ੍ਧਿ ਹੋਤੀਤਿ ਆਹ ‘‘ਕਿਂਤੇ ਅਯ’’ਨ੍ਤਿ. ‘‘ਓਵਦਿਤਬ੍ਬੋਤਿ’’ਇਮਿਨਾ ਓਵਦਿਯੋਤਿ ਏਤ੍ਥ ਣ੍ਯਪਚ੍ਚਯਸ੍ਸ ਕਮ੍ਮਤ੍ਥਂ ਦਸ੍ਸੇਤਿ. ‘‘ਤਦਤ੍ਥਾਯਾ’’ਤਿ ਇਮਿਨਾ ‘‘ਯਦਿਦਂ ਗਣਬਨ੍ਧਿਕ’’ਨ੍ਤਿ ਉਤ੍ਤਰਵਾਕ੍ਯੇ ਯਂਸਦ੍ਦਂ ਦਿਸ੍ਵਾ ਪੁਬ੍ਬਵਾਕ੍ਯੇ ਤਂਸਦ੍ਦਂ ਞਾਪੇਤਿ, ਤਸ੍ਸ ਬਾਹੁਲ੍ਲਸ੍ਸ ਅਤ੍ਥਾਯਾਤਿ ਅਤ੍ਥੋ.

੭੬. ਸੋਤਿ ਪਸੂਰੋ ਪਰਿਬ੍ਬਾਜਕੋ. ਤੇਨਾਤਿ ਉਦਾਯਿਤ੍ਥੇਰੇਨ. ਸਹਧਮ੍ਮਿਕਨ੍ਤਿ ਸਹ ਧਮ੍ਮੇਨ ਕਾਰਣੇਨ. ਬ੍ਯਤ੍ਤੋ ਤਾਵ ਪੁਬ੍ਬੇ ਵੁਤ੍ਤਲਕ੍ਖਣੋ ਹੋਤੁ, ਪਟਿਬਲੋ ਪਨ ਕਥਂ ਞਾਤਬ੍ਬੋਤਿ ਆਹ ‘‘ਯੋ ਪਨਾ’’ਤਿਆਦਿ. ਯੋ ਪਨ ਸਕ੍ਕੋਤੀਤਿ ਸਮ੍ਬਨ੍ਧੋ. ਚਾਤਿ ਸਚ੍ਚਂ. ਏਤਨ੍ਤਿ ਪਟਿਬਲਤ੍ਤਂ, ‘‘ਪਞ੍ਚਹਿ…ਪੇ… ਵਿਨੇਤੁ’’ਨ੍ਤਿਵਚਨਂ ਵਾ.

੭੭. ਤਿਤ੍ਥਿਯਪਕ੍ਖਸਙ੍ਕਨ੍ਤੇਸੂਤਿ ਤਿਤ੍ਥਿਯਸਙ੍ਖਾਤਂ ਸਾਸਨਸ੍ਸ ਪਟਿਪਕ੍ਖਂ ਸਙ੍ਕਮਨ੍ਤੇਸੁ. ਆਚਾਰਸਮਾਚਾਰਸਿਕ੍ਖਾਪਨਕਨ੍ਤਿ ਅਤਿਵਿਯ ਚਰਿਤਬ੍ਬਂ ਆਭਿਸਮਾਚਾਰਿਕਸੀਲਂ ਸਿਕ੍ਖਾਪਨਕਂ. ਇਮਿਨਾ ਆਚਾਰਂ ਸਿਕ੍ਖਾਪੇਤੀਤਿ ਆਚਰਿਯੋਤਿ ਵਚਨਤ੍ਥਂ ਦਸ੍ਸੇਤਿ. ਨਾਮਮਤ੍ਤਮੇਵਾਤਿ ‘‘ਆਚਰਿਯੋ’’ਤਿ ਵਾ ‘‘ਅਨ੍ਤੇਵਾਸਿਕੋ’’ਤਿ ਵਾ ਨਾਮਮਤ੍ਤਮੇਵ. ਨਾਨਨ੍ਤਿ ਉਪਜ੍ਝਾਯਤੋ ਵਾ ਸਦ੍ਧਿਵਿਹਾਰਿਕਤੋ ਵਾ ਨਾਨਂ.

੨੦. ਪਣਾਮਨਾਖਮਾਪਨਾਕਥਾ

੮੦. ਯਂ ਲਕ੍ਖਣਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਨਿਸ੍ਸਯਨ੍ਤੇਵਾਸਿਕੇਨ ਕਾਤਬ੍ਬਨ੍ਤਿ ਯੋਜਨਾ. ਪਬ੍ਬਜ੍ਜਾਉਪਸਮ੍ਪਦਾਧਮ੍ਮਨ੍ਤੇਵਾਸਿਕੇਹੀਤਿ ਪਬ੍ਬਜ੍ਜਨ੍ਤੇਵਾਸਿਕੇਨ ਚ ਉਪਸਮ੍ਪਦਨ੍ਤੇਵਾਸਿਕੇਨ ਚ ਧਮ੍ਮਨ੍ਤੇਵਾਸਿਕੇਨ ਚ. ਏਤੇਸਨ੍ਤਿ ਪਬ੍ਬਜ੍ਜਾਉਪਸਮ੍ਪਦਾਧਮ੍ਮਨ੍ਤੇਵਾਸਿਕਾਨਂ. ਏਤੇਸੂਤਿ ਏਤੇਸੁ ਤੀਸੁ ਅਨ੍ਤੇਵਾਸਿਕੇਸੁ. ਆਚਰਿਯਸ੍ਸਾਤਿ ਪਬ੍ਬਜ੍ਜਨ੍ਤੇਵਾਸਿਕੋ ਪਬ੍ਬਜ੍ਜਾਚਰਿਯਸ੍ਸ, ਉਪਸਮ੍ਪਦਨ੍ਤੇਵਾਸਿਕੋ ਉਪਸਮ੍ਪਦਾਚਰਿਯਸ੍ਸਾਤਿ ਅਤ੍ਥੋ. ਸਮੀਪੇਤਿ ਨਿਸ੍ਸਯਾਚਰਿਯਸ੍ਸ ਚ ਧਮ੍ਮਾਚਰਿਯਸ੍ਸ ਚ ਆਸਨ੍ਨੇ. ਤਸ੍ਮਾਤਿ ਯਸ੍ਮਾ ਅਨ੍ਤੇਵਾਸਿਕੇਨ ਆਚਰਿਯਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ, ਤਸ੍ਮਾ. ਆਚਰਿਯੇਨਾਪੀਤਿ ਨਿਸ੍ਸਯਪਬ੍ਬਜ੍ਜਾ ਉਪਸਮ੍ਪਦਾ ਧਮ੍ਮਾਚਰਿਯੇਨਾਪਿ. ਓਵਾਦਾਚਰਿਯੋ ਤੇਸੁ ਸਙ੍ਗਹਂ ਗਚ੍ਛਤਿ. ਤੇਸੂਤਿ ਚਤੂਸੁ ਅਨ੍ਤੇਵਾਸਿਕੇਸੁ.

੨੨. ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾ

ਆਣਤ੍ਤਿਵਿਨਿਚ੍ਛਯੋ

੮੩. ‘‘ਨਿਸ੍ਸਯਪਟਿਪਸ੍ਸਦ੍ਧੀਸੂ’’ਤਿ ਸਮੂਹਾਧਾਰੋ. ‘‘ਉਪਜ੍ਝਾਯੋ ਪਕ੍ਕਨ੍ਤੋ ਵਾਤਿਆਦੀਸੂ’’ਤਿ ਅਵਯਵਾਧਾਰੋ. ‘‘ਵਿਪ੍ਪਵਸਿਤੁਕਾਮੋ’’ਤਿ ਇਮਿਨਾ ਨਿਰਾਲਯਭਾਵਂ ਦਸ੍ਸੇਤਿ. ਏਵਂ ਗਤੇਤਿ ਏਵਂ ਉਪਜ੍ਝਾਯੇ ਗਤੇਤਿ ਯੋਜਨਾ. ਅਞ੍ਞਦਾਪੀਤਿ ਅਞ੍ਞਸ੍ਮਿਮ੍ਪਿ ਕਾਲੇ. ਉਪਜ੍ਝਾਯੇਨ ਪਵਾਸਿਤਕਾਲੇਤਿ ਅਤ੍ਥੋ. ਏਕਸਮ੍ਭੋਗਪਰਿਭੋਗੋਤਿ ਅਤ੍ਤਨਾ ਵਾ ਉਪਜ੍ਝਾਯੇਨ ਵਾ ਏਕੋ ਪਚ੍ਚਯਸਮ੍ਭੋਗੋ ਚ ਧਮ੍ਮਪਰਿਭੋਗੋ ਚ. ਏਕਦਿਵਸਮ੍ਪੀਤਿ ਪਿਸਦ੍ਦੋ ਗਰਹਤ੍ਥੋ, ਦ੍ਵਿਹਾਦਿਕਂ ਪਨ ਪਗੇਵਾਤਿ ਅਤ੍ਥੋ. ਪਰਿਹਾਰੋ ਨਤ੍ਥੀਤਿ ਆਪਤ੍ਤਿਪਰਿਹਾਰੋ ਨਤ੍ਥਿ, ਆਪਤ੍ਤਿਯਾ ਪਰਿਹਰਣਂ ਅਪਨਯਨਂ ਨਤ੍ਥੀਤਿ ਅਧਿਪ੍ਪਾਯੋ. ਲਜ੍ਜੀ ਪੇਸਲੋਤਿ ਲਜ੍ਜੀ ਹੁਤ੍ਵਾ ਪਿਯਸੀਲੋ ਭਿਕ੍ਖੂਤਿ ਸਮ੍ਬਨ੍ਧੋ. ਤਦਹੇਵਾਤਿ ਤਸ੍ਮਿਂ ਉਪਜ੍ਝਾਯਸ੍ਸ ਪਕ੍ਕਨ੍ਤਅਹਨਿ ਏਵ. ਤਥਾਤਿ ਯਥਾ ‘‘ਉਪਜ੍ਝਾਯੋ ਲਹੁਂ ਆਗਮਿਸ੍ਸਤੀ’’ਤਿ ਪੁਚ੍ਛਤਿ, ਤਥਾ ‘‘ਅਹਂ ਲਹੁਂ ਆਗਮਿਸ੍ਸਾਮੀ’’ਤਿ ਵੁਤ੍ਤਨ੍ਤਿ ਅਤ੍ਥੋ. ਸਚੇ ਵਦਤੀਤਿ ਸਚੇ ਆਚਰਿਯੋ ਵਦਤੀਤਿ ਯੋਜਨਾ. ਅਸ੍ਸਾਤਿ ਭਿਕ੍ਖੁਸ੍ਸ. ਸਭਾਗਤਨ੍ਤਿ ਲਜ੍ਜਿਪੇਸਲਭਾਵਂ.

ਯਾਵ ਆਗਮਨਾਤਿ ਉਪਜ੍ਝਾਯਸ੍ਸ ਯਾਵ ਆਗਮਨਾ. ਨਨ੍ਤਿ ਉਪਜ੍ਝਾਯਂ. ‘‘ਵਾਸੇਨ੍ਤਿਯੇਵਾ’’ਤਿਪਦੇ ਕਾਰਿਤਕਮ੍ਮਂ. ਤਤ੍ਥਾਤਿ ਉਪਜ੍ਝਾਯਸ੍ਸ ਗਤਟ੍ਠਾਨੇ. ਤੇਨਾਤਿ ਉਪਜ੍ਝਾਯੇਨ. ਪਵਤ੍ਤੀਤਿ ਪਵਤ੍ਤਨਂ. ਨਦੀਪੂਰੇਨ ਵਾ ਉਪਦ੍ਦੁਤੋਤਿ ਸਮ੍ਬਨ੍ਧੋ. ਨਦੀਪੂਰਤ੍ਤਾ ਉਦਕੋਸਕ੍ਕਨਂ ਆਗਮੇਤਿ, ਚੋਰਾਦੀਨਂ ਉਪਦ੍ਦੁਤਤ੍ਤਾ ਸਹਾਯੇ ਪਰਿਯੇਸਤਿ. ਸੋਤਿ ਉਪਜ੍ਝਾਯੋ.

‘‘ਨਿਸ੍ਸਯਪਣਾਮਨਾ’’ਤਿ ਇਮਿਨਾ ਆਣਾਪਨਂ ਆਣਤ੍ਤੀਤਿ ਵਚਨਤ੍ਥੇਨ ਨਿਸ੍ਸਯਪਣਾਮਨਾ ਆਣਤ੍ਤੀਤਿ ਵੁਚ੍ਚਤੀਤਿ ਦਸ੍ਸੇਤਿ. ਨਿਸ੍ਸਯਪਣਾਮਨਾਤਿ ਨਿਸ੍ਸਯਸ੍ਸ ਉਪਜ੍ਝਾਚਰਿਯਸ੍ਸ ਪਣਾਮਨਾ. ਤਸ੍ਮਾ ਪਣਾਮਿਤੋ ਹੋਤੀਤਿ ਸਮ੍ਬਨ੍ਧੋ. ‘‘ਆਪੁਚ੍ਛੀਤਿਆਦਿਨਾ’’ਤਿ ਏਤ੍ਥ ਆਦਿਸਦ੍ਦੇਨ ‘‘ਮਾ ਮਂ ਸੁਸਾਨਗਮਨਂ ਆਪੁਚ੍ਛੀ’’ਤਿਆਦਯੋ ਸਙ੍ਗਣ੍ਹਾਤਿ. ਤੇਨਾਤਿ ਸਦ੍ਧਿਵਿਹਾਰਿਕੇਨ. ਖਮਾਪੇਤਬ੍ਬੋਤਿ ਤਿਤਿਕ੍ਖਾਪੇਤਬ੍ਬੋ.

ਤਾਵਾਤਿ ਮਹਾਥੇਰੇਹਿ, ਮਹਾਥੇਰਾਨਂ ਵਾ ਪਠਮਂ. ਅਞ੍ਞਤ੍ਥਾਤਿ ਉਪਜ੍ਝਾਯਸ੍ਸ ਵਿਹਾਰਤੋ ਅਞ੍ਞਂ ਵਿਹਾਰਂ. ਅਪ੍ਪੇਵਾਤਿ ਅਪਿ ਏਵ ਨਾਮ ਖਮੇਯ੍ਯਾਤਿ ਯੋਜਨਾ. ਤਤ੍ਰੇਵਾਤਿ ਅਞ੍ਞਤ੍ਥੇਵ. ਦੁਬ੍ਭਿਕ੍ਖਾਦਿਦੋਸੇਨਾਤਿ ਏਤ੍ਥ ਆਦਿਸਦ੍ਦੇਨ ਞਾਤਿਵਿਯੋਗਾਦਿਦੋਸੋ ਗਹੇਤਬ੍ਬੋ. ਤਂਯੇਵਾਤਿ ਅਤ੍ਤਨਾ ਵਸਿਤਂ ਤਮੇਵ ਠਾਨਂ. ਅਞ੍ਞਸ੍ਸਾਤਿ ਉਪਜ੍ਝਾਯਤੋ ਅਞ੍ਞਸ੍ਸ ਭਿਕ੍ਖੁਸ੍ਸਾਤਿ ਸਮ੍ਬਨ੍ਧੋ. ਇਮਿਨਾ ਉਪਜ੍ਝਾਯੇਨ ਪਰਿਚ੍ਚਤ੍ਤਤ੍ਤਾ ਉਪਜ੍ਝਾਯਸਮੋਧਾਨੇ ਨਿਸ੍ਸਯਪਟਿਪ੍ਪਸ੍ਸਦ੍ਧਿ ਨਤ੍ਥੀਤਿ ਦੀਪੇਤਿ.

ਸਮੋਧਾਨਵਿਨਿਚ੍ਛਯੋ

ਆਪੁਚ੍ਛਿਤ੍ਵਾਤਿ =੦੦ ਅਨ੍ਤੇਵਾਸਿਕਂ ਆਪੁਚ੍ਛਿਤ੍ਵਾ. ਤਤ੍ਰਾਪੀਤਿ ਆਚਰਿਯਨ੍ਤੇਵਾਸਿਕੇਸੁਪਿ. ਕਦਾਤਿ ਕਸ੍ਮਿਂ ਕਾਲੇ. ਸਾਯਨ੍ਹੇ ਵਾ ਰਤ੍ਤਿਂਵਾਤਿ ਅਜ੍ਜ ਸਾਯਨ੍ਹੇ ਵਾ ਰਤ੍ਤਿਂ ਵਾ. ਤਂਖਣੇਯੇਵਾਤਿ ਤਸ੍ਮਿਂ ਸਮ੍ਪਟਿਚ੍ਛਨਕ੍ਖਣੇਯੇਵ.

ਸੋ ਚਾਤਿ ਅਨ੍ਤੇਵਾਸਿਕੋ ਚ. ਤਤੋਤਿ ਗਾਮਤੋ. ਸੁਗਤੋਤਿ ਸੁਟ੍ਠੁ ਗਤੋ, ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤੀਤਿ ਅਧਿਪ੍ਪਾਯੋ. ਅਥਾਪੀਤਿ ਪੁਨ ਚ ਪਰਂ. ਆਪੁਚ੍ਛਿਤ੍ਵਾ ਪਕ੍ਕਮਨੇ ਵਿਨਿਚ੍ਛਯਂ ਦਸ੍ਸੇਤ੍ਵਾ ਆਪੁਚ੍ਛਿਤ੍ਵਾ ਪਕ੍ਕਮਨੇ ਤਂ ਦਸ੍ਸੇਨ੍ਤੋ ਆਹ ‘‘ਆਚਰਿਯਂ ਅਨਾਪੁਚ੍ਛਾ’’ਤਿਆਦਿ. ਉਪਚਾਰਸੀਮਾਤਿਕ੍ਕਮੇਤਿ ਉਪਚਾਰਸੀਮਾਯ ਅਤਿਕ੍ਕਮੇ ਸਤਿ, ਅਤਿਕ੍ਕਮਨਹੇਤੁ ਵਾਤਿ ਯੋਜਨਾ. ਏਤ੍ਥ ਚ ਉਪਚਾਰਸੀਮਾ ਨਾਮ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪੋਯੇਵ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਂ.

ਸਾਯਨ੍ਹੇ ਵਾ ਰਤ੍ਤਿਭਾਗੇ ਵਾਤਿ ਅਜ੍ਜ ਸਾਯਨ੍ਹੇ ਵਾ ਰਤ੍ਤਿਭਾਗੇ ਵਾ. ਸ੍ਵੇਤਿ ਸੁਵੇ.

ਬਹਿਸੀਮਨ੍ਤਿ ਉਪਚਾਰਸੀਮਤੋ ਬਹਿ. ਤਤੋਤਿ ਬਹਿਸੀਮਤੋ. ਦ੍ਵਿਨ੍ਨਂ ਲੇਡ੍ਡੁਪਾਤਾਨਨ੍ਤਿ ਅਨ੍ਤੇਵਾਸਿਕਤੋ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ. ਅਤਿਕ੍ਕਮਿਤ੍ਵਾਤਿ ਉਪਚਾਰਸੀਮਤੋ ਬਹਿ ਅਨ੍ਤੇਵਾਸਿਕਸਦ੍ਧਿਵਿਹਾਰਿਕਾਨਂ ਵਸਨਟ੍ਠਾਨਤੋ ਅਤਿਕ੍ਕਮਿਤ੍ਵਾ.

ਮੁਚ੍ਚਿਤੁਕਾਮੋਤਿ ਅਨ੍ਤੇਵਾਸਿਕਮ੍ਹਾ ਮੁਚ੍ਚਿਤੁਕਾਮੋ ਏਵ. ਪਣਾਮੇਤੀਤਿ ਕਾਯਵਾਚਾਹਿ ਪਣਾਮੇਤਿ. ਸਾਲਯੋਤਿ ਆਚਰਿਯੇ ਸਾਪੇਕ੍ਖੋ. ‘‘ਨਿਰਾਲਯੋ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਨ ਦਾਨੀ’’ਤਿਆਦਿ. ਏਵਮ੍ਪੀਤਿ ਧੁਰੇ ਨਿਕ੍ਖਿਤ੍ਤੇਪਿ. ਉਭਿਨ੍ਨਂ ਧੁਰਨਿਕ੍ਖੇਪੇ ਸਤਿ, ਧੁਰਨਿਕ੍ਖੇਪਹੇਤੁ ਵਾ ਪਟਿਪ੍ਪਸ੍ਸਮ੍ਭਤੀਤਿ ਯੋਜਨਾ. ਪਣਾਮਿਤੇਨ ਪਟਿਪਜ੍ਜਿਤਬ੍ਬਨ੍ਤਿ ਸਮ੍ਬਨ੍ਧੋ.

ਵੁਤ੍ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਆਚਰਿਯਨ੍ਤਿ ਨਿਸ੍ਸਯਾਚਰਿਯਂ. ਚੇਤਿਯਂ ਵਾ ਵਨ੍ਦਨ੍ਤਂ ਉਪਜ੍ਝਾਯਨ੍ਤਿ ਸਮ੍ਬਨ੍ਧੋ, ਮਗ੍ਗਪ੍ਪਟਿਪਨ੍ਨਂ ਵਾ ਉਪਜ੍ਝਾਯਨ੍ਤਿ ਯੋਜਨਾ. ਦੂਰਤ੍ਤਾਤਿ ਦੂਰਭਾਵਤੋ. ਉਪਰਿਪਾਸਾਦੇਤਿ ਪਾਸਾਦਸ੍ਸ ਉਪਰਿ. ਤਨ੍ਤਿ ਉਪਜ੍ਝਾਯਂ. ਨਿਸਿਨ੍ਨਂ ਉਪਜ੍ਝਾਯਨ੍ਤਿ ਸਮ੍ਬਨ੍ਧੋ.

ਸਵਨਵਸੇਨ ਸਮੋਧਾਨੇ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਉਪਜ੍ਝਾਯਸ੍ਸ ਸਦ੍ਦਨ੍ਤਿ ਸਮ੍ਬਨ੍ਧੋ.