੨੧੮. ਅਤਿਰੇਕਚੀਵਰਾਦਿਕਥਾ

੩੪੮. ਅਚ੍ਛੁਪੇਯ੍ਯਨ੍ਤਿ ਏਤ੍ਥ ਅਚ੍ਛਿ ਵੁਚ੍ਚਤਿ ਨੇਤ੍ਤਮਣ੍ਡਲਂ, ਤਂ ਵਿਯਾਤਿ ਅਚ੍ਛਿ ਛਿਦ੍ਦੋ, ਤਸ੍ਮਿਂ ਉਪਗਨ੍ਤਬ੍ਬਂ ਉਪਨੇਤਬ੍ਬਨ੍ਤਿ ਅਚ੍ਛੁਪੇਯ੍ਯਂ. ‘‘ਲਗ੍ਗਾਪੇਯ੍ਯ’’ਨ੍ਤਿ ਇਮਿਨਾ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਏਤ੍ਥਾਤਿ ਪਂਸੁਕੂਲੇ. ਸਬ੍ਬਮਿਦਨ੍ਤਿ ‘‘ਦਿਗੁਣਂ ਸਙ੍ਘਾਟਿ’’ਨ੍ਤਿਆਦਿਕਂ ਸਬ੍ਬਂ ਇਦਂ ਵਚਨਂ. ਉਦ੍ਧਰਿਤ੍ਵਾਤਿ ਅਪਨੇਤ੍ਵਾ. ਸਂਸਿਬ੍ਬਿਤਨ੍ਤਿ ਅਞ੍ਞਮਞ੍ਞਂ ਸਮ੍ਬਨ੍ਧਿਤ੍ਵਾ ਸਿਬ੍ਬਿਤਂ.

੩੫੧. ਸੋਵਗ੍ਗਿਕਨ੍ਤਿ ਏਤ੍ਥ ਸੁਨ੍ਦਰਾਨਿ ਅਗ੍ਗਾਨਿ ਰੂਪਾਦੀਨਿ ਏਤ੍ਥਾਤਿ ਸਗ੍ਗੋ, ਪੁਬ੍ਬਪਦੇ ਉਕਾਰਸ੍ਸ ਲੋਪੋ, ਉਕਾਰਸ੍ਸ ਉਵਾਦੇਸੇ ‘‘ਸੁਵਗ੍ਗੋ’’ਤਿ ਸਿਜ੍ਝਤਿ. ਸੁਵਗ੍ਗਪ੍ਪਤ੍ਤਹੇਤੁਕਂ ਸੋਵਗ੍ਗਿਕਂ, ਦਾਨਂ, ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਗ੍ਗਪ੍ਪਤ੍ਤਹੇਤੁਕ’’ਨ੍ਤਿ. ‘‘ਅਪਨੇਤੀ’’ਤਿ ਇਮਿਨਾ ਨੁਦਧਾਤੁਯਾ ਅਪਨਯਨਤ੍ਥਂ ਦਸ੍ਸੇਤਿ. ਅਨਾਮਯਾਤਿ ਏਤ੍ਥ ਆਮਯਸਦ੍ਦੋ ਰੋਗਪਰਿਯਾਯੋਤਿ ਆਹ ‘‘ਅਰੋਗਾ’’ਤਿ. ਨਤ੍ਥਿ ਆਮਯੋ ਏਤਿਸ੍ਸਾਤਿ ਅਨਾਮਯਾ.

੩੫੩. ਝਾਨਲਾਭਿਨੋਤਿ ਝਾਨਲਾਭੀਨਂ ਪੁਥੁਜ੍ਜਨਾਨਂ ਕਾਮਚ੍ਛਨ੍ਦਨੀਵਰਣਸ੍ਸ ਵਿਕ੍ਖਮ੍ਭਨਤ੍ਤਾ ਵੁਤ੍ਤਂ.

੩੫੬. ਸਮੋਧਾਨਵਸੇਨ ਦਸ੍ਸਿਯਿਤ੍ਥਾਤਿ ਸਨ੍ਦਿਟ੍ਠੋ. ਸਮੋਧਾਨਵਸੇਨ ਭਜਿਯਿਤ੍ਥਾਤਿ ਸਮ੍ਭਤ੍ਤੋ. ਅਭਿਮੁਖਂ ਲਪਿਤ੍ਥਾਤਿ ਆਲਪਿਤੋ. ਇਮੇਹੀਤਿ ਇਮੇਹਿ ਦ੍ਵੀਹਿ.