੮. ਚੀਵਰਕ੍ਖਨ੍ਧਕਂ
੨੦੨. ਜੀਵਕਵਤ੍ਥੁਕਥਾ
੩੨੬. ਚੀਵਰਕ੍ਖਨ੍ਧਕੇ ਪਦਕ੍ਖਿਣਸਦ੍ਦਸ੍ਸ ਅਪਸਬ੍ਯਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਛੇਕਾ ਕੁਸਲਾ’’ਤਿ. ਅਭਿਸਟਾਤਿ ਏਤ੍ਥ ਸਰਧਾਤੁਯਾ ਗਤਿਚਿਨ੍ਤਾਸੁ ਇਧ ਗਤ੍ਯਤ੍ਥੇਤਿ ਦਸ੍ਸੇਨ੍ਤੋ ਆਹ ‘‘ਅਭਿਗਤਾ’’ਤਿ. ਅਭਿਗਤਾਤਿ ਅਭਿਮੁਖਂ ਗਨ੍ਤਬ੍ਬਾ. ਨਨੁ ਪਾਲ਼ਿਯਂ ‘‘ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨ’’ਨ੍ਤਿ ਵੁਤ੍ਤਂ, ਕਸ੍ਮਾ ਪਨ ‘‘ਅਤ੍ਥਿਕੇਹਿ ਅਤ੍ਥਿਕੇਹਿ ਮਨੁਸ੍ਸੇਹੀ’’ਤਿ ਵੁਤ੍ਤਨ੍ਤਿ ਆਹ ‘‘ਕਰਣਤ੍ਥੇ ਪਨਾ’’ਤਿਆਦਿ. ਇਮਿਨਾ ਛਟ੍ਠੀਕਤ੍ਤਾ ਨਾਮ ਤਤਿਯਾਕਤ੍ਤੁਨਾ ਸਮਾਨੋਯੇਵਾਤਿ ਦਸ੍ਸੇਤਿ. ਨਿਗਮੇ ਵਸਤੀਤਿ ਨੇਗਮੋਤਿ ਵੁਤ੍ਤੇ ਕੁਟੁਮ੍ਬਿਯਗਣੋ ਨੇਗਮੋ ਨਾਮਾਤਿ ਆਹ ‘‘ਕੁਟੁਮ੍ਬਿਯਗਣੋ’’ਤਿ.
੩੨੭. ਨਗਰੇ ਨਿਵਸਨ੍ਤੀਤਿ ਨਾਗਰਾ. ਦਤ੍ਵਾ, ਵੁਟ੍ਠਾਪੇਸੁਨ੍ਤਿ ਸਮ੍ਬਨ੍ਧੋ. ਆਰਾਮੁਯ੍ਯਾਨਵਾਹਨਾਦੀਤਿ ਏਤ੍ਥ ਆਦਿਸਦ੍ਦੇਨ ਅਞ੍ਞਾਨਿ ਉਪਭੋਗਪਰਿਭੋਗਾਨਿ ਸਙ੍ਗਣ੍ਹਾਤਿ. ਗਣਿਕਟ੍ਠਾਨੇਤਿ ਗਣਿਕਾਯ ਠਾਨੇ. ਗਣਿਕਾਤਿ ਚ ਨਗਰਸੋਭਿਨੀ. ਸਾ ਹਿ ਅਤ੍ਥਿਕੇਨ ਜਨਗਣੇਨ ਅਭਿਗਨ੍ਤਬ੍ਬਾਤਿ ਗਣਿਕਾਤਿ ਵੁਚ੍ਚਤਿ. ਪਟਿਸਤੇਨ ਚਾਤਿ ਏਤ੍ਥ ਚਸਦ੍ਦੋ ਅਵਧਾਰਣਤ੍ਥੋ. ਰਤ੍ਤਿਂ ਗਮਨਸ੍ਸ ਪਟਿਨਿਧਿਸਙ੍ਖਾਤੇਨ ਸਤੇਨ ਏਵਾਤਿ ਹਿ ਅਤ੍ਥੋ. ਗਿਲਾਨਨ੍ਤਿ ਏਤ੍ਥ ਭਾਵਪਚ੍ਚਯੇਨ ਵਿਨਾਪਿ ਭਾਵਤ੍ਥੋ ਞਾਤਬ੍ਬੋਤਿ ਆਹ ‘‘ਗਿਲਾਨਭਾਵ’’ਨ੍ਤਿ. ‘‘ਜਾਨਾਪੇਯ੍ਯ’’ਨ੍ਤਿ ਇਮਿਨਾ ਪਟਿਵੇਦੇਯ੍ਯਨ੍ਤਿ ਏਤ੍ਥ ਵਿਦਧਾਤੁਯਾ ਞਾਣਤ੍ਥਂ ਦਸ੍ਸੇਤਿ. ਕਤ੍ਤਰਸੁਪ੍ਪੇਤਿ ਏਤ੍ਥ ਕਤ੍ਤਰਸਦ੍ਦੋ ਜਿਣ੍ਣਪਰਿਯਾਯੋਤਿ ਆਹ ‘‘ਜਿਣ੍ਣਸੁਪ੍ਪੇ’’ਤਿ. ਸੁਪਨ੍ਤਿ ਸੁਨਖਾਦਯੋ ਏਤ੍ਥਾਤਿ ਸੁਪ੍ਪਂ, ਕਤ੍ਤਰਂ ਸੁਪ੍ਪਂ ਕਤ੍ਤਰਸੁਪ੍ਪਂ.
੩੨੮. ਤਨ੍ਤਿ ਜੀਵਕਂ. ਅਞ੍ਞੇ ਰਾਜਦਾਰਕਾ ਵਦਨ੍ਤਿ ਕਿਰਾਤਿ ਸਮ੍ਬਨ੍ਧੋ. ਨਤ੍ਥਿ ਮਾਤਾ ਏਤਸ੍ਸਾਤਿ ਨਿਮ੍ਮਾਤਿਕੋ. ਯਥਾ ਚਾਤਿਆਦੀਸੁ ਯਥਾ ਪੇਸਨ੍ਤਿ, ਤਥਾਤਿ ਯੋਜਨਾ. ਚਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਨ ਕੇਵਲਂ ਵਦਨ੍ਤਿਯੇਵ, ਅਥ ਖੋ ਨ ਕੋਚਿ ਕਿਞ੍ਚਿ ਪੇਸੇਤੀਤਿ ਹਿ ਅਤ੍ਥੋ. ਅਞ੍ਞੇਸਨ੍ਤਿ ਜੀਵਕਤੋ ਅਞ੍ਞੇਸਂ. ਤਸ੍ਸਾਤਿ ਜੀਵਕਸ੍ਸ. ਇਤੀਤਿ ਏਵਂ. ਸੋਤਿ ਜੀਵਕੋ. ਤਂ ਸਬ੍ਬਨ੍ਤਿ ‘‘ਨਿਮ੍ਮਾਤਿਕੋ ਨਿਪ੍ਪਿਤਿਕੋ’’ਤਿ ਵਦਨਞ੍ਚ ਪਣ੍ਣਾਕਾਰਸ੍ਸ ਅਪੇਸਨਞ੍ਚਾਤਿ ਤਂ ਸਬ੍ਬਂ.
ਯਂਨੂਨਾਤਿ ਸਾਧੁ ਵਤ. ਅਹਂ ਵਜ੍ਜਸਿਪ੍ਪਂ ਸਿਕ੍ਖੇਯ੍ਯਂ ਸਾਧੁ ਵਤਾਤਿ ਯੋਜਨਾ. ਤਸ੍ਸਾਤਿ ਜੀਵਕਸ੍ਸ. ਏਤਦਹੋਸੀਤਿ ਏਤਂ ਅਹੋਸਿ, ਪਰਿਵਿਤਕ੍ਕੋ ਅਹੂਤਿ ਅਤ੍ਥੋ. ਪਰੂਪਘਾਤਪਟਿਸਂਯੁਤ੍ਤਾਨੀਤਿ ਪਰਂ ਉਪਗਨ੍ਤ੍ਵਾ, ਉਪ ਭੁਸੇਨ ਵਾ ਹਨਨੇਨ ਪਟਿਸਂਯੁਤ੍ਤਾਨਿ. ਮੇਤ੍ਤਾਪੁਬ੍ਬਭਾਗਨ੍ਤਿ ਸਿਪ੍ਪਸ੍ਸ ਪੁਬ੍ਬਭਾਗੇ ਪਵਤ੍ਤਾ ਮੇਤ੍ਤਾ ਏਤਸ੍ਸਾਤਿ ਮੇਤ੍ਤਾਪੁਬ੍ਬਭਾਗਂ. ਇਤਿ ਅਹੋਸੀਤਿ ਯੋਜਨਾ. ਪੁਰਿਮਚਿਨ੍ਤਾਯ ਅਨੇਕਨ੍ਤਭਾਵਤੋ ਏਕਨ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਅਪਿ ਚਾ’’ਤਿਆਦਿ. ਅਪਿ ਚਾਤਿ ਏਕਨ੍ਤੇਨ. ਅਯਨ੍ਤਿ ਜੀਵਕੋ. ਇਤੋਤਿ ਭਦ੍ਦਕਪ੍ਪਤੋ. ਅਯਨ੍ਤਿ ਉਪਾਸਕੋ. ਚਤੁਪਰਿਸਨ੍ਤਰੇਤਿ ਚਤੁਪਰਿਸਮਜ੍ਝੇ. ਪਤ੍ਥਤਗੁਣਨ੍ਤਿ ਪਤ੍ਥਰਿਤਗੁਣਂ. ਠਾਨਨ੍ਤਰਨ੍ਤਿ ਠਾਨਭੇਦਂ, ਅਹਮ੍ਪੀਤਿ ਨ ਅਯਂ ਉਪਾਸਕੋਯੇਵ, ਅਹਮ੍ਪੀਤਿ ਅਤ੍ਥੋ. ਭਗਵਾਤਿ ਆਲਪਨਪਦਮੇਤਂ. ਪਤ੍ਥਨਨ੍ਤਿ ਇਚ੍ਛਿਤਵਰਂ. ਚੋਦਿਯਮਾਨੋਪੀਤਿ ਉਯ੍ਯੋਜਿਯਮਾਨੋਪਿ. ਪਿਸਦ੍ਦੇਨ ਪੁਰਿਮਚਿਨ੍ਤਨਮਪੇਕ੍ਖਤਿ. ਏਸਾਤਿ ਏਸੋ ਜੀਵਕੋ.
੩੨੯. ਦਿਸਾਪਾਮੋਕ੍ਖੋਤਿ ਪਦਸ੍ਸ ਦਿਸਾਸੁ ਪਾਮੋਕ੍ਖੋ ਦਿਸਾਪਾਮੋਕ੍ਖੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਬ੍ਬਦਿਸਾਸੂ’’ਤਿਆਦਿ. ਤਸ੍ਮਿਞ੍ਚ ਸਮਯੇਤਿ ਜੀਵਕਸ੍ਸ ਤਸ੍ਮਿਂ ਚਿਨ੍ਤਨਸਮਯੇ ਚ, ਆਗਮਂਸੂਤਿ ਸਮ੍ਬਨ੍ਧੋ. ਤੇਤਿ ਵਾਣਿਜੇ, ਪੁਚ੍ਛੀਤਿ ਸਮ੍ਬਨ੍ਧੋ. ਕੁਤੋਤਿ ਨਗਰਤੋ. ਤਕ੍ਕਸੀਲਤੋਤਿ ਤਕ੍ਕਸੀਲਨਗਰਤੋ. ਤਤ੍ਥਾਤਿ ਤਕ੍ਕਸੀਲੇ. ਆਮਾਤਿ ਸਮ੍ਪਟਿਚ੍ਛਨਤ੍ਥੇ ਨਿਪਾਤੋ, ਆਮ ਅਤ੍ਥੀਤਿ ਹਿ ਅਤ੍ਥੋ. ਤੇਤਿ ਵਾਣਿਜਾ. ਤਥਾਤਿ ਯਥਾ ਜੀਵਕੋ ਆਹ, ਤਥਾ ਅਕਂਸੂਤਿ ਅਤ੍ਥੋ. ਸੋਤਿ ਜੀਵਕੋ. ਪਿਤਰਨ੍ਤਿ ਅਭਯਰਾਜਕੁਮਾਰਂ. ਤੇਹੀਤਿ ਵਾਣਿਜੇਹਿ.
ਤਨ੍ਤਿ ਜੀਵਕਂ, ਪੁਚ੍ਛੀਤਿ ਸਮ੍ਬਨ੍ਧੋ. ਸੋਤਿ ਜੀਵਕੋ. ਕਸ੍ਮਾ ਤਾਤ ਤ੍ਵਂ ਇਧਾਗਤੋ ਅਸਿ ਪਨਾਤਿ ਪੁਚ੍ਛੀਤਿ ਯੋਜਨਾ. ਤਤੋਤਿ ਪੁਚ੍ਛਤੋ. ਸੋਤਿ ਜੀਵਕੋ. ਸਿਕ੍ਖਿਤੁਂ ਆਗਤੋ ਅਮ੍ਹੀਤਿ ਯੋਜਨਾ. ਬਹੁਞ੍ਚ ਗਣ੍ਹਾਤੀਤਿਆਦੀਸੁ ਸੋ ਕਿਞ੍ਚਿ ਕਮ੍ਮਂ ਅਕਤ੍ਵਾ ਸਿਪ੍ਪਸ੍ਸੇਵ ਸਿਕ੍ਖਿਤਤ੍ਤਾ ਬਹੁਞ੍ਚ ਗਣ੍ਹਾਤੀਤਿ ਆਹ ‘‘ਯਥਾ’’ਤਿਆਦਿ. ਤਤ੍ਥ ਯਥਾ ਸਿਕ੍ਖਨ੍ਤਿਯੇਵ, ਏਵਂ ਤਥਾ ਸੋ ਨ ਸਿਕ੍ਖਤੀਤਿ ਯੋਜਨਾ. ਸੋ ਪਨਾਤਿ ਜੀਵਕੋ ਪਨ, ਕਰੋਤਿ ਸਿਕ੍ਖਤੀਤਿ ਸਮ੍ਬਨ੍ਧੋ. ਏਕਂ ਕਾਲਨ੍ਤਿ ਏਕਸ੍ਮਿਂ ਕਾਲੇ. ਏਵਂ ਸਨ੍ਤੇ ਕਸ੍ਮਾ ਸੋ ਬਹੁਞ੍ਚ ਗਣ੍ਹਾਤੀਤਿ ਆਹ ‘‘ਏਵਂ ਸਨ੍ਤੇਪੀ’’ਤਿਆਦਿ. ਮੇਧਾਵਿਤਾਯਾਤਿ ਖਿਪ੍ਪਂ ਗਹਣਧਾਰਣਪਞ੍ਞਤਾਯ, ਬਹੁਞ੍ਚ ਸਿਪ੍ਪਨ੍ਤਿ ਸਮ੍ਬਨ੍ਧੋ. ਅਸ੍ਸ ਜੀਵਕਸ੍ਸ ਗਹਿਤਞ੍ਚ ਸਿਪ੍ਪਂ ਨ ਸਮ੍ਮੁਸ੍ਸਤੀਤਿ ਯੋਜਨਾ.
ਯਤ੍ਤਕਂ ਸਿਪ੍ਪਂ ਆਚਰਿਯੋ ਜਾਨਾਤਿ, ਤਤ੍ਤਕਂ ਅਯਂ ਜੀਵਕੋ ਜਾਨਾਤੀਤਿ ਯੋਜਨਾ. ਯਨ੍ਤਿ ਸਿਪ੍ਪਂ. ਅਯਨ੍ਤਿ ਜੀਵਕੋ, ਭਵਿਸ੍ਸਤੀਤਿ ਸਮ੍ਬਨ੍ਧੋ. ਨਨ੍ਤਿ ਜੀਵਕਂ. ਯਥਾਤਿ ਯੇਨਾਕਾਰੇਨ. ਕਮ੍ਮਵਿਪਾਕਨ੍ਤਿ ਕਮ੍ਮਵਿਪਾਕਜਂ ਰੋਗਂ. ‘‘ਨ’’ਨ੍ਤਿ ਪਦਂ ‘‘ਸਿਕ੍ਖਾਪੇਸੀ’’ਤਿ ਪਦੇ ਕਾਰਿਤਕਮ੍ਮਂ, ‘‘ਭੇਸਜ੍ਜਯੋਜਨ’’ਨ੍ਤਿ ਪਦਂ ਧਾਤੁਕਮ੍ਮਂ. ਭੇਸਜ੍ਜਯੋਜਨਨ੍ਤਿ ਭੇਸਜ੍ਜੇਨ ਰੋਗਸ੍ਸ ਯੋਜਨਂ. ਸੋ ਪਨਾਤਿ ਜੀਵਕੋ ਪਨ. ਇਮਿਨਾਤਿ ਜੀਵਕੇਨ ਨ ਉਗ੍ਗਹਿਤਂ, ਉਗ੍ਗਹਿਤਨ੍ਤਿ ਸਮ੍ਬਨ੍ਧੋ. ਏਕੇਨ ਦ੍ਵਾਰੇਨਾਤਿ ਚਤੂਸੁ ਦ੍ਵਾਰੇਸੁ ਏਕੇਨ ਦ੍ਵਾਰੇਨ. ਆਹਿਣ੍ਡਨ੍ਤੋਤਿ ਵਿਚਰਨ੍ਤੋ. ਪਰਿਤ੍ਤਂ ਪਾਥੇਯ੍ਯਨ੍ਤਿ ਏਤ੍ਥ ਪਰਿਤ੍ਤਸਦ੍ਦਸ੍ਸ ਆਰਕ੍ਖਨਤ੍ਥੇਪਿ ਪਵਤ੍ਤਨਤੋ ਇਧ ਅਪ੍ਪਤ੍ਥੇ ਪਵਤ੍ਤਤੀਤਿ ਦਸ੍ਸੇਨ੍ਤੋ ਆਹ ‘‘ਅਪ੍ਪਮਤ੍ਤਕ’’ਨ੍ਤਿ. ਕਸ੍ਮਾ ਅਪ੍ਪਮਤ੍ਤਕਂ ਪਾਥੇਯ੍ਯਂ ਅਦਾਸੀਤਿ ਯੋਜਨਾ. ਤਸ੍ਸਾਤਿ ਦਿਸਾਪਾਮੋਕ੍ਖਸ੍ਸ. ਅਯਨ੍ਤਿ ਜੀਵਕੋ, ਲਭਿਸ੍ਸਤੀਤਿ ਸਮ੍ਬਨ੍ਧੋ. ਤਤੋਤਿ ਲਭਨਤੋ. ਖੀਣੇ ਪਾਥੇਯ੍ਯੇਤਿ ਪਾਥੇਯ੍ਯੇ ਖੀਣੇ ਸਤੀਤਿ ਯੋਜਨਾ.
੨੦੩. ਸੇਟ੍ਠਿਭਰਿਯਾਦਿਵਤ੍ਥੁਕਥਾ
੩੩੦. ਯਾ ਨਾਮਾਤਿ ਯਾ ਨਾਮ ਘਰਣੀ. ਕਿਮ੍ਪਿ ਮਾਯਨ੍ਤਿ ਏਤ੍ਥ ਏਕਾਰਲੋਪਸਨ੍ਧੀਤਿ ਆਹ ‘‘ਕਿਮ੍ਪਿ ਮੇ ਅਯ’’ਨ੍ਤਿ. ਇਮਿਨਾ ਯਕਾਰਾਦੇਸਸਨ੍ਧਿਂ ਨਿਵਤ੍ਤੇਤਿ, ‘‘ਮ੍ਯਾਯ’’ਨ੍ਤਿਪਿ ਪਾਠੋ, ਏਵਂ ਸਤਿ ਆਦੇਸਸਨ੍ਧਿਯੇਵ, ਨ ਲੋਪਸਨ੍ਧਿ. ਅਯਂ ਘਰਣੀ ਮੇ ਕਿਞ੍ਚਿ ਦੇਯ੍ਯਧਮ੍ਮਂ ਕਿਮ੍ਪਿ ਦਸ੍ਸਤੀਤਿ ਯੋਜਨਾ. ਤਸ੍ਸ ਚਾਤਿ ਸਬ੍ਬਿਸ੍ਸ ਚ, ਕਤਸ੍ਸਾਤਿਪਿ ਪਾਠੋ. ਰੋਗੂਪਸਮਸ੍ਸ ਚਾਤਿ ਮਮ ਰੋਗਸ੍ਸ ਉਪਸਮਸ੍ਸ ਚ, ਇਮੇਹਿ ਪਦੇਹਿ ਸਂਯਮਸ੍ਸਾਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਉਪਕਾਰ’’ਨ੍ਤਿ ਇਮਿਨਾ ਉਪਜਾਨਾਮੀਤਿ ਏਤ੍ਥ ਉਪਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ਅਧਿਪ੍ਪਾਯੋਤਿ ਘਰਣਿਯਾ ਆਸਯੋ.
੩੩੧. ‘‘ਸਬ੍ਬਾਲਙ੍ਕਾਰਂ ਤੁਯ੍ਹਂ ਹੋਤੂ’’ਤਿ ਇਦਂ ਵਚਨਂ ਰਾਜਾ ਸਭਾਵਤੋ ਆਹ, ਉਦਾਹੁ ਕਿਞ੍ਚਿ ਚਿਨ੍ਤੇਤ੍ਵਾਤਿ ਆਹ ‘‘ਰਾਜਾ’’ਤਿਆਦਿ. ਤਤ੍ਥ ਇਮਨ੍ਤਿ ਅਲਙ੍ਕਾਰਂ. ਪਮਾਣਯੁਤ੍ਤੇਤਿ ਕਾਰਣਾਨੁਰੂਪੇ. ਨਨ੍ਤਿ ਜੀਵਕਂ. ਨਾਟਕਾਨਮ੍ਪੀਤਿ ਪਞ੍ਚਸਤਿਕਾਨਂ ਨਾਟਕਾਨਮ੍ਪਿ. ਸੋਪੀਤਿ ਜੀਵਕੋਪਿ. ਤੇਸਨ੍ਤਿ ਅਭਯਕੁਮਾਰਨਾਟਕਾਨਂ. ਮੇਤਿ ਮਯ੍ਹਂ, ਨ ਪਤਿਰੂਪਨ੍ਤਿ ਸਮ੍ਬਨ੍ਧੋ. ਅਯ੍ਯਿਕਾਨਨ੍ਤਿ ਮਾਤਾਮਹੀਨਂ. ਕਤਸ੍ਸ ਮੇ ਉਪਕਾਰਨ੍ਤਿ ਯੋਜਨਾ. ਇਮਿਨਾ ਅਧਿਕਾਰੋ ਚ ਉਪਕਾਰੋ ਚ ਅਤ੍ਥਤੋ ਸਦਿਸਨ੍ਤਿ ਦਸ੍ਸੇਤਿ. ਰਾਜਾ ਪਸਨ੍ਨੋ ਦਤ੍ਵਾ ਆਹਾਤਿ ਸਮ੍ਬਨ੍ਧੋ.
੨੦੫. ਰਾਜਗਹਸੇਟ੍ਠਿਵਤ੍ਥੁਕਥਾ
੩੩੨. ਇਰਿਯਾਪਥਸਮ੍ਪਰਿਵਤ੍ਤਨੇਨਾਤਿ ਇਰਿਯਾਪਥਸ੍ਸ ਪੁਨਪ੍ਪੁਨਂ ਪਰਿਵਤ੍ਤਨੇਨ. ਤੀਹਿ ਸਤ੍ਤਾਹੇਹਿ ਨਿਚ੍ਚਲਸ੍ਸ ਨਿਪਨ੍ਨਸ੍ਸ ਅਸ੍ਸ ਸੇਟ੍ਠਿਸ੍ਸ ਮਤ੍ਥਲੁਙ੍ਗਨ੍ਤਿ ਯੋਜਨਾ. ਅਪ੍ਪੇਵ ਨਿਪਜ੍ਜੇਯ੍ਯਾਤਿ ਯੋਜਨਾ. ਨਨ੍ਤਿ ਸੇਟ੍ਠਿਂ. ਤੇਨੇਵਾਤਿ ਤੇਨੇਵ ਕਾਰਣੇਨ. ਸੀਸਂ ਛਾਦੇਤੀਤਿ ਸੀਸਚ੍ਛਵੀਤਿ ਵੁਤ੍ਤੇ ਸੀਸਪਟਿਚ੍ਛਾਦਨਚਮ੍ਮਨ੍ਤਿ ਆਹ ‘‘ਸੀਸਚਮ੍ਮ’’ਨ੍ਤਿ. ਤਸ੍ਸਾਤਿ ਸੇਟ੍ਠਿਸ੍ਸ. ਤੀਹਿ ਸਤ੍ਤਾਹੇਨਾਤਿ ਏਤ੍ਥ ਪੁਬ੍ਬਪਦੇਨ ਪਚ੍ਛਿਮਪਦਂ ਗੁਣਿਤ੍ਵਾ ਗਹੇਤਬ੍ਬਨ੍ਤਿ ਆਹ ‘‘ਤੀਹਿ ਪਸ੍ਸੇਹਿ ਏਕੇਨੇਕੇਨ ਸਤ੍ਤਾਹੇਨਾ’’ਤਿ.
੩੩੩. ਜਨਂ ਨੀਹਰਾਪੇਤ੍ਵਾਤਿ ਜਨਂ ਅਪਕ੍ਕਮਾਪੇਤ੍ਵਾ.
੨੦੭. ਪਜ੍ਜੋਤਰਾਜਵਤ੍ਥੁਕਥਾ
੩੩੪. ਵਿਚ੍ਛਿਕਸ੍ਸ ਜਾਤੋਤਿ ਵਿਚ੍ਛਿਕਸ੍ਸ ਕਾਰਣਾ ਜਾਤੋ, ਵਿਚ੍ਛਿਕਂ ਪਟਿਚ੍ਚ ਜਾਤੋਤਿ ਅਤ੍ਥੋ. ਸਬ੍ਬਿ ਚ ਭੇਸਜ੍ਜਂ ਵਿਚ੍ਛਿਕਾਨਂ ਪਟਿਕੂਲਂ ਹੋਤੀਤਿ ਯੋਜਨਾ. ਪਞ੍ਞਾਸਯੋਜਨਿਕਾਤਿ ਏਤ੍ਥ ਣਿਕਪਚ੍ਚਯਸ੍ਸ ਗਨ੍ਤੁਂ ਸਮਤ੍ਥਤ੍ਥੇ ਪਵਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਗਨ੍ਤੁਂ ਸਮਤ੍ਥੋ ਹੋਤੀ’’ਤਿ. ਅਸ੍ਸ ਰਞ੍ਞੋਤਿ ਚਨ੍ਦਪਜ੍ਜੋਤਨਾਮਕਸ੍ਸ ਅਸ੍ਸ ਰਞ੍ਞੋ. ਹਤ੍ਥਿਨੀਯੇਵਾਤਿ ਭਦ੍ਦਵਤਿਕਾ ਨਾਮ ਹਤ੍ਥਿਨੀਯੇਵ. ਵੀਸਯੋਜਨਸਤਨ੍ਤਿ ਵੀਸਾਧਿਕਂ ਯੋਜਨਸਤਂ.
ਭੁਞ੍ਜਿਤੁਂ ਨਿਸਿਨ੍ਨਸ੍ਸ ਏਕਸ੍ਸ ਕੁਲਪੁਤ੍ਤਸ੍ਸ ਦ੍ਵਾਰੇਤਿ ਯੋਜਨਾ. ਤਸ੍ਸਾਤਿ ਕੁਲਪੁਤ੍ਤਸ੍ਸ, ਆਰੋਚੇਸੀਤਿ ਸਮ੍ਬਨ੍ਧੋ. ਸੋਤਿ ਕੁਲਪੁਤ੍ਤੋ, ‘‘ਆਹਰਾ’’ਤਿ ਆਣਾਪੇਸੀਤਿ ਸਮ੍ਬਨ੍ਧੋ. ਇਤਰੋਤਿ ਪੁਰਿਸੋ. ਤਨ੍ਤਿ ਪਤ੍ਤਂ. ਯਤ੍ਥ ਯਤ੍ਥਾਤਿ ਯਸ੍ਮਿਂ ਯਸ੍ਮਿਂ ਭਵੇ. ਤਤ੍ਥ ਤਤ੍ਥ ਵਾਹਨਸਮ੍ਪਨ੍ਨੋ ਹੋਮੀਤਿ ਯੋਜਨਾ. ਸੋਤਿ ਪੁਰਿਸੋ. ਪਜ੍ਜੋਤੋ ਨਾਮ ਅਯਂ ਰਾਜਾ ਜਾਤੋਤਿ ਯੋਜਨਾ.
ਸਬ੍ਬਿਂ ਪਾਯੇਤ੍ਵਾਤਿ ਇਦਂ ਉਪਲਕ੍ਖਣਮਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਸਬ੍ਬਿਞ੍ਚ ਪਾਯੇਤ੍ਵਾ’’ਤਿਆਦਿ. ਸਬ੍ਬਿਞ੍ਚ ਪਾਯੇਤ੍ਵਾ, ਪਰਿਚਾਰਕਾਨਂ ਆਹਾਰਾਚਾਰੇ ਵਿਧਿਞ੍ਚ ਆਚਿਕ੍ਖਿਤ੍ਵਾਤਿ ਅਤ੍ਥੋ. ਓਲੁਮ੍ਪੇਤ੍ਵਾਤਿ ਲੁਪਿਧਾਤੁ ਓਦਹਨਤ੍ਥੋਤਿ ਆਹ ‘‘ਓਦਹਿਤ੍ਵਾ’’ਤਿ. ਵਿਰੇਚੇਸੀਤਿ ਉਦ੍ਧਞ੍ਚ ਅਧੋ ਚ ਵਿਰੇਚੇਸਿ.
੨੦੮. ਸਿਵੇਯ੍ਯਕਦੁਸ੍ਸਯੁਗਕਥਾ
੩੩੫. ਸਿਵਥਿਕਨ੍ਤਿ ਸਿਵਾ ਜਮ੍ਬੁਕਾ ਕੁਣਪਖਾਦਨਤ੍ਥਾਯ ਆਗਨ੍ਤ੍ਵਾ ਤਿਟ੍ਠਨ੍ਤਿ ਏਤ੍ਥਾਤਿ ਸਿਵਟ੍ਠਂ, ਤਦੇਵ ਸਿਵਥਿਕਂ, ਇਮਿਨਾ ਸਿਵਥਿਕਾਯਂ ਉਪ੍ਪਨ੍ਨਂ ਸਿਵੇਯ੍ਯਕਂ ਥਿਕਸਦ੍ਦਸ੍ਸ ਲੋਪਂ ਕਤ੍ਵਾਤਿ ਦਸ੍ਸੇਤਿ. ਤਤ੍ਥਾਤਿ ਉਤ੍ਤਰਕੁਰੂਸੁ. ਤਨ੍ਤਿ ਮਤਂ. ਹਤ੍ਥਿਸੋਣ੍ਡਕਸਕੁਣਾਤਿ ਹਤ੍ਥਿਲਿਙ੍ਗਵਿਹਙ੍ਗਮਾ. ਤੇ ਹਿ ਹਤ੍ਥਿਨੋ ਸੋਣ੍ਡੋ ਵਿਯ ਸੋਣ੍ਡੋ ਏਤੇਸੁ ਅਤ੍ਥੀਤਿ ਹਤ੍ਥੀਸੋਣ੍ਡਕਾ, ਤੇ ਚ ਤੇ ਸਕੁਣਾ ਚੇਤਿ ਹਤ੍ਥਿਸੋਣ੍ਡਕਸਕੁਣਾਤਿ ਵੁਚ੍ਚਨ੍ਤਿ. ਰਞ੍ਞੋ ਆਹਰਨ੍ਤੀਤਿ ਰਞ੍ਞੋ ਅਤ੍ਥਾਯ, ਸਨ੍ਤਿਕਂ ਵਾ ਆਹਰਨ੍ਤਿ. ਇਦਨ੍ਤਿ ਸਿਵੇਯ੍ਯਕਂ ਦੁਸ੍ਸਯੁਗਂ. ਸਿਵਿਰਟ੍ਠੇ ਵਾਯਿਤਂ ਸਿਵੇਯ੍ਯਕਨ੍ਤਿ ਚ ਦਸ੍ਸੇਨ੍ਤੋ ਆਹ ‘‘ਅਥਵਾ’’ਤਿਆਦਿ. ਤੇਨਾਤਿ ਕਾਰਣੇਨ. ‘‘ਸਿਵੇਯ੍ਯਕਨ੍ਤਿ…ਪੇ… ਵਦਨ੍ਤੀ’’ਤਿ ਪੋਰਾਣਾ ਆਹੂਤਿ ਯੋਜਨਾ.
੨੦੯. ਸਮਤ੍ਤਿਂਸਵਿਰੇਚਨਕਥਾ
੩੩੬. ਕਿਂਪਨਾਤਿ ਏਤ੍ਥ ਕਿਂਸਦ੍ਦੋ ਅਨਿਯਮਤ੍ਥੋ. ਲੂਖੋ ਕਿਂ, ਨ ਲੂਖੋ ਕਿਨ੍ਤਿ ਹਿ ਅਤ੍ਥੋ. ‘‘ਸਿਨੇਹਪਾਨਂ ਪਨ ਤੇਮੇਤੀ’’ਤਿ ਚ ‘‘ਕਰੋਤੀ’’ਤਿ ਚ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਕਲਕਾਯੇ. ਸਿਰਾਤਿ ਕਣ੍ਡਰਾ. ਅਯਨ੍ਤਿ ਜੀਵਕੋ. ਓਲ਼ਾਰਿਕਦੋਸਹਰਣਤ੍ਥਨ੍ਤਿ ਓਲ਼ਾਰਿਕਸ੍ਸ ਦੋਸਸ੍ਸ ਅਪਨਯਨਤ੍ਥਂ. ਪਕਤਤ੍ਤੇਤਿ ਪਕਤਿਸਙ੍ਖਾਤੇ ਸਭਾਵੇ ਸਤੀਤਿ ਸਮ੍ਬਨ੍ਧੋ. ਭਗਵਾ ਭਨ੍ਤੇਤਿ ਯੋਜਨਾ. ਕੁਤੋਤਿ ਕਸ੍ਸ ਸਨ੍ਤਿਕਾ. ਵਟ੍ਟਤਿ ਨੁ ਖੋਤਿ ਚਿਨ੍ਤੇਸੀਤਿ ਯੋਜਨਾ. ਤਤੋਤਿ ਚਿਨ੍ਤਨਤੋ. ਸੋਣੋਤਿ ਕੋਲ਼ਿਵੀਸਸੋਣੋ, ਭੁਞ੍ਜਤੀਤਿ ਸਮ੍ਬਨ੍ਧੋ. ਤਤੋਤਿ ਸੋਣਸ੍ਸ ਸਨ੍ਤਿਕਾ. ਤਸ੍ਸਾਤਿ ਸੋਣਸ੍ਸ. ਸੋਤਿ ਸੋਣੋ. ਥੇਰਸ੍ਸਾਤਿ ਮੋਗ੍ਗਲ੍ਲਾਨਤ੍ਥੇਰਸ੍ਸ. ਇਦਂ ‘‘ਪਤ੍ਤ’’ਨ੍ਤਿਪਦੇ ਸਾਮੀ, ‘‘ਅਦਾਸੀ’’ਤਿ ਪਦੇ ਸਮ੍ਪਦਾਨਂ. ਅਞ੍ਞਂ ਪਿਣ੍ਡਪਾਤਨ੍ਤਿ ਸਮ੍ਬਨ੍ਧੋ.
ਰਾਜਾਪਿ ਖੋ ਭੁਞ੍ਜਿਤੁਕਾਮੋ ਅਹੋਸੀਤਿ ਸਮ੍ਬਨ੍ਧੋ. ਯਞ੍ਚ ਸੁਜਾਤਾ ਅਦਾਸਿ, ਯਞ੍ਚ ਪਰਿਨਿਬ੍ਬਾਨਕਾਲੇ ਚੁਨ੍ਦੋ ਕਮ੍ਮਾਰਪੁਤ੍ਤੋ, ਭਾਜਨਗਤੇਸੁ ਦ੍ਵੀਸੁਯੇਵ ਤੇਸੁ ਪਿਣ੍ਡਪਾਤੇਸੁ ਦੇਵਤਾ ਓਜਂ ਪਕ੍ਖਿਪਨ੍ਤੀਤਿ ਯੋਜਨਾ. ਅਞ੍ਞੇਸੂਤਿ ਦ੍ਵੀਹਿ ਪਿਣ੍ਡਪਾਤੇਹਿ ਅਞ੍ਞੇਸੁ. ਇਚ੍ਛਨ੍ਤਿ ਰੁਚਿਂ. ਸੋਤਿ ਬਿਮ੍ਬਿਸਾਰੋ ਰਾਜਾ. ਤਵੇਵਾਤਿ ਤੁਯ੍ਹਮੇਵ. ਤਨ੍ਤਿ ਭਗਵਤੋ ਵਚਨਂ. ਰਾਜਾ ਅਕਾਸੀਤਿ ਸਮ੍ਬਨ੍ਧੋ. ਤੇਤਿ ਅਸੀਤਿਕੁਲਪੁਤ੍ਤਸਹਸ੍ਸਾ. ਏਤਦਤ੍ਥਮੇਵਾਤਿ ਸੋਣਸ੍ਸ ਅਰਹਤ੍ਤੇ ਪਤਿਟ੍ਠਾਪਨਤ੍ਥਮੇਵ, ਨ ਰਞ੍ਞੋ ਅਨੁਗ੍ਗਹਤ੍ਥਨ੍ਤਿ ਅਧਿਪ੍ਪਾਯੋ.
੨੧੦. ਵਰਯਾਚਨਕਥਾ
੩੩੭. ਕਤਂ ਭਤ੍ਤਕਿਚ੍ਚਂ ਯੇਨਾਤਿ ਕਤਭਤ੍ਤਕਿਚ੍ਚੋ, ਤਸ੍ਮਿਂ ਸਤੀਤਿ ਸਮ੍ਬਨ੍ਧੋ. ਵੁਤ੍ਤਨਯੇਨੇਵਾਤਿ ਰਾਹੁਲਵਤ੍ਥੁਮ੍ਹਿ (ਮਹਾਵ. ਅਟ੍ਠ. ੧੦੫) ਵੁਤ੍ਤਨਯੇਨੇਵ. ਇਦਂ ਵਤ੍ਥਨ੍ਤਿ ਇਦਂ ਸਿਵੇਯ੍ਯਕਂ ਵਤ੍ਥਂ, ਉਪ੍ਪਨ੍ਨਨ੍ਤਿ ਸਮ੍ਬਨ੍ਧੋ. ‘‘ਤਾਵਾ’’ਤਿ ਅਜ੍ਝਾਹਰਿਤਬ੍ਬੋ. ਏਤ੍ਥਨ੍ਤਰੇਤਿ ਏਤਸ੍ਮਿਂ ਵਤ੍ਥੁਪ੍ਪਨ੍ਨਕਾਲਮਜ੍ਝੇ. ਕੋਚਿ ਭਿਕ੍ਖੂਤਿ ਸਮ੍ਬਨ੍ਧੋ. ਤੇਨਾਤਿ ਪਂਸੁਕੂਲਿਕਹੇਤੁਨਾ. ਅਯਨ੍ਤਿ ਜੀਵਕੋ. ਗਹਪਤਿਚੀਵਰਨ੍ਤਿ ਏਤ੍ਥ ਗਹਪਤੀਨਂ ਚੀਵਰਨ੍ਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਗਹਪਤੀਹਿ ਦਿਨ੍ਨਂ ਚੀਵਰ’’ਨ੍ਤਿ. ਵਤ੍ਥਦਾਨਾਨਿਸਂਸਪਟਿਸਂਯੁਤ੍ਤਾਯਾਤਿ ‘‘ਵਤ੍ਥਦੋ ਹੋਤਿ ਵਣ੍ਣਦੋ’’ਤਿਆਦਿਕਾਯ (ਸਂ. ਨਿ. ੧.੪੨) ਵਤ੍ਥਦਾਨਸ੍ਸ ਆਨਿਸਂਸੇਨ ਪਟਿਸਂਯੁਤ੍ਤਾਯ. ਵਿਚ੍ਛਾਵਸੇਨ ਵੁਤ੍ਤੋ ‘‘ਇਤਰੀਤਰੇਨਾ’’ਤਿ ਸਬ੍ਬਨਾਮਸਦ੍ਦੋ ਅਨਿਯਮਤ੍ਥੋਤਿ ਆਹ ‘‘ਅਪ੍ਪਗ੍ਘੇਨਪਿ ਮਹਗ੍ਘੇਨਪਿ ਯੇਨ ਕੇਨਚੀ’’ਤਿ. ਪਾਵਾਰੋਤਿ ਉਤ੍ਤਰਾਸਙ੍ਗੋ. ਸੋ ਹਿ ਪਾਰੁਪਨਤ੍ਥਾਯ ਵਰਿਯਤਿ ਇਚ੍ਛਿਯਤੀਤਿ ਪਾਵਾਰੋਤਿ ਵੁਚ੍ਚਤਿ. ‘‘ਕਪ੍ਪਾਸਾਦਿਭੇਦੋ’’ਤਿ ਇਮਿਨਾ ਤਸ੍ਸ ਸਰੂਪਂ ਦਸ੍ਸੇਤਿ. ਪਕਤਿਕੋਜਵਮੇਵਾਤਿ ਪਕਤਿਯਾ ਭਿਕ੍ਖੂਨਂ ਸਾਰੁਪ੍ਪਂ ਕੋਜਵਮੇਵ. ਸੋਲ਼ਸਨਾਟਕਿਤ੍ਥੀਨਂ ਠਤ੍ਵਾ ਨਚ੍ਚਯੋਗ੍ਯਤ੍ਤਾ ਮਹਤੀ ਪਿਟ੍ਠਿ ਏਤਸ੍ਸਾਤਿ ਮਹਾਪਿਟ੍ਠਿਯਂ, ਤਮੇਵ ਕੋਜਵਂ ਮਹਾਪਿਟ੍ਠਿਯਕੋਜਵਂ. ਤਸ੍ਸ ਕਿਰ ਲੋਮਾਨਿ ਚਤੁਰਙ੍ਗੁਲਾਧਿਕਾਨਿ ਹੋਨ੍ਤਿ.
੨੧੧. ਕਮ੍ਬਲਾਨੁਜਾਨਨਾਦਿਕਥਾ
੩੩੮. ਕਾਸੀਨਨ੍ਤਿ ਕਾਸੀਨਂ ਜਨਪਦਾਨਂ, ਕਾਸਿਰਟ੍ਠੇ ਨਿਵਾਸੀਨਂ ਜਨਾਨਂ ਵਾ. ਪਸੇਨਦਿਸ੍ਸਾਤਿ ਪਚ੍ਚੁਟ੍ਠਂ, ਪਟਿਪਕ੍ਖਂ ਵਾ ਸੇਨਂ ਜਿਨਾਤੀਤਿ ਪਸੇਨਦਿ ਜਕਾਰਸ੍ਸ ਦਕਾਰਂ ਕਤ੍ਵਾ. ਏਸਾਤਿ ਏਸੋ ਕਾਸਿਰਾਜਾ. ‘‘ਸਹਸ੍ਸ’’ਨ੍ਤਿ ਇਮਿਨਾ ਕਾਸਿਸਦ੍ਦਸ੍ਸ ਸਙ੍ਕੇਤਸਙ੍ਖ੍ਯਂ ਦਸ੍ਸੇਤਿ. ਤਂਅਗ੍ਘਨਕੋਤਿ ਤੇਨ ਕਾਸਿਨਾ ਅਗ੍ਘਨਕੋ. ਕਸ੍ਮਾ ਅਡ੍ਢਕਾਸੀਤਿ (ਥੇਰੀਗਾ. ਅਟ੍ਠ. ੨੫) ਵੁਤ੍ਤੋਤਿ ਆਹ ‘‘ਅਯਂ ਪਨਾ’’ਤਿਆਦਿ. ਅਯਨ੍ਤਿ ਕਮ੍ਬਲੋ. ਪਨਾਤਿ ਕਾਰਣਤ੍ਥਜੋਤਕੋ. ਯਸ੍ਮਾਤਿ ਹਿ ਅਤ੍ਥੋ.
੩੩੯. ਭਞ੍ਜਿਤਬ੍ਬਂ ਖੋਮਾਦੀਨਿ ਪਞ੍ਚ ਸੁਤ੍ਤਾਨਿ ਮਿਸ੍ਸਿਤ੍ਵਾ ਅਵਮਦ੍ਦਿਤਬ੍ਬਨ੍ਤਿ ਭਙ੍ਗਨ੍ਤਿ ਦਸ੍ਸੇਨ੍ਤੋ ਆਹ ‘‘ਭਙ੍ਗਂ ਨਾਮਾ’’ਤਿਆਦਿ. ਵਾਕਮਯਮੇਵਾਤਿ ਭਙ੍ਗਨਾਮਕੇਨ ਵਾਕੇਨ ਨਿਬ੍ਬਤ੍ਤਮੇਵ.
੩੪੦. ਤੇਤਿ ਭਿਕ੍ਖੂ, ਸਲ੍ਲਕ੍ਖਿਂਸੁ ਕਿਰਾਤਿ ਸਮ੍ਬਨ੍ਧੋ. ਏਤਸ੍ਸਾਤਿ ਪਦਸ੍ਸ, ਅਤ੍ਥਨ੍ਤਿ ਸਮ੍ਬਨ੍ਧੋ. ਨ ਅਚ੍ਛਿਂਸੂਤਿ ਨ ਆਸਿਂਸੁ, ਨ ਵਸਿਂਸੂਤਿ ਅਤ੍ਥੋ. ਨਾਕਾਮਾਤਿ ਏਤ੍ਥ ਕਮੁਧਾਤੁ ਇਚ੍ਛਤ੍ਥੋ ਯਕਾਰਲੋਪੋਤਿ ਆਹ ‘‘ਨ ਅਨਿਚ੍ਛਾਯਾ’’ਤਿ. ਦਾਤਬ੍ਬੋਤਿ ਭਾਗੋ ਦਾਤਬ੍ਬੋ. ਉਪਚਾਰੇਤਿ ਸੁਸਾਨਸ੍ਸ ਸਮੀਪੇ. ‘‘ਅਕਾਮਾ ਭਾਗਂ ਦਾਤੁ’’ਨ੍ਤਿ ਵਚਨਸ੍ਸ ਅਨੇਕਨ੍ਤਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਯਦਿ ਪਨਾ’’ਤਿਆਦਿ. ਇਧਾਤਿ ਇਮਂ ਸੁਸਾਨਂ. ‘‘ਸਮ੍ਪਤ੍ਤਾ ਗਣ੍ਹਨ੍ਤੂ’’ਤਿ ਦੇਨ੍ਤੀਤਿ ਯੋਜਨਾ. ਯੇਨਾਤਿ ਭਿਕ੍ਖੁਨਾ. ਸਦਿਸਾ ਓਕ੍ਕਮਿਂਸੂਤਿ ਏਤ੍ਥ ਸਦਿਸਸਦ੍ਦੋ ਸਮਪਰਿਯਾਯੋਤਿ ਆਹ ‘‘ਸਮਂ ਓਕ੍ਕਮਿਂਸੂ’’ਤਿ. ਸਮਨ੍ਤਿ ਭਾਵਨਪੁਂਸਕੋ. ਸਮਾਨਦਿਸਾਯਾਤਿ ਵਾ ਦਸ੍ਸੇਨ੍ਤੋ ਆਹ ‘‘ਏਕਦਿਸਾਯ ਵਾ’’ਤਿ. ਏਤ੍ਥ ਪਨ ਯਕਾਰਲੋਪੋ ਦਟ੍ਠਬ੍ਬੋ. ਬਹਿਮੇਵਾਤਿ ਸੁਸਾਨਤੋ ਬਹਿ ਏਵ. ਕਤਿਕਨ੍ਤਿ ਕਤੇਨ ਪਵਤ੍ਤਂ ਸਙ੍ਗਰਂ.
੨੧੩. ਚੀਵਰਪਟਿਗ੍ਗਾਹਕਸਮ੍ਮੁਤਿਕਥਾ
੩੪੨. ‘‘ਯੋ ਨ ਛਨ੍ਦਾਗਤਿਂ ਗਚ੍ਛਤੀ’’ਤਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਞਾਤਕਾਦੀਨਂ ਚੀਵਰਨ੍ਤਿ ਸਮ੍ਬਨ੍ਧੋ. ਏਕਚ੍ਚਸ੍ਮਿਨ੍ਤਿ ਜਨੇ. ਵਾਸਦ੍ਦੋ ਵਿਕਪ੍ਪਤ੍ਥੋ. ਏਤੇਸੁ ਤੀਸੁ ਅਞ੍ਞਤਰੇਨ ਕਾਰਣੇਨ ਛਨ੍ਦਾਗਤਿਂ ਗਚ੍ਛਤਿ ਨਾਮਾਤਿ ਹਿ ਅਤ੍ਥੋ. ਆਗਤਸ੍ਸਾਪਿ ਚੀਵਰਨ੍ਤਿ ਸਮ੍ਬਨ੍ਧੋ ਪਿਸਦ੍ਦੋ ਗਰਹਤ੍ਥੋ. ਪਗੇਵ ਪਚ੍ਛਾ ਆਗਤਸ੍ਸਾਤਿ ਹਿ ਅਤ੍ਥੋ. ਅਵਮਞ੍ਞਨ੍ਤਿ ਉਞ੍ਞਾਤਂ. ਵੋਤਿ ਤੁਮ੍ਹਾਕਂ. ਨਤ੍ਥਿ ਕਿਨ੍ਤਿ ਯੋਜਨਾ. ਮੁਟ੍ਠਾ ਸਤਿ ਏਤਸ੍ਸਾਤਿ ਮੁਟ੍ਠਸ੍ਸਤਿ. ਆਗਤਾਨਮ੍ਪਿ ਚੀਵਰਨ੍ਤਿ ਸਮ੍ਬਨ੍ਧੋ. ਪਿਸਦ੍ਦੋ ਸਮ੍ਭਾਵਨਤ੍ਥੋ. ਪਗੇਵ ਪਠਮਂ ਆਗਤਾਨਨ੍ਤਿ ਹਿ ਅਤ੍ਥੋ. ਏਤਂ ਚੀਵਰਪਟਿਗ੍ਗਾਹਕਟ੍ਠਾਨਂ ਨਾਮਾਤਿ ਯੋਜਨਾ. ਸਨ੍ਤਸਨ੍ਤੋ ਵਾਤਿ ਖੇਦਖੇਦੋ ਵਾ. ਇਦਞ੍ਚਿਦਞ੍ਚਾਤਿ ਇਦਞ੍ਚ ਇਦਞ੍ਚ ਚੀਵਰਂ. ਤਸ੍ਮਾਤਿ ਯਸ੍ਮਾ ਚ ਗਚ੍ਛਤਿ, ਯਸ੍ਮਾ ਚ ਜਾਨਾਤਿ, ਤਸ੍ਮਾ. ਯੋਤਿ ਭਿਕ੍ਖੁ. ਸਕ੍ਕੋਤੀਤਿ ਸਮ੍ਬਨ੍ਧੋ. ਏਵਰੂਪੋ ਭਿਕ੍ਖੁ ਸਮ੍ਮਨਿਤਬ੍ਬੋਤਿ ਯੋਜਨਾ.
ਅਪਲੋਕਨੇਨਪੀਤਿ ‘‘ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਕਾਤੁਂ ਸਙ੍ਘਂ ਅਪਲੋਕੇਮੀ’’ਤਿ ਅਪਲੋਕਨੇਨਪਿ, ਸਮ੍ਮਨਿਤੁਨ੍ਤਿ ਸਮ੍ਬਨ੍ਧੋ. ਯਤ੍ਥ ਪਨਾਤਿ ਯਸ੍ਮਿਂ ਪਨ ਧੁਰਵਿਹਾਰੇ.
‘‘ਗਹਿਤਟ੍ਠਾਨੇਯੇਵਾ’’ਤਿ ਇਮਿਨਾ ਤਤ੍ਥੇਵਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ‘‘ਛਡ੍ਡੇਤ੍ਵਾ’’ਤਿ ਇਮਿਨਾ ਉਜ੍ਝਿਤ੍ਵਾਤਿ ਏਤ੍ਥ ਉਧਧਾਤੁਯਾ ਵਿਸ੍ਸਜ੍ਜਨਤ੍ਥਂ ਦਸ੍ਸੇਤਿ. ਚੀਵਰਪਟਿਗ੍ਗਾਹਕਨ੍ਤਿ ਪਦਸ੍ਸ ਚੀਵਰਂ ਪਟਿਗ੍ਗਣ੍ਹਾਤੀਤਿ ਚੀਵਰਪਟਿਗ੍ਗਾਹਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੋ’’ਤਿਆਦਿ. ਤਤ੍ਥ ਯੋ ਪਟਿਗ੍ਗਣ੍ਹਾਤਿ, ਸੋ ਚੀਵਰਪਟਿਗ੍ਗਾਹਕੋ ਨਾਮਾਤਿ ਯੋਜਨਾ. ‘‘ਚੀਵਰਪਟਿਸਾਮਕ’’ਨ੍ਤਿ ਇਮਿਨਾ ਚੀਵਰਂ ਗਹਿਤਟ੍ਠਾਨਤੋ ਨੀਹਰਿਤ੍ਵਾ ਭਣ੍ਡਾਗਾਰੇ ਦਹਤਿ ਠਪੇਤੀਤਿ ਚੀਵਰਨਿਦਹਕੋਤਿ ਅਤ੍ਥਂ ਦਸ੍ਸੇਤਿ. ਯੋ ਨ ਛਨ੍ਦਾਤਿਂ ਗਚ੍ਛਤੀਤਿਆਦੀਸੁ ਏਤ੍ਥ ਏਤੇਸੁ ਚ ਇਤੋ ਪਰਞ੍ਚਾਤਿ ਯੋਜਨਾ.
੨੧੪. ਭਣ੍ਡਾਗਾਰਸਮ੍ਮੁਤਿਆਦਿਕਥਾ
੩੪੩. ਯੋ ਵਿਹਾਰੋ ਵਾ ਯੋ ਅਡ੍ਢਯੋਗੋ ਵਾ ਹੋਤਿ, ਸੋ ਵਿਹਾਰਾਦਿਕੋ ਸਮ੍ਮਨਿਤਬ੍ਬੋਤਿ ਯੋਜਨਾ. ‘‘ਆਰਾਮਿਕਸਾਮਣੇਰਾਦੀਹੀ’’ਤਿ ਪਦਂ ਵਿਵਿਤ੍ਤਤ੍ਥੇ ਅਪਾਦਾਨਂ, ਕਰਣਮ੍ਪਿ ਯੁਜ੍ਜਤਿ. ਪਚ੍ਚਨ੍ਤਸੇਨਾਸਨਂ ਪਨ ਨ ਸਮ੍ਮਨਿਤਬ੍ਬਂ ਚੋਰਾਦਿਉਪਦ੍ਦਵਤ੍ਤਾ. ਵਿਹਾਰਮਜ੍ਝੇਯੇਵਾਤਿ ਭਣ੍ਡਾਗਾਰਵਿਹਾਰਮਜ੍ਝੇਯੇਵ.
ਯਸ੍ਸਾਤਿ ਭਣ੍ਡਾਗਾਰਸ੍ਸ. ਇਦਂ ਪਦਂ ‘‘ਛਦਨਾਦੀਸੂ’’ਤਿ ਪਦੇ ਸਾਮੀ, ‘‘ਨਤ੍ਥੀ’’ਤਿ ਪਦੇ ਸਮ੍ਪਦਾਨਂ. ਯਸ੍ਸ ਪਨਾਤਿ ਭਣ੍ਡਾਗਾਰਸ੍ਸ ਪਨ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਸ੍ਮਿਂਚਿ ਠਾਨੇ. ਯੇਨਾਤਿ ਪਤਿਤਹੇਤੁਨਾ. ਮੂਸਿਤ੍ਵਾ ਖਾਦਤੀਤਿ ਮੂਸਿਕੋ. ਆਦਿਸਦ੍ਦੇਨ ਗੋਧਾਮਙ੍ਗੁਸਾਦਯੋ ਸਙ੍ਗਣ੍ਹਾਤਿ. ਉਪ ਭੁਸਂ, ਉਪਗੁਹਿਤ੍ਵਾ ਵਾ ਚਿਨਨ੍ਤੀਤਿ ਉਪਚਿਕਾ. ਤਨ੍ਤਿ ਓਵਸ੍ਸਨਾਦਿਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਵਨ੍ਤਿਆਦਿ ਨਿਗਮਨਂ.
ਚੀਵਰਪਟਿਗ੍ਗਾਹਕਾਦੀਹੀਤਿ ਆਦਿਸਦ੍ਦੇਨ ਚੀਵਰਨਿਦਹਕਭਣ੍ਡਾਗਾਰਿਕੇ ਸਙ੍ਗਣ੍ਹਾਤਿ. ਤਤ੍ਥਾਤਿ ਤੇਸੁ. ਚੀਵਰਪਟਿਗ੍ਗਾਹਕੇਨ ਨ ਗਣ੍ਹਿਤਬ੍ਬਨ੍ਤਿ ਸਮ੍ਬਨ੍ਧੋ. ਤਾਵਾਤਿ ਚੀਵਰਨਿਦਹਕਭਣ੍ਡਾਗਾਰਿਕਾਨਂ, ਤੇਹਿ ਵਾ ਪਠਮਂ. ਯਂ ਯਨ੍ਤਿ ਚੀਵਰਂ. ਤਥੇਵਾਤਿ ਯਥਾ ਵਿਸੁਂ ਵਿਸੁਂ ਕਤ੍ਵਾ ਗਣ੍ਹਤਿ, ਤਥੇਵ. ਚੀਵਰਨਿਦਹਕੇਨਾਪੀਤਿ ਪਿਸਦ੍ਦੋ ਨ ਕੇਵਲਂ ਪਟਿਗ੍ਗਾਹਕੇਨੇਵ, ਅਥ ਖੋ ਨਿਦਹਕੇਨਪੀਤਿ ਸਮ੍ਪਿਣ੍ਡੇਤਿ. ਤਥੇਵਾਤਿ ਯਥਾ ਨਿਦਹਕੋ ਆਚਿਕ੍ਖਤਿ, ਤਥੇਵ. ਤਤੋਤਿ ਤੇਹਿ ਚੀਵਰੇਹਿ, ਵਿਭਤ੍ਤਅਪਾਦਾਨਂ, ਤੇਸੁ ਚੀਵਰੇਸੁ ਵਾ ਨਿਦ੍ਧਾਰਣਂ. ਤਦੇਵਾਤਿ ਸਙ੍ਘੇਨ ਵੁਤ੍ਤਚੀਵਰਮੇਵ.
ਇਤੀਤਿਆਦਿ ਨਿਗਮਨਂ. ਭਗਵਤਾ ਅਨੁਞ੍ਞਾਤੋਤਿ ਸਮ੍ਬਨ੍ਧੋ. ਭਣ੍ਡਾਗਾਰਨ੍ਤਿ ਭਣ੍ਡਸ੍ਸ ਠਪਨੋਕਾਸਂ ਅਗਾਰਂ. ਭਣ੍ਡਾਗਾਰਿਕੋਤਿ ਭਣ੍ਡਾਗਾਰੇ ਨਿਯੁਤ੍ਤੋ. ਬਾਹੁਲ੍ਲਿਕਤਾਯਾਤਿ ਪਚ੍ਚਯਬਾਹੁਲ੍ਲੇਨ ਨਿਯੁਤ੍ਤਭਾਵਤ੍ਥਂ. ਏਵਂ ਸਨ੍ਤੇ ਕਿਮਤ੍ਥਾਯ ਅਨੁਞ੍ਞਾਤੋਤਿ ਆਹ ‘‘ਅਪਿ ਚਾ’’ਤਿਆਦਿ. ਅਨੁਗ੍ਗਹਾਯ ਅਨੁਞ੍ਞਾਤੋਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਨੇਵ ਜਾਨੇਯ੍ਯੁਨ੍ਤਿ ਯੋਜਨਾ. ਦ੍ਵੇ ਦ੍ਵੇ ਵਾ ਚੀਵਰੇਤਿ ਸਮ੍ਬਨ੍ਧੋ. ਸਙ੍ਗਹਂ ਕਾਤੁਨ੍ਤਿ ਸਙ੍ਘੇਨ ਸਙ੍ਗਹਂ ਕਾਤੁਂ.
ਨ ਵੁਟ੍ਠਾਪੇਤਬ੍ਬੋਤਿ ਏਤ੍ਥ ਅਤ੍ਥੁਦ੍ਧਾਰਵਸੇਨ ਅਞ੍ਞੇਪਿ ਅਵੁਟ੍ਠਾਪਨੀਯੇ ਦਸ੍ਸੇਨ੍ਤੋ ਆਹ ‘‘ਅਞ੍ਞੇਪੀ’’ਤਿਆਦਿ. ਹੀਤਿ ਵਿਤ੍ਥਾਰੋ. ਤਤ੍ਥਾਤਿ ਚਤੂਸੁ. ਸਙ੍ਘੋ ਪਨ ਦੇਤੀਤਿ ਸਮ੍ਬਨ੍ਧੋ. ਉਪਕਾਰਤਾਯ ਚਾਤਿ ਸਙ੍ਘਸ੍ਸ ਉਪਕਾਰਤਾਯ ਚ. ਏਤ੍ਥ ਚ ਪੁਰਿਮੇਸੁ ਤੀਸੁ ਏਕੋਯੇਵ ਹੇਤੁ, ਪਚ੍ਛਿਮੇ ਪਨ ਦ੍ਵੇ ਹੇਤਵੋਤਿ ਦਟ੍ਠਬ੍ਬਂ.
ਸਮ੍ਮੁਖੀਭੂਤੇਨਾਤਿ ਅਞ੍ਞਮਞ੍ਞਸ੍ਸ ਮੁਖੇ ਸਂਵਿਜ੍ਜਮਾਨੋ, ਸਨ੍ਨਿਪਤਿਤੋ ਵਾ ਸਮ੍ਮੁਖੋ, ਸਮ੍ਮੁਖੋ ਹੁਤ੍ਵਾ ਭੂਤੋ ਸਮ੍ਮੁਖੀਭੂਤੋ. ਭੂਸਦ੍ਦਯੋਗਤ੍ਤਾ ਅਕਾਰਸ੍ਸੀਕਾਰੋ ਹੋਤਿ, ਅਨ੍ਤੋਉਪਚਾਰਸੀਮਾਯਂ ਠਿਤੋ ਸਙ੍ਘੋ. ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨ੍ਤੋਉਪਚਾਰਸੀਮਾਯਂ ਠਿਤੇਨਾ’’ਤਿ. ਕੋਲਾਹਲਨ੍ਤਿ ਬਹੁਜਨੇਹਿ ਸਨ੍ਨਿਪਤਿਤ੍ਵਾ ਏਕਤੋ ਕਤਂ ਅਬ੍ਯਤ੍ਤਸਦ੍ਦਂ. ਤਦਾਕਾਰਂ ਦਸ੍ਸੇਨ੍ਤੋ ਆਹ ‘‘ਅਮ੍ਹਾਕ’’ਨ੍ਤਿਆਦਿ. ‘‘ਚੀਵਰਭਾਜਕੇਸੂ’’ਤਿਆਦਿਨਾ ਅਗਤਿਗਮਨਾਕਾਰਂ ਦਸ੍ਸੇਤਿ, ਤਂ ਸੁਵਿਞ੍ਞੇਯ੍ਯਮੇਵ. ਤੁਲਾਭੂਤੋਤਿ ਤੁਲਾਯ ਸਦਿਸੋ ਹੁਤ੍ਵਾ ਭੂਤੋ, ਤੁਲਾਯ ਸਦਿਸਭਾਵਂ ਪਤ੍ਤੋ ਵਾ. ਮਜ੍ਝਤ੍ਤੋਤਿ ਮਜ੍ਝੇ ਠਿਤੋ ਅਤ੍ਤਾ ਸਭਾਵੋ ਏਤਸ੍ਸਾਤਿ ਮਜ੍ਝਤ੍ਤੋ.
ਇਦਨ੍ਤਿ ਚੀਵਰਂ. ਘਨਨ੍ਤਿ ਨਿਰਨ੍ਤਰਂ. ਤਨੁਕਨ੍ਤਿ ਵਿਰਲ਼ਂ. ਏਤ੍ਥ ‘‘ਉਚ੍ਚਿਨਿਤ੍ਵਾ’’ਤਿ ਇਮਿਨਾ ਵਤ੍ਥਸ੍ਸ ਪਮਾਣੇਨ ਉਚ੍ਚਿਨਨਂ ਦਸ੍ਸੇਤਿ. ‘‘ਤੁਲਯਿਤ੍ਵਾ’’ਤਿ ਇਮਿਨਾ ਅਗ੍ਘੇਨ ਤੁਲਨਂ ਦਸ੍ਸੇਤਿ. ਵਣ੍ਣਾਵਣ੍ਣਂ ਕਤ੍ਵਾਤਿ ਵਣ੍ਣਞ੍ਚ ਅਵਣ੍ਣਞ੍ਚ ਖੁਦ੍ਦਕਞ੍ਚ ਪਮਾਣਂ, ਮਹਨ੍ਤਞ੍ਚ ਪਮਾਣਂ ਕਤ੍ਵਾਤਿ ਅਤ੍ਥੋ. ਏਕਚ੍ਚਾਨਿ ਚੀਵਰਾਨਿ ਅਪ੍ਪਗ੍ਘਾਨਿ ਹੋਨ੍ਤਿ, ਏਕਚ੍ਚਾਨਿ ਮਹਗ੍ਘਾਨੀਤਿ ਵੁਤ੍ਤਂ ਹੋਤਿ. ਦਸਦਸਅਗ੍ਘਨਕਨ੍ਤਿ ਦਸਹਿ ਦਸਹਿ ਕਹਾਪਣੇਹਿ ਅਗ੍ਘਨਕਂ. ਯਨ੍ਤਿ ਚੀਵਰਂ, ਬਨ੍ਧਿਤ੍ਵਾਤਿ ਨਵਗ੍ਘਨਕਂ ਏਕਗ੍ਘਨਕੇਨ, ਅਟ੍ਠਗ੍ਘਨਕਞ੍ਚ ਦ੍ਵਿਅਗ੍ਘਨਕੇਨ ਬਨ੍ਧਿਤ੍ਵਾਤਿ ਅਤ੍ਥੋ. ਸਮੇ ਪਟਿਵੀਸੇਤਿ ਸਮਪਮਾਣੇ ਪਟਿਵੀਸੇ ਠਪੇਤ੍ਵਾ, ਇਮਿਨਾ ‘‘ਵਣ੍ਣਾਵਣ੍ਣ’’ਨ੍ਤਿ ਏਤ੍ਥ ਵਣ੍ਣਸਦ੍ਦੋ ਪਮਾਣਤ੍ਥੋਤਿ ਦੀਪੇਤਿ. ਦਸ ਦਸ ਭਿਕ੍ਖੂਤਿ ਇਦਂ ਉਪਲਕ੍ਖਣਵਸੇਨ ਵੁਤ੍ਤਂ ਅਞ੍ਞੇਨਾਕਾਰੇਨਾਪਿ ਗਣੇਤੁਂ ਸਕ੍ਕੁਣੇਯ੍ਯਤ੍ਤਾ. ਭਣ੍ਡਿਕਨ੍ਤਿ ਚੀਵਰਭਣ੍ਡੇਨ ਨਿਯੁਤ੍ਤਂ ਪੁਟਂ. ਕੁਸੋਤਿ ਸਲਾਕਦਣ੍ਡੋ.
ਅਤ੍ਤਿਸ੍ਸਰਾਤਿ ਅਤ੍ਤਨਾਵ ਅਤ੍ਤਾਨਂ ਇਸ੍ਸਰਾ. ਅਞ੍ਞੇਸਂ ਵਤ੍ਤਪਟਿਪਤ੍ਤਿਨ੍ਤਿ ਸਮ੍ਬਨ੍ਧੋ. ਉਪਡ੍ਢਭਾਗੋਤਿ ਭਿਕ੍ਖੂਨਂ ਲਦ੍ਧਭਾਗਤੋ ਉਪਡ੍ਢੋ ਭਾਗੋ. ਯੇ ਪਨਾਤਿ ਸਾਮਣੇਰਾ ਪਨ. ਸਮਭਾਗੋਤਿ ਭਿਕ੍ਖੂਨਂ ਭਾਗੇਨ ਸਮੋ ਭਾਗੋ. ਇਦਞ੍ਚਾਤਿ ‘‘ਉਪਡ੍ਢਪਟਿਵੀਸ’’ਨ੍ਤਿ ਵਚਨਞ੍ਚ, ਕਥਿਤਨ੍ਤਿ ਸਮ੍ਬਨ੍ਧੋ. ਸਮਕਮੇਵਾਤਿ ਭਿਕ੍ਖੁਸਾਮਣੇਰਾਨਂ ਸਮਪਮਾਣਮੇਵ. ਤਤ੍ਰੁਪ੍ਪਾਦਵਸ੍ਸਾਵਾਸਿਕਨ੍ਤਿ ਤਸ੍ਮਿਂ ਵਿਹਾਰੇ ਉਪ੍ਪਾਦੇਨ ਮੂਲੇਨ ਉਪ੍ਪਾਦਿਤਂ ਵਸ੍ਸਾਵਾਸਿਕਂ. ਫਾਤਿਕਮ੍ਮਨ੍ਤਿ ਵਡ੍ਢਨਕਮ੍ਮਂ ‘‘ਯਤ੍ਤਕੇਨ ਵਿਨਯਾਗਤੇਨ ਸਮ੍ਮੁਞ੍ਜਨਿਬਨ੍ਧਨਾਦਿਨਾ ਹਤ੍ਥਕਮ੍ਮੇਨ ਵਿਹਾਰਸ੍ਸ ਊਨਤਾ ਨ ਹੋਤਿ, ਤਤ੍ਤਕਂ ਕਤ੍ਵਾਤਿ ਅਤ੍ਥੋ. ਏਤਨ੍ਤਿ ਫਾਤਿਕਮ੍ਮਂ ਕਤ੍ਵਾ ਗਹਣਂ. ਹੀਤਿ ਸਚ੍ਚਂ. ਏਤ੍ਥਾਤਿ ਤਤ੍ਰੁਪ੍ਪਾਦਵਸ੍ਸਾਵਾਸਿਕਗਹਣੇ. ਸਬ੍ਬੇਸਨ੍ਤਿ ਅਖਿਲਾਨਂ ਭਿਕ੍ਖੁਸਾਮਣੇਰਾਨਂ. ਭਣ੍ਡਾਗਾਰਿਕਚੀਵਰੇਪੀਤਿ ਭਣ੍ਡਾਗਾਰੇ ਠਪਿਤੇ ਅਕਾਲਚੀਵਰੇਪਿ. ਪਿਸਦ੍ਦੇਨ ਤਤ੍ਰੁਪ੍ਪਾਦਵਸ੍ਸਾਵਾਸਿਕਮਪੇਕ੍ਖਤਿ. ਸਾਮਣੇਰਾ ਉਕ੍ਕੁਟ੍ਠਿਂ ਕਰੋਨ੍ਤੀਤਿ ਸਮ੍ਬਨ੍ਧੋ. ਅਪਹਰਿਤਕਨ੍ਤਿ ਹਰਿਤਵਿਰਹਿਤਂ. ਰਙ੍ਗਛਲ੍ਲਿਨ੍ਤਿ ਰਜਨਚ੍ਛਵਿਂ. ਏਤਨ੍ਤਿ ਉਕ੍ਕੁਟ੍ਠਿਕਰਣਤੋ ਸਮਭਾਗਦਾਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯੇ ਚਾਤਿ ਸਾਮਣੇਰਾ ਚ. ਵਿਰਜ੍ਝਿਤ੍ਵਾ ਕਰੋਨ੍ਤੀਤਿ ਕਤ੍ਤਬ੍ਬਕਾਲੇਸੁ ਅਕਤ੍ਵਾ ਯਥਿਚ੍ਛਿਤਕ੍ਖਣੇ ਕਰੋਨ੍ਤਿ. ਤੇਤਿ ਸਾਮਣੇਰੇ. ਸਮਪਟਿਵੀਸੋ ਦਾਤਬ੍ਬੋਤਿ ‘‘ਕਰਿਸ੍ਸਾਮਾ’’ਤਿ ਪਟਿਞ੍ਞਾਤਮਤ੍ਤੇਨ ਸਮੋ ਪਟਿਵੀਸੋ ਦਾਤਬ੍ਬੋ.
‘‘ਸਕਂ ਭਾਗਂ ਦਾਤੁ’’ਨ੍ਤਿ ਇਦਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਕਿਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਭਣ੍ਡਾਗਾਰਤੋ…ਪੇ… ਸਨ੍ਧਾਯਾ’’ਤਿ. ਪਹਤਾਯਾਤਿ ਪਹਰਿਤਬ੍ਬਾਯ, ਪਹਨਿਤਬ੍ਬਾਯ ਵਾ. ਤਸ੍ਮਾਤਿ ਯਸ੍ਮਾ ਸਨ੍ਧਾਯ ਵੁਤ੍ਤਂ, ਤਸ੍ਮਾ. ਅਨੀਹਟੇਸੂਤਿ ਭਣ੍ਡਾਗਾਰਤੋ ਅਨੀਹਰਿਤੇਸੁ. ਇਮਸ੍ਸ ਭਿਕ੍ਖੁਨੋਤਿ ਉਤ੍ਤਰਿਤੁਕਾਮਸ੍ਸ ਇਮਸ੍ਸ ਭਿਕ੍ਖੁਨੋ. ਤੁਲਾਯਾਤਿ ਮਾਨੇਨ.
ਤੇਸੂਤਿ ਸਾਟਕੇਸੁ, ਏਕੋ ਸਾਟਕੋਤਿ ਯੋਜਨਾ. ਸਬ੍ਬੇਸੁ ਪਾਤਿਤੇਸੂਤਿ ਸਮ੍ਬਨ੍ਧੋ. ਏਤ੍ਤਕੇਨਾਤਿ ਦ੍ਵਾਦਸਗ੍ਘਨਕੇਨ. ਤਂ ਸੁਤ੍ਵਾਤਿ ਭਿਕ੍ਖੂਨਂ ਤਂ ਵਚਨਂ ਸੁਤ੍ਵਾ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਸਙ੍ਘਗਣਸਨ੍ਤਕੇ. ਅਨੁਪ੍ਪਦਾਨੇਨ ਖਿਪਿਯਤਿ ਪਕ੍ਖਿਪਿਯਤੀਤਿ ਅਨੁਕ੍ਖੇਪਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਨੁਕ੍ਖੇਪਂ ਨਾਮਾ’’ਤਿਆਦਿ. ਯਤ੍ਤਕਂ ਅਗ੍ਘਨ੍ਤਿ ਸਮ੍ਬਨ੍ਧੋ. ਤਤ੍ਤਕੇਨ ਅਗ੍ਘੇਨ ਅਗ੍ਘਨਕੇਤਿ ਯੋਜਨਾ. ਵਿਕਲ੍ਲਕਾਤਿ ਵਿਕਲਸ੍ਸ ਭਾਵੋ ਵਿਕਲ੍ਲਂ, ਚੀਵਰਪੁਗ੍ਗਲਾਨਂ ਅਪਹੋਨਕਭਾਵੋ, ਤਦੇਵ ਵਿਕਲ੍ਲਕਾ. ‘‘ਤਤ੍ਥਾ’’ਤਿ ਪਾਠਸੇਸੋ, ਤੇਸੁ ਦ੍ਵੀਸੁ ਵਿਕਲ੍ਲਕੇਸੂਤਿ ਅਤ੍ਥੋ. ਅਤ੍ਥੀਤਿ ਸਂਵਿਜ੍ਜਨ੍ਤਿ, ਨਿਪਾਤੋਯਂ. ਛਿਨ੍ਦਨ੍ਤੇਹਿ ਚ ਦਾਤਬ੍ਬਾਨੀਤਿ ਸਮ੍ਬਨ੍ਧੋ. ਦਾਤਬ੍ਬਾਨੀਤਿ ਚ ਛਿਨ੍ਦਿਤਬ੍ਬਾਨਿ. ਦਾਸਦ੍ਦੋ ਹਿ ਅਵਖਣ੍ਡਨਤ੍ਥੋ. ਦਾਤੁਨ੍ਤਿ ਅਵਖਣ੍ਡਿਤੁਂ. ਏਵਨ੍ਤਿਆਦਿ ਨਿਗਮਨਂ. ਏਤ੍ਥਾਤਿ ਏਤੇਸੁ ਵਿਕਲ੍ਲਕੇਸੁ. ਤਨ੍ਤਿ ਚੀਵਰਂ. ਅਥਾਤਿ ਤੋਸਿਤਤੋ ਪਰਂ. ਤਤ੍ਥਾਤਿ ਏਕਸ੍ਸ ਭਿਕ੍ਖੁਨੋ ਕੋਟ੍ਠਾਸੇ. ਸਾਮਣਕਨ੍ਤਿ ਸਮਣਸ੍ਸ ਅਨੁਰੂਪਂ. ਯੋਤਿ ਭਿਕ੍ਖੁ. ਤੇਨਾਤਿ ਪਰਿਕ੍ਖਾਰੇਨ. ਇਦਮ੍ਪੀਤਿ ਅਞ੍ਞਂ ਸਾਮਣਕਸ੍ਸ ਪਰਿਕ੍ਖਾਰਸ੍ਸ ਠਪਨਮ੍ਪਿ. ਪਿਸਦ੍ਦੇਨ ਪੁਰਿਮਂ ਵਤ੍ਥਛਿਨ੍ਦਨਮਪੇਕ੍ਖਤਿ.
ਵਗ੍ਗਨ੍ਤਿ ਸਮੂਹਂ. ਅਟ੍ਠ ਵਾ ਨਵ ਵਾ ਭਿਕ੍ਖੂ ਹੋਨ੍ਤੀਤਿ ਯੋਜਨਾ. ਤੇਸਨ੍ਤਿ ਅਟ੍ਠਨ੍ਨਂ ਵਾ ਨਵਨ੍ਨਂ ਵਾ. ਏਵਨ੍ਤਿਆਦਿ ਨਿਗਮਨਂ. ਅਯਂ ਅਪਹੋਨਕਭਾਵੋਤਿ ਯੋਜਨਾ. ਪੁਨ ਚੀਵਰਸ੍ਸੇਵ ਵਿਕਲ੍ਲਕਭਾਵਂ ਦਸ੍ਸੇਨ੍ਤੋ ਆਹ ‘‘ਅਥਵਾ’’ਤਿਆਦਿ. ਏਤ੍ਥ ਪੁਰਿਮਨਯੇ ਚੀਵਰਸ੍ਸ ਚ ਪੁਗ੍ਗਲਸ੍ਸ ਚ ਵਿਕਲ੍ਲਕਂ ਹੋਤਿ, ਪਚ੍ਛਿਮੇ ਚੀਵਰਸ੍ਸੇਵਾਤਿ ਅਯਮੇਤੇਸਂ ਵਿਸੇਸੋ.
੨੧੫. ਚੀਵਰਰਜਨਕਥਾ
੩੪੪. ਗਿਹਿਪਰਿਭੁਤ੍ਤਂ ਪਨਾਤਿ ਗਿਹਿਨਾ ਪਰਿਭੁਤ੍ਤਂ ਵਤ੍ਥਂ ਪਨ, ਕਿਞ੍ਚਿ ਫਲਨ੍ਤਿ ਸਮ੍ਬਨ੍ਧੋ.
ਸੀਤੁਦਕਾਤਿ ਸੀਤਂ ਉਦਕਂ. ਲਿਙ੍ਗਵਿਪਲ੍ਲਾਸੋ ਹਿ ਅਯਂ. ਉਤ੍ਤਰਾਲ਼ੁਮ੍ਪਨ੍ਤਿ ਏਤ੍ਥ ਉਤ੍ਤਰ ਉਲ਼ੁਮ੍ਪਨ੍ਤਿ ਪਦਚ੍ਛੇਦਂ ਕਤ੍ਵਾ ਅਕਾਰਤੋ ਉਕਾਰਸ੍ਸ ਲੋਪਂ ਕਤ੍ਵਾ, ਪੁਬ੍ਬਸਰਸ੍ਸ ਚ ਦੀਘਂ ਕਤ੍ਵਾ ‘‘ਉਤ੍ਤਰਾਲ਼ੁਮ੍ਪ’’ਨ੍ਤਿ ਵੁਚ੍ਚਤਿ. ਉਤ੍ਤਰਾਲ਼ੂਤਿ ਉਤ੍ਤਰਉਦਕਂ. ਉਲ਼ੁਸਦ੍ਦੋ ਹਿ ਉਦਕਵਾਚਕੋ, ਤਂ ਪਾਤਿ ਰਕ੍ਖਤੀਤਿ ਉਤ੍ਤਰਾਲ਼ੁਮ੍ਪਂ. ਤਸ੍ਸ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਵਟ੍ਟਾਧਾਰਕ’’ਨ੍ਤਿ. ਰਜਨਨ੍ਤਿ ਰਜਨਛਲ੍ਲਿਂ. ਹੀਤਿ ਫਲਜੋਤਕੋ. ਰਜਨਨ੍ਤਿ ਰਜਨੁਦਕਂ. ਹੀਤਿ ਵਿਤ੍ਥਾਰੋ. ਥੇਵੋਤਿ ਰਜਨਬਿਨ੍ਦੁ. ਨ ਵਿਸਰਤੀਤਿ ਨ ਪਗ੍ਘਰਤਿ. ਰਜਨਾਲ਼ੁਙ੍ਕਨ੍ਤਿ ਏਤ੍ਥਾਪਿ ਪੁਰਿਮਨਯੇਨੇਵ ਪਦਸਿਦ੍ਧਿ ਵੇਦਿਤਬ੍ਬਾ. ਰਜਨਉਲ਼ੁਙ੍ਕਨ੍ਤਿ ਰਜਨਸਙ੍ਖਾਤਸ੍ਸ ਉਦਕਸ੍ਸ ਗਹਣਤ੍ਥਾਯ ਕਰਿਯਤੀਤਿ ਰਜਨਉਲ਼ੁਙ੍ਕਂ. ਦਣ੍ਡਕੇਨ ਨਿਯੁਤ੍ਤਂ ਥਾਲਕਂ ਦਣ੍ਡਕਥਾਲਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਤਮੇਵ ਸਦਣ੍ਡਕ’’ਨ੍ਤਿ. ਰਜਨਕੁਣ੍ਡਨ੍ਤਿ ਰਜਨਪਕ੍ਖਿਪਨਂ ਮਹਾਘਟਂ. ਅਞ੍ਞਤ੍ਰਾਤਿ ਅਞ੍ਞਂ ਠਾਨਂ. ਪਤ੍ਥਿਨ੍ਨਸਦ੍ਦੋ ਥਦ੍ਧਪਰਿਯਾਯੋਤਿ ਆਹ ‘‘ਥਦ੍ਧ’’ਨ੍ਤਿ. ਦਨ੍ਤਕਾਸਾਵਾਨੀਤਿ ਏਤ੍ਥ ਦਨ੍ਤਸਦ੍ਦੇਨ ਤਸ੍ਸ ਵਣ੍ਣੋ ਗਹੇਤਬ੍ਬੋ, ਸੋ ਏਤੇਸਮਤ੍ਥੀਤਿ ਦਨ੍ਤਾਨਿ, ਦਨ੍ਤਾਨਿ ਚ ਤਾਨਿ ਕਾਸਾਵਾਨਿ ਚੇਤਿ ਦਨ੍ਤਕਾਸਾਵਾਨਿ, ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਦਨ੍ਤਵਣ੍ਣਾਨੀ’’ਤਿ. ਦਨ੍ਤਵਣ੍ਣਾਨਿ ਕਾਸਾਵਾਨਿ ਧਾਰੇਨ੍ਤੀਤਿ ਸਮ੍ਬਨ੍ਧੋ.
੨੧੬. ਛਿਨ੍ਨਕਚੀਵਰਾਨੁਜਾਨਨਕਥਾ
੩੪੫. ਦੀਘਮਰਿਯਾਦਬਦ੍ਧਨ੍ਤਿ ਦੀਘੇਨ ਮਰਿਯਾਦੇਨ ਬਦ੍ਧਂ. ਚਤੁਕ੍ਕਸਣ੍ਠਾਨਨ੍ਤਿ ਚਤੁਨ੍ਨਂ ਮਗ੍ਗਾਨਂ ਸਮੋਧਾਨਸਣ੍ਠਾਨਂ. ਉਸ੍ਸਹਸਿ ਤ੍ਵਨ੍ਤਿ ਏਤ੍ਥ ਉਪੁਬ੍ਬੋ ਸਹਧਾਤੁ ਸਮਤ੍ਥਤ੍ਥੋਤਿ ਆਹ ‘‘ਸਕ੍ਕੋਸਿ ਤ੍ਵ’’ਨ੍ਤਿ. ਪਪੁਬ੍ਬੋ ਪਨ ਅਭਿਭਵਨਤ੍ਥੋ ਹੋਤਿ ‘‘ਪਸਹਤੀ’’ਤਿਆਦੀਸੁ. ਯੋ ਨਾਮਾਤਿ ਯੋ ਆਨਨ੍ਦੋ ਆਜਾਨਿਸ੍ਸਤਿ ਨਾਮ, ਸੋ ਆਨਨ੍ਦੋ ਪਣ੍ਡਿਤੋਤਿ ਯੋਜਨਾ. ‘‘ਕੁਸੀ’’ਤਿ ਏਤਂ ਨਾਮਂ ਅਧਿਵਚਨਨ੍ਤਿ ਯੋਜਨਾ. ਅਨੁਵਾਤਾਦੀਨਨ੍ਤਿ ਆਦਿਸਦ੍ਦੇਨ ਪਰਿਭਣ੍ਡਾਦੀਨਿ ਸਙ੍ਗਣ੍ਹਾਤਿ. ‘‘ਅਡ੍ਢਕੁਸੀ’’ਤਿ ਏਤਨ੍ਤਿ ਯੋਜਨਾ.
ਗੀਵੇਯ੍ਯਕਨ੍ਤਿ ਏਤ੍ਥ ਗੀਵਾਯਂ ਸੁਤ੍ਤਸਂਸਿਬ੍ਬਿਤਂ ਗੀਵੇਯ੍ਯਕਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਗੀਵਾਵੇਠਨਟ੍ਠਾਨੇ’’ਤਿਆਦਿ. ‘‘ਆਗਨ੍ਤੁਕਪਟ੍ਟ’’ਨ੍ਤਿ ਇਮਿਨਾ ਏਯ੍ਯਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਏਸੇਵ ਨਯੋ ਜਙ੍ਘੇਯ੍ਯਕਨ੍ਤਿ ਏਤ੍ਥਾਪਿ. ਏਤਂ ਨਾਮਨ੍ਤਿ ‘‘ਗੀਵੇਯ੍ਯਕਂ, ਜਙ੍ਘੇਯ੍ਯਕ’’ਨ੍ਤਿ ਏਤਂ ਨਾਮਂ. ਇਤੀਤਿ ਏਵਂ. ਏਤਨ੍ਤਿ ‘‘ਅਨੁਵਿਵਟ੍ਟ’’ਨ੍ਤਿਆਦਿ ਏਤਂ. ‘‘ਅਨੁਵਿਵਟ੍ਟ’’ਨ੍ਤਿ ਏਤਂ ਨਾਮਨ੍ਤਿ ਯੋਜਨਾ. ਵਿਵਟ੍ਟਸ੍ਸਾਤਿ ਮਜ੍ਝਿਮਖਣ੍ਡਕਸ੍ਸ. ਬਾਹਨ੍ਤਨ੍ਤਿ ਏਤ੍ਥ ਬਾਹਾਯ ਉਪਰਿ ਠਪਿਤਾ ਅਨ੍ਤਾ ਬਾਹਨ੍ਤਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਬਾਹਾਯਾ’’ਤਿਆਦਿ. ਤੇਸਨ੍ਤਿ ਉਭਿਨ੍ਨਮਨ੍ਤਾਨਂ. ਏਤਨ੍ਤਿ ‘‘ਬਾਹਨ੍ਤ’’ਨ੍ਤਿ ਏਤਂ.
੨੧੭. ਤਿਚੀਵਰਾਨੁਜਾਨਨਕਥਾ
੩੪੬. ‘‘ਉਕ੍ਖਿਤ੍ਤਭਣ੍ਡਿਕਭਾਵਂ ਆਪਾਦਿਤੇ’’ਤਿ ਇਮਿਨਾ ਉਬ੍ਭਣ੍ਡਿਤੇਤਿ ਏਤ੍ਥ ਉਕ੍ਖਿਤ੍ਤਂ ਭਣ੍ਡਂ ਉਬ੍ਭਣ੍ਡਂ, ਉਬ੍ਭਣ੍ਡਭਾਵਂ ਇਤਾ ਆਪਾਦਿਤਾਤਿ ਉਬ੍ਭਣ੍ਡਿਤਾਤਿ ਵਚਨਤ੍ਥਂ ਦਸ੍ਸੇਤਿ. ਤੇ ਉਬ੍ਭਣ੍ਡਿਤੇ ਭਿਕ੍ਖੂ ਅਦ੍ਦਸਾਤਿ ਯੋਜਨਾ. ਭਿਸਿਸਙ੍ਖੇਪੇਨਾਤਿ ਭਿਸਿਯਂ ਪਕ੍ਖੇਪੇਨ, ਪਵੇਸੇਨਾਤਿ ਅਤ੍ਥੋ, ਭਿਸਿਆਕਾਰੇਨਾਤਿ ਵੁਤ੍ਤਂ ਹੋਤਿ. ਤਤ੍ਥਾਤਿ ਦਕ੍ਖਿਣਾਗਿਰਿਂ. ਗਚ੍ਛਨ੍ਤਾ ਤੇ ਭਿਕ੍ਖੂਤਿ ਯੋਜਨਾ. ‘‘ਅਟ੍ਠਪਮਾਣਾਸੂ’’ਤਿ ਇਮਿਨਾ ਅਨ੍ਤਰਟ੍ਠਕਾਸੂਤਿ ਏਤ੍ਥ ਕਪਚ੍ਚਯੋ ਪਮਾਣਤ੍ਥੇ ਹੋਤੀਤਿ ਦਸ੍ਸੇਤਿ, ਕੇਸੁਚਿ ਪੋਤ੍ਥਕੇਸੁ ਪਮਾਣਸਦ੍ਦੋ ਨ ਦਿਸ੍ਸਤਿ, ਗਲ਼ਿਤੋਤਿ ਦਟ੍ਠਬ੍ਬੋ. ਰਤ੍ਤੀਸੂਤਿ ਸਮ੍ਬਨ੍ਧੋ. ਭਗਵਨ੍ਤਨ੍ਤਿ ਏਤ੍ਥ ਸਮ੍ਪਦਾਨਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਭਗਵਤੋ’’ਤਿ. ਸੀਤਾਲੁਕਾਤਿ ਏਤ੍ਥ ਸੀਤਂ ਪਕਤਿ ਏਤੇਸਨ੍ਤਿ ਸੀਤਾਲੁਨੋ, ਤੇਯੇਵ ਸੀਤਾਲੁਕਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੀਤਪਕਤਿਕਾ’’ਤਿ. ਯੇ ਕੁਲਪੁਤ੍ਤਾ ਪਕਤਿਯਾਵ ਸੀਤੇਨ ਕਿਲਮਨ੍ਤਿ, ਤੇ ਸੀਤਾਲੁਕਾ ਨਾਮਾਤਿ ਯੋਜਨਾ. ਏਕਚ੍ਚਿਯਨ੍ਤਿ ਏਤ੍ਥ ਏਕਚ੍ਚਸਦ੍ਦੋ ਏਕਪਰਿਯਾਯੋਤਿ ਆਹ ‘‘ਏਕਂ ਪਟ੍ਟ’’ਨ੍ਤਿ. ਇਮਿਨਾ ਏਕੋਯੇਵ ਏਕਚ੍ਚੋਤਿ ਕਤ੍ਵਾ ਸਕਤ੍ਥੇ ਅਚ੍ਚਪਚ੍ਚਯੋਤਿ ਦਸ੍ਸੇਤਿ. ‘‘ਪਟ੍ਟ’’ਨ੍ਤਿ ਇਮਿਨਾ ਏਕਚ੍ਚੇਨ ਨਿਯੁਤ੍ਤਂ ਏਕਚ੍ਚਿਯਨ੍ਤਿ ਵਚਨਤ੍ਥਂ ਕਤ੍ਵਾ ਨਿਯੁਤ੍ਤਤ੍ਥੇ ਪਵਤ੍ਤਸ੍ਸ ਇਯਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਇਤੀਤਿ ਏਵਂ. ਭਗਵਾ ਅਨੁਜਾਨਾਤੀਤਿ ਸਮ੍ਬਨ੍ਧੋ. ਇਤਰੇਤਿ ਸਙ੍ਘਾਟਿਤੋ ਇਤਰੇ ਉਤ੍ਤਰਾਸਙ੍ਗਅਨ੍ਤਰਵਾਸਕੇ.
੨੧੮. ਅਤਿਰੇਕਚੀਵਰਾਦਿਕਥਾ
੩੪੮. ਅਚ੍ਛੁਪੇਯ੍ਯਨ੍ਤਿ ਏਤ੍ਥ ਅਚ੍ਛਿ ਵੁਚ੍ਚਤਿ ਨੇਤ੍ਤਮਣ੍ਡਲਂ, ਤਂ ਵਿਯਾਤਿ ਅਚ੍ਛਿ ਛਿਦ੍ਦੋ, ਤਸ੍ਮਿਂ ਉਪਗਨ੍ਤਬ੍ਬਂ ਉਪਨੇਤਬ੍ਬਨ੍ਤਿ ਅਚ੍ਛੁਪੇਯ੍ਯਂ. ‘‘ਲਗ੍ਗਾਪੇਯ੍ਯ’’ਨ੍ਤਿ ਇਮਿਨਾ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਏਤ੍ਥਾਤਿ ਪਂਸੁਕੂਲੇ. ਸਬ੍ਬਮਿਦਨ੍ਤਿ ‘‘ਦਿਗੁਣਂ ਸਙ੍ਘਾਟਿ’’ਨ੍ਤਿਆਦਿਕਂ ਸਬ੍ਬਂ ਇਦਂ ਵਚਨਂ. ਉਦ੍ਧਰਿਤ੍ਵਾਤਿ ਅਪਨੇਤ੍ਵਾ. ਸਂਸਿਬ੍ਬਿਤਨ੍ਤਿ ਅਞ੍ਞਮਞ੍ਞਂ ਸਮ੍ਬਨ੍ਧਿਤ੍ਵਾ ਸਿਬ੍ਬਿਤਂ.
੩੫੧. ਸੋਵਗ੍ਗਿਕਨ੍ਤਿ ਏਤ੍ਥ ਸੁਨ੍ਦਰਾਨਿ ਅਗ੍ਗਾਨਿ ਰੂਪਾਦੀਨਿ ਏਤ੍ਥਾਤਿ ਸਗ੍ਗੋ, ਪੁਬ੍ਬਪਦੇ ਉਕਾਰਸ੍ਸ ਲੋਪੋ, ਉਕਾਰਸ੍ਸ ਉਵਾਦੇਸੇ ‘‘ਸੁਵਗ੍ਗੋ’’ਤਿ ਸਿਜ੍ਝਤਿ. ਸੁਵਗ੍ਗਪ੍ਪਤ੍ਤਹੇਤੁਕਂ ਸੋਵਗ੍ਗਿਕਂ, ਦਾਨਂ, ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਗ੍ਗਪ੍ਪਤ੍ਤਹੇਤੁਕ’’ਨ੍ਤਿ. ‘‘ਅਪਨੇਤੀ’’ਤਿ ਇਮਿਨਾ ਨੁਦਧਾਤੁਯਾ ਅਪਨਯਨਤ੍ਥਂ ਦਸ੍ਸੇਤਿ. ਅਨਾਮਯਾਤਿ ਏਤ੍ਥ ਆਮਯਸਦ੍ਦੋ ਰੋਗਪਰਿਯਾਯੋਤਿ ਆਹ ‘‘ਅਰੋਗਾ’’ਤਿ. ਨਤ੍ਥਿ ਆਮਯੋ ਏਤਿਸ੍ਸਾਤਿ ਅਨਾਮਯਾ.
੩੫੩. ਝਾਨਲਾਭਿਨੋਤਿ ਝਾਨਲਾਭੀਨਂ ਪੁਥੁਜ੍ਜਨਾਨਂ ਕਾਮਚ੍ਛਨ੍ਦਨੀਵਰਣਸ੍ਸ ਵਿਕ੍ਖਮ੍ਭਨਤ੍ਤਾ ਵੁਤ੍ਤਂ.
੩੫੬. ਸਮੋਧਾਨਵਸੇਨ ਦਸ੍ਸਿਯਿਤ੍ਥਾਤਿ ਸਨ੍ਦਿਟ੍ਠੋ. ਸਮੋਧਾਨਵਸੇਨ ਭਜਿਯਿਤ੍ਥਾਤਿ ਸਮ੍ਭਤ੍ਤੋ. ਅਭਿਮੁਖਂ ਲਪਿਤ੍ਥਾਤਿ ਆਲਪਿਤੋ. ਇਮੇਹੀਤਿ ਇਮੇਹਿ ਦ੍ਵੀਹਿ.
੨੨੧. ਪਚ੍ਛਿਮਵਿਕਪ੍ਪਨੁਪਗਚੀਵਰਾਦਿਕਥਾ
੩੫੯. ਕਤਪਂਸੁਕੂਲੋਤਿ ਕਤੋ ਪਂਸੁਕੂਲੋ. ਇਮਿਨਾ ‘‘ਪਂਸੁਕੂਲਤੋ’’ਤਿ ਪਦਸ੍ਸ ਵਿਸੇਸਨਪਰਪਦਤ੍ਤਂ ਦਸ੍ਸੇਤਿ. ਅਗ੍ਗਲ਼ਾਰੋਪਨੇਨਾਤਿ ਅਗ੍ਗਲ਼ਸ੍ਸ ਆਰੋਪਨੇਨ. ‘‘ਸੁਤ੍ਤੇਨੇਵਾ’’ਤਿ ਏਤ੍ਥ ਏਵਸਦ੍ਦੇਨ ਪਿਲੋਤਿਕਂ ਨਿਵਤ੍ਤੇਤਿ. ਅਞ੍ਛਿਤ੍ਵਾ ਅਞ੍ਛਿਤ੍ਵਾਤਿ ਆਕਡ੍ਢਿਤ੍ਵਾ ਆਕਡ੍ਢਿਤ੍ਵਾ. ਅਭਿਧਾਤੁ ਹਿ ਆਕਡ੍ਢਨਤ੍ਥੋ. ‘‘ਸਙ੍ਘਾਟਿਕੋਣੋ ਦੀਘੋ’’ਤਿ ਇਮਿਨਾ ਵਿਕਣ੍ਣੋਤਿ ਏਤ੍ਥ ਵਿਸਮੋ ਕਣ੍ਣੋ ਵਿਕਣ੍ਣੋਤਿ ਕਤ੍ਵਾ ਕਣ੍ਣਸਦ੍ਦਸ੍ਸ ਕੋਣਤ੍ਥਂ ਦਸ੍ਸੇਤਿ. ਤਤੋਤਿ ਗਲ਼ਨਤੋ. ਲੁਜ੍ਜਨ੍ਤੀਤਿ ਵਲਿਂ ਗਣ੍ਹਨ੍ਤਿ. ਅਟ੍ਠਪਦਕਨ੍ਤਿ ਪਦਸ੍ਸ ਅਟ੍ਠਪਦੇਨ ਸਿਬ੍ਬਿਤਂ ਅਟ੍ਠਪਦਕਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਟ੍ਠਪਦਕਚ੍ਛਿਨ੍ਨੇਨ ਪਤ੍ਤਮੁਖਂ ਸਿਬ੍ਬਿਤੁ’’ਨ੍ਤਿ. ਤਤ੍ਥ ਅਟ੍ਠਪਦਕਚ੍ਛਿਨ੍ਨੇਨ ਪਤ੍ਤਮੁਖਂ ਸਿਬ੍ਬਿਤੁਨ੍ਤਿ ਅਟ੍ਠਪਦਲਿਖਨੇਨ ਤਤ੍ਥ ਤਤ੍ਥ ਗਬ੍ਭਂ ਦਸ੍ਸੇਤ੍ਵਾ ਪਤ੍ਤਮੁਖਂ ਸਿਬ੍ਬਿਤੁਂ. ‘‘ਅਟ੍ਠਪਦਕਚ੍ਛਨ੍ਨੇਨਾ’’ਤਿਪਿ ਪਾਠੋ, ਅਟ੍ਠਫਲਕਾਕਾਰੇਨਾਤਿ ਅਤ੍ਥੋ.
੩੬੦. ‘‘ਆਗਨ੍ਤੁਕਪਤ੍ਤਮ੍ਪਿ ਦਾਤੁ’’ਨ੍ਤਿ ਇਮਿਨਾ ਅਨ੍ਵਾਦਿਕਨ੍ਤਿ ਪਦਸ੍ਸ ਅਨੁਪਚ੍ਛਾ ਆਗਨ੍ਤੁਕਭਾਵੇਨ ਦੀਯਤੀਤਿ ਅਨ੍ਵਾਦਿਕਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਚਤੁਤ੍ਥਕ੍ਖਰੇਨਪਿ ਪਾਠੋ, ਅਨੁਪਚ੍ਛਾ ਆਗਨ੍ਤੁਕਭਾਵੇਨ ਧੀਯਤਿ ਠਪੀਯਤੀਤਿ ਅਨ੍ਵਾਧਿਕਨ੍ਤਿ ਕਾਤਬ੍ਬੋ. ਇਦਂ ਪਨਾਤਿ ਅਨ੍ਵਾਧਿਕਂ ਪਨ.
੩੬੧. ਸੇਸਞਾਤੀਨਨ੍ਤਿ ਮਾਤਾਪਿਤੂਹਿ ਸੇਸਞਾਤੀਨਂ. ਵਿਨਿਪਾਤੇਤਿਯੇਵਾਤਿ ਵਿਨਸ੍ਸਨ੍ਤੋ ਨਿਪਾਤੇਤਿਯੇਵ.
੩੬੨. ‘‘ਵਸ੍ਸਿਕੋ’’ਤਿ ਸਙ੍ਕੇਤੀਯਤਿ ਗਣ੍ਹੀਯਤੀਤਿ ਵਸ੍ਸਿਕਸਙ੍ਕੇਤਨ੍ਤਿ ਵੁਤ੍ਤੇ ਚਤ੍ਤਾਰੋ ਮਾਸਾਤਿ ਆਹ ‘‘ਚਤ੍ਤਾਰੋ ਮਾਸੇ’’ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਆਰਞ੍ਞਕਸ੍ਸ ਭਿਕ੍ਖੁਨੋਤਿ ਸਮ੍ਬਨ੍ਧੋ. ਤੇਨਾਤਿ ਆਰਞ੍ਞਕੇਨ ਭਿਕ੍ਖੁਨਾ.
੨੨੨. ਸਙ੍ਘਿਕਚੀਵਰੁਪ੍ਪਾਦਕਥਾ
੩੬੩. ਅਞ੍ਞਤ੍ਥਾਤਿ ਦਿਨ੍ਨਟ੍ਠਾਨਤੋ ਅਞ੍ਞਤ੍ਥ. ਹਟਾਨਿਪਿ ਚੀਵਰਾਨਿ ਤੁਯ੍ਹੇਵ ਸਨ੍ਤਕਾਨੀਤਿ ਯੋਜਨਾ. ਤੇਸਨ੍ਤਿ ਚੀਵਰਾਨਂ. ਅਞ੍ਞੋਤਿ ਏਕਕਵਸ੍ਸਾਵਾਸਿਕਤੋ ਅਞ੍ਞੋ. ਪਞ੍ਚਮਾਸੇ ਤਂ ਸਬ੍ਬਂ ਤਸ੍ਸੇਵ ਭਿਕ੍ਖੁਨੋ ਹੋਤੀਤਿ ਸਮ੍ਬਨ੍ਧੋ. ਯਨ੍ਤਿ ਚੀਵਰਂ, ਤਂ ਸਬ੍ਬਂ ਚੀਵਰਨ੍ਤਿ ਸਮ੍ਬਨ੍ਧੋ. ਯਮ੍ਪੀਤਿ ਚੀਵਰਮ੍ਪਿ. ਸੋਤਿ ਭਿਕ੍ਖੁ, ਗਣ੍ਹਾਤੀਤਿ ਸਮ੍ਬਨ੍ਧੋ. ਵਸ੍ਸਾਵਾਸਤ੍ਥਾਯਾਤਿ ਵਸ੍ਸਂ ਆਵਾਸਸ੍ਸ ਭਿਕ੍ਖੁਨੋ ਅਤ੍ਥਾਯ. ਠਪਿਤਉਪਨਿਕ੍ਖੇਪਤੋਤਿ ਵੇਯ੍ਯਾਵਚ੍ਚਕਰੇਹਿ ਵਡ੍ਢਿਂ ਪਯੋਜੇਤ੍ਵਾ ਠਪਿਤਉਪਨਿਕ੍ਖੇਪਤੋ. ਤਤ੍ਰੁਪ੍ਪਾਦਤੋਤਿ ਤਸ੍ਮਿਂ ਵਿਹਾਰੇ ਉਪ੍ਪਾਦਤੋ ਨਾਲ਼ਿਕੇਰਆਰਾਮਾਦਿਤੋ. ਇਦਨ੍ਤਿ ਵਕ੍ਖਮਾਨਂ. ਏਤ੍ਥਾਤਿ ‘‘ਤਸ੍ਸੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ ਵਚਨੇ. ਯਨ੍ਤਿ ਚੀਵਰਂ. ਪਨ ਸਦ੍ਦੋ ਵਿਸੇਸਤ੍ਥਜੋਤਕੋ. ਇਦਨ੍ਤਿ ਪਦਾਲਙ੍ਕਾਰਮਤ੍ਤਂ. ਇਧਾਤਿ ਇਮਸ੍ਮਿਂ ਵਿਹਾਰੇ. ਅਭਿਲਾਪਮਤ੍ਤਨ੍ਤਿਪਿ ਵਦਨ੍ਤਿ. ਅਨਤ੍ਥਤਕਥਿਨਸ੍ਸਾਪੀਤਿ ਪਿਸਦ੍ਦੋ ਪਗੇਵ ਅਤ੍ਥਤਕਥਿਨਸ੍ਸਾਤਿ ਦਸ੍ਸੇਤਿ. ਪਞ੍ਚਮਾਸੇਤਿ ਅਚ੍ਚਨ੍ਤਸਂਯੋਗਤ੍ਥੇ ਉਪਯੋਗਵਚਨਂ. ਤਤੋਤਿ ਪਞ੍ਚਮਾਸਤੋ. ਅਤੀਤਵਸ੍ਸੇ ਵਸ੍ਸਂਵੁਤ੍ਥਸਙ੍ਘਸ੍ਸ ਇਦਂ ਵਸ੍ਸਾਵਾਸਿਕਂ ਦੇਤਿ ਕਿਂ? ਉਦਾਹੁ ਅਨਾਗਤਵਸ੍ਸੇਤਿ ਯੋਜਨਾ. ਪਿਟ੍ਠਿਸਮਯੇਤਿ ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਯਾਵ ਅਸ੍ਸਯੁਜਪੁਣ੍ਣਮੀ, ਤਾਵ ਪਿਟ੍ਠਿਸਮਯੇ.
ਵਸ੍ਸਾਨਤੋਤਿ ਵਸ੍ਸਾਨਮਾਸਤੋ. ਏਤ੍ਥਾਤਿ ਏਤੇਸੁ ਚੀਵਰੇਸੁ. ਕੇਚਿ ਭਿਕ੍ਖੂਤਿ ਸਮ੍ਬਨ੍ਧੋ. ਤਮਤ੍ਥਨ੍ਤਿ ਤਸ੍ਸ ਸਙ੍ਘਿਕਚੀਵਰਸ੍ਸ ਕਾਰਣਂ. ਤਤ੍ਥੇਵਾਤਿ ਗਤਟ੍ਠਾਨੇ ਏਵ. ਏਸਾਤਿ ਸਙ੍ਘਿਕਚੀਵਰਹਾਰਕੋ ਭਿਕ੍ਖੁ. ਤਤ੍ਰਾਤਿ ਵਿਹਾਰਾਦੀਸੁ. ਨਨ੍ਤਿ ਚੀਵਰਹਾਰਕਂ ਭਿਕ੍ਖੁਂ.
ਵਤ੍ਤਂ ਵਿਤ੍ਥਾਰੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਤੇਨ ਹੀ’’ਤਿਆਦਿ. ਤੇਨ ਭਿਕ੍ਖੁਨਾ ਭਾਜੇਤਬ੍ਬਾਨੀਤਿ ਸਮ੍ਬਨ੍ਧੋ. ਤਸ੍ਸੇਵਾਤਿ ਅਧਿਟ੍ਠਹਨ੍ਤਸ੍ਸੇਵ.
ਏਕੇਕਂ ਭਾਗਨ੍ਤਿ ਸਮ੍ਬਨ੍ਧੋ. ਏਤ੍ਥ ਠਾਨੇ ਅਹਮੇਵ ਅਸ੍ਮੀਤਿ ਯੋਜਨਾ. ਦੁਗ੍ਗਹਿਤਾਨਿ ਹੋਨ੍ਤੀਤਿ ਸਙ੍ਘਿਕਾਨੇਵ ਹੋਨ੍ਤੀਤਿ ਅਧਿਪ੍ਪਾਯੋ. ਮਯ੍ਹਮੇਵਿਮਾਨਿ ਚੀਵਰਾਨੀਤਿ ਇਸ੍ਸਰਵਸੇਨ ਗਹਣੇ ਦੁਗ੍ਗਹਿਤਾਨਿ. ਮਯ੍ਹੇਤਾਨਿ ਪਾਪੁਣਨ੍ਤੀਤਿ ਅਨਿਸ੍ਸਰਵਸੇਨ ਗਹਣੇ ਸੁਗ੍ਗਹਿਤਾਨੀਤਿ ਵਿਸੇਸੋ.
ਪਾਤਿਤੇ ਕੁਸੇਤਿ ਏਤ੍ਥ ਤਪਚ੍ਚਯਸ੍ਸ ਪਚ੍ਚੁਪ੍ਪਨ੍ਨਕਾਲਿਕਭਾਵਂ ਦਸ੍ਸੇਨ੍ਤੋ ਆਹ ‘‘ਏਕਕੋਟ੍ਠਾਸੇ’’ਤਿਆਦਿ. ਗਹਿਤਮੇਵਾਤਿ ਏਕਕੋਟ੍ਠਾਸੇ ਪਾਤਿਤਸ੍ਸ ਕੁਸਦਣ੍ਡਸ੍ਸ ਵਸੇਨ ‘‘ਇਮਸ੍ਸਿਦ’’ਨ੍ਤਿ ਏਕਕੋਟ੍ਠਾਸੇ ਵਿਦਿਤੇ ਸਬ੍ਬੇਸਂ ਵਿਦਿਤਤ੍ਤਾ ਗਹਿਤਮੇਵਾਤਿ ਅਧਿਪ੍ਪਾਯੋ.
ਇਤੋਵਾਤਿ ਸਚੀਵਰਭਤ੍ਤਤੋਵ. ਵਿਸੁਂ ਸਜ੍ਜਿਯਮਾਨੇਤਿ ਚੀਵਰੇ ਚ ਭਤ੍ਤੇ ਚ ਵਿਸੁਂ ਸਜ੍ਜਿਯਮਾਨੇ.
ਯਥਾ ਪੁਰਿਮੇਸੁ ਦ੍ਵੀਸੁ ਵਤ੍ਥੂਸੁ ‘‘ਅਦਂਸੂ’’ਤਿ ਵੁਤ੍ਤਂ, ਤਥਾ ਅਵਤ੍ਵਾ ਕਸ੍ਮਾ ਇਧ ‘‘ਦੇਨ੍ਤੀ’’ਤਿ ਵੁਤ੍ਤਨ੍ਤਿ ਆਹ ‘‘ਸਣਿਕਂ ਸਣਿਕਂ ਦੇਨ੍ਤਿਯੇਵਾ’’ਤਿ. ਸਣਿਕਂ ਸਣਿਕਂ ਦੇਨ੍ਤੇ ਦਾਨਕਿਰਿਯਾਯ ਅਨੁਪਚ੍ਛਿਨ੍ਨਤ੍ਤਾ ‘‘ਦੇਨ੍ਤੀ’’ਤਿ ਪਚ੍ਚੁਪ੍ਪਨ੍ਨਵਸੇਨ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਪਚ੍ਛਿਨ੍ਨਦਾਨਤ੍ਤਾਤਿ ਪਚ੍ਛਿਨ੍ਨਦਾਨਕਿਰਿਯਭਾਵਤੋ. ਇਦਂ ਪਨ ਵਤ੍ਥੁ ਉਪ੍ਪਨ੍ਨਨ੍ਤਿ ਸਮ੍ਬਨ੍ਧੋ. ਇਮੇ ਚ ਥੇਰਾਤਿ ਨਿਲਵਾਸਿਆਦਯੋ ਵਿਨਯਧਰਪਾਮੋਕ੍ਖਾ ਇਮੇ ਚ ਥੇਰਾ.
੨੨੩. ਉਪਨਨ੍ਦਸਕ੍ਯਪੁਤ੍ਤਵਤ੍ਥੁਕਥਾ
੩੬੪. ਏਤ੍ਥਾਤਿ ਉਪਨਨ੍ਦਵਤ੍ਥੁਮ੍ਹਿ. ਤਸ੍ਸਾਤਿ ਉਪਨਨ੍ਦਸ੍ਸ. ਗਾਮਕਾਵਾਸਿਨੋਤਿ ਗਾਮਕੇ ਆਵਾਸਿਨੋ. ਅਯਨ੍ਤਿ ਉਪਨਨ੍ਦੋ. ਮੁਖਰੋਤਿ ਮੁਖਂ ਖਰਂ ਏਤਸ੍ਸਾਤਿ ਮੁਖਰੋ ਖਕਾਰਲੋਪੋ, ਅਥ ਵਾ ਮੁਖਂ ਏਤਸ੍ਸਤ੍ਥੀਤਿ ਮੁਖਰੋ ਮਨ੍ਤੁਤ੍ਥੇ ਪਵਤ੍ਤੋ ਰਪਚ੍ਚਯੋ ਨਿਨ੍ਦਤ੍ਥਵਾਚਕੋ. ਲਹੁਕਾਪਤ੍ਤੀਤਿ ਦੁਕ੍ਕਟਾਪਤ੍ਤਿ. ਤਸ੍ਸੇਵਾਤਿ ਗਹਿਤਭਿਕ੍ਖੁਸ੍ਸੇਵ. ਧੁਰਨਿਕ੍ਖੇਪੇ ਸਤੀਤਿ ਯੋਜਨਾ.
ਏਕਸ੍ਸ ਪੁਗ੍ਗਲਸ੍ਸਤ੍ਥਾਯ ਅਧਿਪ੍ਪਿਯਤੇ ਇਚ੍ਛਿਯਤੇਤਿ ਏਕਾਧਿਪ੍ਪਾਯੋ, ਏਕਪੁਗ੍ਗਲਪਟਿਵੀਸੋ, ਤੇਨਾਹ ‘‘ਏਕਪੁਗ੍ਗਲਪਟਿਵੀਸਮੇਵਾ’’ਤਿ. ਯਥਾ ਯਥਾਤਿ ਯੇਨ ਯੇਨਾਕਾਰੇਨ. ਯੋਤਿ ਪਟਿਵੀਸੋ. ‘‘ਤਥਾ ਤਥਾ’’ਤਿ ਅਜ੍ਝਾਹਰਿਤਬ੍ਬੋ. ਤਤ੍ਥਾਤਿ ‘‘ਇਧ ਪਨਾ’’ਤਿਆਦਿਵਚਨੇ. ਏਕੇਕਸ੍ਮਿਂ ਆਵਾਸੇਤਿ ਸਮ੍ਬਨ੍ਧੋ. ਵਾਸਦ੍ਦੋ ਅਞ੍ਞੇਪਿ ਦ੍ਵੀਹਦ੍ਵੀਹਾਦਿਵਾਰੇ ਸਙ੍ਗਣ੍ਹਾਤਿ. ਯਨ੍ਤਿ ਪਟਿਵੀਸਂ. ਏਕੋ ਪੁਗ੍ਗਲੋਤਿ ਏਕੋ ਨਿਚ੍ਚਾਵਾਸੋ ਪੁਗ੍ਗਲੋ. ਏਵਨ੍ਤਿ ਉਪਡ੍ਢੇ ਦਿਯ੍ਯਮਾਨੇ. ਯਤ੍ਥ ਵਾ ਪਨਾਤਿ ਏਤ੍ਥ ਯਸਦ੍ਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਏਵਂ ਪੁਰਿਮਸ੍ਮਿ’’ਨ੍ਤਿ. ਪੁਰਿਮਸ੍ਮਿਂ ਆਵਾਸੇਤਿ ਸਮ੍ਬਨ੍ਧੋ. ਤਤੋਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਬਹੁਤਰਂ ਵਸਿਤਵਿਹਾਰਤੋ’’ਤਿ. ਇਦਞ੍ਚਾਤਿ ‘‘ਅਮੁਤ੍ਰ ਉਪਡ੍ਢੋ ਚੀਵਰਪਟਿਵੀਸੋ ਦਾਤਬ੍ਬੋ’’ਤਿ ਵਚਨਞ੍ਚ. ਏਕਸੀਮਵਿਹਾਰੇਹੀਤਿ ਏਕਿਸ੍ਸਂ ਉਪਚਾਰਸੀਮਾਯਂ ਠਿਤੇਹਿ ਵਿਹਾਰੇਹਿ. ਨਾਨਾਸੀਮਵਿਹਾਰੇਤਿ ਨਾਨਾਉਪਚਾਰਸੀਮਾਯਂ ਠਿਤੇ ਵਿਹਾਰੇ. ਸੇਨਾਸਨਗ੍ਗਾਹੋਤਿ ਪੁਰਿਮਉਪਚਾਰਸੀਮਾਯਂ ਸੇਨਾਸਨਗ੍ਗਾਹੋ. ਤਤ੍ਥਾਤਿ ਪਸ੍ਸਮ੍ਭਨਵਿਹਾਰੇ. ਸੇਸਨ੍ਤਿ ਚੀਵਰਤੋ ਸੇਸਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਵਿਹਾਰੇਸੁ. ਅਨ੍ਤੋਸੀਮਗਤਸ੍ਸਾਤਿ ਅਨ੍ਤੋਉਪਚਾਰਸੀਮਾਯਂ ਗਤਸ੍ਸ, ਭਿਕ੍ਖੁਨੋਤਿ ਸਮ੍ਬਨ੍ਧੋ. ਚੀਵਰਂ ਸੇਨਾਸਨਗ੍ਗਾਹਸ੍ਸੇਵ ਪਾਪੁਣਾਤਿ, ਸੇਸਂ ਪਨ ਆਮਿਸਭੇਸਜ੍ਜਾਦਿਸਬ੍ਬਂ ਅਞ੍ਞਵਿਹਾਰਤੋ ਆਗਨ੍ਤ੍ਵਾ ਅਨ੍ਤੋਸੀਮਗਤਸ੍ਸ ਪਾਪੁਣਾਤੀਤਿ ਅਧਿਪ੍ਪਾਯੋ.
੨੨੪. ਗਿਲਾਨਵਤ੍ਥੁਕਥਾ
੩੬੫. ਮਞ੍ਚਕੇ ਨਿਪਾਤੇਸੁਨ੍ਤਿ ਏਤ੍ਥ ਮਞ੍ਚਕੇ ਨਿਪਾਤਨਂ ਨਾਮ ਮਞ੍ਚਕੇ ਨਿਪਜ੍ਜਾਪਨਨ੍ਤਿ ਆਹ ‘‘ਮਞ੍ਚਕੇ ਨਿਪਜ੍ਜਾਪੇਸੁ’’ਨ੍ਤਿ. ਮੁਤ੍ਤਕਰੀਸਕਿਲਿਟ੍ਠਨ੍ਤਿ ਮੁਤ੍ਤਕਰੀਸੇਹਿ ਕਿਲਿਟ੍ਠਂ. ਯੋਤਿ ਯੋ ਕੋਚਿ. ਮਨ੍ਤਿ ਮਮ. ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਓਵਾਦਾਨੁਸਾਸਨੀਕਰਣੇਨਾ’’ਤਿ. ਮਮ ਓਵਾਦਸ੍ਸ ਚ ਅਨੁਸਾਸਨਿਯਾ ਚ ਕਰਣੇਨਾਤਿ ਅਤ੍ਥੋ. ਏਤ੍ਥਾਤਿ ‘‘ਯੋ ਭਿਕ੍ਖਵੇ ਮਂ ਉਪਟ੍ਠਹੇਯ੍ਯਾ’’ਤਿਆਦਿਪਾਠੇ. ਸੁਤ੍ਤਸ੍ਸ ਨੇਯ੍ਯਤ੍ਥਤ੍ਤਾ ਅਗਹੇਤਬ੍ਬਤ੍ਥਂ ਦਸ੍ਸੇਨ੍ਤੋ ਆਹ ‘‘ਭਗਵਤੋ ਚਾ’’ਤਿਆਦਿ. ਯਸ੍ਸਾਤਿ ਗਿਲਾਨਸ੍ਸ. ਉਪਜ੍ਝਾਯਾਦਯੋਤਿ ਏਤ੍ਥ ਆਦਿਸਦ੍ਦੇਨ ਆਚਰਿਯਸਦ੍ਧਿਵਿਹਾਰਿਕਅਨ੍ਤੇਵਾਸਿਕਸਮਾਨੁਪਜ੍ਝਾਯਕਸਮਾਨਾਚਰਿਯਕਸਙ੍ਖਾਤੇ ਪਞ੍ਚ ਜਨੇ ਸਙ੍ਗਣ੍ਹਾਤਿ. ਏਕਚਾਰਿਕੋ ਵਾ ਹੋਤੀਤਿ ਸਮ੍ਬਨ੍ਧੋ. ਸਙ੍ਘਤ੍ਥੇਰੋਪੀਤਿ ਪਿਸਦ੍ਦੋ ਪਗੇਵ ਅਞ੍ਞੇਸਨ੍ਤਿ ਦਸ੍ਸੇਤਿ.
੩੬੬. ਅਭਿਕ੍ਕਮਨ੍ਤਂ ਵਾਤਿ ਏਤ੍ਥ ਅਭਿਮੁਖਂ ਕਮਤੀਤਿ ਅਭਿਕ੍ਕਮਨ੍ਤੋਤਿ ਵੁਤ੍ਤੇ ਵਡ੍ਢਨਤ੍ਥੋਤਿ ਆਹ ‘‘ਵਡ੍ਢਨ੍ਤਂ ਵਾ’’ਤਿ. ਆਬਾਧਂ ਨਾਵਿਕਰੋਤੀਤਿ ਸਮ੍ਬਨ੍ਧੋ. ਇਮਿਨਾ ਅਨ੍ਤਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਇਦਂ ਨਾਮ ਭੋਜਨਨ੍ਤਿ ਸਮ੍ਬਨ੍ਧੋ. ਸਂਵਿਧਾਤੁਨ੍ਤਿ ਏਤ੍ਥ ਸਂਵਿਪੁਬ੍ਬੋ ਧਾਧਾਤੁ ਕਰਧਾਤ੍ਵਤ੍ਥੋ, ਕਰਧਾਤੁ ਚ ਸਬ੍ਬਧਾਤ੍ਵਤ੍ਥੋ, ਤਸ੍ਮਾ ਵੁਤ੍ਤਂ ‘‘ਭੇਸਜ੍ਜਂ ਯੋਜੇਤੁ’’ਨ੍ਤਿ. ਅਸ੍ਸਾਤਿ ਗਿਲਾਨੁਪਟ੍ਠਾਕਸ੍ਸ. ਅਨ੍ਤਰਸਦ੍ਦਸ੍ਸ ਮਜ੍ਝਤ੍ਥਾਦਯੋ ਪਟਿਕ੍ਖਿਪਨ੍ਤੋ ਆਹ ‘‘ਕਾਰਣਂ ਵੁਚ੍ਚਤੀ’’ਤਿ.
੨੨੫. ਮਤਸਨ੍ਤਕਕਥਾ
੩੬੭. ਕਾਲਙ੍ਕਤੇਤਿ ਏਤ੍ਥ ਕਰਣਂ ਕਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਾਲਕਿਰਿਯਾਯਾ’’ਤਿ. ਅਪਲੋਕੇਤ੍ਵਾਤਿ ‘‘ਇਤ੍ਥਨ੍ਨਾਮੋ ਭਨ੍ਤੇ ਭਿਕ੍ਖੁ ਕਾਲਙ੍ਕਤੋ, ਤਸ੍ਸ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਾਤੁਂ ਸਙ੍ਘਂ ਅਪਲੋਕੇਮੀ’’ਤਿ ਅਪਲੋਕੇਤ੍ਵਾ.
੩੬੯. ਗਿਲਾਨੁਪਟ੍ਠਾਕਲਾਭੇਤਿ ਗਿਲਾਨੁਪਟ੍ਠਾਕਾਨਂ ਲਭਿਤਬ੍ਬੇ.
ਸਬ੍ਬੇਪਿ ਭਿਕ੍ਖੂਤਿ ਸਮ੍ਬਨ੍ਧੋ. ਤਤ੍ਥਾਤਿ ਤਸ੍ਮਿਂ ਕਾਲਙ੍ਕਤੇ. ਕਿਂ ਵਦਨ੍ਤਿ? ‘‘ਸਬ੍ਬੇਪਿ…ਪੇ… ਸਾਮਿਨੋ’’ਤਿ ਵਦਨ੍ਤੀਤਿ ਯੋਜਨਾ. ਦ੍ਵੀਸੁ ਵਾਦੇਸੁ ਪਚ੍ਛਿਮਵਾਦੋ ਅਟ੍ਠਕਥਾਚਰਿਯੇਨ ਰੁਚ੍ਚਤੀਤਿ ਵਦਨ੍ਤਿ. ਯਨ੍ਤਿ ਯਂ ਵਤ੍ਥੁ. ‘‘ਯਂ ਅਤ੍ਥਿ, ਤਂ ਦਾਤਬ੍ਬ’’ਨ੍ਤਿ ਵੁਤ੍ਤਮੇਵਤ੍ਥਂ ਆਵਿਕਰੋਨ੍ਤੋ ਆਹ ‘‘ਅਞ੍ਞਸ੍ਮਿਂ…ਪੇ… ਦਾਤਬ੍ਬ’’ਨ੍ਤਿ. ਤਨ੍ਤਿ ਪਰਿਕ੍ਖਾਰਂ.
ਸਮਕੋਤਿ ਸਮਂ ਪਮਾਣਮੇਤਸ੍ਸ ਭਾਗਸ੍ਸਾਤਿ ਸਮਕੋ. ਸਂਵਿਦਹਨਮਤ੍ਤਮੇਵਾਤਿ ਇਦਞ੍ਚਿਦਞ੍ਚ ਕਰੋਹੀਤਿ ਸਜ੍ਜਨਮਤ੍ਤਮੇਵ. ਜੇਟ੍ਠਕਭਾਗੋਤਿ ਦਿਗੁਣਭਾਗੋ.
ਯੋ ਪਨਾਤਿ ਭਿਕ੍ਖੁ ਪਨ. ਏਤ੍ਥਾਤਿ ਬਹੂਸੁ ਭਿਕ੍ਖੂਸੁ. ਯੇਨਾਤਿ ਯੇਨ ਕੇਨਚਿ, ਦਿਨ੍ਨਂ ਪਟਿਯਾਦਿਤਨ੍ਤਿ ਸਮ੍ਬਨ੍ਧੋ. ਏਕਦਿਵਸਮ੍ਪੀਤਿ ਪਿਸਦ੍ਦੋ ਪਗੇਵ ਦ੍ਵੀਹਾਦਿਕੇਤਿ ਦਸ੍ਸੇਤਿ. ਸੋਪੀਤਿ ਪਿਸਦ੍ਦੋ ਨ ਕੇਵਲਂ ਬਹੁਦਿਵਸਂ ਉਪਟ੍ਠਾਕੋਯੇਵ, ਅਥ ਖੋ ਸੋਪੀਤਿ ਦਸ੍ਸੇਤਿ. ਸਮੀਪਨ੍ਤਿ ਗਿਲਾਨਸ੍ਸ ਸਨ੍ਤਿਕਂ. ਆਗਚ੍ਛਤੀਤਿ ਸਮੀਪਮਾਗਚ੍ਛਤਿ.
ਪਚ੍ਚਾਸੀਸਾਯਾਤਿ ਭਾਗਸ੍ਸ ਪਚ੍ਚਾਸੀਸਾਯ. ‘‘ਪੁਨ ਆਗਨ੍ਤ੍ਵਾ ਜਗ੍ਗਿਸ੍ਸਾਮੀ’’ਤਿ ਇਮਿਨਾ ‘‘ਪੁਨ ਆਗਨ੍ਤ੍ਵਾ ਨ ਜਗ੍ਗਿਸ੍ਸਾਮੀ’’ਤਿ ਗਚ੍ਛਨ੍ਤਸ੍ਸ ਨ ਦਾਤਬ੍ਬਨ੍ਤਿ ਦਸ੍ਸੇਤਿ. ਧੁਰਂ ਨਿਕ੍ਖਿਪਿਤ੍ਵਾਤਿ ਉਪਟ੍ਠਹਨੇ ਧੁਰਂ ਨਿਕ੍ਖਿਪਿਤ੍ਵਾ.
ਮਾਤੁਗਾਮੋਪਿ ਹੋਤੂਤਿ ਯੋਜਨਾ. ਤਸ੍ਸ ਭਿਕ੍ਖੁਨੋਤਿ ਕਾਲਙ੍ਕਤਸ੍ਸ ਤਸ੍ਸ ਭਿਕ੍ਖੁਨੋ. ਸਚੇਪਿ ਸਹਸ੍ਸਂ ਅਗ੍ਘਤਿ, ਗਿਲਾਨੁਪਟ੍ਠਾਕਾਨਂਯੇਵ ਦਾਤਬ੍ਬਨ੍ਤਿ ਯੋਜਨਾ. ਅਞ੍ਞਨ੍ਤਿ ਪਤ੍ਤਚੀਵਰਤੋ ਅਞ੍ਞਂ. ਤੇਤਿ ਗਿਲਾਨੁਪਟ੍ਠਾਕਾ. ਅਵਸੇਸਨ੍ਤਿ ਪਤ੍ਤਚੀਵਰਤੋ ਅਵਸੇਸਂ. ਤਤੋਤਿ ਬਹੁਕਮਹਗ੍ਘਤੋ. ਤਿਚੀਵਰਪਰਿਕ੍ਖਾਰੋਤਿ ਤਿਣ੍ਣਂ ਚੀਵਰਾਨਂ ਪਰਿਵਾਰੋ. ਸਬ੍ਬਞ੍ਚੇਤਨ੍ਤਿ ਸਬ੍ਬਮੇਵ ਏਤਂ ਪਰਿਕ੍ਖਾਰਂ. ਲਭਤੀਤਿ ਗਿਲਾਨੁਪਟ੍ਠਾਕੋ ਲਭਤਿ.
ਸੋਤਿ ਕਾਲਙ੍ਕਤੋ. ਕਸ੍ਸਚੀਤਿ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ. ਤਸ੍ਸੇਵਾਤਿ ਦਿਨ੍ਨਗਾਹਕਸ੍ਸੇਵ. ਰੁਚਿਯਾ ਏਵਾਤਿ ਕਾਮਾ ਏਵ. ਤਤ੍ਥ ਤਤ੍ਥ ਸਙ੍ਘਸ੍ਸੇਵਾਤਿ ਤਸ੍ਮਿਂ ਤਸ੍ਮਿਂ ਵਿਹਾਰੇ ਠਿਤਸ੍ਸ ਸਙ੍ਘਸ੍ਸੇਵ. ਇਦਂ ਵਿਹਾਰੇ ਠਪਿਤਪਰਿਕ੍ਖਾਰੇ ਸਨ੍ਧਾਯ ਵੁਤ੍ਤਂ. ਸਚੇ ਗਾਮੇ ਵਾ ਅਰਞ੍ਞੇ ਵਾ ਠਪਿਤਾ ਹੋਨ੍ਤਿ, ਸਕਲੋਵ ਸਙ੍ਘੋ ਇਸ੍ਸਰੋ. ਕਸ੍ਮਾ? ਸਙ੍ਘਸ੍ਸੇਵ ਦਾਯਜ੍ਜਭਾਵਤੋ. ਬਹੂਨਮ੍ਪੀਤਿ ਤੀਹਿ ਪਟ੍ਠਾਯ ਬਹੂਨਮ੍ਪਿ. ਈਦਿਸਵਚਨਂ ਉਪਨਿਧਾਯ ਸਾਸਨੇਪਿ ਏਕੋ ਦ੍ਵੇ ਬਹੂਤਿ ਤੀਣਿ ਵਚਨਾਨਿ ਅਤ੍ਥੇ ਦਿਸ੍ਸਨ੍ਤਿ, ਸਦ੍ਦੇ ਪਨ ਦ੍ਵਿਵਚਨਬਹੁਵਚਨਾਨਂ ਵਿਸੇਸਾਭਾਵਤੋ ਦ੍ਵਿਵਚਨਂ ਨਤ੍ਥੀਤਿ ਦਟ੍ਠਬ੍ਬਂ. ਅਦਿਨ੍ਨਮੇਵਾਤਿ ਅਤ੍ਤਨੋਯੇਵ ਅਸਨ੍ਤਕਤ੍ਤਾ, ਅਞ੍ਞੇਸਮ੍ਪਿ ਸਾਧਾਰਣਤ੍ਤਾ ਚ ਅਦਿਨ੍ਨਮੇਵ. ਸਚੇ ਸਬ੍ਬੇ ਮਤਾ ਅਨੁਮਤਿਯਾ ਦੇਨ੍ਤਿ, ਸੁਦਿਨ੍ਨਮੇਵ. ਤਨ੍ਤਿ ਸਨ੍ਤਕਂ. ਤੇਸੂਤਿ ਤੇਸੁ ਸਬ੍ਬੇਸੁ.
੨੨੭. ਕੁਸਚੀਰਾਦਿਪਟਿਕ੍ਖੇਪਕਥਾ
੩੭੧. ‘‘ਅਕ੍ਕਨਾਲ਼ਮਯ’’ਨ੍ਤਿ ਇਮਿਨਾ ਅਕ੍ਕਨਾਲ਼ੇਨ ਨਿਬ੍ਬਤ੍ਤਂ ਅਕ੍ਕਨਾਲ਼ਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਮਕਚਿਮਯੋਤਿ ਏਤ੍ਥ ਮਕਚਿਸਦ੍ਦੇਨ ਪੋਤ੍ਥਕਸਦ੍ਦਸ੍ਸ ਗਨ੍ਥਾਦਯੋ ਅਤ੍ਥੇ ਨਿਵਤ੍ਤੇਤਿ. ਮਯਸਦ੍ਦੇਨ ਪੁਰਿਮਨਯੇਨੇਵ ਨਿਬ੍ਬਤ੍ਤਤਦ੍ਧਿਤਂ ਦਸ੍ਸੇਤਿ. ਸੇਸਾਨੀਤਿ ਅਕ੍ਕਨਾਲ਼ਪੋਤ੍ਥਕੇਹਿ ਸੇਸਾਨਿ ਕੁਸਚੀਰਾਦੀਨਿ. ਤੇਸੂਤਿ ਕੁਸਚੀਰਾਦੀਸੁ.
੩੭੨. ਤਿਪਟ੍ਟਚੀਵਰਸ੍ਸ ਵਾਤਿ ਇਦਂ ਦ੍ਵਿਪਟ੍ਟਚੀਵਰਸ੍ਸ ਮਜ੍ਝੇ ਦਾਨਂ ਸਨ੍ਧਾਯ ਵੁਤ੍ਤਂ. ਤੇਸਨ੍ਤਿ ਸਬ੍ਬਨੀਲਕਾਦੀਨਂ. ਕਞ੍ਚੁਕਨ੍ਤਿ ਵਾਰਣਂ. ਤਞ੍ਹਿ ਕਚਿਯਤਿ ਕਾਯੇ ਬਨ੍ਧਿਯਤੀਤਿ ਕਞ੍ਚੁਕੋਤਿ ਵੁਚ੍ਚਤਿ. ਵੇਠਨੇਪੀਤਿ ਉਣ੍ਹੀਸੇਪਿ. ਤਞ੍ਹਿ ਯਸ੍ਮਾ ਯੇਨ ਸੀਸੇ ਵੇਠਿਯਤਿ, ਤਸ੍ਮਾ ਵੇਠਨਨ੍ਤਿ ਵੁਚ੍ਚਤਿ. ਰੁਕ੍ਖਛਲ੍ਲਿਮਯਨ੍ਤਿ ਏਤ੍ਥ ਰੁਕ੍ਖਛਲ੍ਲਿਸਦ੍ਦੇਨ ਤਿਰੀਟਸਦ੍ਦਸ੍ਸ ਵਕ੍ਕਲਤ੍ਥਂ ਦਸ੍ਸੇਤਿ. ਵਕ੍ਕਲਞ੍ਹਿ ਨਿਵਸਨਾਨਂ ਅਙ੍ਗਪਚ੍ਚਙ੍ਗਂ ਤਿਰੋਭਾਵਂ ਪਟਿਚ੍ਛਨ੍ਨਭਾਵਂ ਏਤਿ ਗਚ੍ਛਤਿ ਅਨੇਨਾਤਿ ਵਾ ਰੁਕ੍ਖਂ ਤਿਰੋਪਟਿਚ੍ਛਨ੍ਨਂ ਹੁਤ੍ਵਾ ਏਤਿ ਪਵਤ੍ਤਤੀਤਿ ਵਾ ਤਿਰੀਟਨ੍ਤਿ ਵੁਚ੍ਚਤਿ. ਅਭਿਧਾਨੇ (ਅਭਿਧਾਨਪ੍ਪਦੀਪਿਕਾਯਂ ੪੪੨ ਗਾਥਾਯਂ) ਪਨ ਤਰੀਟਨ੍ਤਿ ਤਕਾਰੇ ਇਕਾਰਵਿਰਹਿਤੋ ਪਾਠੋ ਅਤ੍ਥਿ. ਪਾਦਪੁਞ੍ਜਨਨ੍ਤਿ ਪਾਦੋ ਪੁਜਿਯਤਿ ਸੋਧਿਯਤਿ ਅਨੇਨਾਤਿ ਪਾਦਪੁਞ੍ਜਨਂ, ਤਾਲੁਜੋ ਤਤਿਯਕ੍ਖਰੋ.
੩੭੪. ਸਨ੍ਤੇ ਪਤਿਰੂਪਕੇ ਗਾਹਕੇਤਿ ਏਤ੍ਥ ਪਤਿਰੂਪਕੋ ਨਾਮ ਪਕ੍ਕਮਨ੍ਤਸ੍ਸ ਭਿਕ੍ਖੁਨੋ ਸਨ੍ਦਿਟ੍ਠਸਮ੍ਭਤ੍ਤੋ. ਇਮਿਨਾ ਪਤਿਰੂਪਕੇ ਗਾਹਕੇ ਅਸਤਿ ਅਦਤ੍ਵਾ ਸਙ੍ਘੇਨ ਭਾਜਿਤੇ ਸੁਭਾਜਿਤਮੇਵਾਤਿ ਦਸ੍ਸੇਤਿ. ਸਤ੍ਤ ਜਨਾਤਿ ਪਕ੍ਕਮਨ੍ਤਉਮ੍ਮਤ੍ਤਕਖਿਤ੍ਤਚਿਤ੍ਤਵੇਦਨਟ੍ਟਾ ਚਤ੍ਤਾਰੋ, ਉਕ੍ਖਿਤ੍ਤਕਾ ਤਯੋਤਿ ਸਤ੍ਤ ਜਨਾ.
੨੩੦. ਸਙ੍ਘੇ ਭਿਨ੍ਨੇ ਚੀਵਰੁਪ੍ਪਾਦਕਥਾ
੩੭੬. ਸਙ੍ਘੋ ਭਿਜ੍ਜਤੀਤਿ ਏਤ੍ਥ ਦ੍ਵਿਕੋਟ੍ਠਾਸਵਸੇਨ ਭਿਜ੍ਜਨਮੇਵਾਧਿਪ੍ਪੇਤਂ, ਨ ਅਞ੍ਞਨ੍ਤਿ ਆਹ ‘‘ਦ੍ਵੇ ਕੋਟ੍ਠਾਸਾ’’ਤਿ. ਏਕਸ੍ਮਿਂ ਪਕ੍ਖੇ ਚੀਵਰਾਨਿ ਦੇਨ੍ਤੀਤਿ ਯੋਜਨਾ. ਦ੍ਵਿਪਕ੍ਖਂ ਸਨ੍ਧਾਯ ‘‘ਸਕਲਸ੍ਸ ਸਙ੍ਘਸ੍ਸਾ’’ਤਿ ਵੁਤ੍ਤਂ. ਏਤਨ੍ਤਿ ਚੀਵਰਂ. ਤਸ੍ਸੇਵ ਚੀਵਰਨ੍ਤਿ ਤਸ੍ਸ ਕੋਟ੍ਠਾਸਸ੍ਸ ਚੀਵਰਮੇਵ. ਯਤ੍ਥਾਤਿ ਯਸ੍ਮਿਂ ਦੇਸੇ. ਦਕ੍ਖਿਣੋਦਕਂ ਪਮਾਣਨ੍ਤਿ ਦਕ੍ਖਿਣੋਦਕਮੇਵ ਪਮਾਣਂ, ਨ ਦੇਯ੍ਯਧਮ੍ਮੋ. ਤਸ੍ਮਾ ਦਕ੍ਖਿਣੋਦਕਂ ਪਟਿਗ੍ਗਣ੍ਹਨ੍ਤਾ, ਦੇਯ੍ਯਧਮ੍ਮਸ੍ਸ ਸਾਮਿਨੋ ਹੋਨ੍ਤੀਤਿ ਅਧਿਪ੍ਪਾਯੋ. ਉਭੋਹਿਪਿ ਪਕ੍ਖੇਹੀਤਿ ਯੋਜਨਾ. ਪਰਸਮੁਦ੍ਦੇਤਿ ਜਮ੍ਬੁਦੀਪੇ. ਸੋ ਹਿ ਸੀਹਲ਼ਦੀਪਤੋ ਸਮੁਦ੍ਦਸ੍ਸ ਪਾਰਤ੍ਤਾ ਪਰਸਮੁਦ੍ਦੋਤਿ ਵੁਚ੍ਚਤਿ. ਇਤਰੋ ਪਕ੍ਖੋਤਿ ਦਕ੍ਖਿਣੋਦਕਸ੍ਸ ਚ ਚੀਵਰਸ੍ਸ ਚ ਲਦ੍ਧਪਕ੍ਖਤੋ ਇਤਰੋ ਅਲਦ੍ਧੋ ਪਕ੍ਖੋ.
੨੩੨. ਅਟ੍ਠਚੀਵਰਮਾਤਿਕਾਕਥਾ
੩੭੯. ਇਦਾਨਿ ਆਹਾਤਿ ਸਮ੍ਬਨ੍ਧੋ. ਪੁਗ੍ਗਲਾਧਿਟ੍ਠਾਨਨਯੇਨਾਤਿ ‘‘ਸੀਮਾਯ ਦੇਤੀ’’ਤਿ ਕਤ੍ਤੁਵਾਚਕੇਨ ਕਿਰਿਯਾਪਦੇਨ ਦਾਯਕਪੁਗ੍ਗਲਸਙ੍ਖਾਤਕਤ੍ਤੁਨੋ ਅਧਿਟ੍ਠਾਨਵਸੇਨ ਵੁਤ੍ਤਤ੍ਤਾ ਪੁਗ੍ਗਲਾਧਿਟ੍ਠਾਨੇਨ ਨਯੇਨ. ਏਤ੍ਥਾਤਿ ਏਤਾਸੁ ਅਟ੍ਠਸੁ ਮਾਤਿਕਾਸੁ. ਅਟ੍ਠਮਾ ਮਾਤਿਕਾਤਿ ਯੋਜਨਾ. ਤਤ੍ਥਾਤਿ ਅਟ੍ਠਸੁ ਮਾਤਿਕਾਸੁ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਕਤਿਕਾਯ ਦੇਤੀ’’ਤਿਆਦੀਸੁ.
ਸੀਮਾਯ…ਪੇ… ਭਾਜੇਤਬ੍ਬਨ੍ਤਿਆਦਿਮ੍ਹਿ ਮਾਤਿਕਾਨਿਦ੍ਦੇਸੇ ਪਨ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਸੀਮਾਯ ਦੇਤੀਤਿ ਏਤ੍ਥ ਪਨ੍ਨਰਸ ਸੀਮਾ ਵੇਦਿਤਬ੍ਬਾਤਿ ਸਮ੍ਬਨ੍ਧੋ.
ਤਤ੍ਥਾਤਿ ਪਨ੍ਨਰਸਸੁ ਸੀਮਾਸੁ. ਉਪਚਾਰਸੀਮਾ ਪਰਿਚ੍ਛਿਨ੍ਨਾ ਹੋਤੀਤਿ ਸਮ੍ਬਨ੍ਧੋ. ਏਤ੍ਤਕਂ ਠਾਨਨ੍ਤਿ ਪਰਿਕ੍ਖੇਪਾਰਹਟ੍ਠਾਨਸ੍ਸ ਏਕਨ੍ਤੇਨ ਅਵੁਤ੍ਤਤ੍ਤਾ ਏਕਨ੍ਤੇਨ ਪਰਿਕ੍ਖੇਪਾਰਹਟ੍ਠਾਨਂ ਦਸ੍ਸੇਨ੍ਤੋ ਆਹ ‘‘ਅਪਿਚਾ’’ਤਿਆਦਿ. ਧੁਵਸਨ੍ਨਿਪਾਤਤੋ ਵਾ ਖਿਪਿਤਾਨਨ੍ਤਿ ਸਮ੍ਬਨ੍ਧੋ. ‘‘ਪਰਿਯਨ੍ਤੇ’’ਤਿ ਪਦਂ ਪੁਬ੍ਬਾਪਰਾਪੇਕ੍ਖਂ. ਤਸ੍ਮਾ ਤੀਸੁ ਨਿਸ੍ਸਕ੍ਕਪਦੇਸੁ ਯੋਜੇਤਬ੍ਬਂ. ਸਾ ਪਨਾਤਿ ਉਪਚਾਰਸੀਮਾ ਪਨ. ਭਿਕ੍ਖੂਸੁ ਵਡ੍ਢਨ੍ਤੇਸੁ ਆਵਾਸੋਪਿ ਵਡ੍ਢਤੀਤਿ ਮਨਸਿਕਤ੍ਵਾ ਵੁਤ੍ਤਂ ‘‘ਭਿਕ੍ਖੂਸੁ ਵਡ੍ਢਨ੍ਤੇਸੂ’’ਤਿ. ਸਬ੍ਬੇਸਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਵੁਤ੍ਤਮੇਵਾਤਿ ਸੀਮਕਥਾਯਂ (ਮਹਾਵ. ਅਟ੍ਠ. ੧੩੮, ੧੪੪) ਵੁਤ੍ਤਮੇਵ.
ਅਪਿਚ ਖੋਤਿ ਏਤ੍ਥ ਅਪਿਸਦ੍ਦੋ ਪੁਚ੍ਛਤ੍ਥਵਾਚਕੋ. ਕੇਹਿ ਠਪਿਤਾਤਿ ਹਿ ਅਤ੍ਥੋ. ਰਾਜਰਾਜਮਹਾਮਤ੍ਤਾ ਠਪੇਨ੍ਤੀਤਿ ਸਮ੍ਬਨ੍ਧੋ. ਲਾਭਸੀਮਾਤਿ ਲਾਭਸ੍ਸ ਮਰਿਯਾਦੋ. ਯਨ੍ਤਿ ਯੋ ਲਾਭੋ. ਏਤ੍ਥਨ੍ਤਰੇਤਿ ਏਤਸ੍ਮਿਂ ਗਾਵੁਤਾਦਿਅਨ੍ਤਰੇ. ਲਾਭਸੀਮਾ ਨਾਮਾਤਿ ਲਾਭੇਨ ਪਰਿਚ੍ਛਿਨ੍ਨਾ ਸੀਮਾ ਨਾਮ. ਤਤ੍ਥਾਤਿ ਬਹੂਸੁ ਜਨਪਦੇਸੁ. ਅਨ੍ਤਰਦੀਪਾ ਚਾਤਿ ਮਹਾਦੀਪਤੋ ਅਞ੍ਞਦੀਪਾ ਚ, ਖੁਦ੍ਦਕਦੀਪਾਤਿ ਅਧਿਪ੍ਪਾਯੋ.
ਏਤ੍ਥੇਵ ਸੀਮਾਯਾਤਿ ਖਣ੍ਡਸੀਮਾਯ ਏਵ. ਤੇਸਂਯੇਵਾਤਿ ਖਣ੍ਡਸੀਮਗਤਾਨਂਯੇਵ. ਏਵਤ੍ਥਫਲਂ ਦਸ੍ਸੇਨ੍ਤੋ ਆਹ ‘‘ਅਞ੍ਞੇਸ’’ਨ੍ਤਿਆਦਿ. ਰੁਕ੍ਖੇ ਵਾ ਪਬ੍ਬਤੇ ਵਾ ਠਿਤਸ੍ਸ ਵਾ ਹੇਟ੍ਠਾ ਪਥਵੀਮਜ੍ਝਗਤਸ੍ਸ ਵਾ ਭਿਕ੍ਖੁਸ੍ਸਾਤਿ ਯੋਜਨਾ. ਇਮਿਸ੍ਸਾ ਉਪਚਾਰਸੀਮਾਯ ਠਿਤਸ੍ਸਾਤਿ ਸਮ੍ਬਨ੍ਧੋ. ਸਮਾਨਸਂਵਾਸਸੀਮਾਯਾਤਿ ਮਹਾਸੀਮਾਯ. ਖਣ੍ਡਸੀਮਸੀਮਨ੍ਤਰਿਕਾਸੂਤਿ ਖਣ੍ਡਸੀਮਾਯਞ੍ਚ ਦ੍ਵਿਨ੍ਨਂ ਸੀਮਾਨਂ ਸੀਮਨ੍ਤਰਿਕਾਯਞ੍ਚ. ਤਤ੍ਥ ਦ੍ਵਿਨ੍ਨਂ ਗਾਮਟ੍ਠਾਨਮ੍ਪਿ ਪਾਪੁਣਾਤਿ. ਅਵਿਪ੍ਪਵਾਸਸੀਮਾਯ ਦਿਨ੍ਨਂ ਗਾਮਟ੍ਠਾਨਂ ਨ ਪਾਪੁਣਾਤਿ ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿ ਵੁਤ੍ਤਤ੍ਤਾ.
ਜਮ੍ਬੁਯਾ ਲਕ੍ਖਿਤੋ ਦੀਪੋ ਜਮ੍ਬੁਦੀਪੋ. ਤਮ੍ਬੋ ਲੋਹਿਤੋ ਪਾਣਿ ਹਤ੍ਥੋ ਏਤੇਸਨ੍ਤਿ ਤਮ੍ਬਪਾਣਿਨੋ. ਵਿਜਯਕੁਮਾਰਾਦਯੋ ਸਤ੍ਤਸਤਾ ਜਨਾ. ਤੇਸਂ ਨਿਵਾਸੋ ਤਮ੍ਬਪਣ੍ਣਿ, ਸੋਯੇਵ ਦੀਪੋਤਿ ਤਮ੍ਬਪਣ੍ਣਿਦੀਪੋ, ਤਸ੍ਮਿਂ. ਸਬ੍ਬੇਸਂ ਭਾਗਨ੍ਤਿ ਸਮ੍ਬਨ੍ਧੋ. ਤਤ੍ਰੇਵਾਤਿ ਜਮ੍ਬੁਦੀਪੇਯੇਵ. ਏਵਨ੍ਤਿਆਦਿ ਨਿਗਮਨਂ.
ਯੋ ਪਨ ਭਣਤੀਤਿ ਸਮ੍ਬਨ੍ਧੋ. ਤਤੋਤਿ ਕਥਨਤੋ, ਪਰਨ੍ਤਿ ਸਮ੍ਬਨ੍ਧੋ. ਨਨ੍ਤਿ ਮਹਾਸਿਵਤ੍ਥੇਰਂ. ਤਿਯੋਜਨਾਪੀਤਿ ਪਿਸਦ੍ਦੋ ਤਤੋ ਊਨਾਪਿ ਹੋਤੀਤਿ ਦਸ੍ਸੇਤਿ. ਸਬ੍ਬਂਪੇਤਨ੍ਤਿ ਸਬ੍ਬਂਪਿ ਏਤਂ ਲਾਭਗਣ੍ਹਨਾਦਿਂ. ਇਤਿ ਆਹਂਸੂਤਿ ਯੋਜਨਾ.
ਕਤਿਕਾਨਂ ਯਥਿਚ੍ਛਿਤਕਤੇਨ ਪਵਤ੍ਤਤ੍ਤਾ ਬਹੁ ਹੋਤਿ, ਤਸ੍ਮਾ ਇਧ ਇਚ੍ਛਿਤਕਤਿਕਂ ਦਸ੍ਸੇਤੁਂ ਵੁਤ੍ਤਂ ‘‘ਸਮਾਨਲਾਭਕਤਿਕਾਯਾ’’ਤਿ. ਤਤ੍ਰਾਤਿ ‘‘ਕਤਿਕਾਯ ਦੇਤੀ’’ਤਿ ਪਾਠੇ. ਸਨ੍ਨਿਪਤਿਤੇਹਿ ਭਿਕ੍ਖੂਹਿ ਭਾਜੇਤਬ੍ਬਨ੍ਤਿ ਸਮ੍ਬਨ੍ਧੋ. ਤਸ੍ਸਾਤਿ ਵਿਹਾਰਸ੍ਸ. ਬੁਦ੍ਧਾਧਿਵੁਤ੍ਥੋਤਿ ਬੁਦ੍ਧੇਨ ਅਧਿ ਇਸ੍ਸਰਵਸੇਨ ਵਸਿਯਿਤ੍ਥਾਤਿ ਬੁਦ੍ਧਾਧਿਵੁਤ੍ਥੋ. ਏਤ੍ਤਾਵਤਾਤਿ ਏਤ੍ਤਕੇਨ ਸਾਵਨਮਤ੍ਤੇਨ. ਨਿਸਿਨ੍ਨੋਵਾਤਿ ਨਿਸਿਨ੍ਨੋ ਏਵ ਹੋਤਿ, ਨਿਸਿਨ੍ਨੋ ਇਵ ਵਾ. ਤਸ੍ਮਿਂ ਵਿਹਾਰੇਪੀਤਿ ਤਸ੍ਮਿਂ ਪੋਰਾਣਕਾਦਿਵਿਹਾਰੇਪਿ. ਏਵਮੇਵਾਤਿ ‘‘ਅਯਂ ਪੋਰਾਣਕੋ ਵਿਹਾਰੋ ਤੇਨ ਨਵਵਿਹਾਰੇਨ ਸਦ੍ਧਿਂ ਸਮਾਨਲਾਭਂ ਕਾਤੁਂ ਸਙ੍ਘਸ੍ਸ ਰੁਚ੍ਚਤੀ’’ਤਿਆਦਿਨਾ ਏਵਮੇਵ. ਇਧਾਤਿ ਪੋਰਾਣਕਵਿਹਾਰੇ. ਤਸ੍ਮਿਨ੍ਤਿ ਨਵਵਿਹਾਰੇ. ਏਵਨ੍ਤਿ ਯਥਾ ਏਕੇਨ ਵਿਹਾਰੇਨ ਸਦ੍ਧਿਂ ਏਕੋ ਵਿਹਾਰੋ ਕਾਤਬ੍ਬੋ, ਏਵਂ ਤਥਾਤਿ ਅਤ੍ਥੋ.
ਭਿਕ੍ਖਾਪਞ੍ਞਤ੍ਤਿਯਾਤਿ ਏਤ੍ਥ ਭਿਕ੍ਖਾ ਪਞ੍ਞਪਿਯਤਿ ਨਿਚ੍ਚਵਸੇਨ ਠਪਿਯਤਿ ਏਤ੍ਥਾਤਿ ਭਿਕ੍ਖਾਪਞ੍ਞਤ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਪਰਿਚ੍ਚਾਗਪਞ੍ਞਾਪਨਟ੍ਠਾਨੇ’’ਤਿ. ਤਸ੍ਸਾਤਿ ‘‘ਯਤ੍ਥ ਸਙ੍ਘਸ੍ਸ ਧੁਵਕਾਰਾ ਕਰਿਯਨ੍ਤੀ’’ਤਿਪਾਠਸ੍ਸ. ਅਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਯਤ੍ਥ ਵਾਤਿ ਯਸ੍ਮਿਂ ਵਾ ਠਾਨੇ. ਅਨੇਨਾਤਿ ਚੀਵਰਦਾਯਕੇਨ. ਸਲਾਕਭਤ੍ਤਾਦੀਨਿ ਵਾ ਨਿਬਦ੍ਧਾਨਿ ਕਾਰਿਤਾਨੀਤਿ ਸਮ੍ਬਨ੍ਧੋ. ਯੇਨ ਪਨਾਤਿ ਚੀਵਰਦਾਯਕੇਨ ਪਨ. ਸਕਲੋਪਿ ਵਿਹਾਰੋਤਿ ਸਕਲੋਪਿ ਸਆਰਾਮੋ ਵਿਹਾਰੋ. ਤਤ੍ਥਾਤਿ ਚੀਵਰਦਾਯਕੇ. ਇਮੇਤਿ ਪਾਕਵਤ੍ਤਸ੍ਸ ਵਤ੍ਤਨਟ੍ਠਾਨਾਦਯੋ ਵਿਹਾਰਾ. ਧੁਵੇਨ ਕਰਿਯਨ੍ਤੀਤਿ ਧੁਵਕਾਰਾ ਵਿਹਾਰਾ. ਸੋਤਿ ਚੀਵਰਦਾਯਕੋ. ਯਤ੍ਥਾਤਿ ਯਸ੍ਮਿਂ ਠਾਨੇ. ਸਬ੍ਬਤ੍ਥਾਤਿ ਸਬ੍ਬੇਸੁ ਬਹੂਸੁ ਵਿਹਾਰੇਸੁ.
ਤੇਹੀਤਿ ਬਹੁਤਰੇਹਿ ਭਿਕ੍ਖੂਹਿ. ਧੁਵਕਾਰੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਏਕਤ੍ਥਾਤਿ ਏਕਸ੍ਮਿਂ ਧੁਵਕਾਰੇ. ‘‘ਸਚੇ ਭਿਕ੍ਖੁਗਣਨਾਯ ਗਣ੍ਹਥਾਤਿ ਵਦਤੀ’’ਤਿ ਇਮਿਨਾ ਸਚੇ ਨ ਵਦਤਿ, ਭਿਕ੍ਖੁਗਣਨਾਯ ਭਾਜੇਤ੍ਵਾ ਗਣ੍ਹਿਤੁਂ ਨ ਵਟ੍ਟਤੀਤਿ ਦਸ੍ਸੇਤਿ, ਵਿਹਾਰਗਣਨਾਯ ਗਣ੍ਹਿਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਤਥਾਤਿ ਯਥਾ ‘‘ਭਿਕ੍ਖੁਗਣਨਾਯ ਗਣ੍ਹਥਾ’’ਤਿ ਵਦਤਿ, ਤਥਾਤਿ ਅਤ੍ਥੋ. ਏਤ੍ਥਾਤਿ ਭਾਜੇਤਬ੍ਬਵਤ੍ਥੂਸੁ. ਤਨ੍ਤਿ ਮਞ੍ਚਪੀਠਕਂ, ਪੁਚ੍ਛਿਤ੍ਵਾ ਦਾਤਬ੍ਬਨ੍ਤਿ ਸਮ੍ਬਨ੍ਧੋ. ਪੁਚ੍ਛਿਤ੍ਵਾਤਿ ਦਾਯਕਂ ਪੁਚ੍ਛਿਤ੍ਵਾ, ਵਦਤੀਤਿ ਦਾਯਕੋ ਵਦਤਿ. ਸਙ੍ਘਸ੍ਸਾਪੀਤਿ ਪਿਸਦ੍ਦੋ ਨ ਦਾਯਕਸ੍ਸੇਵਾਤਿ ਦਸ੍ਸੇਤਿ.
ਉਪਚਾਰਸੀਮਾਯਂ ਠਿਤੇਨ ਸਙ੍ਘੇਨ ਭਾਜੇਤਬ੍ਬਨ੍ਤਿ ਸਮ੍ਬਨ੍ਧੋ. ਸੀਮਟ੍ਠਸ੍ਸਾਤਿ ਉਪਚਾਰਸੀਮਾਯਂ ਠਿਤਸ੍ਸ. ਅਸਮ੍ਪਤ੍ਤਸ੍ਸਾਪੀਤਿ ਭਾਜਨਟ੍ਠਾਨਂ ਅਸਮ੍ਪਤ੍ਤਸ੍ਸਾਪਿ. ਅਲਸਜਾਤਿਕਾਤਿ ਕੋਸਜ੍ਜਜਾਤਿਕਾ. ਠਿਤਿਕਾਤਿ ਪਬਨ੍ਧਵਸੇਨ ਠਿਯਤੇ ਠਿਤਿ, ਸਾਯੇਵ ਠਿਤਿਕਾ. ਅਥ ਵਾ ‘‘ਠਿਤਟ੍ਠਾਨਤੋ ਪਟ੍ਠਾਯ ਦਾਤਬ੍ਬ’’ਨ੍ਤਿ ਅਟ੍ਠਕਥਾਯਂ (ਮਹਾਵ. ਅਟ੍ਠ. ੩੭੯) ਵੁਤ੍ਤਤ੍ਤਾ ਤਿਟ੍ਠਤਿ ਪਬਨ੍ਧਵਸੇਨ ਏਤ੍ਥਾਤਿ ਠਿਤਿ, ਸਾਯੇਵ ਠਿਤਿਕਾਤਿ ਵਚਨਤ੍ਥੋ ਕਾਤਬ੍ਬੋ. ਠਿਤਿਕਂ ਠਪੇਤ੍ਵਾਤਿ ਵੀਸਤਿਵਸ੍ਸਸਙ੍ਖਾਤਂ ਠਿਤਿਕਂ ਠਪੇਤ੍ਵਾ. ਤੇਸਨ੍ਤਿ ਥੇਰਾਨਂ.
ਸਮ੍ਪਤ੍ਤਸਮ੍ਪਤ੍ਤਾਨਨ੍ਤਿ ਭਾਜਨਟ੍ਠਾਨਂ ਸਮ੍ਪਤ੍ਤਸਮ੍ਪਤ੍ਤਾਨਂ. ਅਤ੍ਤਨੋ ਵਿਹਾਰਦ੍ਵਾਰੇ ਵਾ ਅਤ੍ਤਨੋ ਅਨ੍ਤੋਵਿਹਾਰੇਯੇਵ ਵਾਤਿ ਯੋਜਨਾ. ਸੀਮਾਤਿ ਉਪਚਾਰਸੀਮਾ. ਥੇਰਾਸਨਂ ਆਰੂਲ਼੍ਹੇ ਸਤੀਤਿ ਯੋਜਨਾ. ਵਸ੍ਸਗ੍ਗੇਨਾਤਿ ਵਸ੍ਸਗਣਨਾਯ.
ਪਾਟੇਕ੍ਕਨ੍ਤਿ ਪਚ੍ਚੇਕਂ. ਸਬ੍ਬਾਨੇਵ ਚੀਵਰਾਨੀਤਿ ਸਮ੍ਬਨ੍ਧੋ. ਦੁਬ੍ਭਾਸਿਤਦੁਗ੍ਗਹਿਤਾਨਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਗਤਗਤਟ੍ਠਾਨੇ ਸਙ੍ਘਿਕਾਨੇਵ ਹੋਨ੍ਤੀ’’ਤਿ. ਏਕਨ੍ਤਿ ਦਸਸੁ ਵਤ੍ਥੇਸੁ ਏਕਂ.
ਵਤ੍ਥਸ੍ਸੇਵ ਪੁਪ੍ਫਂ ਵਾ ਵਲਿ ਵਾ ਅਤ੍ਥੀਤਿ ਯੋਜਨਾ. ਤੇਨਾਤਿ ਪੁਪ੍ਫਵਲਿਨਾ. ਏਕਂ ਤਨ੍ਤਨ੍ਤਿ ਏਕਂ ਸੁਤ੍ਤਂ. ਤਤ੍ਥਾਤਿ ਤੇਸੁ ਠਿਤਿਕਾਯ ਠਾਨਾਟ੍ਠਾਨੇਸੁ. ਦ੍ਵੀਹਿਪਿ ਗਹੇਤਬ੍ਬਂ ਠਿਤਿਕਾਯ ਅਭਾਵਤੋ.
ਭਿਕ੍ਖੁ ਅਤ੍ਤਨੋ ਸਨ੍ਤਕਂ ਯਂ ਚੀਵਰਨ੍ਤਿ ਯੋਜਨਾ. ਪਂਸੁਕੂਲਿਕਾਨਮ੍ਪਿ ਵਟ੍ਟਤੀਤਿ ‘‘ਸਙ੍ਘਸ੍ਸ ਦੇਮਾ’’ਤਿ ਵਾ ‘‘ਤੁਯ੍ਹਂ ਦੇਮਾ’’ਤਿ ਵਾ ਅਵਤ੍ਵਾ ‘‘ਭਿਕ੍ਖੂਨਂ ਦੇਮ, ਥੇਰਾਨਂ ਦੇਮਾ’’ਤਿ ਵੁਤ੍ਤਤ੍ਤਾ ਪਂਸੁਕੂਲਿਕਾਨਮ੍ਪਿ ਵਟ੍ਟਤਿ. ਭਿਕ੍ਖੁਥੇਰਾ ਨਾਮ ਹਿ ਨ ਅਤ੍ਤਨਾਯੇਵ ਹੋਨ੍ਤਿ, ਅਞ੍ਞੇਪਿ ਬਹੂ, ਤਸ੍ਮਾ ਵਟ੍ਟਤਿ. ‘‘ਸਙ੍ਘਸ੍ਸਾ’’ਤਿ ਵੁਤ੍ਤੇ ਅਤ੍ਤਨਾ ਏਕਨ੍ਤੇਨ ਸਙ੍ਘੋਯੇਵ, ਤਸ੍ਮਾ ‘‘ਸਙ੍ਘਸ੍ਸਾ’’ਤਿ ਵੁਤ੍ਤੇਪਿ ਨ ਵਟ੍ਟਤਿ, ਪਗੇਵ ‘‘ਤੁਯ੍ਹ’’ਨ੍ਤਿ ਵੁਤ੍ਤੇ.
ਤਤੋਤਿ ਬਹੁਵਤ੍ਥਤੋ. ਗਹੇਤੁਂ ਨ ਵਟ੍ਟਤੀਤਿ ਪਂਸੁਕੂਲਿਕਾਨਂ ਗਹੇਤੁਂ ਨ ਵਟ੍ਟਤਿ.
ਯਨ੍ਤਿ ਵਤ੍ਥਂ. ਤਤ੍ਥਾਤਿ ਪਰਿਕ੍ਖਾਰੇਸੁ. ਸੁਤ੍ਤਨ੍ਤਿ ਤਨ੍ਤਂ.
ਏਵਂ ਅਨ੍ਤੋਸੀਮਂ ਪਵਿਸਿਤ੍ਵਾ ‘‘ਸਙ੍ਘਸ੍ਸ ਦੇਮਾ’’ਤਿ ਦਿਨ੍ਨੇ ਵਿਨਿਚ੍ਛਯਂ ਦਸ੍ਸੇਤ੍ਵਾ ਬਹਿਸੀਮਾਯ ਦਿਨ੍ਨੇ ਤਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਏਕਬਦ੍ਧਾ ਚਾਤਿ ਦ੍ਵਾਦਸਹਤ੍ਥਮਨਤਿਕ੍ਕਮਿਤ੍ਵਾ ਏਕਤੋਬਦ੍ਧਾ ਚ. ਯੇ ਪਨਾਤਿ ਭਿਕ੍ਖੂ ਪਨ.
ਉਭਤੋਸਙ੍ਘਸ੍ਸ ਦੇਤੀਤਿ ਏਤ੍ਥ ਚਤੁਨ੍ਨਂ ਵਾਕ੍ਯਾਨਂ ਵਸੇਨ ਵੁਤ੍ਤੇਪਿ ਉਭਤੋਸਙ੍ਘਸ੍ਸ ਦੇਤਿਯੇਵ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਉਭਤੋਸਙ੍ਘਸ੍ਸ ਦਮ੍ਮੀਤਿ ਵੁਤ੍ਤੇਪੀ’’ਤਿਆਦਿ. ਉਭਤੋਸਙ੍ਘਗ੍ਗਹਣੇਨ ਗਹਿਤਤ੍ਤਾਤਿ ਪੁਗ੍ਗਲਸ੍ਸ ਉਭਤੋਸਙ੍ਘਗ੍ਗਹਣੇਨ ਗਹਿਤਤ੍ਤਾ. ‘‘ਏਸੇਵ ਨਯੋ’’ਤਿ ਇਮਿਨਾ ਏਕਵੀਸਤਿਪਟਿਵੀਸੇ ਕਤ੍ਵਾ ਏਕੋ ਚੇਤਿਯਸ੍ਸ ਦਾਤਬ੍ਬੋਤਿ ਨਯਂ ਅਤਿਦਿਸਤਿ. ਪਾਪੁਣਨਕੋਟ੍ਠਾਸੋ ਨਾਮ ਨਤ੍ਥਿ ਚੇਤਿਯਸ੍ਸ ਉਭਤੋਸਙ੍ਘਗ੍ਗਹਣੇਨ ਅਗਹਿਤਤ੍ਤਾ.
ਤਤ੍ਥਾਤਿ ਉਭਤੋਸਙ੍ਘਪੁਗ੍ਗਲਚੇਤਿਯੇਸੁ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਪੁਬ੍ਬੇਤਿ ਬੁਦ੍ਧਸ੍ਸ ਭਗਵਤੋ ਧਰਮਾਨਕਾਲੇ. ਤਦਾਤਿ ਯਦਾ ਬੁਦ੍ਧੋ ਭਗਵਾ ਧਰਤਿ, ਤਦਾ. ਪਟਿਮਂ ਵਾਤਿ ਪਟਿਬਿਮ੍ਬਂ ਵਾ. ਤਞ੍ਹਿ ਭਗਵਤਾ ਪਟਿ ਸਦਿਸਂ ਮਾਨੀਯਤੀਤਿ ਪਟਿਮਾਤਿ ਵੁਚ੍ਚਤਿ. ਚੇਤਿਯਂ ਵਾਤਿ ਥੂਪਂ ਵਾ. ਸੋ ਹਿ ਦੇਵਮਨੁਸ੍ਸੇਹਿ ਚਿਤਿਤਬ੍ਬਂ, ਪੂਜੇਤਬ੍ਬਂ, ਇਟ੍ਠਕਾਦੀਹਿ ਵਾ ਚਿਨਿਤਬ੍ਬਨ੍ਤਿ ਚੇਤਿਯਨ੍ਤਿ ਵੁਚ੍ਚਤਿ. ਤਤ੍ਥਾਤਿ ਦੇਯ੍ਯਧਮ੍ਮੇਸੁ. ਯਨ੍ਤਿ ਕਿਰਿਯਾਪਰਾਮਸਨਂ. ਯਂ ਦੇਨ੍ਤੀਤਿ ਯੋਜਨਾ. ਤਤ੍ਥਾਤਿ ਤਸ੍ਮਿਂ ਦਾਨੇ. ਅਨਿਯਮਵਾਚਕਸ੍ਸ ‘‘ਯੋ’’ਤਿ ਸਬ੍ਬਨਾਮਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਬ੍ਬਜਿਤੋ ਵਾ ਗਹਟ੍ਠੋ ਵਾ’’ਤਿ. ਵਤ੍ਤਂ ਕਤ੍ਵਾ ਪਰਿਭੁਞ੍ਜਿਤੁਨ੍ਤਿ ਪੁਬ੍ਬਕਾਲਅਪਰਕਾਲਕਿਰਿਯਾਨਂ ਵਿਕਾਰਵਸੇਨ ਅਨਿਯਤਤ੍ਤਾ ਵੁਤ੍ਤਂ ‘‘ਭੁਞ੍ਜਿਤ੍ਵਾ ਪਚ੍ਛਾਪਿ ਵਤ੍ਤਂ ਕਾਤੁ’’ਨ੍ਤਿ.
‘‘ਦੂਰਮ੍ਪਿ ਹਰਿਤ੍ਵਾ ਪੂਜੇਤਬ੍ਬ’’ਨ੍ਤਿ ਇਮਿਨਾ ਜਙ੍ਘਪੇਸਨਿਕਕਮ੍ਮਂ ਨ ਹੋਤੀਤਿ ਦਸ੍ਸੇਤਿ. ਹਰਨ੍ਤਸ੍ਸ ਭਿਕ੍ਖੁਨੋਤਿ ਸਮ੍ਬਨ੍ਧੋ. ਗਚ੍ਛਤੋਤਿ ਅਨਾਦਰੇ ਸਾਮਿਵਚਨਂ. ਤਨ੍ਤਿ ਸਙ੍ਘਸ੍ਸ ਆਹਟਭਤ੍ਤਂ.
ਵਸ੍ਸਂਵੁਤ੍ਥਸਙ੍ਘਸ੍ਸਾਤਿ ਵਸ੍ਸਂ ਵਸਿਤ੍ਥਾਤਿ ਵਸ੍ਸਂਵੁਤ੍ਥੋ. ਅਲੁਤ੍ਤਕਿਤਨ੍ਤਸਮਾਸੋਯਂ, ਸੋਯੇਵ ਸਙ੍ਘੋ ਵਸ੍ਸਂਵੁਤ੍ਥਸਙ੍ਘੋ, ਤਸ੍ਸ. ਯਾਵਤਿਕਸਦ੍ਦੋ ਯਤ੍ਤਕਪਰਿਯਾਯੋਤਿ ਆਹ ‘‘ਯਤ੍ਤਕਾ’’ਤਿ. ਦਿਸਾਪਕ੍ਕਨ੍ਤਸ੍ਸਾਪੀਤਿ ਅਞ੍ਞਂ ਦਿਸਂ ਪਕ੍ਕਨ੍ਤਸ੍ਸਪਿ, ਦਾਤਬ੍ਬਨ੍ਤਿ ਸਮ੍ਬਨ੍ਧੋ. ਵਦਨ੍ਤੀਤਿ ਅਟ੍ਠਕਥਾਚਰਿਯੇਹਿ ਅਪਰੇ ਆਚਰਿਯਾ ਵਦਨ੍ਤਿ. ਏਤਨ੍ਤਿ ਵਚਨਂ.
ਸਮ੍ਪਤ੍ਤਾਨਨ੍ਤਿ ਦਿਨ੍ਨਟ੍ਠਾਨਂ ਸਮ੍ਪਤ੍ਤਾਨਂ. ਸਬ੍ਬੇਸਨ੍ਤਿ ਯਤ੍ਥ ਕਤ੍ਥਚਿ ਵੁਤ੍ਥਵਸ੍ਸਾਨਂ ਸਬ੍ਬੇਸਂ. ਤਤ੍ਰਾਤਿ ਵਿਹਾਰੇ. ਤਤ੍ਰਾਤਿ ਤਸ੍ਮਿਂ ਵਦਨੇ ਸਤਿ, ਤੇਸੁ ਭਿਕ੍ਖੂਸੁ ਵਾ. ਵਸ੍ਸਂ ਵਸਨ੍ਤੀਤਿ ਵਸ੍ਸਂਵਸਨ੍ਤਾ, ਤੇਸਂ. ਚੀਵਰਮਾਸੇਤਿ ਚੀਵਰੇਨ ਲਕ੍ਖਿਤੇ ਪਚ੍ਛਿਮਕਤ੍ਤਿਕਮਾਸੇ.
ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋਤਿ ਫਗ੍ਗੁਣਪੁਣ੍ਣਮੀਸਙ੍ਖਾਤੋ ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋ. ਵਸ੍ਸਾਵਾਸਿਕਨ੍ਤਿ ਵਸ੍ਸਂ ਆਵਸਨ੍ਤਾਨਂ ਦਾਤਬ੍ਬਂ ਚੀਵਰਂ. ਆਰੋਪੇਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਅਤੀਤਵਸ੍ਸਾਵਾਸਸ੍ਸਾ’’ਤਿਆਦਿ. ਤਤ੍ਥ ਅਤੀਤਵਸ੍ਸਾਵਾਸਸ੍ਸਾਤਿ ਅਤੀਤਵਸ੍ਸਂ, ਅਤੀਤਵਸ੍ਸੇ ਵਾ ਆਵਾਸਸ੍ਸ ਸਙ੍ਘਸ੍ਸ. ਤਨ੍ਤਿ ਚੀਵਰਂ.
ਠਪੇਤ੍ਵਾਤਿ ਵਿਹਾਰੇ ਠਪੇਤ੍ਵਾ. ਸਮ੍ਪਤ੍ਤਾਨਨ੍ਤਿ ਇਮਂ ਠਾਨਂ ਸਮ੍ਪਤ੍ਤਾਨਂ. ਇਤੋਤਿ ਚੀਵਰਦਾਨਕਾਲਤੋ. ਤੇਤਿ ਅਨ੍ਤੋਵਸ੍ਸੇ ਵੁਤ੍ਥਭਿਕ੍ਖੂ.
ਆਦਿਸ੍ਸਾਤਿ ਪਦਸ੍ਸ ਤ੍ਵਾਪਚ੍ਚਯਨ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਆਦਿਸਿਤ੍ਵਾ’’ਤਿ. ਅਯਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਤਤ੍ਰਾਤਿ ‘‘ਯਾਗੁਯਾ ਵਾ’’ਤਿਆਦਿਪਾਠੇ. ਅਜ੍ਜਤਨਾਯ ਵਾਤਿ ਅਜ੍ਜ ਭਵਾਨਂ ਪੁਞ੍ਞਾਨਂ ਅਤ੍ਥਾਯ ਵਾ. ਤੇਸਨ੍ਤਿ ਨਿਮਨ੍ਤਕਾਨਂ, ਪਵਿਟ੍ਠਾਨਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਯੇਹਿ ਨਿਮਨ੍ਤਿਤੇਹੀਤਿ ਨਿਮਨ੍ਤਿਤੇਹਿ ਯੇਹਿ ਭਿਕ੍ਖੂਹਿ. ਯੇਸਂ ਵਾ ਪਤ੍ਤਨ੍ਤਿ ਸਮ੍ਬਨ੍ਧੋ. ਤੇਸਂ ਨ ਪਾਪੁਣਾਤੀਤਿ ਸਬ੍ਬੇਸਂ ਤੇਸਂ ਨ ਪਾਪੁਣਾਤਿ, ਕਸ੍ਮਾ? ਅਨਿਮਨ੍ਤਿਤਤ੍ਤਾ. ਤੇਸਂ ਨ ਪਾਪੁਣਨ੍ਤਿ, ਕਸ੍ਮਾ? ਨਿਮਨ੍ਤਿਤਗੇਹਂ ਅਪਵਿਟ੍ਠਤ੍ਤਾ. ਸੋਤਿ ਦਾਯਕੋ.
ਪੁਬ੍ਬੇਪੀਤਿ ਇਤੋ ਪੁਬ੍ਬੇਪਿ. ਅਸ੍ਸਾਤਿ ਦਾਯਕਸ੍ਸ. ਵਾਸੇਤ੍ਵਾਤਿ ਵਾਸਾਪੇਤ੍ਵਾ. ਸੋਤਿ ਦਾਯਕੋ. ਯੋਤਿ ਭਿਕ੍ਖੁ, ਵਸਤੀਤਿ ਸਮ੍ਬਨ੍ਧੋ. ਤਾਨੀਤਿ ਭੇਸਜ੍ਜਾਨਿ. ਇਦਨ੍ਤਿ ਚੀਵਰਂ.
‘‘ਅਨ੍ਤੇਵਾਸਿਕਾਨਞ੍ਚਾ’’ਤਿ ਪਦੇਨ ਸਦ੍ਧਿਵਿਹਾਰਿਕਾਪਿ ਗਹੇਤਬ੍ਬਾ ਉਦ੍ਦੇਸਾਦਿਵਸੇਨ ਅਨ੍ਤੇ ਵਸਨਸੀਲਤ੍ਤਾ. ਉਦ੍ਦੇਸਂ ਗਹੇਤੁਂ ਆਗਤੋ ਚ ਗਹੇਤ੍ਵਾ ਗਚ੍ਛਨ੍ਤੋ ਚਾਤਿ ਇਮੇ ਅਨ੍ਤੇ ਅਵਸਨਸੀਲਾਪਿ ਰੂਲ਼੍ਹੀਵਸੇਨ ਅਨ੍ਤੇਵਾਸਿਕਾ ਨਾਮ. ਇਮਿਨਾ ਨਿਸ੍ਸਯਂ ਗਹੇਤੁਂ ਆਗਤੋ ਚ ਥੇਰਸ੍ਸ ਸਨ੍ਤਿਕੇ ਨਿਸ੍ਸਯਂ ਗਹਿਤਪੁਬ੍ਬੋ ਚ ਅਨ੍ਤੇਵਾਸਿਕੋ ਨਾਮਾਤਿ ਦਸ੍ਸੇਤਿ. ਵਤ੍ਤਂ ਕਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਗਹੇਤ੍ਵਾ ਵਿਚਰਨ੍ਤਾਨਂ ਸਬ੍ਬੇਸਂ ਉਦ੍ਦੇਸਨ੍ਤੇਵਾਸਿਕਾਨਂ ਪਾਪੁਣਾਤੀਤਿ ਯੋਜਨਾ. ਇਮਿਨਾ ਸਦ੍ਧਿਵਿਹਾਰਿਕਨਿਸ੍ਸਯਨ੍ਤੇਵਾਸਿਕਉਪਸਮ੍ਪਦਨ੍ਤੇਵਾਸਿਕਪਬ੍ਬਜ੍ਜਨ੍ਤੇਵਾਸਿਕਾਪਿ ਗਹੇਤਬ੍ਬਾ ਤੇਸਮ੍ਪਿ ਨਿਬਦ੍ਧਚਾਰਿਕਭਿਕ੍ਖੁਭਾਵਤੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਚੀਵਰਕ੍ਖਨ੍ਧਕੇ.
ਇਤਿ ਚੀਵਰਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.