੯. ਚਮ੍ਪੇਯ੍ਯਕ੍ਖਨ੍ਧਕਂ

੨੩੪. ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁਕਥਾ

੩੮੦. ਚਮ੍ਪੇਯ੍ਯਕ੍ਖਨ੍ਧਕੇ ਗਗ੍ਗਰਾਯ ਪੋਕ੍ਖਰਣਿਯਾਤਿ ਏਤ੍ਥ ਗਗ੍ਗਰਸਦ੍ਦਸ੍ਸ ਨਾਮਸਦ੍ਦਭਾਵਂ ਦਸ੍ਸੇਨ੍ਤੋ ਆਹ ‘‘ਗਗ੍ਗਰਨਾਮਿਕਾਯ ਇਤ੍ਥਿਯਾ’’ਤਿ. ਇਮਿਨਾ ਗਗ੍ਗਰਸਦ੍ਦੋ ਗਗ੍ਗਰਇਤਿ ਨਾਮਂ ਪਵਤ੍ਤਿਨਿਮਿਤ੍ਤਂ ਕਤ੍ਵਾ ਇਤ੍ਥਿਦਬ੍ਬਂ ਵਦਤੀਤਿ ਦਸ੍ਸੇਤਿ. ਤਨ੍ਤਿਪਟਿਬਦ੍ਧੋਤਿ ਤਨ੍ਤਿਯਾ ਪਟਿਬਦ੍ਧੋ. ‘‘ਉਸ੍ਸੁਕ੍ਕਮ੍ਪਿ ਅਕਾਸਿ ਯਾਗੁਯਾ’’ਤਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਤਸ੍ਸ ਭਿਕ੍ਖੁਨੋਤਿ ਕਸ੍ਸਪਗੋਤ੍ਤਨਾਮਕਸ੍ਸ ਤਸ੍ਸ ਭਿਕ੍ਖੁਨੋ. ਤਤ੍ਥੇਵਾਤਿ ਵਾਸਭਗਾਮੇਯੇਵ.

੩੮੨. ਅਧਮ੍ਮੇਨ ਵਗ੍ਗਕਮ੍ਮਂ ਕਰੋਨ੍ਤੀਤਿਆਦੀਨਂ ਨਾਨਾਕਰਣਨ੍ਤਿ ਸਮ੍ਬਨ੍ਧੋ.

੨੩੬. ਞਤ੍ਤਿਵਿਪਨ੍ਨਕਮ੍ਮਾਦਿਕਥਾ

੩੮੫. ਅਞ੍ਞਤ੍ਰਾਪਿ ਧਮ੍ਮਾਤਿ ਏਤ੍ਥ ਧਮ੍ਮਾਤਿ ਉਪਯੋਗਤ੍ਥੇ ਨਿਸ੍ਸਕ੍ਕਵਚਨਮੇਤਨ੍ਤਿ ਆਹ ‘‘ਅਞ੍ਞਤ੍ਰ ਧਮ੍ਮ’’ਨ੍ਤਿ. ‘‘ਅਞ੍ਞਤ੍ਰਾ’’ਤਿ ਨਿਪਾਤਪਯੋਗੇ ਦੁਤਿਯਾਤਤਿਯਾਪਞ੍ਚਮੀਸੁ ਅਞ੍ਞਤਰਸ੍ਸ ਸਮ੍ਭਵਤੋ ਉਪਯੋਗਵਚਨਮ੍ਪਿ ਹੋਤਿ. ਤਸ੍ਮਾ ਵੁਤ੍ਤਂ ‘‘ਅਯਮੇਵ ਵਾ ਪਾਠੋ’’ਤਿ. ‘‘ਭੂਤੇਨ ਵਤ੍ਥੁਨਾ’’ਤਿ ਇਮਿਨਾ ਧਮ੍ਮਸਦ੍ਦਸ੍ਸ ਸਚ੍ਚਤ੍ਥਂ ਦਸ੍ਸੇਤਿ. ‘‘ਏਸੇਵ ਨਯੋ’’ਤਿ ਇਮਿਨਾ ਸਦ੍ਦਸਭਾਵਮੇਵ ਸਨ੍ਧਾਯ ਅਤਿਦਿਸਤਿ, ਨ ਅਤ੍ਥਂ. ਤੇਨ ਵੁਤ੍ਤਂ ‘‘ਏਤ੍ਥ ਪਨਾ’’ਤਿਆਦਿ. ਸਤ੍ਥੁਸਾਸਨਨ੍ਤਿ ਸਤ੍ਥੁ ਆਣਾ. ਸਤ੍ਥੁਆਣਾ ਨਾਮ ਞਤ੍ਤਿਅਨੁਸਾਵਨਾਨਂ ਸਮ੍ਪਦਾਤਿ ਆਹ ‘‘ਞਤ੍ਤਿਸਮ੍ਪਦਾ ਅਨੁਸਾਵਨਸਮ੍ਪਦਾ ਚਾ’’ਤਿ. ‘‘ਪਟਿਕੁਟ੍ਠਞ੍ਚੇਵ ਕਤਞ੍ਚਾ’’ਤਿ ਇਮਿਨਾ ਪਟਿਕੁਟ੍ਠਕਤਨ੍ਤਿ ਪਦਸ੍ਸ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ. ਪਟਿਕੁਸਿਤਬ੍ਬਨ੍ਤਿ ਪਟਿਕੁਟ੍ਠਂ, ਕਤ੍ਤਬ੍ਬਨ੍ਤਿ ਕਤਂ, ਕਮ੍ਮਂ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਂ ਅਞ੍ਞੇਸੂ’’ਤਿਆਦਿ. ਤਤ੍ਥ ਯਨ੍ਤਿ ਕਮ੍ਮਂ.

੩੮੭. ਪਾਲ਼ਿਯਾਤਿ ਵਿਨਯਪਾਲ਼ਿਯਾ. ਯਨ੍ਤਿ ਕਮ੍ਮਂ, ਨ ਕਰਿਯਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਅਟ੍ਠਕਥਾਯਂ. ਸੋ ਚ ਖੋਤਿ ਸੋ ਚ ਵਿਤ੍ਥਾਰੋ, ਆਗਤੋਤਿ ਸਮ੍ਬਨ੍ਧੋ. ਕਸ੍ਮਾ ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮਾਨਮੇਵ ਵਸੇਨ ਆਗਤੋ, ਨਨੁ ਞਤ੍ਤਿਅਪਲੋਕਨਕਮ੍ਮਵਸੇਨਪਿ ਆਗਤੇਨ ਭਵਿਤਬ੍ਬਨ੍ਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਞਤ੍ਤਿਦੁਤਿਯਞਤ੍ਤਿਚਤੁਤ੍ਥੇਸੁ ਹਾਪਨਂ ਵਾ ਅਞ੍ਞਥਾ ਕਰਣਂ ਵਾ ਅਤ੍ਥਿ ਵਿਯ ਞਤ੍ਤਿਕਮ੍ਮੇ ਨਤ੍ਥੀਤਿ ਯੋਜਨਾ. ਞਤ੍ਤਿਕਮ੍ਮੇ ਞਤ੍ਤਿਟ੍ਠਪਨਤੋ ਅਞ੍ਞਕਿਚ੍ਚਸ੍ਸ ਅਸਮ੍ਭਵਤੋ ਹਾਪਨਂ ਵਾ ਅਞ੍ਞਥਾ ਕਰਣਂ ਵਾ ਨਤ੍ਥੀਤਿ ਅਧਿਪ੍ਪਾਯੋ. ਤਾਨੀਤਿ ਞਤ੍ਤਿਕਮ੍ਮਅਪਲੋਕਨਕਮ੍ਮਾਨਿ. ਸਬ੍ਬੇਸਮ੍ਪਿ ਕਮ੍ਮਾਨਨ੍ਤਿ ਸਬ੍ਬੇਸਮ੍ਪਿ ਚਤੁਨ੍ਨਂ ਕਮ੍ਮਾਨਂ. ਪਰਤੋਤਿ ਪਰਸ੍ਮਿਂ ਪਰਿਵਾਰਾਵਸਾਨੇ (ਪਰਿ. ਅਟ੍ਠ. ੪੮੨).

੨੩੭. ਚਤੁਵਗ੍ਗਕਰਣਾਦਿਕਥਾ

੩੮੮. ਯਦਿਦਂ ਕਮ੍ਮਨ੍ਤਿ ਯੋਜਨਾ. ਤੇਸਨ੍ਤਿ ਸਙ੍ਘਾਨਂ. ਕਮ੍ਮਪ੍ਪਤ੍ਤੋਤਿ ਏਤ੍ਥ ਕਮ੍ਮੇਨ, ਕਮ੍ਮਸ੍ਸ ਵਾ ਪਤ੍ਤੋਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਕਮ੍ਮਂ ਪਤ੍ਤੋ’’ਤਿ. ‘‘ਸਬ੍ਬਕਮ੍ਮੇਸੁ ਕਮ੍ਮਪਤ੍ਤੋ’’ਤਿ ਪਾਲ਼ਿਨਯੇਨ ‘‘ਕਮ੍ਮੇਸੁ ਪਤ੍ਤੋ’’ਤਿ ਅਤ੍ਥੋਪਿ ਯੁਜ੍ਜਤਿ. ਲੋਕਵੋਹਾਰਵਸੇਨ ‘‘ਕਮ੍ਮੇਨ ਕਮ੍ਮਸ੍ਸ ਵਾ ਪਤ੍ਤੋ’’ਤਿ ਅਤ੍ਥੋਪਿ ਯੁਜ੍ਜਤੇਵ.

੩੮੯. ਪਰਿਸਤੋਤਿ ਪਰਿਸਕਾਰਣਾ. ਤਤ੍ਥਾਤਿ ‘‘ਚਤੁਵਗ੍ਗਕਰਣਞ੍ਚੇ ਭਿਕ੍ਖਵੇ’’ਤਿਆਦਿਪਾਠੇ, ਚਤੁਵੀਸਤਿਪੁਗ੍ਗਲੇਸੁ ਵਾ. ਕਮ੍ਮਨਾਨਾਸਂਵਾਸਕੋਤਿ ਉਕ੍ਖੇਪਨੀਯਕਮ੍ਮਕਤੋ. ਲਦ੍ਧਿਨਾਨਾਸਂਵਾਸਕੋਤਿ ਉਕ੍ਖਿਤ੍ਤਾਨੁਵਤ੍ਤਕੋ. ‘‘ਹੁਤ੍ਵਾ’’ਤਿ ਇਮਿਨਾ ‘‘ਭਿਕ੍ਖੁਨੀਚਤੁਤ੍ਥੋ’’ਤਿਆਦੀਸੁ ਚਤੁਵੀਸਤਿਯਾ ਠਾਨੇਸੁ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ. ਭਿਕ੍ਖੁਨੀ ਚਤੁਤ੍ਥੀ ਏਤਸ੍ਸਾਤਿ ਭਿਕ੍ਖੁਨੀਚਤੁਤ੍ਥੋ, ਚਤੁਵਗ੍ਗੋ ਸਙ੍ਘੋਤਿਆਦਿਨਾ ਵਚਨਤ੍ਥੋ ਕਾਤਬ੍ਬੋ.

੩੯੩. ਪਰਿਵਾਸਾਦੀਤਿਆਦਿਸਦ੍ਦੇਨ ਮੂਲਾਯਕਸ੍ਸਨਮਾਨਤ੍ਤਅਬ੍ਭਾਨਾਨਿ ਸਙ੍ਗਣ੍ਹਾਤਿ. ਤੇਸਨ੍ਤਿ ਪਰਿਵਾਸਾਦਿਕਮ੍ਮਾਨਂ. ਪਰਤੋਤਿ ਪਰਸ੍ਮਿਂ ਚੂਲ਼ਵਗ੍ਗੇ (ਚੂਲ਼ਵ. ਅਟ੍ਠ. ੭੫ ਆਦਯੋ).

੩੯੪. ਪਟਿਕੁਟ੍ਠਕਤਕਮ੍ਮਸ੍ਸਾਤਿ ਪਟਿਕੁਟ੍ਠਸ੍ਸ ਹੁਤ੍ਵਾ ਕਤਸ੍ਸ ਕਮ੍ਮਸ੍ਸ. ਪਕਤਤ੍ਤਸ੍ਸਾਤਿ ਏਤ੍ਥ ਪਕਤਿਸੀਲਸਙ੍ਖਾਤੋ ਅਤ੍ਤਾ ਸਭਾਵੋ ਏਤਸ੍ਸਾਤਿ ਪਕਤਤ੍ਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਵਿਪਨ੍ਨਸੀਲਸ੍ਸਾ’’ਤਿ. ਸਙ੍ਘਾਦਿਸੇਸਂ ਅਨਾਪਜ੍ਜਨ੍ਤਸ੍ਸਾਪਿ ਅਵਿਪਨ੍ਨਸੀਲਤ੍ਤਾ ਵੁਤ੍ਤਂ ‘‘ਪਾਰਾਜਿਕਂ ਅਨਜ੍ਝਾਪਨ੍ਨਸ੍ਸਾ’’ਤਿ. ਇਮਿਨਾ ਸਙ੍ਘਾਦਿਸੇਸਂ ਆਪਜ੍ਜਨ੍ਤੋਪਿ ਪਕਤਤ੍ਤੋਯੇਵਾਤਿ ਦਸ੍ਸੇਤਿ. ਸੋਪਿ ਹਿ ਇਧ ਅਵਿਪਨ੍ਨਸੀਲੋ ਨਾਮ, ਅਞ੍ਞਤ੍ਥ ਪਨ ਸਙ੍ਘਾਦਿਸੇਸਸ੍ਸ ਸੀਲਵਿਪਤ੍ਤਿਭਾਵਤੋ ਤਂ ਆਪਜ੍ਜਨ੍ਤੋਪਿ ਵਿਪਨ੍ਨਸੀਲੋਯੇਵ ਨਾਮ. ਆਨਨ੍ਤਰਿਕਸ੍ਸਾਤਿ ਏਤ੍ਥ ਅਨਨ੍ਤਰਸਦ੍ਦਸ੍ਸ ਸਮ੍ਬਨ੍ਧਞ੍ਚ ਣਿਕਪਚ੍ਚਯਸ੍ਸ ਅਤ੍ਥਞ੍ਚ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਅਨਨ੍ਤਰਂ ਨਿਸਿਨ੍ਨਸ੍ਸਾ’’ਤਿ. ਤਤ੍ਥ ‘‘ਅਤ੍ਤਨੋ’’ਤਿ ਇਮਿਨਾ ਅਨਨ੍ਤਰਸਦ੍ਦਸ੍ਸ ਸਮ੍ਬਨ੍ਧਂ ਦਸ੍ਸੇਤਿ. ‘‘ਨਿਸਿਨ੍ਨਸ੍ਸਾ’’ਤਿ ਇਮਿਨਾ ਣਿਕਪਚ੍ਚਯਸ੍ਸ ਅਤ੍ਥਂ ਦਸ੍ਸੇਤਿ.

੨੩੯. ਦ੍ਵੇਨਿਸ੍ਸਾਰਣਾਦਿਕਥਾ

੩੯੫. ਵਤ੍ਥੁਤੋਤਿ ਵਤ੍ਥੁਕਾਰਣਾ. ਤਤ੍ਥਾਤਿ ‘‘ਦ੍ਵੇਮਾ ਭਿਕ੍ਖਵੇ’’ਤਿਆਦਿਪਾਠੇ. ‘‘ਸਨ੍ਧਾਯ ਵੁਤ੍ਤ’’ਨ੍ਤਿ ਇਮਿਨਾ ‘‘ਅਪ੍ਪਤ੍ਤੋ’’ਤਿਆਦਿਸੁਤ੍ਤਸ੍ਸ ਨੇਯ੍ਯਤ੍ਥਭਾਵਂ ਦਸ੍ਸੇਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਨ੍ਤਿ ਪਬ੍ਬਾਜਨੀਯਕਮ੍ਮਂ. ਪੁਨ ਤਨ੍ਤਿ ਪਬ੍ਬਾਜਨੀਯਕਮ੍ਮਮੇਵ. ਏਸ ਭਿਕ੍ਖੁ ਅਪ੍ਪਤ੍ਤੋਤਿ ਸਮ੍ਬਨ੍ਧੋ. ਕਸ੍ਮਾ ਅਪ੍ਪਤ੍ਤੋਤਿ ਆਹ ‘‘ਯਸ੍ਮਾ’’ਤਿਆਦਿ. ਆਵੇਣਿਕਲਕ੍ਖਣੇਨਾਤਿ ਅਵਿਨਾ ਹੁਤ੍ਵਾ ਪਵਤ੍ਤੇਨ ਲਕ੍ਖਣੇਨ. ਅਤ੍ਤਨਾ ਅਵਿਨਾ ਹੁਤ੍ਵਾ ਅਤ੍ਤਨੋ ਸਨ੍ਤਕੇਨ ਵਿਸੁਂ ਭੂਤੇਨ ਲਕ੍ਖਣੇਨਾਤਿ ਵੁਤ੍ਤਂ ਹੋਤਿ. ਯਦਿ ਅਪ੍ਪਤ੍ਤੋ, ਕਸ੍ਮਾ ਸੁਨਿਸ੍ਸਾਰਿਤੋਤਿ ਆਹ ‘‘ਯਸ੍ਮਾ ਪਨਸ੍ਸਾ’’ਤਿਆਦਿ. ਅਸ੍ਸਾਤਿ ਭਿਕ੍ਖੁਸ੍ਸ, ਕਰੇਯ੍ਯਾਤਿ ਸਮ੍ਬਨ੍ਧੋ. ਤਂ ਚੇ ਸਙ੍ਘੋ ਤਜ੍ਜਨੀਯਕਮ੍ਮਾਦਿਵਸੇਨ ਨਿਸ੍ਸਾਰੇਤਿ, ਸੁਨਿਸ੍ਸਾਰਿਤੋਤਿ ਸਮ੍ਬਨ੍ਧੋ. ਸੋਤਿ ਭਿਕ੍ਖੁ. ਯਸ੍ਮਾ ਅਨੁਞ੍ਞਾਤਾ, ਤਸ੍ਮਾ ਸੁਨਿਸ੍ਸਾਰਿਤੋਤਿ ਯੋਜਨਾ. ਕਿਤ੍ਤਕੇਨ ਅਙ੍ਗੇਨ ਅਨੁਞ੍ਞਾਤਾਤਿ ਆਹ ‘‘ਏਕੇਨਪਿ ਅਙ੍ਗੇਨਾ’’ਤਿ.

੩੯੬. ਓਸਾਰਣਾਤਿ ਏਤ੍ਥ ਓਤ੍ਯੂਪਸਗ੍ਗਵਸੇਨ ਸਰਧਾਤੁ ਪਵੇਸਨਤ੍ਥੋਤਿ ਆਹ ‘‘ਪਵੇਸਨਾ’’ਤਿ. ਤਤ੍ਥਾਤਿ ‘‘ਓਸਾਰਣਾ’’ਤਿਆਦਿਪਾਠੇ. ਓਸਾਰੇਤੀਤਿ ਏਤ੍ਥ ਅਬ੍ਭਾਨਾਦਿਵਸੇਨ ਪਵੇਸਨਂ ਪਟਿਕ੍ਖਿਪਨ੍ਤੋ ਆਹ ‘‘ਉਪਸਮ੍ਪਦਕਮ੍ਮਵਸੇਨਾ’’ਤਿ. ਸਹਸ੍ਸਕ੍ਖਤ੍ਤੁਮ੍ਪੀਤਿ ਪਿਸਦ੍ਦੋ ਗਰਹਤ੍ਥੋ. ਏਕਵਾਰਾਦਿਕੇ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਸਾਤਿਸਾਰਾਤਿ ਸਦੋਸਾ. ਤਥਾਤਿ ਯਥਾ ਆਚਰਿਯੁਪਜ੍ਝਾਯਾ ਸਾਤਿਸਾਰਾ, ਤਥਾ. ਸੇਸੋ ਕਾਰਕਸਙ੍ਘੋ ਸਾਤਿਸਾਰੋਤਿ ਸਮ੍ਬਨ੍ਧੋ. ‘‘ਹਤ੍ਥਚ੍ਛਿਨ੍ਨਾਦਯੋ ਪਨ ਦ੍ਵਤ੍ਤਿਂਸ ਸੁਓਸਾਰਿਤਾ’’ਤਿ ਵੁਤ੍ਤਤ੍ਤਾ ਅਨ੍ਧਮੂਗਬਧਿਰਾਨਂ ਅਪਬ੍ਬਜਿਤਾਨਮ੍ਪਿ ਉਪਸਮ੍ਪਦਾ ਰੁਹਤੀਤਿ ਦਟ੍ਠਬ੍ਬਂ. ਤੇਤਿ ਹਤ੍ਥਚ੍ਛਿਨ੍ਨਾਦਯੋ ਦ੍ਵਤ੍ਤਿਂਸ.

੩੯੭. ਅਭੂਤਵਤ੍ਥੁਵਸੇਨਾਤਿ ਅਸਚ੍ਚਵਤ੍ਥੁਵਸੇਨ, ਅਸਂਵਿਜ੍ਜਮਾਨਵਤ੍ਥੁਵਸੇਨ ਵਾ. ਤਤ੍ਥਾਤਿ ‘‘ਇਧ ਪਨ ਭਿਕ੍ਖਵੇ’’ਤਿਆਦਿਪਾਠੇ. ਪਟਿਨਿਸ੍ਸਜ੍ਜਿਤਾਤਿ ਏਤ੍ਥ ਤਪਚ੍ਚਯਸ੍ਸ ਕਮ੍ਮਤ੍ਥੇ ਪਵਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਪਟਿਨਿਸ੍ਸਜ੍ਜਿਤਬ੍ਬਾ’’ਤਿ.

੨੪੧. ਉਪਾਲਿਪੁਚ੍ਛਾਕਥਾ

੪੦੦. ਤਤ੍ਥਾਤਿ ਉਪਾਲਿਪਞ੍ਹੇਸੁ. ਤਸ੍ਸਪਾਪਿਯਸਿਕਾਦੀਹਿ ਸਦ੍ਧਿਂ ਏਕਾ ਪੁਚ੍ਛਾ ਕਤਾਤਿ ਯੋਜਨਾ. ਭਿਕ੍ਖੂਨਮ੍ਪਿ ਵਾਰੇਤਿ ਸਮ੍ਬਨ੍ਧੋ. ਪਿਸਦ੍ਦੇਨ ‘‘ਨ ਕੇਵਲਂ ਉਪਾਲਿਪਞ੍ਹੇਸੁਯੇਵ ਯੋਜੇਤਬ੍ਬਾਨਿ, ਅਥ ਖੋ ਭਿਕ੍ਖੂਨਂ ਵਾਰੇਪੀ’’ਤਿ ਦਸ੍ਸੇਤਿ.

੨੪੨. ਤਜ੍ਜਨੀਯਕਮ੍ਮਕਥਾ

੪੦੭. ‘‘ਇਧ ਪਨ ਭਿਕ੍ਖਵੇ ਭਿਕ੍ਖੁ ਭਣ੍ਡਨਕਾਰਕੋ’’ਤਿਆਦਿ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਇਧ ਪਨ ਭਿਕ੍ਖਵੇ’’ਤਿਆਦਿਪਾਠੇ. ਅਨਪਦਾਨੋਤਿ ਏਤ੍ਥ ਅਪਪੁਬ੍ਬੋ ਦਾਸਦ੍ਦੋ ਅਵਖਣ੍ਡਨਤ੍ਥੋਤਿ ਆਹ ‘‘ਅਪਦਾਨਂ ਵੁਚ੍ਚਤਿ ਪਰਿਚ੍ਛੇਦੋ’’ਤਿ. ਨਤ੍ਥਿ ਅਪਦਾਨਂ ਅਵਖਣ੍ਡਨਂ ਆਪਤ੍ਤਿਪਰਿਯਨ੍ਤੋ ਏਤਸ੍ਸਾਤਿ ਅਨਪਦਾਨੋਤਿ ਵਚਨਤ੍ਥੋ ਕਾਤਬ੍ਬੋ. ਸਾਯੇਵ ਪਾਲ਼ਿ ਵੁਤ੍ਤਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਤਸ੍ਸਂ ਪਾਲ਼ਿਯਂ. ਕਿਞ੍ਚਿ ਅਤ੍ਥਵਿਨਿਚ੍ਛਯਂ ਪਾਲ਼ਿਅਨੁਸਾਰੇਨ ਵਿਦਿਤੁਂ ਨ ਸਕ੍ਕਾ ਨ ਹੋਤੀਤਿ ਯੋਜਨਾ.

ਇਤਿ ਚਮ੍ਪੇਯ੍ਯਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.