੧੦. ਕੋਸਮ੍ਬਕਕ੍ਖਨ੍ਧਕਂ

੨੭੧. ਕੋਸਮ੍ਬਕਵਿਵਾਦਕਥਾ

੪੫੧. ਕੋਸਮ੍ਬਕਕ੍ਖਨ੍ਧਕੇ ਅਯਮਨੁਪੁਬ੍ਬਿਕਥਾ ਏਵਂ ਵੇਦਿਤਬ੍ਬਾਤਿ ਯੋਜਨਾ. ਵਿਨਯਂ ਪਾਲ਼ਿਤੋ ਚ, ਤਦਤ੍ਥਤੋ ਚ ਧਾਰੇਤੀਤਿ ਵਿਨਯਧਰੋ, ਤਥਾ ਸੁਤ੍ਤਨ੍ਤਂ ਧਾਰੇਤੀਤਿ ਸੁਤ੍ਤਨ੍ਤਿਕੋ. ਤੇਸੂਤਿ ਦ੍ਵੀਸੁ ਭਿਕ੍ਖੂਸੁ. ਸੁਤ੍ਤਨ੍ਤਿਕੋ ਭਿਕ੍ਖੁ ਨਿਕ੍ਖਮੀਤਿ ਸਮ੍ਬਨ੍ਧੋ. ਆਚਮਨਉਦਕਾਵਸੇਸਨ੍ਤਿ ਆਚਮੇਤਿ ਧੋਵਤਿ ਅਨੇਨਾਤਿ ਆਚਮਨਂ, ਤਮੇਵ ਉਦਕਂ ਆਚਮਨਉਦਕਂ, ਤਮੇਵ ਅਵਸੇਸਂ ਆਚਮਨਉਦਕਾਵਸੇਸਂ, ਅਵਸੇਸਆਚਮਨਉਦਕਨ੍ਤਿ ਅਤ੍ਥੋ. ਤਂ ਭਿਕ੍ਖੁਨ੍ਤਿ ਸੁਤ੍ਤਨ੍ਤਿਕਂ ਭਿਕ੍ਖੁਂ. ਏਤ੍ਥਾਤਿ ਆਚਮਨਉਦਕਾਵਸੇਸਟ੍ਠਪਨੇ. ‘‘ਸਚੇ ਹੋਤਿ, ਦੇਸੇਸ੍ਸਾਮੀ’’ਤਿ ਇਮਿਨਾ ਅਤ੍ਤਨੋ ਸੁਬ੍ਬਚਭਾਵਞ੍ਚ ਸਿਕ੍ਖਾਕਾਮਤਞ੍ਚ ਦਸ੍ਸੇਤਿ. ਤੇਤਿ ਤਯਾ, ਕਥਨ੍ਤਿ ਸਮ੍ਬਨ੍ਧੋ. ਅਥ ਵਾ ਤੇਤਿ ਤੁਯ੍ਹਂ, ਨਤ੍ਥੀਤਿ ਸਮ੍ਬਨ੍ਧੋ. ਅਸਞ੍ਚਿਚ੍ਚ ਅਸਤਿਯਾ ਕਤਤ੍ਤਾ ਅਨਾਪਤ੍ਤਿਪਕ੍ਖੋਪਿ ਭਵੇਯ੍ਯਾਤਿ ਆਹ ‘‘ਨਤ੍ਥਿ ਆਪਤ੍ਤੀ’’ਤਿ. ਏਤ੍ਥ ਪਨ ਆਪਤ੍ਤਿਯੇਵ. ਸੋਤਿ ਸੁਤ੍ਤਨ੍ਤਿਕੋ.

ਵਿਨਯਧਰੋਪੀਤਿ ਵਿਨਯਧਰੋ ਪਨ, ਆਰੋਚੇਸੀਤਿ ਸਮ੍ਬਨ੍ਧੋ. ਆਪਜ੍ਜਮਾਨੋਪੀਤਿ ਪਿਸਦ੍ਦੋ ਗਰਹਤ੍ਥੋ. ਤੇਤਿ ਵਿਨਯਧਰਸ੍ਸ ਨਿਸ੍ਸਿਤਕਾ, ਆਹਂਸੂਤਿ ਸਮ੍ਬਨ੍ਧੋ. ਤਸ੍ਸਾਤਿ ਸੁਤ੍ਤਨ੍ਤਿਕਸ੍ਸ. ਤੇਤਿ ਸੁਤ੍ਤਨ੍ਤਿਕਸ੍ਸ ਨਿਸ੍ਸਿਤਕਾ, ਆਰੋਚੇਸੁਨ੍ਤਿ ਸਮ੍ਬਨ੍ਧੋ. ਸੋਤਿ ਸੁਤ੍ਤਨ੍ਤਿਕੋ. ਮੁਸਾਵਾਦੀਤਿ ਅਭੂਤਤੋ, ਅਭੂਤਂ ਵਾ ਵਚਨਂ ਵਦਨਸੀਲੋ. ਏਸੋਤਿ ਵਿਨਯਧਰੋ. ਤੇਤਿ ਸੁਤ੍ਤਨ੍ਤਿਕਸ੍ਸ ਨਿਸ੍ਸਿਤਕਾ, ਆਹਂਸੂਤਿ ਸਮ੍ਬਨ੍ਧੋ. ਤਤੋਤਿ ਕਲਹਵਡ੍ਢਨਕਾਰਣਾ. ਵਿਨਯਧਰੋ ਅਕਾਸੀਤਿ ਸਮ੍ਬਨ੍ਧੋ.

੪੫੩. ‘‘ਨ ਤਾਵ ਭਿਨ੍ਨੋ’’ਤਿ ਇਮਿਨਾ ਭਿਨ੍ਨੋਤਿ ਏਤ੍ਥ ਤਪਚ੍ਚਯਸ੍ਸ ਅਵਸ੍ਸਮ੍ਭਾਵਿਯਤ੍ਥੇ ਅਨਾਗਤਕਾਲਿਕਤਂ ਦਸ੍ਸੇਤਿ. ਤਮੇਵਤ੍ਥਂ ਸਹ ਉਪਮਾਯ ਦਸ੍ਸੇਨ੍ਤੋ ਆਹ ‘‘ਅਪਿਚਾ’’ਤਿਆਦਿ. ਤਨ੍ਤਿ ਸਸ੍ਸਂ. ‘‘ਭਿਜ੍ਜਿਸ੍ਸਤੀ’’ਤਿ ਇਮਿਨਾ ਭਿਜ੍ਜਿਸ੍ਸਤੀਤਿ ਭਿਨ੍ਨੋਤਿ ਵਚਨਤ੍ਥਂ ਦਸ੍ਸੇਤਿ. ਸੋ ਚ ਖੋਤਿ ਸਙ੍ਘੋ. ਕਲਹਵਸੇਨ ਭਿਜ੍ਜਿਸ੍ਸਤੀਤਿ ਸਮ੍ਬਨ੍ਧੋ. ਸਮ੍ਭਮਅਤ੍ਥਵਸੇਨਾਤਿ ਸਂਵੇਗਅਤ੍ਥਵਸੇਨ. ਸਮ੍ਭਮਸਦ੍ਦੋ ਹਿ ਤੀਸੁ ਅਤ੍ਥੇਸੁ ਵਤ੍ਤਤਿ ਗਾਰਵੇ, ਭੀਤਿਯਂ, ਸਂਵੇਗੇ ਚਾਤਿ. ਇਧ ਪਨ ਸਂਵੇਗੇ ਵਤ੍ਤਤਿ. ਭਿਕ੍ਖੁਸਙ੍ਘਸ੍ਸ ਭਿਨ੍ਨੇ ਸਂਵੇਗਅਤ੍ਥਵਸੇਨਾਤਿ ਅਧਿਪ੍ਪਾਯੋ. ਇਦਂ ਹੇਟ੍ਠਾ ਕਥਿਤਾਯ ‘‘ਭਯੇ ਕੋਧੇ ਪਸਂਸਾਯ’’ਨ੍ਤਿ ਗਾਥਾਯ (ਪਾਰਾ. ਅਟ੍ਠ. ੧.੧੫) ਚਸਦ੍ਦੇਨ ਸਮ੍ਪਿਣ੍ਡਿਤਂ ਸਮ੍ਭਮਅਤ੍ਥਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਤ੍ਥਾਤਿ ‘‘ਭਿਨ੍ਨੋ ਭਿਕ੍ਖੁਸਙ੍ਘੋ ਭਿਨ੍ਨੋ ਭਿਕ੍ਖੁਸਙ੍ਘੋ’’ਤਿ ਪਾਠੇ. ਆਮੇਡਿਤਨ੍ਤਿ ਆ ਪੁਨਪ੍ਪੁਨਂ ਭਯਾਦਿਪੀਲ਼ਿਤਤ੍ਤਾ ਮੇਡੇਨ ਉਮ੍ਮਾਦੇਨ ਇਤਂ ਕਥਿਤਂ ਆਮੇਡਿਤਂ.

੪੫੪. ਹੀਤਿ ਵਿਤ੍ਥਾਰੋ. ਭਗਵਾ ਵਦੇਯ੍ਯਾਤਿ ਸਮ੍ਬਨ੍ਧੋ. ਉਕ੍ਖਿਪਨ੍ਤਿ ਅਪਨੇਨ੍ਤੀਤਿ ਉਕ੍ਖੇਪਕਾ. ਉਕ੍ਖਿਤ੍ਤਮਨੁਵਤ੍ਤਨ੍ਤੀਤਿ ਉਕ੍ਖਿਤ੍ਤਾਨੁਵਤ੍ਤਕਾ. ਏਤੇਸਨ੍ਤਿ ਉਕ੍ਖਿਤ੍ਤਾਨੁਵਤ੍ਤਕਾਨਂ. ਪੁਨ ਏਤੇਸਨ੍ਤਿ ਉਕ੍ਖੇਪਕਾਨਂ. ਪਕ੍ਖੋਤਿ ਸਖਾ. ਤਨ੍ਤਿਮੇਵਾਤਿ ਪਾਲ਼ਿਮੇਵ, ਬ੍ਯਾਪਾਰਮੇਵ ਵਾ.

੪੫੫. ਯੋਤਿ ਭਿਕ੍ਖੁ. ਚਿਤ੍ਤਂ ਉਪ੍ਪਾਦੇਤੀਤਿ ਸਮ੍ਬਨ੍ਧੋ. ਤੁਮ੍ਹੇਤਿ ਧਮ੍ਮਵਾਦਿਨੋ ਸਨ੍ਧਾਯ ਵੁਤ੍ਤਂ. ਕਿਂ ਭਣਥਾਤਿ ਕਿਂ ਵਚਨਂ ਭਣਥ. ਇਤਿ ਪੁਚ੍ਛਿਤ੍ਵਾਤਿ ਸਮ੍ਬਨ੍ਧੋ. ਤੇਸਞ੍ਚਾਤਿ ਧਮ੍ਮਵਾਦੀਨਞ੍ਚ. ਇਤਰੇਸਞ੍ਚਾਤਿ ਅਧਮ੍ਮਵਾਦੀਨਞ੍ਚ. ਇਮੇਤਿ ਅਤ੍ਤਨੋ ਪਕ੍ਖੇ ਇਮੇ ਭਿਕ੍ਖੂ. ਤੇਸਨ੍ਤਿ ਅਧਮ੍ਮਵਾਦੀਨਂ. ‘‘ਕਮ੍ਮਂ ਕੋਪੇਤੀ’’ਤਿ ‘‘ਨਾਨਾਸਂਵਾਸਕਚਤੁਤ੍ਥੋ ਚੇ ਭਿਕ੍ਖਵੇ ਕਮ੍ਮਂ ਕਰੇਯ੍ਯ, ਅਕਮ੍ਮਂ, ਨ ਚ ਕਰਣੀਯ’’ਨ੍ਤਿ ਵਚਨਤੋ (ਮਹਾਵ. ੩੮੯) ਕਮ੍ਮਂ ਕੋਪੇਤਿ. ਇਤਰੇਸਮ੍ਪੀਤਿ ਧਮ੍ਮਵਾਦੀਨਮ੍ਪਿ. ਧਮ੍ਮਵਾਦੀਨਂ ਪਕ੍ਖੇ ਨਿਸੀਦਿਤ੍ਵਾ ਅਧਮ੍ਮਵਾਦੀਨਂ ਲਦ੍ਧਿਂ ਗਣ੍ਹਨ੍ਤੋਪਿ ਧਮ੍ਮਵਾਦੀਨਂ ਨਾਨਾਸਂਵਾਸਕੋ ਹੋਤਿਯੇਵ, ਅਯਂ ਨਯੋ ਵੁਤ੍ਤਨਯਸ੍ਸ ਅਤ੍ਥਤੋ ਸਿਦ੍ਧੋਤਿ ਕਤ੍ਵਾ ਇਧ ਨ ਵੁਤ੍ਤੋ. ਏਵਨ੍ਤਿਆਦਿ ਨਿਗਮਨਂ. ਯੋਤਿ ਭਿਕ੍ਖੁ, ਪਵਿਸਤਿ ਗਣ੍ਹਾਤੀਤਿ ਸਮ੍ਬਨ੍ਧੋ. ਨਿਸਿਨ੍ਨੋ ਹੁਤ੍ਵਾਤਿ ਯੋਜਨਾ. ਇਮੇਤਿ ਅਤ੍ਤਨੋ ਪਕ੍ਖੇ ਇਮੇ ਭਿਕ੍ਖੂ. ਇਤਰੇਤਿ ਪਰਪਕ੍ਖੇ ਇਤਰੇ ਭਿਕ੍ਖੂ. ਤੇਸਨ੍ਤਿ ਧਮ੍ਮਵਾਦੀਨਂ. ਯਤ੍ਥ ਤਤ੍ਥ ਵਾ ਪਨ ਪਕ੍ਖੇਤਿ ਯਸ੍ਮਿਂ ਕਸ੍ਮਿਂਚਿ ਵਾ ਧਮ੍ਮਵਾਦੀਨਂ ਪਕ੍ਖੇ. ਇਮੇ ਧਮ੍ਮਵਾਦਿਨੋਤਿ ਗਣ੍ਹਾਤੀਤਿ ਤਂਤਂਪਕ੍ਖਗਤੇ ਭਿਕ੍ਖੂ ਯਾਥਾਵਤੋ ਵਾ ਅਯਾਥਾਵਤੋ ਵਾ ‘‘ਇਮੇ ਧਮ੍ਮਵਾਦਿਨੋ’’ਤਿ ਗਣ੍ਹਾਤਿ.

੪੫੬. ਕਾਯੇਨ ਕਤਂ ਕਮ੍ਮਂ ਕਾਯਕਮ੍ਮਂ, ਵਚਿਯਾ ਕਤਂ ਕਮ੍ਮਂ ਵਚੀਕਮ੍ਮਂ. ਤਤ੍ਥ ਕਾਯਕਮ੍ਮਂ ਉਪਦਂਸੇਨ੍ਤਾ ਭਿਕ੍ਖੂ ਪਹਰਨ੍ਤਾ ਉਪਦਂਸੇਨ੍ਤਿ. ਵਚੀਕਮ੍ਮਂ ਉਪਦਂਸੇਨ੍ਤਾ ਭਿਕ੍ਖੂ ਫਰੁਸਂ ਵਦਨ੍ਤਾ ਉਪਦਂਸੇਨ੍ਤਿ. ਤੇਨ ਵੁਤ੍ਤਂ ‘‘ਕਾਯੇਨ ਪਹਰਨ੍ਤਾ’’ਤਿਆਦਿ. ਉਪਦਂਸੇਨ੍ਤੀਤਿ ਪਵਤ੍ਤੇਨ੍ਤਿ. ‘‘ਕੋਧਵਸੇਨਾ’’ਤਿ ਇਮਿਨਾ ਪੇਮਵਸੇਨਾਤਿ ਅਤ੍ਥਂ ਨਿਵਤ੍ਤੇਤਿ. ਅਧਮ੍ਮਿਯਾਨੀਤਿ ਅਧਮ੍ਮੇਨ ਕਤ੍ਤਬ੍ਬਾਨਿ. ‘‘ਕਿਚ੍ਚਾਨੀ’’ਤਿ ਇਮਿਨਾ ਇਯਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਅਸਮ੍ਮੋਦਿਕਾਤਿ ਏਤ੍ਥ ਯਕਾਰਲੋਪੋਤਿ ਆਹ ‘‘ਅਸਮ੍ਮੋਦਿਕਾਯਾ’’ਤਿ. ‘‘ਕਥਾਯਾ’’ਤਿ ਇਮਿਨਾ ਅਸਮ੍ਮੋਦਂ ਜਨੇਤੀਤਿ ਅਸਮ੍ਮੋਦਿਕਾਤਿ ਕਤ੍ਵਾ ਣਿਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਉਪਚਾਰਂ ਮੁਞ੍ਚਿਤ੍ਵਾਤਿ ਏਤ੍ਥ ਉਪਚਾਰੋ ਨਾਮ ਅਞ੍ਞਮਞ੍ਞਂ ਪਹਰਨ੍ਤਾਨਂ ਹਤ੍ਥਸ੍ਸ ਪਾਪੁਣਨਟ੍ਠਾਨਂ, ਤਂ ਮੁਞ੍ਚਿਤ੍ਵਾਤਿ ਅਤ੍ਥੋ. ਆਸਨਨ੍ਤਰਿਕਾਯਾਤਿ ਏਤ੍ਥ ਏਕਂ ਆਸਨਂ ਅਨ੍ਤਰਂ ਬ੍ਯਵਹਿਤਂ ਇਮਿਸ੍ਸਾ ਨਿਸਿਨ੍ਨਕਿਰਿਯਾਯਾਤਿ ਆਸਨਨ੍ਤਰਿਕਾਤਿ ਦਸ੍ਸੇਨ੍ਤੋ ਆਹ ‘‘ਏਕੇਕਂ ਆਸਨਂ ਅਨ੍ਤਰ’’ਨ੍ਤਿ. ‘‘ਕਤ੍ਵਾ’’ਤਿ ਇਮਿਨਾ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ.

੪੫੭-੮. ਅਯਂ ਅਸ੍ਸ ਭਿਕ੍ਖੁਨੋ ਅਧਿਪ੍ਪਾਯੋ ਕਿਰਾਤਿ ਯੋਜਨਾ. ਏਤੇਤਿ ਕੋਧਾਭਿਭੂਤੇ ਭਿਕ੍ਖੂ. ਭਗਵਾ ਪਨ ਕਥੇਸੀਤਿ ਸਮ੍ਬਨ੍ਧੋ. ‘‘ਅਨਤ੍ਥੋ ਅਤੋ’’ਤਿ ਇਮਿਨਾ ਅਨਤ੍ਥਤੋਤਿ ਪਦਸ੍ਸ ਓਕਾਰਲੋਪਸਨ੍ਧਿਂ ਦਸ੍ਸੇਤਿ. ਤੇਸਂ ਪਦਾਨਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਏਤਸ੍ਮਾ’’ਤਿਆਦਿ. ‘‘ਅਥ ਵਾ’’ਤਿਆਦਿਨਾ ‘‘ਅਨਤ੍ਥਦੋ’’ਤਿ ਵਤ੍ਤਬ੍ਬੇ ‘‘ਸੁਗਤੋ’’ਤਿਆਦੀਸੁ ਵਿਯ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ ਅਨਤ੍ਥਤੋਤਿ ਵੁਤ੍ਤਨ੍ਤਿ ਦਸ੍ਸੇਤਿ. ਅਨਤ੍ਥਦੋਤਿ ਅਨਤ੍ਥਂ ਦਦਾਤੀਤਿ ਅਨਤ੍ਥਦੋ.

੪੬੪. ਪੁਥੁਸਦ੍ਦੋਤਿ ਏਤ੍ਥ ਪੁਥੁਸਦ੍ਦੋ ਮਹਨ੍ਤਪਰਿਯਾਯੋਤਿ ਆਹ ‘‘ਮਹਾ’’ਤਿ. ਅਸ੍ਸਾਤਿ ਭਣ੍ਡਨਕਾਰਕਸ੍ਸ ਜਨਸ੍ਸ. ਸਮਜਨੋਤਿ ਏਤ੍ਥ ਸਮਸਦ੍ਦੋ ਸਦਿਸਪਰਿਯਾਯੋਤਿ ਆਹ ‘‘ਏਕਸਦਿਸੋ’’ਤਿ, ਤੁਲ੍ਯਾਧਿਕਰਣਸਮਾਸੋਯਂ. ਭਣ੍ਡਨਕਾਰਕੋ ਅਯਂ ਜਨੋਤਿ ਯੋਜਨਾ. ਤਤ੍ਥਾਤਿ ਭਣ੍ਡਨਕਾਰਕੇਸੁ ਜਨੇਸੁ. ਅਞ੍ਞਮ੍ਪਿ ਏਕਂ ਇਦਂ ਕਾਰਣਨ੍ਤਿ ਸਮ੍ਬਨ੍ਧੋ. ਨ ਮਞ੍ਞਿਤ੍ਥਾਤਿ ਕੋਚਿ ਏਕੋਪਿ ਨ ਮਞ੍ਞਿਤ੍ਥਾਤਿ ਯੋਜਨਾ. ਇਮਿਨਾ ਅਮਞ੍ਞਰੁਨ੍ਤਿ ਏਤ੍ਥ ਆਵਿਭਤ੍ਤਿਯਾ ‘‘ਰੁ’’ਨ੍ਤਿ ਆਦੇਸੋ ਦਸ੍ਸਿਤੋ.

ਪਰਿਮੁਟ੍ਠਾਤਿ ਪਰਿਮੁਟ੍ਠਾ ਸਤਿ ਏਤੇਸਨ੍ਤਿ ਪਰਿਮੁਟ੍ਠਾਤਿ ਦਸ੍ਸੇਨ੍ਤੋ ਆਹ ‘‘ਪਰਿਮੁਟ੍ਠਸਤਿਨੋ’’ਤਿ. ਅਟ੍ਠਕ੍ਖਰਗਾਥਾਯਂ ‘‘ਪਞ੍ਚਮਂ ਲਘੁ ਸਬ੍ਬਤ੍ਥਾ’’ਤਿ ਵੁਤ੍ਤਤ੍ਤਾ ਪਞ੍ਚਮਸ੍ਸ ਰਾਕਾਰਸ੍ਸ ਰਸ੍ਸੋ ਹੋਤਿ. ਤੇਨ ਵੁਤ੍ਤਂ ‘‘ਰਾਕਾਰਸ੍ਸ ਰਸ੍ਸਾਦੇਸੋ ਕਤੋ’’ਤਿ. ਕਥਂ ਭਾਣਿਨੋਤਿ ਵਾਚਂ ਭਾਣਿਨੋ. ਮੁਖਾਯਾਮਨ੍ਤਿ ਏਤ੍ਥ ਆਯਾਮਸਦ੍ਦੋ ਵਿਤ੍ਥਾਰਪਰਿਯਾਯੋ, ਵਿਤ੍ਥਾਰੋ ਚ ਨਾਮ ਪਸਾਰਣਨ੍ਤਿ ਆਹ ‘‘ਪਸਾਰੇਤੁ’’ਨ੍ਤਿ. ਸਮ੍ਪਦਾਨਤ੍ਥਜੋਤਕੇਨ ਤੁਂਪਚ੍ਚਯੇਨ ਸਮ੍ਪਦਾਨਤ੍ਥੇ ਉਪਯੋਗਵਚਨਨ੍ਤਿ ਦਸ੍ਸੇਤਿ. ਨੀਤਾਤਿ ਕਮ੍ਮਵਾਚਕਸ੍ਸ ਕਿਤਸ੍ਸ ਅਪ੍ਪਧਾਨਕਮ੍ਮਂ ਦਸ੍ਸੇਨ੍ਤੋ ਆਹ ‘‘ਇਮਂ ਨਿਲ੍ਲਜ੍ਜਭਾਵ’’ਨ੍ਤਿ. ਦ੍ਵਿਕਮ੍ਮਕਧਾਤੁਭਾਵਤੋ ‘‘ਅਤ੍ਤਨੋ’’ਤਿ ਪਧਾਨਕਮ੍ਮਮ੍ਪਿ ਅਜ੍ਝਾਹਰਿਤਬ੍ਬਂ. ਤਨ੍ਤਿ ਕਲਹਂ. ‘‘ਜਾਨ’’ਨ੍ਤਿ ਪਦੇਨ ‘‘ਵਿਦੂ’’ਤਿ ਪਦਸ੍ਸ ਅਤ੍ਥਞ੍ਚ ਵਾਕ੍ਯਞ੍ਚ ਦਸ੍ਸੇਤਿ. ਵਿਦਨ੍ਤਿ ਜਾਨਨ੍ਤੀਤਿ ਵਿਦੂਤਿ ਵਚਨਤ੍ਥੋ ਕਾਤਬ੍ਬੋਤਿ ਅਧਿਪ੍ਪਾਯੋ. ਸਾਦੀਨਵੋਤਿਆਦੀਨਵੇਨ ਦੋਸੇਨ ਸਹ ਪਵਤ੍ਤੋ. ਅਯਨ੍ਤਿ ਕਲਹੋ.

ਯੇ ਚ ਤਂ ਉਪਨਯ੍ਹਨ੍ਤੀਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਆਘਾਤ’’ਨ੍ਤਿ. ਯੇਤਿ ਜਨਾ. ਉਪਨਯ੍ਹਨ੍ਤਿ ਉਪਨਹਨ੍ਤਿ ਬਨ੍ਧਨ੍ਤਿ. ਸਨਨ੍ਤਨੋਤਿ ਏਤ੍ਥ ਸਨਨ੍ਤਨਸਦ੍ਦੋ ਪੁਰਾਣਪਰਿਯਾਯੋਤਿ ਆਹ ‘‘ਪੋਰਾਣੋ’’ਤਿ.

‘‘ਅਞ੍ਞੇ’’ਤਿ ਇਮਿਨਾ ਪਰੇਤਿ ਏਤ੍ਥ ਪਰਸਦ੍ਦਸ੍ਸ ਪਚ੍ਛਾਭਾਗਤ੍ਥਾਦਯੋ ਨਿਵਾਰੇਤਿ. ਮਯਮੇਤ੍ਥ ਯਮਾਮਸੇਤਿ ਏਤ੍ਥ ਏਤਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਸਙ੍ਘਮਜ੍ਝੇ’’ਤਿ. ਯਮੁਧਾਤੁ ਉਪਯਮਨਤ੍ਥੋ ਸੇਕਾਰੋ ਨਿਪਾਤਮਤ੍ਤੋਤਿ ਆਹ ‘‘ਉਪਯਮਾਮਾ’’ਤਿ. ‘‘ਸਤਤਂ ਸਮਿਤਂ ਮਚ੍ਚੁਸਨ੍ਤਿਕਂ ਗਚ੍ਛਾਮਾ’’ਤਿ ਇਮਿਨਾ ‘‘ਨ ਜਾਨਨ੍ਤੀ’’ਤਿ ਪਦਸ੍ਸ ਆਕਾਰਂ ਦਸ੍ਸੇਤਿ. ਤਤ੍ਥਾਤਿ ਮਹਾਜਨਕਾਯੇ ਯੇ ਪਣ੍ਡਿਤਾਤਿ ਯੋਜਨਾ. ਏਵਂ ਹੀਤਿ ਏਵਮੇਵ. ਜਾਨਨ੍ਤਾ ਤੇ ਪਣ੍ਡਿਤਾ ਪਟਿਪਜ੍ਜਨ੍ਤੀਤਿ ਯੋਜਨਾ. ਮੇਧਨ੍ਤਾ ਹਿਂਸਨ੍ਤਾ ਗਚ੍ਛਨ੍ਤਿ ਪਵਤ੍ਤਨ੍ਤੀਤਿ ਮੇਧਗਾ ਕਲਹਾ. ਕੇਚਿ ਮੇਧਧਾਤੁਤੋ ਣ੍ਵੁਪਚ੍ਚਯਂ ਵਦਨ੍ਤਿ, ਤੇਸਂ ਮਤੇਨ ਮੇਧਕਾਤਿ ਪਠਮਕ੍ਖਰੇਨ ਪਾਠੋ ਭਵੇਯ੍ਯ.

ਤੇਸਮ੍ਪੀਤਿ ਬ੍ਰਹ੍ਮਦਤ੍ਤਦੀਘਾਵੁਕੁਮਾਰਾਨਮ੍ਪਿ. ਸਙ੍ਗਤੀਤਿ ਸਮਾਗਮੋ. ਵੋਤਿ ਤੁਮ੍ਹਾਕਂ. ਯੇਸਂ ਤੁਮ੍ਹਾਕਂ ਨੇਵ ਮਾਤਾਪਿਤੂਨਂ ਅਟ੍ਠੀਨਿ ਛਿਨ੍ਨਾਨਿ, ਨ ਪਾਣਾ ਹਤਾ, ਨ ਗਵਸ੍ਸਧਨਾਨਿ ਹਟਾਨਿ. ਤੇਸਂ ਤੁਮ੍ਹਾਕਂ ਕਸ੍ਮਾ ਸਙ੍ਗਤਿ ਨ ਹੋਤੀਤਿ ਯੋਜਨਾ.

ਸਬ੍ਬਾਨਿ ਪਰਿਸ੍ਸਯਾਨੀਤਿ ਏਤ੍ਥ ਸਬ੍ਬਾਨੀਤਿ ਵੁਤ੍ਤਕਾਰਣਞ੍ਚ ਲਿਙ੍ਗਵਿਪਲ੍ਲਾਸਞ੍ਚ ਦਸ੍ਸੇਨ੍ਤੋ ਆਹ ‘‘ਪਾਕਟਪਰਿਸ੍ਸਯੇ ਚ ਪਟਿਚ੍ਛਨ੍ਨਪਰਿਸ੍ਸਯੇ ਚਾ’’ਤਿ. ‘‘ਅਭਿਭਵਿਤ੍ਵਾ’’ਤਿ ਇਮਿਨਾ ਅਭਿਭੁਯ੍ਯਾਤਿ ਪਦਸ੍ਸ ਤ੍ਵਾਪਚ੍ਚਯਨ੍ਤਭਾਵਂ ਦਸ੍ਸੇਤਿ. ਤੇਨਾਤਿ ਨਿਪਕੇਨ ਸਹਾਯੇਨ.

ਰਾਜਾਵਾਤਿ ਏਤ੍ਥ ਰਾਜਾ ਇਵਾਤਿ ਪਦਵਿਭਾਗਂ ਕਤ੍ਵਾ ਰਾਜਸਦ੍ਦਸ੍ਸ ਉਪਲਕ੍ਖਣਵਸੇਨ ਮਹਾਜਨਕ, ਅਰਿਨ੍ਦਮਰਾਜਾਨੋ ਚ ਇਵਸਦ੍ਦਸ੍ਸ ਓਪਮ੍ਮਤ੍ਥਜੋਤਕਞ੍ਚ ਦਸ੍ਸੇਨ੍ਤੋ ਆਹ ‘‘ਯਥਾ’’ਤਿਆਦਿ. ਰਟ੍ਠਵਿਜਿਤਸਦ੍ਦਾ ਅਞ੍ਞਮਞ੍ਞਪਰਿਯਾਯਾ. ਵਿਸੇਸਨਵਿਸੇਸ੍ਯਾਨਂ ਕਾਮਾਚਾਰਤੋ ਗਮ੍ਯਮਾਨਤ੍ਤਾ ਵੁਤ੍ਤਂ ‘‘ਵਿਜਿਤਂ ਰਟ੍ਠ’’ਨ੍ਤਿ. ‘‘ਮਾਤਙ੍ਗੋ ਅਰਞ੍ਞੇ ਨਾਗੋ ਇਵਾ’’ਤਿ ਇਮਿਨਾ ਪਦਵਿਭਾਗਂ ਦਸ੍ਸੇਤਿ. ਤੇਸਂ ਪਦਾਨਂ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਾਤਙ੍ਗੋਤਿ ਹਤ੍ਥੀ ਵੁਚ੍ਚਤੀ’’ਤਿਆਦਿ. ‘‘ਹਤ੍ਥੀ ਵੁਚ੍ਚਤੀ’’ਤਿ ਇਮਿਨਾ ਮਹਨ੍ਤੋ ਅਙ੍ਗੋ ਸਰੀਰਮੇਤਸ੍ਸਾਤਿ ਮਾਤਙ੍ਗੋਤਿ ਵਚਨਤ੍ਥੇਨ ਹਤ੍ਥੀ ਮਾਤਙ੍ਗੋ ਨਾਮਾਤਿ ਦਸ੍ਸੇਤਿ. ਮਹਨ੍ਤਸਦ੍ਦਸ੍ਸ ਮਾਤਾਦੇਸੋ. ਨਾਗਸਦ੍ਦੋ ਉਰਗੇ ਚ ਹਤ੍ਥਿਮ੍ਹਿ ਚ ਨਾਗਰੁਕ੍ਖੇ ਚ ਉਤ੍ਤਮੇ ਚ ਨਾਮਪਞ੍ਞਤ੍ਤਿਯਞ੍ਚਾਤਿ ਪਞ੍ਚਸੁ ਅਤ੍ਥੇਸੁ ਵਤ੍ਤਤਿ, ਇਧ ਉਤ੍ਤਮਤ੍ਥੇਤਿ ਦਸ੍ਸੇਨ੍ਤੋ ਆਹ ‘‘ਨਾਗੋਤਿ ਮਹਨ੍ਤਾਧਿਵਚਨਮੇਤ’’ਨ੍ਤਿ. ਮਾਤਙ੍ਗਰਞ੍ਞੇਵਾਤਿ ਏਤ੍ਥ ਇਵਸਦ੍ਦਸ੍ਸ ਓਪਮ੍ਮਤ੍ਥਜੋਤਕਭਾਵਂ ਦਸ੍ਸੇਤ੍ਵਾ ਅਤ੍ਥਯੋਜਨਂ ਦਸ੍ਸੇਨ੍ਤੋ ਆਹ ‘‘ਯਥਾ ਹੀ’’ਤਿਆਦਿ. ‘‘ਯਥਾ ਚ ਪਾਲਿਲੇਯ੍ਯਕੋ’’ਤਿ ਇਮਿਨਾ ਮਾਤਙ੍ਗਨਾਗਸ੍ਸ ਸਰੂਪਂ ਉਪਲਕ੍ਖਣੇਨ ਦਸ੍ਸੇਤਿ.

੨੭੫. ਪਾਲਿਲੇਯ੍ਯਕਗਮਨਕਥਾ

੪੬੭. ਪਾਲਿਲੇਯ੍ਯਕਨ੍ਤਿ ਪਲਿਲਵਨਸਣ੍ਡੇ ਵਸਨ੍ਤਹਤ੍ਥਿਨਾਗਂ. ‘‘ਹਤ੍ਥੀ’’ਤਿ ਚ ‘‘ਨਾਗੋ’’ਤਿ ਚ ਦ੍ਵਿਨ੍ਨਂ ਸਦ੍ਦਾਨਂ ਪਰਿਯਾਯਭਾਵੇਨ ਵੁਤ੍ਤਤ੍ਤਾ ਅਧਿਕਤ੍ਥੋਤਿ ਆਹ ‘‘ਮਹਾਹਤ੍ਥੀ’’ਤਿ. ਪੁਰਤੋ ਪੁਰਤੋ ਗਚ੍ਛਨ੍ਤੇਹਿ ਤੇਹਿ ਹਤ੍ਥਿਆਦੀਹਿ ਛਿਨ੍ਨਗ੍ਗਾਨੀਤਿ ਯੋਜਨਾ. ਓਭਗ੍ਗੋਭਗ੍ਗਨ੍ਤਿ ਭਞ੍ਜਿਤ੍ਵਾ ਅਧੋਪਾਤਿਤਂ ਓਭਗ੍ਗਨ੍ਤਿ ਦਸ੍ਸੇਨ੍ਤੋ ਆਹ ‘‘ਭਞ੍ਜਿਤ੍ਵਾ ਭਞ੍ਜਿਤ੍ਵਾ ਪਾਤਿਤ’’ਨ੍ਤਿ. ‘‘ਉਚ੍ਚਟ੍ਠਾਨਤੋ’’ਤਿ ਇਮਿਨਾ ਅਵਤ੍ਯੂਪਸਗ੍ਗਸ੍ਸ ਅਧੋਤ੍ਥਂ ਨਯੇਨ ਦਸ੍ਸੇਤਿ. ਏਤਸ੍ਸਾਤਿ ਹਤ੍ਥਿਨਾਗਸ੍ਸ. ਤੇਤਿ ਹਤ੍ਥਿਆਦਯੋ. ਤੇਹੀਤਿ ਹਤ੍ਥਿਆਦੀਹਿ. ਪਿਵਨ੍ਤੇਹਿ ਤੇਹੀਤਿ ਯੋਜਨਾ. ਕਦ੍ਦਮੋਦਕਾਨੀਤਿ ਕਦ੍ਦਮੇਨ ਸਂਸਟ੍ਠਾਨਿ ਉਦਕਾਨਿ.

ਈਸਾਦਨ੍ਤਸ੍ਸਾਤਿ ਏਤ੍ਥ ਈਸਾਯ ਸਦਿਸੋ ਦਨ੍ਤੋ ਇਮਸ੍ਸਾਤਿ ਈਸਾਦਨ੍ਤੋਤਿ ਦਸ੍ਸੇਨ੍ਤੋ ਆਹ ‘‘ਰਥਈਸਾਸਦਿਸਦਨ੍ਤਸ੍ਸਾ’’ਤਿ. ‘‘ਰਥਈਸਾ’’ਤਿ ਇਮਿਨਾ ਨਙ੍ਗਲਈਸਂ ਨਿਵਤ੍ਤੇਤਿ. ਯਦੇਕੋਤਿ ਯਂ ਏਕੋ. ਯਂਸਦ੍ਦੋ ਕਾਰਣਤ੍ਥੋਤਿ ਆਹ ‘‘ਯਸ੍ਮਾ’’ਤਿ. ਅਸ੍ਸ ਨਾਗਸ੍ਸਾਤਿ ਹਤ੍ਥਿਨਾਗਸ੍ਸ. ਨਾਗੇਨਾਤਿ ਬੁਦ੍ਧਨਾਗੇਨ.

ਯਥਾਭਿਰਨ੍ਤਨ੍ਤਿ ਏਤ੍ਥ ਕਿਤ੍ਤਕਂ ਕਾਲਂ ਰਮਤੀਤਿ ਆਹ ‘‘ਤੇਮਾਸ’’ਨ੍ਤਿ. ਏਤ੍ਤਾਵਤਾਤਿ ਏਤ੍ਤਕੇਨ ਤੇਮਾਸਵਿਹਰਣੇਨ. ਪਤ੍ਥਟਾ ਅਹੋਸੀਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਜਮ੍ਬੁਦੀਪਤਲੇ.

‘‘ਕੋਸਮ੍ਬਿਨਿਵਾਸਿਨੋ’’ਤਿ ਇਮਿਨਾ ਕੋਸਮ੍ਬਿਯਂ ਨਿਵਸਨ੍ਤੀਤਿ ਕੋਸਮ੍ਬਕਾਤਿ ਵਚਨਤ੍ਥਂ ਦਸ੍ਸੇਤਿ.

੨੭੬. ਅਟ੍ਠਾਰਸਵਤ੍ਥੁਕਥਾ

੪੭੧. ‘‘ਲਦ੍ਧਿਗ੍ਗਹਣ’’ਨ੍ਤਿ ਇਮਿਨਾ ਆਦੀਯਤੇ ਆਦਾਯੋਤਿ ਵਚਨਤ੍ਥਂ ਦਸ੍ਸੇਤਿ.

੪੭੫. ਤਂ ਦਿਵਸਮੇਵਾਤਿ ਤਸ੍ਮਿਂ ਸਙ੍ਘਸਾਮਗ੍ਗਿਕਰਣਦਿਵਸੇਯੇਵ.

੪੭੬. ਨ ਮੂਲਾ ਮੂਲਂ ਗਨ੍ਤ੍ਵਾਤਿ ਮੂਲਤੋ ਮੂਲਂ ਨ ਗਨ੍ਤ੍ਵਾਵ. ‘‘ਅਤ੍ਥਤੋ ਅਪਗਤਾ’’ਤਿ ਇਮਿਨਾ ਅਤ੍ਥਤੋ ਅਪੇਤਾ ਅਤ੍ਥਾਪੇਤਾਤਿ ਵਚਨਤ੍ਥਂ ਦਸ੍ਸੇਤਿ. ‘‘ਬ੍ਯਞ੍ਜਨਮਤ੍ਤਂ ਉਪੇਤਾ’’ਤਿ ਇਮਿਨਾ ਬ੍ਯਞ੍ਜਨਮਤ੍ਤਂ ਉਪੇਤਾ ਉਪਗਤਾ ਬ੍ਯਞ੍ਜਨੂਪੇਤਾਤਿ ਵਚਨਤ੍ਥਂ ਦਸ੍ਸੇਤਿ.

੪੭੭. ਅਤ੍ਥੇਸੁ ਜਾਤੇਸੂਤਿ ਏਤ੍ਥ ਜਾਤਸਦ੍ਦੋ ਉਪ੍ਪਨ੍ਨਪਰਿਯਾਯੋਤਿ ਆਹ ‘‘ਵਿਨਯਅਤ੍ਥੇਸੁ ਉਪ੍ਪਨ੍ਨੇਸੂ’’ਤਿ. ਤਞ੍ਚ ਪਦਂ ‘‘ਸਙ੍ਘਸ੍ਸ ਕਿਚ੍ਚੇਸੂ’’ਤਿਆਦੀਸੁ ਸਬ੍ਬਪਦੇਸੁ ਯੋਜੇਤਬ੍ਬਂ. ਮਹਤ੍ਥਿਕੋਤਿ ਮਹਨ੍ਤੋ ਉਪਕਾਰਸਙ੍ਖਾਤੋ ਅਤ੍ਥੋ ਇਮਸ੍ਸਾਤਿ ਮਹਤ੍ਥਿਕੋਤਿ ਦਸ੍ਸਨ੍ਤੋ ਆਹ ‘‘ਮਹਾਉਪਕਾਰੋ’’ਤਿ.

ਅਨਾਨੁਵਜ੍ਜੋ ਪਠਮੇਨਾਤਿ ਏਤ੍ਥ ਪਠਮਸਦ੍ਦੋ ਤਾਵਪਰਿਯਾਯੋਤਿ ਦਸ੍ਸੇਨ੍ਤੋ ਆਹ ‘‘ਤਾਵਾ’’ਤਿ. ਸੀਲਤੋਤਿ ਸੀਲੇਨ. ਉਪੇਕ੍ਖਿਤਾਚਾਰੋਤਿ ਉਪਪਤ੍ਤਿਤੋ ਇਕ੍ਖਿਤਾਚਾਰੋ. ‘‘ਅਪੇਕ੍ਖਿਤਾਚਾਰੋ’’ਤਿਪਿ ਪਾਠੋ. ਉਪਪਰਿਕ੍ਖਿਤਾਚਾਰੋਤਿ ਉਪਪਰਿਕ੍ਖਿਤੋ ਆਚਾਰੋ ਏਤਸ੍ਸਾਤਿ ਉਪਪਰਿਕ੍ਖਿਤਾਚਾਰੋ.

ਵਿਸਯ੍ਹਾਤਿ ਏਤ੍ਥ ਵਿਪੁਬ੍ਬੋ ਸਹਧਾਤੁ ਅਭਿਭਵਨਤ੍ਥੋ, ਤ੍ਵਾਪਚ੍ਚਯੋ ਚ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਅਭਿਭਵਿਤ੍ਵਾ’’ਤਿ. ਅਨਪਗਤਨ੍ਤਿ ਕਾਰਣਤੋ ਅਨਪੇਤਂ. ਭਣਨ੍ਤੋ ਭਿਕ੍ਖੂਤਿ ਸਮ੍ਬਨ੍ਧੋ. ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ ਹੀ’’ਤਿਆਦਿ. ਸੋਤਿ ਭਿਕ੍ਖੁ, ਨ ਹਾਪੇਤੀਤਿ ਸਮ੍ਬਨ੍ਧੋ. ‘‘ਉਸੂਯਾਯਾ’’ਤਿ ਇਮਿਨਾ ਦੋਸਾਗਤਿਗਮਨਸ੍ਸ ਗਹਿਤਤ੍ਤਾ ‘‘ਅਗਤਿਗਮਨਵਸੇਨਾ’’ਤਿ ਇਮਿਨਾ ਪਾਰਿਸੇਸਨਯੇਨ ਅਵਸੇਸਅਗਤਿਗਮਨਮੇਵਾਧਿਪ੍ਪੇਤਂ. ਸੋਤਿ ਭਿਕ੍ਖੁ. ਛਮ੍ਭਤਿ ਚੇਵਾਤਿ ਥਮ੍ਭਤਿ ਚੇਵ, ਥਦ੍ਧਂ ਕਰੋਤਿ ਚੇਵਾਤਿ ਅਤ੍ਥੋ. ਵੇਧਤਿ ਚਾਤਿ ਕਮ੍ਪਤਿ ਚ. ਯੋ ਚਾਤਿ ਭਿਕ੍ਖੁ ਪਨ. ਈਦਿਸੋਤਿ ਉਸੂਯਾਯ ਵਾ ਅਗਤਿਗਮਨੇਨ ਵਾ ਭਣਨਸਙ੍ਖਾਤੋ ਏਦਿਸੋ ਨ ਹੋਤਿ.

ਕਿਞ੍ਚ ਭਿਯ੍ਯੋਤਿ ਨਿਪਾਤਸਮੁਦਾਯੋ, ਤਤੋ ਵੁਤ੍ਤਤੋ ਅਤਿਰੇਕਂ ਕਥੇਤਬ੍ਬਂ ਕਿਂ ਪਨਾਤਿ ਅਤ੍ਥੋ. ਤਸ੍ਸਾ ਗਾਥਾਯ ਅਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਯੋਤਿ ਭਿਕ੍ਖੁ. ਹੀਤਿ ਸਚ੍ਚਂ. ਕਾਲਾਗਤਨ੍ਤਿ ਏਤ੍ਥ ਗਹੇਤਬ੍ਬਕਾਲਞ੍ਚ ਸਤ੍ਤਮੀਤਪ੍ਪੁਰਿਸਸਮਾਸਞ੍ਚ ਦਸ੍ਸੇਨ੍ਤੋ ਆਹ ‘‘ਕਥੇਤਬ੍ਬਯੁਤ੍ਤਕਾਲੇ ਆਗਤ’’ਨ੍ਤਿ. ਵਚੋਤਿ ਪਦਂ ਨ ਵਚਨਪਧਾਨਂ, ਵਚਨਵਨ੍ਤਪੁਗ੍ਗਲੋਯੇਵ ਪਧਾਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਵਦਨ੍ਤੋ’’ਤਿ.

ਆਚੇਰਕਮ੍ਹਿ ਚ ਸਕੇਤਿ ਏਤ੍ਥ ਆਚਰਿਯਸ੍ਸ ਏਸੋ ਆਚੇਰਕੋ, ਸਸ੍ਸ ਅਤ੍ਤਨੋ ਏਸੋ ਸਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਆਚਰਿਯਵਾਦੇ’’ਤਿ. ਗਾਥਾਭਾਵਤੋ ਆਚਰਿਯਸਦ੍ਦਸ੍ਸ ਆਚੇਰਾਦੇਸੋ ਕਾਤਬ੍ਬੋ. ‘‘ਵਾਦੇ’’ਤਿ ਇਮਿਨਾ ਇਦਮਤ੍ਥੇ ਪਵਤ੍ਤਸ੍ਸ ਣਿਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਅਲਂ ਪਮੇਤੁਨ੍ਤਿ ਏਤ੍ਥ ਅਲਂਸਦ੍ਦੋ ਸਮਤ੍ਥਤ੍ਥੋ, ਪਮਸਦ੍ਦੋਤੁਲਨਤ੍ਥੋਤਿ ਆਹ ‘‘ਤੁਲਯਿਤੁਂ ਸਮਤ੍ਥੋ’’ਤਿ. ਕਥੇਤਵੇਤਿ ਏਤ੍ਥ ਤਵੇਸਦ੍ਦੋ ਅਞ੍ਞਤ੍ਥ ਯੇਭੁਯ੍ਯੇਨ ਭਾਵਵਾਚਕੋ, ਇਧ ਪਨ ਕਮ੍ਮਵਾਚਕੋਤਿ ਆਹ ‘‘ਕਥੇਤਬ੍ਬੇ’’ਤਿ. ਵਿਰਦ੍ਧਟ੍ਠਾਨਕੁਸਲੋਤਿ ਵਿਰਦ੍ਧਟ੍ਠਾਨੇ ਕੁਸਲੋ.

ਅਯਂ ਗਾਥਾ ਵੁਤ੍ਤਾਤਿ ਸਮ੍ਬਨ੍ਧੋ. ਤਨ੍ਤਿ ਕਥੇਤਬ੍ਬਂ. ਅਯਂ ਹੇਤ੍ਥਤ੍ਥੋਤਿ ਅਯਂ ਏਵ ਏਤ੍ਥ ਗਾਥਾਯਂ ਅਤ੍ਥੋਤਿ ਯੋਜਨਾ. ‘‘ਗਚ੍ਛਨ੍ਤੀ’’ਤਿ ਇਮਿਨਾ ਵਜਨ੍ਤੀਤਿ ਏਤ੍ਥ ਵਜਧਾਤੁਯਾ ਗਤ੍ਯਤ੍ਥਂ ਦਸ੍ਸੇਤਿ. ‘‘ਅਤ੍ਤਨੋ ਆਚਰਿਯਵਾਦ’’ਨ੍ਤਿ ਇਮਿਨਾ ‘‘ਸਕਂ ਆਦਾਯ’’ਨ੍ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਆਚਰਿਯਵਾਦੋ ਹਿ ਆਦਾਤਬ੍ਬਤੋ ਗਹੇਤਬ੍ਬਤੋ ਆਦਾਯਨ੍ਤਿ ਵੁਤ੍ਤੋ. ਤਦਨੁਰੂਪਨ੍ਤਿ ਤਸ੍ਸ ਵਤ੍ਥੁਸ੍ਸ ਅਨੁਰੂਪਂ. ਬ੍ਯਾਕਰਮਾਨੋ ਭਿਕ੍ਖੂਤਿ ਸਮ੍ਬਨ੍ਧੋ. ਅਟ੍ਠਹਿ ਦੂਤਙ੍ਗੇਹੀਤਿ ‘‘ਸੋਤਾ ਚ ਹੋਤਿ, ਸਾਵੇਤਾ ਚ, ਉਗ੍ਗਹੇਤਾ ਚ, ਧਾਰੇਤਾ ਚ, ਵਿਞ੍ਞਾਤਾ ਚ, ਵਿਞ੍ਞਾਪੇਤਾ, ਚ ਕੁਸਲੋ ਚ ਸਹਿਤਾਸਹਿਤਸ੍ਸ, ਨੋ ਚ ਕਲਹਕਾਰਕੋ’’ਤਿ (ਚੂਲ਼ਵ. ੩੪੭; ਅ. ਨਿ. ੮.੧੬) ਏਵਂ ਵੁਤ੍ਤੇਹਿ ਅਟ੍ਠਹਿ ਦੂਤਸ੍ਸ ਅਙ੍ਗੇਹਿ. ਕਸ੍ਸ ਦੂਤੇਯ੍ਯਕਮ੍ਮਨ੍ਤਿ ਆਹ ‘‘ਸਙ੍ਘਸ੍ਸਾ’’ਤਿ. ਦੂਤਸ੍ਸ ਏਤਾਨਿ ਦੂਤੇਯ੍ਯਾਨਿ, ਤਾਨਿਯੇਵ ਕਮ੍ਮਾਨਿ ਦੂਤੇਯ੍ਯਕਮ੍ਮਾਨਿ, ਤੇਸੁ. ਇਦਨ੍ਤਿ ਅਤ੍ਥਜਾਕਂ, ਵੁਤ੍ਤਂ ਹੋਤੀਤਿ ਯੋਜਨਾ. ਅਥ ਵਾ ਇਦਨ੍ਤਿ ਅਯਮਤ੍ਥੋ. ਵੁਤ੍ਤਂ ਹੋਤੀਤਿ ਵੁਤ੍ਤੋ ਹੋਤਿ. ਪਚ੍ਛਿਮਨਯੇ ਲਿਙ੍ਗਵਿਪਲ੍ਲਾਸੋਤਿ ਦਟ੍ਠਬ੍ਬੋ. ਆਨੇਤ੍ਵਾ ਹਵਨ੍ਤਿ ਪੂਜੇਨ੍ਤੀਤਿ ਆਹਵੋ ਦਾਯਕਾ, ਤੇਸਂ ਆਹੂਨਂ. ਆਨੇਤ੍ਵਾ ਹੁਨਿਤਬ੍ਬਂ ਪੂਜੇਤਬ੍ਬਨ੍ਤਿ ਆਹੁਤਿ, ਤਂ ਆਹੁਤਿਂ. ਸਙ੍ਘਸ੍ਸ ਕਿਚ੍ਚੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਤੇਨ ਵੁਤ੍ਤਂ ‘‘ਤਸ੍ਸ ਤਸ੍ਸ ਕਿਚ੍ਚਸ੍ਸਾ’’ਤਿ. ਕਰਵਚੋਤਿ ਏਤ੍ਥ ‘‘ਵਚੋਕਰੋ’’ਤਿ ਵਤ੍ਤਬ੍ਬੇ ਗਾਥਾਭਾਵਤੋ ਪਦਵਿਪਰਿਯਾਯਵਸੇਨ ‘‘ਕਰਵਚੋ’’ਤਿ ਵੁਤ੍ਤੋਤਿ ਆਹ ‘‘ਵਚਨਂ ਕਰੋਨ੍ਤੋ’’ਤਿ. ‘‘ਵਚਨਕਰਣੇਨਾ’’ਤਿ ਇਮਿਨਾ ‘‘ਨ ਤੇਨ ਮਞ੍ਞਤੀ’’ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ.

ਆਪਜ੍ਜਮਾਨੋ ਭਿਕ੍ਖੁ ਆਪਤ੍ਤਿ ਹੋਤੀਤਿ ਯੋਜਨਾ. ਤਸ੍ਸਾ ਚਾਤਿ ਏਤ੍ਥ ਸ੍ਮਾਵਚਨਸ੍ਸ ਸ੍ਸਾਦੇਸੋ ਕਾਤਬ੍ਬੋ. ਯਥਾਤਿ ਯੇਨਾਕਾਰੇਨ, ਵਿਨਯਕਮ੍ਮਾਕਾਰੇਨਾਤਿ ਅਤ੍ਥੋ. ਯੇਸੂਤਿ ਯਤ੍ਤਕੇਸੁ ਵਤ੍ਥੂਸੁ. ਉਭਯੇ ਏਤੇ ਵਿਭਙ੍ਗਾਤਿ ਸਮ੍ਬਨ੍ਧੋ. ਅਸ੍ਸਾਤਿ ਭਿਕ੍ਖੁਸ੍ਸ. ਆਪਤ੍ਤਿਵੁਟ੍ਠਾਨਪਦਸ੍ਸਾਤਿ ਪਦਸਦ੍ਦੋ ਕਾਰਣਤ੍ਥੋ, ਭੁਮ੍ਮਤ੍ਥੇ ਸਾਮਿਵਚਨੋ ਚ ਹੋਤੀਤਿ ਆਹ ‘‘ਆਪਤ੍ਤਿਵੁਟ੍ਠਾਨਕਾਰਣੇ’’ਤਿ. ‘‘ਕੁਸਲੋ’’ਤਿ ਇਮਿਨਾ ਛੇਕੋ ਪਣ੍ਡਿਤੋ, ਕੁਚ੍ਛਿਤਂ ਪਾਪਂ ਵਿਦਤਿ ਜਾਨਾਤੀਤਿ ਕੋਵਿਦੋਤਿ ਵਚਨਤ੍ਥੇਨ ਕੋਵਿਦੋ ਨਾਮਾਤਿ ਦਸ੍ਸੇਤਿ.

ਆਚਰਨ੍ਤੋ ਭਿਕ੍ਖੁ ਗਚ੍ਛਤੀਤਿ ਯੋਜਨਾ. ‘‘ਵਤ੍ਤ’’ਨ੍ਤਿ ਇਮਿਨਾ ਓਸਾਰਣਂ ਤਨ੍ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ‘‘ਯਾ’’ਤਿ ਇਮਿਨਾ ਏਤਮ੍ਪੀਤਿ ਏਤ੍ਥ ਏਤਸਦ੍ਦਸ੍ਸ ਅਨਿਯਮਨਿਦ੍ਦੇਸਭਾਵਂ ਦਸ੍ਸੇਤਿ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਕੋਸਮ੍ਬਕਕ੍ਖਨ੍ਧਕੇ.

ਇਤਿ ਕੋਸਮ੍ਬਕਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਮਹਾਵਗ੍ਗਵਣ੍ਣਨਾਯ

ਯੋਜਨਾ ਸਮਤ੍ਤਾ.

ਜਾਦਿਲਞ੍ਛਿਤਨਾਮੇਨ, ਨੇਕਾਨਂ ਵਾਚਿਤੋ ਮਯਾ;

ਮਹਾਵਗ੍ਗਖਨ੍ਧਕਸ੍ਸ, ਸਮਤ੍ਤੋ ਯੋਜਨਾਨਯੋਤਿ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਪਾਚਿਤ੍ਯਾਦਿਯੋਜਨਾ