੭੬. ਗਾਮਸੀਮਾਦਿਕਥਾ

੧੪੭. ਉਪੋਸਥਕਮ੍ਮਸ੍ਸ ਵਿਸੁਂ ਗਹਿਤਤ੍ਤਾ ਸੇਸਕਮ੍ਮਵਸੇਨ ਸਮਾਨਸਂਵਾਸਕਤਾ ਗਹੇਤਬ੍ਬਾ ਗੋਬਲਿਬਦ੍ਦਨਯੇਨ ਵਾ ਪਾਰਿਸੇਸਨਯੇਨ ਵਾ. ਤਨ੍ਤਿ ਸਮਾਨਸਂਵਾਸਏਕੂਪੋਸਥਭਾਵਂ. ‘‘ਅਪਰਿਚ੍ਛਿਨ੍ਨਾਯਾ’’ਤਿ ਇਮਿਨਾ ਅਟ੍ਠਪਿਤਾਯਾਤਿ ਏਤ੍ਥ ਠਪਧਾਤੁਯਾ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਗਾਮਂ ਵਾ ਨਿਗਮਂ ਵਾਤਿ ਏਤ੍ਥ ਨਗਰਂ ਕੇਨ ਸਙ੍ਗਹਿਤਨ੍ਤਿ ਆਹ ‘‘ਗਾਮਗ੍ਗਹਣੇਨ ਚੇਤ੍ਥਾ’’ਤਿਆਦਿ. ਤਤ੍ਥ ਏਤ੍ਥਾਤਿ ‘‘ਗਾਮਂ ਵਾ ਨਿਗਮਂ ਵਾ’’ਤਿ ਪਾਠੇ, ਗਾਮਗ੍ਗਹਣੇਨਾਤਿ ਸਮ੍ਬਨ੍ਧੋ. ਅਥ ਵਾ ਏਤ੍ਥਾਤਿ ਗਾਮਨਿਗਮਨਗਰੇਸੁ, ਨਗਰਮ੍ਪੀਤਿ ਸਮ੍ਬਨ੍ਧੋ. ਗਾਮਾਦੀਨਂ ਪਰਿਚ੍ਛੇਦਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਗਾਮਨਿਗਮਨਗਰੇਸੁ. ਗਾਮਭੋਜਕਾਤਿ ਗਾਮਂ ਭੁਞ੍ਜਨ੍ਤੀਤਿ ਗਾਮਭੋਜਕਾ. ਬਲਿਨ੍ਤਿ ਕਰਂ. ਸੋ ਹਿ ਤਂ ਨਿਸ੍ਸਾਯ ਗਾਮਭੋਜਕਾ ਬਲਨ੍ਤਿ ਜੀਵਨ੍ਤਿ ਅਨੇਨਾਤਿ ਬਲੀਤਿ ਵੁਚ੍ਚਤਿ. ਯਮ੍ਪਿ ਏਕਂ ਪਦੇਸਂ ਪਰਿਚ੍ਛਿਨ੍ਦਿਤ੍ਵਾ ਦੇਤੀਤਿ ਯੋਜਨਾ. ਗਾਮਖੇਤ੍ਤੇਤਿ ਰਞ੍ਞੋ ਆਣਾ ਖਿਪਿਯਤਿ ਏਤ੍ਥਾਤਿ ਖੇਤ੍ਤਂ, ਗਾਮੋਯੇਵ ਖੇਤ੍ਤਂ ਗਾਮਖੇਤ੍ਤਂ, ਤਸ੍ਮਿਂ. ਅਯਮ੍ਪੀਤਿ ਅਯਂ ਪਦੇਸੋਪਿ. ਸੋਪੀਤਿ ਪਦੇਸੋਪਿ. ਵਿਸੁਂਗਾਮੋ ਨਾਮਾਤਿ ਯੋਜਨਾ. ਸੋਪਿ ਵਿਸੁਂਗਾਮੋ ਗਾਮਸੀਮਾ ਹੋਤਿਯੇਵਾਤਿ ਯੋਜਨਾ. ਵਿਸੁਂ ਪਰਿਚ੍ਛਿਨ੍ਦਿਤ੍ਵਾ ਦਿਨ੍ਨੋ ਗਾਮੋ ਵਿਸੁਂਗਾਮੋ. ਤਸ੍ਮਾਤਿ ਯਸ੍ਮਾ ਵਿਸੁਂ ਗਾਮੋ ਹੋਤਿ, ਤਸ੍ਮਾ. ਸਾ ਚਾਤਿ ਵਿਸੁਂਗਾਮਸੀਮਾ ਚ. ਇਤਰਾਤਿ ਵਿਸੁਂਗਾਮਸੀਮਤੋ ਅਞ੍ਞਾ ਪਕਤਿਗਾਮਨਗਰਨਿਗਮਸੀਮਾ ਚਾਤਿ ਯੋਜਨਾ.

ਏਵਨ੍ਤਿ ‘‘ਅਸਮ੍ਮਤਾਯ ਭਿਕ੍ਖਵੇ’’ਤਿਆਦਿਨਾ ਪਾਠੇਨ. ਤਨ੍ਤਿ ਸੀਮਪਰਿਚ੍ਛੇਦਂ. ਅਪਰਿਚ੍ਛਿਨ੍ਨੇਤਿ ਰਾਜੂਹਿ ਅਪਰਿਚ੍ਛਿਨ੍ਨੇ. ‘‘ਅਟਵਿਪਦੇਸੇ’’ਤਿ ਇਮਿਨਾ ਨਤ੍ਥਿ ਗਾਮੋ ਏਤ੍ਥਾਤਿ ਅਗਾਮਕੋਤਿ ਵਚਨਤ੍ਥਸ੍ਸ ਸਰੂਪਂ ਦਸ੍ਸੇਤਿ. ਵਿਜ੍ਝਾਟਵਿਸਦਿਸੇਤਿ ਵਿਗਤਂ ਅਗ੍ਗਿਨੋ ਝਾਯਨਮੇਤ੍ਥਾਤਿ ਵਿਜ੍ਝਾ, ਚੋਰਾਦਯੋ ਮਨੁਸ੍ਸੇ ਆਭੁਸੋ ਟਵਨ੍ਤਿ ਪੀਲ਼ਯਨ੍ਤਿ ਏਤ੍ਥਾਤਿ ਆਟਵਿ. ਵਿਜ੍ਝਾ ਚ ਸਾ ਆਟਵਿ ਚੇਤਿ ਵਿਜ੍ਝਾਟਵਿ, ਤਾਯ ਸਦਿਸੇ ਵਿਜ੍ਝਾਟਵਿਸਦਿਸੇ. ਏਤ੍ਥ ਪੁਰਿਮਨਯੇ ਗਾਮਾਦੀਹਿ ਆਸਨ੍ਨੋ ਵਾ ਹੋਤੁ, ਅਨਾਸਨ੍ਨੋ ਵਾ ਤੇਹਿ ਅਪਰਿਚ੍ਛਿਨ੍ਨੋ ਅਟਵਿਪਦੇਸੋ ਗਹੇਤਬ੍ਬੋ. ਪਚ੍ਛਿਮਨਯੇ ਦੂਰੋ ਮਨੁਸ੍ਸਾਨਂ ਅਨਾਗਮਨਪਥੋ ਆਟਵਿਪਦੇਸੋ ਗਹੇਤਬ੍ਬੋਤਿ ਅਯਮੇਤੇਸਂ ਵਿਸੇਸੋ. ਅਸ੍ਸਾਤਿ ਭਿਕ੍ਖੁਨੋ. ਸਮਨ੍ਤਾਤਿ ਸਮਨ੍ਤਤੋ. ਅਯਂ ਸੀਮਾਤਿ ਅਯਂ ਸਤ੍ਤਬ੍ਭਨ੍ਤਰਸੀਮਾ. ਤਤ੍ਥਾਤਿ ਸਤ੍ਤਸੁ ਅਬ੍ਭਨ੍ਤਰੇਸੁ. ਸਮਨ੍ਤਾ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਅਬ੍ਭਨ੍ਤਰੇ ਅਨ੍ਤੋਕੋਟ੍ਠਾਸੇ ਜਾਤਂ ਅਬ੍ਭਨ੍ਤਰਂ ਅਟ੍ਠਵੀਸਹਤ੍ਥਪਮਾਣਂ.

ਯਾ ਕਾਚਿ ਨਦੀ ਅਸੀਮਾਵ ਹੋਤੀਤਿ ਸਮ੍ਬਨ੍ਧੋ. ਨਦੀਸੀਮਲਕ੍ਖਣਪਤ੍ਤਾਤਿ ਨਦੀਸੀਮਲਕ੍ਖਣਂ ਪਤ੍ਤਾ. ਇਮਿਨਾ ਸੀਮਲਕ੍ਖਣਂ ਅਪਤ੍ਤਾ ਨਦੀ ਬਨ੍ਧਿਯਮਾਨਾ ਸੀਮਾਵ ਹੋਤੀਤਿ ਦਸ੍ਸੇਤਿ. ਸਾਵਧਾਰਣੇਨ ‘‘ਅਤ੍ਤਨੋ ਸਭਾਵੇਨੇਵਾ’’ਤਿ ਇਮਿਨਾ ਭਿਕ੍ਖੂਨਂ ਬਨ੍ਧਨਭਾਵੇਨਾਤਿ ਅਤ੍ਥਂ ਨਿਵਤ੍ਤੇਤਿ. ਏਤ੍ਥਾਤਿ ਨਦਿਯਂ. ਏਤ੍ਥਾਤਿ ਜਾਤਸ੍ਸਰਸਮੁਦ੍ਦੇਸੁ. ਯੇਨ ਕੇਨਚੀਤਿ ਅਨ੍ਤਮਸੋ ਤਿਰਚ੍ਛਾਨਗਤੇਨਪਿ ਯੇਨ ਕੇਨਚਿ. ਖਣਿਤ੍ਵਾ ਅਕਤੋ ਸਯਂਜਾਤੋਤਿ ਸਮ੍ਬਨ੍ਧੋ. ਇਦਂ ਹੇਤੁਅਨ੍ਤੋਗਧਵਿਸੇਸਨਂ. ਖਣਿਤ੍ਵਾ ਅਕਤਤ੍ਤਾਤਿ ਹਿ ਅਤ੍ਥੋ. ਸਯਂਜਾਤੋਤਿ ਸਯਮੇਵ ਜਾਤੋਤਿ ਏਵਕਾਰੋ ਯੋਜੇਤਬ੍ਬੋ. ਤੇਨ ਵੁਤ੍ਤਂ ‘‘ਯੇਨ ਕੇਨਚਿ ਖਣਿਤ੍ਵਾ ਅਕਤੋ’’ਤਿ. ਸੋਬ੍ਭੋਤਿ ਸਂ ਉਭੋਤਿ ਪਦਵਿਭਾਗੋ ਕਾਤਬ੍ਬੋ. ਤਤ੍ਥ ਸਂਸਦ੍ਦੋ ਸਮਨ੍ਤਤ੍ਥਵਾਚਕੋ, ਉਭਸਦ੍ਦੋ ਪੂਰਣਤ੍ਥਵਾਚਕੋ. ਤਸ੍ਮਾ ਸਮਨ੍ਤਤੋ ਆਗਤੇਨ ਉਦਕੇਨ ਉਭਤਿ ਪੂਰਤਿ ਏਤ੍ਥਾਤਿ ਸੋਬ੍ਭੋਤਿ ਵਚਨਤ੍ਥੋ ਕਾਤਬ੍ਬੋ. ਤੇਨ ਵੁਤ੍ਤਂ ‘‘ਸਮਨ੍ਤਤੋ ਆਗਤੇਨ ਉਦਕੇਨ ਪੂਰਿਤੋ ਤਿਟ੍ਠਤੀ’’ਤਿ.

ਤਤ੍ਥਾਤਿ ਨਦੀਸਮੁਦ੍ਦਜਾਤਸ੍ਸਰੇਸੁ, ਆਧਾਰੇ ਭੁਮ੍ਮਂ. ਯਂਸਦ੍ਦੋ ਠਾਨਵਿਸਯੋਤਿ ਆਹ ‘‘ਯਂ ਠਾਨ’’ਨ੍ਤਿ. ਮਜ੍ਝਿਮਸ੍ਸਾਤਿ ਥਾਮਮਜ੍ਝਿਮਸ੍ਸ. ਵਕ੍ਖਤਿ ਹਿ ‘‘ਥਾਮਮਜ੍ਝਿਮੇਨਾ’’ਤਿ. ‘‘ਸਮਨ੍ਤਤੋ’’ਤਿ ਇਮਿਨਾ ਸਮਨ੍ਤਾਤਿ ਏਤ੍ਥ ਨਿਸ੍ਸਕ੍ਕਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ‘‘ਉਦਕੁਕ੍ਖੇਪੇਨਾ’’ਤਿ ਇਮਿਨਾ ਉਦਕੁਕ੍ਖੇਪਾਤਿ ਏਤ੍ਥ ਕਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ਉਦਕਂ ਉਕ੍ਖਿਪਿਤ੍ਵਾ ਖਿਪਿਯਤਿ ਏਤ੍ਥਾਤਿ ਉਦਕੁਕ੍ਖੇਪੋ. ‘‘ਪਰਿਚ੍ਛਿਨ੍ਨ’’ਨ੍ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਅਕ੍ਖਧੁਤ੍ਤਾਤਿ ਏਤ੍ਥ ਅਕ੍ਖੋਤਿ ਪਾਸਕੋ. ਸੋ ਹਿ ਅਕਤਿ ਕੁਟਿਲਂ ਗਚ੍ਛਤਿ ਅਨੇਨਾਤਿ ਅਕ੍ਖੋਤਿ ਵੁਚ੍ਚਤਿ, ਧਵਨ੍ਤਿ ਮਰਿਯਾਦਮਤਿਕ੍ਕਮ੍ਮ ਕੀਲ਼ਾਦਿਪਸੁਤਂ ਗਚ੍ਛਨ੍ਤੀਤਿ ਧੁਤ੍ਤਾ, ਅਕ੍ਖੇਸੁ ਧੁਤ੍ਤਾ ਅਕ੍ਖਧੁਤ੍ਤਾ. ਦਾਰੁਗੁਲ਼ਨ੍ਤਿ ਸਾਰਦਾਰੁਮਯਂ ਗੁਲ਼ਂ. ‘‘ਵਾਲੁਕਂ ਵਾ’’ਤਿ ਇਮਿਨਾ ‘‘ਉਦਕੁਕ੍ਖੇਪਾ’’ਤਿ ਏਤ੍ਥ ਉਪਲਕ੍ਖਣਂ ਦਸ੍ਸੇਤਿ. ਯਤ੍ਥਾਤਿ ਯਸ੍ਮਿਂ ਪਦੇਸੇ. ਅਯਨ੍ਤਿ ਪਦੇਸੋ. ਤਸ੍ਸਾਤਿ ਉਦਕੁਕ੍ਖੇਪਸ੍ਸ.

ਏਤ੍ਥਾਤਿ ਨਦੀਸਮੁਦ੍ਦਜਾਤਸ੍ਸਰੇਸੁ. ਮੁਖਦ੍ਵਾਰਨ੍ਤਿ ਸਮੁਦ੍ਦਾਦੀਨਂ ਮੁਖਸਙ੍ਖਾਤਂ ਦ੍ਵਾਰਂ. ਸਬ੍ਬਤ੍ਥਾਤਿ ਸਬ੍ਬਾਯ ਨਦਿਯਂ. ਥੇਰਵਾਦਂ ਦਸ੍ਸੇਨ੍ਤੋ ਆਹ ‘‘ਯਂ ਪਨਾ’’ਤਿਆਦਿ. ‘‘ਯੋਜਨਂ…ਪੇ… ਵਟ੍ਟਤੀ’’ਤਿ ਯਂ ਪਨ ਵਚਨਂ ਮਹਾਸੁਮਤ੍ਥੇਰੇਨ ਵੁਤ੍ਤਨ੍ਤਿ ਯੋਜਨਾ. ਤਤ੍ਰਾਪੀਤਿ ਯੋਜਨਨਦਿਯਮ੍ਪਿ. ਪਟਿਕ੍ਖਿਤ੍ਤਾਕਾਰਂ ਵਿਤ੍ਥਾਰੇਨ੍ਤੋ ਆਹ ‘‘ਭਗਵਤਾ ਹੀ’’ਤਿਆਦਿ. ਨਦਿਯਾ ਪਮਾਣਨ੍ਤਿ ਨਦਿਯਾ ਗਮ੍ਭੀਰਪਮਾਣਮੇਵ, ਨ ਆਯਾਮਵਿਤ੍ਥਾਰਪਮਾਣਨ੍ਤਿ ਅਤ੍ਥੋ. ‘‘ਨ ਯੋਜਨਂ ਵਾ ਅਦ੍ਧਯੋਜਨਂ ਵਾ’’ਤਿ ਵਚਨਮ੍ਪਿ ਇਦਮੇਵ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਕਿਞ੍ਚਾਪਿ ਆਯਾਮਵਿਤ੍ਥਾਰਪਮਾਣਂ ਨ ਵੁਤ੍ਤਂ, ਪਭਵਤੋ ਪਨ ਯਾਵ ਮੁਖਦ੍ਵਾਰਾ ਆਯਾਮਵਿਤ੍ਥਾਰਵਸੇਨ ਕਮ੍ਮਂ ਕਾਤੁਂ ਪਹੋਨਕਨਦੀਯੇਵ ਗਹੇਤਬ੍ਬਾਤਿ ਦਟ੍ਠਬ੍ਬਾ. ਯਾ ਨਦੀਤਿ ਸਮ੍ਬਨ੍ਧੋ. ਇਮਸ੍ਸ ਸੁਤ੍ਤਸ੍ਸਾਤਿ ‘‘ਤਿਮਣ੍ਡਲ’’ਨ੍ਤਿਆਦਿਕਸ੍ਸ ਇਮਸ੍ਸ ਸੁਤ੍ਤਸ੍ਸ. ਪਭਵਤੋਤਿ ਸਮੁਦਾਗਮਤੋ. ਏਤ੍ਥਾਤਿ ਨਦਿਯਂ. ਸਬ੍ਬੇਹਿ ਭਿਕ੍ਖੂਹਿ ਠਪੇਤਬ੍ਬੋਤਿ ਸਮ੍ਬਨ੍ਧੋ. ਤਤੋਤਿ ਏਕਉਦਕੁਕ੍ਖੇਪਤੋ.

ਕਿਤ੍ਤਕਾ ਪਰਿਪੁਣ੍ਣਾ ਹੋਤੀਤਿ ਆਹ ‘‘ਸਮਤਿਤ੍ਥਿਕਾ’’ਤਿ. ਤਿਤ੍ਥੇਨ ਸਮਂ ਪਰਿਪੂਰਤੀਤਿ ਸਮਤਿਤ੍ਥਿਕਾ. ਉਦਕਸਾਟਿਕਂ ਨਿਵਾਸੇਤ੍ਵਾਪੀਤਿ ਪਿਸਦ੍ਦੋ ‘‘ਅਨਿਵਾਸੇਤ੍ਵਾਪੀ’’ਤਿ ਦਸ੍ਸੇਤਿ. ਉਦਕਸਾਟਿਕਂ ਅਨਿਵਾਸੇਨ੍ਤੋਪਿ ਵਤ੍ਥੇਨ ਅਵਿਨਾਭਾਵਤੋ ਅਞ੍ਞਂ ਨਿਵਾਸੇਤ੍ਵਾਤਿ ਅਤ੍ਥੋ ਗਹੇਤਬ੍ਬੋ. ਨਾਵਾਯ ਠਤ੍ਵਾ ਕਰਿਯਮਾਨੇ ਕਿਂ ਗਚ੍ਛਨ੍ਤਿਯਾਪਿ ਨਾਵਾਯ ਕਾਤੁਂ ਵਟ੍ਟਤੀਤਿ ਆਹ ‘‘ਗਚ੍ਛਨ੍ਤਿਯਾ ਪਨਾ’’ਤਿਆਦਿ. ‘‘ਕਸ੍ਮਾ’’ਤਿਆਦਿਨਾ ਕਾਰਣਂ ਦਸ੍ਸੇਤਿ. ਹੀਤਿ ਯਸ੍ਮਾ. ਤਨ੍ਤਿ ਉਦਕੁਕ੍ਖੇਪਮਤ੍ਤਂ. ਏਵਂ ਸਤਿ…ਪੇ… ਅਨੁਸਾਵਨਾ ਹੋਤਿ, ਤਸ੍ਮਾ ਗਚ੍ਛਨ੍ਤਿਯਾ ਨਾਵਾਯ ਕਾਤੁਂ ਨ ਵਟ੍ਟਤੀਤਿ ਯੋਜਨਾ. ‘‘ਤਸ੍ਮਾ’’ਤਿਆਦਿਨਾ ਲਦ੍ਧਗੁਣਂ ਦਸ੍ਸੇਤਿ. ਨ ਕੇਵਲਂ ਨਾਵਾਯਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਅਨ੍ਤੋਨਦਿਯ’’ਨ੍ਤਿਆਦਿ.

ਰੁਕ੍ਖਸ੍ਸਾਤਿ ਅਨ੍ਤੋਨਦਿਯਂ ਜਾਤਸ੍ਸ ਰੁਕ੍ਖਸ੍ਸ. ਸਾਖਾ ਵਾ ਪਤਿਟ੍ਠਿਤਾਤਿ ਸਮ੍ਬਨ੍ਧੋ. ਸੀਮਂ ਵਾ ਸੋਧੇਤ੍ਵਾਤਿ ਵਿਹਾਰਸੀਮਗਾਮਸੀਮਾਸੁ ਠਿਤਾਨਂ ਹਤ੍ਥਪਾਸਾਨਯਨਬਹਿਕਰਣਵਸੇਨ ਸੀਮਂ ਵਾ ਸੋਧੇਤ੍ਵਾ. ਜਾਤਰੁਕ੍ਖਸ੍ਸ ਪਵਿਟ੍ਠਸਾਖਾਯ ਵਾ ਪਾਰੋਹੇ ਵਾਤਿ ਸਮ੍ਬਨ੍ਧੋ. ਅਸ੍ਸਾਤਿ ਬਹਿਨਦਿਤੀਰੇ ਜਾਤਰੁਕ੍ਖਸ੍ਸ. ਤਤ੍ਥਾਤਿ ਖਾਣੁਕੇ.

ਤਸ੍ਸਾਤਿ ਪਾਸਾਣਦੀਪਕਸ੍ਸ. ਪੁਬ੍ਬੇ ਵੁਤ੍ਤਪ੍ਪਕਾਰੇਤਿ ਪੁਬ੍ਬੇ ਨਦੀਨਿਮਿਤ੍ਤਟ੍ਠਾਨੇ ‘‘ਅਨ੍ਵਦ੍ਧਮਾਸ’’ਨ੍ਤਿਆਦਿਨਾ (ਮਹਾਵ. ਅਟ੍ਠ. ੧੩੮) ਵੁਤ੍ਤਪ੍ਪਕਾਰੇ. ਸੋਤਿ ਪਾਸਾਣਦੀਪਕੋ. ਪੁਨ ਸੋਤਿ ਪਾਸਾਣਦੀਪਕੋਯੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਆਵਰਣਨ੍ਤਿ ਪਾਲ਼ਿਂ. ਤਨ੍ਤਿ ਆਵਰਣਂ. ਆਵਰਣੇਨ ਵਾ ਕੋਟ੍ਠਕਬਨ੍ਧੇਨ ਵਾ ਹੇਤੁਭੂਤੇਨ, ਪਚ੍ਛਿਜ੍ਜਤੀਤਿ ਸਮ੍ਬਨ੍ਧੋ. ਕੋਚਿ ਆਵਰਣਪ੍ਪਦੇਸੋ ਅਜ੍ਝੋਤ੍ਥਰਿਯਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਆਵਰਣਪ੍ਪਦੇਸੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ‘‘ਹੇਟ੍ਠਾਪਾਲ਼ਿ ਬਦ੍ਧਾ’’ਤਿ ਇਦਂ ਨਦਿਂ ਵਿਨਾਸੇਤ੍ਵਾ ਤਲ਼ਾਕਕਰਣਾਕਾਰਦਸ੍ਸਨਂ. ਏਤ੍ਥਾਤਿ ਨਦਿਯਂ, ਤਲ਼ਾਕੇ ਵਾ. ਛਡ੍ਡਿਤਮੋਦਕਨ੍ਤਿ ਤਲ਼ਾਕਰਕ੍ਖਨਤ੍ਥਂ ਏਕੇਨ ਵਾਰਿਮਗ੍ਗੇਨ ਛਡ੍ਡਿਤਂ ਉਦਕਂ. ਦੇਵੇ ਅਵਸ੍ਸਨ੍ਤੇਤਿ ਦੁਬ੍ਬੁਟ੍ਠਿਕਾਲਤ੍ਤਾ ਵਸ੍ਸਨ੍ਤਕਾਲੇਪਿ ਦੇਵੇ ਅਵਸ੍ਸਨ੍ਤੇ. ਸਾਤਿ ਨਦਿਤੋ ਨੀਹਟਮਾਤਿਕਾ. ਕਾਲਨ੍ਤਰੇਨਾਤਿ ਅਞ੍ਞੇਨ ਕਾਲੇਨ. ਉਪ੍ਪਤਿਤ੍ਵਾਤਿ ਗਾਮਨਿਗਮਾਨਂ ਉਪਰਿ ਪਤਿਤ੍ਵਾ. ਪਵਤ੍ਤਤੀਤਿ ਪੁਬ੍ਬੇ ਵੁਤ੍ਤਪਕਾਰੇ ਵਸ੍ਸਕਾਲੇ ਚਤ੍ਤਾਰੋ ਮਾਸੇ ਅਬ੍ਭੋਚ੍ਛਿਨ੍ਨਾ ਸਨ੍ਦਤਿ. ਵਿਹਾਰਸੀਮਨ੍ਤਿ ਵਿਹਾਰਸਮ੍ਬਨ੍ਧਂ ਬਦ੍ਧਸੀਮਂ.

ਸਮੁਦ੍ਦੇਪੀਤਿ ਪਿਸਦ੍ਦੋ ਨਦਿਮਪੇਕ੍ਖਤਿ. ਤਤ੍ਥਾਤਿ ਪਦੇਸੇ. ਓਤਰਿਤ੍ਵਾਤਿ ਹੇਟ੍ਠਾ ਤਰਿਤ੍ਵਾ. ‘‘ਓਸਰਿਤ੍ਵਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਸਣ੍ਠਹਨ੍ਤੀਤਿ ਉਦਕੇਨ ਸਮਂ ਤਿਟ੍ਠਨ੍ਤਿ. ਸੋਤਿ ਪਦੇਸੋ. ਉਦਕਨ੍ਤਤੋਤਿ ਉਦਕਕੋਟਿਤੋ. ਤਤ੍ਥਾਤਿ ਸਮੁਦ੍ਦੇ. ਬਾਧਤੀਤਿ ਪੀਲ਼ਯਤਿ. ਤੇਸੂਤਿ ਨਾਵਾਅਟ੍ਟਕੇਸੁ. ਤਨ੍ਤਿ ਪਿਟ੍ਠਿਪਾਸਾਣਂ. ਊਮਿਯੋਤਿ ਵੀਚਿਯੋ. ਤਾ ਹਿ ਪਰਂਪਰਾਵਸੇਨ ਉਗ੍ਗਨ੍ਤ੍ਵਾ ਸਵਿਞ੍ਞਾਣਕਾਵਿਞ੍ਞਾਣਕੇ ਮਿਯਨ੍ਤਿ ਹਿਂਸਨ੍ਤਿ, ਅਨ੍ਤੋ ਪਕ੍ਖਿਪਨ੍ਤੀਤਿ ਵਾ ਊਮਿਯੋਤਿ ਵੁਚ੍ਚਨ੍ਤਿ. ਤਤ੍ਥਾਤਿ ਪਿਟ੍ਠਿਪਾਸਾਣੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਉਦਕੇਨੇਵ ਪਿਟ੍ਠਿਪਾਸਾਣੋ ਓਤ੍ਥਰੀਯਤੀਤਿ ਯੋਜਨਾ. ਸੋਤਿ ਦੀਪਕਪਬ੍ਬਤੋ. ‘‘ਦੂਰੇ’’ਤਿ ਵਤ੍ਵਾ ਤਸ੍ਸ ਪਮਾਣਂ ਦਸ੍ਸੇਨ੍ਤੋ ਆਹ ‘‘ਮਚ੍ਛਵਧਾਨਂ ਅਨਾਗਮਨਪਥੇ’’ਤਿ. ਮਚ੍ਛਵਧਾਨਨ੍ਤਿ ਕੇਵਟ੍ਟਾਨਂ. ਤੇ ਹਿ ਯਸ੍ਮਾ ਮਚ੍ਛੇ ਹਨਨ੍ਤਿ, ਤਸ੍ਮਾ ਮਚ੍ਛਵਧਾਤਿ ਵੁਚ੍ਚਨ੍ਤਿ. ‘‘ਮਚ੍ਛਬਨ੍ਧਾਨ’’ਨ੍ਤਿਪਿ ਪਾਠੋ. ਮਚ੍ਛੇ ਬਨ੍ਧਨ੍ਤੀਤਿ ਮਚ੍ਛਬਨ੍ਧਾਤਿ ਵਚਨਤ੍ਥੋ ਕਾਤਬ੍ਬੋ. ਅਨਾਗਮਨਪਥੇਤਿ ਯਤ੍ਥ ਗਨ੍ਤ੍ਵਾ ਤਦਹੇਵ ਪਚ੍ਚਾਗਨ੍ਤ੍ਵਾ ਨ ਆਗਮਨਪਥਿਕੇ ਦੇਸੇ. ਨਤ੍ਥਿ ਆਗਮਨਪਥੋ ਏਤ੍ਥਾਤਿ ਅਨਾਗਮਨਪਥੋ, ਦੇਸੋ. ਤਸ੍ਮਿਂ ‘‘ਅਗਮਨਪਥੇ’’ਤਿਪਿ ਪਾਠੋ, ਸੋ ਅਯੁਤ੍ਤੋ. ਕਸ੍ਮਾ? ਅਗਮਨਪਥਸ੍ਸ ਨਾਧਿਪ੍ਪੇਤਤ੍ਤਾ. ਗਨ੍ਤ੍ਵਾ ਹਿ ਪੁਨ ਅਨਾਗਮਨਪਥੋਯੇਵਾਧਿਪ੍ਪੇਤੋ. ਤੇਸਨ੍ਤਿ ਮਚ੍ਛਵਧਾਨਂ. ਗਮਨਪਰਿਯਨ੍ਤਸ੍ਸਾਤਿ ਗਮਨਕੋਟਿਯਾ. ਓਰਤੋਤਿ ਓਰਭਾਗੇ ਠਿਤੋ ਦੀਪਕੋ ਵਾ ਪਬ੍ਬਤੋ ਵਾਤਿ ਯੋਜੇਤਬ੍ਬੋ. ਤਤ੍ਥਾਤਿ ਓਰਭਾਗੇ ਠਿਤੇਸੁ ਦੀਪਕਪਬ੍ਬਤੇਸੁ. ਓਤ੍ਥਰਿਤ੍ਵਾਤਿ ਪਕਤਿਉਦਕੇਨ ਓਤ੍ਥਰਿਤ੍ਵਾ. ਤਤ੍ਥਾਤਿ ਓਤ੍ਥਰਿਤ੍ਵਾ ਠਿਤੇ ਸਮੁਦ੍ਦੇ.

ਕਰੋਨ੍ਤੇਹਿਪਿ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਯਤ੍ਥਾਤਿ ਯਸ੍ਮਿਂ ਸਰੇ. ਅਯਨ੍ਤਿ ਅਯਂ ਸਰੋ, ਨ ਜਾਤਸ੍ਸਰੋ ਹੋਤਿ. ਅਯਂ ਸਰੋ ਗਾਮਖੇਤ੍ਤਸਙ੍ਖ੍ਯਮੇਵ ਗਚ੍ਛਤੀਤਿ ਯੋਜਨਾ. ਤਤ੍ਥਾਤਿ ਸਰੇ. ਯਤ੍ਥ ਪਨਾਤਿ ਯਸ੍ਮਿਂ ਸਰੇ ਪਨ. ਤਸ੍ਸਾਤਿ ਜਾਤਸ੍ਸਰਸ੍ਸ. ਤਤ੍ਥਾਤਿ ਪਦੇਸੇ. ਸਚੇ ਗਮ੍ਭੀਰਂ ਉਦਕਂ ਹੋਤੀਤਿ ਯੋਜਨਾ. ਤਤ੍ਥਾਤਿ ਅਟ੍ਟਕੇ. ਏਤ੍ਥਾਤਿ ਜਾਤਸ੍ਸਰੇ, ਠਿਤੇਸੁ ਪਿਟ੍ਠਿਪਾਸਾਣਦੀਪਕੇਸੂਤਿ ਯੋਜਨਾ. ਪਹੋਨਕਜਾਤਸ੍ਸਰੋਤਿ ਸਙ੍ਘਕਮ੍ਮਂ ਕਾਤੁਂ ਪਹੋਨਕੋ ਜਾਤਸ੍ਸਰੋ. ‘‘ਸੁਕ੍ਖਤੀ’’ਤਿ ਵਤ੍ਵਾ ਤਦੇਵ ਸਮਤ੍ਥੇਤੁਂ ਵੁਤ੍ਤਂ ‘‘ਨਿਰੁਦਕੋ’’ਤਿ. ਤਤ੍ਥਾਤਿ ਜਾਤਸ੍ਸਰੇ. ਸਚੇ ਨਿਰੁਦਕਮਤ੍ਤੇਨ ਗਾਮਖੇਤ੍ਤਂ ਗਚ੍ਛਤਿ. ਕਦਾ ਗਚ੍ਛਤੀਤਿ ਆਹ ‘‘ਸਚੇ ਪਨੇਤ੍ਥਾ’’ਤਿਆਦਿ. ਤਤ੍ਥ ਏਤ੍ਥਾਤਿ ਜਾਤਸ੍ਸਰੇ. ਪੋਕ੍ਖਰਣੀਆਦੀਨੀਤਿ ਏਤ੍ਥ ਆਦਿਸਦ੍ਦੇਨ ਉਦਕਮਾਤਿਕਾਦਯੋ ਸਙ੍ਗਣ੍ਹਾਤਿ. ਯਦਾ ਖਣਨ੍ਤਿ, ਤਦਾਤਿ ਪਾਠਸੇਸੋ ਯੋਜੇਤਬ੍ਬੋ. ‘‘ਤਂ ਠਾਨ’’ਨ੍ਤਿ ਵੁਤ੍ਤੇਪਿ ਨ ਖਣਨਟ੍ਠਾਨਮੇਵ ਗਹੇਤਬ੍ਬਂ, ‘‘ਏਤ੍ਥਾ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਸਬ੍ਬੋਯੇਵ ਜਾਤਸ੍ਸਰੋ ਗਹੇਤਬ੍ਬੋ. ਨ ਕੇਵਲਂ ਅਜਾਤਸ੍ਸਰਮਤ੍ਤਂ ਹੋਤਿ, ਅਥ ਖੋ ਗਾਮਖੇਤ੍ਤਨ੍ਤਿ ਆਹ ‘‘ਗਾਮਸੀਮਾਸਙ੍ਖ੍ਯਮੇਵ ਗਚ੍ਛਤੀ’’ਤਿ.

ਨਨ੍ਤਿ ਜਾਤਸ੍ਸਰਂ. ਪੂਰੇਤ੍ਵਾਤਿ ਮਤ੍ਤਿਕਾਦੀਹਿ ਪੂਰੇਤ੍ਵਾ. ਪਾਲ਼ਿਨ੍ਤਿ ਆਵਰਣਂ. ਸਬ੍ਬਮੇਵ ਨਨ੍ਤਿ ਸਕਲਮੇਵ ਤਂ ਜਾਤਸ੍ਸਰਂ. ਲੋਣੀਪੀਤਿ ਪਿਸਦ੍ਦੇਨ ਨ ਕੇਵਲਂ ਸੋਬ੍ਭੋਯੇਵ ਜਾਤਸ੍ਸਰਸਙ੍ਖ੍ਯਂ ਗਚ੍ਛਤਿ, ਅਥ ਖੋ ਲੋਣੀਪੀਤਿ ਦਸ੍ਸੇਤਿ. ਉਦਕਟ੍ਠਾਨੋਕਾਸੇਤਿ ਉਦਕਸ੍ਸ ਠਾਨੇ ਓਕਾਸੇ.

੧੪੮. ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੀਤਿ ਏਤ੍ਥ ‘‘ਸੀਮਾਯ ਸੀਮ’’ਨ੍ਤਿ ਪਦਾਨਂ ਸਮ੍ਬਨ੍ਧਾਪੇਕ੍ਖਤ੍ਤਾ ਤੇਸਂ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਅਤ੍ਤਨੋ ਪਰੇਸ’’ਨ੍ਤਿ. ‘‘ਬਦ੍ਧਸੀਮ’’ਨ੍ਤਿ ਇਮਿਨਾ ‘‘ਸੀਮ’’ਨ੍ਤਿ ਸਾਮਞ੍ਞਤੋ ਵੁਤ੍ਤੇਪਿ ਵਿਸੇਸਤੋ ਬਦ੍ਧਸੀਮਾਯੇਵ ਗਹੇਤਬ੍ਬਾਤਿ ਦਸ੍ਸੇਤਿ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਸਂਸਟ੍ਠਵਿਟਪਾਤਿ ਅਞ੍ਞਮਞ੍ਞਂ ਆਸਨ੍ਨਤ੍ਤਾ ਸਂਸਟ੍ਠੋ ਵਿਟਪੋ ਏਤੇਸਨ੍ਤਿ ਸਂਸਟ੍ਠਵਿਟਪਾ. ‘‘ਸਂਸਟ੍ਠਵਿਟਪਾ’’ਤਿ ਇਦਂ ਉਪਲਕ੍ਖਣਮਤ੍ਤਂ, ਮੂਲਾਨਿਪਿ ਸਂਸਟ੍ਠਾਨਿਯੇਵਾਤਿ ਦਟ੍ਠਬ੍ਬਂ. ਤੇਸੂਤਿ ਦ੍ਵੀਸੁ ਰੁਕ੍ਖੇਸੁ. ਵਿਹਾਰਸੀਮਾ ਚਾਤਿ ਪੋਰਾਣਕਵਿਹਾਰਸੀਮਾ ਚ. ਅਨ੍ਤੋ ਕਤ੍ਵਾਤਿ ਸੀਮਾਯ ਅਨ੍ਤੋ ਕਤ੍ਵਾ. ਅਥ ਪਚ੍ਛਾਤਿ ਏਤ੍ਥ ‘‘ਪਚ੍ਛਾ’’ਤਿ ਇਮਿਨਾ ਅਥਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਏਵਂ ਕੇ ਅਕਂਸੂਤਿ ਆਹ ‘‘ਏਵਂ ਛਬ੍ਬਗ੍ਗਿਯਾ ਅਕਂਸੂ’’ਤਿ. ਤੇਨਾਤਿ ਕਰਣੇਨ.

ਅਜ੍ਝੋਤ੍ਥਰਣਾਕਾਰਂ ਦਸ੍ਸੇਨ੍ਤੋ ਆਹ ‘‘ਪਰੇਸ’’ਨ੍ਤਿਆਦਿ. ਤਸ੍ਸਾਤਿ ਬਦ੍ਧਸੀਮਾਯ. ਪਦੇਸਨ੍ਤਿ ਭਿਕ੍ਖੂਹਿ ਕਮ੍ਮਂ ਕਾਤੁਂ ਪਹੋਨਕਂ ਏਕਦੇਸਂ. ਅਨ੍ਤਮਸੋ ਏਕਸ੍ਸਪਿ ਭਿਕ੍ਖੁਨੋ ਠਤ੍ਵਾ ਅਧਿਟ੍ਠਾਨੁਪੋਸਥਂ ਕਾਤੁਂ ਪਹੋਨਕਂ ਪਦੇਸਂ. ਕਮ੍ਮਂ ਕਾਤੁਂ ਅਪ੍ਪਹੋਨਕਪਦੇਸਂ ਅਨ੍ਤੋ ਕਰਿਤ੍ਵਾ ਬਨ੍ਧਨ੍ਤਾ ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤਿ ਨਾਮ. ਸੀਮਾਯ ਉਪਚਾਰੋਤਿ ਪਚ੍ਛਾ ਬਨ੍ਧਿਤਬ੍ਬਾਯ ਸੀਮਾਯ ਉਪਚਾਰੋ. ‘‘ਵਡ੍ਢਨ੍ਤੋ ਸੀਮਾਸਙ੍ਕਰਂ ਕਰੋਤੀ’’ਤਿ ਇਮਿਨਾ ਸਚੇ ਅਵਡ੍ਢਨਕੋ ਪਾਸਾਣੋ ਹੋਤਿ, ਦ੍ਵਿਨ੍ਨਮ੍ਪਿ ਸੀਮਾਨਂ ਨਿਮਿਤ੍ਤਂ ਕਾਤੁਂ ਵਟ੍ਟਤੀਤਿ ਦਸ੍ਸੇਤਿ.