੨. ਉਪੋਸਥਕ੍ਖਨ੍ਧਕਂ

੬੮. ਸਨ੍ਨਿਪਾਤਾਨੁਜਾਨਨਾਦਿਕਥਾ

੧੩੨. ਉਪੋਸਥਕ੍ਖਨ੍ਧਕੇ ਤਰਨ੍ਤਿ ਓਤਰਨ੍ਤਿ ਏਤ੍ਥਾਤਿ ਤਿਤ੍ਥਂ, ਉਦਕਤਿਤ੍ਥਂ, ਤਿਤ੍ਥਂ ਵਿਯਾਤਿ ਤਿਤ੍ਥਂ, ਲਦ੍ਧੀਤਿ ਆਹ ‘‘ਤਿਤ੍ਥਂ ਵੁਚ੍ਚਤਿ ਲਦ੍ਧੀ’’ਤਿ. ਲਦ੍ਧਿ ਹਿ ਬਹੂਨਂ ਲਦ੍ਧਿਕਾਨਂ ਓਤਰਣਟ੍ਠਾਨਤ੍ਤਾ ਤਿਤ੍ਥਂ ਨਾਮ. ਅਞ੍ਞਨ੍ਤਿ ਸਾਸਨਿਕਲਦ੍ਧਿਤੋ ਅਞ੍ਞਂ. ਏਤੇਸਨ੍ਤਿ ਪਰਿਬ੍ਬਾਜਕਾਨਂ. ਇਤੋਤਿ ਇਮਸ੍ਮਾ ਸਾਸਨਿਕਲਦ੍ਧਿਤੋ. ਯਨ੍ਤਿ ਯਂ ਧਮ੍ਮਜਾਤਂ. ਤੇਸਨ੍ਤਿ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ. ਤੇ ਲਭਨ੍ਤੀਤਿ ਏਤ੍ਥ ਤਸਦ੍ਦੋ ਮਨੁਸ੍ਸਵਿਸਯੋਤਿ ਆਹ ‘‘ਤੇ ਮਨੁਸ੍ਸਾ’’ਤਿ. ਮੂਗਸੂਕਰਾਤਿ ਏਤ੍ਥ ਥੂਲਸਰੀਰਸ੍ਸ ਸੂਕਰਸ੍ਸ ਸਦ੍ਦਮਤ੍ਤਸ੍ਸਾਪਿ ਅਭਾਵਤੋ ਮੂਗਸੂਕਰੋ ਨਾਮਾਤਿ ਆਹ ‘‘ਥੂਲਸਰੀਰਸੂਕਰਾ’’ਤਿ.

੧੩੫. ਅਸ੍ਸਾਤਿ ਭਿਕ੍ਖੁਨੋ. ਸੋਤਿ ਸਮ੍ਪਜਾਨਮੁਸਾਵਾਦੋ. ਕਿਨ੍ਤਿ ਕਿਂ ਆਪਤ੍ਤਿ. ਦੁਕ੍ਕਟਨ੍ਤਿ ਪਦਸ੍ਸ ਦੁਕ੍ਕਟਂ ਕਮ੍ਮਨ੍ਤਿ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਦੁਕ੍ਕਟਾਪਤ੍ਤੀ’’ਤਿ. ਸਾ ਚ ਖੋ ਦੁਕ੍ਕਟਾਪਤ੍ਤਿ ਮੁਸਾਵਾਦਲਕ੍ਖਣੇਨ ਨ ਹੋਤੀਤਿ ਯੋਜਨਾ. ਕੇਨ ਹੋਤੀਤਿ ਆਹ ‘‘ਭਗਵਤੋ ਪਨ ਵਚਨੇਨਾ’’ਤਿ. ਵਚਨੇਨਾਤਿ ਚ ‘‘ਸਮ੍ਪਜਾਨਮੁਸਾਵਾਦੇ ਕਿਂ ਹੋਤਿ? ਦੁਕ੍ਕਟਂ ਹੋਤੀ’’ਤਿ (ਮਹਾਵ. ੧੩੫) ਵਚਨੇਨ. ਅਕਿਰਿਯਸਮੁਟ੍ਠਾਨਾਤਿ ਆਵਿ ਕਤ੍ਤਬ੍ਬਾਯ ਆਪਤ੍ਤਿਯਾ ਅਕਰਣੇਨ ਅਕਿਰਿਯਸਮੁਟ੍ਠਾਨਾ.

ਮਨੁਜੇਨਾਤਿ ਮਨੁਸ੍ਸੇਨ. ਵਾਚਾਤਿ ਵਾਚਾਯ. ਯਕਾਰਸ੍ਸ ਹਿ ਲੋਪੋ. ਗਿਰਨ੍ਤਿ ਸਦ੍ਦਂ. ਪਰੇਤਿ ਅਞ੍ਞੇ ਪੁਗ੍ਗਲੇ. ਵਾਚਸਿਕਨ੍ਤਿ ਵਾਚਾਤੋ ਸਮੁਟ੍ਠਿਤਂ. ਅਯਂ ਪਨੇਤ੍ਥ ਯੋਜਨਾ – ਭਿਕ੍ਖੁ ਕੇਨਚਿ ਆਸਨ੍ਨੇ ਠਿਤੇਨ ਮਨੁਜੇਨ ਵਾਚਾਯ ਅਨਾਲਪਨ੍ਤੋ ਹੋਤਿ, ਪਰੇ ਦੂਰੇ ਠਿਤੇ ਪੁਗ੍ਗਲੇ ਸਨ੍ਧਾਯ ਗਿਰਂ ਮਹਾਸਦ੍ਦਂ ਨੋ ਚ ਭਣੇਯ੍ਯ, ਏਵਮ੍ਪਿ ਵਾਚਸਿਕਮੇਵ ਆਪਜ੍ਜੇਯ੍ਯਾਤਿ.

ਅਨ੍ਤਰਾਯਿਕੋਤਿ ਏਤ੍ਥ ਕਰੋਤ੍ਯਤ੍ਥੇ ਣਿਕਪਚ੍ਚਯੋਤਿ ਆਹ ‘‘ਅਨ੍ਤਰਾਯਕਰੋ’’ਤਿ. ‘‘ਕਿਮਤ੍ਥਾਯਾ’’ਤਿ ਇਮਿਨਾ ਕਿਸ੍ਸਾਤਿ ਏਤ੍ਥ ਤਦਤ੍ਥੇ ਚਤੁਤ੍ਥੀਤਿ ਦਸ੍ਸੇਤਿ, ਹੇਤ੍ਵਤ੍ਥੋਪਿ ਯੁਜ੍ਜਤੇਵ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਦੁਤਿਯਸ੍ਸ ਝਾਨਸ੍ਸ ਅਧਿਗਮਾਯਾ’’ਤਿਆਦੀਸੁ. ਇਤੀਤਿਆਦਿ ਨਿਗਮਨਂ. ਉਦ੍ਦੇਸਤੋ ਚਾਤਿ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ’’ਤਿਆਦਿਉਦ੍ਦੇਸਤੋ ਚ. ਨਿਦ੍ਦੇਸਤੋ ਚਾਤਿ ‘‘ਪਾਤਿਮੋਕ੍ਖਨ੍ਤਿ ਆਦਿਮੇਤ’’ਨ੍ਤਿਆਦਿਨਿਦ੍ਦੇਸਤੋ ਚ.

੧੩੬. ਦੇਵਸਿਕਨ੍ਤਿ ਏਤ੍ਥ ਣਿਕਪਚ੍ਚਯੋ ਵਿਚ੍ਛਤ੍ਥੇ ਹੋਤੀਤਿ ਆਹ ‘‘ਦਿਵਸੇ ਦਿਵਸੇ’’ਤਿ. ਤਤਿਯੇ ਚ ਸਤ੍ਤਮੇ ਚ ਪਕ੍ਖੇਤਿ ਏਕਸ੍ਸ ਉਤੁਨੋ ਅਟ੍ਠਸੁ ਪਕ੍ਖੇਸੁ ਤਤਿਯੇ ਚ ਸਤ੍ਤਮੇ ਚ ਪਕ੍ਖੇ. ‘‘ਵਚਨਤੋ’’ਤਿ ਪਦਂ ‘‘ਵਟ੍ਟਤੀ’’ਤਿ ਪਦੇ ਞਾਪਕਹੇਤੁ. ਤਥਾਰੂਪੇ ਪਚ੍ਚਯੇਤਿ ਤਥਾਰੂਪੇ ਵਿਕਤਿਚਾਰਿਤ੍ਤਸਙ੍ਖਾਤੇ ਪਚ੍ਚਯੇ. ਅਨੁਵਤ੍ਤਿਤਬ੍ਬਨ੍ਤਿ ਅਨੁਮਤਿਂ ਵਤ੍ਤਿਤਬ੍ਬਂ. ਵਚਨਤੋਪੀਤਿ ਪਿਸਦ੍ਦੋ ਪੁਬ੍ਬੇ ਞਾਪਕਹੇਤੁਂ ਸਮ੍ਪਿਣ੍ਡੇਤਿ. ਏਤਨ੍ਤਿ ‘‘ਯਸ੍ਮਿਂ ਤਸ੍ਮਿਂ ਚਾਤੁਦ੍ਦਸੇ ਵਾ ਪਨ੍ਨਰਸੇ ਵਾ ਉਦ੍ਦਿਸਿਤੁਂ ਵਟ੍ਟਤੀ’’ਤਿ ਵਚਨਂ.

੭੧. ਸੀਮਾਨੁਜਾਨਨਕਥਾ

੧੩੮. ਨਿਮਿਤ੍ਤਾ ਕਿਤ੍ਤੇਤਬ੍ਬਾਤਿ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਨਿਕਾਰਸ੍ਸ ਹਿ ਆਕਾਰੋ. ਨਿਮਿਤ੍ਤਂ ਕਤੋਤਿ ਏਸੋ ਪਬ੍ਬਤੋ ਨਿਮਿਤ੍ਤਂ ਕਤੋਤਿ ਯੋਜਨਾ. ਏਸੇਵ ਨਯੋ ਪਰਤੋਪਿ. ‘‘ਏਸੇਵ ਨਯੋ’’ਤਿ ਇਮਿਨਾ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ? ਪਾਸਾਣੋ ਭਨ੍ਤੇ, ਏਸੋ ਪਾਸਾਣੋ ਨਿਮਿਤ੍ਤ’’ਨ੍ਤਿ ਅਤ੍ਥਂ ਅਤਿਦਿਸਤਿ. ਏਸੇਵ ਨਯੋ ਸੇਸੇਸੁਪਿ. ਕੇਵਲਂ ਪਨ ਵਨਉਦਕੇਸੁ ‘‘ਏਤਂ ਵਨਂ, ਏਤਂ ਉਦਕ’’ਨ੍ਤਿ ਵਤ੍ਤਬ੍ਬਂ. ਨਦਿਯਂ ‘‘ਏਸਾ ਨਦੀ’’ਤਿ ਵਤ੍ਤਬ੍ਬਾ. ਏਤ੍ਥ ਪਨਾਤਿ ਏਤਿਸ੍ਸਂ ਉਤ੍ਤਰਾਯਂ ਅਨੁਦਿਸਾਯਂ ਪਨ. ਹੀਤਿ ਫਲਜੋਤਕੋ. ਤਤ੍ਥਾਤਿ ‘‘ਨਿਮਿਤ੍ਤਾ ਕਿਤ੍ਤੇਤਬ੍ਬਾ’’ਤਿ ਵਚਨੇ. ਸੀਮਮਣ੍ਡਲਨ੍ਤਿ ਸੀਮਬਿਮ੍ਬਂ. ਸਮ੍ਬਨ੍ਧਨ੍ਤੇਨਾਤਿ ਪੁਰਿਮਨਿਮਿਤ੍ਤੇਨ ਪਚ੍ਛਿਮਨਿਮਿਤ੍ਤਂ ਸਮ੍ਬਨ੍ਧਨ੍ਤੇਨ. ਇਮਿਨਾ ਏਕਨ੍ਤਰਿਕਾਦਿਵਸੇਨ ਨਿਮਿਤ੍ਤਕਿਤ੍ਤਨਂ ਨ ਵਟ੍ਟਤਿ ਨਿਮਿਤ੍ਤੇਨਪਿ ਨਿਮਿਤ੍ਤਾਨਂ ਸਮ੍ਬਨ੍ਧਾਭਾਵਤੋਤਿ ਦਸ੍ਸੇਤਿ. ਪੁਰਿਮਨਿਮਿਤ੍ਤੇਨ ਪਚ੍ਛਿਮਨਿਮਿਤ੍ਤਸ੍ਸ ਸਮ੍ਬਨ੍ਧੇ ਸਤਿ ਅਜ੍ਜ ਏਕਂ ਨਿਮਿਤ੍ਤਂ ਕਿਤ੍ਤੇਤ੍ਵਾ ਸ੍ਵੇ ਏਕਂ ਨਿਮਿਤ੍ਤਂ ਕਿਤ੍ਤੇਤ੍ਵਾਤਿ ਏਵਂ ਕਾਲਨ੍ਤਰੇਪਿ ਨਿਮਿਤ੍ਤਂ ਕਿਤ੍ਤੇਤ੍ਵਾ ਸਮ੍ਮਨਿਤੁਂ ਵਟ੍ਟਤੀਤਿ ਵਦਨ੍ਤਿ.

ਪਬ੍ਬਤੋਤਿ ਏਤ੍ਥ ਪਬ੍ਬਂ ਵੁਚ੍ਚਤਿ ਫਲ਼ੁ, ਤਂ ਏਤਸ੍ਮਿਂ ਅਤ੍ਥੀਤਿ ਪਬ੍ਬਤੋ. ਵਾਲਿਕਰਾਸਿਸ੍ਸ ਸੁਦ੍ਧਪਂਸੁਪਬ੍ਬਤਪਸਙ੍ਗਤ੍ਤਾ ਵੁਤ੍ਤਂ ‘‘ਵਾਲਿਕਰਾਸਿ ਪਨ ਨ ਵਟ੍ਟਤੀ’’ਤਿ. ਇਤਰੋਪੀਤਿ ਵਾਲਿਕਰਾਸਿਤੋ ਅਞ੍ਞੋਪਿ ਤਿਵਿਧੋ ਪਬ੍ਬਤੋ. ਹਤ੍ਥਿਪ੍ਪਮਾਣਤੋਤਿ ਅਡ੍ਢਟ੍ਠਮਰਤਨਹਤ੍ਥਿਪਮਾਣਤੋ. ਚਤੂਸੁ ਦਿਸਾਸੂਤਿ ਵਿਹਾਰਸ੍ਸ ਚਤੂਸੁ ਦਿਸਾਸੁ. ਚਤੂਹਿ ਵਾ ਤੀਹਿ ਵਾਤਿ ਏਤ੍ਥ ਵਾਸਦ੍ਦੇਨ ਤਤੋ ਅਧਿਕਾਨਿਪਿ ਗਹੇਤਬ੍ਬਾਨਿ. ਏਕੇਨ ਵਾ ਨਿਮਿਤ੍ਤੇਨਾਤਿ ਯੋਜਨਾ. ਇਤੋਤਿ ਪਬ੍ਬਤਨਿਮਿਤ੍ਤਤੋ. ਤਸ੍ਮਾਤਿ ਯਸ੍ਮਾ ਏਕੇਨ ਨਿਮਿਤ੍ਤੇਨ ਨ ਵਟ੍ਟਤਿ, ਤਸ੍ਮਾ. ਤਨ੍ਤਿ ਪਬ੍ਬਤਂ. ਤਸ੍ਮਾਤਿ ਏਕਸ੍ਸੇਵ ਨਿਮਿਤ੍ਤਸ੍ਸ ਕਿਤ੍ਤਿਤਤ੍ਤਾ. ਯੋ ਪਬ੍ਬਤੋ ਅਤ੍ਥਿ, ਤਂ ਪਬ੍ਬਤਨ੍ਤਿ ਯੋਜਨਾ. ਅਨ੍ਤੋਤਿ ਪਬ੍ਬਤਸ੍ਸ ਅਨ੍ਤੋ.

ਤਤਿਯਭਾਗਂ ਵਾਤਿ ਏਤ੍ਥ ਵਾਸਦ੍ਦੇਨ ਪਠਮਭਾਗੋਪਿ ਏਕਦੇਸੋਪਿ ਗਹੇਤਬ੍ਬੋ. ਤਸ੍ਸਾਤਿ ਤਤ੍ਤਕਸ੍ਸ ਪਦੇਸਸ੍ਸ. ਤਤਿਯਭਾਗਾਦਿਤੋ ਅਪਰਂ ਸਬ੍ਬਪਬ੍ਬਤਂ ਅਨ੍ਤੋਕਤ੍ਵਾ ਸਮ੍ਮਤਂ ਦਸ੍ਸੇਨ੍ਤੋ ਆਹ ‘‘ਸਚੇ’’ਤਿਆਦਿ.

ਪਾਸਾਣਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਪਸਤਿ ਘਨਭਾਵੇਨ ਬਨ੍ਧਤੀਤਿ ਪਾਸਾਣੋ. ਅਯਗੁਲ਼ੋਪਿ ਪਾਸਾਣਸਙ੍ਖਮੇਵ ਗਚ੍ਛਤਿ ਤੇਨ ਤਸ੍ਸ ਸਦਿਸਤ੍ਤਾ. ਅਯਗੁਲ਼ੋਪੀਤਿ ਏਤ੍ਥ ਪਿਸਦ੍ਦੇਨ ਤਮ੍ਬਕਂਸਵਟ੍ਟਲੋਹਸੁਵਣ੍ਣਰਜਤਾਦਯੋਪਿ ਸਙ੍ਗਣ੍ਹਾਤਿ. ਯੋ ਕੋਚੀਤਿ ਸਿਲਾਪਵਾਲ਼ਮਣਿਆਦੀਸੁ ਯੋ ਕੋਚਿ. ਦ੍ਵਤ੍ਤਿਂਸਪਲਗੁਲ਼ਪਿਣ੍ਡਪਰਿਮਾਣਤਾ ਸਣ੍ਠਾਨਤੋ ਗਹੇਤਬ੍ਬਾ, ਨ ਤੁਲਿਤ੍ਵਾ ਗਣਨਵਸੇਨ. ਖੁਦ੍ਦਕਤਰੋ ਪਾਸਾਣੋਤਿ ਯੋਜਨਾ. ਯੋ ਪਿਟ੍ਠਿਪਾਸਾਣੋ ਵਾ ਯੋ ਉਟ੍ਠਿਤਪਾਸਾਣੋ ਵਾਤਿ ਯੋਜਨਾ ਕਾਤਬ੍ਬਾ – ਉਤ੍ਤਰਵਾਕ੍ਯੇ ਤਸਦ੍ਦਸ੍ਸ ਅਨਿਯਮਨਿਦ੍ਦੇਸਵਚਨਤ੍ਤਾ ‘‘ਪਾਸਾਣਸਙ੍ਖਂਯੇਵਾ’’ਤਿ ਏਤ੍ਥ ਏਵਕਾਰੇਨ ‘‘ਨ ਪਬ੍ਬਤਸਙ੍ਖ’’ਨ੍ਤਿ ਅਤ੍ਥਂ ਦਸ੍ਸੇਤਿ. ਮਹਤੋ ਪਿਟ੍ਠਿਪਾਸਾਣਸ੍ਸਾਤਿ ਆਯਾਮਵਿਤ੍ਥਾਰੁਬ੍ਬੇਧਤੋ ਮਹਨ੍ਤਸ੍ਸ ਪਿਟ੍ਠਿਪਾਸਾਣਸ੍ਸ ਸਕ੍ਕਸ੍ਸ ਪਣ੍ਡੁਕਮ੍ਬਲਪਿਟ੍ਠਿਪਾਸਾਣਸ੍ਸ ਵਿਯ. ਤਨ੍ਤਿ ਪਿਟ੍ਠਿਪਾਸਾਣਂ. ਨ ਵਟ੍ਟਤੀਤਿ ਕਿਤ੍ਤੇਤੁਂ ਨ ਵਟ੍ਟਤਿ. ਹੀਤਿ ਲਦ੍ਧਦੋਸਜੋਤਕੋ. ਤਨ੍ਤਿ ਪਿਟ੍ਠਿਪਾਸਾਣਂ. ਸੀਮਾਯਾਤਿ ਸੀਮਤੋ. ਵਿਹਾਰੋਪੀਤਿ ਨ ਕੇਵਲਂ ਨਿਮਿਤ੍ਤਮੇਵ, ਵਿਹਾਰੋਪਿ. ਪਿਟ੍ਠਿਪਾਸਾਣੋ ਨ ਕਿਤ੍ਤੇਤਬ੍ਬੋਤਿ ਸਮ੍ਬਨ੍ਧੋ. ਕਿਤ੍ਤੇਤ੍ਵਾਤਿ ਏਤ੍ਥ ‘‘ਪਿਟ੍ਠਿਪਾਸਾਣ’’ਨ੍ਤਿ ਯੋਜੇਤਬ੍ਬਂ.

ਵਨਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਵਨਿਯਤਿ ਮਯੂਰਕੋਕਿਲਾਦੀਹਿ ਸਤ੍ਤੇਹਿ ਸਮ੍ਭਜਿਯਤੀਤਿ ਵਨਂ, ਵਨਨ੍ਤਿ ਸਮ੍ਭਜਨ੍ਤਿ ਏਤ੍ਥਾਤਿ ਵਾ ਵਨਂ. ਤਚੋ ਏਵ ਸਾਰੋ ਏਤੇਸਨ੍ਤਿ ਤਚਸਾਰੋ, ਤਾਲਨਾਲ਼ਿਕੇਰਾਦਯੋ. ਆਦਿਸਦ੍ਦੇਨ ਵੇਣੁਆਦਯੋ ਸਙ੍ਗਣ੍ਹਾਤਿ. ਅਨ੍ਤੋ ਸਾਰੋ ਏਤੇਸਨ੍ਤਿ ਅਨ੍ਤੋਸਾਰਾ, ਸਾਕਸਾਲਾਦਯੋ. ਆਦਿਸਦ੍ਦੇਨ ਖਦਿਰਾਦਯੋ ਸਙ੍ਗਣ੍ਹਾਤਿ. ਅਨ੍ਤੋਸਾਰਮਿਸ੍ਸਕਾਨਨ੍ਤਿ ਅਨ੍ਤੋਸਾਰੇਹਿ ਰੁਕ੍ਖੇਹਿ ਮਿਸ੍ਸਕਾਨਂ. ਰੁਕ੍ਖਾਨਂ ਵਨਨ੍ਤਿ ਏਤ੍ਥ ਅਵਯਵਅਵਯਵਿਭਾਵੇਨ ਸਮ੍ਬਨ੍ਧੋ ਵੇਦਿਤਬ੍ਬੋ. ਇਮਿਨਾ ਤਿਣਵਨਂ ਰੁਕ੍ਖਵਨਨ੍ਤਿ ਏਤ੍ਥ ‘‘ਤਿਣਾਨਂ ਵਨ’’ਨ੍ਤਿ ਵਾ ‘‘ਰੁਕ੍ਖਾਨਂ ਵਨ’’ਨ੍ਤਿ ਵਾ ਅਤ੍ਥਂ ਦਸ੍ਸੇਤਿ. ਤਿਣਮੇਵ ਵਨਂ, ਰੁਕ੍ਖੋਯੇਵ ਵਨਨ੍ਤਿ ਅਤ੍ਥੋਪਿ ਯੁਜ੍ਜਤੇਵ. ਚਤ੍ਤਾਰੋ ਵਾ ਪਞ੍ਚ ਵਾ ਰੁਕ੍ਖਾਤਿ ਚਤੁਪਞ੍ਚਰੁਕ੍ਖਾ, ਤੇ ਮਤ੍ਤਂ ਪਮਾਣਮੇਤ੍ਥਾਤਿ ਚਤੁਪਞ੍ਚਰੁਕ੍ਖਮਤ੍ਤਂ ਵਨਂ, ਤਤੋਤਿ ਚਤੁਪਞ੍ਚਰੁਕ੍ਖਮਤ੍ਤਤੋ. ਏਕਦੇਸਨ੍ਤਿ ਵਨਸ੍ਸ ਏਕਦੇਸਂ. ਵਨਮਜ੍ਝੇਤਿ ਵਨਸ੍ਸ ਵੇਮਜ੍ਝੇ, ਵਨਸ੍ਸੂਪਰੀਤਿ ਅਤ੍ਥੋ. ਰੁਕ੍ਖਨ੍ਤਰੇਸੁ ਏਵ ਹਿ ਵਿਹਾਰਂ ਕਰੋਨ੍ਤਿ. ਏਕਦੇਸਨ੍ਤਿ ਵਨਸ੍ਸ ਏਕਦੇਸਂ. ਤਤ੍ਥਾਤਿ ਵਨੇ. ‘‘ਠਿਤਵਨ’’ਨ੍ਤਿ ਪਦਂ ‘‘ਕਿਤ੍ਤੇਤ੍ਵਾ’’ਤਿ ਪਦੇ ਅਵੁਤ੍ਤਕਮ੍ਮਂ, ‘‘ਨ ਕਿਤ੍ਤੇਤਬ੍ਬ’’ਨ੍ਤਿ ਪਦੇ ਵੁਤ੍ਤਕਮ੍ਮਂ.

ਰੁਕ੍ਖਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਰੁਕ੍ਖਿਯਤਿ ਫਲਾਦਿਕਾਮੇਹਿ ਸਂਵਰਿਯਤਿ ਰਕ੍ਖਿਯਤੀਤਿ ਰੁਕ੍ਖੋ, ਮਹਿਯਂ ਰੁਹਤੀਤਿ ਵਾ ਰੁਕ੍ਖੋ. ਜੀਵਮਾਨਕੋਤਿ ਲੋਕਵੋਹਾਰਵਸੇਨ ਮੂਲਙ੍ਕੁਰਾਦਿਹਰਿਤਸਙ੍ਖਾਤਜੀਵਮਾਨਕੋ. ਪਰਿਣਾਹਤੋਤਿ ਵਿਸਾਲਭਾਵਤੋ. ਸੂਚਿਦਣ੍ਡਕਪਮਾਣੋਤਿ ਸੂਚਿਯਾ ਲੇਖਨਿਯਾ ਦਣ੍ਡਭੂਤਵੇਲ਼ੁਪਮਾਣੋ. ਸੋ ਵੇਲ਼ੁ ਕਨਿਟ੍ਠਙ੍ਗੁਲਿਪਮਾਣੋਤਿ ਦਟ੍ਠਬ੍ਬੋ. ਤਤੋਤਿ ਅਟ੍ਠਙ੍ਗੁਲੁਬ੍ਬੇਧਸੂਚਿਦਣ੍ਡਕਪਮਾਣਪਰਿਣਾਹਰੁਕ੍ਖਤੋ. ਵਂਸਨਲ਼ਕਸਰਾਵਾਦੀਸੂਤਿ ਵਂਸੋ ਚ ਨਲ਼ਕੋ ਚ ਸਰਾਵੋ ਚ ਵਂਸਨਲ਼ਕਸਰਾਵਾ, ਤੇ ਆਦਯੋ ਯੇਸਂ ਕਪਾਲਾਦੀਨਨ੍ਤਿ ਵਂਸਨਲ਼ਕਸਰਾਵਾਦਯੋ, ਤੇਸੁ. ਤਤੋਤਿ ਵਂਸਾਦਿਤੋ. ਤਂਖਣਮ੍ਪੀਤਿ ਤਸ੍ਮਿਂ ਨਿਮਿਤ੍ਤਕ੍ਖਣੇਪਿ. ਅਕਾਰਣਨ੍ਤਿ ਅਪਮਾਣਂ. ਏਤਨ੍ਤਿ ਨਵਮੂਲਸਾਖਾਨਿਗ੍ਗਮਨਂ. ਵਤ੍ਤੁਂ ਵਟ੍ਟਤੀਤਿ ਸਾਮਞ੍ਞਨਾਮੇਨਪਿ ਵਿਸੇਸਨਾਮੇਨਪਿ ਵਤ੍ਤੁਂ ਵਟ੍ਟਤਿ. ਇਮਿਨਾ ਪਬ੍ਬਤਾਦੀਸੁਪਿ ‘‘ਪਬ੍ਬਤੋ’’ਤਿ ਸਾਮਞ੍ਞਨਾਮੇਨਪਿ ‘‘ਵਙ੍ਕਪਬ੍ਬਤੋ ਵੇਪੁਲ੍ਲਪਬ੍ਬਤੋ’’ਤਿ ਵਿਸੇਸਨਾਮੇਨਪਿ ਵਤ੍ਤੁਂ ਵਟ੍ਟਤੀਤਿ ਦਸ੍ਸੇਤਿ.

ਮਗ੍ਗਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਮਗ੍ਗਿਯਤਿ ਪਥਿਕੇਹਿ, ਮਗ੍ਗਮੂਲ਼੍ਹੇਹਿ ਵਾ ਅਨ੍ਵੇਸਿਯਤੀਤਿ ਮਗ੍ਗੋ. ਯੋ ਯਾਦਿਸੋ ਜਙ੍ਘਮਗ੍ਗੋ ਵਾ ਸਕਟਮਗ੍ਗੋ ਵਾ ਵਿਨਿਵਿਜ੍ਝਿਤ੍ਵਾ ਦ੍ਵੇ ਤੀਣਿ ਗਾਮਨ੍ਤਰਾਨਿ ਗਚ੍ਛਤਿ, ਸੋ ਤਾਦਿਸੋ ਜਙ੍ਘਮਗ੍ਗੋ ਵਾ ਸਕਟਮਗ੍ਗੋ ਵਾ ਵਟ੍ਟਤੀਤਿ ਯੋਜਨਾ. ਉਕ੍ਕਮਿਤ੍ਵਾਤਿ ਪਕ੍ਕਮਿਤ੍ਵਾ. ਯੋ ਜਙ੍ਘਮਗ੍ਗੋ ਓਤਰਤਿ, ਸੋ ਨ ਵਟ੍ਟਤੀਤਿ ਯੋਜਨਾ. ਅਵਲ਼ਞ੍ਜਾਤਿ ਅਪਰਿਭੋਗਾ. ਗਮਨਂ ਜਨੇਤੀਤਿ ਜਙ੍ਘੋ. ਜਣ੍ਣੁਗੋਪ੍ਫਕਾਨਂ ਮਜ੍ਝਪਦੇਸੋ. ਸਹ ਅਤ੍ਥੇਨ ਪਣਿਯਧਨੇਨਾਤਿ ਸਤ੍ਥੋ, ਜਙ੍ਘੇਨ ਵਿਚਰਨ੍ਤੋ ਸਤ੍ਥੋ ਜਙ੍ਘਸਤ੍ਥੋ. ਸਕਤਿ ਸਮਤ੍ਥੇਤਿ ਭਾਰਂ ਵਹਿਤੁਨ੍ਤਿ ਸਕਟੋ, ਤੇਨ ਵਿਚਰਨ੍ਤੋ ਸਤ੍ਥੋ ਸਕਟਸਤ੍ਥੋ. ਜਙ੍ਘਸਤ੍ਥੋ ਚ ਸਕਟਸਤ੍ਥੋ ਚ ਜਙ੍ਘਸਕਟਸਤ੍ਥਾ, ਤੇਹਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤਨ੍ਤਿ ਨਿਮਿਤ੍ਤਂ.

ਕੋਣਨ੍ਤਿ ਵਿਹਾਰਕੋਣਂ. ਗਤਂ ਪਨ ਮਗ੍ਗਨ੍ਤਿ ਯੋਜਨਾ. ਪਰਭਾਗੇਤਿ ਵਿਹਾਰਂ ਪਰਿਕ੍ਖਿਪਿਤ੍ਵਾ ਗਚ੍ਛਨ੍ਤੇਹਿ ਚਤੂਹਿ ਮਗ੍ਗੇਹਿ ਪਰਭਾਗੇ. ਦਸਸੁ ਨਾਮੇਸੂਤਿ ਸਤਿਪਟ੍ਠਾਨਟ੍ਠਕਥਾਦੀਸੁ ਆਗਤੇਸੁ ‘‘ਮਗ੍ਗੋ ਪਨ੍ਥੋ ਪਥੋ ਪਜ੍ਜੋ’’ਤਿਆਦੀਸੁ, ਅਭਿਧਾਨਾਦੀਸੁ (ਦੀ. ਨਿ. ਅਟ੍ਠ. ੨.੩੭੩; ਮ. ਨਿ. ਅਟ੍ਠ. ੧.੧੦੬) ਚ ਆਗਤੇਸੁ ‘‘ਮਗ੍ਗੋ ਪਨ੍ਥੋ ਪਥੋ ਅਦ੍ਧਾ’’ਤਿਆਦੀਸੁ ਦਸਸੁ ਮਗ੍ਗਨਾਮੇਸੁ. ਯੇਨ ਕੇਨਚਿ ਨਾਮੇਨਾਤਿ ਇਮਿਨਾ ਪਬ੍ਬਤਾਦੀਸੁਪਿ ‘‘ਪਬ੍ਬਤੋ ਗਿਰਿ ਸੇਲੋ ਅਦ੍ਦਿ ਨਗੋ ਅਚਲੋ ਸਿਲੁਚ੍ਚਯੋ ਸਿਖਰੀ ਭੂਧਰੋ’’ਤਿਆਦੀਸੁ ਅਨੇਕੇਸੁ ਨਾਮੇਸੁ ਯੇਨ ਕੇਨਚਿ ਨਾਮੇਨ ਕਿਤ੍ਤੇਤੁਂ ਵਟ੍ਟਤੀਤਿ ਦਸ੍ਸੇਤਿ.

ਵਮ੍ਮਿਕਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਉਪਚਿਕਾਹਿ ਵਮਿਯਤਿ, ਸਰਬੂਘਰਗੋਲਿਕਾਦਯੋ ਸਤ੍ਤੇ ਵਮਤੀਤਿ ਵਾ ਵਮ੍ਮਿਕੋ. ਤਂਦਿਵਸਜਾਤੋਤਿ ਤਸ੍ਮਿਂ ਨਿਮਿਤ੍ਤਕਿਤ੍ਤਿਤਦਿਵਸੇ ਜਾਤੋ. ਤਤੋਤਿ ਅਟ੍ਠਙ੍ਗੁਲੁਬ੍ਬੇਧਗੋਵਿਸਾਣਪਮਾਣਵਮ੍ਮੀਕਤੋ.

ਨਦੀਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਨਦਤਿ ਸਨ੍ਦਤੀਤਿ ਨਦੀ, ਨਦਨ੍ਤੋ ਏਤਿ ਗਚ੍ਛਤੀਤਿ ਵਾ ਨਦੀ. ਯਸ੍ਸਾਤਿ ਨਦਿਯਾ, ਸੋਤਨ੍ਤਿ ਸਮ੍ਬਨ੍ਧੋ. ‘‘ਅਨ੍ਵਦ੍ਧਮਾਸ’’ਨ੍ਤਿਆਦਿਨਾ ਏਕਪਕ੍ਖੇ ਤਿਕ੍ਖਤ੍ਤੁਂ ਏਕਮਾਸੇ ਛਕ੍ਖਤ੍ਤੁਂ ਵਸ੍ਸਨ੍ਤਭਾਵਂ ਦੀਪੇਤਿ. ਵਿਗਤਮਤ੍ਤੇ ਸਤੀਤਿ ਸਮ੍ਬਨ੍ਧੋ. ‘‘ਈਦਿਸੇ’’ਤਿ ਇਮਿਨਾ ‘‘ਅਨ੍ਵਦ੍ਧਮਾਸ’’ਨ੍ਤਿਆਦਿਅਤ੍ਥਂ ਅਤਿਦਿਸਤਿ. ਤਿਮਣ੍ਡਲਨ੍ਤਿ ਹੇਟ੍ਠਾ ਜਾਣੁਮਣ੍ਡਲਂ, ਉਪਰਿ ਨਾਭਿਮਣ੍ਡਲਨ੍ਤਿ ਤਿਮਣ੍ਡਲਂ. ਯਤ੍ਥ ਕਤ੍ਥਚੀਤਿ ਤਿਤ੍ਥੇ ਵਾ ਅਤਿਤ੍ਥੇ ਵਾ. ਉਦਕੇਨ ਤੇਮਿਯਤੀਤਿ ਯੋਜਨਾ, ਤਿਨ੍ਤਿਯਤੀਤਿ ਅਤ੍ਥੋ. ਨ ਕੇਵਲਂ ਨਿਮਿਤ੍ਤੇਯੇਵ ਅਯਂ ਨਦੀ ਹੋਤਿ, ਅਥ ਖੋ ਨਦੀਪਾਰਗਮਨਾਦਿਕੇਪੀਤਿ ਆਹ ‘‘ਭਿਕ੍ਖੁਨਿਯਾ’’ਤਿਆਦਿ. ਇਦਂ ‘‘ਨਦੀਪਾਰਗਮਨੇਪੀ’’ਤਿ ਪਦੇਨੇਵ ਸਮ੍ਬਨ੍ਧਿਤਬ੍ਬਂ.

ਯਾ ਪਨਾਤਿ ਨਦੀ ਪਨ, ਗਤਾਤਿ ਯੋਜਨਾ. ਤਨ੍ਤਿ ਨਦਿਂ. ਵਤਿਨ੍ਤਿ ਪਾਲ਼ਿਂ. ਰੁਕ੍ਖਪਾਦੇਤਿ ਰੁਕ੍ਖਸ੍ਸ ਮੂਲੇ. ਉਦਕਞ੍ਚ ਆਵਰਣਂ ਅਜ੍ਝੋਤ੍ਥਰਿਤ੍ਵਾ ਪਵਤ੍ਤਤਿਯੇਵਾਤਿ ਯੋਜਨਾ. ਯਥਾਤਿ ਯੇਨਾਕਾਰੇਨ. ਅਪਵਤ੍ਤਮਾਨਾ ਹੋਤੀਤਿ ਸਮ੍ਬਨ੍ਧੋ.

ਦੁਬ੍ਬੁਟ੍ਠਿਕਾਲੇਤਿ ਗਿਮ੍ਹਸਦਿਸੇ ਦੁਬ੍ਬੁਟ੍ਠਿਕਾਲੇ. ‘‘ਨਿਰੁਦਕਭਾਵੇਨਾ’’ਤਿ ਇਮਿਨਾ ‘‘ਆਵਰਣਭਾਵੇਨਾ’’ਤਿ ਵਿਸੇਸਨਂ ਨਿਵਤ੍ਤੇਤਿ. ਸਾਤਿ ਉਦਕਮਾਤਿਕਾ. ਸਮ੍ਪਾਦੇਨ੍ਤੀ ਹੁਤ੍ਵਾ ਨਿਚ੍ਚਂ ਪਵਤ੍ਤਤੀਤਿ ਯੋਜਨਾ. ਨਿਮਿਤ੍ਤਂ ਕਾਤੁਂ ਨ ਵਟ੍ਟਤੀਤਿ ਮਨੁਸ੍ਸੇਹਿ ਨੀਹਟਤ੍ਤਾ, ਸਯਞ੍ਚ ਅਗਮਨਤ੍ਤਾ ਨ ਵਟ੍ਟਤਿ. ਯਾ ਪਨਾਤਿ ਉਦਕਮਾਤਿਕਾ ਪਨ. ਮੂਲੇਤਿ ਪਠਮਕਾਲੇ. ਕਾਲਨ੍ਤਰੇਨ ਨਦੀ ਹੋਤੀਤਿ ਸਮ੍ਬਨ੍ਧੋ. ਤਨ੍ਤਿ ਉਦਕਮਾਤਿਕਂ.

ਉਦਕਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਉਦਤਿ ਪਸਵਤੀਤਿ ਉਦਕਂ. ਭੂਮਿਗਤਮੇਵ ਉਦਕਨ੍ਤਿ ਸਮ੍ਬਨ੍ਧੋ. ਤਞ੍ਚਾਤਿ ਭੂਮਿਗਤਉਦਕਞ੍ਚ. ਆਵਾਟ…ਪੇ… ਸਮੁਦ੍ਦਾਦੀਸੁ ਠਿਤਂ ਅਪਵਤ੍ਤਨਕਉਦਕਨ੍ਤਿ ਯੋਜਨਾ. ਉਕ੍ਖੇਪਿਮਨ੍ਤਿ ਉਕ੍ਖਿਪਿਤ੍ਵਾ ਗਹਿਤਂ. ਤਨ੍ਤਿ ਵਚਨਂ. ਸੂਕਰਖਤਾਯਪੀਤਿ ਸੂਕਰੇਹਿ ਖਤਾਯ ਵਾਪਿਯਾਪਿ. ਤਂਖਣਞ੍ਞੇਵਾਤਿ ਤਸ੍ਮਿਂ ਨਿਮਿਤ੍ਤੇ ਕਿਤ੍ਤਨਕ੍ਖਣੇਯੇਵ. ਆਵਾਟੋਯੇਵ ਖੁਦ੍ਦਕਟ੍ਠੇਨ ਆਵਾਟਕਂ. ਤਨ੍ਤਿ ਨਿਮਿਤ੍ਤਸਞ੍ਞਾਕਰਣਂ. ਕਾਤੁਞ੍ਚਾਤਿ ਸਯਂ ਕਾਤੁਞ੍ਚ. ਕਾਰਾਪੇਤੁਞ੍ਚਾਤਿ ਪਰੇਹਿ ਕਾਰਾਪੇਤੁਞ੍ਚ. ਕਸ੍ਮਾ ਲਾਭਸੀਮਾਯਂ ਨ ਵਟ੍ਟਤਿ? ਲਾਭਸੀਮਾ ਹਿ ਅਞ੍ਞੇਸਂ ਪੀਲ਼ਨਂ ਕਰੋਤੀਤਿ. ਇਤਿ ਇਮਮਤ੍ਥਂ ਨਯਤੋ ਦਸ੍ਸੇਨ੍ਤੋ ਆਹ ‘‘ਸਮਾਨਸਂਵਾਸਕਸੀਮਾ’’ਤਿਆਦਿ. ਏਤ੍ਥਾਤਿ ਸਮਾਨਸਂਵਾਸਕਸੀਮਾਯਂ.

ਅਟ੍ਠਦਿਸਂ ਸਨ੍ਧਾਯ ਅਟ੍ਠ ਨਿਮਿਤ੍ਤਾਨਿ ਵੁਤ੍ਤਾਨੀਤਿ ਦਟ੍ਠਬ੍ਬਂ. ਸਾਤਿ ਸੀਮਾ. ਏਕੇਨ ਵਾ ਨਿਮਿਤ੍ਤੇਨਾਤਿ ਯੋਜਨਾ. ਤਿਣ੍ਣਂ ਨਿਮਿਤ੍ਤਾਨਂ ਕਿਤ੍ਤਨੇ ਨਿਮਿਤ੍ਤਾਨਂ ਠਿਤਦਿਸਂ ਸਲ੍ਲਕ੍ਖੇਤ੍ਵਾ ‘‘ਪੁਰਤ੍ਥਿਮਾਯ ਦਿਸਾਯਾ’’ਤਿਆਦਿਨਾ ਕਿਤ੍ਤੇਤਬ੍ਬਂ. ਨਿਮਿਤ੍ਤਾਨਂ ਸਤਕਿਤ੍ਤਨੇ ਸੀਮਾਯ ਅਟ੍ਠਦਿਸਂ ਸਲ੍ਲਕ੍ਖੇਤ੍ਵਾ ਏਕਿਸ੍ਸਾਯਪਿ ਦਿਸਾਯ ਬਹੁਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਸਿਙ੍ਘਾਟਕਸਣ੍ਠਾਨਾਤਿ ਤਿਣ੍ਣਂ ਮਗ੍ਗਾਨਂ ਸਮਾਗਮਟ੍ਠਾਨੇ ਸਿਙ੍ਘਾਟਕਸਣ੍ਠਾਨਾ, ਤਿਕੋਣਾ ਨਾਮ ਹੋਤੀਤਿ ਅਧਿਪ੍ਪਾਯੋ. ਚਤੁਰਸ੍ਸਾਤਿ ਸਮਚਤੁਰਸ੍ਸਾ. ਸਿਙ੍ਘਾਟਕਸਣ੍ਠਾਨਾਤਿ ਚਤੁਨ੍ਨਂ ਮਗ੍ਗਾਨਂ ਸਮੋਧਾਨਟ੍ਠਾਨੇ ਸਿਙ੍ਘਾਟਕਸਣ੍ਠਾਨਾ. ਅਡ੍ਢਚਨ੍ਦਮੁਦਿਙ੍ਗਾਦਿਸਣ੍ਠਾਨਾ ਪਨ ਨਿਮਿਤ੍ਤਾਨਂ ਠਿਤਸਣ੍ਠਾਨੇਨ ਹੋਤੀਤਿ ਦਟ੍ਠਬ੍ਬਾ. ਤਨ੍ਤਿ ਸੀਮਂ. ਬਨ੍ਧਿਤੁਕਾਮੇਹਿ ਨਿਸ੍ਸਞ੍ਚਾਰਸਮਯੇ ਬਨ੍ਧਿਤਬ੍ਬਾਤਿ ਸਮ੍ਬਨ੍ਧੋ. ਬਦ੍ਧਸੀਮਵਿਹਾਰਾਨਨ੍ਤਿ ਬਦ੍ਧਾ ਸੀਮਾ ਏਤੇਸੂਤਿ ਬਦ੍ਧਸੀਮਾ, ਤੇ ਏਵ ਵਿਹਾਰਾਤਿ ਬਦ੍ਧਸੀਮਵਿਹਾਰਾ, ਤੇਸਂ. ਦਿਸਾਚਾਰਿਕਭਿਕ੍ਖੂਨਨ੍ਤਿ ਦਿਸਾਸੁ ਚਾਰਿਕਭਿਕ੍ਖੂਨਂ. ਤਤ੍ਥਾਤਿ ਤਸ੍ਮਿਂ ਏਕਗਾਮਖੇਤ੍ਤੇ, ਭਿਕ੍ਖੂਨਂ ਪੇਸੇਤਬ੍ਬਨ੍ਤਿ ਸਮ੍ਬਨ੍ਧੋ. ਏਕਜ੍ਝਨ੍ਤਿ ਏਕਤੋ. ਅਞ੍ਞਾਨਿਪੀਤਿ ਸੀਮਬਨ੍ਧਗਾਮਖੇਤ੍ਤਤੋ ਅਞ੍ਞਾਨਿਪਿ. ਮਹਾਪਦੁਮਤ੍ਥੇਰੋ ਪਨ ਆਹਾਤਿ ਯੋਜਨਾ. ਤਤੋਤਿ ਤੇਹਿ ਨਾਨਾਗਾਮਖੇਤ੍ਤੇਹਿ. ਆਗਨ੍ਤਬ੍ਬਨ੍ਤਿ ਸਾਮੀਚਿਦਸ੍ਸਨਵਸੇਨ ਵੁਤ੍ਤਂ. ਤੇਨਾਹ ‘‘ਆਗਮਨਮ੍ਪਿ ਅਨਾਗਮਨਮ੍ਪਿ ਵਟ੍ਟਤੀ’’ਤਿ. ਏਕਸੀਮਭਾਵਤੋ ਵੁਤ੍ਤਂ ‘‘ਅਨ੍ਤੋਨਿਮਿਤ੍ਤਗਤੇਹਿ ਆਗਨ੍ਤਬ੍ਬ’’ਨ੍ਤਿ.

ਏਵਂ ਸਨ੍ਨਿਪਤਿਤੇਸੁ ਸਨ੍ਤੇਸੁ ਸੀਮਾ ਬਨ੍ਧਿਤਬ੍ਬਾਤਿ ਸਮ੍ਬਨ੍ਧੋ. ਪਰਿਯਨ੍ਤਂ ਕਤ੍ਵਾਤਿ ਹੇਟ੍ਠਿਮਪਰਿਯਨ੍ਤਂ ਕਤ੍ਵਾ.

ਪਬ੍ਬਜ੍ਜੂਪਸਮ੍ਪਦਾਦੀਨਨ੍ਤਿ ਏਤ੍ਥ ਭਣ੍ਡੁਕਮ੍ਮਾਪੁਚ੍ਛਨਂ (ਮਹਾਵ. ਅਟ੍ਠ. ੯੮; ਵਿ. ਸਙ੍ਗ. ਅਟ੍ਠ. ੧੪੪) ਸਨ੍ਧਾਯ ਪਬ੍ਬਜ੍ਜਾਗਹਣਂ ਵੁਤ੍ਤਂ. ਖਣ੍ਡਸੀਮਾਤਿ ਵਿਹਾਰਪਚ੍ਚਨ੍ਤਂ ਖਣ੍ਡਿਤਂ ਵਿਯ ਛਿਨ੍ਦਿਤਂ ਵਿਯ ਪਵਤ੍ਤਾ ਸੀਮਾ ਖਣ੍ਡਸੀਮਾ. ਤਨ੍ਤਿ ਖਣ੍ਡਸੀਮਂ. ਵਤ੍ਤਂ ਜਾਨਿਤਬ੍ਬਨ੍ਤਿ ਏਤ੍ਥ ਵਤ੍ਤਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਸੀਮਨ੍ਤਿ ਖਣ੍ਡਸੀਮਂ. ਯਥਾਤਿ ਯੇਨਾਕਾਰੇਨ ਬਨ੍ਧਿਯਮਾਨੇਤਿ ਸਮ੍ਬਨ੍ਧੋ. ਤਸ੍ਸਾ ਪਮਾਣਂ ਦਸ੍ਸੇਨ੍ਤੋ ਆਹ ‘‘ਸਾ’’ਤਿਆਦਿ. ਸਾਤਿ ਖਣ੍ਡਸੀਮਾ. ਅਬ੍ਭਾਨਕਮ੍ਮੇ ਸਦ੍ਧਿਂ ਕਮ੍ਮਾਰਹੇਨ ਵੀਸਤਿ ਭਿਕ੍ਖੂ ਸਨ੍ਧਾਯ ਵੁਤ੍ਤਂ ‘‘ਏਕਵੀਸਤਿ ਭਿਕ੍ਖੂ’’ਤਿ. ਤਤੋਤਿ ਏਕਵੀਸਤਿਭਿਕ੍ਖੁਤੋ. ਗਣ੍ਹਨ੍ਤੀਪੀਤਿ ਏਤ੍ਥ ਪਿਸਦ੍ਦੋ ਸਹਸ੍ਸਤੋ ਓਰਂ ਪਨ ਪਗੇਵਾਤਿ ਦਸ੍ਸੇਤਿ. ਸਹਸ੍ਸਤੋ ਅਧਿਕਂ ਗਣ੍ਹਨ੍ਤੀਪਿ ਵਿਹਾਰਪਚ੍ਚਨ੍ਤੇ ਖਣ੍ਡਿਤੇ ਖਣ੍ਡਸੀਮਾਯੇਵ ਨਾਮ. ਤਨ੍ਤਿ ਖਣ੍ਡਸੀਮਂ.

ਤਤ੍ਰਾਤਿ ਖਣ੍ਡਸੀਮਮਹਾਸੀਮਾਸੁ ਆਧਾਰੇ ਭੁਮ੍ਮਂ. ਅਥਾਤਿ ਅਨਨ੍ਤਰਂ. ਏਵਨ੍ਤਿ ਇਮਾਯ ਅਵਿਪ੍ਪਵਾਸਕਮ੍ਮਵਾਚਾਯ ਸਮ੍ਮਨਿਯਮਾਨੇ. ਹੀਤਿ ਫਲਜੋਤਕੋ. ਸੀਮਨ੍ਤਿ ਸਮਾਨਸਂਵਾਸਕਸੀਮਂ. ਨ ਸਕ੍ਖਿਸ੍ਸਨ੍ਤੀਤਿ ਪਠਮਂ ਅਵਿਪ੍ਪਵਾਸਂ ਅਸਮੂਹਨਿਤ੍ਵਾ ਸੀਮਂ ਸਮੂਹਨਿਤੁਂ ਨ ਸਕ੍ਖਿਸ੍ਸਨ੍ਤਿ. ਸੀਮਨ੍ਤਰਿਕਪਾਸਾਣਾਤਿ ਦ੍ਵਿਨ੍ਨਂ ਸੀਮਾਨਂ ਅਨ੍ਤਰੇ ਵੇਮਜ੍ਝੇ ਠਪਿਤਾ ਪਾਸਾਣਾ. ਚਤੁਰਙ੍ਗੁਲਪਮਾਣਾਪੀਤਿ ਪਿਸਦ੍ਦੋ ਏਕਙ੍ਗੁਲਿਪਮਾਣਾਪਿ ਵਟ੍ਟਤੀਤਿ ਦਸ੍ਸੇਤਿ.

ਸਮਨ੍ਤਾਤਿ ਖਣ੍ਡਸੀਮਾਯ ਸਮਨ੍ਤਾ. ਅਨੁਪਰਿਯਾਯਨ੍ਤੇਹੀਤਿ ਅਨੁਕ੍ਕਮੇਨ ਖਣ੍ਡਸੀਮਪਰਿਯਾਯਨ੍ਤੇਹਿ ਭਿਕ੍ਖੂਹੀਤਿ ਸਮ੍ਬਨ੍ਧੋ. ਤਤੋਤਿ ਤੇਹਿ ਸੀਮਨ੍ਤਰਿਕਪਾਸਾਣੇਹਿ, ਦ੍ਵਿਨ੍ਨਂ ਸੀਮਾਨਂ ਨਿਮਿਤ੍ਤਾਨਿ ਪਠਮਂ ਕਿਤ੍ਤੇਤ੍ਵਾ ਪਚ੍ਛਾ ਤਾਸੁ ਯਂ ਇਚ੍ਛਨ੍ਤਿ, ਤਂ ਬਨ੍ਧਿਤਬ੍ਬਭਾਵਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਯਥਿਚ੍ਛਿਤਂ ਬਨ੍ਧਿਤੁਂ ਵਟ੍ਟਨ੍ਤੋਪਿ ਪੋਰਾਣਾਚਿਣ੍ਣਂ ਦਸ੍ਸੇਤੁਂ ਵੁਤ੍ਤਂ ‘‘ਏਵਂ ਸਨ੍ਤੇਪੀ’’ਤਿਆਦਿ. ਉਭਿਨ੍ਨਮ੍ਪੀਤਿ ਦ੍ਵੀਸੁ ਸੀਮਾਸੁ ਠਿਤਾਨਂ ਉਭਿਨ੍ਨਮ੍ਪਿ ਕਮ੍ਮਨ੍ਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਚਸਦ੍ਦੋ ਵਾਕ੍ਯਾਰਮ੍ਭਜੋਤਕੋ. ਏਸਾ ਸੀਮਾ ਨਾਮਾਤਿ ਯੋਜਨਾ. ਤਤ੍ਥਾਤਿ ਪਿਟ੍ਠਿਪਾਸਾਣਾਦੀਸੁ ਪਞ੍ਚਸੁ ਠਾਨੇਸੁ. ਨਿਮਿਤ੍ਤਪਾਸਾਣਾ ਯਥਾਠਾਨੇ ਨ ਤਿਟ੍ਠਨ੍ਤੀਤਿ ਪਿਟ੍ਠਿਪਾਸਾਣਸ੍ਸੁਪਰਿ ਨਿਮਿਤ੍ਤਪਾਸਾਣਂ ਠਪਿਤਮਤ੍ਤਂ ਸਨ੍ਧਾਯ ਵੁਤ੍ਤਂ. ਪਿਟ੍ਠਿਪਾਸਾਣਂ ਪਨ ਵਿਜ੍ਝਿਤ੍ਵਾ ਨਿਮਿਤ੍ਤਪਾਸਾਣਂ ਤਤ੍ਥ ਨਿਖਣਿਤ੍ਵਾ ਯਥਾ ਠਾਨਾ ਨ ਚਾਵੇਨ੍ਤਿ, ਤਥਾ ਠਪੇਨ੍ਤਿ. ਏਵਂ ਸਨ੍ਤੇ ਯਥਾਠਾਨੇ ਤਿਟ੍ਠਨ੍ਤਿਯੇਵਾਤਿ ਦਟ੍ਠਬ੍ਬਂ. ਨ ਸੀਮਾਤਿ ਸੀਮਾਯ ਪਥਵਿਸਨ੍ਧਾਰਕਂ ਉਦਕਂ ਪਰਿਯਨ੍ਤਂਕਤ੍ਵਾ ਗਤਤ੍ਤਾ ਸੀਮਾ ਨ ਝਾਯਤਿ.

ਕੁਟਿਗੇਹੇਪੀਤਿ ਏਤ੍ਥ ਕੁਟੀਤਿ ਚ ਗੇਹਨ੍ਤਿ ਚ ਅਗਾਰਸ੍ਸੇਵ ਨਾਮਂ. ਅਗਾਰਞ੍ਹਿ ਸੀਤਾਦਿਦੁਕ੍ਖਸ੍ਸ ਕੁਟਨਟ੍ਠੇਨ ਛਿਨ੍ਦਨਟ੍ਠੇਨ ਚ ਨਾਨਾਦਬ੍ਬਸਮ੍ਭਾਰਸ੍ਸ ਗਹਣਟ੍ਠੇਨ ਚ ਕੁਟਿਗੇਹਨ੍ਤਿ ਵੁਚ੍ਚਤਿ. ਕੁਟਿ ਏਵ ਗੇਹਂ ਕੁਟਿਗੇਹਂ, ਤਸ੍ਮਿਮ੍ਪਿ. ਭਿਤ੍ਤਿਂ ਅਕਿਤ੍ਤੇਤ੍ਵਾਤਿ ਇਦਂ ਇਟ੍ਠਕਦਾਰੁਮਯਂ ਭਿਤ੍ਤਿਂ ਸਨ੍ਧਾਯ ਵੁਤ੍ਤਂ. ਸਚੇ ਸਿਲਾਮਯਾ ਭਿਤ੍ਤਿ ਨਿਮਿਤ੍ਤੂਪਗਾ ਭਵੇਯ੍ਯ, ਭਿਤ੍ਤਿਪਿ ਕਿਤ੍ਤੇਤਬ੍ਬਾ. ਅਨ੍ਤੋ ਕਰਿਤ੍ਵਾਤਿ ਕੁਟਿਗੇਹਸ੍ਸ ਭਿਤ੍ਤਿਯਾ ਵਾ ਅਨ੍ਤੋ ਕਤ੍ਵਾ. ਪਮੁਖੇਤਿ ਕੁਟਿਗੇਹਸ੍ਸ ਆਲਿਨ੍ਦੇ. ਨਿਬ੍ਬੋਦਕਪਤਨਟ੍ਠਾਨੇਤਿ ਨਿਗ੍ਗਲਿਤ੍ਵਾ ਉਦਕਸ੍ਸ ਪਤਨਟ੍ਠਾਨੇ. ਏਵਂ ਸਮ੍ਮਤਾਯ ਸੀਮਾਯਾਤਿ ਯੋਜਨਾ.

‘‘ਕੁਟ੍ਟਂ ਅਕਿਤ੍ਤੇਤ੍ਵਾ’’ਤਿ ਇਦਂ ਪੁਰਿਮਨਯੇਨੇਵ ਵੇਦਿਤਬ੍ਬਂ. ਅਨ੍ਤੋਤਿ ਲੇਣਸ੍ਸ, ਕੁਟ੍ਟਸ੍ਸ ਵਾ ਅਨ੍ਤੋ. ਓਕਾਸੇਤਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੇ. ਏਵਨ੍ਤਿ ਇਮਿਨਾਕਾਰੇਨ ਸਮ੍ਮਨਿਯਮਾਨੇ. ਅਨ੍ਤੋਤਿ ਭਿਤ੍ਤਿਯਾ ਅਨ੍ਤੋ.

ਹੇਟ੍ਠਾ ਨ ਓਤਰਤੀਤਿ ਹੇਟ੍ਠਾ ਆਕਾਸਤਲਤ੍ਤਾ ਨ ਓਤਰਤਿ. ਨਨੁ ਥਮ੍ਭੇ ਅਨੁਸਾਰਿਤ੍ਵਾ ਓਤਰਣੋ ਭਵੇਯ੍ਯ, ਕਸ੍ਮਾ ਨ ਓਤਰਤੀਤਿ? ਥਮ੍ਭਾਨਮੁਪਰਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਾਭਾਵਤੋਤਿ ਦਟ੍ਠਬ੍ਬਂ. ਹੇਟ੍ਠਾ ਓਤਰਣਾਕਾਰਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਤੁਲਾਨਨ੍ਤਿ ਥਮ੍ਭਾਨਮੁਪਰਿ ਤਿਰਿਯਵਸੇਨ ਠਿਤਾਨਂ ਰੁਕ੍ਖਵਿਸੇਸਾਨਂ. ਉਟ੍ਠਹਿਤ੍ਵਾਤਿ ਭੂਮਿਤੋ ਉਟ੍ਠਹਿਤ੍ਵਾ. ਤੁਲਾਰੁਕ੍ਖੇਹੀਤਿ ਤੁਲਾਸਙ੍ਖਾਤੇਹਿ ਰੁਕ੍ਖੇਹਿ. ‘‘ਏਕਸਮ੍ਬਨ੍ਧੋ’’ਤਿ ਇਮਿਨਾ ਨ ਕੇਵਲਂ ਤੁਲਾਰੁਕ੍ਖੇਹੇਵ ਏਕਸਮ੍ਬਨ੍ਧੋ, ਚਤੂਸੁ ਦਿਸਾਸੁ ਚਤੁਨ੍ਨਂ ਭਿਤ੍ਤੀਨਂ ਅਞ੍ਞਮਞ੍ਞਮ੍ਪਿ ਸਮ੍ਬਨ੍ਧੋਤਿ ਦਸ੍ਸੇਤਿ. ਹੇਟ੍ਠਾਪਿ ਓਤਰਤੀਤਿ ਭਿਤ੍ਤੀਨਮੁਪਰਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਪਹੋਨਕਤ੍ਤਾ ਵੁਤ੍ਤਂ. ਸਚੇ ਥਮ੍ਭਮਤ੍ਥਕੇ…ਪੇ… ਹੋਤੀਤਿ ਇਮਿਨਾ ਬਹੂਹਿ ਥਮ੍ਭੇਹਿ ਕਤਪਾਸਾਦਸ੍ਸ ਏਕੇਕਸ੍ਮਿਂ ਥਮ੍ਭਮਤ੍ਥਕੇ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੇ ਸਤਿ ਹੇਟ੍ਠਾ ਓਤਰਤੀਤਿ ਦਸ੍ਸੇਤਿ. ਨਿਯ੍ਯੂਹਕਾਦੀਸੂਤਿ ਨਾਗਦਨ੍ਤਕਾਦੀਸੁ. ਆਦਿਸਦ੍ਦੇਨ ਭਿਤ੍ਤਿਖਿਲਾਦਯੋ ਸਙ੍ਗਣ੍ਹਾਤਿ. ਭਿਤ੍ਤਿ ਚਾਤਿ ਇਟ੍ਠਕਦਾਰੁਮਯਾ ਭਿਤ੍ਤਿ ਚ. ਸਚੇ ਸਿਲਾਮਯਾ ਭਿਤ੍ਤਿ ਚ ਥਮ੍ਭਾ ਚ ਹੋਨ੍ਤਿ, ਕਿਤ੍ਤੇਤਬ੍ਬਾ. ਭਿਤ੍ਤਿਲਗ੍ਗੇਤਿ ਭਿਤ੍ਤੀਸੁ ਲਗ੍ਗੇ, ਭਿਤ੍ਤੀਨਂ ਵਾ ਲਗ੍ਗਟ੍ਠਾਨੇ. ਹੇਟ੍ਠਾਪਾਸਾਦਸ੍ਸਾਤਿ ਹੇਟ੍ਠਾਪਾਸਾਦੇ ‘‘ਠਿਤ’’ਇਤਿ ਪਦੇ ਸਮ੍ਬਨ੍ਧੋ. ਹੇਟ੍ਠਾਪਾਸਾਦਸ੍ਸ ਵਾ ਥਮ੍ਭਾਨਨ੍ਤਿ ਯੋਜਨਾ. ਹੇਟ੍ਠਾ ਸਮ੍ਮਤਾਯ ਸੀਮਾਯ ਉਪਰਿ ਆਰੋਹਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਨਿਬ੍ਬੋਦਕਪਤਨਟ੍ਠਾਨੇਤਿ ਛਦਨਕੋਟਿਯਂ.

ਤਤ੍ਥਾਤਿ ਤਸ੍ਮਿਂ ਤਲੇ. ਪਿਟ੍ਠਿਪਾਸਾਣੇ ਸੀਮਂ ਬਨ੍ਧਨ੍ਤਿ ਵਿਯ ਬਨ੍ਧਨ੍ਤੀਤਿ ਯੋਜਨਾ. ਤੇਨੇਵ ਪਰਿਚ੍ਛੇਦੇਨਾਤਿ ਤੇਨੇਵ ਤਲਪਰਿਚ੍ਛੇਦੇਨ. ਤਾਲਮੂਲਪਬ੍ਬਤੇਪੀਤਿ ਏਤ੍ਥ ਤਾਲਮੂਲਂ ਨਾਮ ਹੇਟ੍ਠਾ ਮਹਨ੍ਤਂ ਹੁਤ੍ਵਾ ਅਨੁਪੁਬ੍ਬੇਨ ਤਨੁਕਂ ਹੋਤਿ, ਤੇਨ ਸਦਿਸੇ ਪਬ੍ਬਤੇਪਿ. ਵਿਤਾਨਸਣ੍ਠਾਨੋਤਿ ਉਲ੍ਲੋਚਸ੍ਸ ਸਣ੍ਠਾਨੋ. ਚਤੂਸੁ ਦਿਸਾਸੁ ਨਿਗ੍ਗਤਸਾਖਰੁਕ੍ਖਸਣ੍ਠਾਨੋ ਵਾ ਖੁਜ੍ਜਰੁਕ੍ਖਸਣ੍ਠਾਨੋ ਵਾ ਹੋਤਿ. ਯਥਾ ਪਬ੍ਬਤੋ ਵਿਤਾਨਸਣ੍ਠਾਨੋ ਹੋਤਿ, ਏਵਂ ਮੁਦਿਙ੍ਗਸਣ੍ਠਾਨੋ ਵਾ ਹੋਤਿ ਪਣਵਸਣ੍ਠਾਨੋ ਵਾਤਿ ਯੋਜਨਾ. ਤਤ੍ਥ ਮੁਦਿਙ੍ਗੋ ਮਜ੍ਝੇ ਥੂਲੋ ਹੋਤਿ, ਮੂਲੇ ਚ ਅਨ੍ਤੇ ਚ ਤਨੁਕੋ. ਪਣਵੋ ਮਜ੍ਝੇ ਤਨੁਕੋ ਹੋਤਿ, ਮੂਲੇ ਚ ਅਗ੍ਗੇ ਚ ਥੂਲੋ. ਤੇਸਂ ਸਣ੍ਠਾਨੋ ਮੁਦਿਙ੍ਗਸਣ੍ਠਾਨੋ ਵਾ ਪਣਵਸਣ੍ਠਾਨੋ ਵਾ. ਹੇਟ੍ਠਾ ਵਾਤਿ ਮੁਦਿਙ੍ਗਸਣ੍ਠਾਨਸ੍ਸ ਪਬ੍ਬਤਸ੍ਸ ਹੇਟ੍ਠਾ ਵਾ. ਮਜ੍ਝੇ ਵਾਤਿ ਪਣਵਸਣ੍ਠਾਨਸ੍ਸ ਮਜ੍ਝੇ ਵਾ. ਦ੍ਵੇ ਕੂਟਾਨੀਤਿ ਦ੍ਵੇ ਸਿਖਰਾਨਿ. ਕੂਟਨ੍ਤਰਨ੍ਤਿ ਕੂਟਾਨਂ ਮਜ੍ਝਂ. ਚਿਨਿਤ੍ਵਾ ਵਾਤਿ ਇਟ੍ਠਕਸਿਲਾਹਿ ਚਿਨਿਤ੍ਵਾ ਵਾ. ਪੂਰੇਤ੍ਵਾ ਵਾਤਿ ਪਂਸੁਵਾਲਿਕਾਹਿ ਪੂਰੇਤ੍ਵਾ ਵਾ.

ਸਪ੍ਪਫਣਸਦਿਸੋਤਿ ਸਪ੍ਪਸ੍ਸ ਫਣੇਨ ਸਦਿਸੋ, ਖੁਜ੍ਜੋ ਪਬ੍ਬਤੋਤਿ ਅਤ੍ਥੋ. ਆਕਾਸਪਬ੍ਭਾਰਨ੍ਤਿ ਭਿਤ੍ਤਿਯਾ ਅਪਰਿਕ੍ਖਿਤ੍ਤਂ ਆਕਾਸਸਙ੍ਖਾਤਂ ਪਬ੍ਭਾਰਂ. ਸੀਮਪ੍ਪਮਾਣੋਤਿ ਸਦ੍ਧਿਂ ਅਨ੍ਤੋਸੁਸਿਰੇਨ ਸੀਮਪ੍ਪਮਾਣੋ. ਅਗ੍ਗਕੋਟਿਨ੍ਤਿ ਅਗ੍ਗਸਙ੍ਖਾਤਂ ਕੋਟਿਂ. ਸਚੇ ਪਨ ਪਬ੍ਬਤਸ੍ਸ ਹੇਟ੍ਠਾ ਅਨ੍ਤੋਲੇਣਂ ਹੋਤੀਤਿ ਸਮ੍ਬਨ੍ਧੋ. ਉਪਰਿਮਸ੍ਸਾਤਿ ਅਨ੍ਤੋਲੇਣਸ੍ਸ ਉਪਰਿ ਠਿਤਸ੍ਸ. ਪਾਰਤੋਤਿ ਬਾਹਿਰਤੋ. ਅਸ੍ਸਾਤਿ ਪਬ੍ਬਤਸ੍ਸ ਬਹੀਤਿ ਸਮ੍ਬਨ੍ਧੋ. ਓਰਤੋਤਿ ਅਨ੍ਤਤੋ. ਲੇਣਂ ਹੋਤੀਤਿ ਸਮ੍ਬਨ੍ਧੋ. ਕਿਤ੍ਤਕਂ ਮਹਨ੍ਤਨ੍ਤਿ ਆਹ ‘‘ਸੀਮਾਪਰਿਚ੍ਛੇਦਮਤਿਕ੍ਕਮਿਤ੍ਵਾ ਠਿਤ’’ਨ੍ਤਿ. ਕਿਤ੍ਤਕਂ ਖੁਦ੍ਦਕਨ੍ਤਿ ਆਹ ‘‘ਸਬ੍ਬਪਚ੍ਛਿਮਸੀਮਾਪਰਿਮਾਣ’’ਨ੍ਤਿ. ਤਨ੍ਤਿ ਖੁਦ੍ਦਕਂ ਲੇਣਂ. ਅਤਿਖੁਦ੍ਦਕਨ੍ਤਿ ਸਬ੍ਬਪਚ੍ਛਿਮਸੀਮਾਪਰਿਮਾਣਾਭਾਵਤੋ ਅਤਿਖੁਦ੍ਦਕਂ. ਤਤੋਤਿ ਉਪਰਿਸੀਮਤੋ. ਬਹੀਤਿ ਸੀਮਤੋ ਬਹਿ. ‘‘ਯਦਿ ਸੀਮਪ੍ਪਮਾਣਂ, ਸੀਮਾ ਹੋਤਿਯੇਵਾ’’ਤਿ ਇਮਿਨਾ ਯਦਿ ਨ ਸੀਮਪ੍ਪਮਾਣਂ, ਨ ਸੀਮਾ ਹੋਤਿਯੇਵਾਤਿ ਦਸ੍ਸੇਤਿ.

ਤਨ੍ਤਿ ਖਣ੍ਡਸੀਮਂ. ਪੂਰੇਤ੍ਵਾਤਿ ਇਟ੍ਠਕਮਤ੍ਤਿਕਾਦੀਹਿ ਪੂਰੇਤ੍ਵਾ. ਅਟ੍ਟਂ ਬਨ੍ਧਿਤ੍ਵਾਤਿ ਅਟ੍ਟਾਲਕਂ ਬਨ੍ਧਿਤ੍ਵਾ. ਉਮਙ੍ਗਨਦੀਤਿ ਏਤ੍ਥ ਉਕਾਰੋ ਓਕਾਰਵਿਪਰੀਤੋ, ਤਸ੍ਮਾ ਪਥਵਿਯਂ ਓਤਰਿਤ੍ਵਾ ਪਵਿਸਿਤ੍ਵਾ ਮਙ੍ਗਤਿ ਗਚ੍ਛਤੀਤਿ ਉਮਙ੍ਗਾਤਿ ਅਤ੍ਥੋ ਦਟ੍ਠਬ੍ਬੋ. ਉਮਙ੍ਗਾਚ ਸਾ ਨਦੀ ਚੇਤਿ ਉਮਙ੍ਗਨਦੀ. ਤਤ੍ਥਾਤਿ ਉਮਙ੍ਗਨਦਿਯਂ. ਹੇਟ੍ਠਾਪਥਵਿਤਲੇ ਠਿਤੋਤਿ ਸੀਮਾਯ ਹੇਟ੍ਠਾਪਥਵਿਤਲੇ ਇਦ੍ਧਿਯਾ ਠਿਤੋ.

ਸੀਮਾਮਾਲ਼ਕੇਤਿ ਖਣ੍ਡਸੀਮਾਯ ਮਾਲ਼ਕੇ. ਵਟਰੁਕ੍ਖੋਤਿ ਨਿਗ੍ਰੋਧਰੁਕ੍ਖੋ. ਤਤੋਤਿ ਵਟਰੁਕ੍ਖਤੋ. ਨਿਗ੍ਗਤਪਾਰੋਹੋਤਿ ਪਵਦ੍ਧਂਵ ਹੁਤ੍ਵਾ ਰੁਕ੍ਖੋ ਆਰੋਹਤਿ ਅਨੇਨਾਤਿ ਪਾਰੋਹੋ, ਏਕੋ ਮੂਲਵਿਸੇਸੋ. ਨਿਗ੍ਗਤੋ ਪਾਰੋਹੋ ਨਿਗ੍ਗਤਪਾਰੋਹੋ. ਮਹਾਸੀਮਂ ਸੋਧੇਤ੍ਵਾਤਿ ਏਤ੍ਥ ਸੋਧਨਂ ਨਾਮ ਮਹਾਸੀਮਗਤਾਨਂ ਭਿਕ੍ਖੂਨਂ ਹਤ੍ਥਪਾਸਾਨਯਨਂ, ਸੀਮਤੋ ਵਾ ਬਹਿਕਰਣਂ. ਬਹਿਦ੍ਧਾਤਿ ਦ੍ਵੀਹਿ ਸੀਮਾਹਿ ਬਹਿਦ੍ਧਾ. ‘‘ਬਹਿਟ੍ਠਾ’’ਤਿਪਿ ਪਾਠੋ. ਬਹਿ ਠਿਤਾ ਕਾਤਬ੍ਬਾਤਿ ਅਤ੍ਥੋ. ਅਨਾਹਚ੍ਚਾਤਿ ਮਹਾਸੀਮਾਯ ਪਥਵੀਤਲਂ ਵਾ ਤਤ੍ਥਜਾਤਰੁਕ੍ਖਾਦੀਨਿ ਵਾ ਨ ਆਹਨਿਤ੍ਵਾ. ਏਵਨ੍ਤਿ ਯਥਾ ਖਣ੍ਡਸੀਮਾਯ, ਏਵਂ ਤਥਾਤਿ ਅਤ੍ਥੋ. ਸੀਮਾਮਾਲ਼ਕੇਤਿ ਖਣ੍ਡਸੀਮਾਮਾਲ਼ਕੇ.

ਸੀਮਾਮਾਲ਼ਕੇਤਿ ਦ੍ਵਿਨ੍ਨਂ ਸੀਮਾਨਂ ਅਙ੍ਗਣੇ. ਸੀਮਾਮਾਲ਼ਕਸ੍ਸਾਤਿ ਕਮ੍ਮਸ੍ਸ ਕਤਟ੍ਠਾਨਸ੍ਸ ਸੀਮਾਮਾਲ਼ਕਸ੍ਸ. ਵੇਹਾਸਟ੍ਠਿਤਸਾਖਾਯਾਤਿ ਕਮ੍ਮਸ੍ਸ ਅਕਤਟ੍ਠਾਨੇ ਸੀਮਾਮਾਲ਼ਕੇ ਉਟ੍ਠਿਤਾਯ ਵੇਹਾਸੇ ਠਿਤਾਯ ਸਾਖਾਯ. ਤਸ੍ਸਾਤਿ ਭਿਕ੍ਖੁਨੋ ਪਾਦਾ ਵਾ ਨਿਵਾਸਨਪਾਰੁਪਨਂ ਵਾਤਿ ਸਮ੍ਬਨ੍ਧੋ. ਪੁਰਿਮਨਯੇਪੀਤਿ ‘‘ਸੀਮਾਮਾਲ਼ਕੇ ਵਟਰੁਕ੍ਖੋ ਹੋਤੀ’’ਤਿਆਦਿਨਾ ਵੁਤ੍ਤੇ ਪੁਰਿਮਨਯੇਪਿ. ਤਤ੍ਰਾਤਿ ਪੁਰਿਮਨਯੇ. ਉਕ੍ਖਿਪਾਪੇਤ੍ਵਾ ਕਾਤੁਂ ਨ ਵਟ੍ਟਤੀਤਿ ਦ੍ਵੀਹਿ ਸੀਮਾਹਿ ਉਟ੍ਠਿਤਰੁਕ੍ਖਸ੍ਸ ਸਾਖਾ ਵਾ ਤਤੋ ਨਿਗ੍ਗਤਪਾਰੋਹੋ ਵਾ ਦ੍ਵੀਸੁ ਸੀਮਾਸੁ ਪਥਵੀਤਲਂ ਵਾ ਤਤ੍ਥ ਜਾਤਰੁਕ੍ਖਾਦੀਨਿ ਵਾ ਆਹਚ੍ਚ ਠਿਤਤ੍ਤਾ ਉਕ੍ਖਿਪਾਪੇਤ੍ਵਾ ਕਾਤੁਂ ਨ ਵਟ੍ਟਤਿ. ਆਨੇਤਬ੍ਬੋਤਿ ਏਤ੍ਥ ਦ੍ਵਿਕਮ੍ਮਿਕਾਯ ਨੀਧਾਤੁਯਾ ਅਪਧਾਨਕਮ੍ਮਸ੍ਸੇਵ ਵੁਤ੍ਤਤ੍ਤਾ ‘‘ਭਿਕ੍ਖੂ’’ਤਿ ਪਧਾਨਕਮ੍ਮਂ ਅਜ੍ਝਾਹਰਿਤਬ੍ਬਂ. ਅਬ੍ਭੁਗ੍ਗਚ੍ਛਤੀਤਿ ਅਬ੍ਭਂ ਆਕਾਸਂ ਉਗ੍ਗਚ੍ਛਤਿ. ਤਤ੍ਰਾਤਿ ਪਬ੍ਬਤੇ. ਕਸ੍ਮਾ ਆਨੇਤਬ੍ਬੋਤਿ ਆਹ ‘‘ਬਜ੍ਝਮਾਨਾਯੇਵ ਹੀ’’ਤਿਆਦਿ. ਤਤ੍ਥ ਬਜ੍ਝਮਾਨਾਯੇਵਾਤਿ ਕਮ੍ਮਵਾਚਾਯ ਬਜ੍ਝਮਾਨਾਯੇਵ. ਇਮਿਨਾ ਅਬਦ੍ਧਸੀਮਾ ਪਮਾਣਰਹਿਤਂ ਦੇਸਂ ਓਤਰਤੀਤਿ ਦਸ੍ਸੇਤਿ. ਯਂਕਿਞ੍ਚੀਤਿ ਯਂਕਿਞ੍ਚਿ ਪਬ੍ਬਤਾਦਿ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਸ੍ਮਿਂਚਿ ਠਾਨੇ. ਏਕਸਮ੍ਬਨ੍ਧੇਨਾਤਿ ਬਦ੍ਧਸੀਮਾਯ ਏਕਸਮ੍ਬਨ੍ਧੇਨ. ਇਤੀਤਿ ਤਸ੍ਮਾ ਆਨੇਤਬ੍ਬੋਤਿ ਯੋਜਨਾ.

੧੪੦. ਤੀਣਿ ਯੋਜਨਾਨਿ ਤਿਯੋਜਨਂ. ‘‘ਪਮਾਣ’’ਨ੍ਤਿ ਇਮਿਨਾ ਪਰਮਸਦ੍ਦਸ੍ਸ ਅਤਿਰੇਕਉਤ੍ਤਮਤ੍ਥੇ ਨਿਵਤ੍ਤੇਤਿ. ਏਤਿਸ੍ਸਾਤਿ ਸੀਮਾਯ. ਸਮ੍ਮਨਨ੍ਤੇਨ ਭਿਕ੍ਖੁਨਾਤਿ ਸਮ੍ਬਨ੍ਧੋ. ਕੋਣਤੋ ਮਿਨਿਤਂ ਕੋਣਨ੍ਤਿ ਯੋਜਨਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਆਪਤ੍ਤਿਞ੍ਚਾਤਿ ਦੁਕ੍ਕਟਾਪਤ੍ਤਿਞ੍ਚ.

ਪਾਰਯਤੀਤਿ ਅਜ੍ਝੋਤ੍ਥਰਤਿ. ‘‘ਕਿਤਕਾਭਿਧੇਯ੍ਯਲਿਙ੍ਗਾ’’ਤਿ (ਕਚ੍ਚਾਯਨਸਾਰੇ ੪੫ ਗਾਥਾਯਂ) ਵਚਨਤੋ ਅਭਿਧੇਯ੍ਯਭੂਤਂ ਸੀਮਂ ਸਨ੍ਧਾਯ ਇਤ੍ਥਿਲਿਙ੍ਗਵਸੇਨ ਪਾਰਾਤਿ ਵੁਤ੍ਤਂ. ਨਦਿਯਾਤਿ ਉਪਯੋਗਤ੍ਥੇ ਸਾਮਿਵਚਨਂ. ਨਦਿਨ੍ਤਿ ਹਿ ਅਤ੍ਥੋ. ਨਦਿਂ ਅਜ੍ਝੋਤ੍ਥਰਮਾਨਂ ਸੀਮਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਨਦਿਪਾਰਸੀਮਾਯਂ. ਯਤ੍ਥਸ੍ਸਾਤਿ ਏਤ੍ਥ ਯਤ੍ਥ ਅਸ੍ਸਾਤਿ ਪਦਵਿਭਾਗਂ ਦਸ੍ਸੇਨ੍ਤੋ ਆਹ ‘‘ਯਤ੍ਥ ਨਦਿਯਾ’’ਤਿਆਦਿ. ‘‘ਨਦਿਯਾ’’ਤਿ ਇਮਿਨਾ ਯਂਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਧੁਵਨਾਵਾਤਿ ਏਤ੍ਥ ਧੁਵਸਦ੍ਦੋ ਨਿਚ੍ਚਤ੍ਥੋਤਿ ਆਹ ‘‘ਨਿਚ੍ਚਸਞ੍ਚਰਣਨਾਵਾ’’ਤਿ. ਇਮਿਨਾ ਧੁਵੇਨ ਨਿਚ੍ਚੇਨ ਸਞ੍ਚਰਣਨਾਵਾ ਧੁਵਨਾਵਾਤਿ ਵਚਨਤ੍ਥਂ ਦਸ੍ਸੇਤਿ. ਅਸ੍ਸਾਤਿ ਹੋਤਿ, ਭਵੇਯ੍ਯ ਵਾ. ਨਾਵਾਯ ਪਮਾਣਂ ਦਸ੍ਸੇਨ੍ਤੋ ਆਹ ‘‘ਯਾ’’ਤਿਆਦਿ. ਤਤ੍ਥ ਯਾਤਿ ਨਾਵਾ. ਪਾਜਨਪੁਰਿਸੇਨਾਤਿ ਏਤ੍ਥ ਪਾਜਨਂ ਨਾਮ ਏਕੋ ਨਾਵਾਯ ਗਮਨੂਪਕਰਣਵਿਸੇਸੋ. ਸੋ ਹਿ ਪਜਤਿ ਨਾਵਾ ਗਚ੍ਛਤਿ ਅਨੇਨਾਤਿ ਪਾਜਨਨ੍ਤਿ ਵੁਚ੍ਚਤਿ. ਜਕਾਰਸ੍ਸ ਚਕਾਰਂ ਕਤ੍ਵਾ ਪਾਚਨਨ੍ਤਿਪਿ ਯੁਜ੍ਜਤੇਵ. ਤਸ੍ਸ ਗਾਹਕੇਨ ਪੁਰਿਸੇਨ ਸਦ੍ਧਿਨ੍ਤਿ ਅਤ੍ਥੋ. ਸਾ ਨਾਵਾ ਨੀਤਾਤਿ ਸਮ੍ਬਨ੍ਧੋ. ਉਦ੍ਧਂ ਵਾ ਅਧੋ ਵਾਤਿ ਨਦਿਯਾ ਪਟਿਸੋਤਂ ਵਾ ਹੇਟ੍ਠਾਸੋਤਂ ਵਾ. ਥੇਨੇਹਿ ਵਾਤਿ ਚੋਰੇਹਿ ਵਾ. ਕਿਞ੍ਚਾਪਿ ਹਟਾ, ਪਨ ਤਥਾਪਿ ਅਵਸ੍ਸਂ ਲਬ੍ਭਨੇਯ੍ਯਾ, ਧੁਵਨਾਵਾਵ ਹੋਤੀਤਿ ਯੋਜਨਾ. ਵਾਤੇਨ ਵਾਤਿ ਮਾਲੁਤੇਨ ਵਾ ‘‘ਛਿਨ੍ਨ’’ਇਤਿ ਸਮ੍ਬਨ੍ਧੋ. ਵੀਚੀਹੀਤਿ ਤਰਙ੍ਗੇਹਿ. ਤਰਙ੍ਗੋ ਹਿ ਵਿਚਿਤ੍ਤਾਕਾਰੇਨ ਚਿਨੋਤਿ ਵਡ੍ਢਤੀਤਿ ਵੀਚੀਤਿ ਵੁਚ੍ਚਤਿ. ਕਿਞ੍ਚਾਪਿ ਨਦੀਮਜ੍ਝਂ ਨੀਤਾ, ਪਨ ਤਥਾਪਿ ਅਵਸ੍ਸਂ ਆਹਰਿਤਬ੍ਬਾ, ਧੁਵਨਾਵਾਵ ਹੋਤੀਤਿ ਯੋਜਨਾ. ਓਗਤੇਤਿ ਓਤਰਿਤ੍ਵਾ ਗਤੇ. ਥਲਂ ਉਸ੍ਸਾਰਿਤਾਤਿ ਥਲਂ ਉਕ੍ਖਿਪਿਤ੍ਵਾ ਸਾਰਿਤਾ ਪਾਪਿਤਾ ਨਾਵਾਪੀਤਿ ਸਮ੍ਬਨ੍ਧੋ. ਵਿਸਙ੍ਖਤਪਦਰਾਤਿ ਸਙ੍ਖਤਵਿਰਹਿਤਫਲਕਾ ਵਾ. ਧੁਵਨਾਵਾਵ ਹੋਤੀਤਿ ਨਿਮਿਤ੍ਤਕਿਤ੍ਤਨਕਾਲੇ ਨਿਚ੍ਚਸਞ੍ਚਰਣਨਾਵਤ੍ਤਾ ਧੁਵਨਾਵਾਵ ਹੋਤੀਤਿ ਅਧਿਪ੍ਪਾਯੋ. ਤਤ੍ਰਾਤਿ ‘‘ਧੁਵਨਾਵਾ’’ਤਿਵਚਨੇ. ਨਿਮਿਤ੍ਤਂ ਵਾ ਸੀਮਾ ਵਾ ਕਮ੍ਮਵਾਚਾਯ ਗਚ੍ਛਤੀਤਿ ਏਤ੍ਥ ਕਿਞ੍ਚਾਪਿ ਨ ਨਿਮਿਤ੍ਤਂ ਕਮ੍ਮਵਾਚਾਯ ਗਚ੍ਛਤਿ, ਸੀਮਾਯ ਪਨ ਅਵਿਨਾਭਾਵਤੋ ਵੁਤ੍ਤਂ ‘‘ਕਮ੍ਮਵਾਚਾਯ ਗਚ੍ਛਤੀ’’ਤਿ. ਤਸ੍ਮਾਤਿ ਯਸ੍ਮਾਵ ਨਾਵਾਯ ਆਗਚ੍ਛਨ੍ਤਾਪਿ ਭਗਵਤਾ ਅਨੁਞ੍ਞਾਤਾ, ਤਸ੍ਮਾ.

ਯਤ੍ਥਾਤਿ ਨਦਿਪਾਰਸੀਮਸਮ੍ਮਨਨਟ੍ਠਾਨੇ. ਰੁਕ੍ਖਸਙ੍ਘਾਟਮਯੋਤਿ ਰੁਕ੍ਖਸਮੂਹੇਨ ਕਤੋ. ਪਦਰਬਦ੍ਧੋਤਿ ਫਲਕੇਹਿ ਬਦ੍ਧੋ. ਸਞ੍ਚਰਣਯੋਗ੍ਗੋਤਿ ਸਞ੍ਚਰਣਕ੍ਖਮੋ. ਪਾਲ਼ਿਯਂ ‘‘ਅਸ੍ਸਾ’’ਤਿ ਠਾਨੇ ਅਟ੍ਠਕਥਾਯਂ ‘‘ਅਤ੍ਥੀ’’ਤਿ ਵੁਤ੍ਤਤ੍ਤਾ ‘‘ਅਸ੍ਸਾ’’ਤਿਪਦਸ੍ਸ ਹੋਤੀਤਿ ਅਤ੍ਥੋਯੇਵ ਦਟ੍ਠਬ੍ਬੋ. ਤਂਖਣਞ੍ਞੇਵਾਤਿ ਤਸ੍ਮਿਂ ਨਿਮਿਤ੍ਤਕਿਤ੍ਤਕ੍ਖਣੇਯੇਵ. ਰੁਕ੍ਖਂ ਛਿਨ੍ਦਿਤ੍ਵਾ ਕਤੋਤਿ ਸਮ੍ਬਨ੍ਧੋ. ਏਕਪਦਿਕਸੇਤੂਤਿ ਏਕੇਨ ਪਦੇਨ ਗਮਨਯੋਗ੍ਗੋ ਏਕਪਦਿਕੋ, ਸੋਯੇਵ ਸੇਤੂਤਿ ਏਕਪਦਿਕਸੇਤੁ. ਅਕਪ੍ਪਿਯਸੇਤੁਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਤੇਨਾਤਿ ਸੇਤੁਨਾ. ਸਞ੍ਚਰਿਤੁਂ ਨ ਸਕ੍ਕਾ ਹੋਤੀਤਿ ਯੋਜਨਾ.

ਯਤ੍ਥਾਤਿ ਯਸ੍ਮਿਂ ਨਦਿਪਾਰਸੀਮਸਮ੍ਮਨਨਟ੍ਠਾਨੇ. ਅਭਿਮੁਖਤਿਤ੍ਥੇਯੇਵਾਤਿ ਸੀਮਾਯ ਅਭਿਮੁਖਤਿਤ੍ਥੇ ਏਵ. ਧੁਵਨਾਵਾ ਵਾ ਧੁਵਸੇਤੁ ਵਾ ਅਭਿਮੁਖਤਿਤ੍ਥਤੋ ਈਸਕਂ ਉਦ੍ਧਂ ਆਰੋਹਨ੍ਤੋਪਿ ਅਧੋ ਓਰੋਹਨ੍ਤੋਪਿ ਕਪ੍ਪਤੀਤਿ ਦਸ੍ਸੇਨ੍ਤੋ ਆਹ ‘‘ਸਚੇ’’ਤਿਆਦਿ. ਈਸਕਨ੍ਤਿ ਏਕਉਸਭ ਦ੍ਵਿਉਸਭਾਦਿਵਸੇਨ ਮਨਂ ਅਪ੍ਪਮਤ੍ਤਂ. ਉਦ੍ਧਂ ਵਾਤਿ ਅਭਿਮੁਖਤਿਤ੍ਥਤੋ ਉਪਰਿ ਵਾ. ਅਧੋ ਵਾਤਿ ਤਤੋ ਹੇਟ੍ਠਾ ਵਾ. ਗਾਵੁਤਮਤ੍ਤਬ੍ਭਨ੍ਤਰੇਤਿ ਗਾਵੁਤਪਮਾਣਸ੍ਸ ਠਾਨਸ੍ਸ ਅਬ੍ਭਨ੍ਤਰੇ.

ਸਹਨਿਮਿਤ੍ਤਕਿਤ੍ਤਨਵਿਧਿਨਾ ਸਮ੍ਮਨਿਤਬ੍ਬਵਿਧਿਂ ਦਸ੍ਸੇਨ੍ਤੋ ਆਹ ‘‘ਇਮਞ੍ਚ ਪਨਾ’’ਤਿਆਦਿ. ਦ੍ਵੀਸੁ ਤੀਰੇਸੁ ਠਾਤੁਮਸਕ੍ਕੁਣੇਯ੍ਯਤ੍ਤਾ ਵੁਤ੍ਤਂ ‘‘ਏਕਸ੍ਮਿਂ ਤੀਰੇ ਠਤ੍ਵਾ’’ਤਿ. ਤਤੋਤਿ ਨਿਮਿਤ੍ਤਤੋ. ਅਤ੍ਤਾਨਨ੍ਤਿ ਨਿਮਿਤ੍ਤਕਿਤ੍ਤਨਂ ਵਿਨਯਧਰਂ ਸਨ੍ਧਾਯ ਵੁਤ੍ਤਂ. ਪਰਿਕ੍ਖਿਪਨ੍ਤੇਨਾਤਿ ਪਰਿਯਾਯਨ੍ਤੇਨ. ਤਸ੍ਸਾਤਿ ਤਤ੍ਤਕਸ੍ਸ ਪਰਿਚ੍ਛੇਦਸ੍ਸ. ਸਮ੍ਮੁਖਟ੍ਠਾਨੇਤਿ ਅਧੋਸੋਤੇ ਨਦਿਤੀਰੇ ਠਿਤਸ੍ਸ ਨਿਮਿਤ੍ਤਸ੍ਸ ਸਮ੍ਮੁਖਟ੍ਠਾਨੇ. ਤਤੋਤਿ ਨਿਮਿਤ੍ਤਤੋ. ਤਸ੍ਸਾਤਿ ਤਤ੍ਤਕਸ੍ਸ ਪਰਿਚ੍ਛੇਦਸ੍ਸ. ਸਮ੍ਮੁਖਾ ਨਦਿਤੀਰੇ ਨਿਮਿਤ੍ਤਂ ਅਤ੍ਥੀਤਿ ਸਮ੍ਬਨ੍ਧੋ. ਸਙ੍ਘਟੇਤਬ੍ਬਨ੍ਤਿ ਸਮ੍ਬਨ੍ਧਿਤਬ੍ਬਂ. ਅਥਾਤਿ ਨਿਮਿਤ੍ਤਕਿਤ੍ਤਨਤੋ ਪਚ੍ਛਾ. ‘‘ਸਬ੍ਬਨਿਮਿਤ੍ਤਾਨਂ ਅਨ੍ਤੋ ਠਿਤੇ ਭਿਕ੍ਖੂ ਹਤ੍ਥਪਾਸਗਤੇ ਕਤ੍ਵਾ’’ਤਿ ਇਦਂ ਸਬ੍ਬਂ ਏਕਂ ਗਾਮਖੇਤ੍ਤਂ ਬ੍ਯਾਪੇਤ੍ਵਾ ਸਮ੍ਮਨਿਤਭਾਵਂ ਸਨ੍ਧਾਯ ਵੁਤ੍ਤਂ. ਸਚੇ ਸਕਲਂ ਗਾਮਖੇਤ੍ਤਂ ਅਬ੍ਯਾਪੇਤ੍ਵਾ ਏਕਦੇਸੇ ਸਮ੍ਮਨਿਤਂ ਹੋਤਿ, ਨਿਮਿਤ੍ਤਤੋ ਬਹਿ ਠਿਤੇ ਭਿਕ੍ਖੂਪਿ ਹਤ੍ਥਪਾਸਗਤੇ ਕਤ੍ਵਾ ਸਮ੍ਮਨਿਤਬ੍ਬਾ. ਕਮ੍ਮਨ੍ਤਿ ਸੀਮਸਮ੍ਮੁਤਿਕਮ੍ਮਂ. ‘‘ਠਪੇਤ੍ਵਾ ਨਦਿ’’ਨ੍ਤਿਵਚਨਸ੍ਸ ਕਾਰਣਂ ਦਸ੍ਸੇਨ੍ਤੋ ਆਹ ‘‘ਨਦੀ ਪਨ ਬਦ੍ਧਸੀਮਸਙ੍ਖ੍ਯਂ ਨ ਗਚ੍ਛਤੀ’’ਤਿ.

ਦੀਪਕੋ ਹੋਤੀਤਿ ਏਤ੍ਥ ਦੀਪੋਤਿ ਅਨ੍ਤਰਦੀਪੋ. ਸੋ ਹਿ ਯਸ੍ਮਾ ਜਲਮਜ੍ਝੇ ਦਿਪ੍ਪਤਿ, ਯਸ੍ਮਾ ਚ ਦ੍ਵਿਧਾ ਆਪੋ ਏਤ੍ਥ ਸਨ੍ਦਤਿ, ਤਸ੍ਮਾ ਦੀਪੋਤਿ ਵੁਚ੍ਚਤਿ, ਸੋਯੇਵ ਖੁਦ੍ਦਕਟ੍ਠੇਨ ਦੀਪਕੋ. ਕਕਾਰੋ ਹਿ ਖੁਦ੍ਦਕਤ੍ਥਵਾਚਕੋ. ਤਨ੍ਤਿ ਦੀਪਕਂ. ਅਤ੍ਤਨਾਤਿ ਵਿਨਯਧਰੇਨ. ਓਰਿਮਨ੍ਤੇ ਚ ਪਾਰਿਮਨ੍ਤੇ ਚਾਤਿ ਅਧੋਸੋਤੇ ਨਦਿਤੀਰੇ ਠਿਤਸ੍ਸ ਨਿਮਿਤ੍ਤਸ੍ਸ ਸਮ੍ਮੁਖੇ ਓਰਿਮਨ੍ਤੇ ਚ ਪਾਰਿਮਨ੍ਤੇ ਚ. ਪਰਤੀਰੇ ਨਿਮਿਤ੍ਤਂ ਕਿਤ੍ਤੇਤ੍ਵਾਤਿ ਸਮ੍ਬਨ੍ਧੋ. ਕਿਸ੍ਸ ਸਮ੍ਮੁਖਟ੍ਠਾਨੇ ਨਿਮਿਤ੍ਤਨ੍ਤਿ ਆਹ ‘‘ਨਦਿਯਾ ਓਰਿਮਤੀਰੇ ਨਿਮਿਤ੍ਤਸ੍ਸ ਸਮ੍ਮੁਖਟ੍ਠਾਨੇ’’ਤਿ. ਤਤੋਤਿ ਨਿਮਿਤ੍ਤਤੋ. ਸਮ੍ਮੁਖਾ ਨਿਮਿਤ੍ਤਂ ਅਤ੍ਥੀਤਿ ਸਮ੍ਬਨ੍ਧੋ. ਪਾਰਿਮਨ੍ਤੇ ਚ ਓਰਿਮਨ੍ਤੇ ਚਾਤਿ ਪਰਤੀਰੇ ਉਪਰਿਸੋਤੇ ਠਿਤਸ੍ਸ ਨਿਮਿਤ੍ਤਸ੍ਸ ਸਮ੍ਮੁਖੇ ਪਾਰਿਮਨ੍ਤੇ ਚ ਓਰਿਮਨ੍ਤੇ ਚ. ਪਠਮਕਿਤ੍ਤਿਤਨਿਮਿਤ੍ਤੇਨਾਤਿ ਓਰਿਮਤੀਰੇ ਉਪਰਿਸੋਤੇ ਪਠਮਂ ਕਿਤ੍ਤਿਤੇਨ ਨਿਮਿਤ੍ਤੇਨ. ਏਕਾ ਸੀਮਾ ਇਮਸ੍ਸਾਤਿ ਏਕਸੀਮੋ, ਦੀਪਕੋ. ‘‘ਤੀਰਦ੍ਵਯਞ੍ਚਾ’’ਤਿ ਪਦਮਪੇਕ੍ਖਿਤ੍ਵਾ ‘‘ਏਕਸੀਮ’’ਨ੍ਤਿ ਸਮ੍ਬਨ੍ਧਿਤਬ੍ਬਂ. ਵਚ੍ਚਮਨਪੇਕ੍ਖਿਤ੍ਵਾ ‘‘ਏਕਸੀਮਾ’’ਤਿਪਿ ਨਿਚ੍ਚਇਤ੍ਥਿਲਿਙ੍ਗਵਸੇਨ ਪਾਠੋ ਅਤ੍ਥਿ.

ਉਦ੍ਧਂ ਵਾ ਅਧੋ ਵਾਤਿ ਏਤ੍ਥ ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਅਥਾਤਿ ਤਸ੍ਮਿਂ ਅਧਿਕਤਰੇ ਸਤੀਤਿ ਯੋਜਨਾ. ਵਿਹਾਰਸੀਮਪਰਿਚ੍ਛੇਦਨਿਮਿਤ੍ਤਸ੍ਸ ਉਜੁਕਮੇਵਾਤਿ ਸਚੇ ਦੀਪਕੋ ਅਧੋ ਅਧਿਕਤਰੋ ਹੋਤਿ, ਓਰਿਮਤੀਰੇ ਅਧੋਸੋਤੇ ਠਿਤਸ੍ਸ ਵਿਹਾਰਸੀਮਪਰਿਚ੍ਛੇਦਨਿਮਿਤ੍ਤਸ੍ਸ ਉਜੁਕਮੇਵ. ਸਿਖਰਨ੍ਤਿ ਸਿਙ੍ਗਂ. ਤਞ੍ਹਿ ਸਿਖਂ ਮਤ੍ਥਕਂ ਰਾਤਿ ਗਣ੍ਹਾਤੀਤਿ ਸਿਖਰਨ੍ਤਿ ਵੁਚ੍ਚਤਿ. ਤਤੋਤਿ ਦੀਪਕਸ੍ਸ ਪਾਰਿਮਨ੍ਤਨਿਮਿਤ੍ਤਤੋ. ਪਰਤੀਰਨਿਮਿਤ੍ਤਾਨਿ ਕਿਤ੍ਤੇਤ੍ਵਾਤਿ ਸਮ੍ਬਨ੍ਧੋ. ਅਯਂ ਦੀਪਕਸ੍ਸ ਵਿਹਾਰਸੀਮਪਰਿਚ੍ਛੇਦਤੋ ਅਧੋ ਅਧਿਕਤਰੇ ਵਿਨਿਚ੍ਛਯੋ. ਉਦ੍ਧਂ ਅਧਿਕਤਰੇਪਿ ਇਮਿਨਾਨੁਸਾਰੇਨ ਵੇਦਿਤਬ੍ਬੋਤਿ ਸੋ ਨ ਦਸ੍ਸਿਤੋ. ਪਬ੍ਬਤਸਣ੍ਠਾਨਾਤਿ ਪਬ੍ਬਤੇਨ ਸਮਂ ਠਾਨਂ ਏਤਿਸ੍ਸਾਤਿ ਪਬ੍ਬਤਸਣ੍ਠਾਨਾ.

ਉਦ੍ਧਮ੍ਪਿ ਅਧੋਪੀਤਿ ਪਿਸਦ੍ਦੋ ਸਮੁਚ੍ਚਯਤ੍ਥੋ. ਉਭੋਪਿ ਸਿਖਰਾਨੀਤਿ ਉਦ੍ਧਂ ਸਿਖਰਂ, ਅਧੋ ਸਿਖਰਨ੍ਤਿ ਉਭੋਪਿ ਸਿਖਰਾਨਿ. ਮੁਦਿਙ੍ਗਸਣ੍ਠਾਨਾਤਿ ਮੂਲੇ ਚ ਅਗ੍ਗੇ ਚ ਤਨੁਕਸ੍ਸ ਮਜ੍ਝੇ ਥੂਲਸ੍ਸ ਮੁਦਿਙ੍ਗਸ੍ਸ ਸਣ੍ਠਾਨਾ.

ਸਬ੍ਬਪਠਮੇਨ ਨਯੇਨਾਤਿ ਉਦ੍ਧਂ ਅਧਿਕਨਯਸ੍ਸ, ਅਧੋ ਅਧਿਕਨਯਸ੍ਸ, ਉਦ੍ਧਂਅਧੋਅਧਿਕਨਯਸ੍ਸ ਚਾਤਿ ਸਬ੍ਬੇਸਂ ਨਯਾਨਂ ਪਠਮੇਨ ਵਿਹਾਰਸੀਮਦੀਪਕਾਨਂ ਸਮੇਨ ਨਯੇਨ. ਪਣਵਸਣ੍ਠਾਨਾਤਿ ਮੂਲੇ ਚ ਅਗ੍ਗੇ ਚ ਥੂਲਸ੍ਸ ਮਜ੍ਝੇਤਨੁਕਸ੍ਸ ਪਣਵਸ੍ਸ ਸਣ੍ਠਾਨਾ.

੭੨. ਉਪੋਸਥਾਗਾਰਾਦਿਕਥਾ

੧੪੧. ਅਨੁਪਰਿਵੇਣਿਯਨ੍ਤਿ ਏਤ੍ਥ ਅਨੁਸਦ੍ਦਸ੍ਸ ਵਿਚ੍ਛਤ੍ਥਂ, ਪਰਿਵੇਣਸਦ੍ਦਸ੍ਸ ਚ ਲਿਙ੍ਗਵਿਪਲ੍ਲਾਸਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਤਸ੍ਮਿਂ ਤਸ੍ਮਿਂ ਪਰਿਵੇਣੇ’’ਤਿ. ਪਰਿਵੇਣਸਦ੍ਦੋ ਹਿ ਨਪੁਂਸਕਲਿਙ੍ਗੋ, ਇਧ ਪਨ ਲਿਙ੍ਗਵਿਪਲ੍ਲਾਸਂ ਕਤ੍ਵਾ ਇਤ੍ਥਿਲਿਙ੍ਗਵਸੇਨ ਵੁਤ੍ਤਂ. ‘‘ਸਙ੍ਕੇਤਂ ਅਕਤ੍ਵਾ’’ਤਿ ਇਮਿਨਾ ਅਸਙ੍ਕੇਤੇਨਾਤਿ ਪਦਸ੍ਸ ਕਿਰਿਯਾਵਿਸੇਸਨਤ੍ਤਂ ਦੀਪੇਤਿ. ‘‘ਕਮ੍ਮਵਾਚਾਯਾ’’ਤਿ ਇਮਿਨਾ ਸਮੂਹਨਿਤ੍ਵਾਤਿ ਪਦਸ੍ਸ ਕਰਣਂ ਦਸ੍ਸੇਤਿ.

੧੪੨. ਯਤੋਤਿ ਏਤ੍ਥ ਤੋਪਚ੍ਚਯਸ੍ਸ ਕਾਰਣਤ੍ਥੇ ਪਵਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ’’ਤਿ. ‘‘ਹਤ੍ਥਪਾਸੇ’’ਤਿ ਇਮਿਨਾ ਹਤ੍ਥਪਾਸਤੋ ਬਹਿ ਨਿਸਿਨ੍ਨੇ ਅਕਤੋਵਸ੍ਸ ਉਪੋਸਥੋ ਹੋਤੀਤਿ ਦਸ੍ਸੇਤਿ. ਅਸ੍ਸਾਤਿ ਭਿਕ੍ਖੁਨੋ. ਵਤ੍ਥੁਵਸੇਨਾਤਿ ਅਟ੍ਠੁਪ੍ਪਤ੍ਤਿਵਸੇਨ. ਉਪੋਸਥਸ੍ਸ ਪਮੁਖਸ੍ਸ ਅਬ੍ਭੋਕਾਸੇ ਵਾ ਮਾਲ਼ਕਾਦੀਸੁ ਵਾਤਿ ਸਮ੍ਬਨ੍ਧੋ. ਨਿਮਿਤ੍ਤੁਪਗਾ ਵਾ ਅਨਿਮਿਤ੍ਤੁਪਗਾ ਵਾਤਿ ਹੇਟ੍ਠਾ ਅਟ੍ਠਸੁ ਨਿਮਿਤ੍ਤੇਸੁ ਵੁਤ੍ਤਾ ਨਿਮਿਤ੍ਤੁਪਗਾ ਵਾ ਅਨਿਮਿਤ੍ਤੁਪਗਾ ਵਾ ਪਬ੍ਬਤਾਦਯੋ ਵਾ ਅਞ੍ਞੇ ਵਾ ਕਿਤ੍ਤੇਤਬ੍ਬਾ.

ਪਠਮਤਰਂ ਨ ਆਗਚ੍ਛਤਿ, ਦੁਕ੍ਕਟਨ੍ਤਿ ਉਪੋਸਥੇ ਘੋਸਿਯਮਾਨੇ ਪਠਮਤਰਂ ਨ ਆਗਚ੍ਛਤਿ, ਦੁਕ੍ਕਟਂ. ਵਿਹਾਰਸ੍ਸ ਮਜ੍ਝੇ ਹੋਤੀਤਿ ਯੋਜਨਾ. ਏਤ੍ਥਾਤਿ ਪੋਰਾਣਕੇ ਆਵਾਸੇ. ਤਤ੍ਥਾਤਿ ਪੋਰਾਣਕੇ ਆਵਾਸੇ. ਅਸਮ੍ਬਾਧੋਤਿ ਸਙ੍ਘਸ੍ਸ ਨਿਸਜ੍ਜਟ੍ਠਾਨਪਹੋਨਕੋ. ਤਤ੍ਥਾਤਿ ਪਚ੍ਛਾ ਉਟ੍ਠਿਤੇ ਆਵਾਸੇ.

ਸਬ੍ਬੇਸਂ ਨਿਸਜ੍ਜਟ੍ਠਾਨਨ੍ਤਿ ਯੋਜਨਾ. ਤਤ੍ਥਾਤਿ ਥੇਰਸ੍ਸ ਵਿਹਾਰੇ. ਸੋਤਿ ਥੇਰਸ੍ਸ ਵਿਹਾਰੋ. ਏਤ੍ਥਾਤਿ ਤੁਮ੍ਹਾਕਂ ਵਿਹਾਰੇ. ਸਬ੍ਬੇਸਂ ਓਕਾਸੋ ਨਤ੍ਥੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਤਂ ਅਸੁਕਂ ਨਾਮ ਆਵਾਸਂ. ‘‘ਵਟ੍ਟਤੀ’’ਤਿ ਵਤ੍ਤਬ੍ਬਨ੍ਤਿ ਯੋਜਨਾ. ਤਸ੍ਸਾਤਿ ਥੇਰਸ੍ਸ.

੭੪. ਅਵਿਪ੍ਪਵਾਸਸੀਮਾਨੁਜਾਨਨਕਥਾ

੧੪੩. ਅਨ੍ਧਕਵਿਨ੍ਦਂ ਨਾਮਾਤਿ ਤਸ੍ਸ ਗਾਮਸ੍ਸ ਨਾਮਂ. ਤਨ੍ਤਿ ਅਨ੍ਧਕਵਿਨ੍ਦਂ. ਥੇਰੋਤਿ ਮਹਾਕਸ੍ਸਪਤ੍ਥੇਰੋ. ਤਤੋਤਿ ਅਨ੍ਧਕਵਿਨ੍ਦਤੋ. ਇਮਿਨਾ ‘‘ਅਨ੍ਧਕਵਿਨ੍ਦਾ’’ਤਿ ਏਤ੍ਥ ਨਿਸ੍ਸਕ੍ਕਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ਉਪੋਸਥਨ੍ਤਿ ਤਦਤ੍ਥੇ ਉਪਯੋਗਵਚਨਂ. ਉਪੋਸਥਤ੍ਥਾਯਾਤਿ ਹਿ ਅਤ੍ਥੋ. ਅਨ੍ਧਕਵਿਨ੍ਦਾ ਰਾਜਗਹਂ ਆਗਮਨਸ੍ਸ ਕਾਰਣਂ ਦਸ੍ਸੇਨ੍ਤੋ ਆਹ ‘‘ਰਾਜਗਹਂ ਹੀ’’ਤਿਆਦਿ. ਤਤ੍ਥ ਹੀਤਿ ਯਸ੍ਮਾ. ਅਨ੍ਧਕਵਿਨ੍ਦਾ ਵਿਹਾਰਂ ਅਨ੍ਤੋ ਕਤ੍ਵਾ ‘‘ਅਟ੍ਠਾਰਸ ਮਹਾਵਿਹਾਰਾ’’ਤਿ ਵੁਤ੍ਤਂ. ਨੇਸਨ੍ਤਿ ਅਟ੍ਠਾਰਸਨ੍ਨਂ ਮਹਾਵਿਹਾਰਾਨਂ. ਸਙ੍ਘਸ੍ਸ ਸਾਮਗ੍ਗਿਦਾਨਤ੍ਥਨ੍ਤਿ ਏਤ੍ਥ ਸਙ੍ਘਸ੍ਸ ਸਾਮਗ੍ਗਿਦਾਨਂ ਅਤ੍ਤਨੋ ਉਪੋਸਥਕਿਚ੍ਚਂ ਸਿਦ੍ਧਂ. ਤਸ੍ਮਾ ਪਾਲ਼ਿਯਂ ‘‘ਉਪੋਸਥਂ ਆਗਚ੍ਛਨ੍ਤੋ’’ਤਿ ਵੁਤ੍ਤਂ. ‘‘ਸਿਪ੍ਪਿਨਿਯਂ ਨਾਮਾ’’ਤਿ ਇਮਿਨਾ ਨਦਿਂ ਤਰਨ੍ਤੋਤਿ ਏਤ੍ਥ ਨਦਿਯਾ ਨਾਮਂ ਦਸ੍ਸੇਤਿ. ਮਨਂ ਵੂਲ਼੍ਹੋਤਿ ਏਤ੍ਥ ਮਨਨ੍ਤਿ ਨਿਪਾਤੋ ਈਸਕਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਈਸਕ’’ਨ੍ਤਿ. ‘‘ਅਪ੍ਪਮਤ੍ਤ’’ਨ੍ਤਿ ਇਮਿਨਾ ‘‘ਈਸਕ’’ਨ੍ਤਿਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਵੂਲ਼੍ਹਭਾਵੋ’’ਤਿ ਇਮਿਨਾ ਭਾਵਪਚ੍ਚਯੇਨ ਵਿਨਾ ਭਾਵਤ੍ਥੋ ਞਾਤਬ੍ਬੋਤਿ ਦਸ੍ਸੇਤਿ. ਚਣ੍ਡੇਨਾਤਿ ਖਰੇਨ. ਤਤ੍ਥਾਤਿ ਨਦਿਯਂ. ਅਮਨਸਿਕਰੋਨ੍ਤੋਤਿ ‘‘ਚਣ੍ਡਸੋਤ’’ਨ੍ਤਿ ਆਭੋਗਂ ਅਕਰੋਨ੍ਤੋ. ਨ ਪਨ ਵੂਲ਼੍ਹੋਤਿ ਨ ਪਨ ਮਹਾਵੂਲ਼੍ਹੋ. ਉਦਕਬ੍ਭਾਹਤਾਨੀਤਿ ਉਦਕੇਨ ਅਭਿਆਹਤਾਨਿ. ਅਸ੍ਸਾਤਿ ਥੇਰਸ੍ਸ. ਅਲ੍ਲਾਨੀਤਿ ਤਿਨ੍ਤਾਨਿ.

੧੪੪. ਪੁਰਿਮਕਮ੍ਮਵਾਚਾਤਿ ‘‘ਸਮ੍ਮਤਾ ਸਾ ਸੀਮਾ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸਾ’’ਤਿ ਪੁਰੇ ਵੁਤ੍ਤਾ ਕਮ੍ਮਵਾਚਾ. ਅਯਮੇਵਾਤਿ ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿਪਦਂ ਪਕ੍ਖਿਪਿਤ੍ਵਾ ਅਨੁਪਞ੍ਞਤ੍ਤਾ ਅਯਮੇਵ ਕਮ੍ਮਵਾਚਾ. ਅਯਨ੍ਤਿ ਪਚ੍ਛਿਮਕਮ੍ਮਵਾਚਾ. ਹਿ ਯਸ੍ਮਾ ਭਿਕ੍ਖੁਨਿਸਙ੍ਘੋ ਅਨ੍ਤੋਗਾਮੇ ਵਸਤਿ, ਤਸ੍ਮਾ ਪੁਰਿਮਾਯੇਵ ਵਟ੍ਟਤੀਤਿ ਯੋਜਨਾ. ਯਦਿ ਏਵਨ੍ਤਿ ਯਦਿ ਭਿਕ੍ਖੁਨਿਸਙ੍ਘਸ੍ਸ ਅਯਂ ਪਚ੍ਛਿਮਕਮ੍ਮਵਾਚਾ ਵਟ੍ਟਨਂ ਸਿਯਾ ਭਵੇਯ੍ਯ, ਏਵਂ ਸਤੀਤਿ ਯੋਜਨਾ. ਸੋਤਿ ਭਿਕ੍ਖੁਨਿਸਙ੍ਘੋ. ਏਤਾਯ ਕਮ੍ਮਵਾਚਾਯਾਤਿ ਪਚ੍ਛਿਮਕਮ੍ਮਵਾਚਾਯ. ਨ ਲਭੇਯ੍ਯਾਤਿ ਅਨ੍ਤੋਗਾਮੇ ਵਸਨਤ੍ਤਾ ਤਿਚੀਵਰਪਰਿਹਾਰਂ ਨ ਲਭੇਯ੍ਯ. ਕਿਂ ਨ ਲਭਤਿਯੇਵਾਤਿ ਆਹ ‘‘ਅਤ੍ਥਿ ਚਸ੍ਸ ਪਰਿਹਾਰੋ’’ਤਿ. ਅਸ੍ਸਾਤਿ ਭਿਕ੍ਖੁਨਿਸਙ੍ਘਸ੍ਸ. ਦ੍ਵੇਪਿ ਸੀਮਾਯੋਤਿ ਸਮਾਨਸਂਵਾਸਕਸੀਮਾ ਚ ਅਵਿਪ੍ਪਵਾਸਸੀਮਾ ਚਾਤਿ ਦ੍ਵੇਪਿ ਸੀਮਾਯੋ. ਤਤ੍ਥਾਤਿ ਭਿਕ੍ਖੁਭਿਕ੍ਖੁਨੀਸੁ. ਤਸ੍ਸਾਤਿ ਭਿਕ੍ਖੂਨਂ ਸੀਮਾਯ. ਏਸੇਵ ਨਯੋਤਿ ਭਿਕ੍ਖੁਨੀਨਂ ਸੀਮਂ ਅਜ੍ਝੋਤ੍ਥਰਿਤ੍ਵਾਪਿ ਅਨ੍ਤੋਪਵਿਸਿਤ੍ਵਾਪਿ ਭਿਕ੍ਖੂਨਂ ਸੀਮਾਯ ਸਮ੍ਮਨੇ ਏਸੇਵ ਨਯੋ. ਏਤੇਤਿ ਭਿਕ੍ਖੁਭਿਕ੍ਖੁਨਿਯੋ. ਸਾਮਞ੍ਞਤ੍ਤਾ ਹਿ ਪੁਲ੍ਲਿਙ੍ਗੇਨ ਵੁਤ੍ਤਂ. ਏਤ੍ਥ ਚਾਤਿ ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿਪਦੇ ਚ. ਸਙ੍ਗਹੋ ਵੇਦਿਤਬ੍ਬੋ, ਕਸ੍ਮਾ? ਗਾਮੇਨ ਨਿਗਮਨਗਰਾਨਂ ਏਕਲਕ੍ਖਣਤ੍ਤਾ.

ਪਰਿਕ੍ਖੇਪੋਕਾਸੋਤਿ ਪਰਿਕ੍ਖੇਪਾਰਹੋਕਾਸੋ. ਤੇਸੂਤਿ ਗਾਮਗਾਮੂਪਚਾਰੇਸੁ. ਪਰਿਹਾਰਨ੍ਤਿ ਚੀਵਰਵਿਪ੍ਪਵਾਸਆਪਤ੍ਤਿਅਪਨਯਨਂ. ‘‘ਇਤੀ’’ਤਿਆਦਿ ਨਿਗਮਨਂ. ਏਤ੍ਥਾਤਿ ਸਮਾਨਸਂਵਾਸਕਅਵਿਪ੍ਪਵਾਸਸੀਮਾਸੁ. ਅਤ੍ਤਨੋ ਧਮ੍ਮਤਾਯਾਤਿ ਅਤ੍ਤਨੋ ਸਭਾਵੇਨ. ਯਤ੍ਥਾਤਿ ਯਸ੍ਮਿਂ ਠਾਨੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਸ੍ਸਾਤਿ ਅਵਿਪ੍ਪਵਾਸਸੀਮਾਯ. ਵਿਸੁਨ੍ਤਿ ਸਮਾਨਸਂਵਾਸਕਸੀਮਤੋ ਪਾਟੇਕ੍ਕਂ. ਤਤ੍ਥਾਤਿ ਦ੍ਵੀਸੁ ਸੀਮਾਸੁ. ਅਵਿਪ੍ਪਵਾਸਾਯਾਤਿ ਅਵਿਪ੍ਪਵਾਸਸੀਮਾਯ. ਤਨ੍ਤਿ ਗਾਮਂ. ਸਾਤਿ ਅਵਿਪ੍ਪਵਾਸਸੀਮਾ. ਸਮ੍ਮਤਾਯ ਸੀਮਾਯਾਤਿ ਅਵਿਪ੍ਪਵਾਸਸੀਮਾਯ ਸਮ੍ਮਤਾਯ ਸਤਿਯਾਤਿ ਸਮ੍ਬਨ੍ਧੋ. ਸਮ੍ਮਤਤੋ ਪਚ੍ਛਾਤਿ ਵਾ ਯੋਜਨਾ. ਨਿਵਿਸਤੀਤਿ ਨਿਵਾਸਤ੍ਥਾਯ ਵਿਸਤਿ ਪਵਿਸਤਿ. ਸੋਪੀਤਿ ਗਾਮੋਪਿ. ਸੀਮਸਙ੍ਖ੍ਯਂਯੇਵਾਤਿ ਅਵਿਪ੍ਪਾਸਸੀਮਵੋਹਾਰਮੇਵ. ਅਧਿਟ੍ਠਿਤਤੇਚੀਵਰਿਕਾ ਭਿਕ੍ਖੂ ਪਰਿਹਾਰਂ ਲਭਨ੍ਤੀਤਿ ਅਧਿਪ੍ਪਾਯੋ. ਯਥਾ ਪਚ੍ਛਾ ਨਿਵਿਟ੍ਠੋ ਗਾਮੋ ਸੀਮਸਙ੍ਖ੍ਯਂਯੇਵ ਗਚ੍ਛਤਿ, ਏਵਨ੍ਤਿ ਯੋਜਨਾ. ‘‘ਪਵਿਸਿਸ੍ਸਾਮਾ’’ਤਿ ਗੇਹਾਨਿ ਕਤਾਨਿ, ‘‘ਪਵਿਸਿਸ੍ਸਾਮਾ’’ਤਿ ਆਲਯੋਪਿ ਅਤ੍ਥੀਤਿ ਯੋਜਨਾ. ਆਲਯੋਪੀਤਿ ਅਪੇਕ੍ਖੋਪਿ. ਅਪਵਿਟ੍ਠਾਤਿ ਗੇਹਾਨਿ ਅਪਵਿਟ੍ਠਾ. ਗੇਹਮੇਵ ਛਡ੍ਡੇਤ੍ਵਾਤਿ ਗੇਹਂ ਛਡ੍ਡੇਤ੍ਵਾ ਏਵ. ਇਮਿਨਾ ਗੇਹੇ ਛਡ੍ਡਿਤੇ ਸਬ੍ਬਂ ਛਡ੍ਡਿਤਮੇਵਾਤਿ ਦਸ੍ਸੇਤਿ. ਪਵਿਟ੍ਠਂ ਵਾ ਅਗਤਂ ਵਾ ਏਕਮ੍ਪਿ ਕੁਲਂ ਅਤ੍ਥਿ ਸਚੇਤਿ ਯੋਜਨਾ. ਏਤ੍ਥ ਚ ‘‘ਏਕਮ੍ਪਿ ਕੁਲਂ ਪਵਿਟ੍ਠਂ ਵਾ’’ਤਿ ਇਦਂ ਨਵਗਾਮਂ ਸਨ੍ਧਾਯ ਵੁਤ੍ਤਂ. ‘‘ਏਕਮ੍ਪਿ ਕੁਲਂ ਅਗਤਂ ਵਾ’’ਤਿ ਇਦਂ ਪੋਰਾਣਕਗਾਮਂ ਸਨ੍ਧਾਯਾਤਿ ਦਟ੍ਠਬ੍ਬਂ.

ਤਤ੍ਰਾਤਿ ‘‘ਵਤ੍ਤਂ ਜਾਨਿਤਬ੍ਬ’’ਨ੍ਤਿਵਚਨੇ. ਅਵਿਪ੍ਪਵਾਸਸੀਮਾਯਨ੍ਤਿ ਮਹਾਸੀਮਾਯ. ਸਾ ਏਵ ਹਿ ਯਸ੍ਮਾ ਅਵਿਪ੍ਪਵਾਸਕਮ੍ਮਵਾਚਾਯ ਬਹੁਲਪਯੋਜਨਾ ਹੋਤਿ, ਤਸ੍ਮਾ ਅਵਿਪ੍ਪਵਾਸਸੀਮਾਤਿ ਵੁਚ੍ਚਤਿ. ਇਤਰਾਯਾਤਿ ਅਵਿਪ੍ਪਵਾਸਸੀਮਾਯ. ਤਤ੍ਥਾਤਿ ਤਾਸੁ ਦ੍ਵੀਸੁ ਸੀਮਾਸੁ. ਨਿਰਾਸਙ੍ਕਟ੍ਠਾਨੇਸੁ ਠਤ੍ਵਾਤਿ ਚੇਤਿਯਙ੍ਗਣਾਦੀਨਂ ਖਣ੍ਡਸੀਮਾਯ ਅਨੋਕਾਸਤ੍ਤਾ ਵੁਤ੍ਤਂ. ਖਣ੍ਡਸੀਮਞ੍ਹਿ ਸਮ੍ਮਨਨ੍ਤਾ ਚੇਤਿਯਙ੍ਗਣਾਦਿਟ੍ਠਾਨਂ ਪਹਾਯ ਅਞ੍ਞਸ੍ਮਿਂ ਵਿਵਿਤ੍ਤੋਕਾਸੇ ਵਿਹਾਰਪਚ੍ਚਨ੍ਤਂ ਖਣ੍ਡਿਤ੍ਵਾ ਸਮ੍ਮਨਨ੍ਤਿ. ਸਮੂਹਨਿਤੁਨ੍ਤਿ ਅਵਿਪ੍ਪਵਾਸਸੀਮਂ ਸਮੂਹਨਿਤੁਂ. ਪਟਿਬਨ੍ਧਿਤੁਂ ਨ ਸਕ੍ਖਿਸ੍ਸਨ੍ਤੇਵਾਤਿ ਅਵਿਪ੍ਪਵਾਸਂਯੇਵ ਜਾਨਿਤ੍ਵਾ ਖਣ੍ਡਸੀਮਾਯ ਅਞ੍ਞਾਤਤ੍ਤਾ ਪਟਿਬਨ੍ਧਿਤੁਂ ਨ ਸਕ੍ਖਿਸ੍ਸਨ੍ਤੇਵ. ਸੀਮਸਮ੍ਭੇਦਨ੍ਤਿ ਖਣ੍ਡਸੀਮਅਵਿਪ੍ਪਵਾਸਸੀਮਾਨਂ ਸਮ੍ਭੇਦਂ. ਸਾਸਨਨ੍ਤਰਧਾਨੇਨ ਵਾਤਿ ਸਤ੍ਥੁ ਆਣਾਯ ਅਨ੍ਤਰਧਾਨੇਨ ਵਾ. ਸਾਧੁਕਂ ਪਨਾਤਿ ਨਿਕ੍ਕਙ੍ਖਂ ਪਨ.

੭੬. ਗਾਮਸੀਮਾਦਿਕਥਾ

੧੪੭. ਉਪੋਸਥਕਮ੍ਮਸ੍ਸ ਵਿਸੁਂ ਗਹਿਤਤ੍ਤਾ ਸੇਸਕਮ੍ਮਵਸੇਨ ਸਮਾਨਸਂਵਾਸਕਤਾ ਗਹੇਤਬ੍ਬਾ ਗੋਬਲਿਬਦ੍ਦਨਯੇਨ ਵਾ ਪਾਰਿਸੇਸਨਯੇਨ ਵਾ. ਤਨ੍ਤਿ ਸਮਾਨਸਂਵਾਸਏਕੂਪੋਸਥਭਾਵਂ. ‘‘ਅਪਰਿਚ੍ਛਿਨ੍ਨਾਯਾ’’ਤਿ ਇਮਿਨਾ ਅਟ੍ਠਪਿਤਾਯਾਤਿ ਏਤ੍ਥ ਠਪਧਾਤੁਯਾ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਗਾਮਂ ਵਾ ਨਿਗਮਂ ਵਾਤਿ ਏਤ੍ਥ ਨਗਰਂ ਕੇਨ ਸਙ੍ਗਹਿਤਨ੍ਤਿ ਆਹ ‘‘ਗਾਮਗ੍ਗਹਣੇਨ ਚੇਤ੍ਥਾ’’ਤਿਆਦਿ. ਤਤ੍ਥ ਏਤ੍ਥਾਤਿ ‘‘ਗਾਮਂ ਵਾ ਨਿਗਮਂ ਵਾ’’ਤਿ ਪਾਠੇ, ਗਾਮਗ੍ਗਹਣੇਨਾਤਿ ਸਮ੍ਬਨ੍ਧੋ. ਅਥ ਵਾ ਏਤ੍ਥਾਤਿ ਗਾਮਨਿਗਮਨਗਰੇਸੁ, ਨਗਰਮ੍ਪੀਤਿ ਸਮ੍ਬਨ੍ਧੋ. ਗਾਮਾਦੀਨਂ ਪਰਿਚ੍ਛੇਦਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਗਾਮਨਿਗਮਨਗਰੇਸੁ. ਗਾਮਭੋਜਕਾਤਿ ਗਾਮਂ ਭੁਞ੍ਜਨ੍ਤੀਤਿ ਗਾਮਭੋਜਕਾ. ਬਲਿਨ੍ਤਿ ਕਰਂ. ਸੋ ਹਿ ਤਂ ਨਿਸ੍ਸਾਯ ਗਾਮਭੋਜਕਾ ਬਲਨ੍ਤਿ ਜੀਵਨ੍ਤਿ ਅਨੇਨਾਤਿ ਬਲੀਤਿ ਵੁਚ੍ਚਤਿ. ਯਮ੍ਪਿ ਏਕਂ ਪਦੇਸਂ ਪਰਿਚ੍ਛਿਨ੍ਦਿਤ੍ਵਾ ਦੇਤੀਤਿ ਯੋਜਨਾ. ਗਾਮਖੇਤ੍ਤੇਤਿ ਰਞ੍ਞੋ ਆਣਾ ਖਿਪਿਯਤਿ ਏਤ੍ਥਾਤਿ ਖੇਤ੍ਤਂ, ਗਾਮੋਯੇਵ ਖੇਤ੍ਤਂ ਗਾਮਖੇਤ੍ਤਂ, ਤਸ੍ਮਿਂ. ਅਯਮ੍ਪੀਤਿ ਅਯਂ ਪਦੇਸੋਪਿ. ਸੋਪੀਤਿ ਪਦੇਸੋਪਿ. ਵਿਸੁਂਗਾਮੋ ਨਾਮਾਤਿ ਯੋਜਨਾ. ਸੋਪਿ ਵਿਸੁਂਗਾਮੋ ਗਾਮਸੀਮਾ ਹੋਤਿਯੇਵਾਤਿ ਯੋਜਨਾ. ਵਿਸੁਂ ਪਰਿਚ੍ਛਿਨ੍ਦਿਤ੍ਵਾ ਦਿਨ੍ਨੋ ਗਾਮੋ ਵਿਸੁਂਗਾਮੋ. ਤਸ੍ਮਾਤਿ ਯਸ੍ਮਾ ਵਿਸੁਂ ਗਾਮੋ ਹੋਤਿ, ਤਸ੍ਮਾ. ਸਾ ਚਾਤਿ ਵਿਸੁਂਗਾਮਸੀਮਾ ਚ. ਇਤਰਾਤਿ ਵਿਸੁਂਗਾਮਸੀਮਤੋ ਅਞ੍ਞਾ ਪਕਤਿਗਾਮਨਗਰਨਿਗਮਸੀਮਾ ਚਾਤਿ ਯੋਜਨਾ.

ਏਵਨ੍ਤਿ ‘‘ਅਸਮ੍ਮਤਾਯ ਭਿਕ੍ਖਵੇ’’ਤਿਆਦਿਨਾ ਪਾਠੇਨ. ਤਨ੍ਤਿ ਸੀਮਪਰਿਚ੍ਛੇਦਂ. ਅਪਰਿਚ੍ਛਿਨ੍ਨੇਤਿ ਰਾਜੂਹਿ ਅਪਰਿਚ੍ਛਿਨ੍ਨੇ. ‘‘ਅਟਵਿਪਦੇਸੇ’’ਤਿ ਇਮਿਨਾ ਨਤ੍ਥਿ ਗਾਮੋ ਏਤ੍ਥਾਤਿ ਅਗਾਮਕੋਤਿ ਵਚਨਤ੍ਥਸ੍ਸ ਸਰੂਪਂ ਦਸ੍ਸੇਤਿ. ਵਿਜ੍ਝਾਟਵਿਸਦਿਸੇਤਿ ਵਿਗਤਂ ਅਗ੍ਗਿਨੋ ਝਾਯਨਮੇਤ੍ਥਾਤਿ ਵਿਜ੍ਝਾ, ਚੋਰਾਦਯੋ ਮਨੁਸ੍ਸੇ ਆਭੁਸੋ ਟਵਨ੍ਤਿ ਪੀਲ਼ਯਨ੍ਤਿ ਏਤ੍ਥਾਤਿ ਆਟਵਿ. ਵਿਜ੍ਝਾ ਚ ਸਾ ਆਟਵਿ ਚੇਤਿ ਵਿਜ੍ਝਾਟਵਿ, ਤਾਯ ਸਦਿਸੇ ਵਿਜ੍ਝਾਟਵਿਸਦਿਸੇ. ਏਤ੍ਥ ਪੁਰਿਮਨਯੇ ਗਾਮਾਦੀਹਿ ਆਸਨ੍ਨੋ ਵਾ ਹੋਤੁ, ਅਨਾਸਨ੍ਨੋ ਵਾ ਤੇਹਿ ਅਪਰਿਚ੍ਛਿਨ੍ਨੋ ਅਟਵਿਪਦੇਸੋ ਗਹੇਤਬ੍ਬੋ. ਪਚ੍ਛਿਮਨਯੇ ਦੂਰੋ ਮਨੁਸ੍ਸਾਨਂ ਅਨਾਗਮਨਪਥੋ ਆਟਵਿਪਦੇਸੋ ਗਹੇਤਬ੍ਬੋਤਿ ਅਯਮੇਤੇਸਂ ਵਿਸੇਸੋ. ਅਸ੍ਸਾਤਿ ਭਿਕ੍ਖੁਨੋ. ਸਮਨ੍ਤਾਤਿ ਸਮਨ੍ਤਤੋ. ਅਯਂ ਸੀਮਾਤਿ ਅਯਂ ਸਤ੍ਤਬ੍ਭਨ੍ਤਰਸੀਮਾ. ਤਤ੍ਥਾਤਿ ਸਤ੍ਤਸੁ ਅਬ੍ਭਨ੍ਤਰੇਸੁ. ਸਮਨ੍ਤਾ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਅਬ੍ਭਨ੍ਤਰੇ ਅਨ੍ਤੋਕੋਟ੍ਠਾਸੇ ਜਾਤਂ ਅਬ੍ਭਨ੍ਤਰਂ ਅਟ੍ਠਵੀਸਹਤ੍ਥਪਮਾਣਂ.

ਯਾ ਕਾਚਿ ਨਦੀ ਅਸੀਮਾਵ ਹੋਤੀਤਿ ਸਮ੍ਬਨ੍ਧੋ. ਨਦੀਸੀਮਲਕ੍ਖਣਪਤ੍ਤਾਤਿ ਨਦੀਸੀਮਲਕ੍ਖਣਂ ਪਤ੍ਤਾ. ਇਮਿਨਾ ਸੀਮਲਕ੍ਖਣਂ ਅਪਤ੍ਤਾ ਨਦੀ ਬਨ੍ਧਿਯਮਾਨਾ ਸੀਮਾਵ ਹੋਤੀਤਿ ਦਸ੍ਸੇਤਿ. ਸਾਵਧਾਰਣੇਨ ‘‘ਅਤ੍ਤਨੋ ਸਭਾਵੇਨੇਵਾ’’ਤਿ ਇਮਿਨਾ ਭਿਕ੍ਖੂਨਂ ਬਨ੍ਧਨਭਾਵੇਨਾਤਿ ਅਤ੍ਥਂ ਨਿਵਤ੍ਤੇਤਿ. ਏਤ੍ਥਾਤਿ ਨਦਿਯਂ. ਏਤ੍ਥਾਤਿ ਜਾਤਸ੍ਸਰਸਮੁਦ੍ਦੇਸੁ. ਯੇਨ ਕੇਨਚੀਤਿ ਅਨ੍ਤਮਸੋ ਤਿਰਚ੍ਛਾਨਗਤੇਨਪਿ ਯੇਨ ਕੇਨਚਿ. ਖਣਿਤ੍ਵਾ ਅਕਤੋ ਸਯਂਜਾਤੋਤਿ ਸਮ੍ਬਨ੍ਧੋ. ਇਦਂ ਹੇਤੁਅਨ੍ਤੋਗਧਵਿਸੇਸਨਂ. ਖਣਿਤ੍ਵਾ ਅਕਤਤ੍ਤਾਤਿ ਹਿ ਅਤ੍ਥੋ. ਸਯਂਜਾਤੋਤਿ ਸਯਮੇਵ ਜਾਤੋਤਿ ਏਵਕਾਰੋ ਯੋਜੇਤਬ੍ਬੋ. ਤੇਨ ਵੁਤ੍ਤਂ ‘‘ਯੇਨ ਕੇਨਚਿ ਖਣਿਤ੍ਵਾ ਅਕਤੋ’’ਤਿ. ਸੋਬ੍ਭੋਤਿ ਸਂ ਉਭੋਤਿ ਪਦਵਿਭਾਗੋ ਕਾਤਬ੍ਬੋ. ਤਤ੍ਥ ਸਂਸਦ੍ਦੋ ਸਮਨ੍ਤਤ੍ਥਵਾਚਕੋ, ਉਭਸਦ੍ਦੋ ਪੂਰਣਤ੍ਥਵਾਚਕੋ. ਤਸ੍ਮਾ ਸਮਨ੍ਤਤੋ ਆਗਤੇਨ ਉਦਕੇਨ ਉਭਤਿ ਪੂਰਤਿ ਏਤ੍ਥਾਤਿ ਸੋਬ੍ਭੋਤਿ ਵਚਨਤ੍ਥੋ ਕਾਤਬ੍ਬੋ. ਤੇਨ ਵੁਤ੍ਤਂ ‘‘ਸਮਨ੍ਤਤੋ ਆਗਤੇਨ ਉਦਕੇਨ ਪੂਰਿਤੋ ਤਿਟ੍ਠਤੀ’’ਤਿ.

ਤਤ੍ਥਾਤਿ ਨਦੀਸਮੁਦ੍ਦਜਾਤਸ੍ਸਰੇਸੁ, ਆਧਾਰੇ ਭੁਮ੍ਮਂ. ਯਂਸਦ੍ਦੋ ਠਾਨਵਿਸਯੋਤਿ ਆਹ ‘‘ਯਂ ਠਾਨ’’ਨ੍ਤਿ. ਮਜ੍ਝਿਮਸ੍ਸਾਤਿ ਥਾਮਮਜ੍ਝਿਮਸ੍ਸ. ਵਕ੍ਖਤਿ ਹਿ ‘‘ਥਾਮਮਜ੍ਝਿਮੇਨਾ’’ਤਿ. ‘‘ਸਮਨ੍ਤਤੋ’’ਤਿ ਇਮਿਨਾ ਸਮਨ੍ਤਾਤਿ ਏਤ੍ਥ ਨਿਸ੍ਸਕ੍ਕਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ‘‘ਉਦਕੁਕ੍ਖੇਪੇਨਾ’’ਤਿ ਇਮਿਨਾ ਉਦਕੁਕ੍ਖੇਪਾਤਿ ਏਤ੍ਥ ਕਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ਉਦਕਂ ਉਕ੍ਖਿਪਿਤ੍ਵਾ ਖਿਪਿਯਤਿ ਏਤ੍ਥਾਤਿ ਉਦਕੁਕ੍ਖੇਪੋ. ‘‘ਪਰਿਚ੍ਛਿਨ੍ਨ’’ਨ੍ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਅਕ੍ਖਧੁਤ੍ਤਾਤਿ ਏਤ੍ਥ ਅਕ੍ਖੋਤਿ ਪਾਸਕੋ. ਸੋ ਹਿ ਅਕਤਿ ਕੁਟਿਲਂ ਗਚ੍ਛਤਿ ਅਨੇਨਾਤਿ ਅਕ੍ਖੋਤਿ ਵੁਚ੍ਚਤਿ, ਧਵਨ੍ਤਿ ਮਰਿਯਾਦਮਤਿਕ੍ਕਮ੍ਮ ਕੀਲ਼ਾਦਿਪਸੁਤਂ ਗਚ੍ਛਨ੍ਤੀਤਿ ਧੁਤ੍ਤਾ, ਅਕ੍ਖੇਸੁ ਧੁਤ੍ਤਾ ਅਕ੍ਖਧੁਤ੍ਤਾ. ਦਾਰੁਗੁਲ਼ਨ੍ਤਿ ਸਾਰਦਾਰੁਮਯਂ ਗੁਲ਼ਂ. ‘‘ਵਾਲੁਕਂ ਵਾ’’ਤਿ ਇਮਿਨਾ ‘‘ਉਦਕੁਕ੍ਖੇਪਾ’’ਤਿ ਏਤ੍ਥ ਉਪਲਕ੍ਖਣਂ ਦਸ੍ਸੇਤਿ. ਯਤ੍ਥਾਤਿ ਯਸ੍ਮਿਂ ਪਦੇਸੇ. ਅਯਨ੍ਤਿ ਪਦੇਸੋ. ਤਸ੍ਸਾਤਿ ਉਦਕੁਕ੍ਖੇਪਸ੍ਸ.

ਏਤ੍ਥਾਤਿ ਨਦੀਸਮੁਦ੍ਦਜਾਤਸ੍ਸਰੇਸੁ. ਮੁਖਦ੍ਵਾਰਨ੍ਤਿ ਸਮੁਦ੍ਦਾਦੀਨਂ ਮੁਖਸਙ੍ਖਾਤਂ ਦ੍ਵਾਰਂ. ਸਬ੍ਬਤ੍ਥਾਤਿ ਸਬ੍ਬਾਯ ਨਦਿਯਂ. ਥੇਰਵਾਦਂ ਦਸ੍ਸੇਨ੍ਤੋ ਆਹ ‘‘ਯਂ ਪਨਾ’’ਤਿਆਦਿ. ‘‘ਯੋਜਨਂ…ਪੇ… ਵਟ੍ਟਤੀ’’ਤਿ ਯਂ ਪਨ ਵਚਨਂ ਮਹਾਸੁਮਤ੍ਥੇਰੇਨ ਵੁਤ੍ਤਨ੍ਤਿ ਯੋਜਨਾ. ਤਤ੍ਰਾਪੀਤਿ ਯੋਜਨਨਦਿਯਮ੍ਪਿ. ਪਟਿਕ੍ਖਿਤ੍ਤਾਕਾਰਂ ਵਿਤ੍ਥਾਰੇਨ੍ਤੋ ਆਹ ‘‘ਭਗਵਤਾ ਹੀ’’ਤਿਆਦਿ. ਨਦਿਯਾ ਪਮਾਣਨ੍ਤਿ ਨਦਿਯਾ ਗਮ੍ਭੀਰਪਮਾਣਮੇਵ, ਨ ਆਯਾਮਵਿਤ੍ਥਾਰਪਮਾਣਨ੍ਤਿ ਅਤ੍ਥੋ. ‘‘ਨ ਯੋਜਨਂ ਵਾ ਅਦ੍ਧਯੋਜਨਂ ਵਾ’’ਤਿ ਵਚਨਮ੍ਪਿ ਇਦਮੇਵ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਕਿਞ੍ਚਾਪਿ ਆਯਾਮਵਿਤ੍ਥਾਰਪਮਾਣਂ ਨ ਵੁਤ੍ਤਂ, ਪਭਵਤੋ ਪਨ ਯਾਵ ਮੁਖਦ੍ਵਾਰਾ ਆਯਾਮਵਿਤ੍ਥਾਰਵਸੇਨ ਕਮ੍ਮਂ ਕਾਤੁਂ ਪਹੋਨਕਨਦੀਯੇਵ ਗਹੇਤਬ੍ਬਾਤਿ ਦਟ੍ਠਬ੍ਬਾ. ਯਾ ਨਦੀਤਿ ਸਮ੍ਬਨ੍ਧੋ. ਇਮਸ੍ਸ ਸੁਤ੍ਤਸ੍ਸਾਤਿ ‘‘ਤਿਮਣ੍ਡਲ’’ਨ੍ਤਿਆਦਿਕਸ੍ਸ ਇਮਸ੍ਸ ਸੁਤ੍ਤਸ੍ਸ. ਪਭਵਤੋਤਿ ਸਮੁਦਾਗਮਤੋ. ਏਤ੍ਥਾਤਿ ਨਦਿਯਂ. ਸਬ੍ਬੇਹਿ ਭਿਕ੍ਖੂਹਿ ਠਪੇਤਬ੍ਬੋਤਿ ਸਮ੍ਬਨ੍ਧੋ. ਤਤੋਤਿ ਏਕਉਦਕੁਕ੍ਖੇਪਤੋ.

ਕਿਤ੍ਤਕਾ ਪਰਿਪੁਣ੍ਣਾ ਹੋਤੀਤਿ ਆਹ ‘‘ਸਮਤਿਤ੍ਥਿਕਾ’’ਤਿ. ਤਿਤ੍ਥੇਨ ਸਮਂ ਪਰਿਪੂਰਤੀਤਿ ਸਮਤਿਤ੍ਥਿਕਾ. ਉਦਕਸਾਟਿਕਂ ਨਿਵਾਸੇਤ੍ਵਾਪੀਤਿ ਪਿਸਦ੍ਦੋ ‘‘ਅਨਿਵਾਸੇਤ੍ਵਾਪੀ’’ਤਿ ਦਸ੍ਸੇਤਿ. ਉਦਕਸਾਟਿਕਂ ਅਨਿਵਾਸੇਨ੍ਤੋਪਿ ਵਤ੍ਥੇਨ ਅਵਿਨਾਭਾਵਤੋ ਅਞ੍ਞਂ ਨਿਵਾਸੇਤ੍ਵਾਤਿ ਅਤ੍ਥੋ ਗਹੇਤਬ੍ਬੋ. ਨਾਵਾਯ ਠਤ੍ਵਾ ਕਰਿਯਮਾਨੇ ਕਿਂ ਗਚ੍ਛਨ੍ਤਿਯਾਪਿ ਨਾਵਾਯ ਕਾਤੁਂ ਵਟ੍ਟਤੀਤਿ ਆਹ ‘‘ਗਚ੍ਛਨ੍ਤਿਯਾ ਪਨਾ’’ਤਿਆਦਿ. ‘‘ਕਸ੍ਮਾ’’ਤਿਆਦਿਨਾ ਕਾਰਣਂ ਦਸ੍ਸੇਤਿ. ਹੀਤਿ ਯਸ੍ਮਾ. ਤਨ੍ਤਿ ਉਦਕੁਕ੍ਖੇਪਮਤ੍ਤਂ. ਏਵਂ ਸਤਿ…ਪੇ… ਅਨੁਸਾਵਨਾ ਹੋਤਿ, ਤਸ੍ਮਾ ਗਚ੍ਛਨ੍ਤਿਯਾ ਨਾਵਾਯ ਕਾਤੁਂ ਨ ਵਟ੍ਟਤੀਤਿ ਯੋਜਨਾ. ‘‘ਤਸ੍ਮਾ’’ਤਿਆਦਿਨਾ ਲਦ੍ਧਗੁਣਂ ਦਸ੍ਸੇਤਿ. ਨ ਕੇਵਲਂ ਨਾਵਾਯਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਅਨ੍ਤੋਨਦਿਯ’’ਨ੍ਤਿਆਦਿ.

ਰੁਕ੍ਖਸ੍ਸਾਤਿ ਅਨ੍ਤੋਨਦਿਯਂ ਜਾਤਸ੍ਸ ਰੁਕ੍ਖਸ੍ਸ. ਸਾਖਾ ਵਾ ਪਤਿਟ੍ਠਿਤਾਤਿ ਸਮ੍ਬਨ੍ਧੋ. ਸੀਮਂ ਵਾ ਸੋਧੇਤ੍ਵਾਤਿ ਵਿਹਾਰਸੀਮਗਾਮਸੀਮਾਸੁ ਠਿਤਾਨਂ ਹਤ੍ਥਪਾਸਾਨਯਨਬਹਿਕਰਣਵਸੇਨ ਸੀਮਂ ਵਾ ਸੋਧੇਤ੍ਵਾ. ਜਾਤਰੁਕ੍ਖਸ੍ਸ ਪਵਿਟ੍ਠਸਾਖਾਯ ਵਾ ਪਾਰੋਹੇ ਵਾਤਿ ਸਮ੍ਬਨ੍ਧੋ. ਅਸ੍ਸਾਤਿ ਬਹਿਨਦਿਤੀਰੇ ਜਾਤਰੁਕ੍ਖਸ੍ਸ. ਤਤ੍ਥਾਤਿ ਖਾਣੁਕੇ.

ਤਸ੍ਸਾਤਿ ਪਾਸਾਣਦੀਪਕਸ੍ਸ. ਪੁਬ੍ਬੇ ਵੁਤ੍ਤਪ੍ਪਕਾਰੇਤਿ ਪੁਬ੍ਬੇ ਨਦੀਨਿਮਿਤ੍ਤਟ੍ਠਾਨੇ ‘‘ਅਨ੍ਵਦ੍ਧਮਾਸ’’ਨ੍ਤਿਆਦਿਨਾ (ਮਹਾਵ. ਅਟ੍ਠ. ੧੩੮) ਵੁਤ੍ਤਪ੍ਪਕਾਰੇ. ਸੋਤਿ ਪਾਸਾਣਦੀਪਕੋ. ਪੁਨ ਸੋਤਿ ਪਾਸਾਣਦੀਪਕੋਯੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਆਵਰਣਨ੍ਤਿ ਪਾਲ਼ਿਂ. ਤਨ੍ਤਿ ਆਵਰਣਂ. ਆਵਰਣੇਨ ਵਾ ਕੋਟ੍ਠਕਬਨ੍ਧੇਨ ਵਾ ਹੇਤੁਭੂਤੇਨ, ਪਚ੍ਛਿਜ੍ਜਤੀਤਿ ਸਮ੍ਬਨ੍ਧੋ. ਕੋਚਿ ਆਵਰਣਪ੍ਪਦੇਸੋ ਅਜ੍ਝੋਤ੍ਥਰਿਯਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਆਵਰਣਪ੍ਪਦੇਸੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ‘‘ਹੇਟ੍ਠਾਪਾਲ਼ਿ ਬਦ੍ਧਾ’’ਤਿ ਇਦਂ ਨਦਿਂ ਵਿਨਾਸੇਤ੍ਵਾ ਤਲ਼ਾਕਕਰਣਾਕਾਰਦਸ੍ਸਨਂ. ਏਤ੍ਥਾਤਿ ਨਦਿਯਂ, ਤਲ਼ਾਕੇ ਵਾ. ਛਡ੍ਡਿਤਮੋਦਕਨ੍ਤਿ ਤਲ਼ਾਕਰਕ੍ਖਨਤ੍ਥਂ ਏਕੇਨ ਵਾਰਿਮਗ੍ਗੇਨ ਛਡ੍ਡਿਤਂ ਉਦਕਂ. ਦੇਵੇ ਅਵਸ੍ਸਨ੍ਤੇਤਿ ਦੁਬ੍ਬੁਟ੍ਠਿਕਾਲਤ੍ਤਾ ਵਸ੍ਸਨ੍ਤਕਾਲੇਪਿ ਦੇਵੇ ਅਵਸ੍ਸਨ੍ਤੇ. ਸਾਤਿ ਨਦਿਤੋ ਨੀਹਟਮਾਤਿਕਾ. ਕਾਲਨ੍ਤਰੇਨਾਤਿ ਅਞ੍ਞੇਨ ਕਾਲੇਨ. ਉਪ੍ਪਤਿਤ੍ਵਾਤਿ ਗਾਮਨਿਗਮਾਨਂ ਉਪਰਿ ਪਤਿਤ੍ਵਾ. ਪਵਤ੍ਤਤੀਤਿ ਪੁਬ੍ਬੇ ਵੁਤ੍ਤਪਕਾਰੇ ਵਸ੍ਸਕਾਲੇ ਚਤ੍ਤਾਰੋ ਮਾਸੇ ਅਬ੍ਭੋਚ੍ਛਿਨ੍ਨਾ ਸਨ੍ਦਤਿ. ਵਿਹਾਰਸੀਮਨ੍ਤਿ ਵਿਹਾਰਸਮ੍ਬਨ੍ਧਂ ਬਦ੍ਧਸੀਮਂ.

ਸਮੁਦ੍ਦੇਪੀਤਿ ਪਿਸਦ੍ਦੋ ਨਦਿਮਪੇਕ੍ਖਤਿ. ਤਤ੍ਥਾਤਿ ਪਦੇਸੇ. ਓਤਰਿਤ੍ਵਾਤਿ ਹੇਟ੍ਠਾ ਤਰਿਤ੍ਵਾ. ‘‘ਓਸਰਿਤ੍ਵਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਸਣ੍ਠਹਨ੍ਤੀਤਿ ਉਦਕੇਨ ਸਮਂ ਤਿਟ੍ਠਨ੍ਤਿ. ਸੋਤਿ ਪਦੇਸੋ. ਉਦਕਨ੍ਤਤੋਤਿ ਉਦਕਕੋਟਿਤੋ. ਤਤ੍ਥਾਤਿ ਸਮੁਦ੍ਦੇ. ਬਾਧਤੀਤਿ ਪੀਲ਼ਯਤਿ. ਤੇਸੂਤਿ ਨਾਵਾਅਟ੍ਟਕੇਸੁ. ਤਨ੍ਤਿ ਪਿਟ੍ਠਿਪਾਸਾਣਂ. ਊਮਿਯੋਤਿ ਵੀਚਿਯੋ. ਤਾ ਹਿ ਪਰਂਪਰਾਵਸੇਨ ਉਗ੍ਗਨ੍ਤ੍ਵਾ ਸਵਿਞ੍ਞਾਣਕਾਵਿਞ੍ਞਾਣਕੇ ਮਿਯਨ੍ਤਿ ਹਿਂਸਨ੍ਤਿ, ਅਨ੍ਤੋ ਪਕ੍ਖਿਪਨ੍ਤੀਤਿ ਵਾ ਊਮਿਯੋਤਿ ਵੁਚ੍ਚਨ੍ਤਿ. ਤਤ੍ਥਾਤਿ ਪਿਟ੍ਠਿਪਾਸਾਣੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਉਦਕੇਨੇਵ ਪਿਟ੍ਠਿਪਾਸਾਣੋ ਓਤ੍ਥਰੀਯਤੀਤਿ ਯੋਜਨਾ. ਸੋਤਿ ਦੀਪਕਪਬ੍ਬਤੋ. ‘‘ਦੂਰੇ’’ਤਿ ਵਤ੍ਵਾ ਤਸ੍ਸ ਪਮਾਣਂ ਦਸ੍ਸੇਨ੍ਤੋ ਆਹ ‘‘ਮਚ੍ਛਵਧਾਨਂ ਅਨਾਗਮਨਪਥੇ’’ਤਿ. ਮਚ੍ਛਵਧਾਨਨ੍ਤਿ ਕੇਵਟ੍ਟਾਨਂ. ਤੇ ਹਿ ਯਸ੍ਮਾ ਮਚ੍ਛੇ ਹਨਨ੍ਤਿ, ਤਸ੍ਮਾ ਮਚ੍ਛਵਧਾਤਿ ਵੁਚ੍ਚਨ੍ਤਿ. ‘‘ਮਚ੍ਛਬਨ੍ਧਾਨ’’ਨ੍ਤਿਪਿ ਪਾਠੋ. ਮਚ੍ਛੇ ਬਨ੍ਧਨ੍ਤੀਤਿ ਮਚ੍ਛਬਨ੍ਧਾਤਿ ਵਚਨਤ੍ਥੋ ਕਾਤਬ੍ਬੋ. ਅਨਾਗਮਨਪਥੇਤਿ ਯਤ੍ਥ ਗਨ੍ਤ੍ਵਾ ਤਦਹੇਵ ਪਚ੍ਚਾਗਨ੍ਤ੍ਵਾ ਨ ਆਗਮਨਪਥਿਕੇ ਦੇਸੇ. ਨਤ੍ਥਿ ਆਗਮਨਪਥੋ ਏਤ੍ਥਾਤਿ ਅਨਾਗਮਨਪਥੋ, ਦੇਸੋ. ਤਸ੍ਮਿਂ ‘‘ਅਗਮਨਪਥੇ’’ਤਿਪਿ ਪਾਠੋ, ਸੋ ਅਯੁਤ੍ਤੋ. ਕਸ੍ਮਾ? ਅਗਮਨਪਥਸ੍ਸ ਨਾਧਿਪ੍ਪੇਤਤ੍ਤਾ. ਗਨ੍ਤ੍ਵਾ ਹਿ ਪੁਨ ਅਨਾਗਮਨਪਥੋਯੇਵਾਧਿਪ੍ਪੇਤੋ. ਤੇਸਨ੍ਤਿ ਮਚ੍ਛਵਧਾਨਂ. ਗਮਨਪਰਿਯਨ੍ਤਸ੍ਸਾਤਿ ਗਮਨਕੋਟਿਯਾ. ਓਰਤੋਤਿ ਓਰਭਾਗੇ ਠਿਤੋ ਦੀਪਕੋ ਵਾ ਪਬ੍ਬਤੋ ਵਾਤਿ ਯੋਜੇਤਬ੍ਬੋ. ਤਤ੍ਥਾਤਿ ਓਰਭਾਗੇ ਠਿਤੇਸੁ ਦੀਪਕਪਬ੍ਬਤੇਸੁ. ਓਤ੍ਥਰਿਤ੍ਵਾਤਿ ਪਕਤਿਉਦਕੇਨ ਓਤ੍ਥਰਿਤ੍ਵਾ. ਤਤ੍ਥਾਤਿ ਓਤ੍ਥਰਿਤ੍ਵਾ ਠਿਤੇ ਸਮੁਦ੍ਦੇ.

ਕਰੋਨ੍ਤੇਹਿਪਿ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਯਤ੍ਥਾਤਿ ਯਸ੍ਮਿਂ ਸਰੇ. ਅਯਨ੍ਤਿ ਅਯਂ ਸਰੋ, ਨ ਜਾਤਸ੍ਸਰੋ ਹੋਤਿ. ਅਯਂ ਸਰੋ ਗਾਮਖੇਤ੍ਤਸਙ੍ਖ੍ਯਮੇਵ ਗਚ੍ਛਤੀਤਿ ਯੋਜਨਾ. ਤਤ੍ਥਾਤਿ ਸਰੇ. ਯਤ੍ਥ ਪਨਾਤਿ ਯਸ੍ਮਿਂ ਸਰੇ ਪਨ. ਤਸ੍ਸਾਤਿ ਜਾਤਸ੍ਸਰਸ੍ਸ. ਤਤ੍ਥਾਤਿ ਪਦੇਸੇ. ਸਚੇ ਗਮ੍ਭੀਰਂ ਉਦਕਂ ਹੋਤੀਤਿ ਯੋਜਨਾ. ਤਤ੍ਥਾਤਿ ਅਟ੍ਟਕੇ. ਏਤ੍ਥਾਤਿ ਜਾਤਸ੍ਸਰੇ, ਠਿਤੇਸੁ ਪਿਟ੍ਠਿਪਾਸਾਣਦੀਪਕੇਸੂਤਿ ਯੋਜਨਾ. ਪਹੋਨਕਜਾਤਸ੍ਸਰੋਤਿ ਸਙ੍ਘਕਮ੍ਮਂ ਕਾਤੁਂ ਪਹੋਨਕੋ ਜਾਤਸ੍ਸਰੋ. ‘‘ਸੁਕ੍ਖਤੀ’’ਤਿ ਵਤ੍ਵਾ ਤਦੇਵ ਸਮਤ੍ਥੇਤੁਂ ਵੁਤ੍ਤਂ ‘‘ਨਿਰੁਦਕੋ’’ਤਿ. ਤਤ੍ਥਾਤਿ ਜਾਤਸ੍ਸਰੇ. ਸਚੇ ਨਿਰੁਦਕਮਤ੍ਤੇਨ ਗਾਮਖੇਤ੍ਤਂ ਗਚ੍ਛਤਿ. ਕਦਾ ਗਚ੍ਛਤੀਤਿ ਆਹ ‘‘ਸਚੇ ਪਨੇਤ੍ਥਾ’’ਤਿਆਦਿ. ਤਤ੍ਥ ਏਤ੍ਥਾਤਿ ਜਾਤਸ੍ਸਰੇ. ਪੋਕ੍ਖਰਣੀਆਦੀਨੀਤਿ ਏਤ੍ਥ ਆਦਿਸਦ੍ਦੇਨ ਉਦਕਮਾਤਿਕਾਦਯੋ ਸਙ੍ਗਣ੍ਹਾਤਿ. ਯਦਾ ਖਣਨ੍ਤਿ, ਤਦਾਤਿ ਪਾਠਸੇਸੋ ਯੋਜੇਤਬ੍ਬੋ. ‘‘ਤਂ ਠਾਨ’’ਨ੍ਤਿ ਵੁਤ੍ਤੇਪਿ ਨ ਖਣਨਟ੍ਠਾਨਮੇਵ ਗਹੇਤਬ੍ਬਂ, ‘‘ਏਤ੍ਥਾ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਸਬ੍ਬੋਯੇਵ ਜਾਤਸ੍ਸਰੋ ਗਹੇਤਬ੍ਬੋ. ਨ ਕੇਵਲਂ ਅਜਾਤਸ੍ਸਰਮਤ੍ਤਂ ਹੋਤਿ, ਅਥ ਖੋ ਗਾਮਖੇਤ੍ਤਨ੍ਤਿ ਆਹ ‘‘ਗਾਮਸੀਮਾਸਙ੍ਖ੍ਯਮੇਵ ਗਚ੍ਛਤੀ’’ਤਿ.

ਨਨ੍ਤਿ ਜਾਤਸ੍ਸਰਂ. ਪੂਰੇਤ੍ਵਾਤਿ ਮਤ੍ਤਿਕਾਦੀਹਿ ਪੂਰੇਤ੍ਵਾ. ਪਾਲ਼ਿਨ੍ਤਿ ਆਵਰਣਂ. ਸਬ੍ਬਮੇਵ ਨਨ੍ਤਿ ਸਕਲਮੇਵ ਤਂ ਜਾਤਸ੍ਸਰਂ. ਲੋਣੀਪੀਤਿ ਪਿਸਦ੍ਦੇਨ ਨ ਕੇਵਲਂ ਸੋਬ੍ਭੋਯੇਵ ਜਾਤਸ੍ਸਰਸਙ੍ਖ੍ਯਂ ਗਚ੍ਛਤਿ, ਅਥ ਖੋ ਲੋਣੀਪੀਤਿ ਦਸ੍ਸੇਤਿ. ਉਦਕਟ੍ਠਾਨੋਕਾਸੇਤਿ ਉਦਕਸ੍ਸ ਠਾਨੇ ਓਕਾਸੇ.

੧੪੮. ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੀਤਿ ਏਤ੍ਥ ‘‘ਸੀਮਾਯ ਸੀਮ’’ਨ੍ਤਿ ਪਦਾਨਂ ਸਮ੍ਬਨ੍ਧਾਪੇਕ੍ਖਤ੍ਤਾ ਤੇਸਂ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਅਤ੍ਤਨੋ ਪਰੇਸ’’ਨ੍ਤਿ. ‘‘ਬਦ੍ਧਸੀਮ’’ਨ੍ਤਿ ਇਮਿਨਾ ‘‘ਸੀਮ’’ਨ੍ਤਿ ਸਾਮਞ੍ਞਤੋ ਵੁਤ੍ਤੇਪਿ ਵਿਸੇਸਤੋ ਬਦ੍ਧਸੀਮਾਯੇਵ ਗਹੇਤਬ੍ਬਾਤਿ ਦਸ੍ਸੇਤਿ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਸਂਸਟ੍ਠਵਿਟਪਾਤਿ ਅਞ੍ਞਮਞ੍ਞਂ ਆਸਨ੍ਨਤ੍ਤਾ ਸਂਸਟ੍ਠੋ ਵਿਟਪੋ ਏਤੇਸਨ੍ਤਿ ਸਂਸਟ੍ਠਵਿਟਪਾ. ‘‘ਸਂਸਟ੍ਠਵਿਟਪਾ’’ਤਿ ਇਦਂ ਉਪਲਕ੍ਖਣਮਤ੍ਤਂ, ਮੂਲਾਨਿਪਿ ਸਂਸਟ੍ਠਾਨਿਯੇਵਾਤਿ ਦਟ੍ਠਬ੍ਬਂ. ਤੇਸੂਤਿ ਦ੍ਵੀਸੁ ਰੁਕ੍ਖੇਸੁ. ਵਿਹਾਰਸੀਮਾ ਚਾਤਿ ਪੋਰਾਣਕਵਿਹਾਰਸੀਮਾ ਚ. ਅਨ੍ਤੋ ਕਤ੍ਵਾਤਿ ਸੀਮਾਯ ਅਨ੍ਤੋ ਕਤ੍ਵਾ. ਅਥ ਪਚ੍ਛਾਤਿ ਏਤ੍ਥ ‘‘ਪਚ੍ਛਾ’’ਤਿ ਇਮਿਨਾ ਅਥਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਏਵਂ ਕੇ ਅਕਂਸੂਤਿ ਆਹ ‘‘ਏਵਂ ਛਬ੍ਬਗ੍ਗਿਯਾ ਅਕਂਸੂ’’ਤਿ. ਤੇਨਾਤਿ ਕਰਣੇਨ.

ਅਜ੍ਝੋਤ੍ਥਰਣਾਕਾਰਂ ਦਸ੍ਸੇਨ੍ਤੋ ਆਹ ‘‘ਪਰੇਸ’’ਨ੍ਤਿਆਦਿ. ਤਸ੍ਸਾਤਿ ਬਦ੍ਧਸੀਮਾਯ. ਪਦੇਸਨ੍ਤਿ ਭਿਕ੍ਖੂਹਿ ਕਮ੍ਮਂ ਕਾਤੁਂ ਪਹੋਨਕਂ ਏਕਦੇਸਂ. ਅਨ੍ਤਮਸੋ ਏਕਸ੍ਸਪਿ ਭਿਕ੍ਖੁਨੋ ਠਤ੍ਵਾ ਅਧਿਟ੍ਠਾਨੁਪੋਸਥਂ ਕਾਤੁਂ ਪਹੋਨਕਂ ਪਦੇਸਂ. ਕਮ੍ਮਂ ਕਾਤੁਂ ਅਪ੍ਪਹੋਨਕਪਦੇਸਂ ਅਨ੍ਤੋ ਕਰਿਤ੍ਵਾ ਬਨ੍ਧਨ੍ਤਾ ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤਿ ਨਾਮ. ਸੀਮਾਯ ਉਪਚਾਰੋਤਿ ਪਚ੍ਛਾ ਬਨ੍ਧਿਤਬ੍ਬਾਯ ਸੀਮਾਯ ਉਪਚਾਰੋ. ‘‘ਵਡ੍ਢਨ੍ਤੋ ਸੀਮਾਸਙ੍ਕਰਂ ਕਰੋਤੀ’’ਤਿ ਇਮਿਨਾ ਸਚੇ ਅਵਡ੍ਢਨਕੋ ਪਾਸਾਣੋ ਹੋਤਿ, ਦ੍ਵਿਨ੍ਨਮ੍ਪਿ ਸੀਮਾਨਂ ਨਿਮਿਤ੍ਤਂ ਕਾਤੁਂ ਵਟ੍ਟਤੀਤਿ ਦਸ੍ਸੇਤਿ.

੭੭. ਉਪੋਸਥਭੇਦਾਦਿਕਥਾ

੧੪੯. ਪਨ੍ਨਰਸਿਕਸ੍ਸ ਪੁਬ੍ਬਕਿਚ੍ਚਸ੍ਸ ਪਾਲ਼ਿਯਂ ਆਗਤਤ੍ਤਾ ਚਾਤੁਦ੍ਦਸਿਕਸ੍ਸੇਵ ਪੁਬ੍ਬਕਿਚ੍ਚਂ ਦਸ੍ਸੇਨ੍ਤੋ ਆਹ ‘‘ਅਜ੍ਜੁਪੋਸਥੋ ਚਾਤੁਦ੍ਦਸੋ’’ਤਿ.

‘‘ਅਧਮ੍ਮੇਨ ਵਗ੍ਗ’’ਨ੍ਤਿਆਦੀਸੁ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਅਧਮ੍ਮੇਨ ਵਗ੍ਗਨ੍ਤਿ ਏਤ੍ਥ ਅਧਮ੍ਮਂ ਨਾਮ ਏਕਸ੍ਮਿਂ ਵਿਹਾਰੇ ਚਤੁਨ੍ਨਂ ਭਿਕ੍ਖੂਨਂ ਸੁਤ੍ਤੁਦ੍ਦੇਸਉਪੋਸਥਮਕਤ੍ਵਾ ਪਾਰਿਸੁਦ੍ਧਿਉਪੋਸਥਕਰਣਞ੍ਚ ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਮਕਤ੍ਵਾ ਸੁਤ੍ਤੁਦ੍ਦੇਸਕਰਣਞ੍ਚ. ਵਗ੍ਗਂ ਨਾਮ ਸਬ੍ਬੇਵ ਅਸਨ੍ਨਿਪਤਿਤ੍ਵਾ ਏਕਸ੍ਸ ਛਨ੍ਦਪਾਰਿਸੁਦ੍ਧਿਹਰਣਂ. ਛਨ੍ਦਪਾਰਿਸੁਦ੍ਧਿ ਨਾਮ ਸਙ੍ਘਮਜ੍ਝਂਯੇਵ ਆਗਚ੍ਛਤਿ, ਨ ਗਣਮਜ੍ਝਂ, ਨ ਪੁਗ੍ਗਲਸ੍ਸ ਸਨ੍ਤਿਕਂ. ਅਧਮ੍ਮੇਨ ਸਮਗ੍ਗਨ੍ਤਿ ਏਤ੍ਥ ਅਧਮ੍ਮਂ ਵੁਤ੍ਤਨਯਮੇਵ. ਸਮਗ੍ਗਂ ਨਾਮ ਸਬ੍ਬੇਸਂ ਸਨ੍ਨਿਪਤਨਂ. ਧਮ੍ਮੇਨ ਵਗ੍ਗਨ੍ਤਿ ਏਤ੍ਥ ਧਮ੍ਮਂ ਨਾਮ ਚਤੁਨ੍ਨਂ ਸੁਤ੍ਤੁਦ੍ਦੇਸਉਪੋਸਥਕਰਣਞ੍ਚ ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਕਰਣਞ੍ਚ. ਵਗ੍ਗਂ ਵੁਤ੍ਤਨਯਮੇਵ.

੭੮. ਪਾਤਿਮੋਕ੍ਖੁਦ੍ਦੇਸਕਥਾ

੧੫੦. ਇਮਂ ਨਿਦਾਨਨ੍ਤਿ ਪਾਤਿਮੋਕ੍ਖਸ੍ਸ ਇਮਂ ਨਿਦਾਨਂ. ਸੁਤਾ ਖੋ ਪਨਾਤਿ ਏਤ੍ਥ ਸੁਯ੍ਯਿਤ੍ਥਾਤਿ ਸੁਤਾ, ਸੁਯ੍ਯਸ੍ਸਨ੍ਤੀਤਿ ਵਾ ਸੁਤਾ, ਪਾਰਾਜਿਕੁਦ੍ਦੇਸਾਦਯੋ. ਸੁਤਾ ਚ ਸੁਤਾ ਚ ਸੁਤਾਤਿ ਸਰੂਪੇਕਸੇਸੋ ਕਾਤਬ੍ਬੋ. ਅਵਸੇਸਨ੍ਤਿ ਨਿਦਾਨੁਦ੍ਦੇਸਾਦਿਤੋ ਅਵਸੇਸਂ ਪਾਰਾਜਿਕੁਦ੍ਦੇਸਾਦਿ. ਸੁਤੇਨਾਤਿ ਸੁਤਸਦ੍ਦੇਨ. ‘‘ਅਤ੍ਥੇ ਅਸਮ੍ਭਵਤੋ ਸਦ੍ਦੇ ਵੁਤ੍ਤਵਿਧਾਨਂ ਹੋਤੀ’’ਤਿ ਹਿ ਪਰਿਭਾਸਤੋ ‘‘ਸੁਤੇਨਾ’’ਤਿ ਏਤ੍ਥ ਸਦ੍ਦੋਵ ਗਹੇਤਬ੍ਬੋ. ਤੇਨ ਨਯੇਨਾਤਿ ਤੇਨ ਨਿਦਾਨੁਦ੍ਦੇਸਨਯੇਨ.

ਅਟਵਿਮਨੁਸ੍ਸਭਯਨ੍ਤਿ ਅਟਵਿਯਂ ਨਿਵਸਨ੍ਤਸ੍ਸ ਮਨੁਸ੍ਸਸ੍ਸ ਭਯਂ, ਵਨਚਰਕਭਯਨ੍ਤਿ ਅਤ੍ਥੋ. ਰਾਜਨ੍ਤਰਾਯੋਤਿਆਦੀਸੁ ਏਵਂ ਵਿਸੇਸੋ ਵੇਦਿਤਬ੍ਬੋਤਿ ਯੋਜਨਾ. ਦਵਦਾਹੋਤਿ ਦਾਯਂ ਦਹਤੀਤਿ ਦਵਦਾਹੋ ਆਕਾਰਸ੍ਸ ਰਸ੍ਸਂ, ਯਕਾਰਸ੍ਸ ਚ ਵਕਾਰਂ ਕਤ੍ਵਾ. ਨਨ੍ਤਿ ਭਿਕ੍ਖੁਂ. ਏਕਂ ਵਾ ਭਿਕ੍ਖੁਨ੍ਤਿ ਯੋਜਨਾ. ਪਠਮੋ ਵਾ ਉਦ੍ਦੇਸੋਤਿ ਨਿਦਾਨੁਦ੍ਦੇਸੋ. ਏਤ੍ਥਾਤਿ ਪਞ੍ਚਸੁ ਉਦ੍ਦੇਸੇਸੁ. ਯਸ੍ਮਿਨ੍ਤਿ ਉਦ੍ਦੇਸੇ. ਸੋਪੀਤਿ ਉਦ੍ਦੇਸੋਪਿ. ਸੁਤੇਨੇਵ ਸਾਵੇਤਬ੍ਬੋਤਿ ਸੁਤਪਦੇਨੇਵ ਸਙ੍ਘਸ੍ਸ ਸਾਵੇਤਬ੍ਬੋਤਿ ਏਵਸਦ੍ਦੋ ‘‘ਨ ਵਿਤ੍ਥਾਰੇਨਾ’’ਤਿ ਦਸ੍ਸੇਤਿ.

ਅਨਜ੍ਝਿਟ੍ਠਾਤਿ ਏਤ੍ਥ ਉਪਸਗ੍ਗਵਸੇਨ ਇਸੁਧਾਤੁਸ੍ਸ ਇਚ੍ਛਾਕਨ੍ਤਿਤੋ ਅਞ੍ਞਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨਾਣਤ੍ਤਾ, ਅਯਾਚਿਤਾ ਵਾ’’ਤਿ. ਏਤ੍ਥ ‘‘ਅਨਾਣਤ੍ਤਾ’’ਤਿ ਇਦਂ ਥੇਰੇਨ ਅਨਾਣਤ੍ਤਭਾਵਂ ਸਨ੍ਧਾਯ ਵੁਤ੍ਤਂ. ‘‘ਅਯਾਚਿਤਾ’’ਤਿ ਇਦਂ ਸਮ੍ਮੁਤਿਲਦ੍ਧੇਨ ਨਵਕੇਨ ਅਯਾਚਿਤਭਾਵਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਤ੍ਥਾਤਿ ‘‘ਅਨਜ੍ਝਿਟ੍ਠਾ ਧਮ੍ਮਂ ਭਾਸਨ੍ਤੀ’’ਤਿ ਵਚਨੇ. ਧਮ੍ਮਜ੍ਝੇਸਕੇਤਿ ਧਮ੍ਮਕਥਨਤ੍ਥਾਯ ਅਜ੍ਝੇਸਤੀਤਿ ਧਮ੍ਮਜ੍ਝੇਸਕੋ, ਤਸ੍ਮਿਂ. ਆਪੁਚ੍ਛਿਤ੍ਵਾ ਵਾ ਤੇਨ ਸਙ੍ਘਤ੍ਥੇਰੇਨ ਯਾਚਿਤੋ ਹੁਤ੍ਵਾ ਵਾਤਿ ਯੋਜਨਾ. ਵਾਰਪਟਿਪਾਟਿਯਾਤਿ ਵਾਰਾਨੁਕ੍ਕਮੇਨ. ਦੇਹੀਤਿ ਵਾਤਿ ਏਤ੍ਥ ਇਤਿ-ਵਾ-ਸਦ੍ਦੋ ‘‘ਭਣ’’ ਇਤਿਪਦੇਨ ਚ ‘‘ਕਥੇਹਿ’’ ਇਤਿਪਦੇਨ ਚ ਯੋਜੇਤਬ੍ਬੋ. ‘‘ਭਣ’’ ਇਤਿ ਵਾ ‘‘ਕਥੇਹਿ’’ਇਤਿ ਵਾ ‘‘ਦੇਹਿ’’ਇਤਿ ਵਾ ਵਤ੍ਤਬ੍ਬਾਤਿ ਯੋਜਨਾ. ਤੀਹਿਪਿ ਵਿਧੀਹੀਤਿ ਓਸਾਰਣਕਥਨਸਰਭਞ੍ਞਸਙ੍ਖਾਤੇਹਿ ਤੀਹਿ ਸਜ੍ਜਨੇਹਿ. ਏਤ੍ਥ ਚ ਸੁਤ੍ਤਸ੍ਸ ਓਸਾਰਿਯਤੇ ਉਚ੍ਚਾਰਿਯਤੇ ਓਸਾਰਣਂ, ਅਤ੍ਥਸ੍ਸ ਕਥਿਯਤੇ ਕਥਨਂ, ਸੁਤ੍ਤਸ੍ਸ ਚ ਤਦਤ੍ਥਸ੍ਸ ਚ ਸਰੇਨ ਭਣਿਯਤੇ ਸਰਭਞ੍ਞਂ. ਓਸਾਰੇਹੀਤਿ ਸੁਤ੍ਤਂ ਉਚ੍ਚਾਰੇਹਿ. ਕਥੇਹੀਤਿ ਅਤ੍ਥਂ ਕਥੇਹਿ. ਸਰਭਞ੍ਞਨ੍ਤਿ ਸੁਤ੍ਤਸ੍ਸ ਚ ਤਦਤ੍ਥਸ੍ਸ ਚ ਸਰੇਨ ਭਣਨਂ. ਨਨ੍ਤਿ ਸਦ੍ਧਿਵਿਹਾਰਿਕਂ. ਸਜ੍ਝਾਯਂ ਅਧਿਟ੍ਠਹਿਤ੍ਵਾਤਿ ‘‘ਸਜ੍ਝਾਯਂ ਕਰੋਮੀ’’ਤਿ ਅਧਿਟ੍ਠਹਿਤ੍ਵਾ. ਏਤ੍ਥਾਤਿ ਅਜ੍ਝੇਸਨਟ੍ਠਾਨੇ.

ਨਿਸ੍ਸਿਤਕੇਤਿ ਸਦ੍ਧਿਵਿਹਾਰਿਕਾਦਯੋ. ਸੋਤਿ ਸਙ੍ਘਤ੍ਥੇਰੋ, ‘‘ਵਤ੍ਤਬ੍ਬੋ’’ਤਿਪਦੇ ਕਮ੍ਮਂ, ‘‘ਵਦਤੀ’’ਤਿਆਦੀਸੁ ਪਦੇਸੁ ਕਤ੍ਤਾ. ਆਰਦ੍ਧਨ੍ਤਿ ਸਙ੍ਘੇਨ ਆਰਦ੍ਧਂ. ਠਪੇਤ੍ਵਾਤਿ ਧਮ੍ਮਸਵਨਂ ਠਪੇਤ੍ਵਾ. ਓਸਾਰੇਤ੍ਵਾਤਿ ਪਠਮਂ ਸੁਤ੍ਤਂ ਓਸਾਰੇਤ੍ਵਾ. ਪੁਨ ਕਥੇਨ੍ਤੇਨਾਤਿ ਪਚ੍ਛਾ ਅਤ੍ਥਂ ਕਥੇਨ੍ਤੇਨ. ਅਟ੍ਠਪੇਤ੍ਵਾਯੇਵ ਵਾਤਿ ਸੁਤ੍ਤਸ੍ਸ ਚ ਅਤ੍ਥਸ੍ਸ ਚ ਅਨ੍ਤਰਾ ਅਟ੍ਠਤ੍ਵਾ ਏਵ ਵਾ. ਕਥੇਤਬ੍ਬਨ੍ਤਿ ਅਤ੍ਥਜਾਤਂ ਕਥੇਤਬ੍ਬਂ. ਕਥੇਨ੍ਤਸ੍ਸ…ਪੇ… ਨਯੋਤਿ ਪਠਮਂ ਅਤ੍ਥਂ ਕਥੇਤ੍ਵਾ ਪੁਨ ਸੁਤ੍ਤਞ੍ਚ ਅਤ੍ਥਞ੍ਚ ਸਰੇਨ ਭਣਨ੍ਤਸ੍ਸ ਪੁਨ ਆਗਤੇਪਿ ਏਸੇਵ ਨਯੋਤਿ ਅਤ੍ਥੋ.

ਉਪਨਿਸਿਨ੍ਨਕਥਾਯਪੀਤਿ ਸਮੀਪੇ ਨਿਸਿਨ੍ਨੇਨ ਕਥਾਯਪਿ. ਤੇਨਾਤਿ ਸਙ੍ਘਤ੍ਥੇਰੇਨ. ਵਤ੍ਤੁਂ ਵਟ੍ਟਤੀਤਿ ਵਿਸੇਸੇਤ੍ਵਾ ਵਤ੍ਤੁਂ ਵਟ੍ਟਤਿ. ਤੇਨਾਤਿ ਮਨੁਸ੍ਸੇਹਿ ਜਾਨਨਭਿਕ੍ਖੁਨਾ. ਸਙ੍ਘਤ੍ਥੇਰੋ ਭਣਤਿ, ਤੁਣ੍ਹੀ ਵਾ ਹੋਤੀਤਿ ਸਮ੍ਬਨ੍ਧੋ. ‘‘ਪੁਚ੍ਛਨ੍ਤੀ’’ਤਿ ਵੁਤ੍ਤੇਤਿ ਯੋਜਨਾ. ਅਨੁਮੋਦਨਾਦੀਸੁਪੀਤਿਆਦਿਸਦ੍ਦੇਨ ਧਮ੍ਮਕਥਾਦਯੋ ਸਙ੍ਗਣ੍ਹਾਤਿ. ਸਙ੍ਘਤ੍ਥੇਰੋ ਅਨੁਜਾਨਾਤੀਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਵਿਹਾਰਅਨ੍ਤਰਘਰੇਸੁ.

ਸਜ੍ਝਾਯਨ੍ਤਿ ਸਯਂ ਇਸ੍ਸਰੇਨ ਅਯਨਂ ਉਚ੍ਚਾਰਣਂ, ਕੇਨਚਿ ਅਨਜ੍ਝਿਟ੍ਠੋ ਸਯਂ ਅਧਿਇਸ੍ਸਰੇਨ ਅਯਨਂ ਉਚ੍ਚਾਰਣਨ੍ਤਿ ਅਤ੍ਥੋ. ਥੇਰੋਤਿ ਸਦ੍ਧਿਵਿਹਾਰੋ ਥੇਰੋ. ਵਿਸ੍ਸਮਿਸ੍ਸਾਮੀਤਿ ਖੇਦਵਿਰਹਿਤਂ ਗਮਿਸ੍ਸਾਮਿ. ਆਪੁਚ੍ਛਿਤਬ੍ਬਨ੍ਤਿ ਪਠਮਥੇਰਮ੍ਪਿ ਪੁਨ ਆਗਤਤ੍ਥੇਰਮ੍ਪਿ ਆਪੁਚ੍ਛਿਤਬ੍ਬਂ. ਏਕੇਨ ਸਙ੍ਘਤ੍ਥੇਰੇਨ ਅਨੁਞ੍ਞਾਤੇਨਾਤਿ ਸਮ੍ਬਨ੍ਧੋ. ਅਞ੍ਞਸ੍ਮੀਨ੍ਤਿ ਅਨੁਞ੍ਞਾਤਤ੍ਥੇਰਤੋ ਅਞ੍ਞਸ੍ਮਿਂ ਥੇਰੇਤਿ ਸਮ੍ਬਨ੍ਧੋ. ਤਨ੍ਤਿ ਪੁਨ ਆਗਤਂ ਥੇਰਂ. ਅਤ੍ਤਾਨਂ ਸਮ੍ਮਨਿਤਬ੍ਬਨ੍ਤਿ ਏਤ੍ਥ ਪਚ੍ਚਤ੍ਤੇ ਉਪਯੋਗਵਚਨਨ੍ਤਿ ਆਹ ‘‘ਅਤ੍ਤਾ ਸਮ੍ਮਨਿਤਬ੍ਬੋ’’ਤਿ. ਕਿਂ ਸਮ੍ਮਤੇਨ ਪਰਿਸਂ ਅਨੋਲੋਕੇਤ੍ਵਾ ਪੁਚ੍ਛਿਤਬ੍ਬੋਤਿ ਆਹ ‘‘ਪੁਚ੍ਛਨ੍ਤੇਨ ਪਨਾ’’ਤਿਆਦਿ.

੧੫੩. ਮੇਤਿ ਮਯ੍ਹਂ. ਇਤੋਤਿ ਪੁਗ੍ਗਲਤੋ, ਉਪ੍ਪਨ੍ਨੋਤਿ ਸਮ੍ਬਨ੍ਧੋ. ਪੁਰਮ੍ਹਾਕਨ੍ਤਿ ਪਦਸ੍ਸ ਪੁਰੇ ਅਮ੍ਹਾਕਨ੍ਤਿ ਪਦਚ੍ਛੇਦਂ ਕਤ੍ਵਾ ਪੁਰੇਸਦ੍ਦੋ ਪਠਮਤ੍ਥੋਤਿ ਆਹ ‘‘ਪਠਮਂ ਅਮ੍ਹਾਕ’’ਨ੍ਤਿ. ਪਟਿਕਚ੍ਚੇਵਸਦ੍ਦੋ ਪਗੇਵਪਰਿਯਾਯੋ, ‘‘ਪਠਮਤਰਮੇਵਾ’’ਤਿ ਇਮਿਨਾ ਤਸ੍ਸ ਅਤ੍ਥਂ ਦਸ੍ਸੇਤਿ. ਭੂਤਮੇਵਾਤਿ ਵਿਜ੍ਜਮਾਨਮੇਵ, ਤਥਮੇਵ ਵਾ.

੮੨. ਅਧਮ੍ਮਕਮ੍ਮਪਟਿਕ੍ਕੋਸਨਾਦਿਕਥਾ

੧੫੪. ਅਧਮ੍ਮਕਮ੍ਮਨ੍ਤਿ ਅਭੂਤਕਮ੍ਮਂ. ਪਟਿਕ੍ਕੋਸਿਤੁਨ੍ਤਿ ਏਤ੍ਥ ਕੁਸਧਾਤੁ ਅਪਨਯਨਤ੍ਥੋਤਿ ਆਹ ‘‘ਵਾਰੇਤੁ’’ਨ੍ਤਿ. ਦਿਟ੍ਠਿਨ੍ਤਿ ਲਦ੍ਧਿਂ. ਤੇਸਨ੍ਤਿ ਚਤੁਨ੍ਨਂ ਪਞ੍ਚਨ੍ਨਂ. ਯਥਾਤਿ ਯੇਨਾਕਾਰੇਨ ਭਣਿਯਮਾਨੇਤਿ ਯੋਜਨਾ. ਨ ਸੁਣਨ੍ਤੀਤਿ ਅਞ੍ਞੇ ਭਿਕ੍ਖੂ ਨ ਸੁਣਨ੍ਤਿ. ਥੇਰਾਧੀਨਨ੍ਤਿ ਥੇਰੇਨ ਅਧੀਨਂ ਆਬਨ੍ਧਨ੍ਤਿ ਅਤ੍ਥੋ. ਥੇਰਾਯਤ੍ਤਨ੍ਤਿ ਥੇਰੇਨ ਆਯਤ੍ਤਂ, ਥੇਰਸ੍ਸ ਸਨ੍ਤਕਨ੍ਤਿ ਅਤ੍ਥੋ. ਏਤ੍ਥਾਤਿ ਪਾਤਿਮੋਕ੍ਖੁਦ੍ਦੇਸੇ.

੮੩. ਪਾਤਿਮੋਕ੍ਖੁਦ੍ਦੇਸਕਅਜ੍ਝੇਸਨਾਦਿਕਥਾ

੧੫੫. ਨਵਵਿਧਞ੍ਚਾਤਿ ਦਿਵਸਵਸੇਨ ਤਿਵਿਧਂ, ਕਾਰਕਵਸੇਨ ਤਿਵਿਧਂ, ਕਤ੍ਤਬ੍ਬਾਕਾਰਵਸੇਨ ਤਿਵਿਧਞ੍ਚਾਤਿ ਨਵਕੋਟ੍ਠਾਸਞ੍ਚ, ਨਵਪਕਾਰਞ੍ਚ ਵਾ. ਚਤੁਬ੍ਬਿਧਨ੍ਤਿ ‘‘ਅਧਮ੍ਮੇਨ ਵਗ੍ਗ’’ਨ੍ਤਿਆਦਿਕਂ ਚਤੁਬ੍ਬਿਧਂ. ਦੁਵਿਧਨ੍ਤਿ ਭਿਕ੍ਖੁਭਿਕ੍ਖੁਨੀਵਸੇਨ ਦੁਵਿਧਂ. ਨਵਵਿਧਨ੍ਤਿ ਭਿਕ੍ਖੁਪਾਤਿਮੋਕ੍ਖੇ ਪਞ੍ਚਵਿਧਂ, ਭਿਕ੍ਖੁਨਿਪਾਤਿਮੋਕ੍ਖੇ ਚਤੁਬ੍ਬਿਧਨ੍ਤਿ ਨਵਵਿਧਂ. ਏਤ੍ਥਾਤਿ ‘‘ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋ’’ਤਿ ਪਾਠੇ. ਸੁਵਿਸਦਾਤਿ ਸੁਟ੍ਠੁ ਬ੍ਯਤ੍ਤਾ, ਸੁਦ੍ਧਾ ਵਾ. ਏਤ੍ਤਕਮ੍ਪੀਤਿ ਪਿਸਦ੍ਦੋ ਗਰਹਾਯਂ, ਅਧਿਕੇ ਕਾ ਨਾਮ ਕਥਾਤਿ ਦਸ੍ਸੇਤਿ.

ਸਾਮਨ੍ਤਾ ਆਵਾਸਾਤਿ ਏਤ੍ਥ ਉਪਯੋਗਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਸਾਮਨ੍ਤਂ ਆਵਾਸ’’ਨ੍ਤਿ. ਯੋ ਸਕ੍ਕੋਤੀਤਿ ਬਹੂਸੁ ਨਵੇਸੁ ਯੋ ਸਕ੍ਕੋਤਿ.

੮੪. ਪਕ੍ਖਗਣਨਾਦਿਉਗ੍ਗਹਣਾਨੁਜਾਨਨਕਥਾ

੧੫੬. ਕਤਿਨਂ ਪੂਰਣੀਤਿ ਕਤਿਨਂ ਤਿਥੀਨਂ ਪੂਰਣੀ. ਕੋ ਦਿਵਸੋਤਿ ਕਿਤ੍ਤਕੋ ਦਿਵਸੋ. ਅਯ੍ਯਾਯਤ੍ਤਨ੍ਤਿ ਅਯ੍ਯੇਹਿ ਭਿਕ੍ਖੂਹਿ ਆਯਤ੍ਤਂ ਆਬਦ੍ਧਂ. ਸਂਹਰਿਤ੍ਵਾਤਿ ਪੁਨ ਸਲਾਕਂ ਸਂਹਰਿਤ੍ਵਾ. ਅਯਂ ਪਾਠੋ ਕੇਸੁਚਿ ਅਟ੍ਠਕਥਾਪੋਤ੍ਥਕੇਸੁ ਨਤ੍ਥਿ. ਕਾਲਵਤੋਤਿ ਏਤ੍ਥ ਵਨ੍ਤੁਪਚ੍ਚਯੋ ਸ੍ਵਤ੍ਥੋਤਿ ਆਹ ‘‘ਕਾਲਸ੍ਸੇਵਾ’’ਤਿ. ਏਵਸਦ੍ਦੋ ਪਨ ਸਮ੍ਭਵਤੋ ਯੁਜ੍ਜਿਯਤਿ. ਪਗੇਵਾਤਿ ਪਾਤੋਵ.

੧੫੮. ਸਾਯਮ੍ਪੀਤਿ ਸਾਯਨ੍ਹੇਪਿ. ਪਿਸਦ੍ਦੇਨ ਅਞ੍ਞਮ੍ਪਿ ਸਰਣਕਾਲਂ ਸਮ੍ਪਿਣ੍ਡੇਤਿ.

੧੫੯. ਆਣਾਪੇਤੁਨ੍ਤਿ ਏਤ੍ਥ ਅਨਾਣਾਪੇਤਬ੍ਬਭਿਕ੍ਖੂ ਅਪਨੇਤ੍ਵਾ ਆਣਾਪੇਤਬ੍ਬਭਿਕ੍ਖੂ ਦਸ੍ਸੇਤੁਂ ਵੁਤ੍ਤਂ ‘‘ਕਿਞ੍ਚਿ ਕਮ੍ਮ’’ਨ੍ਤਿਆਦਿ. ਸਦਾਕਾਲਮੇਵ ਕਿਞ੍ਚਿ ਕਮ੍ਮਂ ਕਰੋਨ੍ਤੋਤਿ ਯੋਜਨਾ. ਧਮ੍ਮਕਥਿਕਾਦੀਸੂਤਿਆਦਿਸਦ੍ਦੇਨ ਗਣਵਾਚਕਾਦਯੋ ਸਙ੍ਗਣ੍ਹਾਤਿ. ਵਾਰੇਨਾਤਿ ਪਰਿਯਾਯੇਨ. ਸਮ੍ਮੁਞ੍ਚਨਿਨ੍ਤਿ ਯਟ੍ਠਿਸਮ੍ਮੁਞ੍ਚਨਿਂ ਵਾ ਮੁਟ੍ਠਿਸਮ੍ਮੁਞ੍ਚਨਿਂ ਵਾ. ਸਮਂ, ਸੁਟ੍ਠੁ ਵਾ ਮੁਞ੍ਚਤਿ ਸੋਧੇਤਿ ਇਮਾਯਾਤਿ ਸਮ੍ਮੁਞ੍ਚਨੀ, ਤਾਲੁਜੋ ਪਠਮੋ. ਤਮ੍ਪੀਤਿ ਸਾਖਾਭਙ੍ਗਮ੍ਪਿ.

੧੬੦. ਵੁਤ੍ਤਨਯੇਨੇਵਾਤਿ ਸਮ੍ਮਜ੍ਜਨੇ ਵੁਤ੍ਤਨਯੇਨੇਵ. ਪੁਨ ਆਹਰਿਤਬ੍ਬਾਨੀਤਿ ਸਙ੍ਘਿਕਾਵਾਸਂ ਆਸਨਾਨਿ ਪੁਨ ਆਹਰਿਤਬ੍ਬਾਨਿ. ਤਟ੍ਟਿਕਾਯੋਪੀਤਿ ਵੇਣੁਆਦਿਮਯਾ ਤਟ੍ਟਿਕਾਯੋਪਿ.

੧੬੧. ਕਪਲ੍ਲਿਕਾ ਵਾਤਿ ਕਪਾਲੇਸੁ ਪਰਿਯਾਪਨ੍ਨਾ ਪਦੀਪਕਪਾਲਾ ਵਾ. ਤਨ੍ਤਿ ਤੇਲਾਦਿਂ. ਪਰਿਯੇਸਿਤਬ੍ਬਾਨੀਤਿ ਅਨਵਜ੍ਜਪਰਿਯੇਸਨੇਨ ਪਰਿਯੇਸਿਤਬ੍ਬਾਨਿ.

੮੬. ਦਿਸਂਗਮਿਕਾਦਿਵਤ੍ਥੁਕਥਾ

੧੬੩. ਸਂਗਹੇਤਬ੍ਬੋਤਿਆਦੀਨਂ ਚਤੁਨ੍ਨਂ ਕਿਰਿਯਾਪਦਾਨਂ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਸਂਗਹੇਤਬ੍ਬੋ’’ਤਿਆਦਿ. ਸਂਗਹਸਦ੍ਦਸ੍ਸ ਸਙ੍ਖੇਪਗਹਣੇਸੁਪਿ ਵਤ੍ਤਨਤੋ ਇਧ ‘‘ਅਨੁਗ੍ਗਹਤ੍ਥੇ’’ਤਿ ਦਸ੍ਸੇਤੁਂ ਪਾਲ਼ਿਯਂ ਵੁਤ੍ਤਂ ‘‘ਅਨੁਗ੍ਗਹੇਤਬ੍ਬੋ’’ਤਿ. ਤੇਨ ਵੁਤ੍ਤਂ ‘‘ਤਥਾਕਰਣਵਸੇਨਾ’’ਤਿ. ਉਪਲਾਪੇਤਬ੍ਬੋਤਿ ਸਙ੍ਘੇਨ ਬਹੁਸ੍ਸੁਤੋ ਭਿਕ੍ਖੁ ਭਿਕ੍ਖੂਹਿ ਉਪਗਨ੍ਤ੍ਵਾ ਲਾਪੇਤਬ੍ਬੋ ਕਥਾਪੇਤਬ੍ਬੋ. ਉਪਟ੍ਠਾਪੇਤਬ੍ਬੋਤਿ ਸਙ੍ਘੇਨ ਬਹੁਸ੍ਸੁਤੋ ਭਿਕ੍ਖੁ ਭਿਕ੍ਖੂਹਿ ਉਪ ਅਚ੍ਚਨੇਨ ਪੂਜਨੇਨ ਠਾਪੇਤਬ੍ਬੋ. ‘‘ਸਬ੍ਬੇਸਂ ਦੁਕ੍ਕਟ’’ਨ੍ਤਿ ਵਤ੍ਵਾ ਤਦੇਵ ਸਮਤ੍ਥੇਤੁਂ ਵੁਤ੍ਤਂ ‘‘ਇਧ ਨੇਵ ਥੇਰਾ, ਨ ਦਹਰਾ ਮੁਚ੍ਚਨ੍ਤੀ’’ਤਿ. ਤੇਨਾਤਿ ਬਹੁਸ੍ਸੁਤੇਨ ਭਿਕ੍ਖੁਨਾ. ਏਵਮ੍ਪਿ ਸਤੀਤਿ ਏਵਂ ਅਸਾਦਿਯਨੇਪਿ ਸਤਿ. ਸਾਯਂ ਪਾਤਨ੍ਤਿ ਸਾਯਞ੍ਚ ਪਾਤੋ ਚ ਸਾਯਂਪਾਤਂ. ਉਪਟ੍ਠਾਨਨ੍ਤਿ ਉਪਟ੍ਠਾਨਟ੍ਠਾਨਂ, ਉਪਟ੍ਠਾਨਤ੍ਥਾਯ ਵਾ. ਤੇਨਾਤਿ ਬਹੁਸ੍ਸੁਤੇਨ ਭਿਕ੍ਖੁਨਾ. ਤੇਸਨ੍ਤਿ ਮਹਾਥੇਰਾਨਂ. ਅਸ੍ਸਾਤਿ ਬਹੁਸ੍ਸੁਤਸ੍ਸ ਭਿਕ੍ਖੁਨੋ. ਸਦ੍ਧਿਂਚਰਾਤਿ ਅਤ੍ਤਨਾ ਸਦ੍ਧਿਂ ਚਰਨ੍ਤੀਤਿ ਸਦ੍ਧਿਂਚਰਾ. ਅਥਾਪੀਤਿ ਯਦਿਪਿ. ਏਕੋ ਵਾ ਵਤ੍ਤਸਮ੍ਪਨ੍ਨੋ ਵਦਤੀਤਿ ਯੋਜਨਾ. ਏਸੋ ਚ ਅਹਞ੍ਚਾਤਿ ਮਯਂ. ਨਾਮਤੁਮ੍ਹਅਮ੍ਹਸਦ੍ਦੇਸੁ ਹਿ ਏਕਸੇਸੇਨ ਕਤ੍ਤਬ੍ਬੇਸੁ ਪਰੋਵ ਗਹੇਤਬ੍ਬੋ. ਵਿਹਰਨ੍ਤੂਤਿ ਵਦਨ੍ਤੀਤਿ ਯੋਜਨਾ.

ਸੋ ਆਵਾਸੋ ਗਨ੍ਤਬ੍ਬੋਤਿ ਏਤ੍ਥ ਕਿਮਤ੍ਥਾਯ ਗਨ੍ਤਬ੍ਬੋ, ਕਿਂ ਅਨੁਦਿਵਸਂ ਗਨ੍ਤਬ੍ਬੋਤਿ ਆਹ ‘‘ਉਪੋਸਥਕਰਣਤ੍ਥਾਯ ਅਨ੍ਵਦ੍ਧਮਾਸਂ ਗਨ੍ਤਬ੍ਬੋ’’ਤਿ. ਸੋ ਚ ਖੋਤਿ ਆਵਾਸੋ. ਉਤੁਵਸ੍ਸੇਯੇਵਾਤਿ ਹੇਮਨ੍ਤਗਿਮ੍ਹੇਯੇਵ. ਉਤੁਵਸ੍ਸੇਯੇਵ ਗਨ੍ਤਬ੍ਬੋਤਿ ਅਤ੍ਥਸ੍ਸ ਞਾਤਬ੍ਬਭਾਵਂ ਦਸ੍ਸੇਨ੍ਤੋ ਆਹ ‘‘ਵਸ੍ਸਾਨੇ ਪਨਾ’’ਤਿਆਦਿ. ਯਨ੍ਤਿ ਕਮ੍ਮਂ. ਤਤ੍ਥਾਤਿ ‘‘ਵਸ੍ਸਂ ਵਸਨ੍ਤੀ’’ਤਿਆਦਿਵਚਨੇ. ਸੋਤਿ ਪਾਤਿਮੋਕ੍ਖੁਦ੍ਦੇਸਕੋ ਭਿਕ੍ਖੁ. ਅਞ੍ਞਸ੍ਮਿਨ੍ਤਿ ਅਪਰਸ੍ਮਿਂ ਪਾਤਿਮੋਕ੍ਖੁਦ੍ਦੇਸਕੇ. ਮਾਸਦ੍ਵਯਨ੍ਤਿ ਸਾਵਣਮਾਸਪੁਣ੍ਣਮਿਤੋ ਯਾਵ ਅਸ੍ਸਯੁਜਪੁਣ੍ਣਮੀ, ਤਾਵ ਮਾਸਦ੍ਵਯਂ ਵਸਿਤਬ੍ਬਂ. ਇਦਂ ਪੁਰਿਮਵਸ੍ਸਂ ਉਪਗਨ੍ਤ੍ਵਾ ਪਚ੍ਛਿਮਿਕਾਯ ਪਕ੍ਕਮਨਾਦਿਂ ਸਨ੍ਧਾਯ ਵੁਤ੍ਤਂ. ਸਚੇ ਪਚ੍ਛਿਮਿਕਂ ਉਪਗਨ੍ਤ੍ਵਾ ਅਨਨ੍ਤਰਮੇਵ ਪਕ੍ਕਮਨਾਦਿਂ ਕਰੋਤਿ, ਮਾਸਤ੍ਤਯਮ੍ਪਿ ਵਸਿਤਬ੍ਬਂ.

੮੭. ਪਾਰਿਸੁਦ੍ਧਿਦਾਨਕਥਾ

੧੬੪. ਯੇਨ ਕੇਨਚਿ ਅਙ੍ਗਪਚ੍ਚਙ੍ਗੇਨ ਵਿਞ੍ਞਾਪੇਤੀਤਿ ਪਟਿਵਚਨਂ ਨਿਚ੍ਛਾਰੇਤੁਮਸਕ੍ਕੋਨ੍ਤੋ ਯੇਨ ਕੇਨਚਿ ਅਙ੍ਗਪਚ੍ਚਙ੍ਗੇਨ ਵਿਞ੍ਞਾਪੇਤਿ. ਉਭਯਥਾਤਿ ਉਭਯੇਹਿ ਕਾਯਵਾਚਾਸਙ੍ਖਾਤੇਹਿ ਆਕਾਰੇਹਿ. ਕਾਯਵਾਚਾਹਿ ਵਿਞ੍ਞਾਪੇਤੀਤਿ ਸਮ੍ਬਨ੍ਧੋ. ਸਬ੍ਬੇਤਿ ਅਖਿਲਾ ਗਿਲਾਨਾ. ਹਤ੍ਥਪਾਸੇਤਿ ਸਙ੍ਘਸ੍ਸ ਹਤ੍ਥਪਾਸਮ੍ਹਿ. ਸਚੇ ਦੂਰੇ ਹੋਨ੍ਤੀਤਿ ਸਚੇ ਬਹੂ ਗਿਲਾਨਾ ਅਞ੍ਞਮਞ੍ਞਂ ਦੂਰੇ ਹੋਨ੍ਤਿ. ਤਂ ਦਿਵਸਨ੍ਤਿ ਤਸ੍ਮਿਂ ਸਙ੍ਘਅਪ੍ਪਹੋਨਕਦਿਵਸੇ.

ਤਤ੍ਥੇਵ ਪਕ੍ਕਮਤੀਤਿ ਏਤ੍ਥ ਨਿਸ੍ਸਕ੍ਕਤ੍ਥੇ ਥਪਚ੍ਚਯੋਤਿ ਆਹ ‘‘ਤਤੋਵਾ’’ਤਿ, ਪਾਰਿਸੁਦ੍ਧਿਹਾਰਟ੍ਠਾਨਤੋ ਏਵਾਤਿ ਅਤ੍ਥੋ. ‘‘ਗਚ੍ਛਤੀ’’ਤਿ ਇਮਿਨਾ ਕਮੁਧਾਤੁਯਾ ਪਦਵਿਕ੍ਖੇਪਤ੍ਥਂ ਦਸ੍ਸੇਤਿ, ‘‘ਕਤ੍ਥਚੀ’’ਤਿ ਇਮਿਨਾ ਤਸ੍ਸ ਕਮ੍ਮਂ. ਸਾਮਣੇਰੋ ਪਟਿਜਾਨਾਤੀਤਿਆਦੀਸੁ ਪਟਿਜਾਨਨਾਕਾਰਤ੍ਥਸ੍ਸ ਇਤਿਸਦ੍ਦਸ੍ਸ ਲੋਪਭਾਵਂ ਦਸ੍ਸੇਨ੍ਤੋ ਆਹ ‘‘ਸਾਮਣੇਰੋ ਅਹ’’ਨ੍ਤਿ ਏਵਂ ਪਟਿਜਾਨਾਤੀ’’ਤਿਆਦਿ. ਭੂਤਂਯੇਵਾਤਿ ਵਿਜ੍ਜਮਾਨਂਯੇਵ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤੀ’’ਤਿਆਦੀਸੁ.

ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੁਨ੍ਨਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਸਙ੍ਘਪ੍ਪਤ੍ਤੋ ਵਿਬ੍ਭਮਤੀ’’ਤਿਆਦੀਸੁ. ਏਤ੍ਥਾਤਿ ਪਾਰਿਸੁਦ੍ਧਿਹਰਣੇ. ਬਹੂਨਮ੍ਪੀਤਿ ਏਤ੍ਥ ਪਿਸਦ੍ਦੇਨ ਏਕੇਨ ਏਕਸ੍ਸਾਪਿ, ਬਹੂਹਿ ਏਕਸ੍ਸਾਪਿ, ਬਹੂਹਿ ਬਹੂਨਮ੍ਪਿ ਆਹਟਾ ਪਾਰਿਸੁਦ੍ਧਿ ਆਹਟਾਵ ਹੋਤੀਤਿ ਦਸ੍ਸੇਤਿ. ਸੋਤਿ ਪਾਰਿਸੁਦ੍ਧਿਹਾਰਕੋ ਭਿਕ੍ਖੁ. ਯੇਸਨ੍ਤਿ ਭਿਕ੍ਖੂਨਂ. ਤਸ੍ਸੇਵਾਤਿ ਪਾਰਿਸੁਦ੍ਧਿਹਾਰਕਸ੍ਸੇਵ. ਇਤਰਾ ਪਨਾਤਿ ਇਤਰੇਸਂ ਪਾਰਿਸੁਦ੍ਧਿ ਪਨ. ਬਿਲ਼ਾਲਸਙ੍ਖਲਿਕਾਤਿ ਏਤ੍ਥ ਬਿਲ਼ਾਲੋਤਿ ਆਖੁਭੁਜੋ. ਸੋ ਹਿ ਬਿਲ਼ਾਸਯਂ ਆਖੁਂ ਗਣ੍ਹਿਤੁਂ ਅਲਤਿ ਸਮਤ੍ਥੇਤੀਤਿ ਬਿਲ਼ਾਲੋਤਿ ਵੁਚ੍ਚਤਿ. ਸਙ੍ਖਲਿਕਾਤਿ ਏਤਂ ਸਤ੍ਤਾਨਂ ਬਨ੍ਧਨੂਪਕਰਣਵਿਸੇਸਸ੍ਸ ਨਾਮਂ. ਬਿਲ਼ਾਲਸ੍ਸ ਸਙ੍ਖਲਿਕਾ ਤੇਨ ਸਮ੍ਬਨ੍ਧਸਮ੍ਬਨ੍ਧਿਭਾਵੇਨ ਸਮ੍ਬਨ੍ਧਤ੍ਤਾਤਿ ਬਿਲ਼ਾਲਸਙ੍ਖਲਿਕਾ. ਇਦਂ ਉਪਲਕ੍ਖਣਮਤ੍ਤਂ ਯੇਸਂ ਕੇਸਞ੍ਚਿ ਸਙ੍ਖਲਿਕਾਯ ਗਹੇਤਬ੍ਬਤ੍ਤਾ. ਤਾਯ ਸਦਿਸਾ ਬਿਲ਼ਾਲਸਙ੍ਖਲਿਕਾ ਪਾਰਿਸੁਦ੍ਧੀਤਿ ਅਤ੍ਥੋ. ਇਦਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਯਥਾ ਸਙ੍ਖਲਿਕਾਯ ਪਠਮਂ ਵਲਯਂ ਦੁਤਿਯਂਯੇਵ ਵਲਯਂ ਪਾਪੁਣਾਤਿ, ਨ ਤਤਿਯਂ, ਏਵਮੇਵ ਪਠਮਂ ਦਿਨ੍ਨਾ ਪਾਰਿਸੁਦ੍ਧਿ ਦੁਤਿਯਮੇਵ ਪਾਪੁਣਾਤਿ, ਨ ਤਤਿਯਨ੍ਤਿ.

ਆਗਨ੍ਤ੍ਵਾਤਿ ਸਙ੍ਘਸ੍ਸ ਹਤ੍ਥਪਾਸਂ ਆਗਨ੍ਤ੍ਵਾ. ਪਾਲ਼ਿਯਂ ਸੁਤ੍ਤੋ ਨ ਆਰੋਚੇਤੀਤਿਆਦੀਸੁ ਹੇਤ੍ਵਤ੍ਥੇ ਪਚ੍ਚਤ੍ਤਵਚਨਂ. ਸੁਤ੍ਤੇਨ ਨਾਰੋਚੇਤੀਤਿ ਹਿ ਅਤ੍ਥੋ. ਪਾਰਿਸੁਦ੍ਧਿਹਾਰਕਸ੍ਸ ਅਨਾਪਤ੍ਤੀਤਿ ਏਤ੍ਥ ਆਪਤ੍ਤੀਤਿ ਅਨ੍ਵਯਤ੍ਥਂ ਅਤ੍ਥਾਪਤ੍ਤਿਤੋ ਦਸ੍ਸੇਨ੍ਤੋ ਆਹ ‘‘ਸਚੇ…ਪੇ… ਆਪਜ੍ਜਤੀ’’ਤਿ. ਅਸ੍ਸਾਤਿ ਭਿਕ੍ਖੁਸ੍ਸ. ਉਭਿਨ੍ਨਮ੍ਪੀਤਿ ਪਾਰਿਸੁਦ੍ਧਿਦਾਯਕਸ੍ਸ, ਤਂਹਾਰਕਸ੍ਸ ਚਾਤਿ ਉਭਿਨ੍ਨਮ੍ਪਿ.

੮੮. ਛਨ੍ਦਦਾਨਕਥਾ

੧੬੫. ਛਨ੍ਦਦਾਨੇਪਿ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਉਪੋਸਥੋ ਕਤੋ ਹੋਤੀਤਿ ਪਾਰਿਸੁਦ੍ਧਿਦਾਯਕਸ੍ਸ ਚ ਸਙ੍ਘਸ੍ਸ ਚ ਉਪੋਸਥੋ ਕਤੋ ਹੋਤਿ. ਅਞ੍ਞਨ੍ਤਿ ਉਪੋਸਥਕਮ੍ਮਤੋ ਅਞ੍ਞਂ. ਯਂ ਪਨ ਕਮ੍ਮਨ੍ਤਿ ਸਮ੍ਬਨ੍ਧੋ. ਕਮ੍ਮਮ੍ਪੀਤਿ ਉਪੋਸਥਕਮ੍ਮਤੋ ਅਞ੍ਞਂ ਕਮ੍ਮਮ੍ਪਿ. ਏਤ੍ਥ ਚ ਤਦਹੁਪੋਸਥੇ ਅਤ੍ਤਨੋ ਚ ਸਙ੍ਘਸ੍ਸ ਚ ਸਚੇ ਉਪੋਸਥਕਮ੍ਮਂ ਹੋਤਿ, ਪਾਰਿਸੁਦ੍ਧਿਯੇਵ ਦਾਤਬ੍ਬਾ. ਅਥ ਅਞ੍ਞਂ ਕਮ੍ਮਂ ਹੋਤਿ, ਛਨ੍ਦੋਯੇਵ ਦਾਤਬ੍ਬੋ. ਯਦਿ ਉਪੋਸਥਕਮ੍ਮਞ੍ਚ ਅਞ੍ਞਕਮ੍ਮਞ੍ਚ ਹੋਤਿ, ਪਾਰਿਸੁਦ੍ਧਿ ਚ ਛਨ੍ਦੋ ਚ ਦਾਤਬ੍ਬੋ. ਤਂ ਸਨ੍ਧਾਯ ਵੁਤ੍ਤਂ ‘‘ਤਦਹੁਪੋਸਥੇ ਪਾਰਿਸੁਦ੍ਧਿਂ ਦੇਨ੍ਤੇਨ ਛਨ੍ਦਮ੍ਪਿ ਦਾਤੁ’’ਨ੍ਤਿ. ਸੀਮਾਯ ਵਾਤਿ ਬਦ੍ਧਸੀਮਾਯ ਵਾ. ਅਚ੍ਛਿਤੁਨ੍ਤਿ ਉਪਵੇਸਿਤੁਂ. ‘‘ਆਸ ਉਪਵੇਸਨੇ’’ਤਿ ਹਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੬ ਸਕਾਰਨ੍ਤਧਾਤੁ) ਵੁਤ੍ਤਂ. ਸਾਮਗ੍ਗੀ ਵਾਤਿ ਕਾਯਸਾਮਗ੍ਗੀ ਵਾ.

੧੬੭. ਸਰਤਿਪਿ ਉਪੋਸਥਂ, ਨਪਿ ਸਰਤੀਤਿ ਏਤ੍ਥ ਪਿਸਦ੍ਦਸ੍ਸ ਅਨਿਯਮਵਿਕਪ੍ਪਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਏਕਦਾ ਸਰਤਿ, ਏਕਦਾ ਨ ਸਰਤੀ’’ਤਿ. ‘‘ਏਕਨ੍ਤ’’ਨ੍ਤਿ ਇਮਿਨਾ ਨੇਵ ਸਰਤੀਤਿ ਏਤ੍ਥ ਏਵਸਦ੍ਦਸ੍ਸ ਸਨ੍ਨਿਟ੍ਠਾਨਤ੍ਥਂ ਦਸ੍ਸੇਤਿ. ਕਮ੍ਮਂ ਨ ਕੋਪੇਤੀਤਿ ਸਮ੍ਮੁਤਿਲਦ੍ਧੋਪਿ ਅਲਦ੍ਧੋਪਿ ਉਮ੍ਮਤ੍ਤਕੋ ਕਮ੍ਮਂ ਨ ਕੋਪੇਤਿ.

੯੧. ਸਙ੍ਘੁਪੋਸਥਾਦਿਕਥਾ

੧੬੮. ‘‘ਸਮ੍ਮਜ੍ਜਿਤ੍ਵਾ’’ਤਿ ਪਦਮਪੇਕ੍ਖਿਤ੍ਵਾ ਸੋ ਦੇਸੋਤਿ ਏਤ੍ਥ ‘‘ਉਪਯੋਗਤ੍ਥੇ ਪਚ੍ਚਤ੍ਤਵਚਨ’’ਨ੍ਤਿ ਵੁਤ੍ਤਂ. ਏਤਨ੍ਤਿ ‘‘ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ’’ਤਿਆਦਿਵਚਨਂ. ਤੇਨਾਤਿ ਤੇਨ ਹੇਤੁਨਾ. ਅਟ੍ਠਕਥਾਚਰਿਯਾ ‘‘ਸਮ੍ਮਜ੍ਜਨੀ…ਪੇ… ਵੁਚ੍ਚਤਿ’’ ਇਤਿ ਆਹੂਤਿ ਯੋਜਨਾ.

ਸਮ੍ਮਜ੍ਜਨੀਤਿ ਸਮ੍ਮਜ੍ਜਨਕਰਣਂ. ਪਦੀਪੋਤਿ ਪਦੀਪੁਜ੍ਜਲਨਂ. ਉਦਕਨ੍ਤਿ ਉਦਕਟ੍ਠਪਨਂ. ਆਸਨੇਨਾਤਿ ਆਸਨਪਞ੍ਞਾਪਨੇਨ. ‘‘ਇਤੀ’’ਤਿ ਅਜ੍ਝਾਹਰਿਤਬ੍ਬਂ. ਉਪੋਸਥਸ੍ਸਾਤਿ ਨਵਵਿਧਸ੍ਸ ਉਪੋਸਥਸ੍ਸ ਪੁਬ੍ਬਕਰਣਨ੍ਤਿ ਸਮ੍ਬਨ੍ਧੋ. ਏਤਾਨੀਤਿ ਚਤ੍ਤਾਰਿ ਕਮ੍ਮਾਨਿ. ਵੁਚ੍ਚਤੀਤਿ ਕਥਿਯਤਿ. ਇਦਂ ‘‘ਏਤਾਨੀ’’ਤਿ ਕਮ੍ਮਸ੍ਸ ਚ ‘‘ਪੁਬ੍ਬਕਰਣ’’ਨ੍ਤਿ ਆਕਾਰਸ੍ਸ ਚ ਅਭੇਦਤ੍ਤਾ ਆਸਨ੍ਨਂ ਆਕਾਰਮਪੇਕ੍ਖਿਤ੍ਵਾ ਏਕਵਚਨਵਸੇਨ ਵੁਤ੍ਤਂ. ‘‘ਅਕ੍ਖਾਤਾਨੀ’’ਤਿ ਇਦਂ ਪਨ ‘‘ਇਮਾਨਿ ਚਤ੍ਤਾਰੀ’’ਤਿ ਕਮ੍ਮਮਪੇਕ੍ਖਿਤ੍ਵਾ ਬਹੁਵਚਨਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਨ੍ਤਿ ਛਨ੍ਦਕ੍ਖਾਨਞ੍ਚ ਪਾਰਿਸੁਦ੍ਧਿਕ੍ਖਾਨਞ੍ਚ ਉਤੁਕ੍ਖਾਨਞ੍ਚ. ਭਿਕ੍ਖੁਗਣਨਾਤਿ ਭਿਕ੍ਖੂ ਗਣੇਤ੍ਵਾ ਅਕ੍ਖਾਨਂ. ਓਵਾਦੋਤਿ ਭਿਕ੍ਖੁਨੀਹਿ ਯਾਚਿਤਸ੍ਸ ਓਵਾਦਸ੍ਸ ਅਕ੍ਖਾਨਂ. ਏਤਾਨੀਤਿ ਏਤਾਨਿ ਪਞ੍ਚ. ਪੁਬ੍ਬਕਰਣਤੋ ਪਚ੍ਛਾਤਿ ਪੁਬ੍ਬਕਰਣਸ੍ਸ ਕਰਣਤੋ ਪਚ੍ਛਾ. ਏਤ੍ਥ ਚ ‘‘ਪੁਬ੍ਬਕਰਣਤੋ ਪਚ੍ਛਾ ਕਤ੍ਤਬ੍ਬਾਨੀ’’ਤਿ ਇਦਂ ਕਤ੍ਤਬ੍ਬਾਕਾਰਸ੍ਸੇਵ ਵਿਸੇਸਨਂ, ਨ ਅਤ੍ਥਸ੍ਸ. ਅਯਂ ਪਨ ਵਿਸੇਸੋ – ਸਙ੍ਘਸਨ੍ਨਿਪਾਤਤੋ ਪੁਬ੍ਬਭਾਗੇ ਕਤ੍ਤਬ੍ਬਤ੍ਤਾ ਪੁਬ੍ਬਕਰਣਂ ਨਾਮ, ਉਪੋਸਥਕਰਣਤੋ ਪੁਬ੍ਬਭਾਗੇ ਕਤ੍ਤਬ੍ਬਤ੍ਤਾ ਪੁਬ੍ਬਕਿਚ੍ਚਂ ਨਾਮਾਤਿ.

ਉਪੋਸਥੋਤਿ ਉਪੋਸਥਦਿਵਸੋ. ਯਾਵਤਿਕਾ ਚ ਭਿਕ੍ਖੂਤਿ ਯਤ੍ਤਕਾ ਭਿਕ੍ਖੂ. ਕਮ੍ਮਪਤ੍ਤਾਤਿ ਉਪੋਸਥਕਮ੍ਮਸ੍ਸ ਪਤ੍ਤਾ ਯੁਤ੍ਤਾ ਅਨੁਰੂਪਾ. ਤਾਵਤਿਕਾ ਭਿਕ੍ਖੂ ਹਤ੍ਥਪਾਸਂ ਅਵਿਜਹਿਤ੍ਵਾ ਏਕਸੀਮਾਯਂ ਠਿਤਾ ਚ ਹੋਨ੍ਤੀਤਿ ਯੋਜਨਾ. ਸਭਾਗਾਪਤ੍ਤਿਯੋਤਿ ਵਤ੍ਥੁਸਭਾਗਾ ਆਪਤ੍ਤਿਯੋ. ਵਜ੍ਜਨੀਯਾਤਿ ਵਜ੍ਜੇਤਬ੍ਬਾ. ਪੁਗ੍ਗਲਾਤਿ ਗਹਟ੍ਠਾਦਿਪੁਗ੍ਗਲਾ. ਤਸ੍ਮਿਨ੍ਤਿ ਤਸ੍ਮਿਂ ਉਪੋਸਥਸੀਮਮਾਲ਼ਕੇ. ਏਤਾਨਿ ਚਤ੍ਤਾਰੀਤਿ ਪਾਠਸੇਸੋ.

ਆਗਤੇਹਿ ਤੇਹਿ ਭਿਕ੍ਖੂਹੀਤਿ ਯੋਜਨਾ. ਪਨ੍ਨਰਸੋਪੀਤਿ ਪਿਸਦ੍ਦੇਨ ਨ ਕੇਵਲਂ ਪਾਲ਼ਿਯਂ ਆਗਤਨਯੇਨੇਵ ਅਧਿਟ੍ਠਾਤੁਂ ਵਟ੍ਟਤਿ, ਅਥ ਖੋ ‘‘ਅਜ੍ਜ ਮੇ ਉਪੋਸਥੋ ਪਨ੍ਨਰਸੋ’’ਤਿਪੀਤਿ ਦਸ੍ਸੇਤਿ.

੯੨. ਆਪਤ੍ਤਿਪਟਿਕਮ੍ਮਵਿਧਿਕਥਾ

੧੬੯. ਭਗਵਤਾ…ਪੇ… ਕਾਤਬ੍ਬੋਤਿ ਇਦਂ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ‘‘ਯਸ੍ਸ ਸਿਯਾ ਆਪਤ੍ਤੀਤਿਆਦਿਵਚਨੇਨੇਵ ਚਾ’’ਤਿਆਦਿਹੇਤੁਤ੍ਤਯੇਨ ‘‘ਨ ਸਾਪਤ੍ਤਿਕੇਨ ਉਪੋਸਥੋ ਕਾਤਬ੍ਬੋ’’ਤਿ ਯਥਾਰੁਤਂ ਅਪਞ੍ਞਤ੍ਤਮ੍ਪਿ ਅਤ੍ਥਤੋ ਸਿਦ੍ਧਮੇਵਾਤਿ ਦਸ੍ਸੇਤਿ. ਹੇਤੁਤ੍ਤਯਂ ‘‘ਵੇਦਿਤਬ੍ਬ’’ਨ੍ਤਿ ਪਦੇਨ ਯੋਜੇਤਬ੍ਬਂ. ਥੁਲ੍ਲਚ੍ਚਯਾਦੀਸੂਤਿ ਆਦਿਸਦ੍ਦੇਨ ਪਾਚਿਤ੍ਤਿਯਪਾਟਿਦੇਸਨੀਯਦੁਕ੍ਕਟਦੁਬ੍ਭਾਸਿਤਾਪਤ੍ਤਿਯੋ ਸਙ੍ਗਣ੍ਹਾਤਿ. ‘‘ਤਂ ਪਟਿਦੇਸੇਮੀ’’ਤਿ ਇਦਂ ਸੁਵੁਤ੍ਤਮੇਵ ਹੋਤੀਤਿ ਸਮ੍ਬਨ੍ਧੋ. ਤਨ੍ਤਿ ਆਪਤ੍ਤਿਂ. ਤੁਮ੍ਹਮੂਲੇਤਿ ਤੁਮ੍ਹਂ ਸਨ੍ਤਿਕੇ. ਨਿਗ੍ਗਹਿਤਲੋਪਞ੍ਹਿ ਵਾਕ੍ਯਮੇਵ, ਨ ਸਮਾਸੋ. ‘‘ਤੁਮ੍ਹ’’ ਇਤਿ ਚ ‘‘ਤੁਯ੍ਹ’’ ਇਤਿ ਚ ਨਵਕਤ੍ਥੇਰਾਨਂ ਵਤ੍ਤਬ੍ਬਾਕਾਰਦਸ੍ਸਨਮਤ੍ਤਮੇਵ, ਨ ਇਚ੍ਛਿਤਤ੍ਥਵਿਪਤ੍ਤਿਦਸ੍ਸਨਂ. ਵੁਤ੍ਤਮ੍ਪੀਤਿ ਪਿਸਦ੍ਦੇਨ ਨ ਕੇਵਲਂ ਪਾਲ਼ਿਨਯੇਨੇਵ ਸੁਵੁਤ੍ਤਂ, ਇਮਿਨਾ ਨਯੇਨਪਿ ਸੁਵੁਤ੍ਤਨ੍ਤਿ ਦਸ੍ਸੇਤਿ. ‘‘ਪਸ੍ਸਸੀ’’ਤਿ ਇਦਞ੍ਚ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ. ਵਤ੍ਤਬ੍ਬਾਕਾਰਂ ਪਨ ਸੁਵਿਞ੍ਞੇਯ੍ਯਂ. ‘‘ਆਮ ਪਸ੍ਸਾਮੀ’’ਤਿ ਇਦਂ ਪਨ ਸੁਵੁਤ੍ਤਮੇਵ ਹੋਤੀਤਿ ਸਮ੍ਬਨ੍ਧੋ. ਵੁਤ੍ਤਮ੍ਪੀਤਿ ਪਿਸਦ੍ਦੋ ਪਾਲ਼ਿਨਯਂ ਸਮ੍ਪਿਣ੍ਡੇਤਿ. ਆਯਤਿਂ ਸਂਵਰੇਯ੍ਯਾਸੀਤਿ ਏਤ੍ਥ ਪਨ ਵਤ੍ਤਬ੍ਬੋਤਿ ਸਮ੍ਬਨ੍ਧੋ. ਗਰੂਸੁ ਬਹੁਵਚਨਸ੍ਸ ਕਤ੍ਤਬ੍ਬਤ੍ਤਾ ਵੁਤ੍ਤਂ ‘‘ਸਂਵਰੇਯ੍ਯਾਥਾ’’ਤਿ. ਏਵਂ ਵੁਤ੍ਤੇਨ ਆਪਤ੍ਤਿਦੇਸਕੇਨਾਤਿ ਸਮ੍ਬਨ੍ਧੋ.

ਤਤ੍ਰਾਤਿ ‘‘ਯਦਾ ਨਿਬ੍ਬੇਮਤਿਕੋ’’ਤਿ ਪਾਠੇ. ਸੂਰਿਯੇ ਮੇਘਚ੍ਛਨ੍ਨੇ ਸਤੀਤਿ ਯੋਜਨਾ. ਤੇਨ ਭਿਕ੍ਖੁਨਾ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ, ਵਤ੍ਥੁਂ ਕਿਤ੍ਤੇਤ੍ਵਾਤਿ ਭੋਜਨਸਙ੍ਖਾਤਂ ਵਤ੍ਥੁਂ ਕਿਤ੍ਤੇਤ੍ਵਾ. ਤਾਤਿ ਆਪਤ੍ਤਿਯੋ.

ਸਭਾਗਾ ਆਪਤ੍ਤੀਤਿ ਏਤ੍ਥ ਦ੍ਵੀਸੁ ਵਤ੍ਥੁਸਭਾਗਆਪਤ੍ਤਿਸਭਾਗਾਸੁ ਵਤ੍ਥੁਸਭਾਗਾਵ ਅਧਿਪ੍ਪੇਤਾਤਿ ਦਸ੍ਸੇਨ੍ਤੋ ਆਹ ‘‘ਯਂ ਦ੍ਵੇਪਿ ਜਨਾ’’ਤਿਆਦਿ. ਯਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ. ਸਮਾਨੋ ਭਾਗੋ ਏਤਾਸਨ੍ਤਿ ਸਭਾਗਾ. ਦੇਸੇਤੁਂ ਵਟ੍ਟਤੀਤਿ ਆਪਤ੍ਤਿਸਭਾਗਾਪਿ ਵਤ੍ਥੁਵਿਸਭਾਗਤ੍ਤਾ ਦੇਸੇਤੁਂ ਵਟ੍ਟਤਿ. ਸੁਦੇਸਿਤਾਵਾਤਿ ਆਪਤ੍ਤਿਤੋ ਭਿਕ੍ਖੁ ਵੁਟ੍ਠਾਤਿਯੇਵਾਤਿ ਅਧਿਪ੍ਪਾਯੋ. ਅਞ੍ਞਂ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਪਨਸਦ੍ਦੋ ਗਰਹਤ੍ਥਜੋਤਕੋ ਸੁਦੇਸਿਤਾਯ ਗਰਹਾਕਾਰੇਨ ਪਵਤ੍ਤਤ੍ਤਾ. ਕਿਞ੍ਚਾਪਿ ਸੁਦੇਸਿਤਾਵ, ਪਨ ਤਥਾਪੀਤਿ ਯੋਜਨਾ. ਤਨ੍ਤਿ ਦੁਕ੍ਕਟਂ. ਨਾਨਾਵਤ੍ਥੁਕਨ੍ਤਿ ਦੇਸਨਾਪਟਿਗ੍ਗਹਣਵਸੇਨ ਨਾਨਾਵਤ੍ਥੁਕਂ.

੧੭੦. ਸਭਾਗੋਯੇਵ ਵਤ੍ਤਬ੍ਬੋ, ਨ ਵਿਸਭਾਗੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਸ੍ਸਾਤਿ ਵਿਸਭਾਗਸ੍ਸ. ਇਤੋਤਿ ਸਙ੍ਘਸਨ੍ਨਿਪਾਤਤੋ.

੯੫. ਅਨਾਪਤ੍ਤਿਪਨ੍ਨਰਸਕਾਦਿਕਥਾ

੧੭੨. ਤੇ ਨ ਜਾਨਿਂਸੂਤਿ ਏਤ੍ਥ ਜਾਨਨਾਕਾਰਦਸ੍ਸਨਤ੍ਥਂ ‘‘ਸੀਮਂ ਓਕ੍ਕਨ੍ਤਾਤਿ ਵਾ ਓਕ੍ਕਮਨ੍ਤੀਤਿ ਵਾ’’ਤਿ ਵੁਤ੍ਤਂ. ਓਕ੍ਕਨ੍ਤਾਤਿ ਵਾਤਿ ਪਵਿਸਿਤ੍ਥ ਇਤਿ ਵਾ. ਤੇਸਨ੍ਤਿ ਚਤੁਨ੍ਨਂ ਵਾ ਅਤਿਰੇਕਾਨਂ ਵਾ ਭਿਕ੍ਖੂਨਂ. ਵਗ੍ਗਾ ਸਮਗ੍ਗਸਞ੍ਞਿਨੋਤਿ ਏਤ੍ਥ ਕਸ੍ਮਾ ਵਗ੍ਗਾ, ਕਸ੍ਮਾ ਸਮਗ੍ਗਸਞ੍ਞਿਨੋਤਿ ਆਹ ‘‘ਤੇਸ’’ਨ੍ਤਿਆਦਿ. ਤਤ੍ਥ ਤੇਸਨ੍ਤਿ ਅਞ੍ਞੇਸਂ ਭਿਕ੍ਖੂਨਂ. ਸੀਮਂ ਓਕ੍ਕਨ੍ਤਤ੍ਤਾਤਿ ਸੀਮਂ ਪਵਿਸਿਤਤ੍ਤਾ, ਵਗ੍ਗਾ ਹੁਤ੍ਵਾਤਿ ਸਮ੍ਬਨ੍ਧੋ. ਸਮਗ੍ਗੋ ਇਤਿ ਸਞ੍ਞਾ ਸਮਗ੍ਗਸਞ੍ਞਾ, ਸਾ ਏਤੇਸਮਤ੍ਥੀਤਿ ਸਮਗ੍ਗਸਞ੍ਞਿਨੋ.

੧੭੫. ਕੁਕ੍ਕੁਚ੍ਚਪਕਤਾਤਿ ਪਦਸ੍ਸ ‘‘ਇਚ੍ਛਾਪਕਤੋ’’ਤਿ ਪਦੇਨ ਸਮਾਨਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਯਥਾ’’ਤਿਆਦਿ. ਪੁਬ੍ਬਭਾਗੇਤਿ ਉਪੋਸਥਕਮ੍ਮਤੋ ਪੁਬ੍ਬਭਾਗੇ. ਸਨ੍ਨਿਟ੍ਠਾਨਂ ਕਤ੍ਵਾਪੀਤਿ ਕਪ੍ਪਤੇਵਾਤਿ ਸਨ੍ਨਿਟ੍ਠਾਨਂ ਕਤ੍ਵਾਪਿ. ‘‘ਅਭਿਭੂਤਾ’’ਤਿ ਇਮਿਨਾ ਪਕਤਾਤਿ ਏਤ੍ਥ ਪਪੁਬ੍ਬਕਰਧਾਤੁਯਾ ਉਪਸਗ੍ਗਵਸੇਨ ਅਭਿਭਵਨਤ੍ਥਂ ਦਸ੍ਸੇਤਿ.

੧੭੬. ਯਥਾ ਹੇਟ੍ਠਾ ਵਗ੍ਗਾਵਗ੍ਗਸਞ੍ਞੀਪਨ੍ਨਰਸਕਾਦੀਸੁ ਦੁਕ੍ਕਟਂ ਵੁਤ੍ਤਂ, ਏਵਮਕਤ੍ਵਾ ਕਸ੍ਮਾ ‘‘ਥੁਲ੍ਲਚ੍ਚਯ’’ਨ੍ਤਿ ਆਹ ‘‘ਅਕੁਸਲਬਲਵਤਾਯਾ’’ਤਿ.

੧੦੦. ਸੀਮੋਕ੍ਕਨ੍ਤਿਕਪੇਯ੍ਯਾਲਕਥਾ

੧੭੭. ਆਵਾਸਿਕੇਨਆਗਨ੍ਤੁਕਪੇਯ੍ਯਾਲੇ ਸਬ੍ਬਂ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਵੇਦਿਤਬ੍ਬਾਕਾਰਂ ਸਹ ਉਪਮਾਯ ਦਸ੍ਸੇਨ੍ਤੋ ਆਹ ‘‘ਯਥਾ’’ਤਿਆਦਿ. ਆਗਨ੍ਤੁਕੇਨਆਵਾਸਿਕਪੇਯ੍ਯਾਲੇ ਪਨ ਆਨੇਤਬ੍ਬਨ੍ਤਿ ਸਮ੍ਬਨ੍ਧੋ. ਪੁਰਿਮਪੇਯ੍ਯਾਲੇਤਿ ਆਵਾਸਿਕੇਨਆਗਨ੍ਤੁਕਪੇਯ੍ਯਾਲੇ. ਆਗਨ੍ਤੁਕੇਨਆਗਨ੍ਤੁਕਪੇਯ੍ਯਾਲੇ ਪਨ ਯੋਜੇਤਬ੍ਬੋਤਿ ਸਮ੍ਬਨ੍ਧੋ. ਏਤ੍ਥ ਚ ਪੇਯ੍ਯਾਲਨ੍ਤਿ ਸਦਿਸਨਯਸ੍ਸ ਚ ਤਂਜਾਨਨਞਾਣਸ੍ਸ ਚ ਪਾਤਬ੍ਬਂ ਰਕ੍ਖਨਂ ਪੇਯ੍ਯਂ, ਪੇਯ੍ਯਂ, ਪੇਯ੍ਯੇ ਵਾ, ਪੇਯ੍ਯਾਯ ਵਾ ਅਲਤਿ ਸਮਤ੍ਥੇਤੀਤਿ ਪੇਯ੍ਯਾਲਨ੍ਤਿ ਵਚਨਤ੍ਥੋ ਕਾਤਬ੍ਬੋ.

੧੭੮. ਆਵਾਸਿਕਾਨਂ ਚਾਤੁਦ੍ਦਸੋ ਹੁਤ੍ਵਾ ਕਸ੍ਮਾ ਆਗਨ੍ਤੁਕਾਨਂ ਪਨ੍ਨਰਸੋਤਿ ਆਹ ‘‘ਯੇਸ’’ਨ੍ਤਿਆਦਿ. ਤਤ੍ਥ ਯੇਸਨ੍ਤਿ ਆਗਨ੍ਤੁਕਾਨਂ. ਤਿਰੋਰਟ੍ਠਤੋਤਿ ਆਵਾਸਿਕਾਨਂ ਰਟ੍ਠਸ੍ਸ ਅਞ੍ਞਰਟ੍ਠਤੋ. ਤਿਰੋਜਨਪਦਤੋਤਿ ਏਕਰਟ੍ਠੇਪਿ ਅਞ੍ਞਜਨਪਦਤੋ. ਚਾਤੁਦ੍ਦਸਿਕਂ ਅਕਂਸੂਤਿ ਸਞ੍ਞਾਨਾਨਤ੍ਤਵਸੇਨ ਚਾਤੁਦ੍ਦਸਿਕਂ ਅਕਂਸੁ. ਅਨੁਵਤ੍ਤਿਤਬ੍ਬਨ੍ਤਿ ਅਨੁਮਤਿਂ ਵਤ੍ਤਿਤਬ੍ਬਂ. ਨ ਪਟਿਕ੍ਕੋਸਿਤਬ੍ਬਨ੍ਤਿ ‘‘ਨ ਚਾਤੁਦ੍ਦਸੋ’’ਤਿ ਵਤ੍ਵਾ ਨ ਵਾਰਿਤਬ੍ਬਂ. ਨ ਅਕਾਮਾਤਿ ਏਤ੍ਥ ਕਮੁਧਾਤੁ ਇਚ੍ਛਤ੍ਥੋ, ਕਰਣਤ੍ਥੇ ਚ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਨ ਅਨਿਚ੍ਛਾਯ ਦਾਤਬ੍ਬਾ’’ਤਿ.

੧੦੧. ਲਿਙ੍ਗਾਦਿਦਸ੍ਸਨਕਥਾ

੧੭੯. ‘‘ਆਵਾਸਿਕਾਨਂ ਆਕਾਰ’’ਨ੍ਤਿ ਇਮਿਨਾ ਆਵਾਸਿਕਾਕਾਰਨ੍ਤਿ ਪਦਸ੍ਸ ਛਟ੍ਠੀਸਮਾਸਂ ਦਸ੍ਸੇਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਆਵਾਸਿਕਲਿਙ੍ਗ’’ਨ੍ਤਿਆਦੀਸੁ. ਯੇਨਾਤਿ ਸੁਪਞ੍ਞਤ੍ਤਮਞ੍ਚਪੀਠਾਦਿਨਾ, ਗਣ੍ਹਤੀਤਿ ਸਮ੍ਬਨ੍ਧੋ. ਤੇਸਨ੍ਤਿ ਆਵਾਸਿਕਾਨਂ. ਆਚਾਰਸਣ੍ਠਾਨਨ੍ਤਿ ਆਚਾਰਸਣ੍ਠਿਤਿਂ. ਸੋ ਸੁਪਞ੍ਞਤ੍ਤਮਞ੍ਚਪੀਠਾਦਿਕੋ ਆਕਾਰੋ ਨਾਮਾਤਿ ਯੋਜਨਾ. ਯਨ੍ਤਿ ਸੁਪਞ੍ਞਤ੍ਤਮਞ੍ਚਪੀਠਾਦਿਂ, ਗਮਯਤੀਤਿ ਸਮ੍ਬਨ੍ਧੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਲੀਨੇ ਆਵਾਸਿਕੇਤਿ ਸਮ੍ਬਨ੍ਧੋ. ਤਂ ਸੁਪਞ੍ਞਤ੍ਤਮਞ੍ਚਪੀਠਾਦਿ ਲਿਙ੍ਗਂ ਨਾਮਾਤਿ ਯੋਜਨਾ. ‘‘ਅਦਿਸ੍ਸਮਾਨੇ’’ਤਿ ਇਮਿਨਾ ਲੀਨੇਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਜਾਨਾਪੇਤੀ’’ਤਿ ਇਮਿਨਾ ਗਮਯਤੀਤਿ ਪਦਸ੍ਸ ਞਾਣਤ੍ਥਂ ਦਸ੍ਸੇਤਿ. ਯਨ੍ਤਿ ਸੁਪਞ੍ਞਤ੍ਤਮਞ੍ਚਪੀਠਾਦਿਂ. ਤੇਤਿ ਆਵਾਸਿਕਾ. ਤਂ ਸੁਪਞ੍ਞਤ੍ਤਮਞ੍ਚਪੀਠਾਦਿ ਨਿਮਿਤ੍ਤਂ ਨਾਮਾਤਿ ਯੋਜਨਾ. ਯੇਨਾਤਿ ਸੁਪਞ੍ਞਤ੍ਤਮਞ੍ਚਪੀਠਾਦਿਨਾ. ਤੇਤਿ ਆਵਾਸਿਕਾ ਉਦ੍ਦਿਸਿਯਨ੍ਤਿ, ਸੋ ਸੁਪਞ੍ਞਤ੍ਤਮਞ੍ਚਪੀਠਾਦਿਕੋ ਉਦ੍ਦੇਸੋ ਨਾਮਾਤਿ ਯੋਜਨਾ. ਇਮੇਹਿ ਪਦੇਹਿ ਆਕਿਰਿਯਨ੍ਤਿ ਪਕਾਸਿਯਨ੍ਤਿ ਏਤੇਨਾਤਿ ਆਕਾਰੋ, ਲੀਨੇ ਗਮਯਤਿ ਬੋਧੇਤੀਤਿ ਲਿਙ੍ਗਂ. ਨਿਮਿਯਨ੍ਤਿ ਪਰਿਚ੍ਛਿਜ੍ਜ ਞਾਯਨ੍ਤਿ ਏਤੇਨਾਤਿ ਨਿਮਿਤ੍ਤਂ, ਉਦ੍ਦਿਸਿਯਨ੍ਤਿ ਅਪਦਿਸਿਯਨ੍ਤਿ ਏਤੇਨਾਤਿ ਉਦ੍ਦੇਸੋਤਿ ਵਚਨਤ੍ਥਂ ਦਸ੍ਸੇਤਿ. ਸਬ੍ਬਮੇਤਨ੍ਤਿ ‘‘ਆਵਾਸਿਕਾਕਾਰ’’ਨ੍ਤਿਆਦਿ ਏਤਂ ਸਬ੍ਬਂ. ਯਥਾਯੋਗਨ੍ਤਿ ਪਾਲ਼ਿਯਂ ਯੋਗਾਨੁਰੂਪਂ. ਤਤ੍ਥਾਤਿ ਆਗਨ੍ਤੁਕਾਕਾਰਾਦੀਸੁ. ‘‘ਅਮ੍ਹਾਕਂ ਇਦ’’ਨ੍ਤਿ ਨ ਞਾਤਬ੍ਬਨ੍ਤਿ ਅਞ੍ਞਾਤਂ, ਤਦੇਵ ਅਞ੍ਞਾਤਕਂ, ਨਿਸੀਦਨਾਦਿ. ‘‘ਅਮ੍ਹਾਕਂ ਇਦ’’ਨ੍ਤਿ ਅਜਾਨਨਂ ਨਾਮ ਅਤ੍ਤਨੋ ਅਸਨ੍ਤਕਤ੍ਤਾ, ਅਞ੍ਞੇਸਮੇਵ ਸਨ੍ਤਕਤ੍ਤਾ ਹੋਤੀਤਿ ਆਹ ‘‘ਅਞ੍ਞੇਸਂ ਸਨ੍ਤਕ’’ਨ੍ਤਿ. ਉਦਕਨਿਸ੍ਸੇਕਨ੍ਤਿ ਸਿਞ੍ਚਨਵਿਰਹਿਤਂ ਉਦਕਂ. ਬਹੁਵਚਨਸ੍ਸਾਤਿ ‘‘ਧੋਤਾਨ’’ਨ੍ਤਿ ਏਤ੍ਥ ਛਟ੍ਠੀਬਹੁਵਚਨਸ੍ਸ. ਏਕਵਚਨਨ੍ਤਿ ‘‘ਧੋਤਸ੍ਸਾ’’ਤਿ ਏਕਵਚਨਂ. ਪਚ੍ਛਿਮਪਾਠੇ ਮਲਂ ਧੁਨਾਤਿ ਅਨੇਨਾਤਿ ਧੋਤਂ, ਧੋਤਞ੍ਚ ਤਂ ਉਦਕਞ੍ਚੇਤਿ ਧੋਤਉਦਕਂ, ਤਮੇਵ ਨਿਸ੍ਸੇਕਂ ਧੋਤਉਦਕਨਿਸ੍ਸੇਕਂ.

੧੮੦. ਸਮਾਨਸਂਵਾਸਕਦਿਟ੍ਠਿਨ੍ਤਿ ਪਦਸ੍ਸ ਇਤਿਲੋਪਸਮਾਸਂ ਦਸ੍ਸੇਨ੍ਤੋ ਆਹ ‘‘ਸਮਾਨਸਂਵਾਸਕਾ ਏਤੇਤਿ ਦਿਟ੍ਠਿ’’ਨ੍ਤਿ. ਏਤੇਤਿ ਆਵਾਸਿਕਾ ਭਿਕ੍ਖੂ. ‘‘ਲਦ੍ਧਿ’’ਨ੍ਤਿ ਇਮਿਨਾ ਨ ਪੁਚ੍ਛਨ੍ਤੀਤਿ ਪਦਸ੍ਸ ਕਮ੍ਮਂ ਦਸ੍ਸੇਤਿ. ਨਾਨਾਸਂਵਾਸਕਭਾਵਨ੍ਤਿ ਤੇਸਂ ਲਦ੍ਧਿਨਾਨਾਸਂਵਾਸਕਭਾਵਂ. ‘‘ਮਦ੍ਦਿਤੁ’’ਨ੍ਤਿ ਇਮਿਨਾ ਨਾਭਿਵਿਤਰਨ੍ਤੀਤਿ ਏਤ੍ਥ ਅਭਿਸਦ੍ਦਸ੍ਸਤ੍ਥਂ ਦਸ੍ਸੇਤਿ. ‘‘ਅਭਿਭਵਿਤੁ’’ਨ੍ਤਿ ਇਮਿਨਾ ਚ ਤਦੇਵਤ੍ਥਂ ਦਸ੍ਸੇਤਿ. ਨਾਨਾਸਂਵਾਸਕਭਾਵਸ੍ਸ ਮਦ੍ਦਨਂ ਨਾਮ ਲਦ੍ਧਿਨਿਸ੍ਸਜ੍ਜਾਪਨਨ੍ਤਿ ਆਹ ‘‘ਤਂ ਦਿਟ੍ਠਿਂ ਨ ਨਿਸ੍ਸਜ੍ਜਾਪੇਨ੍ਤੀ’’ਤਿ.

੧੦੩. ਨਗਨ੍ਤਬ੍ਬਗਨ੍ਤਬ੍ਬਵਾਰਕਥਾ

੧੮੧. ਸਭਿਕ੍ਖੁਕਾਤਿ ਪਦਸ੍ਸ ਸਂਵਿਜ੍ਜਨ੍ਤਿ ਭਿਕ੍ਖੂ ਏਤਸ੍ਮਿਮਾਵਾਸੇਤਿ ਸਭਿਕ੍ਖੁਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਿਂ ਆਵਾਸੇ’’ਤਿਆਦਿ. ਯਨ੍ਤਿ ਆਵਾਸਂ. ਤਦਹੇਵਾਤਿ ਤਦਹੁਪੋਸਥੇ ਏਵ. ਇਮਿਨਾ ਸਚੇ ਸਕ੍ਕੋਤਿ, ਤਦਹੇਵ ਗਨ੍ਤੁਂ, ਸੋ ਗਨ੍ਤਬ੍ਬੋਤਿ ਦਸ੍ਸੇਤਿ. ‘‘ਅਕਤ੍ਵਾ’’ਤਿ ਇਮਿਨਾ ਕਤ੍ਵਾ ਪਨ ਗਨ੍ਤਬ੍ਬੋਤਿ ਦਸ੍ਸੇਤਿ. ‘‘ਅਞ੍ਞਤ੍ਰਾ’’ਤਿ ਨਿਪਾਤੋ ‘‘ਵਿਨਾ’’ਤਿ ਨਿਪਾਤਸ੍ਸ ਪਰਿਯਾਯੋਤਿ ਆਹ ‘‘ਵਿਨਾ’’ਤਿ. ਅਤ੍ਤਚਤੁਤ੍ਥੇਨ ਵਾ ਅਤ੍ਤਪਞ੍ਚਮੇਨ ਵਾ ਸਙ੍ਘੇਨ ਗਨ੍ਤੁਂ ਵਟ੍ਟਤੀਤਿ ਯੋਜਨਾ. ਏਤ੍ਥ ਚ ‘‘ਅਤ੍ਤਚਤੁਤ੍ਥੇਨ ਵਾ’’ਤਿ ਇਦਂ ਉਪੋਸਥਕਮ੍ਮਂ ਸਨ੍ਧਾਯ ਵੁਤ੍ਤਂ. ‘‘ਅਤ੍ਤਪਞ੍ਚਮੇਨ ਵਾ’’ਤਿ ਇਦਂ ਪਵਾਰਣਾਕਮ੍ਮਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵਿਹਾਰੇਤਿ ਵਿਹਾਰਸੀਮਾਯ ਮਹਾਸੀਮਾਯਨ੍ਤਿ ਅਤ੍ਥੋ. ਇਦਞ੍ਹਿ ਵਿਹਾਰਸੀਮਾਨਂ ਅਭੇਦੇਨ ਵੁਤ੍ਤਂ. ਸੀਮਾਪੀਤਿ ਖਣ੍ਡਸੀਮਾਪਿ. ਨ ਗਨ੍ਤਬ੍ਬਾਤਿ ਸਙ੍ਘਸ੍ਸ ਗਰੁਕਤ੍ਤਾ ਨ ਗਨ੍ਤਬ੍ਬਾ. ਏਤ੍ਥਾਤਿ ਖਣ੍ਡਸੀਮਾਦੀਸੁ. ਤਸ੍ਸਾਤਿ ਭਿਕ੍ਖੁਸ੍ਸ. ਗਨ੍ਤੁਂ ਵਟ੍ਟਤੀਤਿ ਗਣੁਪੋਸਥਟ੍ਠਾਨਤੋ ਗਨ੍ਤੁਂ ਵਟ੍ਟਤਿ, ਸਙ੍ਘੁਪੋਸਥਟ੍ਠਾਨਤੋ ਪਨ ਨ ਵਟ੍ਟਤਿਯੇਵਾਤਿ ਦਟ੍ਠਬ੍ਬਂ. ਵਿਸ੍ਸਟ੍ਠਉਪੋਸਥਾ ਆਵਾਸਾਪਿ ਅਞ੍ਞਂ ਗਨ੍ਤੁਂ ਵਟ੍ਟਤੀਤਿ ਯੋਜਨਾ. ਆਰਞ੍ਞਕੇਨਾਪੀਤਿ ਅਰਞ੍ਞੇ ਏਕਕੇਨ ਨਿਵਾਸੇਨਪਿ. ਤਤ੍ਥਾਤਿ ਅਞ੍ਞਵਿਹਾਰੇ. ਉਪੋਸਥਨ੍ਤਿ ਸਙ੍ਘੁਪੋਸਥਞ੍ਚ ਗਣੁਪੋਸਥਞ੍ਚ.

੧੮੨. ਯਨ੍ਤਿ ਆਵਾਸਂ. ਤਤ੍ਥਾਤਿ ਤਂ ਆਵਾਸਂ. ਗਨ੍ਤੁਂ ਸਕ੍ਕੋਮਿ ਇਤਿ ਜਾਨੇਯ੍ਯਾਤਿ ਯੋਜਨਾ. ਤਤ੍ਥਾਤਿ ਤਸ੍ਮਿਂ ਆਵਾਸੇ. ਇਮਿਨਾ ਨੇਵ ਕਤੋਤਿ ਸਮ੍ਬਨ੍ਧੋ. ਨੇਵ ਕਤੋ ਭਵਿਸ੍ਸਤਿ ਇਤਿ ਜਾਨੇਯ੍ਯਾਤਿ ਯੋਜਨਾ.

੧੦੫. ਵਜ੍ਜਨੀਯਪੁਗ੍ਗਲਸਨ੍ਦਸ੍ਸਨਕਥਾ

੧੮੩. ਹਤ੍ਥਪਾਸੂਪਗਮਨਮੇਵਾਤਿ ਉਪੋਸਥਸਙ੍ਘਾਦੀਨਂ ਹਤ੍ਥਪਾਸਸ੍ਸ ਉਪਗਮਨਮੇਵ. ਇਦਂ ਪਾਰਿਵਾਸਿਯਪਾਰਿਸੁਦ੍ਧਿਦਾਨਂ ਨਾਮ ਨ ਵਟ੍ਟਤੀਤਿ ਯੋਜਨਾ. ਤਸ੍ਸਾਤਿ ਪਾਰਿਵਾਸਿਯਪਾਰਿਸੁਦ੍ਧਿਦਾਨਸ੍ਸ. ਅਨੁਪੋਸਥੇਤਿ ਏਤ੍ਥ ਅਕਾਰਸ੍ਸ ਅਞ੍ਞਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਞ੍ਞਸ੍ਮਿਂ ਦਿਵਸੇ’’ਤਿ. ਤਤ੍ਥ ਅਞ੍ਞਸ੍ਮਿਨ੍ਤਿ ਦ੍ਵੀਹਿ ਉਪੋਸਥੇਹਿ ਅਞ੍ਞਸ੍ਮਿਂ. ਯਾ ਸਙ੍ਘਸਾਮਗ੍ਗੀ ਕਰਿਯਤਿ, ਤਥਾਰੂਪਿਨ੍ਤਿ ਯੋਜਨਾ. ਕੋਸਮ੍ਬਕਭਿਕ੍ਖੂਨਨ੍ਤਿ ਕੋਸਮ੍ਬਿਯਂ ਨਿਵਾਸੀਨਂ ਭਿਕ੍ਖੂਨਂ. ਸਾਮਗ੍ਗੀ ਵਿਯ ਯਾ ਸਾਮਗ੍ਗੀਤਿ ਯੋਜਨਾ. ‘‘ਠਪੇਤ੍ਵਾ’’ਤਿ ਇਮਿਨਾ ਅਞ੍ਞਤ੍ਰਾਤਿ ਨਿਪਾਤਸ੍ਸ ਅਤ੍ਥਂ ਦਸ੍ਸੇਤਿ. ਯੇ ਪਨਾਤਿ ਭਿਕ੍ਖੂ ਪਨ ਸਮਗ੍ਗਾ ਹੋਨ੍ਤੀਤਿ ਸਮ੍ਬਨ੍ਧੋ. ਉਪੋਸਥੇਯੇਵਾਤਿ ਉਪੋਸਥਦਿਵਸੇਯੇਵ.

ਇਤਿ ਉਪੋਸਥਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.