੩. ਵਸ੍ਸੂਪਨਾਯਿਕਕ੍ਖਨ੍ਧਕਂ

੧੦੭. ਵਸ੍ਸੂਪਨਾਯਿਕਾਨੁਜਾਨਨਕਥਾ

੧੮੪. ਵਸ੍ਸੂਪਨਾਯਿਕਕ੍ਖਨ੍ਧਕੇ ‘‘ਅਨਨੁਞ੍ਞਾਤੋ’’ਤਿ ਇਮਿਨਾ ਅਪਞ੍ਞਤ੍ਤੋਤਿ ਏਤ੍ਥ ਞਾਧਾਤੁਯਾ ਅਨੁਜਾਨਨਤ੍ਥਂ ਦਸ੍ਸੇਤਿ, ‘‘ਅਸਂਵਿਹਿਤੋ’’ਤਿ ਇਮਿਨਾ ਞਾਧਾਤੁਯਾ ਠਪਨਤ੍ਥਂ. ਤੇਧਾਤਿ ਤੇ ਇਧ. ਇਧਸਦ੍ਦੋ ਸਾਸਨਞ੍ਚ ਲੋਕਞ੍ਚ ਦੇਸਞ੍ਚ ਪਦਪੂਰਣਞ੍ਚ ਉਪਾਦਾਯ ਵਤ੍ਤਤਿ, ਇਧ ਪਨ ਪਦਪੂਰਣੇਤਿ ਦਸ੍ਸੇਨ੍ਤੋ ਆਹ ‘‘ਇਧਸਦ੍ਦੋ ਨਿਪਾਤਮਤ੍ਤੋ’’ਤਿ. ਸਂਹਨਨਂ ਸਙ੍ਘਾਤੋ, ਵਿਨਾਸੋਤਿ ਅਤ੍ਥੋ. ਇਤਿ ਇਮਮਤ੍ਥਂ ਦਸ੍ਸੇਤਿ ‘‘ਵਿਨਾਸ’’ਨ੍ਤਿ ਇਮਿਨਾ. ਸਕੁਨ੍ਤਕਸਦ੍ਦੋ ਸਕੁਣਪਰਿਯਾਯੋਤਿ ਆਹ ‘‘ਸਕੁਣਾ’’ਤਿ. ਸਕੁਣਾਤਿ ਚ ਵਿਹਙ੍ਗਮਾ. ਤੇ ਹਿ ਆਕਾਸੇ ਗਨ੍ਤੁਂ ਸਕ੍ਕੋਨ੍ਤੀਤਿ ਸਕੁਣਾਤਿ ਵੁਚ੍ਚਨ੍ਤਿ. ਸਂਕਸਾਯਿਸ੍ਸਨ੍ਤੀਤਿ ਏਤ੍ਥ ‘‘ਸਂ ਕਸੇ ਅਚ੍ਛਨੇ’’ਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੬ ਸਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਸਂਪੁਬ੍ਬੋ ਕਸੇਧਾਤੁ ਅਚ੍ਛਨਤ੍ਥੋਤਿ ਆਹ ‘‘ਵਸਿਸ੍ਸਨ੍ਤੀ’’ਤਿ. ਏਕਾਰਨ੍ਤੋਯਂ ਧਾਤੁ. ਨਿਬਦ੍ਧਵਾਸਨ੍ਤਿ ਨਿਚ੍ਚਵਾਸਂ. ਵਸ੍ਸਾਨਨਾਮਕੇਤਿ ਵਸ੍ਸਾਨਉਤੁਨਾਮਕੇ. ਵਸ੍ਸਾਨਸ੍ਸ ਚਤੁਮਾਸਤ੍ਤਾ ‘‘ਤੇਮਾਸੇ’’ਤਿ ਵੁਤ੍ਤਂ. ਵਸ੍ਸੂਪਨਾਯਿਕਾਤਿ ਏਤ੍ਥ ਨੀਧਾਤੁ ਗਮਨਤ੍ਥੋਤਿ ਆਹ ‘‘ਵਸ੍ਸੂਪਗਮਨਾਨੀ’’ਤਿ. ਅਪਰਜ੍ਜੂਤਿ ਪੁਣ੍ਣਮਿਤੋ ਅਪਰਂ ਅਹਨ੍ਤਿ ਅਪਰਜ੍ਜੁ, ਅਹਤ੍ਥੇ ਜ੍ਜੁਪਚ੍ਚਯੋ, ਅਤ੍ਥਤੋ ਪਾਟਿਪਦਦਿਵਸੋ. ਅਯਂ ਅਪਰਜ੍ਜੁਸਦ੍ਦੋ ਪਠਮਨ੍ਤਨਿਪਾਤੋ. ਅਸ੍ਸਾਤਿ ਆਸਲ਼੍ਹੀਪੁਣ੍ਣਮਿਯਾ. ਅਸਮਾਨਾਧਿਕਰਣਵਿਸਯੋ ਬਾਹਿਰਤ੍ਥਸਮਾਸੋਯਂ, ਅਤਿਕ੍ਕਨ੍ਤਾਯ ਸਤਿਯਾਤਿ ਯੋਜਨਾ. ਅਪਰਸ੍ਮਿਂ ਦਿਵਸੇਤਿ ਪਾਟਿਪਦਦਿਵਸੇ. ਅਸ੍ਸਾਤਿ ਸਾਵਣਮਾਸਪੁਣ੍ਣਮਿਯਾ. ਤਸ੍ਮਾਤਿ ਯਸ੍ਮਾ ਚ ਅਪਰਜ੍ਜੁਗਤਾ, ਯਸ੍ਮਾ ਚ ਮਾਸਗਤਾ, ਤਸ੍ਮਾ. ‘‘ਅਨਨ੍ਤਰੇ ਪਾਟਿਪਦਦਿਵਸੇ’’ਤਿ ਇਮਿਨਾ ਪਾਲ਼ਿਯਂ ਅਪਰਜ੍ਜੁਗਤਾਯ ਆਸਲ਼੍ਹਿਯਾ ਅਨਨ੍ਤਰੇ ਪਾਟਿਪਦਦਿਵਸੇ ਪੁਰਿਮਿਕਾ ਉਪਗਨ੍ਤਬ੍ਬਾਤਿ ਅਤ੍ਥਂ ਦਸ੍ਸੇਤਿ. ਆਸਲ਼੍ਹਿਯਾਤਿ ਆਸਲ਼੍ਹੀਪੁਣ੍ਣਮਿਯਾ. ਪਚ੍ਛਿਮਨਯੇਪਿ ਮਾਸਗਤਾਯ ਆਸਲ਼੍ਹਿਯਾ ਅਨਨ੍ਤਰੇ ਪਾਟਿਪਦਦਿਵਸੇ ਪਚ੍ਛਿਮਿਕਾ ਉਪਗਨ੍ਤਬ੍ਬਾਤਿ ਅਤ੍ਥੋ ਦਟ੍ਠਬ੍ਬੋ. ਆਸਲ਼੍ਹਿਯਾਤਿ ਆਸਲ਼੍ਹੀਪੁਣ੍ਣਮਿਯਾ ਸਮੀਪੇ ਪਵਤ੍ਤਤ੍ਤਾ ਆਸਲ਼੍ਹੀਸਙ੍ਖਾਤਾਯ ਸਾਵਣਪੁਣ੍ਣਮਿਯਾਤਿ ਅਤ੍ਥੋ. ਪਾਟਿਪਦਦਿਵਸੇਯੇਵ ਵਸ੍ਸਂ ਉਪਗਨ੍ਤਬ੍ਬਨ੍ਤਿ ਸਮ੍ਬਨ੍ਧੋ. ਸਕਿਂ ਵਾਤਿਆਦੀਸੁ ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਨਿਚ੍ਛਾਰੇਤ੍ਵਾਤਿ ਨਿਚ੍ਚਾਰੇਤ੍ਵਾ, ਉਚ੍ਚਾਰੇਤ੍ਵਾਤਿ ਅਤ੍ਥੋ. ਅਫੁਟ੍ਠਕ੍ਖਰਸਞ੍ਞੋਗੇਹਿ ਪਰੋ ਕ੍ਵਚਿ ਫੁਟ੍ਠਤ੍ਤਮਾਪਜ੍ਜਤਿ ‘‘ਨਿਕ੍ਖਮਤੀ’’ਤਿਆਦੀਸੁ ਵਿਯ. ਤਸ੍ਮਾ ਪਰਸ੍ਸ ਚਕਾਰਸ੍ਸ ਛਕਾਰਂ ਕਤ੍ਵਾ ‘‘ਨਿਚ੍ਛਾਰੇਤ੍ਵਾ’’ਤਿ ਵੁਤ੍ਤਂ.

੧੦੮. ਵਸ੍ਸਾਨੇਚਾਰਿਕਾਪਟਿਕ੍ਖੇਪਾਦਿਕਥਾ

੧੮੫. ਆਪਤ੍ਤਿ ਵੇਦਿਤਬ੍ਬਾਤਿ ਅਨਪੇਕ੍ਖਗਮਨੇਨ ਉਪਚਾਰਾਤਿਕ੍ਕਮੇ ਸਾਪੇਕ੍ਖਗਮਨੇਨ ਅਞ੍ਞਤ੍ਥ ਅਰੁਣੁਟ੍ਠਾਪਨੇ ਆਪਤ੍ਤਿ ਵੇਦਿਤਬ੍ਬਾ. ਵਿਹਾਰਗਣਨਾਯ ਆਪਤ੍ਤਿਯੋ ਵੇਦਿਤਬ੍ਬਾਤਿ ਏਤ੍ਥ ਵਸ੍ਸੂਪਨਾਯਿਕਦਿਵਸੇ ਵਸ੍ਸਂ ਅਨੁਪਗਨ੍ਤੁਕਾਮਤਾਚਿਤ੍ਤੇਨ ਵਿਹਾਰਂ ਅਤਿਕ੍ਕਮੇਯ੍ਯ, ਵਿਹਾਰਗਣਨਾਯ ਆਪਤ੍ਤਿਯੋ ਵੇਦਿਤਬ੍ਬਾ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਤਂ ਦਿਵਸਨ੍ਤਿ ਤਸ੍ਮਿਂ ਵਸ੍ਸੂਪਗਮਨਦਿਵਸੇ. ਸਤਂ ਆਪਤ੍ਤਿਯੋਤਿ ਏਤ੍ਥ ਸਤਨ੍ਤਿ ਸਙ੍ਖ੍ਯਾਪਧਾਨਤ੍ਤਾ ਏਕਵਚਨਨ੍ਤਿ ਸਦ੍ਦਸਤ੍ਥੇਸੁ ਵੁਤ੍ਤਂ. ਏਕਾ ਏਵ ਆਪਤ੍ਤੀਤਿ ਅਤ੍ਤਨੋ ਵਿਹਾਰਸ੍ਸ ਅਤਿਕ੍ਕਮਨੇਯੇਵ ਏਕਾ ਏਵ ਆਪਤ੍ਤਿ. ਕੇਨਚਿ ਅਨ੍ਤਰਾਯੇਨ ਅਨੁਪਗਤੇਨਾਤਿ ਸਮ੍ਬਨ੍ਧੋ.

ਵਸ੍ਸਨਾਮੋ ਇਮਸ੍ਸਤ੍ਥੀਤਿ ਵਸ੍ਸੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਵਸ੍ਸਨਾਮਕ’’ਨ੍ਤਿ. ‘‘ਪਠਮਂ ਮਾਸ’’ਨ੍ਤਿ ਇਮਿਨਾ ਅਞ੍ਞਪਦਸ੍ਸ ਸਰੂਪਂ ਦਸ੍ਸੇਤਿ. ਪਠਮਂ ਮਾਸਨ੍ਤਿ ਚਤੂਸੁ ਵਸ੍ਸਮਾਸੇਸੁ ਪਠਮਂ ਮਾਸਂ. ਉਕ੍ਕਡ੍ਢਿਤੁਕਾਮੋਤਿ ਉਪਰਿ ਕਡ੍ਢਿਤੁਕਾਮੋ. ਆਸਲ਼੍ਹੀਮਾਸਮੇਵ, ਨ ਸਾਵਣਮਾਸਨ੍ਤਿ ਅਤ੍ਥੋ. ਜੁਣ੍ਹਸਦ੍ਦੋ ਚਨ੍ਦਪਭਾਯੁਤ੍ਤੋ ਮਾਸੋਤਿ ਆਹ ‘‘ਮਾਸੇ’’ਤਿ. ਚਨ੍ਦਪਭਾਯੁਤ੍ਤੋ ਮਾਸੋਤਿ ਆਹ ‘‘ਮਾਸੇ’’ਤਿ. ਚਨ੍ਦਪਭਾਯੁਤ੍ਤੋ ਹਿ ਮਾਸੋ ਜੋਤਤਿ ਦਿਪ੍ਪਤੀਤਿ ਜੁਣ੍ਹੋਤਿ ਵੁਚ੍ਚਤਿ. ਤਸ੍ਮਾ ‘‘ਮਾਸੇ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਪੁਣ੍ਣਮਿਯੁਤ੍ਤੋ ਮਾਸੋਵ ਗਹੇਤਬ੍ਬੋ. ਕਾਚਿ ਪਰਿਹਾਨਿ ਨਾਮਾਤਿ ਕਿਞ੍ਚਿ ਸੀਲਾਦੀਨਂ ਹਾਯਨਂ ਨਾਮ. ਅਞ੍ਞਸ੍ਮਿਮ੍ਪੀਤਿ ਵਸ੍ਸੂਪਗਮਨਤੋ ਅਞ੍ਞਸ੍ਮਿਮ੍ਪਿ. ਧਮ੍ਮਿਕੇਤਿ ਧਮ੍ਮੇਨ ਯੁਤ੍ਤੇ.

੧੦੯. ਸਤ੍ਤਾਹਕਰਣੀਯਾਨੁਜਾਨਨਕਥਾ

੧੮੭. ਸਤ੍ਤਾਹਕਰਣੀਯੇਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ‘‘ਸਤ੍ਤਾਹਕਰਣੀਯੇਨਾ’’ਤਿ ਪਦਸ੍ਸ ਸਤ੍ਤਮੀਸਮਾਸਞ੍ਚ ਅਨੀਯਸਦ੍ਦਸ੍ਸ ਕਮ੍ਮਤ੍ਥਞ੍ਚ ਦਸ੍ਸੇਨ੍ਤੋ ਆਹ ‘‘ਸਤ੍ਤਾਹਬ੍ਭਨ੍ਤਰੇ ਯਂ ਕਤ੍ਤਬ੍ਬ’’ਨ੍ਤਿ. ਤਤ੍ਥ ‘‘ਸਤ੍ਤਾਹਬ੍ਭਨ੍ਤਰੇ’’ਤਿ ਇਮਿਨਾ ਸਤ੍ਤਮੀਸਮਾਸਂ ਦਸ੍ਸੇਤਿ, ‘‘ਕਤ੍ਤਬ੍ਬ’’ਨ੍ਤਿ ਇਮਿਨਾ ਕਮ੍ਮਤ੍ਥਂ. ‘‘ਸਤ੍ਤਾਹਬ੍ਭਨ੍ਤਰੇ’’ਤਿ ਇਮਿਨਾ ਸਤ੍ਤਾਹਸ੍ਸ ਅਬ੍ਭਨ੍ਤਰਂ ਸਤ੍ਤਾਹਨ੍ਤਿ ਉਤ੍ਤਰਪਦਲੋਪਂ ਦਸ੍ਸੇਤਿ. ਪਹਿਤੇ ਗਨ੍ਤੁਨ੍ਤਿ ਏਤ੍ਥ ਪਹਿਤੇਸਦ੍ਦਸ੍ਸ ਕਤ੍ਤੁਕਮ੍ਮਾਨਿ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਆਦੀਹਿ ਦੂਤੇ’’ਤਿ. ਤਤ੍ਥ ‘‘ਭਿਕ੍ਖੁਆਦੀਹੀ’’ਤਿ ਇਮਿਨਾ ਕਤ੍ਤਾਰਂ ਦਸ੍ਸੇਤਿ, ‘‘ਦੂਤੇ’’ਤਿ ਇਮਿਨਾ ਕਮ੍ਮਂ. ਸਤ੍ਤਾਹਨ੍ਤਿ ਏਤ੍ਥ ਉਤ੍ਤਰਪਦਲੋਪਞ੍ਚ ਭੁਮ੍ਮਤ੍ਥੇ ਉਪਯੋਗਵਚਨਞ੍ਚ ਦਸ੍ਸੇਨ੍ਤੋ ਆਹ ‘‘ਅਨ੍ਤੋਸਤ੍ਤਾਹੇਯੇਵਾ’’ਤਿ. ਤਤ੍ਥੇਵਾਤਿ ਤਸ੍ਮਿਂ ਪਹਿਤਟ੍ਠਾਨੇਯੇਵ. ‘‘ਨ ਉਟ੍ਠਾਪੇਤਬ੍ਬੋ’’ਤਿ ਇਮਿਨਾ ‘‘ਸਤ੍ਤਾਹੇਯੇਵਾ’’ਤਿ ਏਤ੍ਥ ਏਵਸਦ੍ਦਸ੍ਸ ਫਲਂ ਦਸ੍ਸੇਤਿ.

੧੮੯. ਰਸੋ ਏਤਸ੍ਮਿਂ ਅਤ੍ਥੀਤਿ ਰਸਵਤੀਤਿ ਵੁਤ੍ਤੇ ਭਤ੍ਤਗੇਹਂ ਗਹੇਤਬ੍ਬਨ੍ਤਿ ਆਹ ‘‘ਭਤ੍ਤਗੇਹਂ ਵੁਚ੍ਚਤੀ’’ਤਿ. ਭਤ੍ਤਗੇਹਨ੍ਤਿ ਭਤ੍ਤਪਚਨਗੇਹਂ. ਪੁਰਾਯਂ ਸੁਤ੍ਤਨ੍ਤੋਤਿ ਏਤ੍ਥ ਪੁਰਾ ਅਯਨ੍ਤਿ ਪਦਚ੍ਛੇਦਂ ਕਤ੍ਵਾ ਪੁਰਾਸਦ੍ਦੋ ਯਾਵਪਰਿਯਾਯੋਤਿ ਆਹ ‘‘ਯਾਵ ਅਯਂ ਸੁਤ੍ਤਨ੍ਤੋ’’ਤਿ. ਨ ਪਲੁਜ੍ਜਤੀਤਿ ਏਤ੍ਥ ਲੁਜਧਾਤੁ ਵਿਨਾਸਤ੍ਥੋਤਿ ਆਹ ‘‘ਨ ਵਿਨਸ੍ਸਤੀ’’ਤਿ. ਪਰਿਸਙ੍ਖਤਨ੍ਤਿ ਪਰਿਸਙ੍ਖਰਿਤਬ੍ਬਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਹਿਤੇਸੁ. ਇਮਿਨਾਵ ਕਪ੍ਪਿਯਵਚਨੇਨਾਤਿ ਇਮਿਨਾ ਏਵ ਕਪ੍ਪਿਯੇਨ ਤਿਵਾਕ੍ਯਸਙ੍ਖਾਤੇਨ ਵਚਨੇਨ. ਏਤੇਸਨ੍ਤਿ ਏਤੇਸਂ ਤਿਣ੍ਣਂ ਵਾਕ੍ਯਾਨਂ. ਵੇਵਚਨੇਨਾਤਿ ‘‘ਯਞ੍ਞਞ੍ਚ ਯਜਿਤੁਂ, ਸੁਤ੍ਤਞ੍ਚ ਉਗ੍ਗਣ੍ਹਿਤੁਂ, ਸਮਣੇ ਚ ਦਸ੍ਸਿਤੁ’’ਨ੍ਤਿ ਪਰਿਯਾਯੇਨ. ਸਤ੍ਤਸੂਤਿ ਉਪਾਸਕ ਉਪਾਸਿਕ ਭਿਕ੍ਖੁਭਿਕ੍ਖੁਨੀ ਸਿਕ੍ਖਮਾਨ ਸਾਮਣੇਰ ਸਾਮਣੇਰੀ ਸਙ੍ਖਾਤਾਸੁ ਸਤ੍ਤਸੁ.

੧੧੦. ਪਞ੍ਚਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਕਥਾ

੧੯੩. ਪਗੇਵ ਪਹਿਤੇਤਿ ਇਮਿਨਾ ‘‘ਅਪਹਿਤੇਪਿ ਗਨ੍ਤਬ੍ਬ’’ਨ੍ਤਿ ਏਤ੍ਥ ਪਿਸਦ੍ਦਸ੍ਸ ਸਮ੍ਭਾਵਨਤ੍ਥਂ ਦਸ੍ਸੇਤਿ. ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਸਨ੍ਤਿਕਂ ਗਨ੍ਤਬ੍ਬਭਾਵਸ੍ਸ ਕਾਰਣਂ ਵਿਭਜਿਤ੍ਵਾ ਦਸ੍ਸੇਨ੍ਤੋ ਆਹ ‘‘ਭਿਕ੍ਖੁ ਗਿਲਾਨੋ ਹੋਤੀ’’ਤਿਆਦਿ. ਦਸਹੀਤਿ ‘‘ਸਙ੍ਘੋ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਕਤਂ ਵਾ ਸਙ੍ਘੇਨ ਕਮ੍ਮਂ ਹੋਤੀ’’ਤਿ ਇਦਂ ਅਙ੍ਗਂ ਏਕਂ ਕਤ੍ਵਾ ਦਸਹਿ. ਨਵਹੀਤਿ ਪਰਿਵਾਸਾਰਹਂ ਅਪਨੇਤ੍ਵਾ ਨਵਹਿ. ਚਤੂਹੀਤਿ ਗਿਲਾਨਅਨਭਿਰਤਿਕੁਕ੍ਕੁਚ੍ਚਦਿਟ੍ਠਿਗਤਉਪ੍ਪਨ੍ਨਸਙ੍ਖਾਤੇਹਿ ਚਤੂਹਿ. ਇਤਿ ਇਮੇਹਿ ਛਹੀਤਿ ਯੋਜਨਾ. ਸਾਮਣੇਰਸ੍ਸਪਿ ਛਹੀਤਿ ਏਤ੍ਥ ਛਨ੍ਨਂ ਸਰੂਪਂ ਵਿਤ੍ਥਾਰੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਆਦਿਤੋ’’ਤਿਆਦਿ. ਤਂ ਸੁਵਿਞ੍ਞੇਯ੍ਯਮੇਵ. ਸਾਮਣੇਰਿਯਾ ਸਨ੍ਤਿਕਂ ਪਞ੍ਚਹਿ ਗਨ੍ਤਬ੍ਬਨ੍ਤਿ ਯੋਜਨਾ. ਪਰਤੋਤਿ ਪਰਸ੍ਮਾ, ਪਰਸ੍ਮਿਂ ਵਾ. ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯੇ ਞਾਤਕਾ ਵਾ ਯੇ ਅਞ੍ਞਾਤਕਾ ਵਾ ਅਤ੍ਥਿ, ਤੇਸਮ੍ਪੀਤਿ ਯੋਜਨਾ. ਤਨ੍ਤਿ ਵਚਨਂ.

੧੧੨. ਪਹਿਤੇਯੇਵਅਨੁਜਾਨਨਕਥਾ

੧੯੯. ਭਿਕ੍ਖੁਗਤਿਕੋਤਿ ਭਿਕ੍ਖੁ ਏਵ ਗਤਿ ਪਤਿਟ੍ਠਾ ਏਤਸ੍ਸਾਤਿ ਭਿਕ੍ਖੁਗਤਿਕੋਤਿ ਵੁਤ੍ਤੇ ਭਿਕ੍ਖੁਨਿਸ੍ਸਿਤਕੋ ਪੁਰਿਸੋਤਿ ਆਹ ‘‘ਭਿਕ੍ਖੂਹਿ ਸਦ੍ਧਿਂ ਵਸਨਕਪੁਰਿਸੋ’’ਤਿ. ਪਲੁਜ੍ਜਤੀਤਿ ਵਿਨਸ੍ਸਤਿ. ਭਣ੍ਡਂ ਛੇਦਾਪਿਤਨ੍ਤਿ ਏਤ੍ਥ ਭਣ੍ਡਸਦ੍ਦੋ ਪਰਿਕ੍ਖਾਰਤ੍ਥੋ ਏਵ, ਨ ਮੂਲਧਨਤ੍ਥੋਤਿ ਆਹ ‘‘ਦਬ੍ਬਸਮ੍ਭਾਰਭਣ੍ਡ’’ਨ੍ਤਿ. ਛੇਦਾਪਿਤਨ੍ਤਿ ਚੁਰਾਦਿਗਣਿਕਧਾਤੁਂ ‘‘ਛਿਨ੍ਦਾਪਿਤ’’ਨ੍ਤਿ ਰੁਧਾਦਿਗਣਿਕਧਾਤੁਯਾ ਵਣ੍ਣੇਤਿ. ਦਜ੍ਜਾਹਨ੍ਤਿ ਏਕਾਰਲੋਪਸਨ੍ਧੀਤਿ ਆਹ ‘‘ਦਜ੍ਜੇ ਅਹ’’ਨ੍ਤਿ. ‘‘ਦਜ੍ਜੇਹ’’ਨ੍ਤਿਪਿ ਪਾਠੋ. ਏਵਞ੍ਹਿ ਸਤਿ ਅਕਾਰਲੋਪਸਨ੍ਧਿ. ਦਜ੍ਜੇਤਿ ਦਦੇਯ੍ਯਂ, ਦਦਾਮਿ ਵਾ. ਸਙ੍ਘਕਰਣੀਯੇਨਾਤਿ ਸਙ੍ਘਸ੍ਸ ਕਾਤਬ੍ਬੇਨ ਕਿਚ੍ਚੇਨ. ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਂਕਿਞ੍ਚੀ’’ਤਿਆਦਿ. ਤਤ੍ਥ ਯਂਕਿਞ੍ਚਿ ਕਾਤਬ੍ਬਨ੍ਤਿ ਯੋਜਨਾ. ਚੇਤਿਯਛਤ੍ਤਵੇਦਿਕਾਦੀਸੂਤਿ ਚੇਤਿਯਸ੍ਸ ਛਤ੍ਤੇ ਚ ਵੇਦਿਕਾਯ ਚ. ਆਦਿਸਦ੍ਦੇਨ ਸੁਧਾਲਿਮ੍ਪਾਦਯੋ ਸਙ੍ਗਣ੍ਹਾਤਿ. ਤਸ੍ਸਾਤਿ ਸਙ੍ਘਕਰਣੀਯਸ੍ਸ. ਨਿਪ੍ਫਾਦਨਤ੍ਥਂ ਗਨ੍ਤਬ੍ਬਨ੍ਤਿ ਸਮ੍ਬਨ੍ਧੋ.

ਏਤ੍ਥਾਤਿ ਵਸ੍ਸੂਪਨਾਯਿਕਕ੍ਖਨ੍ਧਕੇ. ‘‘ਅਨਿਮਨ੍ਤਿਤੇਨਾ’’ਤਿ ਪਦਂ ‘‘ਗਨ੍ਤੁ’’ਨ੍ਤਿ ਪਦੇ ਭਾਵਕਤ੍ਤਾ. ਗਨ੍ਤੁਨ੍ਤਿ ਗਮਿਤੁਂ, ਗਮਨਂ ਵਾ ‘‘ਨ ਵਟ੍ਟਤੀ’’ਤਿ ਪਦੇ ਕਤ੍ਤਾ. ਪਠਮਂਯੇਵਾਤਿ ਧਮ੍ਮਸ੍ਸਵਨਤੋ ਪਠਮਮੇਵ. ਸਨ੍ਨਿਪਤਿਤਬ੍ਬਂ ਇਤਿ ਕਤਿਕਾ ਕਤਾ ਹੋਤੀਤਿ ਯੋਜਨਾ. ਭਣ੍ਡਕਨ੍ਤਿ ਚੀਵਰਾਦਿਭਣ੍ਡਕਂ. ਗਨ੍ਤੁਂ ਨ ਵਟ੍ਟਤੀਤਿ ਸਯਮੇਵ ਗਨ੍ਤੁਂ ਨ ਵਟ੍ਟਤੀਤਿ ਅਤ੍ਥੋ ਦਟ੍ਠਬ੍ਬੋ. ਤੇਨ ਵੁਤ੍ਤਂ ‘‘ਸਚੇ ਪਨਾ’’ਤਿਆਦਿ. ਤਤ੍ਥਾਤਿ ਤਂ ਵਿਹਾਰਂ. ‘‘ਵਟ੍ਟਤੀ’’ਤਿ ਇਮਿਨਾ ਵਸ੍ਸਚ੍ਛੇਦੋ ਚ ਆਪਤ੍ਤਿ ਚ ਨ ਹੋਤੀਤਿ ਦਸ੍ਸੇਤਿ. ਅਤ੍ਥਾਯਪੀਤਿ ਪਿਸਦ੍ਦੇਨ ‘‘ਭਣ੍ਡਕਂ ਧੋਵਿਸ੍ਸਾਮੀ’’ਤਿ ਅਤ੍ਥਂ ਅਪੇਕ੍ਖਤਿ. ਨਨ੍ਤਿ ਅਨ੍ਤੇਵਾਸਿਕਂ. ਵਟ੍ਟਤੀਤਿ ਆਚਰਿਯਸ੍ਸ ਆਣਾਯ ਸਤ੍ਤਾਹੇ ਅਨਤਿਕ੍ਕਨ੍ਤੇ ਵਟ੍ਟਤਿ, ਵਸ੍ਸਚ੍ਛੇਦੋ ਚ ਆਪਤ੍ਤਿ ਚ ਨ ਹੋਤਿ. ਸਤ੍ਤਾਹੇ ਅਤਿਕ੍ਕਨ੍ਤੇ ਵਸ੍ਸਚ੍ਛੇਦੋਵ ਹੋਤਿ, ਨ ਆਪਤ੍ਤੀਤਿ ਅਧਿਪ੍ਪਾਯੋ.

੧੧੩. ਅਨ੍ਤਰਾਯੇ ਅਨਾਪਤ੍ਤਿਵਸ੍ਸਚ੍ਛੇਦਕਥਾ

੨੦੧. ਅਵਿਦੂਰੇਤਿ ਆਸਨ੍ਨੇ. ਤਤ੍ਥਾਤਿ ਗਾਮੇ. ਸਤ੍ਤਾਹਵਾਰੇਨਾਤਿ ਸਤ੍ਤਾਹੇ ਏਕਵਾਰੇਨ. ਅਰੁਣੋ ਉਟ੍ਠਾਪੇਤਬ੍ਬੋਤਿ ਵਿਹਾਰੇ ਅਰੁਣੋ ਉਟ੍ਠਾਪੇਤਬ੍ਬੋ. ਤਤ੍ਰੇਵਾਤਿ ਗਾਮੇਯੇਵ. ਮਯਨ੍ਤਿ ਭਿਕ੍ਖੂ ਸਨ੍ਧਾਯ ਵੁਤ੍ਤਂ. ਪੁਨ ਮਯਨ੍ਤਿ ਮਨੁਸ੍ਸੇ ਸਨ੍ਧਾਯ ਵੁਤ੍ਤਂ. ਤੇਸਂਯੇਵਾਤਿ ਵਸ੍ਸਚ੍ਛੇਦਭਿਕ੍ਖੂਨਂ ਏਵ. ਤਨ੍ਤਿ ਸਲਾਕਭਤ੍ਤਾਦਿਂ. ਵਸ੍ਸਗ੍ਗੇਨਾਤਿ ਵਸ੍ਸਗਣਨਾਯ.

ਵਸ੍ਸਾਵਾਸਿਕਨ੍ਤਿ ਵਸ੍ਸਾਵਾਸਾਨਂ ਦਾਤਬ੍ਬਂ ਚੀਵਰਂ. ਤਤ੍ਥਾਤਿ ਤਸ੍ਮਿਂ ਵਿਹਾਰੇ. ਯੇਸਂ ਪਾਪਿਤਨ੍ਤਿ ਸਮ੍ਬਨ੍ਧੋ. ਵਿਹਾਰੇਤਿ ਵੁਟ੍ਠਿਤਗਾਮਵਿਹਾਰੇ. ਉਪਨਿਕ੍ਖਿਤ੍ਤਕਂ ਭਣ੍ਡਨ੍ਤਿ ਸਮ੍ਬਨ੍ਧੋ. ਇਧਾਤਿ ਭਿਕ੍ਖੁਨੋ ਨਿਵਾਸਟ੍ਠਾਨੇ. ਯਂ ਚੀਵਰਾਦਿਵੇਭਙ੍ਗਿਯਭਣ੍ਡਂ ਅਤ੍ਥਿ, ਤਨ੍ਤਿ ਯੋਜਨਾ. ਤਤ੍ਥੇਵਾਤਿ ਵੁਟ੍ਠਿਤਗਾਮਵਿਹਾਰੇ ਏਵ. ਇਤੋਤਿ ਖੇਤ੍ਤਵਤ੍ਥੁਆਦਿਤੋ. ਕਪ੍ਪਿਯਕਾਰਕਾਨਂ ਹਤ੍ਥੇਤਿ ਸਮ੍ਬਨ੍ਧੋ. ਤਤ੍ਰੁਪ੍ਪਾਦੇਪੀਤਿ ਤਸ੍ਸ ਵਿਹਾਰਸ੍ਸ ਦਿਨ੍ਨਖੇਤ੍ਤਵਤ੍ਥੁਆਦਿਤੋ ਉਪ੍ਪਾਦੇ ਪਚ੍ਚਯੇਪਿ. ‘‘ਤਤ੍ਥੇਵ ਗਨ੍ਤ੍ਵਾ ਅਪਲੋਕੇਤ੍ਵਾ ਭਾਜੇਤਬ੍ਬ’’ਨ੍ਤਿ ਵਚਨਸ੍ਸ ਯੁਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਸਙ੍ਘਿਕਞ੍ਹੀ’’ਤਿਆਦਿ. ਅਨ੍ਤੋਵਿਹਾਰੇ ਵਾਤਿ ਅਨ੍ਤੋਸੀਮਾਯ ਵਾ. ਉਭਯਤ੍ਥਾਤਿ ਅਨ੍ਤੋਸੀਮਬਹਿਸੀਮ ਸਙ੍ਖਾਤੇਸੁ ਦ੍ਵੀਸੁ ਠਾਨੇਸੁ ਠਿਤਂ ਵੇਭਙ੍ਗਿਯਭਣ੍ਡਨ੍ਤਿ ਸਮ੍ਬਨ੍ਧੋ.

੧੧੪. ਸਙ੍ਘਭੇਦੇ ਅਨਾਪਤ੍ਤਿਵਸ੍ਸਚ੍ਛੇਦਕਥਾ

੨੦੨. ਭਿਨ੍ਨੋਤਿ ਏਤ੍ਥ ਤਪਚ੍ਚਯਸ੍ਸ ਅਤੀਤਤ੍ਥੇ ਅਯੁਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਭਿਨ੍ਨੇ ਸਙ੍ਘੇ ਕਰਣੀਯਂ ਨਤ੍ਥੀ’’ਤਿ. ਯੋ ਪਨਾਤਿ ਸਙ੍ਘੋ ਪਨ. ਇਦਂ ‘‘ਭਿਜ੍ਜਿਸ੍ਸਤੀ’’ਤਿਪਦੇ ਕਤ੍ਤਾ, ‘‘ਆਸਙ੍ਕਿਤੋ’’ਤਿਪਦੇ ਕਮ੍ਮਂ. ‘‘ਭਿਜ੍ਜਿਸ੍ਸਤੀ’’ਤਿ ਇਮਿਨਾ ਭਿਨ੍ਨੋਤਿ ਏਤ੍ਥ ਤਪਚ੍ਚਯਸ੍ਸ ਅਨਾਗਤਤ੍ਥੇ ਪਵਤ੍ਤਭਾਵਂ ਦਸ੍ਸੇਤਿ. ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋਤਿ ਏਤ੍ਥ ਕਿਂ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋਤਿ ਦਟ੍ਠਬ੍ਬੋਤਿ ਆਹ ‘‘ਨ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋਤਿ ਦਟ੍ਠਬ੍ਬੋ’’ਤਿ. ਏਤਨ੍ਤਿ ਭਿਕ੍ਖੁਨੀਹਿ ਅਭਿਨ੍ਨਭਾਵਂ. ਏਤਾ ਪਨਾਤਿ ਭਿਕ੍ਖੁਨਿਯੋ ਪਨ. ਤਨ੍ਤਿ ਸਙ੍ਘਂ. ਏਤਨ੍ਤਿ ‘‘ਸਮ੍ਬਹੁਲਾਹਿ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋ’’ਤਿ ਵਚਨਂ.

੧੧੫. ਵਜਾਦੀਸੁ ਵਸ੍ਸੂਪਗਮਨਕਥਾ

੨੦੩. ‘‘ਗੋਪਾਲਕਾਨਂ ਨਿਵਾਸਟ੍ਠਾਨ’’ਨ੍ਤਿ ਇਮਿਨਾ ਗੋਪਾਲਕਾ ਗਾਵੋ ਵਿਯ ਵਜੇ ਨਿਵਸਨ੍ਤੀਤਿ ਦਸ੍ਸੇਤਿ.

ਉਪਕਟ੍ਠਸਦ੍ਦੋ ਆਸਨ੍ਨਪਰਿਯਾਯੋਤਿ ਆਹ ‘‘ਆਸਨ੍ਨਾਯਾ’’ਤਿ. ਤਤ੍ਥਾਤਿ ਕੁਟਿਕਾਯਂ. ਇਧਾਤਿ ਇਮਿਸ੍ਸਂ ਕੁਟਿਕਾਯਂ. ਅਵਿਹਾਰਤ੍ਤਾ ‘‘ਇਧਾਤਿ’’ਸਾਮਞ੍ਞਵਸੇਨ ਵੁਤ੍ਤਂ. ਤਿਕ੍ਖਤ੍ਤੁਨ੍ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ. ਹੇਟ੍ਠਾ ਹਿ ‘‘ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ’’ਤਿ (ਮਹਾਵ. ਅਟ੍ਠ. ੧੮੪) ਵੁਤ੍ਤਤ੍ਤਾ ਸਕਿਮ੍ਪਿ ਵਟ੍ਟਤੀਤਿ ਦਟ੍ਠਬ੍ਬਂ. ਤਮ੍ਪੀਤਿ ਸਾਲਾਸਙ੍ਖੇਪੇਨ ਠਿਤਸਕਟਮ੍ਪਿ. ‘‘ਆਲਯੋ’’ਤਿ ਇਮਿਨਾ ‘‘ਇਧ ਵਸ੍ਸਂ ਉਪੇਮੀ’’ਤਿ ਵਚੀਭੇਦੋ ਨ ਕਾਤਬ੍ਬੋਤਿ ਦਸ੍ਸੇਤਿ. ਆਲਯੋਤਿ ਚ ਸਤ੍ਥੇ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤਸ੍ਸ ਅਲ੍ਲੀਯਨਂ. ਮਗ੍ਗਪਟਿਪਨ੍ਨੇਯੇਵ ਸਤ੍ਥੇਤਿ ਅਨਾਦਰੇ ਭੁਮ੍ਮਵਚਨਂ. ਤਤ੍ਥੇਵਾਤਿ ਸਤ੍ਥੇਯੇਵ. ਸਤ੍ਥੋ ਅਤਿਕ੍ਕਮਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਪਤ੍ਥਿਤਟ੍ਠਾਨੇ. ਵਿਪ੍ਪਕਿਰਤੀਤਿ ਵਿਸੁਂ ਵਿਸੁਂ ਗਚ੍ਛਤਿ. ਸਚੇ ਅਗਾਮਕੇ ਠਾਨੇ ਵਿਪ੍ਪਕਿਰਤਿ, ਪੁਰਿਮਂ ਗਾਮਂ ਸਨ੍ਨਿਵਤ੍ਤਿਤਬ੍ਬਂ. ਨ ਅਞ੍ਞਗਾਮਂ ਗਨ੍ਤਬ੍ਬਂ. ਤਤੋਤਿ ਗਾਮਤੋ.

ਉਪਗਨ੍ਤਬ੍ਬਨ੍ਤਿ ‘‘ਇਧ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਤ੍ਵਾ ਉਪਗਨ੍ਤਬ੍ਬਂ. ਤਤ੍ਥੇਵਾਤਿ ਸਮੁਦ੍ਦੇਯੇਵ. ਕੂਲਨ੍ਤਿ ਤੀਰਂ. ਤਞ੍ਹਿ ਕੁਲਤਿ ਉਦਕਂ ਆਵਰਤੀਤਿ ਕੂਲਨ੍ਤਿ ਵੁਚ੍ਚਤਿ. ਅਯਞ੍ਚਾਤਿ ਨਾਵਾਯਂ ਵਸ੍ਸੂਪਗਮਨਭਿਕ੍ਖੁ. ਅਨੁਤੀਰਮੇਵਾਤਿ ਅਨੁਕ੍ਕਮੇਨ, ਅਨੁਸਾਰੇਨ ਵਾ ਤੀਰਮੇਵ. ਅਞ੍ਞਤ੍ਥਾਤਿ ਪਠਮਲਦ੍ਧਗਾਮਤੋ ਅਞ੍ਞਸ੍ਮਿਂ ਠਾਨੇ. ਤਤ੍ਥੇਵਾਤਿ ਪਠਮਲਦ੍ਧਗਾਮੇਯੇਵ.

ਇਤੀਤਿਆਦਿ ਨਿਗਮਨਂ. ਪਵਾਰੇਤੁਞ੍ਚ ਲਭਤੀਤਿ ਏਤ੍ਥ ਚਸਦ੍ਦੋ ਵਾਕ੍ਯਸਮ੍ਪਿਣ੍ਡਨਤ੍ਥੋ. ਪੁਰਿਮੇਸੁ ਚ ਪਨਾਤਿ ਏਤ੍ਥ ਚਸਦ੍ਦੋ ਬ੍ਯਤਿਰੇਕਤ੍ਥੋ, ਪਨਸਦ੍ਦੋ ਵਿਸੇਸਤ੍ਥਜੋਤਕੋ. ਅਨਾਪਤ੍ਤਿ ਹੋਤੀਤਿ ਅਨਾਪਤ੍ਤਿਮਤ੍ਤਮੇਵ ਹੋਤਿ.

੧੧੬. ਵਸ੍ਸਂ ਅਨੁਪਗਨ੍ਤਬ੍ਬਟ੍ਠਾਨਕਥਾ

੨੦੪. ਰੁਕ੍ਖਸੁਸੀਰੇਯੇਵਾਤਿ ਰੁਕ੍ਖਸ੍ਸ ਵਿਵਰੇ ਏਵ. ਵਿਵਰਞ੍ਹਿ ਸੁ ਸਂ ਇਰਤਿ ਗਚ੍ਛਤੀਤਿ ਸੁਸੀਰੋਤਿ ਵੁਚ੍ਚਤਿ. ਪਦਰਚ੍ਛਦਨਨ੍ਤਿ ਫਲਕੇਹਿ ਛਾਦਿਤਂ. ਪਵਿਸਨਦ੍ਵਾਰਨ੍ਤਿ ਪਵਿਸਨਨਿਕ੍ਖਮਨਦ੍ਵਾਰਂ. ਪਵਿਸਨਞ੍ਚ ਨਿਕ੍ਖਮਨਞ੍ਚ ਪਵਿਸਨਨ੍ਤਿ ਵਿਰੂਪੇਕਸੇਸੇਨ ਕਾਤਬ੍ਬਂ. ਖਾਣੁਮਤ੍ਥਕੇਤਿ ਖਾਣੁਨੋ ਉਪਰਿ. ਵਿਟਭੀਤਿ ਵਿਟਂ ਅਞ੍ਞਮਞ੍ਞਵੇਧਨਂ ਅਪਤਿ ਗਚ੍ਛਤੀਤਿ ਵਿਟਪੋ, ਪਕਾਰਸ੍ਸ ਭਕਾਰਂ, ਇਤ੍ਥਿਲਿਙ੍ਗਜੋਤਕਈਪਚ੍ਚਯਞ੍ਚ ਕਤ੍ਵਾ ਵਿਟਭੀਤਿ ਵੁਚ੍ਚਤਿ. ਤਤ੍ਥਾਤਿ ਅਟ੍ਟਕੇ. ਯਸ੍ਸਾਤਿ ਭਿਕ੍ਖੁਨੋ, ਨਤ੍ਥੀਤਿ ਸਮ੍ਬਨ੍ਧੋ. ਪਞ੍ਚਨ੍ਨਂ ਛਦਨਾਨਨ੍ਤਿ ਤਿਣਪਣ੍ਣਇਟ੍ਠਕਾਸਿਲਾਸੁਧਾਸਙ੍ਖਾਤਾਨਂ (ਚੂਲ਼ਵ. ੩੦੩) ਪਞ੍ਚਨ੍ਨਂ ਛਦਨਾਨਂ. ਇਦਞ੍ਚ ਯੇਭੁਯ੍ਯਵਸੇਨ ਵੁਤ੍ਤਂ ਪਦਰਚ੍ਛਦਨਾਦੀਨਮ੍ਪਿ ਗਹਿਤਤ੍ਤਾ. ਦ੍ਵਾਰਬਨ੍ਧਨਨ੍ਤਿ ਦ੍ਵਾਰੇਨ ਬਨ੍ਧਿਤਬ੍ਬਂ. ਛਵਕੁਟਿਕਾਤਿ ਛਵਾਨਂ ਸਯਨਟ੍ਠਾਨੇ ਸੁਸਾਨੇ ਕਤਾ ਕੁਟਿਕਾ ਛਵਕੁਟਿਕਾਤਿ ਵੁਚ੍ਚਤਿ. ਟਙ੍ਕਿਤਮਞ੍ਚਾਦੀਤਿਆਦਿਸਦ੍ਦੇਨ ਟਙ੍ਕਿਤਪੀਠਂ ਸਙ੍ਗਣ੍ਹਾਤਿ. ਤਤ੍ਥਾਤਿ ਛਵਕੁਟਿਯਂ. ਅਞ੍ਞਂ ਕੁਟਿਕਨ੍ਤਿ ਛਵਕੁਟਿਤੋ ਅਞ੍ਞਂ ਕੁਟਿਕਂ. ਆਵਰਣਨ੍ਤਿ ਭਿਤ੍ਤਿਂ. ਦ੍ਵਾਰਨ੍ਤਿ ਪਵਿਸਨਨਿਕ੍ਖਮਨਦ੍ਵਾਰਂ. ਛਤ੍ਤਕੁਟਿਕਾ ਨਾਮੇਸਾਤਿ ਏਸਾ ਛਤ੍ਤੇਨ ਕਤਾ ਕੁਟਿਕਾ ਨਾਮ. ਮਹਨ੍ਤੇਨ ਕਪਲ੍ਲੇਨ ਕੁਟਿਕਂ ਕਤ੍ਵਾਤਿ ਸਮ੍ਬਨ੍ਧੋ.

੧੧੭. ਅਧਮ੍ਮਿਕਕਤਿਕਾਕਥਾ

੨੦੫. ਅਞ੍ਞਾਪੀਤਿ ‘‘ਅਨ੍ਤਰਾਵਸ੍ਸਂ ਨ ਪਬ੍ਬਾਜੇਤਬ੍ਬ’’ਨ੍ਤਿ ਕਤਿਕਾਯ ਅਞ੍ਞਾਪਿ. ਕਤਿਕਾ ਹੋਤੀਤਿ ਸਮ੍ਬਨ੍ਧੋ. ਤਸ੍ਸਾਤਿ ਅਧਮ੍ਮਿਕਕਤਿਕਾਯ. ਵੁਤ੍ਤਨ੍ਤਿ ਚਤੁਤ੍ਥਪਾਰਾਜਿਕਵਣ੍ਣਨਾਯਂ (ਪਾਰਾ. ਅਟ੍ਠ. ੨.੨੨੬) ਵੁਤ੍ਤਂ.

੧੧੮. ਪਟਿਸ੍ਸਵਦੁਕ੍ਕਟਾਪਤ੍ਤਿਕਥਾ

੨੦੭. ਪਟਿਸ੍ਸਵੇ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਕਿਂ ਵਸ੍ਸਾਵਾਸਪਟਿਸ੍ਸੁਤੇਯੇਵ ਦੁਕ੍ਕਟਾਪਤ੍ਤਿ ਹੋਤੀਤਿ ਆਹ ‘‘ਨ ਕੇਵਲ’’ਨ੍ਤਿਆਦਿ. ਏਤਸ੍ਸੇਵਾਤਿ ਵਸ੍ਸਾਵਾਸਸ੍ਸੇਵ. ਏਵਮਾਦਿਨਾਪੀਤਿ ਪਿਸਦ੍ਦੋ ‘‘ਪਟਿਸ੍ਸਵੇ’’ਤਿ ਏਤ੍ਥ ਯੋਜੇਤਬ੍ਬੋ. ‘‘ਪਟਿਸ੍ਸਵੇਪੀ’’ਤਿ ਹਿ ਅਤ੍ਥੋ. ਤਸ੍ਸ ਤਸ੍ਸਾਤਿ ਕਮ੍ਮਸ੍ਸ. ਤਞ੍ਚ ਖੋਤਿ ਤਞ੍ਚ ਦੁਕ੍ਕਟਂ ਵਿਸਂਵਾਦਨਪਚ੍ਚਯਾ ਹੋਤੀਤਿ ਯੋਜਨਾ. ਪਠਮਮ੍ਪੀਤਿ ਪਿਸਦ੍ਦੋ ‘‘ਪਚ੍ਛਾਪੀ’’ਤਿ ਪਦਂ ਸਮ੍ਪਿਣ੍ਡੇਤਿ. ਪਠਮਮ੍ਪਿ ਹਿ ਪਾਚਿਤ੍ਤਿਯਂ, ਪਚ੍ਛਾਪਿ ਦੁਕ੍ਕਟਨ੍ਤਿ ਅਤ੍ਥੋ.

ਸੋ ਤਦਹੇਵ ਅਕਰਣੀਯੋਤਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਪੁਰਿਮਿਕਾ ਚ ਨ ਪਞ੍ਞਾਯਤੀਤਿ ਏਤ੍ਥ ਪੁਰੇ ਭਵਾ ਪੁਰਿਮਾ, ਸਾ ਏਵ ਪੁਰਿਮਿਕਾ, ਪਾਟਿਪਦਤਿਥੀ. ਨਾਨਾਸੀਮਾਯ ਦ੍ਵੀਸੁ ਆਵਾਸੇਸੁ ਵਸ੍ਸਂ ਉਪਗਚ੍ਛਨ੍ਤਸ੍ਸ ਦੁਤਿਯੇ ‘‘ਵਸਿਸ੍ਸਾਮੀ’’ਤਿ ਪਠਮਾਵਾਸਸ੍ਸ ਉਪਚਾਰਤੋ ਨਿਕ੍ਖਨ੍ਤਮਤ੍ਤੇ ਪਠਮਸੇਨਾਸਨਗ੍ਗਾਹਸ੍ਸ ਪਸ੍ਸਮ੍ਭਨਂ ਸਨ੍ਧਾਯ ਵੁਤ੍ਤਂ ‘‘ਪੁਰਿਮਿਕਾ ਚ ਨ ਪਞ੍ਞਾਯਤੀ’’ਤਿ. ਅਰੁਣਂ ਅਨੁਟ੍ਠਾਪੇਤ੍ਵਾਤਿ ਵਸ੍ਸਂ ਉਪਗਮਨਵਿਹਾਰੇ ਅਰੁਣਂ ਅਨੁਟ੍ਠਾਪੇਤ੍ਵਾ. ਤਦਹੇਵਾਤਿ ਤਸ੍ਮਿਂ ਵਸ੍ਸੂਪਗਮਨਅਹਨਿ ਏਵ, ਪਕ੍ਕਨ੍ਤਸ੍ਸਾਪੀਤਿ ਸਮ੍ਬਨ੍ਧੋ. ਪਿਸਦ੍ਦਸ੍ਸ ਗਰਹਤ੍ਥਂ ਦਸ੍ਸੇਨ੍ਤੋ ਆਹ ‘‘ਕੋ ਪਨ ਵਾਦੋ’’ਤਿਆਦਿ. ਆਲਯੋਤਿ ਚਿਤ੍ਤਸ੍ਸ ਅਲ੍ਲੀਯਨਂ. ਅਸਤਿਯਾਤਿ ਸਤਿਪਮੁਟ੍ਠੇਨ. ਵਸ੍ਸਂ ਨ ਉਪੇਤੀਤਿ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ (ਮਹਾਵ. ਅਟ੍ਠ. ੧੮੪) ਵਚੀਭੇਦਂ ਕਤ੍ਵਾ ਵਸ੍ਸਂ ਨ ਉਪੇਤਿ.

ਸਤ੍ਤਾਹਨ੍ਤਿ ਸਤ੍ਤਾਹੇਨ, ਅਨਾਗਤਾਯਾਤਿ ਸਮ੍ਬਨ੍ਧੋ. ਨਵਮਿਤੋਤਿ ਪੁਬ੍ਬਕਤ੍ਤਿਕਮਾਸਸ੍ਸ ਜੁਣ੍ਹਪਕ੍ਖਨਵਮਿਤੋ, ਪਚ੍ਛਿਮਕਤ੍ਤਿਕਮਾਸਸ੍ਸ ਜੁਣ੍ਹਪਕ੍ਖਨਵਮਿਤੋ ਵਾ. ਮਾ ਵਾ ਆਗਚ੍ਛਤੁ, ਅਨਾਪਤ੍ਤੀਤਿ ਵਸ੍ਸਂਵੁਤ੍ਥਤ੍ਤਾ ਮਾ ਵਾ ਆਗਚ੍ਛਤੁ, ਅਨਾਪਤ੍ਤੀਤਿ ਅਤ੍ਥੋ.

ਇਤਿ ਵਸ੍ਸੂਪਨਾਯਿਕਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.