੪. ਪਵਾਰਣਾਕ੍ਖਨ੍ਧਕਂ

੧੨੦. ਅਫਾਸੁਕਵਿਹਾਰਕਥਾ

੨੦੯. ਪਵਾਰਣਾਕ੍ਖਨ੍ਧਕੇ ਅਲ੍ਲਾਪੋਤਿ ਏਤ੍ਥ ਆਤ੍ਯੂਪਸਗ੍ਗਸ੍ਸ ਆਦਿਕਮ੍ਮਤ੍ਥਂ, ਲਪਧਾਤੁਯਾ ਚ ਕਥਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਠਮਵਚਨ’’ਨ੍ਤਿ. ਆਦਿਤੋ, ਆਦਿਮ੍ਹਿ ਵਾ ਲਪਨਂ ਕਥਨਂ, ਲਪਤਿ ਅਨੇਨਾਤਿ ਵਾ ਅਲ੍ਲਾਪੋ ਸਂਯੋਗੇ ਪਰੇ ਰਸ੍ਸੋ. ਸਂ ਪੁਨ ਲਪਨਂ, ਲਪਤਿ ਵਾ ਅਨੇਨਾਤਿ ਸਲ੍ਲਾਪੋ. ਹਤ੍ਥਵਿਲਙ੍ਘਕੇਨਾਤਿ ਏਤ੍ਥ ਵਿਪੁਬ੍ਬੋ ਲਘਿਧਾਤੁ ਉਕ੍ਖਿਪਨਤ੍ਥੋਤਿ ਆਹ ‘‘ਹਤ੍ਥੁਕ੍ਖੇਪਕੇਨਾ’’ਤਿ. ਪਸੁਸਂਵਾਸਨ੍ਤਿ ਏਤ੍ਥ ਪਸੂਤਿ ਸਬ੍ਬਚਤੁਪ੍ਪਦਾ. ਤੇ ਹਿ ਅਞ੍ਞਮਞ੍ਞਂ ਪਸਨ੍ਤਿ ਬਾਧਨ੍ਤਿ, ਮਨੁਸ੍ਸਾਦੀਹਿ ਵਾ ਪਸੀਯਨ੍ਤਿ ਬਾਧੀਯਨ੍ਤੀਤਿ ਪਸਵੋਤਿ ਵੁਚ੍ਚਨ੍ਤਿ. ਪਸੂਨਂ ਵਿਯ ਸਂਵਾਸਨ੍ਤਿ ਪਸੂਨਂ ਸਂਵਾਸੋ ਵਿਯ ਸਂਵਾਸੋਤਿ ਪਸੁਸਂਵਾਸੋ, ਤਂ ਪਸੁਸਂਵਾਸਂ. ਤਮਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਪਸਵੋਪਿ ਹੀ’’ਤਿਆਦਿ. ਤਥਾਤਿ ਯਥਾ ਨ ਕਰੋਨ੍ਤਿ, ਤਥਾਤਿ ਅਤ੍ਥੋ. ਏਤੇਪੀਤਿ ਭਿਕ੍ਖਵੋਪਿ. ਤਸ੍ਮਾਤਿ ਯਸ੍ਮਾ ਅਕਂਸੁ, ਤਸ੍ਮਾ. ਨੇਸਨ੍ਤਿ ਭਿਕ੍ਖੂਨਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਏਲ਼ਕਸਂਵਾਸਸਪਤ੍ਤਸਂਵਾਸੇਸੁ. ਮੂਗਬ੍ਬਤਨ੍ਤਿ ਮੂਗਸ੍ਸ ਵਤਂ ਵਿਯ ਵਤਨ੍ਤਿ ਮੂਗਬ੍ਬਤਂ, ਸੁਞ੍ਞਵਚਨਵਤਨ੍ਤਿ ਅਤ੍ਥੋ. ਤਿਤ੍ਥਿਯਸਮਾਦਾਨਨ੍ਤਿ ਤਿਤ੍ਥਿਯੇਹਿ ਸਮਾਦਾਤਬ੍ਬਂ. ਵਤਸਮਾਦਾਨਨ੍ਤਿ ਸਮਾਦਾਤਬ੍ਬਂ ਵਤਂ. ਅਞ੍ਞਮਞ੍ਞਾਨੁਲੋਮਤਾਤਿ ਏਤ੍ਥ ਤਾਸਦ੍ਦਸ੍ਸ ਭਾਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨੁਲੋਮਭਾਵੋ’’ਤਿ. ਇਮਿਨਾ ‘‘ਦੇਵਤਾ’’ਤਿਆਦੀਸੁ (ਸਂ. ਨਿ. ਅਟ੍ਠ. ੧.੧.੧; ਖੁ. ਪਾ. ਅਟ੍ਠ. ੫.ਏਵਮਿਚ੍ਚਾਦਿਪਾਠਵਣ੍ਣਨਾ; ਸੁ. ਨਿ. ਅਟ੍ਠ. ੨.ਅਙ੍ਗਲਸੁਤ੍ਤਵਣ੍ਣਨਾ) ਵਿਯ ਤਾਪਚ੍ਚਯਸ੍ਸ ਸ੍ਵਤ੍ਥਂ ‘‘ਜਨਤਾ’’ਤਿਆਦੀਸੁ (ਪੇ. ਵ. ਅਟ੍ਠ. ੪੬੦) ਵਿਯ ਸਮੂਹਤ੍ਥਞ੍ਚ ਨਿਵਤ੍ਤੇਤਿ. ‘‘ਅਞ੍ਞਮਞ੍ਞਂ ਵਤ੍ਤੁ’’ਨ੍ਤਿ ਵਚਨਸ੍ਸ ਯੁਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਵਦਨ੍ਤੁ ਮ’’ਨ੍ਤਿਆਦਿ. ਵਦਨ੍ਤਂ ਭਿਕ੍ਖੁਂ ਵਤ੍ਤੁਨ੍ਤਿ ਯੋਜਨਾ. ‘‘ਆਪਤ੍ਤੀਹਿ ਵੁਟ੍ਠਾਨਭਾਵੋ’’ਤਿ ਇਮਿਨਾ ਆਪਤ੍ਤਿਵੁਟ੍ਠਾਨਤਾਤਿ ਪਦਸ੍ਸ ਪਞ੍ਚਮੀਸਮਾਸਞ੍ਚ ਤਾਪਚ੍ਚਯਸ੍ਸ ਭਾਵਤ੍ਥਞ੍ਚ ਦਸ੍ਸੇਤਿ. ‘‘ਵਿਨਯ’’ਨ੍ਤਿਆਦਿਨਾ ਪੁਰਤੋ ਕਤ੍ਵਾ ਕਰਣਂ ਪੁਰੇਕ੍ਖਾਰੋ, ਤਸ੍ਸ ਭਾਵੋ ਪੁਰੇਕ੍ਖਾਰਤਾ, ਵਿਨਯਂ ਪੁਰੇਕ੍ਖਾਰਤਾ ਵਿਨਯਪੁਰੇਕ੍ਖਾਰਤਾਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਪੁਰਸਦ੍ਦਸ੍ਸ ਏਕਾਰਤ੍ਤਂ ਸਦ੍ਦਸਤ੍ਥੇਸੁ (ਮੋਗ੍ਗਲ੍ਲਾਨਬ੍ਯਾਕਰਣੇ ੫.੧੩੪ ਸੁਤ੍ਤੇ) ਵਦਨ੍ਤਿ. ਤਸ੍ਸ ਯੁਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਵਦਨ੍ਤੁਮ’’ਨ੍ਤਿਆਦਿ (ਮੋਗ੍ਗਲ੍ਲਾਨਬ੍ਯਾਕਰਣੇ ੫.੧੩੪ ਸੁਤ੍ਤੇ).

੨੧੦. ਸਬ੍ਬਸਙ੍ਗਾਹਿਕਾਤਿ ‘‘ਸਙ੍ਘੋ ਪਵਾਰੇਯ੍ਯਾ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਸਬ੍ਬੇਸਂ ਤੇਵਾਚਿਕਾਦੀਨਂ ਸਙ੍ਗਾਹਕਾ. ਞਤ੍ਤੀਤਿ ਞਾਪੇਤਿ ਸਙ੍ਘਂ ਏਤਾਯ ਵਚਨਾਯਾਤਿ ਞਤ੍ਤਿ. ਸਬ੍ਬਸਙ੍ਗਾਹਿਕਭਾਵਂ ਵਿਤ੍ਥਾਰੇਨ੍ਤੋ ਆਹ ‘‘ਏਵਞ੍ਹਿ ਵੁਤ੍ਤੇ’’ਤਿਆਦਿ. ਤੇਵਾਚਿਕਨ੍ਤਿ ਤਿਸ੍ਸੋ ਵਾਚਾ ਏਤਸ੍ਸਾਤਿ ਤੇਵਾਚਿਕਂ, ਤੀਹਿ ਵਾਚਾਹਿ ਕਤ੍ਤਬ੍ਬਨ੍ਤਿ ਵਾ ਤੇਵਾਚਿਕਂ. ਏਸੇਵ ਨਯੋ ਸੇਸੇਸੁਪਿ. ਸਮਾਨਵਸ੍ਸਿਕਨ੍ਤਿ ਸਮਾਨਂ ਵਸ੍ਸਂ ਏਤੇਸਨ੍ਤਿ ਸਮਾਨਵਸ੍ਸਾ, ਤੇਹਿ ਕਤ੍ਤਬ੍ਬਨ੍ਤਿ ਸਮਾਨਵਸ੍ਸਿਕਂ. ਅਞ੍ਞਨ੍ਤਿ ਦ੍ਵੇਵਾਚਿਕਏਕਵਾਚਿਕਂ.

੨੧੧. ਅਚ੍ਛਨ੍ਤੀਤਿ ਏਤ੍ਥ ਆਸਧਾਤੁਯਾ ਉਪਵੇਸਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਨਿਸਿਨ੍ਨਾਵ ਹੋਨ੍ਤੀ’’ਤਿ. ‘‘ਨ ਉਟ੍ਠਹਨ੍ਤੀ’’ਤਿ ਇਮਿਨਾ ਏਵਫਲਂ ਦਸ੍ਸੇਤਿ. ਤਦਮਨ੍ਤਰਾਤਿ ਏਤ੍ਥ ‘‘ਤਦਨ੍ਤਰਾ’’ਤਿ ਵਤ੍ਤਬ੍ਬੇ ਵਾਚਾਸਿਲਿਟ੍ਠਵਸੇਨ ਮਕਾਰਾਗਮਂ ਕਤ੍ਵਾ ਵੁਤ੍ਤਨ੍ਤਿ ਆਹ ‘‘ਤਦਨ੍ਤਰਾ’’ਤਿ. ਤਸ੍ਸ ਅਤ੍ਤਨੋ ਪਵਾਰਿਤਕਾਲਸ੍ਸ ਅਨ੍ਤਰਾ. ‘‘ਯਾਵ ਪਵਾਰੇਨ੍ਤੀ’’ਤਿ ਪਦਸ੍ਸ ਨਿਯਮਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਤਾਵਤਕਂ ਕਾਲ’’ਨ੍ਤਿ. ਯਾਵਾਤਿ ਨਿਪਾਤਸ੍ਸ ਪਯੋਗਤ੍ਤਾ ‘‘ਤਦਮਨ੍ਤਰਾ’’ਤਿ ਏਤ੍ਥ ਅਭਿਵਿਧਿਅਵਧ੍ਯਤ੍ਥੇ ਪਞ੍ਚਮੀਵਿਭਤ੍ਤਿ ਹੋਤੀਤਿ ਦਟ੍ਠਬ੍ਬਂ.

੧੨੧. ਪਵਾਰਣਾਭੇਦਕਥਾ

੨੧੨. ਚਾਤੁਦ੍ਦਸਿਕਾਯਾਤਿ ਭਣ੍ਡਨਕਾਰਕੇਹਿ ਉਪਦ੍ਦੁਤਤ੍ਤਾ ਪਚ੍ਚੁਕ੍ਕਡ੍ਢਿਤਾਯ ਪੁਬ੍ਬਕਤ੍ਤਿਕਮਾਸਸ੍ਸ ਕਾਲ਼ਪਕ੍ਖਚਾਤੁਦ੍ਦਸਿਕਾਯ. ‘‘ਅਜ੍ਜ ਪਵਾਰਣਾ ਪਨ੍ਨਰਸੀ’’ਤਿ ਪੁਬ੍ਬਕਿਚ੍ਚਂ ਕਾਤਬ੍ਬਨ੍ਤਿ ਯੋਜਨਾ.

ਪਵਾਰਣਾਕਮ੍ਮੇਸੂਤਿ ਨਿਦ੍ਧਾਰਣੇ ਭੁਮ੍ਮਂ, ‘‘ਅਧਮ੍ਮੇਨ ਵਗ੍ਗਂ ਪਵਾਰਣਾਕਮ੍ਮ’’ਨ੍ਤਿਆਦੀਸੁ ਸਮ੍ਬਨ੍ਧਿਤਬ੍ਬਂ. ਅਧਮ੍ਮੇਨ ਵਗ੍ਗਨ੍ਤਿ ਏਤ੍ਥ ਅਧਮ੍ਮਂ ਨਾਮ ਸਙ੍ਘੋ ਹੁਤ੍ਵਾਪਿ ਸਙ੍ਘਪਵਾਰਣਮਕਤ੍ਵਾ ਗਣਪਵਾਰਣਾਯ ਕਰਣਂ, ਗਣੋ ਹੁਤ੍ਵਾਪਿ ਗਣਪਵਾਰਣਮਕਤ੍ਵਾ ਸਙ੍ਘਪਵਾਰਣਾਯ ਕਰਣਞ੍ਚ. ਵਗ੍ਗਂ ਨਾਮ ਏਕਸੀਮਾਯਂ ਵਸਨ੍ਤਾਨਮ੍ਪਿ ਸਬ੍ਬੇਸਂ ਏਕਤੋ ਅਸਨ੍ਨਿਪਤਨਂ.

ਅਧਮ੍ਮੇਨ ਸਮਗ੍ਗਨ੍ਤਿ ਏਤ੍ਥ ਅਧਮ੍ਮਂ ਵੁਤ੍ਤਨਯਮੇਵ. ਸਮਗ੍ਗਂ ਨਾਮ ਸਬ੍ਬੇਸਂ ਏਕਤੋ ਸਨ੍ਨਿਪਤਨਂ.

ਧਮ੍ਮੇਨ ਵਗ੍ਗਨ੍ਤਿ ਏਤ੍ਥ ਧਮ੍ਮਂ ਨਾਮ ਸਙ੍ਘੋ ਹੁਤ੍ਵਾ ਸਙ੍ਘਪਵਾਰਣਾਯ ਕਰਣਂ, ਗਣੋ ਹੁਤ੍ਵਾ ਗਣਪਵਾਰਣਾਯ ਕਰਣਞ੍ਚ. ਵਗ੍ਗਂ ਵੁਤ੍ਤਨਯਮੇਵ. ਧਮ੍ਮੇਨ ਸਮਗ੍ਗਂ ਸੁਵਿਞ੍ਞੇਯ੍ਯਮੇਵ. ਇਤਿਸਦ੍ਦੋ ਪਰਿਸਮਾਪਨਤ੍ਥੋ.

੨੧੩. ਏਵਂ ਦਿਨ੍ਨਾਯਾਤਿ ਏਵਂ ਪਾਲ਼ਿਯਂ ਵੁਤ੍ਤਨਯੇਨੇਵ ਦਿਨ੍ਨਾਯ. ਪਵਾਰੇਤਬ੍ਬਨ੍ਤਿ ਵਸ੍ਸਂਵੁਤ੍ਥਪਵਾਰਣਾਯ ਪਵਾਰੇਤਬ੍ਬਂ. ਤਿਸ੍ਸੋਤਿ ਤਿਸ੍ਸਨਾਮਕੋ. ਦਿਟ੍ਠੇਨ ਵਾ ਵਦਤੂਤਿ ਸਮ੍ਬਨ੍ਧੋ. ਤਨ੍ਤਿ ਤਿਸ੍ਸਨਾਮਕਂ ਭਿਕ੍ਖੁਂ. ਸਙ੍ਘੋ ਅਨੁਕਮ੍ਪਂ ਉਪਾਦਾਯ ਵਦਤੂਤਿ ਯੋਜਨਾ. ਵੁਡ੍ਢਤਰੋਤਿ ਪਵਾਰਣਾਦਾਯਕੋ ਤਂਹਾਰਕਤੋ ਵੁਡ੍ਢਤਰੋ. ਹੀਤਿ ਲਦ੍ਧਗੁਣੋ. ਤੇਨਾਤਿ ਪਵਾਰਣਾਹਾਰਕੇਨ. ਤਸ੍ਸਾਤਿ ਪਵਾਰਣਾਦਾਯਕਸ੍ਸ.

ਇਧਾਪਿ ਚਾਤਿ ਇਮਸ੍ਮਿਂ ਪਵਾਰਣਾਕ੍ਖਨ੍ਧਕੇਪਿ ਚ. ਅਪਿਸਦ੍ਦੋ ਉਪੋਸਥਕ੍ਖਨ੍ਧਕਂ ਅਪੇਕ੍ਖਤਿ. ਅਵਸੇਸਕਮ੍ਮਤ੍ਥਾਯਾਤਿ ਪਵਾਰਣਾਕਮ੍ਮਤੋ ਅਵਸੇਸਾਨਂ ਕਮ੍ਮਾਨਮਤ੍ਥਾਯ ਹੋਤੀਤਿ ਸਮ੍ਬਨ੍ਧੋ. ਪਵਾਰਣਾਯ ਆਹਟਾਯ ਸਤਿਯਾਤਿ ਯੋਜਨਾ. ਤਸ੍ਸ ਚਾਤਿ ਪਵਾਰਣਾਦਾਯਕਸ੍ਸ ਚ. ਸਬ੍ਬੇਸਨ੍ਤਿ ਪਵਾਰਣਾਦਾਯਕਸ੍ਸ ਚ ਸਙ੍ਘਸ੍ਸ ਚਾਤਿ ਸਬ੍ਬੇਸਂ. ਅਞ੍ਞਂ ਪਨ ਕਮ੍ਮਨ੍ਤਿ ਪਵਾਰਣਾਕਮ੍ਮਤੋ ਅਞ੍ਞਂ ਕਮ੍ਮਂ ਪਨ. ਤੇਨ ਪਨ ਭਿਕ੍ਖੁਨਾਤਿ ਪਵਾਰਣਾਦਾਯਕੇਨ ਭਿਕ੍ਖੁਨਾ ਪਨ. ਏਤ੍ਥ ਚ ਤਦਹੁਪਵਾਰਣਾਯ ਅਤ੍ਤਨੋ ਚ ਸਙ੍ਘਸ੍ਸ ਚ ਸਚੇ ਪਵਾਰਣਾਕਮ੍ਮਮੇਵ ਹੋਤਿ, ਪਵਾਰਣਾਯੇਵ ਦਾਤਬ੍ਬਾ. ਅਥ ਅਞ੍ਞਮੇਵ ਕਮ੍ਮਂ ਹੋਤਿ, ਛਨ੍ਦੋਯੇਵ ਦਾਤਬ੍ਬੋ. ਯਦਿ ਪਵਾਰਣਾਕਮ੍ਮਞ੍ਚ ਅਞ੍ਞਕਮ੍ਮਞ੍ਚ ਹੋਤਿ, ਪਵਾਰਣਾ ਚ ਛਨ੍ਦੋ ਚ ਦਾਤਬ੍ਬੋ. ਤਂ ਸਨ੍ਧਾਯ ਵੁਤ੍ਤਂ ‘‘ਤਦਹੁ ਪਵਾਰਣਾਯ ਪਵਾਰਣਂ ਦੇਨ੍ਤੇਨ ਛਨ੍ਦਮ੍ਪਿ ਦਾਤੁ’’ਨ੍ਤਿ (ਮਹਾਵ. ੨੧੩). ਤੇਨਾਤਿ ਦਾਨਹੇਤੁਨਾ.

੨੧੮. ਅਜ੍ਜ ਮੇ ਪਵਾਰਣਾਤਿ ਏਤ੍ਥ ਪਾਲ਼ਿਨਯਤੋ ਅਞ੍ਞਂ ਅਟ੍ਠਕਥਾਨਯਂ ਦਸ੍ਸੇਨ੍ਤੋ ਆਹ ‘‘ਸਚੇ’’ਤਿਆਦਿ.

੨੧੯. ਵੁਤ੍ਤਨਯਮੇਵਾਤਿ ਉਪੋਸਥਕ੍ਖਨ੍ਧਕੇ (ਮਹਾਵ. ਅਟ੍ਠ. ੧੬੯) ਵੁਤ੍ਤਨਯਮੇਵ.

੨੨੨. ਪੁਨ ਪਵਾਰੇਤਬ੍ਬਨ੍ਤਿ ਏਤ੍ਥ ਨ ਕੇਵਲਂ ਪਵਾਰਣਾਯੇਵ ਪੁਨ ਕਾਤਬ੍ਬਾ, ਪੁਬ੍ਬਕਿਚ੍ਚਾਦੀਨਿਪਿ ਪੁਨ ਕਾਤਬ੍ਬਾਨੀਤਿ ਦਸ੍ਸੇਨ੍ਤੋ ਆਹ ‘‘ਪੁਨ ਪੁਬ੍ਬਕਿਚ੍ਚ’’ਨ੍ਤਿਆਦਿ.

੨੨੮. ਏਸੇਵ ਨਯੋਤਿ ‘‘ਅਜ੍ਜ ਪਵਾਰਣਾ ਪਨ੍ਨਰਸੀ’’ਤਿ ਪੁਬ੍ਬਕਿਚ੍ਚਂ ਅਤਿਦਿਸਤਿ. ਅਸ੍ਸਾਤਿ ਵਚਨਸ੍ਸ. ਞਤ੍ਤਿਨ੍ਤਿ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ ਅਜ੍ਜ ਪਵਾਰਣਾ’’ਤਿ ਞਤ੍ਤਿਂ. ਪਚ੍ਛਿਮੇਹੀਤਿ ਪਚ੍ਛਿਮਵਸ੍ਸਂ ਉਪਗਤੇਹਿ ਭਿਕ੍ਖੂਹਿ. ਉਪੋਸਥਗ੍ਗੇਤਿ ਉਪੋਸਥਸ੍ਸ ਗਣ੍ਹਨਟ੍ਠਾਨੇ ਗੇਹੇ. ਦ੍ਵੇ ਞਤ੍ਤਿਯੋਤਿ ਪਵਾਰਣਾਞਤ੍ਤਿ ਚ ਉਪੋਸਥਞਤ੍ਤਿ ਚਾਤਿ ਦ੍ਵੇ ਞਤ੍ਤਿਯੋ. ਇਦਞ੍ਚਾਤਿ ਇਦਂ ਵਕ੍ਖਮਾਨਂ ਪਨ. ਏਤ੍ਥਾਤਿ ਪੁਰਿਮਿਕਪਚ੍ਛਿਮਿਕਭਿਕ੍ਖੂਨਂ ਸਂਸਗ੍ਗਟ੍ਠਾਨੇ. ਪੁਰਿਮਿਕਾਯ ਉਪਗਤੇਹੀਤਿ ਵਿਭਤ੍ਤਅਪਾਦਾਨਂ ਅਨੁਮੇਯ੍ਯਵਿਸਯਅਪਾਦਾਨਂ, ਥੋਕਤਰਾਤਿ ਸਮ੍ਬਨ੍ਧੋ, ਸਹਾਦਿਯੋਗੋ ਵਾ, ਸਮਸਮਾਤਿ ਸਮ੍ਬਨ੍ਧੋ. ਸਮਸਮਾਤਿ ਸਮੇਨ, ਸਮਤੋ ਵਾ ਸਮਾ ਸਮਸਮਾ, ਅਤਿਰੇਕਸਮਾਤਿ ਅਤ੍ਥੋ. ਕਿਞ੍ਚਿ ਊਨਂ ਵਾ ਅਧਿਕਂ ਵਾ ਨਤ੍ਥੀਤਿ ਅਧਿਪ੍ਪਾਯੋ. ਇਤੀਤਿ ਇਦਂ ਲਕ੍ਖਣਂ.

ਸੋਤਿ ਪਚ੍ਛਿਮਿਕੋ ਭਿਕ੍ਖੁ. ਇਤਰੇਨਾਤਿ ਪਚ੍ਛਿਮਿਕੇਨ. ਤੇਸਨ੍ਤਿ ਪੁਰਿਮਿਕਾਨਂ. ਏਕੇਨਾਤਿ ਪੁਰਿਮਿਕੇਨ. ਏਕਸ੍ਸਾਤਿ ਪਚ੍ਛਿਮਿਕਸ੍ਸ. ਪੁਨ ਏਕੇਨਾਤਿ ਪਚ੍ਛਿਮਿਕੇਨ. ‘‘ਏਕਸ੍ਸਾ’’ਤਿ ਅਨੁਵਤ੍ਤੇਤਬ੍ਬੋ, ਪੁਰਿਮਿਕਸ੍ਸਾਤਿ ਅਤ੍ਥੋ. ਪੁਰਿਮਵਸ੍ਸੂਪਗਤੇਹਿ ਅਧਿਕਤਰਾਤਿ ਸਮ੍ਬਨ੍ਧੋ. ਥੋਕਤਰੇਹੀਤਿ ਪਚ੍ਛਿਮਵਸ੍ਸੂਪਗਤੇਹਿ ਥੋਕਤਰੇਹਿ ਪੁਰਿਮਵਸ੍ਸੂਪਗਤੇਹੀਤਿ ਯੋਜਨਾ.

ਕਤ੍ਤਿਕਾਯਾਤਿ ਪਚ੍ਛਿਮਕਤ੍ਤਿਕਾਯ. ਚਾਤੁਮਾਸਿਨਿਯਾ ਪਵਾਰਣਾਯਾਤਿ ਚਤੁਨ੍ਨਂ ਮਾਸਾਨਂ ਪੂਰਣਿਯਾ ਪਵਾਰਣਾਯ. ਪਵਾਰਣਾਞਤ੍ਤਿਂ ਠਪੇਤ੍ਵਾਤਿ ਸਮਸਮਾ ਹੁਤ੍ਵਾਪਿ ਪਵਾਰਣਾਦਿਵਸਤ੍ਤਾ ਪਵਾਰਣਾਞਤ੍ਤਿਂ ਠਪੇਤ੍ਵਾ. ਤੇਹੀਤਿ ਪਚ੍ਛਿਮਿਕੇਹਿ. ਇਤਰੇਹੀਤਿ ਪੁਰਿਮਿਕੇਹਿ. ਤੇਸਨ੍ਤਿ ਪਚ੍ਛਿਮਿਕਾਨਂ. ਥੋਕਤਰਾ ਵਾਤਿ ਏਕਾਦਿਨਾ ਥੋਕਤਰਾ ਵਾ. ਤੇਸਨ੍ਤਿ ਪੁਰਿਮਿਕਾਨਂ. ਤੇਹੀਤਿ ਪਚ੍ਛਿਮਿਕੇਹਿ.

੨੩੩. ਸਙ੍ਘਸਾਮਗ੍ਗਿਯਾਤਿ ਏਤ੍ਥ ਕੀਦਿਸੀ ਸਙ੍ਘਸਾਮਗ੍ਗੀ ਵੇਦਿਤਬ੍ਬਾਤਿ ਆਹ ‘‘ਕੋਸਮ੍ਬਕਸਾਮਗ੍ਗੀਸਦਿਸਾਵ ਵੇਦਿਤਬ੍ਬਾ’’ਤਿ. ਏਤ੍ਥਾਤਿ ਸਾਮਗ੍ਗੀਪਵਾਰਣਾਯਂ. ਅਪ੍ਪਮਤ੍ਤਕੇਤਿ ਪਤ੍ਤਚੀਵਰਾਦਿਂ ਪਟਿਚ੍ਚ ਉਪ੍ਪਨ੍ਨੇ ਅਪ੍ਪਮਤ੍ਤਕੇ ਵਿਵਾਦੇ. ਪਵਾਰਣਾਯਮੇਵਾਤਿ ਪਵਾਰਣਾਦਿਵਸੇਯੇਵ. ਕਸ੍ਮਿਂ ਦਿਵਸੇ ਸਾਮਗ੍ਗੀਪਵਾਰਣਾ ਕਾਤਬ੍ਬਾਤਿ ਆਹ ‘‘ਸਾਮਗ੍ਗੀਪਵਾਰਣ’’ਨ੍ਤਿਆਦਿ. ਪਠਮਪਵਾਰਣਨ੍ਤਿ ਪੁਬ੍ਬਕਤ੍ਤਿਕਪੁਣ੍ਣਮਿਂ. ਯਾਵ ਕਤ੍ਤਿਕਚਾਤੁਮਾਸਿਨੀ ਪੁਣ੍ਣਮਾਤਿ ਅਯਂ ਅਵਧਿ ਅਨਭਿਵਿਧਿਅਵਧਿ ਨਾਮ. ਕਸ੍ਮਾ? ਕਤ੍ਤਿਕਚਾਤੁਮਾਸਿਨਿਪੁਣ੍ਣਮਿਂ ਠਪੇਤ੍ਵਾ ਅਨ੍ਤੋਯੇਵ ਗਹੇਤਬ੍ਬਤ੍ਤਾ. ਏਤ੍ਥਨ੍ਤਰੇਤਿ ਏਤਸ੍ਮਿਂ ਦ੍ਵਿਨ੍ਨਂ ਪੁਣ੍ਣਮਿਨਮਨ੍ਤਰੇ ਅਟ੍ਠਵੀਸਤਿਪਮਾਣੇ ਦਿਵਸੇ ਕਾਤਬ੍ਬਾ. ਤਤੋਤਿ ਏਤ੍ਥਨ੍ਤਰਸਙ੍ਖਾਤਾ ਅਟ੍ਠਵੀਸਦਿਵਸਤੋ.

੧੪੦. ਦ੍ਵੇਵਾਚਿਕਾਦਿਪਵਾਰਣਾਕਥਾ

੨੩੪. ਞਤ੍ਤਿਂ ਠਪੇਨ੍ਤੇਨਾਪੀਤਿ ਪਿਸਦ੍ਦੋ ਨ ਕੇਵਲਂ ਪਵਾਰੇਨ੍ਤੇਨ ਏਵ ਦ੍ਵੇਵਾਚਿਕਂ ਪਵਾਰੇਤਬ੍ਬਂ, ਅਥ ਖੋ ਞਤ੍ਤਿਂ ਠਪੇਨ੍ਤੇਨਾਪਿ ਦ੍ਵੇਵਾਚਿਕਞਤ੍ਤਿਯੇਵ ਠਪੇਤਬ੍ਬਾਤਿ ਦਸ੍ਸੇਤਿ. ਏਤ੍ਥ ਚਾਤਿ ‘‘ਸਮਾਨਵਸ੍ਸਿਕਂ ਪਵਾਰੇਤੁ’’ਨ੍ਤਿ ਪਾਠੇ ਚ. ਸਮਾਨਵਸ੍ਸਿਕਾਤਿ ਗਣਨਵਸੇਨ ਸਮਾਨਂ ਵਸ੍ਸਂ ਏਤੇਸਨ੍ਤਿ ਸਮਾਨਵਸ੍ਸਿਕਾ, ਸਮਾਨੇ ਵਸ੍ਸੇ ਉਪਸਮ੍ਪਾਦੇਨ੍ਤੀਤਿ ਵਾ ਸਮਾਨਵਸ੍ਸਿਕਾ. ਏਕਤੋਤਿ ਏਕਸ੍ਮਿਂ ਖਣੇ, ਏਕਪਹਾਰੇਨ ਵਾ.

੧੪੧. ਪਵਾਰਣਾਟ੍ਠਪਨਕਥਾ

੨੩੬. ਸਬ੍ਬਂ ਸਙ੍ਗਣ੍ਹਾਤੀਤਿ ਸਬ੍ਬਸਙ੍ਗਾਹਿਕਂ. ਪੁਗ੍ਗਲਸ੍ਸ ਠਪਨਂ ਪੁਗ੍ਗਲਿਕਂ. ਤਤ੍ਥਾਤਿ ਦ੍ਵੀਸੁ ਪਵਾਰਣਾਟ੍ਠਪਨੇਸੁ. ਸਬ੍ਬਸਙ੍ਗਾਹਿਕੇ ਠਪਿਤਾ ਹੋਤੀਤਿ ਸਮ੍ਬਨ੍ਧੋ. ਯਾਵ ਰੇਕਾਰੋ ਅਤ੍ਥਿ, ਤਾਵਾਤਿ ਯੋਜਨਾ. ਭਾਸਿਯਿਤ੍ਥਾਤਿ ਭਾਸਿਤਾ. ਲਪਿਯਿਤ੍ਥਾਤਿ ਲਪਿਤਾ. ਨ ਪਰਿਯੋਸਿਯਿਤ੍ਥਾਤਿ ਅਪਰਿਯੋਸਿਤਾ. ਏਤ੍ਥਨ੍ਤਰੇਤਿ ਏਤਸ੍ਮਿਂ ਸੁਕਾਰਰੇਕਾਰਾਨਂ ਅਨ੍ਤਰੇ. ਏਕਪਦੇਪੀਤਿ ਪਿਸਦ੍ਦੋ ਏਕਕ੍ਖਰੇਪੀਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਠਪਿਤਾਤਿ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਇਤ੍ਥਨ੍ਨਾਮੋ ਪੁਗ੍ਗਲੋ ਸਾਪਤ੍ਤਿਕੋ, ਤਸ੍ਸ ਪਵਾਰਣਂ ਠਪੇਮੀ’’ਤਿ ਞਤ੍ਤਿਯਾ ਠਪਿਤਾ. ਯ੍ਯਕਾਰੇਤਿ ‘‘ਪਵਾਰੇਯ੍ਯਾ’’ਤਿ ਏਤ੍ਥ ਯ੍ਯਕਾਰੇ. ਤਤੋਤਿ ਯ੍ਯਕਾਰਤੋ. ਪੁਗ੍ਗਲਿਕਟ੍ਠਪਨੇ ਪਨ ਅਟ੍ਠਪਿਤਾ ਹੋਤੀਤਿ ਸਮ੍ਬਨ੍ਧੋ. ਸਂਕਾਰਤੋਤਿ ‘‘ਸਙ੍ਘਂ ਭਨ੍ਤੇ’’ਤਿ ਏਤ੍ਥ ਸਂਕਾਰਤੋ. ਸਬ੍ਬਪਚ੍ਛਿਮੋਤਿ ਤੀਸੁ ਵਾਰੇਸੁ ਤਤਿਯਵਾਰੇ ਸਬ੍ਬੇਸਂ ਅਕ੍ਖਰਾਨਂ ਪਚ੍ਛਿਮੋ ਟਿਕਾਰੋ ਅਤ੍ਥੀਤਿ ਯੋਜਨਾ. ਏਤ੍ਥਨ੍ਤਰੇਤਿ ਏਤਸ੍ਮਿਂ ਸਂਕਾਰਟਿਕਾਰਾਨਂ ਅਨ੍ਤਰੇ. ਤਸ੍ਮਾਤਿ ਯਸ੍ਮਾ ਪਰਿਯੋਸਿਤਾ ਹੋਤਿ, ਤਸ੍ਮਾ. ‘‘ਏਸੇਵ ਨਯੋ’’ਤਿ ਵੁਤ੍ਤਵਚਨਂ ਵਿਤ੍ਥਾਰੇਨ੍ਤੋ ਆਹ ‘‘ਏਤਾਸੁਪਿ ਹੀ’’ਤਿਆਦਿ. ਤਤ੍ਥ ਏਤਾਸੁਪੀਤਿ ਦ੍ਵੇਵਾਚਿਕਏਕਵਾਚਿਕਸਮਾਨਵਸ੍ਸਿਕਾਸੁਪਿ. ਪਿਸਦ੍ਦੋ ਤੇਵਾਚਿਕਮਪੇਕ੍ਖਤਿ. ਠਪਨਖੇਤ੍ਤਨ੍ਤਿ ਠਪਨਸ੍ਸ ਭੂਮਿ. ਇਤਿਸਦ੍ਦੋ ਪਰਿਸਮਾਪਨਤ੍ਥੋ.

੨੩੭. ਅਨੁਯੁਞ੍ਜਿਯਮਾਨੋਤਿ ਏਤ੍ਥ ਅਨੁਯੁਞ੍ਜਸਦ੍ਦੋ ਪੁਚ੍ਛਨਤ੍ਥੋਤਿ ਆਹ ‘‘ਪੁਚ੍ਛਿਯਮਾਨੋ’’ਤਿ. ਪਰਤੋਤਿ ਪਰਸ੍ਮਿਂਯੇਵ ਖਨ੍ਧਕੇਤਿ (ਮਹਾਵ. ੨੩੭) ਅਤ੍ਥੋ. ਅਲਂ ਭਿਕ੍ਖੁ ਮਾ ਭਣ੍ਡਨਨ੍ਤਿਆਦੀਨੀਤਿ ਏਤ੍ਥ ਆਦਿਸਦ੍ਦੇਨ ‘‘ਮਾ ਕਲਹਂ, ਮਾ ਵਿਵਾਦ’’ਨ੍ਤਿਵਚਨਾਨਿ ਸਙ੍ਗਣ੍ਹਾਤਿ, ਵਚਨਾਨਿ ਵਤ੍ਵਾ ਓਮਦ੍ਦਿਤ੍ਵਾਤਿ ਯੋਜਨਾ. ਵਚਨੋਮਦ੍ਦਨਾਤਿ ਵਚਨੇਨੇਵ ਓਮਦ੍ਦਨਾ. ਹੀਤਿ ਸਚ੍ਚਂ. ਇਧਾਤਿ ਇਮਸ੍ਮਿਂ ਪਵਾਰਣਾਟ੍ਠਪਨਟ੍ਠਾਨੇ. ਅਨੁਦ੍ਧਂਸਿਤਂ ਪਟਿਜਾਨਾਤੀਤਿ ਏਤ੍ਥ ਪਟਿਜਾਨਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸਿਤੋ ਅਯਂ ਮਯਾ’’ਤਿ. ‘‘ਲਿਙ੍ਗਨਾਸਨਾਯਾ’’ਤਿ ਇਮਿਨਾ ਦਣ੍ਡਕਮ੍ਮਨਾਸਨਸਂਵਾਸਨਾਸਨਾਨਿ ਨਿਵਤ੍ਤੇਤਿ.

੨੩੮. ਏਤਨ੍ਤਿ ‘‘ਅਸੁਕਾ ਆਪਤ੍ਤੀ’’ਤਿ ਵਚਨਂ. ਕਲਹਸ੍ਸ ਮੁਖਨ੍ਤਿ ਕਲਹਸ੍ਸ ਉਪਾਯੋ.

੧੪੩. ਵਤ੍ਥੁਟ੍ਠਪਨਾਦਿਕਥਾ

੨੩੯. ਚੋਰਾ ਅਗਮਂਸੁ ਕਿਰਾਤਿ ਸਮ੍ਬਨ੍ਧੋ. ਪੋਕ੍ਖਰਣਿਤੋ ਨੀਹਰਿਤ੍ਵਾਤਿ ਸਮ੍ਬਨ੍ਧੋ. ਸੋਤਿ ਭਿਕ੍ਖੁ, ਏਵਮਾਹਾਤਿ ਸਮ੍ਬਨ੍ਧੋ. ਵੁਤ੍ਥੇਨਾਤਿ ਵਸਨ੍ਤੇਨ, ਯੇਨ ਕੇਨਚਿ ਕਤਨ੍ਤਿ ਸਮ੍ਬਨ੍ਧੋ. ਤਂ ਪੁਗ੍ਗਲਨ੍ਤਿ ਵਤ੍ਥੁਕਤਂ ਤਂ ਪੁਗ੍ਗਲਂ. ਏਤ੍ਥਾਤਿ ‘‘ਵਤ੍ਥੁਂ ਠਪੇਤ੍ਵਾ ਸਙ੍ਘੋ ਪਵਾਰੇਯ੍ਯਾ’’ਤਿ ਪਾਠੇ. ਇਮਿਨਾ ਵਤ੍ਥੁਨਾ ਅਪਦਿਸਾਹੀਤਿ ਸਮ੍ਬਨ੍ਧੋ. ਨਨ੍ਤਿ ਪੁਗ੍ਗਲਂ. ਅਨੁਵਿਜ੍ਜਿਤ੍ਵਾਤਿ ਅਨੁਯੁਞ੍ਜਿਤ੍ਵਾ, ਪੁਚ੍ਛਿਤ੍ਵਾਤਿ ਅਤ੍ਥੋ.

ਏਕੋ ਭਿਕ੍ਖੁ ਪੂਜੇਸਿ, ਪਿਵੀਤਿ ਸਮ੍ਬਨ੍ਧੋ. ਤਸ੍ਸਾਤਿ ਭਿਕ੍ਖੁਸ੍ਸ. ਤਦਨੁਰੂਪੋਤਿ ਤੇਸਂ ਪੂਜਨਪਿਵਨਾਨਂ ਅਨੁਰੂਪੋ. ਸੋਤਿ ਚੋਦਕੋ ਭਿਕ੍ਖੁ. ਤਂ ਗਨ੍ਧਨ੍ਤਿ ਤਂ ਸਰੀਰਗਨ੍ਧਂ. ਯਂ ਪੁਗ੍ਗਲਨ੍ਤਿ ਯੋਜਨਾ. ਠਪੇਸੀਤਿ ਪਵਾਰਣਾਯ ਠਪੇਸਿ. ਅਯਮਸ੍ਸਾਤਿ ਅਯਂ ਦੋਸੋ ਅਸ੍ਸ ਪੁਗ੍ਗਲਸ੍ਸ.

ਇਦਾਨੇਵ ਨਨ੍ਤਿ ਏਤ੍ਥ ‘‘ਨ’’ਨ੍ਤਿ ਪਦਂ ‘‘ਪੁਗ੍ਗਲ’’ਨ੍ਤਿ ਪਦੇਨ ਯੋਜੇਤਬ੍ਬਂ. ਨਂ ਪੁਗ੍ਗਲਨ੍ਤਿ ਹਿ ਅਤ੍ਥੋ. ਉਭਯਨ੍ਤਿ ਵਤ੍ਥੁਞ੍ਚ ਪੁਗ੍ਗਲਞ੍ਚਾਤਿ ਉਭਯਂ. ਕਲ੍ਲਂ ਵਚਨਾਯਾਤਿ ਯੁਤ੍ਤਂ ਕਥੇਤੁਂ. ਕਸ੍ਮਾ ਕਲ੍ਲਂ ਵਚਨਾਯਾਤਿ ਯੋਜਨਾ. ਪਵਾਰਣਤੋ ਪੁਬ੍ਬੇ, ਪਚ੍ਛਾ ਚਾਤਿ ਸਮ੍ਬਨ੍ਧੋ. ਇਤਿ ਤਸ੍ਮਾ ਕਲ੍ਲਂ ਵਚਨਾਯਾਤਿ ਯੋਜਨਾ. ਇਦਞ੍ਹਿ ਉਭਯਨ੍ਤਿ ਵਤ੍ਥੁਪੁਗ੍ਗਲਸਙ੍ਖਾਤਂ ਇਦਮੇਵ ਉਭਯਂ. ਪਵਾਰਣਾਯ ਪੁਬ੍ਬੇਤਿ ਯੋਜਨਾ. ਉਕ੍ਕੋਟੇਨ੍ਤਸ੍ਸਾਤਿ ਚਾਲੇਨ੍ਤਸ੍ਸ.

੧੪੪. ਭਣ੍ਡਨਕਾਰਕਵਤ੍ਥੁਕਥਾ

੨੪੦. ਚਤੁਤ੍ਥਪਞ੍ਚਮਾਤਿ ਛਸੁ ਪਕ੍ਖੇਸੁ ਪੋਟ੍ਠਪਾਦਮਾਸਸ੍ਸ ਜੁਣ੍ਹਪਕ੍ਖਕਾਲ਼ਪਕ੍ਖਸਙ੍ਖਾਤਾ ਚਤੁਤ੍ਥਪਞ੍ਚਮਾ. ਤਤਿਯੋਤਿ ਸਾਵਣਮਾਸਸ੍ਸ ਕਾਲ਼ਪਕ੍ਖੋ ਤਤਿਯੋ. ਤਤਿਯਚਤੁਤ੍ਥਪਞ੍ਚਮਾ ਵਾਤਿ ਏਤ੍ਥ ਤਤਿਯੋਤਿ ਸਾਵਣਮਾਸਸ੍ਸ ਕਾਲ਼ਪਕ੍ਖੋ. ਚਤੁਤ੍ਥੋਤਿ ਪੋਟ੍ਠਪਾਦਮਾਸਸ੍ਸ ਜੁਣ੍ਹਪਕ੍ਖੋ. ਪਞ੍ਚਮੋਤਿ ਤਸ੍ਸੇਵ ਕਾਲ਼ਪਕ੍ਖੋ. ‘‘ਤਤਿਯ…ਪੇ… ਪਞ੍ਚਮਾ ਵਾ’’ਤਿ ਪਦਾਨਿ ‘‘ਦ੍ਵੇ ਵਾ ਤਯੋ ਵਾ’’ਤਿ ਪਦੇਹਿ ਯਥਾਕ੍ਕਮਂ ਯੋਜੇਤਬ੍ਬਾਨਿ. ਚਤੁਤ੍ਥੇ ਵਾ ਕਤੇਤਿ ਚਤੁਤ੍ਥਪਕ੍ਖੇ ਵਾ ਪਨ੍ਨਰਸਿਭਾਵੇਨ ਕਤੇ. ਦ੍ਵੇ ਚਾਤੁਦ੍ਦਸਿਕਾਤਿ ਤਤਿਯਪਕ੍ਖੇ ਚ ਚਾਤੁਦ੍ਦਸਿਯਾ ਸਦ੍ਧਿਂ ਦ੍ਵੇ ਚਾਤੁਦ੍ਦਸਿਕਾ. ਇਮੇਤਿ ਭਣ੍ਡਨਕਾਰਕਾ. ਤੇਤਿ ਭਣ੍ਡਨਕਾਰਕਾ.

ਅਸਂਵਿਹਿਤਾਤਿ ਏਤ੍ਥ ਅਕਾਰਸ੍ਸ ਵਿਰਹਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਂਵਿਦਹਨਵਿਰਹਿਤਾ’’ਤਿ. ਤਤ੍ਥ ਸਂਵਿਦਹਨਵਿਰਹਿਤਾਤਿ ਸਂਵਿਦਹਨਰਕ੍ਖਵਿਰਹਿਤਾ. ਆਗਮਨਜਾਨਨਤ੍ਥਾਯਾਤਿ ਭਣ੍ਡਨਕਾਰਕਾਨਂ ਆਗਮਨਸ੍ਸ ਜਾਨਨਤ੍ਥਾਯ. ਕਿਲਨ੍ਤਤ੍ਥਾਤਿ ਤੁਮ੍ਹੇ ਕਿਲਨ੍ਤਾ ਭਵਥ. ‘‘ਸਮ੍ਮੋਹਂ ਕਤ੍ਵਾ’’ਤਿ ਇਮਿਨਾ ਵਿਕ੍ਖਿਤ੍ਵਾਤਿ ਪਦਸ੍ਸ ਵਿਕ੍ਖੇਪਂ ਕਤ੍ਵਾਤਿ ਅਤ੍ਥਂ ਦਸ੍ਸੇਤਿ. ਨੋ ਚੇ ਲਭੇਥਾਤਿ ਏਤ੍ਥ ਕਿਮਤ੍ਥਾਯ ਨ ਲਭੇਥਾਤਿ ਆਹ ‘‘ਬਹਿਸੀਮਂ ਗਨ੍ਤੁ’’ਨ੍ਤਿ. ‘‘ਭਣ੍ਡਨਕਾਰਕਾਨਂ…ਪੇ… ਹੋਨ੍ਤੀ’’ਤਿ ਇਮਿਨਾ ਅਲਭਨਸ੍ਸ ਕਾਰਣਂ ਦਸ੍ਸੇਤਿ. ਯਨ੍ਤਿ ਆਗਮਂ ਜੁਣ੍ਹਂ. ਕੋਮੁਦਿਯਾ ਚਾਤੁਮਾਸਿਨਿਯਾਤਿ ਪਚ੍ਛਿਮਕਤ੍ਤਿਕਪੁਣ੍ਣਮਾਯਂ. ਸਾ ਹਿ ਕੁਮੁਦਾਨਮਤ੍ਥਿਤਾਯ ਕੋਮੁਦੀ, ਚਤੁਨ੍ਨਂ ਵਸ੍ਸਿਕਾਨਂ ਮਾਸਾਨਂ ਪੂਰਣਤ੍ਤਾ ਚਾਤੁਮਾਸਿਨੀਤਿ ਵੁਚ੍ਚਤਿ. ਤਦਾ ਹਿ ਕੁਮੁਦਾਨਿ ਸੁਪੁਪ੍ਫਿਤਾਨਿ ਹੋਨ੍ਤਿ, ਤਸ੍ਮਾ ਕੁਮੁਦਾਨਂ ਸਮੂਹਾ, ਕੁਮੁਦਾਨਿ ਏਵ ਵਾ ਕੋਮੁਦਾ, ਤੇ ਏਤ੍ਥ ਅਤ੍ਥੀਤਿ ਕੋਮੁਦੀਤਿ ਵੁਚ੍ਚਤਿ, ਕੁਮੁਦਵਤੀਤਿ ਵੁਤ੍ਤਂ ਹੋਤਿ. ਅਵਸ੍ਸਂ ਪਵਾਰੇਤਬ੍ਬਨ੍ਤਿ ਧੁਵਂ ਪਵਾਰੇਤਬ੍ਬਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਨ੍ਤਿ ਕੋਮੁਦਿਂ ਚਾਤੁਮਾਸਿਨਿਂ.

੧੪੫. ਪਵਾਰਣਾਸਙ੍ਗਹਕਥਾ

੨੪੧. ਅਞ੍ਞਤਰੋ ਫਾਸੁਵਿਹਾਰੋਤਿ ਏਤ੍ਥ ਫਾਸੁਵਿਹਾਰੋ ਨਾਮ ਕੋਤਿ ਆਹ ‘‘ਤਰੁਣਸਮਥੋ ਵਾ ਤਰੁਣਵਿਪਸ੍ਸਨਾ ਵਾ’’ਤਿ. ਇਮਿਨਾ ਤਰੁਣਸਮਥਵਿਪਸ੍ਸਨਾ ਫਾਸੁਂ ਵਿਹਰਤਿ ਅਨੇਨਾਤਿ ਫਾਸੁਵਿਹਾਰੋਤਿ ਦਸ੍ਸੇਤਿ. ਪਰਿਬਾਹਿਰਾ ਭਵਿਸ੍ਸਾਮਾਤਿ ਏਤ੍ਥ ਕਸ੍ਮਾ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਨ੍ਤੀਤਿ ਆਹ ‘‘ਅਨਿਬਦ੍ਧਰਤ੍ਤਿਟ੍ਠਾਨਦਿਵਾਟ੍ਠਾਨਾਦਿਭਾਵੇਨਾ’’ਤਿਆਦਿ. ਤਤ੍ਥ ਅਨਿਬਦ੍ਧਰਤ੍ਤਿਟ੍ਠਾਨਦਿਵਾਟ੍ਠਾਨਾਦਿਭਾਵੇਨਾਤਿ ਅਨਿਬਦ੍ਧਦਿਵਾਟ੍ਠਾਨਾਦਿਭਾਵੇਨ ਹੇਤੁਭੂਤੇਨ, ਅਸਕ੍ਕੋਨ੍ਤਾਤਿ ਸਮ੍ਬਨ੍ਧੋ. ਆਦਿਸਦ੍ਦੇਨ ਅਨਿਬਦ੍ਧਚਙ੍ਕਮਾਦਯੋ ਸਙ੍ਗਣ੍ਹਾਤਿ. ‘‘ਛਨ੍ਦਦਾਨਂ ਪਟਿਕ੍ਖਿਪਤੀ’’ਤਿ ਇਮਿਨਾ ‘‘ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬ’’ਨ੍ਤਿ ਵਾਕ੍ਯਸ੍ਸ ਅਞ੍ਞਤ੍ਥਾਪੋਹਨਂ ਦਸ੍ਸੇਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਇਮੇਸੁ ਤੀਸੁ ਛਨ੍ਦਦਾਨਂ ਨ ਵਟ੍ਟਤਿ, ਤਸ੍ਮਾ ਪਟਿਕ੍ਖਿਪਤੀਤਿ ਯੋਜਨਾ. ਅਯਂ ਪਵਾਰਣਾਸਙ੍ਗਹੋ ਨਾਮ ਨ ਦਾਤਬ੍ਬੋਤਿ ਯੋਜਨਾ. ਤਰੁਣਸਮਥਵਿਪਸ੍ਸਨਾਲਾਭੀ ਏਕਪੁਗ੍ਗਲੋ ਵਾ ਹੋਤੂਤਿ ਯੋਜਨਾ. ‘‘ਏਕਸ੍ਸਪਿ ਦਾਤਬ੍ਬੋਯੇਵਾ’’ਤਿ ਇਮਿਨਾ ਅਯਂ ਪਵਾਰਣਾਸਙ੍ਗਹੋ ਏਕਸ੍ਸ ਦਿਨ੍ਨੋਪਿ ਸਬ੍ਬੇਸਂ ਦਿਨ੍ਨੋ ਹੋਤੀਤਿ ਦਸ੍ਸੇਤਿ. ਪਵਾਰਣਾਸਙ੍ਗਹੇ ਦਿਨ੍ਨੇ ਸਤੀਤਿ ਯੋਜਨਾ. ਆਗਨ੍ਤੁਕਾਤਿ ਸਟ੍ਠਿਵਸ੍ਸਾਪਿ ਆਗਨ੍ਤੁਕਾ. ਤੇਸਨ੍ਤਿ ਦਿਨ੍ਨਪਵਾਰਣਾਸਙ੍ਗਹਾਨਂ. ਅਨ੍ਤਰਾਪੀਤਿ ਕੋਮੁਦਿਯਾ ਚਾਤੁਮਾਸਿਨਿਯਾ ਅਨ੍ਤਰਾਪਿ.

ਇਤਿ ਪਵਾਰਣਾਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.