੫. ਚਮ੍ਮਕ੍ਖਨ੍ਧਕਂ

੧੪੭. ਸੋਣਕੋਲ਼ਿਵਿਸਵਤ੍ਥੁਕਥਾ

੨੪੨. ਚਮ੍ਮਕ੍ਖਨ੍ਧਕੇ ਇਸ੍ਸਰਿਯਾਧਿਪਚ੍ਚਨ੍ਤਿ ਏਤ੍ਥ ਇਸ੍ਸਰਸ੍ਸ ਭਾਵੋ ਇਸ੍ਸਰਿਯਂ, ਅਧਿਪਤਿਨੋ ਭਾਵੋ ਆਧਿਪਚ੍ਚਂ, ਇਸ੍ਸਰਿਯਞ੍ਚ ਆਧਿਪਚ੍ਚਞ੍ਚ, ਤੇਹਿ ਸਮਨ੍ਨਾਗਤਂ ਇਸ੍ਸਰਿਯਾਧਿਪਚ੍ਚਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਇਸ੍ਸਰਭਾਵੇਨ ਚ ਅਧਿਪਤਿਭਾਵੇਨ ਚ ਸਮਨ੍ਨਾਗਤ’’ਨ੍ਤਿ. ‘‘ਰਾਜਭਾਵ’’ਨ੍ਤਿ ਇਮਿਨਾ ਰਜ੍ਜਨ੍ਤਿ ਏਤ੍ਥ ਰਞ੍ਞੋ ਭਾਵੋ ਰਜ੍ਜਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਰਞ੍ਞਾ ਕਤ੍ਤਬ੍ਬਕਿਚ੍ਚ’’ਨ੍ਤਿ ਇਮਿਨਾ ਰਞ੍ਞੋ ਇਦਂ ਰਜ੍ਜਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਕੋਲ਼ਿਵੀਸੋਤਿ ਗੋਤ੍ਤ’’ਨ੍ਤਿ ਇਦਂ ਅਟ੍ਠਕਥਾਵਾਦਵਸੇਨ ਵੁਤ੍ਤਂ, ਅਪਦਾਨੇ ਪਨ ਤਸ੍ਸ ਜਾਤਕ੍ਖਣੇ ਪਿਤਰਾ ਕੋਟਿਵੀਸਧਨਸ੍ਸ ਦਿਨ੍ਨਤ੍ਤਾ ‘‘ਕੋਲ਼ਿਵੀਸੋ ਨਾਮਾ’’ਤਿ ਵੁਤ੍ਤਂ. ਵੁਤ੍ਤਞ੍ਹਿ ਤਤ੍ਥ

‘‘ਜਾਤਪੁਤ੍ਤਸ੍ਸ ਮੇ ਸੁਤ੍ਵਾ, ਪਿਤੁ ਛਨ੍ਦੋ ਅਯਂ ਅਹੁ;

ਦਦਾਮਹਂ ਕੁਮਾਰਸ੍ਸ, ਵੀਸਕੋਟੀ ਅਨੂਨਕਾ’’ਤਿ.

ਇਮਿਨਾ ਪਾਲ਼ਿਨਯੇਨ ‘‘ਕੋਟਿਵੀਸੋ’’ਤਿ ਵਤ੍ਤਬ੍ਬੇ ‘‘ਚਕ੍ਕਵਾਲ਼’’ਨ੍ਤਿਆਦੀਸੁ ਵਿਯ ਟਕਾਰਸ੍ਸ ਲ਼ਕਾਰਂ ਕਤ੍ਵਾ ਕੋਲ਼ਿਵੀਸੋਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਅਞ੍ਜਨਵਣ੍ਣਾਨੀਤਿ ਅਞ੍ਜਨਸ੍ਸ ਵਣ੍ਣੋ ਵਿਯ ਵਣ੍ਣੋ ਏਤੇਸਨ੍ਤਿ ਅਞ੍ਜਨਵਣ੍ਣਾਨਿ. ਲੋਮਾਨਿ ਜਾਤਾਨਿ ਹੋਨ੍ਤੀਤਿ ਸਮ੍ਬਨ੍ਧੋ. ਸੋਤਿ ਸੋਣੋ. ਠਪੇਸਿ ਕਿਰਾਤਿ ਸਮ੍ਬਨ੍ਧੋ. ਤੇਹੀਤਿ ਅਸੀਤਿਸਹਸ੍ਸਪੁਰਿਸੇਹਿ. ਪਣ੍ਣਸਾਲਨ੍ਤਿ ਪਣ੍ਣੇਨ ਛਾਦਿਤਂ, ਤੇਨ ਚ ਪਰਿਕ੍ਖਿਤ੍ਤਂ ਸਾਲਂ. ਉਣ੍ਣਪਾਵਾਰਣਨ੍ਤਿ ਉਣ੍ਣਮਯਂ ਉਤ੍ਤਰਾਸਙ੍ਗਂ. ਪਾਦਪੁਞ੍ਛਨਿਕਨ੍ਤਿ ਪਾਦਂ ਪੁਞ੍ਛਤਿ ਸੋਧੇਤਿ ਅਨੇਨਾਤਿ ਪਾਦਪੁਞ੍ਛਨਿਯਂ, ਤਦੇਵ ਪਾਦਪੁਞ੍ਛਨਿਕਂ. ਸਬ੍ਬੇਵਾਤਿ ਸੋਣੇਨ ਸਹ ਅਸੀਤਿਸਹਸ੍ਸਪੁਰਿਸਾ ਏਵ. ਤਸ੍ਸ ਚਾਤਿ ਸੋਣਸ੍ਸ ਚ. ਪੁਬ੍ਬਯੋਗੋਤਿ ਪੁਬ੍ਬੂਪਾਯੋ.

ਅਸੀਤਿਗਾਮਿਕਸਹਸ੍ਸਾਨੀਤਿ ਏਤ੍ਥ ਗਾਮੇਸੁ ਵਸਨ੍ਤੀਤਿ ਗਾਮਿਕਾ, ਤੇਸਂ ਅਸੀਤਿਸਹਸ੍ਸਾਨਿ ਅਸੀਤਿਗਾਮਿਕਸਹਸ੍ਸਾਨੀਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਤੇਸੂ’’ਤਿਆਦਿ. ਤਤ੍ਥ ‘‘ਕੁਲਪੁਤ੍ਤਾਨ’’ਨ੍ਤਿ ਇਮਿਨਾ ਵਸਨ੍ਤ੍ਯਤ੍ਥੇ ਪਵਤ੍ਤਸ੍ਸ ਣਿਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ‘‘ਅਸੀਤਿਸਹਸ੍ਸਾਨੀ’’ਤਿ ਇਮਿਨਾ ਸਦ੍ਦਨ੍ਤਰੋਪਿ ਅਸੀਤਿਸਹਸ੍ਸਸਦ੍ਦਾਨਂ ਸਮਾਸਭਾਵਂ ਦਸ੍ਸੇਤਿ. ਕੇਨਚਿਦੇਵਾਤਿ ਏਤ੍ਥ ‘‘ਕੇਨਚਿ ਇਵਾ’’ਤਿ ਪਦਵਿਭਾਗਂ ਕਤ੍ਵਾ ਦਕਾਰੋ ਪਦਸਨ੍ਧਿਮਤ੍ਤੋ, ਇਵਸਦ੍ਦੋ ਉਪਮਤ੍ਥੋਤਿ ਆਹ ‘‘ਕੇਨਚਿ ਕਰਣੀਯੇਨ ਵਿਯਾ’’ਤਿ. ਅਥ ਵਾ ‘‘ਨ ਪਨਾ’’ਤਿਆਦਿਨਾ ਏਵਫਲਸ੍ਸ ਦਸ੍ਸਿਤਤ੍ਤਾ ‘‘ਕੇਨਚਿ ਏਵਾ’’ਤਿ ਪਦਚ੍ਛੇਦਂ ਕਤ੍ਵਾ ਏਵਤ੍ਥੋਪਿ ਯੁਜ੍ਜਤੇਵਾਤਿ ਦਟ੍ਠਬ੍ਬਂ. ਅਸ੍ਸਾਤਿ ਬਿਮ੍ਬਿਸਾਰਰਞ੍ਞੋ. ਤਸ੍ਸਾਤਿ ਸੋਣਸ੍ਸ. ਦਸ੍ਸਨਾਯ ਅਞ੍ਞਤ੍ਰ ਕਿਞ੍ਚਿ ਕਰਣੀਯਂ ਨ ਅਤ੍ਥੀਤਿ ਯੋਜਨਾ. ਰਾਜਾਤਿ ਬਿਮ੍ਬਿਸਾਰੋ ਰਾਜਾ, ਸਨ੍ਨਿਪਾਤਾਪੇਸੀਤਿ ਸਮ੍ਬਨ੍ਧੋ. ਦਿਟ੍ਠਧਮ੍ਮਿਕੇ ਅਤ੍ਥੇਤਿ ਏਤ੍ਥ ਦਿਟ੍ਠਧਮ੍ਮਸਦ੍ਦੋ ਇਧਲੋਕਤ੍ਥੋ, ਇਕਸਦ੍ਦੋ ਹਿਤਤ੍ਥੇ ਪਵਤ੍ਤੋਤਿ ਆਹ ‘‘ਇਧਲੋਕਹਿਤੇ’’ਤਿ. ‘‘ਅਮ੍ਹਾਕ’’ਨ੍ਤਿ ਇਮਿਨਾ ‘‘ਸੋ ਨੋ ਭਗਵਾ’’ਤਿ ਏਤ੍ਥ ਨੋਸਦ੍ਦੋ ਅਮ੍ਹਸਦ੍ਦਕਾਰਿਯੋਤਿ ਦਸ੍ਸੇਤਿ. ਅਮ੍ਹਾਕਂ ਸੋ ਭਗਵਾਤਿ ਯੋਜਨਾ. ਸਮ੍ਪਰਾਯਿਕੇਤਿ ਪਰਲੋਕਹਿਤੇ.

‘‘ਜਾਨਾਪੇਮੀ’’ਤਿ ਇਮਿਨਾ ‘‘ਪਟਿਵੇਦੇਮੀ’’ਤਿ ਏਤ੍ਥ ਵਿਦਧਾਤੁਯਾ ਞਾਣਤ੍ਥਂ ਦਸ੍ਸੇਤਿ. ਪਟਿਕਾਯ ਨਿਮੁਜ੍ਜਿਤ੍ਵਾਤਿ ਏਤ੍ਥ ਪਟਿਕਾਸਦ੍ਦੋ ਅਡ੍ਢੇਨ੍ਦੁਪਾਸਾਣਵਾਚਕੋਤਿ ਆਹ ‘‘ਅਡ੍ਢਚਨ੍ਦਪਾਸਾਣੇ’’ਤਿ. ਸੋ ਹਿ ਪਟਤਿ ਅਡ੍ਢਭਾਵਂ ਗਚ੍ਛਤੀਤਿ ਪਟਿਕਾਤਿ ਵੁਚ੍ਚਤਿ. ਪਟਿਕਾਸਦ੍ਦੋਯਂ ਅਤ੍ਥਰਣਵਿਸੇਸੇਪਿ ਵਤ੍ਤਤਿ. ਯਸ੍ਸ ਦਾਨੀਤਿ ਏਤ੍ਥ ਯਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਤੇਸਂ ਹਿਤਕਰਣੀਯਤ੍ਥਸ੍ਸਾ’’ਤਿ. ਇਮਿਨਾ ਅਯਂ ਯਂਸਦ੍ਦੋ ਨ ਤਂਸਦ੍ਦਾਪੇਕ੍ਖੋਤਿ ਦਸ੍ਸੇਤਿ. ਅਥ ਵਾ ਯਸ੍ਸਾਤਿ ਯੋ ਅਸ੍ਸ. ਅਸ੍ਸ ਤੇਸਂ ਹਿਤਕਰਣੀਯਤ੍ਥਸ੍ਸ ਯੋ ਕਾਲੋ ਅਤ੍ਥਿ, ਤਂ ਕਾਲਂ ਭਗਵਾ ਜਾਨਾਤੀਤਿ ਯੋਜਨਾ. ਤੇਸਨ੍ਤਿ ਅਸੀਤਿਗਾਮਿਕਸਹਸ੍ਸਾਨਂ. ਪਚ੍ਛਾਯਾਯਨ੍ਤਿ ਏਤ੍ਥ ਪਕਾਰੋ ਪਚ੍ਚਨ੍ਤਤ੍ਥਵਾਚਕੋਤਿ ਆਹ ‘‘ਵਿਹਾਰਪਚ੍ਚਨ੍ਤੇ ਛਾਯਾਯ’’ਨ੍ਤਿ. ਸਮ੍ਮਨਾਹਰਨ੍ਤੀਤਿ ਸਂ ਪੁਨਪ੍ਪੁਨਂ ਮਨਸਾਗਤਂ ਅਭਿਮੁਖਂ ਹਰਨ੍ਤੀਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੁਨਪ੍ਪੁਨਂ ਮਨਸਿਕਰੋਨ੍ਤੀ’’ਤਿ. ‘‘ਪਸਾਦਵਸੇਨਾ’’ਤਿ ਇਮਿਨਾ ‘‘ਕੋਧਵਸੇਨਾ’’ਤਿਆਦੀਨਿ ਪਟਿਕ੍ਖਿਪਤਿ. ‘‘ਪੁਨ ਵਿਸਿਟ੍ਠਤਰ’’ਨ੍ਤਿ ਇਮਿਨਾ ਭਿਯ੍ਯੋਸੋ ਮਤ੍ਤਾਯਾਤਿ ਨਿਪਾਤਸ੍ਸ ਅਤ੍ਥਂ ਦਸ੍ਸੇਤਿ.

ਸੋਣਸ੍ਸ ਪਬ੍ਬਜ੍ਜਾਕਥਾ

੨੪੩. ‘‘ਮਕ੍ਖਿਤੋ’’ਤਿ ਇਮਿਨਾ ਫੁਰਤਿ ਵਿਪ੍ਫਾਰਤਿ ਬ੍ਯਾਪੇਤੀਤਿ ਫੁਟੋਤਿ ਵੁਤ੍ਤੇ ਫੁਰਧਾਤੁਯਾ ਵਿਪ੍ਫਾਰਣਂ ਨਾਮ ਮਕ੍ਖਿਤਤ੍ਥੋਤਿ ਦਸ੍ਸੇਤਿ. ਯਤ੍ਥਾਤਿ ਯਸ੍ਮਿਂ ਠਾਨੇ. ਇਮਿਨਾ ਗਾਵੋ ਆਹਨਨ੍ਤਿ ਏਤ੍ਥਾਤਿ ਗਵਾਘਾਤਨਨ੍ਤਿ ਅਤ੍ਥਂ ਦਸ੍ਸੇਭਿ. ਤਨ੍ਤਿਸ੍ਸਰੇਤਿ ਤਨ੍ਤਿਯਾ ਗੁਣਸ੍ਸ ਸਰੇ. ਵਾਦਨਕੁਸਲੋਤਿ ਵਾਦਨੇ ਕੁਸਲੋ. ਖਰਮੁਚ੍ਛਿਤਾਤਿ ਖਰੇਨ ਮੁਚ੍ਛਿਤਾ. ‘‘ਸਰਸਮ੍ਪਨ੍ਨਾ’’ਤਿ ਇਮਿਨਾ ਸਰੋ ਏਤਿਸ੍ਸਮਤ੍ਥੀਤਿ ਸਰਵਤੀ, ਵੀਣਾਤਿ ਦਸ੍ਸੇਤਿ. ਕਮ੍ਮਞ੍ਞਾਤਿ ਏਤ੍ਥ ਕਮ੍ਮਸਦ੍ਦਤੋ ਖਮਤ੍ਥੇ ਞ੍ਞਪਚ੍ਚਯੋਤਿ ਆਹ ‘‘ਕਮ੍ਮਕ੍ਖਮਾ’’ਤਿ. ਮਨ੍ਦਮੁਚ੍ਛਨਾਤਿ ਮਨ੍ਦੇਨ ਮੁਚ੍ਛਨਾ. ਸਮੇ ਗੁਣੇਤਿ ਏਤ੍ਥ ਸਮੋ ਨਾਮ ਮਜ੍ਝਿਮੋ, ਗੁਣੋ ਨਾਮ ਮੁਖ੍ਯਤੋ ਵੀਣਾਯ ਜਿਯਾ, ਉਪਚਾਰਤੋ ਸਰੋਤਿ ਆਹ ‘‘ਮਜ੍ਝਿਮੇ ਸਰੇ’’ਤਿ. ਵੀਰਿਯਸਮਥਨ੍ਤਿ ਏਤ੍ਥ ਵੀਰਿਯਞ੍ਚ ਸਮਥੋ ਚਾਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਵੀਰਿਯਸਮ੍ਪਯੁਤ੍ਤਂ ਸਮਥ’’ਨ੍ਤਿ. ਇਮਿਨਾ ਵੀਰਿਯੇਨ ਸਮ੍ਪਯੁਤ੍ਤਂ ਸਮਥਂ ਵੀਰਿਯਸਮਥਨ੍ਤਿ ਦਸ੍ਸੇਤਿ. ‘‘ਵੀਰਿਯਂ ਸਮਥੇਨ ਯੋਜੇਹੀ’’ਤਿ ਇਮਿਨਾ ਵੀਰਿਯੇਨ ਸਮਥਂ ਯੋਜੇਹੀਤਿ ਅਤ੍ਥੋਪਿ ਦਸ੍ਸਿਤੋਤਿ ਦਟ੍ਠਬ੍ਬਂ. ਇਨ੍ਦ੍ਰਿਯਾਨਞ੍ਚ ਸਮਤਨ੍ਤਿ ਏਤ੍ਥ ਸਦ੍ਧਾਦੀਨਿ ਪਞ੍ਚਿਨ੍ਦ੍ਰਿਯਾਨੇਵ ਗਹੇਤਬ੍ਬਾਨਿ, ਨ ਅਞ੍ਞਾਨੀਤਿ ਦਸ੍ਸੇਨ੍ਤੋ ਆਹ ‘‘ਸਦ੍ਧਾਦੀਨਂ ਇਨ੍ਦ੍ਰਿਯਾਨ’’ਨ੍ਤਿ. ‘‘ਸਮਭਾਵ’’ਨ੍ਤਿ ਇਮਿਨਾ ਤਾਪਚ੍ਚਯੋ ਭਾਵਤ੍ਥੇ ਹੋਤੀਤਿ ਦਸ੍ਸੇਤਿ. ਤਤ੍ਥਾਤਿ ‘‘ਇਨ੍ਦ੍ਰਿਯਾਨਂ ਸਮਤ’’ਨ੍ਤਿਪਾਠੇ, ਸਦ੍ਧਾਦੀਸੁ ਇਨ੍ਦ੍ਰਿਯੇਸੁ ਵਾ. ਤਤ੍ਥ ਚ ਨਿਮਿਤ੍ਤਂ ਗਣ੍ਹਾਹੀਤਿ ਏਤ੍ਥ ਭਾਵੇਨਭਾਵਲਕ੍ਖਣੇ ਥਪਚ੍ਚਯੋ ਹੋਤੀਤਿ ਆਹ ‘‘ਤਸ੍ਮਿਂ ਸਮਥੇ ਸਤੀ’’ਤਿ. ਆਦਾਸੇ ਸਤਿ ਮੁਖਬਿਮ੍ਬੇਨ ਕਤ੍ਤੁਭੂਤੇਨ ਉਪ੍ਪਜ੍ਜਿਤਬ੍ਬਂ ਇਵ, ਤਸ੍ਮਿਂ ਸਮਥੇ ਸਤਿ ਯੇਨ ਨਿਮਿਤ੍ਤੇਨ ਕਤ੍ਤੁਭੂਤੇਨ ਉਪ੍ਪਜ੍ਜਿਤਬ੍ਬਨ੍ਤਿ ਯੋਜਨਾ. ਸਮਥਸ੍ਸ ਨਿਮਿਤ੍ਤਂ ਸਮਥਨਿਮਿਤ੍ਤਂ, ਇਨ੍ਦ੍ਰਿਯਾਨਂ ਸਮਭਾਵੋ. ਏਸੇਵ ਨਯੋ ਸੇਸੇਸੁਪਿ. ਸਮਥਨਿਮਿਤ੍ਤਾਦੀਨਿ ਚਤ੍ਤਾਰਿ ਏਕਸੇਸੇਨ ਵਾ ਸਾਮਞ੍ਞਨਿਦ੍ਦੇਸੇਨ ਵਾ ‘‘ਨਿਮਿਤ੍ਤ’’ਨ੍ਤਿ ਵੁਚ੍ਚਤਿ.

੨੪੪. ਅਞ੍ਞਂ ਬ੍ਯਾਕਰੇਯ੍ਯਨ੍ਤਿ ਏਤ੍ਥ ਅਞ੍ਞਂ ਬ੍ਯਾਕਰੋਨ੍ਤੋ ਅਤ੍ਤਾਨਂ ‘‘ਅਰਹਾ ਅਹ’’ਨ੍ਤਿ ਜਾਨਾਪੇਤੀਤਿ ਆਹ ‘‘ਅਰਹਾ ਅਹ’’ਨ੍ਤਿ ਜਾਨਾਪੇਯ੍ਯ’’ਨ੍ਤਿ. ਛ ਠਾਨਾਨੀਤਿ ਏਤ੍ਥ ਠਾਨਸਦ੍ਦੋ ਕਾਰਣਤ੍ਥੋਤਿ ਆਹ ‘‘ਛ ਕਾਰਣਾਨੀ’’ਤਿ. ‘‘ਪਟਿਵਿਜ੍ਝਿਤ੍ਵਾ’’ਤਿਆਦਿਨਾ ਅਧਿਮੁਤ੍ਤੋਤਿ ਪਦਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਸਦ੍ਦਤ੍ਥੋ ਪਨ ਅਧਿਮੁਚ੍ਚਤੀਤਿ ਅਧਿਮੁਤ੍ਤੋਤਿ ਦਟ੍ਠਬ੍ਬੋ. ਅਰਹਤ੍ਤਂ ਵੁਚ੍ਚਤੀਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਅਸਮ੍ਮੋਹੋਤੀਤਿ ਏਤ੍ਥ ਆਕਾਰਤ੍ਥਵਾਚਕੋ ਇਤਿਸਦ੍ਦੋ ਪੁਬ੍ਬਪਦੇਸੁਪਿ ਯੋਜੇਤ੍ਵਾ ‘‘ਨੇਕ੍ਖਮਂ ਇਤਿ ਵੁਚ੍ਚਤੀ’’ਤਿਆਦਿਨਾ ਯੋਜਨਾ ਕਾਤਬ੍ਬਾ.

‘‘ਪਟਿਵੇਧਰਹਿਤ’’ਨ੍ਤਿ ਇਮਿਨਾ ਕੇਵਲਂ ਸਦ੍ਧਾਮਤ੍ਤਕਨ੍ਤਿ ਏਤ੍ਥ ਮਤ੍ਤਸਦ੍ਦਸ੍ਸ ਨਿਵਤ੍ਤੇਤਬ੍ਬਤ੍ਥਂ ਦਸ੍ਸੇਤਿ. ਪਟਿਵੇਧਪਞ੍ਞਾਯਾਤਿ ਮਗ੍ਗਪਞ੍ਞਾਯ. ‘‘ਅਸਮ੍ਮਿਸ੍ਸ’’ਨ੍ਤਿ ਇਮਿਨਾ ਕੇਵਲਸਦ੍ਦਸ੍ਸ ਅਸਮ੍ਮਿਸ੍ਸਤ੍ਥਂ ਦਸ੍ਸੇਤਿ. ਪਟਿਚਯਨ੍ਤਿ ਏਤ੍ਥ ਪਟਿਸਦ੍ਦੋ ਅਨੁਪਚ੍ਛਿਨ੍ਨਤ੍ਥੋ, ਚਿਧਾਤੁ ਵਡ੍ਢਨਤ੍ਥੋਤਿ ਆਹ ‘‘ਪੁਨਪ੍ਪੁਨਂ ਕਰਣੇਨ ਵਡ੍ਢਿ’’ਨ੍ਤਿ, ਮਗ੍ਗਪਟਿਵੇਧੇਨ ਵੀਤਰਾਗਤ੍ਤਾਯੇਵਾਤਿ ਸਮ੍ਬਨ੍ਧੋ. ਤਨ੍ਨਿਨ੍ਨਮਾਨਸੋਯੇਵਾਤਿ ਤਸ੍ਮਿਂ ਫਲਸਮਾਪਤ੍ਤਿਵਿਹਾਰੇ ਨਿਨ੍ਨਮਾਨਸੋ ਏਵ.

ਲਾਭਸਕ੍ਕਾਰਸਿਲੋਕਨ੍ਤਿ ਏਤ੍ਥ ਲਭਨਂ ਲਾਭੋ, ਸੁਟ੍ਠੁ ਕਰਣਂ ਸਕ੍ਕਾਰੋ, ਸਿਲੋਕਨਂ ਵਣ੍ਣਭਣਨਂ ਸਿਲੋਕੋ, ਲਾਭੋ ਚ ਸਕ੍ਕਾਰੋ ਚ ਸਿਲੋਕੋ ਚ ਲਾਭਸਕ੍ਕਾਰਸਿਲੋਕਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਚਤੁਪਚ੍ਚਯਲਾਭਞ੍ਚਾ’’ਤਿਆਦਿ. ਤੇਸਂਯੇਵਾਤਿ ਚਤੁਨ੍ਨਂ ਪਚ੍ਚਯਾਨਮੇਵ. ‘‘ਸੀਲਞ੍ਚ ਵਤਞ੍ਚਾ’’ਤਿ ਇਮਿਨਾ ਸੀਲਬ੍ਬਤਨ੍ਤਿਪਦਸ੍ਸ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ.

ਭੁਸਸਦ੍ਦਸ੍ਸ ਕਲਿਙ੍ਗਰਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਬਲਵਨ੍ਤੋ’’ਤਿ ‘‘ਖੀਣਾਸਵਸ੍ਸਾ’’ਤਿ ਇਮਿਨਾ ਨੇਵਸ੍ਸਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ‘‘ਗਹੇਤ੍ਵਾ’’ਤਿ ਇਮਿਨਾ ਪਰਿਯਾਦਿਯਨ੍ਤੀਤਿ ਏਤ੍ਥ ਪਰਿਪੁਬ੍ਬਆਪੁਬ੍ਬਦਾਧਾਤੁਯਾ ਗਹਣਤ੍ਥਂ ਦਸ੍ਸੇਤਿ. ਹੀਤਿ ਸਚ੍ਚਂ. ਕਿਲੇਸਾ ਕਰੋਨ੍ਤੀਤਿ ਸਮ੍ਬਨ੍ਧੋ. ਤੇਸਨ੍ਤਿ ਕਿਲੇਸਾਨਂ. ਆਨੇਞ੍ਜਪ੍ਪਤ੍ਤਨ੍ਤਿ ਏਤ੍ਥ ਇਞ੍ਜਨਂ ਕਮ੍ਪਨਂ ਇਞ੍ਜਂ, ਨ ਇਞ੍ਜਂ ਅਨੇਞ੍ਜਂ, ਤਮੇਵ ਆਨੇਞ੍ਜਂ, ਤਂ ਪਤ੍ਤਨ੍ਤਿ ਆਨੇਞ੍ਜਪ੍ਪਤ੍ਤਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਚਲਨਪ੍ਪਤ੍ਤ’’ਨ੍ਤਿ. ਵਯਞ੍ਚਾਤਿ ਚਸਦ੍ਦੋ ਅਵੁਤ੍ਤਸਮ੍ਪਿਣ੍ਡਨਤ੍ਥੋਤਿ ਆਹ ‘‘ਵਯਮ੍ਪਿ ਉਪ੍ਪਾਦਮ੍ਪੀ’’ਤਿ.

ਉਪਾਦਾਨਕ੍ਖਯਸ੍ਸਾਤਿ ਏਤ੍ਥ ਉਪਾਦਾਨਕ੍ਖਯਂ ਅਧਿਮੁਤ੍ਤਸ੍ਸਾਤਿ ਦਸ੍ਸੇਨ੍ਤੋ ਆਹ ‘‘ਉਪਯੋਗਤ੍ਥੇ ਸਾਮਿਵਚਨ’’ਨ੍ਤਿ. ‘‘ਉਪ੍ਪਾਦਞ੍ਚ ਵਯਞ੍ਚਾ’’ਤਿ ਇਮਿਨਾ ਆਯਤਨੁਪ੍ਪਾਦਨ੍ਤਿ ਏਤ੍ਥ ਉਪ੍ਪਾਦਸਦ੍ਦੇਨ ਵਯੋਪਿ ਅਵਿਨਾਭਾਵਤੋ ਗਹੇਤਬ੍ਬੋਤਿ ਦਸ੍ਸੇਤਿ. ਸਮ੍ਮਾਤਿ ਨਿਪਾਤੋ ਞਾਯਤ੍ਥੋਤਿ ਆਹ ‘‘ਹੇਤੁਨਾ ਨਯੇਨਾ’’ਤਿ. ਸਨ੍ਤਚਿਤ੍ਤਸ੍ਸਾਤਿ ਏਤ੍ਥ ਸਨ੍ਤਸਦ੍ਦਸ੍ਸ ਖੇਦਾਦੀਸੁਪਿ ਪਵਤ੍ਤਤ੍ਤਾ ਇਧ ਨਿਬ੍ਬੁਤਤ੍ਥੇ ਵਤ੍ਤਤੀਤਿ ਆਹ ‘‘ਨਿਬ੍ਬੁਤਚਿਤ੍ਤਸ੍ਸਾ’’ਤਿ. ਅਨੁਨਯਪਟਿਘੇਹੀਤਿ ਅਨੁ ਪੁਨਪ੍ਪੁਨਂ ਆਰਮ੍ਮਣੇ ਚਿਤ੍ਤਂ ਨੇਤੀਤਿ ਅਨੁਨਯੋ, ਰਾਗੋ, ਆਰਮ੍ਮਣੇ ਪਟਿਹਞ੍ਞਤੀਤਿ ਪਟਿਘੋ, ਦੋਸੋ, ਅਨੁਨਯੋ ਚ ਪਟਿਘੋ ਚ ਅਨੁਨਯਪਟਿਘਾ, ਤੇਹਿ. ਇਟ੍ਠੇ ਅਨੁਨਯੋ, ਅਨਿਟ੍ਠੇ ਪਟਿਘੋ ਹੋਤੀਤਿ ਸਮ੍ਬਨ੍ਧੋ ਦਟ੍ਠਬ੍ਬੋ.

੧੪੮. ਦਿਗੁਣਾਦਿਉਪਾਹਨਪਟਿਕ੍ਖੇਪਕਥਾ

੨੪੫. ਅਞ੍ਞਂ ਬ੍ਯਾਕਰੋਨ੍ਤੀਤਿ ਏਤ੍ਥ ਅਞ੍ਞਸਦ੍ਦੋ ਸਬ੍ਬਨਾਮਸੁਦ੍ਧਨਾਮਵਸੇਨ ਦੁਵਿਧੋ. ਤੇਸੁ ਇਧ ਸੁਦ੍ਧਨਾਮਂ, ਤਂ ਪਨ ਬਾਲੇ ਚ ਦਾਰਕੇ ਚ ਅਰਹਤ੍ਤੇ ਚ ਪਵਤ੍ਤਤਿ, ਇਧ ਪਨ ਅਰਹਤ੍ਤੇਤਿ ਦਸ੍ਸੇਨ੍ਤੋ ਆਹ ‘‘ਅਰਹਤ੍ਤਂ ਬ੍ਯਾਕਰੋਨ੍ਤੀ’’ਤਿ. ਯੇਨਾਤਿ ਸਭਾਵੇਨ. ਅਰਹਾਤਿ ਞਾਯਤੀਤਿ ਅਰਹਾਇਤਿ ਅਤ੍ਥੋ ਞਾਯਤਿ. ਸੋਤਿ ਸਭਾਵੋ. ਸੁਤ੍ਤਵਣ੍ਣਨਾਤੋਯੇਵਾਤਿ ਅਙ੍ਗੁਤ੍ਤਰਟ੍ਠਕਥਾਤੋ ਏਵ. ਨ ਉਪਨੀਤੋਤਿ ਨ ਉਪਰਿ ਨੀਤੋ. ਏਕਚ੍ਚੇ ਮੋਘਪੁਰਿਸਾਤਿ ਏਕਚ੍ਚੇਸਦ੍ਦੋ ਅਞ੍ਞੇਪਰਿਯਾਯੋ, ਮੋਘਸਦ੍ਦੋ ਤੁਚ੍ਛਵੇਵਚਨੋਤਿ ਆਹ ‘‘ਅਞ੍ਞੇ ਪਨ ਤੁਚ੍ਛਪੁਰਿਸਾ’’ਤਿ. ‘‘ਹਸਮਾਨਾ ਵਿਯਾ’’ਤਿ ਇਮਿਨਾ ਹਸਮਾਨਕਂ ਮਞ੍ਞੇਤਿ ਏਤ੍ਥ ਮਞ੍ਞੇਸਦ੍ਦੋ ਵਿਯਤ੍ਥੋਤਿ ਦਸ੍ਸੇਤਿ. ਅਸਨ੍ਤਮੇਵਾਤਿ ਅਵਿਜ੍ਜਮਾਨਂਯੇਵ. ਏਕਪਲਾਸਿਕਨ੍ਤਿ ਏਤ੍ਥ ਪਲਾਸਸਦ੍ਦੋ ਪਣ੍ਣਵਾਚਕੋ. ਪਟਲਂ ਨਾਮ ਪਣ੍ਣਂ ਵਿਯ ਹੋਤਿ, ਤਸ੍ਮਾ ‘‘ਏਕਪਟਲ’’ਨ੍ਤਿ ਵੁਤ੍ਤਂ. ਅਸੀਤਿਸਕਟਵਾਹੇਤਿ ਏਤ੍ਥ ਅਸੀਤਿ ਪਦਂ ਸਕਟਪਦੇਨ ਸਮ੍ਬਨ੍ਧਂ ਕਤ੍ਵਾ ਅਸੀਤਿਸਕਟੇਹਿ ਵਹਿਤਬ੍ਬੇਤਿ ਅਤ੍ਥੋ ਦਟ੍ਠਬ੍ਬੋ. ‘‘ਦ੍ਵੇ ਸਕਟਭਾਰਾ ਏਕੋ ਵਾਹੋ’’ਤਿ ਇਮਿਨਾ ਵਾਹਾਨਂ ਚਤ੍ਤਾਲੀਸਭਾਵਂ ਦਸ੍ਸੇਤਿ. ਸਤ੍ਤਹਤ੍ਥਿਕਞ੍ਚ ਅਨੀਕਨ੍ਤਿ ਏਤ੍ਥ ਅਨੀਕਸ੍ਸ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਛ ਹਤ੍ਥਿਨਿਯੋ ਚਾ’’ਤਿਆਦਿ. ਸਤ੍ਤਨ੍ਨਂ ਹਤ੍ਥੀਨਂ ਸਮੂਹੋ ਸਤ੍ਤਹਤ੍ਥਿਕਂ. ਸਤ੍ਤਅਨੀਕਤ੍ਤਾ ਏਕੂਨਪਞ੍ਞਾਸਹਤ੍ਥਿਨੋ ਹੋਨ੍ਤਿ. ਤੇਸੁ ਸਤ੍ਤ ਹਤ੍ਥਿਨੋ, ਦ੍ਵਾਚਤ੍ਤਾਲੀਸ ਹਤ੍ਥਿਨਿਯੋ ਹੋਨ੍ਤਿ. ਦ੍ਵਿਗੁਣਾਤਿ ਏਤ੍ਥ ਗੁਣਸਦ੍ਦੋ ਪਟਲਤ੍ਥੋਤਿ ਆਹ ‘‘ਦ੍ਵਿਪਟਲਾ’’ਤਿ. ਗੁਣਙ੍ਗੁਣੂਪਾਹਨਾਤਿ ਏਤ੍ਥ ਦ੍ਵਿਗੁਣਤਿਗੁਣਾਨਂ ਵਿਸੁਂ ਗਹਿਤਤ੍ਤਾ ਪਾਰਿਸੇਸਤੋ ਗੁਣਙ੍ਗੁਣਭਾਵਂ ਦਸ੍ਸੇਨ੍ਤੋ ਆਹ ‘‘ਚਤੁਪਟਲਤੋ ਪਟ੍ਠਾਯ ਵੁਚ੍ਚਤੀ’’ਤਿ. ਗੁਣਙ੍ਗੁਣੂਪਾਹਨਾਤਿ ਪਟਲਪਟਲਾ ਉਪਾਹਨਾ, ਬਹੁਪਟਲਾ ਉਪਾਹਨਾਤਿ ਅਤ੍ਥੋ. ਉਕਾਰੇਨ ਸਹ ਯੋਜੇਤ੍ਵਾ ਗਕਾਰੋ ਸਜ੍ਝਾਯਿਤਬ੍ਬੋ ਚ ਲਿਖਿਤਬ੍ਬੋ ਚ. ਇਦਾਨਿ ਪੋਤ੍ਥਕੇਸੁ ਪਨ ਉਕਾਰੋ ਨ ਦਿਸ੍ਸਤਿ.

੧੪੯. ਸਬ੍ਬਨੀਲਿਕਾਦਿਪਟਿਕ੍ਖੇਪਕਥਾ

੨੪੬. ਸਬ੍ਬਾਵ ਨੀਲਿਕਾਤਿ ਸਬ੍ਬਾਵ ਉਪਾਹਨਾਯੋ ਨੀਲਿਕਾ, ਸਬ੍ਬਟ੍ਠਾਨੇਸੁ ਨੀਲਮੇਤਾਸਨ੍ਤਿ ਸਬ੍ਬਨੀਲਿਕਾਤਿਪਿ ਕਾਤਬ੍ਬੋ. ਤਤ੍ਥ ਚਾਤਿ ਤੇਸੁ ਨੀਲਿਕਾਦੀਸੁ ਚ. ਉਮ੍ਮਾਰਪੁਪ੍ਫਸ੍ਸ ਵਣ੍ਣੋ ਵਿਯ ਵਣ੍ਣੋ ਏਤਿਸ੍ਸਾਤਿ ਉਮ੍ਮਾਰਪੁਪ੍ਫਵਣ੍ਣਾ. ਏਵਂ ਸੇਸੇਸੁਪਿ. ਅਦ੍ਦਾਰਿਟ੍ਠਕਵਣ੍ਣਾਤਿ ਏਤ੍ਥ ਅਦ੍ਦੋਤਿ ਅਲ੍ਲੋ. ਅਰਿਟ੍ਠੋਤਿ ਫੇਣਿਲਰੁਕ੍ਖੋ ਵਾ ਕਾਕੋ ਵਾ, ਤਸ੍ਮਾ ਅਦ੍ਦੋ ਅਲ੍ਲੋ ਅਰਿਟ੍ਠੋ ਫੇਣਿਲਰੁਕ੍ਖੋ, ਕਾਕੋ ਵਾਤਿ ਅਦ੍ਦਾਰਿਟ੍ਠੋ, ਤਦੇਵ ਅਦ੍ਦਾਰਿਟ੍ਠਕੋ, ਅਦ੍ਦਾਰਿਟ੍ਠਕਸ੍ਸ ਵਣ੍ਣੋ ਵਿਯ ਵਣ੍ਣੋ ਏਤਿਸ੍ਸਾਤਿ ਅਦ੍ਦਾਰਿਟ੍ਠਕਵਣ੍ਣਾ. ਏਤਾਸੂਤਿ ਸਬ੍ਬਨੀਲਿਕਾਦੀਸੁ. ਪੁਞ੍ਛਿਤ੍ਵਾਤਿ ਪਰਿਮਜ੍ਜਿਤ੍ਵਾ. ਅਪ੍ਪਮਤ੍ਤਕੇਨਾਪੀਤਿ ਪਿਸਦ੍ਦੋ ਸਮ੍ਭਾਵਨੇ. ਸਬ੍ਬਨੀਲਾਦਿਕੇ ਭਿਨ੍ਨੇ ਕਾ ਨਾਮ ਕਥਾਤਿ ਅਤ੍ਥੋ.

‘‘ਯਾਸਂ ਵਦ੍ਧਾਯੇਵ ਨੀਲਾ’’ਤਿ ਇਮਿਨਾ ਨੀਲਕਾ ਵਦ੍ਧਿਕਾ ਏਤਾਸਨ੍ਤਿ ਨੀਲਕਵਦ੍ਧਿਕਾਤਿ ਛਟ੍ਠੀਬਾਹਿਰਤ੍ਥਸਮਾਸਂ ਦਸ੍ਸੇਤਿ. ਵਦ੍ਧਿਕਾਤਿ ਚ ਨਦ੍ਧਿ. ਸਾ ਹਿ ਉਪਾਹਨਤਲਤੋ ਵਦ੍ਧਯਤੀਤਿ ਵਦ੍ਧਿਕਾਤਿ ਚ ਉਪਾਹਨਤਲਂ ਬਨ੍ਧਤਿ ਇਮਾਯਾਤਿ ਵਦ੍ਧਿਕਾਤਿ ਚ ਵੁਚ੍ਚਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਪੀਤਕਵਦ੍ਧਿਕਾਦੀਸੁ. ਏਤਾਯੋਪੀਤਿ ਨੀਲਕਵਦ੍ਧਿਕਾਦਿਕਾ ਉਪਾਹਨਾਯੋਪਿ. ਤਲੇਤਿ ਉਪਾਹਨਾਯ ਤਲੇ. ‘‘ਖਲ੍ਲਕਂ ਬਨ੍ਧਿਤ੍ਵਾ’’ਤਿ ਇਮਿਨਾ ਖਲ੍ਲਕੇਨ ਬਨ੍ਧਿਤਬ੍ਬਾਤਿ ਖਲ੍ਲਕਬਦ੍ਧਾਤਿ ਵਚਨਤ੍ਥਂ ਦਸ੍ਸੇਤਿ. ਯੋਨਕਉਪਾਹਨਾਤਿ ਯੋਨਕਜਾਤੀਨਂ ਮਨੁਸ੍ਸਾਨਂ ਉਪਾਹਨਾ. ਪਲਿਗੁਣ੍ਠੇਤ੍ਵਾਤਿ ਪਰਿਸਮਨ੍ਤਤੋ ਵੇਠੇਤ੍ਵਾ. ‘‘ਉਪਰਿ…ਪੇ… ਜਙ੍ਘ’’ਨ੍ਤਿ ਇਮਿਨਾ ਪੁਟਬਦ੍ਧਤੋ ਵਿਸੇਸਂ ਦਸ੍ਸੇਤਿ. ਤੂਲਪਿਚੁਨਾਤਿ ਤੂਲਸਙ੍ਖਾਤੇਨ ਪਿਚੁਨਾ. ‘‘ਤਿਤ੍ਤਿਰਪਤ੍ਤਸਦਿਸਾ’’ਤਿ ਇਮਿਨਾ ਤਿਤ੍ਤਿਰਸ੍ਸ ਪਤ੍ਤਂ ਵਿਯ ਤਿਤ੍ਤਿਰਪਤ੍ਤਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਤਿਤ੍ਤਿਰੋਤਿ ਚ ਏਕੋ ਸਕੁਣਵਿਸੇਸੋ. ਕਣ੍ਣਿਕਟ੍ਠਾਨੇਤਿ ਦ੍ਵਿਨ੍ਨਂ ਵਦ੍ਧਿਕਾਨਂ ਏਕਤੋ ਸਮਾਗਮਟ੍ਠਾਨੇ. ‘‘ਮੇਣ੍ਡ…ਪੇ… ਕਤਾ’’ਤਿ ਇਮਿਨਾ ਮੇਣ੍ਡਸ੍ਸ ਵਿਸਾਣੇਨ ਸਦਿਸਾ ਵਦ੍ਧਿਕਾ ਏਤਾਸਨ੍ਤਿ ਮੇਣ੍ਡਵਿਸਾਣਵਦ੍ਧਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਤਥੇਵਾਤਿ ਯਥਾ ਮੇਣ੍ਡਅਜਸਿਙ੍ਗਸਣ੍ਠਾਨੇ ਵਦ੍ਧੇ ਯੋਜੇਤ੍ਵਾ ਕਤਾ, ਤਥੇਵਾਤਿ ਅਤ੍ਥੋ. ‘‘ਵਿਚ੍ਛਿਕਾ…ਪੇ… ਕਤਾ’’ਤਿ ਇਮਿਨਾ ਵਿਚ੍ਛਿਕਾਯ ਅਲ਼ੋ ਵਿਚ੍ਛਿਕਾਲ਼ੋ, ਸੋ ਵਿਯ ਵਦ੍ਧਿਕਾ ਏਤਾਸਨ੍ਤਿ ਵਿਚ੍ਛਿਕਾਲ਼ਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਅਲ਼ਸਦ੍ਦੋ ‘‘ਅਲ਼ਚ੍ਛਿਨ੍ਨੋ’’ਤਿਆਦੀਸੁ (ਮਹਾਵ. ੧੧੯) ਅਙ੍ਗੁਟ੍ਠਵਾਚਕੋ, ਇਧ ਪਨ ਨਙ੍ਗੁਟ੍ਠਵਾਚਕੋ, ਤਸ੍ਮਾ ਵੁਤ੍ਤਂ ‘‘ਨਙ੍ਗੁਟ੍ਠਸਣ੍ਠਾਨੇ’’ਤਿ. ਤਲੇਸੂਤਿ ਉਪਾਹਨਾਯ ਤਲੇਸੁ. ‘‘ਮੋਰ…ਪੇ… ਸਿਬ੍ਬਿਕਾ’’ਤਿ ਇਮਿਨਾ ਮੋਰਪਿਞ੍ਛੇਹਿ ਪਰਿਸਮਨ੍ਤਤੋ, ਪਰਿਕ੍ਖਿਪਿਤ੍ਵਾ ਵਾ ਸਿਬ੍ਬਿਤਾ ਮੋਰਪਿਞ੍ਛਪਰਿਸਿਬ੍ਬਿਤਾਤਿ ਵਚਨਤ੍ਥਂ ਦਸ੍ਸੇਤਿ. ਚਿਤ੍ਰਾ ਉਪਾਹਨਾਯੋਤਿ ਏਤ੍ਥ ਚਿਤ੍ਰਸਦ੍ਦੋ ਵਿਚਿਤ੍ਰਤ੍ਥੋਤਿ ਆਹ ‘‘ਵਿਚਿਤ੍ਰਾ’’ਤਿ. ਏਤਾਸੂਤਿ ਖਲ੍ਲਕਬਦ੍ਧਾਦੀਸੁ. ਵਲ਼ਞ੍ਜੇਤਬ੍ਬਾਤਿ ਪਰਿਭੁਞ੍ਜਿਤਬ੍ਬਾ. ਵਲ਼ਜਿ ਪਰਿਭੋਗੇਤਿ ਧਾਤੁਪਾਠੋ (ਸਦ੍ਦਨੀਤਿਧਾਤੁਮਾਲਾਯਂ ੧੫ ਜਕਾਰਨ੍ਤਧਾਤੁ). ਤਾਲੁਜੋ ਤਤਿਯੋ. ਤੇਸੁ ਪਨਾਤਿ ਖਲ੍ਲਕਾਦੀਸੁ ਪਨ. ਸਤਿ ਸਨ੍ਤੇਸੂਤਿ ਯੋਜਨਾ. ਸੀਹਚਮ੍ਮੇਨ ਪਰਿਕ੍ਖਿਪਿਤਬ੍ਬਾਤਿ ਸੀਹਚਮ੍ਮਪਰਿਕ੍ਖਤਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਰਿਯਨ੍ਤੇਸੂ’’ਤਿਆਦਿ. ਪਕ੍ਖਿਬਿਲ਼ਾਲੋਤਿ ਤੁਲਿਯੋ. ਸੋ ਹਿ ਪਕ੍ਖਯੁਤ੍ਤਤ੍ਤਾ ਚ ਬਿਲ਼ਾਲਮੁਖਸਦਿਸਮੁਖਤ੍ਤਾ ਚ ਪਕ੍ਖਿਬਿਲ਼ਾਲੋਤਿ ਵੁਚ੍ਚਤਿ. ਇਮਿਨਾ ਲੁਵਕਚਮ੍ਮਪਰਿਕ੍ਖਤਾਤਿ ਏਤ੍ਥ ਲੁਵਕਸਦ੍ਦੋ ਪਕ੍ਖਿਬਿਲ਼ਾਲਪਰਿਯਾਯੋਤਿ ਦਸ੍ਸੇਤਿ. ‘‘ਉਲੂਕਚਮ੍ਮਪਰਿਕ੍ਖਤਾ’’ਤਿਪਿ ਪਾਠੋ. ਏਤਾਸੁਪੀਤਿ ਸੀਹਚਮ੍ਮਪਰਿਕ੍ਖਤਾਦੀਸੁਪਿ. ਯਾ ਕਾਚਿ ਉਪਾਹਨਾਯੋਤਿ ਸਮ੍ਬਨ੍ਧੋ.

੨੪੭. ਓਮੁਕ੍ਕਨ੍ਤਿ ਏਤ੍ਥ ਅਵਤ੍ਯੂਪਸਗ੍ਗਸ੍ਸ ਵਿਯੋਗਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਟਿਮੁਞ੍ਚਿਤ੍ਵਾ ਅਪਨੀਤ’’ਨ੍ਤਿ. ਪੁਰਾਣਂ ਗੁਣਙ੍ਗੁਣੂਪਾਹਨਨ੍ਤਿ ਅਤ੍ਥੋ.

੧੫੧. ਅਜ੍ਝਾਰਾਮੇ ਉਪਾਹਨਪਟਿਕ੍ਖੇਪਕਥਾ

੨੪੮. ‘‘ਯੇਨ ਸਿਪ੍ਪੇਨਾ’’ਤਿਆਦਿਨਾ ਅਭਿ ਅਧਿਕਂ ਜੀਵਨ੍ਤਿ ਅਨੇਨਾਤਿ ਅਭਿਜੀਵਨਂ, ਕਿਂਤਂ? ਸਿਪ੍ਪਨ੍ਤਿ ਅਤ੍ਥਂ ਦਸ੍ਸੇਤਿ. ਤਸ੍ਸਾਤਿ ਸਿਪ੍ਪਸ੍ਸ. ਇਧਾਤਿ ਇਮਸ੍ਮਿਂ ਸਾਸਨੇ. ਯਂਸਦ੍ਦੋ ਵਚਨਵਿਪਲ੍ਲਾਸੋਤਿ ਆਹ ‘‘ਯੇ ਤੁਮ੍ਹੇ’’ਤਿ. ਹੀਤਿ ਸਚ੍ਚਂ. ਯਂਨਿਪਾਤੋਤਿ ਯਂਇਤਿ ਨਿਪਾਤੋ ਯਦਿਸਦ੍ਦਸ੍ਸ ਅਤ੍ਥੇ ਪਵਤ੍ਤਤੀਤਿ ਯੋਜਨਾ. ਆਚਰਿਯਾ ਏਵਾਤਿ ਏਵਸਦ੍ਦੇਨ ਆਚਰਿਯਮਤ੍ਤਭਾਵਂ ਪਟਿਕ੍ਖਿਪਤਿ. ਹੀਤਿ ਸਚ੍ਚਂ. ਸੋਤਿ ਅਵਸ੍ਸਿਕੋ. ਤਨ੍ਤਿ ਛਬ੍ਬਸ੍ਸਂ. ਨਿਸ੍ਸਾਯ ਵਚ੍ਛਤੀਤਿ ਅਵਸ੍ਸਿਕਸ੍ਸ ਚਤੁਵਸ੍ਸਕਾਲੇ ਛਬ੍ਬਸ੍ਸਸ੍ਸ ਦਸਵਸ੍ਸਿਕਤ੍ਤਾ ਤਂ ਨਿਸ੍ਸਾਯ ਵਸਤਿ. ਉਪਜ੍ਝਾਯਮਤ੍ਤਂ ਦਸ੍ਸੇਨ੍ਤੋ ਆਹ ‘‘ਉਪਜ੍ਝਾਯਸ੍ਸਾ’’ਤਿਆਦਿ. ਮਹਨ੍ਤਤਰਾਤਿ ਅਤ੍ਤਨੋ ਵੁਡ੍ਢਤਰਾ. ਉਪਜ੍ਝਾਯਸ੍ਸ ਮਤ੍ਤਂ ਪਮਾਣਮੇਤੇਸਨ੍ਤਿ ਉਪਜ੍ਝਾਯਮਤ੍ਤਾ.

੨੪੯. ਪਾਦਤੋ ਨਿਕ੍ਖਨ੍ਤੇਨ ਖੀਲਸਦਿਸੇਨ ਮਂਸੇਨ ਪਵਤ੍ਤੋ ਆਬਾਧੋ ਪਾਦਖੀਲਾਬਾਧੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਾਦਤੋ’’ਤਿਆਦਿ. ਪਾਦਤੋ ਨਿਕ੍ਖਨ੍ਤਨ੍ਤਿ ਸਮ੍ਬਨ੍ਧੋ.

੨੫੧. ਤਿਣਪਾਦੁਕਾਤਿਆਦੀਸੁ ਤਿਣੇਨ ਕਤਾ ਪਾਦੁਕਾ ਤਿਣਪਾਦੁਕਾਤਿ ਵਚਨਤ੍ਥਾਦਿਂ ਦਸ੍ਸੇਨ੍ਤੋ ਆਹ ‘‘ਯੇਨ ਕੇਨਚਿ ਤਿਣੇਨਾ’’ਤਿਆਦਿ. ਤਂ ਸੁਵਿਞ੍ਞੇਯ੍ਯਮੇਵ. ‘‘ਭੂਮਿਯਂ ਸੁਪ੍ਪਤਿਟ੍ਠਿਤਾਤਿ’’ਆਦਿਨਾ ਨ ਸਙ੍ਕਮਿਤਬ੍ਬਾਤਿ ਅਸਙ੍ਕਮਨੀਯਾਤਿ ਅਤ੍ਥਂ ਦਸ੍ਸੇਤਿ.

੨੫੨. ਅਙ੍ਗਜਾਤੇਨੇਵਾਤਿ ਅਤ੍ਤਨੋ ਅਙ੍ਗਜਾਤੇਨ ਏਵ. ਅਙ੍ਗਜਾਤਨ੍ਤਿ ਗਾਵੀਨਂ ਅਙ੍ਗਜਾਤਂ. ਓਗਾਹੇਤ੍ਵਾਤਿ ਏਤ੍ਥ ਓਤ੍ਯੂਪਸਗ੍ਗੋ ਦਲ਼੍ਹਤ੍ਥੋਤਿ ਆਹ ‘‘ਦਲ਼੍ਹਂ ਗਹੇਤ੍ਵਾ’’ਤਿ.

੧੫੩. ਯਾਨਾਦਿਪਟਿਕ੍ਖੇਪਕਥਾ

੨੫੩. ਇਤ੍ਥਿਯੁਤ੍ਤੇਨਾਤਿ ਏਤ੍ਥ ਰੂਲ਼ੀਵਸੇਨ ਧੇਨੁਪਿ ਇਤ੍ਥੀ ਨਾਮਾਤਿ ਆਹ ‘‘ਧੇਨੁਯੁਤ੍ਤੇਨਾ’’ਤਿ. ਪੁਰਿਸਨ੍ਤਰੇਨਾਤਿ ਏਤ੍ਥ ਪੁਰਿਸੋ ਏਵ ਅਨ੍ਤਰੋ ਅਞ੍ਞੋ ਏਤ੍ਥਾਤਿ ਪੁਰਿਸਨ੍ਤਰਂ ਯਾਨਂ. ਪੁਰਿਸਨ੍ਤਰੋ ਨਾਮ ਅਤ੍ਥਤੋ ਸਾਰਥੀਤਿ ਆਹ ‘‘ਪੁਰਿਸਸਾਰਥਿਨਾ’’ਤਿ, ਯਾਨੇਨਾਤਿ ਯੋਜਨਾ. ਗਙ੍ਗਾਮਹਿਯਾਯਾਤਿ ਏਤ੍ਥ ਗਙ੍ਗਾ ਚ ਮਹੀ ਚ ਗਙ੍ਗਾਮਹੀ, ਤਤ੍ਥ ਕੀਲ਼ਿਕਾ ਗਙ੍ਗਾਮਹਿਯਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਗਙ੍ਗਾਮਹੀਕੀਲ਼ਿਕਾਯਾ’’ਤਿ. ਤਤ੍ਥ ਹਿ ਇਤ੍ਥਿਪੁਰਿਸਾ ਯਾਨੇਹਿ ਉਦਕਕੀਲ਼ਂ ਕੀਲ਼ਨ੍ਤਿ. ਪੁਰਿਸਯੁਤ੍ਤਂ ਹਤ੍ਥਵਟ੍ਟਕਨ੍ਤਿ ਏਤ੍ਥ ‘‘ਅਨੁਜਾਨਾਮਿ ਭਿਕ੍ਖਵੇ ਪੁਰਿਸਯੁਤ੍ਤਞ੍ਚ ਹਤ੍ਥਵਟ੍ਟਕਞ੍ਚਾ’’ਤਿ ਦਸ੍ਸੇਨ੍ਤੋ ਆਹ ‘‘ਏਤ੍ਥਾ’’ਤਿਆਦਿ. ਤਤ੍ਥ ਪੁਰਿਸਯੁਤ੍ਤਨ੍ਤਿ ਪੁਰਿਸੇਨ ਯੁਜ੍ਜਿਤਬ੍ਬਨ੍ਤਿ ਪੁਰਿਸਯੁਤ੍ਤਂ ਯਾਨਂ. ਹਤ੍ਥਵਟ੍ਟਕਨ੍ਤਿ ਹਤ੍ਥੇਨ ਵਟ੍ਟੇਤਬ੍ਬਨ੍ਤਿ ਹਤ੍ਥਵਟ੍ਟਕਂ ਯਾਨਂ. ਯਾਨੁਗ੍ਘਾਤੇਨਾਤਿ ਯਾਨਸ੍ਸ ਉਲ੍ਲਙ੍ਘਿਤ੍ਵਾ ਗਮਨੇਨ. ਹਨਧਾਤੁ ਹਿ ਗਤ੍ਯਤ੍ਥੋ. ਤਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਾਨਂ ਅਭਿਰੁਹਨ੍ਤਸ੍ਸਾ’’ਤਿਆਦਿ. ‘‘ਤਪ੍ਪਚ੍ਚਯਾ’’ਤਿ ਇਮਿਨਾ ਯਾਨੁਗ੍ਘਾਤੇਨਾਤਿ ਏਤ੍ਥ ਹੇਤ੍ਵਤ੍ਥੇ ਕਰਣਵਚਨਨ੍ਤਿ ਦਸ੍ਸੇਤਿ. ਪੀਠਕਸਿਵਿਕਨ੍ਤਿ ਪੀਠੇਨ ਸਹ ਕਤਂ ਸਿਵਿਕਂ. ਪਟਪੋਟਲਿਕਨ੍ਤਿ ਪਟਮਯਂ ਪੋਟਲਿਕਂ.

੧੫੪. ਉਚ੍ਚਾਸਯਨਮਹਾਸਯਨਪਟਿਕ੍ਖੇਪਕਥਾ

੨੫੪. ਉਚ੍ਚਂ ਆਸਯਨਂ ਉਚ੍ਚਾਸਯਨਂ. ਮਹਨ੍ਤਂ ਆਸਯਨਂ ਮਹਾਸਯਨਂ. ਆਸਨ੍ਦਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਪਮਾਣਾਤਿਕ੍ਕਨ੍ਤਾਸਨਨ੍ਤਿ ਦੀਘਾਸਨਂ. ਤਞ੍ਹਿ ਆਗਮ੍ਮ ਸਦਤਿ ਨਿਸੀਦਤੀਤਿ ਏਤ੍ਥ, ਆਯਤਂ ਵਾ ਸੁਟ੍ਠੁਂ ਦਦਾਤੀਤਿ ਆਸਨ੍ਦੀਤਿ ਵੁਚ੍ਚਤਿ. ਵਾਲ਼ਰੂਪਾਨੀਤਿ ਸੀਹਬ੍ਯਗ੍ਘਾਦਿਵਾਲ਼ਰੂਪਾਨਿ. ਪਾਦੇਸੁ ਵਾਲ਼ਰੂਪਾਨਿ ਪਰਿਚ੍ਛਿਨ੍ਦਿਤ੍ਵਾ ਅਙ੍ਕੀਯਤਿ ਲਕ੍ਖੀਯਤੀਤਿ ਪਲ੍ਲਙ੍ਕੋ. ਗੋਨਕੋਤਿ ਗਵਤਿ ਦੀਘਲੋਮੇਹਿ ਉਗ੍ਗਚ੍ਛਤਿ ਏਤ੍ਥਾਤਿ ਗੋਨਕੋ. ਕੋਜਵੋਤਿ ਕੁਯਂ ਭੂਮਿਯਂ ਜਵਤਿ ਗਚ੍ਛਤੀਤਿ ਕੋਜਵੋ. ਤਸ੍ਸਾਤਿ ਗੋਨਕਸ੍ਸ. ਲੋਮਾਨਿ ਚਤੁਰਙ੍ਗੁਲਾਧਿਕਾਨਿ ਹੋਨ੍ਤਿ ਕਿਰਾਤਿ ਯੋਜਨਾ. ਵਾਨਚਿਤ੍ਰਉਣ੍ਣਾਮਯਤ੍ਥਰਣੋਤਿ ਵਾਨੇਨ ਸਿਬ੍ਬਨੇਨ ਸਞ੍ਜਾਤਂ ਚਿਤ੍ਰਰੂਪਮੇਤ੍ਥਾਤਿ ਵਾਨਚਿਤ੍ਰਂ, ਉਣ੍ਣਾਯ ਨਿਬ੍ਬਤ੍ਤੋ ਉਣ੍ਣਾਮਯੋ, ਸੋਯੇਵ ਅਤ੍ਥਰਣੋ ਉਣ੍ਣਾਮਯਤ੍ਥਰਣੋ, ਵਾਨਚਿਤ੍ਰਞ੍ਚ ਤਂ ਉਣ੍ਣਾਮਯਤ੍ਥਰਣੋ ਚੇਤਿ ਵਾਨਚਿਤ੍ਰਉਣ੍ਣਾਮਯਤ੍ਥਰਣੋ. ਸੇਤਤ੍ਥਰਣੋਤਿ ਸੇਤਤ੍ਥਿਕੇਹਿ ਸੇਵੀਯਤੀਤਿ ਸੋਤੋ, ਸੋਯੇਵ ਅਤ੍ਥਰਣੋ ਸੇਤਤ੍ਥਰਣੋ. ਇਮਿਨਾ ਅਤ੍ਥੇਨ ਪਟਤਿ ਸੇਤਭਾਵਂ ਗਚ੍ਛਤੀਤਿ ਪਟਿਕਾਤਿ ਕਾਤਬ੍ਬਂ. ਪਟਿਕਾਸਦ੍ਦੋਯਂ ਅਡ੍ਢੇਨ੍ਦੁਪਾਸਾਣੇਪਿ ਪਵਤ੍ਤਤਿ. ਘਨਪੁਪ੍ਫਕੋਤਿ ਘਨਂ ਕਥਿਨਂ ਪੁਪ੍ਫਮੇਤ੍ਥਾਤਿ ਘਨਪੁਪ੍ਫਕੋ. ਇਮਿਨਾ ਘਨਪੁਪ੍ਫਸਙ੍ਖਾਤਂ ਪਟਲਮੇਤ੍ਥ ਅਤ੍ਥੀਤਿ ਪਟਲਿਕਾਤਿ ਦਸ੍ਸੇਤਿ. ਸੋਤਿ ਅਤ੍ਥਰਣੋ. ਆਮਲਕਪਟੋਤਿ ਆਮਲਕਪੁਪ੍ਫਂ ਦਸ੍ਸੇਤ੍ਵਾ ਕਤੋ ਪਟੋ. ਤੂਲਿਕਾਤਿ ਤੂਲਂ ਪੂਰੇਤ੍ਵਾ ਕਤਾ ਤੂਲਿਕਾ. ਵਿਕਤਿਕਾਤਿ ਸੀਹਬ੍ਯਗ੍ਘਾਦਿਰੂਪੇਹਿ (ਦੀ. ਨਿ. ਅਟ੍ਠ. ੧.੧੫) ਵਿਚਿਤ੍ਤਾਕਾਰੇਨ ਕਰੀਯਤੀਤਿ ਵਿਕਤਿਕਾ. ਦੀਘਨਿਕਾਯਟ੍ਠਕਥਾਯਂ ‘‘ਉਦ੍ਦਲੋਮੀਤਿ ਉਭਤੋਦਸਂ ਉਣ੍ਣਾਮਯਤ੍ਥਰਣਂ. ਏਕਨ੍ਤਲੋਮੀਤਿ ਏਕਤੋਦਸਂ ਉਣ੍ਣਾਮਯਤ੍ਥਰਣ’’ਨ੍ਤਿ ਵੁਤ੍ਤਂ. ਇਧ ਪਨ ‘‘ਉਦ੍ਦਲੋਮੀਤਿ ਏਕਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣਂ, ਏਕਨ੍ਤਲੋਮੀਤਿ ਉਭਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣ’’ਨ੍ਤਿ ਵੁਤ੍ਤਂ. ਤਸ੍ਮਾ ਦ੍ਵੇ ਅਟ੍ਠਕਥਾਯੋ ਅਞ੍ਞਮਞ੍ਞਂ ਵਿਸਦਿਸਾ ਹੋਨ੍ਤਿ. ਏਤ੍ਥ ਦੀਘਨਿਕਾਯਟ੍ਠਕਥਾਨਯੇਨ ਵਚਨਤ੍ਥਂ ਕਰਿਸ੍ਸਾਮਿ. ਉਟ੍ਠਿਤਂ ਦ੍ਵੀਹਿ ਪਕ੍ਖੇਹਿ, ਦ੍ਵੀਸੁ ਵਾ ਦਸਾਸਙ੍ਖਾਤਂ ਲੋਮਮੇਤ੍ਥਾਤਿ ਉਦ੍ਦਲੋਮੀ. ਨਿਗ੍ਗਹਿਤਾਗਮਂ ਕਤ੍ਵਾ ‘‘ਉਨ੍ਦਲੋਮੀ’’ਤਿਪਿ ਪਾਠੋ, ਅਯਮੇਵਤ੍ਥੋ. ਏਕਸ੍ਮਿਂ ਅਨ੍ਤੇ ਦਸਾਸਙ੍ਖਾਤਂ ਲੋਮਮੇਤ੍ਥਾਤਿ ਏਕਨ੍ਤਲੋਮੀਤਿ. ਕੋਸੇਯ੍ਯਕਟ੍ਟਿਸ੍ਸਮਯਨ੍ਤਿ ਏਤ੍ਥ ਕੋਸੇਯ੍ਯਨ੍ਤਿ ਕੋਸਿਯਸੁਤ੍ਤਂ. ਕਟ੍ਟਿਸ੍ਸਨ੍ਤਿ ਕਟ੍ਟਿਸ੍ਸਨਾਮਕਂ ਵਾਕਂ. ਇਮਿਨਾ ਕੋਸੇਯ੍ਯਞ੍ਚ ਕਟ੍ਟਿਸ੍ਸਞ੍ਚ ਕਟ੍ਟਿਸ੍ਸਾਨੀਤਿ ਵਿਰੂਪੇਕਸੇਸਂ ਕਤ੍ਵਾ ਕਟ੍ਟਿਸ੍ਸੇਹਿ ਪਕਤਂ ਅਤ੍ਥਰਣਂ ਕਟ੍ਟਿਸ੍ਸਨ੍ਤਿ ਅਤ੍ਥਂ ਦਸ੍ਸੇਤਿ. ਸੁਦ੍ਧਕੋਸੇਯ੍ਯਨ੍ਤਿ ਰਤਨਅਪਰਿਸਿਬ੍ਬਿਤਂ ਸੁਦ੍ਧਕੋਸੇਯ੍ਯਂ. ਇਮਿਨਾ ਸੁਦ੍ਧਕਟ੍ਟਿਸ੍ਸਮ੍ਪਿ ਵਟ੍ਟਤੀਤਿ ਦਸ੍ਸੇਤਿ.

ਸੋਲ਼ਸ ਨਾਟਕਿਤ੍ਥਿਯੋ ਠਤ੍ਵਾ ਨਚ੍ਚਂ ਕਰੋਨ੍ਤਿ ਏਤ੍ਥਾਤਿ ਕੁਤ੍ਤਕਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੋਲ਼ਸਨ੍ਨ’’ਨ੍ਤਿਆਦਿ. ਅਜਿਨਚਮ੍ਮੇਹੀਤਿ ਅਜਿਨਮਿਗਚਮ੍ਮੇਹਿ, ਕਤਇਤਿ ਸਮ੍ਬਨ੍ਧੋ. ਪਵੇਣੀਤਿ ਦੁਪਟ੍ਟਤਿਪਟ੍ਟਾਦੀਹਿ ਪਰਂਪਰਵਸੇਨ ਕਤਤ੍ਤਾ ‘‘ਪਵੇਣੀ’’ਤਿ ਵੁਚ੍ਚਤਿ. ਅਜਿਨਚਮ੍ਮਾਨਿ ਹਿ ਸੁਖੁਮਤਰਾਨਿ, ਤਸ੍ਮਾ ਦੁਪਟ੍ਟਤਿਪਟ੍ਟਾਦੀਨਿ ਕਤ੍ਵਾ ਪਵੇਣਿਵਸੇਨ ਕਤਾਨਿ. ਤਸ੍ਮਾ ਵੁਤ੍ਤਂ ‘‘ਅਜਿਨਪਵੇਣੀ’’ਤਿ. ‘‘ਕਦਲਿਮਿਗਚਮ੍ਮਂ ਨਾਮਾ’’ਤਿ ਇਮਿਨਾ ਤਸ੍ਸ ਚਮ੍ਮਂ ਕਦਲਿਮਿਗਇਤਿ ਗਹੇਤਬ੍ਬਂ ਉਤ੍ਤਰਪਦਲੋਪਵਸੇਨ ਵਾ ਉਪਚਾਰੇਨ ਵਾਤਿ ਦਸ੍ਸੇਤਿ. ਪਵਰਸਦ੍ਦੋ ਉਤ੍ਤਮਤ੍ਥੋਤਿ ਆਹ ‘‘ਉਤ੍ਤਮਪਚ੍ਚਤ੍ਥਰਣ’’ਨ੍ਤਿ. ਤਨ੍ਤਿ ਕਦਲਿਮਿਗਪਵਰਪਚ੍ਚਤ੍ਥਰਣਂ. ਸਉਤ੍ਤਰਚ੍ਛਦਨ੍ਤਿ ਏਤ੍ਥ ਸਕਾਰੋ ਸਹਸਦ੍ਦਕਾਰਿਯੋਤਿ ਦਸ੍ਸੇਨ੍ਤੋ ਆਹ ‘‘ਸਹ ਉਤ੍ਤਰਚ੍ਛਦੇਨਾ’’ਤਿ. ‘‘ਉਪਰੀ’’ਤਿ ਇਮਿਨਾ ਉਤ੍ਤਰਸਦ੍ਦਸ੍ਸ ਸੇਟ੍ਠਾਦਯੋ ਨਿਵਤ੍ਤੇਤਿ. ‘‘ਸਦ੍ਧਿ’’ਨ੍ਤਿ ਇਮਿਨਾ ਸਹਸਦ੍ਦਸ੍ਸ ਤੁਲ੍ਯਤ੍ਥਂ ਨਿਵਤ੍ਤੇਤਿ. ‘‘ਸੇਤ…ਪੇ… ਨ ਵਟ੍ਟਤੀ’’ਤਿ ਇਮਿਨਾ ਰਤ੍ਤਵਿਤਾਨਂ ਹੇਟ੍ਠਾ ਕਪ੍ਪਿਯਪਚ੍ਚਤ੍ਥਰਣੇ ਸਤਿਪਿ ਨ ਵਟ੍ਟਤੀਤਿ ਦਸ੍ਸੇਤਿ. ਕਸ੍ਮਾ? ਰਤ੍ਤਵਿਤਾਨਸ੍ਸ ਅਕਪ੍ਪਿਯਤ੍ਤਾ. ਉਭਤੋਲੋਹਿਤਕੂਪਧਾਨਨ੍ਤਿ ਏਤ੍ਥ ਉਭਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਸੀਸੂਪਧਾਨਞ੍ਚ ਪਾਦੂਪਧਾਨਞ੍ਚਾ’’ਤਿ. ਸੀਸੋ ਉਪਗਨ੍ਤ੍ਵਾ ਤਿਟ੍ਠਤਿ ਏਤ੍ਥਾਤਿ ਉਪਧਾਨਂ, ਉਪ ਭੁਸਂ ਵਾ ਸੁਖਂ ਧਾਰੇਤੀਤਿ ਉਪਧਾਨਂ, ਬਿਬ੍ਬੋਹਨਂ. ਸਚੇ ਪਮਾਣਯੁਤ੍ਤਂ, ਤਂ ਉਪਧਾਨਂ ਵਟ੍ਟਤੀਤਿ ਯੋਜਨਾ.

੧੫੫. ਸਬ੍ਬਚਮ੍ਮਪਟਿਕ੍ਖੇਪਾਦਿਕਥਾ

੨੫੫. ਦੀਪਿਪੋਤਕੋਤਿ ਦੀਪਿਪੋਤੋ ਵਿਯਾਤਿ ਦੀਪਿਪੋਤਕੋ ਵਚ੍ਛੋ. ਭਿਤ੍ਤਿਦਣ੍ਡਕਾਦੀਸੂਤਿ ਭਿਤ੍ਤਿਸਮ੍ਬਨ੍ਧੇਸੁ ਦਣ੍ਡਕਾਦੀਸੁ. ਆਦਿਸਦ੍ਦੇਨ ਭਿਤ੍ਤਿਥਮ੍ਭਾਦਯੋ ਸਙ੍ਗਣ੍ਹਾਤਿ.

੨੫੬. ਯੋ ਨ ਸਕ੍ਕੋਤਿ ਅਨੁਪਾਹਨੋ ਗਾਮਂ ਪਵਿਸਿਤੁਂ, ਸੋ ਗਿਲਾਨੋ ਨਾਮਾਤਿ ਯੋਜਨਾ.

੧੫੭. ਸੋਣਕੁਟਿਕਣ੍ਣਵਤ੍ਥੁਕਥਾ

੨੫੭. ਏਤੇਨਾਤਿ ‘‘ਕੁਰਰਘਰੇ’’ਤਿ ਪਾਠੇਨ. ਅਸ੍ਸਾਤਿ ਮਹਾਕਚ੍ਚਾਨਸ੍ਸ. ਪਪਾਤਨਾਮਕੇਤਿ ਯਸ੍ਮਾ ਮਹਾਤਟੋ ਏਤ੍ਥ ਅਤ੍ਥਿ, ਤਸ੍ਮਾ ਪਪਾਤਨਾਮਕੋ ਹੋਤਿ. ਏਤੇਨਾਤਿ ‘‘ਪਪਾਤਕੇ ਪਬ੍ਬਤੇ’’ਤਿ ਪਾਠੇਨ. ਅਸ੍ਸਾਤਿ ਮਹਾਕਚ੍ਚਾਨਸ੍ਸ. ਕੋਟਿਅਗ੍ਘਨਕਂ ਪਿਲ਼ਨ੍ਧਨਂ ਕਣ੍ਣੇ ਏਤਸ੍ਸਤ੍ਥੀਤਿ ਕੁਟਿਕਣ੍ਣੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਕੋਟਿਅਗ੍ਘਨਕਂ ਪਨਾ’’ਤਿਆਦਿ. ਪਿਲ਼ਨ੍ਧਤਿ ਅਨੇਨਾਤਿ ਪਿਲ਼ਨ੍ਧਨਂ, ਅਲਙ੍ਕਾਰੋ. ਦਨ੍ਤਜੋ ਚਤੁਤ੍ਥਕ੍ਖਰੋ. ‘‘ਪਸਾਦਜਨਕ’’ਨ੍ਤਿ ਇਮਿਨਾ ਪਸਾਦਂ ਜਨੇਤੀਤਿ ਪਾਸਾਦਿਕੋਤਿ ਵਚਨਤ੍ਥਂ ਦਸ੍ਸੇਤਿ. ਪਸਾਦਨੀਯਨ੍ਤਿ ਪਸਾਦਿਤਬ੍ਬਂ, ਪਸਾਦਿਤੁਂ ਅਰਹਨ੍ਤਿ ਅਤ੍ਥੋ. ਅਤ੍ਥਵਚਨਨ੍ਤਿ ਅਤ੍ਥੋ ਵੁਚ੍ਚਤਿ ਅਨੇਨਾਤਿ ਅਤ੍ਥਵਚਨਂ. ਪਾਲ਼ਿਯਂ ਇਦਾਨਿ ਪੋਤ੍ਥਕੇਸੁ ‘‘ਪਸਾਦਨੀਯ’’ਨ੍ਤਿ ਪਾਠੋ ਨਤ੍ਥਿ. ‘‘ਪਾਸਾਦਿਕ’’ਨ੍ਤਿਪਦਸ੍ਸ ਪੁਬ੍ਬੇ ‘‘ਦਸ੍ਸਨੀਯ’’ਨ੍ਤਿ ਪਾਠੋਯੇਵ ਅਤ੍ਥਿ. ਉਤ੍ਤਮਦਮਥਸਮਥਨ੍ਤਿਏਤ੍ਥ ਦਮਥਸਦ੍ਦਸ੍ਸ ਞਾਣਤ੍ਥਞ੍ਚ ਇਨ੍ਦ੍ਰਿਯਸਂਵਰਤ੍ਥਞ੍ਚ ਸਮਥਸਦ੍ਦਸ੍ਸ ਸਮਾਧਤ੍ਥਞ੍ਚ ਚਿਤ੍ਤੂਪਸਮਤ੍ਥਞ੍ਚ ਦਸ੍ਸੇਨ੍ਤੋ ਆਹ ‘‘ਉਤ੍ਤਮਂ ਦਮਥਞ੍ਚਾ’’ਤਿਆਦਿ. ਚਸਦ੍ਦੇਨ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ. ਵਿਸੂਕਾਯਿਕਵਿਪ੍ਫਨ੍ਦਿਤਾਨਨ੍ਤਿ ਵਿਸੂਕਾਯ ਪਟਿਪਕ੍ਖਾਯ ਪਵਤ੍ਤਾਨਂ ਦਿਟ੍ਠਿਚਿਤ੍ਤਸਙ੍ਖਾਤਾਨਂ ਵਿਵਿਧਚਲਨਾਨਂ. ‘‘ਵੀਰਿਯਿਨ੍ਦ੍ਰਿਯ’’ਨ੍ਤਿ ਇਮਿਨਾ ਯਤਿਨ੍ਦ੍ਰਿਯਨ੍ਤਿ ਏਤ੍ਥ ਯਤਸਦ੍ਦੋ ਵੀਰਿਯਵਾਚਕੋਤਿ ਦਸ੍ਸੇਤਿ. ਨਾਗਨ੍ਤਿ ਏਤ੍ਥ ਨਤ੍ਥਿ ਆਗੁ ਪਾਪਮੇਤਸ੍ਸਾਤਿ ਨਾਗੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਆਗੁਵਿਰਹਿਤ’’ਨ੍ਤਿ ਕਿਂ ਦਿਵਸਤੋ ਪਟ੍ਠਾਯਾਤਿ ਆਹ ‘‘ਮਮ ਪਬ੍ਬਜ੍ਜਾਦਿਵਸਤੋ ਪਟ੍ਠਾਯਾ’’ਤਿ. ਕਣ੍ਹਾ ਮਤ੍ਤਿਕਾ ਉਤ੍ਤਰਿ ਏਤ੍ਥਾਤਿ ਕਣ੍ਹੁਤ੍ਤਰਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਕਣ੍ਹਮਤ੍ਤਿਕੁਤ੍ਤਰਾ’’ਤਿ. ‘‘ਉਪਰੀ’’ਤਿ ਇਮਿਨਾ ਉਤ੍ਤਰਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਗੁਨ੍ਨਂ ਖੁਰੇਹੀ’’ਤਿ ਇਮਿਨਾ ਗੁਨ੍ਨਂ ਖੁਰਕਣ੍ਟਕਸਦਿਸਤ੍ਤਾ ਗੋਕਣ੍ਟਕਾ ਨਾਮਾਤਿ ਦਸ੍ਸੇਤਿ. ਤੇ ਗੋਕਣ੍ਟਕੇ ਰਕ੍ਖਿਤੁਨ੍ਤਿ ਸਮ੍ਬਨ੍ਧੋ. ਏਵਂ ਖਰਾ ਭੂਮਿ ਹੋਤੀਤਿ ਯੋਜਨਾ. ਏਤੇਹੀਤਿ ਏਰਗੂਆਦੀਹਿ ਚਤੂਹਿ ਤਿਣੇਹਿ. ਤਨ੍ਤਿ ਏਰਗੂਤਿਣਂ. ਤੇਨਾਤਿ ਮੋਰਗੂਤਿਣੇਨ. ਜਨ੍ਤੁਸ੍ਸ ਵਣ੍ਣੋਤਿ ਸਮ੍ਬਨ੍ਧੋ. ਸੇਨਾਸਨਂ ਪਞ੍ਞਪੇਸੀਤਿ ਏਤ੍ਥ ਕਿਂ ਨਾਮ ਸੇਨਾਸਨਂ ਪਞ੍ਞਪੇਸੀਤਿ ਆਹ ‘‘ਭਿਸਿਂ ਵਾ ਕਟਸਾਰਕਂ ਵਾ ਪਞ੍ਞਪੇਸੀ’’ਤਿ. ਪਞ੍ਞਪੇਤ੍ਵਾ ਚ ਪਨ ਸੋਣਸ੍ਸ ਆਰੋਚੇਸਿ. ਕਿਂ ਆਰੋਚੇਸੀਤਿ ਆਹ ‘‘ਆਵੁਸੋ’’ਤਿਆਦਿ. ਸਤ੍ਥਾ ਵਸਿਤੁਕਾਮੋਤਿ ਸਮ੍ਬਨ੍ਧੋ.

੨੫੮. ‘‘ਤਸ੍ਸ ਸੋਣਸ੍ਸਾ’’ਤਿ ਇਮਿਨਾ ਪਟਿਭਾਤੁ ਤਨ੍ਤਿ ਏਤ੍ਥ ‘‘ਤ’’ਨ੍ਤਿਪਦਂ ਸਾਮ੍ਯਤ੍ਥੇ ਉਪਯੋਗਵਚਨਨ੍ਤਿ ਦਸ੍ਸੇਤਿ. ਤਨ੍ਤਿ ਤਵ. ਅਟ੍ਠਕਵਗ੍ਗਿਕਾਨੀਤਿ ਅਟ੍ਠਪਮਾਣੋ, ਅਟ੍ਠਸਮੂਹੋ ਵਾ ਵਗ੍ਗੋ ਏਤੇਸਨ੍ਤਿ ਅਟ੍ਠਕਵਗ੍ਗਿਕਾਨਿ. ਕਾਮਸੁਤ੍ਤਾਦੀਨਿ (ਸੁ. ਨਿ. ੭੭੨ ਆਦਯੋ) ਸੋਲ਼ਸ ਸੁਤ੍ਤਾਨਿ. ਯੋਤਿ ਪੁਗ੍ਗਲੋ, ਸਮਨ੍ਨਾਗਤੋਤਿ ਸਮ੍ਬਨ੍ਧੋ. ਅਰਿਯੋਪੀਤਿ ਪਿਸਦ੍ਦੋ ਨ ਕੇਵਲਂ ਸੁਚਿਸਮਨ੍ਨਾਗਤੋਯੇਵ ਪਾਪੇ ਨ ਰਮਤਿ, ਅਥ ਖੋ ਅਰਿਯੋਪੀਤਿ ਦਸ੍ਸੇਤਿ. ‘‘ਪਟਿਭਾਤੁ ਤ’’ਨ੍ਤਿ ਪਾਠਤੋ ਯਾਵ ‘‘ਸੁਚੀਤਿ ਵੁਤ੍ਤ’’ਨ੍ਤਿ ਪਾਠਾ ਕੇਸੁਚਿਯੇਵ ਅਟ੍ਠਕਥਾਪੋਤ੍ਥਕੇਸੁ ਅਤ੍ਥਿ. ਅਯਂ ਖ੍ਵਸ੍ਸਾਤਿ ਏਤ੍ਥ ਅਸ੍ਸਸਦ੍ਦੋ ਆਖ੍ਯਾਤੋਤਿ ਆਹ ‘‘ਭਵੇਯ੍ਯਾ’’ਤਿ. ਪਰਿਦਸ੍ਸੇਸੀਤਿ ਪਞ੍ਚ ਵਰਾਨਿ ਪਰਿਚ੍ਛਿਨ੍ਦਿਤ੍ਵਾ ਦਸ੍ਸੇਸਿ. ਯਂ ਵਚਨਂ ਮੇ ਉਪਜ੍ਝਾਯੋ ਜਾਨਾਪੇਤਿ, ਤਸ੍ਸ ਵਚਨਸ੍ਸ ਅਯਂ ਕਾਲੋ ਭਵੇਯ੍ਯਾਤਿ ਯੋਜਨਾ.

੨੫੯. ਵਿਨਯਧਰਪਞ੍ਚਮੇਨਾਤਿ ਏਤ੍ਥ ਉਪਜ੍ਝਾਯਪਞ੍ਚਮੇਨਾਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਅਨੁਸ੍ਸਾਵਨਾਚਰਿਯਪਞ੍ਚਮੇਨਾ’’ਤਿ. ਉਪਾਹਨਕੋਸਕੋਤਿ ਉਪਾਹਨਾਯ ਪਕ੍ਖਿਪਨੋਕਾਸੋ ਕੋਸਕੋ. ਏਲ਼ਕਚਮ੍ਮਅਜਚਮ੍ਮੇਸੁ ਅਕਪ੍ਪਿਯਂ ਨਾਮ ਨਤ੍ਥਿ. ਮਿਗਚਮ੍ਮੇ ਪਨ ਕਿਞ੍ਚਿ ਵਟ੍ਟਤਿ, ਨ ਕਿਞ੍ਚਿ ਵਟ੍ਟਤਿ. ਤਂ ਵਿਭਜਿਤ੍ਵਾ ਦਸ੍ਸੇਨ੍ਤੋ ਆਹ ‘‘ਮਿਗਚਮ੍ਮੇ’’ਤਿਆਦਿ. ਏਤੇਸਂਯੇਵਾਤਿ ਏਣਿਮਿਗਾਦੀਨਂ ਛਨ੍ਨਮੇਵ. ਅਞ੍ਞੇਸਂ ਪਨਾਤਿ ਛਹਿ ਮਿਗੇਹਿ ਅਵਸੇਸਾਨਂ ਪਨ. ਤੇਸਂ ਚਮ੍ਮਂ ਨ ਵਟ੍ਟਤੀਤਿ ਸਮ੍ਬਨ੍ਧੋ.

ਗਾਥਾਯਂ ਮਕ੍ਕਟੋ ਚ ਕਾਲ਼ਸੀਹੋ ਚ ਸਰਭੋ ਚ ਕਦਲਿਮਿਗੋ ਚ ਕੇਚਿ ਯੇ ਵਾਲ਼ਮਿਗਾ ਅਤ੍ਥਿ, ਤੇ ਚਾਤਿ ਯੋਜਨਾ. ਤੇਸਨ੍ਤਿ ਮਕ੍ਕਟਾਦੀਨਂ.

ਤਤ੍ਥਾਤਿ ਗਾਥਾਯ, ਮਕ੍ਕਟਾਦੀਸੁ ਵਾ. ‘‘ਸੀਹਬ੍ਯਗ੍ਘਅਚ੍ਛਤਰਚ੍ਛਾ’’ਤਿ ਇਮਿਨਾ ਵਾਲ਼ਮਿਗਾਨਂ ਸਰੂਪਂ ਦਸ੍ਸੇਤਿ. ਏਤ੍ਤਕਾਯੇਵ ਵਾਲ਼ਮਿਗਾਤਿ ਆਹ ‘‘ਨ ਕੇਵਲ’’ਨ੍ਤਿਆਦਿ. ਏਤੇਸਂਯੇਵਾਤਿ ਸੀਹਬ੍ਯਗ੍ਘਅਚ੍ਛਤਰਚ੍ਛਾਨਮੇਵ. ਨ ਚਮ੍ਮਂ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਯੇਸਨ੍ਤਿ ਛਨ੍ਨਂ ਏਣਿਮਿਗਾਦੀਨਂ. ਤੇਤਿ ਛ ਏਣਿਮਿਗਾਦਿਕੇ. ਹਿ ਸਚ੍ਚਂ ਸਬ੍ਬੇਸਂ ਏਤੇਸਂ ਵਾਲ਼ਮਿਗਾਨਂ ਚਮ੍ਮਂ ਨ ਵਟ੍ਟਤੀਤਿ ਯੋਜਨਾ. ਆਹਰਿਤ੍ਵਾ ਵਾ ਨ ਦਿਨ੍ਨਨ੍ਤਿ ਆਹਰਿਤ੍ਵਾ ਵਾ ਹਤ੍ਥੇ ਵਾ ਪਾਦਮੂਲੇ ਵਾ ਠਪੇਤ੍ਵਾ ਨ ਦਿਨ੍ਨਂ. ‘‘ਗਣਨਂ ਨ ਉਪੇਤੀ’’ਤਿ ਇਮਿਨਾ ਗਣਨਂ ਉਪਗਚ੍ਛਤੀਤਿ ਗਣਨੂਪਗਨ੍ਤਿ ਅਤ੍ਥਂ ਦਸ੍ਸੇਤਿ. ਅਧਿਟ੍ਠਿਤਞ੍ਚਾਤਿ ਅਧਿਟ੍ਠਿਤਂ ਪਨ. ਯਦਾਤਿ ਯਸ੍ਮਿਂ ਕਾਲੇ. ਤਤੋਤਿ ਕਾਲਤੋ.

ਇਤਿ ਚਮ੍ਮਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.