੭੭. ਉਪੋਸਥਭੇਦਾਦਿਕਥਾ

੧੪੯. ਪਨ੍ਨਰਸਿਕਸ੍ਸ ਪੁਬ੍ਬਕਿਚ੍ਚਸ੍ਸ ਪਾਲ਼ਿਯਂ ਆਗਤਤ੍ਤਾ ਚਾਤੁਦ੍ਦਸਿਕਸ੍ਸੇਵ ਪੁਬ੍ਬਕਿਚ੍ਚਂ ਦਸ੍ਸੇਨ੍ਤੋ ਆਹ ‘‘ਅਜ੍ਜੁਪੋਸਥੋ ਚਾਤੁਦ੍ਦਸੋ’’ਤਿ.

‘‘ਅਧਮ੍ਮੇਨ ਵਗ੍ਗ’’ਨ੍ਤਿਆਦੀਸੁ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਅਧਮ੍ਮੇਨ ਵਗ੍ਗਨ੍ਤਿ ਏਤ੍ਥ ਅਧਮ੍ਮਂ ਨਾਮ ਏਕਸ੍ਮਿਂ ਵਿਹਾਰੇ ਚਤੁਨ੍ਨਂ ਭਿਕ੍ਖੂਨਂ ਸੁਤ੍ਤੁਦ੍ਦੇਸਉਪੋਸਥਮਕਤ੍ਵਾ ਪਾਰਿਸੁਦ੍ਧਿਉਪੋਸਥਕਰਣਞ੍ਚ ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਮਕਤ੍ਵਾ ਸੁਤ੍ਤੁਦ੍ਦੇਸਕਰਣਞ੍ਚ. ਵਗ੍ਗਂ ਨਾਮ ਸਬ੍ਬੇਵ ਅਸਨ੍ਨਿਪਤਿਤ੍ਵਾ ਏਕਸ੍ਸ ਛਨ੍ਦਪਾਰਿਸੁਦ੍ਧਿਹਰਣਂ. ਛਨ੍ਦਪਾਰਿਸੁਦ੍ਧਿ ਨਾਮ ਸਙ੍ਘਮਜ੍ਝਂਯੇਵ ਆਗਚ੍ਛਤਿ, ਨ ਗਣਮਜ੍ਝਂ, ਨ ਪੁਗ੍ਗਲਸ੍ਸ ਸਨ੍ਤਿਕਂ. ਅਧਮ੍ਮੇਨ ਸਮਗ੍ਗਨ੍ਤਿ ਏਤ੍ਥ ਅਧਮ੍ਮਂ ਵੁਤ੍ਤਨਯਮੇਵ. ਸਮਗ੍ਗਂ ਨਾਮ ਸਬ੍ਬੇਸਂ ਸਨ੍ਨਿਪਤਨਂ. ਧਮ੍ਮੇਨ ਵਗ੍ਗਨ੍ਤਿ ਏਤ੍ਥ ਧਮ੍ਮਂ ਨਾਮ ਚਤੁਨ੍ਨਂ ਸੁਤ੍ਤੁਦ੍ਦੇਸਉਪੋਸਥਕਰਣਞ੍ਚ ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਕਰਣਞ੍ਚ. ਵਗ੍ਗਂ ਵੁਤ੍ਤਨਯਮੇਵ.