੭੪. ਅਵਿਪ੍ਪਵਾਸਸੀਮਾਨੁਜਾਨਨਕਥਾ

੧੪੩. ਅਨ੍ਧਕਵਿਨ੍ਦਂ ਨਾਮਾਤਿ ਤਸ੍ਸ ਗਾਮਸ੍ਸ ਨਾਮਂ. ਤਨ੍ਤਿ ਅਨ੍ਧਕਵਿਨ੍ਦਂ. ਥੇਰੋਤਿ ਮਹਾਕਸ੍ਸਪਤ੍ਥੇਰੋ. ਤਤੋਤਿ ਅਨ੍ਧਕਵਿਨ੍ਦਤੋ. ਇਮਿਨਾ ‘‘ਅਨ੍ਧਕਵਿਨ੍ਦਾ’’ਤਿ ਏਤ੍ਥ ਨਿਸ੍ਸਕ੍ਕਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ਉਪੋਸਥਨ੍ਤਿ ਤਦਤ੍ਥੇ ਉਪਯੋਗਵਚਨਂ. ਉਪੋਸਥਤ੍ਥਾਯਾਤਿ ਹਿ ਅਤ੍ਥੋ. ਅਨ੍ਧਕਵਿਨ੍ਦਾ ਰਾਜਗਹਂ ਆਗਮਨਸ੍ਸ ਕਾਰਣਂ ਦਸ੍ਸੇਨ੍ਤੋ ਆਹ ‘‘ਰਾਜਗਹਂ ਹੀ’’ਤਿਆਦਿ. ਤਤ੍ਥ ਹੀਤਿ ਯਸ੍ਮਾ. ਅਨ੍ਧਕਵਿਨ੍ਦਾ ਵਿਹਾਰਂ ਅਨ੍ਤੋ ਕਤ੍ਵਾ ‘‘ਅਟ੍ਠਾਰਸ ਮਹਾਵਿਹਾਰਾ’’ਤਿ ਵੁਤ੍ਤਂ. ਨੇਸਨ੍ਤਿ ਅਟ੍ਠਾਰਸਨ੍ਨਂ ਮਹਾਵਿਹਾਰਾਨਂ. ਸਙ੍ਘਸ੍ਸ ਸਾਮਗ੍ਗਿਦਾਨਤ੍ਥਨ੍ਤਿ ਏਤ੍ਥ ਸਙ੍ਘਸ੍ਸ ਸਾਮਗ੍ਗਿਦਾਨਂ ਅਤ੍ਤਨੋ ਉਪੋਸਥਕਿਚ੍ਚਂ ਸਿਦ੍ਧਂ. ਤਸ੍ਮਾ ਪਾਲ਼ਿਯਂ ‘‘ਉਪੋਸਥਂ ਆਗਚ੍ਛਨ੍ਤੋ’’ਤਿ ਵੁਤ੍ਤਂ. ‘‘ਸਿਪ੍ਪਿਨਿਯਂ ਨਾਮਾ’’ਤਿ ਇਮਿਨਾ ਨਦਿਂ ਤਰਨ੍ਤੋਤਿ ਏਤ੍ਥ ਨਦਿਯਾ ਨਾਮਂ ਦਸ੍ਸੇਤਿ. ਮਨਂ ਵੂਲ਼੍ਹੋਤਿ ਏਤ੍ਥ ਮਨਨ੍ਤਿ ਨਿਪਾਤੋ ਈਸਕਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਈਸਕ’’ਨ੍ਤਿ. ‘‘ਅਪ੍ਪਮਤ੍ਤ’’ਨ੍ਤਿ ਇਮਿਨਾ ‘‘ਈਸਕ’’ਨ੍ਤਿਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਵੂਲ਼੍ਹਭਾਵੋ’’ਤਿ ਇਮਿਨਾ ਭਾਵਪਚ੍ਚਯੇਨ ਵਿਨਾ ਭਾਵਤ੍ਥੋ ਞਾਤਬ੍ਬੋਤਿ ਦਸ੍ਸੇਤਿ. ਚਣ੍ਡੇਨਾਤਿ ਖਰੇਨ. ਤਤ੍ਥਾਤਿ ਨਦਿਯਂ. ਅਮਨਸਿਕਰੋਨ੍ਤੋਤਿ ‘‘ਚਣ੍ਡਸੋਤ’’ਨ੍ਤਿ ਆਭੋਗਂ ਅਕਰੋਨ੍ਤੋ. ਨ ਪਨ ਵੂਲ਼੍ਹੋਤਿ ਨ ਪਨ ਮਹਾਵੂਲ਼੍ਹੋ. ਉਦਕਬ੍ਭਾਹਤਾਨੀਤਿ ਉਦਕੇਨ ਅਭਿਆਹਤਾਨਿ. ਅਸ੍ਸਾਤਿ ਥੇਰਸ੍ਸ. ਅਲ੍ਲਾਨੀਤਿ ਤਿਨ੍ਤਾਨਿ.

੧੪੪. ਪੁਰਿਮਕਮ੍ਮਵਾਚਾਤਿ ‘‘ਸਮ੍ਮਤਾ ਸਾ ਸੀਮਾ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸਾ’’ਤਿ ਪੁਰੇ ਵੁਤ੍ਤਾ ਕਮ੍ਮਵਾਚਾ. ਅਯਮੇਵਾਤਿ ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿਪਦਂ ਪਕ੍ਖਿਪਿਤ੍ਵਾ ਅਨੁਪਞ੍ਞਤ੍ਤਾ ਅਯਮੇਵ ਕਮ੍ਮਵਾਚਾ. ਅਯਨ੍ਤਿ ਪਚ੍ਛਿਮਕਮ੍ਮਵਾਚਾ. ਹਿ ਯਸ੍ਮਾ ਭਿਕ੍ਖੁਨਿਸਙ੍ਘੋ ਅਨ੍ਤੋਗਾਮੇ ਵਸਤਿ, ਤਸ੍ਮਾ ਪੁਰਿਮਾਯੇਵ ਵਟ੍ਟਤੀਤਿ ਯੋਜਨਾ. ਯਦਿ ਏਵਨ੍ਤਿ ਯਦਿ ਭਿਕ੍ਖੁਨਿਸਙ੍ਘਸ੍ਸ ਅਯਂ ਪਚ੍ਛਿਮਕਮ੍ਮਵਾਚਾ ਵਟ੍ਟਨਂ ਸਿਯਾ ਭਵੇਯ੍ਯ, ਏਵਂ ਸਤੀਤਿ ਯੋਜਨਾ. ਸੋਤਿ ਭਿਕ੍ਖੁਨਿਸਙ੍ਘੋ. ਏਤਾਯ ਕਮ੍ਮਵਾਚਾਯਾਤਿ ਪਚ੍ਛਿਮਕਮ੍ਮਵਾਚਾਯ. ਨ ਲਭੇਯ੍ਯਾਤਿ ਅਨ੍ਤੋਗਾਮੇ ਵਸਨਤ੍ਤਾ ਤਿਚੀਵਰਪਰਿਹਾਰਂ ਨ ਲਭੇਯ੍ਯ. ਕਿਂ ਨ ਲਭਤਿਯੇਵਾਤਿ ਆਹ ‘‘ਅਤ੍ਥਿ ਚਸ੍ਸ ਪਰਿਹਾਰੋ’’ਤਿ. ਅਸ੍ਸਾਤਿ ਭਿਕ੍ਖੁਨਿਸਙ੍ਘਸ੍ਸ. ਦ੍ਵੇਪਿ ਸੀਮਾਯੋਤਿ ਸਮਾਨਸਂਵਾਸਕਸੀਮਾ ਚ ਅਵਿਪ੍ਪਵਾਸਸੀਮਾ ਚਾਤਿ ਦ੍ਵੇਪਿ ਸੀਮਾਯੋ. ਤਤ੍ਥਾਤਿ ਭਿਕ੍ਖੁਭਿਕ੍ਖੁਨੀਸੁ. ਤਸ੍ਸਾਤਿ ਭਿਕ੍ਖੂਨਂ ਸੀਮਾਯ. ਏਸੇਵ ਨਯੋਤਿ ਭਿਕ੍ਖੁਨੀਨਂ ਸੀਮਂ ਅਜ੍ਝੋਤ੍ਥਰਿਤ੍ਵਾਪਿ ਅਨ੍ਤੋਪਵਿਸਿਤ੍ਵਾਪਿ ਭਿਕ੍ਖੂਨਂ ਸੀਮਾਯ ਸਮ੍ਮਨੇ ਏਸੇਵ ਨਯੋ. ਏਤੇਤਿ ਭਿਕ੍ਖੁਭਿਕ੍ਖੁਨਿਯੋ. ਸਾਮਞ੍ਞਤ੍ਤਾ ਹਿ ਪੁਲ੍ਲਿਙ੍ਗੇਨ ਵੁਤ੍ਤਂ. ਏਤ੍ਥ ਚਾਤਿ ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿਪਦੇ ਚ. ਸਙ੍ਗਹੋ ਵੇਦਿਤਬ੍ਬੋ, ਕਸ੍ਮਾ? ਗਾਮੇਨ ਨਿਗਮਨਗਰਾਨਂ ਏਕਲਕ੍ਖਣਤ੍ਤਾ.

ਪਰਿਕ੍ਖੇਪੋਕਾਸੋਤਿ ਪਰਿਕ੍ਖੇਪਾਰਹੋਕਾਸੋ. ਤੇਸੂਤਿ ਗਾਮਗਾਮੂਪਚਾਰੇਸੁ. ਪਰਿਹਾਰਨ੍ਤਿ ਚੀਵਰਵਿਪ੍ਪਵਾਸਆਪਤ੍ਤਿਅਪਨਯਨਂ. ‘‘ਇਤੀ’’ਤਿਆਦਿ ਨਿਗਮਨਂ. ਏਤ੍ਥਾਤਿ ਸਮਾਨਸਂਵਾਸਕਅਵਿਪ੍ਪਵਾਸਸੀਮਾਸੁ. ਅਤ੍ਤਨੋ ਧਮ੍ਮਤਾਯਾਤਿ ਅਤ੍ਤਨੋ ਸਭਾਵੇਨ. ਯਤ੍ਥਾਤਿ ਯਸ੍ਮਿਂ ਠਾਨੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਸ੍ਸਾਤਿ ਅਵਿਪ੍ਪਵਾਸਸੀਮਾਯ. ਵਿਸੁਨ੍ਤਿ ਸਮਾਨਸਂਵਾਸਕਸੀਮਤੋ ਪਾਟੇਕ੍ਕਂ. ਤਤ੍ਥਾਤਿ ਦ੍ਵੀਸੁ ਸੀਮਾਸੁ. ਅਵਿਪ੍ਪਵਾਸਾਯਾਤਿ ਅਵਿਪ੍ਪਵਾਸਸੀਮਾਯ. ਤਨ੍ਤਿ ਗਾਮਂ. ਸਾਤਿ ਅਵਿਪ੍ਪਵਾਸਸੀਮਾ. ਸਮ੍ਮਤਾਯ ਸੀਮਾਯਾਤਿ ਅਵਿਪ੍ਪਵਾਸਸੀਮਾਯ ਸਮ੍ਮਤਾਯ ਸਤਿਯਾਤਿ ਸਮ੍ਬਨ੍ਧੋ. ਸਮ੍ਮਤਤੋ ਪਚ੍ਛਾਤਿ ਵਾ ਯੋਜਨਾ. ਨਿਵਿਸਤੀਤਿ ਨਿਵਾਸਤ੍ਥਾਯ ਵਿਸਤਿ ਪਵਿਸਤਿ. ਸੋਪੀਤਿ ਗਾਮੋਪਿ. ਸੀਮਸਙ੍ਖ੍ਯਂਯੇਵਾਤਿ ਅਵਿਪ੍ਪਾਸਸੀਮਵੋਹਾਰਮੇਵ. ਅਧਿਟ੍ਠਿਤਤੇਚੀਵਰਿਕਾ ਭਿਕ੍ਖੂ ਪਰਿਹਾਰਂ ਲਭਨ੍ਤੀਤਿ ਅਧਿਪ੍ਪਾਯੋ. ਯਥਾ ਪਚ੍ਛਾ ਨਿਵਿਟ੍ਠੋ ਗਾਮੋ ਸੀਮਸਙ੍ਖ੍ਯਂਯੇਵ ਗਚ੍ਛਤਿ, ਏਵਨ੍ਤਿ ਯੋਜਨਾ. ‘‘ਪਵਿਸਿਸ੍ਸਾਮਾ’’ਤਿ ਗੇਹਾਨਿ ਕਤਾਨਿ, ‘‘ਪਵਿਸਿਸ੍ਸਾਮਾ’’ਤਿ ਆਲਯੋਪਿ ਅਤ੍ਥੀਤਿ ਯੋਜਨਾ. ਆਲਯੋਪੀਤਿ ਅਪੇਕ੍ਖੋਪਿ. ਅਪਵਿਟ੍ਠਾਤਿ ਗੇਹਾਨਿ ਅਪਵਿਟ੍ਠਾ. ਗੇਹਮੇਵ ਛਡ੍ਡੇਤ੍ਵਾਤਿ ਗੇਹਂ ਛਡ੍ਡੇਤ੍ਵਾ ਏਵ. ਇਮਿਨਾ ਗੇਹੇ ਛਡ੍ਡਿਤੇ ਸਬ੍ਬਂ ਛਡ੍ਡਿਤਮੇਵਾਤਿ ਦਸ੍ਸੇਤਿ. ਪਵਿਟ੍ਠਂ ਵਾ ਅਗਤਂ ਵਾ ਏਕਮ੍ਪਿ ਕੁਲਂ ਅਤ੍ਥਿ ਸਚੇਤਿ ਯੋਜਨਾ. ਏਤ੍ਥ ਚ ‘‘ਏਕਮ੍ਪਿ ਕੁਲਂ ਪਵਿਟ੍ਠਂ ਵਾ’’ਤਿ ਇਦਂ ਨਵਗਾਮਂ ਸਨ੍ਧਾਯ ਵੁਤ੍ਤਂ. ‘‘ਏਕਮ੍ਪਿ ਕੁਲਂ ਅਗਤਂ ਵਾ’’ਤਿ ਇਦਂ ਪੋਰਾਣਕਗਾਮਂ ਸਨ੍ਧਾਯਾਤਿ ਦਟ੍ਠਬ੍ਬਂ.

ਤਤ੍ਰਾਤਿ ‘‘ਵਤ੍ਤਂ ਜਾਨਿਤਬ੍ਬ’’ਨ੍ਤਿਵਚਨੇ. ਅਵਿਪ੍ਪਵਾਸਸੀਮਾਯਨ੍ਤਿ ਮਹਾਸੀਮਾਯ. ਸਾ ਏਵ ਹਿ ਯਸ੍ਮਾ ਅਵਿਪ੍ਪਵਾਸਕਮ੍ਮਵਾਚਾਯ ਬਹੁਲਪਯੋਜਨਾ ਹੋਤਿ, ਤਸ੍ਮਾ ਅਵਿਪ੍ਪਵਾਸਸੀਮਾਤਿ ਵੁਚ੍ਚਤਿ. ਇਤਰਾਯਾਤਿ ਅਵਿਪ੍ਪਵਾਸਸੀਮਾਯ. ਤਤ੍ਥਾਤਿ ਤਾਸੁ ਦ੍ਵੀਸੁ ਸੀਮਾਸੁ. ਨਿਰਾਸਙ੍ਕਟ੍ਠਾਨੇਸੁ ਠਤ੍ਵਾਤਿ ਚੇਤਿਯਙ੍ਗਣਾਦੀਨਂ ਖਣ੍ਡਸੀਮਾਯ ਅਨੋਕਾਸਤ੍ਤਾ ਵੁਤ੍ਤਂ. ਖਣ੍ਡਸੀਮਞ੍ਹਿ ਸਮ੍ਮਨਨ੍ਤਾ ਚੇਤਿਯਙ੍ਗਣਾਦਿਟ੍ਠਾਨਂ ਪਹਾਯ ਅਞ੍ਞਸ੍ਮਿਂ ਵਿਵਿਤ੍ਤੋਕਾਸੇ ਵਿਹਾਰਪਚ੍ਚਨ੍ਤਂ ਖਣ੍ਡਿਤ੍ਵਾ ਸਮ੍ਮਨਨ੍ਤਿ. ਸਮੂਹਨਿਤੁਨ੍ਤਿ ਅਵਿਪ੍ਪਵਾਸਸੀਮਂ ਸਮੂਹਨਿਤੁਂ. ਪਟਿਬਨ੍ਧਿਤੁਂ ਨ ਸਕ੍ਖਿਸ੍ਸਨ੍ਤੇਵਾਤਿ ਅਵਿਪ੍ਪਵਾਸਂਯੇਵ ਜਾਨਿਤ੍ਵਾ ਖਣ੍ਡਸੀਮਾਯ ਅਞ੍ਞਾਤਤ੍ਤਾ ਪਟਿਬਨ੍ਧਿਤੁਂ ਨ ਸਕ੍ਖਿਸ੍ਸਨ੍ਤੇਵ. ਸੀਮਸਮ੍ਭੇਦਨ੍ਤਿ ਖਣ੍ਡਸੀਮਅਵਿਪ੍ਪਵਾਸਸੀਮਾਨਂ ਸਮ੍ਭੇਦਂ. ਸਾਸਨਨ੍ਤਰਧਾਨੇਨ ਵਾਤਿ ਸਤ੍ਥੁ ਆਣਾਯ ਅਨ੍ਤਰਧਾਨੇਨ ਵਾ. ਸਾਧੁਕਂ ਪਨਾਤਿ ਨਿਕ੍ਕਙ੍ਖਂ ਪਨ.