੯. ਪਿਣ੍ਡਪਾਤਪਾਰਿਸੁਦ੍ਧਿਸੁਤ੍ਤਵਣ੍ਣਨਾ

੪੩੮. ਧਮ੍ਮਸੇਨਾਪਤਿਨੋ ਪਟਿਸਲ੍ਲੀਯਨਸ੍ਸ ਅਧਿਪ੍ਪੇਤਤ੍ਤਾ, ਉਪਰਿ ਚ ਪਾਲ਼ਿਯਂ, ‘‘ਸੁਞ੍ਞਤਾਵਿਹਾਰੇਨ ਖੋ ਅਹਂ, ਭਨ੍ਤੇ, ਏਤਰਹਿ ਬਹੁਲਂ ਵਿਹਰਾਮੀ’’ਤਿ (ਮ. ਨਿ. ੩.੪੩੮) ਵੁਤ੍ਤਤ੍ਤਾ ‘‘ਪਟਿਸਲ੍ਲਾਨਾਤਿ ਫਲਸਮਾਪਤ੍ਤਿਤੋ’’ਤਿ ਆਹ.

ਵਿਪ੍ਪਸਨ੍ਨਾਨੀਤਿ ਵਿਸੇਸਤੋ ਪਸਨ੍ਨਾਨਿ. ਓਕਾਸਵਸੇਨਾਤਿ ਇਨ੍ਦ੍ਰਿਯਾਨਂ ਪਤਿਟ੍ਠਿਤੋਕਾਸਵਸੇਨ. ਨਨੁ ਤਾਨਿ ਇਨ੍ਦ੍ਰਿਯਾਨਿ ਸਭਾਵਤੋ ਵਿਪ੍ਪਸਨ੍ਨਾਨਿ ਹੋਨ੍ਤੀਤਿ? ਸਚ੍ਚਂ ਹੋਨ੍ਤਿ. ਨ ਹਿਦਂ ਤਾਦਿਸਂ ਪਸਨ੍ਨਤਂ ਸਨ੍ਧਾਯ ਵੁਤ੍ਤਂ, ਇਦਂ ਪਨ ਸਨ੍ਤਪਣੀਤਸਮਾਪਤ੍ਤਿਸਮੁਟ੍ਠਿਤਾਨਂ ਪਚ੍ਚੁਪਟ੍ਠਿਤਾਨਂ ਚਿਤ੍ਤਜਰੂਪਾਨਂ ਵਸੇਨ ਸੇਸਤਿਸਨ੍ਤਤਿਰੂਪਾਨਂ ਸੇਟ੍ਠਤਰਂ ਪਣੀਤਭਾਵਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਫਲਸਮਾਪਤ੍ਤਿਤੋਤਿ ਸੁਞ੍ਞਤਾਨੁਪਸ੍ਸਨਾਵਸੇਨ ਸਮਾਪਨ੍ਨਫਲਸਮਾਪਤ੍ਤਿਤੋ. ਮਹਨ੍ਤਾਨਂ ਬੁਦ੍ਧਾਦੀਨਂ ਪੁਰਿਸਾਨਂ ਵਿਹਾਰੋ ਮਹਾਪੁਰਿਸਵਿਹਾਰੋ. ਤੇਨਾਹ – ‘‘ਬੁਦ੍ਧ…ਪੇ… ਵਿਹਾਰੋ’’ਤਿ. ਵਿਹਾਰਤੋ ਪਟ੍ਠਾਯਾਤਿ ਪਰਿਕ੍ਖਿਤ੍ਤੇ ਚ ਵਿਹਾਰੇ ਪਰਿਕ੍ਖੇਪਤੋ ਪਟ੍ਠਾਯ, ਅਪਰਿਕ੍ਖਿਤ੍ਤੇ ਚ ਪਰਿਕ੍ਖੇਪਾਰਹਟ੍ਠਾਨਤੋ ਪਟ੍ਠਾਯ. ਕੇਚਿ ਪਨ ‘‘ਵਿਹਾਰਬ੍ਭਨ੍ਤਰਤੋ ਪਟ੍ਠਾਯਾ’’ਤਿ ਵਦਨ੍ਤਿ. ਯਾਵ ਗਾਮਸ੍ਸ ਇਨ੍ਦਖੀਲਾਤਿ ਗਾਮਸ੍ਸ ਅਬ੍ਭਨ੍ਤਰਿਨ੍ਦਖੀਲੋ. ਗੇਹਪਟਿਪਾਟਿਯਾਚਰਿਤ੍ਵਾਤਿ ਪਿਣ੍ਡਾਯ ਚਰਿਤ੍ਵਾ. ਯਾਵ ਨਗਰਦ੍ਵਾਰੇਨ ਨਿਕ੍ਖਮਨਾਤਿ ਨਗਰਦ੍ਵਾਰੇਨ ਯਾਵ ਨਿਕ੍ਖਮਨਪਦੇਸਾ. ਯਾਵ ਵਿਹਾਰਾਤਿ ਯਾਵ ਵਿਹਾਰਬ੍ਭਨ੍ਤਰਾ. ਪਟਿਕ੍ਕਨ੍ਤਮਗ੍ਗੋਤਿ ਨਿਵਤ੍ਤਨਮਗ੍ਗੋ. ਆਰਮ੍ਮਣੇ ਪਟਿਹਞ੍ਞਨਾਕਾਰੇਨ ਪਵਤ੍ਤਮਾਨਮ੍ਪਿ ਪਟਿਘਸਮ੍ਪਯੁਤ੍ਤਂ ਚਿਤ੍ਤੇ ਪਟਿਹਨਨ੍ਤਂ ਵਿਯ ਪਵਤ੍ਤਤੀਤਿ ਆਹ – ‘‘ਚਿਤ੍ਤੇ ਪਟਿਹਞ੍ਞਨਕਿਲੇਸਜਾਤ’’ਨ੍ਤਿ. ਦਿਵਸਞ੍ਚ ਰਤ੍ਤਿਞ੍ਚ ਅਨੁਸਿਕ੍ਖਨ੍ਤੇਨਾਤਿ ਏਤਂਯੇਵ ਰਾਗਾਦਿਪ੍ਪਹਾਯਿਨਿਂ ਸਮ੍ਮਾਪਟਿਪਤ੍ਤਿਂ ਦਿਵਾ ਚ ਰਤ੍ਤਿਞ੍ਚ ਅਨੁ ਅਨੁ ਸਿਕ੍ਖਨ੍ਤੇਨ ਉਪਰੂਪਰਿ ਵਡ੍ਢੇਨ੍ਤੇਨ.

੪੪੦. ਪਹੀਨਾ ਨੁ ਖੋ ਮੇ ਪਞ੍ਚ ਕਾਮਗੁਣਾਤਿ ਏਤ੍ਥ ਕਾਮਗੁਣਪ੍ਪਹਾਨਂ ਨਾਮ ਤਪ੍ਪਟਿਬਦ੍ਧਛਨ੍ਦਰਾਗਪ੍ਪਹਾਨਂ. ਤਥਾ ਹਿ ਵੁਤ੍ਤਂ – ‘‘ਤਿਟ੍ਠਨ੍ਤਿ ਚਿਤ੍ਰਾਨਿ ਤਥੇਵ ਲੋਕੇ, ਅਥੇਤ੍ਥ ਧੀਰਾ ਵਿਨਯਨ੍ਤਿ ਛਨ੍ਦ’’ਨ੍ਤਿ. ਏਕਭਿਕ੍ਖੁਸ੍ਸ ਪਚ੍ਚਵੇਕ੍ਖਣਾ ਨਾਨਾਤਿ ਏਕਸ੍ਸੇਵ ਭਿਕ੍ਖੁਨੋ, ‘‘ਪਹੀਨਾ ਨੁ ਖੋ ਮੇ ਪਞ੍ਚ ਕਾਮਗੁਣਾ’’ਤਿਆਦਿਨਾ ਪਾਲ਼ਿਯਂ ਆਗਤਾ ਨਾਨਾਪਚ੍ਚਵੇਕ੍ਖਣਾ ਹੋਨ੍ਤਿ. ਨਾਨਾਭਿਕ੍ਖੂਨਨ੍ਤਿ ਵਿਸੁਂ ਵਿਸੁਂ ਅਨੇਕੇਸਂ ਭਿਕ੍ਖੂਨਂ. ਪਚ੍ਚਵੇਕ੍ਖਣਾ ਨਾਨਾਤਿ ਵੁਤ੍ਤਨਾਨਾਪਚ੍ਚਵੇਕ੍ਖਣਾ. ਇਦਾਨਿ ਤਮੇਵ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ, ‘‘ਕਥ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ‘‘ਪਚ੍ਚਵੇਕ੍ਖਤੀ’’ਤਿ ਵੁਤ੍ਤਂ, ਕਥਂ ਪਨ ਪਚ੍ਚਵੇਕ੍ਖਤੀਤਿ ਆਹ ‘‘ਪਹੀਨਾ ਨੁ ਖੋ’’ਤਿਆਦਿ. ਵੀਰਿਯਂ ਪਗ੍ਗਯ੍ਹਾਤਿ ਚਤੁਬ੍ਬਿਧਸਮ੍ਮਪ੍ਪਧਾਨਵੀਰਿਯਂ ਆਰਭਿਤ੍ਵਾ ਵਿਪਸ੍ਸਨਂ ਵਡ੍ਢਿਤ੍ਵਾ. ਮਗ੍ਗਾਨਨ੍ਤਰਂ ਅਨਾਗਾਮਿਫਲਂ ਪਤ੍ਵਾਤਿ ਵਚਨਸੇਸੋ. ਫਲਾਨਨ੍ਤਰਂ ਮਗ੍ਗਨ੍ਤਿ ਤਸ੍ਮਿਂ ਅਨਾਗਾਮਿਮਗ੍ਗੇ ਠਿਤੋ ਫਲਸਮਾਪਤ੍ਤਿਤੋ ਵੁਟ੍ਠਾਯ ਅਗ੍ਗਮਗ੍ਗਤ੍ਥਾਯ ਵਿਪਸ੍ਸਨਂ ਆਰਭਿਤ੍ਵਾ ਤਸ੍ਮਿਂਯੇਵ ਆਸਨੇ ਨ ਚਿਰੇਨੇਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਮਗ੍ਗਂ ਗਣ੍ਹਨ੍ਤੋ ਨਿਰੋਧਧਮ੍ਮਾਨੁਪ੍ਪਤ੍ਤਿਯਾ ਵਿਪਸ੍ਸਨਾਪਰਿਵਾਸਾਭਾਵਤੋ ਫਲਾਨਨ੍ਤਰਂ ਮਗ੍ਗਪ੍ਪਤ੍ਤੋ ਨਾਮ ਹੋਤੀਤਿ ਕਤ੍ਵਾ.

ਤਤੋ ਵੁਟ੍ਠਾਯਾਤਿ ਮਗ੍ਗਾਨਨ੍ਤਰਫਲਤੋ ਵੁਟ੍ਠਾਯ. ਮਗ੍ਗਾਨਨ੍ਤਰਤੋ ਹਿ ਵੁਟ੍ਠਿਤੋ ਮਗ੍ਗਤੋ ਵੁਟ੍ਠਿਤੋ ਵਿਯ ਹੋਤੀਤਿ ਤਥਾ ਵੁਤ੍ਤਂ. ‘‘ਫਲਾਨਨ੍ਤਰਂ ਮਗ੍ਗ’’ਨ੍ਤਿ ਏਤ੍ਥ ਫਲਂ ਅਨਨ੍ਤਰਂ ਏਤਸ੍ਸਾਤਿ ਫਲਾਨਨ੍ਤਰਂ. ‘‘ਫਲਾਨਨ੍ਤਰਂ ਮਗ੍ਗ’’ਨ੍ਤਿ ਪਦਦ੍ਵਯੇਨਪਿ ਅਨਾਗਾਮਿਮਗ੍ਗਫਲਾਨਿ ਚੇਵ ਵਦਤੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਨੀਵਰਣਾਦੀਸੁਪਿ ਏਸੇਵ ਨਯੋਤਿ ਏਤ੍ਥ, ‘‘ਪਹੀਨਾ ਨੁ ਖੋ ਮੇ ਪਞ੍ਚ ਨੀਵਰਣਾ’’ਤਿਆਦਿਨਾ ਯੋਜਨਾ ਵੇਦਿਤਬ੍ਬਾ. ਏਤੇਸਨ੍ਤਿ ਏਤ੍ਥ ਏਤੇਸਂ ਨੀਵਰਣਪਞ੍ਚੁਪਾਦਾਨਕ੍ਖਨ੍ਧਸਤਿਪਟ੍ਠਾਨਾਦੀਨਂ. ਪਹਾਨਾਦੀਨੀਤਿ ਪਹਾਨਪਰਿਞ੍ਞਾਭਾਵਨਾਸਚ੍ਛਿਕਿਰਿਯਾ. ਨਾਨਾਪਚ੍ਚਵੇਕ੍ਖਣਾ ਹੋਤੀਤਿ ਤਾ ਪਚ੍ਚਵੇਕ੍ਖਣਾ ਨਾਨਾਤਿ ਅਧਿਪ੍ਪਾਯੋ. ਏਤਾਸੁ ਪਨ ਪਚ੍ਚਵੇਕ੍ਖਣਾਸੂਤਿ ਏਤਾਸੁ ਕਾਮਗੁਣਪਚ੍ਚਵੇਕ੍ਖਣਾਦੀਸੁ ਦ੍ਵਾਦਸਸੁ ਪਚ੍ਚਵੇਕ੍ਖਣਾਸੁ. ਏਕਂ ਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਤਿ ਦ੍ਵਾਦਸਸੁ ਨਯੇਸੁ ਏਕੇਨੇਵ ਕਿਚ੍ਚਸਿਦ੍ਧਿਤੋ. ਅਞ੍ਞੋ ਭਿਕ੍ਖੁ. ਏਕਨ੍ਤਿ ਅਞ੍ਞਂ ਪਚ੍ਚਵੇਕ੍ਖਤਿ. ਅਞ੍ਞਤ੍ਥੋ ਹਿ ਅਯਂ ਏਕਸਦ੍ਦੋ ‘‘ਇਤ੍ਥੇਕੇ’’ਤਿਆਦੀਸੁ (ਮ. ਨਿ. ੩.੨੧, ੨੭) ਵਿਯਾਤਿ. ਨਾਨਾਭਿਕ੍ਖੂਨਂ ਪਨ ਏਕਾ ਪਚ੍ਚਵੇਕ੍ਖਣਾ, ਨਾਨਾਭਿਕ੍ਖੂਨਂ ਨਾਨਾਪਚ੍ਚਵੇਕ੍ਖਣਾਤਿ ਏਵਂ ਚਤੁਕ੍ਕਪਚ੍ਚਵੇਕ੍ਖਣਮ੍ਪਿ ਏਤ੍ਥ ਸਮ੍ਭਵਤਿ. ਇਮਸ੍ਸ ਪਨ ਦ੍ਵਯਸ੍ਸ ਵਸੇਨ ਅਭਿਸਮਯੋ ਨਤ੍ਥੀਤਿ ਤਦੁਭਯਂ ਅਟ੍ਠਕਥਾਯਂ ਨ ਉਦ੍ਧਟਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਪਿਣ੍ਡਪਾਤਪਾਰਿਸੁਦ੍ਧਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.