੬. ਛਛਕ੍ਕਸੁਤ੍ਤਵਣ੍ਣਨਾ

੪੨੦. ਆਦਿਮ੍ਹਿ ਕਲ੍ਯਾਣਨ੍ਤਿ ਆਦਿਕੋਟ੍ਠਾਸੇ ਕਲ੍ਯਾਣਂ ਏਤਸ੍ਸਾਤਿ ਵਾ ਆਦਿਕਲ੍ਯਾਣੋ, ਤਂ ਆਦਿਕਲ੍ਯਾਣਂ, ਆਦਿਕਲ੍ਯਾਣਭਾਵੋ ਚ ਦੋਸਵਿਗਮੇਨ ਇਚ੍ਛਿਤਬ੍ਬੋ. ਯਞ੍ਹਿ ਸਬ੍ਬਸੋ ਵਿਗਤਦੋਸਂ, ਤਂ ਪਰਿਪੁਣ੍ਣਗੁਣਮੇਵ ਹੋਤੀਤਿ ‘‘ਨਿਦ੍ਦੋਸ’’ਨ੍ਤਿ ਵੁਤ੍ਤਂ. ਕਤ੍ਵਾਤਿ ਚ ਪਦਂ, ‘‘ਕਲ੍ਯਾਣਂ ਕਤ੍ਵਾ ਭਦ੍ਦਕਂ ਕਤ੍ਵਾ’’ਤਿ ਪੁਰਿਮਪਦਦ੍ਵਯੇਨਪਿ ਯੋਜੇਤਬ੍ਬਂ. ਦੇਸਨਾਕਾਰੋ ਹਿ ਇਧ ਕਲ੍ਯਾਣਸਦ੍ਦੇਨ ਗਹਿਤੋ. ਤੇਨੇਵਾਹ – ‘‘ਦੇਸੇਤਬ੍ਬਧਮ੍ਮਸ੍ਸ ਕਲ੍ਯਾਣਤਾ ਦਸ੍ਸਿਤਾ ਹੋਤੀ’’ਤਿ, ਦੁਤਿਯੇ ਪਨ ਅਤ੍ਥਵਿਕਪ੍ਪੇ ਦੇਸੇਤਬ੍ਬਧਮ੍ਮਸ੍ਸ ਕਲ੍ਯਾਣਤਾ ਮੁਖ੍ਯੇਨੇਵ ਕਥਿਤਾ ਇਤਰਸ੍ਸ ਅਤ੍ਥਾਪਤ੍ਤਿਤੋ. ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਅਯਞ੍ਚ ਦੇਸਨਾਯ ਥੋਮਨਾ ਬੁਦ੍ਧਾਨਂ ਆਚਿਣ੍ਣਸਮਾਚਿਣ੍ਣਾਵਾਤਿ ਦਸ੍ਸੇਤੁਂ, ‘‘ਇਤਿ ਭਗਵਾ ਅਰਿਯਵਂਸ’’ਨ੍ਤਿਆਦਿ ਵੁਤ੍ਤਂ. ਧਮ੍ਮਗ੍ਗਹਣਮ੍ਪਿ ਦੇਸਨਾਯ ਥੋਮਨਾ ਏਵਾਤਿ ‘‘ਨਵਹਿ ਪਦੇਹੀ’’ਤਿ ਵੁਤ੍ਤਂ.

ਵੇਦਨਾ ਯਾਥਾਵਤੋ ਜਾਨਨਂ, ਤਞ੍ਚ ਮਗ੍ਗਕਿਚ੍ਚਂ, ਤਸ੍ਸ ਉਪਾਯੋ ਵਿਪਸ੍ਸਨਾਤਿਆਹ – ‘‘ਸਹਵਿਪਸ੍ਸਨੇਨ ਮਗ੍ਗੇਨ ਜਾਨਿਤਬ੍ਬਾਨੀ’’ਤਿ. ਪਰਿਞ੍ਞਾਭਿਸਮਯਾਦਿਕਿਚ੍ਚੇਨ ਨਿਬ੍ਬਤ੍ਤਿਯਾ ਅਸਮ੍ਮੋਹਤੋ ਚ ਪਟਿਵਿਜ੍ਝਿਤਬ੍ਬੋ. ਤੇਭੂਮਕਚਿਤ੍ਤਮੇਵ ਕਥਿਤਂ ਸਮ੍ਮਸਨਟ੍ਠਾਨਸ੍ਸ ਅਧਿਪ੍ਪੇਤਤ੍ਤਾ. ਏਸ ਨਯੋ ਧਮ੍ਮਾਯਤਨਾਦੀਸੁਪਿ. ਧਮ੍ਮਾਯਤਨਸ੍ਸ ਵਾ ਆਯਤਨਭਾਵਤੋ ਬਹਿਦ੍ਧਾਗਹਣਂ, ਨ ਸਬ੍ਬਸੋ ਅਨਜ੍ਝਤ੍ਤਭਾਵਤੋ. ਵਿਪਾਕਵੇਦਨਾਪਚ੍ਚਯਾ ਜਵਨਕ੍ਖਣੇ ਉਪ੍ਪਨ੍ਨਤਣ੍ਹਾਤਿ ਛਤ੍ਤਿਂਸਵਿਪਾਕਵੇਦਨਂ ਨਿਸ੍ਸਾਯ ਏਵਂ ਅਸ੍ਸਾਦੇਨ੍ਤੀ ਅਨੁਭਵੇਯ੍ਯਨ੍ਤਿ ਅਕੁਸਲਜਵਨਕ੍ਖਣਤੋ ਉਪ੍ਪਨ੍ਨਤਣ੍ਹਾ.

੪੨੨. ਪਾਟਿਯੇਕ੍ਕੋ ਅਨੁਸਨ੍ਧੀਤਿ ਯਥਾਨੁਸਨ੍ਧਿਆਦੀਨਂ ਅਸਮ੍ਭਵਤੋਤਿ ਅਧਿਪ੍ਪਾਯੇਨ ਵੁਤ੍ਤਂ. ਹੇਟ੍ਠਾਤਿ ਵਿਞ੍ਞਾਣਫਸ੍ਸਵੇਦਨਾਤਣ੍ਹਾਨਂ ਪਚ੍ਚਯਾਯਤ੍ਤਵੁਤ੍ਤਿਤਾਦਸ੍ਸਨੇਨ ਚਕ੍ਖਾਯਤਨਾਦੀਨਂ ਰੂਪਾਯਤਨਾਦੀਨਞ੍ਚ ਪਚ੍ਚਯਾਯਤ੍ਤਵੁਤ੍ਤਿਤਾ ਦੀਪਿਤਾ ਅਪਚ੍ਚਯੁਪ੍ਪਨ੍ਨਸ੍ਸ ਪਚ੍ਚਯਾਭਾਵਤੋ, ਯਞ੍ਚ ਪਚ੍ਚਯਾਯਤ੍ਤਵੁਤ੍ਤਿਕਂ, ਤਂ ਅਨਿਚ੍ਚਂ ਉਪ੍ਪਾਦਸਮ੍ਭਵਤੋ, ਯਦਨਿਚ੍ਚਂ ਤਂ ਦੁਕ੍ਖਂ, ਯਂ ਦੁਕ੍ਖਂ ਤਦਨਤ੍ਤਾਤਿ ਖਨ੍ਧਪਞ੍ਚਕੇ ਚ ਛਨ੍ਨਂ ਛਕ੍ਕਾਨਂ ਵਸੇਨ ਘਨਵਿਨਿਬ੍ਭੋਗਕਰਣੇਨ ਅਤ੍ਥਤੋ ਅਨਤ੍ਤਲਕ੍ਖਣਂ ਵਿਭਾਵਿਤਂ. ਨ ਸਰੂਪਤੋਤਿ ਸਰੂਪਤੋਪਿ ਤਂ ਵਿਭਾਵੇਤੁਕਾਮੋ ਤੇਨੇਵ ਛਛਕ੍ਕਾਨਂ ਵਸੇਨ ਘਨਵਿਨਿਬ੍ਭੋਗਨਯੇਨ ਬ੍ਯਤਿਰੇਕਤੋ ਚ ਅਨ੍ਵਯਤੋ ਚ ਦਸ੍ਸੇਨ੍ਤੋ ਭਗਵਾ – ‘‘ਚਕ੍ਖੁ ਅਤ੍ਤਾਤਿ ਯੋ ਵਦੇਯ੍ਯਾ’’ਤਿਆਦਿਮਾਹਾਤਿ ਯਥਾਨੁਸਨ੍ਧਿਕਾਵ ਦੇਸਨਾ ਵਿਭਾਵਿਤਾ. ਤੇਨਾਹ ‘‘ਹੇਟ੍ਠਾ ਕਥਿਤਾਨਂ ਹੀ’’ਤਿਆਦਿ. ਹੇਟ੍ਠਾ ਪਨ ਛਨ੍ਨਂ ਛਕ੍ਕਾਨਂ ਵਸੇਨ ਵਿਨਿਬ੍ਭੋਗਦਸ੍ਸਨਮਤ੍ਤਂ, ਨ ਅਨਤ੍ਤਲਕ੍ਖਣਂ ਵਿਭਾਵਿਤਂ, ਇਧ ਪਨ ਸਰੂਪਤੋ ਅਨਤ੍ਤਲਕ੍ਖਣਂ ਵਿਭਾਵਿਤਨ੍ਤਿ ਅਧਿਪ੍ਪਾਯੇਨ ਅਨੁਸਨ੍ਧਨ੍ਤਰਭਾਵਜੋਤਨਾ. ਯਦਿਪਿ ਅਨਤ੍ਤਭਾਵੋ ਨਾਮ ਚਤੂਸੁਪਿ ਸਚ੍ਚੇਸੁ ਲਬ੍ਭਤੇਵ, ਸਬ੍ਬੇਪਿ ਹਿ ਧਮ੍ਮਾ ਅਨਤ੍ਤਾ, ਇਮੇ ਪਨੇਤ੍ਥ ਦ੍ਵੇਪਿ ਨਯਾ ਸਮ੍ਮਸਨਵਸੇਨ ਪਵਤ੍ਤਾਤਿ ਵੁਤ੍ਤਂ – ‘‘ਦ੍ਵਿਨ੍ਨਂ ਸਚ੍ਚਾਨਂ ਅਨਤ੍ਤਭਾਵਦਸ੍ਸਨਤ੍ਥ’’ਨ੍ਤਿ. ਨ ਉਪਪਜ੍ਜਤੀਤਿ ਉਪਪਤ੍ਤਿਸਙ੍ਖਾਤਯੁਤ੍ਤਿਯਾ ਨ ਸਮੇਤੀਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਨ ਯੁਜ੍ਜਤੀ’’ਤਿ. ਅਤ੍ਤਵਾਦਿਨਾ – ‘‘ਨਿਚ੍ਚੋ ਧੁਵੋ ਸਸ੍ਸਤੋ’’ਤਿ ਅਭਿਮਤੋ, ਚਕ੍ਖੁਞ੍ਚ ਉਪ੍ਪਾਦਵਨ੍ਤਤਾਯ ਅਨਿਚ੍ਚਂ, ਯਂ ਪਚ੍ਚਯਾਯਤ੍ਥਵੁਤ੍ਤਿਤਾ, ਤਸ੍ਮਾ ‘‘ਚਕ੍ਖੁ ਅਤ੍ਤਾਤਿ ਯੋ ਵਦੇਯ੍ਯ, ਤਂ ਨ ਉਪਪਜ੍ਜਤੀ’’ਤਿਆਦਿ. ਸਕ੍ਕਾਯਵਤ੍ਥੁ ਚਕ੍ਖੁ ਅਨਤ੍ਤਾ ਅਨਿਚ੍ਚਭਾਵਤੋ ਸੇਯ੍ਯਥਾਪਿ ਘਟੋ, ਚਕ੍ਖੁਂ ਅਨਿਚ੍ਚਂ ਪਚ੍ਚਯਾਯਤ੍ਤਵੁਤ੍ਤਿਭਾਵਤੋ ਸੇਯ੍ਯਥਾਪਿ ਘਟੋ, ਚਕ੍ਖੁ ਪਚ੍ਚਯਾਯਤ੍ਤਵੁਤ੍ਤਿ ਉਪ੍ਪਾਦਾਦਿਸਮ੍ਭਵਤੋ ਸੇਯ੍ਯਥਾਪਿ ਘਟੋ. ਵਿਗਚ੍ਛਤੀਤਿ ਭਙ੍ਗੁਪ੍ਪਤ੍ਤਿਯਾ ਸਭਾਵਾਵਿਗਮੇਨ ਵਿਗਚ੍ਛਤਿ. ਤੇਨਾਹ ‘‘ਨਿਰੁਜ੍ਝਤੀ’’ਤਿ.

੪੨੪. ਯਸ੍ਮਾ ਕਿਲੇਸਵਟ੍ਟਮੂਲਕਂ ਕਮ੍ਮਵਟ੍ਟਂ, ਕਮ੍ਮਵਟ੍ਟਮੂਲਕਞ੍ਚ ਵਿਪਾਕਵਟ੍ਟਂ. ਕਿਲੇਸੁਪ੍ਪਤ੍ਤਿ ਚ ਤਣ੍ਹਾਦਿਗ੍ਗਾਹਪੁਬ੍ਬਿਕਾ, ਤਸ੍ਮਾ ‘‘ਤਿਣ੍ਣਂ ਵਾ ਗਾਹਾਨਂ ਵਸੇਨ ਵਟ੍ਟਂ ਦਸ੍ਸੇਤੁ’’ਨ੍ਤਿ ਆਹ. ਯਸ੍ਮਾ ਪਨ ਤਣ੍ਹਾਪਕ੍ਖਿਕਾ ਧਮ੍ਮਾ ਸਮੁਦਯਸਚ੍ਚਂ, ਚਕ੍ਖਾਦਯੋ ਦੁਕ੍ਖਸਚ੍ਚਂ, ਤਸ੍ਮਾ ਵੁਤ੍ਤਂ – ‘‘ਦ੍ਵਿਨ੍ਨਂ ਸਚ੍ਚਾਨਂ ਵਸੇਨ ਵਟ੍ਟਂ ਦਸ੍ਸੇਤੁ’’ਨ੍ਤਿ. ਤਣ੍ਹਾਮਾਨਦਿਟ੍ਠਿਗ੍ਗਾਹਾਵ ਵੇਦਿਤਬ੍ਬਾ ਸਕ੍ਕਾਯਗਾਮਿਨਿਪਟਿਪਦਾਯ ਅਧਿਪ੍ਪੇਤਤ੍ਤਾ. ‘‘ਏਤਂ ਮਮਾ’’ਤਿਆਦਿਨਾ ਗਹਣਮੇਵੇਤ੍ਥ ਅਨੁਪਸ੍ਸਨਾਤਿ ਆਹ – ‘‘ਗਾਹਤ੍ਤਯਵਸੇਨ ਪਸ੍ਸਤੀ’’ਤਿ.

ਤਿਣ੍ਣਂ ਗਾਹਾਨਂ ਪਟਿਪਕ੍ਖਵਸੇਨਾਤਿ ਤਣ੍ਹਾਦਿਗ੍ਗਾਹਪਟਿਪਕ੍ਖਭੂਤਾਨਂ ਦੁਕ੍ਖਾਨਿਚ੍ਚਾਨਤ੍ਤਾਨੁਪਸ੍ਸਨਾਨਂ ਵਸੇਨ, ਤਾਹਿ ਵਾ ਤਿਣ੍ਣਂ ਗਾਹਾਨਂ ਪਟਿਪਕ੍ਖਵਸੇਨ ਵਿਨਿਵੇਠਨਵਸੇਨ ਅਨੁਪ੍ਪਾਦਨਵਸੇਨਾਤਿ ਅਤ੍ਥੋ. ਪਟਿਪਕ੍ਖਵਸੇਨ ਵਿਵਟ੍ਟਂ ਦਸ੍ਸੇਤੁਨ੍ਤਿ ਯੋਜਨਾ. ਸਕ੍ਕਾਯਨਿਰੋਧਗਾਮਿਨੀ ਪਟਿਪਦਾਤਿ ਏਤ੍ਥ ਨਿਰੋਧਧਮ੍ਮੋ ਸਰੂਪੇਨੇਵ ਦਸ੍ਸਿਤੋਤਿ ਆਹ – ‘‘ਨਿਰੋਧੋ…ਪੇ… ਦਸ੍ਸੇਤੁ’’ਨ੍ਤਿ. ਪਟਿਸੇਧਵਚਨਾਨੀਤਿ ਪਟਿਕ੍ਖੇਪਵਚਨਾਨਿ.

੪੨੫. ਤਣ੍ਹਾਦੀਨਂ ਅਨੁਪਾਦਿਯਨਵਚਨਾਨਿ ਤਣ੍ਹਾਦਿਟ੍ਠਿਵਸੇਨੇਵ ਵੁਤ੍ਤਾਨਿ ਤਣ੍ਹਾਦਿਟ੍ਠੀਨਂਯੇਵ ਅਭਿਨਨ੍ਦਨਾਦਿਵਸੇਨ ਪਵਤ੍ਤਿਸਬ੍ਭਾਵਤੋ. ਅਪ੍ਪਹੀਨਤ੍ਥੋ ਅਨੁਸਯਤ੍ਥੋਤਿ ਆਹ – ‘‘ਅਨੁਸੇਤੀਤਿ ਅਪ੍ਪਹੀਨੋ ਹੋਤੀ’’ਤਿ ਅਰਿਯਮਗ੍ਗੇਨ ਹਿ ਅਪ੍ਪਹੀਨੋ ਥਾਮਗਤੋ ਰਾਗਾਦਿਕਿਲੇਸੋ ਅਨੁਸਯੋ ਕਾਰਣਲਾਭੇ ਸਤਿ ਉਪ੍ਪਜ੍ਜਨਾਰਹਭਾਵਤੋ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਵਟ੍ਟਦੁਕ੍ਖਕਿਲੇਸਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਸ੍ਸ ਚੇਵ ਕਿਲੇਸਦੁਕ੍ਖਸ੍ਸ ਚ. ਸਉਪਾਦਿਸੇਸਨਿਬ੍ਬਾਨਞ੍ਹਿ ਕਿਲੇਸਦੁਕ੍ਖਸ੍ਸ ਅਨ੍ਤਕਰਣਂ, ਅਨੁਪਾਦਿਸੇਸਨਿਬ੍ਬਾਨਂ ਵਟ੍ਟਦੁਕ੍ਖਸ੍ਸ.

੪੨੬. ਤੇਸਨ੍ਤਿ ਅਨੁਸਯਾਨਂ. ਪਟਿਕ੍ਖੇਪਵਸੇਨਾਤਿ ਪਜਹਨਵਸੇਨ, ਅਪ੍ਪਵਤ੍ਤਿਕਰਣਵਸੇਨਾਤਿ ਅਤ੍ਥੋ. ਅਵਿਜ੍ਜਂ ਪਜਹਿਤ੍ਵਾਤਿ ਅਨਵਸੇਸਤੋ ਅਵਿਜ੍ਜਂ ਅਪ੍ਪਵਤ੍ਤਿਧਮ੍ਮਤਂ ਆਪਾਦੇਤ੍ਵਾ. ਕਾਮਂ ਹੇਟ੍ਠਿਮਮਗ੍ਗਞਾਣਮ੍ਪਿ ਅਵਿਜ੍ਜਾਪਹਾਯਿਨੀ ਵਿਜ੍ਜਾ ਏਵ, ਤਂ ਪਨ ਞਾਣਂ ਅਵਿਜ੍ਜਾਯ ਅਨਵਸੇਸਪ੍ਪਹਾਯਕਂ ਨ ਹੋਤਿ, ਅਗ੍ਗਮਗ੍ਗਞਾਣੇ ਪਨ ਉਪ੍ਪਨ੍ਨੇ ਅਵਿਜ੍ਜਾਯ ਲੇਸੋਪਿ ਨਾਵਸਿਸ੍ਸਤੀਤਿ ਤਦੇਵ ਅਵਿਜ੍ਜਾਯ ਪਹਾਯਕਨ੍ਤਿ ਆਹ – ‘‘ਅਰਹਤ੍ਤਮਗ੍ਗਵਿਜ੍ਜਂ ਉਪ੍ਪਾਦੇਤ੍ਵਾ’’ਤਿ.

੪੨੭. ਸਯਮੇਵ ਤਥਾਗਤੇ ਅਤ੍ਤਨੋ ਬੁਦ੍ਧਾਨੁਭਾਵੇਨ ਦੇਸੇਨ੍ਤੇ ਸਟ੍ਠਿ ਭਿਕ੍ਖੂ ਅਰਹਤ੍ਤਂ ਪਤ੍ਤਾਤਿ ਅਨਚ੍ਛਰਿਯਮੇਤਂ, ਅਥ ਕਿਂ ਅਚ੍ਛਰਿਯਨ੍ਤਿ ਆਹ ‘‘ਇਮ’’ਨ੍ਤਿਆਦਿ. ਕਥੇਨ੍ਤੇਪੀਤਿ ਏਤ੍ਥ ਇਤਿਸਦ੍ਦੋ ਪਕਾਰਤ੍ਥੋ, ਇਮਿਨਾਵ ਪਕਾਰੇਨਾਤਿ ਅਤ੍ਥੋ. ਪਤ੍ਤਾ ਏਵਾਤਿ ਸਟ੍ਠਿ ਭਿਕ੍ਖੂ ਅਰਹਤ੍ਤਂ ਪਤ੍ਤਾ ਏਵਾਤਿ ਯੋਜਨਾ. ਏਤਮ੍ਪਿ ਅਨਚ੍ਛਰਿਯਂ, ਸਤ੍ਥੁ ਸਮ੍ਮੁਖਾ ਸਾਵਕਾ ਸਮੁਦਾਗਮਾ ਮਹਾਭਿਞ੍ਞਾ ਪਭਿਨ੍ਨਪਟਿਸਮ੍ਭਿਦਾ ਤਥਾ ਤਥਾ ਸਪ੍ਪਾਟਿਹਾਰਿਯਂ ਧਮ੍ਮਂ ਦੇਸੇਨ੍ਤੀਤਿ. ਤੇਨਾਹ – ‘‘ਮਹਾਭਿਞ੍ਞਪ੍ਪਤ੍ਤਾ ਹਿ ਤੇ ਸਾਵਕਾ’’ਤਿ.

ਮਹਾਮਣ੍ਡਪੇਤਿ ਲੋਹਪਾਸਾਦਸ੍ਸ ਪੁਰਤੋ ਏਵ ਮਹਾਭਿਕ੍ਖੁਸਨ੍ਨਿਪਾਤੋ ਜਾਤੋਤਿ ਤੇਸਂ ਪਹੋਨਕਵਸੇਨ ਕਤੇ ਮਹਤਿ ਸਾਣਿਮਣ੍ਡਪੇਤਿ ਵਦਨ੍ਤਿ. ਤੇਸੁਪਿ ਠਾਨੇਸੂਤਿ ਤੇਸੁ ਯਥਾਵੁਤ੍ਤਮਹਾਮਣ੍ਡਪਾਦੀਸੁ ਠਾਨੇਸੁ. ਮਹਾਥੇਰੋ ਅਤ੍ਥੀਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਦੇਵਤ੍ਥੇਰਸ੍ਸ ਗੁਣੇ ਸੁਤ੍ਵਾ ਪਸਨ੍ਨਮਾਨਸੋ ਮਹਾਥੇਰੋ, ਤਥਾਪਿ ਵਤ੍ਥਸਮ੍ਪਤ੍ਤਿਯਾ ਪਸੀਦਿਤ੍ਵਾ ‘‘ਤ੍ਵਂ ਪਨ ਨ੍ਹਾਪੇਹੀ’’ਤਿ ਆਹ.

ਹੇਟ੍ਠਾਪਾਸਾਦੇਤਿ ਚ ਕਲ੍ਯਾਣਿਯਮਹਾਵਿਹਾਰੇ ਉਪੋਸਥਾਗਾਰੇ ਹੇਟ੍ਠਾਪਾਸਾਦੇ ਏਕਦਾ ਉਪਰਿਪਾਸਾਦੇ ਏਕਦਾ, ਕਥੇਸੀਤਿ. ਚੂਲ਼ਨਾਗਸ੍ਸ ਤਥਾ ਮਹਤੀ ਪਰਿਸਾ ਦੇਵਤਾਨੁਭਾਵੇਨ ਅਭਿਞ੍ਞਾਪਾਦਨਂ ਅਹੋਸੀਤਿ ਕੇਚਿ. ਥੇਰੋ ਪਨ ਮਹਿਦ੍ਧਿਕੋ ਅਹੋਸਿ, ਤਸ੍ਮਾ ਤਾਵ ਮਹਤਿਂ ਪਰਿਸਂ ਅਭਿਞ੍ਞਾਪੇਸੀਤਿ ਅਪਰੇ.

ਤਤੋ ਤਤੋਤਿ ਤਸ੍ਸਂ ਤਸ੍ਸਂ ਦਿਸਾਯਂ. ਏਕੋਵਾਤਿ ਏਕਚ੍ਚੋ ਏਵ, ਨ ਬਹੁਸੋ, ਕਤਿਪਯਾਵ ਪੁਥੁਜ੍ਜਨਾ ਅਹੇਸੁਨ੍ਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ.

ਛਛਕ੍ਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.