੭. ਮਹਾਸਲ਼ਾਯਤਨਿਕਸੁਤ੍ਤਵਣ੍ਣਨਾ

੪੨੮. ਮਹਨ੍ਤਾਨਿ ਸਲ਼ਾਯਤਨਾਨਿ ਅਧਿਕਿਚ੍ਚ ਪਵਤ੍ਤਤ੍ਤਾ ਮਹਾਸਲ਼ਾਯਤਨਿਕਂ, ਮਹਨ੍ਤਤਾ ਚ ਤੇਸਂ ਮਹਨ੍ਤਂ ਲੋਕਸਨ੍ਨਿਵਾਸਂ ਅਭਿਬ੍ਯਾਪੇਤ੍ਵਾ ਠਿਤਤ੍ਤਾ ਅਯੋਨਿਸੋ ਗਯ੍ਹਮਾਨਾਨਂ ਮਹਤੋ ਅਨਤ੍ਥਾਯ ਸਂਵਤ੍ਤਨਤੋ, ਯੋਨਿਸੋ ਗਯ੍ਹਮਾਨਾਨਂ ਮਹਤੋ ਅਤ੍ਥਾਯ ਹਿਤਾਯ ਸੁਖਾਯ ਸਂਵਤ੍ਤਨਤੋ ਚ ਦਟ੍ਠਬ੍ਬਾ. ਜੋਤਕਨ੍ਤਿ ਬੋਧਕਂ.

੪੨੯. ਸਿਖਾਪ੍ਪਤ੍ਤਾਯ ਵਿਪਸ੍ਸਨਾਯ ਜਾਨਨਮ੍ਪਿ ਯਥਾਭੂਤਜਾਨਨਮੇਵ ਮਗ੍ਗੇਨ ਜਾਨਨਸ੍ਸ ਆਸਨ੍ਨਕਾਰਣਭਾਵਤੋਤਿ ਆਹ – ‘‘ਸਹਵਿਪਸ੍ਸਨੇਨ ਮਗ੍ਗੇਨ ਅਜਾਨਨ੍ਤੋ’’ਤਿ. ਵੁਡ੍ਢਿਂ ਗਚ੍ਛਨ੍ਤੀਤਿ ਪਚ੍ਚਯਸਮੋਧਾਨੇਨ ਭਵਯੋਨਿਗਤਿਠਿਤਿਸਤ੍ਤਾਵਾਸਪਾਲ਼ਿਯਾ ਅਪਰਾਪਰਂ ਪਰਿਵੁਦ੍ਧਿਂ ਗਚ੍ਛਨ੍ਤਿ. ਏਵਂਭੂਤਾ ਪਗੁਣਭਾਵਮਾਪਾਦਿਤਾ ਸਮਥਵਿਪਸ੍ਸਨਾਧਮ੍ਮਾ ਵਿਯ ਸੁਟ੍ਠੁਤਰਂ ਵਸੀਭਾਵਂ ਪਾਪਿਤਾ ਝਾਨਾਭਿਞ੍ਞਾ ਵਿਯ ਚ ਵਸੀਭੂਤਾ ਹੁਤ੍ਵਾ ਉਪਰੂਪਰਿ ਬ੍ਰੂਹੇਨ੍ਤੀਤਿ ਆਹ – ‘‘ਵਸੀਭਾਵਂ ਗਚ੍ਛਨ੍ਤੀ’’ਤਿ. ਤਥਾ ਹਿ ਤੇ ਕਦਾਚਿ ਭਵਪਤ੍ਥਨਾਯ ਅਨੁਪ੍ਪਾਦਿਤਾਯਪਿ ਅਪ੍ਪਹੀਨਭਾਵੇਨੇਵਸ੍ਸਾ ਤਿਟ੍ਠਨ੍ਤਿ. ਅਕੁਸਲਾ ਧਮ੍ਮਾਵ ਯੇਭੁਯ੍ਯੇਨ ਦਸ੍ਸਨਾਯਤਨੇਨ ਵਿਨਾਸਦਸ੍ਸਨਤੋ ਪਵਤ੍ਤਨ੍ਤਿ ਪਰਿਵਡ੍ਢਨ੍ਤਿ ਚ. ਪਞ੍ਚਦ੍ਵਾਰਿਕਦਰਥਾਤਿ ਪਞ੍ਚਦ੍ਵਾਰਿਕਜਵਨਸਹਗਤਾ ਅਕੁਸਲਦਰਥਾ. ਏਵਂ ਮਨੋਦ੍ਵਾਰਿਕਦਰਥਾ ਵੇਦਿਤਬ੍ਬਾ. ਸਨ੍ਤਾਪਾਤਿ ਦਰਥੇਹਿ ਬਲਵਨ੍ਤੋ ਸਮ੍ਪਯੁਤ੍ਤਧਮ੍ਮਾਨਂ ਨਿਸ੍ਸਯਸ੍ਸ ਚ ਸਨ੍ਤਾਪਨਕਰਾ. ਪਰਿਲ਼ਾਹਾਤਿ ਤਤੋਪਿ ਬਲਵਤਰਾ ਤੇਸਂਯੇਵ ਪਰਿਦਹਨਕਰਾ.

੪੩੦. ਪਞ੍ਚਦ੍ਵਾਰਿਕਸੁਖਂ, ਨ ਕਾਯਪ੍ਪਸਾਦਸਨ੍ਨਿਸ੍ਸਿਤਸੁਖਮੇਵ. ਮਨੋਦ੍ਵਾਰਿਕਸੁਖਨ੍ਤਿ ਮਨੋਦ੍ਵਾਰਿਕਚਿਤ੍ਤਸਨ੍ਨਿਸ੍ਸਿਤਸੁਖਂ, ਨ ਯਂ ਕਿਞ੍ਚਿ ਚੇਤਸਿਕਸੁਖਂ ਤਸ੍ਸ ਕਾਯਿਕਸੁਖਗ੍ਗਹਣੇਨੇਵ ਗਹਿਤਤ੍ਤਾ. ਪਞ੍ਚਦ੍ਵਾਰਿਕਜਵਨੇਨ ਸਮਾਪਜ੍ਜਨਂ ਵਾ ਵੁਟ੍ਠਾਨਂ ਵਾ ਨਤ੍ਥੀਤਿ ਇਦਂ ਮਨੋਦ੍ਵਾਰਿਕਜਵਨੇਨ ਤਸ੍ਸ ਸਮ੍ਭਵਂ ਦਸ੍ਸੇਤੁਂ, ਮਗ੍ਗਸ੍ਸ ਵਸੇਨ ਵੁਤ੍ਤਂ, ਨ ਪਨ ਤਪ੍ਪਸਙ੍ਗਸਙ੍ਕਾਨਿਵਤ੍ਤਨਤ੍ਥਂ. ਵਿਞ੍ਞਤ੍ਤਿਮਤ੍ਤਮ੍ਪਿ ਜਨੇਤੁਂ ਅਸਮਤ੍ਥਂ ਸਮਾਪਜ੍ਜਨਸ੍ਸ ਕਥਂ ਪਚ੍ਚਯੋ ਹੋਤਿ, ਬੁਦ੍ਧਾਨਂ ਪਨ ਭਗਵਨ੍ਤਾਨਂ ਹੋਤੀਤਿ ਚੇ? ਤਥਾਪਿ ਤਸ੍ਸ ਆਸਨ੍ਨਟ੍ਠਾਨੇ ਪਞ੍ਚਦ੍ਵਾਰਿਕਚਿਤ੍ਤਪ੍ਪਵਤ੍ਤਿਯਾ ਅਸਮ੍ਭਵੋ ਏਵ ਤਾਦਿਸਸ੍ਸ ਪੁਬ੍ਬਾਭੋਗਸ੍ਸ ਤਸ੍ਮਿਂ ਕਾਲੇ ਅਸਮ੍ਭਵਤੋ. ਏਤੇਨੇਵ ਯਾ ਕੇਸਞ੍ਚਿ ਅਰਿਯਧਮ੍ਮੇ ਅਕੋਵਿਦਾਨਂ ਘਟਸਭਾਵਾਦੀਸੁ ਬੁਦ੍ਧਿਤੁਲ੍ਯਕਾਰਿਤਾਪਤ੍ਤਿਚੋਦਨਾ; ਸਾ ਪਟਿਕ੍ਖਿਤ੍ਤਾਤਿ ਦਟ੍ਠਬ੍ਬਾ ਤਂਤਂਪੁਰਿਮਾਭੋਗਵਸੇਨ ਤੇਨ ਤੇਨ ਪਞ੍ਚਦ੍ਵਾਰਿਕਾਭਿਨਿਯਤਮਨੋਵਿਞ੍ਞਾਣਸ੍ਸ ਪਰਤੋ ਪਵਤ੍ਤਮਾਨਮਨੋਵਿਞ੍ਞਾਣੇਨ ਤਸ੍ਮਿਂ ਤਸ੍ਮਿਂ ਅਤ੍ਥੇ ਵਣ੍ਣਸਣ੍ਠਾਨਾਦਿਵਿਸੇਸਸ੍ਸ ਵਿਨਿਚ੍ਛਿਨਿਤਬ੍ਬਤੋ. ਉਪ੍ਪਨ੍ਨਮਤ੍ਤਕਮੇਵ ਹੋਤੀਤਿ ਪਞ੍ਚਦ੍ਵਾਰਿਕਜਵਨਂ ਤਾਦਿਸਂ ਕਿਞ੍ਚਿ ਅਤ੍ਥਨਿਚ੍ਛਯਕਿਚ੍ਚਂ ਕਾਤੁਂ ਨ ਸਕ੍ਕੋਤਿ, ਕੇਵਲਂ ਉਪ੍ਪਨ੍ਨਮਤ੍ਤਮੇਵ ਹੋਤਿ. ਅਯਨ੍ਤਿ ‘‘ਆਦੀਨਵਾਨੁਪਸ੍ਸਿਨੋ’’ਤਿਆਦਿਨਾ ਵੁਤ੍ਤਾ.

੪੩੧. ਕੁਸਲਚਿਤ੍ਤ…ਪੇ… ਭੂਤਸ੍ਸਾਤਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਸਹਗਤਕੁਸਲਚਿਤ੍ਤਸ੍ਸ ਸਮ੍ਪਯੁਤ੍ਤਚੇਤੋਸੁਖਸਮਙ੍ਗੀਭੂਤਸ੍ਸ. ਪੁਬ੍ਬਸੁਦ੍ਧਿਕਾਤਿ ਮਗ੍ਗੁਪ੍ਪਤ੍ਤਿਤੋ, ਵਿਪਸ੍ਸਨਾਰਮ੍ਭਤੋਪਿ ਵਾ ਪੁਬ੍ਬੇਵ ਸੁਦ੍ਧਾ. ਤੇਨਾਹ – ‘‘ਆਦਿਤੋ ਪਟ੍ਠਾਯ ਪਰਿਸੁਦ੍ਧਾਵ ਹੋਨ੍ਤੀ’’ਤਿ. ਸਬ੍ਬਤ੍ਥਕਕਾਰਾਪਕਙ੍ਗਾਨੀਤਿ ਸੀਲਵਿਸੋਧਨਸ੍ਸ ਚਿਤ੍ਤਸਮਾਧਾਨਸ੍ਸ ਵਿਪਸ੍ਸਨਾਭਿਯੋਗਸ੍ਸ ਮਗ੍ਗੇਨ ਪਹਾਤਬ੍ਬਕਿਲੇਸਪਹਾਨਸ੍ਸਾਤਿ ਸਬ੍ਬਸ੍ਸਪਿ ਮਗ੍ਗਸਮ੍ਭਾਰਕਿਚ੍ਚਸ੍ਸ ਕਾਰਾਪਕਙ੍ਗਾਨਿ. ਅਟ੍ਠਙ੍ਗਿਕੋ ਵਾਤਿ ਪਠਮਜ੍ਝਾਨਿਕੋ ਵਾ ਅਟ੍ਠਙ੍ਗਿਕੋ, ਦੁਤਿਯਜ੍ਝਾਨਿਕੋ ਵਾ ਸਤ੍ਤਙ੍ਗਿਕੋ ਹੋਤਿ.

ਇਮਮੇਵ ਸੁਤ੍ਤਪਦੇਸਂ ਗਹੇਤ੍ਵਾਤਿ, ‘‘ਯਾ ਤਥਾਭੂਤਸ੍ਸ ਦਿਟ੍ਠੀ’’ਤਿਆਦਿਨਾ ਸਮ੍ਮਾਦਿਟ੍ਠਿਆਦੀਨਂ ਪਞ੍ਚਨ੍ਨਂਯੇਵ ਤਸ੍ਮਿਂ ਠਾਨੇ ਗਹਿਤਤ੍ਤਾ ਲੋਕੁਤ੍ਤਰਮਗ੍ਗੋ ਪਞ੍ਚਙ੍ਗਿਕੋਤਿ ਵਦਤਿ. ਸੋਤਿ ਤਥਾ ਵਦਨ੍ਤੋ ਵਿਤਣ੍ਡਵਾਦੀ. ਅਨਨ੍ਤਰਵਚਨੇਨੇਵਾਤਿ, ‘‘ਯਾ ਤਥਾਭੂਤਸ੍ਸ ਦਿਟ੍ਠੀ’’ਤਿਆਦਿਵਚਨਸ੍ਸ, ‘‘ਏਵਮਸ੍ਸਾਯ’’ਨ੍ਤਿਆਦਿਨਾ ਅਨਨ੍ਤਰਵਚਨੇਨ. ਪਟਿਸੇਧਿਤਬ੍ਬੋਤਿ ਪਟਿਕ੍ਖਿਪਿਤਬ੍ਬੋ. ‘‘ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ’’ਤਿ ਹਿ ਇਦਂ ਵਚਨਂ ਅਰਿਯਮਗ੍ਗਸ੍ਸ ਪਞ੍ਚਙ੍ਗਿਕਭਾਵਂ ਉਜੁਕਮੇਵ ਪਟਿਕ੍ਖਿਪਤਿ. ਯਦਿ ਏਵਂ ‘‘ਯਾ ਤਥਾਭੂਤਸ੍ਸ ਦਿਟ੍ਠੀ’’ਤਿਆਦਿਨਾ ਤਤ੍ਥ ਪਞ੍ਚਨ੍ਨਂ ਏਵ ਅਙ੍ਗਾਨਂ ਗਹਣਂ ਕਿਮਤ੍ਥਿਯਨ੍ਤਿ ਆਹ ‘‘ਉਤ੍ਤਰਿ ਚਾ’’ਤਿਆਦਿ. ਸਮ੍ਮਾਵਾਚਂ ਭਾਵੇਤਿ ਅਰਿਯਮਗ੍ਗਸਮਙ੍ਗੀ. ਤੇਨਾਹ ‘‘ਮਿਚ੍ਛਾਵਾਚਂ ਪਜਹਤੀ’’ਤਿ. ਯਸ੍ਮਿਞ੍ਹਿ ਖਣੇ ਸਮ੍ਮਾਵਾਚਾ ਭਾਵਨਾਪਾਰਿਪੂਰਿਂ ਗਚ੍ਛਤਿ, ਤਸ੍ਮਿਂਯੇਵ ਮਿਚ੍ਛਾਵਾਚਾ ਪਜਹੀਯਤੀਤਿ. ਸਹੇਵ ਵਿਰਤਿਯਾ ਪੂਰੇਨ੍ਤਿ ਸਮੁਚ੍ਛੇਦਵਿਰਤਿਯਾ ਵਿਨਾ ਦੁਕ੍ਖਪਰਿਞ੍ਞਾਦੀਨਂ ਅਸਮ੍ਭਵਤੋ. ਆਦਿਤੋ ਪਟ੍ਠਾਯ ਪਰਿਸੁਦ੍ਧਾਨੇਵ ਵਟ੍ਟਨ੍ਤਿ ਪਰਿਸੁਦ੍ਧੇ ਸੀਲੇ ਪਤਿਟ੍ਠਿਤਸ੍ਸੇਵ ਭਾਵਨਾਯ ਇਜ੍ਝਨਤੋ. ਯਥਾਵੁਤ੍ਤਮਤ੍ਥਂ ਗਨ੍ਥਨ੍ਤਰੇਨਪਿ ਸਮਤ੍ਥੇਤੁਂ, ‘‘ਸੁਭਦ੍ਦਸੁਤ੍ਤੇਪਿ ਚਾ’’ਤਿਆਦਿ ਵੁਤ੍ਤਂ. ਅਨੇਕੇਸੁ ਸੁਤ੍ਤਸਤੇਸੁ ਅਟ੍ਠਙ੍ਗਿਕੋਵ ਮਗ੍ਗੋ ਆਗਤੋ, ਨ ਪਞ੍ਚਙ੍ਗਿਕੋਤਿ ਅਧਿਪ੍ਪਾਯੋ.

ਸਮ੍ਮਾਸਤਿ ਮਗ੍ਗਕ੍ਖਣੇ ਕਾਯਾਨੁਪਸ੍ਸਨਾਦਿਚਤੁਕਿਚ੍ਚਸਾਧਿਕਾ ਹੋਤੀਤਿ ਤਂ ਚਤੁਬ੍ਬਿਧਂ ਕਤ੍ਵਾ ਦਸ੍ਸੇਨ੍ਤੋ, ‘‘ਮਗ੍ਗਸਮ੍ਪਯੁਤ੍ਤਾਵ ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਆਹ. ਨ ਚਤੁਮਗ੍ਗਸਮ੍ਪਯੁਤ੍ਤਤਾਵਸੇਨ. ਏਸ ਨਯੋ ਸਮ੍ਮਪ੍ਪਧਾਨਾਦੀਸੁਪਿ. ਅਞ੍ਞਮਞ੍ਞਾਨਤਿਵਤ੍ਤਮਾਨਾ ਯੁਗਨਦ੍ਧਾ ਯੁਤ੍ਤਾ ਵਿਯ ਅਰਿਯਮਗ੍ਗਯੁਗਨਦ੍ਧਾ ਅਞ੍ਞਮਞ੍ਞਂ ਪਟਿਬਦ੍ਧਾਤਿ ਯੁਗਨਦ੍ਧਾ. ਤੇਨਾਹ – ‘‘ਏਕਕ੍ਖਣਿਕਯੁਗਨਨ੍ਧਾ’’ਤਿ ਅਰਿਯਮਗ੍ਗਕ੍ਖਣੇ ਏਵ ਹਿ ਸਮਥਵਿਪਸ੍ਸਨਾ ਏਕਕ੍ਖਣਿਕਾ ਹੁਤ੍ਵਾ ਸਮਧੁਰਂ ਵਤ੍ਤਨ੍ਤਿ. ਤੇਨੇਵਾਹ ‘‘ਏਤੇ ਹੀ’’ਤਿਆਦਿ. ਅਞ੍ਞਸ੍ਮਿਂ ਖਣੇ ਸਮਾਪਤ੍ਤਿ, ਅਞ੍ਞਸ੍ਮਿਂ ਵਿਪਸ੍ਸਨਾਤਿ ਇਦਂ ਤੇਸਂ ਤਤ੍ਥ ਤਤ੍ਥ ਕਿਚ੍ਚਤੋ ਅਧਿਕਭਾਵਂ ਸਨ੍ਧਾਯ ਵੁਤ੍ਤਂ, ਨ ਅਞ੍ਞਥਾ. ਨ ਹਿ ਪਞ੍ਞਾਰਹਿਤਾ ਸਮਾਪਤ੍ਤਿ, ਸਮਾਧਿਰਹਿਤਾ ਚ ਵਿਪਸ੍ਸਨਾ ਅਤ੍ਥਿ. ਅਰਿਯਮਗ੍ਗੇ ਪਨ ਏਕਕ੍ਖਣਿਕਾ ਸਮਧੁਰਤਾਯ ਏਕਰਸਭਾਵੇਨਾਤਿ ਅਤ੍ਥੋ. ਫਲਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ.

ਮਹਾਸਲ਼ਾਯਤਨਿਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.