੪. ਨਨ੍ਦਕੋਵਾਦਸੁਤ੍ਤਵਣ੍ਣਨਾ

੩੯੮. ਸਙ੍ਘਸ੍ਸ ਭਾਰਂ ਅਕਾਸਿ ਉਪਾਯੇਨ ਨਨ੍ਦਕਤ੍ਥੇਰਸ੍ਸ ਓਵਾਦੇਨ ਵਿਨੇਤਬ੍ਬਾਨਂ ਭਿਕ੍ਖੁਨੀਨਂ ਵਿਨਯਤ੍ਥਂ. ਤੇਨਾਹ ‘‘ਇਮਂ ਪਨਾ’’ਤਿਆਦਿ. ਪਰਿਯਾਯਤਿ ਪਵਤ੍ਤਤੀਤਿ ਪਰਿਯਾਯੋ, ਪਟਿਪਾਟੀਤਿ ਆਹ – ‘‘ਪਰਿਯਾਯੇਨਾਤਿ ਵਾਰੇਨਾ’’ਤਿ. ਅਸ੍ਸਾਤਿ ਨਨ੍ਦਕਤ੍ਥੇਰਸ੍ਸ. ਵਦਾਪੇਸਿ ਅਞ੍ਞੇਹਿ ਅਤ੍ਤਨੋ ਅਨੋਕਾਸਭਾਵਂ. ਪਰਿਯਾਯੇਨ ਓਵਦਨ੍ਤੀਤਿ ਓਵਦਿਤੁਂ ਸਮਤ੍ਥਾ ਭਿਕ੍ਖੁਨਿਯੋ ਵਾਰੇਨ ਓਵਦਨ੍ਤਿ. ਇਦਂ ਪਰਿਯਾਯੇਨ ਓਵਦਨਂ. ਚਿਤ੍ਤਂ ਏਕਗ੍ਗਂ ਹੋਤਿ ਪਸੀਦਤਿ ਪੁਬ੍ਬਚਰਿਯਸਿਦ੍ਧੇਨ ਗਾਰਵਬਹੁਮਾਨੇਨ ਗੇਹਸ੍ਸਿਤਪੇਮਵਸੇਨ.

ਗੋਤਮੀਤਿ ਮਹਾਪਜਾਪਤਿਗੋਤਮੀ. ਸੇਟ੍ਠਿਸ੍ਸਾਤਿ ਬਾਰਾਣਸਿਸੇਟ੍ਠਿਨੋ.

ਤੇਤਿ ਪਚ੍ਚੇਕਬੁਦ੍ਧੇ. ਕਿਂ ਨੁ ਖੋਤਿ ਪੁਚ੍ਛਿ ਚਿਰਤਰਕਾਲਂ ਪੁਞ੍ਞਕਿਰਿਯਾਯ ਪਰਿਭਾਵਿਤਸਨ੍ਤਾਨਤਾਯ, ਪਚ੍ਚੇਕਬੁਦ੍ਧੇਸੁ ਚ ਗਾਰਵਬਹੁਮਾਨਤਾਯ. ਦੁਗ੍ਗਤੇਹਿਪਿ ਸਕ੍ਕਾ ਕਾਤੁਨ੍ਤਿ ਦੁਗ੍ਗਤੇਹਿਪਿ ਯਥਾਵਿਭਵਂ ਕਤਾ ਕੁਟਿ ਤੁਮ੍ਹਾਕਂ ਵਸਿਤੁਂ ਸਕ੍ਕਾਤਿ ਪੁਚ੍ਛਿ.

ਹਤ੍ਥਕਮ੍ਮਂ ਦੇਥਾਤਿ ਹਤ੍ਥਕਮ੍ਮਂ ਕਤ੍ਵਾ ਦੇਥਾਤਿ ਅਤ੍ਥੋ. ਆਨਿਸਂਸਂ ਆਚਿਕ੍ਖਿਤ੍ਵਾਤਿ ‘‘ਤਾਦਿਸਾਨਂ ਮਹੇਸੀਨਂ ਕਤਂ ਵੇਯ੍ਯਾਵਚ੍ਚਂ ਅਮ੍ਹਾਕਮ੍ਪਿ ਦੀਘਰਤ੍ਤਂ ਹਿਤਾਯ ਹੋਤਿ. ਆਵਾਸਦਾਨਞ੍ਚ ਨਾਮ ਮਹਪ੍ਫਲਂ ਮਹਾਨਿਸਂਸਂ ਨਿਬ੍ਬਤ੍ਤਟ੍ਠਾਨੇ ਮਹਾਸਮ੍ਪਤ੍ਤਿਆਵਹਂ ਭਵਿਸ੍ਸਤੀ’’ਤਿਆਦਿਨਾ ਆਨਿਸਂਸਂ ਆਚਿਕ੍ਖਿਤ੍ਵਾ. ਗਾਲ਼੍ਹੇਨ ਓਵਾਦੇਨ ਤਜ੍ਜੇਤ੍ਵਾਤਿ, ‘‘ਇਮੇਸੁ ਨਾਮ ਕਰੋਨ੍ਤੇਸੁ ਤ੍ਵਂ ਕਸ੍ਮਾ ਨ ਕਰੋਸਿ, ਮਮ ਜੇਟ੍ਠਕਦਾਸਸ੍ਸ ਭਰਿਯਭਾਵਂ ਨ ਜਾਨਾਸਿ. ਸਬ੍ਬੇਹਿਪਿ ਕਰਿਯਮਾਨਸ੍ਸ ਹਤ੍ਥਕਮ੍ਮਸ੍ਸ ਅਕਰਣੇ ਤੁਯ੍ਹਂ ਇਦਞ੍ਚਿਦਞ੍ਚ ਦੁਕ੍ਖਂ ਆਗਮਿਸ੍ਸਤੀ’’ਤਿ ਭਯੇਨ ਤਜ੍ਜੇਤ੍ਵਾ. ਸਤਂ ਸਤਂ ਹੁਤ੍ਵਾਤਿ ਸਤਂ ਸਤਂ ਦਾਸਪੁਤ੍ਤਾ ਏਕਜ੍ਝਂ ਹੁਤ੍ਵਾ ਏਕਞ੍ਚ ਏਕਞ੍ਚ ਕੁਟਿਂ ਕਤ੍ਵਾ ਅਦਾਸਿ. ਚਙ੍ਕਮਨਾਦਿਪਰਿਵਾਰਨ੍ਤਿ ਚਙ੍ਕਮਨਰਤ੍ਤਿਟ੍ਠਾਨਦਿਵਾਟ੍ਠਾਨਭੋਜਨਾਦਿਪਰਿਵਾਰਟ੍ਠਾਨਸਹਿਤਂ. ਜਗ੍ਗਿਤ੍ਵਾ ਉਪਟ੍ਠਾਪੇਤ੍ਵਾ. ਵਿਸ੍ਸਜ੍ਜਾਪੇਸੀਤਿ ਪਰਿਚ੍ਚਜਾਪੇਸਿ. ਪਰਿਵਤ੍ਤਾਪੇਤ੍ਵਾਤਿ ਚੇਤਾਪੇਤ੍ਵਾ. ਤਿਚੀਵਰਾਨੀਤਿ ਸਹਸ੍ਸਗ੍ਘਨਿਕਾਨਿ ਤਿਚੀਵਰਾਨਿ ਕਤ੍ਵਾ ਅਦਾਸਿ. ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ, ਕਿਸ੍ਮਿਞ੍ਚਿ ਕਾਲੇਤਿ ਅਤ੍ਥੋ. ਰਜ੍ਜੇ ਠਿਤਸ੍ਸਾਤਿ ਸਬ੍ਬਭੂਤੂਪਕਾਰਰਜ੍ਜੇ ਠਿਤਸ੍ਸ.

ਨਨ੍ਦਕਤ੍ਥੇਰੋਪੀਤਿ ਤਦਾ ਜੇਟ੍ਠਕਦਾਸੋ ਏਤਰਹਿ ਨਨ੍ਦਕਤ੍ਥੇਰੋ ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਤੋ. ਜੇਟ੍ਠਕਦਾਸਿਧੀਤਾ …ਪੇ… ਅਗ੍ਗਮਹੇਸਿਟ੍ਠਾਨੇ ਠਿਤਾਤਿ ਮਹਾਪਜਾਪਤਿਗੋਤਮਿਂ ਸਨ੍ਧਾਯ ਵਦਤਿ. ਅਯਮਾਯਸ੍ਮਾ ਨਨ੍ਦਕੋਤਿ ਅਯਮੇਵ ਸਮੁਦਾਗਮਤੋ ਆਯਸ੍ਮਾ ਨਨ੍ਦਕਤ੍ਥੇਰੋ. ਏਤਾਵ ਤਾ ਭਿਕ੍ਖੁਨਿਯੋਤਿ ਏਤਾਵਤਾ ਸਮੁਦਾਗਮਤੋ ਪਞ੍ਚਸਤਾ ਭਿਕ੍ਖੁਨਿਯੋ.

੩੯੯. ਹੇਤੁਨਾਤਿ ਞਾਯੇਨ ਅਵਿਪਰੀਤਪਟਿਪਤ੍ਤਿਯਾ. ਪੁਬ੍ਬਭਾਗਾ ਹਿ ਪੁਰਿਮਾ ਪੁਰਿਮਾ ਪਟਿਪਦਾ ਪਚ੍ਛਿਮਾਯ ਕਾਰਣਂ. ਯਾਥਾਵਸਰਸਤੋ ਦਿਟ੍ਠਨ੍ਤਿ ਯਥਾਭੂਤਸਭਾਵਤੋ ਪਚ੍ਚਕ੍ਖਂ ਵਿਯ.

੪੦੧. ਤਂ ਸਭਾਵਂ ਤਂਸਭਾਵਨ੍ਤਿ ਤਸ੍ਸਾ ਵੇਦਨਾਯ ਪਚ੍ਚਯਭਾਵੇਨ ਅਨੁਰੂਪਂ.

੪੦੩. ਪਠਮਤਰਂਯੇਵ ਅਨਿਚ੍ਚਾਤਿ ਤਸ੍ਸਾਪਿ ਛਾਯਾਯ ਅਨਿਚ੍ਚਭਾਵੋ ਪਠਮਤਰਂਯੇਵ ਸਿਦ੍ਧੋ. ਨ ਹਿ ਕਦਾਚਿ ਅਨਿਚ੍ਚਂ ਨਿਸ੍ਸਾਯ ਪਵਤ੍ਤਂ ਕਿਞ੍ਚਿ ਨਿਚ੍ਚਂ ਨਾਮ ਅਤ੍ਥੀਤਿ.

੪੦੪. ਅਨੁਪਹਨਿਤ੍ਵਾਤਿ ਅਵਿਨਾਸੇਤ੍ਵਾ. ਕਥਂ ਪਨ ਮਂਸਕਾਯਂ ਚਮ੍ਮਕਾਯਞ੍ਚ ਅਵਿਨਾਸੇਤ੍ਵਾ ਇਤਰੇਸਂ ਕਨ੍ਤਨਂ ਹੋਤੀਤਿ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ, ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਚਮ੍ਮਂ ਅਲ੍ਲਿਯਾਪੇਨ੍ਤੋਤਿ ਚਮ੍ਮੇ ਲਗ੍ਗਾਪੇਨ੍ਤੋ ਚਮ੍ਮਪਟਿਬਦ੍ਧਂ ਕਰੋਨ੍ਤੋ. ਚਮ੍ਮਂ ਬਦ੍ਧਂ ਕਤ੍ਵਾਤਿ ਵਿਵਰਕਾਲੇ ਨ ਫਾਲੇਨ੍ਤੋ ਚਮ੍ਮਬਦ੍ਧੇ ਕਤ੍ਵਾ. ਏਵਂ ਅਕਤ੍ਵਾਤਿ ਏਵਂ ਮਂਸਚਮ੍ਮਕਾਯਾਨਂ ਵਿਨਾਸਨਂ ਅਕਤ੍ਵਾ, ਵਿਲਿਮਂਸਾਦਿਵਿਕਨ੍ਤਨੇਨ ਅਞ੍ਞਮਞ੍ਞਂ ਵਿਵੇਚੇਤ੍ਵਾ. ਤਤ੍ਥ ਵਿਲਿਮਂਸਨ੍ਤਿ ਚਮ੍ਮਨਿਸ੍ਸਿਤਮਂਸਂ, ਪਟਿਚ੍ਛਨ੍ਨਕਿਲੋਮਕਨ੍ਤਿ ਚ ਵਦਨ੍ਤਿ. ਨ੍ਹਾਰੂਤਿ ਸੁਖੁਮਨ੍ਹਾਰੁ. ਬਨ੍ਧਨਨ੍ਤਿ ਚਮ੍ਮਮਂਸਾਨਂ ਸਮ੍ਬਨ੍ਧਂ. ਤੇਨਾਹ – ‘‘ਸਬ੍ਬਚਮ੍ਮੇ ਲਗ੍ਗਵਿਲਿਪਨਮਂਸਮੇਵਾ’’ਤਿ. ਅਨ੍ਤਰਕਿਲੇਸਮੇਵਾਤਿ ਅਨ੍ਤਰੇ ਚਿਤ੍ਤੇ ਜਾਤਤ੍ਤਾ ਸਤ੍ਤਸਨ੍ਤਾਨਨ੍ਤੋਗਧਤਾਯ ਅਬ੍ਭਨ੍ਤਰਭੂਤਕਿਲੇਸਮੇਵ.

੪੦੫. ਤਜ੍ਜਂ ਵਾਯਾਮਨ੍ਤਿ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ. ਤਥਾ ਹਿ ਪੁਰਿਸੇਨ ਕੁਠਾਰਿਨਾ ਛੇਜ੍ਜਂ ਛਿਨ੍ਦਿਤੇ ਛੇਜ੍ਜਟ੍ਠਾਨਸ੍ਸ ਸਲ੍ਲਕ੍ਖਣਂ ਇਚ੍ਛਿਤਬ੍ਬਂ, ਤਸ੍ਸ ਪਟਿਘਾਤਭਾਵੋ ਇਚ੍ਛਿਤਬ੍ਬੋ, ਕਾਯਪਰਿਲ਼ਾਹਾਭਾਵੋ ਇਚ੍ਛਿਤਬ੍ਬੋ, ਤਸ੍ਸ ਅਵਟ੍ਠਾਨਂ ਇਚ੍ਛਿਤਬ੍ਬਂ, ਕਿਚ੍ਚਨ੍ਤਰੇ ਅਜ੍ਝੁਪੇਕ੍ਖਣਂ ਇਚ੍ਛਿਤਬ੍ਬਂ, ਏਵਂ ਪਞ੍ਞਾਯ ਕਿਲੇਸੇ ਛਿਨ੍ਦਨ੍ਤਸ੍ਸ ਯੋਗਿਨੋ ਵੀਰਿਯਬਲੇਨ ਸਦ੍ਧਿਂ ਸਤਿ-ਪੀਤਿ-ਪਸ੍ਸਦ੍ਧਿ-ਸਮਾਧਿ-ਉਪੇਕ੍ਖਾਸਮ੍ਬੋਜ੍ਝਙ੍ਗਂ ਇਚ੍ਛਿਤਬ੍ਬਨ੍ਤਿ ਆਹ – ‘‘ਏਵਂ ਨ ਵਿਨਾ ਛਹਿ…ਪੇ… ਸਕ੍ਕੋਤੀ’’ਤਿ.

੪੦੭. ਤੇਨ ਕਾਰਣੇਨਾਤਿ ਯੇਨ ਤਾਸਂ ਭਿਕ੍ਖੁਨੀਨਂ ਸਾ ਧਮ੍ਮਦੇਸਨਾ ਸਪ੍ਪਾਯਾ, ਆਸੇਵਨਮਨ੍ਦਤਾਯ ਪਨ ਅਜ੍ਝਾਸਯੇਨ ਪਰਿਪੁਣ੍ਣਸਙ੍ਕਪ੍ਪਾ ਨ ਜਾਤਾਯੇਵ; ਪੁਨ ਤਥਾ ਦੇਸਨਾਯ ਸਤਿ ਆਸੇਵਨਬਲਵਤਾਯ ਪਰਿਪੁਣ੍ਣਸਙ੍ਕਪ੍ਪਾ ਭਵਿਸ੍ਸਨ੍ਤਿ; ਤੇਨ ਕਾਰਣੇਨ ਤ੍ਵਮ੍ਪਿ ਤਾ ਭਿਕ੍ਖੁਨਿਯੋ ਤੇਨੇਵ ਓਵਾਦੇਨ ਓਵਦੇਯ੍ਯਾਸੀਤਿ.

੪੧੫. ਸਬ੍ਬਪਚ੍ਛਿਮਿਕਾਤਿ ਸਬ੍ਬਾਸਂ ਕਨਿਟ੍ਠਾ ਸੋਤਾਪਨ੍ਨਾ, ਅਨਰਿਯਾ ਤਤ੍ਥ ਕਾਚਿ ਨਤ੍ਥੀਤਿ ਅਤ੍ਥੋ. ਤੇਨਾਹ – ‘‘ਸੇਸਾ ਪਨ…ਪੇ… ਖੀਣਾਸਵਾ ਚਾ’’ਤਿ. ਯਦਿ ਏਵਨ੍ਤਿ ਅਖੀਣਾਸਵਾਪਿ ਤਾਦਿਸਾ ਭਿਕ੍ਖੁਨੀ ਅਤ੍ਥਿ. ਏਵਂ ਸਤਿ ਸੁਕ੍ਖਵਿਪਸ੍ਸਕਭਾਵੇਨਪਿ ਸਤਿ ਖੀਣਾਸਵਭਾਵੇ ਅਰਿਯਸ੍ਸ ਵਿਨਯੇ ਅਪਰਿਪੁਣ੍ਣਸਙ੍ਕਪ੍ਪਾਵਾਤਿ ਅਧਿਪ੍ਪਾਯੇਨ ਚੋਦੇਤਿ, ‘‘ਕਥਂ ਪਰਿਪੁਣ੍ਣਸਙ੍ਕਪ੍ਪਾ’’ਤਿ? ਇਤਰੋ ਅਜ੍ਝਾਸਯਪਾਰਿਪੂਰਿਯਾਤਿ ਕਾਰਣਂ ਵਤ੍ਵਾ, ‘‘ਯਸ੍ਸ ਹੀ’’ਤਿਆਦਿਨਾ ਤਮਤ੍ਥਂ ਵਿਵਰਤਿ. ਅਜ੍ਝਾਸਯਪਾਰਿਪੂਰਿਯਾਤਿ ਤਤ੍ਥ ਅਧਿਪ੍ਪਾਯਪਾਰਿਪੂਰਿਯਾ, ਨ ਸਬ੍ਬਸੋ ਗੁਣਪਾਰਿਪੂਰਿਯਾਤਿ ਅਧਿਪ੍ਪਾਯੋ. ਤੇਨਾਹ ‘‘ਕਦਾ ਨੁ ਖੋ’’ਤਿਆਦਿ. ਏਤੇਨ ਪਾਦਕਜ੍ਝਾਨਸਮ੍ਮਸਿਤਜ੍ਝਾਨਾਨਂ ਵਿਸਦਿਸਤਾਯ ਪੁਗ੍ਗਲਸ੍ਸ ਵਿਪਸ੍ਸਨਾਕਾਲੇ ਪਵਤ੍ਤਅਜ੍ਝਾਸਯਵਸੇਨ ਅਰਿਯਮਗ੍ਗੇ ਬੋਜ੍ਝਙ੍ਗਮਗ੍ਗਙ੍ਗਝਾਨਙ੍ਗਾਨਂ ਵਿਸੇਸਤਾਤਿ ਅਯਮਤ੍ਥੋ ਦੀਪਿਤੋਤਿ ਵੇਦਿਤਬ੍ਬੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਨਨ੍ਦਕੋਵਾਦਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.