੩. ਪੁਣ੍ਣੋਵਾਦਸੁਤ੍ਤਵਣ੍ਣਨਾ

੩੯੫. ਅਨਨ੍ਤਰਸੁਤ੍ਤੇ ‘‘ਪਟਿਸਲ੍ਲਾਨਾਤਿ ਫਲਸਮਾਪਤ੍ਤਿਤੋ’’ਤਿ ਵੁਤ੍ਤਂ, ਤਤ੍ਥ ਧਮ੍ਮਸੇਨਾਪਤਿਨੋ ਅਰਿਯਵਿਹਾਰਸ੍ਸ ਅਧਿਪ੍ਪੇਤਤ੍ਤਾ, ਇਧ ਪਨ ਅਕਤਕਿਚ੍ਚਸ੍ਸ ਪਟਿਸਲ੍ਲਾਨਂ ਨਾਮ ਕਾਯਵਿਵੇਕੋਤਿ ਆਹ – ‘‘ਪਟਿਸਲ੍ਲਾਨਾਤਿ ਏਕੀਭਾਵਾ’’ਤਿ. ‘‘ਚਕ੍ਖੁਵਿਞ੍ਞੇਯ੍ਯਾ ਰੂਪਾ’’ਤਿ ਪਨੇਤ੍ਥ ਵਿਞ੍ਞੇਯ੍ਯਰੂਪਂ ਵਿਜਾਨਨ੍ਤਸ੍ਸ ਦ੍ਵਾਰਭੂਤਂ ਚਕ੍ਖੁਨ੍ਤਿ ਉਭਯਂ ਅਜ੍ਝਤ੍ਤਿਕਂ ਬਾਹਿਰਞ੍ਚ ਆਯਤਨਂ ਅਭਿਨਨ੍ਦਿਤਾਦਿਸਾਮਞ੍ਞੇਨ ਤਞ੍ਚੇਤਿ ਏਤ੍ਥ ਤਂ-ਸਦ੍ਦੇਨ ਏਕਜ੍ਝਂ ਪਚ੍ਚਾਮਟ੍ਠਨ੍ਤਿ ਆਹ – ‘‘ਤਞ੍ਚੇਤਿ ਤਂ ਚਕ੍ਖੁਞ੍ਚੇਵ ਰੂਪਞ੍ਚਾ’’ਤਿ. ਯਂ ਪਨੇਤ੍ਥ ਵਿਞ੍ਞੇਯ੍ਯਸਦ੍ਦੇਨ ਜੋਤਿਤਂ ਵਿਞ੍ਞਾਣਂ ਤਂ ਸਮ੍ਪਯੁਤ੍ਤਧਮ੍ਮਾਤਿ ਤਦੁਭਯਂ, ‘‘ਮਨੋਵਿਞ੍ਞੇਯ੍ਯਾ ਧਮ੍ਮਾ’’ਤਿ ਪਦੇਨ ਕਥਿਤਮੇਵਾਤਿ ਇਧ ਨ ਗਹਿਤਂ. ਏਸ ਨਯੋ ਸੇਸੇਸੁਪਿ. ਸਮੋਧਾਨੇਨਾਤਿ ਸਹਾਵਟ੍ਠਾਨੇਨ, ਚਿਤ੍ਤੇਨ ਨਨ੍ਦਿਯਾ ਤਣ੍ਹਾਯ ਸਹ ਪਵਤ੍ਤਿਯਾ ਚਿਤ੍ਤਸਹੁਪ੍ਪਤ੍ਤਿਯਾਤਿ ਅਤ੍ਥੋ. ਤੇਨਾਹ – ‘‘ਉਪ੍ਪਜ੍ਜਤਿ ਨਨ੍ਦੀ’’ਤਿ. ਪਞ੍ਚਕ੍ਖਨ੍ਧਦੁਕ੍ਖਸ੍ਸ ਸਮੋਧਾਨਨ੍ਤਿ ਪਞ੍ਚਕ੍ਖਨ੍ਧਸਙ੍ਖਾਤਸ੍ਸ ਦੁਕ੍ਖਸਚ੍ਚਸ੍ਸ ਪਚ੍ਚਵੋਕਾਰੇ ਸਹਪ੍ਪਵਤ੍ਤਿ ਹੋਤਿ. ਯਸ੍ਮਾ ਦੁਕ੍ਖਂ ਉਪ੍ਪਜ੍ਜਮਾਨਂ ਛਨ੍ਨਂ ਦ੍ਵਾਰਾਨਂਯੇਵ ਵਸੇਨ ਉਪ੍ਪਜ੍ਜਤਿ, ਤਥਾ ਸਮੁਦਯੋਤਿ, ਤਸ੍ਮਾ ਆਹ – ‘‘ਇਤਿ ਛਸੁ ਦ੍ਵਾਰੇਸੂ’’ਤਿਆਦਿ. ਕਿਲੇਸਵਟ੍ਟਸ੍ਸ ਕਮ੍ਮਵਟ੍ਟਸ੍ਸ ਵਿਪਾਕਵਟ੍ਟਸ੍ਸ ਚ ਕਥਿਤਤ੍ਤਾ ਆਹ – ‘‘ਵਟ੍ਟਂ ਮਤ੍ਥਕਂ ਪਾਪੇਤ੍ਵਾ ਦਸ੍ਸੇਤੀ’’ਤਿ. ਦੁਤਿਯਨਯੇਤਿ ‘‘ਸਨ੍ਤਿ ਚ ਖੋ’’ਤਿਆਦਿਨਾ ਵੁਤ੍ਤੇ ਦੁਤਿਯੇ ਦੇਸਨਾਨਯੇ. ਪਾਟਿਯੇਕ੍ਕੋ ਅਨੁਸਨ੍ਧੀਤਿ ਨ ਯਥਾਨੁਸਨ੍ਧਿ ਨਾਪਿ ਅਜ੍ਝਾਸਯਾਨੁਸਨ੍ਧੀਤਿ ਅਧਿਪ੍ਪਾਯੋ, ਪੁਚ੍ਛਾਨੁਸਨ੍ਧਿਸ੍ਸ ਪਨ ਇਧ ਸਮ੍ਭਵੋ ਏਵ ਨਤ੍ਥੀਤਿ. ਸਤ੍ਤਸੁ ਠਾਨੇਸੂਤਿ ਅਕ੍ਕੋਸਨੇ ਪਰਿਭਾਸਨੇ ਪਾਣਿਪ੍ਪਹਾਰੇ ਲੇਡ੍ਡੁਪ੍ਪਹਾਰੇ ਦਣ੍ਡਪ੍ਪਹਾਰੇ ਸਤ੍ਥਪ੍ਪਹਾਰੇ ਜੀਵਿਤਾਵੋਰੋਪਨੇਤਿ ਇਮੇਸੁ ਸਤ੍ਤਸੁ. ‘‘ਭਦ੍ਦਕਾ ਵਤਿਮੇ’’ਤਿਆਦਿਨਾ ਖਨ੍ਤਿਪਟਿਸਂਯੁਤ੍ਤਂ ਸੀਹਨਾਦਂ ਨਦਾਪੇਤੁਂ.

੩੯੬. ਚਣ੍ਡਾਤਿ ਕੋਧਨਾ, ਤੇਨ ਦੂਸਿਤਚਿਤ੍ਤਤਾਯ ਦੁਟ੍ਠਾਤਿ ਵੁਤ੍ਤਾ. ਕਿਬ੍ਬਿਸਾਤਿ ਪਾਪਾ. ਫਰੁਸਾਤਿ ਈਸਕਮ੍ਪਿ ਪਸਾਦਸਿਨੇਹਾਭਾਵੇਨ ਲੁਦ੍ਦਾ. ਫਰੁਸਵਚਨਤਾਯ ਵਾ ਫਰੁਸਾ, ਤਥਾਭੂਤਾ ਪਨ ਲੁਦ੍ਦਾ ਨਾਮ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਕਕ੍ਖਲ਼ਾ’’ਤਿ. ਇਦਞ੍ਚ ਤੇਤਿ, ‘‘ਹਤ੍ਥਚ੍ਛੇਦਂ ਨਾਸਿਕਚ੍ਛੇਦ’’ਨ੍ਤਿ ਏਵਮਾਦਿਂ ਇਦਞ੍ਚ ਅਨਿਟ੍ਠਂ ਕਰਿਸ੍ਸਾਮਾਤਿ ਭਯਦਸ੍ਸਨੇਨ ਤਜ੍ਜੇਸ੍ਸਨ੍ਤਿ.

ਘਟਿਕਮੁਗ੍ਗਰੇਨਾਤਿ ਦਣ੍ਡਾਨਂ ਕਿਰ ਅਗ੍ਗਪਸ੍ਸੇ ਘਟਾਕਾਰਂ ਦਸ੍ਸੇਨ੍ਤਿ, ਤੇਨ ਸੋ ‘‘ਘਟਿਕਮੁਗ੍ਗਰੋ’’ਤਿ ਵੁਚ੍ਚਤਿ. ਏਕਤੋਧਾਰਾਦਿਨਾ ਸਤ੍ਥੇਨ ਕਰਵਾਲਖਗ੍ਗਾਦਿਨਾ. ‘‘ਇਨ੍ਦ੍ਰਿਯਸਂਵਰਾਦੀਨਂ ਏਤਂ ਨਾਮ’’ਨ੍ਤਿ ਵਤ੍ਵਾ ਯਤ੍ਥ ਯਤ੍ਥ ਇਨ੍ਦ੍ਰਿਯਸਂਵਰਾਦਯੋ ‘‘ਦਮੋ’’ਤਿ ਵੁਤ੍ਤਾ, ਤਂ ਪਾਠਪਦੇਸਂ ਦਸ੍ਸੇਨ੍ਤੋ ‘‘ਸਚ੍ਚੇਨਾ’’ਤਿਆਦਿਮਾਹ. ਮਨਚ੍ਛਟ੍ਠਾਨਿ ਇਨ੍ਦ੍ਰਿਯਾਨਿ ਦਮੇਤਿ ਸਂਵਰੇਤੀਤਿ ਇਨ੍ਦ੍ਰਿਯਸਂਵਰੋ, ਦਮੋ. ਰਾਗਾਦਿਪਾਪਧਮ੍ਮੇ ਦਮੇਤਿ ਉਪਸਮੇਤੀਤਿ ਦਮੋ, ਪਞ੍ਞਾ. ਪਾਣਾਤਿਪਾਤਾਦਿਕਮ੍ਮਕਿਲੇਸੇ ਦਮੇਤਿ ਉਪਸਮੇਤਿ ਵਿਕ੍ਖਮ੍ਭੇਤੀਤਿ ਦਮੋ ਉਪੋਸਥੋ. ਬ੍ਯਾਪਾਦਵਿਹੇਸਾਦਿਕੇ ਦਮੇਤਿ ਵਿਨੇਤੀਤਿ ਦਮੋਤਿ ਆਹ – ‘‘ਇਮਸ੍ਮਿਂ ਪਨ ਸੁਤ੍ਤੇ ਖਨ੍ਤਿ ‘ਦਮੋ’ਤਿ ਵੇਦਿਤਬ੍ਬਾ’’ਤਿ. ਉਪਸਮੋਤਿ ਤਸ੍ਸੇਵ ਦਮਸ੍ਸ ਵੇਵਚਨਂ, ਤਸ੍ਮਾ ਦਮੋ ਚ ਸੋ ਬ੍ਯਾਪਾਦਾਦੀਨਂ ਵਿਨਯਨਟ੍ਠੇਨ ਤੇਸਂਯੇਵ ਉਪਸਮਨਟ੍ਠੇਨ ਉਪਸਮੋ ਚਾਤਿ ਦਮੂਪਸਮੋ, ਅਧਿਵਾਸਨਖਨ੍ਤਿ.

੩੯੭. ਤਤ੍ਥ ਖਨ੍ਤਿਯਂ ਕਤਾਧਿਕਾਰੋ ਤਂ ਜਨਪਦਂ ਗਨ੍ਤ੍ਵਾ ਮਹਾਜਨਸ੍ਸ ਅਵਸ੍ਸਯੋ ਹੋਤਿ, ਤਸ੍ਮਾ ਤਦਸ੍ਸ ਅਪਦਾਨਂ ਸਮੁਦਾਗਮਤੋ ਪਟ੍ਠਾਯ ਵਿਭਾਵੇਤੁਂ, ‘‘ਕੋ ਪਨੇਸ ਪੁਣ੍ਣੋ’’ਤਿਆਦਿ ਆਰਦ੍ਧਂ. ਏਤ੍ਥਾਤਿ ਏਤਸ੍ਮਿਂ ਸੁਨਾਪਰਨ੍ਤਜਨਪਦੇ. ਅਸਪ੍ਪਾਯਵਿਹਾਰਨ੍ਤਿ ਭਾਵਨਾਭਿਯੋਗਸ੍ਸ ਨ ਸਪ੍ਪਾਯਂ ਵਿਹਾਰਂ.

ਦ੍ਵੇ ਭਾਤਰੋਤਿ ਅਵਿਭਤ੍ਤਸਾਪਤੇਯ੍ਯਾ ਅਵਿਭਤ੍ਤਵੋਹਾਰਸਂਯੋਗਾ. ਤੇਨਾਹ ‘‘ਤੇਸੂ’’ਤਿਆਦਿ. ਜਨਪਦਚਾਰਿਕਂ ਚਰਨ੍ਤੋ ਭਣ੍ਡਂ ਗਹੇਤ੍ਵਾ ਜਨਪਦੇਸੁ ਵਿਕ੍ਕਯਂ ਕਰੋਨ੍ਤੋ.

‘‘ਬੁਦ੍ਧਪੂਜਂ ਧਮ੍ਮਪੂਜਂ ਸਙ੍ਘਪੂਜਂ ਕਰਿਸ੍ਸਾਮਾ’’ਤਿ ਤਨ੍ਨਿਨ੍ਨਾ. ਅਟ੍ਠਿਮਿਞ੍ਜਂ ਆਹਚ੍ਚ ਅਟ੍ਠਾਸੀਤਿ, ‘‘ਬੁਦ੍ਧੋ’’ਤਿ ਵਚਨਂ ਅਸ੍ਸੁਤਪੁਬ੍ਬਂ ਸੋਤਪਥਂ ਉਪਗਤਂ ਅਨਪ੍ਪਕਂ ਪੀਤਿਸੋਮਨਸ੍ਸਂ ਸਮੁਟ੍ਠਾਪੇਨ੍ਤਂ ਪੀਤਿਸਮੁਟ੍ਠਾਨਪਣੀਤਰੂਪੇਹਿ ਛਵਿਚਮ੍ਮਾਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਅਟ੍ਠਾਸਿ. ਵਿਸ੍ਸਜ੍ਜਿਤਨ੍ਤਿ ਵਿਕ੍ਕਿਣਨਵਸੇਨ ਵਿਨਿਯੋਜਿਤਂ. ਕਮ੍ਮਟ੍ਠਾਨਂ ਨ ਉਪਟ੍ਠਾਤੀਤਿ ਭਾਵਨਾਵੀਥਿਂ ਨ ਓਤਰਤਿ. ਮਯ੍ਹਂ ਅਸਪ੍ਪਾਯੋਤਿ ਮਯ੍ਹਂ ਕਮ੍ਮਟ੍ਠਾਨਭਾਵਨਾਯ ਸਪ੍ਪਾਯੋ ਉਪਕਾਰੋ ਨ ਹੋਤਿ.

ਕੋਚਿ ਚਙ੍ਕਮਿਤੁਂ ਸਮਤ੍ਥੋ ਨਾਮ ਨਤ੍ਥਿ ਮਹਤਾ ਸਮੁਦ੍ਦਵੀਚਿਸਦ੍ਦੇਨ ਉਪਦ੍ਦੁਤਤ੍ਤਾ ਭਾਵਨਾਮਨਸਿਕਾਰਸ੍ਸ ਅਨਭਿਸਮ੍ਭੁਣਨਤੋ. ਤੇਨਾਹ ‘‘ਸਮੁਦ੍ਦਵੀਚਿਯੋ’’ਤਿਆਦਿ. ਸੋਤਿ ਮਕੁਲ਼ਵਿਹਾਰੋ.

ਉਤ੍ਤਮਜਵੇਨ ਗਚ੍ਛਮਾਨਾ ਯਥਾਧਿਪ੍ਪੇਤਂ ਮਗ੍ਗਂ ਅਤਿਕ੍ਕਮਿਤ੍ਵਾ ਅਞ੍ਞਤਰਂ ਦੀਪਕਂ ਪਾਪੁਣਿ.

ਉਪ੍ਪਾਦਿਕਂ ਉਟ੍ਠਾਪੇਤ੍ਵਾਤਿ ਮਹਾਵਾਤਮਣ੍ਡਲਸਮੁਟ੍ਠਾਪਨੇਨ ਤਸ੍ਮਿਂ ਪਦੇਸੇ ਮਹਾਸਮੁਦ੍ਦਂ ਸਂਖੋਭੇਨ੍ਤੋ ਮਹਨ੍ਤਂ ਉਪ੍ਪਾਦਂ ਉਟ੍ਠਪੇਤ੍ਵਾ.

ਥੇਰੋ, ‘‘ਅਮ੍ਹੇ ਆਵਜ੍ਜੇਯ੍ਯਾਥਾ’’ਤਿ ਕਨਿਟ੍ਠਸ੍ਸ ਵਚਨਂ ਸਰਿਤ੍ਵਾ ਅਨ੍ਤਰਨ੍ਤਰਾ ਆਵਜ੍ਜੇਤਿ, ਤਸ੍ਮਾ ਤਦਾਪਿ ਆਵਜ੍ਜੇਤਿ, ਤਂ ਸਨ੍ਧਾਯ ਵੁਤ੍ਤਂ – ‘‘ਤਸ੍ਮਿਂਯੇਵ ਖਣੇ ਆਵਜ੍ਜਿਤ੍ਵਾ’’ਤਿ. ਸਮ੍ਮੁਖੇਤਿ ਸੀਸਟ੍ਠਾਨੇ. ਪਟਿਵੇਦੇਸੁਨ੍ਤਿ ਪਵੇਦੇਸੁਂ, ਉਪਾਸਕਾ ਮਯਨ੍ਤਿ ਪਟਿਜਾਨਿਂਸੁ. ਇਮਿਨਾਤਿ ਇਮਿਨਾ ਮਯ੍ਹਂ ਪਰਿਚ੍ਚਤ੍ਤਕੋਟ੍ਠਾਸੇਨ. ਮਣ੍ਡਲਮਾਲ਼ਨ੍ਤਿ ਮੁਣ੍ਡਮਣ੍ਡਲਮਾਲ਼ਸਦਿਸਂ ਪਟਿਸ੍ਸਯਂ. ਪਰਿਚਾਰਕਾਤਿ ਅਵਸੇਸਗਾਮਿਨੋ.

ਸਚ੍ਚਬਨ੍ਧਸ੍ਸ ਓਕਾਸਂ ਕਰੋਨ੍ਤੋ ‘‘ਏਕੂਨਪਞ੍ਚਸਤਾਨ’’ਨ੍ਤਿ ਆਹ. ਤਂ ਦਿਵਸਂ…ਪੇ… ਅਗ੍ਗਹੇਸਿ, ਤੇਨ ਸੋ ਥੇਰੋ ਪਠਮਂ ਸਲਾਕਂ ਗਣ੍ਹਨ੍ਤਾਨਂ ਏਤਦਗ੍ਗੇ ਠਪਿਤੋ.

ਵਾਣਿਜਗਾਮਂ ਗਨ੍ਤ੍ਵਾਤਿ ਵਾਣਿਜਗਾਮਸਮੀਪਂ ਗਨ੍ਤ੍ਵਾ. ਬੁਦ੍ਧਕੋਲਾਹਲਨ੍ਤਿ ਬੁਦ੍ਧਾਨਂ ਉਪਗਮ੍ਮ ਸਤ੍ਤਾਨਂ ਉਪ੍ਪਜ੍ਜਨਕੁਤੂਹਲਂ.

ਮਹਾਗਨ੍ਧਕੁਟਿਯਂਯੇਵਾਤਿ ਜੇਤਵਨਮਹਾਵਿਹਾਰੇ ਮਹਾਗਨ੍ਧਕੁਟਿਯਂਯੇਵ. ਪਰਿਚਰਿਤਬ੍ਬਨ੍ਤਿ ਉਪਟ੍ਠਾਤਬ੍ਬਂ.

ਗਨ੍ਧਕਟ੍ਠਾਨੀਤਿ ਚਨ੍ਦਨਅਗਰੁਸਲਲ਼ਾਦੀਨਿ ਸੁਗਨ੍ਧਕਟ੍ਠਾਨਿ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਪੁਣ੍ਣੋਵਾਦਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.