੨. ਛਨ੍ਨੋਵਾਦਸੁਤ੍ਤਵਣ੍ਣਨਾ

੩੮੯. ਛਨ੍ਨੋਤਿ ਇਦਂ ਤਸ੍ਸ ਨਾਮਨ੍ਤਿ ਆਹ ‘‘ਏਵਂਨਾਮਕੋ ਥੇਰੋ’’ਤਿ. ਯਸ੍ਸ ਪਨ ਸਤ੍ਥਾਰਾ ਪਰਿਨਿਬ੍ਬਾਨਕਾਲੇ ਬ੍ਰਹ੍ਮਦਣ੍ਡੋ ਆਣਤ੍ਤੋ, ਅਯਂ ਸੋ ਨ ਹੋਤੀਤਿ ਦਸ੍ਸੇਨ੍ਤੋ ਆਹ – ‘‘ਨ ਅਭਿਨਿਕ੍ਖਮਨਂ ਨਿਕ੍ਖਨ੍ਤਤ੍ਥੇਰੋ’’ਤਿ, ਲੋਕਨਾਥਸ੍ਸ ਅਭਿਨਿਕ੍ਖਮਨਕਾਲੇ ਕਪਿਲਪੁਰਤੋ ਨਿਕ੍ਖਨ੍ਤੋਤਿ ਅਤ੍ਥੋ. ਗਿਲਾਨਪੁਚ੍ਛਕਾਤਿ ਗਿਲਾਨਸ੍ਸ ਪੁਚ੍ਛਨਕਾ, ਗਿਲਾਨਭਾਵਸ੍ਸ ਅਵਤ੍ਥਂ ਸੋਤੁਕਾਮਾਤਿ ਅਤ੍ਥੋ. ਸਸਨਤੋ ਹਿਂਸਨਤੋ ਸਤ੍ਥਨ੍ਤਿ ਆਹ ‘‘ਜੀਵਿਤਹਾਰਕਸਤ੍ਥ’’ਨ੍ਤਿ.

੩੯੦. ਉਪਵਜ੍ਜਂ ਏਤਸ੍ਸ ਨਤ੍ਥੀਤਿ ਅਨੁਪਵਜ੍ਜਂ, ਕਰਜਕਾਯਂ ਕਤ੍ਵਾ ਆਯਤਿਂ ਉਪ੍ਪਤ੍ਤਿਰਹਿਤਨ੍ਤਿ ਅਤ੍ਥੋ. ਤੇਨਾਹ ‘‘ਅਨੁਪ੍ਪਤ੍ਤਿਕ’’ਨ੍ਤਿ.

੩੯੧. ਖਯਵਯਂ ਞਤ੍ਵਾਤਿ ਸਙ੍ਖਾਰਗਤਂ ਖਣਭਙ੍ਗਂ ਨੇਤ੍ਵਾ ਞਾਣੇਨ ਯਾਥਾਵਤੋ ਞਤ੍ਵਾ. ਨੇਤਂ ਮਮਾਤਿ ਦੁਕ੍ਖਤੋ ਸਮਨੁਪਸ੍ਸਨਾ ਸਙ੍ਖਾਰੇਸੁ ਦਿਟ੍ਠੇਸੁ ਮਮਂਕਾਰਾਭਾਵਤੋ. ਨੇਸੋਹਮਸ੍ਮੀਤਿ ਅਨਿਚ੍ਚਤੋ ਸਮਨੁਪਸ੍ਸਨਾ ਅਨਿਚ੍ਚਤੋ ਤੇਸੁ ਦਿਟ੍ਠੇਸੁ ਅਹਂਕਾਰਾਭਾਵਤੋ. ਨ ਮੇਸੋ ਅਤ੍ਤਾਤਿ ਅਨਤ੍ਤਤੋ ਸਮਨੁਪਸ੍ਸਨਾ ਅਨਤ੍ਤਤੋ ਤੇਸੁ ਦਿਟ੍ਠੇਸੁ ਅਤ੍ਤਗ੍ਗਾਹਾਭਾਵਤੋਤਿ ਆਹ – ‘‘ਨੇਤਂ ਮਮ…ਪੇ… ਅਤ੍ਤਾਤਿ ਸਮਨੁਪਸ੍ਸਾਮੀ’’ਤਿ.

੩੯੩. ਤਸ੍ਮਾ ਪੁਥੁਜ੍ਜਨੋਤਿ ਯਸ੍ਮਾ ਅਰਿਯੋ ਸਬ੍ਬਸੋ ਪਰਿਞ੍ਞਾਤਵਤ੍ਥੁਕੋ ਦੁਕ੍ਖਵੇਦਨਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਨਾਮ ਨਤ੍ਥਿ, ਤਸ੍ਮਾ ਪੁਥੁਜ੍ਜਨੋ, ਕੇਵਲਂ ਪਨ ਅਧਿਮਾਨੇਨੇਵ – ‘‘ਨਾਭਿਕਙ੍ਖਾਮਿ ਜੀਵਿਤਂ, ਪਰਿਚਿਣ੍ਣੋ ਮੇ ਸਤ੍ਥਾ, ਨਿਰੋਧਂ ਦਿਸ੍ਵਾ’’ਤਿ ਵਦਤੀਤਿ ਅਧਿਪ੍ਪਾਯੋ. ਇਦਮ੍ਪੀਤਿ ਇਦਮ੍ਪਿ, ‘‘ਨਿਸ੍ਸਿਤਸ੍ਸ ਚਲਿਤ’’ਨ੍ਤਿਆਦਿ. ਤਣ੍ਹਾਨਿਸ੍ਸਿਤਭਾਵੇਨ ਹਿ ਆਯਸ੍ਮਾ ਛਨ੍ਨੋ ਮਾਰਣਨ੍ਤਿਕਂ ਵੇਦਨਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਇਤੋ ਚਿਤੋ ਪਰਿਵਤ੍ਤਨ੍ਤੋ ਚਲਤਿ ਵਿਪ੍ਫਨ੍ਦਤਿ, ਤਸ੍ਮਾ ‘‘ਨਿਸ੍ਸਿਤਸ੍ਸ ਚਲਿਤ’’ਨ੍ਤਿਆਦਿ ਮਨਸਿਕਾਤਬ੍ਬਂ, ਤੇਨ ਇਦਂ ਸਬ੍ਬਂ ਤਂ ਵਿਪ੍ਫਨ੍ਦਿਤਂ ਨ ਭਵਿਸ੍ਸਤੀਤਿ ਅਧਿਪ੍ਪਾਯੋ. ਕਪ੍ਪਸਦ੍ਦੋ ਕਾਲਪਰਿਯਾਯੋਪਿ ਹੋਤਿ, ਨ ਕਾਲਵਿਸੇਸਵਾਚਕੋ ਏਵਾਤਿ ਆਹ – ‘‘ਨਿਚ੍ਚਕਪ੍ਪਨ੍ਤਿ ਨਿਚ੍ਚਕਾਲ’’ਨ੍ਤਿ. ਯਥਾ ਅਪ੍ਪਹੀਨਤਣ੍ਹਾਦਿਟ੍ਠਿਕੋ ਪੁਗ੍ਗਲੋ ਤਂਨਿਸ੍ਸਿਤੋ ਅਲ੍ਲਿਨੋ, ਏਵਂ ਤਾਹਿਪਿ ਨਿਸ੍ਸਿਤੋ ਅਮੁਤ੍ਤਭਾਵਤੋਤਿ ਆਹ – ‘‘ਤਣ੍ਹਾਦਿਟ੍ਠੀਹਿ ਨਿਸ੍ਸਿਤਸ੍ਸਾ’’ਤਿ. ਚਲਿਤਨ੍ਤਿ ਯਥਾ ਯਥਾ ਅਸਮਾਰਦ੍ਧਾਯ ਸਮ੍ਮਾਪਟਿਪਤ੍ਤਿਯਾ ਆਦੀਨਵਵਸੇਨ ਚਲਨ੍ਤਂ ਪਨ ਯਸ੍ਮਾ ਅਰਿਯਸ੍ਸ ਵਿਨਯੇ ਵਿਰੂਪਂ ਚਲਿਤਂ ਨਾਮ ਹੋਤਿ, ਤਸ੍ਮਾ ਆਹ – ‘‘ਵਿਪ੍ਫਨ੍ਦਿਤਂ ਹੋਤੀ’’ਤਿ. ਤਾਦਿਸੇ ਪਨ ਪਪਞ੍ਚਵਿਕ੍ਖਮ੍ਭਨਵਸੇਨ ਚਿਤ੍ਤਸ੍ਸ ਚਲਿਤੇ ਅਸਤਿ ਭਾਵਨਾਯ ਵੀਥਿਪਟਿਪਨ੍ਨਤਾਯ ਕਿਲੇਸਪਟਿਪ੍ਪਸ੍ਸਦ੍ਧਿ ਏਵ ਹੋਤੀਤਿ ਆਹ ‘‘ਚਲਿਤੇ ਅਸਤਿ ਪਸ੍ਸਦ੍ਧੀ’’ਤਿ. ਤੇਨ ਵੁਤ੍ਤਂ – ‘‘ਕਿਲੇਸਪਸ੍ਸਦ੍ਧਿ ਨਾਮ ਹੋਤੀ’’ਤਿ.

ਭਵਨ੍ਤਰਂ ਦਿਸ੍ਵਾ ਨਮਨਟ੍ਠੇਨ ਨਤਿ. ਤੇਨਾਹ – ‘‘ਨਤਿਯਾ ਅਸਤੀਤਿ ਭਵਤ੍ਥਾਯ ਆਲਯਨਿਕਨ੍ਤਿਪਰਿਯੁਟ੍ਠਾਨੇਸੁ ਅਸਤੀ’’ਤਿ. ਪਟਿਸਨ੍ਧਿਵਸੇਨ ਆਗਤਿ ਨਾਮਾਤਿ ਪਟਿਸਨ੍ਧਿਗ੍ਗਹਣਵਸੇਨ ਭਵਨ੍ਤਰਤੋ ਇਧੇਵ ਆਗਮਨਂ ਨਾਮ, ਚੁਤਿਵਸੇਨ ਚਵਨਵਸੇਨ ਇਤੋ ਭਵਨ੍ਤਰਸ੍ਸ ਗਮਨਂ ਨਾਮ ਨ ਹੋਤਿ ਆਗਤਿਗਤਿਯਾ ਅਸਤਿ ਕਤੂਪਚਿਤਸ੍ਸਪਿ ਕਮ੍ਮਸ੍ਸ ਉਪ੍ਪਤ੍ਤਿਪਰਿਕਪ੍ਪਵਸੇਨ ਪਵਤ੍ਤਿਯਾ ਅਭਾਵਤੋ. ਚਵਨਵਸੇਨਾਤਿ ਨਿਬ੍ਬਤ੍ਤਭਵਤੋ ਚਵਨਵਸੇਨ ਚੁਤਿ, ਆਯਤਿਂ ਉਪਪਜ੍ਜਨਵਸੇਨ ਉਪਪਾਤੋ ਨ ਹੋਤਿ. ਯਤੋ ਗਤਿ ਆਗਤਿ ਚਵਨਂ ਉਪਪਾਤੋ ਨ ਹੋਤਿ, ਤਤੋ ਏਵ ਨੇਵਿਧ, ਨ ਹੁਰਂ, ਨ ਉਭਯਮਨ੍ਤਰੇਨ, ਕਾਯਸ੍ਸ ਗਤਿਯਾ ਆਗਤਿਯਾ ਚ ਅਭਾਵਤੋ ਸਬ੍ਬਸੋ ਚੁਤੂਪਪਾਤੋ ਨਤ੍ਥਿ; ਤੇਨ ਨ ਇਧਲੋਕੇ ਠਿਤੋਤਿ ਵਤ੍ਤਬ੍ਬੋ. ਨ ਪਰਲੋਕੇ ਠਿਤੋਤਿ ਵਤ੍ਤਬ੍ਬੋ, ਨ ਉਭਯਮਨ੍ਤਰੇਨ ਠਿਤੋਤਿ ਵਤ੍ਤਬ੍ਬੋ. ਤੇਨਾਹ ‘‘ਨਯਿਧ ਲੋਕੇ’’ਤਿਆਦਿ. ਤਤ੍ਥ ਇਧਲੋਕਪਰਲੋਕਵਿਨਿਮੁਤ੍ਤਸ੍ਸ ਸਂਸਰਣਪਦੇਸਸ੍ਸ ਅਭਾਵਤੋ, ‘‘ਨ ਉਭਯਮਨ੍ਤਰੇਨਾ’’ਤਿ ਵੁਤ੍ਤੋਤਿ ਉਭਯਪਰਿਯਾਪਨ੍ਨੋ ਨ ਹੋਤੀਤਿ ਪਟਿਕ੍ਖਿਪਨ੍ਤੋ, ‘‘ਨ ਉਭਯਤ੍ਥ ਹੋਤੀ’’ਤਿ ਆਹ. ਅਯਮੇਵ ਅਨ੍ਤੋਤਿ ਯੋ ਇਧਲੋਕੇ ਪਰਲੋਕੇ ਚ ਅਭਾਵੋ ਅਵਿਜ੍ਜਮਾਨਤਾ ਅਨੁਪ੍ਪਜ੍ਜਨਂ, ਅਯਮੇਵ ਸਕਲਸ੍ਸ ਦੁਕ੍ਖਮੂਲਸ੍ਸ ਅਨ੍ਤੋ ਪਰਿਯੋਸਾਨਂ.

੩੯੪. ਕਣ੍ਠਨਾਲ਼ਿਂ ਛਿਨ੍ਦੀਤਿ ਨਾਲ਼ਿਂ ਛਿਨ੍ਦਿਤੁਂ ਆਰਭਿ. ਤਸ੍ਮਿਂ ਛਿਨ੍ਦਿਤੁਂ ਆਰਦ੍ਧਕ੍ਖਣੇ ਛੇਦੋ ਚ ਵਤ੍ਤਤਿ; ਮਰਣਭਯਞ੍ਚ ਓਕ੍ਕਮਿ ਅਵੀਤਰਾਗਭਾਵਤੋ, ਤਤੋ ਏਵ ਗਤਿਨਿਮਿਤ੍ਤਂ ਉਪਟ੍ਠਾਤਿ. ‘‘ਸੋਪਿ ਨਾਮ ਸਬ੍ਰਹ੍ਮਚਾਰੀਨਂ ਅਨੁਪਵਜ੍ਜਤਂ ਬ੍ਯਾਕਰਿਤ੍ਵਾ ਸਰਾਗਮਰਣਂ ਮਰਿਸ੍ਸਤੀ’’ਤਿ ਸਂਵਿਗ੍ਗਮਾਨਸੋ ਸਙ੍ਖਾਰੇ ਅਨਿਚ੍ਚਾਦਿਵਸੇਨ ਪਰਿਗ੍ਗਣ੍ਹਨ੍ਤੋ. ਅਰਹਤ੍ਤਂ ਪਤ੍ਵਾਤਿ ਪੁਬ੍ਬੇ ਬਹੁਸੋ ਵਿਪਸ੍ਸਨਾਯ ਉਦਯਬ੍ਬਯਞਾਣਂ ਪਾਵਿਤਤ੍ਤਾ ਤਾਵਦੇਵ ਅਰਹਤ੍ਤਂ ਪਤ੍ਵਾ ਅਰਹਤ੍ਤਫਲਪਚ੍ਚਵੇਕ੍ਖਣਾਨਨ੍ਤਰਂ ਕਣ੍ਠਨਾਲ਼ਿਚ੍ਛੇਦਪਚ੍ਚਯਾ ਜੀਵਿਤਨਿਰੋਧੇਨ ਸਮਸੀਸੀ ਹੁਤ੍ਵਾ ਪਰਿਨਿਬ੍ਬਾਯਿ. ਨ ਹਿ ਅਨ੍ਤਿਮਭਵਿਕਸ੍ਸ ਅਰਹਤ੍ਤਂ ਅਪ੍ਪਤ੍ਵਾ ਜੀਵਿਤਨ੍ਤਰਾਯੋ ਹੋਤਿ. ਥੇਰਸ੍ਸਾਤਿ ਆਯਸ੍ਮਤੋ ਛਨ੍ਨਤ੍ਥੇਰਸ੍ਸ. ਬ੍ਯਾਕਰਣੇਨਾਤਿ ਹੇਤੁਮ੍ਹਿ ਕਰਣਵਚਨਂ ‘‘ਬ੍ਯਾਕਰਣੇਨ ਹੇਤੁਨਾ’’ਤਿ. ਤਨ੍ਨਿਮਿਤ੍ਤਞ੍ਹਿ ਥੇਰੋ ਵੀਰਿਯਂ ਪਗ੍ਗਣ੍ਹਨ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤਿ. ਇਮਿਨਾਤਿ, ‘‘ਅਤ੍ਥਿ, ਭਨ੍ਤੇ’’ਤਿਆਦਿਵਚਨੇਨ. ਥੇਰੋਤਿ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ. ਪੁਚ੍ਛਤੀਤਿ, ਭਨ੍ਤੇ, ਤਥਾ ਕੁਲਸਂਸਗ੍ਗਪਸੁਤੋ ਕਥਂ ਪਰਿਨਿਬ੍ਬਾਯਿਸ੍ਸਤੀਤਿ ਪੁਚ੍ਛਤਿ. ‘‘ਪੁਬ੍ਬੇ ਕੁਲੇਸੁ ਸਂਸਟ੍ਠਵਿਹਾਰੀ’’ਤਿ ਸਬ੍ਰਹ੍ਮਚਾਰੀਨਂ ਪਞ੍ਞਾਤਸ੍ਸਪਿ ਇਮਸ੍ਮਿਂ ‘‘ਹੋਨ੍ਤਿ ਹੇਤੇ ਸਾਰਿਪੁਤ੍ਤਾ’’ਤਿਆਦਿਨਾ ਭਗਵਤੋ ਵੁਤ੍ਤ-ਟ੍ਠਾਨੇ ਅਸਂਸਟ੍ਠਭਾਵੋ ਪਾਕਟੋ ਅਹੋਸਿ. ਪਕ੍ਕਮ੍ਪਿ ਨਿਪਕ੍ਕਂ ਵਿਯ ਸਮ੍ਮਾਪਟਿਪਜ੍ਜਮਾਨਾਪਿ ਕੇਚਿ ਅਸਞ੍ਞਤਾ ਉਪਟ੍ਠਹਨ੍ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਛਨ੍ਨੋਵਾਦਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.