੧. ਅਨਾਥਪਿਣ੍ਡਿਕੋਵਾਦਸੁਤ੍ਤਵਣ੍ਣਨਾ

੩੮੩. ਅਧਿਮਤ੍ਤਗਿਲਾਨੋਤਿ ਅਧਿਕਾਯ ਮਤ੍ਤਾਯ ਮਰਣਸ੍ਸ ਆਸਨ੍ਨਤਾਯ ਅਤਿਵਿਯ ਗਿਲਾਨੋਤਿ ਅਤ੍ਥੋ. ਤੇਨਾਹ ‘‘ਮਰਣਸੇਯ੍ਯਂ ਉਪਗਤੋ’’ਤਿ. ਅਖਣ੍ਡਂ ਅਕਾਸਿ ਗਹਪਤਿਨੋ ਸਤ੍ਥਰਿ ਪਰਮਪੇਮਤ੍ਤਾ. ਯਤ੍ਤਕਂ ਚਸ੍ਸਾਤਿ, ‘‘ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ’’ਤਿ ਵੁਤ੍ਤਂ ਯਤ੍ਤਕਂ ਅਸ੍ਸ ਗਹਪਤਿਸ੍ਸ.

੩੮੪. ਓਸਕ੍ਕਨ੍ਤੀਤਿ ਪਰਿਹਾਯਨ੍ਤਿ. ਓਤ੍ਥਰਨ੍ਤੀਤਿ ਅਭਿਭਵਨ੍ਤਿ. ਉਸ੍ਮਾ ਨਾਮ ਕਮ੍ਮਜਤੇਜੋਧਾਤੁ, ਸਾ ਸਹ ਜੀਵਿਤਿਨ੍ਦ੍ਰਿਯਨਿਰੋਧਾ ਪਰਿਯਾਦਿਯਤਿ, ਯਾਵ ਤਾ ਆਯੁਉਸ੍ਮਾ ਵਤ੍ਤਨ੍ਤਿ, ਤਾਵ ਮਰਣਨ੍ਤਿਕਾ ਵੇਦਨਾ ਵਤ੍ਤਨ੍ਤੇਵ ਵਿਞ੍ਞਾਣਸ੍ਸ ਅਨਿਰੁਦ੍ਧਤ੍ਤਾ. ਤੇਨਾਹ ‘‘ਯਾਵ ਉਸ੍ਮਾ’’ਤਿਆਦਿ.

੩੮੫. ਤੀਹਿ ਗਾਹੇਹੀਤਿ ਤਣ੍ਹਾਮਾਨਦਿਟ੍ਠਿਗ੍ਗਾਹੇਹਿ. ਪਟਿਬਾਹਿਤੁਂ ਵਿਕ੍ਖਮ੍ਭੇਤੁਂ. ਚਕ੍ਖੁਂ ਤੀਹਿ ਗਾਹੇਹਿ ਨ ਗਣ੍ਹਿਸ੍ਸਾਮੀਤਿ ਮਾਨਗ੍ਗਾਹਪਟਿਕ੍ਖੇਪਮੁਖੇਨ ਚਕ੍ਖੁਸ੍ਮਿਂ ਅਨਿਚ੍ਚਾਨੁਪਸ੍ਸਨਾਤਿ ਦਸ੍ਸੇਤਿ. ਅਨਿਚ੍ਚਾਨੁਪਸ੍ਸਨਾਯ ਹਿ ਸਤਿ ਅਪ੍ਪਤਿਟ੍ਠੋ ਮਾਨਗ੍ਗਾਹੋ, ਦੁਕ੍ਖਾਨੁਪਸ੍ਸਨਾਯ ਸਤਿ ਅਪ੍ਪਤਿਟ੍ਠੋ ਤਣ੍ਹਾਗ੍ਗਾਹੋ, ਅਨਤ੍ਤਾਨੁਪਸ੍ਸਨਾਯ ਸਤਿ ਅਪ੍ਪਤਿਟ੍ਠੋ ਦਿਟ੍ਠਿਗ੍ਗਾਹੋਤਿ, ਗਾਹੋ ਚ ਨਾਮ ਓਲ਼ਾਰਿਕੋ, ਤਸ੍ਮਿਂ ਵਿਗਤੇਪਿ ਨਿਕਨ੍ਤਿ ਤਿਟ੍ਠੇਯ੍ਯਾਤਿ ਤਂ ਵਿਜਹਾਪੇਤੁਕਾਮੇਨ, – ‘‘ਨ ਚ ਮੇ ਚਕ੍ਖੁਨਿਸ੍ਸਿਤਂ ਵਿਞ੍ਞਾਣਂ ਭਵਿਸ੍ਸਤੀ’’ਤਿ ਵੁਤ੍ਤਨ੍ਤਿ ਆਹ – ‘‘ਵਿਞ੍ਞਾਣਞ੍ਚਾਪਿ ਮੇ ਚਕ੍ਖੁਨਿਸ੍ਸਿਤਂ ਨ ਭਵਿਸ੍ਸਤੀ’’ਤਿ. ਸਬ੍ਬਂ ਕਾਮਭਵਰੂਪਨ੍ਤਿ ਕਾਮਭੂਮਿਪਰਿਯਾਪਨ੍ਨਂ ਸਬ੍ਬਂ ਰੂਪਕ੍ਖਨ੍ਧਮਾਹ – ‘‘ਕਾਮਰੂਪਭਵਰੂਪ’’ਨ੍ਤਿ ਵਾ ਪਾਠੋ. ਸੋ ਯੁਤ੍ਤੋ ਇਮਸ੍ਸ ਵਾਰਸ੍ਸ ਏਵ ਅਨਵਸੇਸਪਞ੍ਚਵੋਕਾਰਭਵਪਰਿਯਾਪਨ੍ਨਤੋ. ਤਥਾ ਹਿ ਉਪਰਿ ਚਤੁਵੋਕਾਰਭਵੋ ਅਨਵਸੇਸਤੋ ਵੁਤ੍ਤੋ.

੩੮੬. ਇਧਲੋਕਨ੍ਤਿ ਏਤ੍ਥ ਸਙ੍ਖਾਰਲੋਕਵਿਸਯੋਤਿ ਅਧਿਪ੍ਪਾਯੇਨ, ‘‘ਵਸਨਟ੍ਠਾਨਂ ਵਾ’’ਤਿਆਦਿ ਵੁਤ੍ਤਂ, ਤਞ੍ਚ ਖੋ ਪਠਮਦੁਤਿਯਵਾਰੇਹਿ ਇਧਲੋਕੋ ਗਹਿਤੋਤਿ ਕਤ੍ਵਾ. ਪਠਮਦੁਤਿਯਵਾਰੇਹਿ ਪਨ ਇਧਲੋਕੋ ਪਰਲੋਕੋਤਿ ਵਿਭਾਗੇਨ ਵਿਨਾ ਪਞ੍ਚਵੋਕਾਰਭਵੋ ਗਹਿਤੋ; ਤਥਾ ਤਤਿਯਵਾਰੇ ਪਞ੍ਚਵੋਕਾਰਭਵੋ ਚਤੁਵੋਕਾਰਭਵੋ ਚ ਗਹਿਤੋਤਿ ਪੁਨ ਦਿਟ੍ਠਧਮ੍ਮਸਮ੍ਪਰਾਯਵਸੇਨ ਤਂ ਵਿਭਜਿਤ੍ਵਾ ਦਸ੍ਸੇਤੁਂ, ‘‘ਨ ਇਧਲੋਕ’’ਨ੍ਤਿਆਦਿ ਵੁਤ੍ਤਂ. ਇਧਲੋਕਨ੍ਤਿ ਚ ਸਤ੍ਤਸਙ੍ਖਾਰਵਸੇਨੇਵ ਗਹਿਤਂ. ਸਬ੍ਬਮ੍ਪਿ ਸਙ੍ਖਾਰਵਸੇਨ ਪਰਿਗ੍ਗਹੇਤ੍ਵਾ ਦਸ੍ਸੇਤੁਂ, ‘‘ਯਮ੍ਪਿ ਮੇ ਦਿਟ੍ਠ’’ਨ੍ਤਿਆਦਿ ਵੁਤ੍ਤਨ੍ਤਿ ਕੇਚਿ. ਅਪਰਿਤਸ੍ਸਨਤ੍ਥਂ ਤਣ੍ਹਾਪਰਿਤਸ੍ਸਨਾਯ ਅਨੁਪ੍ਪਾਦਨਤ੍ਥਂ. ਯਸ੍ਸ ਦਿਟ੍ਠਧਮ੍ਮੋਤਿ ਵੁਚ੍ਚਤਿ, ਤਸ੍ਸ ਪਨ ਅਭਾਵਤੋ, ‘‘ਮਨੁਸ੍ਸਲੋਕਂ ਠਪੇਤ੍ਵਾ ਸੇਸਾ ਪਰਲੋਕਾ ਨਾਮਾ’’ਤਿ ਵੁਤ੍ਤਂ. ਯੇਸਂ ਪਨ ‘‘ਇਧਲੋਕ’’ਨ੍ਤਿ ਇਮਿਨਾ ਸਤ੍ਤਲੋਕਸ੍ਸਪਿ ਗਹਣਂ ਇਚ੍ਛਿਤਂ. ਤੇਸਂ ਮਤੇਨ, ‘‘ਮਨੁਸ੍ਸਲੋਕਂ ਠਪੇਤ੍ਵਾ’’ਤਿ ਯੋਜਨਾ.

੩੮੭. ਅਲ੍ਲੀਯਸੀਤਿ ਅਤ੍ਤਭਾਵੇ ਭੋਗੇਸੁ ਚ ਅਪੇਕ੍ਖਂ ਕਰੋਸੀਤਿ ਅਤ੍ਥੋ. ਏਵਰੂਪੀਤਿ ਯਾਦਿਸੀ ਤਦਾ ਧਮ੍ਮਸੇਨਾਪਤਿਨਾ ਕਥਿਤਾ, ਏਵਰੂਪੀ. ਧਮ੍ਮਕਥਾ ਨ ਸੁਤਪੁਬ੍ਬਾਤਿ ਯਥਾਕਥਿਤਾਕਾਰਮੇਵ ਸਨ੍ਧਾਯ ਪਟਿਕ੍ਖੇਪੋ, ਨ ਸੁਖੁਮਗਮ੍ਭੀਰਸੁਞ੍ਞਤਾਪਟਿਸਂਯੁਤ੍ਤਤਾਸਾਮਞ੍ਞਂ. ਤੇਨਾਹ ‘‘ਏਵਂ ਪਨਾ’’ਤਿਆਦਿ.

ਮਯਾ ਗਤਮਗ੍ਗਮੇਵ ਅਨੁਗਚ੍ਛਸੀਤਿ ਦਾਨਮਯਪੁਞ੍ਞਭਾਵਸਾਮਞ੍ਞਂ ਗਹੇਤ੍ਵਾ ਵਦਤਿ, ਨ ਬੋਧਿਸਤ੍ਤਦਾਨਭੂਤਂ ਦਾਨਪਾਰਮਿਤਂ. ਨ ਪਟਿਭਾਤੀਤਿ ਰੁਚ੍ਚਨਵਸੇਨ ਚਿਤ੍ਤੇ ਨ ਉਪਤਿਟ੍ਠਤਿ. ਤੇਨਾਹ ‘‘ਨ ਰੁਚ੍ਚਤੀ’’ਤਿ. ਤਥਾ ਹੇਸ ਵਟ੍ਟਾਭਿਰਤੋਤਿ. ਉਜੁਮਗ੍ਗਾਵਹਾ ਵਿਪਸ੍ਸਨਾ ਭਗਵਤਾ ਪਨਸ੍ਸ ਕਥਿਤਪੁਬ੍ਬਾ.

੩੮੮. ਏਸਿਤਗੁਣਤ੍ਤਾ ਏਸਿਯਮਾਨਗੁਣਤ੍ਤਾ ਚ ਇਸਿ, ਅਸੇਕ੍ਖਾ ਸੇਕ੍ਖਾ ਕਲ੍ਯਾਣਪੁਥੁਜ੍ਜਨਾ ਚ, ਇਸੀਨਂ ਸਙ੍ਘੋ, ਤੇਨ ਨਿਸੇਵਿਤਨ੍ਤਿ ਇਸਿਸਙ੍ਘਨਿਸੇਵਿਤਂ. ਕਾਮਂ ਤਸ੍ਸ ਵਿਹਾਰਸ੍ਸ ਗਨ੍ਧਕੁਟਿਪਾਸਾਦਕੂਟਾਗਾਰਾਦਿਵਸੇਨ ਨਿਸੀਦਨਨਿਪਜ੍ਜਨਾਯ ਰੁਕ੍ਖਲਤਾਦਿਵਸੇਨ ਭੂਮਿਸਯਾਦਿਵਸੇਨ ਚ ਅਨਞ੍ਞਸਾਧਾਰਣਾ ਮਹਤੀ ਰਮਣੀਯਤਾ ਅਤ੍ਥੇਵ, ਸਾ ਪਨ ਗੇਹਸ੍ਸਿਤਭਾਵੇਨ ਅਰਿਯਾਨਂ ਚਿਤ੍ਤਂ ਤਥਾ ਨ ਤੋਸੇਤਿ; ਯਥਾ ਅਰਿਯਾਨਂ ਨਿਸੇਵਿਤਭਾਵੇਨਾਤਿ ਆਹ – ‘‘ਪਠਮਗਾਥਾਯ ਜੇਤਵਨਸ੍ਸ ਵਣ੍ਣਂ ਕਥੇਤ੍ਵਾ’’ਤਿ. ਤੇਨਾਹ ਭਗਵਾ – ‘‘ਯਤ੍ਥ ਅਰਹਨ੍ਤੋ ਵਿਹਰਨ੍ਤਿ, ਤਂ ਭੂਮਿਰਾਮਣੇਯ੍ਯਕ’’ਨ੍ਤਿ (ਧ. ਪ. ੯੮; ਥੇਰਗਾ. ੯੯੧; ਸਂ. ਨਿ. ੧.੨੬੧). ਅਪਚਯਗਾਮਿਨੀ ਚੇਤਨਾ ਸਤ੍ਤਾਨਂ ਸੁਦ੍ਧਿਮਾਵਹਤੀਤਿ ਆਹ – ‘‘ਕਮ੍ਮਨ੍ਤਿ ਮਗ੍ਗਚੇਤਨਾ’’ਤਿ. ਚਤੁਨ੍ਨਂ ਅਰਿਯਸਚ੍ਚਾਨਂ ਵਿਦਿਤਕਰਣਟ੍ਠੇਨ ਕਿਲੇਸਾਨਂ ਵਿਕ੍ਖਮ੍ਭਨਟ੍ਠੇਨ ਚ ਵਿਜ੍ਜਾ, ਮਗ੍ਗਸਮ੍ਮਾਦਿਟ੍ਠੀਤਿ ਆਹ – ‘‘ਵਿਜ੍ਜਾਤਿ ਮਗ੍ਗਪਞ੍ਞਾ’’ਤਿ. ਸਮਾਧਿਪਕ੍ਖਿਕੋ ਧਮ੍ਮੋ ਨਾਮ ਸਮ੍ਮਾਵਾਯਾਮਸਤਿਸਮਾਧਯੋ. ਤਥਾ ਹਿ ਵਿਜ੍ਜਾਭਾਗਿਯੋ ਸਮਾਧਿਪਿ ਸਮਾਧਿਪਕ੍ਖਿਕੋ. ਸੀਲਂ ਤਸ੍ਸ ਅਤ੍ਥੀਤਿ ਸੀਲਨ੍ਤਿ ਆਹ – ‘‘ਸੀਲੇ ਪਤਿਟ੍ਠਿਤਸ੍ਸ ਜੀਵਿਤਂ ਉਤ੍ਤਮ’’ਨ੍ਤਿ. ਦਿਟ੍ਠਿਸਙ੍ਕਪ੍ਪੋਤਿ ਸਮ੍ਮਾਸਙ੍ਕਪ੍ਪੋ. ਤਤ੍ਥ ਸਮ੍ਮਾਸਙ੍ਕਪ੍ਪਸ੍ਸ ਉਪਕਾਰਕਭਾਵੇਨ ਵਿਜ੍ਜਾਭਾਗੋ. ਤਥਾ ਹਿ ਸੋ ਪਞ੍ਞਾਕ੍ਖਨ੍ਧਸਙ੍ਗਹਿਤੋਤਿ ਵੁਚ੍ਚਤਿ, ਯਥਾ ਸਮ੍ਮਾਸਙ੍ਕਪ੍ਪੋ ਪਞ੍ਞਾਕ੍ਖਨ੍ਧੇਨ ਸਙ੍ਗਹਿਤੋ, ਏਵਂ ਵਾਯਾਮਸਤਿਯੋ ਸਮਾਧਿਕ੍ਖਨ੍ਧਸਙ੍ਗਹਿਤਾਤਿ. ਤੇਨਾਹ – ‘‘ਧਮ੍ਮੋਤਿ ਵਾਯਾਮਸਤਿਸਮਾਧਯੋ’’ਤਿ. ‘‘ਧਮ੍ਮੋ’’ਤਿ ਹਿ ਇਧ ਸਮ੍ਮਾਸਮਾਧਿ ਅਧਿਪ੍ਪੇਤੋ, – ‘‘ਏਵਂ ਧਮ੍ਮਾ ਤੇ ਭਗਵਨ੍ਤੋ ਅਹੇਸੁ’’ਨ੍ਤਿਆਦੀਸੁ (ਦੀ. ਨਿ. ੨.੧੩; ਮ. ਨਿ. ੩.੧੯੮; ਸਂ. ਨਿ. ੫.੩੭੮) ਵਿਯ. ਵਾਚਾਕਮ੍ਮਨ੍ਤਾਜੀਵਾਤਿ ਸਮ੍ਮਾਵਾਚਾਕਮ੍ਮਨ੍ਤਾਜੀਵਾ ਮਗ੍ਗਪਰਿਯਾਪਨ੍ਨਾ ਏਵ, ਤੇ ਸਬ੍ਬੇਪਿ ਗਹਿਤਾਤਿ. ਤੇਨਾਹ – ‘‘ਏਤੇਨ ਅਟ੍ਠਙ੍ਗਿਕੇਨ ਮਗ੍ਗੇਨਾ’’ਤਿ.

ਉਪਾਯੇਨਾਤਿ ਯੇਨ ਵਿਧਿਨਾ ਅਰਿਯਮਗ੍ਗੋ ਭਾਵੇਤਬ੍ਬੋ, ਤੇਨ ਸਮਾਧਿਪਕ੍ਖਿਯਂ ਵਿਪਸ੍ਸਨਾਧਮ੍ਮਞ੍ਚੇਵ ਮਗ੍ਗਧਮ੍ਮਞ੍ਚ. ‘‘ਅਰਿਯਂ ਵੋ, ਭਿਕ੍ਖਵੇ, ਸਮ੍ਮਾਸਮਾਧਿਂ ਦੇਸੇਸ੍ਸਾਮਿ ਸਉਪਨਿਸਂ ਸਪਰਿਕ੍ਖਾਰ’’ਨ੍ਤਿ (ਮ. ਨਿ. ੩.੧੩੬) ਹਿ ਵਚਨਤੋ ਸਮ੍ਮਾਸਮਾਧਿਆਦਯੋ ਮਗ੍ਗਧਮ੍ਮਾਪਿ ਸਮਾਧਿਪਕ੍ਖਿਯਾ. ਵਿਚਿਨੇਯ੍ਯਾਤਿ ਵੀਮਂਸੇਯ੍ਯ, ਭਾਵੇਯ੍ਯਾਤਿ ਅਤ੍ਥੋ. ਤਤ੍ਥਾਤਿ ਹੇਤੁਮ੍ਹਿ ਭੁਮ੍ਮਵਚਨਂ. ਅਰਿਯਮਗ੍ਗਹੇਤੁਕਾ ਹਿ ਸਤ੍ਤਾਨਂ ਵਿਸੁਦ੍ਧਿ. ਤੇਨਾਹ – ‘‘ਤਸ੍ਮਿਂ ਅਰਿਯਮਗ੍ਗੇ ਵਿਸੁਜ੍ਝਤੀ’’ਤਿ. ਪਞ੍ਚਕ੍ਖਨ੍ਧਧਮ੍ਮਂ ਵਿਚਿਨੇਯ੍ਯ, ਪਞ੍ਚੁਪਾਦਾਨਕ੍ਖਨ੍ਧੇ ਵਿਪਸ੍ਸੇਯ੍ਯ. ਤੇਸੁ ਹਿ ਵਿਪਸ੍ਸਿਯਮਾਨੇਸੁ ਵਿਪਸ੍ਸਨਾ ਉਕ੍ਕਂਸਗਤਾ. ਯਦਗ੍ਗੇਨ ਦੁਕ੍ਖਸਚ੍ਚਂ ਪਰਿਞ੍ਞਾਪਟਿਵੇਧੇਨ ਪਟਿਵਿਜ੍ਝੀਯਤਿ, ਤਦਗ੍ਗੇਨ ਸਮੁਦਯਸਚ੍ਚਂ ਪਹਾਨਪਟਿਵੇਧੇਨ ਨਿਰੋਧਸਚ੍ਚਂ ਸਚ੍ਛਿਕਿਰਿਯਾਪਟਿਵੇਧੇਨ, ਮਗ੍ਗਸਚ੍ਚਂ ਭਾਵਨਾਪਟਿਵੇਧੇਨ ਪਟਿਵਿਜ੍ਝੀਯਤਿ, ਏਵਂ ਅਚ੍ਚਨ੍ਤਵਿਸੁਦ੍ਧਿਯਾ ਸੁਜ੍ਝਤਿ. ਤੇਨਾਹ – ‘‘ਏਵਂ ਤੇਸੁ ਚਤੂਸੁ ਸਚ੍ਚੇਸੁ ਵਿਸੁਜ੍ਝਤੀ’’ਤਿ. ਇਧਾਪਿ ਨਿਮਿਤ੍ਤਤ੍ਥੇ ਭੁਮ੍ਮਵਚਨਂ. ਸਚ੍ਚੇਸੁ ਵਾ ਪਟਿਵਿਜ੍ਝਿਯਮਾਨੇਸੂਤਿ ਵਚਨਸੇਸੋ.

ਅਵਧਾਰਣਵਚਨਨ੍ਤਿ ਵਵਤ੍ਥਾਪਨਵਚਨਂ, ਅਵਧਾਰਣਨ੍ਤਿ ਅਤ੍ਥੋ. ਸਾਰਿਪੁਤ੍ਤੋਵਾਤਿ ਚ ਅਵਧਾਰਣਂ ਤਸ੍ਸ ਸਾਵਕਭਾਵਤੋ ਸਾਵਕੇਸੁ ਸਾਰਿਪੁਤ੍ਤੋਵ ਸੇਯ੍ਯੋਤਿ ਇਮਮਤ੍ਥਂ ਦੀਪੇਤਿ. ਕਿਲੇਸਉਪਸਮੇਨਾਤਿ ਇਮਿਨਾ ਮਹਾਥੇਰਸ੍ਸ ਤਾਦਿਸੋ ਕਿਲੇਸੂਪਸਮੋਤਿ ਦਸ੍ਸੇਤਿ, ਯਸ੍ਸ ਸਾਵਕਸ੍ਸ ਵਿਸਯੇ ਪਞ੍ਞਾਯ ਪਾਰਮਿਪ੍ਪਤ੍ਤਿ ਅਹੋਸਿ. ਯਦਿ ਏਵਂ – ‘‘ਯੋਪਿ ਪਾਰਙ੍ਗਤੋ ਭਿਕ੍ਖੁ, ਏਤਾਵਪਰਮੋ ਸਿਯਾ’’ਤਿ ਇਦਂ ਕਥਨ੍ਤਿ? ਤੇਸਂ ਤੇਸਂ ਬੁਦ੍ਧਾਨਂ ਸਾਸਨੇ ਪਞ੍ਞਾਯ ਪਾਰਮਿਪ੍ਪਤ੍ਤਸਾਵਕਵਸੇਨੇਤਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਅਥ ਵਾ – ‘‘ਨਤ੍ਥਿ ਵਿਮੁਤ੍ਤਿਯਾ ਨਾਨਤ੍ਤ’’ਨ੍ਤਿ (ਦੀ. ਨਿ. ਟੀ. ੩.੧੪੧; ਵਿਭ. ਮੂਲਟੀ. ਸੁਤ੍ਤਨ੍ਤਭਾਜਨੀਯਵਣ੍ਣਨਾ) ਵਚਨਤੋ ਸਾਵਕੇਹਿ ਵਿਮੁਤ੍ਤਿਪਞ੍ਞਾਮਤ੍ਤਂ ਸਨ੍ਧਾਯੇਤਂ ਵੁਤ੍ਤਂ. ਤੇਨਾਹ – ‘‘ਪਾਰਙ੍ਗਤੋਤਿ ਨਿਬ੍ਬਾਨਂ ਗਤੋ’’ਤਿਆਦਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਅਨਾਥਪਿਣ੍ਡਿਕੋਵਾਦਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.