੯. ਅਰਣਵਿਭਙ੍ਗਸੁਤ੍ਤਵਣ੍ਣਨਾ

੩੨੩. ਗੇਹਸ੍ਸਿਤਵਸੇਨਾਤਿ ਕਿਲੇਸਨਿਸ੍ਸਿਤਵਸੇਨ ਅਨੁਰੋਧਵਸੇਨ. ਨੇਵ ਉਕ੍ਖਿਪੇਯ੍ਯਾਤਿ ਨ ਅਨੁਗ੍ਗਣ੍ਹੇਯ੍ਯ. ਨ ਅਵਕ੍ਖਿਪੇਯ੍ਯਾਤਿ ਗੇਹਸ੍ਸਿਤਵਸੇਨ ਵਿਰੋਧਵਸੇਨ ਨ ਨਿਗ੍ਗਣ੍ਹੇਯ੍ਯ. ਅਨੁਰੋਧੇਨ ਵਿਨਾ ਸਮ੍ਪਹਂਸਨਵਸੇਨ ਯਥਾਭੂਤਗੁਣਕਥਨਂ ਨੇਵੁਸ੍ਸਾਦਨਾ ਵਜ੍ਜਾਭਾਵਤੋ; ਤਥਾ ਵਿਰੋਧੇਨ ਵਿਨਾ ਵਿਵੇਚਨਵਸੇਨ ਯਥਾਭੂਤਦੋਸਕਥਨਂ ਨ ਅਪਸਾਦਨਂ. ਸਭਾਵਮੇਵਾਤਿ ਯਥਾਭੂਤਸਭਾਵਮੇਵ ਕਸ੍ਸਚਿ ਪੁਗ੍ਗਲਸ੍ਸ ਅਨਾਦੇਸਕਰਣਵਸੇਨ ਕਥੇਯ੍ਯ, ਸੇਯ੍ਯਥਾਪਿ ਆਯਸ੍ਮਾ ਸੁਭੂਤਿਤ੍ਥੇਰੋ. ਵਿਨਿਚ੍ਛਿਤਸੁਖਨ੍ਤਿ, ‘‘ਅਜ੍ਝਤ੍ਤਂ ਅਨਵਜ੍ਜ’’ਨ੍ਤਿਆਦਿਨਾ ਵਿਸੇਸਤੋ ਵਿਨਿਚ੍ਛਿਤਸੁਖਾਯ ਹੋਤਿ. ਪਰਮ੍ਮੁਖਾ ਅਵਣ੍ਣਨ੍ਤਿ ਸ੍ਵਾਯਂ ਰਹੋਵਾਦੋ ਪੇਸੁਞ੍ਞੂਪਸਂਹਾਰਵਸੇਨ ਪਵਤ੍ਤੋ ਇਧਾਧਿਪ੍ਪੇਤੋਤਿ ਆਹ ‘‘ਪਿਸੁਣਵਾਚਨ੍ਤਿ ਅਤ੍ਥੋ’’ਤਿ. ਖੀਣਾਤੀਤਿ ਖੀਣੋ, ਯੋ ਭਾਸਤਿ, ਯਞ੍ਚ ਉਦ੍ਦਿਸ੍ਸ ਭਾਸਤਿ, ਦ੍ਵੇਪਿ ਹਿਂਸਤਿ ਵਿਬਾਧਤੀਤਿ ਅਤ੍ਥੋ, ਤਂ ਖੀਣਵਾਦਂ. ਸ੍ਵਾਯਂ ਯਸ੍ਮਾ ਕਿਲੇਸੇਹਿ ਆਕਿਣ੍ਣੋ ਸਂਕਿਲਿਟ੍ਠੋ ਏਵ ਚ ਹੋਤਿ, ਤਸ੍ਮਾ ਵੁਤ੍ਤਂ – ‘‘ਆਕਿਣ੍ਣਂ ਸਂਕਿਲਿਟ੍ਠਂ ਵਾਚ’’ਨ੍ਤਿ. ਤੇਨ ਅਵਸਿਟ੍ਠਂ ਤਿਵਿਧਮ੍ਪਿ ਵਚੀਦੁਚ੍ਚਰਿਤਮਾਹ. ਅਧਿਟ੍ਠਹਿਤ੍ਵਾਤਿ, ‘‘ਇਦਮੇਵ ਸਚ੍ਚ’’ਨ੍ਤਿ ਅਜ੍ਝੋਸਾਯ. ਆਦਾਯਾਤਿ ਪਗ੍ਗਯ੍ਹ. ਵੋਹਰੇਯ੍ਯਾਤਿ ਸਮੁਦਾਚਰੇਯ੍ਯ. ਲੋਕਸਮਞ੍ਞਨ੍ਤਿ ਲੋਕਸਙ੍ਕੇਤਂ.

੩੨੪. ਆਰਮ੍ਮਣਤੋ ਸਮ੍ਪਯੋਗਤੋ ਕਾਮੇਹਿ ਪਟਿਸਂਹਿਤਤ੍ਤਾ ਕਾਮਪਟਿਸਨ੍ਧਿ, ਕਾਮਸੁਖਂ. ਤੇਨਾਹ ‘‘ਕਾਮੂਪਸਂਹਿਤੇਨ ਸੁਖੇਨਾ’’ਤਿ. ਸਦੁਕ੍ਖੋਤਿ ਵਿਪਾਕਦੁਕ੍ਖੇਨ ਸਂਕਿਲੇਸਦੁਕ੍ਖੇਨ ਸਦੁਕ੍ਖੋ. ਤਥਾ ਸਪਰਿਲ਼ਾਹੋਤਿ ਵਿਪਾਕਪਰਿਲ਼ਾਹੇਨ ਚੇਵ ਕਿਲੇਸਪਰਿਲ਼ਾਹੇਨ ਚ ਸਪਰਿਲ਼ਾਹੋ.

੩੨੬. ਵਟ੍ਟਤੋ ਨਿਸ੍ਸਰਿਤੁਂ ਅਦਤ੍ਵਾ ਤਤ੍ਥੇਵ ਸੀਦਾਪਨਤੋ ਮਿਚ੍ਛਾਪਟਿਪਦਾਭਾਵੇਨ ਸਤ੍ਤੇ ਸਂਯੋਜੇਤੀਤਿ ਸਂਯੋਜਨਂ, ਵਿਸੇਸਤੋ ਭਵਸਂਯੋਜਨਂ ਤਣ੍ਹਾਤਿ ਆਹ ‘‘ਤਣ੍ਹਾਯੇਤਂ ਨਾਮ’’ਨ੍ਤਿ. ਨ ਤਣ੍ਹਾਯੇਵ ਮਾਨਾਦਯੋਪਿ ਸਂਯੋਜਨਤ੍ਤਂ ਸਾਧੇਨ੍ਤਿ ਨਾਮ ਸਬ੍ਬਸੋ ਸਂਯੋਜਨਤੋ ਸੁਟ੍ਠੁ ਬਨ੍ਧਨਤੋ. ਤੇਨ ਵੁਤ੍ਤਂ – ‘‘ਅਵਿਜ੍ਜਾਨੀਵਰਣਾਨਂ, ਭਿਕ੍ਖਵੇ, ਸਤ੍ਤਾਨਂ ਤਣ੍ਹਾਸਂਯੋਜਨਾਨ’’ਨ੍ਤਿ (ਸਂ. ਨਿ. ੨.੧੨੫-੧੨੬).

ਇਮਂ ਚਤੁਕ੍ਕਨ੍ਤਿ, ‘‘ਯੇ ਕਾਮਪਟਿਸਨ੍ਧਿਸੁਖਿਨੋ ਸੋਮਨਸ੍ਸਾਨੁਯੋਗਂ ਅਨੁਯੁਤ੍ਤਾ, ਯੇ ਅਤ੍ਤਕਿਲਮਥਾਨੁਯੋਗਂ ਅਨੁਯੁਤ੍ਤਾ’’ਤਿ ਏਵਮਾਗਤਂ ਇਮਂ ਚਤੁਕ੍ਕਂ ਨਿਸ੍ਸਾਯ. ‘‘ਏਤਦਗ੍ਗੇ ਠਪਿਤੋ’’ਤਿ, ਵਤ੍ਵਾ ਤਂ ਨਿਸ੍ਸਾਯ ਠਪਿਤਭਾਵਂ ਵਿਤ੍ਥਾਰਤੋ ਦਸ੍ਸੇਤੁਂ, ‘‘ਭਗਵਤੋ ਹੀ’’ਤਿਆਦਿ ਵੁਤ੍ਤਂ. ਉਸ੍ਸਾਦਨਾਅਪਸਾਦਨਾ ਪਞ੍ਞਾਯਨ੍ਤਿ ਤਥਾਗਤੇਨ ਵਿਨੇਤਬ੍ਬਪੁਗ੍ਗਲਵਸੇਨ ਧਮ੍ਮਦੇਸਨਾਯ ਪਵਤ੍ਤੇਤਬ੍ਬਤੋ. ਅਯਂ ਪੁਗ੍ਗਲੋ…ਪੇ… ਆਚਾਰਸਮ੍ਪਨ੍ਨੋਤਿ ਵਾ ਨਤ੍ਥਿ ਪਰੇਸਂ ਅਨੁਦ੍ਦੇਸਕਵਸੇਨ ਧਮ੍ਮਦੇਸਨਾਯ ਪਵਤ੍ਤਨਤੋ.

੩੨੯. ਪਰਮ੍ਮੁਖਾ ਅਵਣ੍ਣਨ੍ਤਿ ਨਿਨ੍ਦਿਯਸ੍ਸ ਦੋਸਸ੍ਸ ਨਿਨ੍ਦਨਂ. ਨ ਹਿ ਕਦਾਚਿ ਨਿਨ੍ਦਿਯੋ ਪਸਂਸਿਯੋ ਹੋਤਿ, ਤਂ ਪਨ ਕਾਲਂ ਞਤ੍ਵਾਵ ਕਥੇਤਬ੍ਬਨ੍ਤਿ ਆਹ, ‘‘ਯੁਤ੍ਤਪਤ੍ਤਕਾਲਂ ਞਤ੍ਵਾਵਾ’’ਤਿ. ਖੀਣਵਾਦੇਪਿ ਏਸੇਵ ਨਯੋ ਤਸ੍ਸ ਰਹੋਵਾਦੇਨ ਸਮਾਨਯੋਗਕ੍ਖਮਤ੍ਤਾ.

੩੩੦. ਘਾਤੀਯਤੀਤਿ ਵਧੀਯਤਿ. ਸਦ੍ਦੋਪਿ ਭਿਜ੍ਜਤਿ ਨਸ੍ਸਤਿ, ਭੇਦੋ ਹੋਤੀਤਿ ਅਤ੍ਥੋ. ਗੇਲਞ੍ਞਪ੍ਪਤ੍ਤੋਤਿ ਖੇਦਂ ਪਰਿਸ੍ਸਮਂ ਪਤ੍ਤੋ. ਅਪਲਿਬੁਦ੍ਧਨ੍ਤਿ ਦੋਸੇਹਿ ਅਨਨੁਪਤਿਤਂ.

੩੩੧. ਅਭਿਨਿਵਿਸ੍ਸ ਵੋਹਰਤੀਤਿ ਏਵਮੇਤਂ, ਨ ਇਤੋ ਅਞ੍ਞਥਾਤਿ ਤਂ ਜਨਪਦਨਿਰੁਤ੍ਤਿਂ ਅਭਿਨਿਵਿਸਿਤ੍ਵਾ ਸਮੁਦਾਚਰਤਿ. ਅਤਿਧਾਵਨਨ੍ਤਿ ਸਮਞ੍ਞਂ ਨਾਮੇਤਂ ਲੋਕਸਙ੍ਕੇਤਸਿਦ੍ਧਾ ਪਞ੍ਞਤ੍ਤੀਤਿ ਪਞ੍ਞਤ੍ਤਿਮਤ੍ਤੇ ਅਟ੍ਠਤ੍ਵਾ ਪਰਮਤ੍ਥਤੋ ਥਾਮਸਾ ਪਰਾਮਸ੍ਸ ਵੋਹਰਣਂ.

੩੩੨. ਅਪਰਾਮਸਨ੍ਤੋਤਿ ਅਨਭਿਨਿਵਿਸਨ੍ਤੋ ਸਮਞ੍ਞਾਮਤ੍ਤਤੋਵ ਵੋਹਰਤਿ.

੩੩੩. ਮਰਿਯਾਦਭਾਜਨੀਯਨ੍ਤਿ ਯਥਾਵੁਤ੍ਤਸਮ੍ਮਾਪਟਿਪਦਾਯ ਮਿਚ੍ਛਾਪਟਿਪਦਾਯ ਚ ਅਞ੍ਞਮਞ੍ਞਂ ਸਙ੍ਕਰਭਾਵਵਿਭਾਜਨਂ. ਰਣਨ੍ਤਿ ਸਤ੍ਤਾ ਏਤੇਹਿ ਕਨ੍ਦਨ੍ਤਿ ਅਕਨ੍ਦਨ੍ਤਾਪਿ ਕਨ੍ਦਨਕਾਰਣਭਾਵਤੋਤਿ ਰਣਾ; ਰਾਗਦੋਸਮੋਹਾ, ਦਸਪਿ ਵਾ ਕਿਲੇਸਾ, ਸਬ੍ਬੇਪਿ ਵਾ ਏਕਨ੍ਤਾਕੁਸਲਾ, ਤੇਹਿ ਨਾਨਪ੍ਪਕਾਰਦੁਕ੍ਖਨਿਬ੍ਬਤ੍ਤਕੇਹਿ ਅਭਿਭੂਤਾ ਸਤ੍ਤਾ ਕਨ੍ਦਨ੍ਤਿ; ਸਹ ਰਣੇਹੀਤਿ ਸਰਣੋ. ਰਣਸਦ੍ਦੋ ਵਾ ਰਾਗਾਦਿਰੇਣੂਸੁ ਨਿਰੁਲ਼੍ਹੋ. ਤੇਨਾਹ ‘‘ਸਰਜੋ ਸਕਿਲੇਸੋ’’ਤਿ. ਪਾਲ਼ਿਯਂ ਪਨ ‘‘ਸਦੁਕ੍ਖੋ ਏਸੋ ਧਮ੍ਮੋ’’ਤਿਆਦਿਨਾ ਆਗਤਤ੍ਤਾ ਕਾਮਸੁਖਾਨੁਯੋਗਾਦਯੋਪਿ ‘‘ਸਰਣੋ’’ਤਿ ਵੁਤ੍ਤਾਤਿ ਦੁਕ੍ਖਾਦੀਨਂ ਰਣਭਾਵੋ ਤਨ੍ਨਿਬ੍ਬਤ੍ਤਕਸਭਾਵਾਨਂ ਅਕੁਸਲਾਨਂ ਸਰਣਤਾ ਚ ਵੇਦਿਤਬ੍ਬਾ. ਅਰਣੋਤਿਆਦੀਨਂ ਪਦਾਨਂ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ.

ਵਤ੍ਥੁਂ ਸੋਧੇਤੀਤਿ ਨਿਰੋਧਸਮਾਪਜ੍ਜਨੇਨ ਮਹਪ੍ਫਲਭਾਵਕਰਣੇਨ ਦਕ੍ਖਿਣੇਯ੍ਯਵਤ੍ਥੁਭੂਤਂ ਅਤ੍ਤਾਨਂ ਵਿਸੋਧੇਤਿ; ਨਿਰੋਧਸਮਾਪਤ੍ਤਿਯਾ ਵਤ੍ਥੁਵਿਸੋਧਨਂ ਨਿਰੋਧਂ ਸਮਾਪਜ੍ਜਿਤ੍ਵਾ ਵੁਟ੍ਠਿਤਾਨਂ ਪਚ੍ਚੇਕਬੁਦ੍ਧਾਨਂ ਮਹਾਕਸ੍ਸਪਤ੍ਥੇਰਾਦੀਨਂ ਦਿਨ੍ਨਦਕ੍ਖਿਣਾਵਿਸੁਦ੍ਧਿਯਾ ਦੀਪੇਤਬ੍ਬਂ. ਤੇਨਾਹ ‘‘ਤਥਾ ਹੀ’’ਤਿਆਦਿ. ਤਥੇਵਾਤਿ ਇਮਿਨਾ ‘‘ਪਿਣ੍ਡਾਯ ਚਰਨ੍ਤੋ’’ਤਿਆਦਿਂ ਉਪਸਂਹਰਤਿ. ਮੇਤ੍ਤਾਭਾਵਨਾਯ ਮੁਦੁਭੂਤਚਿਤ੍ਤਬਹੁਮਾਨਪੁਬ੍ਬਕਂ ਦੇਨ੍ਤੀਤਿ, ‘‘ਸੁਭੂਤਿਤ੍ਥੇਰੋ ਦਕ੍ਖਿਣਂ ਵਿਸੋਧੇਤੀ’’ਤਿ ਵੁਤ੍ਤਂ. ਤੇਨ ਦਾਯਕਤੋਪਿ ਦਕ੍ਖਿਣਾਵਿਸੁਦ੍ਧਿਂ ਦਸ੍ਸੇਤਿ. ਵਤ੍ਥੁਸੋਧਨਂ ਪਨ ਪਟਿਭਾਗਤੋ. ਏਵਂ ਪਨ ਕਾਤੁਂ ਸਕ੍ਕਾਤਿ ਸਾਵਕਾਨਮ੍ਪਿ ਕਿਮੇਵਂ ਲਹੁਵੁਟ੍ਠਾਨਾਧਿਟ੍ਠਾਨਂ ਸਾਵਕੇਸੁ ਚਿਣ੍ਣਵਸੀਭਾਵੋ ਸਮ੍ਭਵਤੀਤਿ ਪੁਚ੍ਛਤਿ. ਇਤਰੋ ਅਗ੍ਗਸਾਵਕਮਹਾਸਾਵਕੇਸੁ ਕਿਂ ਵਤ੍ਤਬ੍ਬਂ, ਪਕਤਿਸਾਵਕੇਸੁਪਿ ਵਸਿਪ੍ਪਤ੍ਤੇਸੁ ਲਬ੍ਭਤੀਤਿ ਤੇ ਦਸ੍ਸੇਨ੍ਤੋ, ‘‘ਆਮ ਸਕ੍ਕਾ’’ਤਿਆਦਿਮਾਹ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਅਰਣਵਿਭਙ੍ਗਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.