੧੦. ਧਾਤੁਵਿਭਙ੍ਗਸੁਤ੍ਤਵਣ੍ਣਨਾ
੩੪੨. ਅਪਰਿਕ੍ਖੀਣਾਯੁਕਂ ਪੁਕ੍ਕੁਸਾਤਿਕੁਲਪੁਤ੍ਤਂ ਉਦ੍ਦਿਸ੍ਸ ਗਮਨਨ੍ਤਿ ਕਤ੍ਵਾ ਵੁਤ੍ਤਂ ‘‘ਤੁਰਿਤਗਮਨਚਾਰਿਕ’’ਨ੍ਤਿ. ਮਮ ਵਾਸੁਪਗਮਨੇਨ ਤਵ ਚਿਤ੍ਤਸ੍ਸ ਅਫਾਸੁਕਂ ਅਨਿਟ੍ਠਂ ਸਚੇ ਨਤ੍ਥਿ. ਸੋਤਿ ਪੁਬ੍ਬੁਪਗਤੋ. ਦਿਨ੍ਨਂ ਦਿਨ੍ਨਮੇਵ ਵਟ੍ਟਤੀਤਿ ਏਕਵਾਰਂ ਦਿਨ੍ਨਂ ਦਿਨ੍ਨਮੇਵ ਯੁਤ੍ਤਂ, ਨ ਪੁਨ ਦਾਤਬ੍ਬਨ੍ਤਿ ਅਧਿਪ੍ਪਾਯੋ. ਕਤਂ ਕਤਮੇਵਾਤਿ ਸਙ੍ਗਹਤ੍ਥਂ ਕਤਂ ਅਨੁਚ੍ਛਵਿਕਕਮ੍ਮਂ ਕਤਮੇਵ, ਨ ਤਂ ਪੁਨ ਵਿਪਰਿਵਤ੍ਤੇਤਬ੍ਬਨ੍ਤਿ ਅਧਿਪ੍ਪਾਯੋ.
ਪੁਕ੍ਕੁਸਾਤਿਮ੍ਹਿ ਉਭਯਥਾਪਿ ਕੁਲਪੁਤ੍ਤਭਾਵੋ ਪਰਿਪੁਣ੍ਣੋ ਏਵਾਤਿ ਆਹ – ‘‘ਜਾਤਿਕੁਲਪੁਤ੍ਤੋਪਿ ਆਚਾਰਕੁਲਪੁਤ੍ਤੋਪੀ’’ਤਿ. ਤਤ੍ਰਾਤਿ ਤਸ੍ਮਿਂ ਤਕ੍ਕਸੀਲਤੋ ਆਗਮਨੇ. ਅਙ੍ਕੇ ਨਿਪਨ੍ਨਦਾਰਕਂ ਵਿਯ ਜਨਂ ਤੋਸੇਤਿ ਤੁਟ੍ਠਿਂ ਪਾਪੇਤਿ. ਰਤਨਾਨਿ ਉਪ੍ਪਜ੍ਜਨ੍ਤਿ ਪਬ੍ਬਤਸਮੁਦ੍ਦਾਦਿਸਨ੍ਨਿਸ੍ਸਿਤਤ੍ਤਾ ਪਚ੍ਚਨ੍ਤਦੇਸਸ੍ਸ. ਦਸ੍ਸਨੀਯਨ੍ਤਿ ਦਸ੍ਸਨੇਨੇਵ ਸੁਖਾਵਹਂ. ਏਵਰੂਪਨ੍ਤਿ ਦਸ੍ਸਨੀਯਂ ਸਵਨੀਯਞ੍ਚ.
ਅਨਗ੍ਘਕਮ੍ਬਲੇ ਮਹਗ੍ਘਕਮ੍ਬਲੇ. ਸਾਰਕਰਣ੍ਡਕੇਤਿ ਚਨ੍ਦਨਸਾਰਾਦਿਸਾਰਮਯਕਰਣ੍ਡਕੇ. ਲਿਖਾਪੇਤ੍ਵਾ ਉਕ੍ਕਿਰਾਪੇਤ੍ਵਾ. ਲਾਖਾਯ ਵਟ੍ਟਾਪੇਤ੍ਵਾਤਿ ਮੁਖਂ ਪਿਦਹਿਤ੍ਵਾ ਲਾਖਾਪਰਿਕਮ੍ਮਂ ਕਾਰੇਤ੍ਵਾ.
ਅਨ੍ਤੋ ਦੁਸ੍ਸਭਣ੍ਡਿਕਂ ਅਤ੍ਥੀਤਿ ਅਞ੍ਞਾਸਿ ਨਾਤਿਗਰੁਕਭਾਵਤੋ. ਅਨਗ੍ਘਾ ਅਹੇਸੁਨ੍ਤਿ ਵਣ੍ਣਸਮ੍ਪਤ੍ਤਿਫਸ੍ਸਸਮ੍ਪਤ੍ਤਿਪਮਾਣਮਹਤ੍ਤਦੁਨ੍ਨਿਮ੍ਮਾਪਿਯਤਾਹਿ ਮਹਗ੍ਘਾ ਅਹੇਸੁਂ, ਮਹਾਪੁਞ੍ਞੋ ਰਾਜਾ ਤਸ੍ਸ ਅਤ੍ਥੇਵਾਤਿ ਅਧਿਪ੍ਪਾਯੋ.
ਯਦਿ ਏਵਂ, ‘‘ਕਿਨ੍ਨੁ ਖੋ ਪੇਸੇਮੀ’’ਤਿ ਕਸ੍ਮਾ ਵੀਮਂਸਂ ਆਪਜ੍ਜੀਤਿ ਆਹ – ‘‘ਅਪਿਚ ਖੋ ਪਨਾ’’ਤਿਆਦਿ. ਸੋਤਿ ਬਿਮ੍ਬਿਸਾਰੋ ਰਾਜਾ. ਵਿਚਿਨਿਤੁਂ ਆਰਦ੍ਧੋ ਰਤਨਸ੍ਸ ਅਨੇਕਵਿਧਤ੍ਤਾ ਉਤ੍ਤਰੁਤ੍ਤਰਿਞ੍ਚ ਪਣੀਤਤਰਾਦਿਭਾਵਤੋ. ਸੁਵਣ੍ਣਰਜਤਾਦੀਤਿ ਸੁਵਣ੍ਣਰਜਤਪਵਾਲ਼ਮਣਿਮੁਤ੍ਤਾਵੇਲ਼ੁਰਿਯਾਦਿ. ਇਨ੍ਦ੍ਰਿਯਬਦ੍ਧਨ੍ਤਿ ਚਕ੍ਖਾਦਿਇਨ੍ਦ੍ਰਿਯਪਟਿਬਦ੍ਧਂ. ਪਦੇਸਨ੍ਤਿ ਗੁਣਵਸੇਨ ਏਕਦੇਸਂ ਨ ਪਾਪੁਣਾਤਿ.
ਸਾਮਂ ਸਚ੍ਚਾਨਂ ਅਭਿਸਮ੍ਬੁਦ੍ਧਤਾਸਾਮਞ੍ਞੇਨ, ‘‘ਬੁਦ੍ਧਰਤਨਮ੍ਪਿ ਦੁਵਿਧ’’ਨ੍ਤਿ ਵੁਤ੍ਤਂ. ਬੁਦ੍ਧਰਤਨਸਮਂ ਰਤਨਂ ਨਾਮ ਨਤ੍ਥਿ, ਯਸ੍ਮਾ ਪਨ ਇਮਸ੍ਮਿਂ ਲੋਕੇ ਪਰਸ੍ਮਿਂ ਵਾ ਪਨ ਬੁਦ੍ਧੇਨ ਸਦਿਸੋ ਨ ਵਿਜ੍ਜਤੀਤਿ. ਪਠਮਬੋਧਿਯਂਯੇਵ ਪਵਤ੍ਤਤੀਤਿ ਕਤ੍ਵਾ ਵੁਤ੍ਤਂ ‘‘ਘੋਸੋਪੀ’’ਤਿਆਦਿ.
ਰਾਜਾ ਤੁਟ੍ਠੋ ਚਿਨ੍ਤੇਸਿ, ‘‘ਤਤ੍ਥ ਅਵਿਜ੍ਜਮਾਨਂਯੇਵ ਪੇਸੇਤੁਂ ਲਦ੍ਧ’’ਨ੍ਤਿ. ਤਸ੍ਮਾਤਿ ਯਸ੍ਮਾ ਪਰਿਪੁਣ੍ਣਂ ਏਕਦਿਵਸਮ੍ਪਿ ਤਸ੍ਮਿਂ ਪਦੇਸੇ ਬੁਦ੍ਧਾਨਂ ਆਵਾਸਪਰਿਗ੍ਗਹੋ ਨਤ੍ਥਿ, ਤਸ੍ਮਾ. ਪੁਬ੍ਬਦਿਸਾਮੁਖਨ੍ਤਿ ਪੁਬ੍ਬਦਿਸਾਭਿਮੁਖਂ ਸੀਹਪਞ੍ਜਰਂ. ਤੇਨਸ੍ਸ ਸੁਵਿਭੂਤਾਲੋਕਤਂ ਦਸ੍ਸੇਤਿ.
ਏਵਂ ਅਨਞ੍ਞਸਾਧਾਰਣਸ੍ਸ ਭਗਵਤੋ ਈਦਿਸੋ ਸਮੁਦਾਗਮੋਤਿ ਦਸ੍ਸੇਤੁਂ, ‘‘ਏਵਂ ਦਸ ਪਾਰਮਿਯੋ ਪੂਰੇਤ੍ਵਾ’’ਤਿਆਦਿ ਵੁਤ੍ਤਂ. ਏਵਂ ਸਮ੍ਪਨ੍ਨਸਮੁਦਾਗਮਸ੍ਸ ਤਦਨੁਰੂਪਾ ਅਯਂ ਫਲਸਮ੍ਪਦਾਤਿ ਦਸ੍ਸੇਤੁਂ, ‘‘ਤੁਸਿਤਭਵਨਤੋ’’ਤਿਆਦਿ ਵੁਤ੍ਤਂ.
ਅਰਿਯਧਮ੍ਮੋ ਨਾਮ ਅਰਿਯਮਗ੍ਗਪ੍ਪਧਾਨੋ, ਅਰਿਯਮਗ੍ਗੋ ਚ ਸਤ੍ਤਤਿਂਸਬੋਧਿਪਕ੍ਖਿਯਸਙ੍ਗਹੋ, ਤੇ ਚ ਉਦ੍ਦੇਸਮਤ੍ਤੇਨੇਵ ਗਹਿਤਾਤਿ ਆਹ – ‘‘ਸਤ੍ਤਤਿਂਸਬੋਧਿਪਕ੍ਖਿਯੇ ਏਕਦੇਸੇਨ ਲਿਖਿਤ੍ਵਾ’’ਤਿ. ਚੂਲ਼ਸੀਲਾਦੀਨਿ ਬ੍ਰਹ੍ਮਜਾਲੇ (ਦੀ. ਨਿ. ੧.੮-੯) ਆਗਤਨਯੇਨ ਵੇਦਿਤਬ੍ਬਾਨਿ. ਛਦ੍ਵਾਰਸਂਵਰਂ ਸਤਿਸਮ੍ਪਜਞ੍ਞਨ੍ਤਿ ਮਨਚ੍ਛਟ੍ਠਾਨਂ ਦ੍ਵਾਰਾਨਂ ਸਂਵਰਣਵਸੇਨ ਸਤ੍ਤਟ੍ਠਾਨਿਕਂ ਸਤਿਸਮ੍ਪਜਞ੍ਞਂ. ਦ੍ਵਾਦਸਪ੍ਪਭੇਦਂ ਚੀਵਰਾਦਿਚਤੁਪ੍ਪਚ੍ਚਯਸਨ੍ਤੋਸਂ. ਅਰਞ੍ਞਰੁਕ੍ਖਮੂਲਾਦੀਨਞ੍ਚ ਵਿਭਙ੍ਗਂ ਭਾਵਨਾਨੁਕੂਲਂ ਸੇਨਾਸਨਂ. ‘‘ਅਭਿਜ੍ਝਂ ਲੋਕੇ ਪਹਾਯਾ’’ਤਿਆਦਿਨਾ ਵੁਤ੍ਤਂ ਨੀਵਰਣਪ੍ਪਹਾਨਂ. ਪਰਿਕਮ੍ਮਨ੍ਤਿ ਕਸਿਣਾਦਿਪਰਿਕਮ੍ਮਂ. ਪਾਲ਼ਿਯਂ ਆਗਤਨਯੇਨ ਅਟ੍ਠਤਿਂਸ ਕਮ੍ਮਟ੍ਠਾਨਾਨਿ. ਵਿਸੁਦ੍ਧਿਪਟਿਪਾਟਿਯਾ ਯਾਵ ਆਸਵਕ੍ਖਯਾ ਇਮਂ ਪਟਿਪਤ੍ਤਿਂ ਏਕਦੇਸੇਨ ਲਿਖਿ. ਸੋਲ਼ਸਵਿਧਨ੍ਤਿ ਸੋਲ਼ਸਵਿਧਭਾਵਨਾਯ ਪਯੋਗਂ.
ਕਿਲਞ੍ਜਮਯੇਤਿ ਨਾਨਾਵਿਧਭਿਤ੍ਤਿਵਿਭਤ੍ਤੇ ਸਣ੍ਹਸੁਖੁਮਰਤਨਪਰਿਸਿਬ੍ਬਿਤੇ ਕਿਲਞ੍ਜਮਯਸਮੁਗ੍ਗੇ. ਬਹਿ ਵਤ੍ਥੇਨ ਵੇਠੇਤ੍ਵਾਤਿ ਪਠਮਂ ਸੁਖੁਮਕਮ੍ਬਲੇਨ ਵੇਠੇਤ੍ਵਾ ਪਟਿਪਾਟਿਯਾ ਤੇਤ੍ਤਿਂਸਾਯ ਸਮੁਗ੍ਗੇਸੁ ਪਕ੍ਖਿਪਿਤ੍ਵਾ ਤਤੋ ਬਹਿ ਸੁਖੁਮਵਤ੍ਥੇਨ ਵੇਠੇਤ੍ਵਾ ਛਾਦੇਤ੍ਵਾ. ਤਿਣਗਚ੍ਛਪਹਾਨਸਮ੍ਮਜ੍ਜਨਾਦਿਨਾ ਸੋਧਿਤਮਤ੍ਤਕਮੇਵ ਹੋਤੁ, ਕਦਲਿਪੁਣ੍ਣਘਟਠਪਨਧਜਪਟਾਕੁਸ੍ਸਾਪਨਾਦਿਅਲਙ੍ਕਰਣੇਨ ਮਾ ਨਿਟ੍ਠਾਪੇਥਾਤਿ ਅਤ੍ਥੋ. ਰਾਜਾਨੁਭਾਵੇਨ ਪਟਿਯਾਦੇਥਾਤਿ ਮਮ ਰਾਜਾਨੁਰੂਪਂ ਸਜ੍ਜੇਥ, ਅਲਙ੍ਕਰੋਥਾਤਿ ਅਤ੍ਥੋ. ਅਨ੍ਤਰਭੋਗਿਕਾਨਨ੍ਤਿ ਅਨੁਯੁਤ੍ਤਰਾਜਮਹਾਮਤ੍ਤਾਨਂ. ਜਵਨਦੂਤੇਤਿ ਖਿਪ੍ਪਂ ਗਚ੍ਛਨ੍ਤਕਦੂਤਪੁਰਿਸੇ. ਤਾਲ਼ੇਹਿ ਸਹ ਅਵਚਰਨ੍ਤੀਤਿ ਤਾਲ਼ਾਵਚਰਾ.
ਰਞ੍ਞਾ ਪਣ੍ਣਾਕਾਰਂ ਉਦ੍ਦਿਸ੍ਸ ਕਤਪੂਜਾਸਕ੍ਕਾਰਸ੍ਸ ਅਮਚ੍ਚਤੋ ਸੁਤਤ੍ਤਾ ਪਣ੍ਣਾਕਾਰਂ ਉਚ੍ਚਟ੍ਠਾਨੇ ਠਪੇਤ੍ਵਾ ਸਯਂ ਨੀਚਾਸਨੇ ਨਿਸਿਨ੍ਨੋ. ਨਾਯਂ ਅਞ੍ਞਸ੍ਸ ਰਤਨਸ੍ਸ ਭਵਿਸ੍ਸਤੀਤਿ ਅਯਂ ਪਰਿਹਾਰੋ ਅਞ੍ਞਸ੍ਸ ਮਣਿਮੁਤ੍ਤਾਦਿਭੇਦਸ੍ਸ ਰਤਨਸ੍ਸ ਨ ਭਵਿਸ੍ਸਤਿ ਮਣਿਮੁਤ੍ਤਾਦੀਹਿ ਅਭਿਸਙ੍ਖਤਤ੍ਤਾ. ਬਲਵਸੋਮਨਸ੍ਸਂ ਉਪ੍ਪਜ੍ਜਿ ਚਿਰਤਨਕਾਲਂ ਬੁਦ੍ਧਸਾਸਨੇ ਭਾਵਿਤਭਾਵਨਤਾਯ ਵਾਸਿਤਵਾਸਨਤਾਯ ਘਟੇ ਦੀਪੋ ਵਿਯ ਅਬ੍ਭਨ੍ਤਰੇ ਏਵ ਸਮੁਜ੍ਜਲਮਾਨਪਰਿਪਕ੍ਕਤਿਹੇਤੁਕਭਾਵਤੋ.
ਧਾਰੇਮੀਤਿ ਇਚ੍ਛਾਮਿ, ਗਣ੍ਹਾਮੀਤਿ ਅਤ੍ਥੋ. ਦ੍ਵੇਜ੍ਝਵਚਨਨ੍ਤਿ ਦ੍ਵੇਲ਼੍ਹਕਭਾਵੋ. ਅਨ੍ਤਰਂ ਕਰੋਤੀਤਿ ਦ੍ਵਿਨ੍ਨਂ ਪਾਦਾਨਂ ਅਨ੍ਤਰਂ ਤਂ ਲੇਖਂ ਕਰੋਤਿ, ਏਕੇਨ ਪਾਦੇਨ ਅਤਿਕ੍ਕਮੀਤਿ ਅਤ੍ਥੋ. ਤਸ੍ਸਾ ਗਤਮਗ੍ਗੇਨਾਤਿ ਤਾਯ ਦੇਵਿਯਾ ਵਿਵਟ੍ਟਮਾਨਾਯ ਨਾਸਿਤਾਯ ਗਤਮਗ੍ਗੇਨ. ਤਂ ਪਨ ਲੇਖਨ੍ਤਿ ਪੁਕ੍ਕੁਸਾਤਿਨਾ ਕਤਲੇਖਂ. ਪਣ੍ਣਚ੍ਛਤ੍ਤਕਨ੍ਤਿ ਤਾਲਪਤ੍ਤਮੁਟ੍ਠਿਂ.
ਸਤ੍ਥੁਗਾਰਵੇਨਾਤਿ ਸਤ੍ਥਰਿ ਉਪ੍ਪਨ੍ਨਪਸਾਦਪੇਮਬਹੁਮਾਨਸਮ੍ਭਵੇਨ. ਤਦਾ ਸਤ੍ਥਾਰਂਯੇਵ ਮਨਸਿ ਕਤ੍ਵਾ ਤਨ੍ਨਿਨ੍ਨਭਾਵੇਨ ਗਚ੍ਛਨ੍ਤੋ, ‘‘ਪੁਚ੍ਛਿਸ੍ਸਾਮੀ’’ਤਿਪਿ ਚਿਤ੍ਤਂ ਨ ਉਪ੍ਪਾਦੇਸਿ, ‘‘ਏਤ੍ਥ ਨੁ ਖੋ ਸਤ੍ਥਾ ਵਸਤੀ’’ਤਿ ਪਰਿਵਿਤਕ੍ਕਸ੍ਸੇਵ ਅਭਾਵਤੋ; ਰਾਜਗਹਂ ਪਨ ਪਤ੍ਵਾ ਰਞ੍ਞੋ ਪੇਸਿਤਸਾਸਨਵਸੇਨ ਤਤ੍ਥ ਚ ਵਿਹਾਰਸ੍ਸ ਬਹੁਭਾਵਤੋ ਸਤ੍ਥਾ ਕਹਂ ਵਸਤੀਤਿ ਪੁਚ੍ਛਿ. ਸਤ੍ਥੁ ਏਕਕਸ੍ਸੇਵ ਨਿਕ੍ਖਮਨਂ ਪਞ੍ਚਚਤ੍ਤਾਲੀਸ ਯੋਜਨਾਨਿ ਪਦਸਾ ਗਮਨਞ੍ਚ ਧਮ੍ਮਪੂਜਾਵਸੇਨ ਕਤਨ੍ਤਿ ਦਟ੍ਠਬ੍ਬਂ. ਧਮ੍ਮਪੂਜਾਯ ਚ ਬੁਦ੍ਧਾਨਂ ਆਚਿਣ੍ਣਭਾਵੋ ਹੇਟ੍ਠਾ ਵਿਤ੍ਥਾਰਿਤੋਯੇਵ. ਬੁਦ੍ਧਸੋਭਂ ਪਨ ਪਟਿਚ੍ਛਾਦੇਤ੍ਵਾ ਅਞ੍ਞਾਤਕਵੇਸੇਨ ਤਤ੍ਥ ਗਮਨਂ ਤਸ੍ਸ ਕੁਲਪੁਤ੍ਤਸ੍ਸ ਵਿਸ੍ਸਤ੍ਥਵਸੇਨ ਮਗ੍ਗਦਰਥਪਟਿਪਸ੍ਸਮ੍ਭਨਤ੍ਥਂ. ਅਪ੍ਪਟਿਪਸ੍ਸਦ੍ਧਮਗ੍ਗਦਰਥੋ ਹਿ ਧਮ੍ਮਦੇਸਨਾਯ ਭਾਜਨਂ ਨ ਹੋਤੀਤਿ. ਤਥਾਹਿ ਵਕ੍ਖਤਿ, ‘‘ਨਨੁ ਚ ਭਗਵਾ’’ਤਿਆਦਿ.
ਉਰੁਦ੍ਧਨ੍ਤਿ ਵਿਸਾਲਨ੍ਤਿ ਕੇਚਿ. ਅਤਿਰੇਕਤਿਯੋਜਨਸਤਨ੍ਤਿਆਦਿਨਾ ਅਨ੍ਵਯਤੋ ਬ੍ਯਤਿਰੇਕਤੋ ਚ ਮਚ੍ਛੇਰਵਿਨਯਨੇ ਸਬ੍ਰਹ੍ਮਚਾਰੀਨਂ ਓਵਾਦਦਾਨਂ. ਅਚ੍ਚਨ੍ਤਸੁਖੁਮਾਲੋਤਿਆਦਿਨਾ ਸਤ੍ਥੁ ਧਮ੍ਮਗਾਰਵੇਨ ਸਦ੍ਧਿਂ ਕੁਲਪੁਤ੍ਤਸ੍ਸਪਿ ਧਮ੍ਮਗਾਰਵਂ ਸਂਸਨ੍ਦਤਿ ਸਮੇਤੀਤਿ ਦਸ੍ਸੇਤਿ. ਤੇਨ ਭਗਵਤੋ ਕਤਸ੍ਸ ਪਚ੍ਚੁਗ੍ਗਮਨਸ੍ਸ ਠਾਨਗਤਭਾਵਂ ਵਿਭਾਵੇਨ੍ਤੋ ਅਞ੍ਞੇਸਮ੍ਪਿ ਭਬ੍ਬਰੂਪਾਨਂ ਕੁਲਪੁਤ੍ਤਾਨਂ ਯਥਾਰਹਂ ਸਙ੍ਗਹੋ ਕਾਤਬ੍ਬੋਤਿ ਦਸ੍ਸੇਤਿ.
ਬ੍ਰਹ੍ਮਲੋਕਪ੍ਪਮਾਣਨ੍ਤਿ ਉਚ੍ਚਭਾਵੇਨ. ਆਨੁਭਾਵੇਨਾਤਿ ਇਦ੍ਧਾਨੁਭਾਵੇਨ ਯਥਾ ਸੋ ਸੋਤਪਥਂ ਨ ਉਪਗਚ੍ਛਤਿ, ਏਵਂ ਵੂਪਸਮੇਤੁਂ ਸਕ੍ਕੋਤਿ. ਅਵਿਬ੍ਭਨ੍ਤਨ੍ਤਿ ਵਿਬ੍ਭਮਰਹਿਤਂ ਨਿਲ੍ਲੋਲੁਪ੍ਪਂ. ‘‘ਭਾਵਨਪੁਂਸਕਂ ਪਨੇਤ’’ਨ੍ਤਿ ਵਤ੍ਵਾ ਤਸ੍ਸ ਵਿਵਰਣਤ੍ਥਂ, ‘‘ਪਾਸਾਦਿਕੇਨ ਇਰਿਯਾਪਥੇਨਾ’’ਤਿ ਵੁਤ੍ਤਂ. ਇਤ੍ਥਮ੍ਭੂਤਲਕ੍ਖਣੇ ਏਤਂ ਕਰਣਵਚਨਂ ਦਟ੍ਠਬ੍ਬਂ. ਤੇਨਾਹ ‘‘ਯਥਾ ਇਰਿਯਤੋ’’ਤਿਆਦਿ. ਅਮਨਾਪੋ ਹੋਤਿ ਪਸ੍ਸਨ੍ਤਾਨਂ. ਸੀਹਸੇਯ੍ਯਾਯ ਨਿਪਨ੍ਨਸ੍ਸਪਿ ਹਿ ਏਕਚ੍ਚੇ ਸਰੀਰਾਵਯਵਾ ਅਧੋਖਿਤ੍ਤਵਿਕ੍ਖਿਤ੍ਤਾ ਵਿਯ ਦਿਸ੍ਸਨ੍ਤਿ. ਕਟਿਯਂ ਦ੍ਵਿਨ੍ਨਂ ਊਰੁਸਨ੍ਧੀਨਂ ਦ੍ਵਿਨ੍ਨਞ੍ਚ ਜਾਣੁਸਨ੍ਧੀਨਂ ਵਸੇਨ ਚਤੁਸਨ੍ਧਿਕਪਲ੍ਲਙ੍ਕਂ. ਨ ਪਤਿਟ੍ਠਾਤੀਤਿ ਨਪ੍ਪਵਤ੍ਤਤਿ, ‘‘ਕਂਸਿ ਤ੍ਵ’’ਨ੍ਤਿਆਦਿਨਾ ਅਪੁਚ੍ਛਿਤੇ ਕਥਾਪਵਤ੍ਤਿ ਏਵ ਨ ਹੋਤਿ. ਅਪ੍ਪਤਿਟ੍ਠਿਤਾਯ ਕਥਾਯ ਨ ਸਞ੍ਜਾਯਤੀਤਿ ਤਥਾ ਪਨ ਪੁਚ੍ਛਾਵਸੇਨ ਕਥਾਯ ਅਪ੍ਪਵਤ੍ਤਿਤਾਯ ਉਪਰਿ ਧਮ੍ਮਕਥਾ ਨ ਸਞ੍ਜਾਯਤਿ ਨ ਉਪ੍ਪਜ੍ਜਤਿ. ਇਤੀਤਿ ਤਸ੍ਮਾ. ਕਥਾਪਤਿਟ੍ਠਾਪਨਤ੍ਥਂ ਕਥਾਪਵਤ੍ਤਨਤ੍ਥਂ ਕਥਾਸਮੁਟ੍ਠਾਪਨਤ੍ਥਂ ਵਾ ਪੁਚ੍ਛਿ.
ਸਭਾਵਮੇਵ ਕਥੇਤੀਤਿ ਅਤ੍ਤਨੋ ਭਗਵਤੋ ਅਦਿਟ੍ਠਪੁਬ੍ਬਤ੍ਤਾ ‘‘ਅਦਿਟ੍ਠਪੁਬ੍ਬਕਂ ਕਥਮਹਂ ਜਾਨੇਯ੍ਯ’’ਨ੍ਤਿ ਸਭਾਵਮੇਵ ਕੇਵਲਂ ਅਤ੍ਤਨੋ ਅਜ੍ਝਾਸਯਮੇਵ ਕਥੇਤਿ; ਨ ਪਨ ਸਦੇਵਕਸ੍ਸ ਲੋਕਸ੍ਸ ਸੁਪਾਕਟਂ ਸਭਾਵਸਿਦ੍ਧਂ ਬੁਦ੍ਧਰੂਪਕਾਯਸਭਾਵਂ. ਅਥ ਵਾ ਸਭਾਵਮੇਵ ਕਥੇਤੀਤਿ ‘‘ਇਦਮੇਵ’’ਨ੍ਤਿ ਜਾਨਨ੍ਤੋਪਿ ਤਦਾ ਭਗਵਤੋ ਰੁਚਿਯਾ ਤਥਾਪਵਤ੍ਤਮਾਨਂ ਰੂਪਕਾਯਸਭਾਵਮੇਵ ਕਥੇਤਿ ਅਪ੍ਪਵਿਕ੍ਖਮ੍ਭਨ੍ਤਿ ਅਧਿਪ੍ਪਾਯੋ. ਤੇਨਾਹ – ‘‘ਤਥਾ ਹਿ ਨ’’ਨ੍ਤਿਆਦਿ, ਵਿਪਸ੍ਸਨਾਲਕ੍ਖਣਮੇਵ ਪਟਿਪਦਨ੍ਤਿ ਅਧਿਪ੍ਪਾਯੋ.
੩੪੩. ‘‘ਪੁਬ੍ਬਭਾਗਪਟਿਪਦਂ ਅਕਥੇਤ੍ਵਾ’’ਤਿ ਵਤ੍ਵਾ ਪੁਬ੍ਬਭਾਗਪਟਿਪਦਾਯ ਅਕਥਨੇ ਕਾਰਣਂ ਪੁਬ੍ਬਭਾਗਪਟਿਪਦਞ੍ਚ ਸਰੂਪਤੋ ਦਸ੍ਸੇਤੁਂ, ‘‘ਯਸ੍ਸ ਹੀ’’ਤਿਆਦਿ ਵੁਤ੍ਤਂ. ਅਪਰਿਸੁਦ੍ਧਾਯਪਿ ਪੁਬ੍ਬਭਾਗਪਟਿਪਦਾਯ ਵਿਪਸ੍ਸਨਾ ਤਥਾ ਨ ਕਿਚ੍ਚਕਾਰੀ, ਪਗੇਵ ਅਵਿਜ੍ਜਮਾਨਾਯਾਤਿ, ‘‘ਯਸ੍ਸ ਹਿ…ਪੇ… ਅਪਰਿਸੁਦ੍ਧਾ ਹੋਤਿ’’ਚ੍ਚੇਵ ਵੁਤ੍ਤਂ. ਪੁਬ੍ਬਭਾਗਪਟਿਪਦਾ ਚ ਨਾਮ ਸਙ੍ਖੇਪਤੋ ਪਨ੍ਨਰਸ ਚਰਣਧਮ੍ਮਾਤਿ ਆਹ – ‘‘ਸੀਲਸਂਵਰਂ…ਪੇ… ਇਮਂ ਪੁਬ੍ਬਭਾਗਪਟਿਪਦਂ ਆਚਿਕ੍ਖਤੀ’’ਤਿ. ਯਾਨਕਿਚ੍ਚਂ ਸਾਧੇਤਿ ਮਗ੍ਗਗਮਨੇਨ ਅਕਿਲਨ੍ਤਭਾਵਸਾਧਨਤ੍ਤਾ. ਚਿਰਕਾਲਂ ਪਰਿਭਾਵਿਤਾਯ ਪਰਿਪਕ੍ਕਗਤਾਯ ਹੇਤੁਸਮ੍ਪਦਾਯ ਉਪਟ੍ਠਾਪਿਤਂ ਸਾਮਣੇਰਸੀਲਮ੍ਪਿ ਪਰਿਪੁਣ੍ਣਂ ਅਖਣ੍ਡਾਦਿਭਾਵਪ੍ਪਤ੍ਤਿਯਾ, ਯਂ ਪੁਬ੍ਬਹੇਤੁਤ੍ਤਾ ‘‘ਸੀਲ’’ਨ੍ਤਿ ਵੁਚ੍ਚਤਿ.
ਧਾਤੁਯੋ ਪਰਮਤ੍ਥਤੋ ਵਿਜ੍ਜਮਾਨਾ, ਪਞ੍ਞਤ੍ਤਿਮਤ੍ਥੋ ਪੁਰਿਸੋ ਅਵਿਜ੍ਜਮਾਨੋ. ਅਥ ਕਸ੍ਮਾ ਭਗਵਾ ਅਰਹਤ੍ਤਸ੍ਸ ਪਦਟ੍ਠਾਨਭੂਤਂ ਵਿਪਸ੍ਸਨਂ ਕਥੇਨ੍ਤੋ ‘‘ਛਧਾਤੁਰੋ’’ਤਿ ਅਵਿਜ੍ਜਮਾਨਪ੍ਪਧਾਨਂ ਦੇਸਨਂ ਆਰਭੀਤਿ ਆਹ – ‘‘ਭਗਵਾ ਹੀ’’ਤਿਆਦਿ. ਕਤ੍ਥਚਿ ‘‘ਤੇਵਿਜ੍ਜੋ ਛਲ਼ਭਿਞ੍ਞੋ’’ਤਿਆਦੀਸੁ ਵਿਜ੍ਜਮਾਨੇਨ ਅਵਿਜ੍ਜਮਾਨਂ ਦਸ੍ਸੇਤਿ. ਕਤ੍ਥਚਿ – ‘‘ਇਤ੍ਥਿਰੂਪਂ, ਭਿਕ੍ਖਵੇ, ਪੁਰਿਸਸ੍ਸ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤੀ’’ਤਿਆਦੀਸੁ (ਅ. ਨਿ. ੧.੧) ਅਵਿਜ੍ਜਮਾਨੇਨ ਵਿਜ੍ਜਮਾਨਂ ਦਸ੍ਸੇਤਿ. ਕਤ੍ਥਚਿ ‘‘ਚਕ੍ਖੁਵਿਞ੍ਞਾਣਂ ਸੋਤਵਿਞ੍ਞਾਣ’’ਨ੍ਤਿਆਦੀਸੁ (ਵਿਭ. ੧੨੧) ਵਿਜ੍ਜਮਾਨੇਨ ਵਿਜ੍ਜਮਾਨਂ ਦਸ੍ਸੇਤਿ. ਕਤ੍ਥਚਿ – ‘‘ਖਤ੍ਤਿਯਕੁਮਾਰੋ ਬ੍ਰਾਹ੍ਮਣਕਞ੍ਞਾਯ ਸਦ੍ਧਿਂ ਸਂਵਾਸਂ ਕਪ੍ਪੇਤੀ’’ਤਿਆਦੀਸੁ (ਦੀ. ਨਿ. ੧.੨੭੫) ਅਵਿਜ੍ਜਮਾਨੇਨ ਅਵਿਜ੍ਜਮਾਨਂ ਦਸ੍ਸੇਤਿ. ਇਧ ਪਨ ਵਿਜ੍ਜਮਾਨੇਨ ਅਵਿਜ੍ਜਮਾਨਂ ਦਸ੍ਸੇਤਿ. ‘‘ਛਧਾਤੁਰੋ’’ਤਿ ਹਿ ਸਮਾਸਤ੍ਥੋ ਅਵਿਜ੍ਜਮਾਨੋ ਪੁਗ੍ਗਲਵਿਸਯਤ੍ਤਾ, ਤਸ੍ਸ ਪਦਸ੍ਸ ਅਵਯਵਤ੍ਥੋ ਪਨ ਅਪ੍ਪਧਾਨਤ੍ਥੋ ਵਿਜ੍ਜਮਾਨੋ, ਸੋ ਸਦ੍ਦਕ੍ਕਮੇਨ ਅਪ੍ਪਧਾਨੋਪਿ ਅਤ੍ਥਕ੍ਕਮੇਨ ਪਧਾਨੋਤਿ ਆਹ – ‘‘ਵਿਜ੍ਜਮਾਨੇਨ ਅਵਿਜ੍ਜਮਾਨਂ ਦਸ੍ਸੇਨ੍ਤੋ’’ਤਿ. ਪੁਗ੍ਗਲਾਧਿਟ੍ਠਾਨਾਯੇਤ੍ਥ ਦੇਸਨਾਯ ਕਾਰਣਂ ਦਸ੍ਸੇਤੁਂ, ‘‘ਸਚੇ ਹੀ’’ਤਿਆਦਿ ਵੁਤ੍ਤਂ. ਉਪਟ੍ਠਾਪੇਯ੍ਯਾਤਿ – ‘‘ਧਾਤੁਯੋ’’ਇਚ੍ਚੇਵ ਕੁਲਪੁਤ੍ਤਸ੍ਸ ਚਿਤ੍ਤਂ ਨਿਵੇਸੇਯ੍ਯ ਤਥਾ ਸਞ੍ਜਾਨੇਯ੍ਯ, ਏਵਂ ਧਮ੍ਮਂ ਦੇਸੇਯ੍ਯਾਤਿ ਅਤ੍ਥੋ. ਸਨ੍ਦੇਹਂ ਕਰੇਯ੍ਯਾਤਿ ਅਸਤਿ ਪੁਰਿਸੇ ਕੋ ਕਰੋਤਿ? ਕੋ ਪਟਿਸਂਵੇਦੇਤਿ, ਧਾਤੁਯੋ ਏਵਾਤਿ ਕਿਂ ਨੁ ਖੋ ਇਦਂ, ਕਥਂ ਨੁ ਖੋ ਇਦਨ੍ਤਿ ਸਂਸਯਂ ਉਪ੍ਪਾਦੇਯ੍ਯ? ਸਮ੍ਮੋਹਂ ਆਪਜ੍ਜੇਯ੍ਯਾਤਿ ਚਤੁਰਙ੍ਗਸਮਨ੍ਨਾਗਤੇ ਅਨ੍ਧਕਾਰੇ ਵਤ੍ਤਮਾਨਂ ਵਿਯ ਦੇਸਿਯਮਾਨੇ ਅਤ੍ਥੇ ਸਮ੍ਮੋਹਂ ਆਪਜ੍ਜੇਯ੍ਯ. ਤਥਾਭੂਤੋ ਚ ਦੇਸਨਾਯ ਅਭਾਜਨਭੂਤਤ੍ਤਾ ਦੇਸਨਂ ਸਮ੍ਪਟਿਚ੍ਛਿਤੁਂ ਨ ਸਕ੍ਕੁਣੇਯ੍ਯ. ਏਵਮਾਹਾਤਿ ਏਵਂ ‘‘ਛਧਾਤੁਰੋ’’ਤਿ ਆਹ.
ਯਂ ਤ੍ਵਂ ਪੁਰਿਸੋਤਿ ਸਞ੍ਜਾਨਾਸੀਤਿ ਯਂ ਰੂਪਾਰੂਪਧਮ੍ਮਸਮੂਹਂ ਪਬਨ੍ਧਵਸੇਨ ਪਵਤ੍ਤਮਾਨਂ ਅਧਿਟ੍ਠਾਨਵਿਸੇਸਵਿਸਿਟ੍ਠਂ – ‘‘ਪੁਰਿਸੋ ਸਤ੍ਤੋ ਇਤ੍ਥੀ’’ਤਿਆਦਿਨਾ ਤ੍ਵਂ ਸਞ੍ਜਾਨਾਸਿ, ਸੋ ਛਧਾਤੁਰੋ. ਸਨ੍ਤੇਸੁਪਿ ਛਧਾਤੁਵਿਨਿਮੁਤ੍ਤੇਸੁ ਧਾਤ੍ਵਨ੍ਤਰੇਸੁ ਸੁਖਾਵਗ੍ਗਹਣਤ੍ਥਂ ਤਥਾ ਵੁਤ੍ਤਂ ਤਗ੍ਗਹਣੇਨੇਵ ਚ ਤੇਸਂ ਗਹੇਤਬ੍ਬਤੋ, ਸ੍ਵਾਯਮਤ੍ਥੋ ਹੇਟ੍ਠਾ ਦਸ੍ਸਿਤੋ ਏਵ. ਸੇਸਪਦੇਸੂਤਿ ‘‘ਛਫਸ੍ਸਾਯਤਨੋ’’ਤਿਆਦਿਪਦੇਸੁਪਿ. ਚਤ੍ਤਾਰਿ ਅਧਿਟ੍ਠਾਨਾਨਿ ਚਤਸ੍ਸੋ ਪਤਿਟ੍ਠਾ ਏਤਸ੍ਸਾਤਿ ਚਤੁਰਾਧਿਟ੍ਠਾਨੋ, ਅਧਿਤਿਟ੍ਠਤਿ ਪਤਿਟ੍ਠਹਤਿ ਏਤੇਨਾਤਿ ਅਧਿਟ੍ਠਾਨਂ, ਯੇਸੁ ਪਤਿਟ੍ਠਾਯ ਉਤ੍ਤਮਤ੍ਥਂ ਅਰਹਤ੍ਤਂ ਅਧਿਗਚ੍ਛਤਿ, ਤੇਸਂ ਪਞ੍ਞਾਦੀਨਂ ਏਤਂ ਅਧਿਵਚਨਂ. ਤੇਨਾਹ ‘‘ਸ੍ਵਾਯਂ ਭਿਕ੍ਖੂ’’ਤਿਆਦਿ. ਏਤ੍ਤੋਤਿ ਵਟ੍ਟਤੋ. ਵਿਵਟ੍ਟਿਤ੍ਵਾਤਿ ਵਿਨਿਵਟ੍ਟਿਤ੍ਵਾ ਅਪਸਕ੍ਕਿਤ੍ਵਾ. ਏਤ੍ਤੋਤਿ ਵਾ ਏਤੇਹਿ ਛਧਾਤੁਆਦੀਹਿ. ਏਤ੍ਥ ਹਿ ਨਿਵਿਟ੍ਠਸ੍ਸ ਆਯਤ੍ਤਸ੍ਸ ਉਤ੍ਤਮਾਯ ਸਿਦ੍ਧਿਯਾ ਅਸਮ੍ਭਵੋਤਿ. ਪਤਿਟ੍ਠਿਤਨ੍ਤਿ ਅਰਿਯਮਗ੍ਗਾਧਿਗਮਵਸੇਨ ਸੁਪ੍ਪਤਿਟ੍ਠਿਤਂ. ਏਵਞ੍ਹਿ ਸਬ੍ਬਸੋ ਪਟਿਪਕ੍ਖਸਮੁਚ੍ਛਿਨ੍ਦਨੇਨ ਤਤ੍ਥ ਪਤਿਟ੍ਠਿਤੋ ਹੋਤਿ. ਮਞ੍ਞਸ੍ਸਵਾ ਨਪ੍ਪਵਤ੍ਤਨ੍ਤੀਤਿ ਛਹਿਪਿ ਦ੍ਵਾਰੇਹਿ ਪਵਤ੍ਤਮਾਨਸੋਤਾਯ ਮਗ੍ਗੇਨ ਵਿਸੋਸਿਤਾਯ ਸਬ੍ਬਸੋ ਵਿਗਤਾਯ ਸਬ੍ਬਸੋ ਵਿਚ੍ਛੇਦਪ੍ਪਤ੍ਤਿਯਾ ਨ ਸਨ੍ਦਨ੍ਤਿ. ਤੇਨਾਹ ‘‘ਨਪ੍ਪਵਤ੍ਤਨ੍ਤੀ’’ਤਿ. ਯਸ੍ਮਾ ਮਾਨੇ ਸਬ੍ਬਸੋ ਸਮੁਚ੍ਛਿਨ੍ਨੇ ਅਸਮੁਚ੍ਛਿਨ੍ਨੋ ਅਨੁਪਸਨ੍ਤੋ ਕਿਲੇਸੋ ਨਾਮ ਨਤ੍ਥਿ, ਤਸ੍ਮਾ ਆਹ – ‘‘ਮੁਨਿ ਸਨ੍ਤੋਤਿ ਵੁਚ੍ਚਤੀ’’ਤਿ ਰਾਗਗ੍ਗਿਆਦੀਨਂ ਨਿਬ੍ਬਾਨੇਨ ਨਿਬ੍ਬੁਤੋ.
ਪਞ੍ਞਂ ਨਪ੍ਪਮਜ੍ਜੇਯ੍ਯਾਤਿ, ‘‘ਦਿਵਸਂ ਚਙ੍ਕਮੇਨ ਨਿਸਜ੍ਜਾਯ ਆਵਰਣੀਯੇਹਿ ਧਮ੍ਮੇਹਿ ਚਿਤ੍ਤਂ ਪਰਿਸੋਧੇਤੀ’’ਤਿਆਦਿਨਯਪ੍ਪਵਤ੍ਤਾਯ (ਮ. ਨਿ. ੧.੪੨੩; ੨.੨੪; ੩.੭੫; ਸਂ. ਨਿ. ੪.੧੨੦; ਅ. ਨਿ. ੩.੧੫; ਵਿਭ. ੫੧੯; ਮਹਾਨਿ. ੧੬੧) ਅਪ੍ਪਮਾਦਪ੍ਪਟਿਪਤ੍ਤਿਯਾ ਸਮਾਧਿਵਿਪਸ੍ਸਨਾਪਞ੍ਞਂ ਨਪ੍ਪਮਜ੍ਜੇਯ੍ਯ. ਏਤੇਨ ਪੁਬ੍ਬਭਾਗਿਯਂ ਸਮਥਵਿਪਸ੍ਸਨਾਭਾਵਨਮਾਹ. ਸਚ੍ਚਮਨੁਰਕ੍ਖੇਯ੍ਯਾਤਿ ਸਚ੍ਚਾਨੁਰਕ੍ਖਨਾਪਦੇਸੇਨ ਸੀਲਵਿਸੋਧਨਮਾਹ; ਸਚ੍ਚੇ ਠਿਤੋ ਸਮਾਦਿਨ੍ਨਸੀਲਂ ਅਵਿਕੋਪੇਤ੍ਵਾ ਪਰਿਪੂਰੇਨ੍ਤੋ ਸਮਾਧਿਸਂਵਤ੍ਤਨਿਯਤਂ ਕਰੋਤਿ. ਤੇਨਾਹ ‘‘ਵਚੀਸਚ੍ਚਂ ਰਕ੍ਖੇਯ੍ਯਾ’’ਤਿ. ਕਿਲੇਸਪਰਿਚ੍ਚਾਗਂ ਬ੍ਰੂਹੇਯ੍ਯਾਤਿ ਤਦਙ੍ਗਾਦਿਵਸੇਨ ਕਿਲੇਸਾਨਂ ਪਰਿਚ੍ਚਜਨਵਿਧਿਂ ਵਡ੍ਢੇਯ੍ਯ. ਕਿਲੇਸਵੂਪਸਮਨਂ ਸਿਕ੍ਖੇਯ੍ਯਾਤਿ ਯਥਾ ਤੇ ਕਿਲੇਸਾ ਤਦਙ੍ਗਾਦਿਵਸੇਨ ਪਰਿਚ੍ਚਤ੍ਤਾ ਯਥਾਸਮੁਦਾਚਾਰਪ੍ਪਵਤ੍ਤਿਯਾ ਸਨ੍ਤਾਨੇ ਪਰਿਲ਼ਾਹਂ ਨ ਜਨੇਨ੍ਤਿ; ਏਵਂ ਕਿਲੇਸਾਨਂ ਵੂਪਸਮਨਵਿਧਿਂ ਸਿਕ੍ਖੇਯ੍ਯ ਪਞ੍ਞਾਧਿਟ੍ਠਾਨਾਦੀਨਨ੍ਤਿ ਲੋਕੁਤ੍ਤਰਾਨਂ ਪਞ੍ਞਾਧਿਟ੍ਠਾਨਾਦੀਨਂ. ਅਧਿਗਮਤ੍ਥਾਯਾਤਿ ਪਟਿਲਾਭਤ੍ਥਾਯ.
੩੪੭. ਪੁਬ੍ਬੇ ਵੁਤ੍ਤਾਨਨ੍ਤਿ, ‘‘ਚਤੁਰਾਧਿਟ੍ਠਾਨੋ, ਯਤ੍ਥ ਠਿਤਂ ਮਞ੍ਞਸ੍ਸਵਾ ਨਪ੍ਪਵਤ੍ਤਨ੍ਤੀ’’ਤਿ (ਮ. ਨਿ. ੩.੩੪੩) ਏਵਂ ਪੁਬ੍ਬੇ ਵੁਤ੍ਤਾਨਂ.
੩੪੮. ਵਤ੍ਤਬ੍ਬਂ ਭਵੇਯ੍ਯਾਤਿ ਨਿਦ੍ਦੇਸਵਸੇਨ ਵਤ੍ਤਬ੍ਬਂ ਭਵੇਯ੍ਯ. ਆਦੀਹੀਤਿ ਏਵਮਾਦੀਹਿ. ਕਿਚ੍ਚਂ ਨਤ੍ਥਿ ਕਿਚ੍ਚਾਭਾਵਤੋ. ਉਪ੍ਪਟਿਪਾਟਿਧਾਤੁਕਨ੍ਤਿ ਅਯਥਾਨੁਪੁਬ੍ਬਿਕਂ. ਯਥਾਧਮ੍ਮਵਸੇਨੇਵਾਤਿ ਦੇਸੇਤਬ੍ਬਧਮ੍ਮਾਨਂ ਯਥਾਸਭਾਵੇਨੇਵ. ਸਪ੍ਪਾਯਂ ਧੁਤਙ੍ਗਨ੍ਤਿ ਅਤ੍ਤਨੋ ਕਿਲੇਸਨਿਗ੍ਗਣ੍ਹਨਯੋਗ੍ਗਂ ਧੁਤਙ੍ਗਂ. ਚਿਤ੍ਤਰੁਚਿਤਨ੍ਤਿ ਅਤ੍ਤਨੋ ਚਿਤ੍ਤਪਕਤਿਯਾ ਆਚਰਿਯੇਹਿ ਵਿਰੋਚੇਤਬ੍ਬਂ, ਚਰਿਯਾਨੁਕੂਲਨ੍ਤਿ ਅਤ੍ਥੋ. ਹਤ੍ਥਿਪਦੋਪਮਸੁਤ੍ਤਾਦੀਸੂਤਿ ਆਦਿ-ਸਦ੍ਦੇਨ ਵਿਸੁਦ੍ਧਿਮਗ੍ਗਧਾਤੁਵਿਭਙ੍ਗਾਦਿਂ ਸਙ੍ਗਣ੍ਹਾਤਿ.
੩੫੪. ਅਯਮ੍ਪੇਤ੍ਥਾਤਿ ਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ‘‘ਅਥਾਪਰਂ ਉਪੇਕ੍ਖਾਯੇਵ ਅਵਸਿਸ੍ਸਤੀ’’ਤਿ ਉਪਰਿਦੇਸਨਂ ਸਮ੍ਪਿਣ੍ਡੇਤਿ. ਸੋਪਿ ਹਿ ਪਾਟਿਯੇਕ੍ਕੋ ਅਨੁਸਨ੍ਧੀਤਿ. ਨਨੁ ਚਾਯਂ ਯਥਾਉਦ੍ਦਿਟ੍ਠਾਯ ਵਿਞ੍ਞਾਣਧਾਤੁਯਾ ਨਿਦ੍ਦੇਸੋਪਿ ਭਵਿਸ੍ਸਤੀਤਿ ਯਥਾਨੁਸਨ੍ਧਿਨਯੋ ਵਿਜ੍ਜਤੀਤਿ? ਨ, ਵਿਞ੍ਞਾਣਧਾਤੁਨਿਦ੍ਦੇਸਨਯੇਨ ਦੇਸਨਾਯ ਅਪ੍ਪਵਤ੍ਤਤ੍ਤਾ ਤੇਨਾਹ ‘‘ਹੇਟ੍ਠਤੋ’’ਤਿਆਦਿ. ਯਂ ਵਾ ਪਨਾਤਿਆਦਿਨਾ ਪਨ ਦੇਸਨਾਯ ਸਾਨੁਸਨ੍ਧਿਤਂ ਵਿਭਾਵੇਤਿ. ਨ ਹਿ ਬੁਦ੍ਧਾ ਭਗਵਨ੍ਤੋ ਅਨਨੁਸਨ੍ਧਿਕਂ ਦੇਸਨਂ ਦੇਸੇਨ੍ਤਿ. ਆਗਮਨੀਯਵਿਪਸ੍ਸਨਾਵਸੇਨਾਤਿ ਯਸ੍ਸਾ ਪੁਬ੍ਬੇ ਪਵਤ੍ਤਤ੍ਤਾ ਆਗਮਨੀਯਟ੍ਠਾਨੇ ਠਿਤਾ ਵਿਪਸ੍ਸਨਾ, ਤਸ੍ਸਾ ਵਸੇਨ. ਕਮ੍ਮਕਾਰਕਵਿਞ੍ਞਾਣਨ੍ਤਿ ‘‘ਨੇਤਂ ਮਮ ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’’ਤਿ ਏਵਂ ਵਿਪਸ੍ਸਨਾਕਿਚ੍ਚਕਾਰਕਂ ਵਿਪਸ੍ਸਨਾਸਹਿਤਂ ਵਿਞ੍ਞਾਣਂ. ਵਿਞ੍ਞਾਣਧਾਤੁਵਸੇਨਾਤਿ ਯਥਾਉਦ੍ਦਿਟ੍ਠਾਯ ਵਿਞ੍ਞਾਣਧਾਤੁਯਾ ਭਾਜਨਵਸੇਨ. ਸਤ੍ਥੁ ਕਥਨਤ੍ਥਾਯਾਤਿ ਸਤ੍ਥਾਰਾ ਉਦ੍ਦੇਸਮੇਵ ਕਤ੍ਵਾ ਠਪਿਤਤ੍ਤਾ ਨਿਦ੍ਦੇਸਵਸੇਨ ਕਥਨਤ੍ਥਾਯ. ਅਕਥਿਤਭਾਵੋ ਏਵ ਹਿਸ੍ਸ ਅਵਸਿਟ੍ਠਤਾ ਕਥਨਤ੍ਥਾਯ ਪਟਿਵਿਜ੍ਝਨਤ੍ਥਾਯ ਚ. ਪਟਿਪਕ੍ਖਵਿਗਮੇਨ ਤਸ੍ਸ ਚਿਤ੍ਤਸ੍ਸ ਪਰਿਸੁਦ੍ਧਤਾਤਿ ਆਹ ‘‘ਨਿਰੁਪਕ੍ਕਿਲੇਸ’’ਨ੍ਤਿ. ਉਪਕ੍ਕਿਲੇਸਾਨਂ ਪਨ ਪਹੀਨਭਾਵਤੋ ਪਰਿਯੋਦਾਤਂ. ਸਮੁਦਯਵਸੇਨ ਉਦਯਦਸ੍ਸਨਤ੍ਥਞ੍ਚੇਵ ਪਚ੍ਚਯਨਿਰੋਧਵਸੇਨ ਅਤ੍ਥਙ੍ਗਮਦਸ੍ਸਨਤ੍ਥਞ੍ਚ. ਕਾਰਣਭਾਵੇਨ ਸੁਖਾਯ ਵੇਦਨਾਯ ਹਿਤਨ੍ਤਿ ਸੁਖਵੇਦਨਿਯਂ. ਤੇਨਾਹ ‘‘ਸੁਖਵੇਦਨਾਯ ਪਚ੍ਚਯਭੂਤ’’ਨ੍ਤਿ.
੩੬੦. ਰੂਪਕਮ੍ਮਟ੍ਠਾਨਮ੍ਪਿ ਚਤੁਧਾਤੁਵਵਤ੍ਥਾਨਵਸੇਨ, ਅਰੂਪਕਮ੍ਮਟ੍ਠਾਨਮ੍ਪਿ ਸੁਖਦੁਕ੍ਖਵੇਦਨਾਮੁਖੇਨ ਪਗੁਣਂ ਜਾਤਂ.
ਸਤ੍ਥੁ ਕਥਨਤ੍ਥਂਯੇਵ ਅਵਸਿਸ੍ਸਤੀਤਿ, ‘‘ਕੁਲਪੁਤ੍ਤਸ੍ਸ ਪਟਿਵਿਜ੍ਝਨਤ੍ਥ’’ਨ੍ਤਿ ਵੁਤ੍ਤਮੇਵਤ੍ਥਂ ਨਿਸੇਧੇਤਿ, ਤਸ੍ਮਾ ਵੁਤ੍ਤਮੇਵਤ੍ਥਂ ਸਮਤ੍ਥੇਤੁਂ, ‘‘ਇਮਸ੍ਮਿਂ ਹੀ’’ਤਿਆਦਿ ਵੁਤ੍ਤਂ. ਕੁਲਪੁਤ੍ਤਸ੍ਸ ਰੂਪਾਵਚਰਜ੍ਝਾਨੇਤਿ ਕੁਲਪੁਤ੍ਤੇਨ ਅਧਿਗਤਰੂਪਾਵਚਰਜ੍ਝਾਨੇ. ਤੇਨਾਹ – ‘‘ਭਿਕ੍ਖੁ ਪਗੁਣਂ ਤਵ ਇਦਂ ਰੂਪਾਵਚਰਚਤੁਤ੍ਥਜ੍ਝਾਨ’’ਨ੍ਤਿ. ਯਂ ਕਿਞ੍ਚਿ ਸੁਵਣ੍ਣਤਾਪਨਯੋਗ੍ਯਂ ਅਙ੍ਗਾਰਭਾਜਨਂ ਇਧ ‘‘ਉਕ੍ਕਾ’’ਤਿ ਅਧਿਪ੍ਪੇਤਨ੍ਤਿ ਆਹ ‘‘ਅਙ੍ਗਾਰਕਪਲ੍ਲ’’ਨ੍ਤਿ. ਸਜ੍ਜੇਯ੍ਯਾਤਿ ਯਥਾ ਤਤ੍ਥ ਪਕ੍ਖਿਤ੍ਤਸੁਵਣ੍ਣਞ੍ਚ ਤਪ੍ਪਤਿ, ਏਵਂ ਪਟਿਯਾਦਿਯੇਯ੍ਯ. ਨੀਹਟਦੋਸਨ੍ਤਿ ਵਿਗਤੀਭੂਤਕਾਲ਼ਕਂ. ਅਪਨੀਤਕਸਾਵਨ੍ਤਿ ਅਪਗਤਸੁਖੁਮਕਾਲ਼ਕਂ.
ਅਰਿਯਮਗ੍ਗੇ ਪਤਿਟ੍ਠਾਪੇਤੁਕਾਮੇਨ ਨਾਮ ਸਬ੍ਬਸ੍ਮਿਮ੍ਪਿ ਲੋਕਿਯਧਮ੍ਮੇ ਵਿਰਜ੍ਜਨਤ੍ਥਾਯ ਧਮ੍ਮੋ ਕਥੇਤਬ੍ਬੋਤਿ ਅਧਿਪ੍ਪਾਯੇਨ, ‘‘ਕਸ੍ਮਾ ਪਨਾ’’ਤਿਆਦਿਨਾ ਚੋਦਨਾ ਕਤਾ. ਵਿਨੇਯ੍ਯਦਮਨਕੁਸਲੇਨ ਭਗਵਤਾ ਵੇਨੇਯ੍ਯਜ੍ਝਾਸਯਵਸੇਨ ਤਾਵ ਚਤੁਤ੍ਥਜ੍ਝਾਨੁਪੇਕ੍ਖਾਯ ਵਣ੍ਣੋ ਕਥਿਤੋਤਿ ਤਸ੍ਸ ਪਰਿਹਾਰਂ ਵਦਨ੍ਤੋ, ‘‘ਕੁਲਪੁਤ੍ਤਸ੍ਸਾ’’ਤਿਆਦਿਮਾਹ.
੩੬੧. ਤਦਨੁਧਮ੍ਮਨ੍ਤਿ ਤਸ੍ਸ ਅਰੂਪਾਵਚਰਸ੍ਸ ਕੁਸਲਸ੍ਸ ਅਨੁਰੂਪਧਮ੍ਮਂ, ਯਾਯ ਪਟਿਪਦਾਯ ਤਸ੍ਸ ਅਧਿਗਮੋ ਹੋਤਿ, ਤਸ੍ਸ ਪੁਬ੍ਬਭਾਗਪਟਿਪਦਨ੍ਤਿ ਅਤ੍ਥੋ. ਤੇਨਾਹ ‘‘ਰੂਪਾਵਚਰਜ੍ਝਾਨ’’ਨ੍ਤਿ. ਤਗ੍ਗਹਣਾਤਿ ਤਸ੍ਸ ਗਹਣੇਨ ਤਸ੍ਸਾ ਪਟਿਪਤ੍ਤਿਯਾ ਪਟਿਪਜ੍ਜਮਾਨੇਨ. ਇਤੋ ਉਤ੍ਤਰਿਨ੍ਤਿ ‘‘ਵਿਞ੍ਞਾਣਞ੍ਚਾਯਤਨ’’ਨ੍ਤਿਆਦੀਸੁ.
੩੬੨. ਤਸ੍ਸੇਵਾਤਿ ਅਰੂਪਾਵਚਰਜ੍ਝਾਨਸ੍ਸ. ਏਤਂ ਪਨ ਸਵਿਪਾਕਂ ਅਰੂਪਾਵਚਰਜ੍ਝਾਨਂ ਸਮੇਚ੍ਚ ਸਮ੍ਭੁਯ੍ਯ ਪਚ੍ਚਯੇਹਿ ਕਤਤ੍ਤਾ ਸਙ੍ਖਤਂ. ਪਕਪ੍ਪਿਤਨ੍ਤਿ ਪਚ੍ਚਯਵਸੇਨ ਸਵਿਹਿਤਂ. ਆਯੂਹਿਤਨ੍ਤਿ ਸਮ੍ਪਿਣ੍ਡਿਤਂ. ਕਰੋਨ੍ਤੇਨ ਕਰੀਯਤੀਤਿ ਪਟਿਪਜ੍ਜਨਕੇਨ ਪਟਿਪਜ੍ਜੀਯਤਿ ਸਙ੍ਖਰੀਯਤਿ. ਨਿਬ੍ਬਾਨਂ ਵਿਯ ਨ ਨਿਚ੍ਚਂ ਨ ਸਸ੍ਸਤਂ. ਅਥ ਖੋ ਖਣੇ ਖਣੇ ਭਿਜ੍ਜਨਸਭਾਵਤਾਯ ਤਾਵਕਾਲਿਕਂ. ਤਤੋ ਏਵ ਚਵਨਾਦਿਸਭਾਵਨ੍ਤਿ ਸਬ੍ਬਮੇਤਂ ਰੂਪਾਵਚਰਧਮ੍ਮੇਸੁ ਆਦੀਨਵਵਿਭਾਵਨਂ. ਦੁਕ੍ਖੇ ਪਤਿਟ੍ਠਿਤਨ੍ਤਿ ਸਙ੍ਖਾਰਦੁਕ੍ਖੇ ਪਤਿਟ੍ਠਿਤਂ. ਅਤਾਣਨ੍ਤਿ ਚਵਨਸਭਾਵਾਦਿਤਾਯ ਤਾਣਰਹਿਤਂ. ਅਲੇਣਨ੍ਤਿ ਤਤੋ ਅਰਕ੍ਖਤ੍ਤਾ ਲੀਯਨਟ੍ਠਾਨਰਹਿਤਂ. ਅਸਰਣਨ੍ਤਿ ਅਪ੍ਪਟਿਸਰਣਂ. ਅਸਰਣੀਭੂਤਨ੍ਤਿ ਸਬ੍ਬਕਾਲਮ੍ਪਿ ਅਪ੍ਪਟਿਸਰਣਂ.
ਸਮਤ੍ਤਪਤ੍ਤਵਿਸੇ ਖਨ੍ਧਾਦੀਸੁ ਗਹਿਤੇ ਦੁਤ੍ਤਿਕਿਚ੍ਛਾ ਸਿਯਾਤਿ, ‘‘ਖਨ੍ਧਂ ਵਾ ਸੀਸਂ ਵਾ ਗਹੇਤੁਂ ਅਦਤ੍ਵਾ’’ਤਿ ਵੁਤ੍ਤਂ. ਏਵਮੇਵਾਤਿ ਏਤ੍ਥਾਯਂ ਉਪਮਾਸਂਸਨ੍ਦਨਾ – ਛੇਕੋ ਭਿਸਕ੍ਕੋ ਵਿਯ ਸਮ੍ਮਾਸਮ੍ਬੁਦ੍ਧੋ. ਵਿਸਵਿਕਾਰੋ ਵਿਯ ਕਿਲੇਸਦੁਕ੍ਖਾਨੁਬਨ੍ਧੋ, ਭਿਸਕ੍ਕਸ੍ਸ ਵਿਸਂ ਠਾਨਤੋ ਚਾਵੇਤ੍ਵਾ ਉਪਰਿ ਆਰੋਪਨਂ ਵਿਯ ਭਗਵਤੋ ਦੇਸਨਾਨੁਭਾਵੇਨ ਕੁਲਪੁਤ੍ਤਸ੍ਸ ਕਾਮਭਵੇ ਨਿਕਨ੍ਤਿਂ ਪਰਿਯਾਦਾਯ ਅਰੂਪਜ੍ਝਾਨੇ ਭਵਨਂ. ਭਿਸਕ੍ਕਸ੍ਸ ਵਿਸਂ ਓਤਾਰੇਤ੍ਵਾ ਪਥਵਿਯਂ ਪਾਤਨਂ ਵਿਯ ਕੁਲਪੁਤ੍ਤਸ੍ਸ ਓਰਮ੍ਭਾਗਿਯਕਿਲੇਸਦੁਕ੍ਖਾਪਨਯਨਂ.
ਅਸਮ੍ਪਤ੍ਤਸ੍ਸਾਤਿ ਅਰੂਪਾਵਚਰਜ੍ਝਾਨਂ ਅਨਧਿਗਤਸ੍ਸ. ਅਪ੍ਪਟਿਲਦ੍ਧਸ੍ਸੇਵਾਤਿ ਤਸ੍ਸ ਵੇਵਚਨਂ. ਸਬ੍ਬਮੇਤਨ੍ਤਿ ‘‘ਅਨਿਚ੍ਚਂ ਅਧੁਵ’’ਨ੍ਤਿਆਦਿਨਾ ਵਿਤ੍ਥਾਰਤੋ ਵੁਤ੍ਤਂ ਸਬ੍ਬਮੇਤਂ ਆਦੀਨਵਂ. ਏਕਪਦੇਨੇਵ ‘‘ਸਙ੍ਖਤਮੇਤ’’ਨ੍ਤਿ ਕਥੇਸਿ ਸਙ੍ਖਤਪਦੇਨੇਵ ਤਸ੍ਸ ਅਤ੍ਥਸ੍ਸ ਅਨਵਸੇਸਤੋ ਪਰਿਯਾਦਿਨ੍ਨਤ੍ਤਾ.
ਨਾਯੂਹਤੀਤਿ ਭਵਕਾਰਣਚੇਤਨਾਵਸੇਨ ਬ੍ਯਾਪਾਰਂ ਨ ਸਮੂਹੇਤਿ ਨ ਸਮ੍ਪਿਣ੍ਡੇਤਿ. ਤੇਨਾਹ – ‘‘ਨ ਰਾਸਿਂ ਕਰੋਤੀ’’ਤਿ. ਅਭਿਸਙ੍ਖਰਣਂ ਨਾਮ ਚੇਤਨਾਬ੍ਯਾਪਾਰੋਤਿ ਆਹ – ‘‘ਨ ਅਭਿਸਞ੍ਚੇਤਯਤੀ’’ਤਿ. ਤਂ ਪਨ ਫਲੁਪ੍ਪਾਦਨਸਮਤ੍ਥਤਾਯ ਫਲੇਨ ਕਪ੍ਪਨਨ੍ਤਿ ਆਹ ‘‘ਨ ਕਪ੍ਪੇਤੀ’’ਤਿ. ਸਚੇ ਅਭਿਸਙ੍ਖਾਰਚੇਤਨਾ ਉਲ਼ਾਰਾ, ਫਲਮਹਤ੍ਤਸਙ੍ਖਾਤਾਯ ਵੁਡ੍ਢਿਯਾ ਹੋਤਿ, ਅਨੁਲ਼ਾਰਾ ਚ ਅਵੁਡ੍ਢਿਯਾਤਿ ਆਹ – ‘‘ਵੁਡ੍ਢਿਯਾ ਵਾ ਪਰਿਹਾਨਿਯਾ ਵਾ’’ਤਿ. ਬੁਦ੍ਧਵਿਸਯੇ ਠਤ੍ਵਾਤਿ ਭਗਵਾ ਅਤ੍ਤਨੋ ਬੁਦ੍ਧਸੁਬੁਦ੍ਧਤਾਯ ਸੀਹਸਮਾਨਵੁਤ੍ਤਿਤਾਯ ਚ ਦੇਸਨਂ ਉਕ੍ਕਂਸਤੋ ਸਾਵਕੇਹਿ ਪਤ੍ਤਬ੍ਬਂ ਵਿਸੇਸਂ ਅਨਵਸੇਸੇਨ੍ਤੋ ਤਥਾ ਵਦਤਿ, ਨ ਸਾਵਕਵਿਸਯਂ ਅਤਿਕ੍ਕਮਿਤ੍ਵਾ ਅਤ੍ਤਨੋ ਬੁਦ੍ਧਵਿਸਯਮੇਵ ਦੇਸੇਨ੍ਤੋ. ਤੇਨਾਹ – ‘‘ਅਰਹਤ੍ਤਨਿਕੂਟਂ ਗਣ੍ਹੀ’’ਤਿ. ਯਦਿ ਕੁਲਪੁਤ੍ਤੋ ਅਤ੍ਤਨੋ…ਪੇ… ਪਟਿਵਿਜ੍ਝਿ, ਅਥ ਕਸ੍ਮਾ ਭਗਵਾ ਦੇਸਨਾਯ ਅਰਹਤ੍ਤਨਿਕੂਟਂ ਗਣ੍ਹੀਤਿ ਆਹ ‘‘ਯਥਾ ਨਾਮਾ’’ਤਿਆਦਿ.
ਇਤੋ ਪੁਬ੍ਬੇਤਿ ਇਤੋ ਅਨਾਗਾਮਿਫਲਾਧਿਗਮਤੋ ਉਤ੍ਤਰਿ ਉਪਰਿ. ਅਸ੍ਸਾਤਿ ਕੁਲਪੁਤ੍ਤਸ੍ਸ. ਕਥੇਨ੍ਤਸ੍ਸ ਭਗਵਤੋ ਧਮ੍ਮੇ ਨੇਵ ਕਙ੍ਖਾ ਨ ਵਿਮਤਿ ਪਠਮਮਗ੍ਗੇਨੇਵ ਕਙ੍ਖਾਯ ਸਮੁਚ੍ਛਿਨ੍ਨਤ੍ਤਾ. ਏਕਚ੍ਚੇਸੁ ਠਾਨੇਸੂਤਿ ਤਥਾ ਵਿਨੇਯ੍ਯਠਾਨੇਸੁ. ਤਥਾ ਹਿ ਅਯਮ੍ਪਿ ਕੁਲਪੁਤ੍ਤੋ ਅਨਾਗਾਮਿਫਲਂ ਪਤ੍ਵਾ ਭਗਵਨ੍ਤਂ ਸਞ੍ਜਾਨਿ. ਤੇਨ ਵੁਤ੍ਤਂ ‘‘ਯਤੋ ਅਨੇਨਾ’’ਤਿਆਦਿ.
੩੬੩. ਅਨਜ੍ਝੋਸਿਤਾਤਿ ਅਨਜ੍ਝੋਸਨੀਯਾਤਿ ਅਯਮਤ੍ਥੋਤਿ ਆਹ – ‘‘ਗਿਲਿਤ੍ਵਾ ਪਰਿਨਿਟ੍ਠਾਪੇਤ੍ਵਾ ਗਹੇਤੁਂ ਨ ਯੁਤ੍ਤਾ’’ਤਿ.
੩੬੪. ਰਾਗੋਵ ਅਨੁਸਯੋ ਰਾਗਾਨੁਸਯੋ, ਸੋ ਚ ਪਚ੍ਚਯਸਮਵਾਯੇ ਉਪ੍ਪਜ੍ਜਨਾਰਹੋਤਿ ਵਤ੍ਤਬ੍ਬਤਂ ਲਭਤੀਤਿ ਵੁਤ੍ਤਂ – ‘‘ਸੁਖਵੇਦਨਂ ਆਰਬ੍ਭ ਰਾਗਾਨੁਸਯੋ ਉਪ੍ਪਜ੍ਜੇਯ੍ਯਾ’’ਤਿ. ਨ ਪਨ ਤਸ੍ਸ ਉਪ੍ਪਾਦਨਂ ਅਤ੍ਥਿ ਖਣਤ੍ਤਯਸਮਾਯੋਗਾਸਮ੍ਭਵਤੋ. ਏਸ ਨਯੋ ਸੇਸੇਸੁਪਿ. ਇਤਰਨ੍ਤਿ ਅਦੁਕ੍ਖਮਸੁਖਵੇਦਨਂ. ਵਿਸਂਯੁਤ੍ਤੋਤਿ ਕੇਨਚਿ ਸਞ੍ਞੋਜਨੇਨ ਅਸਂਯੁਤ੍ਤਤਾਯ ਏਵ ਨਿਯਤਵਿਪ੍ਪਯੁਤ੍ਤੋ. ਕਾਯਸ੍ਸ ਕੋਟਿ ਪਰਮੋ ਅਨ੍ਤੋ ਏਤਸ੍ਸਾਤਿ ਕਾਯਕੋਟਿਕਂ. ਦੁਤਿਯਪਦੇਤਿ ‘‘ਜੀਵਿਤਪਰਿਯਨ੍ਤਿਕ’’ਨ੍ਤਿ ਇਮਸ੍ਮਿਂ ਪਦੇ. ਵਿਸੇਵਨਸ੍ਸਾਤਿ ਉਪਾਦਾਨਸ੍ਸ. ਸੀਤੀਭਵਿਸ੍ਸਨ੍ਤੀਤਿ ਪਦਸ੍ਸ ‘‘ਨਿਰੁਜ੍ਝਿਸ੍ਸਨ੍ਤੀ’’ਤਿ ਅਤ੍ਥੋ ਵੁਤ੍ਤੋ, ਕਥਂ ਪਨ ਵੇਦਯਿਤਾਨਂ ਦ੍ਵਾਦਸਸੁ ਆਯਤਨੇਸੁ ਨਿਰੁਜ੍ਝਨਂ ਸੀਤਿਭਾਵਪ੍ਪਤ੍ਤੀਤਿ ਚੋਦਨਂ ਸਨ੍ਧਾਯਾਹ – ‘‘ਕਿਲੇਸਾ ਹੀ’’ਤਿਆਦਿ. ਸਮੁਦਯਪਞ੍ਹੇਨਾਤਿ ਮਹਾਸਤਿਪਟ੍ਠਾਨੇ (ਦੀ. ਨਿ. ੨.੪੦੦; ਮ. ਨਿ. ੧.੧੩੩) ਸਮੁਦਯਸਚ੍ਚਨਿਰੋਧਪਞ੍ਹੇਨ. ਨਨੁ ਸਬ੍ਬਸੋ ਕਿਲੇਸਪਰਿਲ਼ਾਹਵਿਗਮੇ ਸੀਤਿਭਾਵੋ ਨਾਮ ਵੇਦਨਾਨਿਰੋਧਮਤ੍ਤੇਨ ਅਧਿਪ੍ਪੇਤੋ; ਤੇਨ ਇਧ ਵੇਦਯਿਤਾਨਿ ਵੁਤ੍ਤਾਨਿ, ਨ ਕਿਲੇਸਾਤਿ ਵੇਦਯਿਤਾਨਂ ਅਚ੍ਚਨ੍ਤਨਿਰੋਧਸਙ੍ਖਾਤੋ ਸੀਤਿਭਾਵੋਪਿ ਕਿਲੇਸਸਮੁਚ੍ਛੇਦੇਨੇਵਾਤਿ ਆਹ ‘‘ਵੇਦਯਿਤਾਨਿਪੀ’’ਤਿਆਦਿ.
੩੬੫. ਇਦਂ ਓਪਮ੍ਮਸਂਸਨ੍ਦਨਨ੍ਤਿ ਏਤ੍ਥ ਸਞ੍ਞੋਜਨਾ ਦੀਪਸਿਖਾ ਵਿਯ, ਅਧਿਟ੍ਠਾਨਕਪਲ੍ਲਿਕਾ ਵਿਯ ਵੇਦਨਾਯ ਨਿਸ੍ਸਯਭੂਤਾ ਚਤ੍ਤਾਰੋ ਖਨ੍ਧਾ, ਤੇਲਂ ਵਿਯ ਕਿਲੇਸਾ, ਵਟ੍ਟਿ ਵਿਯ ਕਮ੍ਮਵਟ੍ਟਂ, ਉਪਹਰਣਕਪੁਰਿਸੋ ਵਿਯ ਵਟ੍ਟਗਾਮੀ ਪੁਥੁਜ੍ਜਨੋ, ਤਸ੍ਸ ਸੀਸਚ੍ਛੇਦਕਪੁਰਿਸੋ ਵਿਯ ਅਰਹਤ੍ਤਮਗ੍ਗੋ ਸਨ੍ਤਾਨਸ੍ਸ ਸਮੁਚ੍ਛੇਦਕਰਣਤੋ, ਅਨਾਹਾਰਾਯ ਦੀਪਸਿਖਾਯ ਨਿਬ੍ਬਾਯਨਂ ਵਿਯ ਕਮ੍ਮਕਿਲੇਸਾਨਂ ਅਨਨ੍ਤਰਪਚ੍ਚਯਤੋ ਅਨਾਹਾਰਾਯ ਵੇਦਨਾਯ ਅਨੁਪਾਦਿਸੇਸਵਸੇਨ ਨਿਬ੍ਬਾਯਨਂ.
ਆਦਿਮ੍ਹਿ ਸਮਾਧਿਵਿਪਸ੍ਸਨਾਪਞ੍ਞਾਹੀਤਿ ਪੁਬ੍ਬਭਾਗਪਟਿਪਦਾਭੂਤਾ ਤਯਾ ਪਗੁਣਸਮਾਧਿਤੋ ਅਰਹਤ੍ਤਸ੍ਸ ਪਦਟ੍ਠਾਨਭੂਤਵਿਪਸ੍ਸਨਾਪਞ੍ਞਾਤੋ ਚ. ਉਤ੍ਤਰਿਤਰਾਤਿ ਵਿਸਿਟ੍ਠਤਰਾ. ਏਵਂ ਸਮਨ੍ਨਾਗਤੋਤਿ ਏਤ੍ਥ ਏਵਂ-ਸਦ੍ਦੋ ਇਦਂਸਦ੍ਦਤ੍ਥਵਚਨੋਤਿ ਆਹ – ‘‘ਇਮਿਨਾ ਉਤ੍ਤਮੇਨ ਅਰਹਤ੍ਤਫਲਪਞ੍ਞਾਧਿਟ੍ਠਾਨੇਨਾ’’ਤਿ. ਸਬ੍ਬਂ ਵਟ੍ਟਦੁਕ੍ਖਂ ਖੇਪੇਤੀਤਿ ਸਬ੍ਬਦੁਕ੍ਖਕ੍ਖਯੋ, ਅਗ੍ਗਮਗ੍ਗੋ, ਤਂਪਰਿਯਾਪਨ੍ਨਤਾਯ ਤਤ੍ਥ ਞਾਣਨ੍ਤਿ ਆਹ – ‘‘ਸਬ੍ਬਦੁਕ੍ਖਕ੍ਖਯੇ ਞਾਣਂ ਨਾਮ ਅਰਹਤ੍ਤਮਗ੍ਗੇ ਞਾਣ’’ਨ੍ਤਿ. ਅਰਹਤ੍ਤਫਲੇ ਞਾਣਂ ਅਧਿਪ੍ਪੇਤਂ ਵੁਤ੍ਤਨਯੇਨ ਸਬ੍ਬਦੁਕ੍ਖਕ੍ਖਯੇ ਸਨ੍ਤੇ ਤਨ੍ਨਿਮਿਤ੍ਤਂ ਵਾ ਉਪ੍ਪਨ੍ਨਞਾਣਨ੍ਤਿ ਕਤ੍ਵਾ. ਤਸ੍ਸਾਤਿ, ‘‘ਏਵਂ ਸਮਨ੍ਨਾਗਤੋ ਭਿਕ੍ਖੁ ਇਮਿਨਾ ਪਰਮੇਨ ਪਞ੍ਞਾਧਿਟ੍ਠਾਨੇਨ ਸਮਨ੍ਨਾਗਤੋ ਹੋਤੀ’’ਤਿ ਵੁਤ੍ਤਭਿਕ੍ਖੁਨੋ.
੩੬੬. ਹੀਤਿ ਯਸ੍ਮਾ. ਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿ, ਤਸ੍ਮਾ ਸਬ੍ਬਦੁਕ੍ਖਕ੍ਖਯੇ ਞਾਣਨ੍ਤਿ ਅਰਹਤ੍ਤਫਲਞਾਣਂ ਅਧਿਪ੍ਪੇਤਂ. ਸਚ੍ਚਨ੍ਤਿ ਪਰਮਤ੍ਥਸਚ੍ਚਂ ਨਿਬ੍ਬਾਨਂ, ਨ ਮਗ੍ਗਸਚ੍ਚਂ. ਕਾਮਂ ਅਰਹਤ੍ਤਫਲਵਿਮੁਤ੍ਤਿ ਪਟਿਪਕ੍ਖੇਹਿ ਅਕੋਪਨੀਯਤਾਯ ਅਕੁਪ੍ਪਾ, ‘‘ਸਚ੍ਚੇ ਠਿਤਾ’’ਤਿ ਪਨ ਵਚਨਤੋ, ‘‘ਅਕੁਪ੍ਪਾਰਮ੍ਮਣਕਰਣੇਨ ਅਕੁਪ੍ਪਾਤਿ ਵੁਤ੍ਤਾ’’ਤਿ ਆਹ. ਵਿਤਥਨ੍ਤਿ ਨਟ੍ਠਂ, ਜਰਾਯ ਮਰਣੇਨ ਚ ਵਿਪਰਿਣਾਮੇਤਬ੍ਬਤਾਯ ਯਾਦਿਸਂ ਉਪ੍ਪਾਦਾਵਤ੍ਥਾਯ ਜਾਤਂ, ਤਤੋ ਅਞ੍ਞਾਦਿਸਨ੍ਤਿ ਅਤ੍ਥੋ. ਤਥਾ ਹਿ ਤਂ ਜਰਾਮਰਣੇਹਿ ਪਰਿਮੁਸਿਤਬ੍ਬਰੂਪਤਾਯ ‘‘ਮੁਸਾ’’ਤਿ ਵੁਤ੍ਤਂ. ਤੇਨਾਹ – ‘‘ਮੋਸਧਮ੍ਮਨ੍ਤਿ ਨਸ੍ਸਨਸਭਾਵ’’ਨ੍ਤਿ. ਤਂ ਅਵਿਤਥਨ੍ਤਿ ਤਂ ਵੁਤ੍ਤਨਯੇਨ ਅਵਿਤਥਂ ਨਾਮ, ਤਂ ਸਭਾਵੋ ਸਬ੍ਬਕਾਲਂ ਤੇਨੇਵ ਲਬ੍ਭਨਤੋ. ਸਮਥਵਿਪਸ੍ਸਨਾਵਸੇਨ ਵਚੀਸਚ੍ਚਤੋਤਿ ਸਮਥਵਿਪਸ੍ਸਨਾਵਸੇਨ ਯਂ ਵਿਸੁਦ੍ਧਿਮਤ੍ਤਂ ਵਚੀਸਚ੍ਚਂ, ਤਤੋ. ਦੁਕ੍ਖਸਚ੍ਚਸਮੁਦਯਸਚ੍ਚੇਹਿ ਤਚ੍ਛਵਿਪਲ੍ਲਾਸਭੂਤਸਭਾਵੇਹਿ. ਇਤਿ ਨੇਸਂ ਯਥਾਸਕਂ ਸਭਾਵੇਨ ਅਵਿਤਥਭਾਵੇ ਅਮੋਸਧਮ੍ਮਤਾਯ ਤੇਹਿਪਿ ਅਵਿਤਥਭਾਵਾ ਪਰਮਤ੍ਥਸਚ੍ਚਂ ਨਿਬ੍ਬਾਨਮੇਵ ਉਤ੍ਤਰਿਤਰਂ. ਤਸ੍ਮਾਤਿ ਨਿਬ੍ਬਾਨਸ੍ਸੇਵ ਉਤ੍ਤਰਿਤਰਭਾਵਤੋ.
੩੬੭. ਉਪਧੀਯਤਿ ਏਤ੍ਥ ਦੁਕ੍ਖਨ੍ਤਿ ਉਪਧੀ, ਖਨ੍ਧਾ ਕਾਮਗੁਣਾ ਚ. ਉਪਦਹਨ੍ਤਿ ਦੁਕ੍ਖਨ੍ਤਿ ਉਪਧੀ, ਕਿਲੇਸਾਭਿਸਙ੍ਖਾਰਾ. ਪਰਿਪੂਰਾ ਗਹਿਤਾ ਪਰਾਮਟ੍ਠਾਤਿ ਪਰਿਯਤ੍ਤਭਾਵੇਨ ਤਣ੍ਹਾਯ ਗਹਿਤਾ ਦਿਟ੍ਠਿਯਾ ਪਰਾਮਟ੍ਠਾ. ਸਮਥਵਿਪਸ੍ਸਨਾਵਸੇਨ ਕਿਲੇਸਪਰਿਚ੍ਚਾਗਤੋਤਿ ਵਿਕ੍ਖਮ੍ਭਨਵਸੇਨ ਤਦਙ੍ਗਪ੍ਪਹਾਨਵਸੇਨ ਚ ਕਿਲੇਸਾਨਂ ਪਰਿਚ੍ਚਜਨਤੋ. ਉਤ੍ਤਰਿਤਰੋ ਵਿਸਿਟ੍ਠਤਰਸ੍ਸ ਪਹਾਨਪ੍ਪਕਾਰਸ੍ਸ ਅਭਾਵਤੋ.
੩੬੮. ਆਘਾਤਕਰਣਵਸੇਨਾਤਿ ਚੇਤਸਿਕਾਘਾਤਸ੍ਸ ਉਪ੍ਪਜ੍ਜਨਵਸੇਨ. ਬ੍ਯਾਪਜ੍ਜਨਵਸੇਨਾਤਿ ਚਿਤ੍ਤਸ੍ਸ ਵਿਪਤ੍ਤਿਭਾਵਵਸੇਨ. ਸਮ੍ਪਦੁਸ੍ਸਨਵਸੇਨਾਤਿ ਸਬ੍ਬਸੋ ਦੁਸ੍ਸਨਵਸੇਨ. ਤੀਹਿ ਪਦੇਹਿ ਯਦਿ ਅਰਹਤ੍ਤਮਗ੍ਗੇਨ ਕਿਲੇਸਾਨਂ ਪਰਿਚ੍ਚਾਗੋ ਚਾਗਾਧਿਟ੍ਠਾਨਂ, ਅਰਹਤ੍ਤਮਗ੍ਗੇਨੇਵ ਨੇਸਂ ਵੂਪਸਮੋ ਉਪਸਮਾਧਿਟ੍ਠਾਨਂ ਹੋਤੀਤਿ ਦਸ੍ਸੇਤਿ. ਏਤ੍ਥ ਵਿਸੇਸੇਨ ਪਰਿਚ੍ਚਾਗੋ ਸਮ੍ਪਜਹਨਂ ਅਨੁਪ੍ਪਤ੍ਤਿਧਮ੍ਮਤਾਪਾਦਨਂ ਚਾਗੋ, ਤਥਾ ਪਨ ਪਰਿਚ੍ਚਾਗੇਨ ਯੋ ਸੋ ਨੇਸਂ ਤਦਾ ਵੂਪਸਨ੍ਤਤਾਯ ਅਭਾਵੋ, ਅਯਂ ਉਪਸਮੋਤਿ ਅਯਮੇਤੇਸਂ ਵਿਸੇਸੋ.
੩੬੯. ਮਞ੍ਞਿਤਨ੍ਤਿ ਮਞ੍ਞਨਾ, ‘‘ਏਤਂ ਮਮਾ’’ਤਿਆਦਿਨਾ ਕਪ੍ਪਨਾਤਿ ਅਤ੍ਥੋ. ਅਵਿਜ੍ਜਾਵਿਬਨ੍ਧਨਤਣ੍ਹਾਗਾਹਾਦੀਨਂ ਸਾਧਾਰਣਭਾਵਤੋ ਅਯਮਹਨ੍ਤਿ ਏਤ੍ਥ ਅਹਨ੍ਤਿ ਦਿਟ੍ਠਿਮਞ੍ਞਨਾਦਸ੍ਸਨਂ, ਸਾ ਪਨ ਦਿਟ੍ਠਿ ਮਾਨਮਞ੍ਞਨਾਯ ਅਤ੍ਤਨਿਯਗਾਹਵਸੇਨ ਹੋਤੀਤਿ ਸ੍ਵੇਵ ‘‘ਅਯ’’ਨ੍ਤਿ ਇਮਿਨਾ ਗਹਿਤੋਤਿ ਆਹ – ‘‘ਅਯਮਹਨ੍ਤਿ ਏਕਂ ਤਣ੍ਹਾਮਞ੍ਞਿਤਮੇਵ ਵਟ੍ਟਤੀ’’ਤਿ. ਆਬਾਧਟ੍ਠੇਨਾਤਿ ਪਟਿਪੀਲ਼ਨਟ੍ਠੇਨ. ਮਞ੍ਞਨਾਵਸੇਨ ਹਿ ਸਤ੍ਤਾਨਂ ਤਥਾ ਹੋਤਿ. ਅਨ੍ਤੋਦੋਸਟ੍ਠੇਨਾਤਿ ਅਬ੍ਭਨ੍ਤਰਦੁਟ੍ਠਭਾਵੇਨ. ਮਞ੍ਞਨਾਦੂਸਿਤਤ੍ਤਾ ਹਿ ਸਤ੍ਤਾਨਂ ਅਤ੍ਤਭਾਵੋ ਦੁਕ੍ਖਤਾਮੂਲਾਯਤ੍ਤੋ, ਕਿਲੇਸਾਸੁਚਿਪਗ੍ਘਰਣਤੋ ਉਪ੍ਪਾਦਨਿਰੋਧਭਙ੍ਗੇਹਿ ਉਦ੍ਧਮੁਦ੍ਧਂ ਪਕ੍ਕਪਭਿਨ੍ਨੋ ਹੋਤੀਤਿ ਫਲੂਪਚਾਰੇਨ ‘‘ਮਞ੍ਞਿਤਂ ਗਣ੍ਡੋ’’ਤਿ ਵੁਤ੍ਤੋ. ਅਨੁਪਵਿਟ੍ਠਟ੍ਠੇਨਾਤਿ ਅਨੁਪਵਿਸਿਤ੍ਵਾ ਹਦਯਮਾਹਚ੍ਚ ਅਧਿਟ੍ਠਾਨੇਨ. ਮਞ੍ਞਿਤਞ੍ਹਿ ਪੀਲ਼ਾਜਨਨਤੋ ਅਨ੍ਤੋਤੁਦਨਤੋ ਦੁਰੁਦ੍ਧਰਣਤੋ ਸਲ੍ਲਂ. ਖੀਣਾਸਵਮੁਨਿ ਸਬ੍ਬਸੋ ਕਿਲੇਸਾਨਂ ਸਨ੍ਤਤ੍ਤਾ, ਤਤੋ ਏਵ ਪਰਿਲ਼ਾਹਾਨਂ ਪਰਿਨਿਬ੍ਬੁਤਤ੍ਤਾ ਵੂਪਸਨ੍ਤਤ੍ਤਾ ਸਨ੍ਤੋ ਉਪਸਨ੍ਤੋ ਨਿਬ੍ਬੁਤੋਤਿ ਵੁਚ੍ਚਤਿ. ਯਤ੍ਥ ਠਿਤਨ੍ਤਿ ਯਸ੍ਮਿਂ ਅਸੇਕ੍ਖਭੂਮਿਯਂ ਠਿਤਂ. ਯਦਿ ਭਗਵਾ ਅਤ੍ਤਨੋ ਦੇਸਨਾਞਾਣਾਨੁਰੂਪਂ ਦੇਸਨਂ ਪਵਤ੍ਤਾਪੇਯ੍ਯ, ਮਹਾਪਥਵਿਂ ਪਤ੍ਥਰਨ੍ਤਸ੍ਸ ਵਿਯ, ਆਕਾਸਂ ਪਸਾਰੇਨ੍ਤਸ੍ਸ ਵਿਯ, ਅਨਨ੍ਤਾਪਰਿਮੇਯ੍ਯਲੋਕਧਾਤੁਯੋ ਪਟਿਚ੍ਚ ਤੇਸਂ ਠਿਤਾਕਾਰਂ ਅਨੁਪ੍ਪੂਰਂ ਵਿਚਿਨਨ੍ਤਸ੍ਸ ਵਿਯ ਦੇਸਨਾ ਪਰਿਯੋਸਾਨਂ ਨ ਗਚ੍ਛੇਯ੍ਯ. ਯਸ੍ਮਾ ਪਨਸ੍ਸ ਵਿਨੇਯ੍ਯਜ੍ਝਾਸਯਾਨੁਰੂਪਮੇਵ ਦੇਸਨਾ ਪਵਤ੍ਤਿ, ਨ ਤਤੋ ਪਰਂ ਅਣੁਮਤ੍ਤਮ੍ਪਿ ਵਡ੍ਢਤਿ. ਤਸ੍ਮਾ ਵੁਤ੍ਤਂ – ‘‘ਸਬ੍ਬਾਪਿ ਧਮ੍ਮਦੇਸਨਾ ਸਂਖਿਤ੍ਤਾਵ, ਵਿਤ੍ਥਾਰਦੇਸਨਾ ਨਾਮ ਨਤ੍ਥੀ’’ਤਿ. ਨਨੁ ਸਤ੍ਤਪਕਰਣਦੇਸਨਾ ਵਿਤ੍ਥਾਰਕਥਾਤਿ? ਨ ਸਾਪਿ ਵਿਤ੍ਥਾਰਕਥਾਤਿ ਆਹ – ‘‘ਸਮਨ੍ਤਪਟ੍ਠਾਨਕਥਾਪਿ ਸਂਖਿਤ੍ਤਾਯੇਵਾ’’ਤਿ. ਸਨ੍ਨਿਪਤਿਤਦੇਵਪਰਿਸਾਯ ਅਜ੍ਝਾਸਯਾਨੁਰੂਪਮੇਵ ਹਿ ਤਸ੍ਸਾਪਿ ਪਵਤ੍ਤਿ, ਨ ਸਤ੍ਥੁਦੇਸਨਾਞਾਣਾਨੁਰੂਪਨ੍ਤਿ. ਯਥਾਨੁਸਨ੍ਧਿਂ ਪਾਪੇਸਿ ਯਥਾਉਦ੍ਦਿਟ੍ਠੇ ਅਨੁਪੁਬ੍ਬੇਨ ਅਨਵਸੇਸਤੋ ਵਿਭਜਨਵਸੇਨ ਦੇਸਨਾਯ ਨਿਟ੍ਠਾਪਿਤਤ੍ਤਾ. ਵਿਪਞ੍ਚਿਤਞ੍ਞੂ…ਪੇ… ਕਥੇਸਿ ਨਾਤਿਸਙ੍ਖੇਪਵਿਤ੍ਥਾਰਵਸੇਨ ਦੇਸਿਤਤ੍ਤਾ.
੩੭੦. ਅਟ੍ਠਨ੍ਨਂ ਪਰਿਕ੍ਖਾਰਾਨਨ੍ਤਿ ਨਯਿਦਮਨਵਸੇਸਪਰਿਯਾਦਾਨਂ, ਲਕ੍ਖਣਵਚਨਂ ਪਨੇਤਂ, ਅਞ੍ਞਤਰਸ੍ਸਾਤਿ ਵਚਨਸੇਸੋ. ਤਥਾ ਹਿ, ‘‘ਮਯ੍ਹਂ ਇਦ੍ਧਿਮਯਪਰਿਕ੍ਖਾਰਲਾਭਾਯ ਪਚ੍ਚਯੋ ਹੋਤੂ’’ਤਿ ਪਤ੍ਥਨਂ ਪਟ੍ਠਪੇਤ੍ਵਾ ਪਤ੍ਤਚੀਵਰਂ, ਪਤ੍ਤਂ, ਚੀਵਰਮੇਵ ਵਾ ਦਿਨ੍ਨੇ ਚਰਿਮਭਵੇ ਇਦ੍ਧਿਮਯਪਰਿਕ੍ਖਾਰੋ ਨਿਬ੍ਬਤ੍ਤਤੀਤਿ ਵਦਨ੍ਤਿ. ਅਦਿਨ੍ਨਤ੍ਤਾਤਿ ਕੇਚਿਵਾਦੋ, ਤੇਨਾਹ ‘‘ਕੁਲਪੁਤ੍ਤੋ’’ਤਿਆਦਿ. ਓਕਾਸਾਭਾਵਤੋਤਿ ਉਪਸਮ੍ਪਦਾਲਕ੍ਖਣਸ੍ਸ ਅਸਮ੍ਭਵਤੋ. ਤੇਨਾਹ – ‘‘ਕੁਲਪੁਤ੍ਤਸ੍ਸ ਆਯੁਪਰਿਕ੍ਖੀਣ’’ਨ੍ਤਿ. ਉਦਕਤਿਤ੍ਥ…ਪੇ… ਆਰਦ੍ਧੋ ਪਰਮਪ੍ਪਿਚ੍ਛਭਾਵਤੋ.
ਵਿਬ੍ਭਨ੍ਤਾਤਿ ਭਨ੍ਤਚਿਤ੍ਤਾ. ਸਿਙ੍ਗੇਨ ਵਿਜ੍ਝਿਤ੍ਵਾ ਘਾਤੇਸਿ ਪੁਰਿਮਜਾਤਿਬਦ੍ਧਾਘਾਤਤਾਯਾਤਿ ਵਦਨ੍ਤਿ.
ਮਾਨੁਸਂ ਯੋਗਨ੍ਤਿ ਮਨੁਸ੍ਸਤ੍ਤਭਾਵਂ. ਅਤ੍ਤਭਾਵੋ ਹਿ ਯੁਜ੍ਜਤਿ ਕਮ੍ਮਕਿਲੇਸੇਹੀਤਿ ‘‘ਯੋਗੋ’’ਤਿ ਵੁਚ੍ਚਤਿ. ਉਪਚ੍ਚਗੁਨ੍ਤਿ ਉਪਗਚ੍ਛਿਂਸੁ. ਉਪਕੋਤਿਆਦਿ ਤੇਸਂ ਨਾਮਾਨਿ.
ਗਨ੍ਧਕਟ੍ਠੇਹੀਤਿ ਚਨ੍ਦਨਾਗਰੁਸਲ਼ਲਦੇਵਦਾਰੁਆਦੀਹਿ ਗਨ੍ਧਦਾਰੂਹਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਧਾਤੁਵਿਭਙ੍ਗਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.