੮. ਉਦ੍ਦੇਸਵਿਭਙ੍ਗਸੁਤ੍ਤਵਣ੍ਣਨਾ

੩੧੩. ਦੇਸੇਤਬ੍ਬਸ੍ਸ ਅਤ੍ਥਸ੍ਸ ਉਦ੍ਦਿਸਨਂ ਉਦ੍ਦੇਸੋ, ਵਿਭਜਨਂ ਵਿਭਙ੍ਗੋਤਿ ਆਹ – ‘‘ਮਾਤਿਕਞ੍ਚ ਵਿਭਜਨਞ੍ਚਾ’’ਤਿ ਤੁਲੇਯ੍ਯਾਤਿਆਦੀਨਿ ਚਤ੍ਤਾਰਿਪਿ ਪਦਾਨਿ ਪਞ੍ਞਾਵੇਵਚਨਾਨਿ. ਅਥ ਵਾ ਤੁਲੇਯ੍ਯਾਤਿ ਤੁਲਨਭੂਤਾਯ ਪਞ੍ਞਾਯ ਤਸ੍ਸ ਧਮ੍ਮਸ੍ਸ ਪਗ੍ਗਹਾਦਿਵਿਧਿਨਾ ਪਰਿਤੁਲੇਯ੍ਯ. ਤੀਰੇਯ੍ਯਾਤਿ ਤੀਰਣਭੂਤਾਯ ਪਞ੍ਞਾਯ ਤਤ੍ਥ ਞਾਣਕਿਰਿਯਾਸਮਾਪਨਵਸੇਨ ਤੀਰੇਯ੍ਯ. ਪਰਿਗ੍ਗਣ੍ਹੇਯ੍ਯਾਤਿ ਤਥਾਸਮਾਪਨ੍ਨੋ ਆਨਿਸਂਸੇ ਅਸ੍ਸਾਦਆਦੀਨਵੇ ਚ ਵਿਚਿਨੇਯ੍ਯ. ਪਰਿਚ੍ਛਿਨ੍ਦੇਯ੍ਯਾਤਿ ਪਰਿਚ੍ਛਿਨ੍ਦਭੂਤੇਨ ਞਾਣੇਨ ਅਤ੍ਥਂ ਪਰਿਚ੍ਛਿਨ੍ਦਿਤ੍ਵਾ ਜਾਨੇਯ੍ਯ. ਆਰਮ੍ਮਣੇਸੂਤਿ ਰੂਪਾਦਿਪੁਥੁਤ੍ਤਾਰਮ੍ਮਣੇਸੁ. ਨਿਕਨ੍ਤਿਵਸੇਨਾਤਿ ਨਿਕਾਮਨਵਸੇਨ ਅਪੇਕ੍ਖਾਵਸੇਨ. ਤਿਟ੍ਠਮਾਨਨ੍ਤਿ ਪਵਤ੍ਤਮਾਨਂ. ਗੋਚਰਜ੍ਝਤ੍ਤੇਤਿ ਝਾਨਾਰਮ੍ਮਣਭੂਤੇ. ਤਞ੍ਹਿ ਭਾਵਨਾਚਿਤ੍ਤੇਨਾਭਿਭੁਯ੍ਯ ਅਵਿਸ੍ਸਜ੍ਜਿਤ੍ਵਾ ਗਯ੍ਹਮਾਨਂ ਅਜ੍ਝਤ੍ਤਂ ਵਿਯ ਹੋਤੀਤਿ ‘‘ਗੋਚਰਜ੍ਝਤ੍ਤ’’ਨ੍ਤਿ ਵੁਚ੍ਚਤਿ. ਭਾਵਨਂ ਆਰਦ੍ਧਸ੍ਸ ਭਿਕ੍ਖੁਨੋ ਯਦਿ ਭਾਵਨਾਰਮ੍ਮਣੇ ਨਿਕਨ੍ਤਿ ਉਪ੍ਪਜ੍ਜੇਯ੍ਯ, ਤਾਯ ਨਿਕਨ੍ਤਿਯਾ ਉਪਰਿ ਭਾਵਨਂ ਵਿਸ੍ਸਜ੍ਜੇਤ੍ਵਾ ਚਿਤ੍ਤਸਂਕੋਚਵਸੇਨ ਸਣ੍ਠਿਤਂ ਨਾਮ, ਤਦਭਾਵੇਨ ਅਸਣ੍ਠਿਤਂ ਨਾਮ ਹੋਤੀਤਿ, ‘‘ਅਜ੍ਝਤ੍ਤਂ ਅਸਣ੍ਠਿਤ’’ਨ੍ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ, ‘‘ਗੋਚਰਜ੍ਝਤ੍ਤੇ ਨਿਕਨ੍ਤਿਵਸੇਨ ਅਸਣ੍ਠਿਤ’’ਨ੍ਤਿ ਆਹ. ਤਥਾ ਹਿ ਵਕ੍ਖਤਿ – ‘‘ਨਿਕਨ੍ਤਿਵਸੇਨ ਹਿ ਅਤਿਟ੍ਠਮਾਨਂ ਹਾਨਭਾਗਿਯਂ ਨ ਹੋਤਿ, ਵਿਸੇਸਭਾਗਿਯਮੇਵ ਹੋਤੀ’’ਤਿ. ਅਗ੍ਗਹੇਤ੍ਵਾਤਿ ਰੂਪਾਦੀਸੁ ਕਿਞ੍ਚਿ ਤਣ੍ਹਾਦਿਗ੍ਗਾਹਵਸੇਨ ਅਗ੍ਗਹੇਤ੍ਵਾ. ਤਥਾ ਅਗ੍ਗਹਣੇਨੇਵ ਹਿ ਤਣ੍ਹਾਪਰਿਤਾਸਾਦਿਵਸੇਨ ਨ ਪਰਿਤਸ੍ਸੇਯ੍ਯ. ਅਵਸੇਸਸ੍ਸ ਚ ਦੁਕ੍ਖਸ੍ਸਾਤਿ ਸੋਕਾਦਿਦੁਕ੍ਖਸ੍ਸ. ਅਵਸੇਸਸ੍ਸ ਚ ਦੁਕ੍ਖਸ੍ਸਾਤਿ ਵਾ ਜਾਤਿਜਰਾਮਰਣਸੀਸੇਨ ਵਿਪਾਕਦੁਕ੍ਖਸ੍ਸ ਗਹਿਤਤ੍ਤਾ ਕਿਲੇਸਦੁਕ੍ਖਸ੍ਸ ਚੇਵ ਸਂਸਾਰਦੁਕ੍ਖਸ੍ਸ ਚਾਤਿ ਅਤ੍ਥੋ.

੩੧੬. ਰੂਪਮੇਵ ਕਿਲੇਸੁਪ੍ਪਤ੍ਤਿਯਾ ਕਾਰਣਭਾਵਤੋ ਰੂਪਨਿਮਿਤ੍ਤਂ. ਰਾਗਾਦਿਵਸੇਨ ਤਂ ਅਨੁਧਾਵਤੀਤਿ ਰੂਪਨਿਮਿਤ੍ਤਾਨੁਸਾਰੀ.

੩੧੮. ਨਿਕਨ੍ਤਿਵਸੇਨ ਅਸਣ੍ਠਿਤਨ੍ਤਿ ਅਪੇਕ੍ਖਾਵਸੇਨ ਸਣ੍ਠਿਤਂ ਨਿਕਨ੍ਤਿਂ ਪਹਾਯ ਪਵਤ੍ਤਮਾਨਂ ਉਪਰਿ ਵਿਸੇਸਾਵਹਤੋਤਿ. ਤੇਨਾਹ ‘‘ਨਿਕਨ੍ਤਿਵਸੇਨ ਹੀ’’ਤਿਆਦਿ.

੩੨੦. ਅਗ੍ਗਹੇਤ੍ਵਾ ਅਪਰਿਤਸ੍ਸਨਾਤਿ ਪਞ੍ਚੁਪਾਦਾਨਕ੍ਖਨ੍ਧੇ, ‘‘ਏਤਂ ਮਮਾ’’ਤਿਆਦਿਨਾ ਤਣ੍ਹਾਦਿਗ੍ਗਾਹਵਸੇਨ ਉਪਾਦਿਯਿਤ੍ਵਾ ਤਣ੍ਹਾਪਰਿਤਾਸਾਦਿਵਸੇਨ ਪਰਿਤਸ੍ਸਨਾ, ਵੁਤ੍ਤਵਿਪਰਿਯਾਯੇਨ ਅਗ੍ਗਹੇਤ੍ਵਾ ਅਪਰਿਤਸ੍ਸਨਾ ਵੇਦਿਤਬ੍ਬਾ. ਕਥਂ ਪਨੇਸਾ ਅਨੁਪਾਦਾਪਰਿਤਸ੍ਸਨਾ ਹੋਤੀਤਿ ਮਹਾਥੇਰਸ੍ਸ ਅਧਿਪ੍ਪਾਯਂ ਵਿਵਰਿਤੁਂ ਚੋਦਨਂ ਸਮੁਟ੍ਠਪੇਤਿ? ਉਪਾਦਾਤਬ੍ਬਸ੍ਸ ਅਭਾਵਤੋਤਿ ਤਸ੍ਸ ਅਨੁਪਾਦਾਪਰਿਤਸ੍ਸਨਾਭਾਵੇ ਕਾਰਣਵਚਨਂ. ਯਦਿ ਹੀਤਿਆਦਿ ਤਸ੍ਸ ਸਮਤ੍ਥਨਂ. ਉਪਾਦਾਪਰਿਤਸ੍ਸਨਾਵ ਅਸ੍ਸ ਤਥਾ ਉਪਾਦਾਤਬ੍ਬਸ੍ਸ ਤਥੇਵ ਉਪਾਦਿਨ੍ਨਤ੍ਤਾ. ਏਵਨ੍ਤਿ ਨਿਚ੍ਚਾਦਿਆਕਾਰੇਨ. ਉਪਾਦਿਨ੍ਨਾਪੀਤਿ ਗਹਿਤਪਰਾਮਟ੍ਠਾਪਿ. ਅਨੁਪਾਦਿਨ੍ਨਾਵ ਹੋਨ੍ਤਿ ਅਯੋਨਿਸੋ ਗਹਿਤਤ੍ਤਾ, ਵਿਞ੍ਞੂਸੁ ਨਿਸ੍ਸਾਯ ਜਾਨਿਤਬ੍ਬਤ੍ਤਾ ਚ. ਦਿਟ੍ਠਿਵਸੇਨਾਤਿ ਮਿਚ੍ਛਾਦਿਟ੍ਠਿਯਾ ਗਹਣਾਕਾਰਵਸੇਨ, ਤਸ੍ਸ ਪਨ ਅਯਥਾਭੂਤਗਾਹਿਤਾਯ ਪਰਮਤ੍ਥਤੋ ਚ ਅਭਾਵਤੋ. ਅਤ੍ਥਤੋਤਿ ਪਰਮਤ੍ਥਤੋ. ਅਨੁਪਾਦਾਪਰਿਤਸ੍ਸਨਾਯੇਵ ਨਾਮ ਹੋਤਿ ਉਪਾਦਾਤਬ੍ਬਾਕਾਰਸ੍ਸ ਅਭਾਵੇਨ ਤਂ ਅਨੁਪਾਦਿਯਿਤ੍ਵਾ ਏਵ ਪਰਿਤਸ੍ਸਨਾਤਿ ਕਤ੍ਵਾ.

ਪਰਿਵਤ੍ਤਤੀਤਿ ਨ ਤਦੇਵ ਰੂਪਂ ਅਞ੍ਞਥਾ ਪਵਤ੍ਤਂ ਪਰਿਵਤ੍ਤਤਿ, ਅਥ ਖੋ ਪਕਤਿਜਹਨੇਨ ਸਭਾਵਵਿਗਮੇਨ ਨਸ੍ਸਤਿ ਭਿਜ੍ਜਤਿ. ਵਿਪਰਿਣਤਨ੍ਤਿ ਅਞ੍ਞਥਤ੍ਤਂ ਗਤਂ ਵਿਨਟ੍ਠਂ. ਕਮ੍ਮਵਿਞ੍ਞਾਣਨ੍ਤਿ ਅਭਿਸਙ੍ਖਾਰਵਿਞ੍ਞਾਣਂ. ‘‘ਰੂਪਂ ਅਤ੍ਤਾ’’ਤਿਆਦਿ ਮਿਚ੍ਛਾਗਾਹਵਸੇਨ ਵਿਞ੍ਞਾਣਸ੍ਸ ਰੂਪਭੇਦੇਨ ਵੁਤ੍ਤਸ੍ਸ ਭੇਦਾਨੁਪਰਿਵਤ੍ਤਿ ਹੋਤਿ. ਵਿਪਰਿਣਾਮਂ ਅਨੁਗਨ੍ਤ੍ਵਾ ਵਿਪਰਿਵਤ੍ਤਨਤਂ ਆਰਬ੍ਭ ਪਵਤ੍ਤਂ ਵਿਪਰਿਣਾਮਾਨੁਪਰਿਵਤ੍ਤਂ; ਤਤੋ ਸਮੁਪ੍ਪਨ੍ਨਾ ਪਰਿਤਸ੍ਸਨਾ ਵਿਪਰਿਣਾਮਾਨੁਪਰਿਵਤ੍ਤਜਾ ਪਰਿਤਸ੍ਸਨਾਤਿ ਦਸ੍ਸੇਨ੍ਤੋ ਆਹ – ‘‘ਵਿਪਰਿਣਾਮਸ੍ਸ…ਪੇ… ਪਰਿਤਸ੍ਸਨਾ’’ਤਿ. ਅਕੁਸਲਧਮ੍ਮਸਮੁਪ੍ਪਾਦਾ ਚਾਤਿ, ‘‘ਯਂ ਅਹੁ ਵਤ ਮੇ, ਤਂ ਵਤ ਮੇ ਨਤ੍ਥੀ’’ਤਿਆਦਿਨਾ ਪਵਤ੍ਤਾ ਅਕੁਸਲਚਿਤ੍ਤੁਪ੍ਪਾਦਧਮ੍ਮਾ. ਖੇਪੇਤ੍ਵਾਤਿ ਪਵਤ੍ਤਿਤੁਂ ਅਪ੍ਪਦਾਨਵਸੇਨ ਅਨੁਪ੍ਪਤ੍ਤਿਨਿਮਿਤ੍ਤਤਾਯ ਖੇਪੇਤ੍ਵਾ. ਭਯਤਾਸੇਨਾਤਿ ਭਾਯਨਵਸੇਨਪਿ ਚਿਤ੍ਤੁਤ੍ਰਾਸੇਨ. ਤਣ੍ਹਾਤਾਸੇਨਾਤਿ ਤਸ੍ਸਨੇਨ. ਸਵਿਘਾਤੋਤਿ ਚਿਤ੍ਤਵਿਘਾਤਨਵਿਘਾਤੇਨ ਸਵਿਘਾਤੋ. ਤਤੋ ਏਵ ਚੇਤੋਦੁਕ੍ਖੇਨ ਸਦੁਕ੍ਖੋ. ਮਣਿਕਰਣ੍ਡਕਸਞ੍ਞਾਯਾਤਿ ਰਿਤ੍ਤਕਰਣ੍ਡਂਯੇਵ ਮਣਿਪਰਿਪੁਣ੍ਣਕਰਣ੍ਡੋਤਿ ਉਪ੍ਪਨ੍ਨਸਞ੍ਞਾਯ. ਅਗ੍ਗਹੇਤ੍ਵਾ ਪਰਿਤਸ੍ਸਨਾਤਿ ਗਹੇਤਬ੍ਬਸ੍ਸ ਅਭਾਵੇਨ ਗਹਣਮ੍ਪਿ ਅਵਿਜ੍ਜਮਾਨਪਕ੍ਖਿਯਮੇਵਾਤਿ ਅਗ੍ਗਹੇਤ੍ਵਾ ਪਰਿਤਸ੍ਸਨਾ ਨਾਮ ਹੋਤਿ.

੩੨੧. ਕਮ੍ਮਵਿਞ੍ਞਾਣਮੇਵ ਨਤ੍ਥਿ ਸਤਿ ਕਮ੍ਮਵਿਞ੍ਞਾਣੇ ਰੂਪਭੇਦਾਨੁਪਰਿਵਤ੍ਤਿ ਸਿਯਾਤਿ ਕਮ੍ਮਵਿਞ੍ਞਾਣਾਭਾਵਦਸ੍ਸਨਮੁਖੇਨ ਖੀਣਾਸਵਸ੍ਸ ਸਬ੍ਬਸੋ ਕਿਲੇਸਾਭਾਵਂ ਦਸ੍ਸੇਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਉਦ੍ਦੇਸਵਿਭਙ੍ਗਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.