੧੨. ਦਕ੍ਖਿਣਾਵਿਭਙ੍ਗਸੁਤ੍ਤਵਣ੍ਣਨਾ
੩੭੬. ਮਹਾਪਜਾਪਤਿਗੋਤਮੀਤਿ ਏਤ੍ਥ ਗੋਤਮੀਤਿ ਤਸ੍ਸ ਗੋਤਮਗੋਤ੍ਤਤੋ ਆਗਤਂ ਨਾਮਂ, ਮਹਾਪਜਾਪਤਿ ਪਨ ਗੁਣਤੋ. ਤਂ ਵਿਵਰਿਤੁਂ, ‘‘ਨਾਮਕਰਣਦਿਵਸੇ ਪਨਸ੍ਸਾ’’ਤਿਆਦਿ ਵੁਤ੍ਤਂ. ਮਹਤਿਂ ਉਲ਼ਾਰਂ ਪਜਂ ਜਨਨਪੋਸਨੇਹਿ ਪਰਿਰਕ੍ਖਤੀਤਿ ਮਹਾਪਜਾਪਤਿ. ਪਰਿਭੋਗਵਸੇਨ ਨ ਹਞ੍ਞਤੀਤਿ ਅਹਤਂ. ਸਿਪ੍ਪਿਕਾਨਨ੍ਤਿ ਤਨ੍ਤਵਾਯਾਨਂ. ਵਾਯਨਟ੍ਠਾਨਨ੍ਤਿ ਵੀਨਟ੍ਠਾਨਂ. ਤਾਨਿ ਮਂ ਨ ਤੋਸੇਨ੍ਤਿ ਕਾਯਿਕਸ੍ਸ ਪੁਞ੍ਞਸ੍ਸ ਅਭਾਵਤੋ. ਤੇਨਾਹ – ‘‘ਸਹਤ੍ਥਾ ਕਤਮੇਵ ਮਂ ਤੋਸੇਤੀ’’ਤਿ. ਪਿਸਿਤ੍ਵਾ ਨਿਬ੍ਬਤ੍ਤਨਂ ਕਤ੍ਵਾ. ਪੋਥੇਤ੍ਵਾਤਿ ਸੁਖੁਮਭਾਵਾਪਾਦਨਤ੍ਥਂ ਧਨੁਕੇਨ ਨੇਤ੍ਵਾ. ਕਾਲਾਨੁਕਾਲਞ੍ਚ ਧਾਤਿਗਣਪਰਿਵੁਤਾ ਗਨ੍ਤ੍ਵਾ ਵੇਮਕੋਟਿਂ ਅਗ੍ਗਹੇਸਿ ਏਕਦਿਵਸਨ੍ਤਿ ਅਧਿਪ੍ਪਾਯੋ. ਏਵਞ੍ਹਿ ‘‘ਏਕਦਿਵਸਂ ਪਨ…ਪੇ… ਅਕਾਸੀ’’ਤਿ ਪੁਰਿਮਵਚਨੇਨ ਤਂ ਨ ਵਿਰੁਜ੍ਝੇਯ੍ਯ.
ਛ ਚੇਤਨਾਤਿ ਛਬ੍ਬਿਧਾ ਚੇਤਨਾ. ਨ ਹਿ ਤਾ ਛਯੇਵ ਚੇਤਨਾਤਿ. ਸਙ੍ਘੇ ਗੋਤਮਿ ਦੇਹਿ…ਪੇ… ਸਙ੍ਘੋ ਚਾਤਿ ਇਦਮੇਵ ਸੁਤ੍ਤਪਦਂ. ਸਙ੍ਘੇ ਗੋਤਮਿ ਦੇਹੀਤਿ ਸਙ੍ਘਸ੍ਸ ਦਾਨਾਯ ਨਿਯੋਜੇਸਿ, ਤਸ੍ਮਾ ਸਙ੍ਘੋਵ ਦਕ੍ਖਿਣੇਯ੍ਯਤਰੋਤਿ ਅਯਮੇਵੇਤ੍ਥ ਅਤ੍ਥੋ. ਯਦਿ ਏਵਨ੍ਤਿਆਦਿਨਾ ਤਤ੍ਥ ਬ੍ਯਭਿਚਾਰਂ ਦਸ੍ਸੇਤਿ. ਰਾਜਮਹਾਮਤ੍ਤਾਦਯੋਤਿਆਦਿਨਾ ਤਤ੍ਥ ਬ੍ਯਤਿਰੇਕਤੋ ਨਿਦਸ੍ਸਨਂ ਆਹ. ਮਹਨ੍ਤਤਰਾ ਭਵੇਯ੍ਯੁਨ੍ਤਿ ਆਨੁਭਾਵਾਦਿਨਾ ਮਹਨ੍ਤਤਰਾ ਭਵੇਯ੍ਯੁਂ, ਨ ਚ ਤਂ ਅਤ੍ਥੀਤਿ. ਤਸ੍ਮਾਤਿ ਯਸ੍ਮਾ ਗੁਣਵਿਸਿਟ੍ਠਹੇਤੁਕਂ ਦਕ੍ਖਿਣੇਯ੍ਯਤਂ ਅਨਪੇਕ੍ਖਿਤ੍ਵਾ ਅਤ੍ਤਨੋ ਦੀਯਮਾਨਸ੍ਸ ਦਾਪਨਂ ਲਭਤਿ, ਤਸ੍ਮਾ. ਮਾ ਏਵਂ ਗਣ੍ਹਾਤਿ ਸਮ੍ਮਾਸਮ੍ਬੁਦ੍ਧਤੋ ਸਙ੍ਘੋਵ ਦਕ੍ਖਿਣੇਯ੍ਯੋ’’ਤਿ ਮਾ ਗਣ੍ਹ.
ਤਤ੍ਥ ਨਿਚ੍ਛਯਸਾਧਕਂ ਸੁਤ੍ਤਪਦਂ ਦਸ੍ਸੇਨ੍ਤੋ, ‘‘ਨਯਿਮਸ੍ਮਿਂ ਲੋਕੇ…ਪੇ… ਵਿਪੁਲਫਲੇਸਿਨ’’ਨ੍ਤਿ ਆਹ. ਸ੍ਵਾਯਮਤ੍ਥੋ ਰਤਨਸੁਤ੍ਤੇ (ਖੁ. ਪਾ. ੬.੩; ਸੁ. ਨਿ. ੨੨੬), ‘‘ਯਂ ਕਿਞ੍ਚਿ ਵਿਤ੍ਤ’’ਨ੍ਤਿ ਗਾਥਾਯ, ਅਗ੍ਗਪਸਾਦਸੁਤ੍ਤਾਦੀਹਿ (ਇਤਿਵੁ. ੯੦) ਚ ਵਿਭਾਵੇਤਬ੍ਬੋਤਿ. ਤੇਨਾਹ – ‘‘ਸਤ੍ਥਾਰਾ ਉਤ੍ਤਰਿਤਰੋ ਦਕ੍ਖਿਣੇਯ੍ਯੋ ਨਾਮ ਨਤ੍ਥੀ’’ਤਿ.
ਗੋਤਮਿਯਾ ਅਨ੍ਤਿਮਭਵਿਕਤਾਯ ਦਾਨਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯ ਅਨੁਪ੍ਪਾਦਨਤੋ ਨ ਤਂ ਗਰੁਤਰਂ ਸਙ੍ਘਸ੍ਸ ਪਾਦਾਪਨੇ ਕਾਰਣਨ੍ਤਿ ਆਹ – ‘‘ਪਚ੍ਛਿਮਾਯ ਜਨਤਾਯਾ’’ਤਿਆਦਿ. ਵਚਨਤੋਪੀਤਿ ਤਸ੍ਸ ਵਤ੍ਥਯੁਗਸ੍ਸ ਸਤ੍ਥੁ ਏਵ ਪਟਿਗ੍ਗਹਣਾਯ ਵਚਨਤੋਪਿ. ਤੇਨਾਹ ‘‘ਨ ਹੀ’’ਤਿਆਦਿ.
ਸਤ੍ਥਾ ਸਙ੍ਘਪਰਿਯਾਪਨ੍ਨੋਵ ਈਦਿਸੇ ਠਾਨੇ ਅਗ੍ਗਫਲਟ੍ਠਤਾਯ ਅਟ੍ਠ-ਅਰਿਯਪੁਗ੍ਗਲਭਾਵਤੋ, ਸਚੇ ਪਨਸ੍ਸ ਨ ਸਯਂ ਸਙ੍ਘਪਰਿਯਾਪਨ੍ਨਤਾ, ਕਥਂ ਸਙ੍ਘੇ ਪੂਜਿਤੇ ਸਤ੍ਥਾ ਪੂਜਿਤੋ ਨਾਮ ਸਿਯਾਤਿ ਅਧਿਪ੍ਪਾਯੋ. ਤੀਣਿ ਸਰਣਗਮਨਾਨਿ ਤਯੋ ਏਵ ਅਗ੍ਗਪਸਾਦਾਤਿ ਵਕ੍ਖਤੀਤਿ ਅਧਿਪ੍ਪਾਯੋ. ਅਭਿਧੇਯ੍ਯਾਨੁਰੂਪਾਨਿ ਹਿ ਲਿਙ੍ਗਵਚਨਾਨਿ. ਨ ਰੁਹਤਿ ਅਯਾਥਾਵਪਟਿਪਤ੍ਤਿਭਾਵਤੋ, ਨ ਗਿਹਿਵੇਸਗ੍ਗਹਣਾਦਿਨਾ ਗਿਹਿਭਾਵਸ੍ਸ ਪਟਿਕ੍ਖਿਪਿਤਤ੍ਤਾ. ਨ ਵਤ੍ਤਬ੍ਬਮੇਤਂ ‘‘ਸਤ੍ਥਾ ਸਙ੍ਘਪਰਿਯਾਪਨ੍ਨੋ’’ਤਿ ਸਤ੍ਥੁਭਾਵਤੋ. ਸਾਵਕਸਮੂਹੋ ਹਿ ਸਙ੍ਘੋ. ਸਙ੍ਘਗਣੇ ਹਿ ਸਤ੍ਥਾ ਉਤ੍ਤਰਿਤਰੋ ਅਨਞ੍ਞਸਾਧਾਰਣਗੁਣੇਹਿ ਸਮਨ੍ਨਾਗਤਭਾਵਤੋ ਮੂਲਰਤਨਭਾਵਤੋ ਚ.
੩੭੭. ਸਮ੍ਪਤਿਜਾਤਸ੍ਸ ਮਹਾਸਤ੍ਤਸ੍ਸ ਸਤ੍ਤਪਦਵੀਤਿਹਾਰਗਮਨਂ ਧਮ੍ਮਤਾਵਸੇਨ ਜਾਤਂ, ਪਰਂ ਤਦਞ੍ਞਦਹਰਸਦਿਸੀ ਪਟਿਪਤ੍ਤੀਤਿ ਆਹ – ‘‘ਹਤ੍ਥਪਾਦਕਿਚ੍ਚਂ ਅਸਾਧੇਨ੍ਤੇਸੂ’’ਤਿ.
੩੭੮. ਪਚ੍ਚੂਪਕਾਰਂ ਨ ਸੁਕਰਂ ਵਦਾਮਿ ਅਨੁਚ੍ਛਵਿਕਕਿਰਿਯਾਯ ਕਾਤੁਂ ਅਸਕ੍ਕੁਣੇਯ੍ਯਤ੍ਤਾ. ਅਭਿਵਾਦੇਨ੍ਤਿ ਏਤੇਨਾਤਿ ਅਭਿਵਾਦਨਂ. ਵਨ੍ਦਮਾਨੇਹਿ ਅਨ੍ਤੇਵਾਸਿਕੇਹਿ ਆਚਰਿਯਂ ‘‘ਸੁਖੀ ਹੋਤੂ’’ਤਿਆਦਿਨਾ ਅਭਿਵਾਦੇਨ੍ਤਿ ਨਾਮ. ਤੇਨ ਵੁਤ੍ਤਂ ‘‘ਅਭਿਵਾਦਨ’’ਨ੍ਤਿ. ਤਦਭਿਮੁਖੋ…ਪੇ… ਵਨ੍ਦਿਤ੍ਵਾ ਨਿਪਜ੍ਜਤਿ, ਸੇਯ੍ਯਥਾਪਿ ਆਯਸ੍ਮਾ ਸਾਰਿਪੁਤ੍ਤੋ. ਕਾਲਾਨੁਕਾਲਂ ਉਪਟ੍ਠਾਨਂ ਬੀਜਯਨਪਾਦਸਮ੍ਬਾਹਨਾਦਿ ਅਨੁਚ੍ਛਵਿਕਕਮ੍ਮਸ੍ਸ ਕਰਣਂ ਨਾਮ. ਅਨੁਚ੍ਛਵਿਕਂ ਕਿਰਿਯਂ ਕਾਤੁਂ ਨ ਸਕ੍ਕੋਤਿਯੇਵ, ਯਸ੍ਮਾ ਆਚਰਿਯੇਨ ਕਤਸ੍ਸ ਧਮ੍ਮਾਨੁਗ੍ਗਹਸ੍ਸ ਅਨ੍ਤੇਵਾਸਿਨਾ ਕਰਿਯਮਾਨੋ ਆਮਿਸਾਨੁਗ੍ਗਹੋ ਸਙ੍ਖਮ੍ਪਿ ਕਲਮ੍ਪਿ ਕਲਭਾਗਮ੍ਪਿ ਨ ਉਪੇਤਿਯੇਵਾਤਿ. ਤੇਨ ਵੁਤ੍ਤਂ ‘‘ਨ ਸੁਪ੍ਪਤਿਕਾਰਂ ਵਦਾਮੀ’’ਤਿ.
੩੭੯. ਪਾਟਿਪੁਗ੍ਗਲਿਕਂ ਦਕ੍ਖਿਣਂ ਆਰਬ੍ਭ ਸਮੁਟ੍ਠਿਤਂ, ‘‘ਤਂ ਮੇ ਭਗਵਾ ਪਟਿਗ੍ਗਣ੍ਹਤੂ’’ਤਿ ਮਹਾਪਜਾਪਤਿਗੋਤਮਿਯਾ ਵਚਨਂ ਨਿਮਿਤ੍ਤਂ ਕਤ੍ਵਾ ਦੇਸਨਾਯ ਉਟ੍ਠਿਤਤ੍ਤਾ. ਨ ਕੇਵਲਞ੍ਚ ਤਸ੍ਸਾ ਏਵ ਵਚਨਂ, ਅਥ ਖੋ ਆਨਨ੍ਦਤ੍ਥੇਰੋਪਿ…ਪੇ… ਸਮਾਦਪੇਸਿ, ਤਸ੍ਮਾ ਵਿਭਾਗਤੋ ਚੁਦ੍ਦਸਸੁ…ਪੇ… ਹੋਤੀਤਿ ਦਸ੍ਸੇਤੁਂ, ਇਮਂ ਦੇਸਨਂ ਆਰਭਿ. ਤਤ੍ਥ ਪਤਿਪਚ੍ਚੇਕਂ ਪੁਗ੍ਗਲਂ ਦੀਯਤੀਤਿ ਪਾਟਿਪੁਗ੍ਗਲਿਕਂ. ਪਠਮਸਦ੍ਦੋ ਯਥਾ ਅਗ੍ਗਤ੍ਥੋ, ਏਵਂ ਸੇਟ੍ਠਪਰਿਯਾਯੋਪੀਤਿ ਆਹ ‘‘ਜੇਟ੍ਠਕਵਸੇਨਪੀ’’ਤਿ. ਅਗ੍ਗਾ ਉਤ੍ਤਮੇ ਖੇਤ੍ਤੇ ਪਵਤ੍ਤਤ੍ਤਾ. ਦੁਤਿਯਤਤਿਯਾਪਿ ਪਰਮਦਕ੍ਖਿਣਾਯੇਵ ਸਬ੍ਬਸੋ ਸਮ੍ਮਾਵਿਕ੍ਖਮ੍ਭਿਤਰਾਗਾਦਿਕਿਲੇਸਤ੍ਤਾ. ਰਾਗਾਦਯੋ ਹਿ ਅਦਕ੍ਖਿਣੇਯ੍ਯਭਾਵਸ੍ਸ ਕਾਰਣਂ. ਤੇਨੇਵਾਹ – ‘‘ਤਿਣਦੋਸਾਨਿ ਖੇਤ੍ਤਾਨਿ, ਰਾਗਦੋਸਾ ਅਯਂ ਪਜਾ’’ਤਿਆਦਿ (ਧ. ਪ. ੩੫੬). ਯਸ੍ਮਾ ਪਨ ਸਵਾਸਨਂ ਸਬ੍ਬਸੋ ਸਮੁਚ੍ਛਿਨ੍ਨਕਿਲੇਸੇਹਿ ਤਤੋ ਏਵ ਸਬ੍ਬਸੋ ਅਪ੍ਪਟਿਹਤਞਾਣਚਾਰੇਹਿ ਅਨਨ੍ਤਾਪਰਿਮੇਯ੍ਯਗੁਣਗਣਾਧਾਰੇਹਿ ਸਮ੍ਮਾਸਮ੍ਬੁਦ੍ਧੇਹਿ ਸਦਿਸੋ ਸਦੇਵਕੇ ਲੋਕੇ ਕੋਚਿ ਦਕ੍ਖਿਣੇਯ੍ਯੋ ਨਤ੍ਥਿ. ਤਸ੍ਮਾ ‘‘ਪਰਮਦਕ੍ਖਿਣਾਯੇਵਾ’’ਤਿ ਸਾਸਙ੍ਕਂ ਵਦਤਿ. ਯਸ੍ਮਾ ਪਞ੍ਚਾਭਿਞ੍ਞੋ ਅਟ੍ਠਸਮਾਪਤ੍ਤਿਲਾਭੀ ਏਵ ਹੋਤਿ ਲੋਕਿਯਾਭਿਞ੍ਞਾਨਂ ਅਟ੍ਠਸਮਾਪਤ੍ਤਿਅਧਿਟ੍ਠਾਨਤ੍ਤਾ, ਤਸ੍ਮਾ ‘‘ਲੋਕਿਯਪਞ੍ਚਾਭਿਞ੍ਞੇ’’ਇਚ੍ਚੇਵ ਵੁਤ੍ਤਂ, ਨ ‘‘ਅਟ੍ਠਸਮਾਪਤ੍ਤਿਲਾਭਿਮ੍ਹੀ’’ਤਿ ਤਾਯ ਅਵੁਤ੍ਤਸਿਦ੍ਧਤ੍ਤਾ. ਗੋਸੀਲਧਾਤੁਕੋਤਿ ਗੋਸੀਲਸਭਾਵੋ, ਸੀਲਵਤਾ ਸਦਿਸਸੀਲੋਤਿ ਅਤ੍ਥੋ. ਤੇਨਾਹ ‘‘ਅਸਠੋ’’ਤਿਆਦਿ. ਤੇਨ ਨ ਅਲਜ੍ਜਿਧਾਤੁਕੋ ਪਕਤਿਸਿਦ੍ਧੋ ਇਧ ਪੁਥੁਜ੍ਜਨਸੀਲਵਾਤਿ ਅਧਿਪ੍ਪੇਤੋਤਿ ਦਸ੍ਸੇਤਿ.
ਪਰਿਚ੍ਛਿਨ੍ਦਨ੍ਤੋਤਿ ਏਤ੍ਤਕੋਤਿ ਪਚ੍ਚੇਕਪ੍ਪਮਾਣਤੋ ਤਤੋ ਏਵ ਅਞ੍ਞਮਞ੍ਞਂ ਅਸਙ੍ਕਰਤੋਵ ਪਰਿਚ੍ਛਿਨ੍ਦਨ੍ਤੋ. ਕਥਂ ਪਨ ਅਸਙ੍ਖ੍ਯੇਯ੍ਯਭਾਵੇਨ ਵੁਚ੍ਚਮਾਨੋ ਵਿਪਾਕੋ ਪਰਿਚ੍ਛਿਨ੍ਨੋ ਹੋਤਿ? ਸੋਪਿ ਤਸ੍ਸ ਪਰਿਚ੍ਛੇਦੋ ਏਵ ਇਤਰੇਹਿ ਅਸਂਕਿਣ੍ਣਭਾਵਦੀਪਨਤੋ, ਏਤਦਤ੍ਥਮੇਵ ਪੁਬ੍ਬੇ ਅਸਙ੍ਕਰਗ੍ਗਹਣਂ ਕਤਂ. ਗੁਣਵਸੇਨਾਤਿ ਲਕ੍ਖਣਸਮ੍ਪਨ੍ਨਾਦਿਗੁਣਵਸੇਨ. ਉਪਕਾਰਵਸੇਨਾਤਿ ਭੋਗਰਕ੍ਖਾਦਿਉਪਕਾਰਵਸੇਨ. ਯਂ ਪੋਸਨਤ੍ਥਂ ਦਿਨ੍ਨਂ, ਇਦਂ ਨ ਗਹਿਤਂ ਦਾਨਲਕ੍ਖਣਾਯੋਗਤੋ. ਅਨੁਗ੍ਗਹਪੂਜਨਿਚ੍ਛਾਵਸੇਨ ਹਿ ਅਤ੍ਤਨੋ ਦੇਯ੍ਯਵਤ੍ਥੁਪਰਿਚ੍ਚਾਗੋ ਦਾਨਂ ਭਯਰਾਗਲਦ੍ਧੁਕਾਮਕੁਲਾਦਿਵਸੇਨ ਸਾਵਜ੍ਜਾਭਾਵਤੋ. ਤਮ੍ਪਿ ਨ ਗਹਿਤਂ ਅਯਾਵਦਤ੍ਥਤਾਅਪਰਿਪੁਣ੍ਣਭਾਵੇਨ ਯਥਾਧਿਪ੍ਪੇਤਫਲਦਾਨਾਸਮਤ੍ਥਭਾਵਤੋ. ਸਮ੍ਪਤ੍ਤਸ੍ਸਾਤਿ ਸਨ੍ਤਿਕਾਗਤਸ੍ਸ. ਤੇਨ ਸਮ੍ਪਤ੍ਤਿਪਯੋਜਨੇ ਅਨਪੇਕ੍ਖਤਂ ਦਸ੍ਸੇਤਿ. ਫਲਂ ਪਟਿਕਙ੍ਖਿਤ੍ਵਾਤਿ ‘‘ਇਦਂ ਮੇ ਦਾਨਮਯਂ ਪੁਞ੍ਞਂ ਆਯਤਿਂ ਸੁਖਹਿਤਭਾਵਾਯ ਹੋਤੂ’’ਤਿਆਦਿਨਾ ਫਲਂ ਪਚ੍ਚਾਸੀਸਿਤ੍ਵਾ. ਤੇਨਸ੍ਸ ਫਲਦਾਨੇ ਨਮਿਯਤਂ ਦਸ੍ਸੇਤਿ, ਯਾਵਦਤ੍ਥਨ੍ਤਿ ਇਮਿਨਾ ਪਰਿਪੁਣ੍ਣਫਲਤਂ. ਸਤਗੁਣਾਤਿ ਏਤ੍ਥ ਗੁਣਸਦ੍ਦੋ ਨ ‘‘ਗੁਣੇਨ ਨਾਮਂ ਉਦ੍ਧਰੇਯ੍ਯ’’ਨ੍ਤਿਆਦੀਸੁ (ਧ. ਸ. ਅਟ੍ਠ. ੧੩੧੩; ਉਦਾ. ਅਟ੍ਠ. ੫੩; ਪਟਿ. ਮ. ਅਟ੍ਠ. ੧.੧.੭੬; ਨੇਤ੍ਤਿ. ਅਟ੍ਠ. ੪.੩੮) ਵਿਯ ਸਮ੍ਪਤ੍ਤਿਅਤ੍ਥੋ, ‘‘ਤਦ੍ਦਿਗੁਣ’’ਨ੍ਤਿਆਦੀਸੁ ਵਿਯ ਨ ਵਡ੍ਢਨਤ੍ਥੋ, ‘‘ਪਞ੍ਚ ਕਾਮਗੁਣਾ ਲੋਕੇ, ਮਨੋਛਟ੍ਠਾ ਪਵੇਦਿਤਾ’’ਤਿਆਦੀਸੁ (ਸੁ. ਨਿ. ੧੭੩) ਵਿਯ ਨ ਕੋਟ੍ਠਾਸਤ੍ਥੋ, ‘‘ਅਨ੍ਤਂ ਅਨ੍ਤਗੁਣ’’ਨ੍ਤਿਆਦੀਸੁ (ਦੀ. ਨਿ. ੨.੩੭੭; ਮ. ਨਿ. ੧.੧੧੦; ਖੁ. ਪਾ. ੩) ਵਿਯ ਨ ਅਨ੍ਤਭਾਗਤ੍ਥੋ, ਅਥ ਖੋ ਆਨਿਸਂਸਤ੍ਥੋਤਿ ਦਸ੍ਸੇਨ੍ਤੋ, ‘‘ਸਤਾਨਿਸਂਸਾ’’ਤਿ ਆਹ, ਤੇ ਆਨਿਸਂਸੇ ਸਰੂਪਤੋ ਦਸ੍ਸੇਤੁਂ, ‘‘ਆਯੁਸਤ’’ਨ੍ਤਿਆਦਿ ਵੁਤ੍ਤਂ. ਸਤਗੁਣਾਤਿ ਵਾ ਸਤਵਡ੍ਢਿਕਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਨਿਪ੍ਪਰਿਤਸਂ ਕਰੋਤੀਤਿ ਆਯੁਆਦੀਨਂ ਆਨਿਸਂਸਾਨਂ ਅਪਰਿਤ੍ਤਾਸਂ ਕਰੋਤਿ. ਅਥ ਵਾ ਨਿਪ੍ਪਰਿਤਸਂ ਕਰੋਤੀਤਿ ਆਯੁਆਦਿਨਿਮਿਤ੍ਤਂ ਅਪਰਿਤ੍ਤਾਸਂ ਕਰੋਤਿ. ਅਥ ਵਾ ਨਿਪ੍ਪਰਿਤਸਂ ਕਰੋਤੀਤਿ ਆਯੁਆਦੀਨਿ ਤਤੋ ਉਤ੍ਤਰਿਮ੍ਪਿ ਆਹਾਰਾਦਿਹੇਤੁ ਅਪਰਿਤ੍ਤਾਸਂ ਕਰੋਤਿ. ਅਤ੍ਤਭਾਵਵਿਨਿਮੁਤ੍ਤਸਞ੍ਚਰਣਸ੍ਸ ਅਭਾਵਾ, ‘‘ਭਵਸਤੇਪਿ ਵੁਤ੍ਤੇ ਅਯਮੇਵਤ੍ਥੋ’’ਤਿ ਵੁਤ੍ਤਂ. ਸਬ੍ਬਤ੍ਥਾਤਿ, ‘‘ਪੁਥੁਜ੍ਜਨਦੁਸ੍ਸੀਲੇ’’ਤਿਆਦੀਸੁ ਸਬ੍ਬਵਾਰੇਸੁ. ਨਯੋ ਨੇਤਬ੍ਬੋਤਿ, ‘‘ਆਯੁਸਹਸ੍ਸਂ ਵਣ੍ਣਸਹਸ੍ਸ’’ਨ੍ਤਿਆਦਿਕੋ ਨਯੋ.
ਸਾਸਨਾਵਤਰਣਂ ਨਾਮ ਯਾਵਦੇਵ ਵਟ੍ਟਦੁਕ੍ਖਨਿਤ੍ਥਰਣਤ੍ਥਂ, ਤਞ੍ਚ ਮਗ੍ਗਪਟਿਵੇਧਨਂ, ਤਸ੍ਮਾ ਨਿਬ੍ਬੇਧਭਾਗਿਯਸਰਣਗਮਨਂ ਸਿਕ੍ਖਾਪਦਸਮਾਦਾਨਂ ਪਬ੍ਬਜ੍ਜਾ ਉਪਸਮ੍ਪਦਾ ਸੀਲਪਰਿਪੂਰਣਂ ਅਧਿਚਿਤ੍ਤਸਿਕ੍ਖਾਨੁਯੋਗੋ ਵਿਪਸ੍ਸਨਾਭਾਵਨਾਤਿ ਸਬ੍ਬਾਪੇਸਾ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਤ੍ਤਿ ਏਵ ਹੋਤੀਤਿ ਆਹ – ‘‘ਤਿਸਰਣਂ ਗਤੋ ਉਪਾਸਕੋਪੀ’’ਤਿਆਦਿ. ਤਤ੍ਥ ਯਥਾ ਨਿਬ੍ਬੇਧਭਾਗਿਯੋ ਸਮਾਧਿ ਤਾਵ ਨਾਮ ਪਰਮ੍ਪਰਾਯ ਅਰਿਯਮਗ੍ਗਾਧਿਗਮਸ੍ਸ ਪਚ੍ਚਯਭਾਵਤੋ ਉਪਨਿਸ੍ਸਯੋ; ਤਥਾ ਨਿਬ੍ਬੇਧਭਾਗਿਯਂ ਸੀਲਪਰਿਪੂਰਣਂ ਉਪਸਮ੍ਪਦਾ ਪਬ੍ਬਜ੍ਜਾ ਉਪਾਸਕਸ੍ਸ ਦਸਸੁ ਪਞ੍ਚਸੁ ਸੀਲੇਸੁ ਪਤਿਟ੍ਠਾਨਂ ਅਨ੍ਤਮਸੋ ਸਰਣਾਦਿਗਮਨਮ੍ਪਿ ਨਿਬ੍ਬੇਧਭਾਗਿਯਂ ਅਰਿਯਮਗ੍ਗਾਧਿਗਮਸ੍ਸ ਉਪਨਿਸ੍ਸਯੋ ਹੋਤਿਯੇਵਾਤਿ, ‘‘ਸਬ੍ਬਾਪੇਸਾ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਤ੍ਤੀ’’ਤਿ ਵੁਤ੍ਤਾ. ਤਤ੍ਥ ਅਨਞ੍ਞਸਾਧਾਰਣ-ਵਿਜ੍ਜਾਚਰਣਾਦਿ-ਅਸਙ੍ਖ੍ਯੇਯ੍ਯਅਪਰਿਮੇਯ੍ਯ-ਗੁਣ-ਸਮੁਦਯਪੂਰਿਤੇ ਭਗਵਤਿ ਸਦ੍ਧਮ੍ਮੇ ਅਰਿਯਸਙ੍ਘੇ ਉਲ਼ਾਰਤਰਬਹੁਮਾਨਗਾਰਵਤਂ ਗਤੋ. ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਤਪ੍ਪਰਾਯਣਤਾਦਿਆਕਾਰਪ੍ਪਤ੍ਤੋ ਞਾਣਪਰਿਸੋਧਿਤੋ ਪਸਾਦੋ ਸਰਣਗਮਨਨ੍ਤਿ ਤੇਨ ਵਤ੍ਥੁਗਤੇਨ ਪਸਾਦੇਨ ਪਰਿਭਾਵਿਤੇ ਸਨ੍ਤਾਨੇ ਕਤਂ ਪੁਞ੍ਞਕ੍ਖੇਤ੍ਤਸਮ੍ਪਤ੍ਤਿਯਾ ਮਹਪ੍ਫਲਂ ਮਹਾਨਿਸਂਸਮੇਵ ਹੋਤੀਤਿ ਆਹ – ‘‘ਤਸ੍ਮਿਂ ਦਿਨ੍ਨਦਾਨਮ੍ਪਿ ਅਸਙ੍ਖ੍ਯੇਯ੍ਯਂ ਅਪ੍ਪਮੇਯ੍ਯ’’ਨ੍ਤਿ. ਤਯਿਦਂ ਸਰਣਂ ਵਤ੍ਥੁਤ੍ਤਯੇ ਪਸਾਦਭਾਵੇਨ ਅਜ੍ਝਾਸਯਸਮ੍ਪਤ੍ਤਿਮਤ੍ਤਂ, ਤਾਦਿਸਸ੍ਸ ਪਨ ਪਞ੍ਚਸੀਲਂ ਅਜ੍ਝਾਸਯਸਮ੍ਪਤ੍ਤਿਉਪਥਮ੍ਭਿਤੋ ਕਾਯਵਚੀਸਂਯਮੋਤਿ ਤਤ੍ਥ ਦਿਨ੍ਨਂ ਤਤੋ ਉਤ੍ਤਰਿ ਮਹਪ੍ਫਲਨ੍ਤਿ, ਦਸਸੀਲਂ ਪਨ ਪਰਿਪੁਣ੍ਣੁਪੋਸਥਸੀਲਂ, ਤਤ੍ਥ ਦਿਨ੍ਨਂ ਮਹਪ੍ਫਲਨ੍ਤਿ, ‘‘ਤਤੋ ਉਤ੍ਤਰਿ ਮਹਪ੍ਫਲ’’ਨ੍ਤਿ ਵੁਤ੍ਤਂ. ਸਾਮਣੇਰਸੀਲਾਦੀਨਂ ਪਨ ਉਤ੍ਤਰਿ ਵਿਸਿਟ੍ਠਤਰਾਦਿਭਾਵਤੋ ਤਤ੍ਥ ਤਤ੍ਥ ਦਿਨ੍ਨਸ੍ਸ ਵਿਸੇਸਮਹਪ੍ਫਲਤਾ ਵੁਤ੍ਤਾ.
ਮਗ੍ਗਸਮਙ੍ਗਿਤਾ ਨਾਮ ਮਗ੍ਗਚਿਤ੍ਤਕ੍ਖਣਪਰਿਚ੍ਛਿਨ੍ਨਾ, ਤਸ੍ਮਿਞ੍ਚ ਖਣੇ ਕਥਂ ਦਾਤੁਂ ਪਟਿਗ੍ਗਹੇਤੁਞ੍ਚ ਸਮ੍ਭਵਤੀਤਿ ਚੋਦੇਤਿ ‘‘ਕਿਂ ਪਨ ਮਗ੍ਗਸਮਙ੍ਗਿਸ੍ਸ ਸਕ੍ਕਾ ਦਾਨਂ ਦਾਤੁ’’ਨ੍ਤਿ. ਇਤਰੋ ਤਾਦਿਸੇ ਸਤਿ ਸਮਯੇਤਿ ਦਸ੍ਸੇਨ੍ਤੋ, ‘‘ਆਮ ਸਕ੍ਕਾ’’ਤਿ ਪਟਿਜਾਨਿਤ੍ਵਾ, ‘‘ਆਰਦ੍ਧਵਿਪਸ੍ਸਕੋ’’ਤਿਆਦਿਨਾ ਤਮਤ੍ਥਂ ਵਿਵਰਤਿ. ਤਸ੍ਮਿਂ ਖਣੇਤਿ ਤਸ੍ਮਿਂ ਪਕ੍ਖਿਪਨਕ੍ਖਣੇ. ਯਦਿ ਅਟ੍ਠਮਕਸ੍ਸ ਸੋਤਾਪਨ੍ਨਸ੍ਸ ਦਿਨ੍ਨਦਾਨਂ ਫਲਤੋ ਅਸਙ੍ਖ੍ਯੇਯ੍ਯਮੇਵ, ਕੋ ਨੇਸਂ ਵਿਸੇਸੋਤਿ ਆਹ ‘‘ਤਤ੍ਥਾ’’ਤਿਆਦਿ. ਤੇਨ ਸਤਿਪਿ ਅਸਙ੍ਖ੍ਯੇਯ੍ਯਭਾਵਸਾਮਞ੍ਞੇ ਅਤ੍ਥਿ ਨੇਸਂ ਅਪ੍ਪਬਹੁਭਾਵੋ ਸਂਵਟ੍ਟਟ੍ਠਾਯੀ ਅਸਙ੍ਖ੍ਯੇਯ੍ਯਮਹਾਕਪ੍ਪਾਸਙ੍ਖ੍ਯੇਯ੍ਯਾਨਂ ਵਿਯਾਤਿ ਦਸ੍ਸੇਤਿ. ਮਗ੍ਗਸਮਙ੍ਗੀਨਂ ਤੇਨ ਤੇਨ ਓਧਿਨਾ ਸਂਕਿਲੇਸਧਮ੍ਮਾਨਂ ਪਹੀਯਮਾਨਤ੍ਤਾ ਵੋਦਾਨਧਮ੍ਮਾਨਂ ਵਡ੍ਢਮਾਨਤ੍ਤਾ ਅਪਰਿਯੋਸਿਤਕਿਚ੍ਚਤ੍ਤਾ ਅਪਰਿਪੁਣ੍ਣਗੁਣਤਾ, ਪਰਿਯੋਸਿਤਕਿਚ੍ਚਤ੍ਤਾ ਫਲਸਮਙ੍ਗੀਨਂ ਪਰਿਪੁਣ੍ਣਗੁਣਤਾਤਿ ਤਂਤਂਮਗ੍ਗਟ੍ਠੇਹਿ ਫਲਟ੍ਠਾਨਂ ਖੇਤ੍ਤਾਤਿਸਯਤਾ ਵੇਦਿਤਬ੍ਬਾ. ਹੇਟ੍ਠਿਮਹੇਟ੍ਠਿਮੇਹਿ ਪਨ ਮਗ੍ਗਟ੍ਠੇਹਿ ਉਪਰਿਮਾਨਂ ਮਗ੍ਗਟ੍ਠਾਨਂ ਫਲਟ੍ਠੇਹਿ ਫਲਟ੍ਠਾਨਂ ਉਤ੍ਤਰਿਤਰਤਾ ਪਾਕਟਾ ਏਵ. ਤਥਾ ਹਿ ਉਪਰਿਮਾਨਂ ਦਿਨ੍ਨਦਾਨਸ੍ਸ ਮਹਪ੍ਫਲਤਾ ਵੁਤ੍ਤਾ.
੩੮੦. ਕਾਮਞ੍ਚੇਤ੍ਥ ਬੁਦ੍ਧਪ੍ਪਮੁਖੇ ਉਭਤੋਸਙ੍ਘੇ ਕੇਵਲੇ ਚ ਭਿਕ੍ਖੁਸਙ੍ਘੇ ਦਾਨਂ ਅਤ੍ਥਿ ਏਵ, ਨ ਪਨ ਬੁਦ੍ਧਪ੍ਪਮੁਖੇ ਭਿਕ੍ਖੁਸਙ੍ਘੇ, ਤਂ ਪਨ ਬੁਦ੍ਧਪ੍ਪਮੁਖਉਭਤੋਸਙ੍ਘੇਨੇਵ ਸਙ੍ਗਹਿਤਨ੍ਤਿ ਅਵਿਰੁਦ੍ਧਂ. ਨ ਪਾਪੁਣਨ੍ਤਿ ਮਹਪ੍ਫਲਭਾਵੇਨ ਸਦਿਸਤਮ੍ਪਿ, ਕੁਤੋ ਅਧਿਕਤਂ.
‘‘ਤਥਾਗਤੇ ਪਰਿਨਿਬ੍ਬੁਤੇ ਉਭਤੋਸਙ੍ਘਸ੍ਸ’’ ਇਚ੍ਚੇਵ ਵੁਤ੍ਤਤ੍ਤਾ – ‘‘ਕਿਂ ਪਨਾ’’ਤਿਆਦਿਨਾ ਚੋਦੇਤਿ. ਇਤਰੋ ਪਰਿਨਿਬ੍ਬੁਤੇ ਤਥਾਗਤੇ ਤਂ ਉਦ੍ਦਿਸ੍ਸ ਗਨ੍ਧਪੁਪ੍ਫਾਦਿਪਰਿਚ੍ਚਾਗੋ ਵਿਯ ਚੀਵਰਾਦਿਪਰਿਚ੍ਚਾਗੋਪਿ ਮਹਪ੍ਫਲੋ ਹੋਤਿਯੇਵਾਤਿ ਕਤ੍ਵਾ ਪਟਿਪਜ੍ਜਨਵਿਧਿਂ ਦਸ੍ਸੇਤੁਂ, ‘‘ਉਭਤੋਸਙ੍ਘਸ੍ਸਾ’’ਤਿਆਦਿ ਵੁਤ੍ਤਂ. ‘‘ਏਤ੍ਤਕਾਯੇਵ, ਭਿਕ੍ਖੂ ਉਦ੍ਦਿਸਥਾ’’ਤਿ ਏਵਂ ਪਰਿਚ੍ਛੇਦਸ੍ਸ ਅਕਰਣੇਨ ਉਪਚਾਰਸੀਮਾਪਰਿਯਾਪਨ੍ਨਾਨਂ ਖੇਤ੍ਤਪਰਿਯਾਪਨ੍ਨਾਨਂ ਵਸੇਨ ਅਪਰਿਚ੍ਛਿਨ੍ਨਕਮਹਾਭਿਕ੍ਖੁਸਙ੍ਘੇ.
ਗੋਤ੍ਤਂ ਵੁਚ੍ਚਤਿ ਸਾਧਾਰਣਨਾਮਂ, ਮਤ੍ਤਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਤਸ੍ਮਾ ਸਮਣਾਤਿ ਗੋਤ੍ਤਮਤ੍ਤਂ ਅਨੁਭਵਨ੍ਤਿ ਧਾਰੇਨ੍ਤੀਤਿ ਗੋਤ੍ਰਭੁਨੋ. ਤੇਨਾਹ ‘‘ਨਾਮਮਤ੍ਤਸਮਣਾ’’ਤਿ. ਦਿਟ੍ਠਿਸੀਲਸਾਮਞ੍ਞੇਨ ਸਂਹਤੋ ਸਮਣਗਣੋ ਸਙ੍ਘੋ, ਤਸ੍ਮਾ ਸਙ੍ਘੋ ਦੁਸ੍ਸੀਲੋ ਨਾਮ ਨਤ੍ਥਿ. ਗੁਣਸਙ੍ਖਾਯਾਤਿ ਆਨਿਸਂਸਗਣਨਾਯ, ਮਹਪ੍ਫਲਤਾਯਾਤਿ ਅਤ੍ਥੋ. ਕਾਸਾਵ…ਪੇ… ਅਸਙ੍ਖ੍ਯੇਯ੍ਯਾਤਿ ਵੁਤ੍ਤਾ ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਤ੍ਤਾ. ਯਥਾ ਪਨ ਸਙ੍ਘਂ ਉਦ੍ਦਿਸ੍ਸ ਦਾਨਂ ਹੋਤਿ, ਤਂ ਵਿਧਿਂ ਦਸ੍ਸੇਤੁਂ, ‘‘ਸਙ੍ਘਗਤਾ ਦਕ੍ਖਿਣਾ’’ਤਿਆਦਿ ਵੁਤ੍ਤਂ. ਤਤ੍ਥ ਚਿਤ੍ਤੀਕਾਰਨ੍ਤਿ ਗਾਰਵਂ.
ਸਙ੍ਘਤੋ ਨ ਪੁਗ੍ਗਲਤੋ. ਅਞ੍ਞਥਤ੍ਤਂ ਆਪਜ੍ਜਤੀਤਿ ‘‘ਇਮਸ੍ਸ ਮਯਾ ਦਿਨ੍ਨਂ ਸਙ੍ਘਸ੍ਸ ਦਿਨ੍ਨਂ ਹੋਤੀ’’ਤਿ ਏਵਂ ਚਿਤ੍ਤਂ ਅਨੁਪ੍ਪਾਦੇਤ੍ਵਾ, ‘‘ਸਙ੍ਘਸ੍ਸ ਦਸ੍ਸਾਮੀ’’ਤਿ ਦੇਯ੍ਯਧਮ੍ਮਂ ਪਟਿਯਾਦੇਤ੍ਵਾ ਸਾਮਣੇਰਸ੍ਸ ਨਾਮ ਦਾਤਬ੍ਬਂ ਜਾਤਨ੍ਤਿ ਅਞ੍ਞਥਤ੍ਤਂ ਆਪਜ੍ਜਤਿ; ਤਸ੍ਮਾ ਤਸ੍ਸ ਦਕ੍ਖਿਣਾ ਸਙ੍ਘਗਤਾ ਨ ਹੋਤਿਯੇਵ ਪੁਗ੍ਗਲਵਸੇਨ ਚਿਤ੍ਤਸ੍ਸ ਪਰਿਣਾਮਿਤਤ੍ਤਾ. ਨਿਬ੍ਬੇਮਤਿਕੋ ਹੁਤ੍ਵਾਤਿ ‘‘ਕਿਂ ਨੁ ਖੋ ਮਯਾ ਇਮਸ੍ਸ ਦਿਨ੍ਨਂ ਹੋਤਿ ਵਾ ਨ ਵਾ’’ਤਿ ਵਿਮਤਿਂ ਅਨੁਪ੍ਪਾਦੇਤ੍ਵਾ, ‘‘ਯੋ ਪਨਾ’’ਤਿਆਦਿਨਾ ਵੁਤ੍ਤਾਕਾਰੇਨ ਕਰੋਤਿ.
ਤਤ੍ਥਾਤਿਆਦਿਨਾ ਵੁਤ੍ਤਸ੍ਸੇਵਤ੍ਥਸ੍ਸ ਪਾਕਟਕਰਣਤ੍ਥਂ ਵਤ੍ਥੁਂ ਨਿਦਸ੍ਸੇਤਿ, ‘‘ਪਰਸਮੁਦ੍ਦਵਾਸਿਨੋ’’ਤਿਆਦਿਨਾ. ਓਪੁਞ੍ਜਾਪੇਤ੍ਵਾ ਪਰਿਭਣ੍ਡਂ ਕਾਰੇਤ੍ਵਾ, ਹਰਿਤਗੋਮਯੇਨ ਉਪਲਿਮ੍ਪਿਤ੍ਵਾਤਿ ਅਤ੍ਥੋ. ਕਾਸਾਵਕਣ੍ਠਸਙ੍ਘਸ੍ਸਾਤਿ ਕਾਸਾਵਕਣ੍ਠਸਮੂਹਸ੍ਸ. ਕੋ ਸੋਧੇਤੀਤਿ ਮਹਪ੍ਫਲਭਾਵਕਰਣੇਨ ਕੋ ਵਿਸੋਧੇਤਿ. ਮਹਪ੍ਫਲਭਾਵਾਪਤ੍ਤਿਯਾ ਹਿ ਦਕ੍ਖਿਣਾ ਵਿਸੁਜ੍ਝਤਿ ਨਾਮ. ਤਤ੍ਥ ਯੇਸਂ ਹਤ੍ਥੇ ਦਿਨ੍ਨਂ, ਤੇਸਂ ਵਸੇਨ ਪਟਿਗ੍ਗਾਹਕਤੋ ਦਕ੍ਖਿਣਾਯ ਵਿਸੁਦ੍ਧਤ੍ਤਾ, – ‘‘ਤਦਾਪਾਹਂ, ਆਨਨ੍ਦ, ਸਙ੍ਘਗਤਂ ਦਕ੍ਖਿਣਂ ਅਸਙ੍ਖ੍ਯੇਯ੍ਯਂ ਅਪ੍ਪਮੇਯ੍ਯਂ ਵਦਾਮੀ’’ਤਿ (ਮ. ਨਿ. ੩.੩੮੦) ਚ ਵੁਤ੍ਤਂ, ਤਸ੍ਮਾ ਕਮ੍ਮਵਸੇਨੇਵ ਦਕ੍ਖਿਣਾਵਿਸੁਦ੍ਧਿਂ ਪੁਚ੍ਛਤਿ. ਇਤਰੋ ਅਰਿਯਸਙ੍ਘੇ ਦਿਨ੍ਨਦਕ੍ਖਿਣਾਯ ਨਿਬ੍ਬਿਸਿਟ੍ਠਂ ਕਤ੍ਵਾ ਵੁਤ੍ਤਤ੍ਤਾ ਮਤ੍ਥਕਪ੍ਪਤ੍ਤਸ੍ਸੇਵ ਅਰਿਯਸਙ੍ਘਸ੍ਸ ਵਸੇਨ ਦਕ੍ਖਿਣਾਵਿਸੁਦ੍ਧਿਂ ਦਸ੍ਸੇਨ੍ਤੋ, ‘‘ਸਾਰਿਪੁਤ੍ਤ…ਪੇ… ਸੋਧੇਨ੍ਤੀ’’ਤਿ ਵਤ੍ਵਾ ਪੁਨ, ‘‘ਯੇ ਕੇਚਿ ਅਰਹਨ੍ਤੋ ਸੋਧੇਨ੍ਤੀ’’ਤਿ ਦਸ੍ਸੇਨ੍ਤੋ, ‘‘ਅਪਿਚਾ’’ਤਿਆਦਿਮਾਹ. ਥੇਰਾ ਚਿਰਪਰਿਨਿਬ੍ਬੁਤਾਤਿ ਇਦਂ ਅਜ੍ਜਤਨਾਨਮ੍ਪਿ ਅਰਿਯਾਨਂ ਸਾਵਕਤਂ ਦਸ੍ਸੇਨ੍ਤੇਨ ਮਗ੍ਗਸੋਧਨਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ, ਨ ਉਦ੍ਦਿਸ੍ਸ ਪੁਞ੍ਞਕਰਣੇ ਸਤਿ ਅਕਰਣਪ੍ਪਤ੍ਤਿਯਾ. ਏਵਞ੍ਹਿ ‘‘ਅਸੀਤਿਮਹਾਥੇਰਾ ਸੋਧੇਨ੍ਤੀ’’ਤਿ ਇਦਂ ਸੁਵੁਤ੍ਤਂ ਹੋਤਿ, ਨ ਅਞ੍ਞਥਾ.
‘‘ਸਙ੍ਘਗਤਾਯ ਦਕ੍ਖਿਣਾਯਾ’’ਤਿ ਕਾਮਞ੍ਚੇਤਂ ਸਾਧਾਰਣਵਚਨਂ, ਤਥਾਪਿ ਤਤ੍ਥ ਤਤ੍ਥ ਪੁਗ੍ਗਲਵਿਸੇਸੋ ਞਾਤਬ੍ਬੋਤਿ ਦਸ੍ਸੇਨ੍ਤੋ, ‘‘ਅਤ੍ਥਿ ਬੁਦ੍ਧਪ੍ਪਮੁਖੋ ਸਙ੍ਘੋ’’ਤਿਆਦਿਮਾਹ. ਨ ਉਪਨੇਤਬ੍ਬੋ ਭਗਵਤੋ ਕਾਲੇ ਭਿਕ੍ਖੂਨਂ ਅਭਿਞ੍ਞਾਪਟਿਸਮ੍ਭਿਦਾਗੁਣਵਸੇਨ ਅਤਿਵਿਯ ਉਲ਼ਾਰਭਾਵਤੋ, ਏਤਰਹਿ ਤਦਭਾਵਤੋ. ਏਤਰਹਿ ਸਙ੍ਘੋ…ਪੇ… ਨ ਉਪਨੇਤਬ੍ਬੋਤਿ ਏਤ੍ਥ ਨਯਾਨੁਸਾਰੇਨ ਅਤ੍ਥੋ ਵਤ੍ਤਬ੍ਬੋ. ਤੇਨ ਤੇਨੇਵ ਸਮਯੇਨਾਤਿ ਤਸ੍ਸ ਤਸ੍ਸ ਕਾਲਸ੍ਸ ਸਮ੍ਪਤ੍ਤਿਵਿਪਤ੍ਤਿਮੁਖੇਨ ਪਟਿਪਤ੍ਤਿਯਾ ਉਲ਼ਾਰਤਂ ਅਨੁਲ਼ਾਰਤਞ੍ਚ ਉਲ੍ਲਿਙ੍ਗੇਤਿ. ਯਤ੍ਥ ਹਿ ਭਿਕ੍ਖੂ ਗੁਣੇਹਿ ਸਬ੍ਬਸੋ ਪਰਿਪੁਣ੍ਣਾ ਹੋਨ੍ਤਿ, ਤਸ੍ਮਿਂ ਸਮਯੇ ਸਙ੍ਘਗਤਾ ਦਕ੍ਖਿਣਾ ਇਤਰਸ੍ਮਿਂ ਸਮਯੇ ਦਕ੍ਖਿਣਤੋ ਮਹਪ੍ਫਲਤਰਾਤਿ ਦਟ੍ਠਬ੍ਬਾ. ਸਙ੍ਘੇ ਚਿਤ੍ਤੀਕਾਰਂ ਕਾਤੁਂ ਸਕ੍ਕੋਨ੍ਤਸ੍ਸਾਤਿ ਸੁਪ੍ਪਟਿਪਨ੍ਨਤਾਦਿਂ ਸਙ੍ਘੇ ਆਵਜ੍ਜਿਤ੍ਵਾ ਸਙ੍ਘਗਤੇਨ ਪਸਾਦੇਨ ਸਙ੍ਘਸ੍ਸ ਸਮ੍ਮੁਖਾ ਵਿਯ ਤਸ੍ਮਿਂ ਪੁਗ੍ਗਲੇ ਚ ਗਾਰਵਵਸੇਨ ਦੇਨ੍ਤਸ੍ਸ ਪੁਥੁਜ੍ਜਨਸਮਣੇ ਦਿਨ੍ਨਂ ਮਹਪ੍ਫਲਤਰਂ ਸਙ੍ਘਤੋ ਉਦ੍ਦਿਸਿਤ੍ਵਾ ਗਹਿਤਤ੍ਤਾ, ‘‘ਸਙ੍ਘਸ੍ਸ ਦੇਮੀ’’ਤਿਯੇਵ ਦਿਨ੍ਨਤ੍ਤਾ ਚ.
ਏਸੇਵ ਨਯੋਤਿ ਇਮਿਨਾ, ‘‘ਸੋਤਾਪਨ੍ਨੇ ਦਿਨ੍ਨਂ ਮਹਪ੍ਫਲਤਰ’’ਨ੍ਤਿ ਏਵਮਾਦਿਂ ਅਤਿਦਿਸਤਿ. ਆਦਿ-ਸਦ੍ਦੇਨ ਉਦ੍ਦਿਸਿਤ੍ਵਾ ਗਹਿਤੋ ਸਕਦਾਗਾਮੀ, ਪਾਟਿਪੁਗ੍ਗਲਿਕੋ ਅਨਾਗਾਮੀਤਿ ਏਵਮਾਦਿ ਸਙ੍ਗਹਿਤਂ. ਮਹਪ੍ਫਲਤਰਮੇਵ. ਤੇਨਾਹ ਭਗਵਾ – ‘‘ਨ ਤ੍ਵੇਵਾਹਂ, ਆਨਨ੍ਦ, ਕੇਨਚਿ ਪਰਿਯਾਯੇਨ ਸਙ੍ਘਗਤਾਯ ਦਕ੍ਖਿਣਾਯ ਪਾਟਿਪੁਗ੍ਗਲਿਕਂ ਦਾਨਂ ਮਹਪ੍ਫਲਤਰਂ ਵਦਾਮੀ’’ਤਿ (ਮ. ਨਿ. ੩.੩੮੦). ਯਦਿ ਖੀਣਾਸਵੇ ਦਿਨ੍ਨਦਾਨਤੋ ਸਙ੍ਘਤੋ ਉਦ੍ਦਿਸਿਤ੍ਵਾ ਗਹਿਤਦੁਸ੍ਸੀਲੇਪਿ ਦਿਨ੍ਨਦਾਨਂ ਮਹਪ੍ਫਲਂ, ਏਵਂ ਸਨ੍ਤੇ – ‘‘ਸੀਲਵਤੋ, ਮਹਾਰਾਜ, ਦਿਨ੍ਨਂ ਮਹਪ੍ਫਲਂ, ਨੋ ਤਥਾ ਦੁਸ੍ਸੀਲੇ’’ਤਿ ਇਦਂ ਕਥਨ੍ਤਿ ਆਹ – ‘‘ਤਂ ਇਮਂ ਨਯਂ ਗਹਾਯਾ’’ਤਿਆਦਿ. ਸਙ੍ਘਤੋ ਉਦ੍ਦਿਸਿਤ੍ਵਾ ਗਹਣਵਿਧਿਂ ਪਹਾਯ ਦੁਸ੍ਸੀਲਸ੍ਸੇਵ ਗਹਣਵਸੇਨ ਵੁਤ੍ਤਂ. ਇਮਸ੍ਮਿਂ ਚਤੁਕ੍ਕੇ ਦਟ੍ਠਬ੍ਬਨ੍ਤਿ ਇਮਸ੍ਸ ਪਦਸ੍ਸ ਵਸੇਨ ਦਟ੍ਠਬ੍ਬਂ. ਤਤ੍ਥ ਹਿ ‘‘ਪਟਿਗ੍ਗਾਹਕਾ ਹੋਨ੍ਤਿ ਦੁਸ੍ਸੀਲਾ ਪਾਪਧਮ੍ਮਾ’’ਤਿ ਆਗਤਂ.
੩੮੧. ਵਿਸੁਜ੍ਝਤੀਤਿ ਨ ਕਿਲਿਸ੍ਸਤਿ, ਮਹਾਜੁਤਿਕਾਰੀ ਮਹਾਵਿਪ੍ਫਾਰਾ ਹੋਤੀਤਿ ਅਤ੍ਥੋ. ਸੁਚਿਧਮ੍ਮੋਤਿ ਰਾਗਾਦਿਅਸੁਚਿਵਿਧਮਨੇਨ ਸੁਚਿਸਭਾਵੋ. ਨ ਪਾਪਧਮ੍ਮੋਤਿ ਨ ਨਿਹੀਨਸਭਾਵੋ ਪਾਪਕਿਰਿਯਾਯ. ਅਕੁਸਲਧਮ੍ਮੋ ਹਿ ਏਕਨ੍ਤਨਿਹੀਨੋ. ਜੂਜਕੋ ਸੀਲਵਾ ਕਲ੍ਯਾਣਧਮ੍ਮੋ ਨ ਹੋਤਿ. ਤਸ੍ਸ ਮਹਾਬੋਧਿਸਤ੍ਤਸ੍ਸ ਅਤ੍ਤਨੋ ਪੁਤ੍ਤਦਾਨਂ ਦਾਨਪਾਰਮਿਯਾ ਮਤ੍ਥਕਂ ਗਣ੍ਹਨ੍ਤਂ ਮਹਾਪਥਵੀਕਮ੍ਪਨਸਮਤ੍ਥਂ ਜਾਤਂ, ਸ੍ਵਾਯਂ ਦਾਨਗੁਣੋ ਵੇਸ੍ਸਨ੍ਤਰਮਹਾਰਞ੍ਞਾ ਕਥੇਤਬ੍ਬੋਤਿ.
ਉਦ੍ਧਰਤੀਤਿ ਬਹੁਲਂ ਕਤਪਾਪਕਮ੍ਮਵਸੇਨ ਲਦ੍ਧਵਿਨਿਪਾਤਤੋ ਉਦ੍ਧਰਤਿ. ਤਸ੍ਮਾ ਨਤ੍ਥਿ ਮਯ੍ਹਂ ਕਿਞ੍ਚਿ ਚਿਤ੍ਤਸ੍ਸ ਅਞ੍ਞਥਤ੍ਤਨ੍ਤਿ ਅਧਿਪ੍ਪਾਯੋ.
ਪੇਤਦਕ੍ਖਿਣਨ੍ਤਿ ਪੇਤੇ ਉਦ੍ਦਿਸ੍ਸ ਦਾਤਬ੍ਬਦਕ੍ਖਿਣਂ. ਪਾਪਿਤਕਾਲੇਯੇਵਾਤਿ, ‘‘ਇਦਂ ਦਾਨਂ ਅਸੁਕਸ੍ਸ ਪੇਤਸ੍ਸ ਹੋਤੂ’’ਤਿ ਉਦ੍ਦਿਸਨਵਸੇਨ ਪਤ੍ਤੇ ਪਾਪਿਤਕਾਲੇਯੇਵ. ਅਸ੍ਸਾਤਿ ਪੇਤਸ੍ਸ. ਪਾਪੁਣੀਤਿ ਫਲਸਮਾਪਤ੍ਤਿਯਾ ਵਸੇਨ ਪਾਪੁਣਿ. ਅਯਞ੍ਹਿ ਪੇਤੇ ਉਦ੍ਦਿਸ੍ਸ ਦਾਨੇ ਧਮ੍ਮਤਾ.
ਤਦਾ ਕੋਸਲਰਞ੍ਞੋ ਪਰਿਚ੍ਚਾਗਵਸੇਨ ਅਤਿਵਿਯ ਉਲ਼ਾਰਜ੍ਝਾਸਯਤਂ, ਬੁਦ੍ਧਪ੍ਪਮੁਖਸ੍ਸ ਚ ਭਿਕ੍ਖੁਸਙ੍ਘਸ੍ਸ ਉਕ੍ਕਂਸਗਤਗੁਣਵਿਸਿਟ੍ਠਤਂ ਸਨ੍ਧਾਯਾਹ, ‘‘ਅਸਦਿਸਦਾਨਂ ਕਥੇਤਬ੍ਬ’’ਨ੍ਤਿ.
ਅਸਾਰਮ੍ਪਿ ਖੇਤ੍ਤਨ੍ਤਿ ਸਾਰਹੀਨਂ ਦੁਕ੍ਖੇਤ੍ਤਂ. ਸਮਯੇਤਿ ਕਸਨਾਰਹੇ ਕਾਲੇ. ਪਂਸੁਂ ਅਪਨੇਤ੍ਵਾਤਿ ਨਿਸ੍ਸਾਰਂ ਪਂਸੁਂ ਨੀਹਰਿਤ੍ਵਾ. ਸਾਰਬੀਜਾਨੀਤਿ ਸਭਾਵਤੋ ਅਭਿਸਙ੍ਖਾਰਤੋ ਚ ਸਾਰਭੂਤਾਨਿ ਬੀਜਾਨਿ. ਪਤਿਟ੍ਠਪੇਤ੍ਵਾਤਿ ਵਪਿਤ੍ਵਾ. ਏਵਨ੍ਤਿ ਯਥਾ ਕਸ੍ਸਕੋ ਅਤ੍ਤਨੋ ਪਯੋਗਸਮ੍ਪਤ੍ਤਿਯਾ ਅਸਾਰੇਪਿ ਖੇਤ੍ਤੇ ਫਲਂ ਅਧਿਗਚ੍ਛਤਿ. ਏਵਂ ਸੀਲਵਾ ਅਤ੍ਤਨੋ ਪਯੋਗਸਮ੍ਪਤ੍ਤਿਯਾ ਦੁਸ੍ਸੀਲਸ੍ਸਪਿ ਦਤ੍ਵਾ ਫਲਂ ਮਹਨ੍ਤਂ ਅਧਿਗਚ੍ਛਤਿ. ਇਮਿਨਾ ਉਪਾਯੇਨਾਤਿ ਇਮਿਨਾ ਪਠਮਪਦੇ ਵੁਤ੍ਤਨਯੇਨ. ਸਬ੍ਬਪਦੇਸੂਤਿ ਸਬ੍ਬਕੋਟ੍ਠਾਸੇਸੁ ਵਿਸੁਜ੍ਝਨਂ ਵੁਤ੍ਤਂ, ਤਤਿਯਪਦੇ ਪਨ ਵਿਸੁਜ੍ਝਨਂ ਪਟਿਕ੍ਖਿਤ੍ਤਮੇਵ.
੩੮੨. ਅਰਹਤੋ ਦਿਨ੍ਨਦਾਨਮੇਵ ਅਗ੍ਗਂ ਦਾਨਚੇਤਨਾਯ ਕੇਨਚਿ ਉਪਕ੍ਕਿਲੇਸੇਨ ਅਨੁਪਕ੍ਕਿਲਿਟ੍ਠਤ੍ਤਾ, ਪਟਿਗ੍ਗਾਹਕਸ੍ਸ ਅਗ੍ਗਦਕ੍ਖਿਣੇਯ੍ਯਤ੍ਤਾ. ਤੇਨਾਹ – ‘‘ਭਵਾਲਯਸ੍ਸ ਭਵਪਤ੍ਥਨਾਯ ਅਭਾਵਤੋ’’ਤਿ, ‘‘ਉਭਿਨ੍ਨਮ੍ਪੀ’’ਤਿ ਵਚਨਸੇਸੋ. ਖੀਣਾਸਵੋ ਦਾਨਫਲਂ ਨ ਸਦ੍ਦਹਤੀਤਿ ਇਦਂ ਤਸ੍ਸ ਅਪ੍ਪਹੀਨਕਿਲੇਸਜਨਸ੍ਸ ਵਿਯ ਕਮ੍ਮਕਮ੍ਮਫਲਾਨਂ ਸਦ੍ਦਹਨਾਕਾਰੇਨ ਪਵਤ੍ਤਿ ਨਤ੍ਥੀਤਿ ਕਤ੍ਵਾ ਵੁਤ੍ਤਂ, ਯਤੋ ਅਰਹਾ ‘‘ਅਸਦ੍ਧੋ ਅਕਤਞ੍ਞੂ ਚ…ਪੇ… ਪੋਰਿਸੋ’’ਤਿ (ਧ. ਪ. ੯੭) ਥੋਮੀਯਤਿ. ਅਸਦ੍ਦਹਨਂ ਅਨੁਮਾਨਪਕ੍ਖਿਕਂ, ਅਨੁਮਾਨਞ੍ਚ ਸਂਸਯਪੁਬ੍ਬਕਂ, ਨਿਸ੍ਸਨ੍ਦਿਦ੍ਧੋ ਚ ਕਮ੍ਮਕਮ੍ਮਫਲੇਸੁ ਪਚ੍ਚਕ੍ਖਭਾਵਂ ਗਤੋ. ਤਮੇਵ ਹਿ ਨਿਚ੍ਛਿਤਭਾਵਸਿਦ੍ਧਂ ਨਿਸ੍ਸਨ੍ਦਿਦ੍ਧਤਂ ਸਨ੍ਧਾਯ – ‘‘ਦਾਨਫਲਂ ਸਦ੍ਦਹਨ੍ਤਾ’’ਤਿਆਦਿ ਵੁਤ੍ਤਂ. ਯਦਿ ਏਵਂ ਤੇਨ ਕਤਕਮ੍ਮਂ ਕਮ੍ਮਲਕ੍ਖਣਪ੍ਪਤ੍ਤਂ ਹੋਤੀਤਿ ਆਹ ‘‘ਖੀਣਾਸਵੇਨਾ’’ਤਿਆਦਿ. ਤੇਨੇਵਾਹ – ‘‘ਨਿਚ੍ਛਨ੍ਦਰਾਗਤ੍ਤਾ’’ਤਿ, ਏਤਞ੍ਚ ਲਕ੍ਖਣਵਚਨਂ, ਕੇਨਚਿ ਕਿਲੇਸੇਨ ਅਨੁਪਕ੍ਕਿਲਿਟ੍ਠਤ੍ਤਾਤਿ ਅਧਿਪ੍ਪਾਯੋ. ਅਸ੍ਸਾਤਿ ਖੀਣਾਸਵਸ੍ਸ ਦਾਨਂ.
ਕਿਂ ਪਨ ਸਮ੍ਮਾਸਮ੍ਬੁਦ੍ਧੇਨਾਤਿਆਦਿਨਾ ਦਾਯਕਤੋ ਦਕ੍ਖਿਣਾਵਿਸੁਦ੍ਧਿ ਚੋਦਿਤਾ, ਸਾਰਿਪੁਤ੍ਤਤ੍ਥੇਰੇਨਾਤਿਆਦਿਨਾ ਪਨ ਪਟਿਗ੍ਗਾਹਕਤੋਤਿ ਵਦਨ੍ਤਿ; ਤਦਯੁਤ੍ਤਂ, ਸਾਵਕਸ੍ਸ ਮਹਪ੍ਫਲਭਾਵੇ ਸਂਸਯਾਭਾਵਤੋ, ਹੇਟ੍ਠਾ ਨਿਚ੍ਛਿਤਤ੍ਤਾ ਚ, ਤਸ੍ਮਾ ਉਭਯੇਨਪਿ ਦਾਯਕਤੋ ਦਕ੍ਖਿਣਾਵਿਸੁਦ੍ਧਿ ਏਵ ਚੋਦਿਤਾ. ਸਾ ਹਿ ਇਧ ਸਾਧਾਰਣਵਸੇਨ ਨਿਚ੍ਛਿਤਤ੍ਤਾ ਸਂਸਯਵਤ੍ਥੁ. ਤੇਨਾਹ – ‘‘ਸਮ੍ਮਾਸਮ੍ਬੁਦ੍ਧੇਨ…ਪੇ… ਵਦਨ੍ਤੀ’’ਤਿ. ਸਮ੍ਮਾਸਮ੍ਬੁਦ੍ਧਂ ਹੀਤਿਆਦਿ ਯਥਾਵੁਤ੍ਤਅਤ੍ਥਸ੍ਸ ਕਾਰਣਵਚਨਂ. ਅਞ੍ਞੋ ਦਾਨਸ੍ਸ ਵਿਪਾਕਂ ਜਾਨਿਤੁਂ ਸਮਤ੍ਥੋ ਨਾਮ ਨਤ੍ਥਿ ਸਬ੍ਬਸੋ ਸਤ੍ਤਾਨਂ ਕਮ੍ਮਵਿਪਾਕਵਿਭਾਗਜਾਨਨਞਾਣਸ੍ਸ ਅਨਨੁਞ੍ਞਾਤਤ੍ਤਾ. ਤੇਨਾਹ ਭਗਵਾ – ‘‘ਯਸ੍ਮਾ ਚ ਖੋ, ਭਿਕ੍ਖਵੇ, ਸਤ੍ਤਾ ਨ ਜਾਨਨ੍ਤਿ, ਦਾਨਸਂਵਿਭਾਗਸ੍ਸ ਵਿਪਾਕਂ ਯਥਾਹਂ ਜਾਨਾਮਿ, ਤਸ੍ਮਾ ਅਦਤ੍ਵਾ ਭੁਞ੍ਜਨ੍ਤੀ’’ਤਿਆਦਿ (ਇਤਿਵੁ. ੨੬). ਏਤੇਨ ਏਤ੍ਥ ਞਾਣਵਿਸੋਧਨਂ ਨਾਮ ਕਥਿਤਂ, ਨ ਦਕ੍ਖਿਣਾਯ ਵਿਸੁਦ੍ਧਿ ਨਾਮ ਦਾਯਕਤੋ ਪਟਿਗ੍ਗਾਹਕਤੋ ਚ ਵਸੇਨ ਹੋਤੀਤਿ; ਸਮ੍ਮਾਸਮ੍ਬੁਦ੍ਧੇਨ ਸਾਰਿਪੁਤ੍ਤਤ੍ਥੇਰਸ੍ਸ ਦਿਨ੍ਨਦਾਨਂ ਸਬ੍ਬਸੋ ਉਪਕ੍ਕਿਲੇਸਵਿਸੁਦ੍ਧਿਯਾ ਞਾਣਸ੍ਸ ਚ ਅਤਿਵਿਯ ਉਲ਼ਾਰਤ੍ਤਾ ਮਹਾਨੁਭਾਵਂ ਨਾਮ ਸਿਯਾ ਮਹਾਤੇਜਵਨ੍ਤਞ੍ਚ; ਨ ਮਹਪ੍ਫਲਂ ਤੇਸਂ ਸਨ੍ਤਾਨੇ ਪਰਿਪੁਣ੍ਣਫਲਸ੍ਸ ਅਸਮ੍ਭਵਤੋ. ਯਦਿ ਦਿਨ੍ਨਦਾਨਂ ਪਰਿਪੁਣ੍ਣਫਲਂ ਨ ਹੋਤਿ ਉਭਯਵਿਪਾਕਦਾਨਾਭਾਵਤੋ, ਪਵਤ੍ਤਿਵਿਪਾਕਦਾਯੀ ਪਨ ਹੋਤੀਤਿ ਦਸ੍ਸੇਨ੍ਤੋ, ‘‘ਦਾਨਂ ਹੀ’’ਤਿਆਦਿਮਾਹ.
ਚਤੂਹੀਤਿ ਸਹਯੋਗੇ ਕਰਣਵਚਨਂ, ਚਤੂਹਿ ਸਮ੍ਪਦਾਹਿ ਸਹਗਤਾ ਸਹਿਤਂ ਕਤ੍ਵਾਤਿ ਅਤ੍ਥੋ. ਇਮਾ ਚਤਸ੍ਸੋ ਸਮ੍ਪਦਾ ਸਬ੍ਬਸਾਧਾਰਣਵਸੇਨ ਵੁਤ੍ਤਾ, ਨ ਯਥਾਧਿਗਤਪੁਗ੍ਗਲਵਸੇਨ. ਤੇਨਾਹ – ‘‘ਦੇਯ੍ਯਧਮ੍ਮਸ੍ਸ ਧਮ੍ਮੇਨਾ’’ਤਿਆਦਿ. ਤਸ੍ਮਿਂਯੇਵ ਅਤ੍ਤਭਾਵੇਤਿ ਯਸ੍ਮਿਂ ਅਤ੍ਤਭਾਵੇ ਤਂ ਦਾਨਮਯਂ ਪੁਞ੍ਞਂ ਉਪ੍ਪਨ੍ਨਂ, ਤਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ, ਚੇਤਨਾਯ ਮਹਨ੍ਤਤ੍ਤਾ ਦਿਟ੍ਠਧਮ੍ਮਵੇਦਨੀਯਂ ਹੁਤ੍ਵਾ ਵਿਪਚ੍ਚਤੀਤਿ ਅਤ੍ਥੋ. ਪੁਬ੍ਬਚੇਤਨਾਦਿਵਸੇਨਾਤਿ ਸਨ੍ਨਿਟ੍ਠਾਪਕਜਵਨਵੀਥਿਤੋ ਪੁਬ੍ਬਾਪਰਵੀਥਿਚੇਤਨਾਵਸੇਨ, ਅਞ੍ਞਥਾ ਸਨ੍ਨਿਟ੍ਠਾਪਕਵੀਥਿਯਂਯੇਵ ਪੁਬ੍ਬਚੇਤਨਾਦਿਵਸੇਨਾਤਿ ਵਤ੍ਤਬ੍ਬਂ ਸਿਯਾ. ਸਾ ਹਿ ਚੇਤਨਾ ਦਿਟ੍ਠਧਮ੍ਮਵੇਦਨੀਯਭੂਤਾ ਤਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ, ਨ ਇਤਰਾ. ਮਹਤ੍ਤਤਾਤਿ ਪੁਬ੍ਬਾਭਿਸਙ੍ਖਾਰਵਸੇਨ ਞਾਣਸਮ੍ਪਯੋਗਾਦਿਵਸੇਨ ਚੇਤਨਾਯ ਉਲ਼ਾਰਤਾ. ਖੀਣਾਸਵਭਾਵੇਨਾਤਿ ਯਸ੍ਸ ਦੇਤਿ, ਤਸ੍ਸ ਖੀਣਾਸਵਭਾਵੇਨ. ਵਤ੍ਥੁਸਮ੍ਪਨ੍ਨਤਾਤਿ ਏਤ੍ਥ ਯਥਾ ਪਟਿਘਸਞ੍ਞਾ ਨਾਨਤ੍ਤਸਞ੍ਞਾਨਂ ਵਿਗਮੇਨ ਦਿਬ੍ਬਵਿਹਾਰਾਨਂ ਵਸੇਨ, ਬ੍ਯਾਪਾਦਸਞ੍ਞਾਦੀਨਂ ਵਿਗਮੇਨ ਬ੍ਰਹ੍ਮਵਿਹਾਰਾਨਂ ਵਸੇਨ, ਸਬ੍ਬਸੋ ਰੂਪਸਞ੍ਞਾਨਾਨਤ੍ਤਸਞ੍ਞਾਨਂ ਵਿਗਮੇਨ ਆਨੇਞ੍ਜਵਿਹਾਰਾਨਂ ਵਸੇਨ ਸਬ੍ਬਸੋ ਨਿਚ੍ਚਸਞ੍ਞਾਦੀਨਂ ਪਟਿਪ੍ਪਸ੍ਸਦ੍ਧਿਯਾ ਸਬ੍ਬਸਙ੍ਖਾਰਵਿਮੁਖਤਾਯ ਅਰਿਯਵਿਹਾਰਾਨਂ ਵਸੇਨ ਵਤ੍ਥੁਸਮ੍ਪਨ੍ਨਤਾ ਇਚ੍ਛਿਤਾ. ਤਂਤਂਸਮਾਪਤ੍ਤਿਸਮਾਪਜ੍ਜਨੇਨ ਸਨ੍ਤਾਨਸ੍ਸ ਨਿਰੋਧਸਾਧਨਤਾ ਤਂ ਦਿਵਸਂ ਨਿਰੋਧਸ੍ਸ ਸਾਧਨਤਾ ਨਾਮ. ਵਤ੍ਥੁਸਮ੍ਪਨ੍ਨਤਾਤਿ ਸਬ੍ਬਸੋ ਨਿਰੋਧਸਮਾਪਤ੍ਤਿਸਮਾਪਜ੍ਜਨੇਨ ਵਤ੍ਥੁਸਮ੍ਪਨ੍ਨਤਾ ਇਚ੍ਛਿਤਾ; ਨ ਸਬ੍ਬਸੋ ਅਨਵਸੇਸਸਞ੍ਞਾਨਿਰੋਧਤਾਯਾਤਿ ਆਹ – ‘‘ਤਂ ਦਿਵਸਂ ਨਿਰੋਧਤੋ ਵੁਟ੍ਠਿਤਭਾਵੇਨ ਵਤ੍ਥੁਸਮ੍ਪਨ੍ਨਤਾ’’ਤਿ. ਸਞ੍ਞਾਨਿਰੋਧਸ੍ਸ ਚੇਤ੍ਥ ਅਚ੍ਚਾਸਨ੍ਨਤਂ ਸਨ੍ਧਾਯ, ‘‘ਤਂ ਦਿਵਸ’’ਨ੍ਤਿ ਵੁਤ੍ਤਂ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.
ਦਕ੍ਖਿਣਾਵਿਭਙ੍ਗਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
ਨਿਟ੍ਠਿਤਾ ਚ ਵਿਭਙ੍ਗਵਗ੍ਗਵਣ੍ਣਨਾ.