੯. ਕਾਯਗਤਾਸਤਿਸੁਤ੍ਤਵਣ੍ਣਨਾ
੧੫੩-੪. ਤਪ੍ਪਟਿਸਰਣਾਨਂ ਕਾਮਾਵਚਰਸਤ੍ਤਾਨਂ ਪਟਿਸਰਣਟ੍ਠੇਨ ਗੇਹਾ ਕਾਮਗੁਣਾ, ਗੇਹੇ ਸਿਤਾ ਆਰਬ੍ਭ ਪਵਤ੍ਤਿਯਾ ਅਲ੍ਲੀਨਾਤਿ ਗੇਹਸ੍ਸਿਤਾ. ਸਰਨ੍ਤੀਤਿ ਵੇਗਸਾ ਪਵਤ੍ਤਨ੍ਤਿ. ਵੇਗੇਨ ਹਿ ਪਵਤ੍ਤਿ ਧਾਵਤੀਤਿ ਵੁਚ੍ਚਤਿ. ਸਙ੍ਕਪ੍ਪਾਤਿ ਯੇ ਕੇਚਿ ਮਿਚ੍ਛਾਸਙ੍ਕਪ੍ਪਾ, ਬ੍ਯਾਪਾਦਵਿਹਿਂਸਾਸਙ੍ਕਪ੍ਪਾਦਯੋਪਿ ਕਾਮਗੁਣਸਿਤਾ ਏਵਾਤਿ. ਗੋਚਰਜ੍ਝਤ੍ਤਸ੍ਮਿਂਯੇਵਾਤਿ ਪਰਿਗ੍ਗਹਿਤੇ ਕਮ੍ਮਟ੍ਠਾਨੇ ਏਵ ਵਤ੍ਤਨ੍ਤਿ. ਤਞ੍ਹਿ ਧਮ੍ਮਵਸੇਨ ਉਪਟ੍ਠਿਤਾਯ ਭਾਵਨਾਯ ਗੋਚਰਭਾਵਤੋ ‘‘ਗੋਚਰਜ੍ਝਤ੍ਤ’’ਨ੍ਤਿ ਵੁਤ੍ਤਂ. ਅਸ੍ਸਾਸਪਸ੍ਸਾਸਕਾਯੇ ਗਤਾ ਪਵਤ੍ਤਾਤਿ ਕਾਯਗਤਾ, ਤਂ ਕਾਯਗਤਾਸਤਿਂ. ਸਤਿਸੀਸੇਨ ਤਂਸਹਗਤੇ ਭਾਵਨਾਧਮ੍ਮੇ ਵਦਤਿ ਅਸ੍ਸਾਸਪਸ੍ਸਾਸਕਾਯਾਦਿਕੇ ਤਂਤਂਕੋਟ੍ਠਾਸੇ ਸਮਥਵਤ੍ਥੁਭਾਵੇਨ ਪਰਿਗ੍ਗਹੇਤ੍ਵਾ ਸਤਿਯਾ ਪਰਿਗ੍ਗਹਿਤਤ੍ਤਾ; ਤਥਾਪਰਿਗ੍ਗਹਿਤੇ ਵਾ ਤੇ ਆਰਬ੍ਭ ਅਨਿਚ੍ਚਾਦਿਮਨਸਿਕਾਰਵਸੇਨ ਪਵਤ੍ਤਾ ਕਾਯਾਰਮ੍ਮਣਾ ਸਤੀ ਸਤਿਭਾਵੇਨ ਵਤ੍ਵਾ ਏਕਜ੍ਝਂ ਦਸ੍ਸੇਨ੍ਤੋ ‘‘ਕਾਯਪਰਿਗ੍ਗਾਹਿਕ’’ਨ੍ਤਿਆਦਿਮਾਹ.
ਸਤਿਪਟ੍ਠਾਨੇਤਿ ਮਹਾਸਤਿਪਟ੍ਠਾਨਸੁਤ੍ਤੇ (ਦੀ. ਨਿ. ੨.੩੭੮; ਮ. ਨਿ. ੧.੧੧੧), ਚੁਦ੍ਦਸਵਿਧੇਨ ਕਾਯਾਨੁਪਸ੍ਸਨਾ ਕਥਿਤਾ, ਚੁਣ੍ਣਕਜਾਤਾਨਿ ਅਟ੍ਠਿਕਾਨਿ ਪਰਿਯੋਸਾਨਂ ਕਤ੍ਵਾ ਕਾਯਾਨੁਪਸ੍ਸਨਾ ਨਿਦ੍ਦਿਟ੍ਠਾ, ਇਧ ਪਨ ਕੇਸਾਦੀਸੁ ਵਣ੍ਣਕਸਿਣਵਸੇਨ ਨਿਬ੍ਬਤ੍ਤਿਤਾਨਂ ਚਤੁਨ੍ਨਂ ਝਾਨਾਨਂ ਵਸੇਨ ਉਪਰਿਦੇਸਨਾਯ ਵਡ੍ਢਿਤਤ੍ਤਾ ਅਟ੍ਠਾਰਸਵਿਧੇਨ ਕਾਯਗਤਾਸਤਿਭਾਵਨਾ.
੧੫੬. ਤਸ੍ਸ ਭਿਕ੍ਖੁਨੋਤਿ ਯੋ ਕਾਯਗਤਾਸਤਿਭਾਵਨਾਯ ਵਸੀਭੂਤੋ, ਤਸ੍ਸ ਭਿਕ੍ਖੁਨੋ. ਸਮ੍ਪਯੋਗਵਸੇਨ ਵਿਜ੍ਜਂ ਭਜਨ੍ਤੀਤਿ ਸਹਜਾਤ-ਅਞ੍ਞਮਞ੍ਞ-ਨਿਸ੍ਸਯ-ਸਮ੍ਪਯੁਤ੍ਤ-ਅਤ੍ਥਿ-ਅਵਿਗਤਪਚ੍ਚਯਵਸੇਨ ਵਿਜ੍ਜਂ ਭਜਨ੍ਤਿ, ਤਾਯ ਸਹ ਏਕੀਭਾਵਮਿਵ ਗਚ੍ਛਨ੍ਤੀਤਿ ਅਤ੍ਥੋ. ਵਿਜ੍ਜਾਭਾਗੇ ਵਿਜ੍ਜਾਕੋਟ੍ਠਾਸੇ ਵਤ੍ਤਨ੍ਤੀਤਿ ਵਿਜ੍ਜਾਸਭਾਗਤਾਯ ਤਦੇਕਦੇਸੇ ਵਿਜ੍ਜਾਕੋਟ੍ਠਾਸੇ ਵਤ੍ਤਨ੍ਤਿ. ਤਾਹਿ ਸਮ੍ਪਯੁਤ੍ਤਧਮ੍ਮਾ ਫਸ੍ਸਾਦਯੋ. ਨਨੁ ਚੇਤ੍ਥ ਵਿਜ੍ਜਾਨਂ ਵਿਜ੍ਜਾਭਾਗਿਯਤਾ ਨ ਸਮ੍ਭਵਤੀਤਿ? ਨੋ ਨ ਸਮ੍ਭਵਤਿ. ਯਾਯ ਹਿ ਵਿਜ੍ਜਾਯ ਵਿਜ੍ਜਾਸਮ੍ਪਯੁਤ੍ਤਾਨਂ ਵਿਜ੍ਜਾਭਾਗਿਯਤਾ, ਸਾ ਤਂਨਿਮਿਤ੍ਤਾਯ ਵਿਜ੍ਜਾਯ ਉਪਚਰੀਯਤੀਤਿ. ਏਕਾ ਵਿਜ੍ਜਾ ਵਿਜ੍ਜਾ, ਸੇਸਾ ਵਿਜ੍ਜਾਭਾਗਿਯਾਤਿ ਅਟ੍ਠਸੁ ਵਿਜ੍ਜਾਸੁ ਏਕਂ ‘‘ਵਿਜ੍ਜਾ’’ਤਿ ਗਹੇਤ੍ਵਾ ਇਤਰਾ ਤਸ੍ਸਾ ਭਾਗਤਾਯ ‘‘ਵਿਜ੍ਜਾਭਾਗਿਯਾ’’ਤਿ ਵੇਦਿਤਬ੍ਬਾ. ਸਦ੍ਧਿਂ ਪਵਤ੍ਤਨਸਭਾਵਾਸੁ ਅਯਮੇਵ ਵਿਜ੍ਜਾਤਿ ਵਤ੍ਤਬ੍ਬਾਤਿ ਨਿਯਮਸ੍ਸ ਅਭਾਵਤੋ ਵਿਜ੍ਜਾਭਾਗੋ ਵਿਯ ਵਿਜ੍ਜਾਭਾਗਿਯਾਪਿ ਪਵਤ੍ਤਤਿ ਏਵਾਤਿ ਵਤ੍ਤਬ੍ਬਂ. ਆਪੋਫਰਣਨ੍ਤਿ ਪਟਿਭਾਗਨਿਮਿਤ੍ਤਭੂਤੇਨ ਆਪੋਕਸਿਣੇਨ ਸਬ੍ਬਸੋ ਮਹਾਸਮੁਦ੍ਦਫਰਣਂ ਆਪੋਫਰਣਂ ਨਾਮ. ਦਿਬ੍ਬਚਕ੍ਖੁਞਾਣਸ੍ਸ ਕਿਚ੍ਚਂ ਫਰਣਨ੍ਤਿ ਕਤ੍ਵਾ, ਦਿਬ੍ਬਚਕ੍ਖੁਅਤ੍ਥਂ ਵਾ ਆਲੋਕਫਰਣਂ ਦਿਬ੍ਬਚਕ੍ਖੁਫਰਣਨ੍ਤਿ ਦਟ੍ਠਬ੍ਬਂ. ਉਭਯਸ੍ਮਿਮ੍ਪਿ ਪਕ੍ਖੇ ਸਮੁਦ੍ਦਙ੍ਗਮਾਨਂ ਕੁਨ੍ਨਦੀਨਂ ਸਮੁਦ੍ਦਨ੍ਤੋਗਧਤ੍ਤਾ ਤੇਸਂ ਚੇਤਸਾ ਫੁਟਤਾ ਵੇਦਿਤਬ੍ਬਾ. ਕੁਨ੍ਨਦਿਗ੍ਗਹਣਞ੍ਚੇਤ੍ਥ ਕਞ੍ਚਿਮੇਵ ਕਾਲਂ ਸਨ੍ਦਿਤ੍ਵਾ ਤਾਸਂ ਉਦਕਸ੍ਸ ਸਮੁਦ੍ਦਪਰਿਯਾਪਨ੍ਨਭਾਵੂਪਗਮਨਤ੍ਤਾ, ਨ ਬਹਿ ਮਹਾਨਦਿਯੋ ਵਿਯ ਪਰਿਤ੍ਤਕਾਲਟ੍ਠਿਤਿਕਾਤਿ.
ਓਤਾਰਨ੍ਤਿ ਕਿਲੇਸੁਪ੍ਪਤ੍ਤਿਯਾ ਅਵਸਰਂ, ਤਂ ਪਨ ਵਿਵਰਂ ਛਿਦ੍ਦਨ੍ਤਿ ਚ ਵੁਤ੍ਤਂ. ਆਰਮ੍ਮਣਨ੍ਤਿ ਕਿਲੇਸੁਪ੍ਪਤ੍ਤਿਯਾ ਓਲਮ੍ਬਨਂ. ਯਾਵ ਪਰਿਯੋਸਾਨਾਤਿ ਮਤ੍ਤਿਕਾਪੁਞ੍ਜਸ੍ਸ ਯਾਵ ਪਰਿਯੋਸਾਨਾ.
੧੫੮. ਅਭਿਞ੍ਞਾਯਾਤਿ ਇਦ੍ਧਿਵਿਧਾਦਿਅਭਿਞ੍ਞਾਯ. ਸਚ੍ਛਿਕਾਤਬ੍ਬਸ੍ਸਾਤਿ ਪਚ੍ਚਕ੍ਖਤੋ ਕਾਤਬ੍ਬਸ੍ਸ ਅਧਿਟ੍ਠਾਨਵਿਕੁਬ੍ਬਨਾਦਿਧਮ੍ਮਸ੍ਸ. ਅਭਿਞ੍ਞਾਵ ਕਾਰਣਨ੍ਤਿ ਆਹ – ‘‘ਸਚ੍ਛਿਕਿਰਿਯਾਪੇਕ੍ਖਾਯ, ਅਭਿਞ੍ਞਾਕਾਰਣਸ੍ਸ ਪਨ ਸਿਦ੍ਧਿਯਾ ਪਾਕਟਾ’’ਤਿ. ਮਰਿਯਾਦਬਦ੍ਧਾਤਿ ਉਦਕਮਾਤਿਕਾਮੁਖੇ ਕਤਾ.
ਯੁਤ੍ਤਯਾਨਂ ਵਿਯ ਕਤਾਯ ਇਚ੍ਛਿਤਿਚ੍ਛਿਤੇ ਕਾਲੇ ਸੁਖੇਨ ਪਚ੍ਚਵੇਕ੍ਖਿਤਬ੍ਬਤ੍ਤਾ. ਪਤਿਟ੍ਠਾਕਤਾਯਾਤਿ ਸਮ੍ਪਤ੍ਤੀਨਂ ਪਤਿਟ੍ਠਾਭਾਵਂ ਪਾਪਿਤਾਯ. ਅਨੁਪ੍ਪਵਤ੍ਤਿਤਾਯਾਤਿ ਭਾਵਨਾਬਹੁਲੀਕਾਰੇਹਿ ਅਨੁਪ੍ਪਵਤ੍ਤਿਤਾਯ. ਪਰਿਚਯਕਤਾਯਾਤਿ ਆਸੇਵਨਦਲ਼੍ਹਤਾਯ ਸੁਚਿਰਂ ਪਰਿਚਯਾਯ. ਸੁਸਮ੍ਪਗ੍ਗਹਿਤਾਯਾਤਿ ਸਬ੍ਬਸੋ ਉਕ੍ਕਂਸਂ ਪਾਪਿਤਾਯ. ਸੁਸਮਾਰਦ੍ਧਾਯਾਤਿ ਅਤਿਵਿਯ ਸਮ੍ਮਦੇਵ ਨਿਬ੍ਬਤ੍ਤਿਕਤਾਯ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਕਾਯਗਤਾਸਤਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.