੧੦. ਸਙ੍ਖਾਰੁਪਪਤ੍ਤਿਸੁਤ੍ਤਵਣ੍ਣਨਾ

੧੬੦. ਸਙ੍ਖਾਰੁਪਪਤ੍ਤਿਨ੍ਤਿ ਵਿਪਾਕਕ੍ਖਨ੍ਧਸਞ੍ਞਿਤਾਨਂ ਸਙ੍ਖਾਰਾਨਂ ਉਪ੍ਪਤ੍ਤਿਂ, ਨਿਬ੍ਬਤ੍ਤਿਨ੍ਤਿ ਅਤ੍ਥੋ. ਯਸ੍ਮਾ ਅਵਧਾਰਣਂ ਏਤਸ੍ਮਿਂ ਪਦੇ ਇਚ੍ਛਿਤਬ੍ਬਨ੍ਤਿ, ‘‘ਸਙ੍ਖਾਰਾਨਂਯੇਵ ਉਪਪਤ੍ਤਿ’’ਨ੍ਤਿ ਵਤ੍ਵਾ ਤੇਨ ਨਿਵਤ੍ਤਿਤਂ ਦਸ੍ਸੇਨ੍ਤੋ, ‘‘ਨ ਸਤ੍ਤਸ੍ਸਾ’’ਤਿ ਆਹ. ਤੇਨ ਸਤ੍ਤੋ ਜੀਵੋ ਉਪ੍ਪਜ੍ਜਤੀਤਿ ਮਿਚ੍ਛਾਵਾਦਂ ਪਟਿਕ੍ਖਿਪਤਿ. ਏਵਂ ਉਪ੍ਪਜ੍ਜਨਕਧਮ੍ਮਵਸੇਨ ਉਪ੍ਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਉਪ੍ਪਤ੍ਤਿਜਨਕਧਮ੍ਮਵਸੇਨਪਿ ਤਂ ਦਸ੍ਸੇਤੁਂ, ‘‘ਪੁਞ੍ਞਾਭਿਸਙ੍ਖਾਰੇਨ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਕਾਮੇਸੁ ਪੁਞ੍ਞਾਭਿਸਙ੍ਖਾਰੇਨਪਿ ਉਪਪਤ੍ਤਿ ਹੋਤਿ, ਸਾ ਪਨ ਇਮਸ੍ਮਿਂ ਸੁਤ੍ਤੇ ਗਹਿਤਾਤਿ. ਪੁਞ੍ਞਾਭਿਸਙ੍ਖਾਰੇਨ ਵਾਤਿ ਵਾ-ਸਦ੍ਦੋ ਅਵੁਤ੍ਤਤ੍ਥਾਪੇਕ੍ਖਣਵਿਕਪ੍ਪਤ੍ਥੋ, ਅਵੁਤ੍ਤਤ੍ਥਾਪੇਕ੍ਖਾਯ ਪਨ ਨ ਆਗਤੋ ‘‘ਆਨੇਞ੍ਜਾਭਿਸਙ੍ਖਾਰੇਨਾ’’ਤਿ. ਅਥ ਵਾ ਉਪਪਤ੍ਤਿ ਆਗਤਾ, ਏਵਂ ਕਿਚ੍ਚਂ ਆਗਤਂ, ਆਨੇਞ੍ਜਾਭਿਸਙ੍ਖਾਰੋ ਪਨੇਤ੍ਥ ਸਰੂਪੇਨ ਅਨਾਗਤੋਪਿ ਪੁਞ੍ਞਾਭਿਸਙ੍ਖਾਰਗ੍ਗਹਣੇਨੇਵ ਗਹਿਤੋਤਿ ਦਟ੍ਠਬ੍ਬਂ. ਕੇਚਿ ਪਨ ‘‘ਪੁਞ੍ਞਾਨੇਞ੍ਜਾਭਿਸਙ੍ਖਾਰੇਨਾ’’ਤਿ ਪਠਨ੍ਤਿ. ਭਵੂਪਗਕ੍ਖਨ੍ਧਾਨਨ੍ਤਿ ਸੁਗਤਿਭਵੂਪਗਾਨਂ ਉਪਾਦਾਨਕ੍ਖਨ੍ਧਾਨਂ.

੧੬੧. ਲੋਕਿਕਾ ਵਟ੍ਟਨ੍ਤਿ ਕਮ੍ਮਵਟ੍ਟਸ੍ਸ ਗਹਣਤੋ. ਭਵੂਪਪਤ੍ਤਿਹੇਤੁਭੂਤਾ ਓਕਪ੍ਪਨੀਯਸਦ੍ਧਾ ਚਤੁਪਾਰਿਸੁਦ੍ਧਿਸੀਲਂ ਤਾਦਿਸਂ ਬੁਦ੍ਧਵਚਨਬਾਹੁਸਚ੍ਚਂ ਆਮਿਸਪਰਿਚ੍ਚਾਗੋ ਕਮ੍ਮਸ੍ਸਕਤਾਞਾਣਂ ਕਮ੍ਮਫਲਦਿਟ੍ਠਿ ਚ ਇਮੇ ਸਦ੍ਧਾਦਯੋ ਵੇਦਿਤਬ੍ਬਾ. ਠਪੇਤੀਤਿ ਪਣਿਦਹਨਵਸੇਨ ਠਪੇਤਿ. ਪਣਿਦਹਤੀਤਿ ਹਿ ਅਯਮੇਤ੍ਥ ਅਤ੍ਥੋ. ਪਤਿਟ੍ਠਾਪੇਤੀਤਿ ਤਤ੍ਥ ਸੁਪ੍ਪਤਿਟ੍ਠਿਤਂ ਕਤ੍ਵਾ ਠਪੇਤਿ. ਸਹਪਤ੍ਥਨਾਯਾਤਿ, ‘‘ਅਹੋ ਵਤਾਹਂ…ਪੇ… ਉਪਪਜ੍ਜੇਯ੍ਯ’’ਨ੍ਤਿ ਏਵਂ ਪਵਤ੍ਤਪਤ੍ਥਨਾਯ ਸਹ. ਸਦ੍ਧਾਦਯੋਵਾਤਿ ਯਥਾਵੁਤ੍ਤਾ ਸਦ੍ਧਾਦਯੋ ਏਵ ਪਞ੍ਚ ਧਮ੍ਮਾ ਉਪਪਤ੍ਤਿਯਾ ਸਙ੍ਖਰਣਟ੍ਠੇਨ ਸਙ੍ਖਾਰਾ, ਤਸ੍ਮਾ ਏਵ ਅਞ੍ਞੇਹਿ ਵਿਸਿਟ੍ਠਭਵੂਪਹਰਣਟ੍ਠੇਨ ਵਿਹਾਰਾ ਨਾਮਾਤਿ. ਤਸ੍ਮਿਂ ਠਾਨੇਤਿ ਤਸ੍ਮਿਂ ਉਪਪਤ੍ਤਿਟ੍ਠਾਨੇ.

ਪਞ੍ਚਧਮ੍ਮਾਵ ਤਂਸਮਙ੍ਗੀਪੁਗ੍ਗਲੋ ਉਪਪਤ੍ਤਿਂ ਮਗ੍ਗਤਿ ਗਵੇਸਤਿ ਏਤੇਨਾਤਿ ਮਗ੍ਗੋ. ਪਟਿਪਜ੍ਜਤਿ ਏਤਾਯਾਤਿ ਪਟਿਪਦਾ. ਚੇਤਨਾ ਪਨੇਤ੍ਥ ਸੁਦ੍ਧਸਙ੍ਖਾਰਤਾਯ ਸਦ੍ਧਾਦਿਗ੍ਗਹਣੇਨੇਵ ਗਹਿਤਾ, ਤਸ੍ਮਾ ਅਵਧਾਰਣਂ ਕਤਂ. ਉਪਪਤ੍ਤਿਪਕਪ੍ਪਨਵਸੇਨੇਵ ਪਵਤ੍ਤਿਯਾ ਪਤ੍ਥਨਾਗਹਣੇਨੇਵ ਤਸ੍ਸਾ ਗਹਣਨ੍ਤਿ ਕੇਚਿ. ਚਿਤ੍ਤਕਰਯੁਤ੍ਤਗਤਿਨਿਬ੍ਬਤ੍ਤਨਧਮ੍ਮਵਸੇਨ ਅਵਧਾਰਣਸ੍ਸ ਕਤਤ੍ਤਾ. ਚੇਤਨਾ ਹਿ ਨਾਮ ਕਮ੍ਮਂ, ਤਸ੍ਸਾ ਉਪਪਤ੍ਤਿਨਿਬ੍ਬਤ੍ਤਨੇ ਵਤ੍ਤਬ੍ਬਮੇਵ ਨਤ੍ਥਿ, ਤਸ੍ਸਾ ਪਨ ਕਿਚ੍ਚਕਰਣਾ ਸਦ੍ਧਾਦਯੋ ਪਤ੍ਥਨਾ ਚਾਤਿ ਇਮੇ ਧਮ੍ਮਾ ਸਹਕਾਰਿਨੋ ਭਵੂਪਪਤ੍ਤਿਯਾ ਨਿਯਾਮਕਾ ਹੋਨ੍ਤੀਤਿ ਤਤ੍ਰੂਪਪਤ੍ਤਿਯਾ ਪਵਤ੍ਤਨ੍ਤੀਤਿ ਤੇਸਂ ਮਗ੍ਗਾਦਿਭਾਵੋ ਵੁਤ੍ਤੋ. ਤੇਨਾਹ ‘‘ਯਸ੍ਸ ਹੀ’’ਤਿਆਦਿ. ਤੇਨ ਸਦ੍ਧਾ ਪਤ੍ਥਨਾ ਚਾਤਿ ਉਭਯੇ ਧਮ੍ਮਾ ਸਹਿਤਾ ਹੁਤ੍ਵਾ ਕਮ੍ਮਂ ਵਿਸੇਸੇਨ੍ਤਾ ਗਤਿਂ ਨਿਯਮੇਨ੍ਤੀਤਿ ਦਸ੍ਸੇਤਿ, ਪਟਿਸਨ੍ਧਿਗ੍ਗਹਣਂ ਅਨਿਯਤਂ ਕੇਵਲਸ੍ਸ ਕਮ੍ਮਸ੍ਸ ਵਸੇਨਾਤਿ ਅਧਿਪ੍ਪਾਯੋ. ਕਾਮਞ੍ਚੇਤ੍ਥ ‘‘ਕਮ੍ਮਂ ਕਤ੍ਵਾ’’ਤਿ ਵੁਤ੍ਤਂ, ਕਮ੍ਮਾਯੂਹਨਤੋ ਪਨ ਪਗੇਵ ਪਤ੍ਥਨਂ ਠਪੇਤੁਮ੍ਪਿ ਵਟ੍ਟਤਿਯੇਵ. ਕਮ੍ਮਂ ਕਤ੍ਵਾਤਿ ਚੇਤ੍ਥ ‘‘ਤਾਪੇਤ੍ਵਾ ਭੁਞ੍ਜਤਿ, ਭੁਤ੍ਵਾ ਸਯਤੀ’’ਤਿਆਦੀਸੁ ਵਿਯ ਨ ਕਾਲਨਿਯਮੋ, ਕਮ੍ਮਂ ਕਤ੍ਵਾ ਯਦਾ ਕਦਾਚਿ ਪਤ੍ਥਨਂ ਕਾਤੁਂ ਵਟ੍ਟਤੀਤਿ ਚ ਇਦਂ ਚਾਰਿਤ੍ਤਦਸ੍ਸਨਂ ਵਿਯ ਵੁਤ੍ਤਂ. ਯਥਾ ਹਿ ਭਵਪਤ੍ਥਨਾ ਯਾਵ ਮਗ੍ਗੇਨ ਨ ਸਮੁਚ੍ਛਿਜ੍ਜਤਿ, ਤਾਵ ਅਨੁਪ੍ਪਨ੍ਨਾਭਿਨਵਕਤੂਪਚਿਤਸ੍ਸ ਕਮ੍ਮਸ੍ਸ ਪਚ੍ਚਯੋ ਹੋਤਿਯੇਵ. ਪੁਨ ਤਥਾ ਵਿਸੇਸਪਚ੍ਚਯੋ, ਯਥਾ ਨਿਯਮੇਤ੍ਵਾ ਉਪ੍ਪਾਦਿਤਾ. ਤੇਨ ਵੁਤ੍ਤਂ – ‘‘ਯਸ੍ਸ ਪਞ੍ਚ ਧਮ੍ਮਾ ਅਤ੍ਥਿ, ਨ ਪਤ੍ਥਨਾ ਤਸ੍ਸ ਗਤਿ ਅਨਿਬਦ੍ਧਾ’’ਤਿ.

੧੬੫. ਸਬ੍ਬਸੋਵਾਤਿ ‘‘ਇਦਂ ਕਾਲ਼ਕਂ ਸਾਮਂ ਸੇਤਂ ਹਰਿਤਂ ਮਣ੍ਡਲਂ ਅਪਰਿਮਣ੍ਡਲਂ ਚਤੁਰਂਸਂ ਪਰਿਪੁਣ੍ਣਂ ਖੁਦ੍ਦਕਂ ਮਹਨ੍ਤ’’ਨ੍ਤਿਆਦਿਨਾ ਸਬ੍ਬਸੋਵ ਪਾਕਟਂ ਹੋਤਿ.

੧੬੭. ਸੁਨ੍ਦਰੋਤਿ ਕਾਲ਼ਕਾਦਿਦੋਸਰਹਿਤਤਾਯ ਸੋਭਨੋ. ਆਕਰਸਮ੍ਪਨ੍ਨੋ ਸਮ੍ਪਨ੍ਨਆਕਰੁਪ੍ਪਤ੍ਤਿਯਾ. ਧੋਵਨਾਦੀਹੀਤਿ ਧੋਵਨਤਾਪਨਮਜ੍ਜਨਾਦੀਹਿ.

੧੬੮. ਲੋਕਧਾਤੂਨਂ ਸਤਸਹਸ੍ਸਂ ਅਤ੍ਤਨੋ ਵਸੇ ਵਤ੍ਤਨਤੋ ਸਤਸਹਸ੍ਸੋ. ਤਸ੍ਸ ਪਨ ਤਤ੍ਥ ਓਭਾਸਕਰਣਂ ਪਾਕਟਨ੍ਤਿ ਆਹ ‘‘ਆਲੋਕਫਰਣਬ੍ਰਹ੍ਮਾ’’ਤਿ. ਅਯਮੇਵ ਨਯੋ ਹੇਟ੍ਠਾ ‘‘ਸਹਸ੍ਸੋ ਬ੍ਰਹ੍ਮਾ’’ਤਿਆਦੀਸੁਪਿ. ਨਿਕ੍ਖੇਨ ਕਤਨ੍ਤਿ ਨਿਕ੍ਖਪਰਿਮਾਣੇਨ ਜਮ੍ਬੋਨਦੇਨ ਕਤਂ. ਨਿਕ੍ਖਂ ਪਨ ਵੀਸਤਿਸੁਵਣ੍ਣਨ੍ਤਿ ਕੇਚਿ. ਪਞ੍ਚਵੀਸਤਿਸੁਵਣ੍ਣਨ੍ਤਿ ਅਪਰੇ. ਸੁਵਣ੍ਣਂ ਨਾਮ ਚਤੁਧਰਣਨ੍ਤਿ ਵਦਨ੍ਤਿ. ਘਟ੍ਟਨਮਜ੍ਜਨਕ੍ਖਮਂ ਨ ਹੋਤਿ ਪਰਿਤ੍ਤਭਾਵਤੋ. ਅਤਿਰੇਕੇਨਾਤਿ ਪਞ੍ਚਸੁਵਣ੍ਣਅਤਿਰੇਕੇਨ ਨਿਕ੍ਖਪ੍ਪਮਾਣਂ ਅਸਮ੍ਪਤ੍ਤੇਨ. ਵਣ੍ਣਵਨ੍ਤਂ ਪਨ ਨ ਹੋਤਿ ਅਵਿਪੁਲਤਾਯ ਉਲ਼ਾਰਂ ਹੁਤ੍ਵਾ ਅਨੁਪਟ੍ਠਾਨਤੋ. ਅਵਣ੍ਣਵਨ੍ਤਤਾਯ ਏਵ ਫਰੁਸਧਾਤੁਕਂ ਖਾਯਤਿ. ਤਾਸੂਤਿ ਤਾਸੁ ਭੂਮੀਸੁ, ਯਤ੍ਥ ਸਾਖਾ ਵਡ੍ਢਿਤ੍ਵਾ ਠਿਤਾ. ਤੇਤਿ ਸੁਵਣ੍ਣਙ੍ਕੁਰਾ. ਪਚਿਤ੍ਵਾਤਿ ਤਾਪੇਤ੍ਵਾ. ਸਮ੍ਪਹਟ੍ਠਨ੍ਤਿ ਸਮੁਜ੍ਜਲੀਕਤਨ੍ਤਿ ਆਹ – ‘‘ਧੋਤਘਟ੍ਟਿਤਪਮਜ੍ਜਿਤ’’ਨ੍ਤਿ, ਤਮ੍ਬਮਤ੍ਤਿਕਲੇਪਂ ਕਤ੍ਵਾ ਧੋਤਞ੍ਚੇਵ ਪਾਸਾਣਾਦਿਨਾ ਘਟ੍ਟਿਤਞ੍ਚ ਏਲ਼ਕਲੋਮਾਦਿਨਾ ਪਮਜ੍ਜਿਤਞ੍ਚਾਤਿ ਅਤ੍ਥੋ.

ਏਤਦੇਵਾਤਿ ਆਲੋਕਂ ਵਡ੍ਢੇਤ੍ਵਾ ਏਤ੍ਥ ਆਲੋਕਫਰਣਮੇਵ. ਅਥ ਵਾ ਯਂ ਦਿਬ੍ਬਚਕ੍ਖੁਫਰਣਂ, ਆਲੋਕਫਰਣਮ੍ਪਿ ਏਤਦੇਵ. ਯਤ੍ਤਕਞ੍ਹਿ ਠਾਨਂ ਯੋਗੀ ਕਸਿਣਾਲੋਕੇਨ ਫਰਤਿ; ਤਤ੍ਤਕਂ ਠਾਨਂ ਦਿਬ੍ਬਚਕ੍ਖੁਞਾਣਂ ਫੁਸਤੀਤਿ ਦਿਬ੍ਬਚਕ੍ਖੁਫਰਣੇ ਦਸ੍ਸਿਤੇ ਆਲੋਕਫਰਣਂ ਦਸ੍ਸਿਤਮੇਵਾਤਿ ਅਤ੍ਥੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ‘‘ਫਰਿਤ੍ਵਾ’’ਤਿ ਆਗਤਟ੍ਠਾਨੇ. ਅਵਿਨਾਸੇਨ੍ਤੇਨਾਤਿ ਅਸਮ੍ਭਿਨ੍ਨੇਨ.

ਕਸਿਣਫਰਣਂ ਵਿਯਾਤਿ ਕਸਿਣੋਭਾਸੇਨ ਫਰਣਂ ਵਿਯ ਦਿਸ੍ਸਤਿ ਉਪਟ੍ਠਾਤਿ, ਮਣਿਪਭਾਫਰਣਸ੍ਸ ਵਿਯ ਬ੍ਰਹ੍ਮਲੋਕੇ ਧਾਤੁਫਰਣਸ੍ਸ ਦਸ੍ਸਿਤਤ੍ਤਾਤਿ ਅਧਿਪ੍ਪਾਯੋ. ਸਰੀਰਪਭਾ ਪਨ ਨਿਕ੍ਖਪਭਾਸਦਿਸਾਤਿ, ‘‘ਨਿਕ੍ਖੋਪਮ੍ਮੇ ਸਰੀਰਫਰਣਂ ਵਿਯ ਦਿਸ੍ਸਤੀ’’ਤਿ ਵੁਤ੍ਤਂ. ਅਟ੍ਠਕਥਾ ਨਾਮ ਨਤ੍ਥੀਤਿ ਪਾਲ਼ਿਪਦਸ੍ਸ ਅਤ੍ਥਵਣ੍ਣਨਾਯ ਨਾਮ ਨਿਚ੍ਛਿਤਾਯ ਭਵਿਤਬ੍ਬਂ, ਅਵਿਨਿਚ੍ਛਿਤਾਯ ਪਨ ਨਤ੍ਥਿ ਵਿਯਾਤਿ ਅਕਥਨਂ ਨਾਮ ਅਟ੍ਠਕਥਾਯ ਅਨਾਚਿਣ੍ਣਨ੍ਤਿ ਤਸ੍ਸ ਵਾਦਂ ਪਟਿਕ੍ਖਿਪਿਤ੍ਵਾ. ਯਥਾ ਹਿ ਵਤ੍ਤਬ੍ਬਂ, ਤਥਾ ਅਵਤ੍ਵਾ ‘‘ਵਿਯਾ’’ਤਿ ਵਚਨਂ ਕਿਮਤ੍ਥਿਯਨ੍ਤਿ ਅਧਿਪ੍ਪਾਯੋ. ਬੁਦ੍ਧਾਨਂ ਬ੍ਯਾਮਪ੍ਪਭਾ ਬ੍ਯਾਮਪ੍ਪਦੇਸੇ ਸਬ੍ਬਕਾਲਂ ਅਧਿਟ੍ਠਾਤਿ ਵਿਯ ਤਸ੍ਸ ਬ੍ਰਹ੍ਮੁਨੋ ਸਰੀਰਫਰਣਂ ਸਰੀਰਾਭਾਯ ਪਤ੍ਥਰਣਂ ਸਬ੍ਬਕਾਲਿਕਂ. ਚਤ੍ਤਾਰਿਮਾਨਿ ਇਤਰਾਨਿ ਫਰਣਾਨਿ ਅਵਿਨਾਸੇਤ੍ਵਾ ਅਞ੍ਞਮਞ੍ਞਮਭਿਨ੍ਦਿਤ੍ਵਾ ਕਥੇਤਬ੍ਬਂ. ਫਰਣਪਦਸ੍ਸੇਵ ਵੇਵਚਨਂ ‘‘ਅਧਿਮੁਚ੍ਚਨੇਨੇਵ ਫਰਣ’’ਨ੍ਤਿ. ਪਤ੍ਥਰਤੀਤਿ ਯਥਾਵੁਤ੍ਤਂ ਫਰਣਵਸੇਨ ਪਤ੍ਥਰਤਿ. ਜਾਨਾਤੀਤਿ ਅਧਿਮੁਚ੍ਚਨਵਸੇਨ ਜਾਨਾਤਿ.

੧੬੯. ਆਦਯੋਤਿ ਆਦਿ-ਸਦ੍ਦੇਨ ਸੁਭੇ ਸਙ੍ਗਣ੍ਹਾਤਿ. ਆਭਾਤਿ ਦੁਤਿਯਜ੍ਝਾਨਭੂਮਿਕੇ ਦੇਵੇ ਏਕਜ੍ਝਂ ਗਹੇਤ੍ਵਾ ਸਾਧਾਰਣਤੋ ਵੁਤ੍ਤਂ. ਤਤੋ ਸੁਭਾਤਿ ਤਤਿਯਜ੍ਝਾਨਭੂਮਿਕੇ. ਤੇਨਾਹ – ‘‘ਪਾਟਿਯੇਕ੍ਕਾ ਦੇਵਾ ਨਤ੍ਥੀ’’ਤਿਆਦਿ. ਸਾਧਾਰਣਤੋ ਕਤਾਯਪਿ ਪਤ੍ਥਨਾਯ ਝਾਨਙ੍ਗਂ ਪਰਿਤ੍ਤਂ ਭਾਵਿਤਞ੍ਚੇ, ਪਰਿਤ੍ਤਾਭੇਸੁ ਉਪਪਤ੍ਤਿ ਹੋਤਿ, ਮਜ੍ਝਿਮਞ੍ਚੇ, ਅਪ੍ਪਮਾਣਾਭੇਸੁ, ਪਣੀਤਞ੍ਚੇ, ਆਭਸ੍ਸਰੇਸੁ ਉਪਪਤ੍ਤਿ ਹੋਤੀਤਿ ਦਟ੍ਠਬ੍ਬਂ. ਸੁਭਾਤਿ ਏਤ੍ਥਾਪਿ ਏਸੇਵ ਨਯੋ. ਹੇਟ੍ਠਾ ਵੁਤ੍ਤਨਯੇਨੇਵ ਸੁਵਿਞ੍ਞੇਯ੍ਯੋਤਿ ਆਹ – ‘‘ਵੇਹਪ੍ਫਲਾਦਿਵਾਰਾ ਪਾਕਟਾਯੇਵਾ’’ਤਿ.

ਕਾਮਾਵਚਰੇਸੁ ਨਿਬ੍ਬਤ੍ਤਤੂਤਿਆਦਿਨਾ ਸਦ੍ਧਾਦੀਨਂ ਅਜ੍ਝਾਨਵਿਪਸ੍ਸਨਾਨਂ ਕਥਂ ਤਦਧਿਟ੍ਠਾਨਂ ਹੋਤੀਤਿ ਆਸਙ੍ਕਤਿ. ਇਤਰੋ ਸਦ੍ਧਾਦੀਨਂ ਅਜ੍ਝਾਨਸਭਾਵਤ੍ਤੇਪਿ ਝਾਨਵਿਪਸ੍ਸਨਾਨਂ ਅਧਿਟ੍ਠਾਨਂ ਨਿਸ੍ਸਯਪਚ੍ਚਯਾਦਿਵਸੇਨ ਸਪ੍ਪਚ੍ਚਯਤ੍ਤਾ ਬ੍ਰਹ੍ਮਲੋਕੂਪਪਤ੍ਤਿਂ ਨਿਬ੍ਬਾਨਞ੍ਚ ਆਵਹਨ੍ਤੀਤਿ ਦਸ੍ਸੇਨ੍ਤੋ, ‘‘ਇਮੇ ਪਞ੍ਚ ਧਮ੍ਮਾ’’ਤਿਆਦਿਮਾਹ. ਤਤ੍ਥ ਸੀਲਨ੍ਤਿ ਸਮ੍ਭਾਰਸੀਲਂ. ਅਨਾਗਾਮੀ ਸਮੁਚ੍ਛਿਨ੍ਨਓਰਮ੍ਭਾਗਿਯਸਂਯੋਜਨੋ ਸਮਾਨੋ ਸਚੇ ਸਬ੍ਬਸੋ ਉਪਪਤ੍ਤਿਯੋ ਅਤਿਕ੍ਕਮਿਤੁਂ ਨ ਸਕ੍ਕੋਤਿ, ਅਰਿਯਭੂਮੀਸੁ ਏਵ ਨਿਬ੍ਬਤ੍ਤਤਿ ਯਥੂਪਚਿਤਝਾਨਕਮ੍ਮੁਨਾਤਿ ਆਹ – ‘‘ਅਨਾਗਾਮਿ…ਪੇ… ਨਿਬ੍ਬਤ੍ਤਤੀ’’ਤਿ. ਉਪਰਿਮਗ੍ਗਨ੍ਤਿ ਅਗ੍ਗਮਗ੍ਗਂ ਭਾਵੇਤ੍ਵਾ. ਆਸਵਕ੍ਖਯਨ੍ਤਿ ਸਬ੍ਬਸੋ ਆਸਵਾਨਂ ਖਯਂ ਪਹਾਨਂ ਪਾਪੁਣਾਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸਙ੍ਖਾਰੁਪਪਤ੍ਤਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

ਨਿਟ੍ਠਿਤਾ ਚ ਅਨੁਪਦਵਗ੍ਗਵਣ੍ਣਨਾ.