੩. ਸੁਞ੍ਞਤਵਗ੍ਗੋ
੧. ਚੂਲ਼ਸੁਞ੍ਞਤਸੁਤ੍ਤਵਣ੍ਣਨਾ
੧੭੬. ਕਾਲਪਰਿਚ੍ਛੇਦਂ ਕਤ੍ਵਾਤਿ ਸਮਾਪਜ੍ਜਨ੍ਤੇਹਿ ਨਾਮ ਕਾਲਪਰਿਚ੍ਛੇਦੋ ਕਾਤਬ੍ਬੋ. ਥੇਰੋ ਪਨ ਭਗਵਤੋ ਵਤ੍ਤਕਰਣਤ੍ਥਂ ਕਾਲਪਰਿਚ੍ਛੇਦਂ ਕਰੋਤਿ, ‘‘ਏਤ੍ਤਕੇ ਕਾਲੇ ਵੀਤਿਵਤ੍ਤੇ ਇਦਂ ਨਾਮ ਭਗਵਤੋ ਕਾਤਬ੍ਬ’’ਨ੍ਤਿ. ਸੋ ਤਤ੍ਥਕਂਯੇਵ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਵੁਟ੍ਠਾਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਕਾਲਪਰਿਚ੍ਛੇਦਂ ਕਤ੍ਵਾ’’ਤਿ. ਸੁਞ੍ਞਤਾਫਲਸਮਾਪਤ੍ਤਿਂ ਅਪ੍ਪੇਤ੍ਵਾਤਿ ਏਤੇਨ ਇਤਰੇ, ‘‘ਨ ਸੋਤਾਪਨ੍ਨਸਕਦਾਗਾਮੀ ਫਲਸਮਾਪਤ੍ਤਿਂ ਸਮਾਪਜ੍ਜਨ੍ਤੀ’’ਤਿ ਵਦਨ੍ਤਿ, ਤਂ ਵਾਦਂ ਪਟਿਸੇਧੇਤਿ. ਸੁਞ੍ਞਤੋਤਿ ਅਤ੍ਤਸੁਞ੍ਞਤੋ ਚ ਨਿਚ੍ਚਸੁਞ੍ਞਤੋ ਚ ਸਙ੍ਖਾਰਾ ਉਪਟ੍ਠਹਿਂਸੁ. ਸੇਕ੍ਖਾਨਞ੍ਹਿ ਸੁਞ੍ਞਤਾਪਟਿਵੇਧੋ ਪਾਦੇਸਿਕੋ ਸੁਭਸੁਖਸਞ੍ਞਾਨਂ ਅਪ੍ਪਹੀਨਤ੍ਤਾ, ਤਸ੍ਮਾ ਸੋ ਥੇਰੋ ਸੁਞ੍ਞਤਾਕਥਂ ਸੋਤੁਕਾਮੋ ਜਾਤੋ. ਧੁਰੇਨ ਧੁਰਂ ਪਹਰਨ੍ਤੇਨ ਵਿਯਾਤਿ ਰਥਧੁਰੇਨ ਰਥਧੁਰਂ ਪਹਰਨ੍ਤੇਨ ਵਿਯ ਕਤ੍ਵਾ ਉਜੁਕਮੇਵ ਸੁਞ੍ਞਤਾ…ਪੇ… ਵਤ੍ਥੁਂ ਨ ਸਕ੍ਕਾਤਿ ਯੋਜਨਾ. ਏਕਂ ਪਦਨ੍ਤਿ ਏਕਂ ਸੁਞ੍ਞਤਾਪਦਂ.
ਪੁਬ੍ਬੇਪਾਹਨ੍ਤਿਆਦਿਨਾ ਭਗਵਾ ਪਠਮਬੋਧਿਯਮ੍ਪਿ ਅਤ੍ਤਨੋ ਸੁਞ੍ਞਤਾਵਿਹਾਰਬਾਹੁਲ੍ਲਂ ਪਕਾਸੇਤੀਤਿ ਦਸ੍ਸੇਨ੍ਤੋ ‘‘ਪਠਮਬੋਧਿਯਮ੍ਪੀ’’ਤਿ ਆਹ. ਏਕੋਤਿਆਦਿ ਥੇਰਸ੍ਸ ਸੁਞ੍ਞਤਾਕਥਾਯ ਭਾਜਨਭਾਵਦਸ੍ਸਨਤ੍ਥਂ. ਸੋਤੁਨ੍ਤਿ ਅਟ੍ਠਿਂ ਕਤ੍ਵਾ ਮਨਸਿ ਕਤ੍ਵਾ ਸਬ੍ਬਚੇਤਸਾ ਸਮਨ੍ਨਾਹਰਿਤ੍ਵਾ ਸੋਤੁਮ੍ਪਿ. ਉਗ੍ਗਹੇਤੁਮ੍ਪਿਤਿ ਯਥਾਭੂਤਂ ਧਮ੍ਮਂ ਧਾਰਣਪਰਿਪੁਚ੍ਛਾਪਰਿਚਯਵਸੇਨ ਹਦਯੇਨ ਉਗ੍ਗਹਿਤਂ ਸੁਵਣ੍ਣਭਾਜਨੇ ਪਕ੍ਖਿਤ੍ਤਸੀਹਵਸਾ ਵਿਯ ਅਵਿਨਟ੍ਠੇ ਕਾਤੁਮ੍ਪਿ. ਕਥੇਤੁਮ੍ਪੀਤਿ ਵਿਤ੍ਥਾਰੇਨ ਪਰੇਸਂ ਦਸ੍ਸੇਤੁਮ੍ਪਿ ਸਕ੍ਕਾ. ਤਤ੍ਥਾਤਿ ਮਿਗਾਰਮਾਤੁਪਾਸਾਦੇ. ਕਟ੍ਠਰੂਪਪੋਤ੍ਥਕਰੂਪਚਿਤ੍ਤਰੂਪਵਸੇਨ ਕਤਾਤਿ ਥਮ੍ਭਾਦੀਸੁ ਉਤ੍ਤਿਰਿਤ੍ਵਾ ਕਤਾਨਂ ਕਟ੍ਠਰੂਪਾਨਂ, ਨਿਯ੍ਯੂਹਾਦੀਸੁ ਪਟਿਮਾਵਸੇਨ ਰਚਿਤਾਨਂ ਪੋਤ੍ਥਕਰੂਪਾਨਂ, ਸਿਤ੍ਤਿਪਸ੍ਸੇ ਚਿਤ੍ਤਕਮ੍ਮਵਸੇਨ ਵਿਰਚਿਤਾਨਂ ਚਿਤ੍ਤਰੂਪਾਨਞ੍ਚ ਕਤਾ ਨਿਟ੍ਠਪਿਤਾ. ਵੇਸ੍ਸਵਣਮਨ੍ਧਾਤਾਦੀਨਨ੍ਤਿ ਪਟਿਮਾਰੂਪੇਨ ਕਤਾਨਂ ਵੇਸ੍ਸਵਣਮਨ੍ਧਾਤੁਸਕ੍ਕਾਦੀਨਂ. ਚਿਤ੍ਤਕਮ੍ਮਵਸੇਨਾਤਿ ਆਰਾਮਾਦਿਚਿਤ੍ਤਕਮ੍ਮਵਸੇਨ. ਸਣ੍ਠਿਤਮ੍ਪੀਤਿ ਅਵਯਵਭਾਵੇਨ ਸਣ੍ਠਿਤਂ ਹੁਤ੍ਵਾ ਠਿਤਮ੍ਪਿ. ਜਿਣ੍ਣਪਟਿਸਙ੍ਖਰਣਤ੍ਥਨ੍ਤਿ ਜਿਣ੍ਣਾਨਂ ਨਿਯ੍ਯੂਹਕੂਟਾਗਾਰਪਾਸਾਦਾਵਯਵਾਨਂ ਅਭਿਸਙ੍ਖਰਣਤ੍ਥਾਯ ਤਸ੍ਮਿਂ ਤਸ੍ਮਿਂ ਠਾਨੇ ਰਹਸ੍ਸਸਞ੍ਞਾਣੇਨ ਠਪਿਤਂ. ‘‘ਪਰਿਭੁਞ੍ਜਿਸ੍ਸਾਮੀ’’ਤਿ ਤਸ੍ਮਿਂ ਤਸ੍ਮਿਂ ਕਿਚ੍ਚੇ ਵਿਨਿਯੁਞ੍ਜਨਵਸੇਨ ਪਰਿਭੁਞ੍ਜਿਤਬ੍ਬਸ੍ਸ. ਏਤਂ ਵੁਤ੍ਤਨ੍ਤਿ, ‘‘ਅਯਂ ਮਿਗਾਰਮਾਤੁਪਾਸਾਦੋ ਸੁਞ੍ਞੋ’’ਤਿਆਦਿਕਂ ਵੁਤ੍ਤਂ.
ਨਿਚ੍ਚਨ੍ਤਿ ਸਬ੍ਬਕਾਲਂ ਰਤ੍ਤਿਞ੍ਚ ਦਿਵਾ ਚ. ਏਕਭਾਵਂ ਏਕਂ ਅਸੁਞ੍ਞਤਨ੍ਤਿ ਪਚ੍ਚਤ੍ਤੇ ਉਪਯੋਗਵਚਨਂ, ਏਕਤ੍ਤਂ ਏਕੋ ਅਸੁਞ੍ਞਤੋਤਿ ਅਤ੍ਥੋ. ਗਾਮੋਤਿ ਪਵਤ੍ਤਨਵਸੇਨਾਤਿ ਗੇਹਸਨ੍ਨਿਵੇਸਵੀਥਿਚਚ੍ਚਰਸਿਙ੍ਘਾਟਕਾਦਿਕੇ ਉਪਾਦਾਯ ਗਾਮੋਤਿ ਲੋਕੁਪ੍ਪਤ੍ਤਿਵਸੇਨ. ਕਿਲੇਸਵਸੇਨਾਤਿ ਤਤ੍ਥ ਅਨੁਨਯਪਟਿਘਵਸੇਨ. ਏਸੇਵ ਨਯੋਤਿ ਇਮਿਨਾ ‘‘ਪਵਤ੍ਤਵਸੇਨ ਵਾ ਕਿਲੇਸਵਸੇਨ ਵਾ ਉਪ੍ਪਨ੍ਨਂ ਮਨੁਸ੍ਸਸਞ੍ਞ’’ਨ੍ਤਿ ਇਮਮਤ੍ਥਂ ਅਤਿਦਿਸਤਿ. ਏਤ੍ਥ ਚ ਯਥਾ ਗਾਮਗ੍ਗਹਣੇਨ ਘਰਾਦਿਸਞ੍ਞਾ ਸਙ੍ਗਹਿਤਾ, ਏਵਂ ਮਨੁਸ੍ਸਗ੍ਗਹਣੇਨ ਇਤ੍ਥਿਪੁਰਿਸਾਦਿਸਞ੍ਞਾ ਸਙ੍ਗਹਿਤਾ. ਯਸ੍ਮਾ ਰੁਕ੍ਖਾਦਿਕੇ ਪਟਿਚ੍ਚ ਅਰਞ੍ਞਸਞ੍ਞਾ ਤਤ੍ਥ ਪਬ੍ਬਤਵਨਸਣ੍ਡਾਦਯੋ ਅਨ੍ਤੋਗਧਾ, ਤਸ੍ਮਾ ਤਤ੍ਥ ਵਿਜ੍ਜਮਾਨਮ੍ਪਿ ਤਂ ਵਿਭਾਗਂ ਅਗ੍ਗਹੇਤ੍ਵਾ ਏਕਂ ਅਰਞ੍ਞਂਯੇਵ ਪਟਿਚ੍ਚ ਅਰਞ੍ਞਸਞ੍ਞਂ ਮਨਸਿ ਕਰੋਤਿ. ਓਤਰਤੀਤਿ ਅਨੁਪ੍ਪਵਿਸਤਿ. ਅਧਿਮੁਚ੍ਚਤੀਤਿ ਨਿਚ੍ਛਿਨੋਤਿ. ਪਵਤ੍ਤਦਰਥਾਤਿ ਤਥਾਰੂਪਾਯ ਪਸ੍ਸਦ੍ਧਿਯਾ ਅਭਾਵਤੋ ਓਲ਼ਾਰਿਕਧਮ੍ਮਪ੍ਪਵਤ੍ਤਿਸਿਦ੍ਧਾ ਦਰਥਾ. ਕਿਲੇਸਦਰਥਾਤਿ ਅਨੁਨਯਪਟਿਘਸਮ੍ਭਵਾ ਕਿਲੇਸਦਰਥਾ. ਦੁਤਿਯਪਦੇਤਿ ‘‘ਯੇ ਅਸ੍ਸੁ ਦਰਥਾ ਮਨੁਸ੍ਸਸਞ੍ਞਂ ਪਟਿਚ੍ਚਾ’’ਤਿ ਇਮਸ੍ਮਿਂ ਪਦੇ. ਮਨਸਿਕਾਰਸਨ੍ਤਤਾਯ, – ‘‘ਨਾਯਂ ਪੁਬ੍ਬੇ ਵਿਯ ਓਲ਼ਾਰਿਕਾ, ਧਮ੍ਮਪ੍ਪਵਤ੍ਤੀ’’ਤਿ ਸਙ੍ਖਾਰਦਸ੍ਸਨਦਰਥਾਨਂ ਸੁਖੁਮਤਾ ਸਲ੍ਲਹੁਕਤਾ ਚ ਚਰਿਤਤ੍ਥਾਤਿ ਆਹ ‘‘ਪਵਤ੍ਤਦਰਥਮਤ੍ਤਾ ਅਤ੍ਥੀ’’ਤਿ.
ਯਂ ਕਿਲੇਸਦਰਥਜਾਤਂ, ਤਂ ਇਮਿਸ੍ਸਾ ਦਰਥਸਞ੍ਞਾਯ ਨ ਹੋਤੀਤਿ ਯੋਜਨਾ. ਪਵਤ੍ਤਦਰਥਮਤ੍ਤਂ ਅਵਸਿਟ੍ਠਂ ਹੋਤਿ, ਵਿਜ੍ਜਮਾਨਮੇਵ ਅਤ੍ਥਿ ਇਦਨ੍ਤਿ ਪਜਾਨਾਤੀਤਿ ਯੋਜਨਾ. ਸੁਞ੍ਞਤਾ ਨਿਬ੍ਬਤ੍ਤੀਤਿ ਸੁਞ੍ਞਤਨ੍ਤਿ ਪਵਤ੍ਤਿ. ਸੁਞ੍ਞਤਾ ਸਹਚਰਿਤਞ੍ਹਿ ਸੁਞ੍ਞਂ, ਇਧ ਸੁਞ੍ਞਤਾਤਿ ਵੁਤ੍ਤਾ.
੧੭੭. ਅਸ੍ਸਾਤਿ ਭਗਵਤੋ ਏਵਂ ਇਦਾਨਿ ਵੁਚ੍ਚਮਾਨਾਕਾਰੇਨ ਚਿਤ੍ਤਪ੍ਪਵਤ੍ਤਿ ਅਹੋਸਿ. ਅਚ੍ਚਨ੍ਤਸੁਞ੍ਞਤਨ੍ਤਿ ‘‘ਪਰਮਾਨੁਤ੍ਤਰ’’ਨ੍ਤਿ ਵੁਤ੍ਤਂ ਅਰਹਤ੍ਤਂ ਦੇਸੇਸ੍ਸਾਮੀਤਿ. ਅਰਞ੍ਞਸਞ੍ਞਾਯ ਵਿਸੇਸਾਨਧਿਗਮਨਤੋਤਿ, ‘‘ਅਰਞ੍ਞਂ ਅਰਞ੍ਞ’’ਨ੍ਤਿ ਮਨਸਿਕਾਰੇਨ ਝਾਨਾਦਿਵਿਸੇਸਸ੍ਸ ਅਧਿਗਮਾਭਾਵਤੋ, ‘‘ਪਥਵੀ’’ਤਿ ਮਨਸਿਕਾਰੇਨ ਵਿਸੇਸਾਧਿਗਮਨਤੋ. ਇਦਾਨਿ ਤਮੇਵਤ੍ਥਂ ਉਪਮਾਯ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਏਵਂ ਸਨ੍ਤੇਤਿ ਏਵਂ ਵਪਿਤੇ ਸਾਲਿਆਦਯੋ ਸਮ੍ਪਜ੍ਜਨ੍ਤਿ. ਧੁਵਸੇਵਨਨ੍ਤਿ ਨਿਯਤਸੇਵਨਂ ਪਾਰਿਹਾਰਿਯਕਮ੍ਮਟ੍ਠਾਨਂ. ਪਟਿਚ੍ਚਾਤਿ ਏਤ੍ਥ ‘‘ਸਮ੍ਭੂਤ’’ਨ੍ਤਿ ਵਚਨਸੇਸੋ ਇਚ੍ਛਿਤੋਤਿ ਆਹ ‘‘ਪਟਿਚ੍ਚ ਸਮ੍ਭੂਤ’’ਨ੍ਤਿ. ਪਥਵਿਂ ਪਟਿਚ੍ਚ ਸਮ੍ਭੂਤਾ ਹਿ ਸਞ੍ਞਾਤਿ.
ਪਥਵੀਕਸਿਣੇ ਸੋ ਪਥਵੀਸਞ੍ਞੀ ਹੋਤਿ, ਨ ਪਕਤਿਪਥਵਿਯਂ. ਤਸ੍ਸਾਤਿ ਪਥਵੀਕਸਿਣਸ੍ਸ. ਤੇਹੀਤਿ ਗਣ੍ਡਾਦੀਹਿ. ਸੁਟ੍ਠੁ ਵਿਹਤਨ੍ਤਿ ਯਥਾ ਵਲੀਨਂ ਲੇਸੋਪਿ ਨ ਹੋਤਿ, ਏਵਂ ਸਮ੍ਮਦੇਵ ਆਕੋਟਿਤਂ. ਨਦੀਤਲ਼ਾਕਾਦੀਨਂ ਤੀਰਪ੍ਪਦੇਸੋ ਉਦਕਸ੍ਸ ਆਕਰਟ੍ਠੇਨ ਕੂਲਂ, ਉਨ੍ਨਤਭਾਵਤੋ ਉਗ੍ਗਤਂ ਕੂਲਂ ਵਿਯਾਤਿ ਉਕ੍ਕੂਲਂ, ਭੂਮਿਯਾ ਉਚ੍ਚਟ੍ਠਾਨਂ. ਵਿਗਤਂ ਕੂਲਨ੍ਤਿ ਵਿਕ੍ਕੂਲਂ, ਨੀਚਟ੍ਠਾਨਂ. ਤੇਨਾਹ ‘‘ਉਚ੍ਚਨੀਚ’’ਨ੍ਤਿ. ਏਕਂ ਸਞ੍ਞਨ੍ਤਿ ਏਕਂ ਪਥਵੀਤਿਸਞ੍ਞਂਯੇਵ.
੧੮੨. ਸਤਿਪਿ ਸਙ੍ਖਾਰਨਿਮਿਤ੍ਤਵਿਰਹੇ ਯਾਦਿਸਾਨਂ ਨਿਮਿਤ੍ਤਾਨਂ ਅਭਾਵੇਨ ‘‘ਅਨਿਮਿਤ੍ਤ’’ਨ੍ਤਿ ਵੁਚ੍ਚਤਿ, ਤਾਨਿ ਦਸ੍ਸੇਤੁਂ, ‘‘ਨਿਚ੍ਚਨਿਮਿਤ੍ਤਾਦਿਵਿਰਹਿਤੋ’’ਤਿ ਵੁਤ੍ਤਂ. ਚਤੁਮਹਾਭੂਤਿਕਂ ਚਤੁਮਹਾਭੂਤਨਿਸ੍ਸਿਤਂ. ਸਲ਼ਾਯਤਨਪਟਿਸਂਯੁਤ੍ਤਂ ਚਕ੍ਖਾਯਤਨਾਦਿਸਲ਼ਾਯਤਨਸਹਿਤਂ.
੧੮੩. ਵਿਪਸ੍ਸਨਾਯ ਪਟਿਵਿਪਸ੍ਸਨਨ੍ਤਿ ਧਮ੍ਮਾਨਞ੍ਚ ਪੁਨ ਵਿਪਸ੍ਸਨਂ. ਇਧਾਤਿ ਅਤ੍ਤਨੋ ਪਚ੍ਚਕ੍ਖਭੂਤਯਥਾਧਿਗਤਮਗ੍ਗਫਲਂ ਵਦਤੀਤਿ ਆਹ – ‘‘ਅਰਿਯਮਗ੍ਗੇ ਚੇਵ ਅਰਿਯਫਲੇ ਚਾ’’ਤਿ. ਉਪਾਦਿਸੇਸਦਰਥਦਸ੍ਸਨਤ੍ਥਨ੍ਤਿ ਸਬ੍ਬਸੋ ਕਿਲੇਸੁਪਧਿਯਾ ਪਹੀਨਾਯ ਖਨ੍ਧੋਪਧਿ ਅਵਿਸਿਟ੍ਠਾ, ਤਪ੍ਪਚ੍ਚਯਾ ਦਰਥਾ ਉਪਾਦਿਸੇਸਦਰਥਾ, ਤਂ ਦਸ੍ਸਨਤ੍ਥਂ. ਯਸ੍ਮਾ ਵਿਸਯਤੋ ਗਾਮਸਞ੍ਞਾ ਓਲ਼ਾਰਿਕਾ, ਮਨੁਸ੍ਸਸਞ੍ਞਾ ਸੁਖੁਮਾ, ਤਸ੍ਮਾ ਮਨੁਸ੍ਸਸਞ੍ਞਾਯ ਗਾਮਸਞ੍ਞਂ ਨਿਵਤ੍ਤੇਤ੍ਵਾ. ਯਸ੍ਮਾ ਪਨ ਮਨੁਸ੍ਸਸਞ੍ਞਾਪਿ ਸਭਾਗਵਤ੍ਥੁਪਰਿਗ੍ਗਹਤੋ ਓਲ਼ਾਰਿਕਾ, ਸਭਾਗਵਤ੍ਥੁਤੋ ਅਰਞ੍ਞਸਞ੍ਞਾ ਸੁਖੁਮਾ, ਤਸ੍ਮਾ ਅਰਞ੍ਞਸਞ੍ਞਾਯ ਮਨੁਸ੍ਸਸਞ੍ਞਂ ਨਿਵਤ੍ਤੇਤ੍ਵਾ. ਪਥਵੀਸਞ੍ਞਾਦਿਨਿਵਤ੍ਤਨੇ ਕਾਰਣਂ ਹੇਟ੍ਠਾ ਸੁਤ੍ਤਨ੍ਤਰੇਸੁ ਚ ਵੁਤ੍ਤਮੇਵ. ਅਨੁਪੁਬ੍ਬੇਨਾਤਿ ਮਗ੍ਗਪ੍ਪਟਿਪਾਟਿਯਾ. ਨਿਚ੍ਚਸਾਰਾਦੀਨਂ ਸਬ੍ਬਸੋ ਅਵਤ੍ਥੁਤਾਯ ਅਚ੍ਚਨ੍ਤਮੇਵ ਸੁਞ੍ਞਤ੍ਤਾ ਅਚ੍ਚਨ੍ਤਸੁਞ੍ਞਤਾ.
੧੮੪. ਸੁਞ੍ਞਤਫਲਸਮਾਪਤ੍ਤਿਨ੍ਤਿ ਸੁਞ੍ਞਤਵਿਮੋਕ੍ਖਸ੍ਸ ਫਲਭੂਤਤ੍ਤਾ, ਸੁਞ੍ਞਤਾਨੁਪਸ੍ਸਨਾਯ ਵਸੇਨ ਸਮਾਪਜ੍ਜਿਤਬ੍ਬਤ੍ਤਾ ਚ ਸੁਞ੍ਞਤਫਲਸਮਾਪਤ੍ਤਿਨ੍ਤਿ ਲਦ੍ਧਨਾਮਂ ਅਰਹਤ੍ਤਫਲਸਮਾਪਤ੍ਤਿਂ. ਯਸ੍ਮਾ ਅਤੀਤੇ ਪਚ੍ਚੇਕਸਮ੍ਬੁਦ੍ਧਾ ਅਹੇਸੁਂ, ਅਨਾਗਤੇ ਭਵਿਸ੍ਸਨ੍ਤਿ, ਇਦਾਨਿ ਪਨ ਬੁਦ੍ਧਸਾਸਨਸ੍ਸ ਧਰਮਾਨਤ੍ਤਾ ਪਚ੍ਚੇਕਬੁਦ੍ਧਾ ਨ ਵਤ੍ਤਨ੍ਤਿ, ਤਸ੍ਮਾ ਪਚ੍ਚੇਕਬੁਦ੍ਧਗ੍ਗਹਣਂ ਅਕਤ੍ਵਾ, ‘‘ਏਤਰਹਿਪਿ ਬੁਦ੍ਧਬੁਦ੍ਧਸਾਵਕਸਙ੍ਖਾਤਾ’’ਇਚ੍ਚੇਵ ਵੁਤ੍ਤਂ. ਨ ਹਿ ਬੁਦ੍ਧਸਾਸਨੇ ਧਰਨ੍ਤੇ ਪਚ੍ਚੇਕਬੁਦ੍ਧਾ ਭਵਨ੍ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਚੂਲ਼ਸੁਞ੍ਞਤਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੨. ਮਹਾਸੁਞ੍ਞਤਸੁਤ੍ਤਵਣ੍ਣਨਾ
੧੮੫. ਛਵਿਵਣ੍ਣੇਨ ਸੋ ਕਾਲ਼ੋ, ਨ ਨਾਮੇਨ. ਪਲਾਲਸਨ੍ਥਾਰੋਤਿ ਆਦੀਨੀਤਿ ਆਦਿ-ਸਦ੍ਦੇਨ ਕੋਚ੍ਛਚਿਮਿਲਿਕਾਕਟਸਾਰਾਦੀਨਂ ਗਹਣਂ. ਗਣਭਿਕ੍ਖੂਨਨ੍ਤਿ ਗਣਬਨ੍ਧਨਵਸੇਨ ਭਿਕ੍ਖੂਨਂ.
ਯਦਿ ਸਂਸਯੋ ਨਾਮ ਨਤ੍ਥਿ, ‘‘ਸਮ੍ਬਹੁਲਾ ਨੁ ਖੋ’’ਤਿ ਇਦਂ ਕਥਨ੍ਤਿ ਆਹ ‘‘ਵਿਤਕ੍ਕਪੁਬ੍ਬਭਾਗਾ’’ਤਿਆਦਿ. ਤਤ੍ਥ ਵਿਤਕ੍ਕੋ ਪੁਬ੍ਬਭਾਗੋ ਏਤਿਸ੍ਸਾਤਿ ਵਿਤਕ੍ਕਪੁਬ੍ਬਭਾਗਾ, ਪੁਚ੍ਛਾ. ਸਾ ‘‘ਸਮ੍ਬਹੁਲਾ ਨੋ ਏਤ੍ਥ ਭਿਕ੍ਖੂਵਿਹਰਨ੍ਤੀ’’ਤਿ ਵਚਨਂ, ਵਿਤਕ੍ਕੋ ਪਨ ‘‘ਸਮ੍ਬਹੁਲਾ ਨੁ ਖੋ ਇਧ ਭਿਕ੍ਖੂ ਵਿਹਰਨ੍ਤੀ’’ਤਿ ਇਮਿਨਾ ਆਕਾਰੇਨ ਤਦਾ ਭਗਵਤੋ ਉਪ੍ਪਨ੍ਨੋ ਚਿਤ੍ਤਸਙ੍ਕਪ੍ਪੋ, ਤਸ੍ਸ ਪਰਿਵਿਤਕ੍ਕਸ੍ਸ ਤਬ੍ਭਾਵਜੋਤਨੋਯਂ ਨੁ-ਕਾਰੋ ਵੁਤ੍ਤੋਤਿ ਦਸ੍ਸੇਨ੍ਤੋ ਆਹ – ‘‘ਵਿਤਕ੍ਕਪੁਬ੍ਬਭਾਗੇ ਚਾਯਂ ਨੁ-ਕਾਰੋ ਨਿਪਾਤਮਤ੍ਤੋ’’ਤਿ. ਕਿਞ੍ਚਾਪਿ ਗਚ੍ਛਨ੍ਤੋ ਦਿਸ੍ਵਾ, ‘‘ਸਮ੍ਬਹੁਲਾ ਨੋ ਏਤ੍ਥ ਭਿਕ੍ਖੂ ਵਿਹਰਨ੍ਤੀ’’ਤਿ ਪੁਚ੍ਛਾਵਸੇਨ ਭਗਵਤਾ ਵੁਤ੍ਤੋ, ਅਥ ਖੋ ‘‘ਨ ਖੋ, ਆਨਨ੍ਦ, ਭਿਕ੍ਖੁ ਸੋਭਤਿ ਸਙ੍ਗਣਿਕਾਰਾਮੋ’’ਤਿਆਦਿ (ਮ. ਨਿ. ੩.੧੮੫) ਉਪਰਿਦੇਸਨਾਵਸੇਨ ਮਤ੍ਥਕਂ ਗਚ੍ਛਨ੍ਤੇ ਅਵਿਨਿਚ੍ਛਿਤੋ ਨਾਮ ਨ ਹੋਤਿ, ਅਥ ਖੋ ਵਿਸੁਂ ਵਿਨਿਚ੍ਛਿਤੋ ਏਵ ਹੋਤਿ, ਦਿਸ੍ਵਾ ਨਿਚ੍ਛਿਨਿਤ੍ਵਾਵ ਕਥਾਸਮੁਟ੍ਠਾਪਨਤ੍ਥਂ ਤਥਾ ਪੁਚ੍ਛਤਿ. ਤਥਾ ਹਿ ਵੁਤ੍ਤਂ – ‘‘ਜਾਨਨ੍ਤਾਪਿ ਤਥਾਗਤਾ ਪੁਚ੍ਛਨ੍ਤੀ’’ਤਿ (ਪਾਰਾ. ੧੬). ਤੇਨਾਹ ‘‘ਇਤੋ ਕਿਰਾ’’ਤਿਆਦਿ.
ਯਥਾ ਨਦੀਓਤਿਣ੍ਣਂ ਉਦਕਂ ਯਥਾਨਿਨ੍ਨਂ ਪਕ੍ਖਨ੍ਦਤਿ, ਏਵਂ ਸਤ੍ਤਾ ਧਾਤੁਸੋ ਸਂਸਨ੍ਦਨ੍ਤਿ, ਤਸ੍ਮਾ ‘‘ਗਣਵਾਸੋ ਨਦੀਓਤਿਣ੍ਣਉਦਕਸਦਿਸੋ’’ਤਿ ਵੁਤ੍ਤਂ. ਇਦਾਨਿ ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ – ‘‘ਨਿਰਯਤਿਰਚ੍ਛਾਨਯੋਨੀ’’ਤਿਆਦਿ ਵੁਤ੍ਤਂ. ਕੁਰੁਵਿਨ੍ਦਾਦਿਨ੍ਹਾਨੀਯਚੁਣ੍ਣਾਨਿ ਸਣ੍ਹਸੁਖੁਮਭਾਵਤੋ ਨਾਲ਼ਿਯਂ ਪਕ੍ਖਿਤ੍ਤਾਨਿ ਨਿਰਨ੍ਤਰਾਨੇਵ ਤਿਟ੍ਠਨ੍ਤੀਤਿ ਆਹ – ‘‘ਚੁਣ੍ਣਭਰਿਤਾ ਨਾਲ਼ਿ ਵਿਯਾ’’ਤਿ. ਸਤ੍ਤਪਣ੍ਣਾਸ ਕੁਲਸਤਸਹਸ੍ਸਾਨੀਤਿ ਸਤ੍ਤਸਤਸਹਸ੍ਸਾਧਿਕਾਨਿ ਪਞ੍ਞਾਸ ਕੁਲਾਨਂਯੇਵ ਸਤਸਹਸ੍ਸਾਨਿ, ਮਨੁਸ੍ਸਾਨਂ ਪਨ ਵਸੇਨ ਸਤ੍ਤ ਕੋਟਿਯੋ ਤਦਾ ਤਤ੍ਥ ਵਸਿਂਸੁ.
ਤਤੋ ਚਿਨ੍ਤੇਸਿ, ਕਥਂ? ਕਾਮਞ੍ਚਾਯਂ ਲੋਕਪਕਤਿ, ਮਯ੍ਹਂ ਪਨ ਸਾਸਨੇ ਅਯੁਤ੍ਤੋਵ ਸੋਤਿ ਆਹ – ‘‘ਮਯਾ’’ਤਿਆਦਿ. ਧਮ੍ਮਨ੍ਤਿ ਸਭਾਵਸਿਦ੍ਧਂ. ਸਂਵੇਗੋਤਿ ਸਹੋਤ੍ਤਪ੍ਪਞਾਣਂ ਵੁਚ੍ਚਤਿ. ਨ ਖੋ ਪਨੇਤਂ ਸਕ੍ਕਾ ਗਿਲਾਨੁਪਟ੍ਠਾਨਓਵਾਦਾਨੁਸਾਸਨਿਆਦਿਵਸੇਨ ਸਮਾਗਮਸ੍ਸ ਇਚ੍ਛਿਤਬ੍ਬਤ੍ਤਾ. ਗਣਭੇਦਨਨ੍ਤਿ ਗਣਸਙ੍ਗਣਿਕਾਯ ਵਿਵੇਚਨਂ.
੧੮੬. ਕਤਪਰਿਭਣ੍ਡਨ੍ਤਿ ਪੁਬ੍ਬੇ ਕਤਸਂਵਿਧਾਨਸ੍ਸ ਚੀਵਰਸ੍ਸ ਵੁਤ੍ਤਾਕਾਰੇਨ ਪਟਿਸਙ੍ਖਰਣਂ. ਨੋਤਿ ਅਮ੍ਹਾਕਂ. ਅਨਤ੍ਤਮਨੋਤਿ ਅਨਾਰਾਧਿਤਚਿਤ੍ਤੋ.
ਸਕਗਣੇਨ ਸਹਭਾਵਤੋ ਸਙ੍ਗਣਿਕਾਤਿ ਆਹ ‘‘ਸਕਪਰਿਸਸਮੋਧਾਨ’’ਨ੍ਤਿ. ਗਣੋਤਿ ਪਨ ਇਧ ਜਨਸਮੂਹੋਤਿ ਵੁਤ੍ਤਂ ‘‘ਨਾਨਾਜਨਸਮੋਧਾਨ’’ਨ੍ਤਿ. ਸੋਭਤਿ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਤੋ. ਕਾਮਤੋ ਨਿਕ੍ਖਮਤੀਤਿ ਨਿਕ੍ਖਮੋ, ਏਵਂ ਨਿਕ੍ਖਮਵਸੇਨ ਉਪ੍ਪਨ੍ਨਂ ਸੁਖਂ. ਗਣਸਙ੍ਗਣਿਕਾਕਿਲੇਸਸਙ੍ਗਣਿਕਾਹਿ ਪਵਿਵਿਤ੍ਤਿ ਪਵਿਵੇਕੋ. ਪਵਿਵੇਕਵਸੇਨ ਉਪ੍ਪਨ੍ਨਂ ਸੁਖਂ. ਰਾਗਾਦੀਨਂ ਉਪਸਮਾਵਹਂ ਸੁਖਂ ਉਪਸਮਸੁਖਂ. ਮਗ੍ਗਸਮ੍ਬੋਧਾਵਹਂ ਸੁਖਂ ਸਮ੍ਬੋਧਿਸੁਖਂ. ਨਿਕਾਮੇਤਬ੍ਬਸ੍ਸ, ਨਿਕਾਮਂ ਵਾ ਲਾਭੀ ਨਿਕਾਮਲਾਭੀ. ਨਿਦੁਕ੍ਖਂ ਸੁਖੇਨੇਵ ਲਭਤੀਤਿ ਅਦੁਕ੍ਖਲਾਭੀ. ਕਸਿਰਂ ਵੁਚ੍ਚਤਿ ਅਪ੍ਪਕਨ੍ਤਿ ਆਹ – ‘‘ਅਕਸਿਰਲਾਭੀਤਿ ਵਿਪੁਲਲਾਭੀ’’ਤਿ.
ਸਾਮਾਯਿਕਨ੍ਤਿ ਸਮਯੇ ਕਿਲੇਸਵਿਮੁਚ੍ਚਨਂ ਅਚ੍ਚਨ੍ਤਮੇਵਾਤਿ ਸਾਮਾਯਿਕਂ ਮ-ਕਾਰੇ ਅ-ਕਾਰਸ੍ਸ ਦੀਘਂ ਕਤ੍ਵਾ. ਤੇਨਾਹ – ‘‘ਅਪ੍ਪਿਤਪ੍ਪਿਤਸਮਯੇ ਕਿਲੇਸੇਹਿ ਵਿਮੁਤ੍ਤ’’ਨ੍ਤਿ. ਕਨ੍ਤਨ੍ਤਿ ਅਙ੍ਗਸਨ੍ਤਤਾਯ ਆਰਮ੍ਮਣਸਨ੍ਤਤਾਯ ਚ ਕਮਨੀਯਂ ਮਨੋਰਮ੍ਮਂ. ਅਸਾਮਾਯਿਕਂ ਅਚ੍ਚਨ੍ਤਵਿਮੁਤ੍ਤਂ.
ਏਤ੍ਤਾਵਤਾਤਿਆਦਿਨਾ ਸਙ੍ਗਣਿਕਾਰਾਮਸ੍ਸ ਵਿਸੇਸਾਧਿਗਮਸ੍ਸ ਅਨ੍ਤਰਾਯਿਕਭਾਵਂ ਅਨ੍ਵਯਤੋ ਬ੍ਯਤਿਰੇਕਤੋ ਚ ਸਹ ਨਿਦਸ੍ਸਨੇਨ ਦਸ੍ਸੇਤਿ. ਤਤ੍ਥ ਸਾ ਦੁਵਿਧਾ ਅਨ੍ਤਰਾਯਿਕਤਾ ਵੋਦਾਨਧਮ੍ਮਾਨਂ ਅਨੁਪ੍ਪਤ੍ਤਿਹੇਤੁਕਾ, ਸਂਕਿਲੇਸਧਮ੍ਮਾਨਂ ਉਪ੍ਪਤ੍ਤਿਹੇਤੁਕਾ ਚ.
ਤੇ ਪਠਮਂ ‘‘ਸਙ੍ਗਣਿਕਾਰਾਮੋ’’ਤਿਆਦਿਨਾ ਵਿਭਾਵੇਤ੍ਵਾ ਇਤਰਂ ਵਿਭਾਵੇਤੁਂ, ‘‘ਇਦਾਨਿ ਦੋਸੁਪ੍ਪਤ੍ਤਿਂ ਦਸ੍ਸੇਨ੍ਤੋ’’ਤਿਆਦਿ ਵੁਤ੍ਤਂ. ‘‘ਅਟ੍ਠਿਞ੍ਚ ਪਟਿਚ੍ਚ ਨ੍ਹਾਰੁਞ੍ਚ ਪਟਿਚ੍ਚ ਚਮ੍ਮਞ੍ਚ ਪਟਿਚ੍ਚ ਮਂਸਞ੍ਚ ਪਟਿਚ੍ਚ ਆਕਾਸੋ ਪਰਿਵਾਰਿਤੋ ਰੂਪਨ੍ਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿਆਦੀਸੁ (ਮ. ਨਿ. ੧.੩੦੬) ਵਿਯ ਇਧ ਰੂਪਸਦ੍ਦੋ ਕਰਜਕਾਯਪਰਿਯਾਯੋਤਿ ‘‘ਰੂਪਨ੍ਤਿ ਸਰੀਰ’’ਨ੍ਤਿ ਆਹ. ‘‘ਨਾਹਂ, ਆਨਨ੍ਦ…ਪੇ… ਦੋਮਨਸ੍ਸੁਪਾਯਾਸਾ’’ਤਿ ਕਸ੍ਮਾ ਵੁਤ੍ਤਂ? ਨਨੁ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਚਿਤ੍ਤਾਨਂ ਆਰਦ੍ਧਵਿਪਸ੍ਸਕਾਨਮ੍ਪਿ ਅਸਪ੍ਪਾਯਵਜ੍ਜਨਸਪ੍ਪਾਯਸੇਵਨਵਸੇਨ ਕਾਯਸ੍ਸ ਪਰਿਹਰਣਂ ਹੋਤੀਤਿ? ਸਚ੍ਚਂ, ਤਂ ਪਨ ਯੋ ਕਲ੍ਲਸਰੀਰਂ ਨਿਸ੍ਸਾਯ ਧਮ੍ਮਸਾਧਨਾਯ ਅਨੁਯੁਞ੍ਜਿਤੁਕਾਮੋ ਹੋਤਿ, ਤਸ੍ਸੇਵ ਧਮ੍ਮਸਾਧਨਤਾਵਸੇਨ. ਧਮ੍ਮਸਾਧਨਭਾਵਞ੍ਹਿ ਅਪੇਕ੍ਖਿਤ੍ਵਾ ਅਸਪ੍ਪਾਯਂ ਵਜ੍ਜੇਤ੍ਵਾ ਸਪ੍ਪਾਯਵਸੇਨ ਪੋਸੇਤ੍ਵਾ ਸੁਟ੍ਠੁਤਰਂ ਹੁਤ੍ਵਾ ਅਨੁਯੁਞ੍ਜਨਤੋ ਕਾਯਸ੍ਸ ਪਰਿਹਰਣਂ, ਨ ਸੋ ਕਾਯੇ ਅਭਿਰਤੋ ਨਾਮ ਹੋਤਿ ਪਚ੍ਚਵੇਕ੍ਖਣਾਯਤ੍ਤਤ੍ਤਾ ਅਪੇਕ੍ਖਾਯ ਵਿਨੋਦਿਤਬ੍ਬੋ ਤਾਦਿਸੋਤਿ. ਉਪਾਲਿਗਹਪਤਿਨੋਤਿ ਏਤ੍ਥਾਪਿ ‘‘ਦਸਬਲਸਾਵਕਤ੍ਤੁਪਗਮਨਸਙ੍ਖਾਤੇਨਾ’’ਤਿ ਆਨੇਤ੍ਵਾ ਯੋਜੇਤਬ੍ਬਂ.
੧੮੭. ਮਹਾਕਰੁਣਾਵਸੇਨ ਪਰਿਵੁਤਾਯ ਪਰਿਸਾਯ ਮਜ੍ਝੇ ਨਿਸਿਨ੍ਨੋਪਿ ਏਕਨ੍ਤਵਿਵੇਕਜ੍ਝਾਸਯਤ੍ਤਾ ਏਕਕੋਵ. ਏਤੇਨ ਸਤ੍ਥੁਨੋ ਪਵਿਵਿਤ੍ਤਸ੍ਸ ਪਵਿਵੇਕਤ੍ਤੇਨ ਵਿਵਿਤ੍ਤਤਂ ਦਸ੍ਸੇਤਿ. ਰੂਪਾਰੂਪਪਟਿਭਾਗਨਿਮਿਤ੍ਤੇਹਿ ਨਿਵਤ੍ਤਨਤ੍ਥਂ ‘‘ਰੂਪਾਦੀਨਂ ਸਙ੍ਖਤਨਿਮਿਤ੍ਤਾਨ’’ਨ੍ਤਿ ਵੁਤ੍ਤਂ. ਅਤਿਵਿਯ ਸਨ੍ਤਤਰਪਣੀਤਤਮਭਾਵੇਨ ਵਿਸੇਸਤੋ ਸਿਨੋਤਿ ਬਨ੍ਧਤੀਤਿ ਵਿਸਯੋ, ਸੋ ਏਵ ਸਸਨ੍ਤਤਿਪਰਿਯਾਪਨ੍ਨਤਾਯ ਅਜ੍ਝਤ੍ਤਂ. ਕਿਂ ਪਨ ਤਨ੍ਤਿ ਆਹ – ‘‘ਸੁਞ੍ਞਤਨ੍ਤਿ ਸੁਞ੍ਞਤਫਲਸਮਾਪਤ੍ਤਿ’’ਨ੍ਤਿ. ਉਪਧਿਵਿਵੇਕਤਾਯ ਅਸਙ੍ਖਤਾ ਧਾਤੁ ਇਧ ਵਿਵੇਕੋਤਿ ਅਧਿਪ੍ਪੇਤੋਤਿ ਆਹ – ‘‘ਵਿਵੇਕਨਿਨ੍ਨੇਨਾ’’ਤਿਆਦਿ. ਭਙ੍ਗਮਤ੍ਤਮ੍ਪਿ ਅਸੇਸੇਤ੍ਵਾ ਆਸਵਟ੍ਠਾਨਿਯਾਨਞ੍ਚ ਧਮ੍ਮਾਨਂ ਤਤ੍ਥ ਵਿਗਤਤ੍ਤਾ ਤੇਸਂ ਵਸੇਨ ਵਿਗਤਨ੍ਤੇਨ, ਏਵਂਭੂਤਂ ਤੇਸਂ ਬ੍ਯਨ੍ਤਿਭਾਵਂ ਪਤ੍ਤਨ੍ਤਿ ਪਾਲ਼ਿਯਂ ‘‘ਬ੍ਯਨ੍ਤਿਭੂਤੇਨਾ’’ਤਿ ਵੁਤ੍ਤਂ. ਉਯ੍ਯੋਜਨਂ ਵਿਸ੍ਸਜ੍ਜਨਂ, ਤਂ ਏਤਸ੍ਸ ਅਤ੍ਥਿ, ਉਯ੍ਯੋਜੇਤਿ ਵਿਸ੍ਸਜ੍ਜੇਤੀਤਿ ਵਾ ਉਯ੍ਯੋਜਨਿਕਂ. ਯਸ੍ਮਾ ਨ ਸਬ੍ਬਕਥਾ ਉਯ੍ਯੋਜਨਵਸੇਨੇਵ ਪਵਤ੍ਤਤਿ, ਤਸ੍ਮਾ ਵੁਤ੍ਤਂ ‘‘ਉਯ੍ਯੋਜਨਿਕਪਟਿਸਂਯੁਤ੍ਤ’’ਨ੍ਤਿ.
ਤੇਲਪਾਕਂ ਗਣ੍ਹਨ੍ਤੋ ਵਿਯਾਤਿ ਯਥਾ ਤੇਲਪਾਕੋ ਨਾਮ ਪਰਿਚ੍ਛਿਨ੍ਨਕਾਲੋ ਨ ਅਤਿਕ੍ਕਮਿਤਬ੍ਬੋ, ਏਵਂ ਅਤ੍ਤਨੋ ਸਮਾਪਤ੍ਤਿਕਾਲਂ ਅਨਤਿਕ੍ਕਮਿਤ੍ਵਾ. ਯਥਾ ਹਿ ਕੁਸਲੋ ਵੇਜ੍ਜੋ ਤੇਲਂ ਪਚਨ੍ਤੋ ਤਂ ਤਂ ਤੇਲਕਿਚ੍ਚਂ ਚਿਨ੍ਤੇਤ੍ਵਾ ਯਦਿ ਵਾ ਪਤ੍ਥਿਨ੍ਨਪਾਕੋ, ਯਦਿ ਵਾ ਮਜ੍ਝਿਮਪਾਕੋ, ਯਦਿ ਵਾ ਖਰਪਾਕੋ ਇਚ੍ਛਿਤਬ੍ਬੋ, ਤਸ੍ਸ ਕਾਲਂ ਉਪਧਾਰੇਤ੍ਵਾ ਪਚਤਿ, ਏਵਂ ਭਗਵਾ ਧਮ੍ਮਂ ਦੇਸੇਨ੍ਤੋ ਵੇਨੇਯ੍ਯਾਨਂ ਞਾਣਪਰਿਪਾਕਂ ਉਪਧਾਰੇਤ੍ਵਾ ਤਂ ਤਂ ਕਾਲਂ ਅਨਤਿਕ੍ਕਮਿਤ੍ਵਾ ਧਮ੍ਮਂ ਦੇਸੇਤ੍ਵਾ ਪਰਿਸਂ ਉਯ੍ਯੋਜੇਨ੍ਤੋ ਚ ਵਿਵੇਕਨਿਨ੍ਨੇਨੇਵ ਚਿਤ੍ਤੇਨ ਉਯ੍ਯੋਜੇਤਿ. ਦ੍ਵੇ ਪਞ੍ਚਵਿਞ੍ਞਾਣਾਨਿਪਿ ਤਦਭਿਨੀਹਤਮਨੋਵਿਞ੍ਞਾਣਵਸੇਨ ਨਿਬ੍ਬਾਨਨਿਨ੍ਨਾਨੇਵ. ਬੁਦ੍ਧਾਨਞ੍ਹਿ ਸਙ੍ਖਾਰਾਨਂ ਸੁਟ੍ਠੁ ਪਰਿਞ੍ਞਾਤਤਾਯ ਪਣੀਤਾਨਮ੍ਪਿ ਰੂਪਾਦੀਨਂ ਆਪਾਥਗਮਨੇ ਪਗੇਵ ਇਤਰੇਸਂ ਪਟਿਕੂਲਤਾਵ ਸੁਪਾਕਟਾ ਹੁਤ੍ਵਾ ਉਪਟ੍ਠਾਤਿ, ਤਸ੍ਮਾ ਘਮ੍ਮਾਭਿਤਤ੍ਤਸ੍ਸ ਵਿਯ ਸੀਤਜਲਟ੍ਠਾਨਨਿਨ੍ਨਤਾ ਨਿਬ੍ਬਾਨਨਿਨ੍ਨਮੇਵ ਚਿਤ੍ਤਂ ਹੋਤਿ, ਤਸ੍ਸ ਅਤਿਵਿਯ ਸਨ੍ਤਪਣੀਤਭਾਵਤੋ.
੧੮੮. ਅਜ੍ਝਤ੍ਤਮੇਵਾਤਿ ਇਧ ਝਾਨਾਰਮ੍ਮਣਂ ਅਧਿਪ੍ਪੇਤਨ੍ਤਿ ਆਹ ‘‘ਗੋਚਰਜ੍ਝਤ੍ਤਮੇਵਾ’’ਤਿ. ਇਧ ਨਿਯਕਜ੍ਝਤ੍ਤਂ ਸੁਞ੍ਞਤਂ. ਅਪਗੁਣਪਾਦਕਜ੍ਝਾਨਞ੍ਹਿ ਏਤ੍ਥ ‘‘ਨਿਯਕਜ੍ਝਤ੍ਤ’’ਨ੍ਤਿ ਅਧਿਪ੍ਪੇਤਂ ਵਿਪਸ੍ਸਨਾਵਿਸੇਸਸ੍ਸ ਅਧਿਪ੍ਪੇਤਤ੍ਤਾ, ਨਿਯਕਜ੍ਝਤ੍ਤਂ ਨਿਜ੍ਜੀਵਨਿਸ੍ਸਤ੍ਤਤਂ, ਅਨਤ੍ਤਤਨ੍ਤਿ ਅਤ੍ਥੋ. ਅਸਮ੍ਪਜ੍ਜਨਭਾਵਜਾਨਨੇਨਾਤਿ ਇਦਾਨਿ ਮੇ ਕਮ੍ਮਟ੍ਠਾਨਂ ਵੀਥਿਪਟਿਪਨ੍ਨਂ ਨ ਹੋਤਿ, ਉਪ੍ਪਥਮੇਵ ਪਵਤ੍ਤਤੀਤਿ ਜਾਨਨੇਨ.
ਕਸ੍ਮਾ ਪਨੇਤ੍ਥ ਭਗਵਤਾ ਵਿਪਸ੍ਸਨਾਯ ਏਵ ਪਾਦਕੇ ਝਾਨੇ ਅਵਤ੍ਵਾ ਪਾਦਕਜ੍ਝਾਨਂ ਗਹਿਤਨ੍ਤਿ ਆਹ – ‘‘ਅਪ੍ਪਗੁਣਪਾਦਕਜ੍ਝਾਨਤੋ’’ਤਿਆਦਿ. ਨ ਪਕ੍ਖਨ੍ਦਤਿ ਸਮ੍ਮਾ ਨ ਸਮਾਹਿਤਤ੍ਤਾ. ਸੋ ਪਨ ‘‘ਅਜ੍ਝਤ੍ਤਧਮ੍ਮਾ ਮਯ੍ਹਂ ਨਿਜ੍ਜਟਾ ਨਿਗੁਮ੍ਬਾ ਹੁਤ੍ਵਾ ਨ ਉਪਟ੍ਠਹਨ੍ਤਿ, ਹਨ੍ਦਾਹਂ ਬਹਿਦ੍ਧਾਧਮ੍ਮੇ ਮਨਸਿ ਕਰੇਯ੍ਯਂ ਏਕਚ੍ਚੇਸੁ ਸਙ੍ਖਾਰੇਸੁ ਉਪਟ੍ਠਿਤੇਸੁ ਇਤਰੇਪਿ ਉਪਟ੍ਠਹੇਯ੍ਯੁਮੇਵਾ’’ਤਿ ਪਰਸ੍ਸ…ਪੇ… ਮਨਸਿ ਕਰੋਤਿ. ਪਾਦਕਜ੍ਝਾਨਵਸੇਨ ਵਿਯ ਸਮ੍ਮਸਿਤਜ੍ਝਾਨਵਸੇਨਪਿ ਉਭਤੋਭਾਗਵਿਮੁਤ੍ਤੋ ਹੋਤਿਯੇਵਾਤਿ ਆਹ – ‘‘ਅਰੂਪਸਮਾਪਤ੍ਤਿਯਂ ਨੁ ਖੋ ਕਥਨ੍ਤਿ ਆਨੇਞ੍ਜਂ ਮਨਸਿ ਕਰੋਤੀ’’ਤਿ. ਨ ਮੇ ਚਿਤ੍ਤਂ ਪਕ੍ਖਨ੍ਦਤੀਤਿ ਮਯ੍ਹਂ ਵਿਪਸ੍ਸਨਾਚਿਤ੍ਤਂ ਵੀਥਿਪਟਿਪਨ੍ਨਂ ਹੁਤ੍ਵਾ ਨ ਵਹਤੀਤਿ. ਪਾਦਕਜ੍ਝਾਨਮੇਵਾਤਿ ਵਿਪਸ੍ਸਨਾਯ ਪਾਦਕਭੂਤਮੇਵ ਝਾਨਂ. ਪੁਨਪ੍ਪੁਨਂ ਮਨਸਿ ਕਾਤਬ੍ਬਨ੍ਤਿ ਪੁਨਪ੍ਪੁਨਂ ਸਮਾਪਜ੍ਜਿਤਬ੍ਬਂ ਵਿਪਸ੍ਸਨਾਯ ਤਿਕ੍ਖਵਿਸਦਤਾਪਾਦਨਾਯ. ਅਵਹਨ੍ਤੇ ਨਿਪੁਣਾਭਾਵੇਨ ਛੇਦਨਕਿਰਿਯਾਯ ਅਪ੍ਪਵਤ੍ਤਨ੍ਤੇ. ਸਮਾਪਜ੍ਜਿਤ੍ਵਾ ਵਿਪਸ੍ਸਨਾਯ ਤਿਕ੍ਖਕਮ੍ਮਕਰਣਂ ਸਮਥਵਿਪਸ੍ਸਨਾਵਿਹਾਰੇਨਾਤਿ ਆਹ – ‘‘ਕਮ੍ਮਟ੍ਠਾਨੇ ਮਨਸਿਕਾਰੋ ਵਹਤੀ’’ਤਿ.
੧੮੯. ਸਮ੍ਪਜ੍ਜਤਿ ਮੇਤਿ ਵੀਥਿਪਟਿਪਤ੍ਤਿਯਾ ਪੁਬ੍ਬੇਨਾਪਰਂ ਵਿਸੇਸਾਭਾਵਤੋ ਸਮ੍ਪਜ੍ਜਤਿ ਮੇ ਕਮ੍ਮਟ੍ਠਾਨਨ੍ਤਿ ਜਾਨਨੇਨ. ਇਰਿਯਾਪਥਂ ਅਹਾਪੇਤ੍ਵਾਤਿ ਯਥਾ ਪਰਿਸ੍ਸਮੋ ਨਾਗਚ੍ਛਤਿ, ਏਵਂ ਅਤ੍ਤਨੋ ਬਲਾਨੁਰੂਪਂ ਤਸ੍ਸ ਕਾਲਂ ਨੇਤ੍ਵਾ ਪਮਾਣਮੇਵ ਪਵਤ੍ਤਨੇਨ ਇਰਿਯਾਪਥਂ ਅਹੋਪੇਤ੍ਵਾ. ਸਬ੍ਬਵਾਰੇਸੂਤਿ ਠਾਨਨਿਸਜ੍ਜਾਸਯਨਵਾਰੇਸੁ. ਕਥਾਵਾਰੇਸੁ ਪਨ ਵਿਸੇਸਂ ਤਤ੍ਥ ਤਤ੍ਥ ਵਦਨ੍ਤਿ. ਇਦਂ ਵੁਤ੍ਤਨ੍ਤਿ ਇਦਂ, ‘‘ਇਮਿਨਾ ਵਿਹਾਰੇਨਾ’’ਤਿਆਦਿਵਚਨਂ ਵੁਤ੍ਤਂ.
੧੯੦. ਕਾਮਵਿਤਕ੍ਕਾਦਯੋ ਓਲ਼ਾਰਿਕਕਾਮਰਾਗਬ੍ਯਾਪਾਦਸਭਾਗਾਤਿ ਆਹ – ‘‘ਵਿਤਕ੍ਕਪਹਾਨੇਨ ਦ੍ਵੇ ਮਗ੍ਗੇ ਕਥੇਤ੍ਵਾ’’ਤਿ. ਕਾਮਗੁਣੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਕਿਸ੍ਮਿਞ੍ਚਿਦੇਵ ਕਿਲੇਸੁਪ੍ਪਤ੍ਤਿਕਾਰਣੇਤਿ ਤਸ੍ਸ ਪੁਗ੍ਗਲਸ੍ਸ ਕਿਲੇਸੁਪ੍ਪਤ੍ਤਿਕਾਰਣਂ ਸਨ੍ਧਾਯ ਵੁਤ੍ਤਂ, ਅਞ੍ਞਥਾ ਸਬ੍ਬੇਪਿ ਪਞ੍ਚ ਕਾਮਗੁਣਾ ਕਿਲੇਸੁਪ੍ਪਤ੍ਤਿਕਾਰਣਮੇਵ. ਸਮੁਦਾਚਰਤੀਤਿ ਸਮੁਦਾਚਾਰੋਤਿ ਆਹ ‘‘ਸਮੁਦਾਚਰਣਤੋ’’ਤਿ. ਸੋ ਪਨ ਯਸ੍ਮਾ ਚਿਤ੍ਤਸ੍ਸ, ਨ ਸਤ੍ਤਸ੍ਸ, ਤਸ੍ਮਾ ਵੁਤ੍ਤਂ ਪਾਲ਼ਿਯਂ ‘‘ਚੇਤਸੋ’’ਤਿ. ਮ-ਕਾਰੋ ਪਦਸਨ੍ਧਿਕਰੋ ਏ-ਕਾਰਸ੍ਸ ਚ ਅਕਾਰੋ ਕਤੋਤਿ ਆਹ ‘‘ਏਵਂ ਸਨ੍ਤੇ ਏਤਨ੍ਤਿ.
੧੯੧. ਅਨੁਸਯੋਤਿ ਮਾਨਾਨੁਸਯੋ ਭਵਰਾਗਾਨੁਸਯੋ ਅਵਿਜ੍ਜਾਨੁਸਯੋਤਿ ਤਿਵਿਧੋਪਿ ਅਨੁਸਯੋ ਪਹੀਯਤਿ ਅਰਹਤ੍ਤਮਗ੍ਗੇਨ. ਵੁਤ੍ਤਨਯੇਨੇਵਾਤਿ, ‘‘ਤਤੋ ਮਗ੍ਗਾਨਨ੍ਤਰਂ ਫਲਂ, ਫਲਤੋ ਵੁਟ੍ਠਾਯ ਪਚ੍ਚਵੇਕ੍ਖਮਾਨੋ ਪਹੀਨਭਾਵਂ ਜਾਨਾਤਿ, ਤਸ੍ਸ ਜਾਨਨੇਨ ਸਮ੍ਪਜਾਨੋ ਹੋਤੀ’’ਤਿ ਵੁਤ੍ਤਨਯੇਨ.
ਕੁਸਲਤੋ ਆਯਾਤੀਤਿ ਆਯਤੋ, ਸੋ ਏਤੇਸਨ੍ਤਿ ਕੁਸਲਾਯਤਿਕਾ. ਤੇਨਾਹ ‘‘ਕੁਸਲਤੋ ਆਗਤਾ’’ਤਿ. ਤਂ ਪਨ ਨੇਸਂ ਕੁਸਲਾਯਤਿਕਤ੍ਤਂ ਉਪਨਿਸ੍ਸਯਵਸੇਨ ਹੋਤਿ ਸਹਜਾਤਵਸੇਨਪੀਤਿ ਤਦੁਭਯਂ ਦਸ੍ਸੇਤੁਂ, ‘‘ਸੇਯ੍ਯਥਿਦ’’ਨ੍ਤਿਆਦਿ ਵੁਤ੍ਤਂ.
ਯਸ੍ਮਾ ਪਨ ਯਥਾਵੁਤ੍ਤਧਮ੍ਮੇਸੁ ਕੇਚਿ ਲੋਕਿਯਾ, ਕੇਚਿ ਲੋਕੁਤ੍ਤਰਾ; ਅਥ ਕਸ੍ਮਾ ਵਿਸੇਸੇਨ ‘‘ਲੋਕੁਤ੍ਤਰਾ’’ਤਿ ਵੁਤ੍ਤਨ੍ਤਿ ਆਹ – ‘‘ਲੋਕੇ ਉਤ੍ਤਰਾ ਵਿਸਿਟ੍ਠਾ’’ਤਿ. ਤੇਨ ਲੋਕਿਯਧਮ੍ਮੇਸੁ ਉਤ੍ਤਮਭਾਵੇਨ ਝਾਨਾਦਯੋ ਲੋਕੁਤ੍ਤਰਾ ਵੁਤ੍ਤਾ, ਨ ਲੋਕਸ੍ਸ ਉਤ੍ਤਰਣਤੋਤਿ ਦਸ੍ਸੇਤਿ. ਯਂ ਕਿਞ੍ਚਿ ਮਹਗ੍ਗਤਚਿਤ੍ਤਂ ਮਾਰਸ੍ਸ ਅਵਿਸਯੋ ਅਕਾਮਾਵਚਰਤ੍ਤਾ, ਪਗੇਵ ਤਂ ਵਿਪਸ੍ਸਨਾਯ ਪਾਦਕਭੂਤਂ ਸੁਵਿਕ੍ਖਾਲਿਤਮਲਨ੍ਤਿ ਆਹ – ‘‘ਜਾਨਿਤੁਂ ਨ ਸਕ੍ਕੋਤੀ’’ਤਿ. ਏਕੋ ਆਨਿਸਂਸੋ ਅਤ੍ਥਿ ਭਾਵਨਾਨੁਯੋਗਸ੍ਸ ਸਪ੍ਪਾਯਧਮ੍ਮਕਥਾਪਟਿਲਾਭੋ.
੧੯੨. ਏਤਦਤ੍ਥਨ੍ਤਿ ਕੇਵਲਸ੍ਸ ਸੁਤਸ੍ਸ ਅਤ੍ਥਾਯ. ਸਪ੍ਪਾਯਾਸਪ੍ਪਾਯਵਸੇਨਾਤਿ ਕਸ੍ਮਾ ਵੁਤ੍ਤਂ? ਨਨੁ ਸਪ੍ਪਾਯਵਸੇਨ ਦਸਕਥਾਵਤ੍ਥੂਨਿ ਆਗਤਾਨੀਤਿ? ਸਚ੍ਚਮੇਤਂ, ਅਸਪ੍ਪਾਯਕਥਾਵਜ੍ਜਨਪੁਬ੍ਬਿਕਾਯ ਸਪ੍ਪਾਯ ਕਥਾਯ ਵਸੇਨ ਆਗਤਤ੍ਤਾ ‘‘ਸਪ੍ਪਾਯਾਸਪ੍ਪਾਯਵਸੇਨ ਆਗਤਾਨੀ’’ਤਿ ਵੁਤ੍ਤਂ. ਸੁਤਪਰਿਯਤ੍ਤਿਵਸੇਨਾਤਿ ਸਰੂਪੇਨ ਤਤ੍ਥ ਅਨਾਗਤਾਨਿਪਿ ਦਸਕਥਾਵਤ੍ਥੂਨਿ ਸੁਤ੍ਤਗੇਯ੍ਯਾਦਿਅਨ੍ਤੋਗਧਤ੍ਤਾ, ‘‘ਸੁਤਪਰਿਯਤ੍ਤਿਵਸੇਨ ਆਗਤਾਨੀ’’ਤਿ ਵੁਤ੍ਤਂ. ਪਰਿਪੂਰਣਵਸੇਨ ਸਰੂਪਤੋ ਆਗਤਤ੍ਤਾ ਇਮਸ੍ਮਿਂ ਠਾਨੇ ਠਤ੍ਵਾ ਕਥੇਤਬ੍ਬਾਨਿ. ਅਤ੍ਥੋਤਿ ਸਾਮਞ੍ਞਤ੍ਥੋ.
੧੯੩. ਅਨੁਆਵਤ੍ਤਨ੍ਤੀਤਿ ਅਨੁਅਨੁ ਅਭਿਮੁਖਾ ਹੁਤ੍ਵਾ ਵਤ੍ਤਨ੍ਤਿ, ਪਯਿਰੁਪਾਸਨਾਦਿਵਸੇਨ ਅਨੁਕੂਲਯਨ੍ਤਿ. ਮੁਚ੍ਛਨਤਣ੍ਹਨ੍ਤਿ ਪਚ੍ਚਯੇਸੁ ਮੁਚ੍ਛਨਾਕਾਰਂ. ਤਣ੍ਹਾਯ ਪਤ੍ਥਨਾ ਨਾਮ ਤੇਨਾਕਾਰੇਨ ਪਵਤ੍ਤੀਤਿ ਆਹ – ‘‘ਪਤ੍ਥੇਤਿ ਪਵਤ੍ਤੇਤੀ’’ਤਿ. ਕਿਲੇਸੂਪਦ੍ਦਵੇਨਾਤਿ ਕਿਲੇਸਸਙ੍ਖਾਤੇਨ ਉਪਦ੍ਦਵੇਨ. ਕਿਲੇਸਾ ਹਿ ਸਤ੍ਤਾਨਂ ਮਹਾਨਤ੍ਥਕਰਣਤੋ ‘‘ਉਪਦ੍ਦਵੋ’’ਤਿ ਵੁਚ੍ਚਨ੍ਤਿ. ਅਤ੍ਤਨੋ ਅਬ੍ਭਨ੍ਤਰੇ ਉਪ੍ਪਨ੍ਨੇਨ ਕਿਲੇਸੂਪਦ੍ਦਵੇਨ ਅਨ੍ਤੇਵਾਸਿਨੋ, ਉਪਦ੍ਦਵੋ ਅਨ੍ਤੇਵਾਸੂਪਦ੍ਦਵੋ, ਬ੍ਰਹ੍ਮਚਰਿਯਸ੍ਸ ਉਪਦ੍ਦਵੋ ਬ੍ਰਹ੍ਮਚਾਰੁਪਦ੍ਦਵੋਤਿ ਇਮਮਤ੍ਥਂ ‘‘ਸੇਸੁਪਦ੍ਦਵੇਸੁਪਿ ਏਸੇਵ ਨਯੋ’’ਤਿ ਇਮਿਨਾ ਅਤਿਦਿਸਤਿ. ਗੁਣਮਰਣਂ ਕਥਿਤਂ, ਨ ਜੀਵਿਤਮਰਣਂ.
ਅਪ੍ਪਲਾਭਾਤਿ ਅਪ੍ਪਮਤ੍ਤਕਲਾਭੀ ਵਿਸੇਸਾਨਂ. ਏਵਂ ਵੁਤ੍ਤੋਤਿ ਯਥਾਵੁਤ੍ਤਬ੍ਰਹ੍ਮਚਾਰੁਪਦ੍ਦਵੋ ਦੁਕ੍ਖਵਿਪਾਕਤਰੋ ਚੇਵ ਕਟੁਕਵਿਪਾਕਤਰੋ ਚਾਤਿ ਏਵਂ ਵੁਤ੍ਤੋ. ਆਚਰਿਯਨ੍ਤੇਵਾਸਿਕੂਪਦ੍ਦਵੋ ਹਿ ਬਾਹਿਰਕਸਮਯਵਸੇਨ ਵੁਤ੍ਤੋ, ਬ੍ਰਹ੍ਮਚਾਰੁਪਦ੍ਦਵੋ ਪਨ ਸਾਸਨਵਸੇਨ. ਦੁਰਕ੍ਖਾਤੇ ਹਿ ਧਮ੍ਮਵਿਨਯੇ ਦੁਪ੍ਪਟਿਪਤ੍ਤਿ ਨ ਮਹਾਸਾਵਜ੍ਜਾ ਮਿਚ੍ਛਾਭਿਨਿਵੇਸਸ੍ਸ ਸਿਥਿਲਵਾਯਾਮਭਾਵਤੋ; ਸ੍ਵਾਖ੍ਯਾਤੇ ਪਨ ਧਮ੍ਮਵਿਨਯੇ ਦੁਪ੍ਪਟਿਪਤ੍ਤਿ ਮਹਾਸਾਵਜ੍ਜਾ ਮਹਤੋ ਅਤ੍ਥਸ੍ਸ ਬਾਹਿਰਭਾਵਕਰਣਤੋ. ਤੇਨਾਹ ‘‘ਸਾਸਨੇ ਪਨਾ’’ਤਿਆਦਿ.
੧੯੬. ਤਸ੍ਮਾਤਿ ਇਦਂ ਪੁਬ੍ਬਪਰਾਪੇਕ੍ਖਂ ਪੁਰਿਮਸ੍ਸ ਚ ਅਤ੍ਥਸ੍ਸ ਕਾਰਣਭਾਵੇਨ ਪਚ੍ਚਾਮਸਨਨ੍ਤਿ ਆਹ ‘‘ਯਸ੍ਮਾ’’ਤਿਆਦਿ. ਮਿਤ੍ਤਂ ਏਤਸ੍ਸ ਅਤ੍ਥੀਤਿ ਮਿਤ੍ਤਵਾ, ਤਸ੍ਸ ਭਾਵੋ ਮਿਤ੍ਤਵਤਾ, ਤਾਯ. ਮਿਤ੍ਤਵਸੇਨ ਪਟਿਪਜ੍ਜਨਨ੍ਤਿ ਆਹ ‘‘ਮਿਤ੍ਤਪਟਿਪਤ੍ਤਿਯਾ’’ਤਿ. ਸਪਤ੍ਤਵਤਾਯਾਤਿ ਏਤ੍ਥਾਪਿ ਏਸੇਵ ਨਯੋ.
ਦੁਕ੍ਕਟਦੁਬ੍ਭਾਸਿਤਮਤ੍ਤਮ੍ਪੀਤਿ ਇਮਿਨਾ ਪਗੇਵ ਇਤਰਂ ਵੀਤਿਕ੍ਕਮਨ੍ਤੋਤਿ ਦਸ੍ਸੇਤਿ. ਸਾਵਕੇਸੁ ਹਿਤਪਰਕ੍ਕਮਨਂ ਓਵਾਦਾਨੁਸਾਸਨੀਹਿ ਪਟਿਪਜ੍ਜਨਨ੍ਤਿ ਆਹ – ‘‘ਤਥਾ ਨ ਪਟਿਪਜ੍ਜਿਸ੍ਸਾਮੀ’’ਤਿ. ਆਮਕਮਤ੍ਤਨ੍ਤਿ ਕੁਲਾਲਭਾਜਨਂ ਵੁਚ੍ਚਤਿ. ਨਾਹਂ ਤੁਮ੍ਹੇਸੁ ਤਥਾ ਪਟਿਪਜ੍ਜਿਸ੍ਸਾਮੀਤਿ ਕੁਮ੍ਭਕਾਰੋ ਵਿਯ ਆਮਕਭਾਜਨੇਸੁ ਅਹਂ ਤੁਮ੍ਹੇਸੁ ਕੇਵਲਂ ਜਾਨਾਪੇਨ੍ਤੋ ਨ ਪਟਿਪਜ੍ਜਿਸ੍ਸਾਮਿ. ਨਿਗ੍ਗਣ੍ਹਿਤ੍ਵਾਤਿ ਨੀਹਰਿਤ੍ਵਾ. ਲੋਕਿਯਗੁਣਾਪਿ ਇਧ ਸਾਰੋਤ੍ਵੇਵ ਅਧਿਪ੍ਪੇਤਾ ਲੋਕੁਤ੍ਤਰਗੁਣਾਨਂ ਅਧਿਟ੍ਠਾਨਭਾਵਤੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਮਹਾਸੁਞ੍ਞਤਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੩. ਅਚ੍ਛਰਿਯਬ੍ਭੁਤਸੁਤ੍ਤਵਣ੍ਣਨਾ
੧੯੭. ਵਿਭਤ੍ਤਿਪਤਿਰੂਪਕਾ ਚ ਨਿਪਾਤਾ ਹੋਨ੍ਤੀਤਿ ਯਥਾਰਹਂ ਤਂਤਂਵਿਭਤ੍ਤਿਅਤ੍ਥਦੀਪਕਾ, ਇਧ ਪਚ੍ਚਤ੍ਤਵਚਨੋ ਯਤ੍ਰਸਦ੍ਦੋ, ਹਿਸਦ੍ਦੋ ਹੇਤੁਅਤ੍ਥੋ, ਨਾਮਸਦ੍ਦੋ ਅਚ੍ਛਰਿਯਤ੍ਥੋ, ਪਦਤ੍ਤਯਸ੍ਸ ਪਨ ਅਚ੍ਛਰਿਯਤ੍ਥਨਿਦ੍ਦਿਟ੍ਠਤਾਯ ‘‘ਅਚ੍ਛਰਿਯਤ੍ਥੇ ਨਿਪਾਤੋ’’ਤਿ ਵੁਤ੍ਤਂ. ਏਕਂਸਤੋ ਪਨੇਤਂ ਪਦਤ੍ਤਯਂ. ਤਥਾ ਹਿ ਵਕ੍ਖਤਿ, ‘‘ਯਤ੍ਰਾਤਿ ਨਿਪਾਤਵਸੇਨ ਅਨਾਗਤਵਚਨ’’ਨ੍ਤਿ. ਪਪਞ੍ਚਸਦ੍ਦੋ ਹੇਟ੍ਠਾ ਵੁਤ੍ਤੋ. ਛਿਨ੍ਨਵਟੁਮੇਤਿ ਇਮਿਨਾ ਸਬ੍ਬਕਿਲੇਸਵਟ੍ਟਸ੍ਸ ਅਕੁਸਲਕਮ੍ਮਵਟ੍ਟਸ੍ਸ ਚ ਛਿਨ੍ਨਤ੍ਤਾ ਵਿਪਾਕਵਟ੍ਟਸ੍ਸ ਚ ਉਪਰਿ ਵਕ੍ਖਮਾਨਤ੍ਤਾ ਆਹ – ‘‘ਵਟੁਮਨ੍ਤਿ ਕੁਸਲਾਕੁਸਲਕਮ੍ਮਵਟ੍ਟਂ ਵੁਚ੍ਚਤੀ’’ਤਿ. ਨਿਪਾਤਵਸੇਨ ਯਤ੍ਰਸਦ੍ਦਯੋਗੇਨ. ਅਨਾਗਤਵਚਨਨ੍ਤਿ ਇਦਂ ਅਨਾਗਤਵਚਨਸਦਿਸਤ੍ਤਾ ਵੁਤ੍ਤਂ. ਅਨਾਗਤਤ੍ਥਵਾਚੀ ਹਿ ਅਨਾਗਤਵਚਨਂ, ਅਤ੍ਥੋ ਚੇਤ੍ਥ ਅਤੀਤੋਤਿ. ਅਨੁਸ੍ਸਰੀਤਿ ਇਦਂ ਅਨੁਸ੍ਸਰਿਤਭਾਵਂ ਸਨ੍ਧਾਯ ਵੁਤ੍ਤਂ – ‘‘ਨ ਅਨੁਸ੍ਸਰਿਸ੍ਸਤੀ’’ਤਿ ਸਦ੍ਦਪਯੋਗਸ੍ਸ ਅਤੀਤਵਿਸਯਤ੍ਤਾ. ਯਦਾ ਪਨ ਤੇਹਿ ਭਿਕ੍ਖੂਹਿ ਯਾ ਕਥਾ ਪਵਤ੍ਤਿਤਾ, ਤਤੋ ਪਚ੍ਛਾਪਿ ਭਗਵਤੋ ਤੇਸਂ ਬੁਦ੍ਧਾਨਂ ਅਨੁਸ੍ਸਰਣਂ ਹੋਤਿਯੇਵ.
ਖਤ੍ਤਿਯਜਚ੍ਚਾਤਿਆਦਿਕਾਲਤੋ ਪਟ੍ਠਾਯ ਅਸਮ੍ਭਿਨ੍ਨਾਯ ਖਤ੍ਤਿਯਜਾਤਿਯਾ ਉਦਿਤੋਦਿਤਾਯ. ਬ੍ਰਹ੍ਮਜਚ੍ਚਾਤਿ ਬ੍ਰਾਹ੍ਮਣਜਚ੍ਚਾ. ਏਵਂਗੋਤ੍ਤੇਪਿ ਏਸੇਵ ਨਯੋ. ਲੋਕਿਯਲੋਕੁਤ੍ਤਰਸੀਲੇਨਾਤਿ ਪਾਰਮਿਤਾਸਮ੍ਭੂਤੇਨ ਬੁਦ੍ਧਾਵੇਣਿਕਤ੍ਤਾ ਅਨਞ੍ਞਸਾਧਾਰਣੇਨ ਲੋਕਿਯੇਨ ਲੋਕੁਤ੍ਤਰੇਨ ਚ ਸੀਲੇਨ. ਏਵਂਸੀਲਾਤਿ ਅਨਵਸੇਸਸੀਲਾਨਂ ਵਿਸੁਂ ਪਚ੍ਚਵੇਕ੍ਖਣਕਰਣੇਨ ਏਵਂਸੀਲਾਤਿ ਅਨੁਸ੍ਸਰਿਸ੍ਸਤਿ. ਏਸ ਨਯੋ ਸੇਸੇਸੁ. ਯਥਾ ਵਿਜ੍ਜਾਭਾਗਿਯਾ ਵਿਜ੍ਜਾਸਮ੍ਪਯੁਤ੍ਤਧਮ੍ਮਾ, ਏਵਂ ਸਮਾਧਿਪਕ੍ਖਾ ਸਮਾਧਿਸਮ੍ਪਯੁਤ੍ਤਧਮ੍ਮਾਪਿ ਸਤਿਵੀਰਿਯਾਦਯੋਤਿ ਆਹ – ‘‘ਹੇਟ੍ਠਾ ਸਮਾਧਿਪਕ੍ਖਾਨਂ ਧਮ੍ਮਾਨਂ ਗਹਿਤਤ੍ਤਾ ਵਿਹਾਰੋ ਗਹਿਤੋਵਾ’’ਤਿ. ਤਸ੍ਮਾ ਸਮਾਧਿਪਕ੍ਖਧਮ੍ਮਵਿਨਿਮੁਤ੍ਤੋ ਏਵ ਇਧ ਵਿਹਾਰੋ ਅਧਿਪ੍ਪੇਤੋਤਿ ਵੁਤ੍ਤਂ ‘‘ਇਦਂ ਹੀ’’ਤਿਆਦਿ.
ਯਥਾ ਵਾ ਅਟ੍ਠਸਮਾਪਤ੍ਤਿਵਿਪਸ੍ਸਨਾਮਗ੍ਗਫਲਸਙ੍ਗਹਿਤਾ ਲੋਕਿਯਲੋਕੁਤ੍ਤਰਾ ਸਮਾਧਿਪਞ੍ਞਾ ‘‘ਏਵਂਧਮ੍ਮਾ ਏਵਂਪਞ੍ਞਾ’’ਤਿ ਪਦੇਹਿ ਹੇਟ੍ਠਾ ਗਹਿਤਾਪਿ ਯਥਾਸਕਂ ਪਟਿਪਕ੍ਖਤੋ ਮੁਚ੍ਚਨਸ੍ਸ ਪਵਤ੍ਤਿਵਿਸੇਸਂ ਉਪਾਦਾਯ ‘‘ਏਵਂਵਿਮੁਤ੍ਤਾ’’ਤਿ ਏਤ੍ਥ ਪੁਨ ਗਹਿਤਾ, ਤਥਾ ‘‘ਏਵਂਧਮ੍ਮਾ’’ਤਿ ਏਤ੍ਥ ਗਹਿਤਾਪਿ ਸਮਾਧਿਪਕ੍ਖਧਮ੍ਮਾ ਦਿਬ੍ਬਬ੍ਰਹ੍ਮਆਨੇਞ੍ਜਅਰਿਯਵਿਹਾਰਸਙ੍ਖਾਤਂ ਅਤ੍ਤਨੋ ਪਵਤ੍ਤਿਵਿਸੇਸਂ ਉਪਾਦਾਯ, ‘‘ਏਵਂਵਿਹਾਰੀ’’ਤਿ ਏਤ੍ਥ ਪੁਨ ਗਹਿਤਾਤਿ ਵੁਚ੍ਚਮਾਨੇ ਨ ਕੋਚਿ ਵਿਰੋਧੋ. ਫਲਧਮ੍ਮਾਨਂ ਪਵਤ੍ਤਿਕਾਲੇਪਿ ਕਿਲੇਸਾਨਂ ਪਟਿਪ੍ਪਸ੍ਸਦ੍ਧਿ ਨ ਤਂਆਨੁਭਾਵਜਾਤਾ, ਅਥ ਖੋ ਅਰਿਯਮਗ੍ਗੇਨ ਕਿਲੇਸਾਨਂ ਸਮੁਚ੍ਛਿਨ੍ਨਤ੍ਤਾਤਿ ਆਹ – ‘‘ਮਗ੍ਗਾਨੁਭਾਵੇਨ ਕਿਲੇਸਾਨਂ ਪਟਿਪਸ੍ਸਦ੍ਧਨ੍ਤੇ ਉਪ੍ਪਨ੍ਨਤ੍ਤਾ’’ਤਿ. ਯੋ ਯਂ ਪਜਹਤਿ, ਸੋ ਪਹਾਯਕੋ ਪਹਾਤਬ੍ਬਤੋ ਵਿਮੁਤ੍ਤੋਤਿ ਵੁਚ੍ਚਤਿ ਵਿਸਂਸਟ੍ਠਭਾਵਤੋਤਿ ਪਹਾਨਵਿਭਾਗੇਨ ਵੁਚ੍ਚਮਾਨੇ ਅਪਹਾਯਕਸ੍ਸ ਨਿਬ੍ਬਾਨਸ੍ਸ ਕਥਂ ਵਿਮੁਤ੍ਤਤਾ? ਵਿਸਂਸਟ੍ਠਾਭਾਵਤੋ ਏਵ. ਤਞ੍ਹਿ ਪਕਤਿਯਾਵ ਸਬ੍ਬਸੋ ਕਿਲੇਸੇਹਿ ਵਿਸਂਸਟ੍ਠਂ ਵਿਨਿਸ੍ਸਟਂ ਸੁਵਿਦੂਰਵਿਦੂਰੇ ਠਿਤਂ, ਤਸ੍ਮਾਸ੍ਸ ਤਤੋ ਨਿਸ੍ਸਟਤ੍ਤਾ ਨਿਸ੍ਸਰਣਵਿਮੁਤ੍ਤਿ ਨਿਸ੍ਸਰਣਪਹਾਨਨ੍ਤਿ ਵੁਚ੍ਚਤੀਤਿ ਆਹ ‘‘ਨਿਬ੍ਬਾਨ’’ਨ੍ਤਿਆਦਿ.
੧੯੯. ਇਮੇ ਤਥਾਗਤਸ੍ਸ ਅਚ੍ਛਰਿਯਅਬ੍ਭੁਤਧਮ੍ਮਾ, ਨ ਸਾਵਕਵਿਸਯਾ, ਮਮ ਪਨ ਦੇਸਨਾ ਤਯਾ ਸੁਤਾ ਏਵਾਤਿ ਤੇ ਥੇਰਸ੍ਸੇਵ ਭਾਰਂ ਕਰੋਨ੍ਤੋ, ‘‘ਤਂ ਭਿਯ੍ਯੋਸੋਮਤ੍ਤਾਯ ਪਟਿਭਨ੍ਤੂ’’ਤਿ ਆਹ. ਸਤੋ ਸਮ੍ਪਜਾਨੋਤਿ ਏਤ੍ਥ ਕਾਲਭੇਦਵਸੇਨ ਲਬ੍ਭਮਾਨਮ੍ਪਿ ਸਮ੍ਪਜਾਨਭਾਵਂ ਅਨਾਮਸਿਤ੍ਵਾ ਗਤਿਵਿਭਾਗੇਨ ਤਂ ਦਸ੍ਸੇਤੁਂ, ‘‘ਦ੍ਵੇ ਸਮ੍ਪਜਞ੍ਞਾਨੀ’’ਤਿਆਦਿ ਵੁਤ੍ਤਂ – ਅਟ੍ਠ ਵਰੇ ਗਣ੍ਹਨ੍ਤੋਤਿ ਏਤ੍ਥ ਕਥਂ ਵਰਂ ਦੇਵਤਾ ਦੇਤਿ, ਪਰਸ੍ਸ ਦੀਯਮਾਨਞ੍ਚ ਤਂ ਕਥਂ ਪਰਸ੍ਸ ਸਮਿਜ੍ਝਤੀਤਿ? ਕਮ੍ਮਬਲੇਨੇਵ. ਯਦਿ ਹਿ ਤਂ ਕਮ੍ਮਂ ਕਤੋਕਾਸਂ ਯਸ੍ਸ ਤਦਪਦੇਸੇਨ ਫਲਂ ਵਿਪਚ੍ਚਤਿ, ਏਵਂ ਦੇਵਤਾਯ ਤਸ੍ਸ ਵਰਂ ਦਿਨ੍ਨਂ, ਇਤਰੇਨ ਚ ਲਦ੍ਧਨ੍ਤਿ ਵੋਹਾਰੋ ਹੋਤੀਤਿ. ਅਪਿਚ ਪਰਸ੍ਸ ਪਤ੍ਥਿਤਵਰਾਨਿ ਨਾਮ ਵਿਪਚ੍ਚਮਾਨਸ੍ਸ ਕਮ੍ਮਸ੍ਸ ਪਚ੍ਚਯਭੂਤੋ ਪਯੋਗਵਿਸੇਸੋਤਿ ਦਟ੍ਠਬ੍ਬਂ. ਤਾਨਿ ਵਿਪਚ੍ਚਨੇ ਏਕਨ੍ਤਿਕਾਨਿਪਿ ਅਪ੍ਪੇਸਕ੍ਖਾ ਦੇਵਤਾ – ‘‘ਅਯਮਸ੍ਸ ਪਤ੍ਥਨਾ ਸਮਿਜ੍ਝਿਸ੍ਸਤਿ, ਨੋ’’ਤਿ ਨ ਜਾਨਨ੍ਤਿ, ਸਕ੍ਕੋ ਪਨ ਪਞ੍ਞਵਾ ਤਾਨਿ ਏਕਚ੍ਚਂ ਜਾਨਾਤਿਯੇਵ. ਤੇਨ ਵੁਤ੍ਤਂ – ‘‘ਸਕ੍ਕੇਨ ਪਸੀਦਿਤ੍ਵਾ ਦਿਨ੍ਨੇ ਅਟ੍ਠ ਵਰੇ ਗਣ੍ਹਨ੍ਤੋ’’ਤਿਆਦਿ.
ਪਠਮਜਵਨਵਾਰੇਤਿ ਉਪ੍ਪਨ੍ਨਸ੍ਸ ਸਬ੍ਬਪਠਮਜਵਨਵਾਰੇ. ਸੋ ਹਿ ਪਟਿਸਨ੍ਧਿਯਾ ਆਸਨ੍ਨਭਾਵਤੋ ਅਵਿਸਦੋ ਹੋਤਿ, ਦੇਵਭਾਵੇ ਨਿਕਨ੍ਤਿਵਸੇਨ ਉਪ੍ਪਜ੍ਜਨਤੋ ਨ ਜਾਨਾਤਿ. ਅਞ੍ਞਾਹਿ ਦੇਵਤਾਹਿ ਅਸਾਧਾਰਣਜਾਨਨਂ ਹੋਤਿ ਦੁਤਿਯਜਵਨਵਾਰਤੋ ਪਟ੍ਠਾਯ ਪਵਤ੍ਤਨਤੋ.
ਅਞ੍ਞੇਪਿ ਦੇਵਾਤਿਆਦਿਨਾ ਬੋਧਿਸਤ੍ਤਸ੍ਸ ਤਤ੍ਥ ਸਮ੍ਪਜਞ੍ਞੇਨੇਵ ਠਿਤਭਾਵਂ ਬ੍ਯਤਿਰੇਕਮੁਖੇਨ ਵਿਭਾਵੇਤਿ. ਆਹਾਰੂਪਚ੍ਛੇਦੇਨ ਕਾਲਙ੍ਕਰੋਨ੍ਤੀਤਿ ਇਦਂ ਖਿਡ੍ਡਾਪਦੋਸਿਕਵਸੇਨ ਵੁਤ੍ਤਂ. ਇਤਰੇਸਮ੍ਪਿ ਦਿਬ੍ਬਭੋਗੇਹਿ ਮੁਚ੍ਛਿਤਤਂ ਅਜ੍ਝਾਪਨ੍ਨਾਨਂ ਤਿਟ੍ਠਨ੍ਤਾਨਂ ਸਮ੍ਪਜਞ੍ਞਾਭਾਵੋ ਹੋਤਿਯੇਵ. ਕਿਂ ਤਥਾਰੂਪਂ ਆਰਮ੍ਮਣਂ ਨਤ੍ਥੀਤਿ ਯਥਾਰੂਪਂ ਉਲ਼ਾਰਂ ਪਣੀਤਞ੍ਚ ਆਰਮ੍ਮਣਂ ਪਟਿਚ੍ਚ ਤੇ ਦੇਵਾ ਸਂਮੁਚ੍ਛਿਤਾ ਆਹਾਰੂਪਚ੍ਛੇਦਮ੍ਪਿ ਕਰੋਨ੍ਤਿ, ਕਿਂ ਤਥਾਰੂਪਂ ਉਲ਼ਾਰਂ ਪਣੀਤਞ੍ਚ ਆਰਮ੍ਮਣਂ ਬੋਧਿਸਤ੍ਤਸ੍ਸ ਨਤ੍ਥੀਤਿ ਬੋਧਿਸਤ੍ਤਸ੍ਸ ਸਮ੍ਪਜਞ੍ਞਾਨੁਭਾਵਂ ਵਿਭਾਵੇਤੁਂ ਚੋਦਨਂ ਸਮੁਟ੍ਠਾਪੇਤਿ? ਬੋਧਿਸਤ੍ਤੋ ਹਿ ਯਤ੍ਥ ਯਤ੍ਥ ਨਿਬ੍ਬਤ੍ਤਤਿ, ਤਤ੍ਥ ਤਤ੍ਥ ਅਞ੍ਞੇ ਸਤ੍ਤੇ ਦਸਹਿ ਵਿਸੇਸੇਹਿ ਅਧਿਗ੍ਗਣ੍ਹਾਤਿ, ਪਗੇਵ ਤਤ੍ਥ ਦੇਵਭੂਤੋ, ਤਥਾਪਿ ‘‘ਸਤੋ ਸਮ੍ਪਜਾਨੋ’’ਤਿ ਅਯਮੇਤ੍ਥ ਅਚ੍ਛਰਿਯਧਮ੍ਮੋ ਵੁਤ੍ਤੋ.
੨੦੦. ਸਮ੍ਪਤ੍ਤਿਭਵੇ ਦੀਘਾਯੁਕਤਾ ਨਾਮ ਪਞ੍ਞਾਬਲੇਨ ਹੋਤਿ, ਬੋਧਿਸਤ੍ਤੋ ਚ ਮਹਾਪਞ੍ਞੋ, ਤਸ੍ਮਾ ਤਤ੍ਥ ਤਤ੍ਥ ਭਵੇ ਤੇਨ ਦੀਘਾਯੁਕੇਨ ਭਵਿਤਬ੍ਬਨ੍ਤਿ ਅਧਿਪ੍ਪਾਯੇਨ, ‘‘ਸੇਸਤ੍ਤਭਾਵੇਸੁ ਕਿਂ ਯਾਵਤਾਯੁਕਂ ਨ ਤਿਟ੍ਠਤੀ’’ਤਿ ਚੋਦੇਤਿ. ਇਤਰੋ ‘‘ਆਮ ਨ ਤਿਟ੍ਠਤੀ’’ਤਿ ਪਟਿਜਾਨਿਤ੍ਵਾ, ‘‘ਅਞ੍ਞਦਾ ਹੀ’’ਤਿਆਦਿਨਾ ਤਤ੍ਥ ਕਾਰਣਮਾਹ. ‘‘ਇਧ ਨ ਭਵਿਸ੍ਸਾਮੀ’’ਤਿ ਅਧਿਮੁਚ੍ਚਨਵਸੇਨ ਕਾਲਕਿਰਿਯਾ ਅਧਿਮੁਤ੍ਤਿਕਾਲਕਿਰਿਯਾ. ਪਾਰਮਿਧਮ੍ਮਾਨਞ੍ਹਿ ਉਕ੍ਕਂਸਪ੍ਪਤ੍ਤਿਯਾ ਤਸ੍ਮਿਂ ਤਸ੍ਮਿਂ ਅਤ੍ਤਭਾਵੇ ਅਭਿਞ੍ਞਾਸਮਾਪਤ੍ਤੀਹਿ ਸਨ੍ਤਾਨਸ੍ਸ ਵਿਸੇਸਿਤਤ੍ਤਾ ਅਤ੍ਤਸਿਨੇਹਸ੍ਸ ਤਨੁਭਾਵੇਨ ਸਤ੍ਤੇਸੁ ਚ ਮਹਾਕਰੁਣਾਯ ਉਲ਼ਾਰਭਾਵੇਨ ਅਧਿਟ੍ਠਾਨਸ੍ਸ ਤਿਕ੍ਖਵਿਸਦਭਾਵਾਪਤ੍ਤਿਯਾ ਬੋਧਿਸਤ੍ਤਾਨਂ ਅਧਿਪ੍ਪਾਯਾ ਸਮਿਜ੍ਝਨ੍ਤਿ, ਚਿਤ੍ਤੇ ਵਿਯ ਕਮ੍ਮੇਸੁ ਚ ਤੇਸਂ ਵਸਿਭਾਵੋ, ਤਸ੍ਮਾ ਯਤ੍ਥੁਪਪਨ੍ਨਾਨਂ ਪਾਰਮਿਯੋ ਸਮ੍ਮਦੇਵ ਪਰਿਬ੍ਰੂਹੇਨ੍ਤਿ, ਵੁਤ੍ਤਨਯੇਨ ਕਾਲਂ ਕਤ੍ਵਾ ਤਤ੍ਥ ਉਪਪਜ੍ਜਨ੍ਤਿ. ਤਥਾ ਹਿ ਅਯਂ ਮਹਾਸਤ੍ਤੋ ਇਮਸ੍ਮਿਂਯੇਵ ਕਪ੍ਪੇ ਨਾਨਾਜਾਤੀਸੁ ਅਪਰਿਹੀਨਜ੍ਝਾਨੋ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ ਅਪ੍ਪਕਮੇਵ ਕਾਲਂ ਤਤ੍ਥ ਠਤ੍ਵਾ ਤਤੋ ਚਵਿਤ੍ਵਾ ਇਧ ਨਿਬ੍ਬਤ੍ਤੋ. ਤੇਨਾਹ – ‘‘ਅਯਂ ਕਾਲਕਿਰਿਯਾ ਅਞ੍ਞੇਸਂ ਨ ਹੋਤੀ’’ਤਿ. ਸਬ੍ਬਪਾਰਮੀਨਂ ਪੂਰਿਤਤ੍ਤਾਤਿ ਇਮਿਨਾ ਪਯੋਜਨਾਭਾਵਤੋ ਤਤ੍ਥ ਠਤ੍ਵਾ ਅਧਿਮੁਤ੍ਤਿਕਾਲਕਿਰਿਯਾ ਨਾਮ ਨ ਹੋਤੀਤਿ ਦਸ੍ਸੇਤਿ. ਅਪਿਚ ਚਰਿਮਭਵੇ ਚਤੁਮਹਾਨਿਧਿਸਮੁਟ੍ਠਾਨਪੁਬ੍ਬਿਕਾਯ ਦਿਬ੍ਬਸਮ੍ਪਤ੍ਤਿਸਦਿਸਾਯ ਮਹਾਸਮ੍ਪਤ੍ਤਿਯਾ ਨਿਬ੍ਬਤ੍ਤਿ ਵਿਯ ਬੁਦ੍ਧਭੂਤਸ੍ਸ ਅਸਦਿਸਦਾਨਾਦਿਵਸੇਨ ਅਨਞ੍ਞਸਾਧਾਰਣਲਾਭੁਪ੍ਪਤ੍ਤਿ ਵਿਯ ਚ ਇਤੋ ਪਰਂ ਮਹਾਪੁਰਿਸਸ੍ਸ ਦਿਬ੍ਬਸਮ੍ਪਤ੍ਤਿਅਨੁਭਵਨਂ ਨਾਮ ਨਤ੍ਥੀਤਿ ਯਾਵਤਾਯੁਕਟ੍ਠਾਨਂ ਉਸ੍ਸਾਹਜਾਤਸ੍ਸ ਪੁਞ੍ਞਸਮ੍ਭਾਰਸ੍ਸ ਵਸੇਨਾਤਿ ਦਟ੍ਠਬ੍ਬਂ. ਅਯਞ੍ਹੇਤ੍ਥ ਧਮ੍ਮਤਾ.
ਮਨੁਸ੍ਸਗਣਨਾਵਸੇਨ, ਨ ਦੇਵਗਣਨਾਵਸੇਨ. ਪੁਬ੍ਬਨਿਮਿਤ੍ਤਾਨੀਤਿ ਚੁਤਿਯਾ ਪੁਬ੍ਬਨਿਮਿਤ੍ਤਾਨਿ. ਅਮਿਲਾਯਿਤ੍ਵਾਤਿ ਏਤ੍ਥ ਅਮਿਲਾਤਗ੍ਗਹਣੇਨੇਵ ਤਾਸਂ ਮਾਲਾਨਂ ਵਣ੍ਣਸਮ੍ਪਦਾਪਿ ਗਨ੍ਧਸਮ੍ਪਦਾਪਿ ਸੋਭਾਸਮ੍ਪਦਾਪਿ ਦਸ੍ਸਿਤਾਤਿ ਦਟ੍ਠਬ੍ਬਂ. ਬਾਹਿਰਬ੍ਭਨ੍ਤਰਾਨਂ ਰਜੋਜਲ੍ਲਾਨਂ ਲੇਸਸ੍ਸਪਿ ਅਭਾਵਤੋ ਦੇਵਾਨਂ ਸਰੀਰਗਤਾਨਿ ਵਤ੍ਥਾਨਿ ਸਬ੍ਬਕਾਲਂ ਪਰਿਸੁਦ੍ਧਪਭਸ੍ਸਰਾਨੇਵ ਹੁਤ੍ਵਾ ਤਿਟ੍ਠਨ੍ਤੀਤਿ ਆਹ ‘‘ਵਤ੍ਥੇਸੁਪਿ ਏਸੇਵ ਨਯੋ’’ਤਿ. ਨੇਵ ਸੀਤਂ ਨ ਉਣ੍ਹਨ੍ਤਿ ਯਸ੍ਸ ਸੀਤਸ੍ਸ ਪਤੀਕਾਰਵਸੇਨ ਅਧਿਕਂ ਸੇਵਿਯਮਾਨਂ ਉਣ੍ਹਂ, ਸਯਮੇਵ ਵਾ ਖਰਤਰਂ ਹੁਤ੍ਵਾ ਅਧਿਭਵਨ੍ਤਂ ਸਰੀਰੇ ਸੇਦਂ ਉਪ੍ਪਾਦੇਯ੍ਯ, ਤਾਦਿਸਂ ਨੇਵ ਸੀਤਂ ਨ ਉਣ੍ਹਂ ਹੋਤਿ. ਤਸ੍ਮਿਂ ਕਾਲੇਤਿ ਯਥਾਵੁਤ੍ਤੇ ਮਰਣਾਸਨ੍ਨਕਾਲੇ. ਬਿਨ੍ਦੁਬਿਨ੍ਦੁਵਸੇਨਾਤਿ ਮੁਤ੍ਤਗੁਲ਼ਿਕਾ ਵਿਯ ਬਿਨ੍ਦੁ ਬਿਨ੍ਦੁ ਹੁਤ੍ਵਾ ਸੇਦਾ ਮੁਚ੍ਚਨ੍ਤਿ. ਦਨ੍ਤਾਨਂ ਖਣ੍ਡਿਤਭਾਵੋ ਖਣ੍ਡਿਚ੍ਚਂ. ਕੇਸਾਨਂ ਪਲਿਤਭਾਵੋ ਪਾਲਿਚ੍ਚਂ. ਆਦਿ-ਸਦ੍ਦੇਨ ਵਲਿਤ੍ਤਚਤਂ ਸਙ੍ਗਣ੍ਹਾਤਿ. ਕਿਲਨ੍ਤਰੂਪੋ ਅਤ੍ਤਭਾਵੋ ਹੋਤਿ, ਨ ਪਨ ਖਣ੍ਡਿਚ੍ਚਪਾਲਿਚ੍ਚਾਦੀਹੀਤਿ ਅਧਿਪ੍ਪਾਯੋ. ਉਕ੍ਕਣ੍ਠਿਤਾਤਿ ਅਨਭਿਰਤਿ, ਸਾ ਨਤ੍ਥਿ ਉਪਰੂਪਰਿ ਉਲ਼ਾਰੁਲ਼ਾਰਾਨਮੇਵ ਭੋਗਾਨਂ ਵਿਸੇਸਤੋ ਰੁਚਿਜਨਕਾਨਂ ਉਪਤਿਟ੍ਠਨਤੋ.
ਪਣ੍ਡਿਤਾ ਏਵਾਤਿ ਬੁਦ੍ਧਿਸਮ੍ਪਨ੍ਨਾ ਏਵ ਦੇਵਤਾ. ਯਥਾ ਦੇਵਤਾ ‘‘ਸਮ੍ਪਤਿ ਜਾਤਾ ਕੀਦਿਸੇਨ ਪੁਞ੍ਞਕਮ੍ਮੇਨ ਇਧ ਨਿਬ੍ਬਤ੍ਤਾ’’ਤਿ ਚਿਨ੍ਤੇਤ੍ਵਾ, ‘‘ਇਮਿਨਾ ਨਾਮ ਪੁਞ੍ਞਕਮ੍ਮੇਨ ਇਧ ਨਿਬ੍ਬਤ੍ਤਾ’’ਤਿ ਜਾਨਨ੍ਤਿ, ਏਵਂ ਅਤੀਤਭਵੇ ਅਤ੍ਤਨਾ ਕਤਂ ਏਕਚ੍ਚਂ ਅਞ੍ਞਮ੍ਪਿ ਪੁਞ੍ਞਂ ਜਾਨਨ੍ਤਿਯੇਵ ਮਹਾਪੁਞ੍ਞਾਤਿ ਆਹ – ‘‘ਯੇ ਮਹਾਪੁਞ੍ਞਾ’’ਤਿਆਦਿ.
ਨ ਪਞ੍ਞਾਯਨ੍ਤਿ ਚਿਰਤਰਕਾਲਤ੍ਤਾ ਪਰਮਾਯੁਨੋ. ਅਨਿਯ੍ਯਾਨਿਕਨ੍ਤਿ ਨ ਨਿਯ੍ਯਾਨਾਵਹਂ ਸਤ੍ਤਾਨਂ ਅਭਾਜਨਭਾਵਤੋ. ਸਤ੍ਤਾ ਨ ਪਰਮਾਯੁਨੋ ਹੋਨ੍ਤਿ ਨਾਮ ਪਾਪੁਸ੍ਸਨ੍ਨਤਾਯਾਤਿ ਆਹ – ‘‘ਤਦਾ ਹਿ ਸਤ੍ਤਾ ਉਸ੍ਸਨ੍ਨਕਿਲੇਸਾ ਹੋਨ੍ਤੀ’’ਤਿ. ਏਤ੍ਥਾਹ – ‘‘ਕਸ੍ਮਾ ਸਮ੍ਬੁਦ੍ਧਾ ਮਨੁਸ੍ਸਲੋਕੇ ਏਵ ਉਪ੍ਪਜ੍ਜਨ੍ਤਿ, ਨ ਦੇਵਬ੍ਰਹ੍ਮਲੋਕੇਸੂ’’ਤਿ. ਦੇਵਲੋਕੇ ਤਾਵ ਨੁਪ੍ਪਜ੍ਜਨ੍ਤਿ ਬ੍ਰਹ੍ਮਚਰਿਯਵਾਸਸ੍ਸ ਅਨੋਕਾਸਭਾਵਤੋ ਤਥਾ ਅਨਚ੍ਛਰਿਯਭਾਵਤੋ. ਅਚ੍ਛਰਿਯਧਮ੍ਮਾ ਹਿ ਬੁਦ੍ਧਾ ਭਗਵਨ੍ਤੋ, ਤੇਸਂ ਸਾ ਅਚ੍ਛਰਿਯਧਮ੍ਮਤਾ ਦੇਵਤ੍ਤਭਾਵੇ ਠਿਤਾਨਂ ਨ ਪਾਕਟਾ ਹੋਤਿ ਯਥਾ ਮਨੁਸ੍ਸਭੂਤਾਨਂ. ਦੇਵਭੂਤੇ ਹਿ ਸਮ੍ਮਾਸਮ੍ਬੁਦ੍ਧੇ ਦਿਸ੍ਸਮਾਨਂ ਬੁਦ੍ਧਾਨੁਭਾਵਂ ਦੇਵਾਨੁਭਾਵਤੋਵ ਲੋਕੋ ਦਹਤਿ, ਨ ਬੁਦ੍ਧਾਨੁਭਾਵਤੋ, ਤਥਾ ਸਤਿ ਸਮ੍ਮਾਸਮ੍ਬੁਦ੍ਧੇ ਨਾਧਿਮੁਚ੍ਚਤਿ ਨ ਸਮ੍ਪਸੀਦਤਿ ਇਸ੍ਸਰਕੁਤ੍ਤਗ੍ਗਾਹਂ ਨ ਵਿਸ੍ਸਜ੍ਜੇਤਿ, ਦੇਵਤ੍ਤਭਾਵਸ੍ਸ ਚ ਚਿਰਕਾਲਪਵਤ੍ਤਨਤੋ ਏਕਚ੍ਚਸਸ੍ਸਤਵਾਦਤੋ ਨ ਪਰਿਮੁਚ੍ਚਤਿ. ‘‘ਬ੍ਰਹ੍ਮਲੋਕੇ ਨੁਪ੍ਪਜ੍ਜਨ੍ਤੀ’’ਤਿ ਏਤ੍ਥਾਪਿ ਏਸੇਵ ਨਯੋ. ਸਤ੍ਤਾਨਂ ਤਾਦਿਸਗਾਹਵਿਮੋਚਨਤ੍ਥਞ੍ਹਿ ਬੁਦ੍ਧਾ ਭਗਵਨ੍ਤੋ ਮਨੁਸ੍ਸਸੁਗਤਿਯਂਯੇਵ ਉਪ੍ਪਜ੍ਜਨ੍ਤਿ; ਨ ਦੇਵਸੁਗਤਿਯਂ, ਮਨੁਸ੍ਸਸੁਗਤਿਯਂ ਉਪ੍ਪਜ੍ਜਨ੍ਤਾਪਿ ਓਪਪਾਤਿਕਾ ਨ ਹੋਨ੍ਤਿ, ਸਤਿ ਚ ਓਪਪਾਤਿਕੂਪਪਤ੍ਤਿਯਂ ਵੁਤ੍ਤਦੋਸਾਨਤਿਵਤ੍ਤਨਤੋ. ਧਮ੍ਮਵੇਨੇਯ੍ਯਾਨਂ ਅਤ੍ਥਾਯ ਧਮ੍ਮਤਨ੍ਤਿਯਾ ਠਪਨਸ੍ਸ ਵਿਯ ਧਾਤੁਵੇਨੇਯ੍ਯਾਨਂ ਅਤ੍ਥਾਯ ਧਾਤੂਨਂ ਠਪਨਸ੍ਸ ਇਚ੍ਛਿਤਬ੍ਬਤ੍ਤਾ ਚ. ਨ ਹਿ ਓਪਪਾਤਿਕਾਨਂ ਪਰਿਨਿਬ੍ਬਾਨਤੋ ਉਦ੍ਧਂ ਸਰੀਰਧਾਤੁਯੋ ਤਿਟ੍ਠਨ੍ਤਿ, ਤਸ੍ਮਾ ਨ ਓਪਪਾਤਿਕਾ ਹੋਨ੍ਤਿ, ਚਰਿਮਭਵੇ ਚ ਮਹਾਬੋਧਿਸਤ੍ਤਾ, ਮਨੁਸ੍ਸਭਾਵਸ੍ਸ ਪਾਕਟਕਰਣਾਯ ਦਾਰਪਰਿਗ੍ਗਹਮ੍ਪਿ ਕਰੋਨ੍ਤਾ ਯਾਵ ਪੁਤ੍ਤਮੁਖਦਸ੍ਸਨਾ ਅਗਾਰਮਜ੍ਝੇ ਤਿਟ੍ਠਨ੍ਤਿ. ਪਰਿਪਾਕਗਤਸੀਲਨੇਕ੍ਖਮ੍ਮਪਞ੍ਞਾਦਿਪਾਰਮਿਕਾਪਿ ਨ ਅਭਿਨਿਕ੍ਖਮਨ੍ਤਿ, ਕਿਂ ਵਾ ਏਤਾਯ ਕਾਰਣਚਿਨ੍ਤਾਯ? ਸਬ੍ਬਬੁਦ੍ਧੇਹਿ ਆਚਿਣ੍ਣਸਮਾਚਿਣ੍ਣਾ, ਯਦਿਦਂ ਮਨੁਸ੍ਸਭੂਤਾਨਂਯੇਵ ਅਭਿਸਮ੍ਬੁਜ੍ਝਨਾ, ਨ ਦੇਵਭੂਤਾਨਨ੍ਤਿ ਅਯਮੇਤ੍ਥ ਧਮ੍ਮਤਾ. ਤਥਾ ਹਿ ਤਦਤ੍ਥੋ ਮਹਾਭਿਨੀਹਾਰੋਪਿ ਮਨੁਸ੍ਸਭੂਤਾਨਂਯੇਵ ਇਜ੍ਝਤਿ, ਨ ਇਤਰੇਸਂ.
ਕਸ੍ਮਾ ਪਨ ਸਮ੍ਮਾਸਮ੍ਬੁਦ੍ਧਾ ਜਮ੍ਬੁਦੀਪੇਯੇਵ ਉਪ੍ਪਜ੍ਜਨ੍ਤਿ, ਨ ਸੇਸਦੀਪੇਸੂਤਿ? ਕੇਚਿ ਤਾਵ ਆਹੁ – ‘‘ਯਸ੍ਮਾ ਪਥਵਿਯਾ ਨਾਭਿਭੂਤਾ ਬੁਦ੍ਧਾਨੁਭਾਵਸਹਿਤਾ ਅਚਲਟ੍ਠਾਨਭੂਤਾ ਬੋਧਿਮਣ੍ਡਭੂਮਿ ਜਮ੍ਬੁਦੀਪੇਯੇਵ ਉਪ੍ਪਜ੍ਜਤਿ, ਤਸ੍ਮਾ ਜਮ੍ਬੁਦੀਪੇਯੇਵ ਉਪ੍ਪਜ੍ਜਨ੍ਤੀ’’ਤਿ; ‘‘ਤਥਾ ਇਤਰੇਸਮ੍ਪਿ ਅਵਿਜਹਿਤਟ੍ਠਾਨਾਨਂ ਤਤ੍ਥੇਵ ਲਬ੍ਭਮਾਨਤੋ’’ਤਿ. ਅਯਂ ਪਨੇਤ੍ਥ ਅਮ੍ਹਾਕਂ ਖਨ੍ਤਿ – ਯਸ੍ਮਾ ਪੁਰਿਮਬੁਦ੍ਧਾਨਂ ਮਹਾਬੋਧਿਸਤ੍ਤਾਨਂ ਪਚ੍ਚੇਕਬੁਦ੍ਧਾਨਞ੍ਚ ਨਿਬ੍ਬਤ੍ਤਿਯਾ ਸਾਵਕਬੋਧਿਸਤ੍ਤਾਨਂ ਸਾਵਕਬੋਧਿਯਾ ਅਭਿਨੀਹਾਰੋ ਸਾਵਕਪਾਰਮੀਨਂ ਸਮ੍ਭਰਣਂ ਪਰਿਪਾਚਨਞ੍ਚ ਬੁਦ੍ਧਖੇਤ੍ਤਭੂਤੇ ਇਮਸ੍ਮਿਂ ਚਕ੍ਕਵਾਲ਼ੇ ਜਮ੍ਬੁਦੀਪੇਯੇਵ ਇਜ੍ਝਤਿ, ਨ ਅਞ੍ਞਤ੍ਥ. ਵੇਨੇਯ੍ਯਾਨਂ ਵਿਨਯਨਤ੍ਥੋ ਚ ਬੁਦ੍ਧੁਪ੍ਪਾਦੋਤਿ ਅਗ੍ਗਸਾਵਕਾਦਿਵੇਨੇਯ੍ਯਵਿਸੇਸਾਪੇਕ੍ਖਾਯ ਏਕਸ੍ਮਿਂ ਜਮ੍ਬੁਦੀਪੇਯੇਵ ਬੁਦ੍ਧਾ ਨਿਬ੍ਬਤ੍ਤਨ੍ਤਿ, ਨ ਸੇਸਦੀਪੇਸੁ. ਅਯਞ੍ਚ ਨਯੋ ਸਬ੍ਬਬੁਦ੍ਧਾਨਂ ਆਚਿਣ੍ਣਸਮਾਚਿਣ੍ਣੋਤਿ ਤੇਸਂ ਉਤ੍ਤਮਪੁਰਿਸਾਨਂ ਤਤ੍ਥੇਵ ਉਪ੍ਪਤ੍ਤਿ ਸਮ੍ਪਤ੍ਤਿਚਕ੍ਕਾਨਂ ਵਿਯ ਅਞ੍ਞਮਞ੍ਞੁਪਨਿਸ੍ਸਯਤੋ ਅਪਰਾਪਰਂ ਵਤ੍ਤਤੀਤਿ ਦਟ੍ਠਬ੍ਬਂ. ਤੇਨਾਹ – ‘‘ਤੀਸੁ ਦੀਪੇਸੁ ਬੁਦ੍ਧਾ ਨ ਨਿਬ੍ਬਤ੍ਤਨ੍ਤਿ, ਜਮ੍ਬੁਦੀਪੇਯੇਵ ਨਿਬ੍ਬਤ੍ਤਨ੍ਤੀਤਿ ਦੀਪਂ ਪਸ੍ਸਤੀ’’ਤਿ. ਇਮਿਨਾ ਨਯੇਨ ਦੇਸਨਿਯਮੇਪਿ ਕਾਰਣਂ ਵਤ੍ਤਬ੍ਬਂ.
ਇਦਾਨਿ ਚ ਖਤ੍ਤਿਯਕੁਲਂ ਲੋਕਸਮ੍ਮਤਂ ਬ੍ਰਾਹ੍ਮਣਾਨਮ੍ਪਿ ਪੂਜਨੀਯਭਾਵਤੋ. ਰਾਜਾ ਮੇ ਪਿਤਾ ਭਵਿਸ੍ਸਤੀਤਿ ਕੁਲਂ ਪਸ੍ਸਿ ਪਿਤੁਵਸੇਨ ਕੁਲਸ੍ਸ ਨਿਦ੍ਦਿਸਿਤਬ੍ਬਤੋ. ਦਸਨ੍ਨਂ ਮਾਸਾਨਂ ਉਪਰਿ ਸਤ੍ਤ ਦਿਵਸਾਨੀਤਿ ਪਸ੍ਸਿ ਤੇਨ ਅਤ੍ਤਨੋ ਅਨ੍ਤਰਾਯਾਭਾਵਂ ਅਞ੍ਞਾਸਿ, ਤਸ੍ਸਾ ਚ ਤੁਸਿਤਭਵੇ ਦਿਬ੍ਬਸਮ੍ਪਤ੍ਤਿਪਚ੍ਚਨੁਭਵਨਂ.
ਤਾ ਦੇਵਤਾਤਿ ਦਸਸਹਸ੍ਸਿਚਕ੍ਕਵਾਲ਼ਦੇਵਤਾ. ਕਥਂ ਪਨ ਤਾ ਬੋਧਿਸਤ੍ਤਸ੍ਸ ਪੂਰਿਤਪਾਰਮਿਭਾਵਂ ਭਾਵਿਨਞ੍ਚ ਸਮ੍ਬੁਦ੍ਧਭਾਵਂ ਜਾਨਨ੍ਤੀਤਿ? ਮਹੇਸਕ੍ਖਾਨਂ ਦੇਵਤਾਨਂ ਵਸੇਨ, ਯੇਭੁਯ੍ਯੇਨ ਚ ਤਾ ਦੇਵਤਾ ਅਭਿਸਮਯਭਾਗਿਨੋ. ਤਥਾ ਹਿ ਭਗਵਤੋ ਚ ਧਮ੍ਮਦਾਨਸਂਵਿਭਾਗੇ ਅਨੇਕਵਾਰਂ ਦਸਸਹਸ੍ਸਚਕ੍ਕਵਾਲ਼ਵਾਸਿਦੇਵਤਾਸਨ੍ਨਿਪਾਤੋ ਅਹੋਸਿ.
ਚਵਾਮੀਤਿ ਪਜਾਨਾਤਿ ਚੁਤਿਆਸਨ੍ਨਜਵਨੇਹਿ ਞਾਣਸਹਿਤੇਹਿ ਚੁਤਿਯਾ ਉਪਟ੍ਠਿਤਭਾਵਸ੍ਸ ਪਟਿਸਂਵਿਦਿਤਤ੍ਤਾ. ਚੁਤਿਚਿਤ੍ਤਂ ਨ ਜਾਨਾਤਿ ਚੁਤਿਚਿਤ੍ਤਕ੍ਖਣਸ੍ਸ ਇਤ੍ਤਰਭਾਵਤੋ. ਤਥਾ ਹਿ ਤਂ ਚੁਤੂਪਪਾਤਞਾਣਸ੍ਸਪਿ ਅਵਿਸਯੋ ਏਵ. ਪਟਿਸਨ੍ਧਿਚਿਤ੍ਤੇਪਿ ਏਸੇਵ ਨਯੋ. ਆਵਜ੍ਜਨਪਰਿਯਾਯੋਤਿ ਆਵਜ੍ਜਨਕ੍ਕਮੋ. ਯਸ੍ਮਾ ਏਕਵਾਰਂ ਆਵਜ੍ਜਿਤਮਤ੍ਤੇਨ ਆਰਮ੍ਮਣਂ ਨਿਚ੍ਛਿਨਿਤੁਂ ਨ ਸਕ੍ਕਾ, ਤਸ੍ਮਾ ਤਮੇਵਾਰਮ੍ਮਣਂ ਦੁਤਿਯਂ ਤਤਿਯਞ੍ਚ ਆਵਜ੍ਜਿਤ੍ਵਾ ਨਿਚ੍ਛੀਯਤਿ, ਆਵਜ੍ਜਨਸੀਸੇਨ ਚੇਤ੍ਥ ਜਵਨਵਾਰੋ ਗਹਿਤੋ. ਤੇਨਾਹ – ‘‘ਦੁਤਿਯਤਤਿਯਚਿਤ੍ਤਵਾਰੇਯੇਵ ਜਾਨਿਸ੍ਸਤੀ’’ਤਿ. ਚੁਤਿਯਾ ਪੁਰੇਤਰਂ ਕਤਿਪਯਚਿਤ੍ਤਵਾਰਤੋ ਪਟ੍ਠਾਯ ਮਰਣਂ ਮੇ ਆਸਨ੍ਨਨ੍ਤਿ ਜਾਨਨਤੋ, ‘‘ਚੁਤਿਕ੍ਖਣੇਪਿ ਚਵਾਮੀਤਿ ਪਜਾਨਾਤੀ’’ਤਿ ਵੁਤ੍ਤਂ. ਪਟਿਸਨ੍ਧਿਯਾ ਪਨ ਅਪੁਬ੍ਬਭਾਵਤੋ ਪਟਿਸਨ੍ਧਿਚਿਤ੍ਤਂ ਨ ਜਾਨਾਤਿ. ਨਿਕਨ੍ਤਿਯਾ ਉਪ੍ਪਤ੍ਤਿਤੋ ਪਰਤੋ ਅਸੁਕਸ੍ਮਿਂ ਠਾਨੇ ਮਯਾ ਪਟਿਸਨ੍ਧਿ ਗਹਿਤਾਤਿ ਪਜਾਨਾਤਿ, ਦੁਤਿਯਜਵਨਤੋ ਪਟ੍ਠਾਯ ਜਾਨਾਤੀਤਿ ਵੁਤ੍ਤੋਵਾਯਮਤ੍ਥੋ. ਤਸ੍ਮਿਂ ਕਾਲੇਤਿ ਪਟਿਸਨ੍ਧਿਗ੍ਗਹਣਕਾਲੇ. ਦਸਸਹਸ੍ਸੀ ਕਮ੍ਪਤੀਤਿ ਏਤ੍ਥ ਕਮ੍ਪਨਕਾਰਣਂ ਹੇਟ੍ਠਾ ਵੁਤ੍ਤਮੇਵ. ਮਹਾਕਾਰੁਣਿਕਾ ਬੁਦ੍ਧਾ ਭਗਵਨ੍ਤੋ ਸਤ੍ਤਾਨਂ ਹਿਤਸੁਖਵਿਧਾਨਤਪ੍ਪਰਤਾਯ ਬਹੁਲਂ ਸੋਮਨਸ੍ਸਿਕਾਵ ਹੋਨ੍ਤੀਤਿ ਤੇਸਂ ਪਠਮਮਹਾਵਿਪਾਕਚਿਤ੍ਤੇਨ ਪਟਿਸਨ੍ਧਿਗ੍ਗਹਣਂ ਅਟ੍ਠਕਥਾਯਂ (ਦੀ. ਨਿ. ਅਟ੍ਠ. ੨.੧੭; ਧ. ਸ. ੪੯੮; ਮ. ਨਿ. ਅਟ੍ਠ. ੩.੧੯੯) ਵੁਤ੍ਤਂ. ਮਹਾਸੀਵਤ੍ਥੇਰੋ ਪਨ ਯਦਿਪਿ ਮਹਾਕਾਰੁਣਿਕਾ ਬੁਦ੍ਧਾ ਭਗਵਨ੍ਤੋ ਸਤ੍ਤਾਨਂ ਹਿਤਸੁਖਵਿਧਾਨਤਪ੍ਪਰਾ, ਵਿਵੇਕਜ੍ਝਾਸਯਾ ਪਨ ਵਿਸਙ੍ਖਾਰਨਿਨ੍ਨਾ ਸਬ੍ਬਸਙ੍ਖਾਰੇਸੁ ਅਜ੍ਝੁਪੇਕ੍ਖਣਬਹੁਲਾਤਿ ਪਞ੍ਚਮੇਨ ਮਹਾਵਿਪਾਕਚਿਤ੍ਤੇਨ ਪਟਿਸਨ੍ਧਿਗ੍ਗਹਣਮਾਹ.
ਪੁਰੇ ਪੁਣ੍ਣਮਾਯ ਸਤ੍ਤਮਦਿਵਸਤੋ ਪਟ੍ਠਾਯਾਤਿ ਪੁਣ੍ਣਮਾਯ ਪੁਰੇ ਸਤ੍ਤਮਦਿਵਸਤੋ ਪਟ੍ਠਾਯ, ਸੁਕ੍ਕਪਕ੍ਖੇ ਨਵਮਿਤੋ ਪਟ੍ਠਾਯਾਤਿ ਅਤ੍ਥੋ. ਸਤ੍ਤਮੇ ਦਿਵਸੇਤਿ ਆਸਾਲ਼੍ਹੀਪੁਣ੍ਣਮਾਯ. ਇਦਂ ਸੁਪਿਨਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰਂ ਸੁਪਿਨਂ. ਨੇਸਂ ਦੇਵਿਯੋਤਿ ਮਹਾਰਾਜੂਨਂ ਦੇਵਿਯੋ.
ਸੋ ਚ ਖੋ ਪੁਰਿਸਗਬ੍ਭੋ, ਨ ਇਤ੍ਥਿਗਬ੍ਭੋ, ਪੁਤ੍ਤੋ ਤੇ ਭਵਿਸ੍ਸਤੀਤਿ ਏਤ੍ਤਕਮੇਵ ਤੇ ਬ੍ਰਾਹ੍ਮਣਾ ਅਤ੍ਤਨੋ ਸੁਪਿਨਸਤ੍ਥਨਯੇਨ ਕਥੇਸੁਂ. ਸਚੇ ਅਗਾਰਂ ਅਜ੍ਝਾਵਸਿਸ੍ਸਤੀਤਿਆਦਿ ਪਨ ਦੇਵਤਾਵਿਗ੍ਗਹੇਨ ਭਾਵਿਨਮਤ੍ਥਂ ਯਾਥਾਵਤੋ ਪਵੇਦੇਸੁਂ.
ਗਬ੍ਭਾਵਕ੍ਕਨ੍ਤਿਯੋਤਿ ਏਤ੍ਥ ਗਬ੍ਭੋ ਵੁਚ੍ਚਤਿ ਮਾਤੁਕੁਚ੍ਛਿ, ਤਤ੍ਥ ਉਪ੍ਪਤ੍ਤਿ ਅਵਕ੍ਕਨ੍ਤਿ, ਤਾਵ ਗਬ੍ਭਾਵਕ੍ਕਨ੍ਤਿ, ਯਾਵ ਨ ਨਿਕ੍ਖਮਤਿ. ਠਿਤਕਾਵ ਨਿਕ੍ਖਮਨ੍ਤਿ ਧਮ੍ਮਾਸਨਤੋ ਓਤਰਨ੍ਤੋ ਧਮ੍ਮਕਥਿਕੋ ਵਿਯ.
੨੦੧. ਵਤ੍ਤਮਾਨਸਮੀਪੇ ਵਤ੍ਤਮਾਨੇ ਵਿਯ ਵੋਹਰੀਯਤੀਤਿ ਓਕ੍ਕਮਤੀਤਿ ਵੁਤ੍ਤਨ੍ਤਿ ਆਹ – ‘‘ਓਕ੍ਕਨ੍ਤੋ ਹੋਤੀਤਿ ਅਤ੍ਥੋ’’ਤਿ. ਏਵਂ ਹੋਤੀਤਿ ਏਵਂ ਵੁਤ੍ਤਪ੍ਪਕਾਰੇਨਸ੍ਸ ਸਮ੍ਪਜਾਨਨਾ ਹੋਤਿ. ਨ ਓਕ੍ਕਮਮਾਨੇ ਪਟਿਸਨ੍ਧਿਕ੍ਖਣਸ੍ਸ ਦੁਵਿਞ੍ਞੇਯ੍ਯਤ੍ਤਾ. ਤਥਾ ਚ ਵੁਤ੍ਤਂ – ‘‘ਪਟਿਸਨ੍ਧਿਚਿਤ੍ਤਂ ਨ ਜਾਨਾਤੀ’’ਤਿ. ਦਸਸਹਸ੍ਸਚਕ੍ਕਵਾਲ਼ਪਤ੍ਥਰਣੇਨ ਵਾ ਅਪ੍ਪਮਾਣੋ. ਅਤਿਵਿਯ ਸਮੁਜ੍ਜਲਭਾਵੇਨ ਉਲ਼ਾਰੋ. ਦੇਵਾਨੁਭਾਵਨ੍ਤਿ ਦੇਵਾਨਂ ਪਭਾਨੁਭਾਵਂ. ਦੇਵਾਨਞ੍ਹਿ ਪਭਂਸੋ ਓਭਾਸੋ ਅਧਿਭਵਤਿ, ਨ ਤੇਸਂ ਆਧਿਪਚ੍ਚਂ. ਤੇਨਾਹ ‘‘ਦੇਵਾਨ’’ਨ੍ਤਿਆਦਿ.
ਰੁਕ੍ਖਗਚ੍ਛਾਦਿਨਾ ਕੇਨਚਿ ਨ ਹਞ੍ਞਤੀਤਿ ਅਘਾ, ਅਬਾਧਾ. ਤੇਨਾਹ ‘‘ਨਿਚ੍ਚਵਿਵਟਾ’’ਤਿ. ਅਸਂਵੁਤਾਤਿ ਹੇਟ੍ਠਾ ਉਪਰਿ ਚ ਕੇਨ ਚਿ ਨ ਪਿਹਿਤਾ. ਤੇਨਾਹ ‘‘ਹੇਟ੍ਠਾਪਿ ਅਪ੍ਪਤਿਟ੍ਠਾ’’ਤਿ. ਤਤ੍ਥ ਪਿ-ਸਦ੍ਦੇਨ ਯਥਾ ਹੇਟ੍ਠਾ ਉਦਕਸ੍ਸ ਪਿਧਾਯਿਕਾ ਪਥਵੀ ਨਤ੍ਥੀਤਿ ਅਸਂਵੁਤਾ ਲੋਕਨ੍ਤਰਿਕਾ, ਏਵਂ ਉਪਰਿਪਿ ਚਕ੍ਕਵਾਲ਼ੇਸੁ ਵਿਯ ਦੇਵਵਿਮਾਨਾਨਂ ਅਭਾਵਤੋ ਅਸਂਵੁਤਾ ਅਪ੍ਪਤਿਟ੍ਠਾਤਿ ਦਸ੍ਸੇਤਿ. ਅਨ੍ਧਕਾਰੋ ਏਤ੍ਥ ਅਤ੍ਥੀਤਿ ਅਨ੍ਧਕਾਰਾ. ਚਕ੍ਖੁਵਿਞ੍ਞਾਣਂ ਨ ਜਾਯਤਿ ਆਲੋਕਸ੍ਸਾਭਾਵਤੋ, ਨ ਚਕ੍ਖੁਨੋ. ਤਥਾ ਹਿ ‘‘ਤੇਨ ਓਭਾਸੇਨ ਅਞ੍ਞਮਞ੍ਞਂ ਸਞ੍ਜਾਨਨ੍ਤੀ’’ਤਿ ਵੁਤ੍ਤਂ. ਜਮ੍ਬੁਦੀਪੇ ਠਿਤਮਜ੍ਝਨ੍ਹਿਕਵੇਲਾਯਂ ਪੁਬ੍ਬਵਿਦੇਹਵਾਸੀਨਂ ਅਤ੍ਥਙ੍ਗਮਨਵਸੇਨ ਉਪਡ੍ਢਂ ਸੂਰਿਯਮਣ੍ਡਲਂ ਪਞ੍ਞਾਯਤਿ, ਅਪਰਗੋਯਾਨਵਾਸੀਨਂ ਉਗ੍ਗਮਨਵਸੇਨ, ਏਵਂ ਸੇਸਦੀਪੇਸੁਪੀਤਿ ਆਹ – ‘‘ਏਕਪ੍ਪਹਾਰੇਨੇਵ ਤੀਸੁ ਦੀਪੇਸੁ ਪਞ੍ਞਾਯਨ੍ਤੀ’’ਤਿ. ਇਤੋ ਅਞ੍ਞਥਾ ਪਨ ਦ੍ਵੀਸੁ ਏਵ ਦੀਪੇਸੁ ਏਕਪ੍ਪਹਾਰੇਨੇਵ ਪਞ੍ਞਾਯਤੀਤਿ. ਏਕੇਕਾਯ ਦਿਸਾਯ ਨਵ ਨਵ ਯੋਜਨਸਤਸਹਸ੍ਸਾਨਿ ਅਨ੍ਧਕਾਰਵਿਧਮਨਮ੍ਪਿ ਇਮਿਨਾ ਨਯੇਨ ਦਟ੍ਠਬ੍ਬਂ. ਪਭਾਯ ਨਪ੍ਪਹੋਨ੍ਤੀਤਿ ਅਤ੍ਤਨੋ ਪਭਾਯ ਓਭਾਸਿਤੁਂ ਨ ਅਭਿਸਮ੍ਭੁਣਨ੍ਤਿ. ਯੁਗਨ੍ਧਰਪਬ੍ਬਤਮਤ੍ਥਕਪ੍ਪਮਾਣੇ ਆਕਾਸੇ ਵਿਚਰਣਤੋ, ‘‘ਚਕ੍ਕਵਾਲ਼ਪਬ੍ਬਤਸ੍ਸ ਵੇਮਜ੍ਝੇਨ ਚਰਨ੍ਤੀ’’ਤਿ ਵੁਤ੍ਤਂ.
ਵਾਵਟਾਤਿ ਖਾਦਨਤ੍ਥਂ ਗਣ੍ਹਿਤੁਂ ਉਪਕ੍ਕਮਨ੍ਤਾ. ਵਿਪਰਿਵਤ੍ਤਿਤ੍ਵਾਤਿ ਵਿਵਟ੍ਟਿਤ੍ਵਾ. ਛਿਜ੍ਜਿਤ੍ਵਾਤਿ ਮੁਚ੍ਛਾਪਤ੍ਤਿਯਾ ਠਿਤਟ੍ਠਾਨਤੋ ਮੁਚ੍ਚਿਤ੍ਵਾ, ਅਙ੍ਗਪਚ੍ਚਙ੍ਗਚ੍ਛੇਦਨਵਸੇਨ ਵਾ ਛਿਜ੍ਜਿਤ੍ਵਾ. ਅਚ੍ਚਨ੍ਤਖਾਰੇਤਿ ਆਤਪਸਨ੍ਤਾਪਾਭਾਵੇਨ ਅਤਿਸੀਤਭਾਵਂ ਸਨ੍ਧਾਯ ਅਚ੍ਚਨ੍ਤਖਾਰਤਾ ਵੁਤ੍ਤਾ ਸਿਯਾ. ਨ ਹਿ ਤਂ ਕਪ੍ਪਸਣ੍ਠਾਨਉਦਕਂ ਸਮ੍ਪਤ੍ਤਿਕਰਮਹਾਮੇਘਵੁਟ੍ਠਂ ਪਥਵੀਸਨ੍ਧਾਰਕਂ ਕਪ੍ਪਵਿਨਾਸਕਉਦਕਂ ਵਿਯ ਖਾਰਂ ਭਵਿਤੁਮਰਹਤਿ. ਤਥਾ ਹਿ ਸਤਿ ਪਥਵੀਪਿ ਵਿਲੀਯੇਯ੍ਯ. ਤੇਸਂ ਵਾ ਪਾਪਕਮ੍ਮਬਲੇਨ ਪੇਤਾਨਂ ਪਕਤਿਉਦਕਸ੍ਸ ਪੁਬ੍ਬਖੇਲ਼ਭਾਵਾਪਤ੍ਤਿ ਵਿਯ ਤਸ੍ਸ ਉਦਕਸ੍ਸ ਤਦਾ ਖਾਰਭਾਵਾਪਤ੍ਤਿ ਹੋਤੀਤਿ ਵੁਤ੍ਤਂ ‘‘ਅਚ੍ਚਨ੍ਤਖਾਰੇ ਉਦਕੇ’’ਤਿ. ਸਮਨ੍ਤਤੋਤਿ ਸਬ੍ਬਭਾਗਤੋ ਛਪ੍ਪਕਾਰਮ੍ਪਿ.
੨੦੨. ਚਤੁਨ੍ਨਂ ਮਹਾਰਾਜੂਨਂ ਵਸੇਨਾਤਿ ਵੇਸ੍ਸਵਣਾਦਿਚਤੁਮਹਾਰਾਜਭਾਵਸਾਮਞ੍ਞੇਨ.
੨੦੩. ਸਭਾਵੇਨੇਵਾਤਿ ਪਰਸ੍ਸ ਸਨ੍ਤਿਕੇ ਗਹਣੇਨ ਵਿਨਾ ਅਤ੍ਤਨੋ ਸਭਾਵੇਨੇਵ ਸਯਮੇਵ ਅਧਿਟ੍ਠਹਿਤ੍ਵਾ ਸੀਲਸਮ੍ਪਨ੍ਨਾ.
ਮਨੁਸ੍ਸੇਸੂਤਿ ਇਦਂ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ – ‘‘ਮਨੁਸ੍ਸਿਤ੍ਥਿਯਾ ਨਾਮ ਮਨੁਸ੍ਸਪੁਰਿਸੇਸੁ ਪੁਰਿਸਾਧਿਪ੍ਪਾਯਚਿਤ੍ਤਂ ਉਪ੍ਪਜ੍ਜੇਯ੍ਯਾ’’ਤਿ, ਬੋਧਿਸਤ੍ਤਮਾਤੁ ਪਨ ਦੇਵੇਸੂਪਿ ਤਾਦਿਸਂ ਚਿਤ੍ਤਂ ਨੁਪ੍ਪਜ੍ਜਤੇਵ. ਯਥਾ ਬੋਧਿਸਤ੍ਤਸ੍ਸ ਆਨੁਭਾਵੇਨ ਬੋਧਿਸਤ੍ਤਸ੍ਸ ਮਾਤੁ ਪੁਰਿਸਾਧਿਪ੍ਪਾਯਚਿਤ੍ਤਂ ਨੁਪ੍ਪਜ੍ਜਤਿ, ਏਵਂ ਤਸ੍ਸ ਆਨੁਭਾਵੇਨੇਵ ਸਾ ਕੇਨਚਿ ਪੁਰਿਸੇਨ ਅਨਤਿਕ੍ਕਮਨੀਯਾਤਿ ਆਹ – ‘‘ਪਾਦਾ ਨ ਵਹਨ੍ਤਿ, ਦਿਬ੍ਬਸਙ੍ਖਲਿਕਾ ਵਿਯ ਬਜ੍ਝਨ੍ਤੀ’’ਤਿ.
ਪੁਬ੍ਬੇ ‘‘ਕਾਮਗੁਣੂਪਸਂਹਿਤਂ ਚਿਤ੍ਤਂ ਨੁਪ੍ਪਜ੍ਜਤੀ’’ਤਿ ਵੁਤ੍ਤਂ, ਪੁਨ ‘‘ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾ ਸਮਙ੍ਗੀਭੂਤਾ ਪਰਿਚਾਰੇਤੀ’’ਤਿ ਵੁਤ੍ਤਂ, ਕਥਮਿਦਂ ਅਞ੍ਞਮਞ੍ਞਂ ਨ ਵਿਰੁਜ੍ਝਤੀਤਿ ਆਹ ‘‘ਪੁਬ੍ਬੇ’’ਤਿਆਦਿ. ਵਤ੍ਥੁਪਟਿਕ੍ਖੇਪੋਤਿ ਅਬ੍ਰਹ੍ਮਚਰਿਯਵਤ੍ਥੁਪਟਿਸੇਧੋ. ਤੇਨਾਹ ‘‘ਪੁਰਿਸਾਧਿਪ੍ਪਾਯਵਸੇਨਾ’’ਤਿ. ਆਰਮ੍ਮਣਪਟਿਲਾਭੋਤਿ ਰੂਪਾਦਿਪਞ੍ਚਕਾਮਗੁਣਾਰਮ੍ਮਣਸ੍ਸੇਵ ਪਟਿਲਾਭੋ.
੨੦੪. ਕਿਲਮਥੋਤਿ ਖੇਦੋ. ਕਾਯਸ੍ਸ ਹਿ ਗਰੁਭਾਵਕਠਿਨਭਾਵਾਦਯੋਪਿ ਤਸ੍ਸਾ ਤਦਾ ਨ ਹੋਨ੍ਤਿ ਏਵ. ‘‘ਤਿਰੋਕੁਚ੍ਛਿਗਤਂ ਪਸ੍ਸਤੀ’’ਤਿ ਵੁਤ੍ਤਂ, ਕਦਾ ਪਟ੍ਠਾਯ ਪਸ੍ਸਤੀਤਿ ਆਹ – ‘‘ਕਲਲਾਦਿਕਾਲਂ ਅਤਿਕ੍ਕਮਿਤ੍ਵਾ’’ਤਿਆਦਿ. ਦਸ੍ਸਨੇ ਪਯੋਜਨਂ ਸਯਮੇਵ ਵਦਤਿ, ਤਸ੍ਸ ਅਭਾਵਤੋ ਕਲਲਾਦਿਕਾਲੇ ਨ ਪਸ੍ਸਤਿ. ਪੁਤ੍ਤੇਨਾਤਿ ਦਹਰੇਨ ਮਨ੍ਦੇਨ ਉਤ੍ਤਾਨਸੇਯ੍ਯਕੇਨ. ਯਂ ਤਂ ਮਾਤੂਤਿਆਦਿ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ. ਚਕ੍ਕਵਤ੍ਤਿਗਬ੍ਭਤੋਪਿ ਹਿ ਸਵਿਸੇਸਂ ਬੋਧਿਸਤ੍ਤਗਬ੍ਭੋ ਪਰਿਹਾਰਂ ਲਭਤਿ ਪੁਞ੍ਞਸਮ੍ਭਾਰਸ੍ਸ ਸਾਤਿਸਯਤ੍ਤਾ, ਤਸ੍ਮਾ ਬੋਧਿਸਤ੍ਤਮਾਤਾ ਅਤਿਵਿਯ ਸਪ੍ਪਾਯਾਹਾਰਾਚਾਰਾ ਚ ਹੁਤ੍ਵਾ ਸਕ੍ਕਚ੍ਚਂ ਪਰਿਹਰਤਿ. ਪੁਰਤ੍ਥਾਭਿਮੁਖੋਤਿ ਮਾਤੁ ਪੁਰਤ੍ਥਾਭਿਮੁਖੋ. ਇਦਾਨਿ ਤਿਰੋਕੁਚ੍ਛਿਗਤਸ੍ਸ ਦਿਸ੍ਸਮਾਨਤਾਯ ਅਬ੍ਭਨ੍ਤਰਂ ਬਾਹਿਰਞ੍ਚ ਕਾਰਣਂ ਦਸ੍ਸੇਤੁਂ, ‘‘ਪੁਬ੍ਬੇ ਕਤਕਮ੍ਮ’’ਨ੍ਤਿਆਦਿ ਵੁਤ੍ਤਂ. ਅਸ੍ਸਾਤਿ ਦੇਵਿਯਾ. ਵਤ੍ਥੁਨ੍ਤਿ ਕੁਚ੍ਛਿਂ. ਫਲਿਕਅਬ੍ਭਪਟਲਾਦਿਨੋ ਵਿਯ ਬੋਧਿਸਤ੍ਤਮਾਤੁਕੁਚ੍ਛਿਤਚਸ੍ਸ ਪਟਲਭਾਵੇਨ ਆਲੋਕਸ੍ਸ ਵਿਬਨ੍ਧਾਭਾਵਤੋ ਯਥਾ ਬੋਧਿਸਤ੍ਤਮਾਤਾ ਕੁਚ੍ਛਿਗਤਂ ਬੋਧਿਸਤ੍ਤਂ ਪਸ੍ਸਤਿ, ਕਿਮੇਵਂ ਬੋਧਿਸਤ੍ਤੋਪਿ ਮਾਤਰਂ ਅਞ੍ਞਞ੍ਚ ਪੁਰਤੋ ਰੂਪਗਤਂ ਪਸ੍ਸਤਿ, ਨੋਤਿ ਆਹ, ‘‘ਬੋਧਿਸਤ੍ਤੋ ਪਨਾ’’ਤਿਆਦਿ. ਕਸ੍ਮਾ ਪਨ ਸਤਿ ਚਕ੍ਖੁਮ੍ਹਿ ਆਲੋਕੇ ਚ ਨ ਪਸ੍ਸਤੀਤਿ ਆਹ – ‘‘ਨ ਹਿ ਅਨ੍ਤੋਕੁਚ੍ਛਿਯਂ ਚਕ੍ਖੁਵਿਞ੍ਞਾਣਂ ਉਪ੍ਪਜ੍ਜਤੀ’’ਤਿ. ਅਸ੍ਸਾਸਪਸ੍ਸਾਸਾ ਵਿਯ ਹਿ ਤਤ੍ਥ ਚਕ੍ਖੁਵਿਞ੍ਞਾਣਮ੍ਪਿ ਨ ਉਪ੍ਪਜ੍ਜਤਿ ਤਜ੍ਜਾਸਮਨ੍ਨਾਹਾਰਸ੍ਸਾਭਾਵਤੋ.
੨੦੫. ਯਥਾ ਅਞ੍ਞਾ ਇਤ੍ਥਿਯੋ ਵਿਜਾਤਪਚ੍ਚਯਾ ਤਾਦਿਸੇਨ ਰੋਗੇਨ ਅਭਿਭੂਤਾਪਿ ਹੁਤ੍ਵਾ ਮਰਨ੍ਤਿ, ਬੋਧਿਸਤ੍ਤਮਾਤੁ ਪਨ ਬੋਧਿਸਤ੍ਤੇ ਕੁਚ੍ਛਿਗਤੇ ਨ ਕੋਚਿ ਰੋਗੋ ਉਪ੍ਪਜ੍ਜਤਿ; ਕੇਵਲਂ ਆਯੁਪਰਿਕ੍ਖਯੇਨੇਵ ਕਾਲਂ ਕਰੋਤਿ, ਸ੍ਵਾਯਮਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਬੋਧਿਸਤ੍ਤੇਨ ਵਸਿਤਟ੍ਠਾਨਂ ਹੀਤਿਆਦਿਨਾ ਤਤ੍ਥ ਕਾਰਣਮਾਹ. ਅਪਨੇਤ੍ਵਾਤਿ ਅਗ੍ਗਮਹੇਸਿਟ੍ਠਾਨਤੋ ਨੀਹਰਿਤ੍ਵਾ. ਅਨੁਰਕ੍ਖਿਤੁਂ ਨ ਸਕ੍ਕੋਤੀਤਿ ਸਮ੍ਮਾ ਗਬ੍ਭਪਰਿਹਾਰਂ ਨਾਨੁਯੁਞ੍ਜਤਿ, ਤੇਨ ਗਬ੍ਭੋ ਬਹ੍ਵਾਬਾਧੋ ਹੋਤਿ. ਵਤ੍ਥੁਵਿਸਦਂ ਹੋਤੀਤਿ ਗਬ੍ਭਾਸਯੋ ਪਰਿਸੁਦ੍ਧੋ ਹੋਤਿ. ਮਾਤੁ ਮਜ੍ਝਿਮਵਯਸ੍ਸ ਤਤਿਯਕੋਟ੍ਠਾਸੇ ਬੋਧਿਸਤ੍ਤਸ੍ਸ ਗਬ੍ਭੋਕ੍ਕਮਨਮ੍ਪਿ ਤਸ੍ਸਾ ਆਯੁਪਰਿਮਾਣਵਿਲੋਕਨੇਨੇਵ ਸਙ੍ਗਹਿਤਂ ਵਯੋਵਸੇਨ ਉਪ੍ਪਜ੍ਜਨਕਵਿਕਾਰਸ੍ਸ ਪਰਿਵਜ੍ਜਨਤੋ, ਇਤ੍ਥਿਸਭਾਵੇਨ ਉਪ੍ਪਜ੍ਜਨਕਵਿਕਾਰੋ ਪਨ ਬੋਧਿਸਤ੍ਤਸ੍ਸ ਆਨੁਭਾਵੇਨੇਵ ਵੂਪਸਮ੍ਮਤਿ.
ਸਤ੍ਤਮਾਸਜਾਤੋਤਿ ਪਟਿਸਨ੍ਧਿਗ੍ਗਹਣਤੋ ਸਤ੍ਤਮੇ ਮਾਸੇ ਜਾਤੋ. ਸੋ ਸੀਤੁਣ੍ਹਕ੍ਖਮੋ ਨ ਹੋਤਿ ਅਤਿਵਿਯ ਸੁਖੁਮਾਲਤਾਯ. ਅਟ੍ਠਮਾਸਜਾਤੋ ਕਾਮਂ ਸਤ੍ਤਮਾਸਜਾਤਤੋ ਬੁਦ੍ਧਿਅਵਯਵੋ, ਏਕਚ੍ਚੇ ਪਨ ਚਮ੍ਮਪਦੇਸਾ ਬੁਦ੍ਧਿਂ ਪਾਪੁਣਨ੍ਤਾ ਘਟ੍ਟਨਂ ਨ ਸਹਨ੍ਤਿ, ਤੇਨ ਸੋ ਨ ਜੀਵਤਿ. ਸਤ੍ਤਮਾਸਜਾਤਸ੍ਸ ਪਨ ਨ ਤਾਵ ਤੇ ਜਾਤਾਤਿ ਵਦਨ੍ਤਿ.
ਠਿਤਾਵ ਹੁਤ੍ਵਾਤਿ ਨਿਦ੍ਦੁਕ੍ਖਤਾਯ ਠਿਤਾ ਏਵ ਹੁਤ੍ਵਾ. ਦੁਕ੍ਖਸ੍ਸ ਹਿ ਬਲਵਭਾਵਤੋ ਤਂ ਦੁਕ੍ਖਂ ਅਸਹਮਾਨਾ ਅਞ੍ਞਾ ਇਤ੍ਥਿਯੋ ਨਿਸਿਨ੍ਨਾ ਵਾ ਨਿਪਨ੍ਨਾ ਵਾ ਵਿਜਾਯਨ੍ਤਿ. ਉਪਵਿਜਞ੍ਞਾਤਿ ਉਪਗਤਵਿਜਾਯਨਕਾਲਾ. ਸਕਲਨਗਰਵਾਸਿਨੋਤਿ ਕਪਿਲਵਤ੍ਥੁਂ ਪਰਿਵਾਰੇਤ੍ਵਾ ਠਿਤੇਸੁ ਦੇਵਦਹਾਦੀਸੁ ਛਸੁ ਨਗਰੇਸੁ ਵਸਨ੍ਤਾ.
ਦੇਵਾ ਨਂ ਪਠਮਂ ਪਟਿਗ੍ਗਣ੍ਹਨ੍ਤੀਤਿ ਲੋਕਨਾਥਂ ਮਹਾਪੁਰਿਸਂ ਮਯਮੇਵ ਪਠਮਂ ਪਟਿਗ੍ਗਣ੍ਹਾਮਾਤਿ ਸਞ੍ਜਾਤਗਾਰਵਬਹੁਮਾਨਾ ਅਤ੍ਤਨੋ ਪੀਤਿਂ ਪਵੇਦੇਨ੍ਤਾ ਖੀਣਾਸਵਾ ਸੁਦ੍ਧਾਵਾਸਬ੍ਰਹ੍ਮਾਨੋ ਆਦਿਤੋ ਪਟਿਗ੍ਗਣ੍ਹਨ੍ਤਿ. ਸੂਤਿਵੇਸਨ੍ਤਿ ਸੂਤਿਜਗ੍ਗਨਧਾਤਿਵੇਸਂ. ਏਕੇਤਿ ਉਤ੍ਤਰਵਿਹਾਰਵਾਸਿਨੋ. ਮਚ੍ਛਕ੍ਖਿਸਦਿਸਂ ਛਵਿਵਸੇਨ.
੨੦੬. ਅਜਿਨਪ੍ਪਵੇਣਿਯਾਤਿ ਅਜਿਨਚਮ੍ਮੇਹਿ ਸਿਬ੍ਬੇਤ੍ਵਾ ਕਤਪਵੇਣਿਯਾ. ਮਹਾਤੇਜੋਤਿ ਮਹਾਨੁਭਾਵੋ. ਮਹਾਯਸੋਤਿ ਮਹਾਪਰਿਵਾਰੋ ਵਿਪੁਲਕਿਤ੍ਤਿਘੋਸੋ ਚ.
ਭਗ੍ਗਵਿਭਗ੍ਗਾਤਿ ਸਮ੍ਬਾਧਟ੍ਠਾਨਤੋ ਨਿਕ੍ਖਮਨੇਨ ਵਿਭਾਵਿਤਤ੍ਤਾ ਭਗ੍ਗਾ ਵਿਭਗ੍ਗਾ ਵਿਯ ਚ ਹੁਤ੍ਵਾ. ਤੇਨ ਨੇਸਂ ਅਵਿਸਦਭਾਵਮੇਵ ਦਸ੍ਸੇਤਿ. ਅਲਗ੍ਗੋ ਹੁਤ੍ਵਾਤਿ ਗਬ੍ਭਾਸਯੇ ਯੋਨਿਪਦੇਸੇ ਚ ਕਤ੍ਥਚਿ ਅਲਗ੍ਗੋ ਅਸਤ੍ਤੋ ਹੁਤ੍ਵਾ. ਉਦਕੇਨਾਤਿ ਗਬ੍ਭਾਸਯਗਤੇਨ ਉਦਕੇਨ ਅਮਕ੍ਖਿਤੋ ਨਿਕ੍ਖਮਤਿ ਸਮ੍ਮਕ੍ਖਿਤਸ੍ਸ ਤਾਦਿਸਸ੍ਸ ਉਦਕਸੇਮ੍ਹਾਦਿਕਸ੍ਸੇਵ ਤਤ੍ਥ ਅਭਾਵਤੋ. ਬੋਧਿਸਤ੍ਤਸ੍ਸ ਹਿ ਪੁਞ੍ਞਾਨੁਭਾਵੇਨ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਤਂ ਠਾਨਂ ਵਿਸੁਦ੍ਧਂ ਪਰਮਸੁਗਨ੍ਧਗਨ੍ਧਕੁਟਿ ਵਿਯ ਚਨ੍ਦਨਗਨ੍ਧਂ ਵਾਯਨ੍ਤਂ ਤਿਟ੍ਠਤਿ. ਉਦਕਵਟ੍ਟਿਯੋਤਿ ਉਦਕਕ੍ਖਨ੍ਧਾ.
੨੦੭. ਮੁਹੁਤ੍ਤਜਾਤੋਤਿ ਮੁਹੁਤ੍ਤੇਨ ਜਾਤੋ ਹੁਤ੍ਵਾ ਮੁਹੁਤ੍ਤਮਤ੍ਤੋਵ. ਅਨੁਧਾਰਿਯਮਾਨੇਤਿ ਅਨੁਕੂਲਵਸੇਨ ਨੀਯਮਾਨੇ. ਆਗਤਾਨੇਵਾਤਿ ਤਂ ਠਾਨਂ ਉਪਗਤਾਨਿ ਏਵ.
ਅਨੇਕਸਾਖਨ੍ਤਿ ਰਤਨਮਯਾਨੇਕਸਤਪਤਿਟ੍ਠਾਨਹੀਰਕਂ. ਸਹਸ੍ਸਮਣ੍ਡਲਨ੍ਤਿ ਤੇਸਂ ਉਪਰਿ ਪਤਿਟ੍ਠਿਤਂ ਅਨੇਕਸਹਸ੍ਸਮਣ੍ਡਲਹੀਰਕਂ. ਮਰੂਤਿ ਦੇਵਾ.
ਨ ਖੋ ਪਨੇਵਂ ਦਟ੍ਠਬ੍ਬਨ੍ਤਿ ਸਤ੍ਤਪਦਵੀਤਿਹਾਰਤੋ ਪਗੇਵ ਦਿਸਾਵਿਲੋਕਨਸ੍ਸ ਕਤਤ੍ਤਾ. ਤੇਨਾਹ ‘‘ਮਹਾਸਤ੍ਤੋ ਹੀ’’ਤਿਆਦਿ. ਏਕਙ੍ਗਣਾਨੀਤਿ ਵਿਵਟਭਾਵੇਨ ਵਿਹਾਰਙ੍ਗਣਪਰਿਵੇਣਙ੍ਗਣਾਨਿ ਵਿਯ ਏਕਙ੍ਗਣਸਦਿਸਾਨਿ ਅਹੇਸੁਂ. ਸਦਿਸੋਪਿ ਨਤ੍ਥੀਤਿ ਤੁਮ੍ਹਾਕਂ ਇਦਂ ਵਿਲੋਕਨਂ ਵਿਸਿਟ੍ਠੇ ਪਸ੍ਸਿਤੁਂ ਇਧ ਤੁਮ੍ਹੇਹਿ ਸਦਿਸੋਪਿ ਨਤ੍ਥਿ, ਕੁਤੋ ਉਤ੍ਤਰਿਤਰੋਤਿ ਆਹਂਸੁ. ਸਬ੍ਬਪਠਮੋਤਿ ਸਬ੍ਬਪ੍ਪਧਾਨੋ. ਪਧਾਨਪਰਿਯਾਯੋ ਹਿ ਇਧ ਪਠਮਸਦ੍ਦੋ. ਤੇਨਾਹ ‘‘ਇਤਰਾਨੀ’’ਤਿਆਦਿ. ਏਤ੍ਥ ਚ ਮਹੇਸਕ੍ਖਾ ਤਾਵ ਦੇਵਾ ਤਥਾ ਵਦਨ੍ਤਿ, ਇਤਰੇ ਪਨ ਕਥਨ੍ਤਿ? ਮਹਾਸਤ੍ਤਸ੍ਸ ਆਨੁਭਾਵਦਸ੍ਸਨੇਨੇਵ. ਮਹੇਸਕ੍ਖਾਨਞ੍ਹਿ ਦੇਵਾਨਂ ਮਹਾਸਤ੍ਤਸ੍ਸ ਆਨੁਭਾਵੋ ਵਿਯ ਤੇਨ ਸਦਿਸਾਨਮ੍ਪਿ ਆਨੁਭਾਵੋ ਪਚ੍ਚਕ੍ਖੋ ਅਹੋਸਿ. ਇਤਰੇ ਪਨ ਤੇਸਂ ਵਚਨਂ ਸੁਤ੍ਵਾ ਸਦ੍ਦਹਨ੍ਤਾ ਅਨੁਮਿਨਨ੍ਤਾ ਤਥਾ ਆਹਂਸੁ.
ਜਾਤਮਤ੍ਤਸ੍ਸੇਵ ਬੋਧਿਸਤ੍ਤਸ੍ਸ ਠਾਨਾਦੀਨਿ ਯੇਸਂ ਵਿਸੇਸਾਧਿਗਮਾਨਂ ਪੁਬ੍ਬਨਿਮਿਤ੍ਤਭੂਤਾਨੀਤਿ ਤੇ ਨਿਦ੍ਧਾਰੇਤ੍ਵਾ ਦਸ੍ਸੇਨ੍ਤੋ, ‘‘ਏਤ੍ਥ ਚਾ’’ਤਿਆਦਿਮਾਹ. ਤਤ੍ਥ ਪਤਿਟ੍ਠਾਨਂ ਚਤੁਇਦ੍ਧਿਪਾਦਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ ਇਦ੍ਧਿਪਾਦਵਸੇਨ ਲੋਕੁਤ੍ਤਰਧਮ੍ਮੇਸੁ ਸੁਪ੍ਪਤਿਟ੍ਠਿਤਭਾਵਸਮਿਜ੍ਝਨਤੋ. ਉਤ੍ਤਰਾਭਿਮੁਖਭਾਵੋ ਲੋਕਸ੍ਸ ਉਤ੍ਤਰਣਵਸੇਨ ਗਮਨਸ੍ਸ ਪੁਬ੍ਬਨਿਮਿਤ੍ਤਂ. ਸਤ੍ਤਪਦਗਮਨਂ ਸਤ੍ਤਬੋਜ੍ਝਙ੍ਗਾਦਿਗਮਨਸ੍ਸ ਪੁਬ੍ਬਨਿਮਿਤ੍ਤਂ, ਵਿਸੁਦ੍ਧਛਤ੍ਤਧਾਰਣਂ ਸੁਵਿਸੁਦ੍ਧਵਿਮੁਤ੍ਤਿਛਤ੍ਤਧਾਰਣਸ੍ਸ ਪੁਬ੍ਬਨਿਮਿਤ੍ਤਂ, ਪਞ੍ਚਰਾਜਕਕੁਧਭਣ੍ਡਾਨਿ ਪਞ੍ਚਵਿਧਵਿਮੁਤ੍ਤਿਗੁਣਪਰਿਵਾਰਤਾਯ ਪੁਬ੍ਬਨਿਮਿਤ੍ਤਂ, ਅਨਾਵਟਦਿਸਾਨੁਵਿਲੋਕਨਂ ਅਨਾਵਟਞਾਣਤਾਯ ਪੁਬ੍ਬਨਿਮਿਤ੍ਤਂ, ‘‘ਅਗ੍ਗੋਹਮਸ੍ਮੀ’’ਤਿਆਦਿਵਚਨਂ ਅਪ੍ਪਟਿਵਤ੍ਤਿਯਧਮ੍ਮਚਕ੍ਕਪਵਤ੍ਤਨਸ੍ਸ ਪੁਬ੍ਬਨਿਮਿਤ੍ਤਂ; ਅਯਮਨ੍ਤਿਮਾ ਜਾਤੀਤਿ ਆਯਤਿਂ ਜਾਤਿਯਾ ਅਭਾਵਕਿਤ੍ਤਨਾ ਅਨੁਪਾਦਿ…ਪੇ… ਪੁਬ੍ਬਨਿਮਿਤ੍ਤਨ੍ਤਿ ਵੇਦਿਤਬ੍ਬਂ; ਤਸ੍ਸ ਤਸ੍ਸ ਅਨਾਗਤੇ ਲਦ੍ਧਬ੍ਬਵਿਸੇਸਸ੍ਸ ਤਂ ਤਂ ਨਿਮਿਤ੍ਤਂ ਅਬ੍ਯਭਿਚਾਰੀਨਿਮਿਤ੍ਤਨ੍ਤਿ ਦਟ੍ਠਬ੍ਬਂ. ਨ ਆਗਤੋਤਿ ਇਮਸ੍ਮਿਂ ਸੁਤ੍ਤੇ ਅਞ੍ਞਤ੍ਥ ਚ ਵਕ੍ਖਮਾਨਾਯ ਅਨੁਪੁਬ੍ਬਿਯਾ ਅਨਾਗਤਤਂ ਸਨ੍ਧਾਯ ਵੁਤ੍ਤਂ. ਆਹਰਿਤ੍ਵਾਤਿ ਤਸ੍ਮਿਂ ਤਸ੍ਮਿਂ ਸੁਤ੍ਤੇ ਅਟ੍ਠਕਥਾਸੁ ਚ ਆਗਤਨਯੇਨ ਆਹਰਿਤ੍ਵਾ ਦੀਪੇਤਬ੍ਬੋ.
ਦਸਸਹਸ੍ਸਿਲੋਕਧਾਤੁ ਕਮ੍ਪੀਤਿ ਪਨ ਇਦਂ ਸਤਿਪਿ ਇਧ ਪਾਲ਼ਿਯਂ ਆਗਤਤ੍ਤੇ ਵਕ੍ਖਮਾਨਾਨਮਚ੍ਛਰਿਯਾਨਂ ਮੂਲਭੂਤਂ ਦਸ੍ਸੇਤੁਂ ਵੁਤ੍ਤਂ, ਏਵਂ ਅਞ੍ਞਮ੍ਪੀਦਿਸਂ ਦਟ੍ਠਬ੍ਬਂ. ਤਨ੍ਤਿ ਬਦ੍ਧਾ ਵੀਣਾ, ਚਮ੍ਮਬਦ੍ਧਾ ਭੇਰਿਯੋਤਿ ਪਞ੍ਚਙ੍ਗਿਕਤੂਰਿਯਸ੍ਸ ਨਿਦਸ੍ਸਨਮਤ੍ਤਂ, ਚ-ਸਦ੍ਦੇਨ ਵਾ ਇਤਰੇਸਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਭਿਜ੍ਜਿਂਸੂਤਿ ਪਾਦੇਸੁ ਬਦ੍ਧਟ੍ਠਾਨੇਸੁਯੇਵ ਭਿਜ੍ਜਿਂਸੁ. ਵਿਗਚ੍ਛਿਂਸੂਤਿ ਵੂਪਸਮਿਂਸੁ. ਸਕਤੇਜੋਭਾਸਿਤਾਨੀਤਿ ਅਤਿਵਿਯ ਸਮੁਜ੍ਜਲਾਯ ਅਤ੍ਤਨੋ ਪਭਾਯ ਓਭਾਸਿਤਾਨਿ ਅਹੇਸੁਂ. ਨ ਪਵਤ੍ਤੀਤਿ ਨ ਸਨ੍ਦੀ. ਵਾਤੋ ਨ ਵਾਯੀਤਿ ਖਰੋ ਵਾਤੋ ਨ ਵਾਯਿ, ਮੁਦੁਸੁਖੋ ਪਨ ਸਤ੍ਤਾਨਂ ਸੁਖਾਵਹੋ ਵਾਯਿ. ਪਥਵੀਗਤਾ ਅਹੇਸੁਂ ਉਚ੍ਚਟ੍ਠਾਨੇ ਠਾਤੁਂ ਅਵਿਸਹਨ੍ਤਾ. ਉਤੁਸਮ੍ਪਨ੍ਨੋਤਿ ਅਨੁਣ੍ਹਾਸੀਤਤਾਸਙ੍ਖਾਤੇਨ ਉਤੁਨਾ ਸਮ੍ਪਨ੍ਨੋ. ਵਾਮਹਤ੍ਥਂ ਉਰੇ ਠਪੇਤ੍ਵਾ ਦਕ੍ਖਿਣੇਨ ਪੁਥੁਪਾਣਿਨਾ ਹਤ੍ਥਤਾਲ਼ਨੇਨ ਸਦ੍ਦਕਰਣਂ ਅਪ੍ਫੋਟਨਂ. ਮੁਖੇਨ ਉਸ੍ਸੇਲ਼ਨਂ ਸਦ੍ਦਮੁਞ੍ਚਨਂ ਸੇਲ਼ਨਂ. ਏਕਦ੍ਧਜਮਾਲਾ ਅਹੋਸੀਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ. ਤੇਨ ਵਿਚਿਤ੍ਤਪੁਪ੍ਫਸੁਗਨ੍ਧਪੁਪ੍ਫਵਸ੍ਸਦੇਵਾ ਵਸ੍ਸਿਂਸੁ, ਸੂਰਿਯੇ ਦਿਬ੍ਬਮਾਨੇ ਏਵ ਤਾਰਕਾ ਓਭਾਸਿਂਸੁ, ਅਚ੍ਛਂ ਵਿਪ੍ਪਸਨ੍ਨਂ ਉਦਕਂ ਪਥਵਿਤੋ ਉਬ੍ਭਿਜ੍ਜਿ, ਬਿਲਾਸਯਾ ਦਰਿਸਯਾ ਤਿਰਚ੍ਛਾਨਾ ਆਸਯਤੋ ਨਿਕ੍ਖਮਿਂਸੁ; ਰਾਗਦੋਸਮੋਹਾਪਿ ਤਨੁ ਭਵਿਂਸੁ, ਪਥਵਿਯਂ ਰਜੋ ਵੂਪਸਮਿ, ਅਨਿਟ੍ਠਗਨ੍ਧੋ ਵਿਗਚ੍ਛਿ, ਦਿਬ੍ਬਗਨ੍ਧੋ ਵਾਯਿ, ਰੂਪਿਨੋ ਦੇਵਾ ਸਰੂਪੇਨੇਵ ਮਨੁਸ੍ਸਾਨਂ ਆਪਾਥਮਗਮਂਸੁ, ਸਤ੍ਤਾਨਂ ਚੁਤੁਪਪਾਤਾ ਨਾਹੇਸੁਨ੍ਤਿ ਇਮੇਸਂ ਸਙ੍ਗਹੋ ਦਟ੍ਠਬ੍ਬੋ. ਯਾਨਿ ਮਹਾਭਿਨੀਹਾਰਸਮਯੇ ਉਪ੍ਪਨ੍ਨਾਨਿ ਦ੍ਵਤ੍ਤਿਂਸ ਪੁਬ੍ਬਨਿਮਿਤ੍ਤਾਨਿ, ਤਾਨਿ ਅਨਵਸੇਸਾਨਿ ਤਦਾ ਅਹੇਸੁਨ੍ਤਿ.
ਤਤ੍ਰਾਪੀਤਿ ਤੇਸੁਪਿ ਪਥਵਿਕਮ੍ਪਾਦੀਸੁ ਏਵਂ ਪੁਬ੍ਬਨਿਮਿਤ੍ਤਭਾਵੋ ਵੇਦਿਤਬ੍ਬੋ, ਨ ਕੇਵਲਂ ਸਮ੍ਪਤਿਜਾਤਸ੍ਸ ਠਾਨਾਦੀਸੁ ਏਵਾਤਿ ਅਧਿਪ੍ਪਾਯੋ. ਸਬ੍ਬਞ੍ਞੁਤਞ੍ਞਾਣਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ ਸਬ੍ਬਸ੍ਸ ਞੇਯ੍ਯਸ੍ਸ ਤਿਤ੍ਥਕਰਮਤਸ੍ਸ ਚ ਚਾਲਨਤੋ. ਕੇਨਚਿ ਅਨੁਸ੍ਸਾਹਿਤਾਨਂਯੇਵ ਇਮਸ੍ਮਿਂਯੇਵ ਏਕਚਕ੍ਕਵਾਲ਼ੇ ਸਨ੍ਨਿਪਾਤੋ, ਕੇਨਚਿ ਅਨੁਸ੍ਸਾਹਿਤਾਨਂਯੇਵ ਏਕਪ੍ਪਹਾਰੇਨੇਵ ਸਨ੍ਨਿਪਤਿਤ੍ਵਾ ਧਮ੍ਮਪਟਿਗ੍ਗਣ੍ਹਨਸ੍ਸ ਪੁਬ੍ਬਨਿਮਿਤ੍ਤਂ, ਪਠਮਂ ਦੇਵਤਾਨਂ ਪਟਿਗ੍ਗਹਣਂ ਦਿਬ੍ਬਵਿਹਾਰਪਟਿਲਾਭਸ੍ਸ, ਪਚ੍ਛਾ ਮਨੁਸ੍ਸਾਨਂ ਪਟਿਗ੍ਗਹਣਂ ਤਤ੍ਥੇਵ ਠਾਨਸ੍ਸ ਨਿਚ੍ਚਲਸਭਾਵਤੋ ਆਨੇਞ੍ਜਵਿਹਾਰਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ. ਵੀਣਾਨਂ ਸਯਂ ਵਜ੍ਜਨਂ ਪਰੂਪਦੇਸੇਨ ਵਿਨਾ ਸਯਮੇਵ ਅਨੁਪੁਬ੍ਬਵਿਹਾਰਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ. ਭੇਰੀਨਂ ਵਜ੍ਜਨਂ ਚਕ੍ਕਵਾਲ਼ਪਰਿਯਨ੍ਤਾਯ ਪਰਿਸਾਯ ਪਵੇਦਨਸਮਤ੍ਥਸ੍ਸ ਧਮ੍ਮਭੇਰਿਯਾ ਅਨੁਸਾਵਨਸ੍ਸ ਅਮਤਦੁਨ੍ਦੁਭਿਘੋਸਨਸ੍ਸ ਪੁਬ੍ਬਨਿਮਿਤ੍ਤਂ. ਅਨ੍ਦੁਬਨ੍ਧਨਾਦੀਨਂ ਛੇਦੋ ਮਾਨਵਿਨਿਬਨ੍ਧਛੇਦਨਸ੍ਸ ਪੁਬ੍ਬਨਿਮਿਤ੍ਤਂ; ਸੁਪਟ੍ਟਨਸਮ੍ਪਾਪੁਣਨਂ ਅਤ੍ਥਾਦਿ ਅਨੁਰੂਪਂ ਅਤ੍ਥਾਦੀਸੁ ਞਾਣਸ੍ਸ ਭੇਦਾਧਿਗਮਸ੍ਸ ਪੁਬ੍ਬਨਿਮਿਤ੍ਤਂ.
ਨਿਬ੍ਬਾਨਰਸੇਨਾਤਿ ਕਿਲੇਸਾਨਂ ਨਿਬ੍ਬਾਯਨਰਸੇਨ. ਏਕਰਸਭਾਵਸ੍ਸਾਤਿ ਸਾਸਨਸ੍ਸ ਸਬ੍ਬਤ੍ਥ ਏਕਰਸਭਾਵਸ੍ਸ. ਵਾਤਸ੍ਸ ਅਵਾਯਨਂ ਕਿਸ੍ਸ ਪੁਬ੍ਬਨਿਮਿਤ੍ਤਨ੍ਤਿ ਆਹ ‘‘ਦ੍ਵਾਸਟ੍ਠਿਦਿਟ੍ਠਿਗਤਭਿਨ੍ਦਨਸ੍ਸਾ’’ਤਿ. ਆਕਾਸਾਦਿਅਪ੍ਪਤਿਟ੍ਠਵਿਸਮਚਞ੍ਚਲਟ੍ਠਾਨਂ ਪਹਾਯ ਸਕੁਣਾਨਂ ਪਥਵੀਗਮਨਂ ਤਾਦਿਸਂ ਮਿਚ੍ਛਾਗਾਹਂ ਪਹਾਯ ਸਤ੍ਤਾਨਂ ਪਾਣੇਹਿ ਰਤਨਤ੍ਤਯਸਰਣਗਮਨਸ੍ਸ ਪੁਬ੍ਬਨਿਮਿਤ੍ਤਂ. ਦੇਵਤਾਨਂ ਅਪ੍ਫੋਟਨਾਦੀਹਿ ਕੀਲ਼ਨਂ ਪਮੋਦਨੁਪ੍ਪਤ੍ਤਿਉਦਾਨਸ੍ਸ ਭਵਵਨ੍ਤਗਮਨੇਨ ਧਮ੍ਮਸਭਾਵਬੋਧਨੇਨ ਚ ਪਮੋਦਵਿਭਾਵਨਸ੍ਸ ਪੁਬ੍ਬਨਿਮਿਤ੍ਤਂ. ਧਮ੍ਮਵੇਗਵਸ੍ਸਨਸ੍ਸਾਤਿ ਦੇਸਨਾਞਾਣਵੇਗੇਨ ਧਮ੍ਮਾਮਤਸ੍ਸ ਵਸ੍ਸਨਸ੍ਸ ਪੁਬ੍ਬਨਿਮਿਤ੍ਤਂ. ਕਾਯਗਤਾਸਤਿਵਸੇਨ ਲਦ੍ਧਜ੍ਝਾਨਂ ਪਾਦਕਂ ਕਤ੍ਵਾ ਉਪ੍ਪਾਦਿਤਮਗ੍ਗਫਲਸੁਖਾਨੁਭਵੋ ਕਾਯਗਤਾਸਤਿਅਮਤਪਟਿਲਾਭੋ, ਤਸ੍ਸ ਪਨ ਕਾਯਸ੍ਸਪਿ ਅਤਪ੍ਪਕਸੁਖਾਵਹਤ੍ਤਾ ਖੁਦਾਪਿਪਾਸਾਪੀਲ਼ਨਾਭਾਵੋ ਪੁਬ੍ਬਨਿਮਿਤ੍ਤਂ ਵੁਤ੍ਤੋ. ਅਰਿਯਦ੍ਧਜਮਾਲਾਮਾਲਿਤਾਯਾਤਿ ਸਦੇਵਕਸ੍ਸ ਲੋਕਸ੍ਸ ਅਰਿਯਮਗ੍ਗਬੋਜ੍ਝਙ੍ਗਧਜਮਾਲਾਹਿ ਮਾਲਿਤਭਾਵਸ੍ਸ ਪੁਬ੍ਬਨਿਮਿਤ੍ਤਂ. ਯਂ ਪਨੇਤ੍ਥ ਅਨੁਦ੍ਧਟਂ, ਤਂ ਸੁਵਿਞ੍ਞੇਯ੍ਯਮੇਵ.
ਏਤ੍ਥਾਤਿ ‘‘ਸਮ੍ਪਤਿਜਾਤੋ’’ਤਿਆਦਿਨਾ ਆਗਤੇ ਇਮਸ੍ਮਿਂ ਠਾਨੇ. ਵਿਸ੍ਸਜ੍ਜਿਤੋਵ, ਤਸ੍ਮਾ ਅਮ੍ਹੇਹਿ ਇਧ ਅਪੁਬ੍ਬਂ ਵਤ੍ਤਬ੍ਬਂ ਨਤ੍ਥੀਤਿ ਅਧਿਪ੍ਪਾਯੋ. ਤਦਾ ਪਥਵਿਯਂ ਗਚ੍ਛਨ੍ਤੋਪਿ ਮਹਾਸਤ੍ਤੋ ਆਕਾਸੇਨ ਗਚ੍ਛਨ੍ਤੋ ਵਿਯ ਮਹਾਜਨਸ੍ਸ ਉਪਟ੍ਠਾਸੀਤਿ ਅਯਮੇਤ੍ਥ ਨਿਯਤਿ ਧਮ੍ਮਨਿਯਾਮੋ ਬੋਧਿਸਤ੍ਤਾਨਂ ਧਮ੍ਮਤਾਤਿ ਇਦਂ ਨਿਯਤਿਵਾਦਵਸੇਨ ਕਥਨਂ. ‘‘ਪੁਬ੍ਬੇ ਪੁਰਿਮਜਾਤੀਸੁ ਤਾਦਿਸਸ੍ਸ ਪੁਞ੍ਞਸਮ੍ਭਾਰਕਮ੍ਮਸ੍ਸ ਕਤਤ੍ਤਾ ਉਪਚਿਤਤ੍ਤਾ ਮਹਾਜਨਸ੍ਸ ਤਥਾ ਉਪਟ੍ਠਾਸੀ’’ਤਿ ਇਦਂ ਪੁਬ੍ਬੇਕਤਕਮ੍ਮਵਾਦਵਸੇਨ ਕਥਨਂ. ਇਮੇਸਂ ਸਤ੍ਤਾਨਂ ਉਪਰਿ ਈਸਨਸੀਲਤਾਯ ਯਥਾਸਕਂ ਕਮ੍ਮਮੇਵ ਇਸ੍ਸਰੋ ਨਾਮ, ਤਸ੍ਸ ਨਿਮ੍ਮਾਨਂ ਅਤ੍ਤਨੋ ਫਲਸ੍ਸ ਨਿਬ੍ਬਤ੍ਤਨਂ, ਮਹਾਪੁਰਿਸੋਪਿ ਸਦੇਵਕਂ ਲੋਕਂ ਅਭਿਭਵਿਤੁਂ ਸਮਤ੍ਥੇਨ ਉਲ਼ਾਰੇਨ ਪੁਞ੍ਞਕਮ੍ਮੁਨਾ ਨਿਬ੍ਬਤ੍ਤਿਤੋ ਤੇਨ ਇਸ੍ਸਰੇਨ ਨਿਮ੍ਮਿਤੋ ਨਾਮ, ਤਸ੍ਸ ਚਾਯਂ ਨਿਮ੍ਮਾਨਵਿਸੇਸੋ, ਯਦਿਦਂ ਮਹਾਨੁਭਾਵਤਾ. ਯਾਯ ਮਹਾਜਨਸ੍ਸ ਤਥਾ ਉਪਟ੍ਠਾਸੀਤਿ ਇਦਂ ਇਸ੍ਸਰਨਿਮ੍ਮਾਨਵਾਦਵਸੇਨ ਕਥਨਂ. ਏਵਂ ਤਂ ਤਂ ਬਹੁਂ ਵਤ੍ਵਾ ਕਿਂ ਇਮਾਯ ਪਰਿਯਾਯਕਥਾਯਾਤਿ ਅਵਸਾਨੇ ਉਜੁਕਮੇਵ ਏਵਂ ਬ੍ਯਾਕਾਸਿ. ਸਮ੍ਪਤਿਜਾਤੋ ਪਥਵਿਯਂ ਕਥਂ ਪਦਸਾ ਗਚ੍ਛਤਿ, ਏਵਂਮਹਾਨੁਭਾਵੋ ਆਕਾਸੇਨ ਮਞ੍ਞੇ ਗਚ੍ਛਤੀਤਿ ਪਰਿਕਪ੍ਪਨਸ੍ਸ ਵਸੇਨ ਆਕਾਸੇਨ ਗਚ੍ਛਨ੍ਤੋ ਵਿਯ ਅਹੋਸਿ. ਸੀਘਤਰਂ ਪਨ ਸਤ੍ਤਪਦਵੀਤਿਹਾਰੇਨ ਗਤਤ੍ਤਾ ਦਿਸ੍ਸਮਾਨਰੂਪੋਪਿ ਮਹਾਜਨਸ੍ਸ ਅਦਿਸ੍ਸਮਾਨੋ ਵਿਯ ਅਹੋਸਿ. ਅਚੇਲਕਭਾਵੋ ਖੁਦ੍ਦਕਸਰੀਰਤਾ ਚ ਤਾਦਿਸਸ੍ਸ ਇਰਿਯਾਪਥਸ੍ਸ ਅਨਨੁਚ੍ਛਵਿਕਾਤਿ ਕਮ੍ਮਾਨੁਭਾਵਸਞ੍ਜਨਿਤਪਾਟਿਹਾਰਿਯਵਸੇਨ ਅਲਙ੍ਕਾਰਪਟਿਯਤ੍ਤੋ ਵਿਯ; ਸੋਲ਼ਸਵਸ੍ਸੁਦ੍ਦੇਸਿਕੋ ਵਿਯ ਚ ਮਹਾਜਨਸ੍ਸ ਉਪਟ੍ਠਾਸੀਤਿ ਵੇਦਿਤਬ੍ਬਂ; ਬੁਦ੍ਧਭਾਵਾਨੁਚ੍ਛਵਿਕਸ੍ਸ ਬੋਧਿਸਤ੍ਤਾਨੁਭਾਵਸ੍ਸ ਯਾਥਾਵਤੋ ਪਵੇਦਿਤਤ੍ਤਾ ਬੁਦ੍ਧੇਨ ਵਿਯ…ਪੇ… ਅਤ੍ਤਮਨਾ ਅਹੋਸਿ.
ਪਾਕਟਾ ਹੁਤ੍ਵਾਤਿ ਵਿਭੂਤਾ ਹੁਤ੍ਵਾ. ਬੁਦ੍ਧਾਨਂ ਯੇ ਯੇ ਸਙ੍ਖਾਰੇ ਵਵਤ੍ਥਪੇਤੁਕਾਮਾ, ਤੇ ਤੇ ਉਪ੍ਪਾਦਕ੍ਖਣੇਪਿ ਸਬ੍ਬਸੋ ਸੁਪ੍ਪਟਿਵਿਦਿਤਾ ਸੁਪਾਕਟਾ ਹਤ੍ਥਤਲੇ ਆਮਲਕਂ ਵਿਯ ਸੁਟ੍ਠੁ ਵਿਭੂਤਾ ਏਵ ਹੁਤ੍ਵਾ ਉਪਟ੍ਠਹਨ੍ਤਿ. ਤੇਨਾਹ ‘‘ਯਥਾ ਹੀ’’ਤਿਆਦਿ. ਅਨੋਕਾਸਗਤੇਤਿ ਪਰਿਗ੍ਗਹਸ੍ਸ ਅਨੋਕਾਸਕਾਲੇ ਪਵਤ੍ਤੇ. ਨਿਪ੍ਪਦੇਸੇਤਿ ਨਿਰਵਸੇਸੇ. ਓਕਾਸਪ੍ਪਤ੍ਤੇਤਿ ਠਾਨਗਮਨਾਦਿਕਾਲੇ ਉਪ੍ਪਨ੍ਨੇ, ਤੇ ਹਿ ਸਮ੍ਮਸਨਸ੍ਸ ਯੋਗ੍ਯਕਾਲੇ ਉਪ੍ਪਤ੍ਤਿਯਾ ਓਕਾਸਪ੍ਪਤ੍ਤਾਤਿ ਅਧਿਪ੍ਪਾਯੋ. ਸਤ੍ਤਦਿਵਸਬ੍ਭਨ੍ਤਰੇਤਿ ਇਦਂ ਬੁਦ੍ਧਾਨਂ ਪਾਕਤਿਕਸਮ੍ਮਸਨਵਸੇਨ ਵੁਤ੍ਤਂ, ਆਕਙ੍ਖਨ੍ਤਾ ਪਨ ਤੇ ਯਦਾ ਕਦਾਚਿ ਉਪ੍ਪਨ੍ਨਸਙ੍ਖਾਰੇ ਸਮ੍ਮਸਨ੍ਤਿਯੇਵ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਅਚ੍ਛਰਿਯਬ੍ਭੁਤਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੪. ਬਾਕੁਲਸੁਤ੍ਤਵਣ੍ਣਨਾ
੨੦੯. ਯਥਾ ‘‘ਦ੍ਵਤ੍ਤਿਂਸਾ’’ਤਿ ਵਤ੍ਤਬ੍ਬੇ ਦ੍ਵਿ-ਸਦ੍ਦਸ੍ਸ ਬਾ-ਆਦੇਸਂ ਕਤ੍ਵਾ ਬਾਤ੍ਤਿਂਸਾਤਿ ਵੁਚ੍ਚਤਿ, ਏਵਂ ਏਤ੍ਥ ਬਾ-ਕਾਰਾਦੇਸਂ ਕਤ੍ਵਾ ਬਾਕੁਲੋਤਿ ਸਮਞ੍ਞਾ ਅਹੋਸਿ, ਸਾਯਂ ਤਸ੍ਸ ਅਨ੍ਵਤ੍ਥਸਞ੍ਞਾਤਿ ਦਸ੍ਸੇਤੁਂ, ‘‘ਤਸ੍ਸ ਹੀ’’ਤਿਆਦਿ ਵੁਤ੍ਤਂ. ਸੀਸਂ ਨ੍ਹਾਪੇਤ੍ਵਾਤਿ ਮਙ੍ਗਲਤ੍ਥਂ ਮਹਾਗਙ੍ਗਾਯ ਸੀਸਂ ਨ੍ਹਾਪੇਤ੍ਵਾ. ਨਿਮੁਜ੍ਜਨਵਸੇਨਾਤਿ ਜਣ੍ਣੁਪਮਾਣੇ ਉਦਕੇ ਥੋਕਂਯੇਵ ਨਿਮੁਜ੍ਜਨਵਸੇਨ. ਛਡ੍ਡੇਤ੍ਵਾ ਪਲਾਤਾ ਮਰਣਭਯਤਜ੍ਜਿਤਾ. ਪਹਰਿਯਮਾਨਾ ਮਰਨ੍ਤਿ, ਨ ਜਾਲੇਨ ਬਨ੍ਧਿਤਮਤ੍ਤੇਨ. ਦਾਰਕਸ੍ਸ ਤੇਜੇਨਾਤਿ ਦਾਰਕਸ੍ਸ ਪੁਞ੍ਞਤੇਜੇਨ. ਨੀਹਟਮਤ੍ਤੋਵ ਮਤੋ, ਤਸ੍ਸ ਮਰਣਤ੍ਥਂ ਉਪਕ੍ਕਮੋ ਨ ਕਤੋ, ਯੇਨ ਉਪਕ੍ਕਮੇਨ ਦਾਰਕਸ੍ਸ ਬਾਧੋ ਸਿਯਾ. ਤਨ੍ਤਿ ਮਚ੍ਛਂ. ਸਕਲਮੇਵਾਤਿ ਪਰਿਪੁਣ੍ਣਾਵਯਵਮੇਵ.
ਨ ਕੇਲਾਯਤੀਤਿ ਨ ਮਮਾਯਤਿ ਕਿਸ੍ਮਿਞ੍ਚਿ ਨ ਮਞ੍ਞਤਿ. ਦਾਰਕਸ੍ਸ ਪੁਞ੍ਞਤੇਜੇਨ ਪਿਟ੍ਠਿਤੋ ਫਾਲੇਨ੍ਤੀ. ਦਾਰਕਂ ਲਭਤੀਤਿ ਉਗ੍ਘੋਸਨਵਸੇਨ ਭੇਰਿਂ ਚਰਾਪੇਤ੍ਵਾ. ਪਵਤ੍ਤਿਂ ਆਚਿਕ੍ਖਿ, ਅਤ੍ਤਨੋ ਪੁਤ੍ਤਭਾਵਂ ਕਥੇਸਿ. ਕੁਚ੍ਛਿਯਾ ਧਾਰਿਤਤ੍ਤਾ ਅਮਾਤਾ ਕਾਤੁਂ ਨ ਸਕ੍ਕਾ ਜਨਨੀਭਾਵਤੋ. ਮਚ੍ਛਂ ਗਣ੍ਹਨ੍ਤਾਪੀਤਿ ਮਚ੍ਛਂ ਕਿਣਿਤ੍ਵਾ ਗਣ੍ਹਨ੍ਤਾਪਿ. ਤਥਾ ਗਣ੍ਹਨ੍ਤਾ ਚ ਤਪ੍ਪਰਿਯਾਪਨ੍ਨਂ ਸਬ੍ਬਂ ਗਣ੍ਹਾਤਿ ਨਾਮਾਤਿ ਆਹ – ‘‘ਵਕ੍ਕਯਕਨਾਦੀਨਿ ਬਹਿ ਕਤ੍ਵਾ ਗਣ੍ਹਨ੍ਤਾ ਨਾਮ ਨਤ੍ਥੀ’’ਤਿ. ਅਯਮ੍ਪਿ ਅਮਾਤਾ ਕਾਤੁਂ ਨ ਸਕ੍ਕਾ ਸਾਮਿਕਭਾਵਤੋ. ਦਾਰਕੋ ਉਭਿਨ੍ਨਮ੍ਪਿ ਕੁਲਾਨਂ ਦਾਯਾਦੋ ਹੋਤੁ ਦ੍ਵਿਨ੍ਨਂ ਪੁਤ੍ਤਭਾਵਤੋ.
ਅਸੀਤਿਮੇਤਿ ਜਾਤਿਯਾ ਅਸੀਤਿਮੇ ਵਸ੍ਸੇ. ਪਬ੍ਬਜ੍ਜਾਮਤ੍ਤੇਨ ਕਿਲੇਸਾਨਂ ਅਸਮੁਚ੍ਛਿਜ੍ਜਨਤੋ ਵੀਤਿਕ੍ਕਮਿਤੁਂ ਕਾਮਸਞ੍ਞਾ ਉਪ੍ਪਨ੍ਨਪੁਬ੍ਬਾਤਿ ਪੁਚ੍ਛਾ ਪਨ ਪੁਚ੍ਛਿਤਬ੍ਬਾ. ਤੇਨਾਹ – ‘‘ਏਵਞ੍ਚ ਖੋ ਮਂ, ਆਵੁਸੋ ਕਸ੍ਸਪ, ਪੁਚ੍ਛਿਤਬ੍ਬ’’ਨ੍ਤਿ.
੨੧੦. ਨਿਯਮੇਤ੍ਵਾਤਿ ਤਂ ਤਂਵਾਰੇ ਸੇਸਵਾਰੇਨ ਨਿਯਮੇਤ੍ਵਾ. ਕਮ੍ਮਪਥਭੇਦਕੋਤਿ ਕਮ੍ਮਪਥਵਿਸੇਸਕਰੋ. ਤਤ੍ਥ ਕਾਮਵਿਤਕ੍ਕੋ ਯਥਾ ਕਾਯਵਚੀਦ੍ਵਾਰੇਸੁ ਚੋਪਨਪ੍ਪਤ੍ਤੋ ਕਮ੍ਮਪਥਪ੍ਪਤ੍ਤੋ ਨਾਮ ਹੋਤਿ; ਮਨੋਦ੍ਵਾਰੇ ਪਰਭਣ੍ਡਸ੍ਸ ਅਤ੍ਤਨੋ ਪਰਿਣਾਮਨਵਸੇਨ ਪਵਤ੍ਤਅਭਿਜ੍ਝਾਸਹਗਤੋ; ਏਵਂ ਕਾਮਸਞ੍ਞਾਤਿ, ਤਥਾ ਬ੍ਯਾਪਾਦਵਿਹਿਂਸਾਵਿਤਕ੍ਕਸਞ੍ਞਾਤਿ ਥੇਰੋ, ‘‘ਉਭਯਮ੍ਪੇਤਂ ਕਮ੍ਮਪਥਭੇਦਕਮੇਵਾ’’ਤਿ ਆਹ. ਕਮ੍ਮਪਥਂ ਅਪ੍ਪਤ੍ਤਂ ਸਞ੍ਞਂ ਸਨ੍ਧਾਯ, ‘‘ਸਞ੍ਞਾ ਉਪ੍ਪਨ੍ਨਮਤ੍ਤਾਵਾ’’ਤਿ ਵੁਚ੍ਚਮਾਨੇ ਵਿਤਕ੍ਕਿਤਮ੍ਪਿ ਸਮਾਨਂ ਕਮ੍ਮਪਥਂ ਅਪ੍ਪਤ੍ਤਮੇਵ, ਉਭਯਸ੍ਸ ਪਨ ਵਸੇਨ ਸੁਤ੍ਤਪਦਂ ਪਵਤ੍ਤਨ੍ਤਿ ਥੇਰਸ੍ਸ ਅਧਿਪ੍ਪਾਯੋ.
੨੧੧. ਆਯੂਹਨਕਮ੍ਮਨ੍ਤਿ ਅਤ੍ਤਨਾ ਆਯੂਹਿਤਬ੍ਬਕਮ੍ਮਂ. ਲੋਮਕਿਲਿਟ੍ਠਾਨੀਤਿ ਕਿਲਿਟ੍ਠਲੋਮਾਨਿ, ਕਿਲਿਟ੍ਠਂਸੂਨੀਤਿ ਅਤ੍ਥੋ. ਕਿਮੇਵਂ ਭੋਗੇਸੁ ਪਰਨਿਮ੍ਮਿਤਭਵੇ ਵਸਵਤ੍ਤਿਦੇਵਾਨਂ ਵਿਯ ਸਬ੍ਬਸੋ ਆਯੂਹਨਕਮ੍ਮੇਨ ਵਿਨਾ ਅਞ੍ਞਸ੍ਸਪਿ ਪਬ੍ਬਜਿਤਸ੍ਸ ਪਚ੍ਚਯਲਾਭੋ ਦਿਟ੍ਠਪੁਬ੍ਬੋ ਸੁਤਪੁਬ੍ਬੋਤਿ ਆਹ ‘‘ਅਨਚ੍ਛਰਿਯਞ੍ਚੇਤ’’ਨ੍ਤਿ. ਕੁਲੂਪਕਥੇਰਾਨਮੇਤਂ ਕਮ੍ਮਂ, ਥੇਰੋ ਪਨ ਕਦਾਚਿਪਿ ਕੁਲੂਪਕੋ ਨਾਹੋਸਿ.
ਗਦ੍ਦੁਹਨਮਤ੍ਤਨ੍ਤਿ ਗੋਦੁਹਨਮਤ੍ਤਕਾਲਂ. ਇਧ ਪਨ ਸਕਲੋ ਗੋਦੁਹਨੋ ਅਧਿਪ੍ਪੇਤੋਤਿ ਦਸ੍ਸੇਨ੍ਤੋ, ‘‘ਗਾਵਿਂ…ਪੇ… ਕਾਲਮਤ੍ਤਮ੍ਪੀ’’ਤਿ ਆਹ. ਨਿਬਨ੍ਧੀਤਿ ਨਿਬਦ੍ਧਦਾਤਬ੍ਬਂ ਕਤ੍ਵਾ ਠਪੇਸਿ.
ਸਕਿਲੇਸਪੁਗ੍ਗਲਸ੍ਸ ਅਸੇਰਿਭਾਵਕਰਣੇਨ ਰਣੇਨ ਸਦਿਸਤਾਯ ਰਣੋ, ਸਂਕਿਲੇਸੋ. ਅਞ੍ਞਾ ਉਦਪਾਦੀਤਿ ਪਨਾਹ, ਤਸ੍ਮਾ ਅਰਹਤ੍ਤਂ ਨ ਪਟਿਞ੍ਞਾਤਨ੍ਤਿ ਦਸ੍ਸੇਤਿ. ਨਨੁ ਤਥਾ ਵਚਨਂ ਪਟਿਜਾਨਨਂ ਵਿਯ ਹੋਤੀਤਿ ਆਹ ‘‘ਅਪਿਚਾ’’ਤਿਆਦਿ.
੨੧੨. ਅਵਾਪੁਰਤਿ ਦ੍ਵਾਰਂ ਏਤੇਨਾਤਿ ਅਵਾਪੁਰਣਂ. ਪਠਮਸਙ੍ਗਹਤੋ ਪਚ੍ਛਾ ਦੇਸਿਤਤ੍ਤਾ ਦੁਤਿਯਸਙ੍ਗਹੇ ਸਙ੍ਗਿਤਂ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਬਾਕੁਲਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੫. ਦਨ੍ਤਭੂਮਿਸੁਤ੍ਤਵਣ੍ਣਨਾ
੨੧੩. ਫੁਸੇਯ੍ਯਾਤਿ ਞਾਣਫੁਸਨਾ ਨਾਮ ਅਧਿਪ੍ਪੇਤਾ, ਤਸ੍ਮਾ ਲਭੇਯ੍ਯਾਤਿ ਅਧਿਗਚ੍ਛੇਯ੍ਯ. ਏਵਂ ਪਟਿਪਨ੍ਨੋਤਿ, ‘‘ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ’’ਤਿ ਵੁਤ੍ਤਪ੍ਪਕਾਰੇਨ ਪਟਿਪਨ੍ਨੋ. ਅਜਾਨਨਕੋਟ੍ਠਾਸੇਯੇਵਾਤਿ ਅਵਧਾਰਣੇਨ ਅਤ੍ਤਨਿ ਕਤਂ ਦੋਸਾਰੋਪਨਂ ਨਿਵਤ੍ਤੇਤਿ.
੨੧੪. ਅਪ੍ਪਨਾਉਪਚਾਰਨ੍ਤਿ ਅਪ੍ਪਨਞ੍ਚੇਵ ਉਪਚਾਰਞ੍ਚ ਪਾਪੇਤ੍ਵਾ ਕਥੇਸੀਤਿ ਅਤ੍ਥਂ ਵਦਨ੍ਤਿ, ਅਪ੍ਪਨਾਸਹਿਤੋ ਪਨ ਉਪਚਾਰੋ ਅਪ੍ਪਨਾਉਪਚਾਰੋ, ਤਂ ਪਾਪੇਤ੍ਵਾ ਕਥੇਸੀਤਿ ਅਤ੍ਥੋ.
ਨਿਕ੍ਖਮਤੀਤਿ ਨਿਕ੍ਖਮੋ, ਅਵਗ੍ਗਾਹਕਾਮਤੋ ਨਿਕ੍ਖਮਨਂ ਨਿਕ੍ਖਮੋ ਏਵ ਨੇਕ੍ਖਮ੍ਮੋ, ਪਠਮਜ੍ਝਾਨਾਦਿ. ਸਤਿ ਕਿਲੇਸਕਾਮੇ ਅਤ੍ਤਨੋ ਉਪਹਾਰਂ ਉਪਚਾਰੇਤ੍ਵਾ ਅਸ੍ਸਾਦੇਤ੍ਵਾ ਪਰਿਭੁਞ੍ਜਤਿ ਨਾਮਾਤਿ ਆਹ – ‘‘ਦੁਵਿਧੇਪਿ ਕਾਮੇ ਪਰਿਭੁਞ੍ਜਮਾਨੋ’’ਤਿ. ਦੁਵਿਧੇਪੀਤਿ ਹੀਨਪਣੀਤਾਦਿਵਸੇਨ ਦੁਵਿਧੇ.
੨੧੫. ਕੂਟਾਕਾਰਨ੍ਤਿ ਗਾਲ਼੍ਹਸਾਠੇਯ੍ਯਂ ਅਪ੍ਪਤਿਰੂਪੇ ਠਾਨੇ ਖਨ੍ਧਗਤਪਾਤਨਾਦਿ. ਦਨ੍ਤਗਮਨਨ੍ਤਿ ਦਨ੍ਤੇਹਿ ਨਿਬ੍ਬਿਸੇਵਨੇਹਿ ਗਨ੍ਧਬ੍ਬਗਤਿਂ. ਪਤ੍ਤਬ੍ਬਂ ਭੂਮਿਨ੍ਤਿ ਸਮ੍ਮਾਕਿਰਿਯਾਯ ਲਦ੍ਧਬ੍ਬਸਮ੍ਪਤ੍ਤਿਂ.
੨੧੬. ਬ੍ਯਤਿਹਰਣਵਸੇਨ ਲਙ੍ਘਕਂ ਵਿਲਙ੍ਘਕਂ, ਅਞ੍ਞਮਞ੍ਞਹਤ੍ਥਗ੍ਗਹਣਂ. ਤੇਨਾਹ – ‘‘ਹਤ੍ਥੇਨ ਹਤ੍ਥਂ ਗਹੇਤ੍ਵਾ’’ਤਿ.
੨੧੭. ਗਹੇਤੁਂ ਸਮਤ੍ਥੋਤਿ ਗਣਿਕਾਰਹਤ੍ਥਿਨੀਹਿ ਉਪਲਾਪੇਤ੍ਵਾ ਅਰਞ੍ਞਹਤ੍ਥਿਂ ਵਚਨਵਸੇਨ ਗਹੇਤੁਂ ਸਮਤ੍ਥੋ. ਅਤਿਪਸ੍ਸਿਤ੍ਵਾ ਅਤਿਟ੍ਠਾਨਵਸੇਨ ਪਸ੍ਸਿਤ੍ਵਾ. ਏਤ੍ਥਗੇਧਾਤਿ ਏਤਸ੍ਮਿਂ ਅਰਞ੍ਞੇ ਨਾਗਵਨੇ ਪਵਤ੍ਤਗੇਧਾ. ਸੁਖਾਯਤੀਤਿ ਸੁਖਂ ਅਯਤਿ ਪਵਤ੍ਤੇਤਿ, ‘‘ਸੁਖਂ ਹਰਤੀ’’ਤਿ ਵਾ ਪਾਠੋ. ਡਿਣ੍ਡਿਮੋ ਆਨਕੋ. ਨਿਹਿਤਸਬ੍ਬਵਙ੍ਕਦੋਸੋਤਿ ਅਪਗਤਸਬ੍ਬਸਾਠੇਯ੍ਯਦੋਸੋ. ਅਪਨੀਤਕਸਾਵੋਤਿ ਅਪੇਤਸਾਰਮ੍ਭਕਸਾਵੋ.
੨੧੯. ਪਞ੍ਚਕਾਮਗੁਣਨਿਸ੍ਸਿਤਸੀਲਾਨਨ੍ਤਿ ਅਕੁਸਲਾਨਂ. ਗੇਹਸ੍ਸਿਤਸੀਲਾਨਨ੍ਤਿ ਵਾ ਵਟ੍ਟਸਨ੍ਨਿਸ੍ਸਿਤਸੀਲਾਨਂ.
੨੨੨. ਏਸ ਨਯੋ ਸਬ੍ਬਤ੍ਥਾਤਿ, ‘‘ਮਜ੍ਝਿਮੋ, ਦਹਰੋ’’ਤਿ ਆਗਤੇਸੁ ਉਪਮਾਵਾਰੇਸੁ, ‘‘ਥੇਰੋ’’ਤਿਆਦਿਨਾ ਆਗਤੇਸੁ ਉਪਮੇਯ੍ਯਵਾਰੇਸੂਤਿ ਪਞ੍ਚਸੁ ਸਂਕਿਲੇਸਪਕ੍ਖਿਯੇਸੁ ਵਾਰੇਸੁ ਏਸ ਯਥਾਵੁਤ੍ਤੋਵ ਨਯੋਤਿ ਵੇਦਿਤਬ੍ਬੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਦਨ੍ਤਭੂਮਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੬. ਭੂਮਿਜਸੁਤ੍ਤਵਣ੍ਣਨਾ
੨੨੩. ਆਸਞ੍ਚੇਪਿ ਕਰਿਤ੍ਵਾਤਿ, ‘‘ਇਮਿਨਾਹਂ ਬ੍ਰਹ੍ਮਚਰਿਯੇਨ ਦੇਵੋ ਵਾ ਭਵੇਯ੍ਯਂ ਦੇਵਞ੍ਞਤਰੋ ਵਾ, ਦੁਕ੍ਖਤੋ ਵਾ ਮੁਚ੍ਚੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਚੇਪਿ ਚਰਨ੍ਤਿ, ਅਭਬ੍ਬਾ ਫਲਸ੍ਸ ਅਧਿਗਮਾਯ ਤਣ੍ਹਾਯ ਬ੍ਰਹ੍ਮਚਰਿਯਸ੍ਸ ਵਿਦੂਸਿਤਤ੍ਤਾਤਿ ਅਧਿਪ੍ਪਾਯੋ. ਅਨਾਸਞ੍ਚੇਪਿ ਕਰਿਤ੍ਵਾਤਿ ਵੁਤ੍ਤਨਯੇਨ ਪਤ੍ਥਨਂ ਅਕਤ੍ਵਾ. ਅਭਬ੍ਬਾ ਫਲਸ੍ਸ ਅਧਿਗਮਾਯ ਅਨਿਯਮਿਤਭਾਵਤੋ. ਪਣਿਧਾਨਵਸੇਨ ਹਿ ਪੁਞ੍ਞਫਲਂ ਨਿਯਤਂ ਨਾਮ ਹੋਤਿ, ਤਦਭਾਵਤੋ ਕਤਂ ਪੁਞ੍ਞਂ ਨ ਲਭਤੀਤਿ ਅਧਿਪ੍ਪਾਯੋ. ਤਤਿਯਪਕ੍ਖੇ ਉਭਯਟ੍ਠਾਨੇਹਿ ਵੁਤ੍ਤਂ, ਚਤੁਤ੍ਥਪਕ੍ਖੋ ਸਮ੍ਮਾਵਤਾਰੋ ਇਤਿ ਚਤੁਕੋਟਿਕੋ ਪਞ੍ਹੋ ਜਾਲਵਸੇਨ ਆਹਟੋ, ਤਤ੍ਥ ਆਸਾ ਨਾਮ ਪਤ੍ਥਨਾ, ਮਿਚ੍ਛਾਗਾਹਸ੍ਮਿਂ ਸਤਿ ਨ ਵਿਪਚ੍ਚਤਿ, ਸਮ੍ਮਾਗਾਹਸ੍ਮਿਂ ਸਤਿ ਵਿਪਚ੍ਚਤਿ, ਉਭਯਥਾਪਿ ਉਭਯਾਪੇਕ੍ਖਾਨਾਮ, ਯੋ ਮਿਚ੍ਛਤ੍ਤਧਮ੍ਮੇ ਪੁਰਕ੍ਖਤ੍ਵਾ ਬ੍ਰਹ੍ਮਚਰਿਯਂ ਚਰਤਿ, ਤਸ੍ਸ ਯਥਾਧਿਪ੍ਪਾਯਫਲਂ ਸਮਿਜ੍ਝਤੀਤਿ ਨ ਵਤ੍ਤਬ੍ਬਂ ਅਯੋਨਿਸੋ ਬ੍ਰਹ੍ਮਚਰਿਯਸ੍ਸ ਚਿਣ੍ਣਤ੍ਤਾ; ਯੋ ਪਨ ਸਮ੍ਮਤ੍ਤਂ ਪੁਰਕ੍ਖਤ੍ਵਾ ਬ੍ਰਹ੍ਮਚਰਿਯਂ ਚਰਤਿ, ਤਸ੍ਸ ਯਥਾਧਿਪ੍ਪਾਯਂ ਬ੍ਰਹ੍ਮਚਰਿਯਫਲਂ ਨ ਸਮਿਜ੍ਝਤੀਤਿ ਨ ਵਤ੍ਤਬ੍ਬਂ ਯੋਨਿਸੋ ਬ੍ਰਹ੍ਮਚਰਿਯਸ੍ਸ ਚਿਣ੍ਣਤ੍ਤਾ. ਤੇਨ ਵੁਤ੍ਤਂ – ‘‘ਆਸਞ੍ਚੇਪਿ ਕਰਿਤ੍ਵਾ ਅਯੋਨਿਸੋ ਬ੍ਰਹ੍ਮਚਰਿਯਂ ਚਰਨ੍ਤੀ’’ਤਿਆਦਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਭੂਮਿਜਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੭. ਅਨੁਰੁਦ੍ਧਸੁਤ੍ਤਵਣ੍ਣਨਾ
੨੩੦. ਉਪਸਙ੍ਕਮਿਤ੍ਵਾ ਏਵਮਾਹਂਸੂਤਿ ਵੁਤ੍ਤਂ ਉਪਸਙ੍ਕਮਨਕਾਰਣਂ ਦਸ੍ਸੇਨ੍ਤੋ, ‘‘ਤਸ੍ਸ ਉਪਾਸਕਸ੍ਸ ਅਫਾਸੁਕਕਾਲੋ ਅਹੋਸੀ’’ਤਿ ਆਹ. ਅਵਿਰਾਧਿਤਨ੍ਤਿ ਅਵਿਰਜ੍ਝਨਕਂ. ਯਦਿ ਵਾ ਤੇ ਧਮ੍ਮਾ ਨਾਨਤ੍ਥਾ, ਯਦਿ ਵਾ ਏਕਤ੍ਥਾ, ਯਂ ਤਤ੍ਥ ਅਵਿਰਜ੍ਝਨਕਂ, ਤਂ ਤਂਯੇਵ ਪਟਿਭਾਤੂਤਿ ਯੋਜਨਾ. ਝਾਨਮੇਵਾਤਿ ਅਪ੍ਪਮਾਣਜ੍ਝਾਨਮੇਵ, ‘‘ਚੇਤੋਵਿਮੁਤ੍ਤੀ’’ਤਿ ਪਨ ਵੁਤ੍ਤਤ੍ਤਾ ਚਿਤ੍ਤੇਕਗ੍ਗਤਾਯੇਵ ਏਵਂ ਵੁਚ੍ਚਤੀਤਿ ਉਪਾਸਕਸ੍ਸ ਅਧਿਪ੍ਪਾਯੋ.
੨੩੧. ਯਾਵਤਾ ਮਜ੍ਝਨ੍ਹਿਕੇ ਕਾਲੇ ਛਾਯਾ ਫਰਤਿ, ਨਿਵਾਤੇ ਪਣ੍ਣਾਨਿ ਪਤਨ੍ਤਿ, ਏਤ੍ਤਾਵਤਾ ‘‘ਰੁਕ੍ਖਮੂਲ’’ਨ੍ਤਿ ਵੁਚ੍ਚਤੀਤਿ ਏਵਂ ਵੁਤ੍ਤਂ ਏਕਰੁਕ੍ਖਮੂਲਪ੍ਪਮਾਣਟ੍ਠਾਨਂ. ਕਸਿਣਨਿਮਿਤ੍ਤੇਨ ਓਤ੍ਥਰਿਤ੍ਵਾਤਿ ਕਸਿਣਾਰਮ੍ਮਣਂ ਝਾਨਂ ਸਮਾਪਜ੍ਜਨ੍ਤੋ ਤਸ੍ਮਿਂ ਕਸਿਣ…ਪੇ… ਵਿਹਰਤੀਤਿ ਵੁਤ੍ਤੋ. ਆਭੋਗੋ ਨਤ੍ਥਿ ਝਾਨਕ੍ਖਣੇ. ਕਾਮਂ ਸਮਾਪਤ੍ਤਿਕ੍ਖਣੇ ਆਭੋਗੋ ਨਤ੍ਥਿ ਤਤੋ ਪਨ ਪੁਬ੍ਬੇ ਵਾ ਸਿਯਾ ਸੋ ਆਭੋਗੋ, ਤਮ੍ਪਿ ਸਨ੍ਧਾਯ ਮਹਗ੍ਗਤਨ੍ਤਿ ਕੇਚਿ. ਇਦਾਨਿ ਤਾਸਂ ਚੇਤੋਵਿਮੁਤ੍ਤੀਨਂ ਸਤਿਪਿ ਕੇਨਚਿ ਵਿਸੇਸੇਨ ਅਭੇਦੇ ਵਿਸਯਾਦਿਤੋ ਲਬ੍ਭਮਾਨਭੇਦਂ ਦਸ੍ਸੇਤੁਂ, ‘‘ਏਤ੍ਥਾ’’ਤਿਆਦਿ ਵੁਤ੍ਤਂ. ਨਿਮਿਤ੍ਤਂ ਨ ਵਡ੍ਢਤਿ ਵਡ੍ਢੇਤਬ੍ਬਸ੍ਸ ਨਿਮਿਤ੍ਤਸ੍ਸੇਵ ਅਭਾਵਤੋ. ਪਥਵੀਕਸਿਣਾਦੀਨਂ ਵਿਯ ਆਕਾਸਭਾਵਨਾਯ ਉਗ੍ਘਾਟਨਂ ਨ ਜਾਯਤਿ. ਤਾਨਿ ਝਾਨਾਨੀਤਿ ਬ੍ਰਹ੍ਮਵਿਹਾਰਜ੍ਝਾਨਾਨਿ. ਚੁਦ੍ਦਸਵਿਧੇਨ ਪਰਿਦਮਨਾਭਾਵਤੋ ਅਭਿਞ੍ਞਾਨਂ ਪਾਦਕਾਨਿ ਨ ਹੋਨ੍ਤਿ. ਨਿਮਿਤ੍ਤੁਗ੍ਘਾਟਸ੍ਸੇਵ ਅਭਾਵਤੋ ਅਰੂਪਜ੍ਝਾਨਾਨਂ ਅਨਧਿਟ੍ਠਾਨਤਾਯ ਨਿਰੋਧਸ੍ਸ ਪਾਦਕਾਨਿ ਨ ਹੋਨ੍ਤੀਤਿ. ਕਮ੍ਮਵਟ੍ਟਭਾਵੇਨ ਕਿਲੇਸਵਟ੍ਟਵਿਪਾਕਵਟ੍ਟਾਨਂ ਤਿਣ੍ਣਂ ਵਟ੍ਟਾਨਂ ਪਚ੍ਚਯਭਾਵੋ ਵਟ੍ਟਪਾਦਕਤਾ. ਉਪਪਜ੍ਜਨਵਸੇਨੇਵ ਤਂ ਤਂ ਭਵਂ ਓਕ੍ਕਮਤਿ ਏਤੇਹੀਤਿ ਭਵੋਕ੍ਕਮਨਾਨਿ. ਦੁਤਿਯਨਯਸ੍ਸ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਉਗ੍ਘਾਟਨਸ੍ਸ ਲਬ੍ਭਨਤੋ ਅਰੂਪਜ੍ਝਾਨੋਪਰਿ ਸਮਤਿਕ੍ਕਮੋ ਹੋਤੀਤਿ ਅਯਮੇਵ ਵਿਸੇਸੋ. ਏਵਨ੍ਤਿ ਯਥਾਵੁਤ੍ਤੇਨ ਨਿਮਿਤ੍ਤਾਵਡ੍ਢਨਨਿਮਿਤ੍ਤਵਡ੍ਢਨਾਦਿਪ੍ਪਕਾਰੇਨ. ਨਾਨਤ੍ਥਾਤਿ ਨਾਨਾਸਭਾਵਾ. ਏਵਨ੍ਤਿ ਅਪ੍ਪਮਾਣਮਹਗ੍ਗਤਸਦ੍ਦਵਚਨੀਯਤਾਯ ਨਾਨਾਬ੍ਯਞ੍ਜਨਾ. ਕਾਮਞ੍ਚੇਤ੍ਥ ਅਪ੍ਪਮਾਣਸਮਾਪਤ੍ਤਿਤੋਪਿ ਨੀਹਰਿਤ੍ਵਾ ਵਕ੍ਖਮਾਨਭਵੂਪਪਤ੍ਤਿਕਾਰਣਂ ਦਸ੍ਸੇਤੁਂ ਸਕ੍ਕਾ, ਅਟ੍ਠਕਥਾਯਂ ਪਨ ਕਸਿਣਝਾਨਤੋਵ ਨੀਹਰਿਤ੍ਵਾ ਯੋਜਨਾ ਕਤਾਤਿ ਤਥਾ ਵੁਤ੍ਤਂ. ਅਥ ਵਾ ਮਹਗ੍ਗਤਗਹਣੇਨੇਤ੍ਥ ਅਪ੍ਪਮਾਣਾਤਿ ਵੁਤ੍ਤਬ੍ਰਹ੍ਮਵਿਹਾਰਾਨਮ੍ਪਿ ਸਙ੍ਗਹੋ ਵੇਦਿਤਬ੍ਬੋ ਤਸ੍ਸਾ ਸਮਞ੍ਞਾਯ ਉਭਯੇਸਮ੍ਪਿ ਸਾਧਾਰਣਭਾਵਤੋ.
੨੩੨. ਏਵਂ ਵੁਤ੍ਤੋਤਿ ਅਸਤਿਪਿ ਤਥਾਰੂਪੇ ਆਭੋਗੇ ‘‘ਪਰਿਤ੍ਤਾਭਾਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ ਵਿਹਰਤੀ’’ਤਿ ਵੁਤ੍ਤੋ. ਅਪ੍ਪਮਾਣਂ ਕਤ੍ਵਾ ਕਸਿਣਂ ਵਡ੍ਢੇਨ੍ਤਸ੍ਸ ਕਸਿਣਵਡ੍ਢਨਵਸੇਨ ਬਹੁਲੀਕਾਰਸਮ੍ਭਵਤੋ ਸਿਯਾ ਝਾਨਸ੍ਸ ਬਲਵਤਰਤਾ, ਤਦਭਾਵੇ ਚ ਦੁਬ੍ਬਲਤਾ, ਆਚਿਣ੍ਣਵਸਿਤਾਯ ਪਨ ਪਚ੍ਚਨੀਕਧਮ੍ਮਾਨਂ ਸਮ੍ਮਾ ਅਪਰਿਸੋਧਨੇ ਵਤ੍ਤਬ੍ਬਮੇਵ ਨਤ੍ਥੀਤਿ ਪਞ੍ਚਹਾਕਾਰੇਹਿ ਝਾਨਸ੍ਸ ਅਪ੍ਪਗੁਣਤਂ ਦਸ੍ਸੇਨ੍ਤੋ, ‘‘ਸੁਪ੍ਪਮਤ੍ਤੇ ਵਾ’’ਤਿਆਦਿਮਾਹ. ਝਾਨਸ੍ਸ ਅਪ੍ਪਾਨੁਭਾਵਤਾਯ ਏਵ ਤਨ੍ਨਿਮਿਤ੍ਤਾ ਪਭਾਪਿ ਅਪ੍ਪਤਰਾ ਅਪਰਿਸੁਦ੍ਧਾਵ ਹੋਤੀਤਿ ਆਹ – ‘‘ਵਣ੍ਣੋ…ਪੇ… ਸਂਕਿਲਿਟ੍ਠੋ ਚਾ’’ਤਿ. ਦੁਤਿਯਨਯੋ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬੋ. ਤਤ੍ਥਾਪਿ ਕਸਿਣਸ੍ਸ ਪਰਿਤ੍ਤਭਾਵੇਨ ਵਣ੍ਣਸ੍ਸ ਪਰਿਤ੍ਤਤਾ, ਪਰਿਤ੍ਤਾਰਮ੍ਮਣਾਯ ਅਨੁਰੂਪਤਾਯ ਵਾ ਨਿਮਿਤ੍ਤਂ ਪਭਾਮਣ੍ਡਲਕਮ੍ਪਿ ਪਰਿਤ੍ਤਮੇਵ ਸਿਯਾਤਿ ਅਧਿਪ੍ਪਾਯੋ. ਵਿਪੁਲਪਰਿਕਮ੍ਮਨ੍ਤਿ ਵਿਪੁਲਭਾਵੇਨ ਪਰਿਕਮ੍ਮਂ. ਸੇਸਂ ਤਤਿਯਚਤੁਤ੍ਥਨਯੇਸੁ ਵਤ੍ਤਬ੍ਬਂ ਪਠਮਦੁਤਿਯਨਯੇਸੁ ਵੁਤ੍ਤਸਦਿਸਮੇਵ.
ਵਣ੍ਣਨਾਨਤ੍ਤਨ੍ਤਿ ਯਦਿ ਪੀਤਂ ਯਦਿ ਲੋਹਿਤਂ ਯਦਿ ਵਾ ਓਦਾਤਨ੍ਤਿ ਸਰੀਰਵਣ੍ਣਨਾਨਤ੍ਤਂ. ਆਭਾਨਾਨਤ੍ਤਨ੍ਤਿ ਪਰਿਤ੍ਤਵਿਪੁਲਤਾਵਸੇਨ ਪਭਾਯ ਨਾਨਤ੍ਤਂ. ਅਚ੍ਚਿਨਾਨਤ੍ਤਨ੍ਤਿ ਤੇਜੋਧਾਤੁਸ੍ਸ ਦੀਘਾਦਿਵਸੇਨ ਵੇਮਤ੍ਤਤਾ. ਅਭਿਨਿਵਿਸਨ੍ਤੀਤਿ ਅਭਿਰਤਿਵਸੇਨ ਨਿਵਿਸਨ੍ਤਿ ਨਿਸੀਦਨ੍ਤਿ ਤਿਟ੍ਠਨ੍ਤਿ. ਤੇਨਾਹ ‘‘ਵਸਨ੍ਤੀ’’ਤਿ.
੨੩੪. ਆਭਨ੍ਤਿ ਦਿਬ੍ਬਨ੍ਤੀਤਿ ਆਭਾਤਿ ਆਹ ‘‘ਆਭਾਸਮ੍ਪਨ੍ਨਾ’’ਤਿ. ਤਦਙ੍ਗੇਨਾਤਿ ਵਾ ਤਸ੍ਸਾ ਪਰਿਤ੍ਤਤਾਯ ਅਪ੍ਪਮਾਣਤਾਯ ਚ ਆਭਾਕਾਰਣਂ, ਤਂ ਪਨ ਅਤ੍ਥਤੋ ਭਵੂਪਪਤ੍ਤਿਕਾਰਣਮੇਵਾਤਿ ਆਹ – ‘‘ਤਸ੍ਸਾ ਭਵੂਪਪਤ੍ਤਿਯਾ ਅਙ੍ਗੇਨਾ’’ਤਿ. ਕਾਯਾਲਸਿਯਭਾਵੋ ਤਨ੍ਦੀਆਦੀਨਂ ਹੇਤੁਭੂਤਾ ਕਾਯਸ੍ਸ ਵਿਤ੍ਥਾਯਿਤਤਾ.
੨੩੫. ਪਾਰਮਿਯੋਤਿ ਮਹਾਸਾਵਕਸਂਵਤ੍ਤਨਿਕਾ ਸਾਵਕਪਾਰਮਿਯੋ ਪੂਰੇਨ੍ਤੋ. ਬ੍ਰਹ੍ਮਲੋਕੇਤਿ ਬ੍ਰਹ੍ਮਤ੍ਤਭਾਵੇ, ਬ੍ਰਹ੍ਮਲੋਕੇ ਵਾ ਉਪ੍ਪਤ੍ਤਿਂ ਪਟਿਲਭਿ, ਵੁਤ੍ਤਮ੍ਪਿ ਚੇਤਂ ਥੇਰਗਾਥਾਸੁ. ਅਵੋਕਿਣ੍ਣਨ੍ਤਿ ਅਞ੍ਞੇਹਿ ਅਸਮ੍ਮਿਸ੍ਸਨ੍ਤਿ ਅਤ੍ਥੋ. ਪੁਬ੍ਬੇ ਸਞ੍ਚਰਿਤਨ੍ਤਿ ਅਤੀਤਭਵੇਸੁ ਜਾਤਿਵਸੇਨ ਸਞ੍ਚਰਣਂ ਮਮ, ਸਞ੍ਚਰਿਤਨ੍ਤਿ ਤਂ ਮਮਸ੍ਸਾਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਅਨੁਰੁਦ੍ਧਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੮. ਉਪਕ੍ਕਿਲੇਸਸੁਤ੍ਤਵਣ੍ਣਨਾ
੨੩੬. ਤਸ੍ਮਾਤਿ ਅਤ੍ਥਕਾਮਤ੍ਤਾ ਏਵਮਾਹ, ਨ ਭਗਵਤੋ ਵਚਨਂ ਅਨਾਦਿਯਨ੍ਤੋ. ਯੇ ਪਨ ਤਦਾ ਸਤ੍ਥੁਵਚਨਂ ਨ ਗਣ੍ਹਿਂਸੁ, ਤੇ ਕਿਞ੍ਚਿ ਅਵਤ੍ਵਾ ਤੁਣ੍ਹੀਭੂਤਾ ਮਙ੍ਕੁਭੂਤਾ ਅਟ੍ਠਂਸੁ, ਤਸ੍ਮਾ ਉਭਯੇਸਮ੍ਪਿ ਸਤ੍ਥਰਿ ਅਗਾਰਵਪਟਿਪਤ੍ਤਿ ਨਾਹੋਸਿ.
ਯੇਨਪਿ ਜਨੇਨ ਨ ਦਿਟ੍ਠੋਤਿ ਯੇਨ ਉਭਯਜਨੇਨ ਅਞ੍ਞਵਿਹਿਤਤਾਯ ਕੁਡ੍ਡਕਵਾਟਾਦਿਅਨ੍ਤਰਿਕਤਾਯ ਵਾ ਨ ਦਿਟ੍ਠੋ. ਦਮਨਤ੍ਥਨ੍ਤਿ ਤੇਹਿ ਉਪਾਸਕੇਹਿ ਨਿਮ੍ਮਦਭਾਵਂ ਆਪਾਦਿਤਾਨਂ ਤੇਸਂ ਭਿਕ੍ਖੂਨਂ ਦਮਨਤ੍ਥਂ. ਠਪਯਿਂਸੂਤਿ ਯੋ ਇਮੇਸਂ ਭਿਕ੍ਖੂਨਂ ਦੇਤਿ, ਤਸ੍ਸ ਸਤਂ ਦਣ੍ਡੋਤਿ, ਸਹਸ੍ਸਨ੍ਤਿ ਚ ਵਦਨ੍ਤਿ.
੨੩੭. ਵਗ੍ਗਭਾਵੇਨੇਵ (ਸਾਰਤ੍ਥ. ਟੀ. ਮਹਾਵਗ੍ਗੋ ੩.੪੬੪) ਨਾਨਾਸਦ੍ਦੋ ਅਸ੍ਸਾਤਿ ਪੁਥੁਸਦ੍ਦੋ. ਸਮਜਨੋਤਿ ਭਣ੍ਡਨੇ ਸਮਜ੍ਝਾਸਯੋ ਜਨੋ. ਬਾਲਲਕ੍ਖਣੇ ਠਿਤੋਪਿ ‘‘ਅਹਂ ਬਾਲੋ’’ਤਿ ਨ ਮਞ੍ਞਤਿ. ਭਿਯ੍ਯੋ ਚਾਤਿ ਅਤ੍ਤਨੋ ਬਾਲਭਾਵਸ੍ਸ ਅਜਾਨਨਤੋਪਿ ਭਿਯ੍ਯੋ ਚ ਭਣ੍ਡਨਸ੍ਸ ਉਪਰਿ ਫੋਟੋ ਵਿਯ ਸਙ੍ਘਭੇਦਸ੍ਸ ਅਤ੍ਤਨੋ ਕਾਰਣਭਾਵਮ੍ਪਿ ਉਪ੍ਪਜ੍ਜਮਾਨਂ ਨ ਮਞ੍ਞਿ ਨਞ੍ਞਾਸਿ.
ਕਲਹਵਸੇਨ ਪਵਤ੍ਤਵਾਚਾਯੇਵ ਗੋਚਰੋ ਏਤੇਸਨ੍ਤਿ ਵਾਚਾਗੋਚਰਾ ਹੁਤ੍ਵਾ. ਮੁਖਾਯਾਮਨ੍ਤਿ ਵਿਵਾਦਵਸੇਨ ਮੁਖਂ ਆਯਮੇਤ੍ਵਾ ਭਾਣਿਨੋ. ਨ ਤਂ ਜਾਨਨ੍ਤੀਤਿ ਤਂ ਕਲਹਂ ਨ ਜਾਨਨ੍ਤਿ. ਕਲਹਂ ਕਰੋਨ੍ਤੋ ਚ ਤਂ ਨ ਜਾਨਨ੍ਤੋ ਨਾਮ ਨਤ੍ਥਿ. ਯਥਾ ਪਨ ਨ ਜਾਨਨ੍ਤਿ, ਤਂ ਦਸ੍ਸੇਤੁਂ ਆਹ – ‘‘ਏਵਂ ਸਾਦੀਨਵੋ ਅਯ’’ਨ੍ਤਿ. ਅਯਂ ਕਲਹੋ ਨਾਮ ਅਤ੍ਤਨੋ ਪਰੇਸਞ੍ਚ ਅਤ੍ਥਜਾਪਨਤੋ ਅਨਤ੍ਥੁਪ੍ਪਾਦਨਤੋ ਦਿਟ੍ਠੇਵ ਧਮ੍ਮੇ ਸਮ੍ਪਰਾਯੇ ਚ ਸਾਦੀਨਵੋ, ਸਦੋਸੋਤਿ ਅਤ੍ਥੋ.
ਉਪਨਯ੍ਹਨ੍ਤੀਤਿ ਉਪਨਾਹਵਸੇਨ ਅਨੁਬਨ੍ਧਨ੍ਤਿ. ਪੋਰਾਣੋਤਿ ਪੁਰਿਮੇਹਿ ਬੁਦ੍ਧਾਦੀਹਿ ਆਚਿਣ੍ਣਸਮਾਚਿਣ੍ਣਤਾਯ ਪੁਰਾਤਨੋ.
ਨ ਜਾਨਨ੍ਤੀਤਿ ਅਨਿਚ੍ਚਸਞ੍ਞਂ ਨ ਪਚ੍ਚੁਪਟ੍ਠਾਪੇਨ੍ਤਿ.
ਤਥਾ ਪਵਤ੍ਤਵੇਰਾਨਨ੍ਤਿ ਅਟ੍ਠਿਛਿਨ੍ਨਾਦਿਭਾਵਂ ਨਿਸ੍ਸਾਯ ਉਪਨਯਵਸੇਨ ਚਿਰਕਾਲਂ ਪਵਤ੍ਤਵੇਰਾਨਂ.
ਬਾਲਸਹਾਯਤਾਯ ਇਮੇ ਭਿਕ੍ਖੂ ਕਲਹਪਸੁਤਾ, ਪਣ੍ਡਿਤਸਹਾਯਾਨਂ ਪਨ ਇਦਂ ਨ ਸਿਯਾਤਿ ਪਣ੍ਡਿਤਸਹਾਯਸ੍ਸ ਬਾਲਸਹਾਯਸ੍ਸ ਚ ਵਣ੍ਣਾਵਣ੍ਣਦੀਪਨਤ੍ਥਂ ਵੁਤ੍ਤਾ. ਸੀਹਬ੍ਯਗ੍ਘਾਦਿਕੇ ਪਾਕਟਪਰਿਸ੍ਸਯੇ ਰਾਗਦੋਸਾਦਿਕੇ ਪਟਿਚ੍ਛਨ੍ਨਪਰਿਸ੍ਸਯੇ ਚ ਅਭਿਭਵਿਤ੍ਵਾ.
ਮਾਤਙ੍ਗੋ ਅਰਞ੍ਞੇ ਮਾਤਙ੍ਗਰਞ੍ਞੇਤਿ ਸਰਲੋਪੇਨ ਸਨ੍ਧਿ. ਮਾਤਙ੍ਗਸਦ੍ਦੇਨੇਵ ਹਤ੍ਥਿਭਾਵਸ੍ਸ ਵੁਤ੍ਤਤ੍ਤਾ ਨਾਗਵਚਨਂ ਤਸ੍ਸ ਮਹਤ੍ਤਵਿਭਾਵਨਤ੍ਥਨ੍ਤਿ ਆਹ – ‘‘ਨਾਗੋਤਿ ਮਹਨ੍ਤਾਧਿਵਚਨਮੇਤ’’ਨ੍ਤਿ. ਮਹਨ੍ਤਪਰਿਯਾਯੋਪਿ ਹਿ ਨਾਗ-ਸਦ੍ਦੋ ਹੋਤਿ ‘‘ਏਵਂ ਨਾਗਸ੍ਸ ਨਾਗੇਨ, ਈਸਾਦਨ੍ਤਸ੍ਸ ਹਤ੍ਥਿਨੋ’’ਤਿਆਦੀਸੁ (ਉਦਾ. ੨੫; ਮਹਾਵ. ੪੬੭).
੨੩੮. ਕਿਰਸਦ੍ਦੋ ਅਨੁਸ੍ਸਵਸੂਚਨਤ੍ਥੋ ਨਿਪਾਤੋ. ਤੇਨ ਅਯਮੇਤ੍ਥ ਸੁਤਿਪਰਮ੍ਪਰਾਤਿ ਦਸ੍ਸੇਤਿ. ਭਗਵਤਾ ਹਿ ਸੋ ਆਦੀਨਵੋ ਪਗੇਵ ਪਰਿਞ੍ਞਾਤੋ, ਨ ਤੇਨ ਸਤ੍ਥਾ ਨਿਬ੍ਬਿਣ੍ਣੋ ਹੋਤਿ; ਤਸ੍ਮਿਂ ਪਨ ਅਨ੍ਤੋਵਸ੍ਸੇ ਕੇਚਿ ਬੁਦ੍ਧਵੇਨੇਯ੍ਯਾ ਨਾਹੇਸੁਂ; ਤੇਨ ਅਞ੍ਞਤ੍ਥ ਗਮਨਂ ਤੇਸਂ ਭਿਕ੍ਖੂਨਂ ਦਮਨੁਪਾਯੋਤਿ ਪਾਲਿਲੇਯ੍ਯਕਂ ਉਦ੍ਦਿਸ੍ਸ ਗਚ੍ਛਨ੍ਤੋ ਏਕਵਿਹਾਰਿਂ ਆਯਸ੍ਮਨ੍ਤਂ ਭਗੁਂ, ਸਮਗ੍ਗਵਾਸਂ ਵਸਨ੍ਤੇ ਚ ਅਨੁਰੁਦ੍ਧਤ੍ਥੇਰਾਦਿਕੇ ਸਮ੍ਪਹਂਸੇਤੁਂ ਅਨੁਰੁਦ੍ਧਤ੍ਥੇਰਸ੍ਸ ਚ. ਇਮਂ ਉਪਕ੍ਕਿਲੇਸੋਵਾਦਂ ਦਾਤੁਂ ਤਤ੍ਥ ਗਤੋ, ਤਸ੍ਮਾ ਕਲਹਕਾਰਕੇ ਕਿਰਸ੍ਸਾਤਿ ਏਤ੍ਥਾਪਿ ਕਿਰਸਦ੍ਦਗ੍ਗਹਣੇ ਏਸੇਵ ਨਯੋ. ਵੁਤ੍ਤਨਯਮੇਵ ਗੋਸਿਙ੍ਗਸਾਲਸੁਤ੍ਤੇ (ਮ. ਨਿ. ੧.੩੨੫ ਆਦਯੋ).
੨੪੧. ‘‘ਯਥਾ ਕਥਂ ਪਨਾ’’ਤਿ ਵੁਤ੍ਤਪੁਚ੍ਛਾਨਂ ਪਚ੍ਛਿਮਭਾਵਤੋ ‘‘ਅਤ੍ਥਿ ਪਨ ਵੋਤਿ ਪਚ੍ਛਿਮਪੁਚ੍ਛਾਯਾ’’ਤਿ ਵੁਤ੍ਤਂ, ਨ ਪੁਨ ‘‘ਅਤ੍ਥਿ ਪਨ ਵੋ’’ਤਿ ਪਵਤ੍ਤਨਸ੍ਸ ਪੁਚ੍ਛਨਸ੍ਸ ਅਤ੍ਥਿਭਾਵਤੋ. ਸੋ ਪਨ ਲੋਕੁਤ੍ਤਰਧਮ੍ਮੋ. ਥੇਰਾਨਨ੍ਤਿ ਅਨੁਰੁਦ੍ਧਤ੍ਥੇਰਾਦੀਨਂ ਨਤ੍ਥਿ. ਪਰਿਕਮ੍ਮੋਭਾਸਂ ਪੁਚ੍ਛਤੀਤਿ ਦਿਬ੍ਬਚਕ੍ਖੁਞਾਣੇ ਕਤਾਧਿਕਾਰਤ੍ਤਾ ਤਸ੍ਸ ਉਪ੍ਪਾਦਨਤ੍ਥਂ ਪਰਿਕਮ੍ਮੋਭਾਸਂ ਪੁਚ੍ਛਤਿ. ਪਰਿਕਮ੍ਮੋਭਾਸਨ੍ਤਿ ਪਰਿਕਮ੍ਮਸਮਾਧਿਨਿਬ੍ਬਤ੍ਤਂ ਓਭਾਸਂ, ਉਪਚਾਰਜ੍ਝਾਨਸਞ੍ਜਨਿਤਂ ਓਭਾਸਨ੍ਤਿ ਅਤ੍ਥੋ. ਚਤੁਤ੍ਥਜ੍ਝਾਨਲਾਭੀ ਹਿ ਦਿਬ੍ਬਚਕ੍ਖੁਪਰਿਕਮ੍ਮਤ੍ਥਂ ਓਭਾਸਕਸਿਣਂ ਭਾਵੇਤ੍ਵਾ ਉਪਚਾਰੇ ਠਪਿਤੋ ਸਮਾਧਿ ਪਰਿਕਮ੍ਮਸਮਾਧਿ, ਤਤ੍ਥ ਓਭਾਸੋ ਪਰਿਕਮ੍ਮੋਭਾਸੋਤਿ ਵੁਤ੍ਤੋ. ਤਂ ਸਨ੍ਧਾਯਾਹ – ‘‘ਓਭਾਸਞ੍ਚੇਵ ਸਞ੍ਜਾਨਾਮਾਤਿ ਪਰਿਕਮ੍ਮੋਭਾਸਂ ਸਞ੍ਜਾਨਾਮਾ’’ਤਿ. ਯਤ੍ਤਕੇ ਹਿ ਠਾਨੇ ਦਿਬ੍ਬਚਕ੍ਖੁਨਾ ਰੂਪਗਤਂ ਦਟ੍ਠੁਕਾਮੋ, ਤਤ੍ਤਕਂ ਠਾਨਂ ਓਭਾਸਕਸਿਣਂ ਫਰਿਤ੍ਵਾ ਠਿਤੋ. ਤਂ ਓਭਾਸਂ ਤਤ੍ਥ ਚ ਰੂਪਗਤਂ ਦਿਬ੍ਬਚਕ੍ਖੁਞਾਣੇਨ ਪਸ੍ਸਤਿ, ਥੇਰਾ ਚ ਤਥਾ ਪਟਿਪਜ੍ਜਿਂਸੁ. ਤੇਨ ਵੁਤ੍ਤਂ – ‘‘ਓਭਾਸਞ੍ਚੇਵ ਸਞ੍ਜਾਨਾਮ ਦਸ੍ਸਨਞ੍ਚ ਰੂਪਾਨ’’ਨ੍ਤਿ. ਯਸ੍ਮਾ ਪਨ ਤੇਸਂ ਰੂਪਗਤਂ ਪਸ੍ਸਨ੍ਤਾਨਂ ਪਰਿਕਮ੍ਮਵਾਰੋ ਅਤਿਕ੍ਕਮਿ, ਤਤੋ ਓਭਾਸੋ ਅਨ੍ਤਰਧਾਯਿ, ਤਸ੍ਮਿਂ ਅਨ੍ਤਰਹਿਤੇ ਰੂਪਗਤਮ੍ਪਿ ਨ ਪਞ੍ਞਾਯਤਿ. ਪਰਿਕਮ੍ਮਨ੍ਤਿ ਹਿ ਯਥਾਵੁਤ੍ਤਕਸਿਣਾਰਮ੍ਮਣਂ ਉਪਚਾਰਜ੍ਝਾਨਂ, ਰੂਪਗਤਂ ਪਸ੍ਸਨ੍ਤਾਨਂ ਕਸਿਣੋਭਾਸਵਸੇਨ ਰੂਪਗਤਦਸ੍ਸਨਂ, ਕਸਿਣੋਭਾਸੋ ਚ ਪਰਿਕਮ੍ਮਵਸੇਨਾਤਿ ਤਦੁਭਯਮ੍ਪਿ ਪਰਿਕਮ੍ਮਸ੍ਸ ਅਪ੍ਪਵਤ੍ਤਿਯਾ ਨਾਹੋਸਿ, ਤਯਿਦਂ ਕਾਰਣਂ ਆਦਿਕਮ੍ਮਿਕਭਾਵਤੋ ਥੇਰਾ ਨ ਮਞ੍ਞਿਂਸੁ, ਤਸ੍ਮਾ ਵੁਤ੍ਤਂ ‘‘ਨਪ੍ਪਟਿਵਿਜ੍ਝਾਮਾ’’ਤਿ.
ਨਿਮਿਤ੍ਤਂ ਪਟਿਵਿਜ੍ਝਿਤਬ੍ਬਨ੍ਤਿ ਕਾਰਣਂ ਪਚ੍ਚਕ੍ਖਤੋ ਦਸ੍ਸੇਤ੍ਵਾ ਸੁਵਿਸੁਦ੍ਧਦਿਬ੍ਬਚਕ੍ਖੁਞਾਣੇ ਥੇਰਂ ਪਤਿਟ੍ਠਾਪੇਤੁਕਾਮੋ ਸਤ੍ਥਾ ਵਦਤਿ. ਕਿਂ ਨ ਆਲ਼ੁਲੇਸ੍ਸਨ੍ਤੀਤਿ ਕਿਂ ਨ ਬ੍ਯਾਮੋਹੇਸ੍ਸਨ੍ਤਿ, ਬ੍ਯਾਮੋਹੇਸ੍ਸਨ੍ਤਿ ਏਵਾਤਿ ਅਤ੍ਥੋ. ਵਿਚਿਕਿਚ੍ਛਾ ਉਦਪਾਦੀਤਿ ਦਿਬ੍ਬਚਕ੍ਖੁਨੋ ਯਥਾਉਪਟ੍ਠਿਤੇਸੁ ਰੂਪਗਤੇਸੁ ਅਪੁਬ੍ਬਤਾਯ, ‘‘ਇਦਂ ਨੁ ਖੋ ਰੂਪਗਤਂ ਕਿਂ, ਇਦਂ ਨੁ ਖੋ ਕਿ’’ਨ੍ਤਿ ਮਗ੍ਗੇਨ ਅਸਮੁਚ੍ਛਿਨ੍ਨਤ੍ਤਾ ਵਿਚਿਕਿਚ੍ਛਾ ਸਂਸਯੋ ਉਪ੍ਪਜ੍ਜਿ. ਸਮਾਧਿ ਚਵੀਤਿ ਵਿਚਿਕਿਚ੍ਛਾਯ ਉਪ੍ਪਨ੍ਨਤ੍ਤਾ ਪਰਿਕਮ੍ਮਸਮਾਧਿ ਵਿਗਚ੍ਛਿ. ਤਤੋ ਏਵ ਹਿ ਪਰਿਕਮ੍ਮੋਭਾਸੋਪਿ ਅਨ੍ਤਰਧਾਯਿ, ਦਿਬ੍ਬਚਕ੍ਖੁਨਾਪਿ ਰੂਪਂ ਨ ਪਸ੍ਸਿ. ਨ ਮਨਸਿ ਕਰਿਸ੍ਸਾਮੀਤਿ ਮਨਸਿਕਾਰਵਸੇਨ ਮੇ ਰੂਪਾਨਿ ਉਪਟ੍ਠਹਿਂਸੁ, ਰੂਪਾਨਿ ਪਸ੍ਸਤੋ ਵਿਚਿਕਿਚ੍ਛਾ ਉਪ੍ਪਜ੍ਜਤਿ, ਤਸ੍ਮਾ ਇਦਾਨਿ ਕਿਞ੍ਚਿ ਨ ਮਨਸਿ ਕਰਿਸ੍ਸਾਮੀਤਿ ਤੁਣ੍ਹੀ ਅਹੋਸਿ ਤਂ ਪਨ ਤੁਣ੍ਹੀਭਾਵਪ੍ਪਤ੍ਤਿਂ ਸਨ੍ਧਾਯਾਹ ‘‘ਅਮਨਸਿਕਾਰੋ ਉਦਪਾਦੀ’’ਤਿ.
ਤਥਾਭੂਤਸ੍ਸ ਅਮਨਸਿਕਾਰਸ੍ਸ ਅਭਾਵਂ ਆਗਮ੍ਮ ਉਪ੍ਪਿਲਂ ਉਦਪਾਦਿ. ਵੀਰਿਯਂ ਗਾਲ਼੍ਹਂ ਪਗ੍ਗਹਿਤਨ੍ਤਿ ਥਿਨਮਿਦ੍ਧਛਮ੍ਭਿਤਤ੍ਤਾਨਂ ਵੂਪਸਮਨਤ੍ਥਂ ਅਚ੍ਚਾਰਦ੍ਧਵੀਰਿਯਂ ਅਹੋਸਿ, ਤੇਨ ਚਿਤ੍ਤੇ ਸਮਾਧਿਦੂਸਿਕਾ ਗੇਹਸ੍ਸਿਤਾ ਬਲਵਪੀਤਿ ਉਪ੍ਪਨ੍ਨਾ. ਤੇਨਾਹ ‘‘ਉਪ੍ਪਿਲਂ ਉਪ੍ਪਨ੍ਨ’’ਨ੍ਤਿ. ਤਤੋਤਿ ਸਿਥਿਲਵੀਰਿਯਤ੍ਤਾ. ਪਤਮੇਯ੍ਯਾਤਿ ਅਤਿਵਿਯ ਖਿਨ੍ਨਂ ਭਵੇਯ੍ਯ. ਤਂ ਮਮਾਤਿ ਪਤ੍ਥਨਾਅਭਿਭਵਨੀਯਮਨਸੀਸੇਨ ਜਪ੍ਪੇਤੀਤਿ ਅਭਿਜਪ੍ਪਾ, ਤਣ੍ਹਾ. ਨਾਨਤ੍ਤਾ ਨਾਨਾਸਭਾਵਾ ਸਞ੍ਞਾ ਨਾਨਤ੍ਤਸਞ੍ਞਾ. ਅਤਿਵਿਯ ਉਪਰਿ ਕਤ੍ਵਾ ਨਿਜ੍ਝਾਨਂ ਪੇਕ੍ਖਨਂ ਅਤਿਨਿਜ੍ਝਾਯਿਤਤ੍ਤਂ.
੨੪੩. ਪਰਿਕਮ੍ਮੋਭਾਸਮੇਵਾਤਿ ਪਰਿਕਮ੍ਮਸਮੁਟ੍ਠਿਤਂ ਓਭਾਸਮੇਵ. ਨ ਚ ਰੂਪਾਨਿ ਪਸ੍ਸਾਮੀਤਿ ਓਭਾਸਮਨਸਿਕਾਰਪਸੁਤਤਾਯ ਦਿਬ੍ਬਚਕ੍ਖੁਨਾ ਰੂਪਾਨਿ ਨ ਪਸ੍ਸਾਮਿ. ਵਿਸਯਰੂਪਮੇਵਾਤਿ ਤੇਨ ਫਰਿਤ੍ਵਾ ਠਿਤਟ੍ਠਾਨੇਵ ਦਿਬ੍ਬਚਕ੍ਖੁਨੋ ਵਿਸਯਭੂਤਂ ਰੂਪਗਤਮੇਵ ਮਨਸਿ ਕਰੋਮਿ.
ਕਸਿਣਰੂਪਾਨਂ ਵਸੇਨੇਤ੍ਥ ਓਭਾਸਸ੍ਸ ਪਰਿਤ੍ਤਤਾਤਿ ਆਹ ‘‘ਪਰਿਤ੍ਤਟ੍ਠਾਨੇ ਓਭਾਸ’’ਨ੍ਤਿ. ਪਰਿਤ੍ਤਾਨਿ ਰੂਪਾਨੀਤਿ ਕਤਿਪਯਾਨਿ, ਸਾ ਚ ਨੇਸਂ ਪਰਿਤ੍ਤਤਾ ਠਾਨਵਸੇਨੇਵਾਤਿ ਆਹ ‘‘ਪਰਿਤ੍ਤਕਟ੍ਠਾਨੇ ਰੂਪਾਨੀ’’ਤਿ. ‘‘ਅਪ੍ਪਮਾਣਞ੍ਚੇਵਾ’’ਤਿਆਦਿਨਾ ਵੁਤ੍ਤੋ ਦੁਤਿਯਵਾਰੋ. ਓਭਾਸਪਰਿਤ੍ਤਤਂ ਸਨ੍ਧਾਯ ਪਰਿਕਮ੍ਮਸਮਾਧਿ ‘‘ਪਰਿਤ੍ਤੋ’’ਤਿ ਵੁਤ੍ਤੋ ਤਸ੍ਸੇਵ ਓਭਾਸਸ੍ਸ ਅਪ੍ਪਮਾਣਤਾਯ ਅਪ੍ਪਮਾਣਸਮਾਧੀਤਿ ਵਚਨਤੋ. ਤਸ੍ਮਿਂ ਸਮਯੇਤਿ ਤਸ੍ਮਿਂ ਪਰਿਤ੍ਤਸਮਾਧਿਨੋ ਉਪ੍ਪਨ੍ਨਸਮਯੇ. ਦਿਬ੍ਬਚਕ੍ਖੁਪਿ ਪਰਿਤ੍ਤਕਂ ਹੋਤਿ ਪਰਿਤ੍ਤਰੂਪਗਤਦਸ੍ਸਨਤੋ.
੨੪੫. ਦੁਕਤਿਕਜ੍ਝਾਨਸਮਾਧਿਨ੍ਤਿ ਚਤੁਕ੍ਕਨਯੇ ਦੁਕਜ੍ਝਾਨਸਮਾਧਿਂ, ਪਞ੍ਚਕਨਯੇ ਤਿਕਜ੍ਝਾਨਸਮਾਧਿਨ੍ਤਿ ਯੋਜਨਾ. ਦੁਕਜ੍ਝਾਨਸਮਾਧਿਨ੍ਤਿ ਚਤੁਕ੍ਕਨਯੇ ਤਤਿਯਚਤੁਤ੍ਥਵਸੇਨ ਦੁਕਜ੍ਝਾਨਸਮਾਧਿਂ, ਪਞ੍ਚਕਨਯੇ ਚਤੁਤ੍ਥਪਞ੍ਚਮਵਸੇਨ ਦੁਕਜ੍ਝਾਨਸਮਾਧਿਂ. ਤਿਕਚਤੁਕ੍ਕਜ੍ਝਾਨਸਮਾਧਿਨ੍ਤਿ ਚਤੁਕ੍ਕਨਯੇ ਤਿਕਜ੍ਝਾਨਸਮਾਧਿਂ, ਪਞ੍ਚਕਨਯੇ ਚਤੁਕ੍ਕਜ੍ਝਾਨਸਮਾਧਿਨ੍ਤਿ ਯੋਜਨਾ.
ਤਿਵਿਧਨ੍ਤਿ ਸਪ੍ਪੀਤਿਕਵਸੇਨ ਤਿਪ੍ਪਕਾਰਂ ਸਮਾਧਿਂ. ਤਦਨ੍ਤੋਗਧਾਤਿ ਸਪ੍ਪੀਤਿਕਾਦਿਸਭਾਵਾ. ਕਾਮਂ ਭਗਵਾ ਪੁਰਿਮਯਾਮੇ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ, ਪਚ੍ਛਿਮਯਾਮੇ ਦਿਬ੍ਬਚਕ੍ਖੁਞਾਣਂ ਨਿਬ੍ਬਤ੍ਤੇਨ੍ਤੋਪਿ ਇਮਾਨਿ ਞਾਣਾਨਿ ਭਾਵੇਸਿਯੇਵ. ਵਿਪਸ੍ਸਨਾਪਾਦਕਾਨਿ ਪਨ ਞਾਣਾਨਿ ਸਨ੍ਧਾਯ, ‘‘ਪਚ੍ਛਿਮਯਾਮੇ’’ਤਿ ਵੁਤ੍ਤਂ, ਤੇਨਾਹ ‘‘ਭਗਵਤੋ ਹੀ’’ਤਿਆਦਿ. ਪਞ੍ਚਮਜ੍ਝਾਨਸ੍ਸਾਤਿ ਪਞ੍ਚਮਜ੍ਝਾਨਿਕਸ੍ਸ ਵਸੇਨ ਪਠਮਜ੍ਝਾਨਿਕੋ ਮਗ੍ਗੋ ਨਤ੍ਥਿ. ਸੋਤਿ ਪਞ੍ਚਕਨਯੋ ਭਗਵਤੋ ਲੋਕਿਯੋ ਅਹੋਸਿ. ਏਤਨ੍ਤਿ ਏਤਂ, ‘‘ਸਵਿਤਕ੍ਕਮ੍ਪਿ ਸਵਿਚਾਰਂ ਸਮਾਧਿਂ ਭਾਵੇਮੀ’’ਤਿਆਦਿਵਚਨਂ. ਲੋਕਿਯਲੋਕੁਤ੍ਤਰਮਿਸ੍ਸਕਂ ਸਨ੍ਧਾਯ ਵੁਤ੍ਤਂ, ਨ ‘‘ਲੋਕਿਯਂ ਵਾ ਲੋਕੁਤ੍ਤਰਮੇਵ ਵਾ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਉਪਕ੍ਕਿਲੇਸਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
੯. ਬਾਲਪਣ੍ਡਿਤਸੁਤ੍ਤਵਣ੍ਣਨਾ
੨੪੬. ਏਤੇਹੀਤਿ ਦੁਚਿਨ੍ਤਿਤਾਦੀਹਿ. ਏਤੇਨ ਲਕ੍ਖਣਸਦ੍ਦਸ੍ਸ ਕਰਣਤ੍ਥਤਮਾਹ. ਤਾਨੇਵਾਤਿ ਲਕ੍ਖਣਾਨਿ ਏਵ. ਤਸ੍ਸਾਤਿ ਬਾਲਸ੍ਸ. ‘‘ਅਯਂ ਬਾਲੋ’’ਤਿ ਨਿਮੀਯਤਿ ਸਞ੍ਚਾਨੀਯਤਿ ਏਤੇਹੀਤਿ ਬਾਲਨਿਮਿਤ੍ਤਾਨਿ. ਅਪਦਾਨਂ ਵੁਚ੍ਚਤਿ ਵਿਖ੍ਯਾਤਂ ਕਮ੍ਮਂ. ਦੁਚਿਨ੍ਤਿਤਾਦੀਨਿ ਚ ਬਾਲੇ ਵਿਖ੍ਯਾਤਾਨਿ, ਅਵਧਾਰਣਭਾਵੇ ਵਾ, ਤਸ੍ਮਾ ਬਾਲਸ੍ਸ ਅਪਦਾਨਾਨੀਤਿ ਬਾਲਾਪਦਾਨਾਨਿ. ਅਭਿਜ੍ਝਾਦੀਹਿ ਦੁਟ੍ਠਂ ਦੂਸਿਤਂ ਚਿਨ੍ਤੇਤੀਤਿ ਦੁਚਿਨ੍ਤਿਤਚਿਨ੍ਤੀ. ਲੋਭਾਦੀਹਿ ਦੁਟ੍ਠਂ ਭਾਸਿਤਂ ਮੁਸਾਵਾਦਾਦਿਂ ਭਾਸਤੀਤਿ ਦੁਬ੍ਭਾਸਿਤਭਾਸੀ. ਤੇਸਂ ਤੇਸਂਯੇਵ ਵਸੇਨ ਕਤ੍ਤਬ੍ਬਤੋ ਦੁਕ੍ਕਟਕਮ੍ਮਂ ਪਾਣਾਤਿਪਾਤਾਦਿਂ ਕਰੋਤੀਤਿ ਦੁਕ੍ਕਟਕਮ੍ਮਕਾਰੀ. ਤੇਨਾਹ ‘‘ਚਿਨ੍ਤਯਨ੍ਤੋ’’ਤਿਆਦਿ. ਤਾਨਿ ਉਪਨਿਸ੍ਸਾਯ ਜਾਤਨ੍ਤਿ ਤਜ੍ਜਂ. ਤਤੋ ਏਵ ਤੇਸਂ ਸਾਰੁਪ੍ਪਂ ਅਨੁਰੂਪਨ੍ਤਿ ਤਸ੍ਸਾਰੁਪ੍ਪਂ. ਤੇਨਾਹ ‘‘ਤਜ੍ਜਾਤਿਕ’’ਨ੍ਤਿਆਦਿ. ਕਚ੍ਛਮਾਨਾਯਾਤਿ ਕਥਿਯਮਾਨਾਯ.
੨੪੮. ਯਸ੍ਮਾ ਸਤ੍ਤਾਨਂ ਯਥੂਪਚਿਤਾਨਿ ਕਮ੍ਮਾਨਿ ਕਤੋਕਾਸਾਨਿ ਤਦੁਪਟ੍ਠਾਪਿਤਾਨਿ ਕਮ੍ਮਨਿਮਿਤ੍ਤਗਤਿਨਿਮਿਤ੍ਤਾਨਿ ਮਰਣਸ੍ਸ ਆਸਨ੍ਨਕਾਲੇ ਚਿਤ੍ਤਸ੍ਸ ਆਪਾਥਂ ਆਗਚ੍ਛਨ੍ਤਾਨਿ, ਤਦਾ ਓਲਮ੍ਬਨ੍ਤਾਨਿ ਵਿਯ ਅਭਿਭਵਨ੍ਤਾਨਿ ਵਿਯ ਅਜ੍ਝੋਤ੍ਥਰਨ੍ਤਾਨਿ ਵਿਯ ਉਪਟ੍ਠਹਨ੍ਤਿ, ਤਸ੍ਮਾ ਵੁਤ੍ਤਂ – ‘‘ਓਲਮ੍ਬਨਾਦਿਆਕਾਰੇਨ ਹਿ ਤਾਨਿ ਉਪਟ੍ਠਹਨ੍ਤੀ’’ਤਿ. ਉਪਟ੍ਠਾਨਾਕਾਰੋ ਏਵ ਤਦਾ ਚਿਤ੍ਤਸ੍ਸ ਗੋਚਰਭਾਵਂ ਗਚ੍ਛਤੀਤਿ ਆਹ – ‘‘ਤਸ੍ਮਿਂ ਉਪਟ੍ਠਾਨਾਕਾਰੇ ਆਪਾਥਗਤੇ’’ਤਿ.
੨੪੯. ਨ ਸਕ੍ਕਾਤਿ ਨ ਵਦਤੀਤਿ ਏਤੇਨ ਦ੍ਵੇਪਿ ਪਟਿਸੇਧਾ ਪਕਤਿਅਤ੍ਥਾਤਿ ਅਯਮਤ੍ਥੋ ਵੁਤ੍ਤੋ ਹੋਤਿ. ਨ ਸੁਕਰਾਤਿ ਪਨ ਇਮਿਨਾ ਦੁਕ੍ਕਰਭਾਵੋ ਦੀਪਿਤੋ, ਦੁਕ੍ਕਰਞ੍ਚ ਤਾਵ ਉਪਾਯੇਨ ਸਕ੍ਕਾ ਕਾਤੁਨ੍ਤਿ ਦਸ੍ਸੇਨ੍ਤੋ ਆਹ – ‘‘ਨ ਸੁਕਰਂ ਪਨਾ’’ਤਿਆਦਿ. ਤੇਨਾਤਿ ਵਿਨਿਵਿਜ੍ਝਿਤ੍ਵਾ ਗਮਨੇਨ ਅਞ੍ਞਮਞ੍ਞਂ ਸਂਵਿਜ੍ਝਨੇਨ. ਅਸ੍ਸਾਤਿ ਚੋਰਸ੍ਸ. ਇਤੋ ਉਤ੍ਤਰਿਪੀਤਿ ਮਜ੍ਝਨ੍ਹਿਕਸਮਯਂ ਸਾਯਨ੍ਹਸਮਯਞ੍ਚ ਸਤ੍ਤਿਸਤੇਨ.
੨੫੦. ਸਙ੍ਖਮ੍ਪਿ ਨ ਉਪੇਤੀਤਿ ਇਮਿਨਾ ਸਙ੍ਖਾਤਬ੍ਬਮਤ੍ਤਂ ਨਤ੍ਥੀਤਿ ਦੀਪਿਤਂ ਹੋਤੀਤਿ ਆਹ – ‘‘ਗਣਨਾਮਤ੍ਤਮ੍ਪਿ ਨ ਗਚ੍ਛਤੀ’’ਤਿ. ਉਪਨਿਕ੍ਖੇਪਨਮਤ੍ਤਮ੍ਪੀਤਿ ਏਤ੍ਥਾਪਿ ਏਸੇਵ ਨਯੋ. ਕਲਭਾਗਨ੍ਤਿ ਕਲਾਨਂ ਸਙ੍ਗਣਨਕੋਟ੍ਠਾਸਂ. ਤੇਨਾਹ ‘‘ਸਤਿਮਂ ਕਲ’’ਨ੍ਤਿਆਦਿ. ਓਲੋਕਿਤਮਤ੍ਤਮ੍ਪੀਤਿ ਉਪਨਿਕ੍ਖੇਪਨਵਸੇਨ ਓਲੋਕਨਮਤ੍ਤਕਮ੍ਪਿ. ਤਂ ਕਮ੍ਮਕਾਰਣਨ੍ਤਿ ਤਂ ਪਞ੍ਚਵਿਧਬਨ੍ਧਨਕਮ੍ਮਕਾਰਣਂ ਚਤੁਨ੍ਨਮ੍ਪਿ ਪਸ੍ਸਾਨਂ ਵਸੇਨ ਸਮ੍ਪਰਿਵਤ੍ਤੇਤ੍ਵਾ ਕਰੋਨ੍ਤਿਯੇਵ, ਪਾਲ਼ਿਯਂ ਪਨ ਏਕਪਸ੍ਸਵਸੇਨ ਆਗਤਾ. ਗੇਹਸ੍ਸਾਤਿ ਮਹਤੋ ਗੇਹਸ੍ਸ. ਸਬ੍ਬਤੋਤਿ ਸਬ੍ਬਾਵਯਵਤੋ. ਸਮ੍ਪਜ੍ਜਲਿਤੇ ਏਕਜਾਲੀਭੂਤੇ. ਸੁਪਕ੍ਕੁਥਿਤਾਯਾਤਿ ਸੁਟ੍ਠੁ ਨਿਪਕ੍ਕਾਯ.
ਵਿਭਤ੍ਤੋਤਿ ਤਤ੍ਥ ਨਿਬ੍ਬਤ੍ਤਕਸਤ੍ਤਾਨਂ ਸਾਧਾਰਣਕਮ੍ਮੁਨਾ ਵਿਭਤ੍ਤੋ ਵਿਯ ਨਿਬ੍ਬਤ੍ਤੋ. ਅਯੋਪਾਕਾਰੇਨ ਪਰਿਤੋ ਅਤ੍ਤੋ ਗਹਿਤੋਤਿ ਅਯੋਪਾਕਾਰਪਰਿਯਤ੍ਤੋ ਪਰਿਕ੍ਖਿਤ੍ਤੋ.
ਯਮਕਗੋਲ਼ਕਾਤਿ ਦਾਰਕਾਨਂ ਕੀਲ਼ਨਯੁਗਲ਼ਾ. ਏਵਮ੍ਪਿ ਦੁਕ੍ਖੋਤਿ ਯਥਾਵੁਤ੍ਤਉਸ੍ਸਦਨਿਰਯਵਸੇਨਪਿ ਸੋਤ-ਘਾਨ-ਜਿਵ੍ਹਾ-ਕਾਯ-ਮਨੋ-ਗੋਚਰਤਾਵਸੇਨਪਿ ਇਮਿਨਾ ਆਕਾਰੇਨ ਦੁਕ੍ਖੋਤਿ.
੨੫੧. ਦਨ੍ਤੇਹਿ ਉਲ੍ਲੇਹਿਤ੍ਵਾਤਿ ਉਤ੍ਤਰਦਨ੍ਤੇਹਿ ਅਞ੍ਛਿਤ੍ਵਾ. ਰਸਵਸੇਨ ਅਤਿਤ੍ਤੋ ਅਸ੍ਸਾਦੋ ਰਸਾਦੋ. ਤੇਨਾਹ ‘‘ਰਸਗੇਧੇਨ ਪਰਿਭੁਤ੍ਤਰਸੋ’’ਤਿ.
੨੫੨. ਦੁਰੂਪੋਤਿ ਵਿਰੂਪੋ. ਦੁਦ੍ਦਸੋਤਿ ਤੇਨੇਵ ਵਿਰੂਪਭਾਵੇਨ ਅਨਿਟ੍ਠਦਸ੍ਸਨੋ. ਲਕੁਣ੍ਠਕੋਤਿ ਰਸ੍ਸੋ. ਪਵਿਟ੍ਠਗੀਵੋਤਿ ਖਨ੍ਧਨ੍ਤਰਂ ਅਨੁਪਵਿਟ੍ਠਗੀਵੋ. ਮਹੋਦਰੋਤਿ ਵਿਪੁਲਕੁਚ੍ਛਿ. ਯੇਭੁਯ੍ਯੇਨ ਹਿ ਲਕੁਣ੍ਟਕਾ ਸਤ੍ਤਾ ਰਸ੍ਸਗੀਵਾ ਪੁਥੁਲਕੁਚ੍ਛਿਕਾਵ ਹੋਨ੍ਤੀਤਿ ਤਥਾ ਵੁਤ੍ਤਂ. ਕਾਣੋ ਨਾਮ ਚਕ੍ਖੁਵਿਕਲੋਤਿ ਵੁਤ੍ਤਂ – ‘‘ਏਕਕ੍ਖਿਕਾਣੋ ਵਾ ਉਭਯਕ੍ਖਿਕਾਣੋ ਵਾ’’ਤਿ. ਕੁਣੀਤਿ ਹਤ੍ਥਵਿਕਲੋ ਵੁਚ੍ਚਤੀਤਿ ਆਹ – ‘‘ਏਕਹਤ੍ਥਕੁਣੀ ਵਾ ਉਭਯਹਤ੍ਥਕੁਣੀ ਵਾ’’ਤਿ. ਵਾਤਾਦਿਨਾ ਉਪਹਤਕਾਯਪਕ੍ਖੋ ਇਧ ਪਕ੍ਖਹਤੋਤਿ ਅਧਿਪ੍ਪੇਤੋ, ਨ ਪਕ੍ਖਿਹਤੋਤਿ ਆਹ – ‘‘ਪਕ੍ਖਹਤੋਤਿ ਪੀਠਸਪ੍ਪੀ’’ਤਿ. ਦੁਕ੍ਖਾਨੁਪਬਨ੍ਧਦਸ੍ਸਨਤ੍ਥਨ੍ਤਿ ਅਪਰਾਪਰਜਾਤੀਸੁ ਵਿਪਾਕਦੁਕ੍ਖਸ੍ਸ ਅਨੁਪਬਨ੍ਧਵਸੇਨ ਪਵਤ੍ਤਿਦਸ੍ਸਨਤ੍ਥਂ.
ਕਲੀਯਤਿ ਖਲੀਯਤਿ ਅਪ੍ਪਹੀਯਤਿ ਸਾਸਨਂ ਏਤੇਨਾਤਿ ਕਲਿ, ਜੁਤਪਰਾਜਯੋ. ਸੋ ਏਵ ਗਹਸਦਿਸਤਾਯ ‘‘ਕਲਿਗ੍ਗਹੋ’’ਤਿ ਵੁਤ੍ਤੋ. ਅਧਿਬਨ੍ਧਨ੍ਤਿ ਕੁਟੁਮ੍ਬਸ੍ਸ ਅਧਿਵੁਤ੍ਥਸ੍ਸ ਮੂਲਭੂਤਸ੍ਸ ਅਤ੍ਤਨੋ ਬਨ੍ਧਿਤਬ੍ਬਤਂ. ਤੇਨਾਹ ‘‘ਅਤ੍ਤਨਾਪਿ ਬਨ੍ਧਂ ਨਿਗਚ੍ਛੇਯ੍ਯਾ’’ਤਿ. ਬਾਲਭੂਮਿਯਾ ਬਾਲਭਾਵਸ੍ਸ ਮਤ੍ਥਕਪ੍ਪਤ੍ਤਿ ਨਿਰਯਗਾਮਿਕਮ੍ਮਕਾਰਿਤਾਤਿ ‘‘ਨਿਰਯੇ ਨਿਬ੍ਬਤ੍ਤਤਿ’’ਚ੍ਚੇਵ ਵੁਤ੍ਤਂ. ਤਗ੍ਗਹਣੇਨੇਵ ਪਨ ਤਤੋ ਮੁਦੁਮੁਦੁਤਰਾਦਿਕਮ੍ਮਵਸੇਨ ਸੇਸਾਪਾਯੇਸੁ ਅਪਰਾਪਰਨਿਬ੍ਬਤ੍ਤਾਦਿਬਾਲਭੂਮਿ ਵਿਭਾਵਿਤਾ ਹੋਤੀਤਿ.
੨੫੩. ਵੁਤ੍ਤਾਨੁਸਾਰੇਨਾਤਿ ‘‘ਬਾਲੋ ਅਯ’’ਨ੍ਤਿਆਦਿਨਾ ਵੁਤ੍ਤਸ੍ਸ ਅਤ੍ਥਵਚਨਸ੍ਸ ‘‘ਪਣ੍ਡਿਤੋ ਅਯ’’ਨ੍ਤਿ ਏਤੇਹਿ ਲਕ੍ਖੀਯਤੀਤਿਆਦਿਨਾ ਅਨੁਸਾਰੇਨ. ਮਨੋਸੁਚਰਿਤਾਦੀਨਂ ਵਸੇਨਾਤਿ ਚਿਨ੍ਤੇਨ੍ਤੋ ਅਨਭਿਜ੍ਝਾ-ਅਬ੍ਯਾਪਾਦ-ਸਮ੍ਮਾਦਸ੍ਸਨਂ ਸੁਚਿਨ੍ਤਿਤਮੇਵ ਚਿਨ੍ਤੇਤੀਤਿਆਦਿਨਾ ਮਨੋਸੁਚਰਿਤਾਨਂ ਤਿਣ੍ਣਂ ਸੁਚਰਿਤਾਨਂ ਵਸੇਨ ਯੋਜੇਤਬ੍ਬਾਨਿ.
ਚਕ੍ਕਰਤਨਵਣ੍ਣਨਾ
੨੫੬. ਉਪੋਸਥਂ (ਦੀ. ਨਿ. ਟੀ. ੨.੨੪੩) ਵੁਚ੍ਚਤਿ ਅਟ੍ਠਙ੍ਗਸਮਨ੍ਨਾਗਤਂ ਸਬ੍ਬਦਿਵਸੇਸੁ ਗਹਟ੍ਠੇਹਿ ਰਕ੍ਖਿਤਬ੍ਬਸੀਲਂ, ਸਮਾਦਾਨਵਸੇਨ ਤਂ ਏਤਸ੍ਸ ਅਤ੍ਥੀਤਿ ਉਪੋਸਥਿਕੋ, ਤਸ੍ਸ. ਤੇਨਾਹ ‘‘ਸਮਾਦਿਨ੍ਨਉਪੋਸਥਙ੍ਗਸ੍ਸਾ’’ਤਿ. ਤਦਾਤਿ ਤਸ੍ਮਿਂ ਕਾਲੇ, ਯਸ੍ਮਿਂ ਪਨ ਕਾਲੇ ਚਕ੍ਕਵਤ੍ਤਿਭਾਵਸਂਵਤ੍ਤਨਿਯ-ਦਾਨ-ਸੀਲਾਦਿ-ਪੁਞ੍ਞਸਮ੍ਭਾਰਸਮੁਦਾਗਮਸਮ੍ਪਨ੍ਨੋ ਪੂਰਿਤਚਕ੍ਕਵਤ੍ਤਿਵਤ੍ਤੋ ਕਾਦੀਪਦੇਸਵਿਸੇਸਪਚ੍ਚਾਜਾਤਿਯਾ ਚੇਵ ਕੁਲਰੂਪਭੋਗਾਧਿਪਤੇਯ੍ਯਾਦਿਗੁਣਵਿਸੇਸਸਮ੍ਪਤ੍ਤਿਯਾ ਚ ਤਦਨੁਰੂਪੇ ਅਤ੍ਤਭਾਵੇ ਠਿਤੋ ਹੋਤਿ, ਤਸ੍ਮਿਂ ਕਾਲੇ. ਤਾਦਿਸੇ ਹਿ ਕਾਲੇ ਚਕ੍ਕਵਤ੍ਤਿਭਾਵੀ ਪੁਰਿਸੁਤ੍ਤਮੋ ਯਥਾਵੁਤ੍ਤਗੁਣਸਮਨ੍ਨਾਗਤੋ ਰਾਜਾ ਖਤ੍ਤਿਯੋ ਹੁਤ੍ਵਾ ਮੁਦ੍ਧਾਵਸਿਤ੍ਤੋ ਵਿਸੁਦ੍ਧਸੀਲੋ ਅਨੁਪੋਸਥਂ ਸਤਸਹਸ੍ਸਵਿਸ੍ਸਜ੍ਜਨਾਦਿਨਾ ਸਮ੍ਮਾਪਟਿਪਤ੍ਤਿਂ ਪਟਿਪਜ੍ਜਤਿ, ਨ ਯਦਾ ਚਕ੍ਕਰਤਨਂ ਉਪ੍ਪਜ੍ਜਤਿ, ਤਦਾ ਏਵ. ਤੇਨਾਹ – ‘‘ਪਾਤੋ…ਪੇ… ਧਮ੍ਮਤਾ’’ਤਿ. (ਤਤ੍ਥ ਦਮੋ ਇਨ੍ਦ੍ਰਿਯਸਂਵਰੋ, ਸਂਯਮੋ ਸੀਲਸਂਵਰੋ.)
ਵੁਤ੍ਤਪ੍ਪਕਾਰਪੁਞ੍ਞਕਮ੍ਮਪਚ੍ਚਯਨ੍ਤਿ ਚਕ੍ਕਵਤ੍ਤਿਭਾਵਾਵਹਦਾਨਦਮਸਂਯਮਾਦਿਪੁਞ੍ਞਕਮ੍ਮਹੇਤੁਕਂ. ਨੀਲਮਣਿਸਙ੍ਘਾਟਸਦਿਸਨ੍ਤਿ ਇਨ੍ਦਨੀਲਮਣਿਸਞ੍ਚਯਸਮਾਨਂ. ਦਿਬ੍ਬਾਨੁਭਾਵਯੁਤ੍ਤਤ੍ਤਾਤਿ ਦਸ੍ਸਨੀਯਤਾ ਮਨੁਞ੍ਞਘੋਸਤਾ ਆਕਾਸਗਾਮਿਤਾ ਓਭਾਸਵਿਸ੍ਸਜ੍ਜਨਾ ਅਪ੍ਪਟਿਘਾਤਤਾ ਰਞ੍ਞੋ ਇਚ੍ਛਿਤਤ੍ਥਨਿਪ੍ਫਤ੍ਤਿਕਾਰਣਤਾਤਿ ਏਵਮਾਦੀਹਿ ਦਿਬ੍ਬਸਦਿਸੇਹਿ ਆਨੁਭਾਵੇਹਿ ਸਮਨ੍ਨਾਗਤਤ੍ਤਾ. ਸਬ੍ਬੇਹਿ ਆਕਾਰੇਹੀਤਿ ਸਬ੍ਬੇਹਿ ਸੁਨ੍ਦਰੇਹਿ ਆਕਾਰੇਹਿ. ਪਰਿਪੂਰਨ੍ਤਿ ਪਰਿਪੁਣ੍ਣਂ. ਸਾ ਚਸ੍ਸ ਪਾਰਿਪੂਰਿ ਇਦਾਨੇਵ ਵਿਤ੍ਥਾਰੀਯਤਿ.
ਪਨਾਲ਼ੀਤਿ ਛਿਦ੍ਦਂ. ਸੁਦ੍ਧਸਿਨਿਦ੍ਧਦਨ੍ਤਪਨ੍ਤਿਯਾ ਨਿਬ੍ਬਿਵਰਾਯਾਤਿ ਅਧਿਪ੍ਪਾਯੋ. ਨਾਭਿਪਨਾਲ਼ਿ ਪਰਿਕ੍ਖੇਪਪਟ੍ਟੇਸੂਤਿ ਨਾਭਿਪਰਿਕ੍ਖੇਪਪਟ੍ਟੇ ਚੇਵ ਨਾਭਿਯਾ ਪਨਾਲ਼ਿਪਰਿਕ੍ਖੇਪਪਟ੍ਟੇ ਚ. ਸੁਵਿਭਤ੍ਤਾਵਾਤਿ ਅਞ੍ਞਮਞ੍ਞਂ ਅਸਂਕਿਣ੍ਣਤ੍ਤਾ ਸੁਟ੍ਠੁ ਵਿਭਤ੍ਤਾ. ਪਰਿਚ੍ਛੇਦਲੇਖਨ੍ਤਰੇਸੁ ਮਣਿਕਾ ਸੁਵਿਭਤ੍ਤਾ ਹੁਤ੍ਵਾ ਪਞ੍ਞਾਯਨ੍ਤੀਤਿ ਵਦਨ੍ਤਿ.
ਪਰਿਚ੍ਛੇਦਲੇਖਾਦੀਨੀਤਿ ਆਦਿ-ਸਦ੍ਦੇਨ ਮਾਲਾਕਮ੍ਮਾਦਿਂ ਸਙ੍ਗਣ੍ਹਾਤਿ. ਸੁਰਤ੍ਤਾਤਿਆਦੀਸੁ ਸੁਰਤ੍ਤਗ੍ਗਹਣੇਨ ਮਹਾਨਾਮਵਣ੍ਣਤਂ ਪਟਿਕ੍ਖਿਪਤਿ, ਸੁਦ੍ਧਗ੍ਗਹਣੇਨ ਸਂਕਿਲਿਟ੍ਠਤਂ, ਸਿਨਿਦ੍ਧਗ੍ਗਹਣੇਨ ਲੂਖਤਂ. ਕਾਮਂ ਤਸ੍ਸ ਚਕ੍ਕਰਤਨਸ੍ਸ ਨੇਮਿਮਣ੍ਡਲਂ ਅਸਨ੍ਧਿਕਂਵ ਨਿਬ੍ਬਤ੍ਤਂ, ਸਬ੍ਬਤ੍ਥਕਮੇਵ ਪਨ ਕੇਵਲਂ ਪਵਾਲ਼ਵਣ੍ਣੋਵ ਨ ਸੋਭਤੀਤਿ ਪਕਤਿਚਕ੍ਕਸ੍ਸ ਸਨ੍ਧਿਯੁਤ੍ਤੇਸੁ ਠਾਨੇਸੁ ਰਤ੍ਤਜਮ੍ਬੁਨਦਪਰਿਕ੍ਖਤਂ ਅਹੋਸਿ, ਤਂ ਸਨ੍ਧਾਯ ਵੁਤ੍ਤਂ ‘‘ਸਨ੍ਧੀਸੁ ਪਨਸ੍ਸਾ’’ਤਿਆਦਿ.
ਨੇਮਿਮਣ੍ਡਲਪਿਟ੍ਠਿਯਨ੍ਤਿ ਨੇਮਿਮਣ੍ਡਲਸ੍ਸ ਪਿਟ੍ਠਿਪਦੇਸੇ. ਦਸਨ੍ਨਂ ਦਸਨ੍ਨਂ ਅਰਾਨਮਨ੍ਤਰੇਤਿ ਦਸਨ੍ਨਂ ਦਸਨ੍ਨਂ ਅਰਾਨਂ ਅਨ੍ਤਰਸਮੀਪੇ ਪਦੇਸੇ. ਛਿਦ੍ਦਮਣ੍ਡਲਚਿਤ੍ਤੋਤਿ ਮਣ੍ਡਲਸਣ੍ਠਾਨਛਿਦ੍ਦਵਿਚਿਤ੍ਤੋ. ਸੁਕੁਸਲਸਮਨ੍ਨਾਹਤਸ੍ਸਾਤਿ ਸੁਟ੍ਠੁ ਕੁਸਲੇਨ ਸਿਪ੍ਪਿਨਾ ਪਹਤਸ੍ਸ, ਵਾਦਿਤਸ੍ਸਾਤਿ ਅਤ੍ਥੋ. ਵਗ੍ਗੂਤਿ ਮਨੋਰਮੋ ਰਜਨੀਯੋਤਿ ਸੁਣਨ੍ਤਾਨਂ ਰਾਗੁਪ੍ਪਾਦਕੋ. ਕਮਨੀਯੋਤਿ ਕਨ੍ਤੋ. ਸਮੋਸਰਿਤਕੁਸੁਮਦਾਮਾਤਿ ਓਲਮ੍ਬਿਤਸੁਗਨ੍ਧਕੁਸੁਮਦਾਮਾ. ਨੇਮਿਪਰਿਕ੍ਖੇਪਸ੍ਸਾਤਿ ਨੇਮਿਪਰਿਯਨ੍ਤਪਰਿਕ੍ਖੇਪਸ੍ਸ. ਨਾਭਿਪਨਾਲ਼ਿਯਾ ਦ੍ਵਿਨ੍ਨਂ ਪਸ੍ਸਾਨਂ ਵਸੇਨ ‘‘ਦ੍ਵਿਨ੍ਨਮ੍ਪਿ ਨਾਭਿਪਨਾਲ਼ੀਨ’’ਨ੍ਤਿ ਵੁਤ੍ਤਂ. ਏਕਾ ਏਵ ਹਿ ਸਾ ਪਨਾਲ਼ਿ. ਯੇਹੀਤਿ ਯੇਹਿ ਦ੍ਵੀਹਿ ਸੀਹਮੁਖੇਹਿ. ਪੁਨ ਯੇਹੀਤਿ ਮੁਤ੍ਤਾਕਲਾਪੇਹਿ.
ਓਧਾਪਯਮਾਨਨ੍ਤਿ ਸੋਤੁਂ ਅਵਹਿਤਾਨਿ ਕੁਰੁਮਾਨਂ. ਚਨ੍ਦੋ ਪੁਰਤੋ, ਚਕ੍ਕਰਤਨਂ ਪਚ੍ਛਾਤਿ ਏਵਂ ਪੁਬ੍ਬਾਪਰਿਯੇਨ ਪੁਬ੍ਬਾਪਰਭਾਗੇਨ.
ਅਨ੍ਤੇ ਪੁਰਸ੍ਸਾਤਿ ਅਨੁਰਾਧਪੁਰੇ ਰਞ੍ਞੋ ਅਨ੍ਤੇਪੁਰਸ੍ਸ ਉਤ੍ਤਰਸੀਹਪਞ੍ਜਰਆਸਨ੍ਨੇ ਤਦਾ ਰਞ੍ਞੋ ਪਾਸਾਦੇ ਤਾਦਿਸਸ੍ਸ ਉਤ੍ਤਰਦਿਸਾਯ ਸੀਹਪਞ੍ਜਰਸ੍ਸ ਲਬ੍ਭਮਾਨਤ੍ਤਾ ਵੁਤ੍ਤਂ. ਸੁਖੇਨ ਸਕ੍ਕਾਤਿ ਕਿਞ੍ਚਿ ਅਨਾਰੁਹਿਤ੍ਵਾ ਸਰੀਰਞ੍ਚ ਅਨੁਲ੍ਲਙ੍ਘਿਤ੍ਵਾ ਯਥਾਠਿਤੇਨੇਵ ਹਤ੍ਥੇਨ ਪੁਪ੍ਫਮੁਟ੍ਠਿਯੋ ਖਿਪਿਤ੍ਵਾ ਸੁਖੇਨ ਸਕ੍ਕਾ ਹੋਤਿ ਪੂਜੇਤੁਂ.
ਨਾਨਾਵਿਰਾਗਰਤਨਪ੍ਪਭਾਸਮੁਜ੍ਜਲਨ੍ਤਿ ਨਾਨਾਵਿਧਚਿਤ੍ਤਵਣ੍ਣਰਤਨੋਭਾਸਪਭਸ੍ਸਰਂ. ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਪਵਤ੍ਤੇਤਿ. ਆਗਨ੍ਤ੍ਵਾ ਠਿਤਟ੍ਠਾਨਤੋ ਉਪਰਿ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਪਵਤ੍ਤੇ.
ਸਨ੍ਨਿਵੇਸਕ੍ਖਮੋਤਿ ਖਨ੍ਧਵਾਰਸਨ੍ਨਿਵੇਸਯੋਗ੍ਯੋ. ਸੁਲਭਾਹਾਰੂਪਕਰਣੋਤਿ ਸੁਖੇਨੇਵ ਲਦ੍ਧਬ੍ਬਧਞ੍ਞਗੋਰਸਦਾਰੁਤਿਣਾਦਿਭੋਜਨਸਾਧਨੋ. ਪਰਚਕ੍ਕਨ੍ਤਿ ਪਰਸ੍ਸ ਰਞ੍ਞੋ ਸੇਨਾ, ਆਣਾ ਵਾ.